Friday, March 02, 2007

آآآآآآآخر فرصة

بصراحة بصراحة مش عارفة أعمل فيكوا ايه

يعني عرضت عليكوا تجاربي و قصصي و أفلامي دي كلها ..و مافيش فايده

اللي ضحك و اللي اتريق و اللي عيط..و مافيش فايده

فين يا جماعة القصص و الحكايات اللي تقطع حشايا القلب و المعدة

يعني مكلفة نفسي و عاملالكم بلوج و مكلفاه الشئ الفلاني على حسابي
و قلت ياللا أهم يضحكوني معاهم زي ما ضحكتهم معايا
مافييييييييييييييييييييييش فايييييييييييييييييييييييده

بصوا بأه ..بناءا على إقتراح من قارئة عزيزة من قارئات المدونة
و عشان عارفة انكوا مابتجوش بالذوق

افتحوا الكراريس و اكتبوا من اول السطر
الوااااجب
على كل واحدة دخلت المدونة برجليها اليمين تبعتلي على الإيميل
قصة أغرب عرض جواز جالها في حياتها و اتصرفت فيه ازاي

و على كل واحد دخل المدونة برجله الشمال
قصة أغرب قصة غرامية حصلتلك أو مقلب شربته من الموضوع ده

ياللا إبتدوا الإجابة و ابعتوا الحل على الإيميل
wannababride@yahoo.com

إذا كنتي خايفه من صحباتك اللي على النت ..اكتبي باسم مستعار و هانشرلك بيه

اذا كنت خايف من المدام
مش مشكلتي يا باشا ان شخصيتك ضعيفة قدام الحريم بتوعك...رجالة آخر زمن

نرحب بجميع القصص ..زواج..خطوبة..طلاق..خلع ..أو حتى قصة حب لم تكتما

انا مستنية جنب صندوق البريد بتاعي
ص.ب..45
يعني اللي يبعت يبقى لابس صندل بني مقاس خمسةوأربعين

آخر فرصة ..بعد كده هاجيب البلدوزر و أسوي بيت العرايس و العرسان بالأرض
و ابعت أكتر ..فرصتك في النشر تكتر

و الله المستعان

34 comments:

أميرة البلطجية said...

هاي يا برايد
اخر مقلب كان في البوست دي
http://amirtelbaltgaya.blogspot.com/2007/02/blog-post_05.html
وسبحان الله
اسمك في اول سطررررررررر

غرشوبه said...

يااااااااااه يا بريد الحكايات كتيره ..بس اللى يسمع

هههههههههههههههه

لو دورتى مش هتلاقى اكتر من قصص الحب اللى مكملبتش ..ولا من حالات الطلاق وله من خطوبه مكمليتش..كتيررررررررررر

بس انت تبقى فاضيه تسمعى :)

Medo said...

ايوه كده يا برايد اظهرى وبانى عليكى الامانى عايزه تسمعى القصص بتاعتنا علشان تجمعيها وتنزليها فى كتاب وتبيعيه وتكسبى شىء وشويات ..عايزه تستغلىالعالم الغلابه مش كده يا برايد؟ ... خصوصا ان الجرايد اتكلمت عليكى....يا اما ابو قسم فيفتى فيفتى يا اما اتصل بشارون وجورج بوش واقولهم مقر تنظيم القاعده هنا فى البلوج
بهزر يا برايد مش تزعلى
طيب مش ابو قسم ولا حاجه التلت والتلتين طيب
:)

عبدالله said...

انا جاي مستني بالذات قصص الخلع

بما اني معنديش قصص غريبه و لا اي حاجه فقاعد مستني اتفرج علي الناس و افرح فيهم
:))))))))))

ربنا يستر

تحياتي

شيماء الجيزى said...

يا برايد ايه اغرب عرض جواز ده

مممممممممم والله ممكن

طيب هحاول اكتب حاجه لو جه فى بالى وابعتلك

وماله

ينفع تأليف :d

كراكيب عادل said...

برايد ادخلي مدونتي مليانة مقالب

هو احنا لازم نوصل الطلبات لغاية عندك ولا اية

Nouran said...

يالهوي انا من اول 10 تعليقات ايه الهنا ده طب واللي ملوش قصص يقف يتفرج عليكوا يعني
بس بجد محدش بعتلك اي حاجة ع الميل ده انا قلت فيه كتير هيبعتولك بالهبل

Anonymous said...

آخر فرصة ..بعد كده هاجيب البلدوزر و أسوي بيت العرايس و العرسان بالأرض براااااااااااااااايد!!!!!! اه وقعنا فالمحظور اشمعنى العرايس والعرسان بقى ؟؟؟ غيرة دى يا برايد ولا؟؟؟؟؟؟؟

moodysalihamidzic said...

معنديش صحبات
انا خيبة
D:
:(

هدى said...

انتي عارف المشكلة ايه يابرايد

ان المواقف دي مش بضحك قد ما بتوجع القلب

لكن أكيد هبعتلك بعض القصص

انتي تستاهلي كل خير


تحياتي

أُكتب بالرصاص said...

انا عندي حكاياااات
على رأي توفيق الدقن

تيشييييييب
:)
بس
باخاف من مراتي


:)

Dananeer said...

اغرب عرض جواز
من ابن العطار اللى جنب تيتى

كنت حاقتله
الولد فرحان بالدبلون و دماغه الفاضيه
و طقم الروشنه اللى هو فيه
و كمون و فلفل

و سيادتى مهندسه باهتمامات مختلفه تماااااما

Sokomonoce said...

اوع تقولى انك فلست خلاص او ان العرسان اتعموا ومابقوش يعدوا عليكى؟
ازعل جدا لان ده معناه ان مابقاش فيه رجاله ويبقى كدة فرصتك تقريبا يعنى ......مش عارف اقول ايه بس يعنى اعتقد ان فيه ....................؟

Anfal said...

برايد
انا حكاياتي كلها مؤلمة للغاية
و مش عاوزة أنكد على حد
و بيني و بينك هاتضايق لو حد ضحك على آلامي لأنها ممكن تكون من فرط السذاجة و البواخة مضحكة بجد ..!
هاحاول اكتب لك
دة لو لقيت الشجاعة
أنفال

جوز خالتك said...

أنا التعليق الخمستاشر
هأموت من الفرح
أنا ممكن على فكرة أشتري منك حقوق عمل البوستات دي على شكل سهرات فنية صغيرة و حلوة زي بتاعة زمان دي

لو موافقة أو عندك اقتراح في الموضوع تقدري تكلمي مديرة أعمالي-خالتك طبعا-
و آدي الميل عشان تعرفي إن أنا جاد في الموضوع.

mini_892003@yahoo.com

الكلام دة بره الهزار على فكرة

سندباد said...

سلام يا برايد

أنا كتبت ليك على مدونتي حكايه غريبه قليلا لكن واقعية و يمكن يكون فيها حل لأزمة الزواج..حاجه إسمها موسم الخطوبة....أرجو إنها تعجبك

تصبحي على خير

Anonymous said...
This comment has been removed by a blog administrator.
Anima said...

أيو جاااااااااااااي

ايه ده يا برايد عايزة تعملي مسلسل على حسابنا و لا ايه؟ طب حاتدينا كام؟؟؟؟؟؟؟؟؟؟؟
ممكن أكون المخرجة أنا باعشق الإخراج موووووووووت

raspoutine said...

دعوة عامه لكل المدونين المصريين لحضور اللقاء الثالث الذى تحدد موعده من قبل المشرفين عليه والمؤسيسن له


وذلك يوم


الجمعه الموافق 9/3/2007


بدار الاوبرا المصريه


كوفى شوب الابداع


بجوار دار الابداع بداخل الاوبرا


والدخول للمكان من البوابه الخلفيه للاوبرا امام النادى الاهلى


والحضور بالملابس الشتوية


واوجه الدعوة خاصة الى الاخوات المدونات
هنستناكى بجد

ايمن فاروق

Ahmed said...

Try
http://www.kobool.com/

3lool said...

مجهود رائع حقيقي
ربنا يسعدك ويوفقك

Romantic Rose said...

شوية شوية هتقولي ابعتلي موضوعين و خد التالت مجانا !! ايه البرموشانز الجامدة دي ؟؟

:)

شجره الدر said...

برايد انا بعتلك على الميل يالا بقى اللهم كتر من الفضايح
انا بموت فى المدونه بتاعتك بجد بتخلينى اضحك
لكن شر البليه مايضحك برضه

Blank-Socrate said...

لا يا برايد انت فييييييييين هتعملى ايه بالقصص ......فين قصتى ... انا بعت قصتى اعرف ايه اللى هيحصلهاانا مش مطمن!!!!1

wanna b a bride said...

أميرة البلطجية
looooooooooooooool

جامدة
معلش انتي حلوة وهو وحش..انتي امورة وهو حمار

ولا تزعلي يا ست الحلوين اللي مالوش أهل بيت العرايس و العرسان أهله
--------------------

غرشوبة

انا عن نفسي فاضية

اديها و لا يهمك
----------------------

medo

أخخخخخخخخخخخخخخ
كشفتني يابن الإيه

5% كويس
؟
-------------------------
عبد الله

بلاش تفرح في الناااس
ماحدش عارف المستقبل فيه ايييييه
;)
ابقى تعالى اتفرج انشاء الله فيه كتير
-------------------
شيماء الجيزي

ألفي ألفي ولا يهمك

طلعي كل مواهبك و علينا النشر و لا تبقي مع إيقاف التنفيذ أبدا
----------------------

كراكيب عادل

بجد مواقف جااامدة

بس مش ينفع بعد مانشرتها عندك أرجع أنشرها تاني

ابعتلنا حاجة فريش

wanna b a bride said...

nouran

منورة يا قمر من اول 10 او من آخر عشرة برضه منورة

ماحادش كان بيبعت بس دلوقتي جم بالتهديد

ابقي تعالي و اتفرجي
----------------------
anonymous

طب احمدوا ربنا اننا دخلنا فيها العرسان انا ماكنتش ناوية اصلا
--------------------

moodysalihamidzic

معلش معلش

انشاء الله هتتدبس في جوازة على طول
----------------------

هدى

الله يخليكي يا جميل

كل اما كانت المواضيع مؤلمة أكتر كل اما ممكن نضحك عليها اكتر

ممكن نرتاح
------------------

اكتب بالرصاص

الإعتراف بالحق فضيلة
و رحم الله امرء عرف قدر نفسه

تحياتي للمدام
-----------------
dananeer

طب ادينا التفاصيل

هي دي حكاية تتساب؟؟؟

كراكيب عادل said...

انا علشان خاطرك الغيها

بس استني فيه حجات كتير لسه متنشرتش

لضيق الوقت كلميني مسنجر وانا اديلك الافكار هتلاقي اميلي في مدونتي اه كمان روحي اتفرجي علي الصور الي هناك


وبعدين انتي ليه معلقتيش هناك حطي حتي شخبطة علشان افتخر بيك قدام الناس طب ينفع تزوري مدونتي ومتسيبيش ذكري مش يمكن بكرة تتجوزي ومحدش يشوفك


يالا بئي حطيلي توقيعك

wanna b a bride said...

sokomonoce

العرسان كتييييييييييييييييير

دانا لو بس فتحت خزينة الذكريات اعمللي 24-25 عريس

دع غير اللي لسه بييجوا

بس انا بادي فرصة لبقية الناس يتكلموا في الموضوع بجراه و من غير خجل

و نضحك كلنا مع بعض بدل ما كل واحد يزعل لوحده

والا ايه؟؟؟
-------------------
anfal

مستنيياكي

و اللي يضحك يضحك..ولا يهمك
--------------------

جوز خالتي

هابقى اتكلم مع خالتي في الموضوع ده انشاء الله
-------------------
سندباد

قريت الحكاية و عجبتني جدا

و الله عالم رايقة و مريحة دماغها

البساطة هي اللي بتمشي المواضيع
عقبالنا
-------------------
anima

و أعطيناكي مهمة الإخراج يا ستي

احنا عندنا أعز منك يعني؟؟
------------------
raspotine

هحاول
بس صعب شوية
-----------------
ahmed

i'll try it
thnx

wanna b a bride said...

3lool

شكر ليك

يارب يسعد الجميع يااارب
------------------
romantic rose

لا لا لا

موضوع الجوايز ده مش سكتي

البلدوزر جاهز جنبي أهه

مش هتبعتوا ههد..ولا يهمني
--------------------
شجرة الدر

شكرا ليكي على ميلك
و على الحكاية

انشاء الله هتتنشر قريب
------------------
blank-socrate

قريب جدا انشاء الله

------------------
كراكيب عادل

عينيا ليك

طبعا أحطلك تعليق

دانتا غالي علينا

كراكيب عادل said...

بصي مدام حطيتي تعليقك عندي يبقي خلاص

انتي موضوعك كان مرهون علي التعليق دة

هههههههههه

انا هطبع التعليق دة واحطة علي ازاز العربية من ورا وهلف بية بكرة الخميس وفرصة عندي شبة اجازة تعرفي فية ناس كتير انتي متعرفيهاش كلهم بيحبوك ليكي طابع معين فية حاجة في شخصيتك صعبة تتفسر متشتغلي سفيرة نوايا حسنة

يمكن تهدي النفوس بين الدول

Ahmed said...

على فكرة أسلوب برايد مش غريب علي أبدا وإن كان فيه تشابه كبير بينه وبين أسلوب صديقة قديمة وأخت فاضلة تعرفناها من خلال منتديات جاده ومحترمة والكلام ده يمكن من أربع سنين تقريبا ولكن بغض النظر عن كونها تلك الصديقة أم لا .... بجد طرحك للمواضيع هنا جيد جدا وبلوج محترمة... جو أهيد

galaxy_cadbry said...

رائع يا برايد انا لسه جديده هنا بس معجبة ب اسلوبك اوي اوي اوي يارب نكون كلنا اخوات وانا سعيده بوجودب جدبده في وسطكم هنا يا ريت تقبلوني

ايمان said...

اذا كان على القصصص كتيييير
بس احلى حاجه انك بتقلبى المواضيع لسخريه
والله احسن حاجه بدل ماييجيلنا نقطه بـــــــــــــــعد الشر عليو طبعا

Anonymous said...

لقد قرأت كتابك " عايزة اتجوز" وحقيقة وجدت فيه واقعية وخفة دم وروح
مرحة .. اسجل اعجابى بالكتاب والكاتبة
وعمار يامصر بأولادك وبناتك اللى دمهم شربات ورد من بتاع ومان.
الشيمى