Thursday, February 08, 2007

ع.ا.ن.س

ضحكنا كتير..هناخد السنة كلها ضحك و الا ايه؟
طبعا الحروف اللي فوق دي بتكون كلمة معروفة و مشهورة و رخمة و بايخة و قليلة الذوق
مش قلنا مافيش ضحك؟
في المعجم العربي بتاع عمكوا وائل الصحاح اللي هو الحفيد الثالث و الأربعين لجدكوا مختار الصحاح كلمة عانس دي مرادف لكلمة بايرة و في قول آخر أنها الفتاة التي فاتها القطر..قطر لما يبقى يلهف اللي يقولها على أي واحدة
الصورة اللي كانت بتيجي في بالنا زمان أول مانسمع كلمة عانس هي صورة زينات صدقي
بعدها بشوية بقت صورة عائشة الكيلاني(الأتنين على فكرة كانوا في الحقيقة متجوزين)..
و على الرغم من إننا ساعات نلاقي مزز لسه ماتجوزتش لبعد التلاتين و ساعات الأربعين..إلا ان مافيش أي حد بيسميهم عوانس أبدا
يعني مثلا ..ليلى علوي..لطيفة..أنوشكا..كل دول عدوا الأربعين ..ورغم كده..عمركوا سمعتوا حد قال عليهم عوانس؟..ماحصلش

يعني مهما حاولنا نعرف الكلمة على إنها تأخر واحده في الجواز هنلاقي التعريف ده غير صحيح
الكلمة ..مجرد إهانة..فقط لاغير
نوع من أنواع التشفي في واحدة تعرفها أو ماتعرفهاش

خصوصا لو ماتعرفهاش..ياسلاااام تبقى كلمة لطيفة جدا و على سبيل الهزار و التهييس و حاجة ظريفة تموت م الضحك
بالظبط زي لما تضحك على حد إتسرق مرتبه في الأتوبيس
لو إنت اللي حصلت فيك الحكاية دي تبقى مصيبة سودة ..لكن لو حصلت لحد تاني..يبقى هو اللي حمار و مابيفهمش و دغف و عبيط عشان كده إتسرق

برضه كلمة عانس نفس الطريقة..طب بص حواليك في عيلتك في شغلك في جيرانك ..أكيد هتلاقي واحدة قريبة منك و بتمر بظروف زي دي ..لو هي قريبة منك قلبك مش هيطاوعك تقول عليها عانس
أما لو ماتعرفهاش..فهتلاقي الكلمة بتجري على لسانك بسلاسة و سهولة

إنت بتقول الكلمة سوري يعني بجهل و ماتعرفش هي بتجرح مين
و ماتعرفش أصلا انها بتجرح

يعني من مدة كده كانت فيه واحدة سايبالي تعليق في الشات بوكس بتقول اني باتكلم بلسانها و بلسان صحابها و كده
أم حد برضه جه في التعليقات و قاللي أنا ملاحظ ان كل اللي بكتبولك هنا عوانس ماتغيري اسم البلوج و تخليه بيت العوانس

سيبكوا مني انا ..هتكلم عن نفسي بعدين..لكن قعدت أتخيل إحساس البنت اللي كتبتلي الكلام و يمكن رجعت تبص على تعليقي على كلامها و شافت تعليق الأخ ده
تفتكروا هتضحك ..هتهز كتافها و تنسى الموضوع
لو فكرتوا كده يبقى مافيش حد فيكم عمره فهم نفسية بنت
لأن كل البنات تقريبا الموضوع ده بيبقى هاجس جواها من أول مايبتدوا صاحباتها و اللي حواليها يتخطبوا و يتجوزوا و هي تتأخر حتى لو شوية صغيرين

عن نفسي ..الكلمة بتضايقني لو اتقالت قدامي من أول ما كملت 22 سنة
حتى لما كنت باسمعها في فيلم أو مسلسل كانت بتخنقني

نرجع للتعريف
في الأرياف بتبقى البنت عانس لو عدى على حصولها على الدبلون سنتينفي الأقاليم زمان كان لغاية 25 و دلوقتي بقت32-33في القاهرة و الإسكندرية لحد ال35 و في كل الحالات..اللي وصلت السن ده و ماعادش بيجيلها عرسان
بالنسبة لكل الأرقام دي و بما إني مش معايا دبلون ..يبقى لسه قدامي شوية على ماحمل اللقب
و مع ذلك..كل صحفي أو صحفية كتبوا عن البلوج سواء في الصحافة الإلكترونية أو المكتوبة كل اما حد يجيب سيرة البلوجيقول "إنه صرخة من بنت فاتها قطار الزواج"..إنها صيحة من فتاة مصرية ضد حالة العنوسة..إنها صوت الكثيرات ممن حملوا لقب عانس
و فيه ناس كمان منكم..بحسن نية..أو غيره..لازم يحشروا الكلمة دي في تعليقهم على أي موضوع في البلوج

لو كنت عارف ان الكلمة بتوجع و بتقولها ..على أي بنت تعرفها أو ماتعرفهاش..تبقى مصيبة
و لو ماكنتش تعرف إنها بتوجع..فالمصيبة أعظم
من فضلكوا يا ريت تقاطعوا الكلمة دي
اللي مايحسش بوجع اللي قدامه ..مايستاهلش انه يكون إنسان
------------------------------------------------------------------------
البوست ده هيفضل هنا أسبوع و بعدين هشيله..مش عايزة نكد في المدونة ..بس
بجد كانوا كلمتين محشورين في زوري و يا أقولهم ..يا اموت

111 comments:

BESTIC said...

فعلا انتي صوت كل البنات
أحييكي على البلوج ده لان فعلا كل البنات الي متجوزوش من أول 15 سنة بيجيلهم الهاجس ده خصوصا الي مش حركين ومش بيعرفوا يصطادو ولاد على رأي ماما
بس انا شخصيا ببقى عايزة اعند واعنس وأثبت اني ماخسرتش حاجة بشتغل وبنتج حتى لو مش بشتغل برده مبسوطة -بيت العز يا بيتنا-و اكيد ده خير انا مش اعرف منا ممكن اتجوز بسرعة ويلعنوا اليوم الي اتجوزت فيه وممكن اتجوز وانا عندي 45 سنة مثلا بعد الشر يعني :-)وتبقى باقي حياتي جنة
ده في الآخر نصيب وحاجة مليش يد فيها لانها رزق ومكتوب وقدر ونصيب
بالمناسبة انا عمري ما شفت ملكة جمال
متجوزة على حد علمي يعني

Anonymous said...

فى الاول انا احب احيكى على مدونتك وانا متبعة مدونتك من زمان اوى بس دى اول مرة اعلق فيها عندك فعلا فى ناس بتقول كلمة عانس دى ومبتفكرش انها بتجرح انا عندى 20 سنة ولسة بدرس فى واحدة صحبتى قالتلى الكلمة دى السنة اللى فاتت يعنى وقتها كان عندى 19 سنة ولسة الكلمة دى ماثرة فية لحد دلوقتى ومش قادرة انساها على العموم ربنا يرزقك يلبريد بالزوج الصالح انتى وكل البنات وانا اولكم يارب
مع تحياتى سلام

bluesky said...

ازيك برايد..
مايزال جهادنا مستمر ...بس واضح انك حولتي الجبهة ضد المجتمع و كلامه
حقيقي الكلمة دي صعبة اوي على اي بنت و الكل عارف كدة و عشان كدة أصلا بيستخدموها...عارفة الكلمة دي عملة زي ما حد يشتم حد بأهله بالضبط هو عارف انها هتوجعه و عشان كدة بقولها له ...ده مجتمعنا يا حبيبتي مبدع في الجرح و بس

أميرة البلطجية said...

ولا يهمك..ولا يهمني انا كمان..كت لسه بقول في البلوج بتاعتي امبارح..الكلمة شوية حروف..الناس هي اللي بتديها المعني ومادامتي انتي او انا او اي بنت في ظروفنا واثقة في نفسها وعارفة ان الالم اللي جواها ده مش بسببها هي وان كونها مرتبطتتش ده مش ذنبها ولا خطيئة تعير بيها
يبقي اللي يقول عانس ويقصد يبها اهانة
سورى يعني
يولع

khaled said...


عندك حق فى ان الكلمة بتوجع و انها اهانة للبنت
تصدقى
بالرغم من انى عمرى ماقلتها لاى بنت سواء قرية او بعيدة حبيبة او كريهة
بس اول مرة اعرف تأثيرها على واحدة بنت لأنى دايما اسمعهم (يعنى البنات) بيقولوا على نفسهم كده
فى الجامعة
فى التليفزيون
فى الراديو
فى الشارع
فى الشغل
و كله هزار
و صدقينى لو البنت ابتدت تقول على نفسها كده يبقى بتفتح سكة للولاد انهم يقولولها كده حتى لو قالت انها بتكره ان حد يقولها كده و ان هى بس اللى ليها الحق فى كده
مابينفعش
و اعتقد ان اللى قال كده هنا فى مدونتك كان زى كده
يعنى بيهزر زى ما البنات كلها بتهزر على بعض
و اسف فى الكلمة انتو يا بنات بتستخدموا كلمة مزة و الفاظ كتير على الملأ و ده بقى شئ عادى تفتكرى لو ناديتك بيها هتفرحى و تعتبريها عادى؟
نرجع بقى للمود بتاعنا اللى احنا متعودين عليه هنا فى بلوجك
تفتكرى ايه البديل لكده؟ قصدى للكلمة البعيدة دى؟
ههههههههه

Anonymous said...

مش همدح كلامك ولا هذمه بس فعلا لكل واحد فينا مشكلة في حياته لان مفيش سعاده مطلقة لان السعاده الحقيقه تنبع من الداخل بلاش شكوي من الناس وابتسمي لان الي زيك ممكن يشاركوا في صنع الابتسامه الي اختفت من عند ناس كتير انا متجوز وعندي 3 اولاد وبعيد عنهم مسافر يعني في كل ليلة بضحك علي نفسي اني سعيد وهنفضل ندور كلنا علي السعادة ومش هي بالتحديد شئ معين فية ستات كتير امنية حياتهم يطلقوا بل تمنوا انهم لم يتزوجوا وغيرهم حملوا لقب ارملة لو اطلعتم علي الغيب لاخترتم الواقع فيه عدد 3 لو في سوره الكهف انصح اي حد يرجع ليهم وهو هيرتاح جدااا هيعرف ان ربنا بيحب كل انسان مؤمن ومش هيسيبة ابداا لو نتعلم اننا نحمد ربنا من غير ما نقلب في الاسباب اما اقوم انام لحسن الساعة 5 الصبح جات تصبحوا علي خير adeL29@hotmail.com

khaled said...

بقت قصيدة كدة للمتنبى
ههههههههههههه

Dananeer said...

اولا انا عارفه ان ده اكتر بوست كتبتيه و ممكن يكون بيوجع
بس بجد اعتقد انك عبرتى عن وجع ناس كتير اوى
و اتمنى كمان ناس كتير تفهم و تحس و تبطل تجرح شعور اللى حواليها

بصى يا برايد المشكله اولا
الكلمه زى ما قولتى وحشه اوى و بتوجع
فيه ناس بتفرق معاها اوى

و بتترمى عاطل على باطل بقى مش فارقه

بصراحه انا شايفه ان مش مهم البنت تفضل من غير جواز
او يتاخر
عن انها تترمى فى جوازه من غير حب و من غير ما تاخد وقتها
و تفهم بجد يعنى ايه جواز

طبعا فى مجتمع زى مجتمعنا الجميل بيتبصلها تلات بصات

عانس

احذر هى صحيح قريبه بس مككن تحسدنا
و اكيد هدفها الاول و الاخير عريس
لو تطول تعلق يافطه حتعلقها

مسكينه ان شاء الله ربنا يعوضها

و انا شايفه
ان التلاته اراء متخلفه

لو المجتمع ما فرضش النظره دى معتقدش ان بنات كتير
كانوا حيتوجعوا و يتاثروا

بالعكس يكمن مكنش حيبقى فيه طلاق و مشاكل كتير

مش عارفه

المهم
اتمنى تكونى كويسه و بخير
متتوجعيش
كله باوانه

و صدقينى يا برايد
انتى رفعتى معنويات ناس كتير
و ناقشتى حاجات كتير مهمه
و الاهم انك بتتكلمى دايما فيها بابتسامه
و توصل للناس و معاها ابتسامه

reham said...

ما عاش و لا كان اى جاموسة يزعلك يا توتة ..و بعدين اللى بيقولوا علينا كده عبارة عن شوية حيوانات بصيين للدنيا من فتحة صغيرة و تلاقيهم كل الانجاز ان وجد يعنى بيتم فى قوضة النوم بمساعدة الفياجرا و يا ريت متبقاش كمان مضروبة..يا بنتى كتير من صحابى اطلقوا و كمان فى واحدة فى الطريق اليك و لما بشوفها و لا كأنها فى عزا..جمالها انطفى و كمان روحها..الحمد لله.. الله سبحانه هو الوحيد اللى منعه احسان..و هو مش بيعمل حاجة و حشة للانسان و كفاية علينا اننا حنبقى عرايس الجنة .. و حأبقى افكرك :)

BackBone said...

جري ايه يابنتي انتي بتخدي الكلام علي جوه كده ليه

الناس متقصدش الكلمه بكل معنيها السخيفه البتفهميها

مشكله تاخر سن الجواز ديه مشكله في كل مصر دلقتي و ده لان اصلاً حسب اخر تعداد مفيش غير 1.02 راجل لكل بنت

at birth: 1.05 male(s)/female
under 15 years: 1.05 male(s)/female
15-64 years: 1.02 male(s)/female
65 years and over: 0.74 male(s)/female
total population: 1.02 male(s)/female (2006 est.)

https://www.cia.gov/cia/publications/factbook/geos/eg.html#People

mesh2dra said...

السلام عليكم برايد
متابعاكى من زمان جدا ..بس اول مرة اعلق

بصي يا ستى لو عاوزة الصراحة
مالها القعدة جنب ماما
الله اقوم الصبح افطر معاها بدون ماالاقي حد بيصحينى ويقولى قومى اعمليلي الفطار بسرعة عشااان متأخر..طاخ

ولا مشاكل ..مشاكل
وتلكيك على الفاضى والمليان

متهيألى الواحد يقعد صحيح من غير جواز بدل مايقع فى واحد..الله يكرمه

وبعدين هما دلوقتى اللي حيجروا ورانا عشان نقبل بيهم
لاننا نعرف نعيش من غيرهم بس مايعرفوش يعيشوا من غيرنا

وبالنسبة للكلمة..عادى جدا
والله ده يا جماعة نصيب

واللي بيقولها تريقة مثلا مسيرة حيخلف بنوتة وتيجى فيها وتبقي ضحية كلمة باباها قالها زمان

يالا اضحكى بقي

قطر الندي said...

بصراحه بصراحه انا معاكي في كل كلمه قولتيها انا شخصياً عندي 27 سنه لكني مش باعتبر نفسي عانس خالص صحيح انا زي اي بنت عايزه اتجوز و اجيب ولاد قبل ماوصل سن اليأس لكن مش مشكله يعني لو الموضوع اتأخر لكن من فتره قصيره اتجوزت بنت خالي اللي اصغر مني بحوالي 6 سنين و اختها اللي اصغر منها بسنتين جايلها عريس و باتكلم معاها عادي عن المسؤليه و الحاجات دي تقولي انتي عايزاني اعنس زيك ...... بصراحه انا اخدت موقف منها لأن الكلمة جرحتني اوي و ادتني احساس انها متخيله اني غيرانه منها مع اني مش في دماغي خالص لكن انا عمري ماهانسي الكلمه دي ابداً بس عموماً اللي يقولها يقولها بقي ماهي مش فرقه

Lion king™ said...

كل حد وكتوب له هيتجوز امته ومين
ونصيبه هيكون عامل ازاي
ف الحمد لله على كل حال
في السراء وفي الضراء
وان كان كله من الله سراء
ونحن لا ندري

tamer said...

شوفى المجتمع عندنا بصراحة عايز تغير ثقافة من الاساس

الجواز دة اسمة ونصيب والواحدة او الواحد اللى لسة متجوزشى من الخطىء نقول عانس عليهم

هو افضل الزواج بدرى لكن الظروف الان اصبحت لها دور كبير فى الموضوع دة



اشكرك على البوست الجميل

تحياتى

ارحم دماغك! said...

لا تمسحيه ليه؟ :)
دي كلمة حق، حد يمسح كلمة حق؟ :)

smraa alnil said...

اولا
ان شالله يقعد عشرين سنة
ايكي تمسحيه
عشان الكل يقدر يقراه
بصي انا عندي 25 سنة
وكل بنات خالتي اتجوزم وخلفوا وانا اكبر منهم كلهم
لكي ان تتخيلي كمية الكلام اللي بسمعه من اهلي
زي ما يكون الموضوع دة بادينا
مانا زيك برضه بيجيلي شوية عرسان سكة بعيد عنك
وكلهم مش مناسبين
ولو عايزة اتجوز لمجرد الجواز كان زماني انا وانتي واي بنت تانية اتجوزت مع اول واحد يخبط علي بابها
لكن دي حياة ومودة واستقرار

الكلمة دي برضه بتتقالي
وبيني وبينك بتوجع في اليوم 874586843409 مرة
وفي ناس تقولي هتعملي ايه يعمي هتعنسي وافضلي ارفضي كدة لحد ما تعنسي
وهما مش عارفين وقع الكلمة دي عليا ايه
بس دة نصيب يا جماعه

بصوا هي مسالة شخصية بس انا هاخدها نموذج وربنا ما يوريها لاي حد

انا والدي متزوج بعد طلاقه من والدتي
واول ما اتجوز ساعتها مراته كان عندها 48 سنة
وكانت لسة انسة

بصراحة هي جميلة ومتعلمة تعليم عادي
واتخطبت مرتين واتقدملها مليون واحد
لك برضه كلهم مش مناسبين لحد ما وصلت لمرحلة انها خلاص مش عايزة تتجوز

لحد ما والدي اتقدملها وواافقت وتم جوازها

وهي مبسوطة معاه ومعانا

يعني بغض النظر دة نصيب وقت ما يصيبك هيصيبك

يعني ليه الناس بتوجعنا
لما اللي يعرفنا يشوفني ويعرف ان عندي 25 يقولي انتي هتعنسي زي مرات ابوكي ولا ايه

ياااااااااه كلمة تأثيرها ولو علي سبيل الدعابة مؤلمة

لنا الله وربك الي بيرزقك
يارب يا غادة ربنا يرزقك بابن الحلال اللي يعوضك ويهنيكي ويسعدك ويكون موردة ورحمة ليكي

وارجوكي رجاء مني انك مش تمسحي التدوينة دي لاي سبب كان
مدونتك مش للضحك وبس دي وراها حاجة
وانتي بتقولي اللي جواكي

آندى said...

اهلا برايد انا من بين الناس اللي جابو سيرة العنوسة دي بس ده لاني لقيت تعليق ليكي بتجيبي نفس الكلمة و انا بكره الكلمة دي
انا عمري 27 سنة و قريبا حتمم 28 سنة و مش شايفة نفسي عانس خالص و ممكن و انا اقل بكثير كنت بخاف من الموضوع ده
انا ممكن دلوقتي مش واقعية بس مقدرش اتجوز واحد مبحبوش او مبستلطفوش في كثير حوالية مبيفهموش حتى صديقاتي اللي كلهم اختارو ازواجهم مبيفهموش ليه مقبلش العرسان اللي هم بيشوفهم مناسبين و جدتي بتزعل مني عشان متجوزتش و بتقولي عايزة تكوني بايرة؟؟؟ و كلامها يعملي قلق
لكن انا اتمنى اتجوز راجل يكون مابيني و بينو توافق فكري و اجتماعي و يكون عندو اخلاق كويسة
مش صعبة دي؟
وانا كمان حصللي الحلقات زي اللي حصلتلك كثير
and I agree completely with SAmraa anil
ربنا يوفقنا جميعا ولو محبكتش نتجوز يبقى لازم نملا حياتنا و نلونها و ربنا يتمم بالخير لنا جميعا
تحياتي

masra7 El '3alaba said...

لذيذة برضوه و انتي بتتكلمي بجد ...

masra7 El '3alaba said...

انتي ليه مابتروديش علي التعليقات؟؟!!!

سلام

Anonymous said...

بنحبك يا برايد
والله بنحبك جدا
و على فكرة يا بخته بجد اللى هيفوز بيكي
يعني ما شاء الله عليكي انتي دمك خفيف وحبوبة ومرحة والانسان ما بيطلبش في رفيق حياته اكتر من الصفتين دول -والدين أولا طبعا- اما بأة المال بيروح والنسب برضة مش مهم اصلى مش متجوز واحدة عشان اهلها يصرفوا عليا ولا حتى الجمال بيبقى ده بعد أول حمل وولادة بتكون حاجة تانية وبتتحول لكائن قادم من أورانوس
بجد ربنا يسعده أكتر واكتر اللى مكتوب لك فى اللوح المحفوظ انه من نصيبك ويارب يرزقني بواحدة ليها خفة دمك وربنا يعلم ان لولا الناس دلوئتى بتفهم بعضها غلط وان ممكن كلامي يزعلك انا كنت قلتهالك صراحة ان يارب ربنا يرزقني بيكي انتى
ولو اقولك انى لما استشفيت من كلامك-شفتي استشفيت دي- لما فهمت من كلامك انك صيدلانية فى مستشفى غالبا وانك قاهرية غالبا فكرت مرة انى الف على كل صيدليات المستشفيات فى القاهرة وانده بصوت عالى : يا برايد ولو رديتي او التفتي يبقى انتى
انا كمان نفسي اتجوز وهموت على عروسة ولو عروسة ورق أو عروسة المولد حتى
ياللا مش مهم
ربنا يرزقنا أجمعين
ومش هكتب لك عنوان مدونتي لكن انا زائر يومي عندك واتمني انى اشوفك مبسوطة وسعيدة ويارب يرزقنا كلنا فرادي او سوا سوا
ومش عايز اشوفك مكشرة او زعلانة تانى والا والله لاعيط انا كمان
يا برايد انتى غالية اوى واعتقد ان من اجمل الحاجات فى الوجود انك تعرفى انك غالية عند شخص ما فى الدنيا دي وانه بيحبك بجد(فى الله يعني عشان ما تفتكرينيش عايز اتصاحب او اظبط صاحبة يعني)
وربنا يهدينا أجمعين
وبلاش نكد فى المدونة تانى يا جميلة
سلام

gygy_ahmed said...

بصراحة انا يمكن اكون معجبة بكلامك بس فىنفس الوقت عايزة اقول لكل البنات اللى مش مرتبطين


ياريت تحافظوا علىالنعمة اللى انتم فيها

مقدرش اقول اكتر من كده




بس حقيقى تدوينة جامده

اختك
gygy_ahmed

حماكى said...

الكلام اللى قولتيه ده يا برايد فيه مغالطات كثيرة .. و خلط للأوراق .. فيه فرق بين النية الحسنة و النية السيئة .. و العيوب اللغوية و الحساسية الذاتية و الجهل الشائع

المهم .. ان للأسف الشديد .. ان الإنسان اساسا قد لا يحس بفداحة وضع معين حتى يجربه بنفسه .. زى مثال النشال اللى ذكرتيه

طه حسين نوه بلفظ "أعمى" و كذلك جميع اصحاب العاهات .. او اصحاب "النقص" فى شيئ ما .. خذى عندك الأصلع جزئيا و او كليا .. و القصير بشكل متميز و الطويل بشكل متميز .. و عندك كمان "المطلقة" .. رغم ان ممكن ما يكونش ليها ذنب .. خدى عندك الفقر و الفقراء .. و لفظ فقير .. خذى عندك اصحاب المهن المتواضعه "زبال" و كناس .. و بتاع مجارى

المسألة ليست يا عزيزتى بالبساطة التى عرضتيها .. و ليس كل من ينطق مثل هذا اللفظ بالضروره سيئ النية و ابن ستين فى سبعين .. و متعمد الإهانة او السخرية

لازم تعرفى ان ربنا سبحانه و تعالى بيقسم الحظوظ و الأرزاق .. ايه ذنب الفتاه التى تصاب بشلل اطفال فى صغرها .. أو الفتى .. ايه ذنب الإنسان الذى يقع ضحية حادثة فيبتر له عضو أو يصاب بحروق لا يبرأ منها .. ما ذنب المريض الذى يصاب بالجرب او الجذام

ياريت اللى انا قلته يشجعك للقراءة و محاولة فهم عله الأمور .. و العوائد الإجتماعية .. و حجم المأسى التى قد يعيشها كثير من البشر

مع تحياتى

حماكى بكندا

حماكى برضه said...

الأخ انينموس .. ياريت تبعت الكلام اللى حضرتك تفضلت بيه هنا الى برايد فى رسالة خاصه بها (العنوان فوق الساعة) احنا اللى يهمنا هنا كأصدقاء هو النتيجة النهائية .. مش عايزين نسمع التفاصيل

علما بأنى كنت حاجز برايد لأحد أولادى


حما برايد فى كندا

masrry metgharb said...

عزيزتى برايد
احنا ماتعودناش منك على الجد ده بس اسمحيلى انا مختلف معاك أولا لازم تعرفى ان الموضوع ده زى الشغل وزى الرزق هو عبارة عن نصيب واقدار ربنا سبحانه وتعالى مقدرها ومكتوبة فى كتابك وانتى لسة نطفه

اما البنات الى بيزعلو من الموضوع ده عايز اقولهم أكيد الى بيقول الكلمه دى مريض او ناقص حاجه بيعوضها فى انتقاد الاخرين بدل ما يصلح فى نفسه وبيوجهها لكم دون وعى منه ان هذا الامر ليس بيدكم وليس بسبب تقصير منكم والعيب بجد انكم تخلوا ده يأثر عليكم
وبعدين ايهما افضل ان تتزوجى انسان غير مناسب فقط لتسكتى الاخرين وتحزنى نفسك وتحصلين على لقب اخر اما تعيسه او لاقدر الله مطلقة

عزيزتى برايد وضعكم بنات اليوم ليس لكم دخل به وانما هو بسبب ظروف اقتصاديه واجتماعية ظالمة مجحفه وبسبب عقليات مريضة هذة الظروف لها سببين اولهما النظام وثانيهما الاهالى وأولياء الامور ومطالبهم التى تجعل معظم شباب اليوم يعزفون عن الزواج

كنت وما زلت معجب بطريقة سخريتك من الوضع الذى نعانية جميعا مع اقاربنا وفى بيوتنا وان كنا ندعى كذبا اننا لا نتأثر بهذا الا اننا داخليا نحزن كثيرا ونتمنى تغيير هذا الوضع

استمرى فى الكتابة واستمرى فى اضحاكنا واعلمى ان نصيبك جايلك جايلك وساعتها هاتندم ياجميل

Ehab said...

شوفي يا اخت برايد احسن خمس حاجات في الدنيا ثلاث حاجات الصحة و الستر :) اوعي تزعلي انتي زي الفل بكره هاتشوفي الخير اللي هايجيلك كل شيئ نصيب و انشاء الله نصيبك زي الفل ، علي فكره انا زوجتي كانت عندها تسعة و عشرون سنة لما تزوجتها و سبحان الله زي ما يكون ربنا كان شايلهالي علشان انا مكنتش بفكر في موضوع الزواج ده قبل كده و هيه كانت نصيبي و ربنا حافظلي عليه ، اكيد في واحد دلوقتي ربنا محافظلوه عليكي فاهمه ؟

مصر هى أمى said...

برايد
ولايهمك من الكلمة ديه لازم تكونى قوية انا عارف ان الكلمة ممكن تكون جارحة لاى واحدة بس هوا لازم الواحد يؤمن بالنصيب
بس الموضوع ده مش للبنات بس كمان للرجالة اللى مش لاقيين يتجوزوا اما يحضروا فرح اى حد من قاريبهم او اصحابهم برضة بيكونوا متضايقين انهم لسة متجوزوش والناس كلها بتتجوز
فمعلش لازم الولد والبنت يؤمنوا بالنصيب

Anonymous said...

هل تفكرت يوماً في حقيقة وجودك، كيف حملتك أمك ثم ولدتك، فجئت الى هذا العالم ولم تكن من قبل شيئاً؟

هل تأملت يوماً كيف تنبت تلك الأزهار المزروعة في أحواض غرفة الجلوس من قلب تراب أسود فاحم موحل بألوان زاهية وشذىً عطر؟

هل شغلك انزعاجك من طيران البعوض حولك عن التفكر كيف انها تحرك أجنحتها بسرعة فائقة تجعلك غير قادر على رؤيتها؟

هل تفكّرت يوماً بأن قشور الفاكهة المهملة هي في حقيقتها أغلفة حافظة عالية الجودة، وبأن هذه الفاكهة - كالموز والبطيخ والبرتقال مثلاً- موضبة في داخلها بطريقة تحفظ طعمها وشذاها؟

هل تدبّرت يوماً كيف يمضي العمر حثيثاً، فتذكرت أنك سوف تشيخ وتصبح ضعيفاً وتفقد جمالك وصحتك وقوتك؟

هل فكرت في ذلك اليوم الذي سوف يرسل الله فيه ملائكة الموت لترحل معهم عن هذا العالم؟

هل تساءلت يوماً لماذا يتعلق الناس بدنيا فانية فيما هم بحاجة ماسة الى المجاهدة من أجل الفوز بالآخرة؟

ان الانسان هو المخلوق الذي أنعم الله عليه بملكة التفكير، ومع ذلك فإن معظم الناس لا يستخدمون هذه الملكة المهمة كما يجب، حتى أن بعض الناس يكاد لا يتفكر أبداً!..

في الحقيقة كل انسان يمتلك قدرة على التفكر هو نفسه ليس على دراية بمداها، وما ان يبدأ الانسان باستكشاف قدرته هذه واستخدامها، حتى يتبدى له الكثير من الحقائق التي لم يستطع أن يسبر أغوارها من قبل. وهذا الأمر في متناول أي شخص، وكلما استغرق الانسان في تأمل الحقائق، كلما تعززت قدرته على التفكر. ولا يحتاج الانسان في حياته سوى هذا التفكر الملي والمجاهدة الدؤوبة من بعده

Anonymous said...

المساواة للرجال للتغلب على العنوسة
يحب التحذيرمن تطبيق القانون الجديد للعنف الأسري لأننا اصبحنا في زمن كثر فيه القضايا الكيدية التي ترفعها الزوجات (القرآن وثق اول قضية تلفيق نسوي و اتظلم فيها سيدنا يوسف) و اطالب بتسهيل إجرءات الطلاق بالنسبة للرجل لأن المشكلة الأساسية التي نكابر في مواجهتها هي نشوز المرأة و تجرأها على الرجل بأبشع الألفاظ امام أولاده بل والمبادرة بمد يدها عليه فماذا يفعل هذا الرجل؟ كما ان الإعلام و المسلسلات اصبحت تأتي بمشاهد إهانة الزوجة لزوجها بصفة متكررة. إذا اردنا تقليد الغرب سنتهي بنا الحال إلى نفس النتائج ، إضراب عن الزواج حتى وصلت نسبته إلى 4 بالألف و وأولاد ذكور يرتدون الأقراط نتيجة لنزع الرجولة منهم نتيجة ما يرونه من إذلال للأب و الرجولة بصفة عامة. اصبح الشباب في مصر يتحدثون عن خوفهم من الحبس لإتهامهم كيدياً بتبديد العفش أو عنف أسري أو لعجزهم من دفع نفقة ظالمة ويؤمنون أن الجواز اصبح قلة قيمة و بهدلة للرجل

Anonymous said...

أتذكر و أنا أشاهد القانون الحالي للأحوال الشخصية القانون القديم الظالم للعلاقة بين المالك و المستأجر حينما تركت المستأجر يستهبل على المالك و يستولى على شقته بحجة أن المستأجر ضعيف و يستحق الحماية متناسين أن القرآن الكريم انتصر لصاحب ال99 من الغنم و اعتبر ان صاحب الغنم الواحدة هو الظالم لأنه كان بيستهبل على مالك ال99 من الغنم فالله عز وجل هو العادل.
ساعتها الحكومة قالت للمالك ماتخافش فالمستأجرون ناس كويسين و مش حيستولوا على شققكم و حيسيبوها من نفسهم بعد كام سنة. ماذا حدث بعد ذلك؟ ببساطة لم يوجد مالك واحد يؤجر شقته فانهار القانون تلقائياً.
اعتقد ان هذا ما يحدث القانون الحالي للأحوال الشخصية، فسيضرب الشباب عن الزواج و ستزداد العنوسة حتى تضطر الدولة لتعود إلى صوابها و تلغي هذا القانون.
فمن هو المجنون الذي مستعد للإستعباد من قبل زوجته و اهل زوجته؟ من هو المجنون الذي يصدق الحكومة أن المرأة كائن عاقل لا تنتابه حالات غضب مفاجئة قد تدمر هذا البيت و تحرم الأب من اولاده مدى الحياة (بعد ان مدوا مدة الحضانة). الله عز وجل جعل العصمة بيد الزوج لعلمه بطبيعة المرأة الإنفعالية، فهل نصدقهم ام نصدق الله
الإحصائيات تقول ان المرأة هي المجرم الأول على الأرض و الضحية هي اولادها، و الجريمة هي الإجهاض. ولا أحد يحاسب المرأة على تلك الجريمة لأننا فى زمن اصبح اشباه الرجال يخشون غضب المرأة.
حتى في صعيد مصر تربي المرآة أولادها الذكور لكي يتم توريطهم في عمليات قتل تنتهي بقتلهم هم شخصياً بإسم الثأر بتحريض منها و لا ينتبه الرجال في الصعيد إلى هذه المؤامرة النسائية.
90% من الأطفال المرافقين للنساء الشحاذات هم من الأطفال المخطوفين لكي يتم استغلالهم في عمليات الشحاذة و ولا أحد يعاقبهن أو يعدمهن فالكل يخاف من المرأة هنا. مع إن لو طبقنا اختبار الحمض النووي لقبضنا عليهن جميعاً وارجعنا الأولاد إلى اهلهم الحقيقيين.
المرأة التي يتم تقويتها تتمرد و تسب زوجها وأمام اولاده و قد تخونه إذا فقدت احترامها له و يأتي بعض الشيوخ بمنع الأب من اختبار الحمض النووي على اولاده للتأكد من نسب اولاده مع ان القرآن قال (إدعوهم لأبائهم هو اقسط عند الله فإن لم تعلموا ابائهم فاخوانكم في الدين و مواليكم)
، و نحن الآن نعلم باستخدام الحمض النووي، ثم لاماذا لا نفصل بين احتبار النسب و اتهام الأم بالزنا؟ الكل يخاف من المرأة المهم ستر الأم حتى لو اختلطت الأنساب و تزوج ابن الزنا من اخته مش مهم، و مش مهم المواريث و طبعاً مش مهم الأب، أي منطق هذا ؟
مين المجنون الذي يغامر بشراء شقة ب 200 الف او يزيد لكي يتم الاستيلاء عليها بمجرد ان تنجب الزوجة طفلاً؟ و في اي شرع ان الزوج يسجن إذا كان معسراً و بأي حق يتم المبالغة في النفقة ؟ ما هذا العبث؟
إن المرأة الآن حافظة ماالذي تفعله: 1- تزوجيه 2- انجبي طفلاً 3- افصليه عن اهله تماماً 4- قرقشيه براحتك.
اتوقع ات تبلغ العنوسة المعدلات الموجودة في الغرب و سترون المهازل في هذا المجتمع إذا لم يتم ايقاف هذا العبث.

Anonymous said...

أنا عايز أقول ان المناخ العام في مصر هو مناخ فيه احتقار و تربص بلرجولة و مش عارف في مصلحة مين ده، ده اكيد في مصلحة اسرائيل يعني لو حصلت حرب تاني بيننا و بين اسرائيل مش الرجالة اللي المفروض يدافعوا عن مصر و الا ساعتها بتوع تمكين المرأة هم اللي حيتصدوا للأعداء بعد ما يكونوا دمروا الرجولة في مصر؟ حتى الأمريكان اتبهدلوا بسبب الحركات النسوية وشوف الصين عاملة فيهم ايه و شوف اشباه الرجال عندهم اللي بقوا في كل حتة و الله حل مشاكل العالم ده كله ان صوت المرأة الانتخابي يبقى نصف صوت الرجل عملاً بمبدأ ان شهادتها نصف شهادة الرجل و ده اللي حيوقف الحركة الصهيونية اللي بتخاف من الرجالة الحقيقيين عند حدها

يا مراكبي said...

عزيزتي برايد

أسوأ حاجة أنا بألاحظها في الناس هي معايرتهم للآخرين بشئ قدري مش هما السبب فيه .. أو إنهم بيفتخروا بشئ عندهم قدري برضة وكأنه إنجاز شخصي مش نعمة من عند الله

كتير بأشوف واحدة ربنا أعطاها ثلاثة أولاد ذكور بتعاير جارتها اللي ربنا أعطاها ثلاثة بنات .. وكأن الذكور دول كانوا إنجازها الشخصي وجابتهم بشطارتها .. وكأن جارتها خايبة أو بتتعاقب بالبنات دول

طبعا كلامي واضح .. وياريت الناس تفهم

يا مراكبي said...

نسيت أقول حاجة كمان .. بلاش تمسحي البوست .. ياريت ماحدش يمسح أي حاجة من تاريخة .. ماحدش يقدر ينسي أو يلغي أي لحظات عدت من حياته

shams said...

أنا حسيت فعلاً بمدى حرقة الكلمة في نفسية البنت لما سمعتها بتتقال لواحدة صحبتي قريبة مني اوي ساعتها قلت حسيت زي مايكون سكينة وقطعت قلبها .. المشكلة مش فينا يابرايد المشكلة في المجتمع اللي بيبص للبنات اللي بيتأخروا في سن الجواز على إنهم عوانس هم اللي حسسوا البنات إن كده هم غلط وشكلهم وحش .. لو سابوا البنات تعيش حياتها عادي سواء مستنية نصيبها أو مش مستنياه كل واحدة وبراحتها مكانتش كلمة زي دي أصلاً اتقالت ولا كانوا اخترعوها وكمان لو البنت مش في دماغها انها اتأخرت في الجواز أو متأخرتش يعني مش شاغلة بالها بالموضوع ده وحد قالها الكلمة دي بتحس ان الناس فاهماها غلط وتكتئب وتقول يعني أنا اخترت لنفسي اني مبقاش زعلانة من الموضوع ده يقوموا هم يعكرو على حياتي ويفتكروني بمثل عليهم اني مش زعلانة ويتهموني بالعنوسة .. أيوة المجتمع لما بيقولها للبنت بتبقى عاملة زي الاتهام بالضبط .. متمسحيش البوست يابرايد .. يمكن تفرق مع ناس كتير

esraa said...

لأ بعد الشر عنك من الموت
هي فعلا كلمة عانس كلمه مش ظريفه, وهي فعلا مش بتتقال علي البنات الحلوين,صحيح أنا عندي 21 سنه يعني لسه مادخلتش حيز الكلمه دي, لكني بضايق لما حد يقولها علي بنت , لأنها ذننبها ايه؟ بس بتبسط من البنات اللي بيضحكو وياخدو الموضوع عادي يعني,هما اللي اتجوزو اخدو ايه؟

Shiko said...

سبحان الله محدش عاجبه حاله

لا اللى متجوزش سعيد ولا اللى معاه اولاد مبسوط

والكل بيبص للى فى ايد غيره فى حين ان لو كل واحد يرضى باللى ربنا قاسمه له هنبقى كلنا فى منتهى السعاده

ويا سلام لو الناس تراعى مشاعر بعضها وتحاسب على كلامها بالاخص ان اللسان ده هو اللى هيزج بينا فى النار

Sampateek said...

لو تعرفي
ان في متزوجات كتير بيتمنوا انهم كانوا يفوزوا باللقب ده


متحسبوش يا بنات


ان الجواز راحة

شــــمـس الديـن said...
This comment has been removed by the author.
شــــمـس الديـن said...

السلام عليكم و رحمة الله و بركاتة

الاخت العزيزة جدا برايد

مقالك دا حلو و حيوي ... و ردي هيطول و خايفة مش تقرأية ... و مش عارفة انت بتقرأي ردودنا عليكي ولا لأ

بس زي ما انت كانت فيه كلمتين محشوورين في زورك ...انا كمان عايزة اقول كلمتين اتحشروا في زوري :)

كان هناك صديقة لمرات عمي ... متعلمة و مهنتها مرموقة اوي ... و هي من النوعية اللي مش بتعرف تصتاد عرسان زي حالاتنا ... تقدمت جدا في العمل و التعليم ... و للاسف مكنش حد بيتقدم لها , لحد ما اتقدم لها واحد من نظام الغني لكن دون ثقافة ... بيتة تعبان جدا و صارف كل فلوسة علي المنظرة ...كان عمرها وصل ل 31 سنة و الكل نصحها انها تقبلة ... لكن هي قالت انا مش حاسة معاه بأي توافق و مش ماوية تصوم و تفطر علي بصلة ...
و مرت الايام و تقدمت في عملها جدا لحد ما اصبحت منصب مهم في اليونسكو ... و بلغت الاربعين ... و تعرفت علي رجل ااجنبي اثناء اسفارها ... و اعجب الرجل بعقلها و اقترب منها و تعرف علي الدين الاسلامي و قرر ان يعلن اسلامة و تزوج صاحبتها هذه اللي عندها اربعين سنة و الحمد لله ربنا رزقها بطفل كمان ... و عايشة بجد معاه حياة رائعة

انا في عملي تقريبا كل البنات اللي بشوفهم كلهن متزوجات و عندهم ابناء و هن اصغر مني بمراحل ... بس ارجع اسئل نفسي .. هما فعلا عايشين ولا جوازة و السلام ؟؟؟
بيجاوب علي سؤالي جمالهم اللي اطفأ و نظرة المرار و الهم اللي بشوفة علي وشهم بتخليني احمد ربنا الف مرة اني لسة مرتبطش ولا اتجوزت ...
دا غير ان حالات الطلاق بجد و الله العظيم في ازياد بشكل بشع - الا ما رحم ربي - و الست فعلا بتتبهدل و متصدقوش اللي بيتقال ان الستات بتخرب البيوت ,بجد و الله الست اصعب حاجة عليها انها تحمل لقب مطلقة - بس هما الناس عمرهم ما اختما انهم يفهموا نفسية النساء - بس للاسف فعلا فيه فجوة نفسية بين الرجال و النساء ان الرجالة تقريبا بقوا رجالة بالاسم بس و افتقدوا الجوهر الحقيقي للكلمة علشان كدا النساء في معاناه مستمرة ...لان الحياة بينهما تكامل ..

في نظر الكثير من الناس انا عانس و في نظر الاخرين انا لسة مطلعتش من البيضة لاني لسة متخرجة من الكلية السنة اللي فاتت ... و بصراحة بردوا اهلي مش محسسيني باي حاجة خالص و الموضوع بالنسبة لي فعلا عادي و مش بيضايقني ... بس عامة ...انا كفايا عليا الاقربون انهم مراعيين مشاعري ...و بقيت الناس تولع بجاز لان الناس عمرها ما هتبطل كلام , فاتعودت اني لا القي بالا لما يقال اساساً

عامة انا معتزة دائما بانسانيتي يعني صراحة مش هقبل انه يتم تقييي علي اساس انه انا متجوزة ولا لأ !!!و اللي يعمل كدا يبقي سوي غبي و مبيفهمش , لانه دا هبل لان دا امر خاص بيا انا و بس ... و اللي يهم الناس في تعاملاتي معهم و اخلاقي و ان اكون فردا صالحا اخدم امتي ...

انا شايفة ان الزواج دا رزق ... زية زي الغني و العمل و كل حاجة مقدرة و ربنا مخليها بوقت و ميعاد
و زي ما بيقولوا " قعدة الخزانة ولا جوازة الندامة "

معاني المفردات :
الخزانة : بيت ابوكي

...و مشكور اخونا اللي جاب الاحصائيات ان الرجالة نسبتهم اكتر من الستات ... :))

بس هي الازمة الحقيقية في وضع البلد الاقتصادي المهبب + الناس اللي معاهم فلوس معندهمش اخلاق و اللي عندهم اخلاق معندهومش فلوس ...

ربنا يجحم اللي كان السبب

Anonymous said...

معلش الايزهمر اللى عندى .. انا قرأت الموضوع تانى وغالبا هاقول كلام غير اللى انا كنت كتبه خالص ..

مشكلتنا فى نظرتنا للدنيا .. والهدف من الحب والجواز ..
مشكلتنا فى مواصافات شريك الحياه ..

انا مثلا اهم شرط عندى ان اللى هارتبط بيها يكون مخها كبير .. فاهمه الدنيا .. فاهمه الدنيا مش معناها انها تعرف من اين تأكل الكتف .. بس معناها انها تكون عارفه ان الدنيا ديه ولا حاجه ..

يعنى انا مثلا نفسى ماعملش فرح ولا اى حاجه من ديه .. وبالفلوس ديه مثلا اجيب لزوجتى عربيه .. او حتى نحج .. او حتى نعمل شهر عسل جامد .. يمكن يكون تفكيرى عملى شويه :)

نفسى مراتى ماتبقاش زى اغلبيه الستات .. شوفت مين عمل ايه , ديه قلاتلى ايه لازم تشوفلك صرفه .. ماترحش هناك تانى ....

نفسى لما تلاقينى بصرف فلوسى فى الخير تشجعنى ..

كل ده هانلاقيه تحت مسمى ان الزوجة تكون صالحه ..
والكلام ده ينطبق على الرجل ..

مشكلتنا فى تعريف الحب ...
مشكلتنا اننا بنحب الجسد مش الروح ..

هههه كلام انشاء ..

كل واحد نفسه يتجوز من سعاد حسنى .. وكل واحده نفسها تتجوز من عمرو الشريف !!

انا بعدت عن الموضوع .. نرجع ليه تانى ..

اول حاجه لازم نعرف احنا عاوزين نتجوز ليه ؟
فى رائى لأن الجواز احتياج نفسى وجسدى ( نفسى فى انى اكون اب|ام .. ان فى واحده | واحد جنبى اسند راسى عليه لما اكون تعبان .. وحاجات تانيه كتير اوى الجواز بيشبعها نفسيا .. , وجسديا لان ديه غريزه فينا ) .. , الواحد من غير شريكه جزى كتير اوى من طاقته النفسية والجسديه بيكون مهدر .. وخصوصا هنا فى مصر حيث كلام الناس والكبت الخ ..
فالواحد لو اشبع الحاجات ديه .. ووفر الطاقات ديه .. بيكون اكثر انتاجا فى الحياه .. واكثر قدره على التقرب من الله ..

نيجى للسؤال التانى .. مواصفات شريك الحياه للى تحقق اللى احنا عاوزينه .. ؟!
تنحصر فى معنى واحد انه يكون ذات دين .. ( مش عاوز اعيد وازيد فى انه لازم يكون فى توافق اجتماعى .. وارتياح نفسى ..الخ ) لان ده شئ بديهى ..

لو لقيت فى طريقه واحده او واحد هايسعدك فى تحقيق ده لا تردد فى ان تخطفه !!!

-----------------------------
نرجع بقى نرد على اللى بيبحثوا على فارس الاحلام اللى جاى على جواد ابيض .. لو بصينا من الناحيه الرياضيه .. هانلاقى ان احتمال انك تقابلى نصفك الاخر (يعنى اكتر واحد مناسب ليكى ) شبه معدوم لان عشان تقابليه لازم تقابلى كل شباب الكره الارضيه .. وبعد ماتقبليهم تختارى صح .. وبعد ماتختارى هوا كمان يحبك .. يعنى تقريبا شبه مستحيل رياضيا ..

يعنى بصراحه كده لو الواحد اختار الواحده بقبله -فقط- هايتعب قوى .. ليه !!!
لانى بالقلب معناها انك هاتنجذب لصفات حسيه .. زى المرح ..الشكل الحلو الخ .. وهاتلاقى نفسك كل شويه بتسأل نفسك السؤال ده هوا انا اختيارى صح !!؟ هل هيا ديه فتاه احلامى . ولو قالبت واحده احلى تبتدى تقول ممممم اعمل ايه ديلوقتى افركش الخطوبه ولا ايه .. ولو كنت متجوز تبتدى تصاب بالكتئاب او بعدم الرضا .. كل ده عشان هدف الجواز واسلوب الاختيار عندك خطأ ..

لكن لو انا مرتبط بواحده .. بحب روحها . راضى عن شكلها .. عارف انها هاتوصلنى للهدف اللى انا عاوزه من الجواز .. ايه اللى هايخلينى ابص لواحده تانيه .. اذا كان كل الطرق تؤدى الى روما .. ده مش معناه انى مش بحبها ... بالعكس بعشقها .. بس بالعقل والقلب مع بعض ..

--------------------

مأساتنا هنا ان البنت مش بتختار :( فلو بنت مخها نضيف هاترتبط بواحد مخهه نضيف ازاى :( مشكله .. بصراحه مش لاقيلها حل :(


بس لازم نبتدى نكون عقلانيين .. مفيش حد 10|10 .. زى ماشريك الحياه مش عشره على عشره بالنسبالك . انت كمان مش عشره على عشره بالنسباله .. المهم اننا نشوف الناس اللى ممكن نتغاضى عن عيوبهم ..

ايه كمان ...

عدم جواز البنت فى رائى مأساه عليها :( ضغط عصبى رهيب عليها وعلى اللى حواليها .. خصوصا فى المحروسه مصر ..

لو البنت لسه مافيش حد اتقدمهلها ..لازم تبص لهدف الجواز وتحققه لحد ماتتجوز ..
نرجع من اول السطر . هدف الجواز توفير الطاقات النفسيه والجسديه للقرب من الله .. عشان ده هدفنا فى الدنيا ..
ماعرفتش اتجوز يبقى احاول احقق الهدف من الجواز فى انى افوز بالاخره .. مع شويه ايمان ورضا ..

فى لكل فتاه عاوزه تتجوز ..
- دول هما كلهم على بعض 60 سنه الواحد هايعشهم بالطول بالعرض ..
- مضايقه من نظره المجتمع .. يبقى فى حاجه فيكى غلط .. لازم تعيدى تفكير تانى .. "ط** فى المجتمع"
- مفيش واحد شخصيتها كويس مش بتتجوز .. اللى بيتجوز نوعين .. واحده جميله .. او شخصيتها جذابه .. حاولى تنمى شخصيتك .. عشان تبقى جديره بفارس الاحلام ..
- تحررى من كل القيود عشان تبقى شخصيه جذابه .. وعيشى حياتك ..
- ذهب الدنيا بدون رضا لا يساوى نحاس الدنيا بشويه رضا .


عدم الجواز ليه كذا زويا ممكن ننظر منها .. فى زاويا بتخليه مشكله .. فى زاويا تانيه بتخليه حاله .. فى زاويا تانيا بتخليه فلسفه .. فى زاويا تانيه بتخليه رضا ..

زاويا الرضا مع زاويه الفلسفه بتساعدك انك توصل لهدفك ( الجنه ) بطريقه اسرع ممكن تكون اكثر وعوره من طريق الجواز ظاهريا .. بس ماحدش عارف الغيب فى ايه ..!!


ياريت الكلام يكون مفهوم لانى بصراحه كنت بفضض بالافكار اللى جاتلى لما قرأت الموضوع ..

واضح انى زودت جرعة الحشيش النهارده :)

سلام

copied from this url
http://maganin.com/forum/forum_posts.asp?TID=5882

عبدالله said...

بجد موضوع مهم جدا الكلمه دي ناس كتير بتعتبرها عاديه
بس دي فعلا صرخه ان في ناس كتير بيضايقوا منها و مش لازم تتقال

بس ايه النظام بجد يا برايد انتي عايشه الدور ليه كده انك كبرتي يا بنتي
:)

تحياتي

Miss. E said...

برايد...
ازيك..
من متابعتى لمدونتك واعجابى بأفكارك و موقفك حسيت ان احنا قريبين من بعض

مش هاقدر اضيف جديد بعد كل اللى اتقال.. بس فعلا.. ان من حوالى شهر و شوية اعلنت قدام نفسى و قدام ناس كتير انى كفرت بالمجتمع اللى احنا عايشين فيه.. رغم انى ماشفتش كتير بس شفت ما يكفينى

رأيى.. ماتشيليش البوست ده.. و يا ريت كل واحد يشوف حاجة غلط فى المجتمع ده ياخد منها موقف بجد
كفاية كده بأه
سلام

mano said...

انا مقتنعه بكلامك جدا
و الكلمه دى بتستفزنى
و لو حد قالها امامى حتى على واحده عندها ستين سنه مبسكتش
و بدى درس فى الأخلاق على طول
و للأسف المشكله مشكلة ثقافه اتعودنا عليها

khaled said...

انا مع الناس اللى بتقولك بلاش تمسحى البوست ده
هو الجد يتمسح و الهزار يستنى؟
بلااااااااااش يتمسح

Anonymous said...

مهندس /رامى : احب اقول لكل البنات و الولاد ان احنا مش عايشين علشان نرتبط ببعض وبس يعنى من الاخر السعادة مش فى الارتباط بس السعادة حالة احنا بنوجدها لنفسنا بحب الناس لينا بقدرتنا على التسامح او قدرتنا على فعل الخير و حب الناس "كن جميلا ترى الوجود جميلا"

ودائما بفكر نفسى ان اجمل قصة حب لسة معشنهاش وان عندنا كلنا مخزون من الذكريات و الخيال الجميل اسمة الحب الاول لما كنت و كنا لسة بنحب الحب وبنعشق بعض بجد مش لاى غرض

كراكيب عادل said...

تمسحيه ولا تخليه اتحسب عليك وخلاص

مذكرات حاحا مصر said...

عزيزتي بريد
لما كل هذا الالم في حديثك فلو كان احد الزملاء تحدث بكلمة قاسية او جارحة فنحن اتفقنا من قبل ان الناجحين يجب ان يتحلوا بالصبر والثابرة وانا امعك تماما في ان عدم احترام بعضنا البعض اصبحت عادة بيننا ولم ولن نحترم بعضنا البعض بالاضافة الا اني لم اجد حتي الان مرادف لكلمة الراجل العانس يعني هي على البنات بس برغم اني اعرف رجال كثيرون تعدوا سن الاربعين ولم يتزوجوا رغم القدرة المالية والصحية ولكن مش كل اللى مش عايز يتجوز يبقي عانس فالكثير من البنات اليوم تفضل الحصول علي الشهادة الجامعية وممكن كمان الماجستير والدكتوراة قببل الزواج وهذا من حقها رغم اني اعترض علي ذلك وايضا لا تنسي اننا نفضل موقعك لعدة اسباب هي بالتحديد التمتع بكتابتك الساخرة من احوالنا بعد ان ضعف انتاج كتابنا مثل احمد رجب ومحمود السعدني وكذلك اسلوبك الرفيع والمهذب في عرض الموضوعات وعلي ما اظن اننا تحدثنا في ذلك من قبل وان ذكرت بعض الصحف بعض الملومات عن البلوج الخاص بك ووضعوها تحت بند بنات تبحث عن زواج فسمحي لي ان قصر نظروعدم وعي مهني من الصحفي ( غباء يعني او هبل زي ما تسميه انتي)فلا تشغلي بالك
اما بخصوص مشكلة عدم زواج البنات فهذا مشكلة لها عدة اسباب منها
هطل الرجال وعدم وجود هدف لحياته وفشله في تحقيق ذاته والاعتماد على الحكومة او الاهل في توفير العمل والمسكن والعروسة لازم تبقي شكل واحدة من الممثلات يعني تكون ؟؟ زي ما انتي شايفة ومش ناقص انه يسال ابوه علي مظاريف العيال وكمان هناك مشكلة في البنات وهي لازم يكون العريس اساسي يكون وسيم وغني وشخصية وطويل وعريض ( طيب واحنا هنجيب المقاسات ديه منين في الزمن العجيب دهه) لازم الواحدة ترضي انها تبدا زي ما اهلها بدوا يعني مش لازم كل الاجهزة الكهربائية والعفش لازم من المهندسين او مصر الجديدة ولازم الشقة تبقي مش عارف ايه يا جماعة في هطل بين الشباب البنت والولد مش عايزين يتحدوا ويتغلبوا علي المشكلة ( واللهي انا اعرف واحد ميسور ماديا ومهندس ووسيم وعنده حوالي 43 سنة ومشعايز يتجوز الا علي مزاجه يعني لازم تكون جميلة جدا؟؟ ومثقفة ؟؟ ومتدينة ؟؟ وبتسمع كلامه؟؟ طيب هنجيب ترزي ونفصل بقه ولا ايه) يا بريد ميهمكيش من الكلام الرزل وعيدي حساباتك ويا ريت الكل يرعي كلامه في الرد ونكون نا سعلى الاقل نحترم بعض وليس اللى كل ما تكتبه بريد ممكن يكون صحيح ممكن يكون من نسج الخيال فيجب مراعاة اختيار الالفاظ وربنا يوفق الجميع ويضعمهم بالخلفة الصالحة ان شاء الله

Islamist Bloke said...

يا برايد
ما تتأخريش فى الردود والبوستات كتير
عايزين نقرأ الموضوعات الجميلة
ما تغيبيش عننا كتير
ونحن فى الانتظار

كراكيب عادل said...

انا هتكلم بصراحه وخليكم فاكرين التعليقات اخدتنا لجو غامق كده بس مش مشكله علي رأي برايد هناخد السنه كلها ضحك ولا ايه في السابق كانت الحياه بسيطه والقناعه موجوده لو اي حد استغني عن الحاجتين دول لازم يدفع تمن يعني اهل العروسه بيكون لهم طلبات صعبه من شاب لسه في مقتبل العمر بيكون نفسه يعني وانتوا عارفين اللسته الطويله دي ومش هكتبها فيه شاب كمان بيبحث عن مواصفات معينه في عروسته وكانها تمثال شمع وهي كمان عايز فارس الاحلام الي بتشوفه في الافلام والرويات لو كل واحد فينا دور علي المواصفات دي والمتطلبات دي اكيد هتحصل حاجه غلط انا عن نفسي كانت لي علاقات سابقه وحب وغيره واتجوزت بشكل عادي وربنا عوضني بزوجه لاتقارن بكل نساء الارض بالنسبه لي والحب واللف والدوران وكمان هطلعك القمر وهجيبلك صاروخ والكلام الفاضي ده الواقع غير انا لما كونت نفسي وتعمدت اني اعتمد علي نفسي في كل صغيره وكبيره في زواجي ربنا وفقني فيه حاجتين اتنين لو اي واحد نوي عليهم وابتعد عن المبالغه ربنا هيساعده الزواج والحج واضيف حاجه كمان لو انك هتبني بيت دي عن تجربه اه وكمان حاجه ولاده مولود جديد وخاصه لو بنت صدقوني الرزق بيجي بكده الاخذ بالاسباب والبحث وراء الرزق والدعاء والالتزام بالدين اسف طولت عليكم اخوكم عادل

Anonymous said...

كلامك صح 100 فى الميه الناس دلوقت ما عندهاش غير تتبع فلانه اتجوزت فلانه لسه وطبعا نتيجة ذلك الناس بتتسرع وتجوز بناتها للعريس اللى يتقدم خصوصا اول البنت ما تبلغ 27 سنه يتلهفوا على اول واحد يدق الباب حتى ولو كان مش مناسب والنتيجة زى ما انتم شايفين زيادة نسبة حالات الطلاق بطريقة فظيعه
ام

wanna b a bride said...

هي يا جماعة
إزيكم

أنا شايفة فيه مطالبة باني أسيب البوست و مامسحوش

مش عارفة ماكنتش عايزة أسيب حاجة نكد في وسط البوستات

بس بيني و بينكم بافكر أجرب اختراع الديمقراطية ده اللي بيقولوا عليه و آخد برأيكم و أسيبه

bestic

بلاش موضوع العند ده
ربنا يرزقنا جميعا
فعلا الهاجس بيبتدي من بدري قوي
و موضوع معرفة طرق الصيد ده مهم جدا
خلتيني أفكر أعملله بوست
-------------------
anonymous

ايه موضوع انتي أولنا ده بأااااه
20
لسه بدري شويةعموما ماتخافيش لو اتجوزت قبلك أكيد هاشوفلك عريس و هاجوزك
"ماتصدقيش الكلام ده على فكرة اتقاللي 240 مرة من كل صاحبة من صاحباتي و ماحدش بيعمل حاجة"
-------------------
bluesky

ما هو المفروض نبدأ من هنا
من المدونات..متهيألي دي فئة مثقفة شوية على الأقل
و لو بدأنا نصارح بعض بالكلام اللي بيضايق يمكن نقدر نقلل الموضوع ده
والا ايه؟
-------------------
أميرة البلطجية

المشكلة انها بتوجع حتى لو مش صحيحة
حتى لو لسه مادخلتيش في الحيز بتاعها

خلاص ناخد مسكنات لحد المجتمع مايتغير
-------------------
khaled

كويس جدا اني قدرت أوصلك و يمكن لناس كتير ماكانوش عارفين الكلمة دي بتوجع أد ايه
و بالنسبة لموضوع ان البنات بيستعملوها فبيبقى سهل انك تستعملها انت كمان

يمكن البنات بيستعملوها بينهم و بين نفسهم
بس عن نفسي عمري ما شفت بنات بيستعملوها قدام الولاد
و حتى لو ده بيحصل..مش مبرر انك تستعملها مع بنات تانيين

أتمنى انك تكون فهمت وجهة نظري
-----------------
anonymous

انا ماقصدتش اني أعترض على قضاء ربنا
و طبعا باحمده و أشكره دايما

أنا باعترض على تعمد الناس لإهانة بعضهم

سعيدة اني زي مابتقول باشارك بصنع البسمة
بس هل مش من حقي أفضفض معاكوا و تستحملوني
-----------------------
dananeer

كلامك جميل و مهم
و هو تقريبا اللي كنت باقصده في البوست
ماتخافيش..أنا مش سهل اني أتوجع
باستقبل الوجع بابتسامة
و أهو كله بيعدي
--------------------
reham

ده سوق الجواميس في عزه و لا ليكي عليا حلفان
بس ولا يهمك

صح و الله احنا هنبقى عرايس الجنة انشاء الله
-----------------

backbone

مش باخد الكلام على جوه و لاحاجة
بس قلب البنت بالظبط زي السفنجة
بيمتص كل الكلام لحد مايتملا و يفيض
و ربنا يستر و ماينفجرش

الكلام ده بيضايق و الله حتى لو هزار
و لو كان ماحدش يعرف..أدينا بنقول له

حلوة قوي الإحصائية دي
ضلمتها أكتر

wanna b a bride said...

mesh2adra

منورة قسم التعليقات
وانا بقول ايه النور ده كله

القعدة مش وحشة..لو كل واحد خلاه في حاله

الزن هو اللي بيضايق

و البنوتة ذنبها ايه بس؟...حرام

----------------------

قطر الندى

هو ده قصدي بالظبط
الكلمة بتوجع حتى لو اللي بيقولها مش قاصد بيها غير الهزار

و بتوجع حتى لو مابينتيش للي قدامك انها بتوجع
و بتوجع حتى لو كل الناس مش مصدقين انها بتوجع

بتوجعععععععععععععععععععععع

-----------------------
lionking

الحمد لله طبعا
مابنعترضش على حاجة
غير على الناس اللي غاويين يجرحوا بعض بالكلام
و اللي بيعتبروا كل المواضيع ينفع فيها الهزار و ده مش صحيح

--------------------
tamer

المجتمع بيبتدي يتغير في أي موضوع من أول لحظة بنتكلم فيها بصراحة
حتى لو تغيير بسيط

لكن أدينا بنتكلم فبالتالي بنغير
-------------------
إرحم دماغك

تفتكر؟

هاشوف الموضوع ده
--------------------
smraa alnil

كلامك أثر فيا جدا جدا

و يمكن بالذات عشان كلامك 99%مش هامسحه

و كلامك برضه بيأكد للناس اللي بتقول احنا بنهزر و مانقصدش
أو احنا بننصحك عشان مصلحتك
أو مليون تبرير تاني
ان كل التبريرات دي ماتفرقش معانا و لو حتى البنت عندها 18 أو 19 سنة
برضه الكلمة مؤلمة
مش بس ليها
كمان لعيلتها
لأنه برضه كابوس كل أسرة ان البنت ماتتجوزش

شكرا لكلامك و حكايتك المؤثرة

-----------------
آندي

ممكن أكون استعملت الكلمة في الأول عن طريق السهو

بس فعلا الكلمة بتخنقني

بدون مبالغة لما بقراها في تعليق و حد بيقولها بالذات عليا
ما بعرفش أتنفس

إنتي مش غلط ..من حقك تختاري البني آدم اللي هتعيشي معاه
على الأقل ترتحيله
أصله مش أسبوع مصيف
ده عمر بحاله
ده اللي انا كمان باقوله لنفسي
و كله بامره

"في السماء رزقكم و ماتوعدون"
-------------------
masra7 el 3'alaba

شكرا

أنا برد أهه
------------------
anonymous

ياسلام ياسلام...الله الله

ايه التعليق الجامد ده
بغض النظر يعني عن الكلمتين العاطشفيتين اللي في النص:)

ربنا يرزقنا جميعا بالزوج أو الزوجة الصالحة

حلوة قوي موضوع الكائن اللي جاي من أورانوس
إتأثرت جدا بموضوع اني غالية عند حد ده..فعلا أحرجتني


مولد النبي قرب
هنلم من بعضشينا و نجيبلك عروسة

و الله ماهي راجعة
خيرك سابق
-----------------
gygy_ahmed

أدينا محافظين عليها لحد دلوقتي

ربنا يستر على اللي جاي

أهلا بيكي على طول

wanna b a bride said...

حمايا

ما قصدتش باللي كتبته ان كل اللي بيقول كده ابن ستين في سبعين

النس اللي بيقولوها بدون مايقصدوا يجرحوا اللي قدامهم
و من غير مايعرفوا انهم بيجرحوه

أنا بقولهم أهه انها بتوجع و بتجرح حتى لو قلتهالي في وشي و انا ضحكت قدامك
لازم تعرف اني من جوايا باتألم
حتى لو عندي 17 سنة

دي حاجة في نفسية البنات ناس كتير ماتعرفهاش
و أدينا بنعرفهم

ما فيش إعتراض على قضاء ربنا في أي شئ

بس مش معنى كده ان حتى اللي عنده نقص في حاجة زي مابتقول
و بيحاول يخفف عن نفسه بالسخرية من هذا النقص
مش معنى كده انه هيتقبل السخرية دي من حد تاني

انا متأكده مثلا انك لو كنت قلت لطه حسين يا أعمى

أكيد برضه كان اتوجع


و بعدين ايه موضوع كنت حاجزني دي

يعني خلاص

عموما عشان تبقى عارف

الأولوية لأسبقية الحجز
-------------------

masry metgharab

طبعا زي ماوضحت

أنا عمري ماباعترض على إرادة ربنا وقضاءه
وده شئ وضحتة في أول بوست في المدونة

حتى لو اللي بيقول الكلمة دي ماعندوش نقص و لا حاجة وبيقولها على سبيل الهزار

لازم الكل يعرف ان الكلمة دي بتضايق

و موضوع اننا بنتخنق من الكلمة دي فعلا بيخلي بنات كتير ترمي نفسها في أول بلاعة موجود فيها عريس عشان تخلص من زن الناس

لما يجيلي نصيبي و أندم
ولا يهمك

هاعمل بلوج جديد واكتب فيه كل البلاوي اللي هتجرالي

بعد الشر يعني:)
-------------------
ehab

هو الصراحة أحل 5 حاجات في الدنيا حاجتين

المحشي

أنا زي الفل طيعا ..مين يقدر يقول غير كده؟

ربنا يخليلك المدام و يسعدكوا ببعض

أدينا متشالين حتى يأمر الله
------------------
مصر هي أمي

هي الكلمة صعبة على الطرفين

بس المجتمع أقسى بكتير على البنات

ربنا يرزق الجميع
------------------
anonymous

كلام جميل و كلام معقول

ما أقدرش أقول حاجة عنه
-------------------
anonymous

أقترح عليك انك تعمل بلوج تعبر فيه عن وجهة نظرك

أنا واثقة ان قراءك هيبقوا كتير
---------------------
يا مراكبي

و الله كلامك في الجون

خصوصا غباء موضوع البنات و خلفتهم ده

هنفضل غرقانين في العبط ده
لأننا مش لاقيين حاجة تانية نتفاخر بها
لأننا ببساطة مش فالحين في حاجة غير في الخلفة و بس

انشاء الله مش هامسحه ..ربنا يسهل

تحياتي

amany said...

بعد اذنك انا هاضيف تعليق انا وبالف جولة حرة على المدونات لقيت المدونة دى وبصراحة لذيذة اوى هى تعتبر صوت كل البنات
والله الكلمة ما اسوءها كلمة ومعناها فى اللغة سئية للغاية وما اصعبها على اى بنت وعلى العموم اول ناس بتجرحنا هما اقرب الناس ليكى وهما الاصدقاء انا معايا واحدة صحبتى امتنعت انى اكلمها علشان كل مرة تقولى ايه ده هو انتى لسه قاعدة يا سبحان الله يعنى هو بايدك انك تتجوزى ولا بايدنا اننا لسه
ربنا يكرمنا بازواج صالحيين اصلها مش ناقصة بهدلة ويتقى الله فينا يلا خدى الفاتحة ربنا يكرمنا يعنى خدى اقري القاتحة بس دى بااللهجة بتاعتنا

Anonymous said...

مميزات العزوبية للبنــــــــــــــــــــــــــــــات

اولا
تنامى براحتك على السرير و تتحركى كما تشائين بدون ان تزعجى اللوح
اللى نايم جنبك

ثانيا

غطاء الفراش لك وحدك , بلا منازع بدون ان تستيقظى فى منتصف الليل لتجديه اختفى مع البنى ادم اللى جنبك

ثالثا

تستمتعين بنوم هادىء بدون ازعاج شاكمان العربية اللى على السرير

رابعا

ريموت التليقزيون سيظل لك وحدك بدون استغلال الطرف الأخر

خامسا

اذا قمتى بتنظيف البيت- فرضا يعنى- سيبقى نظيفا لمدة طويلة لعدم وجود
ساكن الزريبة

سادسا

تستطيعين شراء اى شىء فى نفسك مهما كان غاليا بدون الأستماع الى
العبارة الشهيرة " فى حاجات اهم من كده يا هانم"صح؟

سابعا

لن تضطرى لأستضافة اصدقائه الذين يقضون السهرة فى الحديث عن
ملكات الجمال و مذيعات القنوات الفضائية

ثامنا

لن تضطرى لمشاهدة النشرات الاخبارية و البرامج السياسية و الرياضية بالاجبار

تاسعا

لن تضطرى للدخول فى مشاجرات مع الطرف الاخرلاسباب تافهة

عاشرا

تشيلى مسئولية بيته ليه ؟ هو كان من بقيت عيلتك؟

Anonymous said...

يابرايد الكلمه مش جارحه انا عن نفسى احسنلى يتقال انى عانس وبكل فخر وبارادتى احسن ما يتقال عليا فاشله...عانس ..وايه يعنى ؟..عانس اه بس دكتورة ( ولو انها مش امله بس الحمد لله) ..عانس بس باصرف على نفسى مثلا..عانس بمزاجى...وياسلام بقى لو يبقوا يكتبوها فى البطاقه بدل انسه يخلوا كل بنت عانسه الى ان يثبت العكس...والا يبقى يدبحوا البنات اللى متجوزتش على العيد واهو نبقى وفرنا ثروة حيوانيه...دا تخلف..انا عندى 22 سنه ولسع فى بكالوريوس ومع ذلك ما بسلمسش من الكلام من عينه عقبال فرحك وربنا يعدلهالك والكلام اياه..بس بينى وبينك مامتى جدعه بتقولهم دى لسه بتتعلم ..واهو بردو التعليم ستره ولا ايه يا بنات ...قصدى يا عوانس ؟؟؟

life said...

مميزات العزوبية للبنــــــــــــــــــــــــــــــات

اولا
تنامى براحتك على السرير و تتحركى كما تشائين بدون ان تزعجى اللوح
اللى نايم جنبك

ثانيا

غطاء الفراش لك وحدك , بلا منازع بدون ان تستيقظى فى منتصف الليل لتجديه اختفى مع البنى ادم اللى جنبك

ثالثا

تستمتعين بنوم هادىء بدون ازعاج شاكمان العربية اللى على السرير

رابعا

ريموت التليقزيون سيظل لك وحدك بدون استغلال الطرف الأخر

خامسا

اذا قمتى بتنظيف البيت- فرضا يعنى- سيبقى نظيفا لمدة طويلة لعدم وجود
ساكن الزريبة

سادسا

تستطيعين شراء اى شىء فى نفسك مهما كان غاليا بدون الأستماع الى
العبارة الشهيرة " فى حاجات اهم من كده يا هانم"صح؟

سابعا

لن تضطرى لأستضافة اصدقائه الذين يقضون السهرة فى الحديث عن
ملكات الجمال و مذيعات القنوات الفضائية

ثامنا

لن تضطرى لمشاهدة النشرات الاخبارية و البرامج السياسية و الرياضية بالاجبار

تاسعا

لن تضطرى للدخول فى مشاجرات مع الطرف الاخرلاسباب تافهة

عاشرا

تشيلى مسئولية بيته ليه ؟ هو كان من بقيت عيلتك؟

حرة said...

الكلام بيتقال فين يا برايد
بيتقال فى مجتمع منكووس وحالته كرب والأمم تداعت عليه

واحنا لسه قاعدين حاطين رجل على رجل نشوف أم حامد بتتخانق ليه مع حامد
وأبو نسمة قطع المصروف ليه عن نسمة
والبت كايداهم متجوزتش لسه لييه
وليه منى ومرسى كل يوم بيتخانقوا
والبت سنية ... دى متجوزة بقالها 3 سنين ولسه مخلفتش .... إلا صحيح تفتكرى العيب منها ولا من جوزها
واحنا مالنا يا اخويا البيوت أسرار

أحب أقول بعد تنحية برستيجى جانبا
خيبة علينا من بدرى


ربنا يرحمنا

صيدلة
مى

sophy said...

طب ليه النكد ده بأة يا برايد ما كنا حلويين كده برضة تقلبى علينا المواجع

فلة said...

يا اختي الف بعد الشر عنك
ولاتموتي ولا حاجة قوليهم الكلمتين فضفضي يا اختشي
بس كلامك صح والله
انا اما تاخرت شوية صغيرين زي ما قلتي عالجواز
عينك ما تشوف الا النور
بقيت ما اروحش حفلات خطوبة ولا جواز لصاحباتي
والنتيجة بعديها ما حدش حضر فرحي بردو
بس كانت الكلمة دي بالنسبة لي زي الكابوس
عشان كنت تقريبا في معدل الاعمار اللي ذكرتيها في الاول
يعني كان محتمل اوي احمل اللقب السخيف ده
ربنا يسعد كل البنات اللي لسه ما تجوزوش منهم والمتجوزات
آآآمين يا رب

seif said...

الموضوع اكبر من مسأله جواز أو غيره المسأله موضوع الوحده ,الزمان اللي احنا عايشين فيه بقي صعب جدا الكل أندال لما العمر بيعدي مش حا تلاقي أصحاب و لا اخوات و لا قرايب الكل مشغول في حياته و لا حد بيسأل في حد و الكلام ده حقيقي و عن تجربه و المشكله التانيه ان كل ما الأنسان بيتقدم في العمر بتبقي قدرته علي التأقلم مع حد تاني صعبه و علشان كده انا بأنصحك انك ما تطلعيش القطط الفاطسه في العرسان اللي بيتقدمولك و تحاولي تشوفي الجانب المشرق فيهم و تتجنبي عيوبهم لأنه ما فيش انسان كامل و انتي أكيد فيكي عيوب و أول عيب فيكي ان ليكي شخصيه و ده شيئ صعب في البنات لأن الرجل مش بيحب الست الي شخصيتها قويه لأن المجتمع بيفرض عليه ان شخصيته لازم تكون أقوي من شخصيتها و صراع السيطره ده بيخلق مشاكل كتير و بعدين انتي كل كلامك عن العرسان ما وصلش للأمور الجاده زي الشقه و المهر و العفش و القايمه و الحماه ,الحاجات دي اللي توقف المراكب السايره و تبوظ اي جوازه حا تعملي ايه لما توصلي للمرحله دي و لا وصلتي ليها يا ريت تقولي و السلام ختام

Anonymous said...

لا فوض فوك يا برايد باشا....
الكلمة ده بتنرفزنى!
معلش... ومن غير زعل... المشكلة مش قلة الرجاله... المشكلة قلة الرجاله العدله
... و الغريب انى الكلمة الرزلة ده لزقة فينا أحنا!...
أنا أعرف رجالة فوق الخمسين و مجوزوش.... ولا حد قلهم انتم عوانس... ولا حاجة...
وكل واحد فيهم شايف نفسه لقطة! ولا شاب عنده 20 سنة... بس بس يأختى!... انا لو فتحت مش حقفل من البلاوى الى الواحد بيشوفها!..
خالينا سكتين أحسن!

أنـــا حـــــــــرة said...

انا عن نفسى مش مؤمنة بكلمة عانس اصلا
و اعتقد ان العيب مش كله فى المجتمع اللى زى الاهبل بيقول كده
لكن العيب فى البنات اللى بتصدق المجتمع
اللى يقول يقول
و بعدين يعنى حد قال البنت دى " الكلمة اللى مش حاباها " يبقى حمار سورى يعنى

و البنت اللى تصدق انها لو ما اتجوزتش تبقى حسرة عليها و كده ما عاشيتش تبقى غلطانه
الجواز مرحلة او خطوة ممكن تمرى بيها ممكن لا مش فرض هو و اللى ما شافهوش يبقى ماجاش الدنيا

مش عارفه انا صغيرة بس مش بيفرق معايا الكلام ده
اللى عنده كلام يقوله
قاموس المجتمع مليان بلاوى
تفتكرى دى الغلطة الوحيدة

ما تشوفى بيتقال ايه عن المطلقات
و للا اللى مجرد تفسخ خطوبتها

المجمتمع فيه ازدواجية نعبى منها اشوله
و بجد محدش يتضايق من الكلمة دى
عارفه انها بتجرح
بس البنت تهز كتفها

ody911 said...

مش عارف

بس حاسس إنى عاوز أقولك بالنيابة عن الكل إنى آسف إنى فى ناس بتجرح وهيه مش واخدة بالها

آسف بجد

وإنتى زى العسل حقيقى

وفاكرة المدونين كلهم

emos said...

shofo ba2a ya gama3a ana hasbetloko en kelmet 3anes deh kelma gamila ana 2et7'atabt wana 3andy 21 sana 7elwa w so3'anona ya3ny w fedely sana ma7'toba w ba3d keda tefesht men kotr el nakad elly ana 3esht feh ana 3amatan bent farfosha w ba7eb el de7k w naderan maba3ayat w walahi walahi walahi 3omry fe 7ayaty ma3ayat wala 2etnaked 3alaya zay elly 7salay fel sana deh
ana ma3andeesh mashakel 7ad ye2ool 3alaya 3anes bs maye7saleesh elly 7asal en el wa7da yegelha 3arees w torfodo w tettarya2 3aleh w te3tebro mawkef zareef 2a7san men lama tet7'eteb w yetnaked 3aleha 3eshtha w tekrah el regala w senenhom
ana 3anes w sa3eda bel lakab dah

Bride To Be said...

انا بصراحة بقى لي فترة بدخل على البلوج بتاعك وبسبب اللي قريته هنا خليتيني اتشجع واكتب بلوج على غرار موقعك بس بكلماتي انا.. كلمات بعضها كنت كاتباها من كم سنة بس اول مرة افكر احطها على النت واخلي الناس تشوفها معايا وانا اشكرك انك اديتيني الجرأة اعمل كده وبتشرف لزيارتك للبلوج بتاعي مع انو لسه جديد..

بالنسبة للموضوع اللي طرحتيه.. انا مش عارفة الناس دول امتى حيبقوا يحسوا على دمهم ويعرفوا تاثير الكلمة دي في البنت يبقى عامل ازاي! ده لو شتمتي البنت ولا حتى قلتي لها انك وحشة مش حتتاثر زي اما تقوليلها الكلمة دي.. انا جربتها لانها اتقالت لي مرة ومن يومها والعالم اتغير في عيني..

ربنا يوفقك يا برايد ويرزقك وكل بنات المسلمين أزواج صالحين وذرية صالحة..

18goosebumps said...

برايد دخلت مدونتك
وبدأت قر فيها من اول موضوع لغايه م وصلت هنا

انا عندى 18 سنه والكلمه ضايقتنى لما وصلنى احساس البنات بيها

ثم انى بجد في محيط البنات الى حوليا
بحكم دماغى لم فكرت وفرزتهم
لقيت ان لي لسه مرتبطوش احسن كتييييير جداا من الى ارتبطوا
ده مش عيب في لي رتبطوا لكن بجد
ده موجود
والسبب خوف الاولد او الرجال من البنت الى بتفكر وعندها دماغ و بتنجح وبتشتغل وبتدرس و و و

واحد مهندس راح يخطب بنت خريجه تجاره صديقه قاله طب ليه م تاخدش مهندسه
قاله يا عم انا عايز واحده دماغها ريقالى انا وبس !!
ملحوظه ده مش تقليل من البنت الى في ى كليه مهما كانت

ولكن المثل لتوضيح احد التجاهات الموجوده في التفكير

بس بجد انا في حاجه مستربه ليها
هى نوعيه العرسان الى موجوده القصص عنهم هنا
حاجه تخوف

:D

تحياتى يا برايد ام دم خفيف وعقل محترم

ومتمسحيش البوست

Anonymous said...

بجد عايز اعرف ليه عندنا مشكلة في الجواز ؟
هل مشكلة ان اعداد الستات اكتر من الرجالة مثلا ؟
هل المشكلة في المديات ؟
هل المشكلة في البنت نفسها ؟
ولا المشكلة في المجتمع ؟
ولا المشكلة في كل دول مع بعض

BaTresYa said...

لو كل واحدة يا برايد حسة بجمال نفسها الداخلي والخارجي صدقيني مكنش قصر فيها كلمة عانس...احنا جيل على فكره مش بنهتم بالكلام وكلام الناس وكدا...وفعلا دا نصيب دا الشئ اللي المفروض كل واحدة تحطه في بالها ..وبعدين انهي احسن اتجوز واحد متلع عيني بس الخدمه الوحيده انه حرمني من العنوسه ؟؟ولاا افضل مع اهلي
معززة مكرمه لحد ما يجيلي نصيبي؟؟
ربنا معاكي يا برايد وربنا يحقق لك اللي نفسك فيه بجد لأني بحسك صادقه جدا

Anonymous said...

لو سمحتي بلاش تشيلي البوست ده

و بعدين فيها إيه لما يكون فيه بوست جد ، حتى لو كان نكد ، إنتي المفروض صاحبة فكرة و قضية مش فاتحة مسرح علشان الناس يضحكوا و لا بتحطي أرجوزات علشان الناس تنبسط

حضرتك صاحبة قضية و ناس كتير بتشاركك فيها و أنا كمان بشارك حضرتك فيه و سعيد جداً بالبلوج ده و نفسي كل الشباب يقرأوه و هعمل له دعاية بين كل أصحابي

عمرو كمال
الجيزة

عاشقة الوطن said...

والله عندك حق
لو كل واحد عرف يتعامل ازاى مع البنات كان الموضوع هيكون احلى من كده بكتير
ولو كل واحد بيراعى شعور اللى حواليه كانت الدنيا هتكون احلى من كده بكتيرجداااااااا

تحياتى لكى وللبوست الرائع ده وللكلمة اللى انتى وضحتيها
وياريت كل واحد فينا يراعى غيره
وكلنا ناخد بالنا من الكلام اللى بيتقال
مش فى الكلمة ديه بس فى كل حاجة ممكن تجرح او تضايق

moodysalihamidzic said...

قبل كتابتك لهذا الموضوع
ولكنها كلمة تجرحنى
لانها تجرح الآخرين بالطبع
وشكرا

koukawy said...

و يعني لو البنت حتي متجوزتش محدش ليه دعوه ممكن يكون ربنا كاتبلها حياتها و هي مش متجوزه احسن من و هي متجوزه00
و اي حد يتريق باللي في رجلك و احدفيه و لا يهمك00قدر الله و ماشاء فعل
ربنا ما بيعملش حاجه وحشه

قطر الندي said...

بصي يا برايد انا واثقه و متأكده اننا لو مشينا بميكرفونات نقول تحذير للناس يبطلوا يستخدموا الكلمه دي تأكدي ان نسبة استخدمها هاتزيد لان الناس احياناً بيتلذذوا بجرح بعض و علي العموم Happy valentine's day و هديتك عندي تعالي زوريني و خديها

ahmedegypt said...

ربنا يحميكى يا بنتى من شر العين اللى بتنق على البلوج بتاعك .وعلى فكرة ـاخير سن الزواج موش بيقلق غير البنت العربية بس (موش عارف إشمعنى دى اللى مبيقلدوش فيها الغرب)وانا أعتقد إن كل بنت نصيبها موجود فى الدنيا ز ممكن يتأخر بس ده برضه بيكون نصيب . على كل ربنا يدى كل بنت اللى تتمناه سواء زواج أو نجاح فى الحياة . سلام

Anonymous said...

المشكله مش فى عدوم وجود رجاله المشكله فى عدم وجود اخلاق ودين وده اللى مسبب كل المشاكل والظروف اللى احنا فيها سيدنا محمد قال(استوصوا بالنساء خيرا)صلى الله عليه...

wanna b a bride said...

amany

أهلا بيكي و ابقي تعالي على طول

جرح الأصدقاء دايما بيجرح أكتر حاجة

أهم حاجة يكون صالح

على رأيك مش ناقصين بهدلة
-----------------

life

ههههههههههههههههههههههههههههههههههههه
ههههههههههههههههههههههههه
هههههههههههههههههه

و الله فعلا ضحكتيني من قلبك و كل كلمة من كلامك صح

تحياتي
--------------------
anonymous

يمكن عشان لسه في الدراسة و لسه 22 الموضوع مش ملمس معاكي قوي

عموما المسألة بتختلف

و بعدين ليه يكون الإختيار بين الزواج الفاشل و عدم الزواج
ربنا يكرمنا جميعا بالخير انشاء الله
----------------------
حرة

والله عندك حق
بس احنا من حقنا نعترض
حتى لو مافيش حاجة هتتغير الا بعد
200 سنة
-------------------

sophy

معلش مش انتوا صحابي

يعني لازم تشاركوني لحظات نكدي
-------------------

فلة

يا أختى أهلا بيكي

أيوة كده طمنينا

يعني لسه فيه أمل لكل البنات

ألف مبروك
و لو متأخرة
---------------------

seif

كلامك صح على موضوع الشخصية ده

بس أنا و الله كذا مرة حاولت أتأقلم مع القطط الفاطسانة دي

دانا حتى بقيت أأكل القطط و ألعب معاها
و في الاخر برضه مافيش فايدة

كله بأمرة
--------------------

anonymous

و تسكتي ليه ياختي؟؟

قولي قولي و فضفضي

حد واخد منها حاجة

الرجالة دول واكلينها والعة في كل شئ
حسبي الله و نعم الوكيل
-------------------

أنا حرة

مش بالبساطة دي

صحيح بنات كتير بتتجاهل الموضوع و يمكن تضحك و تبين انه ولا هاممها

بس من جواها بتبقى غير كده خالص

يمكن ناس كتير ماتعرفش الموضوع ده

فها أنا ذا..باعرفهم
---------------

ody911

والله انت ذوق و ابن ناس

إشطة عليك يا أودي

و عادي بأه
----------------------

emos

يا ستي إذا كان واحد طلع فشنك

ربنا يرزقك بسيد سيده..على رأي جدتي

مافيش مبرر تقفلي من الصنف كله
بعد الشر عليكي من الكلمة الوحشة دي

wanna b a bride said...

bride to be

ألف مبروك ع البلوج

أيوة كده الكل لازم يسمع صتنا

هو إحنا شوية والا ايه؟

الناس هيحسوا على دمهم لما أساسا يبقى عندهم دم

ربنا يرزق الكل
-----------------

18goosebumps

رغم ان سنك صغير لكن حاسة ان عقلك كبير

مش كويس كده على فكرة

البنات اللي ليها مخ زيك و زيي كده بيعانوا في حياتهم بعدين

و بعدين كمان شوية يجيلك عرسان من العينة اللي هنا و تيجي تقعدي جنبي في البلوج

نصيحة ليكي

بيعي دماغك و اشتري واحده من اللي صديقنا المهندس كان بيدور عليها دي

تحياتي
---------------
anonymous

عروستي

المشكلة في عدد الرجالة...و نوعيتهم

و في المجتمع و متطلباته كمان
---------------

batresya

ضغوط المجتمع مش سهل تستحمليها

حتى لو حاسة بجمال نفسك الداخلي او حتى الخارجي

للأسف المجتمع بياكلنا كل يوم الصبح على الفطار

ربنا يحققلنا كل امانينا يا رب
-----------------

عمرو كمال

حاضر مش هاشيله

أصل انت عارف موقفي من الناس اللي بيقولولي حضرتك دي

ما أقدرش أرفضلهم طلب

سلامي لكل الأصدقاء

----------------

عاشقة الوطن

مش لو بأه

انشاء الله المجتمع يتغير

و كل واحد يحافظ على شعور التاني

إمتى بأه؟

ربنا يكرم
----------------

moodysalihamidzic

شكرا ليك و لتفهمك

بس كل ده إسم؟؟
----------------

koukawy

تصدقي فكرة

موضوع باللي في رجلي ده ماجاش في بالي قبل كده

نجرب

-----------------

قطر الندى

شكرا على هدية الفالانتين

خصوصا ان ماحدش جابلي هدية

تخيلي؟؟
-----------------

ahmedegypt

مجتمعاتنا العربية دي
عايزة عربية تفرمها

بس هنعمل ايه؟

قدرنا اننا اتولدنا هنا

و لازم نصبر على قدرنا
-------------------

anonymous

يسلم فمك

واحـــد مـــــن الـنـــاس said...

مهما قلتي ومهما عملتي
يابنتي
دحنا الشعب المصري

تقولي للشباب ميقولوش كلمة عانس

تلاقيهم جابو مكرفون وشغلو اغنية
انا عانس وبعنس

ويقعدو يقولوها اكتر

ربنا يكون في عون شباب البلد دي

تسـنيم said...

بعد الشر عليكي يا حبيبتي من المووت لأ قوولي كل اللي في نفسك وفعلا أنا ليا مهندس زميلي دايما يقول بهزار إنتو " كبنات" لو كنتم لقيتوا عرسان مكنتوش اشتغلتوا وينصح فيا إن لو أي واحد شنب معدي إنشالله لو صرصار الحقي نفسك واتجوزيه علشان هما كرجالة بقوا عملة نادرة واحنا عمالين نتأمر ونتنك والدستة مننا بقرش بالرغم من إن أخته كانت زميلتي في المدرسة وأكبر مني بسنتين ولا أنا ولا هيا بنبص للزواج من النظرة دي..
أنا فاكرة إن أستاذ الفيزيكس بتاعي في ثانوي كان يقولي لما تكملي 22 سنة وإنتي لسه متخطبتيش هتحملي لقب عانس رسمي هههه أنا بقيت عانس رسممي من سنة ونص ومش فارقة معايا.. أصل الرجالة فاكرين إن احنا لسه زي الأجيال بتاعت زمان عايزين حيطة والسلام نقعد في ضلها.. ميعرفوش إننا عايزين أكتر من كده بكتيييير أنا أخر عريس كلموني عنه قلتلهم قولوه إني عايزاه يشتريلي نجمة في السما.. لمجرد بس إني أسمع رده عليا ووجهة نظره في رومانسيتي يعتبرني هبلة والا هيكون رده اييه.

عموما مش كل الناس هتفهم معنى كلامك ده ومش ك الناس هتقدر.

KING TOOOT said...

هو مين فينا إتخلق عارف نصيبة ؟
ولاّ مين قبل الأوان يقدر يجيبه ؟
دي القسمة بإدين الرزّاق زي الأرزاق
و السهم لما بييجي وقته بيصيب حبيبه
وعجبي
KING TOOOT

حماكى بكندا said...


يا برايد انا لم اعترض على ان الكلمة
سيئة أو جارحة .. بالعكس انا اعطيت دليل و هو طه حسين رغم كل المجد الذى وصل اليه ما زال يشير الى مسألة اطلاق لقب أعمى عليه

انا فقط اردت ان القى الضوء على سلوكيات شائعة

أما مسألة انى "كنت حاجزك" .. فأنا على موقفى .. بس انا شايف بسم الله ما شاء الله العروض تهطل عليك منذ بداية البلوج .. و قلت فى عقل بالى .. جايز "بريودة" تقول "عصفور فى اليد و لا عشرة فى كندا .. "

........

عندى تعليق صغير .. من قال "الرجالة" كذا و كذا .. أو "الستات" كذا و كذا .. يبقى اطلق "تعميم" و هذا خطأ منطقى و علمى فادح .. لا يقل فى رأيى الخاص عن الخطأ الذى يتم نقده فى هذا الموضوع ..

لا يصح ان ننقد فعل ثم نأتى مثله

تحياتى

حماكى بكندا

khaled said...


برايد
الالفاظ اللى البنات بتستعملها بينهم و بين بعض بتبقى مكشوفة و ع الملأ و كمان بتبقى بين البنت و الولد و خصوصا لما يكونوا صحاب و فى الجامعة مثلا
وده اللى بيخللى الناس تاخد عليهم و تقوللهم نفس الكلام و ييجوا يزعلوا بعد كده
نصيحة من اخوكم يا بنات لو بتزعلوا من الكلام ده بلاش تفتحوا سكة للولاد فى المجالات دى وخلوا الكلام ده بينكم وبين بعض بس

مذكرات حاحا مصر said...

رغم انك مش بتردي علي خالص ؟؟؟
لا اني حبيت انك تشوفي الخبر الطريف دهه واعرف رايك فيه ايه
http://www.almesryoon.com/ShowDetails.asp?NewID=30470&Page=13
يعني الموضوع ظاهرة عالمية يعني مش في مصر فقط
علي فكرة شكلهم بقوا يقلدوا الافلام المصرية ( سيادتي انساتي )

هدى said...

خليني اقولك على موقف حصللي
بنت عمي مرة وهي بتتكلم معايا وفي بيتي قالتلي انا عن نفسي ضامنة العريس الدور والباقي علكي انت اللي عنستي

عن نفسي عارفة اني ما عنستش

رغم ان ماما بتحاول تقنعني بكدا

لكن لحظة ما قالت الكلمة بقيت نفسي اقوم اضربها بالقلم على وشها

على العموم ..بطلت اكلمها خالص

بنت بكلمة من اربع حروف حيطة ما عرفتش تبنيها السنين اللي فاتت كلها

البوست بتاعك حلو قوي ومعبر قوي

سعيدة اني زرته

تحياتي

wanna b a bride said...

واحد من الناس

احنا بنعمل اللي علينا و الباقي
على برامج محو الأمية

-------------------
تسنيم

سلميلي على زميلك ده قوي

اديلوا عنوان المدونة و قوليله يتقي ربنا

بلاش تمسكي في موضوع نجمة في السما ده
غيرك مسك في بوتاجاز 4 شعله و خد على دماغه
تقوليلي نجمة
-----------------

king tooot

كلام مكن و في الخمسينة

--------------

حمايا بكندا

فاهماك يا أونكل و الله
بس أنا كمان كنت باستفيض أكتر في شرح وجهة نظري

حلوة باستفيض دي مش كده

أنا على العهد يا أونكل ..المهم انت

التعميم شئ غير صحيح في أي حالة

بس ساعات الواحد يخرج من شعورة و يكره الصنف كله
-----------------------

khaled

عندك حق في كلامك

بس أنا مثلا ماباستعملش الألفاظ دي في كلامي مع صاحباتي

و خصوصا اذا كان حد غريب واقف معانا
يبقى ذنبي إيه أتاخد بذنب غيري؟

و برضه من منبري هذا أنبه البنات

ماتستعملوش يا بنات اوصاف بالهزار يمكن تلف و تلزق فيكوا ساعة الجد

و ساعتها مش هتبقى ظريفة ولا تضحك خصوصا اذا سمعتيها من زميل

------------------

حاحا مصر

ليه بس الزعل

برد و الله على كل الناس

الحاجة الوحيدة اللي مش برد عليها هي الشات

باعتبره مجرد فضفضه

ساعات باتأخر في الرد لظروف شغلي ليس أكثر

شكرا على اللينك

هي فعلا بات ظاهرة انترناشيونال

لنا الله

------------------

هدى

قوللي لبنت عمك

ما فيش حاجة مضمونة في الزمان ده

و خليها ماتطمنش قوي كده

ماعادش فيه أمان

و لما تقوللك كلمة ضايقتك ماتسكتيش

قوليلها
يمكن يخليها ماتقولهاش لحد تاني و تجرحه بيها

تحياتي

~ Bato0ot ~ said...

fe3lan el klma de tedye2 ay bnt w twg3ha :S wana wa7da 3ndy 19 sana aho w bgd el klma de btkhrgny 3n sho3ory w msh 3arfa ezay 7ad ysm7 l nafso ye2ol 3ala bnt keda?

Anonymous said...

عزيزتي, الظاهر إني جيت متأخر...العتب على النظر..
أول مرة أزور مدونتك...والصراحة فهي أكثر من رائعة..و عفوية بشكل رهيب..
أنت شجعتيني أفتح مدونة بصراحة...في القريب إن شاء الله...حأبعث لك لنك

نهارك سعيد, عبدو

الحصان الأسود said...

هدى

استفزتني كلام بنت عمك ليكي

وشفت انك لسة 24 سنة في بروفيلك يعني انتي لسة صغيرة وقدامك بدري على السن اللي يقاللك فية الكلمة دي

وماتزعليش من البجحه دي لانها غالبا هي اللي حاتعنس

مش عارف اية اللي يخلليها ضامنة عريسها
اية متطمنة ان بينها وبينة اللي يخلية لازم يتجوزها

ممكن بيتسلى وحاديهيا بمبة كبيرة في الاخر

وممكن تتجوز و يطلع عين اللي خلفوها و ترجع لابوها متطلقة بعد شوية

انا اتعلمت اني ماعايرش حد ولا اجرح حد لاني ممكن ببساطة ابقى في مكانة بسهولة

تحياتي

حما برايد said...

يا جماعة من غير زعل كده .. تقبلوا الكلمتين دول من حما بريودة .. أنا أكبر منكم فى السن كثير .. بصراحة انا شايف اراء كثيرة غلط .. و غلط بشكل كبير .. خلط للأوراق .. تعميمات .. استنتاجات بدون اساس
ياريت تبذلوا جهد اكبر فى كتابة ما تكتبونه .. او تكتبوه على "الون وورد" الأول و تفكروا فيه و تقلبوه على جوانبه لغاية ما تحسوا انه رأى سديد فعلا .. بعدين تنشروه

مجرد وجهة نظر

حما برايد

Dark Knight said...

بصراحة ياأخت تسنيم ...
انتي و اللي بيفكروا بطريقتك اللي جايبين الدنيا ورا
الواحدة فيهم فاكرة نفسها ياما هنا ياما هناك و متنكة و طالعة فيها مش عارف على ايه
على رأيك .. مش كفاية ضل الحيطة
وبالمرة مش كفاية يكون محترم و مش كفاية يكون على خلق
لازم يكون جذاب زي عمر الشريف مثلا و لسانه اطول من برج ايفل و احلى من عسل نحل التمساح و مش مقبول ابدا واحد غلبان بيركب مواصلات حتى لو دخله يكفي البيت مستريح, هو كانوا صحاب العربيات خلصوا ؟

أحييك و أهنئك , طول ما الدماغ كده طول ما هاتفضل تخرب هنا ... و هنا

الملاح التائه said...

ياترى الأزمة مصدرها غباء من الآخرين وهمجية فى القول والتلفظ بما لايليق
ولا في الأصل أزمة مجتمع غير متحضر ومش متربي
أنا بارجح الإحتمال التاني
أغلب مجتمعنا الذكوري الشيزوفرينى بأفكارة المتناقضة وتصرفاته الدالة على تخلف فكري عميق فى القدم
مش مشكلة واحد ولا اتنين بيقول كلمة بلسانة بقصد او بدون قصد
المشكلة مشكلة نظرة متخلفه لأى انسانه لم توفق لشريك حياة يحقق لها ماتتمنى ويبدى من التفاهم ما يضمن للأسرة الإستمرار
فيراها المجتمع اما سيئة السمعه
او خالية من الجمال او الأنوثه
أو غير ذلك من الأسباب التى فقط تتحمل مسئوليتها البنت
نظرة فى منتهى التخلف
أنا حزين والله انى اسمع الكلام ده
جايز لأنى حاسه حزين
على كل حال كونى نفسك
ودعك من الآخرين
الملاح

رجل من غمار الموالى said...

الكلام موجع جدا
يا ريت الناس فعلا تحس ةتقدر ..

ولكنى أقول
...........
لو أن كل كلباً عوى ألقمته حجراً
لصار الحجر مثقال بدينار
................
لا تلقوا بالا ...للهمج الرعاع الذين يكررون الألفاظ ولا يقدرون معناها ..ولا يملكون إحساسا بما قد تسببه..
........والسلام

شخبطة ملوكى said...

ياريت الولا البوست ده مايتمسحش ابدا
ثانيا انا بضم صوتى لصوتك بجد انا بحس بمنتهى القرف لما بسمع الكلمة دى
لان فى كتير من الحالات بتمثل ضغط على البنت عشان تقبل اى عريس و السلام
وفى هذه الحالة بنكون ظلمنا البنت مرتين
مرة بقسوتنا فى الصفة التى الصقناها بها مع انها ممكن تكون هى اللى بترفض نظرا لانه لم ياتيها العريس الذى ترتاح له و توافق عليه وهى مطمنه
ومرة لما دفعناها دفع للموافقه على اول طارق و السلام حتى لو مش هو فارس احلامها
بجد بوست رائع اتمنى الا يحذف

الربان said...

تحياتي

هذه الكلمة لا أحبها و لا حتي أحب سماعها..و المفروض ان نكف عن استخدامها..

من لم يتزوج بعد سواء كان رجل أم أنثي...لا أحد يعلم الحكمة الالهية من وراء هذا.... بالتأكيد ان الله سبحانة و تعالي أختار لهم...و دائما و أبدا ما يكون أختيارة لنا رحمة بنا...
فمن يدري لو تزوج فلان أو فلانه فلعل الزواج يكون وبالا عليهم...و العياذ بالله ، و قد علمنا جميعا بحوادث و جرائم متعددة بين الازواج...و قانا الله جميعا شر الحوادث و شر الايام.

لا تحزني يا أختاه...و اعلمي ان الله سبحتنه و تعالي احتفظ لك بما تستحقين...ان لم يكن في الدنيا( و ما أقصر و اقل أيامها التي نحياها) ففي الاخرة... و هي دار البقاء و الهناء .

تحياتي

anima said...

أنا مش عارفة ليه حاتشيلي البوست ده
ده لازم يبقى لأنه عبرة
بصراحة أنا لا أعترف بكلمة اسمها العنوسة، طب في رجالة عدو الأربعين و ما اتجوزوش حانقول عليهم ايه؟
عمري 26سنة و لسة ما اتجوزتش، ما اتجوزتش بإرادتي يبقى أنا اخترت "العنوسة" بإرادتي يعني أنا مش
عانس
يمكن هما نسيوا اني ليهم اخوات و بكرة حيبقى ليهم بنات

NOHA said...

دى اول مرة بكتب عندك فيها لكن صدقينى البوست دة هايل جدا جدا مش قادرة اوصفلك اد ايه الموضوع اللى انتى اتكلمتى فيه مهم
انا فى رايى ان الموضوع دة بالظبط زى وئد البنات اللى كان موجود ايام الجاهلية و يمكن اصعب
البنت من يوم ما تتولد و هى بتدخل فى صراع مع الزمن لازم تكون جميلة الشكل و اقصد هنا المظهر الخارجى و معليش اسمحيلى ما فيش حد بيهتم بجمال الروح بس مثل ما يقال من شعارات و لازم تكون مودبة يعنى ما تحبش حد و لا ترتبط بحد علشان سمعتها يعنى تكتم مشاعرها كمان و يا ويلها بقى لو اتخطبت لواحد و سابوا بعض دايما تكون البنت اللى غلطانة و يا سلام لو اتجوزت و اطلقت يبقى احسن لها تموت اما بقى لو ما اتجوزتش خالص يفضل الكابوس المزعج دة يزعجها طول العمر و هى صاحية و هى نائمة و كلام الناس اللى انتوا عارفينوا سكاكين تدبح فيها ببطئ و امام كل دة لازم تظهر و كانها و لا على بالها علشان ما حدش يقول انها بتغيير او حقودة

ايه كل القهر النفسى دة انا عمرى 27 سنة و لسة ما اتجوزتش صدقنى انا بافضل انى افضل من غير جواز على انى اتجوز و افشل و احيانان بافكر انى لو اتجوزت و جبت بنت يا ترى هايكون مصيرها ايه هتتعذب هيا كمان و لا هتموت منتحرة علشان تريح نفسها من تعلقات الناس

رجاء اخير ارجوك ما تحذفيش البوست دة ابدا مهما وصلك من تعليقات سخيفة من ناس نفوسها ضعيفة

Epitaph said...

لا يا برايد
مش تمسحيه
عشان الناس تفهم

وكمان البنات تبطل تقول علي نفسها كدة
و الرجالة تفهم انها كلمة بتكسر النفس

رد بس علي احد المعلقين

هو مش الولد بيقعد يختار بنت اقل من 25 سنة و ماتكونش سمرا و مش تخينة و مش مسلوعة و بتلبس كعب عالي و عايزها تقعد في البيت و تقول حاضر و طيب
وكل واحد يقعد يختار اللي هوا عايزها
وغير كدة مايلزموش
مستكتر علي بنت انها كمان تحلم
ولا فعلا ترضي باول واحد يجيلها اصله سترة يعني
وبعدين مين قال ان البنت بترفض حد علي خلق يتقي ربنا فيها في الزمن ده حتي لو بيركب حنطور مش مواصلات

ولا ايه؟؟!

تحياتي يا برايد
:)

wanna b a bride said...

batoot

شكرا ليكي عل تأكيد وجهة نظري

مش مهم السن ..الكلمة مجرد إهانه ولا يجب أن تقال
--------------------

عبدو

أهلا بيك و ابقى قوللي على عنوان مدونتك و هاجي انشاء الله
-----------------
الحصان الأسود

سامعة يا هدى
--------------
حمايا

معلش يا أونكل فيه ناس لسه مالهومش تجارب
و الدنيا بتعلمنا
-----------------

dark knight

انت متحامل شوية ع الأخت تسنيم

بس منك ليها أنا ما باتدخلش في خناقات
------------------

الملاح التائه

كلام من دهب

بس أدينا بنحاول بتدي نغير المجتمع على الأفل من الحتة دي

بلفت نظر الناس الحلوة اللي بتيجي هنا
ان الكلمة بتضايق و بتجرح

تحياتي
----------------
رجل من غمار الموالي


لو أن كل كلباً عوى ألقمته حجراً
لصار الحجر مثقال بدينار

حلوة و الله عجبتني

بس هنا بنوجه نظر الناس اللي باعتبرهم معظمهم مثقف و محترم

واحدة واحدة
-----------------

شخبطة ملوكي

انشاء الله مش هامسحه

و فعلا مجرد خوف البنت من الكلمة دي بيدفعها لاتخاذ قرارات غلط كتير جدا
-----------------
الربان

صح و الله
ممكن واحدة تتجوز واحد لمجرد خوفها من انها تحمل الكلمة دي و في الآخر يكون مصيره أكياس القمامة متقطع ترنشات

شكرا ليك
-------------------

anima

مش هاشيله طالما كلكم شايفين كده

للأسف اللي بيستخدمها مش بس الرجالة الستات كمان

ربنا يهدي الجميع
---------------
noha

بحب الإسم ده جدا

للأسف ماحدش بيحس بألم حد إلا لو كان مكانه

مش بتمنى للناس الألم اللي بيسببوه لينا

بس لو بس يتحطوا في مكان أي بنت ليوم واح
هيعرفوا قد إيه كل يوم هو رحلة عذاب من اول النهار لآخره بسبب الموضوع ده

معلش ..يمكن ربنا يهديهم و يحسوا و يقدروا
----------------

epitaph

خلاص يا ابي

عشان خاطرك مش هامسحه

حق الغختيار ماحدش بيعتبره من حقوق البنت
هو حق ذكوري فقط

البنت لازم ترضى بنصيبها و تبوس ايديها وش وضهر

هنقول ايه؟

لنا الله

Motazaweg said...


هاي عليكي يا برايد،

بصفتي ممثل للمعارضة، فأولاً أنا بعترض على شيل البوست ده بعد أسبوع.. البوست لازم يفضل موجود لأنه برضه بوست فقري من فصيلة: "شر البلية ما يضحك" وبالتالي فهو مطابق لمواصفات الـ"نقد الساخر" التي تزخر بها مدونتكم المعارضة لسياسة معالينا العليا من واقع التجارب الشخصية والحياتية.


ثانياً: كلمة "عانسة" دي لفظة من التراث الشعبي الأصيل، ولقب مشرف لكل من لقب به لو عرفنا أصل اللفظ ده إيه في قاموس المتزوج للكلام المتوهج اللى إن شاء الله هاطرحة فى الأسواق قريب بسبعة جنيه ونص للنسخة (شاملة ضريبة المبيعات)


لفظة "عانسة" دي بالأساس هيه بعينها لفظة: "آنسة" عند الحاج مخيمر الصعيدي اللى هوه أول من إبتدع النطق ده.

يعني عارفة لما بالبحراوي نقول "هاروح المدرسة" فيقابلها بالصعيدي: "عاروح المدرسة" ؟؟

أهي "عانسة" دي بالمثل كدا.. زي ما "هاتجوز" تعني "عاتجوز" فكلمة "آنسة" تنطق "عانسة".. وكلمة "آنسات" تنطق "عانسات" من نفس المنطلق الصعيدي المخنف اللى مصاب باللحمية في مناخيره



يعنى من الآخر كدا.. متظلموش الناس الصعيدية نتيجة جهلكم يا بنات البندر.. دي كلمة مية مية.. بس من مسكين عنده لحمية..

________

باقدم إعتذاري عن التأخير يا برايد با أختي.. أصل أخوكي أطبش طبش فوق المعتاد ومعادل لتور الله في برسيمه في حكاية البلوجات والمدونات.. ومعرفتش إنك شرفتي مدونتي المتواضعة بتعليق لازم له موديريشن وسبكتيشن وكلام كتير مجعلص قوى..

المهم إني - مؤخراً - عرفت والحمد لله وقريت التعليق ولسة واصل من البلد وعايز ألحق القطر قبل ما يعاود


قال توزعوا عليا "قرص" قال :)

فااااااااااشر.. إن شالة اللى يكرهوني يا رب

المهم.. أنا مازلت حي أرزق والحمد لله وماتفقستش لحد دلوقتي والمخبأ مؤمن تأمين عالي قوى أعلى من مخبأ صدام حسين


وكفاية كدا لحسن الناس تعرف إن أنا رغاي بالسليقة وخلى موضوع إن أنا رغاي ده سر ما بينا :)

Anonymous said...

بصي يا برايد انتي عسولة جدا جدا و بحب اقرا كل حاجه انتي كاتباها
بالنسبة للكلمة دي هي اصلا كلمة قبيحة و الله مش عارفة ليه مش بتتقال الا للبنات بس يعني ليه اما الراجل يوصل للاربعين مش بيتقال عليه عانس مع ان اللي توصل للتلاتين بتبقى اخدت اللقب مع مرتبة الشرف !!
اخواتي البنات اتاخروا في الجواز و عارفة ان ده كمان هيكون قدري مع اننا حلوين - اه والله - بلاقي بنات اوحش مننا و تعليمهم اقل مننا و حتى مستوى اجتماعي اقل و بيتجوزوا جوازات حلوة طب اشمعنى اللي عايزين يتجوزوا بييجوا لحد عندنا و بيحودوا ؟
ده حتى ولا واحده فينا صاحبت !!
العيب فينا مثلا وللا ده قدر ؟ اكيد قدر عشان حتى لو العيب عيبنا ما في برضه لكل قمحة مسوسة كيال اعمى و احنا حتى مش لاقيين كيال متوفي !!!
فياريت كل واحد بيستظرف او كل واحده اتجوزت او اتخطبت بدري و فرحانة بنفسها متعدش تجرح في خلق الله عشان دي حاجه مش بايدينا والله مش حقد ولا حاجه ربنا يهني كل واحد في عيشته ....
ربنا يهدي

Anonymous said...

ربنا يوفقك

sol said...

Ur blog. is too nice and hope u keep writing even after god send u the son of HALLAL.

Hope u be happy.

Anonymous said...

انا عن نفسي الكلمة دي مش بتفرق معي، مش لحاجة غير إني متيقنة إن الجهلة هم اللي بيقولوها، أنا كنت بشوف بنات في الكلية 18 سنة و 19 سنة بيقولوا على نفسهم عنسوا !! من كثر ما المجتمع مش شايف في البنت غير زوجة وأم، غير كدا مش شايفين حاجة خالص ! عمي وصم وبكم وخرس وكل الإعاقات...
أول ما تنجح في ثانوي: عقبال الشربات !!
أول ما تدخل الكلية: مفيش عريس؟ أول ما تتخرج: لسة ما اتجوزتيش ؟
أول ما تتجوز: مفيش حاجة جاية في السكة؟
أول ما تخلف: مش ناوية تجيبي له/لها أخ ؟
أول ما تخلف تاني ! يسيبوها في حالها معكوكة ولا يسألوا عليها !!

دي جملة قرأتها بتوصف اللي بيحصل..

لغتك تحفة بجد، وخيالك واسع وتحبيشاتك ثرية..

أختك..بنت وتفخر أنها بنت رغم أنف المعتدين !

Anonymous said...

والله العظيم انت شكلك انسانة كويسة قوي بس السؤال يعني نقول ايه اقترحي انت بدائل واحنا نقولها انا عارف ان البنات بتبقي حساسة في الموضوع دة زي ماانت قولتي بس متهيألي انهم علشان يكملوا في الحياة لازم ياخدوا الموضوع عادي يعني في الأول والأخر هي كلمة تعبر عن تأخر سن الزواج مش معني كدة ان اللي اتأخرت وحشة او معيوبة بس هو النصيب لسة ماجاش زي كلمة عاطل مش معني كدة ان امكانياته ضعيفة هو بس لسة ماتوفقش ولاقي فرصة شغل لو كل حاجة اخدنها بحساسية يابرايد كنا متنا من زمان

koky said...

بصى انا اعرف انسانه من احسن ما يمكن, دين, وذكاءواخلاق وبتشتغل احسن شغلانه(ما شاء الله ) وعندها 35 سنه ولسه ماتجوزتش ما اعرفش ازاى الناس مش شايفه المميزات دى وبتجرى وراهاالا حاجة واحدة ان الناس معايرها بازط خالص

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

والله يا برايد كلامك حكم كالعاده الي عاوزه اضيفه يا جماعه ان السعاده احيانا كتير بتبقي ادام عينينا واحنا مش شايفنها عشان بنبقي مركزين في حاجه واحده بس هي الحاجه الي نقصانا البنات الي عايزه تتجوز وهي متاكده ان الجواز دلوقتي سلبياته اكتر من ايجابياته بتبقي عايزه تتجوز بس عشان ميتفلش عليها الكلمه ده طيب فرضا اتجوزت واصبحت حامله للقب مدام بدل من عانس بس مرتحتش في حياتها واكتشفت الحقيقه المره ان الجواز مش مجرد اتنين عايشين تحت سقف بيت واحد وخلاص ده كل واحد مطالب بحجات كتيره قوي ناحيه الطرف الاخر وتضحيات وتنازلات وخاصه البنت ولو اشتكت من اي حاجه مهما كانت الحاجه ده مضيقاها وصعبه علي اي حد ان يستحملها بيتقالها اصبري ملكيش الا بيتك وسعتها بس بتعرف انها كانت في جنه وانها ملهاش حق تتراجع دلوقتي وان ده اصبحت كل حياتها ولازم تقبلها وخدي عندك المعاناه الي بتعشها لما تكتشف انها اختارت غلط واتسرعت عشان ترتاح من كلام الناس اهو عملولها دلوقتي الناس ايه ولا حاجه ياجماعه رضي الناس غايه لا تدرك والناس حتفضل تتكلم فيا عزيزتي برايد في الختام اقولك سيبك منهم فالقافله تسير والكلاب تعوي

علاء said...

ما أروعك