Sunday, May 27, 2007

تابع السابع


يا أرضنا العطشااااانة نرويها بدماااااانا..#@#*# شقااااانا..تصبح بالخير ماليانة

لقيت نفسي اليوم الموعود بادندن الأغنية الرومانسية دي في دماغي..هي أغنية رومانسية و حنونة جدا بس اللي ضايقني إني ناسية كلماتها.و ده خلاني أتشائم..حاولت أدور جوه مخي على مطلع أغنية تانية رومانسية من بتوع مطربتي المفضلة الساحرة الرقيقة شفيقة..ما أسعفتنيش الذاكرة
المهم في الآخر استقرت في خلايا المخ الرمادية بتاعتي أغنية رومانسية رقيقة

دقيقةحداد..دقيقة حداد..دقيقة حداااااااد

ارتحت للريتم الشجي ده و ابتديت أستعد لليوم الموعود
خرجت هدومي كلها من الدولاب و بدأت أدور على حاجة ألبسها

أنا مش منافقة..لايمممممممممكن أغير نظامي عشان خاطر حد..ده يبقى اسمه غش تدليس نفاق كذب..بس يعععععني.مش هنخسر حاجة لو وقفنا على أرض محايدة ..شديييت الطقم الأحمر..إخصصص أحمر و العياذ بالله لالالا..و بعدين لحسن يطلع زمالكاوي زي البيه الأولاني و بعدين دول بدأوا يكتروا في البلد اليومين دول

طب الطقم الفوشيا...لا والا فوشية ايه ..ده اسمه لوحده ممكن يخليه يقيم عليا الحد

طب نخليه الأصفر..لالالا..لون خليع الأصفر ده..بلاشه
و فضلت أطلع لون ورا لون و طقم ورا طقم بس مارتحتش نفسيا لأي حاجة منهم

آآآآه..و أخيرا..لقيت في أرضية الدولاب حاجة كده بيضه منفوشة..آآه..دي يا إما النموسية بتاعة جدتي يا إما الباراشوت اللي عمي نط بيه في حرب أكتوبر..مين اللي بيقول ماكانش فيه باراشوتات في حرب أكتوبر؟..انتوا هتفهموا أكتر من عمي؟..هو بنفسه أكدلي انه نزل بالباراشوت في سينا في 6 أكتوبر 74 و مادام قاللي كده يبقى لازم أصدقه أمال هيشتغلني يعني؟..مرت عليا لحظة من الفخر بعمي و بطولاته اللي واحدة منهم اتعملت فيديو جيم بيلعب بيها بابا وأونكل ديسكو كل أسبوع..و قررت اني بشوية دبابيس على حبة غرز هيكون ده هو الزي المناسب اللي أدخل بيه ع العريس المنتظر أبيض في أبيض..لون حيادي و بعيدن فيه فرصة كبيرة ان الموضوع يمشي لأن الباراشوت ده زي ماعمي قاللي جالب للحظ و اللي يلبسه لا يمكن يجراله حاجه وحشة زي ماحصله و هو نازل ع الحدود و 4 اسرائيلين كانوا بينشنوا عليه و قعد يرقص في الرصاص يرقص في الرصاص و نزل سالم غانم فوق السطوح

مديت إيدي على علبة الماكياج و بعدين سحبتها أسرع ماباسحب المرتب من إيد الأستاذ رزق أول كل شهر..و قررت أعمل بنصيحة أماني و ماحطش ماكياج .. ده قرار صعب جدا لواحدة زيي لا يمكن تخرج من أوضتها من غيرالتظبيط اليومي
زي ماقلت أنا لا يممممممممكن أغير نظامي..بس يعععععني يوم واحد من غير ماكياج على الأقل هيريح بشرتي شوية
خرجت من أوضتي عشان أبدأ في موال التنضيف بتاع كل مرة..و في نص الصالة لقيت بابا اللي كان شايل في ايده كباية شاي و جرنال

صباح الخير
صباح النور
فيه حاجة جديدة في الجرايد؟
أكيد فيه..انتي مستنية حد؟
لأ عادي
أمال رايحة فين ؟
رايحة أنضف مع ماما
إيه ده هي مامتك هناكمان؟
أمال هتروح فين؟
و ناويين تقعدوا معانا كتير
بابا..فيه ايه؟..دي مبادئ الزهايمر والا ايه؟
بابا..بابا مين؟
و قربلي و دقق قوي في وشي
انتي مين؟
بابا..انا برايد..مش عارفني
برايد؟..برايد؟..آآه برايد..ايه اللي انتي عاملاه في نفسك ده؟..انتي حاطه ماكياج والا ايه؟..شكلك غريب قوي
آه معلش أصلي باجرب نوع جديد


الحمدلله ان العريس ده ماشافنيش قبل كده ربنا بس يستر و أماني و فوفو مايفتحوش بقهم

و بعد كورس التنضيف و تظبيط الباراشوت البطولي على مقاسي مع ترك خطوطه الأساسية ووسعه زي ماهو..ضرب جرس الباب..بابا فتح الباب و لقا قدامه شخصين مايعرفهومش
بعد شوية مقاومة و انكار و محاولات إقناع ..اقتنع بابا أخيرا ان دول اماني و فوفو و هز راسه و هو بيقول
مش عارف الناس شكلها بيتغير كده ليه؟..انا لازم أغير النضارة

دخلت الصالون معايا صينية الجاتوه المعتاده و قعدت أبص ع اللي قاعدين

اماني و فوفو دول؟..غالبا آه أنا عرفتهم من الهدوم هما كانوا مستغربين شكلي بس مش أد استغرابي لشكلهم و خصوصا فوفو
يا حلاوة..ده طلع شبه الرجالة أهه ده حتى فيه مبادئ شنب يحاول جاهدا إثبات ذاته..لكنه للأسف الشنب المناسب في المكان غير المناسب..و بين فوفو و أماني لمحت هند الصغيرة بتنقل عينيها في رعب بين مامتها و باباها بنظرة عجيبة كأنها طائر من طيور البطريق نام في القطب الشمالي و صحي لقه نفسه في بنها.مسكينة البنت أكيد جاتلها صدمة عصبية و تلاقيها فاكرة انها مخطوفة..صعبت عليا المضروبة

مش وقته يا بربر..خلينا في المهم وطيت راسي و بصيت في الأرض..و هي الحركة اللي بقالي 3 ساعات باتدرب عليها.انا عمري ماوطيت راسي لحد ..أولا لأني..عمري مادخل قسم ..ثانيا لأني أحب أبص في عين اللي قدامي وانا باكلمه..أنا ماباغيرش نظامي.. بس يععععني كان نفسي من زمان أدقق في لون السجادة بتاعنا

طب و الله سجادة حلوة ياجماعة فيها أزرق و أحمر و..ص.ب.48...لأ ده مش عنوانا البريدي مكتوب على السجادة ..ده اللي العريس كان لابسه في رجله..صندل بني شكله مقاس 48..آآآآه..جاتلي قفلة في النفسية متمركزه في العمق العاطفي...صندل يا برايد؟..هي حصلت؟..تتجوزي واحد لابس صندل..بس لأ..مش حنهبكها بأه..أنا في المرحلة دي مستعدة أتجوز أي كائن متعدد الخلايا مادام هينشلني من فترينة الجواز..مش مششششكلة الصندل ..نبقى نغيرهوله مش مشكلة هما صحيح بيقولوا الراجل بيبان من جزمته ..لكن ده طبعا كله كلام قديم وأنا لايمكن أعمله اعتبار خصوصا في هذه المرحله الإنتقالية الحرجة..طلعت بنظري لفوق لفوق لفوق..كويس لابس بدلة و كرافته..بس فين راسه؟؟؟؟..راسه فين؟؟..انا مممكن اتغاضى عن أشياء كتير..لكن ياربي أتجوز عريس من غير راس.قعدت أدقق قوي أدقق قوي و فجأه لمحت حاجة بتلعب كده...ياسلااام دي عنين شخص...آه و الله عنين شخص بتلعب أهه؟..بس فين بقيت الأجزاء..الفم و المناخير مش شايفاهم...دماغ العريس كانت عبارة عن كورة كبيرة من الشعر طالعلها عينين..شعره بحواجبه بدقنه بشنبه كلها عبارة عن شريط واحد سميك من الشعر ملفوف باحكام عجيب حوالين دماغه..يفكرك بالإنسان البدائي اللي كانوا بيدرسهولنا في التاريخ..لدرجة اني تخيلت انه هيقوم يشدني من شعري و يسحبني منه وراه ع الكهف...بسسسسس يا برايد..اهمدي و اتهدي..دقن ايه و شنب ايه اللي هيبوظوا جوازه؟..اعقلي كده وارسي و بعدين و مالوا يعني الشعر الغزيرمش أحسن من العكس؟..بس بس ماتبقيش خايبة مانتي قدامك أماني أهه مثل عظيم عن التنازل عن كل حاجة من اجل تكوين شركة لتربية العيال..هي دي قمة التضحية من أجل الأجيال القادمة

على جانبي العريس لقيته جايب اتنين من اخواته واحده منشكحة ع الآخر صفين اسنان طالعلهم واحده ست و التانية واضح انها جاية غصب عاها..بتبصلي بغل كأني لسه مسلماها فاتورة التليفون..آآآه أنا عارفة النوعية دي..يا إما لسه ماتجوزتش و شايفه ان أي جوازة بتحصل على وجه الخليقة إهانة شخصية في حقها-بتفكرني بحد بس مش مركزة مين- يا إما متجوزة جوازة تعيسة و مستخسره أخوها الحيلة في أي واحدة يسعدها
أنا مالي و مالها..دع الخلق للخالق..أنا لا يمممكن أسمح لأي حاجة تبوظ الجوازة دي..كفاية بأه

العريس ابتدى يتكلم من مكان ما في منتصف نص وشه اللي تحت

بص يا عمي..احنا ناس نحب ندخل البيوت من أبوابها ..و احنا سمعنا كلام كتير كويس عنكم من الأستاذ عبد الفتاح
من مين؟
الأستاذ عبد الفتاح
مين الأستاذ عبد الفتاح
ده
و شاور على فوفو اللي للحظة بص وراه
مين ؟آه..أنا..أنا
أحنا طبعا مانعرفوش بطريقة مباشرة لكن الأخ عماد صديقه يبقى ابن عمي و سمعه بيشكر فيكوا جدا..و انا عن نفسي مستعد لكل طلباتكم ان شاء الله

ماما اتدخلت
على طول كده..مش الأول تقعد معاها و تعرفها
إييييييييه؟
ده الثنائي المرح بيصرخ في صوت واحد و هما بيخبطوا على قفصهم الصدري اللي قرب يتكسر
أ..أ..أنا قصدي يعني عشان التعارف وكده

يا حاجة احنا مانعرفش الحاجات دي احنا اهم حاجة عندنا الأصل

اتكيفت انا من الكلمتين دول..من غير قعاد بأه و كلام مالوش لازمة و بص تاني في الأرض لما رقبتي هتتكسر
عمياني كده ..يمكن هو ده اللي يجيب فايده

أيوه بس الأول نتعرف أكتر على شخصية حضرتك..يعني احنا مش من الناس اللي بتحب التزمت قوي
و مين يحبه؟
يعني من ناحية شغلها
دي مهنة سامية مافيهاش أي مشكلة
(والا كنت اعرف)
زيارتها لأهلها
طبعا دي صلة رحم
خروج وفسح
طبعا أنا عن نفسي أحب الخروج طالما في اماكن محترمة
التلفزيون و النت
طالما أنا واثق في عقلها اللي سمعت عنه كتير يبقى أكيد هاثق في اختياراتها
( ايه الحلاوة دي ..ده عريس فول أوبشان يا جدعان)
طب و بالنسبة يعني للماديات
أنا و الحمدلله عندي شقة كبيرة 4 أوض وريسيبشان كبير و جاهزة من كل شئ
ده شئ كويس جدا..يعني ان شاء الله لو فيه قبول.. يعني حاجات بسيطة بس اللي هتتشرى
لا لا القبول مضون ان شاء الله
(ياواد يا ثقة)
و ان شاء الله مافيش أي شئ هنحتاج نشتريه
أيوة بس يعني العفش و الأجهزة
لااااا..و لا حتى دول..الشقة فيها كل شئ

ماخلاص بأه يا أم برايد..الأستاذ واضح انه شاري كل حاجة جديد في جديد ..هنطلب ايه أكتر من كده..بعد القبول ان شاء الله
لا لا..القبول مضمون ان شاء الله
(ثقة لا تزعزع)
و الأجهزة مش جديدة قوي يعني

ماما ابتدت تزوم

آه عادي ..يعني عازب بأه و كده و استعمل حاجات بسيطة استعمال بسيط
لا ..الحقيقة المسأله مش كده
أمال ايه يعني..انت شاري كل حاجة مستعمله
لا لا ..حاشى الله..انا برضه اعمل في بنات الناس كده؟
أمال ايه يعني الموضوع
في اللحظة دي سمعنا صوت انذار عربية
دي تقريبا عربيتي ممكن أطلع البلكونة أطفي الإنذار
آه طبعا اتفضل

و طلع العريس و معاه بابا وراه جري فوفو و أماني جريين وراهم هند عايزين يطقسوا و يشوفوا نوع العربية ماما قامت تجيب حاجة ساقعة و فضلت أنا و الأختين الحلوين في الصالون لوحدنا

و فجأه أخته اللي كانت منشكحة قوي دي ابتسامتها راحت في لمح البصر و بصتلي نفس البصة بتاع أختها التانيه..انا كشيت في مكاني و ارتعدت فرائصي-الجماعة بتوع النحوي لو سمحتوا يبقوا يقولولي فرائصي دي اللي هي ايه- قاموا الأتنين و جم نحيتي

يا ماماااااا..قاموا قعدوا جنبي زي أسدين قصر النيل واحدة ع اليمين و التانية ع الشمال وكل واحدة استلمتلها ودن و وطت على ودني عشان تقرمها

لأ لأ ماعضونيش بس همسو في ودني بصوت واطيييييي
بلاش الجوازة دي أحسن لك
مش هاترتاحي إحنا عايزين مصلحتك
تيبه مش زي تيبك و مش هتتفقوا
ده غير ان احنا لا يمكن نسمحله يتجوز دكتورة
انتي عايزة تيجي تعمليلنا فيها بنت بارم ديله
بص أنا بابايا مالوش ديل
هش..وطي صوتك
مخك في راسك تعرفي خلاصك
في اللحظة دي دخلوا الباقيين و انقلب الهمس لأحضان و بوس
يا حبيبتش أنا حبيتك قوي
و الله دانتي هتبقي عروسة تجنن
داحنا هنشيلك على كفوف الراحة

الكلمة الأخرانية دي ماعجبيتش ماما اللي كانت شايفاني باستغيث بيها عن طريق التخاطر العقلي الأثيري

ايه ده ؟..هو انت شقة حضرتك في بيت العيلة؟
لا لا لا..أنا شقتي بعيدة عن بيت العيلة انا عارف الموضوع ده حساس لناس كتير
يا أم برايد و ايه يعني حتى لو في بيت العيلة..ده الراجل شكله من عيلة محترمة و أصل طيب حتى باين ع الآنسات
آنسات..آنسات مين دي كل واحده فيهم عندها 3 عيال
آه انا آسف ياسيدي قصدي المدامات
ان شاء الله مع الأيام نتعرف بيهم والا ايه؟
طبعا ماحنا لازم نتعرف مش احنا و بنتكوا هنعيش في شقة واحدة
نعمممممممم..ازاي يعني..انت مش قلت شقتك بعيد عن بيت العيلة..أمال ازاي اخواتك يعيشوا معاك
انتوا فاكرين دول إخواتي؟
أمال ؟
لااااااا..دي تهاني مراتي الأولانية..و دي أمل مراتي التانية أنا ماشي حسب الشرع لا يمممكن أتجوز واحدة غير لما يكونوا اللي قبلها موافقين عليها..أماااال كله حسب الشرع

عارفين شعور تايتانك لما خبطت في جبل الجليد..لأ طبعا ماتعرفوش و هي تايتانك كان ليها شعور؟..بس يعني تخيلوا حاجة زي كده

حتى ماقدرناش نزعق ولا نعترض ولا ندألج حد من ع السلم
امشي يابني ..امشي ..روح في حالك .. احنا ماعندناش بنات للجواز

يعني مافيش جواز؟
لأ
و النبي صحيح
قلت لك مافيش
لولولولولولولولولولولولولولولي
لولولولولولولولولولولولولولولي

و دي كانت أول مرة تدوي فيها الزغاريط في صالوننا المتواضع


و العاقبة عندكم في المسرات

Tuesday, May 15, 2007

السابع

أسوأ جزء من أجزاء يومي..لأ ..من أسوأ الأجزاء-لأن المنافسة مشتعلة و مش قادرة احدد أي جزء أسوأ من التاني- المهم و بفارق ضئيل يتصدر القائمة ...رحلتي من باب الشقة الى بوابة العمارة .و بالعكس
لأني في الرحلة اليومية دي غالبا بقابل كل فرد من أفراد جيراني الأعزاء
الجيران عموما ممكن يشكلوا جزء كبير من حياتك و ممكن يكونوا مالهمش أي أهمية



أنا بأه جيراني من النوع ..العشري..الحنين..المهتم..المواسي..باختصار يعني..ناس لا تطاق
..


بيحبوا يعرفوا و يتدخلوا في كل تفاصيل حياتي و بيحققولي توازن كبير في حياتي اليومية-ايه ده مين اللي فتح التلفيزيون؟-لأن مافيش انسان طبيعي بيعيش حياته في حالة مستمرة من التفاؤل و السرور-ايه؟..أيوة أنا متفاءلة ..فيه حاجة؟- لازم يبقى فيه جزء كده نكد مطعم بحرق الدم و لازم يبقى فيه نص كباية فاضي يوازن نص الكباية المليان و الا الكباية ممكن تتدلق عليك وتغرقك و الناس تفتكرك عملت...والا بلاش..نرجع لموضوعنا



الرحلة اللي ممكن تستغرق دقيقة واحدة من باب الشقة للسلم ممكن تمتد كل يوم لحد ربع ساعة كاملة..و تمر الدقايق ببطء و أحس ان فيه حاجة تقيلة كابسة على مراوحي و مش قادرة أتنفس زي ماكون باتفرج على معتز الدمرداش والا تامر أمين...الستات يوقفوني و يفضلوا يبوسوا فيا و يمصمصوا شفايفهم


ربنا يعدلهالك يا حبيبتشي
معلش مابيقعدش غير بنات الناس
هو انتي لسه
لسه برضه
مافيش أخبار؟
لسه؟
لسه؟



طبعا مفهوم ان أكتر 3 حروف باكرههم في اللغة العربية- اللي مش فاكرة فيها كام حرف- هما اللام و السين و الهاء


الرجالة بأه بيصمموا يوقفوني و يدععععوا ..و انا أأمن...و يدعععععوا..و انا أأمن



يارب يرزقك بالزوج الصالح
آآآآآآمييييين
يارب يفرح أهلك بيكي
آآآآآآآآميييييييييين
يارب تلاقيلنا للواد علبتين لبن من المدعم
منننننيييييين؟؟



أسوأ أيام حياتي بأه هو يوم مابقابل أماني..فاكرينها؟..أفكركوا..أماني اللي هي أصغر مني ب 3سنين و اللي تبقى أم هند اللي عندها 6 سنيت..أيوة أيوة ..اتجوزت و هي عندها 19 سنة..و انا كنت عمالة أضضضضحك عليها و أقول عبيطة دي والا ايه؟..تفهم ايه دي في جواز والا مسؤولية في السن ده و الا حتى تعرف تختار ازاي...و مرت الأيام و ثبتت الحكمة اللي بتقول..لولاك يا لساني مانسكيت يا قفايا..مش انا اللي باقول ..دي طنط مامة أماني كانت بتقوله مرة وانا نازلة من ع السلم ..بتتشفى فيا عشان قلت لأ على أخو جوز أماني و بعبعت كده يعني بكلمتين مالهومش لازمة عن الإختيار الصحيح و السن المناسب و الكلام الفارغ ده..و دارت الأيام و الشهور و السنين و ثبت بالدليل القاطع ان كلامي يصنف تحت فئة الخيال العلمي و أماني أهيه عندها هند و في بطنها مؤمن متوقع وصوله بين أي لحظة و التانية


و عشان الأمور تبقى واضحة أكتر لازم تفهموا ان اماني و جوزها الأستاذ فوفو"تقريبا اسمه عبد الفتاح" يعتبروا فولة و انقسمت نصين و لو معيار التوافق من 1 لـ10 دول ياخدوا 12و نص..مشكلة حياتهم بس هي الخناقة على المصروف ..مصروف البيت. مصروف مدرسة البنت. مصروف الماكياج-مصروف لماكياجه و مصروف لماكياجها-بالنسبة لشخصياتهم فهي واضحة جدا..هيا عاملة زي الربع جنيه المخروم بتلمع لكن فاضية من جوة..و هو عامل زي العشرة صاغ الورق..,موجود آه بس زي قلته و ماحادش بيديله أي أهميه


يوميها لسه بانزل على طراطيف صوابعي عشان ماحدش يحس بيا و هوووب ..اتفتح باب شقتهم و عقلي قاللي يا بتت اركبي الدرابزين و اعملي "سكي" لغاية البوابة..بس ..لأ..لأ..لأ..أنا دكتورة محترمة و لو حد شافني أعمل ايه ان شاء الله..المهم حصل اللي كنت خايفة منه و لقيت أماني جره في ايدها هند و قدامها بطنها فيها مؤمن واضح انه نايم جوه باطنها على ضهرة و حاطت رجل على رجل لأن بطنها كانت واخده شكل شبه المنحرف


امشي يا بنت بأه جننتيني..هلاقيها منك والا من اخوكي..الله برايد ازيك يا حبيبتي
أهلا يا أماني عاملة ايه
البنت مجنناني و الواد محجر و مش راضي ينزل..على سيرة التحجير..مافيش عندك أخبار جديدة؟
بلعت الإهانة بمزاجي..ماعنديش وقت أخش في حوارات
ربنا يسهل يا أماني..عن إذنك
استني بس..ماهو لو ماكنتيش نشفتي راسك و كنت وافقتي على أخو فوفو..مش كان زمانك زيي كده دلوقت
نصيب يا اماني بأه ..هنعمل ايه؟
على رأيك خيرها في غيرها فوفو لسه مكلمني على واحد انما ايه..زي مانتي عايزاه بالظبط
ماظنش
يا بنتي بس خليكي متفاءلة..ده ايه أخلاق و دين و مابيفوتش فرض..هو فوفو ماكانش موافق في الأول عشان موضوع زمان..بس أنا ضغطت عليه
بصيت لمنظرها
..ضغطتي عليه؟ و لسه عايش
ههههههه..يوه يا برايد دمك خفيف يا مضروبة..ايه رأيك الخميس كويس ؟..كويس أنا هاجيبه هو و العيلة ..و انتي ابقي البسي حاجة حلوة كده و بلاش مكياج..أنا قلت لك ده متدين
ياريت برضه لو انتي و الأستاذ فوفو جايين انتوا الإتنين كمان تخللوا بالكوا من موضوع الماكياج ده
هه؟..ماشي ماشي..بس باقوك ايه ماشي أمورك بأي يا حبيبتي مش عايزين حد يشمت فيكي أكتر من كده
أكتر من ايه؟
ماتشغليش بالك..ههههه..الناس مابترحامش
على سيرة الناس اللي مابترحمش ..ازي مامتك؟
هه؟..حلوة حلوة..بتسلم عليكي
الله بيسلمها و يديها على أد نيتها
ان شاء الله..وربنا يقدملك الخير يا حبيبتي..باقوللك ايه شيليلي بأه البنت لحد البوابة
آآآه..هانبتدي حاجة قصاد حاجة
حاضضضضر..يا أماني..و ماتنسيش تبقي تسلميلي ع الأستاذ فوفو..و تقولي لأخوة ياريت مايبقاش لسه زعلان
لولو؟..ده لولو ده عسل و قلبه أبيييض مابيشلش جوه قلبه خالص
ده انتي لو كنت اتجوزتيه كان زمانك عايشة في سعادة مابعدها سعادة
و هو صحيح عمل ايه في قضية الشيكات بتاعته؟
خير ان شاء الله
و محضر السكر؟
ربنا يسهل
وقضية التحرش؟
ربنا يزيح عنه
وقضية الخلع اللي مراته رافعاها
ربنا ينصره ..بس باقوللك ايه ماهو ممكن برضه لو خلعته يبقى فيه نصيب و ربنا بأه يبقى قاسمكم لبعض
تفتكري؟
آه و الله ممكن.و ليه لأ


سؤال وجيه فعلا



عموما من خبرتي الحياتية الطويلة ماحكمش على العريس من خلال الواسطة ..مانا طول عمري بيجيلي عرسان عاهات عن طريق ناس زي الفل..طنط حشرية و أونكل ديسكو و غيرهم
ما تقاطعيش يا بت يا برايد..مش هتخسري حاجة...
.....
..




يمكن

Friday, May 04, 2007

عن الرقة و الأنوثة


فاكرين فيلم غصن الزيتون؟ بتاع أحمد مظهر و سعاد حسني...لا طبعا مش الناصر
صلاح الدين هو ده كان فيه سعاد حسني؟

في الفيلم ده كان أحمد مظهر المدرس بتاع سعاد حسني و حبها و اتجوزها بس كان شاكك ان فيه علاقة بينها و بين عمر الحريري اللي كان مدرس في نفس المدرسة..طب ايه علاقة ده بأي حاجة يعني؟؟؟..هقولكم اصبروا بس

في مشهد من الفيلم ده كان عمر الحريري داخل قهوة فيها شوية مدرسين زمايله قاموا
قالوله ايه الكولونيا الجميلة اللي انت حاطتها دي إسمها إيه
قالهم أنوثة...و بغض النظر عن الإسم السخيف..لأ..السخيف جدا لكولونيا أو بارفان رجالي..فدي كانت المرة الأولى في حياتي اللي أسمع فيها الكلمة دي

أنوثة

و فضلت الكلمة دي متعلقة في ذهني بشكل عمر الحريري لمدة طويلة لحد لما كبرت شوية و لقيت الناس بيستخدموها لوصف ناس تانيين مع الأخ عمر الحريري..هند رستم.مارلين مونرو . ليلى علوي و غيرهم و بدات أدور حواليا في
المحيط بتاعي على حد يتوصف بالكلمة دي..بصراحة مالقيتش



فين يا جماعة الأنوثة اللي بيقولوا عليها دي..مامتي طول النهار في المطبخ ..طنط سهير جارتنا طول النهار و الليل بتغسل و تنشر الغسيل و الغسيل ينقط ع البلكونة بتاعت طنط أمال..فطنط أمال بتتخانق مع طنط سهير عشان الغسيل اللي بينقط و بتتخانق مع ابنها عشان بيلعب في الشارع و سايب واجب الحساب



طب سيبكوا من الجيل ده ..خش ع اللي بعده منال بنت خالتي اللي أكبر مني بخمس أو ست سنين ربنا كرمها من 4سنين و دخلت دنيا ..طيب يا منال انتي طول عمرك حلوة كده و دلوعة ورينا الأنوثة بعد الجواز..بعد الجواز بكام شهر هوب دخلنا ع الحمل كعبرت و بقللت من كل اتجاه ..ما علينا بكره تولد و تفوق..و اذ بمنال اللي كنا بنضرب بيها المثل في الرقة و الروقان بقت شبه الستات اللي بيطلعوا في إعلانات السمنة و مساحيق الغسيل تصحى طول الليل عشان الواد بيعيط و طول النهار عشان أبو الواد عايز ياكل و يشرب و مرتبها اللي كان ضايع كله ع البارفانات و المكياج بقة بيروح في ثلاث إتجاهات..بامبرز ثم بامبرز ثم بامبرز..و طبعا نتيجة الصحيان لمدة 24 ساعة في اليوم واضحة جلية على ملامح وشها و راسها يادوب تلمس أي حيطة في أي مكان و نسمع شخيرها من الفضاء الخارجي


طب سيبنا من المفهوم ده ..خللينا في مفهوم تاني برضه غريب عن المرأة المصرية و
هو مفهوم الرقة



البنت الرقيقة اللي تكلمها تبص في الأرض و تحس ان الهوا ممكن يجرحها و اللي تبقى حاسس انها بسكوتة ممكن لومشت شوية على رجليها تتكسر نصين..يخطبها واحد من دول و يفضل كل اما يروح في حته يقول عليها شعر..نسمة..ريشة.صوتها زقزقة عصافير و كل اما تسمع غنوة حلوة تفكره بيها ..و يعملها رنة ع الموبايل

لما النسيم بيعدي بين شعرك حبيبتي باسمعه ..بيقول أهات
و عطورك الهادية اللي دايبه فيكي كل ماتلمسك بتقول أهات




يعزمها عالغدا ماتاكلش غير سلطة ..يجيبلها هدية غالية تزعل منه و تقوله انت ليه مكلف نفسك..و هكذا تستمر الحياة كحلم جميل يصحى منه إمتى؟

بعد الجواز ب 4 أسابيع أو اسبوع ..حسب حظه و نصيبه و تبدأ المطالب و يبدأ التغيير..و فجأه يلاقي الحالة اتقلبت 180 درجة




لأن واحدة بالمواصفات دي تبقى لازم كانت عايشة في فقاعة بعيد عن كل الناس.. عمرها ما ركبت مواصلات ..عمرها ما اتعاكست و اضطرت ترد على واحد قليل الأدب و توقفه عند حده..عمرها ماتعكاملت مع حد في شغلها ..عمرها ما اضطرت تاخد موقف و تتخانق علشان تاخد حقها أو توقف ظلم وقع عليها..عمرها مانزلت السوق تشترى الخضار و اكيد عمرها ماطبخته فأكيد بعد الجواز لو بدأت تعمل الحاجات دي كلها ..لا يمكن تفضل نفس البنت الرقيقة
البسكوتة اللي بتنجرح من الهوا..و الا مش هتقدر تعيش



طبعا الحالة بتزيد اكترو أكتر مع وجود الأولاد و اللي غالبا عبء تربيتهم بالكامل بيبقى على كتافها هي و بس ..فيا إما تبقى شخصية قوية و تخوف العيال وأبوهم ..يا إما العيال هتبوظ و تفسد و ساعتها كل الناس هيلوموها هي و بس



فيا عزيزي الزوج..ماتزعلش لو عروستك اتقلبت لشخص تاني بعد الجواز ..مافيش
قدامها غير كده..ما هو انت لو بذلت شوية مجهود و ساعدتها يبقى عندها شوية وقت
تفوق لنفسها



و يا عزيزي العريس دور ع التربية و الأخلاق و التدين أولا ماتركزش بس على الرقة
و الأنوثة ..لأن الأيام بتغير هذه الحالات الطارئة



و اللي محتاج أنوثة تدوم معه مدى الحياة...يسأل على إزازة كولونيا من بتوع عمر الحريري



..بس حتى دي ..مافتكرش لسه بينتجوها

Sunday, April 22, 2007

حب آه...حب لأ


النهاردة يا جماعة أنا عايزة أتكلم عن موضوع محيرني ..يا ريت تفيدوني برأيكم فيه
عريس؟...لا مش عريس..أنا هاخد- تايم أوت شوية- من موضوع العرسان دول آخر عريس ده انتوا عارفين كان هيوديني ورا الشمس ..قررت اني آخد أجازة شوية عشان ماتلاقوش خبر في يوم في الجرايد اني رميت نفسي من فوق البرج والا حاجة

اولا يا جماعة لازم تعرفوا ان الشعب الصيدلاني غير بقية شعوب الأرض المحبة للسلام
في دفعتنا كان نظام الكابلز غير معترف بيه رسميا زي بقية الكليات..لأن في كلية الولاد فيها بيدوا البنات بالكتف و الكوع و مقالب الحرامية عشان يدخلوا قبلهم المدرجات مش معقول يبقى فيه أي رومانسية..و في معامل الكلية اللي لو اتلفتت البنت يمين او شمال ممكن ماتلاقيش الكرسي بتاعها و تلاقي حاجتها مرمية ع الأرض عشان فيه واحد من شباب مصر الواعي قرر انه يطبق مبدأ المساواة..مايتهيأليش ان ممكن تبدأ أي قصص حب ناعمة أو قوية او فيها ريحة الحنية

فهما كانوا بالظبط 6 كابلز في التلات دفع اللي كنا بنتتبع اخبارها ..دفعتنا و الدفعة اللي قبلنا و الدفعة اللي بعدنا..احنا بقة بالنسبة لشلتنا اللي كنت انا بلا فخر صوت الضمير بتاعها..فضلت الشلة بتاعنا
"male free"
زي ماكنا مسمينها نتيجة لنصايح الست الوالدة اللي كنت باطبقها عليهم بمنتهى القسوة

علا..كنت بتعملي ايه هناك؟
مافيش ده سامح كان بيطلبمني كشكول المحاضرات
نعممممممممم..انتي اتجننتي؟
ليه ..فيه ايه؟
انت مش عارفة دفتر المحاضرات ده فيه إيه؟
فيه محاضرات هيكون فيه فيه ايه يعني
فيه ورق يا هانم ورق
و دي فيها ايه
ورق يعني وسيلة من وسائل المراسلة شوية شوية يسيبلك جواب بعدها تلاقيه كاتبلك قصيدة شوية شوية يقولك نتجوز عرفي
يا نهار أبيض ..دانا ماكنتش واخده بالي
اتفضلي يا هانم و هاتي الكشكول حالا

و تجري علا جري و تشد الكشكول من ايد الواد و هو واقف وسط أصحابه و هيا بتقوله
..هات انت فاكرني عبيطة و الا ايه ..أنا مش بتاع الكلام ده يا أستاذ

و طبعا فضيحة الواد تبقى بجلاجل على أساس انه كان بيعاكس أو يمكن أكتر و يتعمل عليه مقاطعة من نص شلل البنات في الكلية و انا أبص لعلا بانتصار
أيوة كده ..هو فاكرنا ايه ..الشلة دي هتفضل طول عمرها "ميل فري" بلاش قلة حيا

مره عبير كانت قاعدة جنبي في سيكشان المايكروبيولوجي و جنبها قاعد عمر ممدوح الطالب الوحيد في دفعتنا اللي فيه أمل انه يطلع بني آدم عدل..لمحته بيتدير نحيتها و يسألها..
هو المفروض نسخن العينة الأول والا نحط الصبغة
.
.لمحتها بتحاول تفتح بقها عشان ترد و فجاة لاحظت ان انا بازغرلها بطرف عيني..بصت لي برعب و رجعت بصت لعمر و ظهرت عليها الحيرة حاولت تفتح بقها تاني و انا أزغر اكتر و تحاول و ازغر و تحاول و أزغر..لحد لما فجاة راحت منفجرة في العياط و رامية العينة على البنش و خرجت تجري بره المعمل
..يا سلااااااام هي دي التربية من كتر احساسها بالذنب عشان فكرت تكلمه انفجرت في العياط..برافو يا عبير برافو
عمر التفت لي و قاللي هيا بتعيط ليه؟
بصتله و ديرت وشي الناحية التانية
هو فاكرني هاكلمه والا ايه؟
هزلت

أنا شخصيا بقة ماكنتش محتاجة رقابة من حد ..كنت كفيلة بصد أي حد يتجرأ و يفكر انه يكلمني

لو سمحتي يا دكتورة
نعم
ممكن أقولك حاجة
بخصوص الكيميا الصيدلية
لأ
الكيميا العضوية
لأ
الكيميا الحيوية
لأ
السموم
لأ
يبقى سوري مافيش كلام بيننا
و أرفع راسي بمنتهى الفخر و الإباء و انا سايباه واقف فاتح بقه زي عم عبدربه البواب و هو بيتفرج ع المسلسل الكوري


و فضلنا ماشيين الخمس سنين على هذا الأساس و عيشناهم في سلام و امان و منتهى التصالح مع النفس وماكانش بيعكر صفو حياتنا غير اننا نسمع عن خبر اتنين من الكابلز بتوع الكلية اتخطبوا
فاطمة عضوة الشلة بتاعنا كانت في الأيام دي بتبقى على وشك انهيار عصبي و بتجيلها حالة قرقضة ضوافر و عض ع الصوابع من الدرجة التالتة و مابتهداش و تتطمن الا لما بتعرف ان الموضوع اتفركش و بيبو فرقع جيجي او جيجي فرقعت بيبو أو باباها فرقع فيهم الإتنين بعد ماعرف انهم بقالهم 5 سنين مدبلرين مع بعض و مقرطسينه

و طوال كل السنوات دي كل اما أشوف فيلم عربي من اللي بتلاقي فيهم شلة من تلات بنات و شلة من تلات ولاد و يقعدوا يحبوا في بعض و آخر الفيلم التلاتة دول بيتجوزوا التلاتة دول أقول في نفسي..كلام فارغ و قلة أدب..الناس دي ماتربيتش والا ايه؟

و كل اما اأشوف فيلم او تمثيلية من اللي الطلبة بتوع الجامعة بيضحكوا ع البنات و يتجوزوهم عرفي و بعدين يدوهم استمارة ستة ..أقول في نفسي أيوة كده لا يصح الا الصحيح و أثبت أكتر على مبدأي

و بعدين اتخرجنا و بدأت مأساة جواز الصالونات..و عريس داخل و عريس خارج..و ساعات خارج بس..و بدأ العذاب اللي لسه مستمر في حياتي حتى كتابة هذه السطور..إذا بمرة من المرات و طنط فادية عمتي قاعدة معايا نشكي همنا لبعض
بس لو كنتي ارتبطي بحد من زمايلك في الكلية مش كنا خلصنا
نعمممممممممم
قمت من مكاني مفزوعة كأني اتكهربت
قصدك ايه؟
يعني ما فيه بنات كتير بيتجوزوا زمايلهم في الكلية ..بيحبوا بعض يعني و كده
يحبوا ايه؟..بعض؟..ازاي يعني ..دي قلة أدب وانا ايش ضمني زميلي ده غرضه ايه؟
عادي يا ستي اذا كان غرضه شريف و هيدخل البيوت من أبوابها مش كنا خلصنا

أن أن أن أاااااااااااان
عارفين المشاهد العبيطة في أفلام أبيض و أسود لما بيبقى البطل فاقد الذاكرة لمدة 25 سنة و بعدين يتزحلق في قشرة موز و يخبط في عمود فترجعله الذاكرة و يمر شريط حياته أدام عينيه مع صورة كده لشوية دواير بتلف جوا بعضيها
أهي دي حالتي وقتها
وقفت أبص لها و انا مش فاهمة و مش مستوعبة

يعني كل الكلام اللي اهالينا بيحشولنا دماغنا بيه غلط؟..يعني كل الأفلام بتاعة سعاد حسني و حسن يوسف دي كانت صح والا ايه؟

الله يعني كل المجتمع بيقوللنا حاجة و بعدين يدينا ضهره و يبقى نفسه نكسر الكلام؟

طب الواحد يصدق مين بالظبط و فين المنطق بأه ..فين القواعد اللي الواحد يمشي عليها

مش عارفة يا جماعة الموضوع ملخبطني .. طب فين الصح و فين الغلط ..طب انا أعرف منين باه الغلط الغلط و الغلط اللي الناس بتخوفني بيه بس هما في الحقيقة شايفينه صح

مجتمعنا بوشين و الا هي دي أسس التربية

يعني انا كنت صح و الا كنت معقدة والا ايه النظام
أنا كنت باتكلم مع زمايلي عادي في حدود الدراسة..بس ماكنتش باسمح بالكلام يتعدى الحدود دي..يمكن ماكانش أصلا فيه حد يوحي بالثقة ..أو يمكن انا اللي كنت خايفة ..مش عارفة بالظبط

عموما كده كده خلاص الجامعة عدت بحلوها و مرها..بس ادوني انتوا رأيكم ...من أجل الأجيال القادمة



Thursday, April 05, 2007

تـــــــــابع الســـــــــــــادس

أعذروني يا جماعة ..إتأخرت عليكم

كان عندي ظرف..حزين..كئيب ..يقبض القلب

فأنا و من مدونتي هذه أنعي إليكم بمزيج من الأسى و الأسف ..و بقلب يعتصره الألم....و بنفس جريحة كسيرة دامعة..و أدعوكم للوقوف 56 دقيقة حداد على روح الفقيد
الأصيل الصديق الصدوق المتحمل المخلص

الهارد بتاع الكومبيوتر بتاعي

ماستحملش ياعيني كل البوستات دي اللي انا باكتيها و باخزنها عليه

فضل يكتم في قلبه

يكتم في قلبه

لما طق من جنابه ياعيني

إهئ إهئ إهئ

مش قادرة يا جماعة مش قادرة

دموعي غرقت الكيبورد وبدأ يطلع شرار

زززززززز

أي..ماتخافوش دي صدمة كهربائية على خفيف

المهم..أنا لازم أبقى قوية و أكفكف دموعي و أبص للمستقبل

و الحي أبقى من الميت

و إذا كان الهارد القديم سلم النمر..فقد إستلم المسيرة الهارد الجديد
و ده شكله جامد و هيستحمل البلاوي اللي أنا باكتبها و باخزنها عليه

يرجع مرجوعنا لميييييييييييييين؟

أيييييييييوة..لأونكل ديسكو

شاطرين و الله ذاكرتكم حديد..خمسة و خميسة عليكم و ف عيني بدل ماحد يجيلوا الزهايمر و يقول برايد عينيها مدورة

أختكوا بأه واقفة على باب البلاكونة بتلمع في الأوكر بكل براءة و سمعت الكلمة الموعودة..هما الصراحة حرفين إتنين

يييييس

و ده طبعا النص التاني من إسم المأسوف على شبابه العريس

عاديكم...ركبي سابت و دقات قلبي إرتفعت و الدنيا لفت بيا و وشي إصفر و عينيا برقت

آآآآآآآه يا برايد ..عاهة تانية والا ايه؟

ماما خرجت من البلكونة و لقتني مربعة على الأرض رجلي مش شايلاني

راحت رافعاني بإيد واحدة..جامدة ماما و متأسسه::وواخدانا في حضنها

و بوسة من هنا و بوسة من هنا

مبروك مقدما يا بربر

فيه إيه يا ماما بس؟

أونكل ديسكو جايبلك عريس

و فجأة ماما مالقتنيش قدامها
وقعت من وسط دراعتها و ربعت تاني ع الأرض

ياااادي النيلة

نيلة إيه بس يا بربر يا حبيبتي

و هووب.. شالتني من ع الأرض تاني

ده عريس بأه محترم محترم و الحكومة كلها وافقت عليه قبلنا

الحكومة كلها؟؟ليه؟؟ يكونش جيمي فرقع خديجة و رجع لعقله و هيخطبني ..و النبي يا ماما ده أنا أبقى حتة سيدة أولى ؟... أوجه نشاطي الخيري كله للأطفال ضحايا التلفزيون المصري ..و الا أقولك لسواقين المكروباص ضحايا الحزام و الا أقولك..الستات ضحايا عمليات الشفط

ايه يا بنتي حيلك حيلك جيمي مين و خديجة دي تطلع إيه؟؟ده جايبلك عريس أهم من كده بكتير

أهم من كده؟؟قصدك....سيادة الـ...؟؟
يا بنتي هتودينا في داهية ..بصي طرطقيلي ودانك كده..إيه أول حاجة تخطر على بالك لما أقولك...ظابط شرطة

بوكس و قسم و عصاية مقشة

عصاية مقشة؟؟ يا بنتي باقولك ظااابط مش كناس

و النبي يا ماما انتي طيبه ماعادتش فارقة دلوقت الأدوات دي بقت بتستعمل في المهنتين

يا بت بلاش غلبة بأه..بقولك أونكل ديسكو جايبلك عريس مايترفضش..ظابط و من عيلة و متربي تربية عالية

يا سلام

و الله يا برايد يا حبيبتي شكلها كده هتمشي المرة دي

ربنا يستر..و هييجي إمتى

هييجي يوم الإتنين الجاي

يشرف و يآنس..و نبتــــــــــــدي كورس التنضيف

و طبعا بعد كورس النضافة و التلميع بقى البيت بيبرق من بره و من جوه جت الساعة الموعوده

دقت الساعة و معاها جرس الباب

دقة و نظام ..أمال إيه..باحب انا الناس الملتزمة بمواعيدها دي ..كان عندي دايما أمنية دفينة إني أتجوز واحد دقيق في مواعيده ..يمكن لأن أنا مواعيدي بالظبط بالظبط زي مواعيد السكة الحديد..غير موثوق فيها على الإطلاق

دخل من الباب و قعدت أبحلق أبحلق من ورا الستارة اللي دابت من كتر ما ببحلق من وراها

عريض المنكبين رياضي قوي الشكيمة طول قي عرض في إرتفاع في عمق ..عنده كاريزما كده باينه حتى من قفاه

الله يا برايد الله ..هو ده الكلام ..أبقى مرات ظابط بأه و أدخل على أي لجنة و أقول الكلمة اللي طول عمري باحلم أقولها...إنت يا بني آدم مش عارف بتكلم مين...أنا مدام اللوا فلان الفلاني ماتعرفوش

يا سلااااااااام السلطة حلوة و الله.شكلك كده سرك باتع يا أونكل ديسكو يا جميل
.واقفة انا ورا الستارة و سرحانة في اللجنة و البرستيج و باضرب بعيني كده لقيت لكوا عينه راشقه في الستارة و أنا من وراها ..يا ماما
جوز عيون إيه؟..دا غالبا بيبص للواحد كده يقر و يعترف على طول..طب كويس مش محتاج يعني أدوات الكناسين ولا السمكرية و لا حاجة من دي خالص..بس برضه مشكلة ..و انا هاخنصر مصروف البيت إزاي إنشاء الله..دا لو بصلي بصة واحدة هجيب كل اللي عندي على طول..مش مشكلة مش مشكلة مش هاغلب يعني أكيد هحلها


ماما جابت لي الصينية الموعودة و دخلت بيها قام وقف على طول ..مؤدب و الله ..و كان فاضله 3 سنتي و نص و يخبط في السقف..و ماله الطول هيبه برضه ..بعد ما قاعدنا بأه بدأت المعاينة ..أنا طبعا راسمة الهدوء و باصة في الأرض و كل شوية أضرب بجنب عيني كده و ألمحه ثانية أو إتنين ..لا و الله شكله من قدام الستارة أحلى من وراها بكتير..مش حلو حلو يعني ..بس ملامح رجالي كده عليها مسحة وسامة معقولة
هو بأه راشق عينه في وشوشنا كلنا ..كل أما حد يتكلم يتعدله كده و يبصله بصة عمييييييقة أوي ..ماما جت تتكلم إدير بصلها لقيتها فصلت في وسط الكلام و قامت جري كأنها عاملة عاملة
بابا بأه جامد ..مش بقولكم بطل بلاي ستيشان..فضل و هو بيتكلم باصص للعريس و هو باصصله .ده يبص و ده يبص ..برافو يا بابا ..إديلوا نظرات خليه يخاف..بس مين بابا يا عيني ماقدرش يكمل ماتش البص الدولي ده ..شوية و فصل زي ماما..بابا صعب عليا صحيح بس برضه فرحت قوي بأخينا ده ..جامد جامد يعني ..و الله كويس هي دي الحيطة اللي كنت بادور عليها من زمان ..حاجة كده الواحدة تتسند عليها و تدخل في أي مشكلة و هيا قلبها جامد ..يا سلام هوده الكلام ..هو ده الـ..في اللحظة دي رشقت عيونه في وشي..أي..و الله حسيت إن وشي وجعني ..طب أروح فين و الا اعمل إيه..قلت أقوم أجري ورا ماما ..بس قلت عيب يا بت..لازم تثبتيله برضه إن إنتي بنت جامدة"أنا مش بتاعت الكلام ده ..أنا كنت طول عمري جامدة""..بس بس مش طالبة أغاني هو ده وقته
بصلي و فضل باصصلي ..و لأول مرة من أول ما قعد فتح بقه و إتكلم


إسمك إيه
برايد
ثلاثي
هه؟
إسمك ثلاثي مش فاكرة إسمك والا إيه؟
فاكراة فاكراة..إسمييييي..إسميييي؟..إيه؟..أونكل ديسكو..ماترد إنت
أونكل ديسكو مات على روحه من الضحك ..يا بنت يا عكروتة مش عارفة إسمك؟..إسمها يا سيدي
رفع إيده في وش أونكل ديسكو و خلاه بلع بقيت الكلام
أنا سألتها هيا..و المفروض هيا اللي ترد عليا


يا دي النيلة ..إيه الدهولة اللي أنا فيها دي..مش عارفة أتكلم ..و لسه هافتح بقي لقيته مطلع حاجة بتلمع كده من جيبه ..يا حلولي يا حلولي ..خاتم ده والا إسورة ..يا سلام راجل ذوق برضه الناس الشيك دايما لازم تدخل في إيديها حاجة دهب..مسكها بطراطيف صوابعة و إدهالي
..إيه رأيك؟
مديت إيدي ألحقها قبل مايغير رأيه و يرجعها في جيبه تاني
أول مامسكتها في إيدي إتذهلت
إيه ده..دي ولاعة
آه ..حلوة؟..عجبتك؟
بس أنا مابادخنش
عارف عارف ..أنا بس بافرجهالك ..عجبتك؟..شوف كده يا عمي؟
بابا بص من بعيد ..آه كويسة
لأ إمسكها كده شوف تقيلة و الا خفيفة دي دهب 24 قيراط
بابا مسكها و قلبها في إيده شوية و قاله
يس أنا برضه مابادخنش
كويس و الله أحسن حاجة عملتها ..ممكن تنادي طنط تتفرج عليها
خلاص يا إبني و الله مصدقين إنها دهب
معلش معلش ناديلها برضه
خلاص يا إبني قلنا
من فضضضضلك ناديلللها
الجملة الأخيرة دي قالها بأسلوب خللا الدم يتجمد في عروقي ..معلش يا برايد..بكره تبقي تعلميه يبقى حنين شوية في الكلام..مش عايزين نفركش الموضوع من أول قاعدة..معلش يا بابا ماهو بكرة يبقى نسيبك و ماحادش هيقدر يكلمك
ماما جت بعد ما بابا نده عليها و دخلت و ..شكلها كانت خايفة و بصت على الولاعة
حلوة قوي تعيش و تجيب
قام جري و أخدها من إيدها
لا ..دي بتاعتي..أنا بس كنت عايزكم تتفرجوا عليها
أونكل ديسكو قام و قاله
..ممكن أشوفها
لأ..مش لازم إنت يا أونكل


و مسك الولاعة بطراطيف صوابعة و حطها جوه جيبه و إتجه ناحية الباب
أنا هاستأذن بأه ..أنا سعيد جدا إن أنا إتعرفت بيكم..إنشاء الله هابقى أتفق مع أونكل و هو هيقولكم على الميعاد الجاي..عن إذنكم
و هوب لف و خرج من الصالون و فتح الباب و مشي..و أحنا واقفين مش فاهمين حاجة خالص
بابا بص لأونكل ديسكو


حاج ديسكو..إيه النظام ده؟
أونكل ديسكو و هو بيضحك
هههه..خير يا أبو برايد خير..ده راجل ليه هيبه و مالوش في الدلع..و مادام قال انه هيتفق معايا يبقى ماتقلقش مبروك مقدما
و هوب لف هو كمان و خرج



ماما ياعيني أعصابها ماستحملتش و إترمت على الكرسي و هيا بتنهج
أنا لا يمكن أوافق على الجوازة دي أبدا..يا لهوي ..ده إيه الرعب ده
جرى إيه يا ماما و إنتي خايفة من إيه..تكونيش هربانه من حاجة و خايفة تتقفشي؟
إمشي يا مهروشة إنتي ..يعني بتدافعي عنه..يا بنتي ده ممكن في أي خناقة يجرك ع المعتقل إنتي ماشفتيش كان بيبصلنا إزاي
يا ماما حمش شوية بس
حمش ؟؟..بكرة لو إتجوزك ده يكسر دماغك..يا بنتي ده بيفكرني بأحمد زكي في زوجة رجل مهم
يا أم برايد أدينا هانستنا لما نشوف أخرته إيه ..بلاش نوقف إحنا المراكب السايرة و خلينا ورا الكداب لباب الدار
هو ده الكلام يا بابا...شكله مش عاهة قوي..مش كل يوم هامشي عريس ..أنا عايزة أخلص بأه
يا سلام ياختي؟؟..أما نشوف أخرتها معاكي إيه



طبعا أنا ليلتها ماجاليش نوم عماله أحلم بالظابط و اللجنة و النجوم اللي علي كتفه و أنا و انا بمرمط في خلقالله وانا مسنودة بأه..و من كتر التفكير مانمتش غير بعد الفجر بعد ماقمت صليت الفجر و استغفرت ربنا و قلت خلاص يا رب مش هامرمط في حد و لا هاكسر أي إشارة و هاكون مواطنة مثالية تلتزم بالقانون..بس طبعا نتيجة السهر ماقدرتش أروح الشغل تاني يوم و قعدت في البيت و طول النهار ماما تبصلي و تتنهد ..زي ماتكون بتقوللي اما نشوف هاتودينا فين وراكي


عدى اليوم على كده و تاني يوم رحت الشغل ..أول مادخلت من باب المستشفى عم محمد الأشكيف البواب بتاعنا اللي كل يوم بيستقبلني بتلات أربع دعوات أول ماشافني دير وشه الواحده التانية..خير اللهم أجعلة خير ..يظهر المدام صبحته بخناقة أو مسته على أنغام الشبشب أبو وردة..ماعلينا مانا مش هاقف أقرره و يشكيلي حاله
قلت أطلع على شغلي أحسن قابلتني مدام عواطف على السلم
دكتورة برايد
أيوة يا مدام عواطف فيه حاجة
أيوة يا دكتورة لو سمحتي عايزاكي في مكتبي شوية
دلوقت؟
يا ريت
رحت معاها على مكتبها في شؤون العاملين و كل أما أعدي على موظف يبصلي و يهز راسه
فيه إيه يا جماعة ؟..كلكم نايمين على أنغام الشبشب أبو وردة والا إيه؟
أيوة يا مدام عواطف خير
أستاذ حسين ..أستاذ فتوح ..لو سمحتوا شوية كده
إيه القلق ده بأاااه ..ده الموضوع خطير بأه..طب لو إختلست حاجة كانوا حولوني الشؤون القانونية لكن شؤون العاملين
قوليلي يا دكتورة..إنتي عندك مشاكل في حياتك و الا حاجة؟
مشاكل زي إيه يعني؟
يعني حالتكوا المادية كويسة ..باباكي بيصرف عليكوا كويس
في إيه يا مدام عواطف إيه الأسئلة العجيبة دي..مانتي عندك ملفي و عارفة بابايا بيشتغل إيه
طب معلش ..أنا زي والدتك ..صارحيني..حد من صاحباتك مشيها بطال و حبت تجر رجلك معاها
إيه أنتي إتجنيتي يا ست إنتي والا إيه؟
أمال بس المخبر بتاع الآداب ده كان ماشي يسأل عليكي في المستشفى إمبارح ليه
آداب؟..آداب؟..آداب إيه يا ست إنتي ..أنا ماعرفش حد بتاع آداب
أمال يا دكتورة يعني بيسأل عليكي ليه
مخبر ؟..آداب؟...يخرب بيييييييتك ياللي في بالي



ماقدرتش أستحمل و الا أفكر جالي شلل في مخي أخدت شنطتي و طيران ع البيت
إلحقيني يا ماما..شوفي المصيبة ..أنا ضعت ..،أنا إتدمرت...أنا إتبهدلت بهدلة الزمالك في الدوري يا ماما
عاااااااااااااااااااااااااااااااااااااا



طبعا ماما لما عرفت رقعت بالصوت و اتصلت ببابا و جابته على ملى وشه و لما حكتله نزل عشان يجيب أونكل ديسكو من قفاه وأونكل ديسكو بعد ماخد دش محترم من بابا قرر عمل مؤتمر قمة و بعت جاب سيادة وزير الداخلية مستقبلا
الحديث كله بيدور بيننا و احنا مولعين و بينه و هو أسقع من أطول لوح تلج قابلتوه في حياتكم



إيه يا بني آدم اللي انت عملته ده
إيه عملت إيه
إنت باعت واحد من الآداب يسأل على بنتي في شغلها
عادي أمال يعني هانزل أسأل بنفسي أمال المخبرين دول لازمتهم إيه
هو انت بتتحرى عن مجرم دي عروسة ..و بعدين مالاقيتش غير مخبر من الآداب يسأل عليها و في شغلها
طبعا ماهم مخبرين الآداب دول خبرة في السؤال عن البنات..المخبر بتاع حضرتك بأه من قسم المخدرات
يا سلام سلم إنت كمان بعت مخبر يسأل عليا شوية شوية تقوللي إنك بعت مخبر يسأل على مراتي
طبعا..بس ده بأه تبع التموين
إنت يا بني آدم إنت بتستهبل ..إنت فضحتنا كلنا
يا عمي النار ماتحرقش مؤمن
يا عيني يا عيني ع العقل و الحكمة و انشاء الله التحريات اللي انت جمعتها دي أثبتتلك إن إحنا مجرمين يعني هتيجي تجرنا ع القسم إمتى إنشاء الله
لا يا عمي لا.. التحريات أثبتت إنكم ماشاء الله لا غبار عليكم خالص و الفيش كمان جاي نضيف خالص
أفندم؟..فيش؟؟..إنت إستخرجت الفيش بتاعنا و فتشت عليه
لا يا فندم و دي تيجي..أنت عارف ان الفيش لازم يتجدد كل 3 شهور..أنا عملتلكم واحد جديد
يا سلام و انشاء الله أخدتنا نعمل فيش و احنا مانعرفش ..خدرتنا يعني
لا يا عمي مانا عندي بصامتكم



بصينا لبعض
بصامتنا؟
أه..من ع الولاعة



يا خراااااااااااااااااااااابي
دا أنا بصوت ..مافيش داعي أقولكم ع الباقي كفايا تعرفوا إن لولا وساطة أونكل ديسكو كنا إترمينا كلنا في المعتقل بتهمة إهانة ظابط أثناء تأدية وظيفتة
كانت إيه وظيفته؟



جمع تحريات عن خلية إرهابية مكونة من 4 أشخاص..إحنا التلاتة.....و أونكل ديسكو

Saturday, March 31, 2007

جديد جديد جديد

فرصة نضيفة
و قريبا هنا
الســــــــادس

Thursday, March 15, 2007

السادس

وحشوكوا عرساني؟؟..ماتشوفوش وحش..أنا شخصيا ماوحشونيش خاالص..أنا جاتلي منهم حالة اكتئاب كل أما أنام أحلم بكوابيس مالهاش أول من آخر..مرة أحلم بأيمن ماسك صابعين جلاش..مرة أحلم ببتاع لجنة السياسات معدي بالمكروباص على الرياض و مرة أحلم بالأخ اللي شبه عمرو موسى ده و أنا واقفة و ماسكاله الطفاية..مرتين تلاته كمان حلمت بكريم عبد العزيز بس ده مش موضوعنا دلوقتي خااااااااالص



و برضه من آثار الإكتئاب اللي بيحصل للوحدة بعد كمية محترمة من التجارب المحترمة زي اللي انا مريت بيها دي..بعدها مابتبقاش الواحدة عايزة تسمع كلمة عريس أو تشم حتى ريحته..طبعا أصلا لو له ريحة يبقى ماينفعش..يضرب جرس الباب أقوم أستخبى ورا ماما ..يرن التليفون أقوم أجري و أمسك في ايد بابا قبل مايرفع السماعة و الذعر في عينيا
لا يابابا بلاش..بلاش يا بابا..حرام عليك ..
ايه يابنتي في ايه ..جرالك ايه
لحسن تطلع طنط حشرية يا بابا و جايبالي عريس أرجوك يا حاج..بلاش ترد ع التليفون..اعتبرني زي بنتك
زي بنتي ..الحقي ياأم برايد البت اتهطلت
ماما تيجي و تسلك ايد بابا من ايدي اللي قافشه عليها زي الكابوريا
معلش يا حبيبتي معلش و الله نصيبك هيبقى زي الفل..اهدي يا حبيبتي كده و صلي ع النبي
عاااااااااااااااااا..آه يا ماما آه..مش عايزة طنط حشرية دي تاني
خلاص يا بنتي خلاص ..يا رب يبعدها عن سكتك


و الحمد لله أبواب السما يوميها كانت مفتوحة و مش ماما تنقي دعوة حلوة كده زيي يا رب تتجوزي بكرة الصبح؟..لأ تيجي في حظ طنط حشرية بس كويس برضه أهو قضى أخف من قضى



قوم ايه ..ربنا رحمني من طنط حشرية و عوضني عنها بأونكل ديسكو..أونكل ديسكو ده -و اسمه الأصلي دسوقي- صاحب بابا من زمان بس راجل شيك كده و أمور و روش و يبان عليه العز...نعم؟..أتجوزه؟؟..أتجوزه ده ايه؟..بقولكم صاحب بابا..خلاص يعني مافيش تمييز
المهم أونكل ديسكو ده كان دايما يجي عندنا و يقعد يلعب هو وبابا..طاولة؟؟..مين جاب سيرة طاولة؟..قمار؟؟..إمشي ..قمار في عينك انت و هو..بيقعدوا يلعبوا بلاي ستيشان..أمال ماهو أونكل ديسكو مش أي كلام

يقعد يغلب في بابا يغلب في بابا لحد ماتقوم خناقة و بابا يرزع الجهاز في الأرض و يبقى صوتهم مسمع آخر واحد في عنبر الغيبوبة بتاع القصر العيني
انت راجل مالاكش فيها
انت اللي مابتفهمش
يا عم روح انت صحيح بتفهم في البلاي ستيشان بس زي ماشعبان عبد الرحيم بيقهم في الطاقة الذرية

..و نخش نسلك أنا و ماما تنوبني زغدة في جنبي أو بونية في عيني و بعدين يخلص الموقف و أونكل ديسكو متشعلق في بابا بيبوس راسه و
بابا يقوله الشيطان شاطر يا حاج ديسكو
و هو يقوله حقك عليا يا بو برايد
و تتكرر الحكاية كل خميس زي الساعة لدرجة ان الواد برررق ابن الجيران اللي قصادنا بيجيب العيال صحابه كل خميس يتفرجوا ع الخناقة ..فرقعة و مطاردات في البلاكونة و بونيات و شقلبظات ..أحسن من ميت فيلم للسقا ده اللي بيقولوا عليه



الخميس اللي فات بأه بابا مجهز البلاي ستيشان و الكراسي في البلاكونة ..و انا انتهيت من تمارين الضغط و الحديد استعدادا لدوري في التسليك و ضرب جرس الباب رحت افتح لقيت أونكل ديسكو مدخل وشه من فتحة الباب و بيقوللي بلهجة كده ماعجبتنيش ..إزيك يا برااااااااايد..أخبارك ايييييييه
عارفينها الطريقة دي ..اللي الناس بيمطوا بيها الحروف قبل مايقولولكوا انهم جايبنلكوا باكو شيكولاته و بعد ماتحلموا بالكادبوري ..تطلع كورونا لبني من أم ربع جنيه
آآآآآآآآه ..عرفت ان الموضوع فيه إنه
بابا فيييييييييييين
مش هنا يا أونكل..سافر العراق ..جاتله إعارة سلام
و لسه هاقفل الباب الراجل الأروب حط رجله في فتحة الباب و زقه لما فعصني في الحيطة و دخل
هههههههه إعارة ايه يا بنت يا عكروتة إنتي؟..و الله دمك زي العسل يا برايد من ساعة ماكنتي قد كده لغاية لما بقيتي عروسة زي القمر



آآآآآآه ..وضحت الرؤية مادام قاللي انتي عروسة ..مش بس كده ..ده من خلال خبرتي الحياتية الطويلة ..أي موضوع تجتمع فيها كلمة عروسة مع كلمة عكروتة يبقى أكيد لا يبشر بأي خير

اتجه للبلكونة اللي عارف طريقها كويس و انا من الصدمة قعدت على أول كرسي قابلني في الصالة انتظارا لوقع القضا المستعجل فوق نافوخي
شوية كده و سمعت ضحك و هقهقة و بابا بينادي ماما ماما طلعت م المطبخ اللي مقضية فيه نص حياتها و متجهه ناحية البلكونة
و انا شفتها من هنا و رحت مرمية على رجلها
بلاش يا ماما ربنا يخليكي
فيه ايه يا بنتي ايه اللي حصل
ماتدخليش يا ماما قلبي مش مطمن حاسة انه كمين
كمين ازاي يعني؟
حاسة ان أونكل ديسكو جايبلي عريس
طب يا بنتي ربنا يبعت..انتي مش كنتي هيتقلعلك عين و تتجوزي
لا يا ماما..خلاص انا عرفت حظي و نصيبي ..أنا مابيتقدمليش غير العاهات ..أنا خلاص ياماما هاقعد جنبك و هاسمع الكلام و هاغسل المواعين
ايه ده ..هتغسلي المواعين بجد
لألألأ..بلاش استغلال الظروف ده
..بس و النبي يا ماما و النبي ماتدخلي
ماتقلقيش يا برايد ..انت عارفة ان اونكل ديسكو بيفهم و راجل محترم و معارفه كلهم ناس محترمين و لو جايبلك عريس أكيد هيقى محترم


بصتلها و الدموع في عينيا ..ذكية ماما دي ..عكروتة بتعمل معايا زي ماكانت بتقوللي زمان ..روحي المدرسة و انا أجيبلك صباع روج.....ايه دانا كنت في تالتة إبتدائي يعني عروسة قد الدنيا
يووووه ..برضه عكروتة و عروسة في جملة واحدة بس على رأي ماما أونكل ديسكو راجل محترم و غير طنط حشرية
خالص و لو جابلي عريس هيبقى راجل محترم
مش انتوا رأيكوا كده برضه
أما أخش أتصنت عليهم و أحكيلكوا المرة الجاية
ادعولي

Thursday, March 08, 2007

أول حجر في البيت

و أخيرا و أخيرا هنملا بيت العرايس و العرسان

انا كنت عارفة من الأول ان انتوا مابتجوش غير بالتهديد

خدوا المترو أو التاكسي انشالله حتى التوك توك و روحوا على هناك
أول قصة اتنشرت

قصة رجالي عشان محدش يقوللي تحيز و بتاع

كل قصصكوا عندي و البقية آتية في الطريق

العنوان أهه لحد ما احطه في السايد بار
أول حجر في البيت اتحط و كل قصة بحجر يبنيه و يعليه
و يجعلوا عامر انشاء الله

اقروا أول قصة

Friday, March 02, 2007

آآآآآآآخر فرصة

بصراحة بصراحة مش عارفة أعمل فيكوا ايه

يعني عرضت عليكوا تجاربي و قصصي و أفلامي دي كلها ..و مافيش فايده

اللي ضحك و اللي اتريق و اللي عيط..و مافيش فايده

فين يا جماعة القصص و الحكايات اللي تقطع حشايا القلب و المعدة

يعني مكلفة نفسي و عاملالكم بلوج و مكلفاه الشئ الفلاني على حسابي
و قلت ياللا أهم يضحكوني معاهم زي ما ضحكتهم معايا
مافييييييييييييييييييييييش فايييييييييييييييييييييييده

بصوا بأه ..بناءا على إقتراح من قارئة عزيزة من قارئات المدونة
و عشان عارفة انكوا مابتجوش بالذوق

افتحوا الكراريس و اكتبوا من اول السطر
الوااااجب
على كل واحدة دخلت المدونة برجليها اليمين تبعتلي على الإيميل
قصة أغرب عرض جواز جالها في حياتها و اتصرفت فيه ازاي

و على كل واحد دخل المدونة برجله الشمال
قصة أغرب قصة غرامية حصلتلك أو مقلب شربته من الموضوع ده

ياللا إبتدوا الإجابة و ابعتوا الحل على الإيميل
wannababride@yahoo.com

إذا كنتي خايفه من صحباتك اللي على النت ..اكتبي باسم مستعار و هانشرلك بيه

اذا كنت خايف من المدام
مش مشكلتي يا باشا ان شخصيتك ضعيفة قدام الحريم بتوعك...رجالة آخر زمن

نرحب بجميع القصص ..زواج..خطوبة..طلاق..خلع ..أو حتى قصة حب لم تكتما

انا مستنية جنب صندوق البريد بتاعي
ص.ب..45
يعني اللي يبعت يبقى لابس صندل بني مقاس خمسةوأربعين

آخر فرصة ..بعد كده هاجيب البلدوزر و أسوي بيت العرايس و العرسان بالأرض
و ابعت أكتر ..فرصتك في النشر تكتر

و الله المستعان

Monday, February 19, 2007

هابي فلانطين

كل سنة وانتوا طيبين يا جماعة ..متأخرة شوية معلش ..هو انا يعني اش عرفني بمعاد البتاع ده؟
أنا كل اللي اعرفه اني مرة ماشية في الشارع لقيت دباديب دباديب..قلت جايز يا بت عيد الطفولة
أمشي في شارع ألاقي الناس كلها لابسه أحمر في أحمر ..أقول ايه ده هو الأهلي هيلعب النهاردة..ربنا يقومك بالسلامة يا أبو تريكة
الاقي ناس كتير ماشية شايلة قلوب حمرا..أقول دول لازم بتوع حملات التبرع بالدم


فين و فييين باه قاعده في امان الله في الشغل لقيتلكم مدام سندس-دي واحدة صيدلانية معانا بس متجوزة كلنا بنقولها يا مدام عشان هي تقريبا الوحيدة فينا اللي نالت الشرف ده-كانت قاعدة بتحكي لنهى -فاكرينها طبعا-
دخلت ياختي الشقة لقيت النور مقطوع و الراجل منور شمعتين و حاطتهم ع السفرة و عينك ماتشوف الا النور قعدت أصرخ أصرخ..انت البعيد أعمى مابتفهمش ازاي تحط الشمع فوق مفرش السفرة انت مش عارف ده بكام مش كفاية بابا اللي جايبه على حسابه و الا عشان مادفعتش فيه حاجة ..آآآآه مانت واخدني بالرخيص..لو كنا خليناك كعيت دم قلبك في العفش ماكانش ده اللي جرا
الراجل يا ختشي وقف كده شوية مذهول و بعدين راح رايح مولع النور ببص لقيتلك ايه "حزمة"حاجة حمرا كده على ترابيزة الأنترية ..قال ايه جايبلي ورد..رحت أبص عليهم لقيتلك 10 ورداتقلت له يا راجل يا مخبول مش ده الورد اللي بيتعمل مربى ..ياللا اتفضل قوللي جايبه منين لما أروح أرجعه و أجيب بداله اتنين تلاتة كيلو ينفعوا مربى للتخزين
الراجل بصلي يا ختشي شوية و قال ايه راح واخد شنطته و رايح على أمه...رجاله غريبة ..مش عارف اني هيطلع عيني في عمايل المربى عشان خاطر يطفحها...بس انا اللي فارسني و فاقع مرارتي إني نفسي أفهم هو اتقمص من إيه..هه يا أختشي ..ماتعرفيش؟؟؟
نهى اللي كان باين عليها هيجيلها شلل رباعي بصتلي و قالتلي ..قوليلها حاجة أنا مش قادرة هاطق منها
بصتلها باستغراب كده ..هاتطقي منها ليه؟..الشابة ماغلطتش المفروض لما يعوز يطفـ..قصدي ياكل مربى يقوللها بدل مايشحطتها تفضل تتخانق مع الراجل بتاع الورد على ماتجيب النوع بتاع المربى
يا خراااابييييي"دي نهى بتلطم و بتصوت"..يا بنتي النهاردة الفالانتاين
يا شيييخة أكنه النهاردة ..أتاري الدنيا كلها مدهونة صلصة بررررة؟

المهم فهمنا احنا الباشمهندس شافعي جوز مدام سندس كان بيعمل العمايل الغريبة دي ليه ..طبعا مع فاصل من الدعوات المكن من سندس على أمه اللي ربته تربية خيخة و خلته يفكر في الكلام الفارغ ده

عن نفسي أنا يا جماعة نفسي و منى عيني إن حد يجيبلي انشالله عود جرجير و أقعد أسرح باليل و انا فاتحة الشباك و نور القمر مدلدق على كل حاجة في الأوضة-حلوة يدلدق دي ..رومانسية مش كده؟_و أقعد أفكر في فارس أحلامي و انا باسمع أغنية رقيقة شجية رومانسية من أغاني شفيقة..يا سلام عليكي يا شفيقة عندها شوية أغاني رومانسية جنان
و أقعد أقطع في ورق الجرجير..بيحبني مابيحبنيش..بيحبني مابيحبنيش..بيحبني..إيه ده دودة دي و الا ايه؟..مش كان نقع العود في شوية خل قبل مايجيبه

و بعدين يا جماعة أنا حاسة ان ماعادش فيه رومانسية زي زمان..ماعادش ينفع..شوفوا مثلا أفلام زمان العاطشفية الفيلم ده بتاع شادية و صلاح ذو الفقاربتاع أحماااااااااااد...منااااااااااااااااااااااااا
كل عقدة الفيلم أنه سافر في القطر جت هيا تركب القطر مالحقتهوش قامت سابتله رسالة مع محصل القطر قام الراجل مالحقش يوصلهاله و كانت النتيجة انهم ماتجوزوش و قعدوا عشرين سنة يدوروا على بعض
طب دلوقتي يعملوا فيلم زي ده تاني إزاي ؟
أول ما الإتنين يتوهوا عن بعض و عشان هيا فقرية هتديلوا رنة ع الموبايل عشان يكلمها ..و عشان هو جلدة هتكبر في دماغة و يقوم باعتلها "كلمني شكرا" عشان هي اللي تتدبس في المكالمةو يا إما البت يا عيني تتدبس و تتصل يا إما تكبر في دماغها و تحس انه معفن و ميت ع القرش و تعملوا ديليت من موبايلها و من حياتها
و تبقى دي قصة الحب التي فرقها نجيب ساويرس

طب فيلم البوستاجي ..حبكة الفيلم ان شكري سرحان بيقرا جوابات البنت اللي بتحب الواد و بعدين بتغلط معاه و لما جواب من جواباتها يتحرق و شكري بيقراه الواد مابيعرفش ان أبوها هيقتلها و ساعتها البت بتروح فطيس
طب لو بينهم ايميلات .كان الموضوع هيخلص على انه هيكتشف ان مافيش ينت ولا حاجة وانه واحد صاحبة بيهرج معاه
يا إما كان هيروح يتقدملها و كانت القصة العظيمة دي إتفشكلت بسبب مفتاح الأنبوبة عليها والا عليه..فين العاطشفية بأه؟

حتى فكرة الفلانطين نفسها..مش هتبقى هيا هياها لو كل الناس اكتشفوا انهم كل سنة بيحتفلوا بالذكرى العطرة لجلوس أخونا القديس فلانطين و إعدامه جلوسا على الخازوق
آه و النعمة هو ده العيد

و بعدين أنا بقيت حاسة ان كل الناس بتضحك على بعض
يعني بعد ماخرجت من الشغل قلت أما ألف كده على محلات الهدايا أتفرج من نفسي ..لقيت بنتين شكلهم كده من أصول ريفية ..واقفين بينقوا هدية

-بقولك يا به..أجيبلوا القلب و الا الدبدو..؟
-لأ يا به..جتك نيلة ..دبدو ..إيه ده راااجن و هما الرجاله بيلعبوا بالدباديـ..؟
-أصلي مش عارفة يا به..مش هارشة موضوع القلب ديه..ديه صغير قوي
- طب أقوولك ماتجيبيلوا الاتنين
- يا نايبتي..الاتنين..ليه يا به..هو انا كت هاتجوزه؟
أدي يا عم الفلانطين و اللي بيحتفلوا بيه
يا عم فكك بلا وجع دماغ

Thursday, February 08, 2007

ع.ا.ن.س

ضحكنا كتير..هناخد السنة كلها ضحك و الا ايه؟
طبعا الحروف اللي فوق دي بتكون كلمة معروفة و مشهورة و رخمة و بايخة و قليلة الذوق
مش قلنا مافيش ضحك؟
في المعجم العربي بتاع عمكوا وائل الصحاح اللي هو الحفيد الثالث و الأربعين لجدكوا مختار الصحاح كلمة عانس دي مرادف لكلمة بايرة و في قول آخر أنها الفتاة التي فاتها القطر..قطر لما يبقى يلهف اللي يقولها على أي واحدة
الصورة اللي كانت بتيجي في بالنا زمان أول مانسمع كلمة عانس هي صورة زينات صدقي
بعدها بشوية بقت صورة عائشة الكيلاني(الأتنين على فكرة كانوا في الحقيقة متجوزين)..
و على الرغم من إننا ساعات نلاقي مزز لسه ماتجوزتش لبعد التلاتين و ساعات الأربعين..إلا ان مافيش أي حد بيسميهم عوانس أبدا
يعني مثلا ..ليلى علوي..لطيفة..أنوشكا..كل دول عدوا الأربعين ..ورغم كده..عمركوا سمعتوا حد قال عليهم عوانس؟..ماحصلش

يعني مهما حاولنا نعرف الكلمة على إنها تأخر واحده في الجواز هنلاقي التعريف ده غير صحيح
الكلمة ..مجرد إهانة..فقط لاغير
نوع من أنواع التشفي في واحدة تعرفها أو ماتعرفهاش

خصوصا لو ماتعرفهاش..ياسلاااام تبقى كلمة لطيفة جدا و على سبيل الهزار و التهييس و حاجة ظريفة تموت م الضحك
بالظبط زي لما تضحك على حد إتسرق مرتبه في الأتوبيس
لو إنت اللي حصلت فيك الحكاية دي تبقى مصيبة سودة ..لكن لو حصلت لحد تاني..يبقى هو اللي حمار و مابيفهمش و دغف و عبيط عشان كده إتسرق

برضه كلمة عانس نفس الطريقة..طب بص حواليك في عيلتك في شغلك في جيرانك ..أكيد هتلاقي واحدة قريبة منك و بتمر بظروف زي دي ..لو هي قريبة منك قلبك مش هيطاوعك تقول عليها عانس
أما لو ماتعرفهاش..فهتلاقي الكلمة بتجري على لسانك بسلاسة و سهولة

إنت بتقول الكلمة سوري يعني بجهل و ماتعرفش هي بتجرح مين
و ماتعرفش أصلا انها بتجرح

يعني من مدة كده كانت فيه واحدة سايبالي تعليق في الشات بوكس بتقول اني باتكلم بلسانها و بلسان صحابها و كده
أم حد برضه جه في التعليقات و قاللي أنا ملاحظ ان كل اللي بكتبولك هنا عوانس ماتغيري اسم البلوج و تخليه بيت العوانس

سيبكوا مني انا ..هتكلم عن نفسي بعدين..لكن قعدت أتخيل إحساس البنت اللي كتبتلي الكلام و يمكن رجعت تبص على تعليقي على كلامها و شافت تعليق الأخ ده
تفتكروا هتضحك ..هتهز كتافها و تنسى الموضوع
لو فكرتوا كده يبقى مافيش حد فيكم عمره فهم نفسية بنت
لأن كل البنات تقريبا الموضوع ده بيبقى هاجس جواها من أول مايبتدوا صاحباتها و اللي حواليها يتخطبوا و يتجوزوا و هي تتأخر حتى لو شوية صغيرين

عن نفسي ..الكلمة بتضايقني لو اتقالت قدامي من أول ما كملت 22 سنة
حتى لما كنت باسمعها في فيلم أو مسلسل كانت بتخنقني

نرجع للتعريف
في الأرياف بتبقى البنت عانس لو عدى على حصولها على الدبلون سنتينفي الأقاليم زمان كان لغاية 25 و دلوقتي بقت32-33في القاهرة و الإسكندرية لحد ال35 و في كل الحالات..اللي وصلت السن ده و ماعادش بيجيلها عرسان
بالنسبة لكل الأرقام دي و بما إني مش معايا دبلون ..يبقى لسه قدامي شوية على ماحمل اللقب
و مع ذلك..كل صحفي أو صحفية كتبوا عن البلوج سواء في الصحافة الإلكترونية أو المكتوبة كل اما حد يجيب سيرة البلوجيقول "إنه صرخة من بنت فاتها قطار الزواج"..إنها صيحة من فتاة مصرية ضد حالة العنوسة..إنها صوت الكثيرات ممن حملوا لقب عانس
و فيه ناس كمان منكم..بحسن نية..أو غيره..لازم يحشروا الكلمة دي في تعليقهم على أي موضوع في البلوج

لو كنت عارف ان الكلمة بتوجع و بتقولها ..على أي بنت تعرفها أو ماتعرفهاش..تبقى مصيبة
و لو ماكنتش تعرف إنها بتوجع..فالمصيبة أعظم
من فضلكوا يا ريت تقاطعوا الكلمة دي
اللي مايحسش بوجع اللي قدامه ..مايستاهلش انه يكون إنسان
------------------------------------------------------------------------
البوست ده هيفضل هنا أسبوع و بعدين هشيله..مش عايزة نكد في المدونة ..بس
بجد كانوا كلمتين محشورين في زوري و يا أقولهم ..يا اموت