Sunday, June 17, 2007

كيف تصطادين عريسا

يا سلام يا سلام..انتي و هي و هو جايين جري عايزين تاخدوا نصايح..طب منيين..و انا لو كان عندي معلومات قيمة زي دي مش كنت عملت أنا بيها؟؟حاجة غريبة و الله



المهم عنوان البوست ده هو نفسه عنوان كتاب بيقولوا موجود في السوق دلوقت و مكسر الدنيا...أنا طبعا سمعت اسم الكتاب من واحدة زميلتي من هنا و كنت في ثواني واخدة القرار طيران على المديرة


لو سمحتي يا دكتورة ابتهال..عايزة آخد إذن
ماينفعش النهاردة فيه تفتيش و مافيش أذونات
هو انا باطلب حاجة غير قانونية ده حقي الي بيكفله ليا لدستور
رفعت عينيها و برقتلي زي ما أي مدير متدرب ان جهازة العصبي كله ينتفض اذا سمع أي موظف عنده بيقول أي كلمة فيها ريحة سياسة
نعم؟..دستور..ايش عرفك بالكلمة دي
أ..أ..قصدي القانون..حقي اللي بيكلفله ليا القانون
قلت مافيش


مابدهاش بأه الموضوع عايز استخراج الأسلحة الذكية قعدت أثقلب في مخي على مشهد حزين ..أكتر ذكرى حزينة في دماغي ليوناردو دي كابريو و هو بيموت في تايتانك... أول ما عرفت انا هاقبض كام من شغلي كل شهر..صورة جواز كريم عبد العزيزأيواااه ..صورة جواز كريم
إهئ أهئ إهئ..ماهو لو حضرتك تعرفي ظروفي
ظروفك ..ايه يا بنتي فيه ايه؟ قوليلي أنا زي والدتك فيه حد عندكوا عيان .حالة وفاه كفالله الشر ايه قوليلي
مش عارفة..قصدي مش هاقدر أقولك ..كل اللي أقدر أقولهولك اني لا يمكن كنت طلبت الإذن ده الا في ظروف قهرية زي اللي عندي
طب بس أصل التفتيش
عااااااااااااااااااااااااااااااااا
طب خلاص خلاص..هاقولك نظرا لظروفك اللي واضح انها قهرية ..مكن تمش و انا هابقى أسوي وضوع الإذن ده مع مدام أمل بتاعة الإمضا


و قبل ماتكمل آخر حرف من آخر كلمة كنت اختفيت من المكتب طيران على بره المستشفى ..دي فرصة لازم أقتنصها..و نتوا عارفين الحالة ايه يعني فرصتي في شرا الكتاب ده زي فرصة سعد الصغير في الحصول على جايزة نوبل
لازم اتحرك بسرعة المعركة على أشدها و يوم بعد يوم العداد بيعد و ماعادش فيه وقت نضيعه.و اذا كان في الكتاب ده الحل..فلايمكن أضيعه من ايدي أبدا


جريت على عم صبحي بتاع الجرايد اللي جنب المستشفى لكن اول مارحت لقيت 2-3 دكاترة من اللي شغالين معايا في المستشفى طب و ايه الإحراج ده بأاااه؟



خدت عم صبحي اللي يعرفني عشان باشتري منه الجرايد كل يوم على جنب
بقولك ايه يا عم صبحي
أيوة يا داكتورة
فيه كتاب كده شفت إعلانه في الجرنال امبارح
كتاب ايه
كتاب كده الظاهر انه كوميدي يعني فيه نكت..اسمه كيف
تصـطادين عريسا( بصوت عالي سمعه الإتنين اللي كانوا واقفين)
جرى ايه يا عم صبحي انت هتسيحلي والا ايه
لا يا دكتورة أصل حضرتك اتأخرتي قوي..أنا كان عندي نسختين و بعدين من كتر ماتسأل عليه بعدت جبت 25
طب كويس اديني بأه واحد ه منهم
مانا يا دكتورة بقول لحضرتك اتأخرتي ده الخمسة و عشرين نسخه خلصوا قبل ماينزلوا من على عربية الجرايد
ايه ده و مين اللي خادهم..
ال12 اللي مع حضرتك في الصيدلية و تشكيلة ممرضات كده
يا لهوي حتى المرضات عندهم أزمة في الجواز..ده كده يبقى القيامة قامت يا جماعة
سيبت عم صبحي و مشيت بعد مالمحت الإتنين الدكاترة بيسألوه على نسختين من الكتاب لإخوتهم البنات
طب ماكل واحد يتجوز أخت التاني و خلاص و ايه يعني الإتنين متجوزين..المفروض صحاب يساعدوا بعض..ناس غريبة مابيفكروش بأي منطق


افتكرت مكان صاحب مكتة بعد المستشفى بيجي 3 شوارع كان دايما بيبقى عنده كميات كبيرة من أي كتاب موجود في السوق و اي كتاب ناقص في السوق دايما أبقى عارفة انه أكيد عنده نسخة والا نسختين


لو سمحت كنت عايزة أسأل عن كتاب ..مش ليا يعني ..ده لواحدة صاحبتي
ليكي يا أبلة والا لصاحبتك هو انا هاحقق معاكي؟..اسمه ايه الكتاب
اسمه..هيا قالتلي بس مش فاكره قوي..تقريبا كيف توقعين..كيف تحصلين..كيف
كيف تصطادين عريسا
آه تقريبا كان اسمه حاجة زي كده
لقيته طلع أجندة صغيرة كده و بدأ يكتب
6/2008
نعم؟
دور حضرتك أنا هاحجزلك نسخة بس معلش الطلبات كتير كان ممكن المعاد يبقى بعد كده بس حظك ان واحدة ربنا عدلهالها و اتخطبت و جات لغت الحجز
يا سلام وانا هاستنى سنة بحالها
يا أبلة مانتوا كده كده مستنيين مش هتفرق يعني


لميت كرامتي المتبعترة و قررت اني مش هاشتري الكتاب..ما هي مش طالبة تهزيئ كمان من بتوع الجرايد..و بعدين مانا على رأيه كده كده مستنيه يومين تلاته بأه سنة مش فارقة خلاص خلاص ولا كتاب ولا بتاع هو يعني فيه ايه الكتاب ده؟
خدت بعضي و قررت أروح قبل البيت بشوية شفت مكتبة صغيرة كده و عارضه كتب كتيرة في الواجهة رجع عقلي يوزني..يا بنتي ماتجربي مش هتخسري حاجة يوضع سره ..قاومت الرغبة المتوحشة جوايا و كالعادة فشلت رحت ع المكتبة رجل تودي و رجل تجيب


لو سمحت فيه كتاب كده عايزة أسأل عليه..من الآخر اسمه كيف تصطادين عريسا
موجود
ايه؟..بجد؟ موجود؟
خرجت 3 جنيه من شنطتي..رخيص آه بس جايز يكون فيه الحل
30
هو ايه اللي تلاتين؟..تلاتين جنيه ؟ايه التهريج ده هتضرب سعره في 10 أضعاف؟..ايه الإستغلال ده
بصلي بصه كأنه بيقوللي صرخي للصبح ولااااا هاعبرك..بصيت صاغرة جوا شنطتي..الله يلعن أبو الذل..طلعت التلاتين جنيه و اديتهومله
دولار
أفندم؟
دولاااار 30 دولار
دانا هاطلبلك البوليس تلاقيك حتى ماعندكش الكتاب انتوا نصابين والا ايه

مد ايده تحت المكتب و طلع نسخة من الكتاب ملفوفة بحذر بالغ في طبقات من السلوفان
الكلام وقف في زوري وانبهرت و اذبهليت ..أهه ..الحل أهه..مين كان يصدق ان الحل لمشكلة الجواز يبقى في كتاب ..طب مش كانوا نزلوهولنا في مشروع القراءة للجميع كان على الأق يبقى أفيد من أي حاجة تانية نزلوها ..ده هيحل مشكلة المجتمع المصري كله و مديت إيدي على الكتاب و فجأه سمعت فرملة عربية جامدة بره المكتبه و لقيت واحدة ست نازله منها و سايباها في وسط الشارع..الست كانت بتجري زي ماتكون في الماراثون و نطت نطة لقيتها جوا المحل و ماسكة ايد الراجل بالكتاب


ايه ده انت كنت هتبيعه أنا جبتلك العشرين دولار مش قلتلك هاغير فلوس و اجيلك
الهانم هنا هتدفع تلاتين
الست لفتلي مذعورة تلاتين
انتي هتدفعي تلاتين؟
أنااا
لفت تاني
أنا كنت عارفة انك هتعمل كده عشان كده عملت حسابي التلاتين دولار أهم
بس الآنسة متهيألي ممكن تدفع أكتر
الست لفت و مسكت في ايدي
أرجوكي أرجوكي انتي ماتعرفيش حالتي أنا عندي 4 بنات لو ماجوزتهمش قبل ما يوصلوا التلاتين هاموت أرجوكي انتي مالكيش أم أرجوكي سيبيلي النسخة دي و ديني تليفونك وانا لما أخلص جواز الأربع بنات أكلمك و أبعتلك الكتاب


يا نهار أبيض لسه هاستنى أرررربع بنات..ده 6/2008 كان أقرب..بس تلاتين دولار ايه اللي هادفعهم طب و انا أجيب تاجر عمله منين دلوقت ..الست دي فعلا بتفكرني بماما و في ظل الظروف الراهنة و أزمة الدولارات اللي في البلد ماكانش فيه مفر من اني أتنازل عن الكتاب و جرت الست بيه لعربيتها و هي بتطلق صيحات الإنتصار
ويل يا ويل ويل يا ويل
..الأمهات كلهم لسعوا يا جدعان


و من هنا من موقعي هذا..قررت إني أسأل أولوا الخبرة من نساء العائلة و هي خطوة الكل مستنيها خصوصا من نساء العائلة الي انا واقفالهم في أول الطابور و قاطعة عن بعض بناتهم مايه و نور..و كمان هتبقى مناسبة هايلة للستات في فرع العيلة من ناحية بابا عشان يثبتوا ان مامتي خايبة و انهم هما اللي جابوا الديب من ديله



فقبل ما أقدم على الخطوة دي و أعمل فركيشة بين العيلتين اللي أساسا مش ناقصين...فلو سمحتوا يا جماعة اللي قرا حاجة من الكتاب يشاركنا بمعلوماته و اللي عنده موهبة طبيعية و مهارة فطرية و ذاكرة فوتوغرافية و نفذ أي طريقة ممكن تنفع في الموضوع ده ..فياريت مايبخلش عليا و على قراء البلوج الحبايب و القرايب و حتى الأغراب..



..و هنيالك يا فاعل الخير و الثواب

116 comments:

Esmeralda said...

كتاب ايه يا امى
هى طبخه؟؟؟؟؟؟؟؟
و بعدين اللى ينفع مع غيرك مش لازم ينفع معاكى
ديه عالم حراميه

Anima said...

لسة ما وصلش عندنا المغرب

و اساسا ختى لو وصل انا مش حشتريه

استنى العريس احسن من اني ادور على الكتاب

ربنا يعدلهالك يا ختشي

إنـســانـة said...

يابرايد ياحبيبتى فى اختلاف ايدولوجى اصلا بينى وبين الكاتب بتاع الكتاب ده
هو مقتنع ان فى عرسان وبالتالى يمكن اصطيادهم انا بقا شايفة ان مافيش عرسان من اساسه عشان حد يصطادهم

ودمتم
:D

Masria said...

lol
بوست رائع كالعادة..بس صباح الخير الأول
أنا شفت بنات كتير بتستخدم حيل عشان تصطاد عريس..عايزة اقولك كل اللي حواليها بيبقى عارفين هى بتعمل ايه..بما في ذلك اللي هى بتحاول تصطاده..حاجة محرجة اوي..بس أنا متخيلة الموقف..متخيلة ظروفها يعني
بس ايه كلمة تصطاد دي؟
lol
ما فيش كلمة اظرف شوية؟
:)

محمود علي said...

بالتاكيد ده نصب يا برايد
زي كتاب
اسعد زوج في الدنيا
اكتشفوا ان الي كاتبه راجل مطلق

course won't tell my name ;) said...

إحنا عايزين "كيف تخطفين عريسًا وتتزوجيه بالقهر"
إيه يا جماعة... مش آن الأوان بقى نتجوز الرجالة بالغصب زي ما ياما زمان الستات اتجوزت بالغصب؟

سجدة said...

يا برايد يا حبيبتى هما العرسان دول غزلان يعنى
هههههههههههههه
وبعدين سيبك من الكتب والكلام دا
الطبيعى يكسب
الطبيعى ايه يكسب
ربنا يرزقك يارب بالزوج التقى يارب يكون قرة عين لكى زوج الدنيا والجنة يابرايد يا حبيبتى

Shower-Mirror said...

يا نهار بنى مشجر

!!!!!!!!

هى وصلت للدرجه دى

ده انتوا طلعتوا زباين بقى


30 دولار


ده انتى تلاقيكى فى حياتك كلها ماقريتيش كتب ب 30 دولار


هههههههههه

يا جماعه انا هاتجنن

كل اصحابى الشباب اللى ماتجوزوش بيقولوا مافيش بنات ...و عيال زى الفل و اللهى


و هنا انتوا بتقولوا مافيش عرسان ..


ايه الحكايه

؟؟؟؟؟؟؟؟؟؟؟؟؟؟

امال قاعات الافراح دى كلها بتشتغل على مين ؟؟؟


عموما انتى اوحيتيلى بفكره هايله

انا هابدأ اكتب فى البلوج بتاعى حلقات مسلسله جديده .


و هاسميها .....

ايوه هاسميها : دليل الحاج شاور فى ايجاد العريس المفتخر


ايه رأيك ؟

emos said...

isa awel lamma 2ala2y el ketab dah ha3mel menno nosa7' w 2abe3o b 50 2ersh w leky wa7ed maganan ya setty

w ba3deen howa el mawdoo3 naseeb wana 3arfa en ana law 7afatz el ketab 3an zahr kalb ma2odamesh 3'eer 7amokasha el mekaniky:(

shirry said...

انتي بتتكلمي بجد في كتاب كدة
لاء بصي بجد الموضوع قسمة ونصيب وبعدين شكلك هيبقي وحش اوي لو يعني انجوزتي ان شاء الله والكتب دا وقع في ايد جوزك عندك ولا عند حماته

دا بجد يبقي نهار مشجر بني علي رأي الحاج شاور
سيبيها لربنا احسن ومتقلقيش

momken said...

كتاب ايه يا برايد بس دانتى ممكن بعد الى شوفتيه تالفى الف كتاب

وبعدين مقدمه الكتاب هتلاقى فيها الحكمه الباقيه (الى خدته القرعه تاخده ام الشعور) وهتلاقى الباب الاول بيتكلم عن القول الماثور (الله يجازى الى اتجوز قبل منى وماقاليش ويولع فى الى اتجوز بعد منى ومسالنيش) والباب التالت
بيتكلم عن الدعوة الشائعه( الله يقطع الجواز وسيرته)و
اما الاباب الاخير بيتكلم عن الخلاصه الا وهى
يامامنه للرجال. يامنه لعم عبده) (البقال

Anonymous said...

ونصطاد لية يا بنتى البنات دلوقتى هما اللى بيشتغلو ومراتبتهم اعلى من الرجالة
وهما اة مش كتير بس هما برضة اللى محتجالنا

احمد عبدالحي said...

اختيار مصطفي الجزار من بين افضل35 شاعر في مسابقه امير الشعراء هو فخر لكل مصري




تابع البرنامج وصوت عبر




SMS


لمدة اسبوع بعد الحلقه لشاعرك المفضل


ميعاد البرنامج
قناة ابو ظبي

كل جمعه الساعه 21:45


برنامج / أمير الشعراء
كلنا معك يا جزار رابح ان شاء الله
لاجل مصر صوت لمصطفي الجزار

واحد said...

والله إنتى سكر

لو أنا كنت بأتجوز دلوقت كنتى حتبقى نمرة واحد على القائمة بتاعتى

تمنياتى لكى بالتوفيق

واحد

جزر said...

كتاب ايه ده بس مش هيبطلوا نصب علي الناس
هتلاقي الكتاب ده مرسوم جواه فأر ومصديه علي اساس ان الفأر العريس والمصيده العروسه
عالم فاضيه

Ahmed Sameh said...

الله يكرمك لو عندك كتاب
كيف تصطاد عروسة؟؟

الله يكرمك

ما علينا said...

الا صحيح الـ 30 دولار
يعملوا كام مصري
وطبعا زميلاتك اللي في الصيدلية
لو انت عصرتي على نفسك لمونة وطلبتيه من واحدةمنهم
هوا ايه دا كتاب ايه وبتاع ايه
وتنكر اساسا انها سمعت عن الهيافات دي

بس اعرف يعني
هم العرسان بيعيشوا في المياه المالحة ام المياه العذبة
ولا عرسان الكتاب مجمدين

والله انت سكر يا برايد
ربنا يوفقك يارب
وصنارتك تغمز من غير لا كتب ولا يحزنون
مش بيقولوا
العلم في الراس مش في الكراس

Spyfun said...

حضرتك بالبوست دا وعيتي الرجاله عن اللي كان هيحصلهم
وعن كيقية اصطيادهم
هي بنت الحلال محتاجه تصطاد حد المفروض العكس

Anonymous said...

انا مستغربة الحوار اللى انتى بتقوليه ده خالص حقيقى ده حصل و لاه هزار يارب يكون هزار. عموما لو حقيقى انا مع الجميع انه نصب و متاجرة بظروف الناس. ثم من قرائتى ليكى اعتقد انك لا هتعرفى تصطادى و لا حاجة و سيبى الكلام ده لصاحبه اللى لا اظن انك منهم. على العموم انتى دمك خفيف مووت و حقيقى البوست يجنن . و يارب تتجوزى يا.. .... هى طنط اسمها ايه صحيح؟!! قارئة جديدة

ساعد نسرين الأيمن said...

الطرق الذكية لتصادين عريس ياخدك بالجلبية

- غيري اسمك وسمي نفسك شبكة او هند الحناوي او خديجة الجمال

- سيبك من اسلوب مني توفيق العقيم واتبعي اسلوب سونياجراهام

-لاتركبي عربية السيدات بمترو الانفاق
الا يوم الجمعة الصبح

- تكلمي باستمرار علي ثروة باباكي اللي هتوصلك بعد ما الرجل يودع

- حاولي ان تتميزي في لعب البلياردو او تقمع البامية

- احضري 937 فرحا متالييا واقرصي العروسة في ركبتها او ايديها ع قفاها

-اشتراكي ف برامج ال ام بي سي وال بي سي والسي بي سي وتعاوني حتي مع الس اي ايه في سبيل الوصول للعريس

- شاركي ف الاحتفالات العامة كمولد النبي وشم الفسيخ وعيد العمال واهتفي دايما باسم مصر

- نافقي الستات العواجيز اللي عندهم ولاد ع وش جواز

- اعملي عمل علي جلد جمل

- سافري اسرائيل وقولهم انك مرات رافت الهجان المصرية

- تابعي برامج القناة الثالثة

- زيارت متكررة للشيخ حسونة الفطاطري

- افتحي قهوة هاتشوفي احلي شباب ونقي اللي انتي عايزه وخلي مشاربيه ببلاش

- اقتلي كل البنات تحت 16
- تابعي مباريات الدوري وشجعي حازم امام

او الحل الاخير

- اتصلي بالرقم ده والله فيه عريس 00966568685414

Anonymous said...

لقد ان الاوان للبنت المصرية ان تتنازل قليلا عن الكرامة المزيفة وترضي بالامر الواقع .وترضي ايضا بالشاب الرقيق الحال المحترم الذي يجاهد في الحياة .
ان الاوان لتقبل الامر من جميع الاطراف وتقديم تنازلات تساعد الجميع علي الحياة

Bella said...

شفت الموضوع من بدري وضحكت وقلت دي اكيد تفنينة من تفانين برايد
ولما شفت الصورة عند ازميرالدا قلت مابدهاش بقى
دي الحكاية بجد

لكن بعيد عن حكاية الكتاب والهجايص دي

هو فعلا في خطط وتكتيك بتعمله بعض البنات العفاريت وبيعرفوا يوقعوا بيه عرسان

او يعلقوا بيه عرسان

ولو اني مش باحب التعبيرات دي صراحة بتخليني حاسة اني داخلة محل أدوات منزلية وباتفرج على شماعات ولا حلل وطاسات

ماعلينا

الزواج رزق يابرايد

صحيح احنا في مجتمع قليل ذوق يفهم كل شيئ الا تاخر سن الزواج

مش عارفة ليه الناس مش قادرة تفهم ان ده رزق زيه زي الشغل والذكاء واي شيئ وهبه ربنا سبحانه وتعالى للانسان

فلاحيلة في الرزق

الانسان رزقه يأتيه من حيث لايحتسب

وحتى لو سعى وفضل يعمل حيل وحركات لو مافيش نصيب او مش مقدر لايمكن ح تتم

بالنسبة للاخ المجهول اللى رد قبلي مباشرة وتكلم عن أنه آن الاوان لتقديم بعض التنازلات

معلش بقى اسمح لي ازعلك واقول لك ماحدش بيقدر التنازلات

نحن نعيش في مجتمع مريض ياصاح
من تتنازل فيه لايتم تقدير تنازله ولاالنظر له بعين الاعتبار على انه انسانة متربية كويس وتريد التعاون
بل غالبا ينظر لها على انها رخيصة او فيه سبب يجعلها تتنازل

لما المجتمع يخف من امراضه النفسية والرجالة فيه تفكر صح بدون العقد والترسبات التي سببها لعبهم بديلهم وعطهم شمال ويمين

بالتأكيد سيجدوا بنت الحلال اللى تستاهل

لكن طول مابيدوروا على البنات لامؤاخذة يعني في سلة المهملات او على نواصي الشوارع فلن يجدوا الا كل ماهو معطوب

الجواهر المكنونة لاتقف على الارصفة ولاتتسكح على قارعة الطريق

وكفاية كده بدل ماحد يزعل مني

سلام

على فكرة يابرايد البوست بتاعك حلو قوي وضحكني وانا بقالي كتير ماليش نفس اضحك

ربنا يسعدك

SAMEH said...

وطبعاً أول نصيحه في الكتاب: إياكي أن تخبري أي بنت (و خاصة أصدقائك) .. بأنكِ إشتريتي هذا الكتاب، حتى لا تقل فرصتك في إصطياد العريس
:P
بدليل إن كل واحده من زمايلك في الشغل إشترت نسخه لنفسها
..
يا بنتي إنتوا كده مش هتصطادوا عرسان .. إنتوا هتصطادوا سمك في ميه
:P
بس برضه دمك زي العسل

انتظار مؤقت said...

تعالي يا بنتي عندي ..جبتلك شوية نصايح انما ايه ...زوريني و انتي تشوفي ده صدفه و الله لسه منزل البوست لو اعرف كنت بعتهولك
تحياتي

S H A H said...

موضوعك و طريقة سردك تحفة و الله يا غادة
الكتاب ده هيشتغل على حسك في البلوج

بس المهم تلاقي الكتاب

خمسة فضفضة said...

السلام عليكم ورحمة الله وبركاته

بصي يابرايد يابنتي هاقولك حكمة خليها حلقه في ودانك :

" العلم فالراس مش في الكراس "

كتاب ايه وبتاع ايه اللي انت عاوزه تشتريه وتمشي ورا كلامه ، ومن امتي يعني كلام الكتب بيودي ولا يجيب

ونصيحه بقي ، سيبك من الجواز واديك عايشه سلطانة زمانك في بيت السيد الوالد

The Groom said...


أنا حرزعك بوست قريب فيه نصايح زي اللي في الكتاب أو منه

تحياتي لك من ماناساس البلد
:)

Esmeralda said...

الكتاب اهه للى مش مصدق

http://esmeraldapix.blogspot.com/2007/06/blog-post_17.html

Mysterious R said...

موضوع الجواز ده قسم و بتصيب و إصابات جامدة على فكرة. و بعدين
ياجماعة موضوع الصيد ده صعب شوية و بعدين عايز صبر مفيش حاجة مجمدة

barbie girl said...

بعد الساعة 12 قومى اتوضى وصلى ركعتين قضاء حاجة وادعى بضمير وربنا هيكرمك

همسة قلم said...
This comment has been removed by the author.
همسة قلم said...

صي يابرايد
كان فيه شيخ في التليفزيون بيتكلم عن مشكلة العنوسة
وقال بوصي بناتي بركعتين في جوف الليل وبعدها تقولي
"ربِ اني لما أنزلت اليّ من خير فقير"
وبعدها قولي
ليس لها من دون الله كاشفة

وواظبي على الدعاء ده بيقين في الله عز وجل وهو وحده هايرزقك الزوج الصالح ويرزق كل البنانيت العساسيل اللى زيك بالازواج الصالحين
:)

HAYAH said...

صفحة حياة صفحة جديدة لمناقشة قضايا الشباب
منتظرين مشاركاتكم

BYE BYE

3abdo me7tas said...

صوابع الإيد مش زى بعضها

Bestic said...

اهو ده بجد البوست الي مستنياه من ساعة ما فتحتي

أمي حتفرح أوي بيه

بس أكيد كل الطرق الي في الكتاب ده مش حتنفع لان أنا متأكدة ان الكتاب ده الي خلصوه من السوق العرسان المستهدفين
من الكتاب ( وزمانهم طلعوا كتاب مضاد )مش العرايس
لاني مقتنعة تماما ان الي معندوش الموهبة دي من الفطرة مش حيعرف يتعلمها من كتاب لاننا طول النهار بنسمع كلام بس مش بنعرف ننفذه والي عنده مش ممكن ينقله لحد تاني لانه أكيد حيستخدمه ويصطاد بيه يا اما حيخاف على جوزه الي اصطاده

الا اذا كان يؤمن بالمثل الي بيقول الي خدته القرعة ....

(لو اتعلمتي حاجة من حد أو من كتاب ونفعت معاكي ابقى قوليلي)

ههههههه
تحياتي

تخاريف دكتور said...

ايه يا داكتورة
فيه حد يكون من الغاليبية العظمى فى مصر ال 15 مليون يعنى ويعمل اللى انتى بتعمليه ده
حرام عليكي خليكي مع اصحابك

والله انتو مش حاسين بحاجة
هو يعنى الشباب لاقى ياكل علشان يتجوز ولا فاضي اصلا علشان حد يصطاده
كله ضحك على الدقون يا ماما

هه؟؟

farfasha said...

هههههههههههههههههههه
تصطادي عريس ايه وانهي عريس ده
اكيد هايبقى عريس كحيان اوى اللى يتخطف ده لان العريس المتريش بيبص لفوق اوى وما بيرضاش الا بواحده نازلهخ من السما
يابنتى احنا اللى زينا ممكن يوافقوا على اى عاهه وخلاص بدل الخطف ووجع القلب

مصرى متغرب said...

دمك زى العسل يابرايد
تصدقى انا مستغرب والله ان فى واحدة دمها خفيف كدة ولسة ما اتجوزتش بس الواضح ان الرجالة بينقوا الدم التقيل علشان ينكدوا عليهم وعلى رأى الحكيم الى كان ماشى مع واحد صاحبة فسالة صاحبة هى كل الستات الحلوة دى ماشية فى الشارع لية قالة علشان الوحشين تحنا اتجوزناهم وقعدناهم فى بيوتنا

مصرى متغرب

hana said...

لا انا عاوزة من دة
قصدى عاوزة الكتاااب
ماليش دعوة اللى يجيبه لبرايد يقولى علشان انا عاوزاة كماان
هههه
بجد يا برايد
دة لو الكتاب دة ناجح هيحل ازمة جامدة اوووى
وهياخد الكاتب دعوااات
دة احنا كلنا هندعيلة
بس الخوف بقى لندعى علية
بوست يجنن
تحياتى

omar مشروع بطل said...

متعرفليش كتاب "كيف تصطاد عروسة" بس يكون فيه كمان طريقة لاكون مليونير واقدر ادفع المهر والشبكة و اجيب شقة و .....

اما نصيحتى بقى للأخوات العزيزات فصبرا جميلا .. الموضوع مش بالساهل (علشان تعرفوا قيمتنا)

قال تصطادى عريس قال .. هو سمكة ولا فار هيقع فى المصيدة ؟؟؟!!!! ده بعدكم

Desert cat said...

انا كنت سمعت عن الموضوع ده بس افتكرته تهريجهو بجد طلع بحق وحقيق
طيب انا قاعده هنا يمكن حد يكون قراه يحن علينا بحاجه تفيدنا
ربنا يبارك لكو يا اسيادنا

Ma-3lina said...

يخرب عقلك ايه يا بنتى المسخرة دى

مع انك يعنى خلتينى افقد الامل شكل العيب فى الصيدلة يا اختى و احنا مش عارفين

طيب بقولك ايه احنا نلملنا قرشين من كل البنات و نجيب الكتاب و انا اعملهولكم سكاان و نبعته على بقية البنات نكسب فيهم ئواب

بس يا ريت كل الكتاب يبقى معاه عريس علشان نقصر يعنى

سكر يا بنتى و تحياتى

hana said...

آآآآآآآآآآآة سمكة وليه لاءة
ولا يهمكوا يا بنات بكرة نلاقى مليون عريس
هههههه

hana said...
This comment has been removed by the author.
مفيش فايدة said...

يخرب عقلك يا برايد انتى مالكيش حل انا قريت البوستات بتعاتك كلها وقلت هارد عليها ف الاجازة على ما يخلص الطب الله يحرقة

بس دا مايتسكتش علية انتى بتتكلمى جد

ف موضوع الكتاب داهههههههه

دا تبقى الدنيا خربت والله اكتر ماهى

ودا يبقى فية اية بقى اكيييد هاتلاقى فية طرق تعملى بيها عمل وسحر ورجل النملة وقلب ضفدعة يتيمة والكلام دا

ماهى هى دى الطريقة الوحيدة اللى تجبهم انك تشوفى حد وتعمليلة عمل هههههههه

بصى با بنتى امشى بالمبدا دا اللى عايزنى يجينى انا مابروحش لحد (( اينعم محدش بيجى بس مش مهم راسى فووق)

كازانوفا said...

يا سلام عليكى يا برايد مبدعة يا بنتى

ياسر سليم said...

كيف تصطادين عريساً

ده تقريباً اخر إصداراتى فى السوق

عمر said...

طيب ليه ماتصلتيش بالرقم اللي في الوسيط

0795864405

واهو برده تبقي نفعتي بتوع الكتب وبتوع التليفونات مرة واحدة وينوبك منهم دعوتين

صاحب البوابــة said...

اعجبني للغاية هذا البوست

لكونه يحمل فكرة هزلية يتم تسويقها للاستيلاء على اموال البنات

تحياتي لكل من يملك عقلاً حتى الآن

ذو النون المصري said...

و ياريت اللي عنده معلومات عن كيف تصطاد عروسه بالمره يقولها

فوكيره said...

هههههههههه

برايد الكاتبه الساخره جداا

ولله انا بقول الواحد يلتزم باخلاقه
ويدعى ربنا
وربنا حيعوضه
مهو مش معقول الواحد يتجوز اى حد
باعتبار انها جوازه والسلام

وبعدين الراجل الى يوافق ان واحده (تصطاده) يبقل كده كده يعنى

حلوه حكايه الكتاب دي والله
30 دولاااار

ينهار ابيض

littel angel (2alb el 2ased) said...

آنستي العزيزة.. لو ربنا فك عقدتك.. واتخطبتي.. فإليك نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد..

أجمل ما في الخطوبة العزومات الرومانسية.. على أحلى محلات أكل ف البلد.. واللي عمرك مانتي شايفاها بعد الجواز.. المهم نصائحي لك عند أي عزومة مع ختيبك.. قلنا رقَّه ....

1- الأول لازم تعرفي إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوق طبعًااا

2- العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي.. العيش بيتقطع بالسكينة ف الطبق.. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي حِفِّي زي مانتِ عايزه....

3- الشوووربة.. أبوس كعب رجلك.. بند الشوربة ده مهم جدًاااا.. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ ف الحجر للزبون.. وطبعًاااااا عايزك تنسى تمامًا.. السلطانية اللي بتقيميها على بقك ف البيت.. وتدلدقي على روحك..
بالمعلقه وبدون صوت.. سخنة ولعة برضه بدون صوت.. وتسيبي تلت الطبق ع الأقل.. مش تميليه.. عشان تلهطيها لآخر نقطة.....


4- الرز طبعاً .. بيتاكل بالشوكة.. أوعي إيدك تتمد ع المعلقة.. وتغرفي من طبق الرز وتعبي.. إوعي.. الرز بالشوكة....

5- المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص وبعدين تحطيها ف بؤك من سكات.. مش تشفطي المكرونة عود عود..

6- السمك.. مشكلة.. شوفي.. بتفصلي اللحم عن الشوك.. إزاي..؟؟ تقطعي اللحم من النص.. بالطول وبعدين تفردي اللحم ع الجانبين ولما تخلصي ناحية.. متقلبيش السمكة.. بلاش فلح.. شيلي السلسلة

بالشوكة والسكينة وحطيها ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص.. قولي مابحبش السمك وخلصي نفسك..

7- الجمبري.. -إذا كنتي عارفاه-.. أول ماطبق الجمبري ينزل.. بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت ببااااا.. وأتنهدي جامد وقولي.. برضه..؟؟؟ وتروحي قاطعة راس الجمبريياية.. بالشوكة.. أنا ف عرضك إنسي المصمصة دلوقت..

8- البطاطس سواء مسلوقة أو محمرة.. أوعي تهرسيها وتدبيها ع الرز وتدي ...لا..لآ...لآ...بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي..

9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي....

10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة..

أنا أودامي أسبوع.. هابطل أكل فيه.....

وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك..
وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي.. وبالهنا والشفااااااااااااا

one of ur best fans ... ya rat teshofy el blog beta3y ... hwa mafhosh 7aga men el klam da bes bardo 2aho ymken tla2y feeh 7aga te3gbek....2albelased.blogspot.com

الربان said...

تحياتي

البوست خفيف و ظريف....و يشد القاريء للاخر.

في رأيي ان مشكلة تأخر الزواج تعود في المقام الاول الي الشخص نفسه.

فبعض انواع الشخصيات بتفشل في إنشاء او الاستمرار في العلاقة ...نتيجة لمكونات في شخصيتها هي ...و ليس الطرف الاخر....

حبذا لو أطلعنا من باب العلم بالشيء علي كتاب من كتب سيكولوجية الشخصية
و ايضا إختبارات الشخصية...حتي نعرف انفسنا اولا...و من ثم الاخرين.

تحياتي و تقديري

wanna b a bride said...

esmeralda

يا ستي عايزين برضه اخد بالأسباب و نعمل اللي عبلينا و المر لله من قبل و من بعد
---------------------------
anima

ماتقلقيش بكره تلاقيهم مصدرينه للمغرب

الإنتظار طال..أهي دي طريقة يمكن تكون اكاديمية بدل التلطيش بدون أساس برضه
-----------------------------
إنسانة

لا لا لا مين قال مايش عرسان

فيه طبعا..بس فين النفس
--------------------
masria

ماهو بيبقى عارف و برضه بينصاد

بلاش تصطاد دي...تشنكل تنفع؟
-------------------
محمود علي

الحقيقة مش هاقدر أتأكد غير لما أقراه الأول
و بعدين يا عم دي كلها حاجات بسيطة

كلها 30 دولار
----------------------
course won't till "her" name

شعار المرحلة القادمة

و مانيل المطالب بالتمنى و لكن تؤخذ الدبلة غلابا
-------------------
سجدة

غزلان بأه قراميط والا حتى غربان

ماهو لازم يبقى فيه حل

--------------------
shower-mirror

أوكيه مستنيين المسلسل

و بعدين صحابك الشباب دول ما تباصي منهم اتنين تلاته المدونة أهيه ماليانة بنات زي القمر
-----------------------
emos

خلاص إيدينا على كتفك

شكلك كده غنية و هتقدري تتصرفيلنا في تلاتين دولار تفكي بيها أزمة الجميع
-----------------------
shirry

برررررضه بتكدبوني..طبعا فيه كتاب كده أمال ايه؟

الكتاب أول ما تصطادي بيه حد تنقليه و تنقلي خبراته للجيل اللي بعدك و لا جوزك و لا حماتك يلاقوله أثر

wanna b a bride said...

momken

ماهو أنا ممكن أألف كتاب صحيح

بس اسمه هيبقى كيف ترفضين عريسا ..دي الحاجة الوحيدة اللي أنا خبره فيها

----------------------
anonymous

شكلك كده لسه صغيرة و ماتحطتيش في مفرمة جواز الصالونات

ربنا ينقذك منها
-----------------------
أحمد عبد الحي

ألف مبروك
------------------------
واحد

ده بس من ذوقك

أهي المشكلة في موضوع "لو"دي
--------------------
جزر

لازم الول نشوفه يا جماعة هنظلمهم ليه

يمكن غرضهم شريف
-----------------
ahmed sameh

طب الأول أجيب بتاع العرسان و انا بنفسي هاصطادلك عروسة ان شاء الله

وعد
--------------------
ماعلينا

اللي في الصيدلية مش ممكن يعترفوا انهم محتاجين كتاب زي ده

العرسان عندهم إكوام إكوام في الفسحة هما بس يشاوروا و يلاقوهم مرميين تحت رجليهم..ماكانش حد غلب

ان شاء الله ربنا يوفقني و سنارتي تغمز ادعولي
-------------------
spyfun

وعيت مين بس هو بمزاجهم؟

هيتصادوا يعني هيتصادوا

بس المهم مين يعلمني أصطاد؟

الزمن حاله اتقلب
------------------
anonymous

يعني خلاص..انتي شايفة ان مافيش فيا أمل خالص

مش هاعرف أصطاد حد خلاص؟؟

طنط إسمها أم برايد
:)
-----------------
ساعد نسرين الأيمن

اييييه ده؟

انت شكلك كده جبت الكتاب صح؟

عجبتني النصايح جدا

خصوصا موضوع القهوة ده..بجد بجد مشروع بروحين

أنقيلي عريس و أساهم في شغل اوقات فراغ الشباب

بس ايه موضوع حازم إمام ده؟
الحل الأخير ده ..ممكن نتبعه في آخر مرحلة

wanna b a bride said...

anonymous

مين اللي فتح التلفزيون على برنامج مجلس الشعب؟

---------------------------

bella

أيوااااااه ..اهو انا عايزة الخطط و التكتيك ده

إممممم
شمعات و حلل و طاسات...ساعات بيتشابهوا و الله

عجبتني قوي وجهة نظرك

صحيح في أوقات كتيرة اذا تنازلتي ينظر اليكي على ان فيكي عيب

و ساعات وقت ما تتنازلي الموضوع يتفركش عشان كده

يقولوا طب و هي اتنازلت ليه أكيد بتجر رجلنا و الموضوع فيه حاجة غلط

لا كده عاجب و لا كده عاجب
---------------------
sameh

يا سيدي سمك سمك...هو حد لاقيه

البنات لا يمكن تشارك بخبراتها في المواضيعه دي الا بعد ما تتم

طب و انا بأه أقعد أستناهم لحد ماواحدة فيهم تتجوز

مافيش وقت
-------------------
انتظار مؤقت

هو ده العشم برضه

لحد ماحد يتصرفلي في الكتاب
--------------------
shah

شكرا ليك و لذوقك

بشس هو فين الكتاب

يا مين يلايمني عليه
------------------
خمسة فضفضة

انا عايشه أهه سلطانة بس الصراحة زهقت

الواحدة ساعات يبقى نفسها في الفجل

مش هانقضيها تفاح على طول
---------------------
the groom

ارزع يا عم و لا يهمك

مستنيين النصايح

ما الناس لبعضشيها
------------------
esmsralda

ايووووه

وريلهم الإثبات
-----------------
mysterious r

نفسنا نصيب أي حد و نخلص

المجمد بيقولوا مش مضمون
-------------------
barbie girl

حاضر

ربنا يسهل

شكرا ع النصيجة الجميلة

wanna b a bride said...

همسة قلم


ربنا يسهل ان شاء الله

ميرسي يا جماعة على النصايح الغالية

ربنا يستجيب من الجميع ان شاء الله

----------------------

hayah


مبروك ع المدونة

تحياتي

--------------------

3abdo me7tas


تمام

بس بنحاول ناخد بالأسباب

-----------------

bestic


هاقولك ان شاء الله

بس اعمل جمعية و اشتري الكتاب

او أقعد مع أي واحدة زميلة و آخد منها معلومات تحت تهديد السلاح

ماهو مافيش غير كده
------------------
تخاريف دكتور

شوف انا طول عمري مع الجماعة

لكن في المرحلة دي ..فلتحيا الندالة

بس حد يلايمني عليه
و اما الشباب مش لاقيين يتجوزوا ...ايه المطلوب مني اعمله يعني ؟..ماهو في الآخر انا اللي هاحمل اللقب اللي مش ولابد

يعني كده كده انا الخسرانة
-----------------
farfasha

لااااااااااايمكن

لا للعاهات..نموت نموت و لا نقبل العاهات

ده المبدأ الوحيد اللي عندي في الجواز
و مش مستعدة اتنازل عنه أبببدا
------------------
مصري مغترب

أنا كمان و الله مستغربة

بس نعمل ايه بأه..مع اني حلوة و ذكية و عبقرية و متربية و مافيش زيي في مصر و الدول العربية لكن الصراحة أهم صفة فيا هي " التواضع"..بس هنعمل ايه؟

منهم لله اللي كانوا السبب

تحياتي
-----------------
hana

أيوة كده ضمي صوتك مع صوتي

يمكن حد يحن علينا احنا الإتنين و يجيبلنا نسخة نخمس فيها مع بعض
-------------------
omarمشروع بطل

و الله هتقعوا هتقعوا

هتروحوا فين يعني

ده قدر و مافيش مفر
-------------------
desert cat

وآدي كمان صوت ينضم لقائمة المشترين المحتملين للكتاب

ده اللي يجيب نسخة و يعمل اعلانها هنا هيكسب دهب

wanna b a bride said...

ma-3alina

هي احتمال يكون الصيدلة برضه سرها باتع من أول مارجلي عتبت الكلية و انا شفت اللي ماحادش شافه

بالنسبة للكتاب هو ماعاهوش عريس بس معاه باترون هدية لو تعرفي في التفصيل غالبا هتعرفي تطلعي بعريس منه

بس هيبقى قصير شوية

تحياتي
-----------------------
hana

سمكة سمكة

بس احنا مابنعرفش نصطاد
الحاجات دي ليها ناسها
-----------------------
مفيش فايده

أنا راسي بقت خلاص فوق البرج

تحياتي
----------------------
كازانوفا

ده بس من ذوقك يا كازانوفا
------------------
ياسر سليم

طب افتكرنا بنسخة ينوبك ثواب
------------------
عمر

مافيش الكتاب اتسحب من السوق

اللي اشترى اشترى و لاعزاء للي مالحقش

wanna b a bride said...

صاحب البوابة

سعيدة انه عجبك

و تحياتك وصلت
----------------
ذو النون المصري

لا دي سهلة قوي
احنا نعمل بيننا قناة لتبادل المعلومات

انت تجيب المعلومات اللي عندك و انا هافيدك من خبراتي
----------------
فوكيره

ماهما بيتصادوا و يعملوا انهم مش واخدين بالهم

و يها دي الحرفنة

ربنا يرزقنا جميعا بالخير ان شاء الله
--------------------
little angel(2alb el 2asad)

نصايح هايلة جدا

تفتكر هييجي اليوم و استعملها

أوعدك هاستعملها و اطبقها بحذافيرها

بس يحصل

تحياتي
----------------
الربان

رأي غريب قوي

انت شلت كل المسؤولية من على الطرف الآخر

يتهيألي كلامك ناتج عن تجربتك اللي مش ضروري أفكارك عنها تعمم بالطريقة دي

العيب ممكن جدا يكون من أي طرف من الطرفين و ساعات الإتنين مع بعض
و ساعات بيكون فقط قسمة و نصيب

nesrelsharke said...

هههههههههههههههههههههههههههههههه
انا بصراحه لما شوفت اسم مدونتك ظنيت انها مدونه هزليه يملأها السخريه حول حال البنات وفعلا ده اللى لقيته مع وجود الطابع الجاد فى الحديث عليها
بجد انا او مره تقابلنى مدونه زى دى
تحياتى لك أختى
السلام عليكم

ساعد نسرين الأيمن said...

طب اخر مرجلة ديه هتيجي امتي؟
انتي عارفة معروض عليا فرنسا
مش معقول استني لغاية لما يكملوا 9.5

MeshFahem said...

شوفى يا أستاذتنا
لو حضرتك إستثنيتى:
اللى فوق سن ال40
و اللى تحت ال 20
و اللى مامعاهمش فلوس
و اللى معاهم بس بخلاء
و اللى ال
IQ
بتاعهم أقل من 100
و القصيرين
و اللى مليانين شوية
و المتجوزين
و اللى لابسين شراب كحلى و برنيطة بمبه مسخسخ
و اللى -لا مؤاخدة- بيتكرعوا بصوت عالى بعد الأكل (أو الشرب)
الخ
الخ
الخ

يبقى مش باقى غير راجل واحد و ربع تقريبا
و غالبا مش موجود فى مصر
فإيه رأى سعادتك لو تعملى قائمة بالمواصفات اللازمة
(must have)
و المواصفات المرغوبة
(Wants)
أو اللى بيسموها
wish list
و تدى نسخة منها لطنط شكرية و واحدة لأنكل ديسكو ؟
غير كده أنا والله مش فاهم إيه اللى بيحصل ده؟ أنا على أيامى لما كنا بنلاقى واحدة عندها 10% من خفة دمك كنا بنتخانق عليها - و ياما حطونى فى الجبس
:(

حمودي said...

انا اول مره ازور البلوغ والصراحه رائع ويعطيج العافيه - اما عن الموضوع فانا اقول دام انه جميع المجتمعات العربيه عايشه خدعه انه في حاجه اسمها نصيب قولي لاهلك انه ده نصيبي وانا مالي وخليكي بحريتك بلا جواز بلا نيله :)

masrry metgharb said...

ههههههههههههههههه
بجد التواضع ظاهر جدا
مش بقولك دمك زى العسل
بس ماتقلاقيش بيقولوا فيه مشاكل بين كريم ومراته بعد ما ابوها اتمسك فى قضية اكياس الدم واحتمال ينفصلوا قريب

An Angry one said...

مافيش كتاب "كيف تجد عروسة تريد شابا محترما و مش متنمردة" ؟

محمد فوزي آل ربيع said...

كتاب إية دة اللي انتي هتقرأيه؟

1- استغلال التلاتين دولار اللي كنتي هتدفعيهم للكتاب في مجموعة لا بأس بها من ال إس إم إس على قناة الناس ، في ناس بيقولوا بتجيب مفعول كويس ، خصوصا من اللي بيبقوا مطلقين و في السوعدية و بيشتغلوا ف الخليج و هي فرصة لا بأس بها خصوصا إن العريس بيبقى استعمال تلات سنين بس ، أي و الله واحد منهم كان كاتب كدة

2- إعلان مبوب في المنتديات و المواقع المهتمة بالجواز و البتاع

3- مجموعة من الزيارات العائلية الخنيقة مع الست الوالدة و المشاركة في مناسبات العيال الصغيرة زي المواليد الجدد و أعياد الميلاد ، صدقيني هتلاقي شباب كتير بيستصغروا نفسهم و بيروحوا و متنسيش تاخدي معاكي حاجة عشان المنظر العام بس أمال يقولوا رايحة عشان تتجوز بس؟

4- اركبي مواصلات على قد ما تقدري

5- لو قدرتي يعني تدرسي تمريض من أول و جديد و تشتغلي ممرضة ، بيكونوا أقرب للدكاترة

6- ابقي عدي على الحاج باباكي ف شغله مرة أو اتنين في الأسبوع و ينصح بذلك في نهاية الدوام على أساس إنك جاية تاخديه معاكي البيت يمكن تلاقيلك حد هناك أو حد من أصحاب الحاج عنده ابن أو يعرف حد عايز يتجوز ، دا على افتراض إنك عجبتيه أساسا

7- زيارة الناتشي مرة أسبوعيا و مصاحبة كمية لا بأس بها من التافهات هتنفع جدا

8- خلي الحاجة تطبخ مرة طبخة كويسة و توزعوا على الجيران على أساس إنه انتي يعني اللي طبختي مع احترامي لطبخك ، مش بيقولوا مفتاح قلب الراجل معدته و لا بطنه ، إية الطفاسة دي؟

9- تقوية الروابط مع الجيران زي أماني و الأستاذ فوفو

10- توزيع كمية محترمة من أدوية الضغط و السكر للستات العواجيز اللي عندهم عيال هاتتجوز، منين؟ من الصيدلية هوا حضرتك مش صيدلانية؟ و العهدة سيبيها على الإتناشر اللي عندكوا هوا مفيش غيرك يعني؟

11- انتي رحتي السوعدية قبل كدة؟
أوك لو مرحتيش يبقى خدي أجازة و سجلي في أي حملة عمرة للصيف و أول ما تشوفي الكعبة يبقى ليكي دعوة لا ترد حسب ما قرأت ابقي ادعي ساعتها و متنسيش أخوكي الغلبان دا أنا على وش جوا....قصدي جامعة

و لو يعني حاجة من اللي فوق دول نفهعوا ابقي قوليلي عشان أنزلهم ف كتاب ، دا أنا غلبان خليني أسترزق شوية مش يمكن كتابي ينباع باتنين دولار حتى؟

Nouran said...

يا لهوي لهذه الدرجة
طب تعرفي انا عندي واحدة صحبتي قدي يعني اتخطبت وهتكتب الكتاب كمان ف شهر تسعة ومجبتش الكتاب ولا حاجة
بس بجد الكتاب ده موجود ؟؟
لو بجد يبقى خلاص عليه العوض
بس هو العيب ف ايه يا اختي ؟؟
خليني انا ف المذاكرة يا رب تنفعني :(

essam said...

le sujet ne se pose plus aux pays occidenteaux

fanan fa2eer said...

والله يابرايد ياحبيبتي مانا عارفة الحاجات دي بتجيب نتيجة ولا لأ؟
أنا سمعت عن الكتاب بس ما فكرتش أشتريه
بصي لو اشترتيه ابقي قوليلي أختك غلبانة برده
ربنا يعدلهالك ويعدلهالي يارب:))

bos bos said...

كتاب كتاب أيه حرام عليكى
لو كان الحل فى كتاب كان الحكاية خلصت من زمان وكل البنات والولاد أتجوزوا
بس بجد بوست جميل جدا
تحياتى

MO3TAZ said...

انا كل ده فاكر ان الكتاب من خيالك يا برايد لكن الكتاب بجد حقيقي و موجود في السوق

انا كمان بقي جايب سبق صحفي وجايب لكم الاعلان بتاعه اللي نازل في الجرايد
http://houdounisbi.com/files/images/3arisan.jpg

S H A H said...

طمنيني اخبار الكتاب ايه؟؟

احنا عندنا ولاية عايزين نخلص منهم برده :)))

hana said...

يا جماعة شكل الكتاب خلص ولا حد عارف يجيبو

Sharm said...

تخيلي الكتاب ده اتعمله اعلانات في الجرايد

هي العنوسة بقت جامدة اوي كده

Tina said...

سلام...
هو كان الكتاب ينفع نشتريه ب 300 مش 30 بس اعتقد السر في الحظ مش في الكتاب . يا رب تعطينا حظ . مش بيقولك اعطيني حظ وارميني في البحر .

Human Wolf said...

بصراحه انا جاى المدونه وانا مرعوب انا موصى اساسا اتنين صحابى انى لو متصلتش بيهم خلاص نص ساعه وقولتلهم انى كويس يبلغوا البوليس ويقولوا انى اتخطفت من قبل البنانيت اللى مالين المدونه وادينى بقولها وبصوت عالى وقبل كل شىء انا مش عريس كلا والف كلا اينعم انا سنى مناسب للجواز بس مش قادر اقدم على الخطوه دى اصلى انا مبسوط قوى كده وذى الفل والحياه لونها بمبى كان لازم اقول المقدمه دى خوفا من التأمر ضدى او اى محاولات للنيل منى بابتسامه كده بغزمه كده بصباح الخير بصوت مكهرب اينعم انا مخدش فى ايدكم غلوه لكن حريتى مش من السهل انا اتنازل عنها بسهوله كده وساظل اقاوم واقاوم حتى اخر رمق وبالمناسبه انتوا طابخين ايه عندكم فى المندونه علشان انا شامم ريحه ملوخيه عفاريت انتوا والله يا بنات قال عاوزين يعملوا بمقوله اقرب طريق الى قلب الرجل معدته اه فعلا بس انا عن نفسى هاكل ومعرفش حد فيكم بعد كده هعمل دايخ وعندى فقدان مؤقت للذاكره وابقوا حلونى بقى عقبال ما حد فيكم يفوقنى هتجيبوا كولونيا هشرب منها واكمل نوم بصل بموت فيه هاكله وانام برضه وبعدين انتوا ليه يا جماعه مستعجلين قوى على الجواز ده كله مشاكل انتوا بحد مش عارفين مصلحتكم فين بدل ما تتجوزا وتقعدوا مع واحد بيعد انفاسكم عليكم ها رايحه فين ها جايه من وليه اتاخرتى وليه مخلصتيش الاكل والخمسبن قرش اللى كانت فى جيب البنطلون الكحلى راحت فين دى مش اول مره الاحظ فيها اختفاء مبالغ ماليه منى وازاى تفتحى الباب وانتى لابسه اللبس ده وليه البيت مش متنفض ومترتب مع العلم انه كان ساكن فوق السطوح قبل ما يتجوز ليه ليه يا بنات حرام عليكم ما تخليكم كده براحتكم واشتروا دماغكم ايتعم الزواج فى حاجات حلوه بس براحه البال تكسب عامه لو مصممين انا ممكن اوفرلكم عرسان بارخص الاسعار عندى اصحاب كتير اتخبطوا فى دماغهم وحصلهم غيبوبه سكر وخدوا قرار انهم يتجوزا وقال ايه بيدورا بقى حد يدور على عذابه باديه عجبت لك يا زمن وقولت اه.
وبحب اهنى اسره المدونه ومن محب الى احمد بيقوله رجع القميص علشان ابويا خد باله انه مش موجود ومطلع عينى عليه وسلامى الى خالو فى العراق وبقوله انا عارف انك مزنوق ومش عارف ترجع بس متناس لو ربنا فك ضيقتك تجبلى الكاميرا اللى قولتلك عليها وبهدى الاغنيه لكل الناس اللى بتسمعنى وربنا يسترها دنيا واخره علينا

westtewest said...

دمك زى العسل صراحه ومتقلقيش كل شىء بميعاد وفيه حكمه بتقول
مفيش حد هيتجوز غير مراته
بس بالمره بقى ملاقيش عندك عروسه اصلى بادور على عروسه

المهاجر said...

بجد انتى ما حصلتيش
فعلا بنات جيلكم فى ازمة مجلس الامن نفسه ممكن يخاصم بعضه بسببها
و خاصة بنات طب ربنا معاهم
و حسبى الله ونعم الوكيل
و يارب اشوف كل بنات مصر متستتين
امضاء
متضامن معكن واريد المساعدة
بس ما فى غير الدعاء
ربنا معاكن
اهئ اهئ اهئ

Samir said...

على فكرة أنت بنت زي العسل.
تعرفي أن كلامك بيعجبني جدا؟
ربنا يعدلهالك!!!!!

Geronimo said...

بجد انت بالجمال ده ومش لاقية عريس ؟؟؟

Abdou Basha said...

أقولك نصيحة
الوحدة خير من جليس السوء
مش عارف الناس بتفكر في الجواز ليه دلوقت
يعني خلاص كل حاجة خلصت ومش فاضل غير الجواز؟
يلا ربنا يعدل الحال

sendrlla said...


بصى فى ادعيه لتيسير الزواج ممكن تستعينى بيها

ولازم تكونى عارفه ان الزاج دا نصيب وليك سعه معينه ربنا كاتبهالك هتتجوزى فيها الموضوع مش حيل

بس لا يمنع انك ممكن تستعينى بذكائك الانثوى فى الموضوع دا رى الرقه والاهتمام بالمظهر والاخلاق العاليه
حاولى تنسقى لبسك زياده عن اللازم البسى فواتح يعنى اهتمى بمظهرك

وبعدين خلى بالك ان الحركات اللى بيتكلوا عنها البنات دى بتكون مفهومه لان الشباب بقى اكثر وعيا

بس لازم يكون فيكى سمات كل الشباب بيهتموا بيها ما تحوليش تعلى صوتك فى الكلام او تتكلمى فى مواضيع تافه وبرده مش تتكلمى فى السياسه والاخبار والكلام الفاضى دا حاولى تكون مبتسمه بس مش تفضلى تضحكى عمال على بطال والناس تقول هبله لا خليكى بشوشه حاولى تكونى دبلوماسيه وحساسه فى نفس الوقت بس المشكله بقى فى الشخصيه نفسها لان الطبع بيغلب التطبع فانتى برده مش تتكلفى فى كلامك وتصطنعى الرقه والبساطه لا خليها من سماتك

وبرده كله نصيب وقدر وربنا هيبعتلك ابن الحلال اللى يستهلك وموضوع كيف تصطادين عريسا والكلام دا بلاش منه لانه قد ينزل من قدر نوعا ما

انا هحاول ابعتلك الادعيه لو لاقيت ايميلك لو مش عرفت عندك اسم مدونتى وايميلى موجود

تحياتى

Human Wolf said...

طيب يا ترى يا سندريلا انتى متجوزه ولا لا علشان بس نعرف كلامك ده هيجيب فايده مع البنات اللى لسه مستنيين نصيبهم اصلى انا بصراحه انا شايف ان المشكله مش فى البنت انها تبقى تحاول تبين انها رقيقه او لطيفه او تطوى صوتها شويه اه دى حاجات يفضل انها تبقى فى البنت بس مش هى السبب فى ان البنات تتجوز السبب اللى انتى مش واخده بالك منه غايب الدين والايمان والاتجاه للانحراف ده اولا وثانيا ضعف الظروف الاقتصاديه ثالثا بقى المبالغه فى الطلبات بتاعه العروسه خاصه فى الصعيد لما الواحد بيروح يخطب فى الصعيد محدش بيتكلم فى شبكه اقل من عشرين الف ومؤخر ايه وعفش مش عارف من فين وشقه تكون تمليك والحوارات دى على العلم ويمكن اللى ميعرفوش كتير من الناس ان اسعار الشقق فى الصعيدمش اقل من ربع مليون جنيه لو عاوز شقه مناسبه يعنى فى برج واسانسير ومساحه متوسطه 130 متر وفى منطقه مش هقول هاى كلاس لا منطقه كويسه ده الطبيعى السائد فى ناس هتفهمنى غلط وتفتكر انى بعمل اعلان على شقه عاوز ابيعها ان بشرحلكم الدنيا ماشيه ازاى فى اسعار شقق اقل من كده بس مش هتنزل عن 200 الف قوليلى بقى الشاب يتجوز منين شقه ايجار فى ناس مش بتوافق ولازم تمليك يبقى انتوا اللى بتصعبوا الامور والله يا جماعه لو التعامل سلس وتراعوا الظروف مش هتلاقوا ولا واحده مش متجوزه بس سورى بقى خلى اهاليكم طلاما مزودينها كده يجوزوكم بمعرفتهم بقى اللى بيعملوه الاهالى ده مبالغ فيه وحرام لان سواء انتى او هى او هى مش سلعه يا جماعه بيتاجر فيه ويشيل اللى بيدفع اكتر انتوا كده لغيتوا ادميتكم خالص وفى الاخر نرجع ونشتكى من قله الجواز وانتشار العنوسه واك واك واك واك كلام مش بيخلص يا جماعه يا بنات تحديدا اعرفوا المشكله فين وحلوها.والله الموفق

قلمى وطنى ماما فضيله

S H A H said...

Human Wolf
-------------
فعلا و الله موضوع المغالاة في المهر و المؤخر و الشبكة و الشقة , كل الحاجات دي بتعجز الشاب عن انه يتجوز

مع ان كل حاجة بتمشي و الله و ربنا بيسهل فيها اكتر من اي حاجة تانية

wanna b a bride said...

nesrelsharke

شكرا ليك و أهلا بيك على طول
---------------------
ساعد نسرين الأيمن

في التأني السلامة
و كل شئ نصيب
-------------------
meshfahem

نظرية هايلة بتؤكد وجهة نظري

يعني برضه طنط شكرية أونكل ديسكو من امامي و البحر من ورائي...أين المفر؟

الناس ماعادتش بتشوف يا فندم؟...نعمل ايه؟..النكد هو اللي سوقه ماشي
:)
تحياتي
--------------------
حمودي

هو نظرية بلا جواز بلا نيلة دي..هي خط الدفاع الأخير

بس لغاية لما نوصل لآخر لحظة

لسه فيه أمل

تحياتي

wanna b a bride said...

masrry metgharab

بجد؟..كريم بجد؟؟

تابعلي الموضوع ده و ليك الحلاوة
------------------
an angry one

مافيش كتاب

بس فيه عروسة
----------------

محمد فوزي آل ربيع

طب و مين اللي قاللك اني ماعملتش كل النصايح دي بحذافيرها

ده فيه طريقة والا اتنين لو دورت في أصولها تلاقيني انا اللي اخترعتهم

ماعدا حكاية التمريض دي..تفتكر؟

طب هاسأل كده...لازم الواحد ياخد بالأسباب
------------------
nouran

خليكي في المذاكرة يا عسل

بس نصيحة..مايتهيأليش هتنفعك..عن تجربة يعني
:)تحياتي
--------------
essam

عروستي
-----------------
fnan fa2eer

احنا عايوين نعمل جمعية و نشترية

ماهم تلاتين دولار برضه مش شوية
انتي فنان فقير و انا صيدلي أفقر

wanna b a bride said...

bosbos

طب هو فين بس الكتاب

هو حد كان لاقيه؟

تحياتي
-----------------
mo3taz

مشكلتكم انكم مابتصدقونيش

و بعدين تستغربوا

وانا من إمتى ضحكت عليكوا؟
--------------------
shah

لسه مفقود و جاري البحث عنه

و الست ام الأربع بنات

لاحس و لا خبر
----------------------
hana

القراريب اللي جابوه بيحرقوه بعد مايقروه

مافيش تضامن ..هو ده عيبنا
--------------------
sharm

بدون استخدام للكلمة دي

المسألة مسألة استغلال ظروف
و الأزمة حقيقية مش هزار
-------------------
tina

يارب شوية حظ

ماهو كل حاجة تانية مش نافعة

wanna b a bride said...

human wolf

احنا مابنخطفش حد قبل مانعاينه

يعني نخطفك عيمياني و ايش عرفنا يعني انك مش متجوز اتنين والا بتقلد فنانيين؟

و مهما عملت ..هتقع يعني هتقع..هتيجي واحدة أروبة كده من اللي اشتروا الكتاب و هاتطبق عليك كلامه

و ساعتها يا حلو هتطب زي الجميل كده ولااااا هتقدر تعترض

و بكره تقول برايد قالتلي

ياريت توصيلي صاحبك بتاع العراق ده يبعتلي مروحة
------------------------
westtewest

ماحدش بيتجوز غير مراته ..بس كلهم بيتجوزوا

لكن فيه واحدة مابتتجوزش لا جوزها ولا جوز غيرها

ربنا يستر
-----------------------
المهاجر

طب ياريت تكثفلنا الدعاء

مش بس طب...و صيدلة كمان

اهلا بيك
-------------------
samir

شكرا ليك..ده من ذوقك

بس ياريت الكلام ده بيفيد
------------------
geronimo

تخيل
------------------
abou basha

مانا قلت قبل كده

هو مش الجواز في حد ذاته

لكن على الأقل لأنه الوسيلةالوحيدة اللي نقدر نجيب بيها عيال

wanna b a bride said...

sendrella

شوفي الدعاء في بيتنا مابينقطعش

و من ناحية اللبس و الرقو و الحاجات دي

انا باعمل كل اللي في وسعي

لكن ربنا له المر من قبل و من بعد

و له في ذلك حكم

شكرا ليكي و لو عندك ادعية زيادة الإيميل فوق الساعة

تحياتي
-----------------------
human wolf

تمام الظروف الإقتصادية من أهم الأسباب

لكن مش بس البنات و اهلهم بيغالوا في الطلبات
الشباب كمان مواصفاتهم في الزوجة بتكون في أقصى درجات السطحية

المشكلة من الناحيتين

معقدة ...ربنا يحلها
----------------------
shah

و اللي عنده كل الإمكانات بيبيع و يشري في بنات الناس

العيب الرئيسي
قلة الأصل

Noony said...

طيب أعيط طيب ولا أصرخ ولا أضحك ولا أعمل اية؟
تعرفي..واحدة صاحبتي النهاردة كانت في ندوة وبتقولي ان القاعة كان فيها 2000 فرد...ثلاثة أرباعهم بنات والربع الباقي ولاد...الراجل بيسألهم مين فيكم متجوز..محدش رفع إيده..طيب مين فيكم خاطب..محدش برضه رفع إيده
لا ولد ولا بنت ولا صرصار أعمى كان معدي حتى

فين المشكلة يا ناااااااااااااااس
أنا اتجننت خلاااااااااااااص

نوني وهي بتشد في آخر شعرة عندها

Human Wolf said...

ممكن اقول حاجه كاتمه على نفسى ومش عارف اشد اكسجين بسببها بصوا من الاخر كده يا بنات وبعد اللى هقوله ده اللى هيطاول ويمد ايده او حتى يطول لسانه انا موقف شويه عيال بلطجيه بره المدونه مستنين صفاره واحده ويعملوا اقتحام فشر فريد شوقى فى فيلم رصيف نمره خمسه لما دخل الكباريه وهاتك يا ضرب فى ذكى رستم وتقريبا ده مكنش فيلم رصيف نمره خمسه ما علينا المهم محدش ليه دعوه بيه بعد ما اقول الكلام ده .
طبعا انا كشاب بمثل شباب كتيره قوى من ناحيه الاراء والتفكير ووجهات النظر والاهداف وغيره وغيره وبساطه كده ليه بعض الانتقادات والتعليقات على سلوك البنات وتصرفاتهم اليومين دول وده بصراحه بيخوف ناس كتيره قوى من الارتباط. انا والكثير من غيرى وباختلاف ترتيب الاولويات بنفضل ان البنت اللى احنا عاوزين نرتبط بيها ميكنش ليها علاقه قبل كده وعلاقه بمعنى ايه علشان بس فى نفوس شريره هنا هتفسر الكلام على حسب دماغهم هما ويحالوا الاطاحه بى ولكن من مكانى هذا بقولهم هيهات كانوا غيركم اشطر انا مش بقصد انها عمرها ما كلمت ولد لا انا اقصد مفيش بينها وبين اى علاقه مريبه لانه يا بنات لازم تتفقوا معايا فى ان اى علاقه بره القرابه او الزماله سواء عمل او دراسه يطلق عليها عليها علاقه مريبه مش انا اللى بقول كده اعتقد انه دينيا حرام ولو حد عنده اعتراض يطل كده ذى الشاطر يورينى نفسه ويقولى لا مش حرام اعتقد انه الحلال بين والحرام بين. ده كان بالنسبه لاهم الشروط اللى الواحد بيفضل تواجدها فى الانسانه اللى هيرتبط بها. بالنسبه بقى لموضوع السلوكيات والتصرفات فهنقدر نحكم على السلوكيات من خلال لبس البنات اليومين دول مهو الموضوع بقى اوفر الصراحه لما نلاقى البنات لابسه استومك وكات وبنطون جينز لو لبسته لنمله هتقولى ايه البنطلون الضيق ده مش راضى يدخل يا مان مش عارف هما الصراحه بيلبسوه ازاى وبالنسبه ليها مفيش فرق بين ولد وبنت تتكلم مع الولد ذى ما البنت نفس التهريج ونفس نوعيه الهزار اللى ممكن يكون خادش للحياء بالنسبه لاى ناس اخرى طبعيين يعنى لما نلاقى البنت بتعمل كده يبقى الواحد هيقدم رجل وياخر تلاته واربعين رجل على اساس ان احنا ام اربعه واربعين وكده ولما يكون الهزار من غير حدود وبتجاوزات اعتقد ان الكلام ده كله يقلق ولا ايه ده بالاضافات الى العلاقات اللى من خلالها بيبرروا بيها الغلط وفى الاخر برضه احب يعنى اوضحلكم حاجه معظم الشباب بترفض الزواج من بنات مشيت معاهم قبل كده معرفش يمكن انتوا متعرفوش كده بما انكم الضحايه بس انا اعرف كده بما انى احد الذئاب ولمؤاخذه يعنى المهم يا جماعه علشان انا طولت عليكم قوى وبدات اجوع واعطش وعاوز البى نداء الطبيعه فلازم موضوع الاخلاقيات فى التعامل وبينا وبين نفسنا حتى يكون فيه وقفه انا لا اعمم الكلام ده على كل البنات فى بنات فى غايه الادب والاحترام وكتير بس للاسف مش هما الاغلبيه وخلوا بالكم البنات دى برضه بتظلمكم لانى لو شفت واحده واتنين وتلاته مثلا حاولت الارتباط بيهم ووجدت ان اخلاقهم غير سويه هجى عند الرابعه واشك فيها حتى من غير ما اعرفها يبقى فى حاجات كتيره قوى لازم تتغير فيكم اهما علاقه البنت بالولد والله دى اول حاجه الشاب اللى عاوز يتجوز بيبصلها بعد كده الطباع اللى بيفضلها الواحد لازم تكون يا جماعه البنت بتراعى ربنا لانها بالتالى هتراعى جوزها والهدوء والبساطه والدم الخفيف والروح الجميله والرقه الحاجات دى قربت انها تختفى خالص يا جماعه فاضلها شويه وهتنقرض ذى الديناصورات ونمسع عنها فى الافلام وفى كتب التاريخ بس انا مش بقولكم كده علشان تتظاهروا بالحاجات دى قدام الولاد لا حاولوا من جواكم تتغيروا الكلام ده مش للبنات كلهاانا بقصد البنات اللى اتكلمت عليها فى الاول حتى لا تختلط الامور اللى شايفه انها محترمه وبتراعى ربنا واخلاقها كويسه يبقى ملهاش دعوه بقى باى حاجه من اللى انا قولته راعوا ربنا التزموا شويه وشوفوا ايه النتيجه هتلاقوها باذن الله مهبره لان موضوع قله الزواج ده اعتقد انه ابتلاء ده حتى اللى ظروفهم كويسه برضه مش بيتجوزا يا جماعه يبقى الموضوع فى حاجه احنا مش واخدين بالنا منها والله المستعان

حسن توفيق said...

الاخت العزيزة الغالية
اسمحى لى ان اعلق على العنوان فقط حيث انها الزيارة الاولى لى لهذه المدونة الرائعةةوباذن الله لن تكون الاخيرة
بالنسبة للاجابة على سؤال كيف تصطادين عريس
احنا اساسا عيزين نتصاد مش هتلاقى مشكلة من غير سنارة او طعم
الفاضلة الغالية
لقد استخرت الله وقررت الترشح لعضوية هيئة اتحاد المدونين العرب فاطمع فى زيارة لمدونتى المتواضعة والاطلاع على مابها من موضوعات واخرها يوميات ملاحظ فى الثانوية للحكم على ان كنت استحق دعمك ام لا وفى كل الاحوال لك كل الشكر والى لقاء اخر ان شاء الله لك كل التحية والتقدير

Anonymous said...

bride, u r unbelievably funny and have beautiful spirit, however u never told us what is it that u need in a man?! and how u evaluate ur self! i think that might
help. . $30 dollars ya bride!!!
people got married for that much in the old days!!!
admirer from dc

أمـــاني said...

دمك زي السكر...يابنتى إنتي خساره في ناس كتير
:)

elzain said...

السلام!
اييييييييه الكتاب نزل عندنا بالكويت و كانوا حاطين اعلان بالجريده و طالبين موزعين!!

صراحه شي يضحك.. يا برايد خلي ال 30 دولار بالجيب و روحي اشتريلك فيهم حاجه تلبسيها ولا لماما و لا روحوا اتفسحوا فيها كلكم بلا كتاب بلا بطيخ

امي دايما تقول: المزوج بالسما.. يعني اللي بيده كل الامور بالسماء و متى ما قال كن فيكن.. و نصيبك حييجي بس انتي استني شويه.. ما كلنا سيم سيم و مستنييين لحد ما نقابل سي السيد ده..

سؤال واحد :هل المكتوب هنا و القصص كلها احداث واقعيه؟؟؟

hamed said...

الحكاية مش بالكتب الموضوع فى البلد اللى حالها واقف والناس فيها قربوا يكلوا بعض .... على فكرة انتى مش لوحدك فى ملايين البنات اللى ذيك ومش البنات بس فى شباب كتيرة جدا نفسها تتجوز مش عارفة ومقدمهاش غير الصبر واللى مبيصبرش بيشرب مخدرات عشان ميفكرش فى حالة ..... واهى عيشة والسلام

angle_bero said...

اولا انتى زى العسل
ثانيا كتب ايه اللى بتتلمى عنها ده ربنا عظم كيد النسا تفتكرى ان فى راجل يقدر يقف قدام كيد اى انثى؟
انا معتقدتش
بس عمومااعملى زيى وسيبيها على الله ان شاء الله فرجه قريب
وبحييكى على المدونه كلها
تحياتى

مستشار نسرين الاكبر ساعد نسرين الأيمن سابقا said...

كل شئ قسمة ونصيب
يعني انتي كل ده كنتي بتضحكي عليا
بتخدعني
طيب وحياة كل كلمة قولتها
انا هاسافر واشتهر وانجح
وهابقي اشهر من محمد محي
فاهمة ؟
هابقي اشهر من محمد محي
وهارجع وهتندمي يا سعاد

فى القلب said...

واللهى أنتو يا بنات عليكو حركات
تفضلو تصيحو عيزين عريس ولما يجى
لاء ده معندوش حتى عربيه نص عمر الشبكه
قليله أوى لأدخله مش عجبنى
يعنى النوعيه دى مش رجاله زى الفل وكتير
النوع ألى أنتو عيزينه هو ألى فيه أزمه

e7na said...

التعليق رقم 100
انا يظهر سعيد الحظ
انت عملتى دعايه للكتاب يا برايد

AoLaAoL said...

صدئينى يا آمال الكوتاب مش حتلاقى فيه حاجه...بس بينى وبينك برضه الفضول لا سامحه الله بيعمل عمايله وبعدين برضه تثقف....وبعدين سعد الصغير حياخد نوبل وسحقا للحاقدين..وغلاوتك لو خد حتى جايزة الكتكوت المشمشى لأنتحر...لو لقيت الكتاب ده بالطرق الخلفية الملتوية حنزله على النت
بس احم احم اشتراك الدخول للقرايه خمسه دولار...حتيجى عليا نيهاهاها ضحكة شريرة

Anonymous said...

بقوللك ايه لو سمحتيلي يعني ...ولو مفيهاش رزالة ولا تباتة ولا غلاسة ولا غتاتة ... هوا يعني ،، بس يعني ،، ااقصد يعني ... الكتاب ده ... اللي هوه يعني ... بتقوللي عليه ده،،، اللي هوا غالي مووت واللي اشاسا مش موجود ،، يعني بيتباع فين؟
ميمي
http://mimayaa.blogspot.com/

ftataljanna said...

وحشتيني بجد

بجد وحشتيني مش عارفه مستنيا لك حاجة هو يعني مش بتكتبى غير بعريس اكتبى لنا اى حاجة كده طمنينا عليكي

Vampire said...

ازيك يا جميل


البوست ده تحفه مووووت

ياريت تيجي تشرفي مداونتي

S H A H said...

مودموزيل برايد الجميلة
=====================
عايزك تركزي معايا كويس في اللي هقوله دلوقتي و يرجى الرد في اقرب فرصة سواء بالقبول او الرفض
---------------------------
طالما ان فكرة الزواج و توفيق راسين في الحلال هيا فكرة حلال شرعا مليون في المية

ايه رأيك نعمل مدونة و تعيني فيها مشرفين بمعرفتك
ويكون عملها استقبال سي في الراغبين في الزواج ويبقى الموضوع جد مش زي المواقع اللي بتسوق

و مش كل سي في يتقبل لازم يبقى تحت شروط معينة يعني منحسش بتهريج في الموضوع

و يبقى في كل البيانات من اول البرج لغاية نوع الشراب بتاعه

و اكيد هتلاقي 2 لايقين على بعض
مين عالم تبقى عروستي او البنت اللي بحلم بيها تكون بتكتب عندي في مدونتي و انا لا اعرف انها مش مرتبطة

خصوصا ان البنات مش سهل تتقبل الموضوع كدة الا لما تحس فيه جه بتشرف و تراقب و كدة

ايه رأيك يا برايد
و نكلف احد الاخوة المصممين بتصميم مدونة بطريقة عرض معينة او حتى سايت للموضوع ده و السايت تكلفته عليا انا يا ستي

بس اتجوز بس :)))))

و الله لو اتعمل صح هتكسبي من وراه ثواب كتير ان شاء الله

مستني ردك

و سلام مؤقت

shams said...

تعرفي ان دمك خفيف جدا و انا شخصيا فرحت اني زرت مدونتك

S H A H said...

انتي فين ده انا بفكر ارد على الكومنات دي بدالك

انسان said...

الغاليه برايد انا من اشد المعجبين جدا بكتاباتك وبدمك العسل والله الشباب فى مصر مابيفهموا شئ معقول عسوله مثلك لدلوقتى ماتتجوز ده كفايه خفه دمك وثقافتك واسلوب كلامك الرائع المهم مش هطول لحسن تتغرى علينا وتبطلى تكتبى وتسعدينا ببسمه بتنور يومى كله اصلى بصراحه مدمن قراءه مدونتك وهى اول شئ بفتحها اول مااصحى الصبح ولو كنتى كاتبه فيها شئ جديد بيكون يومى كله سعاده
ثانيا اسف على التاخير فى التعليق على مدونتك وده بسبب انى لااستطيع الحكم على الناس بسهوله ولذلك كان لابد انى اخذ فتره اقراءه فيها كل اللى تكتبيه قبل ماارد
انا فكرت اشارك بفكره فى كيف تحصلين على عريس لكن بشرط انك تساعدينى انتى فى معلومات عن كيف الحصول على زوجه وانت فى الغربه
المهم انا لقيت ان افضل من انى اقعد اكتبلك فى نصائح عارف انها اكيد هتودى فى داهيه للانها لو كانت مفيده كانت نفعت معايا قلت ليه ماافكرشى ارتبط بيكى احسن وفعلا ادرجت الموضوع فى جدول اعمالى واحسب الموضوع بحكمه لحسن تحطينى انتى فى جدول الضرب بتاعك
يلا باى فى رعايه الله برايد واتمنى دائما الخير والسعاده لك

Anonymous said...

أولا في موضوع العريس ربنا بيقول: وليستعفف الذين لا يجدون نكاحا حتى يغنيهم الله من فضله، هذا كان في حق الرجال، لكن يجوز ان يكون في حق النساء أيضا..
ثانيا، سيدتي الدعاء سهم من سهام القدر وصدقيني هو مجرب وقد جربته وتزوجت من أحب بعد قصة حب، كان محكوم عليها بالفشل..
nonono_yesyes@yahoo.com

Anonymous said...

القارئة bella
بصي انا معاكي ان الدرر المكنونة مش بتقف علي النواصي بس تأكدي ان اللي بيعاكس اللي بيقفوا علي النواصي لما بيفكر في الجواز بيدور علي الدرر المكنونة دول يعني هما اللي بيكسبوا في الأول والأخر
اما القارئة همسة قلم فأنا عايز اقول انا انا مختلف تماما مع الكلام اللي الشيخ دة بيقولوا الأية الكريمة تقول
( ازفت الأزفة ليس لها من دون الله كاشفة ) هي تتحدث عن يوم القيامة وذاك الموقف العصيب الذي سوف يقف الناس فيه فما علاقة ذاك بالزواج ثم ان الله لا يحتاج لدعاء معين المفروض ندعي باللي في قلبنا ولا نتقعر في الدعء ولا حتي نتكلف في الكلام
اما بخصوص الكتاب فلو الموضوع دة صح طبعا فدي نصباية كبيرة كل شيء قسمة ونصيب نقوم في وقت السحر قبل الفجر وندعي ربنا وهو سيستجيب
وربنا يوفقنا جميعل لما يحب ويرضي

Anonymous said...

طاب يا جماعة انا شاب عريس وبدرور عن عروسة
ماعندكوش واحدة :)

Anonymous said...

مبرووووووك على الكتاب انشاء يطلع روعه انتى لذيذه اوى وانا حبيتك كتير

Anonymous said...

انت بجد عسل انا معجبه باسلوبك جدا ربنا يعدهالى ويعدلهالك

mody said...

مرحبا ياست البنات
انا مودى من القاهرة محتاج شوية مساعدة منك
انا عملت مدونة جديدة ودى أول مرة أعمل فيها مدونة وسميتها مش عايز اتجوز
مشكلتى انى شوية محتاج مساعدة علشان اكمل شغلى فيها
فيا ترى هاتساعدينى ولا
مودى
مع اطيب تمنياتى لك بالنجاح فى مدونتك الجميلة

Anonymous said...

{ وقلت استغفروا ربكم انه كان غفارا ,, يرسل السمااااء عليكم مدرارا ,, ويمددكم بأموال وبنين ويجعل لكم جنات ويجعل لكم أنهارا }

Anonymous said...

يا برايد يا حبيبتى انا كمان اسمى غاده بس الفراق انى متجوزه من 11 سنه مع العلم انه عندى 29 سنه وبقولك بعلو الصووووووووووووووت انا بحسدك انك لسه بدون مسؤليه وصدقبنى عن تجربه الى انتى فيه احسن مليون مره من الجواز احسن من انك تكونى مجبره ان تتحملى ضغوط الحياه من انسان كنتى فاكره انه المناسب ولكنك بعد ما اديستى فيه وفى الاولاد انه مينفعش لا يكون زوج ولا اب زى ما كنتى بتحلمى وفى نفس الوقت مجبره تكملى لاخر العمر يبقى الى انتى فيه احسن وبعدين الجواز ده نصيب وكل بنى ادم فى الدنيا دى ربنا بيديله نصيبه كامل ما يمكن ربنا ماخرك لانسان احسن من الاشخاص الى قابلتيهم طول حياتك