Sunday, May 27, 2007

تابع السابع


يا أرضنا العطشااااانة نرويها بدماااااانا..#@#*# شقااااانا..تصبح بالخير ماليانة

لقيت نفسي اليوم الموعود بادندن الأغنية الرومانسية دي في دماغي..هي أغنية رومانسية و حنونة جدا بس اللي ضايقني إني ناسية كلماتها.و ده خلاني أتشائم..حاولت أدور جوه مخي على مطلع أغنية تانية رومانسية من بتوع مطربتي المفضلة الساحرة الرقيقة شفيقة..ما أسعفتنيش الذاكرة
المهم في الآخر استقرت في خلايا المخ الرمادية بتاعتي أغنية رومانسية رقيقة

دقيقةحداد..دقيقة حداد..دقيقة حداااااااد

ارتحت للريتم الشجي ده و ابتديت أستعد لليوم الموعود
خرجت هدومي كلها من الدولاب و بدأت أدور على حاجة ألبسها

أنا مش منافقة..لايمممممممممكن أغير نظامي عشان خاطر حد..ده يبقى اسمه غش تدليس نفاق كذب..بس يعععععني.مش هنخسر حاجة لو وقفنا على أرض محايدة ..شديييت الطقم الأحمر..إخصصص أحمر و العياذ بالله لالالا..و بعدين لحسن يطلع زمالكاوي زي البيه الأولاني و بعدين دول بدأوا يكتروا في البلد اليومين دول

طب الطقم الفوشيا...لا والا فوشية ايه ..ده اسمه لوحده ممكن يخليه يقيم عليا الحد

طب نخليه الأصفر..لالالا..لون خليع الأصفر ده..بلاشه
و فضلت أطلع لون ورا لون و طقم ورا طقم بس مارتحتش نفسيا لأي حاجة منهم

آآآآه..و أخيرا..لقيت في أرضية الدولاب حاجة كده بيضه منفوشة..آآه..دي يا إما النموسية بتاعة جدتي يا إما الباراشوت اللي عمي نط بيه في حرب أكتوبر..مين اللي بيقول ماكانش فيه باراشوتات في حرب أكتوبر؟..انتوا هتفهموا أكتر من عمي؟..هو بنفسه أكدلي انه نزل بالباراشوت في سينا في 6 أكتوبر 74 و مادام قاللي كده يبقى لازم أصدقه أمال هيشتغلني يعني؟..مرت عليا لحظة من الفخر بعمي و بطولاته اللي واحدة منهم اتعملت فيديو جيم بيلعب بيها بابا وأونكل ديسكو كل أسبوع..و قررت اني بشوية دبابيس على حبة غرز هيكون ده هو الزي المناسب اللي أدخل بيه ع العريس المنتظر أبيض في أبيض..لون حيادي و بعيدن فيه فرصة كبيرة ان الموضوع يمشي لأن الباراشوت ده زي ماعمي قاللي جالب للحظ و اللي يلبسه لا يمكن يجراله حاجه وحشة زي ماحصله و هو نازل ع الحدود و 4 اسرائيلين كانوا بينشنوا عليه و قعد يرقص في الرصاص يرقص في الرصاص و نزل سالم غانم فوق السطوح

مديت إيدي على علبة الماكياج و بعدين سحبتها أسرع ماباسحب المرتب من إيد الأستاذ رزق أول كل شهر..و قررت أعمل بنصيحة أماني و ماحطش ماكياج .. ده قرار صعب جدا لواحدة زيي لا يمكن تخرج من أوضتها من غيرالتظبيط اليومي
زي ماقلت أنا لا يممممممممكن أغير نظامي..بس يعععععني يوم واحد من غير ماكياج على الأقل هيريح بشرتي شوية
خرجت من أوضتي عشان أبدأ في موال التنضيف بتاع كل مرة..و في نص الصالة لقيت بابا اللي كان شايل في ايده كباية شاي و جرنال

صباح الخير
صباح النور
فيه حاجة جديدة في الجرايد؟
أكيد فيه..انتي مستنية حد؟
لأ عادي
أمال رايحة فين ؟
رايحة أنضف مع ماما
إيه ده هي مامتك هناكمان؟
أمال هتروح فين؟
و ناويين تقعدوا معانا كتير
بابا..فيه ايه؟..دي مبادئ الزهايمر والا ايه؟
بابا..بابا مين؟
و قربلي و دقق قوي في وشي
انتي مين؟
بابا..انا برايد..مش عارفني
برايد؟..برايد؟..آآه برايد..ايه اللي انتي عاملاه في نفسك ده؟..انتي حاطه ماكياج والا ايه؟..شكلك غريب قوي
آه معلش أصلي باجرب نوع جديد


الحمدلله ان العريس ده ماشافنيش قبل كده ربنا بس يستر و أماني و فوفو مايفتحوش بقهم

و بعد كورس التنضيف و تظبيط الباراشوت البطولي على مقاسي مع ترك خطوطه الأساسية ووسعه زي ماهو..ضرب جرس الباب..بابا فتح الباب و لقا قدامه شخصين مايعرفهومش
بعد شوية مقاومة و انكار و محاولات إقناع ..اقتنع بابا أخيرا ان دول اماني و فوفو و هز راسه و هو بيقول
مش عارف الناس شكلها بيتغير كده ليه؟..انا لازم أغير النضارة

دخلت الصالون معايا صينية الجاتوه المعتاده و قعدت أبص ع اللي قاعدين

اماني و فوفو دول؟..غالبا آه أنا عرفتهم من الهدوم هما كانوا مستغربين شكلي بس مش أد استغرابي لشكلهم و خصوصا فوفو
يا حلاوة..ده طلع شبه الرجالة أهه ده حتى فيه مبادئ شنب يحاول جاهدا إثبات ذاته..لكنه للأسف الشنب المناسب في المكان غير المناسب..و بين فوفو و أماني لمحت هند الصغيرة بتنقل عينيها في رعب بين مامتها و باباها بنظرة عجيبة كأنها طائر من طيور البطريق نام في القطب الشمالي و صحي لقه نفسه في بنها.مسكينة البنت أكيد جاتلها صدمة عصبية و تلاقيها فاكرة انها مخطوفة..صعبت عليا المضروبة

مش وقته يا بربر..خلينا في المهم وطيت راسي و بصيت في الأرض..و هي الحركة اللي بقالي 3 ساعات باتدرب عليها.انا عمري ماوطيت راسي لحد ..أولا لأني..عمري مادخل قسم ..ثانيا لأني أحب أبص في عين اللي قدامي وانا باكلمه..أنا ماباغيرش نظامي.. بس يععععني كان نفسي من زمان أدقق في لون السجادة بتاعنا

طب و الله سجادة حلوة ياجماعة فيها أزرق و أحمر و..ص.ب.48...لأ ده مش عنوانا البريدي مكتوب على السجادة ..ده اللي العريس كان لابسه في رجله..صندل بني شكله مقاس 48..آآآآه..جاتلي قفلة في النفسية متمركزه في العمق العاطفي...صندل يا برايد؟..هي حصلت؟..تتجوزي واحد لابس صندل..بس لأ..مش حنهبكها بأه..أنا في المرحلة دي مستعدة أتجوز أي كائن متعدد الخلايا مادام هينشلني من فترينة الجواز..مش مششششكلة الصندل ..نبقى نغيرهوله مش مشكلة هما صحيح بيقولوا الراجل بيبان من جزمته ..لكن ده طبعا كله كلام قديم وأنا لايمكن أعمله اعتبار خصوصا في هذه المرحله الإنتقالية الحرجة..طلعت بنظري لفوق لفوق لفوق..كويس لابس بدلة و كرافته..بس فين راسه؟؟؟؟..راسه فين؟؟..انا مممكن اتغاضى عن أشياء كتير..لكن ياربي أتجوز عريس من غير راس.قعدت أدقق قوي أدقق قوي و فجأه لمحت حاجة بتلعب كده...ياسلااام دي عنين شخص...آه و الله عنين شخص بتلعب أهه؟..بس فين بقيت الأجزاء..الفم و المناخير مش شايفاهم...دماغ العريس كانت عبارة عن كورة كبيرة من الشعر طالعلها عينين..شعره بحواجبه بدقنه بشنبه كلها عبارة عن شريط واحد سميك من الشعر ملفوف باحكام عجيب حوالين دماغه..يفكرك بالإنسان البدائي اللي كانوا بيدرسهولنا في التاريخ..لدرجة اني تخيلت انه هيقوم يشدني من شعري و يسحبني منه وراه ع الكهف...بسسسسس يا برايد..اهمدي و اتهدي..دقن ايه و شنب ايه اللي هيبوظوا جوازه؟..اعقلي كده وارسي و بعدين و مالوا يعني الشعر الغزيرمش أحسن من العكس؟..بس بس ماتبقيش خايبة مانتي قدامك أماني أهه مثل عظيم عن التنازل عن كل حاجة من اجل تكوين شركة لتربية العيال..هي دي قمة التضحية من أجل الأجيال القادمة

على جانبي العريس لقيته جايب اتنين من اخواته واحده منشكحة ع الآخر صفين اسنان طالعلهم واحده ست و التانية واضح انها جاية غصب عاها..بتبصلي بغل كأني لسه مسلماها فاتورة التليفون..آآآه أنا عارفة النوعية دي..يا إما لسه ماتجوزتش و شايفه ان أي جوازة بتحصل على وجه الخليقة إهانة شخصية في حقها-بتفكرني بحد بس مش مركزة مين- يا إما متجوزة جوازة تعيسة و مستخسره أخوها الحيلة في أي واحدة يسعدها
أنا مالي و مالها..دع الخلق للخالق..أنا لا يمممكن أسمح لأي حاجة تبوظ الجوازة دي..كفاية بأه

العريس ابتدى يتكلم من مكان ما في منتصف نص وشه اللي تحت

بص يا عمي..احنا ناس نحب ندخل البيوت من أبوابها ..و احنا سمعنا كلام كتير كويس عنكم من الأستاذ عبد الفتاح
من مين؟
الأستاذ عبد الفتاح
مين الأستاذ عبد الفتاح
ده
و شاور على فوفو اللي للحظة بص وراه
مين ؟آه..أنا..أنا
أحنا طبعا مانعرفوش بطريقة مباشرة لكن الأخ عماد صديقه يبقى ابن عمي و سمعه بيشكر فيكوا جدا..و انا عن نفسي مستعد لكل طلباتكم ان شاء الله

ماما اتدخلت
على طول كده..مش الأول تقعد معاها و تعرفها
إييييييييه؟
ده الثنائي المرح بيصرخ في صوت واحد و هما بيخبطوا على قفصهم الصدري اللي قرب يتكسر
أ..أ..أنا قصدي يعني عشان التعارف وكده

يا حاجة احنا مانعرفش الحاجات دي احنا اهم حاجة عندنا الأصل

اتكيفت انا من الكلمتين دول..من غير قعاد بأه و كلام مالوش لازمة و بص تاني في الأرض لما رقبتي هتتكسر
عمياني كده ..يمكن هو ده اللي يجيب فايده

أيوه بس الأول نتعرف أكتر على شخصية حضرتك..يعني احنا مش من الناس اللي بتحب التزمت قوي
و مين يحبه؟
يعني من ناحية شغلها
دي مهنة سامية مافيهاش أي مشكلة
(والا كنت اعرف)
زيارتها لأهلها
طبعا دي صلة رحم
خروج وفسح
طبعا أنا عن نفسي أحب الخروج طالما في اماكن محترمة
التلفزيون و النت
طالما أنا واثق في عقلها اللي سمعت عنه كتير يبقى أكيد هاثق في اختياراتها
( ايه الحلاوة دي ..ده عريس فول أوبشان يا جدعان)
طب و بالنسبة يعني للماديات
أنا و الحمدلله عندي شقة كبيرة 4 أوض وريسيبشان كبير و جاهزة من كل شئ
ده شئ كويس جدا..يعني ان شاء الله لو فيه قبول.. يعني حاجات بسيطة بس اللي هتتشرى
لا لا القبول مضون ان شاء الله
(ياواد يا ثقة)
و ان شاء الله مافيش أي شئ هنحتاج نشتريه
أيوة بس يعني العفش و الأجهزة
لااااا..و لا حتى دول..الشقة فيها كل شئ

ماخلاص بأه يا أم برايد..الأستاذ واضح انه شاري كل حاجة جديد في جديد ..هنطلب ايه أكتر من كده..بعد القبول ان شاء الله
لا لا..القبول مضمون ان شاء الله
(ثقة لا تزعزع)
و الأجهزة مش جديدة قوي يعني

ماما ابتدت تزوم

آه عادي ..يعني عازب بأه و كده و استعمل حاجات بسيطة استعمال بسيط
لا ..الحقيقة المسأله مش كده
أمال ايه يعني..انت شاري كل حاجة مستعمله
لا لا ..حاشى الله..انا برضه اعمل في بنات الناس كده؟
أمال ايه يعني الموضوع
في اللحظة دي سمعنا صوت انذار عربية
دي تقريبا عربيتي ممكن أطلع البلكونة أطفي الإنذار
آه طبعا اتفضل

و طلع العريس و معاه بابا وراه جري فوفو و أماني جريين وراهم هند عايزين يطقسوا و يشوفوا نوع العربية ماما قامت تجيب حاجة ساقعة و فضلت أنا و الأختين الحلوين في الصالون لوحدنا

و فجأه أخته اللي كانت منشكحة قوي دي ابتسامتها راحت في لمح البصر و بصتلي نفس البصة بتاع أختها التانيه..انا كشيت في مكاني و ارتعدت فرائصي-الجماعة بتوع النحوي لو سمحتوا يبقوا يقولولي فرائصي دي اللي هي ايه- قاموا الأتنين و جم نحيتي

يا ماماااااا..قاموا قعدوا جنبي زي أسدين قصر النيل واحدة ع اليمين و التانية ع الشمال وكل واحدة استلمتلها ودن و وطت على ودني عشان تقرمها

لأ لأ ماعضونيش بس همسو في ودني بصوت واطيييييي
بلاش الجوازة دي أحسن لك
مش هاترتاحي إحنا عايزين مصلحتك
تيبه مش زي تيبك و مش هتتفقوا
ده غير ان احنا لا يمكن نسمحله يتجوز دكتورة
انتي عايزة تيجي تعمليلنا فيها بنت بارم ديله
بص أنا بابايا مالوش ديل
هش..وطي صوتك
مخك في راسك تعرفي خلاصك
في اللحظة دي دخلوا الباقيين و انقلب الهمس لأحضان و بوس
يا حبيبتش أنا حبيتك قوي
و الله دانتي هتبقي عروسة تجنن
داحنا هنشيلك على كفوف الراحة

الكلمة الأخرانية دي ماعجبيتش ماما اللي كانت شايفاني باستغيث بيها عن طريق التخاطر العقلي الأثيري

ايه ده ؟..هو انت شقة حضرتك في بيت العيلة؟
لا لا لا..أنا شقتي بعيدة عن بيت العيلة انا عارف الموضوع ده حساس لناس كتير
يا أم برايد و ايه يعني حتى لو في بيت العيلة..ده الراجل شكله من عيلة محترمة و أصل طيب حتى باين ع الآنسات
آنسات..آنسات مين دي كل واحده فيهم عندها 3 عيال
آه انا آسف ياسيدي قصدي المدامات
ان شاء الله مع الأيام نتعرف بيهم والا ايه؟
طبعا ماحنا لازم نتعرف مش احنا و بنتكوا هنعيش في شقة واحدة
نعمممممممم..ازاي يعني..انت مش قلت شقتك بعيد عن بيت العيلة..أمال ازاي اخواتك يعيشوا معاك
انتوا فاكرين دول إخواتي؟
أمال ؟
لااااااا..دي تهاني مراتي الأولانية..و دي أمل مراتي التانية أنا ماشي حسب الشرع لا يمممكن أتجوز واحدة غير لما يكونوا اللي قبلها موافقين عليها..أماااال كله حسب الشرع

عارفين شعور تايتانك لما خبطت في جبل الجليد..لأ طبعا ماتعرفوش و هي تايتانك كان ليها شعور؟..بس يعني تخيلوا حاجة زي كده

حتى ماقدرناش نزعق ولا نعترض ولا ندألج حد من ع السلم
امشي يابني ..امشي ..روح في حالك .. احنا ماعندناش بنات للجواز

يعني مافيش جواز؟
لأ
و النبي صحيح
قلت لك مافيش
لولولولولولولولولولولولولولولي
لولولولولولولولولولولولولولولي

و دي كانت أول مرة تدوي فيها الزغاريط في صالوننا المتواضع


و العاقبة عندكم في المسرات

120 comments:

TAFATEFO said...

دي بقى هزار ولا جد ؟؟

هو أكيد بتهزري لأن الكلام ده ميدخلش دماغي .. وأكيد مش بتهزري لأنك كتبتي الكلام ده

والله يا برايد لو الكلام ده حصل يبقى المفروض تعدمي نوال وفوفو دول في ميدان عام.

ومسمعكيش مره تانيه تدافعي عن جواز الصالونات

Esmeralda said...

انتى بتعملى ايه فى نفسك فى العادى امال لو ابوكى معرفكيش من غير مكياج؟؟؟؟
الاعتدال مطلوب
و بعدين احمدى ربنا انهم جم معاه
كتر خير الراجل واضح و صريح

ايه اللى جاى بصندل ده كمان!!!!!!!!!

هو يا ربى مفيش حد بين البنين كده
يا اما خنفوس و روش يااما مدروش !!!!!!!!!!
يلا ربنا يعوض
و بلاش تعملى ملاك تانى ابيض فى ابيض
خليكى زى مانتى و اللى عاجبه

ربنا يهدهم

emos said...

howa ya3ny tant garetko deh ma3erfetsh te2ool enoo metgawez

w ba3deen ba3d keda haty 3aresek benafsk mat7;aleesh 7ad yegeblek 7aga

ta3aly neroo7 ma7al 3ersan sheek keda w nena2elek wa7ed

rabena ma3akyb ya benty w yerzo2ek ya rab

Osman said...

انا مش مصدق نفسى, بجد مذهوووووووووللللل.
ده نفس احساسى لما جه واحد كان معايا فى الكلية بيسألنى " انا ناوى انشاء الله اتجوز اتنين, تفتكر لما اتقدم للأولانيه اقولها عشان الأمانة ولا اسكت"
ساعتها جانى نفس الذهول.

Doba said...

مش ممكككككككككككككن
الحمد لللللللللللله

غارووووووووووووو
رميتى القلة وراهم ولا نسيتى

انا بس نفسى اعرف هيه أمانى وفوفو روحو سولام ولا عالمستشفى، اصلك لو سيبتيهم كده من غير جروح يبقى حاجة لا تطاق

ومفيش حاجة اقدر اقولهالك غير لولولولولولولولولولولولولولولولولولولولولولولولولولولولولولى

سلامات

MaMaDo said...

أولا أحب أهنيكي علي البلوج الجميل دا وثانيا أحب أحيي شجاعتك في المشاركة و أحييكي علي أختيار موضوع مهم و مشكلة صعبة و شائكة زي الجواز.
مرة تانية ,مدونة ممتازة

أيامنا الحلوة said...

ههههههههههههه انتي عرسانك كلهم تحف كده ده انتي لو جمعتي القصص بتاعت العرسان تنفع تتمثل ويبقى مسلسل تحفة وتسميه عرساني التحف ويبقوا حلقة وحلقة ..

تحياتي لاسلوبك الممتع بجد انتي في اسلوبك محصلتيش

الحصان الأسود said...

هههههه

عليا النعمه انتي في الاخر حاتتجوزي واحد فية كل العبر يطلع البلى على جتتك

انا متهيألي دي سلسلة الف عريس و عريس

او على بابا و الاربعين عريس

بس يا ترى في الاخر حاتتجوزي و للا قعدتك عالنت تكتبيلنا في بوستات حاتطول إلى ماشاء الله

ايوية said...

حبيبتى برايد بجد مش عارفة اقولك اية انا لو منك فوفو ومراتة دول ترمى عليهم مية نار ولا اقولك بلغى هيئة حقوق الانسان انهم مضهدينك
تعيشى وتاخدى عريس تانى سورى اقصد ثامن

تائهة فى أرض الأحلام said...

ههههههههههههههههههههههه

كدة نقدر نطبق المثل " اللى خدته القارعة تاخده ... "

بجد يابرايد انتى اقنعتينىى ابعد تماما عن جواز الصالونات

ربنا يكون فى عون شباب البلد ديه

فالحلال فيه بقى أصعب من الحرام

تحياتى لك يابرايد

دكتورة هبه said...

اني بتتكلمي بجد يا برايد ولا ده هزار

دي قصه واقعيه يعني حصلت!!!!!!!!!!1


انا مش مصدقه خالص ان ده ممكن يحصل في الواقع ابداااااا


انتي مستحمله ازاي كل ده



انا لو منك اضرب عن الجواز خالص






وبرضه مش مصدقه ان القصه دي حصلت

دي حاجه كده تبقي في الروايات والحكايات الخياليه بس والافلام الهندي!!!

Spyfun said...

اسلوبك في التعبير رائع ,بالنسبه بقه للحصل فهو حصل خير بجد
كل اللي اعرفه علشان نوصل للحاجه الكويسه لازم نشوف الاول الوحش
مش عارف انتي حظك كده ليه,ان شاء الله ربنا يكرمك بواحد زيك كده يكون ابن ناس و عقليته كويسه والله المستعان

جوستيـن said...

يالهوي
دا بجد؟

shaimaa said...

لابس صندل بني؟؟

ومدلقتيش الصنيه باللي فيها عليه

يابنتي القاعده دي دهبيه وسليمه ميه في المييييه
الرااااااااااااااجل مقامه يبداء من جزمته
اتحطت في الموقف دا كتير وكان منهم واحد جاي لابس كوتشي
انا غالبا ببقي ساكته بس استفزيت قوي
قلتله ايه الكوتشي الخطير دا
جايبه من باتا بالقسط ولا مشتريه فوري
ورحت قايمه ماشيه
ال صندل ال
عالم عرر صحيح

Anonymous said...

لوووووووووووووووووووووول
بجد شر البلية ما يضحك
بس برضه يا دكتوره برايدي كان المفروض عند فيهم تعاندي وتتجوزيه وتكتمي على نفسهم لا وإيه تاخديهم وتروحوا تختاروله الرابعه
ههههههههههههههههههههههههه
والله دنتي حكايتك حكايه ولا روايات السيما
المهم يا ست البنات
والله ارتحت لما عرفت إنه في الآخر مش نصيبك
إنتي تستاهلي أكتر من كده بكتير
ومدام إنتي مؤمنه بإن ربنا موجود
وكل شيء قسمه ونصيب
ربنا إنشاءالله حايرزقك وهيعوضك كل خير
بس إنتي استمري في رحلة البحث
إسعى ياعبدي
أتمنى إنها تكون غمامه وانزاحت من طريقك
خليكي متفاءله
الخير موجود
والطيبون للطيبات
تحياتي ليكي ولكل البنات الصامدات
من الكويت
وليد

همسة قلم said...

هههههههههههههههههههههههههههههه

بجد بجد يابرايد مش قادرة امسك نفسي من الضحك وانا متخيلة منظرك بين الاتنين دول
ههههههههههههههه

يابنتي الله يكون في عونك
مش ممكن يابرايد انتي وحكاياتك مع العرسان تحفة بجد

دي اول مرة ارد على بوست عندك لكني متابعكِ على طول والله

ربنا يكرمك ويرزقك الزوج الصالح اللى يستاهلك يادكتورة ياسكرة

اسماء

Bestic said...

no comment
انا لو منك اعتزل
حراااااااااام
احييكي على قوة احتمالك

shahy said...

منك لله يا برايد
خرجتيني من جو النكد اللي كنت عايشة فية
اصلي ناوية اكتب بوست جديد يمكن يبقى نكد شوية
اعمل اية دلوقت بقى؟
بصي انت احسن حاجة تسيبك من المستشفى بتاعتك وتتفرغي لكتابة مسرحيات ومسلسلات كوميدية
وربنا يكتر عرسانك ويرزقك بالزوج الصالح ان شاء الله

Rania said...

والله توقفت كثيرا عند النهاية الصادمة دي كان الله في عونك فعلا

واهمس في اذنك كلما زادت شدة البلاء كلما زادت عظمة الجائزة وهذه هي رحمة وكرم الخالق لتخفيف الم الصابرين وربنا ارحم من عبيده فلا تقنطي من رحمة الله.

اختك في الله رانية

YARA said...

all these are fiction X fiction. You picked from here and there. In my opinion find for yourself a publisher and make some money and good luck.

Anonymous said...

مش هاقولك غير تستاهلى
علشان كثر دى كان جايباللك عريس سوابق قبل كدة

ومتجوزة فوفو

يبقى ايةةةةةةةةةةةة

استنى نصيبك يا بنتى

اختك
موندة

Anonymous said...

ابتدينا نهرج بأه ولا ايه؟؟؟
انا ممكن اتقدملك وتبقى قصه بجد
بدل التأليف
والقصص الخياليه

meroooo said...

دا الحج متولي مش معقوله
استني نصيبك يابرايد

Aardvark EF-111B said...

بتتكلمي جد ولا تخاريف, بأمانه سرحت بيا جامد, بس جامده, حلوه بجد و ضحكت كتيييير

إنـســانة said...

هههههههههههههههههههههههههههههه

معلش يابنتى خيرها فى غيرها

ربنا يصبرك ويصبرنا ويصبر كل اللى زيينا

اللهم امييييييين

omar مشروع بطل said...

فظييييييييييييييييييييييييعة
انا ضحكت موووووووووت
بجد مدونة جامدة جدا
دى أول زيارة ليا وهتكرر هتكرر

كريم said...

يا بنتى انتى دماغك عاليه قوى

ربنا معاكى

تحياتى ,,,

The Groom said...


هاهاهاهاها

أنا فطست من الضحك

لا حول ولا قوة الا بالله شر البلية ما يضحك فعلا

عموما خيرها في غيرها يا برايد

تحياتي لك من ماناساس البلد

reham said...

والله انا قلت ليكى خللى بالك من جيرانك.بس مكنتش اعرف انهم بالطريقة دى..يا خرابى يا عرابى ..احييكى على طولة بالك يا جميل

Anonymous said...

الحمد لله انك لم ترتبطى بهذا الارهابى الهمجى المتخلف

هو يريدك مجرد واحدة من ازواجه وما ملكت يمينه

التهانى لكى

Shahro said...

ازيك يا قمر
طبعا شطحت منك شوية المرة دي, مش عارف معقولة الموضوع ده من نسج خيالك و شخصية ادهم و نبيل فاروق مأثرين عليكي قوي كدة

بس ده لو كان حقيقي هقولك تستاهلي يا برايد عشان ضيعتي الضبوطة من ايديكي, الراجل زي الفل و طول و عرض و كاريزما و قوة حضور و دقة و وحش ديناصور في نظراته انتي بس اللي اتبطرتي عليه

عقبال مغامرتك مع التامنو يا رب يكون الاخير

بس التامن خليه عليا انا

little said...

اولا حمدا لله على سلامتك انا كل يوم يا بنتي افتح عشان البوست الاقيكي لسه منزلتيهوش
ثانيا بجد بقى مش قادرة أصدق الموضوع دا
دا زي الأفلام بالزبط
يعني بنت فوفو ومراته دول ازاي مقالوش انه متنيل متجوز اتنين قبل ما يجيبوه ؟؟؟
انا عارفه ان ليكي تحابيشك ف المواضيع ودي الي بتخلي اسلوبك رائع فوق الوصف
بس انا صلب القسة نفسه مش قادرة اصدقه
لو الكلام دا حصل فعلا يبقى يا بنتي انتي معمولك عمل على ديل قرموط
يخلي العرسان ييجوا ويجروا تاني زي القراميط لما تتصاد كده
انا بهزر طبعا
عموما لو الكلام دا حقيقي انا لو مكانك اتعقد من الجواز

ربنا يعينك على عرسانك
وربنا يعينك اكتر على الردود الغلسة الي هنا

بس خلاص

سجدة said...

لا ما شاء الله عريس لقطة تحفة يعنى بجد
دا تخديه تحطيه فى متحف واللى رايح واللى جاى بالصرمة على دماغه
ناس غريبة بجد
بس قولى الحقيقة دا بجد
ولا خيالك الواسع

ارحم دماغك! said...

هاهاهاهاهاهاهااهاهاهاهاهاهاهاااااي
1- طيب..الفرائص جمع فريصة وهي عضلة بين الرقبة والكتف ترتعد عند الخوف..

2- ص.ب. مع بدلة وكرافتة؟..بصي، مكنش المفروض تكملي بعد دي!!
ص.ب.على قفطان أقول لك كملي المظاهر مش مهم، لكن ص.ب. على بدلة ده يبقى حلوف بقى!!

3- بجد الحكاية دي حقيقية؟! LOL

e7na said...

الحاجه اللى علقت معايا قوى لما فضلتى تتكلمى عنهم نصف ساعه وبعدين رجعت تقولى دع الخلق للخالق
أسوبك مميز جدا يعنى لو الواحد شاف كلمه لك فى اى مجله هيعرف انك الكاتب من غير الاسم
وبعدين كنت وافقى على العريس ايه يعنى متجوز اتنين مش عديتى له الصندل على البدله كنت عدى دى كمان

Rivendell** said...

يا نصيبتي السودا

تصدقي انا خوفت على ودانك لما جم جنبك قولت هياكلوها ولا حاجة


بصي يا بنتي ... بس خلاص


انا رأيي انك تقلبي راجل بقى وتروحي تتقدمي لواحدة وتفكي كربها وتحلي مشكلتها وتبقى خدتي فيها ثواب

اصل بعد اللي بيحصلك دا يبقى خلاااااص
انت متعزم عليكي فعلا

هههههههههههههه

ROMANTIC ROSE said...

بصراحة ما استغربتش اي شئ من بعد الصندل .. قدر و لطف يا بنتي .. بس قليلي يا برايد .. هناء ولا شيرين "مراتاته" دولا .. مين فيهم اللي كانت رافعه عليه قضية خُلع ؟؟ ده سؤال مهم قوي علي فكرة ..

ربنا يكون ف عونك يا بنتي .. الحمد لله الذي عافانا مما ابتلي به كثيرا من خلقه و فضلنا تفضيلا ..

عاوزاكي تعزلي بأة يا برايد لان بعد الزغاريد دي .. البوست الجاي هتحكيلنا علي اللي اتقال و انعاد ف الشارع و العمارة و العمارات المجاورة عن مناسبة الزغاريد دي .. و يا صباح الحكايات و التأليفات ..

ربنا معاكي يا برايد يا حبيبتي ..

Anonymous said...

يا قرّاء برايد المحترمين

أنا بأه العريس اللي بتحكيلكم عنه هنا

كنت سألتها في البوست اللي فات إذا ماكانش عندها مانع تتجوز واحد متجوز غيرها اتنين ولا تلاتة. برايد ما ردتش علي , يعني سكتت , وانا فهمت إن السكوت علامة الرضا فتقدمت لها.

طبعا هي بالغت في الوصف , وعملتني من غير راس. بس انا , والعياذ بالله من كلمة أنا , طيب وحنون وباعرف ازاي أسعدها قوي قوي.
هاستتها. وهتبقى المفضلة عندي.

كل يوم أنا وهي بعد ما نرجع من الشغل , ناكل الكباب اللي هاجيبهولها
وبعدين نقعد نقرأ قرءان . شوية كدة ونخش على كتب سيرة المصطفى ( صلعم )
وقبل ماننام نقرا لنا كم فصل من البخاري . سعادة مافيش زيها.
بعد أسبوع من كتب الكتاب هاخدها عمرة لبيت الله وقبل ما نرجع هانزور المدينة وقبر الرسول .

أول ما نرجع مصر هانروح سيدنا الحسين والسيدة زينب وناكل فطاير من عند فطاطري الحسين.
بعد كده نرجع البيت ونتفرج على قناة الأيمان ونقعد نتفرج على العلماء والفقهاء والدعاة والشيوخ لحد ما ننكشح. بعدين أنا وهي نصلي ونقرا قرآن وندعي لأحبابنا كلهم يبقوا زينا

يعني حياة كده مافيش بعدها حياة.

آه, وهنحضر دروس دينية عند الشيخ متولي والشيخ جمعة والشيخ النقراشي والشيخ حماد , دول شيوخ انما أيه , حاجة ماحصلتش , ومالهمش حل.

بعدين بأه أنا وهي قبل ماننام نقعد ننشد أناشيد دينية.

أما حكاية شغلها فدي طبعا ضد مبادئي وهانصحها تبطل شغل , ولو اني تظاهرت بأني موافق تستمر في عملها لأنه عمل إنساني . إنساني إيه ياشيخة؟

تقعد تتكلم مع الرجالة اللي عايز فياجرا واللي عايز عازل مطاطي وحاجات كده , وتجيلي آخر النهار نقر قرآن؟ أعوز بالله

Naglaa said...

هههههههههههههههههههه
جميلة انتى يا برايد وكلامك جميل زيك فطست على نفسى من الضحك وأنا بقرأه ده يا بنتى عريس نقطة - بالنون مش اللام - يعنى يجيب النقطة للواحدة مننا وعلى فكرة اناحصللى نفس الموقف من قبل كده وكان متجوز أتنين برضه وقالهالى صريحة (ماأنتى لازم تتنزلى فى سنك ده وبعدين الراجل من حقه أربعة ) كسر رقبته ورقبة كل الرجالة اللى زيه وربنا يتوب علنا من البلاوى اللى بتتلقح علينا ويوعدنا على رأى جدتى الله يرحمها بعريس هنى غنى يسعدنا ومستنينك يا برايد مع العريس الثامن

صاحب البوابــة said...

اندهشت كثيراًَ

لكن بالاجمال استمتعت بالقراءة

تحياتي

Noony said...

دة كتير دة أوفر
بجد لأ مش ممكن
بجد دة حصل ولا اية اللي بيحصل؟
لأ مش للدرجة دي
بجد مش ممكن
أنتي أولاً تحفة..وأسلوبك يهلك من الضحك
بس تيجي عند واحدة تجيبلك عريس متجوز..وكمان اتنين!!!!!؟
الرحمة
هي الناس معندهاش نظر؟
طيب عقل يفكروا بيه!؟

وهم كمان مراتاااته حضرااتهم جايين يعاينوكي
يا ساتر يا رب
يا بنتي هم الناس دي موجودة بجد!؟
اللهم احفظنا

صندل!!!!؟

الحمد لله على كل حال
:s
نوني

الشنكوتي الكبير said...

يا لهويييييييييييييييييييييييييي
يا خرابيييييييييييييييييييييييييي
يا دي الوكسههههههههههههههههههههههه
ربنا معاكي يا اختي
وحسبي الله ونعم الوكيل ولما الدين بينقح عليه قوي كده عايز يتجوز تالته ليه
يلعن ابو خاشه
سلااااااااااااااااااااااااااام

Mirage said...

انا بباركلك بس على المدونة الناجحة دى

وربنا يزيد ويبارك

Desert cat said...

ومالوا يعنى يا برايد
ده حتى الشرع محلل 4
والراجل عمل الواجب وجاب الاتنين الاولانيين
والله راجل ما عنده دم
بس الحق مش عليه
الحق على امانى وفوفو
معلشى تتعوض فى الثامن

KOKKO said...

لو الحكايه دى بجد يا برايد
يبقى لازم تشوفى حل
تغيرى الصالون مثلا,تغيروا الشقه,الشارع
عموما انا شوفت عاهات فى الصالون بتاعنا كتير,بس ده كتير كتير كتير على اعصابى
انا لو منك كنت رمتهم من البلكونه اللى كانوا فيها
ربنا يرزقك ويرزقنى بالزوج اللى يعوض كل العاهات المستديمه دي

wanna b a bride said...

tafatefo

حاااضر هاعدم نوال

بس نوال مين؟..فيه حد اسمه نوال انت متغاظ منه و عايزني أعدمهولك ..من عينيا الإتنين

والا تقصد أماني؟
أماني كفاية عليها فوفو..
ده أحسن عقاب

مش بادافع عن جواز الصالونات
بس هو انا كنت لاقيه غيره؟
-------------------------
esmeralda

معلش ي ستي هو الراجل نظره ضعيف و أي تغيير"بسيط" بيفرق معاه كتير

الصنادل ..يمكن موضة وانا مش وخده بالي والا حاجة
------------------------
emos

طنط جارتنا دي تسأل عليه ليه
هو انا كنت اهمها في حاجة و الا يعني عايزة مصلحتي

اهي بتوصلوا و خلاص
احنا نبقى نسأل براحتنا بعد كده

بالنسبة لمواعيد المحل ده..من كام لكام
هاروح لوحدي بدل مانقطع على بعض
---------------------------
osman

و الله تصرف صاحبك ده يدل على إن الناس لسه بخير

شوف الأمانة يا أخي
-----------------------
doba

تصدقي نسيت أجيب قله
اللي عنده قلة يا جماعة يديهالي سلف و انا أرجعهاله بس للأسف هترجع مفششه

أماني و فوفو سايباهم مع بابا من ساعتها و لسه ماخرجوش
سمعنا شوية صريخ كده على خفيف و بعدين صمتت كل الأصوات
و أدينا مستنني نشوف الماتش خلص كام كام
---------------------------
mamado

أولا :أحب أشكرك
ثانيا:أحب أشكرك
ثالثا أحب أقولك انه مش بإيدي و الله أنا لو مابيجراليش كل اللي بيجرالي ماكنتش عملت مدونة و سيحت لنفسي كده
ابقى شرفنا يا فندم المدونة هتنور
----------------------------
أيامنا الحلوة

أخجلتم تواضعنا

موضوع المسلسل ده و الله هتدخلوه في مخي
هابيع الصيغة و انتجه

wanna b a bride said...

الحصان الأسود

طب و ليه التفاؤل و الأمل اللي بتديهولي في المستقبل ده
انت ماعاندكش إخوات بنات؟
--------------------------
أيوية
هو فوفو مش عايز هيئة حقوق انسان

ده عايز جمعية الرفق بالحيوان

بس لأ لأ مش أقدر أعمل فيهم كده..البت هند هتصعب عليا
هي صحيح غلسة و تلمة زي أمها ..بس برضه تصعب عليا
------------------------------
تائهة في أرض الأحلام

اللي يقدر يبعد عن جواز الصالونات يبعد أنا باقولكم أهه

خليكوا في جواز النتريهات او البلكونات

تحياتي
-----------------------------
دكتورة هبه

دي قصة وقعت..بس وقعت فوق دماغي

حياتي فيلم هندي؟
آه انتي لسه ماتعرفيش
------------------------------
spyfun

الله يخليك..ده من ذوقك
أدي احنا شوفنا وحش كتيييييير
يا رب الجاي يبقى كويس
و مش نصوم نصوم
ياااااا رب
--------------------------------
جوستين

آه
-----------------------------
shaimaa

يا سيدي ع الشجاعة

نفسي انا أبقى حاسمة كده...بس مش عارفة

wanna b a bride said...

وليد من الكويت

لأ دانا كنت ممكن اعند أكتر
و اتجوزه و بعدين أخليه يفرقعهم

نفسي أتعلم الحركات دي

بس خايبة أنا ماباعرفش

تحياتي
-----------------------------
همسة قلم (أسماء

ربنا مايوريكي منظري
دانا كنت هاموت

ابقي تعالي و بلاش المراقبة من بعيد
-----------------------------
bestic

ماعنديش ترف حرية الإعتزال للأسف

قضاء الله و لا راد لقضاؤه
-----------------------------
shahy

مني لله طبعا
حد منه لحد تاني؟؟؟

و ليه يا بنتي تكتبي نكد

الدنيا مش ناقصة

بس اقتراح كويس والله.ممكن أجربه
----------------------------
rania

شكرا ليكي يا رانية

و انا لا يمكن أقنط من رحمة الله

و كل سحابه ليها حافة من النور زي مايقولوا

على الأقل من فوايد الناس اللي بتيجي دي انهم ادوني الفرصة أتعرف عليكوا
-----------------------------
yara

it's not fiction×fiction

its fiction×reality
&
reality×fiction

but thnx for the advice anyway
----------------------------

موندة

أديني مستنياه
بس اما ييجي
داا هاطلع كل ده على....
والا بلاش
الطيب أحسن

Anonymous said...

والله دمك زي العسل و انت مش مفروض تجوزي واحد مجوز تلاتة انت مفروض تتجوزي واحد ىمجوز اربعة !!!!! و علي فكرة الجواز مش راحة و لا حاجة انتي كدة يا بنتي في نعمة !! --- ملحوظة كاتب هذه الرسالة زوجها المسكين و غصب عنه لازم يكتب **********b happy and live your life

Anonymous said...

الحقيقه يا برايد اسلوبك هايل وكوميدي
انا عارف انه من الغيظ بس برضه كوميدي


عموما الحق مش عليه الحق على جوز الخيل اللي جايبينه

REEMOO said...

ده بجد ده
ليه يا بنتى بتعملى فى نفسك كده بس
جواز ايه وبتاع ايه اللى خليكى تعرفى ناس زباله كده
بس هى أمانى وفوفو كانو عارفين؟؟
طيب رد فعلهم كان ايه بعد ما عرفو؟؟
وانتى عملتى معاهم ايه
يا نهار ابيض لو كانو فى ايدى أنا
ربنا رحمهم والله
ربنا يكرمك يا برايد يا رب
ويرحمك من العاهات دى
قبلاتى

Bride Zone said...

انا عاوزة اسالك سؤال واحد بس يا برايد..
هي القصص دي حقيقية ولا من وحي خيالك؟ :)
لو كانت حقيقية تبقى نظريتي صحيحة.. اصل مابقاش اليومين دول غير العاهات اللي مالهاش نصيب وبتتحذف علينا كده..

يارب لك الحمد

ابقي شرفينا..

bluestone said...

يعني الواحد يدعيلك تفضلي مشروع برايد كده على طول عشان تفضلي تكتبي الحكايات الجامده دي ؟؟؟؟!!

روحي يا شيخة ...

ولا بلاش حرام برضه ...

على فكرة انتي هايلة جدا .. انا بحب اتابعك على طول ومن الزوار الدائمين .. وآهو الواحد بيفش غله شوية من البلاوي اللي بيشوفها ..

على فكرة لازم تفكري تنشري الكلام ده هينجح جدا

shermen said...

ص.ب 48
على بدلة وكرافت
طيب أذاي يعني
وكمان جايب مراتاته التنتين معاه
يالهوي
يخربيته
ويخربيت مراتته الاتنين

جاتهم الأرف ملو البلد

BaTresYa said...

يا حبيبتي بجد شفتي العجب والله ... عارفه انا لو منكـ هقول ...مش عايزة أتجوززززز

ربنا يرزقكـ باللي يعوضكـ عن اللي أنتي شفتيه :)

انتظار مؤقت said...

انتي خليتي فرئظي ترتعش من هول المفاجئه و ياللهول على راي اسمو ايه لواء المسرح العربي بس الحمدلله انها جت على قد كده و محدش شد الحبل بتاع البراشوت ..العاقبه عندكم

SAMEH said...

إنتي لبستي له باراشوت من حرب أكتوبر و هو جاب معاه دبابتين من سلاح المدرعات
تبقوا خالصين
أهم حاجه إن المعركه خلصت من غير خسائر في الأرواح
:)

e7na said...

ايه يا دكتوره برايد لا تزورينا ولا ترد علينا
من لقى عريسه ؟؟؟؟؟؟؟؟

Anonymous said...

تزاوروا
لو في علاقات اجتماعية بين البشر زي زمان والناس بتزور بعض وفي صلة رحم الموضوع حيبقي اسهل
مش شرط ليكي بس في العموم

Iskanderani said...
This comment has been removed by the author.
Iskanderani said...

مساء الخير ياست العرايس ؛

حضرتك عامله زي عروسة الموسم اللي ماإتباعتش قبل يوم الموسم.
تعرفي إنك ضيعت علي نفسك فرصة العمر؟ ده انت كنت راح تختاري للمزواج ده العروسة الرابعة...لما يحب يغير المود والدلع من جديد.. يعني الاختيار ....لرابعه العدويه راح عليك في الميدان

أرجوكِ لا لا لا لا تتوقفي عن الحكي لقصصك الممتعه مع عرسان الغفلة وإمتعي جمهورك -اللي انا منهم- اللي عامل زي عواجيز الفرح

والله هم يضحك وهم يبكي

ربنا يسعدك بإذن الله

تحيات إسكندراني في بلاد الله الواسعة

Anonymous said...

عيني عليكي يا برايد وعلى حظك إللي عامل زي برج ايقل ده

ربي يعدل لها لك يا حبيبتي

تعيشي وتفتكري يا ضنايا

والله قصتك مع العرسان دول تنفع تتعمل مسلسل

Anonymous said...

ازيك يا برايد
بجد ضحكتينى امبارح سهرت لما خلصت عرسانك كلهم بس بجد بقى انت فعلا انت بكسر التاء ولا فتحها
مش عارفة ليه حاسة ان وحد حاسس بمشكلة البنات والشباب فى الجواز
يعنى باعتبار انى كنت بنوتة زماااااااان قبل ما ابقى أم العيال حاسة ان اسلوبك احيانا مش اسلوب بنت
ولا انا اللى بقيت مش من زمنكم؟
عموما امتعتنا او امتعتينا
وطبعا مهما قولت لك انك كده احسن مش هتصدقينى ومفيش بنت بتصدق
بس بجد والله فعلا احيانا بيكون ضل الحيطة احسن
او بمعنى تانى لو فعلا مش بنى ادم عارف ربنا مش هقول بيحبك والكلام اللى ضحكوا علينا بيه ومان
ويا رب يكتب لك الخير مكان ما يكووووووون
أم العيال

break said...

هههههههههههههههههههه
بجد بجد دمك شربات
انا كمان wanna b a bride
بس قولى يارب بس
الواحد هيتحرم منك لو اتجوزتى
تحياتى

Anonymous said...

هو فين اللينك بتاع المواقف اللى بتحصل للقراء

Mysterious R said...

أنا بقى في حاجو مش فاهمها
البنات في مصر مش لاقية ولاد يتجوزوهم و الولاد مش لا قية بنات يتجوزهوم
أكيد في حاجة غلط
طريقة الصالونات دي بقت قديمة و محدش بيقتنع بيها
لازم نلاقي طريقة جديدة

www.floods-inside.blogspot.com

momken said...

واضح انك بتحذفى الكومنت بتاعتى من عندك باستمرار ليه بقى فيها والعياذ بالله كلام سافل ولا انا سليط اللسان
شكرا يادكتوره

momken said...

على العموم انتى نورتى البلوج بتاعى المتواضع وزى المثل الى بيقول الى لحد بابك جاب الغلط عليك وانتى قرطستينى.انا فعلا مستغرب بعتلك اكتر من كومنت على البوسط الاخير السابع يعنى وملقتهمش تانى استغربت وقلت يا واد يا ممكن افندى ارمى كلمتين واجرى زى زمان ماكنت بضرب جرس الجيران واجرى ولو اتقفشت ااقولهم دى واحد لابس كذا هو الى ضرب الجرس وجرى ولو شوفته هقولكم عليه بس

TAFATEFO said...

في موضوع مهم جدا بقى ملوس علاقه بالبوست ده بس كنت عايز آخد رأيك فيه.

لو فضلت تحلم بمواصفات كذا وكذا وكذا ونفسك اللي تحبها تكون فيها المواصفات دي .. وبعدين لقيت المواصفات دي في واحده .. لازم تحبها ولا مش لازم ؟؟

الي هيجنني .. انك لو سألت أي حد بيحب واحده تقوله بتحبها ليه ؟ هيقولك علشان مثلا رقيقه وحنينة وطيبة وكذا وكذا .. يبقى هو بيحب الصفات دي ولقاها فيها فحبها .. صح؟

طب لو لقى الصفات دي في واحده كمان .. هيحبها هي كمان ؟؟

أنا عارف ان كلامي ملخبط .. بس لأني فعلا متلخبط

بصي يا برايد أنا بمر بمشكله عويصه جدا جدا جدا أنا مش عارف حلها لأني مش عارف أفكر فيها ازاي ؟!؟!؟!

لو مفهمتيش كلامي يا ريت تردي تقولي مفهمتيش وأنا أوصح أكتر ويا ريت يا جماعه حد لو فهم وفاهم الصح يفهمني

Epitaph said...

ربنا يصبرك يا بنتي

عريسنا عليك يا رب

ههههههههههههه

semsem said...

انا اول مرة اعلق عندك
بس معرفش هو الكلام دا بجد ولا هزار

يا لهوى لو بجد

ربنا يصبرك يا بنتى

عريس يا رب عريس

DR Network said...

مش عايزك تزعلى من كلامى..بس من الواضح ان حضرتك وحشة اووووووووووووى يا اما منحوسة اووووووووووووووووووووووووى

ساعد نسرين الأيمن said...

صندل بني
فوفو اللي يطلع عبدالفتاح
برايد من غير مكياج
السابع مات
ما اغربها من حياة
وما اسخف اماني من رفيق ف الخطوبات

من زمان وانا حاسس انك شبهي يا برايد بجد
فاكرة لما علق عندك وقولت ليك اني اريد الزواج من واحدة وجميع اهلها موافقين عد شخص واحد ليس بابيها او باخيها او بعمها
عارفة ؟ مين الوحيد الي كان مش موافق هو جوزها
ولغاية دوقتي معرفتش هو مش موافق ليه بس لما شوفت الحقد اللي عند هناء وشيرين دول ابتدات افهم موقفه
عايزينا الثامن يكوني عربي او اوربي او منوفي برايد
وشكرا ليك ع كل حال

RealMan said...

لازم تكون هيا ده القشه التي قصمت ظهر البعير . اصل يا ست هانم الموضوع كده بقي اوفر شويه او شويتين ولا ايه.
وملهاش تفسير غير انك بتشتغلينا يا بتشتغلينا. علشان من المفترض ان حضرتك طبيبه يعني علي مستوي معقول من العلم والثقافه يعني من المفترض انك علي اقل تقدير لازم يكون في مواصفات لزوج المستقبل يعني لما حد يعرض عليكي عريس حضرتك بتبدئي تسالي عنه اسئله معينه اسمه , سنه , وظيفته , عائلته و درجه اخلاقه وتدينه ده علي الاقل وبعد كده حضرتك تحددي اذا كان مناسب انه يجي البيت ويقابل بابا وماما ولا لا.

وممكن بعد نفكير عميق تكون مامتك هيا الي بتجبلك العرسان ده علشان تنظفي البيت يا شطوره بدل القاعده قدام الكمبيوتر. والعاقبه عندكم بالمكسرات ان شاء الله.

ضـوء الـقـمر said...

ههههههههههههههههههه
بجد يا برايد فطستيني من الدحك يعني ميشتريش اجهزة مستعمله عشان ميعملش في بنات الناس حاجه وحشه يقوم يتجوزهم على اتنين ههههههههه اللي يعيش ياما يشوف والله بس بشرة خير انك زمعتي زغاريط في الصالون :D

karma said...

من صدمة إلى صدمة إلى صدمة.
!
حرقتيلي النيورونين الي كانوا باقيين عندي

هي العرايس بجد بتدخل من غير مكياج و لابسه خيم ولا باراشوتات؟

و صندل؟ بيخطب بصندل؟
بذمتك مش عيب عليكي يا عدوة نفسك، عايزة توافقي على عريس بصندل.

*اسلوبك في الكتابة خطير

Sampateek said...

كانت صدمة لما عرفت انهم زوجاته مش اخواته
بس انت عندك حس تاليفي رائع و قدرة على شد الزبون اقصد القارئ
انا شاكة فيكي
انت باين كده حتطلعي في الاخر راجل و كاتب ساخر كبير
طلعي البطاقة
تحياتي

SAHAR said...

مبروك ترشيحكظ لافضل مدجونة عربية الصراحة تستاهلي

تخاريف دكتور said...

يعنى اول زغروطة فى صالونكم كانت من ضرتك؟؟
لا اله الا الله

Rania said...

قرأت حوارك مع شيماء بكل لهفة وحبيت آجي تاني اسجل اعجابي بآرائك وردودك

مع خالص تحياتي

Anonymous said...

يا ريت حضرتك ما تزعليش مني.

بس انا حاسس انك انتي سبب عدم زواجك. الموضوع مش مفروض انه يكون بكم السخرية دي اللي في المدونة كلها حتى لو كان في وصفه مش في حقيقته.انا اتقدمت لكذا بنت و فعلا لقيت فيهم عيوب (و يمكن يكون فيا انا كمان عيب) بس عمري ما اتريقت و لا سخرت من واحدة فيهم لانهم كانوا شخصيات محترمة. إن ماكانش في جانب فبالتأكيد في جانب تاني.

اهتمي بدينك اكتر و قربي لربنا .. غير كده ما تلوميش غير نفسك.

momken said...

بت يا برايد سيبك من التعليق بتاع انونيموس باين عليه مش طبيعى لانه لسه معلق على بوستك الى قبله بالكلام ده الى فيه تناقض غريب انا جبتلك كابى منه

Anonymous said...
يابت يابرايد انتى زى العسل
بس اللى مجننى ان الناس مش فاهمة الموضوع
برايد مش عايزه عريس ياناس
برايد بتفضفض وبتقول اللىفى قلبها من خلال موضوع الجواز لكن البت دى مخها كبير قوى يعنى الجواز فرشة لموضوع اهم واكبر هم حرية التعبير

اسلوبك زى السكر وربنا حط فى لسانك عسل وشوية شقاوة ربنا يديمهم عليكى وتفضلى العمر كله بنفس الشقاوة والحيوية والحرية والاستقلال

انا عجوز عمرى 62 سنه لكن كلامك ورانى نوعية الشباب اللى بيعمل سهتان وهو فاهم كل حاجة بس بيمشى حاله كلنا عملنا كده يابرايد مش عيب
انا مش بتاع مدونات انا راجل عندى شوية كتب بحبها قوى وباحاول ان الكل يستفيد منها واعتقد ان دا حق مشروع انا اسمى galalgalal@yahoo.com
يمكن تحبى تقرى كتب م اللى بنزلها ح تنبيسطى قوى

وح اتابعك بس علشان احس بالسعادة مع قلمك الشقى العفريت
وروحك الوثابة

يللا طيرى

محمد جلال

29/5/07 21:35

momken said...
This comment has been removed by the author.
ياسمين said...

والله يا برايد بتحصل فعلا واللى مش مصدق ييجى مدونتى وهيلاقى مشكلة زى دى فى البوستات القديمة
اعرف واحد فعلا لم يتم الأربعين ومتزوج ثلاثة
دة بجد بقى على فكرة
اصل كله حسب الشرع

انتى مدونتك زى السكر زيك تماما واتمنى لك حظ اسعد .. انتى مش حاسة بالنعمة اللى انتى فيها
تحياتى

سحابة said...

هههههههههههههههههههههههههههه
والله يابنتي انتي زي العسل بجد..

أنا متبعاكي علطوول بس مش دايما بعرف اكتب رد.. بس بجد بتسعديني ربنا يسعدك
:>

wanna b a bride said...

anonymous

شكرررررررا

-----------------
meroooo

أديني مستنية

مش عارفة جاي راكي جمل ده والا ايه؟..بس ربنا يستر و مايكونش خيبة الأمل
----------------------
aardvark ef-11b

بس الأول بس اسمك ده يعني ايه؟

مادام ضحكت يا فندم كل البهدلة تهون
ولا يهمك
-----------------------
إنسانة

آآآآآآآآآآمين
---------------------
مشروع بطل

أهلا بيك على طول على طول
--------------------
كريم

عالية جدا

فوق السطوح

منور
------------------
the groom

خيرها في غيرها

أدينا بنجرب
-----------------
reham

و اله ولا انا كنت أعرف انهم هيعملوا فيا كده
-----------------
anonymous

ما عنديش فكره عن موضوع الإرهابي ده

يمكن عشان كان جايب معاه 2 قنبلة ذرية؟
-------------------
shahro

و ايه جاب الأخ ده لأدهم صبري

ادهم صبري ده كان شبه أيمممن
الله يمسيك بالخير يا أيمن

و مش عايزه حد يشدد في مصداقيتي يا جماعة

هو انا يعني كنت امتى كدبت عليكم

دانتوا غاليين عندي قوي و لا يمكن أعمل فيكوا كده

التامن عليكي أوكيه

wanna b a bride said...

little

بالعكس بأه..صلب الموضوع ده حصل و بجد و بحق و حقيقي

شوية تفاصيل بس متغيرة

فوفو و مراته ماعرفوش لأنهم ماسألوش و الموضوع بالنسبة لهم كان مجرد تأدية واجب
ان وجد

تفتكري معموللي عمل؟

لو تعرفي حد يفكهولي ابعتيهولي ع البلوج

أو خليه يكلمني ع الماسينجر

ما الدنيا اتقدمت
--------------------------
سجدة

آه و الله دي فكرة وطنية جنان

متحف للعرسان العاهات عشان الناس تتفرج و كل واحد ياخد جزاءه
------------------------
إرحم دماغك

شكرا ع المعلومة جدا..عشان لما تحصللي الحالة دي تاني على الأقل أعرف هي ايه؟

موضوع الصندل ده افتكرته موضه و الا حاجة..مانا أصلي ماليش خبره في الموضات الرجالي

و اللي يعيش ياما يشوف
-----------------------
e7na

أنا ..أنا..أنا لايممممممكن أتكلم على حد ماعرفوش

لكن يعععععني مش لازم أقول رأيي والا ايه؟

تفتكر اتسرعت

أوعدك أفكر تاني في الموضوع ده
--------------------
rivendell

دانا وداني بقت شبه الطمطامية من كتر الرعب

انتي كمان بتقولي متعزم عليا

طب يا جماعة اللي عنده خبره يشوفلي حل في الموضوع ده
--------------------
romantic rose

مافيش ولا واحده فيهم رافعة خلع

اللي مرفوع عليه قضية خلع ده أخو فوفو
و العريس ده واحد غيره

الزغاريط؟؟
ماكنتش متخيله ان أول زغروطة في صالوننا تطلع كده

الجيران؟

مش عارفة انا من ساعتها عندي انهيار عصبي و ماخرجتش من أوضتي
------------------------
anonymous

منور يا حاج

سلامي الخاص للزوجات الفاتنات

ربنا يصبرهم

و الله لو كنت عرضت عليا العروض دي
مش معقول كنت أرفض
----------------------
naglaa

قوليلهم يا نجلاء

ماحدش مصدقني و بيقولوا بألف
آدي واحدة تانية أهه رفيقة في الكفاح
ربنا يصبرنا جميعا
--------------------
صاحب البوابة

شكرا لك

تحياتي
-------------------
noony

اللي يشوف بلاوي غيره

تهون عليه بلوته

تحياتي

ياسر سليم said...

السلام عليكم

تعتبر دى أول زيارة لمدونة حضرتك ..

البوست ده تحفة بمعنى كلمة تحفة ..

وانا مش عارف بصراحة .. انتى صحيتى من النوم فى الأخر ولا الكلام ده حصل بجد ؟

ولا تأليف ؟

ده لو كان تأليف ده انتى تبقى رائعة

ولو كان حصل بجد برضه طريقه سردك للموضوع جنان

ولا الحته دى
قعدت أدقق قوي أدقق قوي و فجأه لمحت حاجة بتلعب كده

ههههههههههههههههههه

wanna b a bride said...

الشنكوتي الكبير

هو ده العشم برضه

الناس لبعشيها
شكرا ع الدعم المعنوي
----------------------
mirage

شكرا جزيلا
---------------------
desert

لأ الحق عليا انا
اللي أثق بمجايب اماني و فوفو
----------------------
kokko

و الله فكرة

احنا فعلا محتاجين نغير العتبة

أنا كنت أقدر أرميهم من البلكونة؟؟
دول كانوا ياكلوني
-----------------------
anonymous

أنا نفسي أتجوز و أنضم لطابور المشتكين من الجواز
هو ده هدفي في الحياة

و ربنا معاك...قلبي عندك
--------------------
anonymous

شكرا ليك أو ليكي

الجوز الخيل و العربية أنغامهم كلها حنية
-------------------
reemoo

الحقيقة من يوميها و انا عندي صدمة عصبية و ماخرجتش من أوضتي و لا اعرف ايه اللي حصل

سمعت بس بابا بيتفاهم مع اماني و فوفو في الصالون تفاهم جامد شوية

بعد كده ..ماسمعتش خبر
-----------------------
bride zone

عيب تسألي سؤال زي ده

دانتي رفيقة سلاح و أكيد عدى عليكي كتير
------------------------
bluestone

حرام حرام

ادعيلي بالخير ينصرك

لو تعرفي حد ينشرلي ماعنديش أي مشاكل

لكن للأسف أنا مرمية في مجال الصيدلة و ماحدش بيسأل عليا
------------------------
shermen

أهي بلاوي و بتتحدف ع الواحد

ربنا يبعدها عني و عنكم

wanna b a bride said...

batresya

مش....لأ برضه مش قادره أقولها

-------------------------
انتظار مؤقت

ههههههههههههههه
آه و الله

دا الحبل كان عمل شغل يجنن
--------------------
sameh

ههههههههههه

ماهي أصل ذكرى النكسة كانت قربت
-------------------
e7na

حاااضر

و بعدين هو فين العريس ده اللي كنت لاقيته
------------------
anonymous

جايز برضه

بالإضافة لكده فيه أسباب تانية كتير
-----------------
iskanderani

ماكنتش هالحق

مراتاته التانيين

كانوا هياكلوني

مش هبطل طول مانا محطوطة في الفاترينة

تحياتي
-------------------
anonymous

زي برج ايفل ازاي يعني؟

عالي؟

عموما ربنا يعدلها للجميع

----------------------
أم العيال

لا لا لا ده اتهام جديد خالص

حتى تاء التأنيث بتاعتي مش مصدقنها

دانا ماحلتيش غيرها

لا يا ستي أتطمني أنا لست ذكرا و لكني أنثى

بس ايه حكاية اسلوبي مش أسلوب بنت ده

ده مدح والا ذم؟

أديني متدارية في ضل الحيطة حتى اشعار آخر

تحياتي
--------------------
break

شكرا ليكي

ربنا يعدلها لكل ال"وانا بي"يارب

----------------------
anonymous

سوري لأني كنت عملت
upgrade
للتمبليت و نسيت أحطه

هو موجود دلوقت
----------------
mysterious

يظهر كلنا بأه نظرنا ضعيف
-----------------
momken

أديني وضحتلك اللي حصل و اني ماحذفتش أي تعليق

حصل خير ان شاء الله

Fantasia said...

Is this true? Have men gone crazy?
I mean I know they are crazy.. but not that crazy!
And why was he so sure that you will agree to marry him? You should have called a doctor to take him to the asylum with his 2 wives.

ftataljanna said...

معلش يا برايد
كل ميسر لما خلق له وانتى لو ماكنتيش جامدة واد اللى بيحصل لك صدقينى ان الله لا يحمل نفسا الا وسعها
وعالعموم يعنى يا برايد كل حاجة فى ميعادها حلوة وكل شيء بميعاد وبعدين يا ستي ربنا ييسر لك الزواج يارب انتى وبنات المسلمين يا رب

رشا عبد الرازق said...

ول مره آجي هنا
بجد بجد انتي فرقتي معايا كتيييييييييييييييييييييير الليله
أكيد هتعرفي السبب لوحدك
أسلوبك ملوش حل

ووضوحك اللي مع خفة دمك
أحلى وأحلى :)

Anima said...

هههههههههههههه
هههههههههههههههههه
ههههههههههههههههههههههه


عمري ما ضحكت زي النهاردة

ايه البلاوي دي يا بنتي

رشا عبد الرازق said...

عارفه يا برايد
أنا عندي اتنين مديرين
واحد منهم بعيد عنك مهمته اليويمه انه يتصل بيه أربع خمس مرات _ انا وكل أمثالي من أصحاب نفس التايتل _ ينكد على اللي جابوني ويكرهوني في الشغلانه الوحيده اللي عرفت أحبها
وانهارده بقا مارس على أعصابي كل انواع الاستفزاز اللي ممكن تتخيليها ومبقاش بيلمح بقا بالعقوبات
ده بقا بالمفتشر عيني عينك
طب ليه ؟
أهو كده
غتت بعيد عنك
المهم كان يوم نكد
والدش فاصل ؟
وانا عندي أرق من 4 أيام
وآخر كتاب بقرأ فيه وحي القلم يعني عايز دماغ متكلفه عشان تعدي فيه كل يوم صفحتين
قوم إايه ؟؟
ملقتش غير النت
ومعرفش عترت عليكي في مدونة مين
قريت موضوع واحد ورديت عليكي اللي هو الموضوع ده باين
وبعد كده
بقالي بالضبط 3 ساعات
قريت كل حرف اتكتب هنا من يوم ما ظهرتِ على الوجود الانترنتي

ربنا يجعله في ميزان حسناتك الضحك اللي ضحكتهولي ويرزقك يا حبيبتي بالزوج الصالح عن قريب
قولي آمين
أيوه قولي آمين عشان الملايكه يردو عليه ويقولو _ بما معناه _ " ولكِ مثل هذا " تصبحي على خير :)

دنـــيـــا said...

و الله يا برايد انا اقرات البوست ده اكتر من مره و كل مره اموت من الضحك و الكركررره معلش يا بنتي اصلهم عايزين يعيشوا في دور الحاج متولي و مادام في بنات بترضه بالهم ده يبقي ليهم الحق يتجروا اكتر من كده معلش يا بنتي بكره ربنا يرزق بالاحس ان شاء الله بس لما يحصل اوعي تقولي كنتي فين يا لا لا لا لما قلت اه ه ه
اتمني تشرفني في مدونتي الجديده

اه يا دماغى said...

هههههههههههههه
كفاية اسم المدونة واعتقد مش معقولة مجلكيش ولا عريس من بدء الإعلان عن المدونة عايزة اتجوز .. ولو حصل متنيسش الدعوة
كريمة عزوم
اه يا دماغى

الكلام نوعان :كلام فارغ وكلام مليان كلام فارغ said...

هههههههههههههههههههههه
يابنتى يا حبيبتى هما الناس دول بيعملوا فيكي كده ليه
الله يخربيتهم اللى بيأذوا الشباب
بس تعرفي انتى ربنا اكرمك من العاهه ده احسن من اى عاهه اتقدمتلك
اه نسيت
عندي ليكي تاااج جميل
عقبال تاج الفرح يا رب
تعالى خديه
وماتنسيش تعلقي

ماسة الحب said...

تعرفي بقي يا برايد
اني بسمع عنك كتير وعن خفة دمك
بس ماشاء الله بوست يجنن
تعرفي انا شفت ناس كتير اوي كده زي سيدنا الشيخ
بس زمن الحريم انتهي
ربنا معانا كلنا

خمسة فضفضة said...
This comment has been removed by the author.
خمسة فضفضة said...

السلام عليكم ورحمة الله وبركاته

دي اول مره احط تعليق ، مع اني جيت هنا قبل كده مرتين تلاته وقريت معظم المواضيع

بصراحه مدونه رائعه دايما دايما تفطسني من الضحك

خصوصا بقي البوست الاخير ده ، مابقيتش عارفه امسك نفسي من كتر الضحك
الله يكون فعونك يابنتي ويعدلهالك يارب ...هههههه

تحياتي لك

fanan fa2eer said...

أنا قبل ما أكتب التعليق فضلت أدور في الكومينتس علي أي حاجة تقولي القصة دي بجد ولا لأ
طلعت بجد يابرايد
ياعيني عليكي ياختي
ده كان البعيد أعمي ولا ايه؟ ماصحيح كنتي بتقولي هما عنيه عبارة عن خورمين ولابس صندل كمان؟
تعرفي ان أول حاجة بتلفت نظري في العرسان هي الجزمة فعلا يمكن لأن هي دي الحاجة الوحيدة اللي بابص عليها طول الوقت هي والسجادة طبعا:))
أصلي علي طول راسمة دور الكسوف ده:))
وطالما طلعنا دكاترة زي بعض بقا تبقي مصيبتنا واحدة
وربنا يلطف بينا يابنتي

منة الله said...

بيرد


ادعوك للمشاركة في استطلاع راي

اكثر 10 مدونات تاثيرا في قرائها

و احب ان اخبرك ان مدونتك تم ترشيحها فعلا

اليك الرابط

http://www.6ef.blogspot.com/

farfasha said...

هاى
انا عامله فكره جديده وياريت تلاقي منك التشجيع
يارب تقولى ايه رايك في الفكره دي ويارب تكونى اول استفتاحي
مستنياااااااااااااااكى
تحياتى

شيماء الجيزى said...

لالالا بجد انا زعلانه من قراء وزوار برايد

لأن محدش زار الحوار الى عملته معاها
بجد كنت اتمنى انى اشوف آرائكم

واعتقد ان برايد كمان كانت تتمنى

ياريت تحققوا امنيتى دى وتعدوا على المدونه
وتقولوا رأيكم

تحياتى

Muhammad EL-Ashry said...

..

عايزة أتجوز
..

أحييك
قضيت وقتاً لطيفاً هنا
في زيارتي الأولى لك
أشكرك
..

ابوزياد الفاتح said...

ههههههههههههههههههههههههههههههههههههههههههههههههههههههههههههههه
انا مش قادر اعلق من كتر الضحك
الكلام ده تاليف ولا بجد
مش معقوله والله
معذوره اختى والله
انا كمان عايز اتجوز بس مفيش عدل خالص
مفيش واحده عايزه تتقدم لى خالص
ابقى زورى مدونتى
وربنا يبعتلك ابن الحلال ويعدلهالك يارب

yasmina said...

انا اول مرة اعلق هنا
بس مدونة حلوة وبتصور واقع ملموس للاسف
اما طريقة السرد حلوة ما شاء الله

والاسلوب الساخر بيعجبني
بس الحق مش عليه لوحده وانما كمان على الاتنين اللي معاه

wahed said...

صندل يا برايد هي حصلت تتجوزي واحد لابس صندل" بجد ضحكيني بهذه الجمله كنت عاوز اعرف هل هي قصه حقيقيه ولا لا

hana said...

ههههههههههههه
ده ايه الفرص اللى متتعوضش دى
سيبتيه يمشى بس ليه دة عريس مايتعوضتش
والحلوين اللى ويااة اللى جايين يجوزوووة
ياربى الدنيا مالها بق عاملة كدة ليه
تعرفى مرة جانى عريس
وشافنى كدة من غير مكياج قال ايه لطنط اللى جايباة ماهى كانت معاهم
دى حلوة ولما تحط مكياج بقى هتيقى تجنن
ههههههههههههه
الناس تقول تتحجب مش تحط مكياج تبقى تجنن ههههههه
علشان كدة اخد استمارة 6 هههههههههههههههههه

barbie girl said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

Muslim&Quptia said...

برايد يابنتي
انتي من اول ماقلتي دقن مش عارف ليه افتركت الراجل اللي كان طالع مع عادل امام في الارهاب والكباب اللي كل مايدورو عليه عشان يشتغل يقول اللع اكبببببببببببببببببببببررر
ده
ربنا يسامحك صوتي صحي الجيران م النوم

Human Wolf said...

عاملين انتوا تطلعوا القطط الفطسانه فى العرسان وماله يعنى لما يبقى متجوز اتنين وجايبهم علشان يخطبوله اهو على الاقل هتلاقى حد يستحمل قرفه معاكى ويشيل شويه من عليكى اصل احنا بصراحه طلباتنا مش بتخلص فهتلاقى شويه بيشيلوا معاكى يعنى ممكن تمسكى انتى المشاريب وواحده تمسك الاكل وواحده تمسك النضافه فى راحه اكتر من كده انتوا بس اللى مش عارفين مصلحتكم فين وبتتبطروا على النعمه وبعدين العريس ده اموره الماديه مستريحه ومش معاه عربيه وبس لا ومعاه عربيه بانذار كمان يعنى هتركبى جنبه وتطلعى ايدك من الشباك وصباح الدلع عاوزه ايه اكتر من كده اتقوا ربنا بقى وبلاش انزحه

Akram said...

الكلام كان ظريف لحد ما جيتي في اخر كام سطر و هبلتي علي الاخر، يا بنت الناس ارحمينا بقي من الاستهبال بتاعك ده و نزلي كتاب و خلصينا، علي الاقل نبقي بنقرا و احتا هارشين انها كوميديا و ننبسط وخلاص، ما نؤعدش بقي نقرا و في الاخر نكتشف انك بتهفلطي علينا

wanna b a bride said...

إلى أكرم

و ليه قلة الذوق و الكلام السخيف اللي مالوش معنى

مش عجبك البلوج و اللي بيتكتب فيه مع ألف ألف سلامه ..انا ماضربتكش على إيدك و قلتلك اقرا بالعافية

مش عاجبك الكلام و شايف انه هبل و استهبال و مش عارفة ايه تاني

يا ريت ماتضيعش وقتك الثمين ده هنا

و دور على حاجة مفيدة تقراها أحسن

أحمد منتصر said...

جامدة جدا المفاجأة دي

أسلوبك حلو أوي
تحياتي

NoNa said...

ههههههههههههههههههههههه

هم يضحك وهم يبكى

بس تبقى مصيبة لو دة بيحصل بجد

مه البصيبة دلوقتى

ان عدد البنات زاد بقيت اكثر من الرجاله

يعنى عشان ناس تجوز كل راجل لازم يجوز 4

يادى نيلة يعنى على حظنا الهباب ويقع فى قراعتنا المشكله دى مش خيبة ونبى

ربنا يستر

تحفة تحفة يا برااااااااااااااااااااد

Anonymous said...

mesh momekn l2 bthrgy ftsteny mn el de7k 2na mesh msd2a 2n 7asalek kda dna kan zamany ftst 3la ro7y mn el de7k w2na 2a3da l2 begad mas7'ara rabena m3aky wm3ana begad 2sl 2na bardo b3any mn mwdo3 el gawaaz dh w2arefny 2wy m3 2ny lesa 25 sana bs tb3n el 3adad 2sht3'l mn w 2na 3andy 23 sana w7yatk mama mesh btbtl zn 3alaya dayman 3ersan lama zh2t wt2eet wkol magebl;aha wa7ed 23rfo t2oly dh eih wdh m3rfsh malo lama zh2t mn el gawaz 7'ale wqrrt 2ny mshofsh 3ersan bs t2oly le meen 2st7ala htsebny fe 7aly w2na 2o7'ty el so3'ayara maktob ketabha 7aga t2rf l2 begad 2stmry fely 2nty btktbeih dh 2na 2shg3k mn kol 2lby begad

Anonymous said...

هل هذه دائما صورة المتدين، صندل وكهوف وغيره ، شكلك بتكتبي أفلام وتصدقيها عموما أكتر الشعب المصؤي متدين وماشي بالقميص والبنطلون والشبشب آسف الصندل يعني ولما عمرو خالد يبقى متدين ويلبس البدلة يبقى منحرف عموما خليك في فيلم المرايا يمكن ينفعك وياستي اللي بيكتبلك عاش في تلات دول أوروبية ومعاه اربع لغات وكنت متدين من الأول للآخر وعمري ما كنت متعصب ولا من أهل الكهف والناس الحلوين اللي بتحبيهم يا في خمارة يا صايع مع البنات وفي الآخر نجيبه من المستشفى بأيدز واللا من الخمارة بعاهة ونرجعه لأبوه وأمه عموما ربنا يديك على قد نيتك.

هـادى محمد هـلـيــل said...

من أجمل المدونات اللى شفتها
وإسلوب الكتابة فى غاية الروعة والتناسق
والقصة نفسها جميلة جدا ومضحكه بشكل كبير
ورسالة واضحه ومهمة أوى

إلى الأمام دائماً