Wednesday, April 16, 2008

آااااااااااااااخر مرة




غالبا آخر مرة يكون فيها توقيع او مناقشة للكتاب



مناقشة للكتاب في مكتبة دار الشروق بالكوربة



الثلاثاء 22 أبريل الساعة 7



مكتبة دار الشروق-مصر الجديدة-15 شارع بغداد-الكوربة




-------------------------------------------------------------------------------------------------


ملاحيظ سريعة


الكتاب للي بيسألوا موجود دلوقتي في الخليج ..العزيز "أكتب بالرصاص" قاللي إنه إشتراه من كارفور في أبو ظبي و فيه ناس إشترته من معرض الكتاب في مسقط فغالبا هيكون موجود في بقية دول الخليج ..عشان تعرفوا أماكن التوزيع




شكر لـ "لبنى بكر" عشان عملت ل برايد فانز جروب على الفيس بوك بالإضافة لصفحة محبي المدونة اللي عاملها "محمد الشافعي"




الظروف في المحلة الفترة اللي فاتت زي مانتوا عارفين..النت ماكانش متوفر دايما ولا النفس كمان...لكن أنا و العيلة بخير و الحمدلله...شكرا للي سألوا و حبوا يطمئنوا عليا مهندس مصري و نيفين عيد و جوي و غيرهم..أدام الله الود



التعليقات مقفولة حاليا و إن شاء الله هتتفتح مع الموضوع الجديد الأسبوع ده إن شاء الله

Thursday, April 03, 2008

عارفة إني هانضرب

عارفة إني هانضرب عشان انتوا مستنيين أقولكم إيه اللي حصل مع سلفتي المستقبلية زوزن و العريس اللي جايباه


و الله هحكيلكم كل التفاصيل..ده طلع موضوع...حلو بأه وحش آدي إنتوا هتشوفوا و تحكموا


كتير منكم لاموني عشان ضيعت "هيثم" من إيدي..بس خلاص بأه هو انا هحارب في كل الجبهات..نيفين في الشغل و زوزن في محيط المعارف و "الأصدقاء" و كمان الباشمهندسة نيرمين في العمارة؟..انا مش حمل كل ده


على فكرة


فيه مقال جميل عن المدونة
إتكتب في موقع جريدة- لوس أنجيليس تايمز


آه و النعمة


فرحت بيه قوي فقلت أفرحكم معايا
خدوا اللينك أهه





و ماتنسوش إن فيه حفلة توقيع و مناقشة للكتاب في مكتبة دار الشروق اللي في سيتي ستارز (الدور الأول محل رقم 1250) ..يوم الثلاثاء الجاي 8/4


الساعة 7
----------------------------------------------------------
تحديث


يوم الأحد 13 أبريل الساعة 4:30


في برنامج "شبابيك"على قناة


دريم

Saturday, March 22, 2008

الحادي عشر

بس يا جماعة..داخلة أنا بأه الشقة و ألاقيلكم منظر يقطع القلب ..ماما محاصرة بين طنط حشرية و زوزن و عينيها زايغة و نفسها مقطوع ..وطنط حشرية بتبصلي و وشها مشرق كده و متفاءله..الست دي احنا مش لسه مدألجنها و قاطعين معاها العلاقات و ساحبين السفير من كام أسبوع..ده حتى شعبولا لسه عامل عن الموقف التاريخي ده أغنية بتتذاع في قناة مولتي كل نص ساعة..إيه مافيش عندها من الاحمر ده خالص؟..شيء غريب و الله..بس مش ده اللي استغربتله اللي استغربته بجد هي البت زوزن..البت قاعدة و حاطة رجل على رجل و على وشها ابتسامة و في عينيها فرحة ماطمنتلهاش..الفرحة اللي في العيون دي بتجيبلي حساسية..فرحانين على إيه دول؟..فيه إيه اللي يفرح يعني..إلا إذا..إلا إذا..و كانت الكلمات القاسية و ضربة القدر العنيفة فوق أم رأسي ..و أم رأس أمي كمان..


مش تيجي يا برايد تباركي لسوسن..سوسن خلاص هتتخطب


تاراتا تارارا..تاراتا تارارااااا...
أتاري ماما قاعدة زي أم هنادي اللي خدها الوبا يا خال


و دي كانت أول مرة أعرف معنى كلمة رقبتها بقت أد السمسمة..ماما يا عيني رقبتها إختفت ..دماغها كأنها متركبة قلاووظ بين كتافها على طول و دقنها قربت تلتحم بقفصها الصدري خلاص..و عشان تقدروا وقع الصدمة على ماما لازم تعرفوا حالتها النفسية في الكام شهر اللي فاتوا..الست خلاص بقت على شعرة و ماشية تكلم نفسها في البيت.. و بتستشير أي حد في المشكلة العويصة دي..اللي بقت أصعب من مشكلة طوابير العيش ..أي حد أو أي حاجة

مرة لقيتها فاتحة التلاجة وبتتكلم مع علبة اللبن
يعني لو جه عريس دلوقت نقبله و خلاص و الا نستنى حد كويس..طب لو استنينى نستنى أد إيه؟


شوية و ألاقيها فاتحة فرن البوتاجاز
يعني رأيك كده؟...نستنى؟..و الله إنت نصايحك كلها محروقة و رأيك ناقص سوى


بس اللي قلقني فعلا يوم ماقالتلي هننفض السجادة و بعد ماشلتها على قلبي و طلعتها فوق السطوح ونزلت أشوف إتأخرت ليه و لقيتها ماسكة المنفضة و نازلة هبد في البلاط
طب ماقلتش كده من زمان لييييه..كنا خلصنا من بدري


و ده كله نتيجة منطقية و حتمية و طبيعية لحملات الضغط النفسي و المعنوي اللي بتمارس علينا أنا و هي و احنا طالعين سلالم العمارة اللي بقت مناطق حظر تجول و بقينا بنعدي فيها على طراطيف صوابعنا ولا اجدع راقصات في بالية بحيرة البرلس الشهير


خلاص الناس أكلت وشنا و داخلين على قفانا ..كل يومين عريس يتدألج على السلم و الأخ تويتي ده اللي وقف و فضحنا في وسط السلم (أنظر العريس التاسع في الكتاب اللي لسه ماشتريتهوش لحد دلوقتي يا بيه)..حتى التعاطف اللي كنت باحسه منهم زمان ذهب أدراج الرياح (عادي بتحصل)..ماهو لما كل واحد من جيرانك ال13 يجيبلك عريس و ترفضيه بيتحول السلم كله لحقل ألغام .وواحدة واحدة اتحولت "لسه؟" اللي كانوا بيقولوهالي من كلمة لسه..لكلمة ..لس..لكلمة ..إلللللل..اللي هو حرف اللام مع إخراج اللسان بأطوال تتراوح بين 5 سنتي و نص متر و كل واحد حسب مقدار خنقته و طول لسانة


حتى اللي لسه بيمثل انه متعاطف لازم يختم الحديث بجملة من الفن الشعبي غالبا بتخلينا عايزين نولع في روحنا
هو انتي يا حبيبتي خلاص..ماعادش بيجيلك عرسان؟
لأ يا طنط بيجوا بس معظمهم مش كويسين
آااه..ماهي اللي ما تعرفش ترقص ..تقول الأرض عوجة



انتي يا حبيبتي خلاص؟
خلاص إيه تاني يا طنط؟
خلاص بقوا العرسان يرفضوكي والا لسه بترفضي؟
لأ يا طنط من ده على ده ..بارفض و اترفض يعني عادي
آااه..ما اللى يعمل نفسه رده تنكشه الفراخ



حتى آخر مرة و أنا رايحة الشغل و واحدة فيهم كانت مشغولة و بتدي الزبالة ل "هيثم"الزبال بتاع المنطقة ..لقيتها بتمصمص شفايفها و هي بتقول
ربنا يعدل المعووج
قام هيثم و إيمانا منه بضرورة تكاتف قوى الشعب العاملة و بالأصالة عن نفسه و بالنيابة عن فئة الزبالين المتعلمين قرر إنه يشارك في الحملة الوطنية لتعريف برايد بمقامها و راح قايل
بكرة اللي فى الحلة تطلعه المغرفة

(إيه العمارة البيئة اللي انا عايشة فيها دي؟)


بس أنا مازعلتش من "هيثم" عشان عارفة انه مجروح من ساعة ما رفضته لما اتقدملي بعد ماشاف فيلم "إنتبهوا أيها السادة مصر ترجع إلى الخلف" و افتكر نفسه محمود يس و افتكرني ناهد شريف (فيه الخير برضه بس ربنا يستر و مايتفرجش قريب على الرصاصة لا تزال في جيبي و يفتكرني محيي إسماعيل)..و أنا رغم إعجابي بشياكته (بييجي ياخد الزبالة و هو لابس فيرساتشي و عامل شعرة سابايكي و دايما إيده في جيبه) و رغم إن الواد كسيب (عنده عربية بيئة مصرية
اللي هي
B.M
(بس موديل قديم


لكن عرق الليبرالية و البروليتارية اللي جوايا اتخانق مع عرق البرجوازية و السفسطائية و الإمبريالية الحرة المتشددة و في الآخر اضطريت آسفة إني أرفضه (إفتحوا أي قاموس و ترجموا إنتم ..مش فاضية أشرحلكم)..فالواد إتقهر و حز في نفسيته..عشان كده كل اما ييجي ياخد الزبالة من عندنا و كنت أعدي قدام الباب كان بيبصلي و بياخد نفس عميق و يصرخ بأعلى صوته


زباااااااااالاااااااااااااه


أنا طبعا ماكنتش باخدها على نفسي خااالص مانتوا عارفين قلبي طيب أد إيه و قعدت أدعيله أدعيله لغاية ربنا مارزقه بخطيبته الباشمهندسة نيرمين
نرجع بأة من ذكريات معركة السلم مارس 2008 لطنط حشرية و زوزن
..حصلت؟...حصلت؟...حتى زوزن؟..يعني الأول نهى ..و دلوقتي زوزن؟...رجلي مابقتش شايلاني و اترميت على أول كرسي لقيته و ماما إنطلقت ناحيتي من آخر الصالة و هي بتطوح..ميت مرة أقولها بلاش تشرب حاجة أصفره..بس بتموت في الحلبة أعملها إيه؟
حطت إيديها على كتفي و راسها على راسي و اتفتحنا في العياط


عاااااااااااااااازوزن يا ماما؟..زوزن؟
عارفة يا حبيبتي ..عارفة
دي شكلها..دي طولها...دي عرضها..دي ..دي..دي بنت طنط حشرية..هو فيه حد يتجوز بنت طنط حشرية؟
يبقى عبيط و مابيفهمش..و ده بأه مانزعلش عليه



طنط حشرية قال إيه جت تحضنا هي كمان..الست دي بقت ولا جمهور الزمالك مابتتأثرش بأي صدمات
شوفتي يا زوزن شوفتي مش قلتلك هيفرحولك ..شوفي دموع الفرح

شوفت يا ماما شوفت..عرفتي بأه يا برايد إن كل شيء نصيب ..مع إني ماكنتش ناوية أتجوز دلوقتي خااالص..بس ..تخيلي ان العريس ده كان مصمم ..مصمم يتجوز دكتورة و تكون فوق ال25..لكن إيه ماما قدرت تقنعه و الحمدلله قرينا الفاتحة إمبارح



سيبيني سيبيني
و احاول أفلفص عشان أبطحها و ماما ماسكة فيا و طنط حشرية عاملالي لمس أكتاف في الحيطة ..لغاية أخيرا ما تحررت من قبضتهم
لأ بأه هو انا خيخة والا إيه
بس يا بنتي بلاش فضايح
فضايح إيه يا ماما الناس دول لازم..لازم
ماقلتكيش إحنا جايين ليه يا بربر..ده أخوه بيدور على عروسة
لازم يتغدوا معانا النهاردة ..امال إيه..يا للا يا ماما قومي اسلقي دكر البط اللي جوه هي طنط حشرية دي شوية والا زوزن بتيجي عندنا كل يوم؟ ياللا يا ماما إعمليلك همه أمال
لأ و شوفي النصيب يا برايد..هنبقى سلايف
يادي النيلة..كمان هابقى أنا و زوزن سلايف؟ طب و حياة عقل ماما اللي قرب يفوت ليكون ليكي نصيب من قبضة سلايف النينجا..يا دي الهم ..ياللا أديني هاسد مناخيري و اغمض عينيا و ابلعه و خلاص..على الأقل إتقاءا لشماتة هيثم فيا
ماما يا عيني فاقت من الإغماءة اللي كانت فيها
يعني يا حشرية يعني..هو كويس؟

كويس؟..ده طول و عرض و مافيهوش غلطة ده حتى فيه شبه من توفيق جوزي الله يرحمه..و النبي لو كان صغير شوية كنت إتجوزته أنا
الله يرحمك يا أونكل توفيق..و الله كنت راجل..فديت الجيل بتاعك كله ..الجنة و نعيمها يا اونكل و الله

بصي ياحبيبتي هما كانوا عايزين يشوفوكي في البيت هنا بس أنا قلتلهم نتقابل بره
إيه رأييييك؟



أجيبها يمين أجيبها شمال..مش لاقية سبب للي طنط حشرية هي و زوزن بيعملوه
طب لو هو زي اللي قبله يبقى هتجوز زوزن أخوه ليه؟
طب لو هو كويس..يبقى تجيبهولي ليه؟
تفتكروا ظلمتها..تفتكروا الست بتحاول و انا اللي بافتري عليها؟؟


تفتكروا؟



بكره نشوف

------------------------------------------------------------------------
شكر من الأعماق ل "محمدعودة" اللي تكرم و عمل للمدونة صفحة على ويكيبيديا ..


وأكررشكري..يا حالوللي و بقينا على ويكيبيديا كمان


:))

Sunday, March 16, 2008

على الهوا

الأحد على القناة التانية


حفلتين..بنجاح عظيم


من 5 لـ 6


ثم 10:30


البيت بيتك



إحجز مقدما

Saturday, March 01, 2008

حازي يا بنت..حااازي

و بعدين انا داخلة الصيدلية الصبح لا بيا ولا عليا ألاقيلكم شوية مناظر غريبة الشكل..مين دول؟..ركزت شوية و بحلقت و بقللت عينيا ..إيييه ده؟ البنات شكلها مزهزه كده و الصيدلية على سنجة عشرة ..ده حتى العيانين على غير العادة شكلهم جايين غاسلين وشهم ..عرررق نظرية المؤااامرة بدأ ينقح في نفوخي و مستقبلات دقات الندالة اتفتحت في جميع أنحاء مخي...يمكن تفتيش؟..يمكن؟..لااااا ده مايفسرش كميات الماكياج المهولة اللي محطوطة على الوشوش ..دي لو اتجمعت كلها تطلعلها 2 طن ..دا البنات قربوا يطلعلهم أتب في ضهورهم من تقل اللي محطوط على وشوشهم..لأ لأ..فيه مؤامرة تحاك في الظلام خلف ظهري..و أنا لما اتكلم نحوي (على أساسا ان ده نحوي يعني) تعرفوا ان الخطب جلل(حلوة مش كده؟)..إتمشيت شوية في الصيدلية كل اما عيني تيجي في عين واحدة تبعد راسها بعيد و تعمل إن حاجة وقعت منها تحت المكتب و تنزل و تغيب..أقوم أبص عليها ألاقيها مستربعة ع الأرض و مطلعة الروج و الأيلاينر و شغااالة


طب مابدهاش بأه..طلعت أنا كمان أدوات الكفاح و إبتديت مشوار التظبيط و انتوا عارفين مشوار التظبيط يبتدي بنقطة..أيلاينر بأه .آي شادو..أهو اللي يقدرني عليه ربنا..مش فاهمه حاجة آه..لكن مش هابقى أنا الكلوب المطفي وسطيهم يعني


شوية و لقيتلكم المديرة بتاعتي داخلة و جره وراها واحدة شكلها ماريحنيش..آااااااه...فهمت فهمت..دي شكلها أم عريس..أيوة أيوة هما بيبانوا..تلاقي الست كده مستحمية ولابسه اللي ع الحبل و حاطة فاترينة دهب في أي مكان يسمح بده. .او مايسمحش.. عشان تزغلل عينينا و تتمنظر على اللي خلفونا..ماعلينا ..بس الست شكلها حلو كده و أرستكراطي(آه بالكاف..شوية رقة دي أم عريس)..فاضلها القميص البنبي أبو ريش و تبقى حتة من رجاء الجداوي في فيلم "في بيتنا رجل" ..كانت تحفة في الفيلم ده..سيبت أنا كل التفاصيل دي ..ماتهمنيش..وركزت في الجزمة دي..يا جدعان مش باشتمها..لسه المرحلة دي قدام..انا قصدي جزمة ام العريس.. سيبكوا بأه من الناس اللي بيقولولكم الراجل بيبان من جزمته..ماتصدقوش..من خلال خبرتي الحياتية الطويييييلة ..أحب أقولكم إن الراجل بيبان من جزمة أمه..جربوها كده و هتلاقوها طريقة ماتخرش الورنيش


الست قعدت هي و المديرة و احنا ماتعرفوناش..ماتعرفوناش حقيقي يعني..سبحان الله ..كل قوانين الفيزيا و الأحياء و الوراثة و حتى الجنح بتتكسر في اللحظة دي..الوشوش القديمة بتتطبق و تتفرش وجوه جديدة لانج..اللي عينيها بتوسع و اللي بقها بيصغر و اللي بتبيض..بيصعبوا عليا قوي الرجالة تاني يوم الجواز..يوم الصباحية بعد العروسة مابتغسل وشها..إحنا عندنا عنبر جلطات كامل في المستشفى لضحايا الموضوع ده..ماعلينا..المهم بدأت المديرة تتكلم


صباح الخير يا بنات..أعرفكم بمدام سعاد..هي..أأأ..هاتسألكم على حاجة كده..بخصوص الأدوية


و في ثواني كان طابور العرض مصفوف..انا في الأول كرامتي وجعتني..بأه أنا على آخر الزمن أقف مرصوصة كده في طابور ولا طابور الجمعية..بس اشمعنى أنا يعني..و انا أقعد كده و أسيب العيال ياكلوا الجو..قومت و جريت و أخدت مكاني..عادي يعني أنا مافيش في دماغي حاجة أنا قلت بس مشاركة و جدانية يعني..و بعدين طابور العرض ده مش جديد يعني..ياما حصل و ياما هيحصل ..و بعدين ده شئ مهم جدا في حياة البنات زيه زي كشف الهيئة في الكليات العسكرية يا إما يركبك طيارة و تطلع للسما يا إما يركبك توك توك و تتكل على بيتكم


أيوة يا طونط..أي خدمة؟
أؤمري حضرتك ..عايزة تسألي عن إيه؟
قطن..شاش..ميكروكروم؟
قلب..سكر..كبد..مخ..طحال..اللي يعجبك؟


الست لفت عينيها في وشوشنا شوية كده و سألتنا بطريقة ماما سامية في برنامج الأطفال الهادف عروستي
مين فيكوا يا حلوين بتعرف تعمل بصارااااه؟


بصينا لبعض بامتعاض مشوب بالإستنكار
بصارة؟


و فجأة كل واحدة رجعت لقواعدها و كل الوشوش رجعت لقوالبها
بصارة؟..أخرتها بصارة؟
لا يا خالتي غلطتي في العنوان
ده يا ماما مش قسم البصارة ..إحنا تخصص عدس بجبة


كلهم أخدوا الموضوع وش كده ورجعوا أماكنهم إلا أنا و نيفين(غريمتي الجديدة و اللي أخدت مكان نهى)..أنا شخصيا ماهضمتهاش..إزاي يعني؟..لألأ ..الموضوع فيه إنه ..الست جزمتها بتلمع و زي الفل..دي مش جزمة واحدة تسأل عن البصارة لأ..الصوت كده مش راكب ع الصورة
..ده مش منظر واحدة ميح و لا حتى جلدة..برضه نيفين واقفة جنبي في الطابور اللي ماعادش فيه غيري أنا و هي..واقفة و هي تزوي مابين حاجبيها(أنا مالي ..دي هي)..و فجأة لقيت البت عينيها نورت زي ماتكون الأخ نيوتن ووقعت فوق راسها تفاحة..و فجأة سمعت صوت غريب بيخرج من بقها ..أرق صوت سمعتوه في حياتكم مايجيش جنبه حاجة و قالت و هي بتمسك إيديها ببعض قدامها زي فيروز في فيلم "معانا ريال"
يعني إيه يا طونط بصارة؟


الست فجأة وقفت و في عينيها فرحة زي ماتكون كسبت عمرة من إيريال


إنتي يا حبيبتشي ماتعرفيش يعني إيه بصارة؟..تبقي بنت عز..هي دي ..هي دي اللي أنا عايزاها
يا بنت اللععععييييبة؟


البنات كلهم لفوا و على وشهم تعبير كأنهم لسه شاريين إزازة زيت من أم 10 جنيه إلا ربع
يخرب بييييييتك


الست صحيح أروبة ..بس عادي يعني دي حماة و الحموات مرفوع عنهم القلم..لكن البت نيفين يطلع منها كل ده؟..دي أكيد دمها فيه كرات بيضا و كرات حمرا و صفائح دموية مليانة كهن على أخرها..الست ماصدقت وراحت واخدة البنت تحت باطها و خارجين و احنا واقفين نبص لبعض و سامعينها بتسألها
و انتي يا حبيبتي دفعة كام؟


ترد عليها المضروبة بصوت سوسن بدر في سلام يا صاحبي (رقة رقة يعني)
2006


كمان..طب و ديني لأنا مبلغة دفعة 99 كلها تيجي تقيم عليكي الحد


الكل قعد في مكانه و بيبصوا لبعض و هما مش مستوعبين
لكن أنا تكالبت على جراحي (مش باقولكم الموضوع كبير)..و طلعت في الخفاء أجندتي السماوي (سماوي من لونها و على أساس يبقى منها لباب السما) و كتبت فيا ..الطريقة رقم 504 تكييف..الإستعباط و الإستهبال في كل من تاريخ التخرج و محتويات حلل المطبخ..صحيح ان الطرق الموجودة في الأجندة كلها مانفعتنيش بحاجة لكن "على المرء أن يسعى و ليس عليه إدراك النجاح"..


و فضلنا نهري و ننكت في نفسيتنا ..و مافرقش معانا حتى لما البت نيفين رجعت و هي تجر أذيال الخيبة بعد ماعرفت ان العريس شغال بانتيير في فرنسا..يعني نقاش عقبال أملتكم و تقريبا جاي ياخدها سقالة..معلش أصل الدنيا كده زي "الحضري" يوم ترقصلك و يوم تقلبك و تديك بومبة.


أنا بأه رجعت البيت و ناوية أعمل مع ماما خناقة لرب السما..إزاي ماتوعينيش على حوار البصارة ده؟..ده تهريج..ده تسيب..دي قلة وعي..ده من أساسيات التربية الحديثة..و لو ماما ماعلمتنيش أجيب مين يعلمني يعني..طنط حشرية؟
طنط حشرية؟

إزيك يا بربر..و الله يا حبيبتي ليكي واحشة
أهلا يا طنط ..و كمان معاكي سوسن إيه النور ده؟
ده نورك يا عروستنا


ييييه..عروستنا؟....تااااني؟..و كمان زوزن؟..يعني مش بس عروسة دانا كمان بقيت جمهورية و الناس بتورثها بعد بعض


يا ترى يا هلترى..جايبة إيه وراكي يا طونط؟؟

Thursday, February 28, 2008

آخر التنطورات

فيه مناقشة للكتب التلاتة..كتابي و كتاب رحاب بسام و كتاب غادة محمد محمود في ساقية الصاوي 5/3 يوم الأربعاء القادم الساعة 7..اللي مجاش التوقيع بأه يجي..و اللي جه يجي تاني..تعالوا نقعد مع بعض قاعدة حلوة كده..ليه لأ؟


الأستاذة رولا خرسا كتبت عني و عن بوست "مخنوقة" في المصري اليوم..باوجهلها شكر كبير لأن مقالها فعلا فرق معايا


التعليقات الظريفة بتاع الناس اللطشيفة ماعادتش بتفرق معايا.. التعليقات دي بقت زي معلقة سبانخ في بحر من الملوخية..الناس الحلوة حلاوة خرافية و اللي ردوا بجد شالوا من جوايا أي ذرة تعاسة و رجعت زي زمان..ضد الخبط
على البوست أكتر من 230 تعليق زي الفل..هاعوز إيه اكتر من كده؟..ده أنا لو زعلت بعد كده الصراحة يبقى بطر


مش هاقفل تعليقات الأنونيموس عشان فيه ناس محترمة و زي الفل بتكتب أنونيموس..طب و أنا أحرم نفسي من تعليقاتهم ليه؟


البوست الجديد في الطريق..بس تقريبا التوك توك اتمسك في السكة و هو جاي


هاوقف التعليقات هنا شوية لغاية البوست الجديد ماينزل..أعذروني على التأخير في الرد خصوصا على الميل..بس الدنيا دلوقتي بقت زحمة عندي شوية..سامحوني


كله يجري بأه على بيت العرايس و العرسان عشان تقروا البوست الجديد



Friday, February 22, 2008

بجد بجد ..مخنوقة


بعد تجربة مريرة مع بعض كوادر التليفزيون المصري و بعض الإخوة الصحفيين


و بعد تعليقين تلاتة مالهمش لازمة و إيميلين تلاتة من ناس ظريفة و لطشيفة و تتحط ع الجرح يورم


بجد اتخنقت


يا جماعة نقول تاني من الأول


أنا مش بايرة


و لسه ماحملتش لقب عانس


أنا مش بادور على عريس..مش في المطلق كده


أنا بادور على حاجة صح في زمن للأسف يندر فيه ده


مش قضية البلوج التأخر في الزواج


قضية البلوج الزواج نفسه


فبليز ماحدش يقوللي معاناة و مشكلتك و جراءتك و شجاعتك


أنا يا جماعة عايزة أتجوز ...عادي زي ماكلكم عايزين


ليه فيه ناس كتير مش فاهمين ده؟؟؟؟


أنا مش عايشة حياتي في أزمة و لا باعيط على روحي ليل و نهار


ليه في عز الفرحة تلاقي ناس عايزة تهدم كل اللي عملته


هو أنا غلطت لما كشفت شخصيتي


هو أنا غلطت لما وافقت على نشر الكتاب


عارفة و الله ان معظمكم واقف معايا


بس بجد في الشهر ده اتعرضت لمواقف كتير بايخة جد
ا


بصوا هما كلمتين واقفين في زوري و قلتهم


مش هاسيب البوست ده كتير


غالبا هاشيله بكرة


بس بجد بجد


مخنوقة

----------------------------------------------------------------------------

تحديث

يعني ينفع كده؟؟

كل مرة تطلعوني عيلة و أرجع في كلامي

بعد كده لما أقول هاشيل البوست تاني يوم ماحدش هيصدقني



بالظبط زي القصة التاريخية بتاعت الواد اللي كل شوية يقول حسني عبد ربه رايح الأهلي حسني عبد ربه رايح الأهلي لغاية لما الناس إتأكدت إنه كذاب و بعدها لما حسني يروح الأهلي فعلا ماحدش هيصدقه



و بعدين إيه اللي انتوا عملتوه فيا ده؟

دانا من إمبارح عمالة أقرا التعليقات و أعيييط و أقرا و أعيييط لما خلصت كل الكلينيكس اللي في البيت



يا جماعة انتوا أحرجتوني و أخجلتوني و خلتوني مكسوفة من نفسي و مش قادرة أبص لنفسي في المراية

صحيح أنا إزاي أتخنق أو أتضايق و كل الناس الحلوة دي حواليا؟



أنا يظهر إتحسدت..و مخي فوت حبتين..أصل طنط حشرية كانت عندنا أول إمبارح و عرفت إن طبعة الكتاب خلصت

(هي على فكرة فاكرة إنه كتاب لتعليم طريقة تربية دود القز ..ماحدش يبقى يقولها حاجة ماشي؟)



و الله يا جماعة انا كل اللي خلاني أكتب ده إمبارح هو إحساس الصدمة و الجرعة المركزة من السخافة اللي أخدتها في المدة الصغيرة اللي فاتت

(و ده من أسباب اني هاسيب البوست ..عشان يمكن ربنا يكرم الناس اللي فهمها بطئ و تفهم)



أنا جامدة آه..بس برضه يعني..عندي شوية مشاعر مرهفة كده..بس و الله بتعالج



أنا مش عارفة أقولكم إيه؟؟؟

دي لو عيلتي اللي من لحمي و دمي و دي إن إييهي كانوا لا يمكن يقفوا جنبي زيكوا كده



تعليقاتكم ليا بجد

Overwhelming

مش لاقية مرادف ليها بالعربي



أنا مكسوفة و متشكرة و الأهم

.

.

إني دلوقتي ..سعيدة جددددا

Monday, February 18, 2008

أنا جاااااااااااااي ..فرافيروووووو

الواد وائل إبن طنط حشرية لما شاف الأملة اللي اختكوا بقت فيها و رايحة على دريم و راجعة من ال إيه آر تي و الناس كل شوية تشاور عليا في الشارع و تقول بنشبه عليها مش دي الي كانت إمبارح على مودرن سبورت و يجوا يسلموا عليا و يقولولي الله الله الله ..يا مساء الأنوار يا كابتن مدحت..(يظهر فيه شبه كبير و أنا مش واخدة بالي)


المهم يظهر الواد وائل الموضوع حز في نفسيته شوية و قال في عقله الباطن و عمقه اللاشعوري أنا لازم أضربلها كرسي في الكلوب.. قام هوووب واكل حتة من سلك الإنترنت و أنا سمعت كده و مادرتش بنفسي غير و انا باجري في الشوارع و أقول

واااااااااااااااااااااااااائيييييييييييييييييييييييييييييل


و من يوميها و احنارايحين جايين ع المستشفى

مش عشان خايفين على وائل ..إحنا عايزين السلك


المهم بعد عمليتين غسيل معدة على 3 -4 عمليات شفط (لطنط حشرية مش لوائل ..لو شفتوها دلوقتي مش هتعرفوها بقت قمر.. شبه فلافيو بالظبط)لكن في الآخر ربنا وفقنا و اتوصلنا للحلقة المفقودة في السلك (آه و فيه دكتور في الوراثة توصل للحلقة المفقودة في سلم تطور الإنسان حسب نظرية داروين بتطبيقها على طنط حشرية..بس ده مش موضوعنا دلوقت)..و بعد 4 أيام من إنقطاع النت أخير عدت إليكم بعد الفاصل و إذ أفاجأ بكل التعليقات دي و كل الناس اللي اتعرفت ع المدونة من العاشرة مساءا و شرفوني هنا لأول مرة


و ردا على كل تعليقات الزوار الدائمين (أهلي و عزوتي) و القراء الجدد (بكره هاروح السجل المدني و أضمكم للبطاقة) و كل الإيميلات اللي اتبعتت من ناس برضه لسه أول مرة يدخلوا المدونة و نسبة معقولة منهم بتقوللي في أول سطر أنا حسن من العراق بس على فكرة متجوز...أنا محمد من السعودية بس على فكرة متجوز..انا مصطفى من الكويت بس على فكرة متجوز...باقولهم أهلا بيكم و ماتخافوش قوي كده ..المدونة أمان و الدنيا لسه بخير


شكرا ليكم يا جماعة على التفاعل الجميل ده و إذا كان أي شئ بيحصل لأختكم خير فده بفضل الله اولا ثم تشجيعكم و دعواتكم


فيه بأه إتنين تلاتة بعتولي ع الإيميل و على الفيس بوك بيقولولي هابي فالانتين


يااادي النيلة


هو أنا مش قايلالكم شعوري ناحية البتاع ده السنة اللي فاتت؟


حد يحتفل بعيد ميلاد جلوس واحد على خازوق؟؟


و النعمة انتوا نفسكم حلوة


هو أنا صحيح نزلت إشتريت قلب و دبدوب و فيشة كهربا (هابقى أحكيلكم موضوع الفيشة ده بعدين) و مشيت في الشارع رافعة راسي قال يعني حد جايبهوملي


و صحيح إديت البت هند بنت أماني 3 جنيه و خليتها ترنلي من موبايل أمها على موبايلي كل 1/2 ساعة وانا في الشغل قال يعني حد بيعاكس


و صحيح وصيت عم محمد الأشكيف البواب بتاع المستشفى يسرقلي وردتين من جنينة المستشفى و يحطهم على مكتبي و معاهم ورقة مكتوب عليها عاشق ولهان


لكن ده مش معناه أبدا إني إديت الفلانتين أدنى إهتمام


عيب أنا واحدة ثابته على موقفي


بالنسبة للناس اللي عمالة تطلع إشاعات


فيه برنامج على إذاعة البرنامج العام من يومين كان عامل حلقة عن موضوع"كلنا ليلى" اللي كنت إشتركت فيه مع بقية المدونات و استشهدوا بموضوع"أنا مش صفر ع الشمال" و إذ أفاجأ-برضه- في آخر البرنامج بيقولولكم ده من مدونة عايزة أتجوز و صاحبة المدونة اتخطبت خلاص


فطبعا إنتوا هارشين..ماحصلش


فيه ناس بتقول دي خلاص بعد الكتاب هتقفل المدونة و ماعدتش هتكتب فيه


فطبعا انتوا فاقسين..لايمكن


فيه ناس بتقول دي خلاص بأه على قلبها أد كده و إغتنت و خدت في نفسها قلم


فطبعا انتوا فاهمين..أنا وش ذلك؟..و بعدين إغتنيت منين بس؟ مانتوا عارفين العلم لا يكيل بإيه



المهم على ما أرد أنا على تعليقاتكم على البوست اللي فات و اللي قبله..إتسلوا إنتوا في شوية الحاجات دي


خلاص بأه هنلم موضوع الكتاب ده و نرجع نكتب زي زمان إن شاء الله


أولا أستاذ أحمد بهجت في الأهرام شرفني بالكتاب عن الكتاب يومي السبت و الأحد بس للأسف مالحقتش أنزل اللينكات من صفحة الأهرام

بس اللي عنده الجرنال يراجعه و هيلاقي المقالات في عموده "صندوق الدنيا"




و آدي لينكات التوقيع في المعرض على يوتيوب












و آدي لينكات العاشرة مساءا برضه على يوتيوب


شكر عميق ل

foolab

اللي هو تقريبا محمد سمير عشان هو اللي رفع الحلقة على يوتيوب

و شكر تاني لوليد اللي جه هنا و سابلي اللينكات







و ده جروب للمدونة على الفيس بوك عمله محمد الشافعي أحد قراء المدونة الأعزاء و اللي باوجه له شكر كبير جدا جدا على الخطوة الجميلة دي.. إبقوا اشتركوا و قولوا رأيكم









يااااالا اتسلوا بأه لحد ماخلص رد ع التعليقات و لو فيه حاجة جدت هابقى أقولكم


و نبتدي بأه من البوست الجاي نحكي من أول و جديد


طب و هي الحكايات عمرها هتخلص؟؟؟


طبعا لأ

Wednesday, February 06, 2008

أخدنا تأجيل





بسم الله ماشااااء الله


مين بأه إن شاء الله اللي نبر في الموضوع؟



لا لا لا ..فيه حد إسود في فحلقي من جوه أكيييييد



مافيش؟..متأكدين؟



طب خلاص مصدقاكوا..يبقى بس هو الحظ و النصيب ..وانتوا عارفينه



إحنا أخدنا تأجيل بس مش إعفا.. م/منى الشاذلي قالت كده في التليفون ..ست ذوق ذوق ذوق الصراحة..تصدقوا كلمتنا بنفسها؟
بلغني انها برضه قالت كده في البرنامج ..أنا طبعا ماشفتوش كنت شاده الرحال من القاهرة المحروسة على بيتنا بعد ماشديت الرحال مخصوص من هنا على هناك من الصبح



طب خلاص بأه إبقوا استنوه يوم الإتنين



اللي هو بعد الخميس ب4 أيام (يعني 5 إلا واحد ;) ماشي)؟



فيه كمان حلقة ال
art
البيوت أسرار الجمعة الساعة 9
وبيتعاد السبت الساعة 1 الضهر
المعدة سحر (العسولة) قالتلي الحلقة حلوة قوي
وم/سهير جودة الجميلة كانت سعيدة جدا بالكتاب و قالت عليه كلام جميل قوي



يوم إيييييييييه؟...أيووووووان الجمعة
اللي هو بعد الخميس على طول ..لحسن بسببي ال
art
تولع والا حاجة
:))



دعواتكم


Monday, February 04, 2008

كنت فرحانة فرحانة فرحانة

كنت فرحانة جدا جدا جدا






أول مارحت لقيت اليافطة متعلقة بره دار الشروق و الناس بتبص عليها ..بقيت عايزة أوقفهم و أقولهم أنا دي.. ده كتابي



دخلت الدار أنا و بابا و دينا صاحبتي أسأل على الكتاب..مافيش كتاب..خلص


فرحت قوي ..بس خفت جدا حد ييجي و مايلاقيهوش..كان فيه شاب مصري أصيل بيسأل عن الكتاب ..كان بيقولهم عايز كتاب..كتاب..و شكله انكسف يقول إسمه..قالهم عايز كتاب "غادة عبدالعال"..قالوله خلص و هييجي كمان ساعة..كنت هاعيط و عايزة امسكه من ايده و هو خارج و أقوله عمو يا عمو طب استنى شوية هييجي دلوقت..مش عشان حاجة ..عشان أنا قلت للناس تعالوا و الكتاب هيكون موجود و مش عايزة أطلع عيلة


لقيت رحاب و ووقفنا سوا شوية بره و بعدين ردت فيا الروح لما شفتهم داخلين بكميات من الكتاب..عرفته من لونه الخضر الجميل..ماكنتش مقتنعة بيه خالص قلتلهم و أعمل كتاب أخضر ليه؟هو أنا القذافي؟..بس أستاذ سيف سلماوي قاللي ماتخافيش و كان عنده حق.. بعد كده عجبني جدا جدا و الله


جرينا أنا و رحاب و قعدنا و كانت غادة محمد محمود لسه ماجاتش


الساعة كانت لسه ماجاتش 3 ..أستاذ احمد الزيادي قالنا لسه بدري..بس احنا ماقدرناش قلناله هي المرة دي بس ..الكتاب الجاي بأه مش هتلاقونا أصلا..و جم الناس و بدأنا نمضي

واكتشفت اني مش عارفة أكتب ايه بالظبط؟


شوية كده و عرفت و بدأت أكتب و الناس بدأت تيجي و تكتر


كنت فرحانة قوي قوي قوي


كان فيه ناس كتير بييجوا و يقولوا:هي دي اللي عايزة تتجوز و يقفوا يبصوا عليا من بعيد كأني تمثال تحتمس التاسع..طب ماهي كويسة أهه..أمال ايه بأه؟؟

و كان فيه شاب مصري أصيل برضه مصممم تصميم لا يتزعزع انه يصورني و قعد يحاول يحاول لغاية الفلاش أخيرا ما اشتغل و صورني صورتين ..تفتكروا فيه في الموضوع إنه؟


طبعا كان فيه ناس أساسا مش فاهمين احنا هنا ليه

اللي يسألنا عن سعر كتاب في ايده و اللي جه يسألنا:سراي ألمانيا فين لو سمحتي؟


و فيه رجل جه أخد 3 كتب من كل واحدة فينا و خللانا نكتبله اهداءات لبناته التلاتة و احنا فرحانين بالرجل المصري المثقف ده..بس البنات كانوا صغيرين و انا ماكنتش فاهمة ليه عايز يجيب لكل واحدة فيهم كتاب اسمه عايزة اتجوز


بس اذا عرف السبب بطل العجب


بعد ثواني لقينا ناس تانيين جايبين كتبنا في ايديهم بنفتحها عشان نكتب الإهداء فوجئنا انها نفس الكتب اللي كان واخدهم الراجل ده لبناته


أتاريه كان فاكرنا بنوزعهم ببلاش و لما عرف انه هيدفع تمنهم رجعهم من سكات على الرفوف تاني..هي دي قيمة العلم و العلماء..إيييييه الله يرحمك يا زكي يا جمعه...مين زكي جمعة ده؟؟


أنا اتنرفزت قوي في الأول


و بعدين قعدت أضحك


أصلي
كنت فرحانة خالص خالص خالص


فيه ناس كتير ماكنتش أعرفهم بس كنت فرحانة بيهم جدا..نسبة الولاد-لدهشتي- كانت أكبر من نسبة البنات (تفتكروا فيه أمل؟)

:))


حتى كان فيه رفيقة مكافحة من تونس جت اشترت الكتاب و قالتلي انها اشترته عشان يساعدها تتجوز..يظهر كانت فاكراه كيف تصطادين عريسا الجزء التاني..أنا مارضتش أصدمها هي تبقى تكتشف على مهلها بأه


كان فيه جروب عسل قوي من اسكندرية و دمنهور..والا كان جروب من اسكندرية و جروب من دمنهور؟ هما كانوا ولاد على بنات و واحد فيهم عرفني بيهم اسم اسم..أنا طبعا و بسبب اللبخة و مبادئ ألزهايمر مبكر مش فاكرة منهم غير "مروة الزراع" ..صح الإسم كده والا غلط ده كمان؟
و من إسكندرية كمان "لماضة"..يا عيني ركبت القطر 4 ساعات و نص عشان تيجي..بكره يا بنتي أردهالك..اعزميني بس انتي على أي حاجة هتلاقيني جاية جري


شفت pink unicorn
وسألتها بينك بال سي والا بال كيه ...شفتوا الخيبة قال و عاملة نفسي خريجة صيدلة و بتاع


فيه واحد رزين كده قاللي اكتبيلي اهداء..قلتله لمين قاللي أي حد..شوية كده و قاللي طب اكتبي للطائر الحزين
قلتله بغباء ..هو انت؟ أنا كنت فاكراك بنت
بصلي بنفس الرزانة و قاللي

الله يكرمك


شفت رضوى و عمرو عزت و شفت بنت مصرية و فكرتها انها أول واحدة نادتني ب"برايد"


شفت سارة
sorsara
و كان معاها بنت خالتها كمان ..شفتوا العائلات المثقفة


شفت ميشيل حنا و اداني كتابه "برسيم دوت كوم" هدية و كان معاه حسام مصطفى إبراهيم و هو كمان إداني كتابه"يوميات مدرس في الأرياف" ..شفتوا الندالة هما الإتنين يدوني كتبهم هدية وأنا اخليهم يشتروا كتابي ..ندالة ندالة يعني


و فيه شاب كمان بعد ماكتبتله إهداء على الكتاب اداني شريط كاسيت هدية ..لا ..مخكوا مايروحش لبعيييد..الشريط إسمه "طرق على أبواب السماء" ..بصتله باستغراب..قاللي دانا جايب 12 و باوزعهم ثواب...!!!عموما فيه الخير برضه


شفت المهندس المصري وإيمان صاحبة بلوج "يوميات عانس حقود" مع إنها 26 سنة ..عانس إيه ..هي مستعجله على إيه مش عارفة؟و اللي وقفت جنبنا وقفة جامدة ..كانت واقفة تفهم الناس اللي كل شوية يقفوا قدامنا بغباء كده و يتفرجوا علينا ..حضرتك دول كتاب و بيمضوا كتب للي بيشتري هتشتري والا تتفضل؟

جامدة جامدة إيمان..شكلنا هنبقى اصحاب ..فلتسقط نهى الخبيثة


وشفت "أم احمد" بس كانت جايبة معاها عمر و سايبه احمد في البيت ..كانت كتبتلي تعليق السنة اللي فاتت قالتلي انها اتجوزت من معرض الكتاب كانت بتحضر ندوة شافها و اتجوزوا..شفتوا البساطة؟..اتفائلت خير طب هي كانت بتحضر مابالك انا بامضي بأة..بس على مين؟؟..ماتلاقيش

:)


قولوا شفت مين كمان؟


أ/خالد الخميسي صاحب كتاب "تاكسي" الشهير جه و سلم علينا و كمان اخد الكتب و كتبناله إهداءات


و كمان كان فيه صحفي من "بص و طل" و أخد مننا أحاديث


و كان فيه كام ست و بناتهم عرفونا من "صباح دريم" ..آه مانا ماقولتلكوش مش احنا طلعنا في برنامج "صباح دريم الثلاثاء اللي فات؟...ماقلتش عشان قلت دي أول مرة موجات البث التلفزيوني تتلاقى مع وش حضرتي ..لازم أشوف النتيجة الأول و بعدين لو طلع حلو ..نذيع على اليوتيوب ..لو طلع وحش ..يبقى كفا الله المؤمنين شر القتال


كمان كان فيه ناس بيخمسوا في الكتاب يعني تلاق 2 مع بعض ..3 مع بعض ..مع إني مرارا و تكرارا قلتلكم ان العلم لا يكيل بمحشي البتنجان..بس مافيش فايده


قمة سعادتي بأه لما كان حد بيقوللي باستفهام
wanna b a bride?
كنت باعرف على طول انه من قراء البلوج..أيوه كده الواحد يبقاله عزوه


كمان لما بنوتة حلوة إسمها ندى قالتلي انها اتخذت من احدى الجمل اللي كتبتها شعار ليها في الحياة
الجملة من بوست "أنا مش صفر على الشمال" و كانت بتقول "البنت لازم تعيش حياتها على إنها حياتها مش على أساس إنها تتر لمسلسل لسه مابتداش"...ماتتخيلوش سعادتي كانت أد إيه..لأن الجملة دي كنت حساها قوي لما كتبتها و كان نفسي بجد كل بنت تحسها و تقتنع بيها
و تخيلوا ان جملة تقولها حد يعتز بيها
إحساس جميل فعلا


عشان كده


كنت فرحانة موت موت موت


فيه ناس بأه كانت جاية متأخرة زي عبد الفتاح" صاحب بلوج "الإرهاب المنزلي" و سحر اللي اتعرفت عليها لما صورت الحلقة بتاعت "البيوت أسرار في قناة عين "عشان هي المعدة بتاعة البرنامج


آه ماقلتلكوش أنا إني صورت الحلقة دي ..أصلي ماكنتش عارفة ايه اللي هيجرالي فيها..كنت انا و دينا بشير الديك و إيمان صاحبة بلوج"يوميات عانس حقود" و قدامنا 3 دكاترة منهم واحد أول ماشافنا قالنا "هو انتوا بأه العوانس؟"..لأ و إيه أستاذ في علم الإجتماع..هو ده بأ اللي كان هيخليني أصدق إن العلم فععععلا يكيل بمحشي البتنجان..بس ماتقلقوش إحنا برضه ظبطناه في الحلقة..م/سهير جودة مذيعة البرنامج ربنا يخليها كانت بتدافع عنا و كانت طول الحلقة بتستشهد بالكتاب بتاعي و قالت عليه كلام جميل قوي..إبقوا شوفوها هتتذاع الجمعة الساعة 9:30


الناس بتوع الشروق بأه كانوا فرحانين بينا جدا الأستاذ إبراهيم المعلم جه بنفسه و اتصور معانا و كتبناله على كتبنا إهداءات ..أستاذ أحمد الزيادي كان واقف جنبنا زي أبو العروسة"بشرة خير و الله" و الأستاذ سيف سلماوي كمان كنت حاسة إنه فرحان بينا قوي..و كل الناس بتوع الشروق فعلا فعلا كنت حاسة إني وسط عيلتي و أهلي


و لما وصلت الساعة 5 كانت نسخ الكتاب خلصت-بسم الله ماشاء الله ..بسم الله ماشاء الله..الساعة 5 واخدين بالكم- و فضلت آخر نسخة و قلت لازم أكتب للي هياخدها إهداء كبيييير فأيمن اللي من أسرة الشروق و اللي كان بيقولي انه مابيسيبش حد يخرج من الباب من غير نسخة من الكتاب صمم ياخدها..كتبتله إهداء كبيييير و قلت له شكرا على المجهود الفظيع ..ليك نسبة..بس ...في الطابعة العاشرة..و هو كان فرحان قوي..متفائل قوي أيمن ده


بعد كده خلاص قمنا و فيه ناس كانوا لسه بيسألوا على الكتاب بعد ماخلص..كان نفسي ألاقيلهم أي نسخة ..بس كل النسخ خلصت-الساعة 5 ..فاكرين؟-بس أكيد فيه نسخ تانية نزلت في الأيام اللي بعد كده

بعد التوقيع ماخلص شميت خبر إن الأستاذ ريادي و الأستاذ سيف رايحين يقابلوا بلال فضل..انا طبعا إستموت فيها و اترميت ع الأرض و اتمرمغت في التراب..هاروح يعني هاروح..(طبعا مش قوي كده أنا مش أوفر للدرجة دي)قالولي تعالي روحنا مالقيناهوش

واحنا راجعين كان فيه توقيع في الدار المصرية اللبنانية ل الشيف أسامه و أحمد منصور الصحفي بالجزيرة دخلنا نسلم عليهم ..قالوا للأستاذ أحمد دي كاتبة جديدة بس كتابها خلص..بصلي قوي كده و قاللي طب مافيش معاكي نسخ..كان معايا نسخة كتبتله إهداء و إدتهاله هدية..قام هو كتبلي إهداء على كتابه"معركة الفلوجة" فاضطريت أشتريه!!!!!!! الشيف أسامه قاللي خدي كتابي ده اللي هيخليكي تتجوزي..ضحكت و قلتله لا شكرا دانا هايلة في الطبيخ "وانا معايا فلوس للكتب دي كلها؟

اليوم كان جميل جدا و انا إستمتعت بيه قوي..ماعدا موضوع الفلوجة ده

:)


و أنا من موقعي هذا أشكر كل أسرة دار الشروق و كل الناس اللي جم و كل الناس اللي ماجوش


طب ليه باشكر اللي ماجوش


مش عارفة؟


يمكن بس عشان أنا


فرحانة طحن طحن طحن


آه و الله


-----------------------------------------------------------------

الصور و الفيديوهات المرة اللي جاية إن شاء الله...الأسبوع ده بس عليكم بالبيوت أسرار يوم الجمعة و احتمال فيه حاجة تانية يوم الأربعاء هاقولكم عليها بكره لما تتأكد