Saturday, March 01, 2008

حازي يا بنت..حااازي

و بعدين انا داخلة الصيدلية الصبح لا بيا ولا عليا ألاقيلكم شوية مناظر غريبة الشكل..مين دول؟..ركزت شوية و بحلقت و بقللت عينيا ..إيييه ده؟ البنات شكلها مزهزه كده و الصيدلية على سنجة عشرة ..ده حتى العيانين على غير العادة شكلهم جايين غاسلين وشهم ..عرررق نظرية المؤااامرة بدأ ينقح في نفوخي و مستقبلات دقات الندالة اتفتحت في جميع أنحاء مخي...يمكن تفتيش؟..يمكن؟..لااااا ده مايفسرش كميات الماكياج المهولة اللي محطوطة على الوشوش ..دي لو اتجمعت كلها تطلعلها 2 طن ..دا البنات قربوا يطلعلهم أتب في ضهورهم من تقل اللي محطوط على وشوشهم..لأ لأ..فيه مؤامرة تحاك في الظلام خلف ظهري..و أنا لما اتكلم نحوي (على أساسا ان ده نحوي يعني) تعرفوا ان الخطب جلل(حلوة مش كده؟)..إتمشيت شوية في الصيدلية كل اما عيني تيجي في عين واحدة تبعد راسها بعيد و تعمل إن حاجة وقعت منها تحت المكتب و تنزل و تغيب..أقوم أبص عليها ألاقيها مستربعة ع الأرض و مطلعة الروج و الأيلاينر و شغااالة


طب مابدهاش بأه..طلعت أنا كمان أدوات الكفاح و إبتديت مشوار التظبيط و انتوا عارفين مشوار التظبيط يبتدي بنقطة..أيلاينر بأه .آي شادو..أهو اللي يقدرني عليه ربنا..مش فاهمه حاجة آه..لكن مش هابقى أنا الكلوب المطفي وسطيهم يعني


شوية و لقيتلكم المديرة بتاعتي داخلة و جره وراها واحدة شكلها ماريحنيش..آااااااه...فهمت فهمت..دي شكلها أم عريس..أيوة أيوة هما بيبانوا..تلاقي الست كده مستحمية ولابسه اللي ع الحبل و حاطة فاترينة دهب في أي مكان يسمح بده. .او مايسمحش.. عشان تزغلل عينينا و تتمنظر على اللي خلفونا..ماعلينا ..بس الست شكلها حلو كده و أرستكراطي(آه بالكاف..شوية رقة دي أم عريس)..فاضلها القميص البنبي أبو ريش و تبقى حتة من رجاء الجداوي في فيلم "في بيتنا رجل" ..كانت تحفة في الفيلم ده..سيبت أنا كل التفاصيل دي ..ماتهمنيش..وركزت في الجزمة دي..يا جدعان مش باشتمها..لسه المرحلة دي قدام..انا قصدي جزمة ام العريس.. سيبكوا بأه من الناس اللي بيقولولكم الراجل بيبان من جزمته..ماتصدقوش..من خلال خبرتي الحياتية الطويييييلة ..أحب أقولكم إن الراجل بيبان من جزمة أمه..جربوها كده و هتلاقوها طريقة ماتخرش الورنيش


الست قعدت هي و المديرة و احنا ماتعرفوناش..ماتعرفوناش حقيقي يعني..سبحان الله ..كل قوانين الفيزيا و الأحياء و الوراثة و حتى الجنح بتتكسر في اللحظة دي..الوشوش القديمة بتتطبق و تتفرش وجوه جديدة لانج..اللي عينيها بتوسع و اللي بقها بيصغر و اللي بتبيض..بيصعبوا عليا قوي الرجالة تاني يوم الجواز..يوم الصباحية بعد العروسة مابتغسل وشها..إحنا عندنا عنبر جلطات كامل في المستشفى لضحايا الموضوع ده..ماعلينا..المهم بدأت المديرة تتكلم


صباح الخير يا بنات..أعرفكم بمدام سعاد..هي..أأأ..هاتسألكم على حاجة كده..بخصوص الأدوية


و في ثواني كان طابور العرض مصفوف..انا في الأول كرامتي وجعتني..بأه أنا على آخر الزمن أقف مرصوصة كده في طابور ولا طابور الجمعية..بس اشمعنى أنا يعني..و انا أقعد كده و أسيب العيال ياكلوا الجو..قومت و جريت و أخدت مكاني..عادي يعني أنا مافيش في دماغي حاجة أنا قلت بس مشاركة و جدانية يعني..و بعدين طابور العرض ده مش جديد يعني..ياما حصل و ياما هيحصل ..و بعدين ده شئ مهم جدا في حياة البنات زيه زي كشف الهيئة في الكليات العسكرية يا إما يركبك طيارة و تطلع للسما يا إما يركبك توك توك و تتكل على بيتكم


أيوة يا طونط..أي خدمة؟
أؤمري حضرتك ..عايزة تسألي عن إيه؟
قطن..شاش..ميكروكروم؟
قلب..سكر..كبد..مخ..طحال..اللي يعجبك؟


الست لفت عينيها في وشوشنا شوية كده و سألتنا بطريقة ماما سامية في برنامج الأطفال الهادف عروستي
مين فيكوا يا حلوين بتعرف تعمل بصارااااه؟


بصينا لبعض بامتعاض مشوب بالإستنكار
بصارة؟


و فجأة كل واحدة رجعت لقواعدها و كل الوشوش رجعت لقوالبها
بصارة؟..أخرتها بصارة؟
لا يا خالتي غلطتي في العنوان
ده يا ماما مش قسم البصارة ..إحنا تخصص عدس بجبة


كلهم أخدوا الموضوع وش كده ورجعوا أماكنهم إلا أنا و نيفين(غريمتي الجديدة و اللي أخدت مكان نهى)..أنا شخصيا ماهضمتهاش..إزاي يعني؟..لألأ ..الموضوع فيه إنه ..الست جزمتها بتلمع و زي الفل..دي مش جزمة واحدة تسأل عن البصارة لأ..الصوت كده مش راكب ع الصورة
..ده مش منظر واحدة ميح و لا حتى جلدة..برضه نيفين واقفة جنبي في الطابور اللي ماعادش فيه غيري أنا و هي..واقفة و هي تزوي مابين حاجبيها(أنا مالي ..دي هي)..و فجأة لقيت البت عينيها نورت زي ماتكون الأخ نيوتن ووقعت فوق راسها تفاحة..و فجأة سمعت صوت غريب بيخرج من بقها ..أرق صوت سمعتوه في حياتكم مايجيش جنبه حاجة و قالت و هي بتمسك إيديها ببعض قدامها زي فيروز في فيلم "معانا ريال"
يعني إيه يا طونط بصارة؟


الست فجأة وقفت و في عينيها فرحة زي ماتكون كسبت عمرة من إيريال


إنتي يا حبيبتشي ماتعرفيش يعني إيه بصارة؟..تبقي بنت عز..هي دي ..هي دي اللي أنا عايزاها
يا بنت اللععععييييبة؟


البنات كلهم لفوا و على وشهم تعبير كأنهم لسه شاريين إزازة زيت من أم 10 جنيه إلا ربع
يخرب بييييييتك


الست صحيح أروبة ..بس عادي يعني دي حماة و الحموات مرفوع عنهم القلم..لكن البت نيفين يطلع منها كل ده؟..دي أكيد دمها فيه كرات بيضا و كرات حمرا و صفائح دموية مليانة كهن على أخرها..الست ماصدقت وراحت واخدة البنت تحت باطها و خارجين و احنا واقفين نبص لبعض و سامعينها بتسألها
و انتي يا حبيبتي دفعة كام؟


ترد عليها المضروبة بصوت سوسن بدر في سلام يا صاحبي (رقة رقة يعني)
2006


كمان..طب و ديني لأنا مبلغة دفعة 99 كلها تيجي تقيم عليكي الحد


الكل قعد في مكانه و بيبصوا لبعض و هما مش مستوعبين
لكن أنا تكالبت على جراحي (مش باقولكم الموضوع كبير)..و طلعت في الخفاء أجندتي السماوي (سماوي من لونها و على أساس يبقى منها لباب السما) و كتبت فيا ..الطريقة رقم 504 تكييف..الإستعباط و الإستهبال في كل من تاريخ التخرج و محتويات حلل المطبخ..صحيح ان الطرق الموجودة في الأجندة كلها مانفعتنيش بحاجة لكن "على المرء أن يسعى و ليس عليه إدراك النجاح"..


و فضلنا نهري و ننكت في نفسيتنا ..و مافرقش معانا حتى لما البت نيفين رجعت و هي تجر أذيال الخيبة بعد ماعرفت ان العريس شغال بانتيير في فرنسا..يعني نقاش عقبال أملتكم و تقريبا جاي ياخدها سقالة..معلش أصل الدنيا كده زي "الحضري" يوم ترقصلك و يوم تقلبك و تديك بومبة.


أنا بأه رجعت البيت و ناوية أعمل مع ماما خناقة لرب السما..إزاي ماتوعينيش على حوار البصارة ده؟..ده تهريج..ده تسيب..دي قلة وعي..ده من أساسيات التربية الحديثة..و لو ماما ماعلمتنيش أجيب مين يعلمني يعني..طنط حشرية؟
طنط حشرية؟

إزيك يا بربر..و الله يا حبيبتي ليكي واحشة
أهلا يا طنط ..و كمان معاكي سوسن إيه النور ده؟
ده نورك يا عروستنا


ييييه..عروستنا؟....تااااني؟..و كمان زوزن؟..يعني مش بس عروسة دانا كمان بقيت جمهورية و الناس بتورثها بعد بعض


يا ترى يا هلترى..جايبة إيه وراكي يا طونط؟؟

148 comments:

Anonymous said...

ههههههههههههه
عود أحمد

(نحوي برضه أهه)

بس حضري إيه؟؟

ماهو جه مضروب على قفاه أهه

بس جامدة قوي نيفين دي..هتتعبك

مش كانت نهى أحسن

:))

رؤى said...

صحيح دي نفين دي مش سهلة

وانتي هتروحي فين يا غلبانة

خليكي بأة مع طنط حشرية و زوزن
هههههههه

أهو عصفور في اليد

ياللا بأه قوليلنا جايبالك إيه؟

قصدي مين
:)))

أحمد said...

طب بالذمة ده كلام؟

إزاي يعني ماتعرفيش حوار البصارة ده؟

دانتي متأخرة قوي

لا لا لا..خليكي ورا طونط حشرية و هي ان شاء الله

هتوديكي ورا الشمس
:)))

حمدالله ع السلامة

فلسطينية said...

مرحبا

انا عندي سؤال..يمكن مالوش لازمة..بس لازم اساله لاني بجد ما بعرف جوابه

الا يا برايد يختي..يعني شو بصارة؟؟؟؟!!!!

نيفين كانت عاملة حالها مش عارفة..بس انا بجد مش عارفة

نورت

عصفورة من الشرق said...

ازيك يا برايد
حلوه اوى حكاية البصاره دى بس قوليلى هو يعنى ايه بصاره؟
بهزر بهزر
انا بجد حاسه انى مبسوطه اوى وبستمتع جدآ لما اقرا كلامك ايوه كده بقالنا حد يتكلم بالاصله عننا وبالنيابه عن نفسه

L.G. said...

رأيي يا غادة تبتدي تكتبي رواية طويلة مش على النت بينك وبين نفسك وتخبيها وبعدين تنشريها
كلوب مطفي تعبير ذكي جدا
بجد بعتبر الشاعر أو الكاتب موفق لما يكتب كلمة تميزه كلمة لا يستطيع القارئ أبداً أن يتوقعها
وبعدين حنتجوز امتى :))

Esraa Hamed said...

هههههههههه
حلوة اويييييي الحلقة
و نيفين دي ايه يعني هههههههههه
ياللا اهي اهي رجعت مكسورة الجناح
ال بانتير ال

fatima said...

نيفين .. نيفين
احنا بيهمنا
كانت نهى أشطر
انتى كفأة تقومى بيهم كلهم
بس موضوع البصارة دا جديد عليا وان بقالى فى مواضيع الجوازات بتاعة صحابتى د مدة طويلة تربو عن 18 سنة ( موش بقولك الموضوع كبير )انا كمان برطن بالنحوى اهو
زى العسل يا غادة
يا ست البنات
و اللى عاملة فيها حماة دى
تغور من جزمتها
احنا نلاقيها من جزمة مين ولا مين
قبلاتى و حبى يا قمر

fatima said...

أه
الف مبروك على البلوج الجديد
من جوه
و انتى فى قلوبنا برضو من جوه
تحياتى

اسلام المصرى said...

نيفين دى ايه
انتى بس خليكى مع طونط حشرية
هى هتقوم بالواجب
ويعنى نيفين دى اكيد هتاخد مقلب
من نوعية مقلب الحضرى
هههههههههههههه

سيكولوبيا *حكايات من العيادة النفسية said...

ههههههههههههههه
لا بجد حلوة اوى
وواعية الست دى

ووظيفة ابنها روعة
طيب اهو حتى صحبتك ضمنت مكياج رقيق وطويل المدى

ومبروك على السقالة

UNIQUE said...

سيبك من كل الجزم المتلمعة

مهما لفيتي مش هتلاقي احسن من طنط حشرية

جميلة اوي .. اقصد الحكاية مش طونط

تحياتي

أُكتب بالرصاص said...

ما ينفعش اجي واقرأ الكلام التحفة دا ولا أعلقش

انت يا بنتي عليكي ايفيهات ،
صحيح
استاذة



ومبروك على الكتاب
وعقبال كتب الكتاب
:)
وأسف لم استطيع الحضور

karma said...

مممتعة دائما.
:)

عودٌ أحمدُ لعالم العرايس والعرسان

* صحيح والله أنا بثني على سؤال "فلسطينة" أيه هي البصارة
!
بسمعها من يومي في الأفلام والمسلسلات لكن
هي ايه يعني؟

انتشلونا من ظلمة الجهل..
:))

Anonymous said...

وحشنا بوست مبدع زي ده
انتي مالكيش حل بجد

أُكتب بالرصاص said...

برايد
ماشاء الله عليك
الان فقط شفت الفيديو بتاع العاشرة مساءا

ماشاء الله عليك،

اكلت الجو من منى الشاذلي

وأسلوبك جميل جدا في الردود بتاعتك


طبعا انا كنت غايب عن الوعي الفترة اللي فاتت دي وماعرفش إيه اللي حصل في الدنيا

فين نسخة الكتاب بتاعي.؟ مش قلتي هاتوقعيها وتبعتيهالي على دبي بالبريد السريع ؟

tawahaan said...

so cool
good luck

Anonymous said...

الدكتورة برايد، سلام الله عليكي.

الموضوع شيق وممتع وأكثر من رائع , وبانتظارك الموضوع القادم إن شاء الله , ,وإلى اللقاء في ساقية الصاوي

رضوى عمرو خالد said...

حمد الله علي السلامه يا غاده
حلوه قصه البصاره ديه
وحلوه الاجنده بتاعتك
شكلك من كتر الخبرات هتكتبيلنا قريب كيف تصطادين عريسا

محمد عبد الغفار said...

مازلت انت هو انت

خايف من الحقيقة said...

انا شايف ان ربنا نجاكي من الست دي ووقع نيفين في شر اعمالها لان الست دي انسانة مدعية و وجدت انسانة مدعية زيها
هو في حد ميعرفش البصارة دا اللي مرضعهاش زمان بيحلم بيها دلوقتي

خايف من الحقيقة said...

الحمد لله انتي بنت حلال و ربنا نجاكي
الست دي مدعيه ونيفين وقعت في شر اعمالها
الست مش اصيله دي بس بتتمنظر عليكم
وبتدور على واحدة متعرفش البصارة تدور عليها بره مصر لكن في مصر سامحيني مين ميعرفهاش
انا لسه عند وعدي وابني جاهز
هه موافقة؟!!

خايف من الحقيقة said...

الحمد لله انتي بنت حلال و ربنا نجاكي
الست دي مدعيه ونيفين وقعت في شر اعمالها
الست مش اصيله دي بس بتتمنظر عليكم
وبتدور على واحدة متعرفش البصارة تدور عليها بره مصر لكن في مصر سامحيني مين ميعرفهاش
انا لسه عند وعدي وابني جاهز
هه موافقة؟!!

خمسة فضفضة said...

السلام عليكمم ورحمة الله وبركاته

عود احمد يا برايد ، وحشتنا حكاياتك الجميله

Anonymous said...

SemSem

هههههههههههههه
والله يابريد انت مشكله بجد بتمنالك كل خير ويارب اشوفك من الكتاب الكبار بس ابقى افتكرينا وبلاش حركات الألاه ديه
مبروك على المدونه الجديدة

صيدلانيه طالعه نازله said...

احمدى ربنا انك بتعرفى تعملى بصاره
اهو طلع نقاش فرنساوى يعنى بيدهن من الشمال لليمين
نيفين معرفتش البصاره لان اخرها طعميه
والمفروض تشكرى مامتك لانها مربياكى على العز
وبالنسبه لطنط حشريه ياعريس انهارده بفلوس بكره هوه اللى يدفع الفلوس

محمد عودة said...

مرحبا يا غادة أنا من التابعين لمدونتك من حوالي سنة وقد أنشئت مقالة في ويكيبيديا أتمني أن تلقي نظره عليها وتقولي لي ما رايك فيها

http://ar.wikipedia.org/w/index.php?title=%D8%B9%D8%A7%D9%8A%D8%B2%D8%A9_%D8%A3%D8%AA%D8%AC%D9%88%D8%B2&oldid=1512546

Anonymous said...

مصرى متغرب

عزيزتى غاده

احنا ما كنا صدقنا خلصنا من نها تطلع لنا نيفين بس انتى المرة دى طلعت منك اوت فين سرعة البديهه كنتى على طول قولتيلها ايوه بصارة يا نيفين الى انتى جيبتى منها امبارح معاكى من البيت على الفطار

وكان الموضوع خلص

بس خيرها فى غيرها واديكى اتعلمتى

نرجع بقى للبوست طبعا مش هاقولك الكلام بتاع كل مرة ان دمك عسل وموتينى من الضحك واسلوبك مالوش حل وكده لان ده بقى كلام مفروغ منه ومش محتاج اقوله كل مرة اعلق عندك اتفقنا ؟
وبعدين ايه ادوات الكفاح دى انتى اصلا قمر من غير حاجه والله

بس السؤال المهم العيال زمايلك دول عرفو منين ؟ انا ابتدا الفار يلعب فى مخى وهابدأ افكر فى نظرية المؤامرة ولا انتى ايه رأيك

محمد عودة said...

معذرة
ستجدي
المقالة هنا

dr.gesho said...

هههههههههه
حمدالله على السلامه يا جى من المعرض
هوا بس فيه سؤال هوا انتى كل حياتك كده
كلها مغامراتك؟
بلا جواز بلا دوشه كده اظرف
و بعدين لو اتجوزتى مين هيحمل رايه المدونه دى بعدك؟
واللا هتخليها يا ريتنى ماتجوزت
اسف على موضوع اسماعيل يس كنت بهزر طبعا
سلاااااااااااام

rona said...

ولا يهمك نيفين ولا نهى ولا غيره بس تقريبا حركات البنات دى مشيه جامد دلوقتى دنا اعرفناس بتقول ان الرجاله بتحب الست للى تكدب عليهم وعلى امهم طبعا

صاحب المضيفة said...

يعين بعد ده كله يطلع بصارة


هو في حد بياكل بصارة في فرنسا


هي بنات الناس لعبة كده يا برايد



على العموم خلي بالك

المرة الجاية تقول مين بيعرف يعمل مقلوبة ولا حاجه


يبقى نهارها مش فايت


تحياتي

romalistic said...

عسل كالعادة
:D

مهندس مصري said...

مبروك علينا رجوعك لينا
و فعلاً انتي مش محتاجة أي أدوات كفاح
انتي كويسة من غير اي حاجة اضافية
بس شكلك بجد مش حتحكي التاسع و العاشر
كده حأضطر استلف الكتاب
:)

MoodyLicious said...

enty 3rfa walahe wala konty omty we hya de law set bent nas sa7i7 kanet basetlek enty . la2en elmafrod mayb2osh elbanat malhofen kda 3la ay wa7da 3ndaha 3rees ana 3rfa enek mesh fe dmaghek bs bardo broosttteeeeeg y3ny ;)

Lasto-adri *Blue* said...

مشكلة يا بنت إنتى

أنا قريت البوست لماما من كتر ما ضحكت عليه يعنى
:d

http://who-is-wael-abbas.blogspot.com/ said...

http://who-is-wael-abbas.blogspot.com/

Anonymous said...

عسل يا براااااااااااااااااايد وتجننى كالعاده
سمسم

بطوط حبوب said...

هههههههههههههههه
مدونتك زى العسل
انا من المتابعين الجدد لمدونه

fatoma said...

ازيك ياغادة وازاى أخبارك
إن شاء الله تكون أخبار زاى العسل زايك
ومعلش أنا أخر الى جايين يباركوا بس والله متابعاكى من زماان أوى
لأنى بجد زاى ماقولتلك مرة على الميل بشوف فيكي
شريط حياتي بيتكرر مرة تانية قدام عيني مش ناقص غير انك يبقى اسمك فاطمة
وفاطمة دي ياستى لو تفتكرى الى باعتتلك مغامراتها مع عرسان الخليج وعريس جزر القمر
أكيد افتكرتينى طبعا دلوقتى
ربنا يسلمك ياحبيبتى من جزر القمر وعرسان الغفلة
كلهم ويختملك بأحلى عريس مصري يعوضك عن كل الى فات

Radwa said...

بصارة إيه اللى الست بتسأل عليها؟ المفروض تسأل عن سد الحنك أو كشرى بطاطس (أيوه دى وجبة حقيقية و دى بقى التحدى الأعظم لأن مفيش حد يعرفها غير تلاتة بس)
يا ترى طنط حشرية جايبالنا إيه المرة دى؟ و يا ترى إيه دخل زوزن (إسمها كارف على ألمانى) فى الموضوع؟
هذا ما سنعرفه فى الحلقة القادمة من برايد فى الملعب

Z_Diva said...

la la la
enty 3amlty fya m3rouf
wana elly knt 7ta fel5ta at3lm elkoshary welbsara welkeshk welfaree2 da kollo
peace
mn hna we ray7 mafesh 3'er elchicken kiev, welbeef stroganoff

Z_Diva said...

ah sa7ee7 nset a2olek mbrook, we welcome back we kol zalik, bas 3andy liky hdya ba2a, neveen sa7btk 3'ltanaaa we day3t 7tet 3arees lo2ta
painteer da ya7bebty mesh na2ash
da 32bal amaltik elly byrsem lekobrat elblad lowa7 we tablohat,3al7ytan bta3thom, y3ny t2dry t2oly rasaaam, mesh na2ash, we l3lmk, da bya5od felmetr she2 we shwayat, we kman bel euro.
tastahl , 3ashan tb2a tetzaka mn waraky tany
bas mtb2esh tet25ary fel postat tany
mfhooooooooom

Nigro said...

حمدلله على السلامة
إيه ياختي الحموات دول
عليهم حركااااااات
بس إيه موضوع الطابور ده؟
أنا مش فاهم حاجة

Anonymous said...

يااااااااااااااااااااه والله وحشتنى حكاياتك يا برايد لأ بجد انا موتت من الضحك على حوار البصارة ده يلا بئا ابقى خدى بالك المرة الجايه وربنا يستر يا ترى طونط حشرية مخبيالنا ايه ؟؟؟؟؟؟؟؟

((((((((شموسة))))))))))

حاسوباتيه said...

برايد وحشتينااااااااااااااااااااااااااااا قويييييييييييييي اخيرا طولتي الغيبه ماتغيبيش تاني وتخلي اضواء الشهره تاخدك مننا بقى والبوست روعه

احمد مجدى said...

بجد بجد المرة ديه يمكن احسن من كل مرة
و الله تفوقت على نفسك
اللى الأمام دائما

Anonymous said...

.

Anonymous said...

هاى يا غادة أو يا برايد
أنا عرفت عنك من رولا خرسا فى المصرى اليوم.
واريت كل مدونتك فى يومين عشان كدة هعلق على حجات كتير معلش استحملينى.
اعتبر نفسى قارىء جيد و أحب جدا الأدب الساخر و لم يضحكنى لدرجة القهقهه الا احمد رجب و أنت.
حقيقي مت من الضحك خصوصا العريس اللى بيقلد الفنانين و لا التانى بتاع المشَبك (على فكرة فيه فى دمياط فعلا قرية اسمها الرياض) و لا اللى كل الديفوهات مجتمعه فيه دة.
بسم الله ما شاء الله عليكى خفة دم ما شاء الله

وردا على استفساراتك
الفرائص هي العضلة مابين الكتف و الرقبة بتوع كمال الجسام بيسموها الترابيس ودى بترتعش مع الخوف الشديد.
عمرك جرى وراكى كلب او النور اتاطع عليكى فجاة فى مكان انت اصلا حاسة انه فيه عفاريت فى موقف زى ده هترتعد فرائصك.(سلامت فرائسك انشالله مدام حشريه)
خفى حنين يا ستى باختصار دة واحد اعرابى القبيلة بعتته زى ما تقولى مشوار مهم اخد الناقة و راح المشوار اللى كل القبيلة حاطة املها علية الخف(طبعا الخف هو البٌلغة ...الشوز يعنى) اليمين بتاعة يقع يسيبه و يمشى و بعدين يغير رايه و يرجع يدور عليه لغاية ما يجيبه و يرجع ياخد طريقة يلاقى الخف الشمال وقع يرجع يدور عليه و بعدين الاتنين المهم اعد ياخد الصحرا رايح جاى زى الاهبل ولما وصل
his final destination
كان الميعاد فات فرجع للقبيلة فبييقولوله يعنى ما عملتش اللى النا لك عليه؟ ال لهم لأ……بس رجعت بالخفين و صار مضرب الامثال .
اللى كانت بتقلب على جمر النار ام كلثوم و كانت كمان بتتحير و يا الافكار (اللهم اجعل الجنة مثواها)
بصى يا ستى بقى اسلوبك مدهش حبكة و تشويق و خفة دم و حرفية.
و تشبيهات و استعاراتك و كنايات جزلة و جديدة و في الجون (على فكرة التشبيهات و الاستعارات و الكنايات تتبع فرع البلاغة وليس النحوى ) مثلا الربع جنيه المخروم و العشرة صاغ الورق و النظارة اللى كعب شفشأ و الودان اللى واقفة احترام و السنان المتلاحمة و غيره و غيره
لازم تكملى وعرفت انك بتتعلمى سيناريو ربنا يوفقك اكيد هيكون لك مستقبل ان شاء الله..... بس تامر عبد المنعم !!!!!! يلا.... لجل الورد ينسقى العليق و دة مش اى عليق دة تامر عبد المنعم !!!!!!!!
هتقولي لي ايه معنى العليق ؟؟
و يا ريت كمان يتعمل مسلسل على غرار تامر و شوقية (تانى تامر!)
اوليلى هو القصص دى كلها حقيقية و لا من نسج الخيال و لا نص نص ؟؟؟
عموما هايلة هايلة و بعدين الى عاجبنى فيكى الصدق فى وصف المشاعر انا صحيح لم امر بتجربتك لانى ببساطة شاب و لكنى كنت فى فترة من اجمل فترات حياتى ايمن اللى عندك فى الشغل و ياله من احساس !!!!!! ان يشعر الشاب مننا انه ديك جوة عشة كلها برابر و كلهم نفسهم يبيضوا اصدى يتخطبوا و يعد هذا الديك يراقب و يستمتع بكونه مطلوب الى ان يختار هذا الديك بربرة غالبا من برة العشة ليتحول بمحض إرادته او يكتشف انه تحول من ديك الى حمار او على احسن الاحوال قطة!!
و بعدين انا شفت اللى انت وصفتيه ده لما اخواتى البنات كانوا بيتخطبوا توضيب البيت و و و و كافة التفاصيل عندك دقة وصف مدهشة و صادقة.
نتكلم جد بقى ؟
بقدر ما اسعدتينى و اضحكتينى فقد اثرت مشاعرى و جعلتينى اعيش لويحظات شجن قلما اشعر بها حين اوضحتى بوصفك بصدق و احساس بالغين جوانب كانت خافية على من ادق المشاعر التى تمر بها الفتاه فى هذة الفترة المضطربة و لا اخفى عليك أنى اشعر طوال عمرى بتعاطف شديد و تفهم كبير نحو من تعشن نفس الظروف سواء من قريبات او زميلات و اشعر انهن بالفعل(ارجوك لا تغضبى منى) مساكين.... لم؟؟
لانه من الصعوبة بمكان ان يجد الانسان- على اختلاف الجنس - انه معروض و ان متعة المبادرة و ميزه الاختيار ليست بيده .
على عكس الشاب تماما بالطبع و لا داعى لان اطيل فى هذا السياق.

هل تصدقينى ان قلت لك انى - و انا الشاب – قد مرت على فترة الخوف من الثلاثين و احسست لايام اتى اصبحت عا.. (الكلمه اللى ما تتسماش)
فى غمرة البحث عن بنت الحلال – التى هى نادرة جدا هذه الايام- و كنت حينئذ احادث نفسى (فما بال البنات ؟؟ كان الله فى عونهن)
غادة ... لقد تحدثتِ عن كل الجوانب لكن استوقفنى انك تريدين الزواج لانه الطريق الوحيد للانجاب ؟؟؟؟؟؟؟ الهذا فقط ؟ هل هذا هو الصدق ام انك اخفيت بعض الحقائق ؟؟
اين الحاجة للاستقرار و السكن و المشاركة ؟؟ اين العامل البيولوجى و هو عامل هام و دافع قوى لا ريب..هل منعك الحياء ... لا بأس
على كل الاحوال بارك الله فيك
بمناسبة الحياء شوفيلك حل فى السطر الاول من (منتهى اللطف) انا عرفت من تعليقات القراء انه المقصود التناكة ( كنت فسرتها بعد ما فضلت مبرق و اضرب كف بكف لمدة 10 دقايق على ان المقصود النكد) لكن لازم تتعدل يعنى الاخت مهرة ما استوقفتهاش الكلمة ؟؟ حتى بعد التعليقات و لا هى هنا؟
برايد.... انه فتح جديد انت غرته لكل الادباء الشبان الباحثين عن النشر سيسجل باسمك و تذكرى هذا الكلام لاحقا, فأكم من ابناء الاقاليم و انا احدهم تكاسل عن ان ينحت فى صخر العاصمة ليثبت موهبته و ذاته و استعذب الكسل الاقليمى اللذيد و رضى باى شىء فصارت حياته فشل يفضى لندم يفضى للا شىء
فها انت بنت كسرت هذا الطوق بطريقة مبتكرة و ان لم تقصديها لكن يظل لك شرف السبق فهنيئاً لك و مبروك
لسوف تحظين يا اختاه بمن هو اهل لك عن قريب – غالبا من القاهرة- فبعد ان رأيتك من خلال رابط العاشرة مساء اندهشت لفتاه فى جمالك و لباقتك و حضورك(دة كفاية خفة دمك اللى زى السكر) ان تصل لسن ال29 دون ديك اقصد حمار اقصد عريس
و الله بعقد الهاء ان لم اكن متزوجا لما تركتك.
عزيزتى نصيحة لوجه الله ستحتاجينها عندما ينهمر عليك سيل الديوك قريبا ان لم يكن قد بدا الانهمارالعظيم بالفعل لا تتسرعى و لا تتباطئى واتخذى بين ذلك سبيلا , اهم شىء هو الدين من يراع الله فى نفسه يراع الله فى زوجته و بيته, بعد الدين العقل و.....و ارى انك ما يتخافش عليكى.
اسف للاطاله لكنى كنت اعلق على كل المدونة شكرا لك و فقك الله.
(TEMPORARY LOSER)

حياتي قنبلة ذرية said...

حلو موضوع البصارة ده

بس بانتيير في فرنسا مش عارفة اقولك ايه هي الناس بقت كدة ليه

بجد دي صدمتها بالنسبة لي اكثر من سهتنة البت نفيين

و ربنا يستر من طنط حشرية يارب

Anonymous said...

هاى غاده بصراحه انا عرفتك من العاشرة مساء ودورت على المدونه بجد انا معجبه بيكى جدا ونفسى اراسلك على الاميل بتاعك وموضوع البصارة ده ولا يهمك منه مش كل البنات كهينه كده

Anonymous said...

على فكرة نسيت اقولك حاجه مهمه انتى نسيتى نوع من البنات مش كل العرسان بتوعهم علل كده بس من النوع اللى فاكر نفسه لقيه ولما بيدخل الصالون اياه بيفتكر نفسه قعد على كرسى العرش واللى حواليه دول الرعيه انا مش عارفه اسجل اميلك

hany mostafa said...


عود حميـــــــــــد
الشخصية القوية بس هى الى تاخد الصدمة وتقوم وتضحك عليها
كنت متأكد انك هترجعى تانى للمدونة
اولا:
اما بالنسبة لامتحان البصارة فهذا دليل على جهل الست الحاجة هى عايزة واحدة متعلمة تعرف لغات وخصوصا الفرنسية وطبعا هى متعرفش فرنسى بالتالى قالت اكيد الى تعرف فرنسى واحدة بنت ناس هاى لايف مش هتعرف البصارة
وده مغزى سؤال البصارة
ثانيا من والواضح جدا ان الانسة نيفين دى بنت لها خبرة كبيرة بامتحانات الحماوات من اول امتحان المكسرات وامتحان المحشى واخيرا امتحان البصارة والى يعيش ياما يشوف
وده هيزود المنافسة بينكم وانا متخيل شكل المغامرات هتكون ممتعة قد ايه
مستنى ...................

بحبك يامصر said...

والله ممتعه انتى ازاى بعد العاشره مساءا والبرامج وخلافه وبعد ما بقيتى مشهوره كده بتكتبى بنفس الاسلوب الجميل ده لا بقه
انتى موهوبه بجد اوعى تبطلى كتابه انا بقولك اهو؟

شمس لا تغيب said...

السلام عليكم
كيف حالك يا غادغودة
و الله اني حبيتك جدا لما شفتك على التلفزيون
انتي فعلا بنوتة امورة و تدخلي على ا لقلب بسرعة
ويا هناه عريس الغفلة اللي ما يتسمى غاطس في اي داهية ده ومفوت عليه فرصة كبيرة يكون مع غدغودة
انا ساتابع بوست لانك فعلا تقدمينه باسلوب جميل جدا و اللهجة المصرية فعلا خفيفة الدم
انا حابة اسالك يا ترى يا هل ترى اذا تزوجت ستوقفين الكتابة ولا يمكن تنتقلي لموضوع اخر
انا و الجواز و سنينه ههههه

شمس لا تغيب said...
This comment has been removed by the author.
Anonymous said...

هو يعني لازم أشكر فيكي وفي كل اللي بتكتبية عشان التعليق بتاعي ميتحذفش لازم تتقبلي النقد لأن النقد بناء
atta75atta@hotmail.com

قلب بلا حب said...

ايوووووووووووووووووووه كده
فين الحاجات دي من زمان
ايوه رجعينا للذي مضى

:)

و ايه حوار طنط حشريه المره دي
جايبه التاسع ولا ايه
هي الست دي موراهاش غيريك ولا ايه
:)

يلا متتاخريش علينا عايزين نعرف اللي حصل

aya said...

يامامنة لنفين يا مأمنة لاسرائيل فى فلسطين
معلش يا دودو

حظك بقى
وان شاء الله تلاقى طونط حشرشر ووبتشها جايبنلكم كل خير

الله معك

Anonymous said...

السلام عليكم ورحمه الله
الاخت العزيزه صاحبه البلوج (دكتور غاده على مااعتقد)
اتابع عن كثب كتاباتك هنا كما رأيتك بالصدفه على قناه عين الفضائيه وارى ان مجهودك وافر اذا كنا نتكلم انك تبذلين مجهودا فى الكتابه فاسلوبك شيق ومتقبل من الناحيه الادبيه
اما اذا كنا نتكلم عن مشكله البنات فعلا فاسمحى لى فانا املك بعض التعليقات على تلك المشكله
لااقصد تعليقات من باب مهاجمه النساء والدفاع عن الرجال ولكن اى نوع من انواع التقييم او الحكم بين طرفين يستلزم سماع الطرفين قبل اصدار الاحكام
املك تجربه مع الجنس الناعم بقدر مالامتنى بفدر ماتعلمت منها
سؤالى الان بعد المقدمه التى اعتذر عن الاطاله فيها هل تسمحين لى بعرض بعض تعليقاتى على هذه المشكله ونناقشها سويا مع رواد هذه المدونه دون تعصب او اطلاق اتهامات مجازيه ام تفضلين ان نتواصل بالميل مثلا ام لامجال للمناقشه هنا والموضوع لايعدو مجرد محاوله لرسم الابتسامه على الشفاه؟
عذرا للاطاله

Anonymous said...

مهندس معماري اسكندراني

اخيرا رجعتي تكتبي تاني يا غادة , انا لاحظت طبعا وانت كمان اد ايه قراك منتظرينك تكتبي

المهم تعليقا على البوست انا كنت عايز اعرف هل البوست ده حصل معاكي الايام ديه ولا ده اكمالا لباقي المواضيع بتاعة العرسان

وعموما تعليقي عليه , هو ايه السبب اللي خلاكي تقفي في طابور العرايس ده

او طابور كشف الهيئة للعرايس من قبل الحموات

ولما انت شايفاه حاجة مهينة ليه تتقبلي عليها وتنافسي فيها

ومدام انتي بتقولي انك عايزة تتجوزي صح
هل في رأيك ديه طريقة للجواز الصح ولا طريقة للجواز والسلام

وضل رجل ولا ضل حيطة

النقطة التانية ايه المشكلة في الباينتر او الدهان هي مش شغلانة شريفة ومن طريق حلال ولا الدهان ده رزقه حرام

يا ريت عشان على الاقل ربنا يوفقك وتتجوزي انسان كويس يراعي ربنا فيكي

مفيش داعي للسخرية من الناس

وميكونش البلوج للسخرية من اجل السخرية

احنا ممكن نسخر من موقف بس منسخرش من اشخاص ومهن

وارجو نزول التعليق وان تتقبلي النقد

مدونة الدفاع said...

السلام عليكم
الانسه برايدانا من فتره بتابع مواضيعك وفعلا فيها جهد جميل بس مكنتش باكتب تعليق وقلت مايصحش بقى ماتعلقش كل ده ولازم تقول هاردلك على العريس اللى خسرته نفيين ومبروك عليكى انها خدت بمبه ولكن انا عندى راى مش ممكن البانتيير بتاع فرنسا ده ياخد وش دهان وسكنتين معجون يمكن يجى منه خصوصا انه هايكون عنده شئ من الخبره فى موضوع اضاءة الكلوب لما يطفى واهو كله دهان
شكرا على مجهودك فى المدونه ونتمنى دايما مزيد من التقدم نحو الهدف

مشروع مدونة said...

دكتورة غادة

او برايد

انت كاتبة ساخرة من الطراز الأول

واضح ايضا انك ذكية ومثقفة ومتابعة للاحداث ومهمومة بهموم اكثر وربما أكبر من موضوع العريس


اتابع مدونتك منذ فترة طويلة و ازداد اهتمامى بها بعد معرض الكتاب الاخير

دعينى اهمس فى اذنك .. سوق العرسان مضروب فى الكم والكيف .. عانيت كثيرا وانا ازوج شقيقاتى الاصغر .. من عرسان كغثاء السيل

استمرى و اتمنى ان اقرا لك فى مجالات ساخرة اخرى

البلد مليانة نكت يابرايد .. شدى حيلك .. اسعار الزيت والحضرى حاجات تهلك من الضحك

ولا رأيك إيه؟

Anonymous said...

خلى بالك اذا كانت عداتك حكاية البصارة
اوعى تنسى حكاية شوربة العدس

انا بيهتك وانت حرة بقى
بصارة
شوربة عدس
ملوخية
فلافل
فووووووول بالطحينة


وحزمة جرجير ورغفين عيش سخن من فرن امك

مش هاضغط عليكى اكتر من كدة لان ريقك جرىىىىىىىىىى ورا الاكل

استاذ صبرى

Anonymous said...

بجد شربببببببببببببببببات
Miso soup

مش عايز أتجوز said...

hehehe

مش عايز أتجوز said...

عارفة في بداية البوست كنت حاسس بمبالغة شوية في السخرية ويمكن أقدر أسميها استظراف
بس في الأخر حسيت بيكي
يا عيني الميك أب اللي اتدلق ده كله كان كفاية أوي يفكوا بيه أزمة عريس محترم بس مش مجهز شقتة كويس
يلا ميك أب وراح
بس هو يعني إيه حازي يا بنت حاازي دي ؟
دمك سكر بس زي ما قلت ساعات بتزيد المبالغة سنة وساعات بقي بتقولي ألغاز ترجمي حازي لو سمحت
وأحلي حاجة أتمني تحافظي عليها إن سخريتك من أوجاع مجتمعنا تستمر ..مجتمعنا مش مجتمعكن .فهماني طبعاً
ciao

جسر الى الحياة said...

عارفة احلى حاجة فيكى ايه؟ دى مش اغنية محمد حماقى ولو انك زى البنوتة اللى بيوصفها ما علينا احلى حاجة فيكى لمحة الكوميديا فى كلامك وكانك خلاص اخدت على المواقف دى ربنا يوفقك ويسعدك باحلى عريس فى الدنيا يا احلى بنوتة فى الدنيا دى اول زيارة لمدونتك وشكلى كده مش طالعة منها
تحياتى لقلبك الجميل المتفائل

barbie girl said...

هههههههههههههههه
بصاااااااااااااااااارة
عافاها
كانت ماما بتعملها زمان
بس مش عارفة ليه اتفطنا وبعدنا عنها
مع انها بتبقى شبه التورتة المتزوقة بالمكسرات




هههههههههههههههههههههه
عسولة يا برايد كالعادة
:)

تــــايه ومش تـــايه said...

هما كل البنات اللى فى الصيدليه مستنين ؟؟!ربنا معاكو بقا ه

mabioon said...

طابور العرض؟؟؟؟ هى وصلت انه يبقى طابور عرض؟؟ انتى غلطانه بجد انك وقفتى فى الطابور ده ... ده طابور العيش اهون والله

المفقوعة مرارتها said...

الف حمد الله علي السلامة

نورتي بيتك من تاني

انا كنت عاوزة آجي بكرة بس للأسف مش

هاأعرف لأن ذي مانتي هارشة مدونتي سرية

ولو حبيت اروح الندوة لازم أقول

لبعلولتي حبيبي اني رايحة الندوة

ومش بعيد يخلي مامته تييجي معايا

بإعتبارها صاحبة مدونتي الرئيسية

ده إذا ماقطعش خبري من الدنيا الأول

خاللي بالك من نيفين ياختشي أحسن دي

باين عليها واخدة دروس في توقيع العرسان

أم أحمد said...

حمد الله علي السلامة ياست البنات
هابقي احاول آجي بكرة
انا وابو احمد بس لو ماقدرتش ابقي سامحيني ولومي علي ابو احمد وشغله

وحشتيني بجد

أم أحمد said...

عارفة ياغادة .. انتي مفروض مدونتك دي تتعمل مسلسل هي دي بقي الخطوة الجاية .. غادة ياجماعة في الحقيقة إنسانة جميلة ومتواضعة .. مجرد مقابلتي ليها في المعرض يوم توقيع الكتاب خلاني أحترمها و احبها وحسيت اني أعرفها من سنين ..

احنا عندنا نقص في الضحك وعاوزين ناخد حقن ضحك ونبطل نهاجم الناس اللي بتسعدنا

هي الدنيا حصل فيها ايه ؟؟ ليه كل كلمة بتتكتب نناقشها بمنطلق ده يصح وده مايصحش .. لو كل إبداع اتهاجم بالطريقة دي مافيش حد هايكتب
حد قري قصة عودة الروح لتوفيق الحكيم شفتوا الكلمات اللي كان بيستخدمها ؟؟ وأهو أسمه توفيق الحكيم

ربنا يبارك فيكي ياغادة

jehan said...

ازيك يا برايد مش محتاجة طبعا انى اقلك انى من متابعيك بس من خلف الكواليس
انا بس حبيت انى اعلق المرة دى علشان افيد غيرى

لانى لقيت ناس مش عارفة يعنى اية بصارة

والبصارة هى ( احدى مشتقات الفول عبارة عن ( فول وكرات وبصل وتوم ومسلوقين ومضربوين فى الخلاط لغاية ما يبقى شكلهم عامل زى المهلبية الخضرا () وبالهنا والشفا

بس كدة

BaTresYa said...

زي العسل والله ... بس الراجل بيتعرف من جزمتة وساعته وريحة برفانه :]
وبالمناسبة مبروووك بجد بجد فرحت لك انا في اقرب وقت هنزل واجيب الكتاب انتي تستاهلي كل خير والله

Ehab A. said...

This is the first time to read your articles.I have known about the three books that published from the egypatian bloggers,Via the internet.Congraulation, you really talent and your articles are very funny and worth reading..

hodazaghloul said...

غاده انتي فعلا بنت لطيفه اوي وحكايتك عن العريس اللي جالك لابس صندل حصلت معايا من زمان لاني انا ممكن اكون اد مامتك جالي عريس عن طريق قريبة والدتي وهي ست ارستقراطيه وشيك اوي والعريس كان دكتور امراض نسا وكان ساكن في نفس العماره اللي فيها قريبة والدتي فنزل من شقته علي شقتها علشان يشوف العروسه وكنت انا معرفش الموضوع خالص ولسه راجعه من المصيف وبنت الست كانت زميلتي في الكليه بس هي اتجوزت قبل ما تخلص الكليه وانا كنت لسه مخلصتش وكانت كمان حامل ولما جه الدكتور العريس صحبتي حبت تفتح معاه اي حوار بعد ما شافت عنيا رايحه تحت الترابيزه في الصالون ومبرقه لها وبصت لمكان ما عيني بتشاور مقدرتش تمسك نفسها من الضحك لان العريس كان لابس شبشب بس الصراحه مش بلاستيك هو جلد وصباعه الكبير مادد رقبته كانه بيبص من البلكونه وحاطط رجل علي رجل وعلشان نحاول ميبنش علينا الضحك صحبتي سالته وهي خريجة مدارس لغات ورقيقه جدا هو يا دكتور انا ليه بحس اني كل شويه ببقه عايزه ادخل التوويلت كتير قال عادي ما هي الست الحامل بتتصير كتير انا اتخضيت من الكلمه واحد دكتور يقول لهانم من عيله ورقيقه اوي تتصير وجاي يشوف عروسه المهم بعد ما العريس مشي صرخت في وش طنط قريبة امي وقلت لها عايزاني اتجوز واحد يقوللي انا رايح اتصير يا نهار اسود طنط هي اللي جريت علي الحمام من كتر الضحك وراحت تتصير .

Anonymous said...

بقوللك اية يا حلوة انا شايف انك تسيبك من البصارة والشكارة واللعب فى الحارة وتيجى نتكلم جد شوية اذا كنت عايزة تتجوزى قيراط انا عايز اتجوز هكتار والحقيقة انا مش عارف وزن الهكتار دة أد أية بس حاسس انة تقيل أوى أوى يعنى ييجى اتنين تلاتة كيلو ياللة مش خسارة فيكى انت باين عليكى طيبة وبنت حلال وحلوة كمان وتستهلى كل خير فى سلامة وسلامة فى خير على رأى عم سلامة المكوجى اللة يسامحة بقى -اصلة حرقلى البنطلون الصوف الجديد حرقة وش يعنى مبقاش ينفع بنطلون-انا قولت أأيفة وأظبطة واعملة شراب اهو يدفينى الكام شهر بتوع الشتا والبس معاة بنطلون البيجامةالكستور الجديدة عشان ارووح الشغل لغاية ما ربنا يسهل وييجى الصيف-مش عارف يا اختى كل ما افتكر الموضوع دة يخطر على بالى اغنية النبى حارسها فيروز...حبيتك فى الصيف وكرهتك فى الششا
المهم فوتك فى الكلام ومش عايز اطول عليكى بصراحة انا عايز اتقدم لك وبصراحة بصراحة انا حبيتك من اول جولة يعنى بالصلى على النبى من الدور الاول ويا رب يارب تكونى انت كمان حبتينى وما تسيبينيش للادوار الاخرانية
ولعلمك انا متعلم ومعايا دبلون سبع صنايع دة غير الصنايع اللى فى ادية -اللة يخليك ردى عليا بسرعة وخلينا نتجوز بقى يىىىىىىىىىى

عمر المصري said...

انتي بجد حكاية
والله أسلوبك جميل جدا
والمدونة دي بقت واجب يومي عندي
لما نشوف اخرتها ايه؟؟
شكلك هتتجوزي قريب وتسيبينا
أوعي
ده احنا نقوم بعملية ونخطف الصيدلية كلها
ايه رأيك؟؟

جبهة التهييس الشعبية said...

يا غادة عمالة ادور على ميلك مش لاقياه
طب بصي انا ميلي
nawaranegm@yahoo.com
عايزة اقول لك حاجة

$$Dado$$ said...

بجد يا غادة انت بقيتي مصدر سعادتي على النت رغم ان البوست بيتاخر كتييييير اوى الا انو لما انت بتحطي انا بتمنى انك كل يوم تنزلى بوست انا كنت كارهه القراءة من ايام كتاب القراءة بتاع وزارة التربية و التعليم لكن دلوقتي بقيت بحب القراءة اوى اوى اوى

EMI said...

هاي برايد
مبروك على البلوج الجديد و انشاء الله يحقق نجاح اكتر من اللى قبله و ربنا معاكى
ايمان

dina said...

جميله يبرايد مدونتك
واسلوبك حلو جدا
انا بحب جدا الاسلوب الساخر
ربنا يوفقك ويثبت خطاكى

AL MODONA EL SAGHERA said...

http://ahzanelnas.blogspot.com/
دي مدونه جديدة ياريت تزوريها

كازانوفا said...

بسراحة يا طونط بريد انتى اسبحتى ملهمةالبنات بكتابتك الرائعة بس البت نفين دى طلعت داهية بجد الركة اللى فيها متتطلعشى الا فى الحوارات الجامتة دى
===================

كنتى منورة الندوة بتاعتك يا برايد ومنتظرين المزيد ان شاء الله

hamssah said...

برافو برافو يا برايد
انا بجد مبسوطه بيكي وليكي
وعلى فكرة كان نفسي احضر ندوتك بس خيرها في غيرها
اكيد كنتي منورة
همسه

Anonymous said...

هاي غادة
ازيك ... عاملة ايه وايه الأخبار

أنا شفت حلقة العاشرة مساءا بس على اليوتيوب لأني معنديش تلفزيون أصلا

أنا فعلا فرحت لأنك شجاعة لدرجة انك تكشفي عن نفسك بالمنظر ده ... وكويس جدا انك تعبري عن فكرتك بالشكل ده

تعرفي أنا ساعات كنت بأفكر ... أكيد برايد دي كركوبة وواخده في نفسها قلم أو انها واحدة بتشتغل الكل والنت تسليتها

بس بصراحة أنا لما شفتك في البرنامج فعلا كبرتي في نظري ... فعلا عرفت ان الواحد لما يكون عنده قناعة وايمان بأمر لازم انه يضحي علشان يحقق ما يؤمن به

عجبتني جملة المدونة اسمها عايزة أتجوز (صح) ربنا يكرمك ويرزقك
بالزوج الصالح اللهم آمين

sameh said...

hi everybody

mohamed said...

هنقعد نعلم فيكى لغاية أمتى يابرايد


أنا قلت ليكى الرجالة مش هما الى بيجوزا البنات, العكس البنات هما الى بيجوزوا الرجالة.
وأنتى مفيش فايدة عايزة العريس ييجى بنفسة دة كلام
أنتى شفتى حد بيرمى نفسة فى التهلكة بايدية الا لوكان عايز ينتحر

أسمعى بقى عارفة لعبة القط والفار
الراجل هو الفار


ممكن بقى تشغلى المصيدة

مع تحياتى
محمد
وبرضة مش عايز اجوز

Rania said...

ربنا يكفيكي شر الحموات دول محتاجين دورات تاهيل نفسي
اهو كله خبرة لا تنتهي ويا ما الواحد بيشوف العجب
لسه في حد بياكل بصارة دي اكلة عفا عليها الزمن اتعلميها يا غادة عشان تكبسي بيها على نفس اي ضيف او ضيفة غير مرغوب فيهم
تحياتي يا احلى كلوب منور

Anonymous said...

First i wana say that i really missed reading your blog for a while because i have some unpleasent events :)

Any way happy to be back to read your Blog

what about this book story ???

i didn't continue because i found u so upset and sad from some people who annoyed u with unpleasent comments.

My advice to u is the follwoing

Keep on what u are doing in this Blog and the book because u are doing a great jop.

i told u before i wounder why u are not a writer because i see great talent in ur Blog really

i will post u more when i finish what i missed in ur blog

Your friend always "as i hope"

Eng. Mohamed Nour

zatamonka said...

ياعينى على نيفين دى

حرصى حرصى وبعدين مش عارف ماله النقاش ماهو حلو
وفى فرنسا كمان يعنى عشرة على عشرة

بس طبعا اكيد الموضوع اتفركش عشان البصارة
تلاقى الكلام قلب بره على اكل تانى ولا حاجة ياعينى

قام صوت سوسن بدر اتقلب يوسف داوود

والعاقبة فى المسرات

SAMEH said...

السلام عليكم يا استاذة غادة
لقد قرأت معظم ما كتبتيه في مدونتك الرائعة ولكن لاحظت أنك ذكرتى أكثرمن مرة أن الغرض الفعلي من هذه المدونة هو الزواج نفسةوليس سرد قصص أو خبرات معينة فقط فما هو الذى تنوين تقديمة لمناقشة مشكلة الزواج ولك جزيل الشكر

Wael Galal said...

ايييييييييه فيه ايه
كل ده بتدوروا على عريس؟
ما انا موجود من زمان اهه
اوعوا تضيعوا الفرصة دي
يالله اقفي طابور و حازي يا بنت منك لها

wanna b a bride said...

anonymous

على رأيك أهو خد جزاؤه

عقبال نيفين ياااا رب
----------------------
رؤى

لا يا جماعة ماتكسروش مقاديفي

صحيح نهى انتصرت
لكن مش كل مرة بأه
----------------------
أحمد

طب مش كنت توعيني على حوار البصارة ده

طب لو عندك أي نصايح تانية من جهة العدس أو الفلف الرومي ماتبقاش تعزها عن أختك
ينوبك ثواب
--------------------
فلسطينية

حتى إنتي كمان؟؟
إنتي قريبة نيفين والا إيه؟
:))
بصي يا ستي هو طبق مصري غريب كده بيتعمل بالفول المدشوش و معاه خلطة حاجات كده أنا مش عارفاها
هابقى أسأللك ماما
-----------------
عصفورة من الشرق

بالأصالة عن نفسي و بالنيابة عنكوا

هانجيب كل حوارات الحموات من أجل الجيال الحالية و القادمة
-------------------
l.g

فكرة حلوة موضوع الرواية دي..هحاول

عجبك الكلوب؟..بس انا بقيت خلاص كلوب منور و غطيت على بقية الكلوبات
هنتجوز لما ربنا يشاء
كله بأمره
------------------
esraa hamed

لا لا لا مش عايزين نشمت في حد
بس الصراحة

كان شكلها تحفففة
------------------
fatima

مش كده برضه

بس نهى اهي طلعت بعريس
طلعت خبيثة قوي البنت دي

شفتي بأه موضوع البصارة..هو ده التجديد

دي من ضمن التحديات اللي بنواجهها في أوائل القرن الواحد و العشرين

غلابة إحنا و الله

و الله يبارك فيكي
انتي عارفة انا كمان باعزك أد إيه

تحياتي يا قمر
-------------------
اسلام المصري

أنا شكلي كده هابقى مع طونط حشرية حتى آخر العمر

ربنا يستر
--------------------
سيكولوبيا

تصدق فعلا
دي بنت خايبة قوي

كانت وفرت ميزانية الماكياج بقية حياتها

ناس مابيفكروش بأي منطق

$$Dado$$ said...

انا مبسوطه اوى اوى اوى انى كنت موجوده فى الندوة انت متعرفيش انا حصلي ايه بعديها
كانت دماغي عاليه اوى لدرجة انى مركبتش اى موصله و روحت البيت ماشيه على رجلي لما فقفقت
انا بحبك اوى يا دودو

wanna b a bride said...

unique

خلينا ورا طونط حشرية
عشان خاطرك بس

أما نشوف نصايحكوا هتودينا فين
-----------------
أكتب بالرصاص

الله يخليك يا فندم

ده بس من ذوقك

الله يبارك فيك

الجايات أكتر
:)
تحياتي
--------------------
karma

لا لا لا يا جماعة

كلكم ماتعرفوش البصارة؟
كلكم يعني ولاد عز و احنا اللي..

البصارة يا ستي أنا ما كلتهاش في حياتي غير مرة واحدة

يعني أعرفها بالشبه
هي فول مدشوش و توم و حاجات خضرا كتير كده

بصي عليكي و على الشيف أسامه و ابقي قوليله أمارة
أنا من طرف برايد اللي أحمد منصور دبسها في كتاب الفلوجة
و هو هيقوللك على طول
و ابقي ادعيلي
---------------------
anonymous

الله يخليك..او يخليكي
ده بس من ذوقك
-------------------
أكتب بالرصاص

العاشرة مساءا ده كان يوم جميل
و فعلا حسيت إني رغاية جدا و مش مدية فرصة حتى لمنى الشاذلي تتكلم

ان شاء الله الكتاب يوصل دبي
هما اللي في دبي هيغلبوا دول بيجيبوا كل حاجة

اللي خلاهم يجيبوا سيلين ديون و إلتون جون و شاكيرا
مش هيعرفوا يجيبوا كتاب برايد؟
--------------------
tawahaan

thank you very much
-------------------
anonymous

و عليكم السلام
الموضوع القادم في الفرن

انت جيت الساقية و الا لأ؟؟
-------------------
رضوى عمرو خالد

الأجندة دي ثروة قومية

بس البلية تلعب معايا بس و أنا أنشرها و أورثها لملايين الجحافل من زميلات الكفاح
------------------
محمد عبد الغفار

و ده كويس والا وحش؟؟

:))
تحياتي
-------------------
خايف من الحقيقة

أهي دي معلومة جديدة ماكنتش اعرفها

الناس كانت بترضع بصارة؟
أنا آخر علمي إنهم كانوا بيرضعوا مسقعة..بصارة دي جديدة

ثانية واحدة أكتبها في الأجندة السماوي

و فين ابنك ده؟..ماجاش الساقية ليه؟؟ استنتكوا
:)

مش عايز أتجوز said...
This comment has been removed by the author.
مش عايز أتجوز said...

مش علي ما عرفت سكة ساقية الصاوي كانت الساعة 8 ؟
مبلاش القاهرة عشان دي زحمة ..أو سيبي خريطة لأن الساقية مش زي المعرض وبصراحة القاهرة دي محتاجة مظلات مش تاكسي ولا عربية
يلا خيرها في غيرها :(

صحيح الأستاذ المهندس قال نقطتين مهمين أوي
وقفنا ليه في الطابور طالما إحنا وش جواز صح :)) ومالهم النقاشين مش وش جواز ؟ طيب ماشي معترضناش بس علي الأقل متحسسنيش إنهم بيمشوا علي أربع

فعلاً السخرية لأجل السخرية هتعملك مشاكل كتير أوي ..خدي بالك أنتي اتعرفتي وناس كتير مفتحة عينيها عليكي

يعني نقاش عقبال أملتكم و تقريبا جاي ياخدها سقالة..معلش أصل الدنيا كده زي "الحضري" يوم ترقصلك و يوم تقلبك و تديك بومبة

يعني فعلاً دي أنا لما قريت البوست تاني أخدت بالي إنها جملة مهينة
خدي بالك بقي

أريد عريساً said...

السلام عليكم انا اختك فى نفس المشكلة والمشكلة دى لازم نواجهها بكل الطرق التى يقدرنا عليها ربنا واية رايك مانعمل حزب نسائى لمواجهة هذة المشكلة ونبحث عن الاسباب والحلول

يا مراكبي said...

بجد يا برايد

إيه هي البصارة بجد؟

أنا ما أعرفهاش مع إني مش إبن عز ولا حاجة .. وبعدين الست إياها دي شكلها مش بنت عز هي كمان مادام تعرف إيه هي البصارة

ما تزعليش عليها دي..ركزي في اللي جاي بقى

NOur said...

البصارة دى يا جماااااعة :
حاجة كدا خضرا و طعمها وحش و كل الناس بتحبها ما عدا انا و شكرررا

حمامة said...

هههههههههههههه
رهيبة رهيبة يعنى
البنات دول فعلاً عليهم حركات
بس اهو نأبها طلع على شونة
فشنك يعنى

:D

Anonymous said...

على فكره انا اسمى فراس من اسكندريه شاب واريد ان اتزوج ايضا بفتاه جميله ومحترمه وصادقه وصريحه

monaliza said...

ولا يهمك وبعدين ماهو فى الاخر طلع نقاش

طائر حزين said...
This comment has been removed by the author.
Serendipity said...

Welcome back! :)

Eagerly waiting for your next post!

sabrina said...

مبروك الكتاب يا دودي
يارب يبقي فتحه خييييييييير!

Nagdi said...

de

مدونات زوجة عاشقة said...

فضلت مستنياكى من تسعة ونص لغاية عشرة ونص وكل شوية اقلب على النيل الثقافية وعبد الله يعد يعيط عايز الكرتون لغاية ما قلبت يجى فى المرة العاشرة بعد مافقدت الامل إنك تيجى ولقيت المذيعة بتقول :بصوا عايزين نتفق فى الاول إن الجواز كان (معلش مش حافظة )المهم كانت مقدمة مدونتك ...أوالله يا غادة اول ما سمعت الكامتين دول مش عارفة ليه حسيت إنها بتتكلم عنى 000كنتى زى القمر 000ربنا يكرمك ويسعدك زى ما بتسعدى ناس كتير ...

محمود فهمى said...

انا شوفتك فى التليفزيون بتقولى انك بتكرهى كلمة لسه
انا كمان عند سؤال باكـــرهه جداً هو ( ايه يا محمود مافيش حاجه جديده)
انا عندى 36 سنه وبعد تجربه مريره مع خطوبه تقليديه قررت انى مااتجوزش بالطريقه دى ابدا حتى لو ماتجوزتش خالص

جنّي - مدونة said...

من جنّي إلى عايزة اتجوز القاطنة في بيت العرايس والعرسان
الحماة شر لابد منه.. والحماة دي رهيبة ولهلوبة علشان أفحمتكوا بصنع البصارة الصعبة .. واللي ما تعرفش تعمل بصارة ماتعرفش تسلق بيض!!! ..وكمان البصارة النهاردة مع الأسعار الملهلبة أصبحت أكلة أرستقراطية (بالكاف طبعا)ما يقدرش عليها إلا اللي زهزهت معاه وبقى مقرش( لم القرشينات ) بعد ما باع الكتاب .. اللهم لا حسد ولا نق..
إلى لقاء
سلام

said57.blogspot.com
saidaziz57@gmail.com
saidaziz57@yahoo.com

د/اجدع بنوته said...

جامده اوى حكاية البصاره دى

ههههههههههه

شكرا انك عرفتهالنا

وطلع البنت نئبها ع شونه صحيح

بانتتتتتتتتر

بقى دى منظر جزمه واحده ابنها بانتررر

تحياتى يابربر

Marmar said...

الحمد لله إنها جات فى نيفين واضح إنها خبيرة فى إستخدام أدوات الكفاح علشان كدة يمكن تنفعه و هو بيلون يعنى فرشة كدة و فرشة كدة
(",)

mady said...

والنبي ياغاده انتي عسل وعسليه
وبعدين اهم حاجه انك قريتينا علي موضوع البصاره ده
حلوه المعلومات الاستراتيجيه دي ياغاده

Hamada said...

على فكرة موضوع البصاره ده اختبار مشهور لأمهات العرسان ولكن اختبارات انهات العرائس انيل وأضل سبيل

Anonymous said...

بصي بقي يا ست برايد ،، صليتي معايا علي النبي ،، البصارة دي يعني فول مدشوش ( فول ثنائي الفلقة منزوع القشرة)وبتنطبخ زي العدس تمام ،، بس اكيد طنط ام جزمة جنان دي جتلك قبل ما يوصل كيلو الفول المدشوش لعشرة جنية ،، يا بنتي اللي بياكلوا البصارة اليومين دول من الاغنياء فقط
وللحديث بقية
ميمي
من غير بلوجر لحين اشعار اخر
gamna2002@hotmail.com

fatima said...

يا أخوانا
بعد إذنك يا غادة يا ست البنات
هقولوهم البصارة تبقى إيه ... لأن لما توصل إن المراكبى
اللى هو نبع الحكمة ميعرفهاش ؟؟
يبقى الموضوع جللو مينفعشى يعدى بالساهل
بصوا بقى
البصارة أكلة مصرية صرفة إخترعتها ست البيت المصرية بعبقرية للتحايل على الملل من نفس الاطباق يوميا
هى عبارة عن فول مدشوش (مكسر لنصين يعنى و من غير قشرة) و يتحط على النار مع بصل و ثوم و خضرة زى الكزبرة الخضرا أو البقدونس و البصل الأخضرو خلافه ...و زيت و ملح و فلفل و ميه ... و تفضل على النار لحد كل المكونات ما تتهرى و تشبه العدس الكهرمان - قولولى موش عارفينه دا راخر بقى - و بعد كدا تتصفى المكونات فى مصفاة لغاية ما تبقى زى المهلبية فى قوامها كدا متماسكة بس طرية حبتين
و يترش على وشها بصل متحمر زى البصل بتاع الكشرى كدا
و تتاكل مع العيش البلدى
بتبقى تحفة
بس خلاص
تحياتى و تحيات ماما أصلها ست بيت 20 من 10 و دراستها إقتصاد منزلى
و فضحتونا يا بنات مصر ...دا ماما اللى بتقول

قطر الندي said...

بموت في اسلوبك يا برايد بجد يجنن بس تعرفي موضوع البصاره دا ماكنش يخطر علي بال حد !! بس البت نيفين دي طلعت حقنه
يارب تتجوز واحد يفطرها بصاره و يغديها بصاره و يعشيها بصاره علشان ماتبئاش تستهبل تاني

www.naksh-frakh.blogspot.com said...

هههههههههههههه. تحفه بجد حوار البصاره ده.ومعلومتك القيمه ان الراجل أو العريس مش بيتعرف من جزمته لأ من جزمة مامته.جدييييييييييييييده.

uuu said...

iiiiiiiiiiiiiiiii

Omar El-Tahan said...

مش عارف ليه وأنا باقرأ الموضوع ده افتكرت الفيلم اللي كانت ماري منيب جاية تعاين لبنى عبد العزيز .... حسيت ان دي الخطوة الجاية :)
حاسس إني هاقرأ عن الموضوع ده بالذات ... أكيد مش هايفوتك انك تكتبي عنه.

wanna b a bride said...

خمسة فضفضة

شكرا يا قمر
ده من ذوقك
-----------------
semsem
وانا أقدر أنساكم بره؟
--------------------
صيدلانية طالعة نازلة

زميلة الكفاح
مش كده برضه
بس ماما برضه كانت لازم توعين
امال إيه؟
------------------
محمد عودة

شكرا ليك جدا جدا

ماتتخيلش أنا فرحانة أد إيه؟

و أكيد هاوجهلك شكر مخصوص في بوست قادم بإذن الله
----------------------
مصري متغرب

آه شفت بالذمة؟

العيال عايزين يقرطسوني
بس أنا فهمتها
بس خيرها في غيرها بأه
:)
تحياتي
--------------------
dr.gesho

أنا برايد مغامرات
بس أنا أتجوز بس و مالكيش دعوة
:)
تحياتي
-------------------
rona

يعني أحجز في كورس الفشر اللي في المركز القومي للبحوث

و الله فكرة
--------------------
صاحب المضيفة

شفت التراث المصري يغزو دول الإتحاد الأوروبي
:)
إيه المقلوبة دي؟
--------------------
romalistic

ده بس من ذوقك
-------------------
مهندس مصري

التاسع و العاشر في الكتاب و بس

امال إيه؟؟
حبة خباثة
;)

wanna b a bride said...

moodylicious

مانا المرة الجاية هاغير الإستراتيجية
يمكن
:)
--------------------
lasto-adri*blue*

انتي بتقولي فيها؟
مشكلة مشكلة..ربنا يحلها من عنده
تحياتي لمامتك
------------------
who is w.a

طيب
------------------
سمسم
و الله انت اللي سكر
-------------------
بطوط حبوب

يا أهلا بالجدد
منورينها
------------------
fatoma

آه صحيح ازي أبناء جزر القمر و اريتريا الأوفياء؟

مش قلتلك تبعتيلي حكاية فيهم بالتفصيل؟
ياللا ابعتي قوام
-------------------
radwa

طب الحقيني بموضوع الكشري بطاطس دي
يمكن تنفع في طابور تاني
-------------------
z_diva

شفتي بأه
و في مدونة برايد الخبر اليقين
ابقوا افتكروا بس الجمايل دي
-------------------
nigro

معلش..هنعمل ايه؟
لازم نعدي و نشيييييل

يمكن
-------------------
شموسة

و الله انتوا كمان وحشينني جدا

طونط حشرية هتجيب إيه يعني؟

اكييييد كل خير

ربنا يستر

somaa said...

بصراحه انا سمعت عن مدونتك كتير بس عمرى ما دخلت وقريت تسلم ايدك واسلوبك هايل ودمك زى الشربات انا عن نفسى مبدقش فى موضوع الجواز وضارباها جزمه ويقولوا ما يقولو مغيرش نفسى وممثلش...!!؟؟
تحساتى ليكى سومه_87

قلوب بتغنى said...

صباحو اناناس يا اغلى الناس
المدونه طحن والشغل عالى والله
بالمناسبه انا اول مره اجى هنا
نصيحه اخويه من قلوب بتغنى الى عاوزه اتجوز ابعدى عن نيفين
الاقتراب منها خطر على العريس
واتمنى نكون اصدقاء وتزورينى
اشطات

koukawy said...

سؤال برئ بعد مبروك و ربنا يوفقك و شئ كميل و كل التهاني اللي نعرفها بمناسبة كتابك الجديد
هو بقي الكتاب بيتباع فين
عشان اشتريه

Anonymous said...

انا اول مرة اكتب عندك بس انا عرفتك من التليفزيون ربنا يرزقك بابن الحلال يارب يا اوختشى...........بس لى سؤال على الماشى هى رجاء الجداوى كانت طالعه فى دور ايه فى فيلم فى بيتنا رجل ؟؟؟؟؟!!!!!

Masry said...

http://khawater-mawakef.blogspot.com/

EGyptiaN GHOST هنا مدونة الشبح المصرى said...

إنتى مش معقولة أنا كنت فاكر إنى الوحيد من نوعى فى الحياة .. لكن الحمد لله لقيت أهو إن برضك لسه فيه ناس زى على الكوكب .. مش عارف أشكرك على لذاذتك ولا على رفضك للزيف ولا على تعبيرك اللطيف ولا على إيه ولا إيه ولا إيه
هقولك على سر إنتى إديتينى نفحة بجد بعد ما كنت بستسلم لبوادر إكتئاب
وأتمنى تردى لى الزيارة وأنا مش هتعبك معايالأنى كنت زهقت ومش كاتب إلا القليل
http://egyptianghost.blogspot.com
أه بس ثوانى عرفت هشكرك على إيه .. أيون .. أشكرك على إنك موجودة .. وأشكرك كمان على النفحة * ميرسى بكوم

Roka said...

دلوقتي بس عرفت انا جوازتي يه اكيد عشان انا استاذة بصااااااااااااااااااارةباظت ل

ليكوريكا said...

هههههههههههه

والله ضحكتيني يا برايد

منتظرين الجديد منك دايما باذن الله

رئـــــيسـة حزب الأحلام said...

السلام عليكم ازيك ياغادة انا شفتك فى معرض الكتاب واد اية انتى امورة وفيكى مواصفات تخلى اى واحد يتمناكى ولكن احنا فى زمن خاببت فية الامال ومش عارفة الشباب عاوزين اية

Anonymous said...

ana tani mara agy hena..bas enty gamda moooot..we 7ekayet el kohn de .. ya3ni eh besara ya tant?? :-))) deh gamda moot..bas besara7a el kohn howa ely sha3'al el ayam deh....bas sa7e7 ya3ni eh besara :-D 7aba kohn men nefsy :-))

mohmmed said...

وأنتي مبتعرفيش تعملي بصارة
عليه العوض ومنه العوض
هههههههههههههه

princess said...

انا اول مرة ادخل البلوج بتاعك مش ممكن اسلوبك جميل موت ودمك خفيف ربنا يوفقك

المتحنظل بأمر الله said...

welcome back ya7'ti

توقعنا انك حتشوفي نفسك علينا بعد الكتاب بس طلعتي أصيله ...

المتحنظل بامر الله - جدة

one of the puzzled people said...
This comment has been removed by the author.
one of the puzzled people said...

يا سلام عليكي يا برايد يا مبدعه
اسلوب روووووووعه .....
بس ياريت بلاش تستشهدي بالافلام العربي انتي كده غيرتي تاريخ السينما المصريه
((:

ٍSOU said...

ها طنط حشرية طلعت جايبة معاها اية؟
ها؟ها؟ها؟

صبرني يارب said...

حلوة حتة البصاره دي يا برايد بس يعنى فين الصيدليه دي يا برايد عشان لما نتزنق فى عروسه نبقى نيجى هناك كلكم كده قاعدين مستنين اي فريسه ؟؟؟

وبعدين ماله النقاش ؟؟؟ ما زي الفل
وبعدين ده نقاش بالفرنساوي بينقش من الشمال لليمين وبالاغ كماااااان

حقيقى مش مهم هو بيشتغل ايه برايد المهم هو عقله فيه ايه وتعليمه ايه مش الشهادات بتاعتناا لمصري دي لا تعليمه يعني اتعلم ايه فى حياته

أنا اعرف واحد معاه مش فاكره كلية ايه ولما راح فرنسا بيشتغل سواق بس عقبال املتك يعنى بيسوق عربيات من الى ما بنسمعش عنها دي الى فيها من جوه حاجات غريبه فى شركه بتأجر للامرا العرب والناس الى زي كده فى فرنسا يعنى
ولما جه يتجوز من مصر دااااااخ على حد يوافق عليه عشان حكاية سواق دي مش لاقي
بعدين اتجوز فرنسيه مطلقه ومعاها بنت رباهالها
عشان تعرفي بقى ان انتم الى مطفشين العيال كده من البلد يا براااااااايد
بس حقيقى مفاهيم هذا المجتمع فى حاجه الى ترميم لا الى تغير شامل

بوست جميل برايد

one of the puzzled people said...

ممكن تعمليلي نسخه من الاجنده السماوي؟؟؟؟؟

ميندوزا المصري said...

بس انتي لحد دلوقتي ما جاوبتيش علي السؤال المهم يعني ايه بصاره ؟؟؟؟
ابقي اسأليها كده لو عندها بنت بتشتغل في فرنسا برده
ههههههههههههههههههههه

لغز الحياة said...

99.9 % من البنات زى نفين بالظبط

الاهلي said...

و الله جباره
انا اول مره في حياتي اقرأ موضوع او حكايه لاخرها
كان ديما اخري سطرين بس معاكي مقدرتش اغمض عيني

walaa gobashy said...

ماشاء الله عليكي
اسلوبك فوق من رائع ساخر بمنتهي العفوية والذكاء والترتيب بنفس الوقت
عبرتي عن مشكلة بنواجهها كلنا ومواقف كلنا بنتألم منها
رغم ان مش كلنا طبعا بنستقبلها بنفس السخرية اللي هي شر البليه ما يضحك
ربنا يسعدك ويسعدنا ونتقابل في مدونة جديدة مع حسن بيه والاولاد
يااااااااااااااااارب انما يكون فعلا رااااجل ويستاهل عقلية بالوعي ده
الف شكر علي كل كلمة كتبتيها
http://mengdeed.blogspot.com/

M.Ezz said...

زي العسل,من احلا البلوجات اللي شفتها,طب تصدقي بقي لاعمل بلوجايةواسميها انا عاوز اتجوز,واعملها مسخرة كدة,يمكن نفرقع زي سيادتك؟؟