Monday, February 04, 2008

كنت فرحانة فرحانة فرحانة

كنت فرحانة جدا جدا جدا






أول مارحت لقيت اليافطة متعلقة بره دار الشروق و الناس بتبص عليها ..بقيت عايزة أوقفهم و أقولهم أنا دي.. ده كتابي



دخلت الدار أنا و بابا و دينا صاحبتي أسأل على الكتاب..مافيش كتاب..خلص


فرحت قوي ..بس خفت جدا حد ييجي و مايلاقيهوش..كان فيه شاب مصري أصيل بيسأل عن الكتاب ..كان بيقولهم عايز كتاب..كتاب..و شكله انكسف يقول إسمه..قالهم عايز كتاب "غادة عبدالعال"..قالوله خلص و هييجي كمان ساعة..كنت هاعيط و عايزة امسكه من ايده و هو خارج و أقوله عمو يا عمو طب استنى شوية هييجي دلوقت..مش عشان حاجة ..عشان أنا قلت للناس تعالوا و الكتاب هيكون موجود و مش عايزة أطلع عيلة


لقيت رحاب و ووقفنا سوا شوية بره و بعدين ردت فيا الروح لما شفتهم داخلين بكميات من الكتاب..عرفته من لونه الخضر الجميل..ماكنتش مقتنعة بيه خالص قلتلهم و أعمل كتاب أخضر ليه؟هو أنا القذافي؟..بس أستاذ سيف سلماوي قاللي ماتخافيش و كان عنده حق.. بعد كده عجبني جدا جدا و الله


جرينا أنا و رحاب و قعدنا و كانت غادة محمد محمود لسه ماجاتش


الساعة كانت لسه ماجاتش 3 ..أستاذ احمد الزيادي قالنا لسه بدري..بس احنا ماقدرناش قلناله هي المرة دي بس ..الكتاب الجاي بأه مش هتلاقونا أصلا..و جم الناس و بدأنا نمضي

واكتشفت اني مش عارفة أكتب ايه بالظبط؟


شوية كده و عرفت و بدأت أكتب و الناس بدأت تيجي و تكتر


كنت فرحانة قوي قوي قوي


كان فيه ناس كتير بييجوا و يقولوا:هي دي اللي عايزة تتجوز و يقفوا يبصوا عليا من بعيد كأني تمثال تحتمس التاسع..طب ماهي كويسة أهه..أمال ايه بأه؟؟

و كان فيه شاب مصري أصيل برضه مصممم تصميم لا يتزعزع انه يصورني و قعد يحاول يحاول لغاية الفلاش أخيرا ما اشتغل و صورني صورتين ..تفتكروا فيه في الموضوع إنه؟


طبعا كان فيه ناس أساسا مش فاهمين احنا هنا ليه

اللي يسألنا عن سعر كتاب في ايده و اللي جه يسألنا:سراي ألمانيا فين لو سمحتي؟


و فيه رجل جه أخد 3 كتب من كل واحدة فينا و خللانا نكتبله اهداءات لبناته التلاتة و احنا فرحانين بالرجل المصري المثقف ده..بس البنات كانوا صغيرين و انا ماكنتش فاهمة ليه عايز يجيب لكل واحدة فيهم كتاب اسمه عايزة اتجوز


بس اذا عرف السبب بطل العجب


بعد ثواني لقينا ناس تانيين جايبين كتبنا في ايديهم بنفتحها عشان نكتب الإهداء فوجئنا انها نفس الكتب اللي كان واخدهم الراجل ده لبناته


أتاريه كان فاكرنا بنوزعهم ببلاش و لما عرف انه هيدفع تمنهم رجعهم من سكات على الرفوف تاني..هي دي قيمة العلم و العلماء..إيييييه الله يرحمك يا زكي يا جمعه...مين زكي جمعة ده؟؟


أنا اتنرفزت قوي في الأول


و بعدين قعدت أضحك


أصلي
كنت فرحانة خالص خالص خالص


فيه ناس كتير ماكنتش أعرفهم بس كنت فرحانة بيهم جدا..نسبة الولاد-لدهشتي- كانت أكبر من نسبة البنات (تفتكروا فيه أمل؟)

:))


حتى كان فيه رفيقة مكافحة من تونس جت اشترت الكتاب و قالتلي انها اشترته عشان يساعدها تتجوز..يظهر كانت فاكراه كيف تصطادين عريسا الجزء التاني..أنا مارضتش أصدمها هي تبقى تكتشف على مهلها بأه


كان فيه جروب عسل قوي من اسكندرية و دمنهور..والا كان جروب من اسكندرية و جروب من دمنهور؟ هما كانوا ولاد على بنات و واحد فيهم عرفني بيهم اسم اسم..أنا طبعا و بسبب اللبخة و مبادئ ألزهايمر مبكر مش فاكرة منهم غير "مروة الزراع" ..صح الإسم كده والا غلط ده كمان؟
و من إسكندرية كمان "لماضة"..يا عيني ركبت القطر 4 ساعات و نص عشان تيجي..بكره يا بنتي أردهالك..اعزميني بس انتي على أي حاجة هتلاقيني جاية جري


شفت pink unicorn
وسألتها بينك بال سي والا بال كيه ...شفتوا الخيبة قال و عاملة نفسي خريجة صيدلة و بتاع


فيه واحد رزين كده قاللي اكتبيلي اهداء..قلتله لمين قاللي أي حد..شوية كده و قاللي طب اكتبي للطائر الحزين
قلتله بغباء ..هو انت؟ أنا كنت فاكراك بنت
بصلي بنفس الرزانة و قاللي

الله يكرمك


شفت رضوى و عمرو عزت و شفت بنت مصرية و فكرتها انها أول واحدة نادتني ب"برايد"


شفت سارة
sorsara
و كان معاها بنت خالتها كمان ..شفتوا العائلات المثقفة


شفت ميشيل حنا و اداني كتابه "برسيم دوت كوم" هدية و كان معاه حسام مصطفى إبراهيم و هو كمان إداني كتابه"يوميات مدرس في الأرياف" ..شفتوا الندالة هما الإتنين يدوني كتبهم هدية وأنا اخليهم يشتروا كتابي ..ندالة ندالة يعني


و فيه شاب كمان بعد ماكتبتله إهداء على الكتاب اداني شريط كاسيت هدية ..لا ..مخكوا مايروحش لبعيييد..الشريط إسمه "طرق على أبواب السماء" ..بصتله باستغراب..قاللي دانا جايب 12 و باوزعهم ثواب...!!!عموما فيه الخير برضه


شفت المهندس المصري وإيمان صاحبة بلوج "يوميات عانس حقود" مع إنها 26 سنة ..عانس إيه ..هي مستعجله على إيه مش عارفة؟و اللي وقفت جنبنا وقفة جامدة ..كانت واقفة تفهم الناس اللي كل شوية يقفوا قدامنا بغباء كده و يتفرجوا علينا ..حضرتك دول كتاب و بيمضوا كتب للي بيشتري هتشتري والا تتفضل؟

جامدة جامدة إيمان..شكلنا هنبقى اصحاب ..فلتسقط نهى الخبيثة


وشفت "أم احمد" بس كانت جايبة معاها عمر و سايبه احمد في البيت ..كانت كتبتلي تعليق السنة اللي فاتت قالتلي انها اتجوزت من معرض الكتاب كانت بتحضر ندوة شافها و اتجوزوا..شفتوا البساطة؟..اتفائلت خير طب هي كانت بتحضر مابالك انا بامضي بأة..بس على مين؟؟..ماتلاقيش

:)


قولوا شفت مين كمان؟


أ/خالد الخميسي صاحب كتاب "تاكسي" الشهير جه و سلم علينا و كمان اخد الكتب و كتبناله إهداءات


و كمان كان فيه صحفي من "بص و طل" و أخد مننا أحاديث


و كان فيه كام ست و بناتهم عرفونا من "صباح دريم" ..آه مانا ماقولتلكوش مش احنا طلعنا في برنامج "صباح دريم الثلاثاء اللي فات؟...ماقلتش عشان قلت دي أول مرة موجات البث التلفزيوني تتلاقى مع وش حضرتي ..لازم أشوف النتيجة الأول و بعدين لو طلع حلو ..نذيع على اليوتيوب ..لو طلع وحش ..يبقى كفا الله المؤمنين شر القتال


كمان كان فيه ناس بيخمسوا في الكتاب يعني تلاق 2 مع بعض ..3 مع بعض ..مع إني مرارا و تكرارا قلتلكم ان العلم لا يكيل بمحشي البتنجان..بس مافيش فايده


قمة سعادتي بأه لما كان حد بيقوللي باستفهام
wanna b a bride?
كنت باعرف على طول انه من قراء البلوج..أيوه كده الواحد يبقاله عزوه


كمان لما بنوتة حلوة إسمها ندى قالتلي انها اتخذت من احدى الجمل اللي كتبتها شعار ليها في الحياة
الجملة من بوست "أنا مش صفر على الشمال" و كانت بتقول "البنت لازم تعيش حياتها على إنها حياتها مش على أساس إنها تتر لمسلسل لسه مابتداش"...ماتتخيلوش سعادتي كانت أد إيه..لأن الجملة دي كنت حساها قوي لما كتبتها و كان نفسي بجد كل بنت تحسها و تقتنع بيها
و تخيلوا ان جملة تقولها حد يعتز بيها
إحساس جميل فعلا


عشان كده


كنت فرحانة موت موت موت


فيه ناس بأه كانت جاية متأخرة زي عبد الفتاح" صاحب بلوج "الإرهاب المنزلي" و سحر اللي اتعرفت عليها لما صورت الحلقة بتاعت "البيوت أسرار في قناة عين "عشان هي المعدة بتاعة البرنامج


آه ماقلتلكوش أنا إني صورت الحلقة دي ..أصلي ماكنتش عارفة ايه اللي هيجرالي فيها..كنت انا و دينا بشير الديك و إيمان صاحبة بلوج"يوميات عانس حقود" و قدامنا 3 دكاترة منهم واحد أول ماشافنا قالنا "هو انتوا بأه العوانس؟"..لأ و إيه أستاذ في علم الإجتماع..هو ده بأ اللي كان هيخليني أصدق إن العلم فععععلا يكيل بمحشي البتنجان..بس ماتقلقوش إحنا برضه ظبطناه في الحلقة..م/سهير جودة مذيعة البرنامج ربنا يخليها كانت بتدافع عنا و كانت طول الحلقة بتستشهد بالكتاب بتاعي و قالت عليه كلام جميل قوي..إبقوا شوفوها هتتذاع الجمعة الساعة 9:30


الناس بتوع الشروق بأه كانوا فرحانين بينا جدا الأستاذ إبراهيم المعلم جه بنفسه و اتصور معانا و كتبناله على كتبنا إهداءات ..أستاذ أحمد الزيادي كان واقف جنبنا زي أبو العروسة"بشرة خير و الله" و الأستاذ سيف سلماوي كمان كنت حاسة إنه فرحان بينا قوي..و كل الناس بتوع الشروق فعلا فعلا كنت حاسة إني وسط عيلتي و أهلي


و لما وصلت الساعة 5 كانت نسخ الكتاب خلصت-بسم الله ماشاء الله ..بسم الله ماشاء الله..الساعة 5 واخدين بالكم- و فضلت آخر نسخة و قلت لازم أكتب للي هياخدها إهداء كبيييير فأيمن اللي من أسرة الشروق و اللي كان بيقولي انه مابيسيبش حد يخرج من الباب من غير نسخة من الكتاب صمم ياخدها..كتبتله إهداء كبيييير و قلت له شكرا على المجهود الفظيع ..ليك نسبة..بس ...في الطابعة العاشرة..و هو كان فرحان قوي..متفائل قوي أيمن ده


بعد كده خلاص قمنا و فيه ناس كانوا لسه بيسألوا على الكتاب بعد ماخلص..كان نفسي ألاقيلهم أي نسخة ..بس كل النسخ خلصت-الساعة 5 ..فاكرين؟-بس أكيد فيه نسخ تانية نزلت في الأيام اللي بعد كده

بعد التوقيع ماخلص شميت خبر إن الأستاذ ريادي و الأستاذ سيف رايحين يقابلوا بلال فضل..انا طبعا إستموت فيها و اترميت ع الأرض و اتمرمغت في التراب..هاروح يعني هاروح..(طبعا مش قوي كده أنا مش أوفر للدرجة دي)قالولي تعالي روحنا مالقيناهوش

واحنا راجعين كان فيه توقيع في الدار المصرية اللبنانية ل الشيف أسامه و أحمد منصور الصحفي بالجزيرة دخلنا نسلم عليهم ..قالوا للأستاذ أحمد دي كاتبة جديدة بس كتابها خلص..بصلي قوي كده و قاللي طب مافيش معاكي نسخ..كان معايا نسخة كتبتله إهداء و إدتهاله هدية..قام هو كتبلي إهداء على كتابه"معركة الفلوجة" فاضطريت أشتريه!!!!!!! الشيف أسامه قاللي خدي كتابي ده اللي هيخليكي تتجوزي..ضحكت و قلتله لا شكرا دانا هايلة في الطبيخ "وانا معايا فلوس للكتب دي كلها؟

اليوم كان جميل جدا و انا إستمتعت بيه قوي..ماعدا موضوع الفلوجة ده

:)


و أنا من موقعي هذا أشكر كل أسرة دار الشروق و كل الناس اللي جم و كل الناس اللي ماجوش


طب ليه باشكر اللي ماجوش


مش عارفة؟


يمكن بس عشان أنا


فرحانة طحن طحن طحن


آه و الله


-----------------------------------------------------------------

الصور و الفيديوهات المرة اللي جاية إن شاء الله...الأسبوع ده بس عليكم بالبيوت أسرار يوم الجمعة و احتمال فيه حاجة تانية يوم الأربعاء هاقولكم عليها بكره لما تتأكد







99 comments:

لماضة said...

:((
انا كفايه انى جيت وشوفتك يا برايد
وقتلك اانى راكبه القطر 4 ساعات ونص من اسكندريه
بس وفرحانه انى هشوفك
مبروك يا جميله وعقبال ما تعملى كتاب عاوزه اجوز بنتى

wanna b a bride said...

طب و ليه زعلانة؟

طب و الله فاكراكي بس معلش-حكم السن بأه- إستني إستني هاعدل البوست

إيمان said...

ربنا يزيد فرحتك كمان وكمان أنا كان نفسى اجيلك جداااااااااااا
لانى متابعكى من زمان وأحد المرابطين لك على أرض المعركة وان كنت حكايتى وظروفى
مختلفين جدااااااا

بس اعمل اية أخوى كان مفروض هيوصلنى بالعربية نظرًا لانى كنت تعبانة...
بس راح لخطيبته طبعا احنا صفر على الشمال فى الحالة دى
ولا كأننا كنا أخوات وبينا 11 شهر
بس ليه حق الناس مقامات هو خاطب.........وأنا وأنا أنتى عارفة الباقى
وكان ليا ناس رايحين السبت وملقوش الكتاب
وسالت امس على الكتب لسة منزلش المكتبات
قوليلى أعمل اية بأة
ربنا يفرحك كمان وكمان
وأتمنى نتواصل ونكون اصحاب
مش عشان الشهرة خالص خالص
احسن هوس الشهرة يصيبك وتقولى كل اللى هيصحبونى عايزين يشتهرو
مستنية الصور والفيديوهااااات على أحر من الجمر

تحياتى ومودتى

إيمان said...

على فكرة بمناسبة الشاب المصرى الاصيل اللى اكسف يقول اسم الكتاب
أنا كمان وانا بتصل بدار الشروق
رد عليا شاب اتحرجت بردو فى الاول وقولتلو اسمك
قالى اسمك الكتاب اية
فقولت مبدهاش وقولت الاسم بحرج
وقولت يمكن يتلكك ويطلع أصيل ويعمل مش فاهم ويفتكرها دعوة باسلوب مبتكر
ويحدد موعد مع بابا
وانا هتلكك واوافق
واحدد كل المواعيد والايام(وش بيضحك)

كل الحب وتمنياتى لك بكل التوفيق

aya said...

يعنى انا طبيعية يا جدعان؟
اصل انا كمان اتكسفت
فابعت واحدة صحبتى جدعة
قالتله من فضلك عايزة كتاب غادة عبد العال اللى لونه اخضر

وقالها خلص

على العموم يا دودو انا منتظرة اخوه بقى
وساعتها هنعملك قاعة لوحدك فى معرض الكتاب
واعذورينى بقى كان نفسى اجى اوى بس معرفتش والله

عارفة انا فرحنالك اوى اوى
وبجد حاسة انه انا اللى نشرت الكتاب مش انتى

يالا ربنا يباركلك يا جميلة يا رب
ومستنين الصور بقى

مبروك يا دودو

M.Sameer said...

طب اللي مش في مصر يعمل ايه ؟

ممكن حفل توقيع في العيد يمكن الحقه ؟

داحنا زمايل مخروبه واحده

:)

مهندس مصري said...

ياه طب كويس ان اسمي مكتوب مع اني ما أشتريتش الكتاب لأن المدونةزي ما قلتلك متسيفة كلها عندي
:)
ثم احنا كنا مربطين مع بعض كلنا يا بنتي و حاطين خطوة أساسية في زيارة معرض الكتاب اننا نعدي عليكي الساعة 3
و أنا جاي من دمنهور مخصوص و حاطط في دماغي اني لازم أسلم عليكي
:)
ثم عانس ايه
ما انتي زي القمر أهوه الناس عميت و لا ايه
ثم انتي لسه بترفضي في عرسان يعني لسه في الطالع
:)
عموماً تفاصيل يوم معرض الكتاب ده كله هانزلها في بوست عندي بكره
و لازم تيجي و تعلقي أنا قلت لك أهه
دا أحنا محافظات زي بعضينا
:)

ثم أحمد الصباغ ضاع منه الكتاب اللي كتبتي له الإهداء عليه و لقى انهم ادوا له كتاب تاني من غير اهداء و بقى متضايق
انما صرصارة و لماضة حافظوا على النسخ الممضية

على فكرة انا قابلت بلال فضل بالصدفة كان ماشي في المعرض و سلمت عليه بس اتخمت و ما عرفتش اتصور معاه
كنت مزبهل و انا شايفه وجهاً لوجه
و عموماً عندي تاج في المدونة حالياً لو تحبي تجاوبيه اتفضلي
:)
مستنيكي بكره
:)

Lasto-adri *Blue* said...

ياه يا برايد
كان نفسى آجى والله بس للأسف كان عندى شغل يومها

حفل توقيع جاى بقى أبقى احضرهولك ان شاء الله

sa7afia_rwsha said...

الف مبروك يا غادة على الكتاب قد اية كان نفسى اشوفك
البلوج بتاعك مسمع فى ال26 محافظة وتوشكى كمان
احب انك تشرفينى فى البلوج بتاعى
سلام
http://namema2.blogspot.com/

محمود السيد \ مدونة فين الوطن said...

مبروووووووووك
وعقبال نفاذ الطبعه ال1000
بس والله انا كنت نفسي اجى بس ظروف الشغل
بجد الواحد حاسس انه كان مع معاكى وانتى بتعيشي اليوم الجميل ده

وياريت لو الكتاب هينزل فى المحافظات تقوليلنا هينزل فين بالضبط عشان نقدر نشتريه

Anonymous said...

انا كمان كان لى الشرف انى اروح المعرض واشوف حضرتك وانا كنت من الناس اللى جت وكانت بتبص عليكى من بعيد زى ما قولتى بس والله مكانش قصدى اقول ماهى كويسة اهوه امال ايه بس انا كان الفضول هيقتلنى عايز اشوف برايد اللى انا كنت بسمع حكايتها وافكارها وحواديتها شكلها ايه والفلوس معايا كانت خلصت فمعرفتش اشترى الكتاب فانا كنت هاطلب توقيعك على ايه على التى شيرت
انا اسف اذا كان بصى ليكى بالشكل ده ضايقك بس بجد انتى كنتى منورة القاعة وبجد بجد انتى زى العسل
بس برغم من فرحك وضحكتك اللى كانت منورة وشك الا ان عينيكى كلها حزن
جبتيه منين
متزعليش منى وربنا ينجحك كمان وكمان

Nigro said...

يااااه يا دودو (لو تسمحيلي بالدلع)..أخيراً.. دا أنا من يوم السبت و أنا بدخل على المدونة كل ساعة مستني أقرا البوست الجديد و أعرف اللي حصل يوم الجمعة.. و أصبّر نفسي بقراية أي حاجة قديمة تاني.. و بجد كنت مشغول يوم الجمعة علشان كده مقدرتش آجي.. بس خير.. و أنا عرفت من مدونة العانس الحقود انها صوّرت حلقة في برنامج البيوت أسرار و قالت انها كان معاها غادة عبد العال بس ماقالتش الحلقة هتتذاع امتي.. فأنا بقى عملت دوريات على قناة عين و مخليهم في البيت كمان كل شوية يجيبوا القناة جايز البرنامج ييجي على سهوة ولا حاجة.. والحمد لله انك قولتي.. و أنا مستننننننييييييييييييي الحلقة.. و كفاية كدة علشان زماني زهّقتك مني.. و اعتذاراً مني على اني ماجيتش المعرض أنا كتبتلك حاجة كده يا ريت تعجبك:
غادة يا ست الحسن يا أحلى مستقبل
لكل راجل بجد.. مش جي يستهبل
عقلك يا غادة جميل و يا محلى أفكارك
و كل يوم في البلوج بيزيدوا زوارك
كل اللي قولتيه كان جميل بس اللي جاي أجمل
من حب ربنا ليها.. حبّبنا في برايد
تدوينة ورا تدوينة ..و حبنا زايد
يا رب نفرح بيكي .. أهلك وأحبابك
و يجيلك ابن الحلال و يدق على بابك
و نسمعها منك بجد"I’m going to be married"

عـلا - من غـزة said...


:))))

يعني بجد يا برايدتنا العزيزة .. انا فخورة جدا بيكي وبرحاب وغادة التانية .. انا عن نفسي فرحانة فرحانة قدك ويمكن اكتر شوية !
ليكي كل الحق انك تفخري وتتفشخري كمان بنفسك وبكتابك وبمدونتك وبكل كلمة كتبتيها هنا او هناك .. :))
ربنا يكرمك كمان وكمان ومين عارف الخطوة الجاية حتكون ايه
ياريت بس تستعجلي كمان في قصة اليوتيوب لأنو انا عايزة اتفرج ومش عندي ريسيفر عربي :(

تحياتي القلبية الخااالصة

karma said...

ألف مبروك يا برايد.
متابعة اخبار الكتاب والمعرض... شكرا لانك شاركتينا تفاصيل فرحك، (<~~ فال خير ) وفرحتينا معاكي.



الله يديم الأفراح يارب.

* متى حنلاقي الكتاب في الخليج؟
الكلام ليكي يا شروق ;)

وضـّاح said...

ذهبت لدار الشروق أسأل عن الكتاب .. لم أجد ولا نسخة .. قلت اللهم لا حسد
:D

سألت عن الكتابين التانيين .. وجدت كتاب رحاب .. اشتريته , وزعلت فعلا إني لم أجد البقية , كان نفسي أساهم في حل الأزمة
:D

احتمال أروح بكرة إن شاء الله

ولكن صدقيني .. فرحت جدا إن في شباب ما بينا استطاعوا أن يعبروا عن أنفسهم والوصول إلى القراء

ربنا يكرمك ويصلح لك حالك .. ويكرمك بعريس

flashawy said...

أنا رحت على الساعة 7 قالولي الكتاب خلص .. وانهم خلصوا اللي موجود عندهم كله في المعرض ولازم تيجي بكرة بس بدري ..

كان نفسي أجي وتوقعيلي على الكتاب .. بس يلا مش مهم .. المهم ياريت تحطي حلقات البرامج على يوتيوب متنسييش والنبي .. أنا همووت واشوفك .. !!

رضوى عمرو خالد said...

ازيك يا غاده
احنا مبسوطين قوووي انك فرحانه
ربنا يفرحك كمان وكمان

bos bos said...

ربنا يفرحك ويوفقك كمان وكمان
انا كمان فرحانة ليكى جداااااااااااا
وكاليش دعوة أبعتيلى نسختى على البيت

تحياتى لكى

Misrdream said...

من زمان وانا متابع مدونتك
لكن عمري ما علقت فيها موش عارف ليه يمكن من روعت اللى بتكتبيه الواحد بينسي يسيب تعليق
المهم فرحت جدا لما عرفت انك نزلتي كتاب وقررت اعلق المره دي علشان اهنيكي على كتابك ده ولو كنت فى مصر كنت اشتريته مع ان المدونه عارف كل موضيعها

المهم عاوز بقي احرق المفاجئه بتاعتك
وهنزل هنا لينك لفيديو لقيته ليكي على youtube

http://www.youtube.com/watch?v=cUn5c780aXc

مره تانيه الف مبروك

رضوى عمرو خالد said...

السلام عليكم ورحمه الله وبركاته
شوفت الفيديوهات
ايه القمر ده يا بنتي
ان شاء الله هتطلعي بحاجه من المعرض
طبعا زهقتي مني تعليقات المره ديه

بحبك يامصر said...

والله يا برايد انا كان نفسى اجى بس ظروفى مكنتش سامحه تتعوض فى الكتاب الجاى ان شاء الله او تتعوض فى فرحك قريب ان شاء الله

Nigro said...

ربنا يفرحك كمان وكمان و كمان وكمان وكمان و كمان و كماااااااان..شوفت الفيديو بتاعك اللي على يوتيوب وما عنديش غير تعليق واحد"يا مسرور هات السيف و اقطع رقبة كل الرجالة اللي في البلد".. يلا خلينا نطهر البلد منهم دول سلالة كسر و ماتستاهلش القمر دا

آمنة said...

الله يا برايد هوا انتي شفتي أحمد منصور لايف. وكمان وقع لك على كتاب وبرضه زعلانة!! لألأ ملكيش حق

ألف مبروك ع الكتاب شكله حقق نجاح باهر

Anonymous said...

غادة الجميلة الف مبروك يا دكتور
فرحت لك والله كانك بنوتي
ربنا يسعدك
ويفرحك
وتنولي كل اللي بتتمنيه
وبجد الرجالة جري لها ايه
بصي بقي انا باحجز اهه بنتك ان شاء الله لابني
مبروك يا عسولة علي الكتاب وانا عارفة ان شاء الله قريب علي حاجة تاني

šσяšαяαα said...

هيييييييييييييييييييه

اسم صورصارة لعلع يارجااااااااااالة

انا فرحاااانة اوى انك افتكرتينى وسط هذا الجمع الهائل

انا كنت فرحانة عشانك اوى ربنا يوفقك وتبقى اشهر مشهورة فمصر والعالم اجمع:)

كان نفسى اول مارجعت من المعرض انى اجى واهنيكى هنا كمان بس النت كان لسا مفصول عندنا للاسف

وان شاء الله الكتاب الجاى هنكون معاكى
امال ايه احنا عاوزين سلسلة كتب مرة واحدة احنا طماعين:)

ربنا يوفقك لكل خير واتمنى اشوفك تانى قريب ان شاء الله

سلاااااااااام

mo'men mohamed said...

انتم كدة بتشوقونى انى اشترى الكتاب ده
انا لسه صغير أه
بس اهه حاجة للزمن
جزاكم الله كل خير ونفع بك
السلام عليكم

adel-samak.blogpost.com said...

الف مبروك الكاتبة المتجددة غادة او برايد البلوج بتاعك بجد بجد محصلش حقيقى بهنيكى من كل قلبى كان نفسى اجى المعرض بس انا مش فى مصر انا بكتب ليكى من دبى ومتابعك علطول وشوفتك على دريم وان شاء الله انا متوقع انك هتكونى خليفة الاستاذ احمد رجب مش عارف لية ربنا معاكى

Soooo said...

ربنا يفرحك كمان وكمان وكمان
وان شاء الله هتكون فاتحة خير عليكي وتألفي بدل الكتاب عشره ومليون

ملحوظه
اسم الكتاب ولونه الاخضر والرسمه اللي عليه والطباعه بتاعته تحفه بجد
والاتحف منه هو المواضيع نفسها

ايه الاتحف دي؟؟؟؟


سلاموووووووز

Big Code said...

يا بنتي حرام عليكي
انا رحت الساعة 6 ولفيت على كل اماكن دار الشروق على الكتاب
وكنت في الاول مكسوف اسأل لكن بعد كدة بقيت بسأل وانا تقريبا عارف الاجابة انه خلص

وهما نفسهم كانوا مستغربين وهما بيقولوا خلص

:)

على العموم ان شاء الله هلاقيه بعدين

حبيت من موقعك هذا اقولك
الف مبروووووووووووووك

تحياتي

Noony said...

على فكرة انتي أموووووووووووورة وبنوتة سكرة خالص

أنا كمان كنت هناك واشتريت الكتاب ووقعتي لي عليه..بس مردتش أسيح لنفسي
:$
100000000 مبروك...المرة الجاية يبقى مجلد

:)
نهاد

رفقة عمر said...

الف مبروك
عقبال الكتاب الميه
بس طبعا وانت محققه اللى فى بالك اللهم امين يارب العالمين

mohamed said...

مبروووووووووووك
مبروووووووووووك
مبرووووووووووووك

أنا بقى حعمل بلوج
أسمة
مش عايز أجوز
بس بجد أنا فرحان لفرحك

ابن حـجـر الـعـسـقـلانـى said...

ألف ألف مبروك يا برايد .. و عقبال الطبعة العاشرة من الكتاب العاشر

طب إيه رأيك نعمل يوم الأول من فبراير دة عيد قومى للمدونين .. و ناخده عطلة رسمية .. و نطلب من الريس يطلع يخطب خطبة .. و تقام الأفراح و الليالى الملاح أربعين ليلة و ليلة ؟؟

و ألف ألف مليون مبروك مرة تانية

سهر الليالى said...

ألف ألف مبروك يا غادة
ويارب يهنيكى ويسعدك دايما وينولك اللى فى بالك كمان

بجد فرحتلك جدا وحقيقى كان نفسى أجيلك مع لماضه بس معلش تتعوض فى الكتاب الجاى إن شاء الله

تحياتى
وألف مبروك

fatima said...

غادة
يا ست البنات ...
أنا الى كونتى بتمضيلها النسخة فى اول التصوير ..خليتك تمضيها بأسم أم يوسف ..عشان تبقى فى مكتبته ومهداة ليه من أجمل كاتبة أدب ساخر فى مصر ..
انا الى شكرتكم انتى ورحاب انكوا جايين بدرى ..قولتولى دا أول كتاب بس ..بعد كدا ولا هتشوفنا لما نشتهر..
يا خرابى على خفة الدم و الشربات المكرر..
زيارتك لمدونتى أسعدنى جدا لدرجة لا تتصوريها ..
حبى وأعجابى الدائم..

احمد said...

يالهوى يا برايد كتاب كمان اشطه يا حاجه وصلتى للعالميه اهو نشغل الحسد ونعد نحسد فيكى

يا رب الاقى نسخه اشتريها

بجد ربنا يوفقكك ويارب اشوف مدونتك تمسليه على التليفزيون فى رمضان الجاى

Pink Unicorn said...

المعرض كان منور يا قمر ..
:-)
بجد انا كنت فرحانة اوى عشانك .. وجيتلك من اسكندرية مخصوص .. بس كله يهون لأنى بجد كنت فرحانة ..
عقبال مانيجى نبارك لك على الكتاب الجاى .. و قبل الكتاب الجاى الفرح ان شاء الله ..
كنت مبسوطة كمان انك افتكرتى اسمى .. وبالنسبة اللسى والكى يابنتى ولا يهمك .. انا فاهمة ان مع الزحمة دى كلها والموقف اكيد كنتى مرتبكة ..
:-)
ان شاء الله حفلة التوقيع الجاية حتبقى قاعده ايه .. اسد .. ولا حيهمك خالص ..
بجد الف مبروك يا غادة و ربنا يسعدك يارب ..

Anonymous said...

������ ������� �� ������ �� ����� ���� �� �� �� ���� ����� �� ���� �� 14 � �� ���� ��� � ���� �� ���� ��� ������ ������� ���� ��� ��� ���
������ �� ����� ������ ������ �� ���� ���� ��� �� ��� ���� ��� ���� �� ����� ������ ����� ��� ������ ���� ��� ����� ���� ����� ������ ��� ����� ������
�� ���

Anonymous said...

������ ������� �� ������ �� ����� ���� �� �� �� ���� ����� �� ���� �� 14 � �� ���� ��� � ���� �� ���� ��� ������ ������� ���� ��� ��� ���
������ �� ����� ������ ������ �� ���� ���� ��� �� ��� ���� ��� ���� �� ����� ������ ����� ��� ������ ���� ��� ����� ���� ����� ������ ��� ����� ������
�� ���

Anonymous said...

الكلام نزل متشفر

Anonymous said...

انا ام احمد ياجميل
بسم الله ماشاء الله عليكي ذي القمر وانا مروحة من عندك عماله انا واخواتي البنات نتكلم عن جمالك يابنتي ده انتي مافيكيش غلطة لا في الشكل ولا في الشخصية حتي الطول ممتاز بس ده اكدلي ان شبابنا ماشاء الله عليهم اتعموا بالثلث ربنا يوفقك ويرزقك باأبن الحلال اللي يستاهلك

L.G. said...

عزيزتي حتى لو مجتش أكيد حسأل عن الكتاب في معارض دار الشروق باسكندرية ولو المعرض جه حروح أسأل عليه وححتفظ بالنسخة لحد ما أشوفك وتمضيلي عليها لأن نجاحك أثلج صدري

Z_Diva said...

congrats 3alktab ya bride
we 32bal mat5wyeh ya5tchy :D
best wishes isa
matb3tely nos5a a7san ana 5arg elblad :D
mt5afish ha7sbk lma arga3 :D

Ahmed Al-Sabbagh said...

وما قابلتيش أحمد الصباااااغ؟؟

ندااااالة

هههههههههه


شكلك انتى اللى قلبتينى فى الكتاب المتوقع عليه

وشكلك هتاخدية تبيعية على اساس طبعا انه نسخة نادرة لأن انا مسكتها بإيدية
:)

ياااااااااااارب

يوفقك وتكون فاتحة خير عليكى

وينجح الكتاب ودار الشروق تقعد تنزل لك كتاب كل سنة

بس مش عايز اضواء الشهرة تشغلك بقى عن انك تفكرى فى فكرة الكتاب الجاى

واحنا كلنا معاكى فى اى مساعدات

لأ.. فكرك مايروحش لبعيد
فلوس ايه ؟ اقصد مساعدات معنوية
ههههههههههههه
(وش مطلع لسانة)

تقبلى تحياتى

أحمد

ميشيل حنا said...

ألف ألف مبروك يا برايد
بس كله كوم والراجل اللي لم النسح
لبناته ده كوم تاني
حاجة تفطس م الضحك!
وبعدين لو ببلاش ما كفاية كتاب واحد طيب!
نظرية أبو بلاش كثر منه لازالت تستمر وتتوغل.
تحياتي ومحبتي.

حسام مصطفي إبراهيم said...

الف الف مبروك يا غادة تستاهلي اكتر من كده لان كتابتك فعلا متميزة ..
انا اتشرفت بحضور حفل التوقيع .. ويا رب من نجاح لنجاح .. واتمنى اتشرف بزيارتك لمدونتي

Ashraf Al Shafaki said...

I know for SURE beyond ANY doubt that this blog WILL be made into a TV series or movie. I am SURE of that.

أنا متأكد بما لا يدع مجال للشك أن كتاب عايزة أتجوز سوف يتم تحويله إلى علقات تلفزيونية أو فيلم سنمائى، أنا متأكد من حدوث هذا بنسبة مئة فى المئة.

المهم بس لما يعملوه تبقوا تفتكروا إنى قلت. خليكوا فاكرين، أدينى قلت أهه.

warDaya said...

لآلآاااااااااااا
بجد حرام
انا وسحابه صاحبتي شدينا الرحال ورحنا المعرض
على ماوصلنا اساسا كانت الساعه 4 وربع
روحنا
لاقينا زحمه جامده جدا
وفي طربيزه عليها مفرش اسود وقدامها كرسي
فضلنا نبص على الكرسي وهو فاضي كنا هانعيط
فضلنا وقافين تايهين وكنا خلاص هانمسك في كم كل واحد ونقول
عاوزه اتجوز يا ولاد الحلاااال
ههههههههههههههههههههه
كانت هاتبقى فضيحه
بجد والله فضلنا ندور ومش عارفين نسأل ازاي ولا نعمل ايه
ربع ساعه وباعدين قعدنا نقلب في الكتب مالقيتش ولا نسخه
بجد بجد كانت هاشد في شعري واقعد اعيطلهم
لاقيت واحد كده لابس بدله لونها رمادي او بيج كده معاه 3 نسخ
مش عارفه هو كان تبع دار الشروق ولا ايه
انا لاقيت وشي احمر والدم ضرب في نفوخي
كنت هاخدهم منه واطلع اجري
وفضلت واقفه وراه عماله اخطط انا وصاحبتي هانعمل ايه ههههههههه شكلنا كان فظييييييع
كنت متغاظه جدا بجد..وباعدين لاقيت ان في مدونين تانيين منشورين
لاقيت الكتاب الازرق بتاع غادة فرحت جداااااا بطريقه مش ممكن لأني متبعاها من زمان بردو
فقررت اشتري الكتاب
واحنا واقفين ماسكينه وبنبص على الناس
لاقينا حد بيقولنا عاوزين توقعوا؟
انا اتصدمت كده وسكتت شويه...لاقيت ان البنت اللي معاه هي غادة بتاعة (مع نفسي-كتاب اما هذه فرقصتي انا)فرحت اوووووووووووووووووووي
وقعدنا اتكلمنا معاها شويه
وسألنها عليكي قالت ايه ده...!!!.دي لسه ماشيه!!!
جاتلنا صدمه فضلنا نبص حوالينا ونقولها طيب لابسه ايه ههههههههه ماحنا لازم نلاقيها يعني هانلاقيها
فضلنا واقفين قدام الدار زي الهبل نبص في وشوش الناس
وباعدين فقدنا الامل خالص بقى
وقعدنا 4 ساعات بنلف المعرض كله على الكتاب...مش عاوزه اقولك
منسوووووووووووووووف ماشاء الله
على قد ماكنت بزعل جدا اني مش بلاقيه
على قد ماكنت بفرحلك بجد

ههههههه ماحكيلكيش بقى عملنا ايه اليوم ده
كل مانقول لحد كتاب عاوزه اتجوز...يقعدوا يستظرفوا...اقوم مزعقه في وشهم...ايه في ايه؟الكتاب اسمه كده...في حاجه سعادتك!!!
يقوموا يقولوا بإحراج ماحنا عارفين
اقوم انا بقى رزعاهم بصه نظام اتلموا
وكنت كل مره بأصر اني اقول اسم الكتاب..عشان بجد الواحد مبسوط جدا بيكي وبالكتاب..

ههههه ماعلينا...رغيت كتير جددااا..معلش..بس عشان انا كنت متجننه اوي عشان ماعرفتش اشوفك....وماتتخيليش دعيتلك قد ايه..
ربنا يباركلك ويكرمك ياااااااااااارب

Blank-Socrate said...

و انا فرحان جدا جدا جدا علشانك
و كان نفسى اكون موجود
لانى من قراء المدونه
و حاسس انى اخوا العروسه
عارفه
صدقينى ممكن الرساله اللى انت مسئوله عنها الان و هى تنوير المجتمع و تقليل الضغط على البنات اعظم كتير من ان انت تكونى واحدة من ضمن الملايين المتجوزيين والتقالديين
اتمنى دوام التوفيق
و يا ريت كل حاجه يوتيوب و تديلنا اللينكات لان معنديش تليفزيون
دا غير انى عندى فضول كبير انى اشوفك

sosa said...

ان ان ان
كده يابرايد حصل عندك لبس
لان اللى جاتلك هى وبنت خالتها سوسة مش صورصارة
شفتى بقى
وعموما عااااااااادى هعديهااااااااااالك ولا يهمك

Amr Ezeldeen said...

ألف مبروك للكتاب

على فكرة رحت أجيبه فى المعرض لقيته خلص، و أنا من إسكندرية يعنى نزول المعرض بيكون كام يوم محدودين، و عرفت لأول مرة موضوع الكتاب فى آخر يوم ليا فى المعرض و هو نفس اليوم اللى ملقتش فيه الكتاب

معلش أبقى أجيبه من دار الشروق هنا فى إسكندرية

مبروك مرة تانية

farida said...

الف مبروك يا برايد

انتي تستاهلي كل خير
بكره يا عم محدش يعرف يكلمك و تتوسطي لينا عند دور النشر

هههههه

عقبال ما اسمع انك لقيتي نصك الثاني اللي يسعدك

و يارب تظل كتاباتك متألقه حتى لما تتجوزي

انا من فرحتي يوم ما قريت الخبر رحت قلت لجوزي مش برايد حتنشر كتاب

قال لي مين برايد دي؟؟
قلت له البنت الصيدلانيه اللي كنت بقرا لك البوستات بتاعتها

قال لي دي دمها خفيف مووت
لازم نشتري الكتاب ده

انا مقدرتش آجي معرض الكتاب و كان نفسي آجي فعلا

لكن أكيد حجيب الكتاب انشاء الله و حكتب لك رأيي فيه على الايميل

دعواتي لكي بالنجاح دائما

shaimaa said...

الف مبروك يا غادة

انا للأسف ما قدرتش اجي يوم التوقيع بس رحت يوم الاثنين واشتريته وفرحت قوي ان الكتاب عليه اقبال
بجد ربنا يوفقك

تــــايه ومش تـــايه said...

مبروك على التوزيع.وانشاء الله يكون ليكى كتاب فى المعرض الجاى بس انا خايف يكون عاوزه اخلع.ولا طلقونى .اللى يقع امسكى فيه

مهندس الرومانسيه said...

بصراحه انتى انسانه جميله وانتى مثال للاخت والبنت والام المصريه رعاكى الله وسدد خطاكى ورزقكى بالاسره السعيده الف مليون مبروك وارجو انك تزورى مدونتى وتقولييلى رايك لانه يهمنى

Atef El-Bassiony said...

مبرووك الكتاب الرائع
لقد أشتريت الكتاب أثناء معرض الكتاب و لقد وصلت لنصفة تقريباَ .... فقد أصبح حكاية ما قبل النوم بالنسبة لى :)
هو و مذكرات زوج للكاتب الكبير أحمد بهجت أشكرك على هذا الأنتاج الرائع و أتمنى لكى مزيد من التوفيق و النجاح .
مبروك
عاطف محسن

Eman said...

بجد الف مبروك على سعادتك و على الكتاب الجديد يا قمر وعلى كل الناس اللي بيحبوكي
واعقبال الجايات الكتير ان شاء الله بالخير ليكي

الراقص مع الذئاب said...

السلام عليكم
دا اول تعليق ليا عندك
مع اني ضيف دائم في مدونتك بس بتابع في صمت

اتمنالك التوفيق في حياتك
وأن يرزقك الله زوجا صالحك يسعدك ويعينك علي زكر الله وشكره وحسن عبادته

دمك خفيف وأسلوبك لذيذ وبسيطة جدا

عشان كدا عرفتي تحولي الحاجة اللي ضدك او اللي المجتمع شايفها ضدك حاجة في صالحك وليكي
وتوصلي لإنجاز جميل

تحياتي لكي يا برايد
او يا دكتورة غادة

حازم said...

ليكي حق تفرحي طبعا بس انتي تستهلي علشان مجتهدة وياريت تكملي وتسيبك من موضع الجواز دا

saadebaid said...

مبرووووووووك
بجد انا فرحان
عقبال الجواز
اقولك علي سر دار الشروق بتنزل اعداد صغيرة من الالعنوان اللي عاوزاه يتسحب فالناس لما تسأئل يقولولها كان فيه وخلص يقوم يحصل اقبال زيادة ع الكتاب وكده ويتشهر اكتر
مش مصدقاني اسألي خالد الخميسي وعاملين ايه في تاكسي

shimaa said...

الف مبروك ياغاده
ماتتصوريش مدونتك رفعت من معنوياتي اد ايه بجد حقيقي فرحانه اوي بيكي وحاسه انك دخلتي جوايا وقولتي اللي نفسي اقوله واصرخ بيه في وش كل الناس

ربنا يوفقك ياقمر ومن نجاح لنجاح ان شاء الله

shimaa atia

F.Osama said...

والله والله انا فرحان عشانك جدا وعلى فكره انا اول مره اشوفك واسمع عنك من خلال البرنامج واخدت اسم المدونه وتانى يوم وانا فى الشغل على طول على جوجل وبحثت وجبتها وعمال اقرأ فيها وميت من الضحك وسعيد جدا لدرجه انى قررت اعملى مدونه انت مش احسن منى لا واحسن منى عاوز اقولك ان النهارده ضيعتيلى اليوم ومفيش اوفر تايم راح بسببك بس فداك

Zico said...

و الله دمك شربااات

BLESSFUL RAIN said...

1000 1000 1000 mbrook, 3afwan 3ala eeh, ana kan nfsy agy wallahi bs asli kont shadeet elre7al le belad el7egaz. 1000 mbrook kaman mrra,

BlueRose said...

أنا للأسف ماعرفتش آجي مع اني كان نفسي فعلا أكون هناك

تتعوض

لكن شفتكوا في العاشرة مساء و كنت مبسوطة جدا جدا جدا , كنت فخورة بيكوا بجد

ROMANTIC ROSE said...

كان نفسي اجي و الله .. بس انا حامل و الحمل للأسف مش مستقر وربنا يستر .. و كل سنة من يوم ما بدأوا معرض الكتاب ده يطلعليي ف الخرابة عفريت و مقدرش اروح .. بس السنادي فعلا كان نفسي جدا جدا بس ما باليد حيلة ..

بجد يا برايد انا فرحانه رقع رزع طس .. ده اكسبريشن زي طحن .. حسيت بيكي و بمشاعرك وقتها من كلامك قوي .. و بالنسبة لمعركة الفلوجة كنتي عملتي زي ابو البنات و سبتي الكتاب علي الرف .. بس اكيد برستيجك بعد ما بقيتي كاتبه مش هيسمحلك بكده .. معلش بقي دي ضريبة الشهرة :)

الف الف الف مبروك يا ست البنات و عقبال اخر نسخة من الطبعة العاشرة و عقبال كتب جديده جميلة و مميزة ان شاء الله :)

wanna b a bride said...

لماضة

أظن دلوقتي عداني العيب و أزح

(إيه أزح دي؟)
أول مرة اغير بوست عشان خاطر حد
عشان تعرفي معزتك عندي
---------------------------------
إيمان

معلش معلش

بكره أخوكي يجرب و خطيبته تطبق عليه منهج الإفترا بتاع تانية ثانوي

و في الآخر هيعرف إنه مالوش غيرك

الكتاب نزل المكتبات خلاص

ياللا بسرعة إشتريه

و ماتنكسفيش من إسمه

إذا كان انا مش مكسوفه
----------------------------------
aya

يا ستي الكتاب خلص من المعرض

لكن موجود في مكتبات الشروق

الصور في السكة
واخدين ميكروباص
-----------------------------------
m.sameer

اللي مش في مصر اللي هي القاهرة والا مصر اللي هي مصر؟

عموما الكتاب دلوقتي في دار الشروق بكل فروعها في القاهرة و اسكندرية

و شهر أو اتنين و يوصل الخليج
-------------------------
مهندس مصري

إيييييييييه ده؟

إنت ماشتريتش الكتاب

طب إسمك

هاشيله

طب خلاص خلاص خليه

عشان بس جيت و سلمت عليا مخصوص
--------------------------
lasto-adri*blue*

إن شاء الله فيه حفل توقيع تاني قريب

هاستناكي
-------------------------
sa7fia_rwsha

طب كويس طمنتيني على الكتاب

كنت قلقانة قوي على توزيعه في توشكى
-------------------------
محمود السيد

كنت حاسة بقلوبكم معايا

هو أكيد عند موزعين دار الشروق بس مش عارفة فين بالظبط
--------------------------------
anonumous

هو انت؟

و كمان ماشتريتش الكتاب

أهو ده بأه اللي كان مزعلني
---------------------------------
nigro

إيه الحلااااااااااااااااوة دي؟

أول مرة يتكتب فيا شعر

والا تاني مرة؟
هي عموما من المرات النادرة يعني

و عذرك مقبول

بس المرة الجاية مش هتنازل
آه

wanna b a bride said...

علا من غزة

شكرررررررا ليكي يا علا

سعيدة ان انتوا مشاركينني فرحتي

الفيديوهات على يوتيوب قريبا في الأسواق
-------------------------
karma

الكتاب ان شاء الله في الخليج كمان شهر أو اتنين

في السعودية في العبيكان و جرير

بس مش عارفة بقية الدول فين
----------------------------
وضاح

إيه ده

لأاااااااااااااااااااااااا

روح تاني لو سمحت النسخ خلاص موجودة

ربنا يكرمك يااااااارب

ساهم في حل الأزمة زي مابتقول
----------------------------
flashawy

الكتاب في دار لشروق بكل فروعها

البرنامج هارفعه إن شاء الله
انتظروه
----------------------------
رضوى عمرو خالد

شكرا ليكي يا رضوى

هو ده العشم
-----------------------------
bosbos

نسختك في الحفظ و الصن

بس هاتي حقها
-----------------------------
misdream

شكرا يا سيدي على حرق المفاجأة

شفت أهي المدونة إتملت دخان

عاجبك كده؟
-----------------------------
رضوى

و مين يزهق منك يا قمر؟
----------------------------
بحبك يا مصر

و ليه تتعوض الكتاب الجاي؟

تتعوض التوقيع الجاي

لنفس الكتاب
----------------------------
nigro

ههههههههههههههه

حلو التعليق

و النعمة عجبني

wanna b a bride said...

آمنة

طب أقولك حاجة؟

هاتي حقه و انا أبعتهولك

و بالإهداء

ياااالا
هو انا عندي أعز منك؟؟
-------------------------
anonymous

باموت أنا في التفاؤل ده

بنتي لابنك؟

ياااارب
-------------------------
sorsara

دانتي نورتيني يا قمر

أمااال

هي صرصارة دي تتنسي أبدا

ميرسي يا قمر على الدعم

هو ده العشم برضه
---------------------------
moe'men mohamed

ياللا إشتري اشتري

و بعدين إيه صغير دي؟

إحنا هنبتدي؟؟؟
----------------------------
adel-samak

شكرا ليك

و تحياتي لكل الطيور المهاجرة
و خاصة بتوع دبي و الرياض

أمااال إلا بتوع الرياض دول حبايبي قوي
----------------------------
soooo

تصدق ماكانش عاجبني لونه خالص

بس دلوقتي الحمد لله عاجبني جدا

-----------------------------
big code

معلش النسخ كانت قليلة في المعرض

لكن دلوقتي موجود

ياللا الحقووووووه
----------------------------
noony

الله يخليكي ده بس من ذوقك

طب ليه ماقلتيش
و الله كنت فرحانة جدا بكل اللي اتعرفت عليهم يوميها

المرة الجاية بأه
----------------------------
رفقة عمر

شكرا ليكي
عقبال الكتاب

و كتب الكتاب
-----------------------------
mohamed

ميرسي ليك

و الله يبارك فيك

و اعمل يا عم بلوج ولا يهمك

الميدان وااااسع

و يساع من الحبايب ألف

Anonymous said...

مبروووك يا غاده

والله فرحتلك من قلبببى

ربنا يوفقك

Anonymous said...

الف مبروك ليك وانا فعلا اشتريت الكتاب ..بس من سوء حظي اني رحت اخر يوم في المعرض..معلشي ان شاء الله تمضيلي لهدائين كده في الكتاب الجاي..وبخصوص موضوع الكسوف دهكان في شاب مصري ظريف اداني الكتاب وهو مخبي اسمه مش عارفه ليه..ووشه احمر من الكسوف كان نفسي اقوله يا ابني الكتاب مش كيف تصطادين عريسا..بس لا حياه لمن تنادي عمل الموضوع دع مع كل بنت اشترته..عامه مبرووووووووووووك وربنا يوفقك

Anonymous said...

الغاليه غادة

أنا كنت في المعرض برضو بس للأسف معرفش أي حاجة عن الكتاب

عامة ملحوقه حضرتك تشرفينا في الاسكندرية تمضي في معرض كوته

اسكندرية هاتنور مقدما


جومانا حمدي

عصفورة من الشرق said...

هاى برايد على فكرة انا روحت المعرض واشتريت اخر نسختين من كتابك الرائع فى اخر ايام المعرض كانوا اخر اتنين على الرف واضح انه نجح موت ربنا معاكى ويرزقك بابن الحلال اللى يستاهلك.

عصفورة من الشرق said...

على فكره انا لسه جديده فى موضوع المدونات دى ممكن تزورى المدونه بتاعتىو تكتببى رايك فيها

gamil said...

لقد كنت من الناس المحظوظين اللذين اشتروا الكتاب من دار الشروق في معرض الكتاب ,انها بالفعل قصة ظريفة جدا واستمتعت بكل كلمة فيها ,ولكني صدمت واتقلبت ضحكاتي حزن لما قرات اخر صفحة من الكتاب وعرفت انها قصتك الحقيقية!!لكن يا بربر ده مشكلة كل الشعب وانا راجل عندي 30 سنة ولسه برده مش موفق بس ده نصيب وهيجي انشاء الله هيجي ويمكن ان التجربة ده فجرت فيكي مواهب ادبية جعلتك الاولى على المدونين (احسن ما كنت تتجوزي وتتدفني في حياة الشغل والبيت مع واحد بقف),وانا كمان بقول ان الجواز ده مش انجاز وجاجة قدر:)

Dr_medo said...

بصراحه أنا واحد من طتطا وشوفتك فى العاشره مساءا بس أعجبت بيكى جدا وبخفة دمك لدرجة انى اجى أزوركو فى المحله ونتمم الموضوع المهم دخلت على مدونتك وقعدت اقرا لغايه موصلت لبوست سعيكم مشكور بتاع ال29 سنه ده اتصدمت بصراحه مكنش باين عليكى انا فى 5 طب طنطا أنا معاكى ومؤمن الحب ممكن يصنع المعجزات بس مش لدرجه29 سنه يعنى وبينى وبينك انا كنت داخل على طمع بقيتى ليكى كتاب وبتكتبى سيناريو يعنى داخال فى 10 ولا 20جنيه ىمبلغ برده يلا سيبك لو تقبلى أكون كسبت أخت كبرى يوووووه خليها صغرى
وده لينك مدونتى لسه محدش دخل عليها خالص قوليلى رأيك فيها وفى شعرى
http://mogarradkalam.blogspot.com/
أخوكى محمد
طب طنطا

Dr_medo said...

بصراحه أنا واحد من طتطا وشوفتك فى العاشره مساءا بس أعجبت بيكى جدا وبخفة دمك لدرجة انى اجى أزوركو فى المحله ونتمم الموضوع المهم دخلت على مدونتك وقعدت اقرا لغايه موصلت لبوست سعيكم مشكور بتاع ال29 سنه ده اتصدمت بصراحه مكنش باين عليكى انا فى 5 طب طنطا أنا معاكى ومؤمن الحب ممكن يصنع المعجزات بس مش لدرجه29 سنه يعنى وبينى وبينك انا كنت داخل على طمع بقيتى ليكى كتاب وبتكتبى سيناريو يعنى داخال فى 10 ولا 20جنيه ىمبلغ برده يلا سيبك لو تقبلى أكون كسبت أخت كبرى يوووووه خليها صغرى
وده لينك مدونتى لسه محدش دخل عليها خالص قوليلى رأيك فيها وفى شعرى
http://mogarradkalam.blogspot.com/
أخوكى محمد
طب طنطا

Dr_medo said...

بصراحه أنا واحد من طتطا وشوفتك فى العاشره مساءا بس أعجبت بيكى جدا وبخفة دمك لدرجة انى اجى أزوركو فى المحله ونتمم الموضوع المهم دخلت على مدونتك وقعدت اقرا لغايه موصلت لبوست سعيكم مشكور بتاع ال29 سنه ده اتصدمت بصراحه مكنش باين عليكى انا فى 5 طب طنطا أنا معاكى ومؤمن الحب ممكن يصنع المعجزات بس مش لدرجه29 سنه يعنى وبينى وبينك انا كنت داخل على طمع بقيتى ليكى كتاب وبتكتبى سيناريو يعنى داخال فى 10 ولا 20جنيه ىمبلغ برده يلا سيبك لو تقبلى أكون كسبت أخت كبرى يوووووه خليها صغرى
وده لينك مدونتى لسه محدش دخل عليها خالص قوليلى رأيك فيها وفى شعرى
http://mogarradkalam.blogspot.com/
أخوكى محمد
طب طنطا

Dr_medo said...

يا ريت لو هتردى يبقى على مدونتى او ايميلى عشان مش مش هقعد أقرا الردود دى كلها

mesh2dra said...

السلام عليكم

ربنا يبسطك يا غدغود كمان وكمان يارب
ربنا يوفقك يا اارب :)


تقبلي سلاماتى وقبلاتى

Omda said...

انت هايلة فى الكتابة انا حاسس انك عايشة معى . انا عملت مدونة اسمها omdaelbalad نفسى تقولى رايك فيها

wanna b a bride said...

ابن حجر العسقلاني

ههههه

حو قوي موضوع العيد القومي ده

و الله فكرة

بس اللي يخطب في الليلة المباركة دي لازم يبقى على قد الحدث

الريس حنتيرة ممكن
--------------------------
سهر الليالي

و أنا مستنياكي الكتاب الجاي

ان شاء الله
---------------------------
fatima

و الله يا أم يوسف فعلا كان نفسي تعرفيني على نفسك و نقعد نرغي حبتين

ياللا متعوضة
---------------------------
أحمد

عضة أسد و لا نظرة حسد
:)
يا عم قول ماشاء الله
--------------------------
pink unicorn

آه المرة الجاية بأه حد يقعد جنبي يمليني
عشان أنا كنت ملبوخة خالص
:)
--------------------------
أم احمد

و الله ليكي وحشة

مش كنتي تجيبي أحمد معاكي

يالا المرة الجاية
تحياتي لسيادة المقدم عمر..شكله مقدم مش عارفة ليه

و ميرسي لذوقك انتي و اخواتك

دعواتك
--------------------------
l.g

ان شاء الله الكتاب في دار الشروق اللي في سان ستيفانو مول

و ان شاء الله ربنا يقرب البعيد و أمضيلك عليه إمضا كبيييييييييرة
----------------------------
z_diva

على عيني و الله
انت بس حاسبني و انا أبعتهالك على طول

شفت سهلة إزاي؟
;)
-------------------------
ahmed al-sabbagh

لأ إزاي

بس ساعتها بصراحة مالزقش في مخي غير اسم أو اسمين

معلش الزهايمر

بس و الله زعلانة جدا على موضوع الكتاب اللي اتقلب ده

معلش امسحها فيا المرة دي

المرة الجاية ليك كتابين

لأ لأ قصدي إمضتين
:)
---------------------------
ميشيل حنا

ده راجل يفرس

و الله دانا كان نفسي أقوم أدور عليه و أديله درس في الشفافية و الريادة و الثقل المركزي لديمقراطية الفوضى الخلاقة

بس قلت بلاش الطيب احسن

تحياتي على كتابك الجميل
---------------------------
حسام مصطفى إبراهيم

ياسلام
إنتوا صحاب قوي للدرجة دي

ججيتوا المعرض مع بعض و كمان بتعلقوا ورا بعض

و نعم الصداقة

و شكرا ليك
و كتابك جميل قوي على فكرة
---------------------------
ashraf al shafaki

يااارب

من بقك لباب السما

و هافتكرك ان شاء الله
ادعيلي بس
---------------------------
wardaya

دعيني أحييكي على المجهود الكبير ده كله

و سعيدة أكتر و أكتر انك أصريتي تقولي اسم الكتاب

مش زي الناس اللي بتنكسف و تقول الكتاب الأخضر بتاع القذافي
قصدي بتاع غادة عبد العال

و ياريتك الساعة 4 و ربع دي كنت دخلتي

و الله مامشيت قبل 5

ياللا معلش المرة الجاية بأه

هاتي انتي بس الكتاب و نتفق و آجي أمضيهولك مخصوص يا ستي

أنا ليا بركة إلا انتي؟؟؟
---------------------------
blank-socrate

شكرا ليك

و الله كنت حاسة ان فيه ناس كتير ساعتها كان عندهم احساس أخو العروسة ده
و ده شئ أسعدني جدا

كل حاجة يوتيوب ان شاء الله
----------------------------
sosa

أسفي الشديد ليكي و لبنت خالتك

بس ليه صرصارة ماعترضتش

جايز انتوا الإتنين جيتوا ببنات خالتكم؟

ماهو موضوع بنات الخالة ده يظهر ماشي في البلد

يا بختكوا

انا كنت لوحدي

بس كفاية انكم كنتم معايا

karma said...

لا بجد!
حيجيبوا الكتب! الله يبشرك بالخير!

ان شاءالله كمان ألقى كتب رحاب وغادة.
خليني اهريهم تلفونات عشان يجيبوهم بسرعة.ههه
.
شفت اللقاء على العاشرة مساءا. سبحان الي خلقكم انتوا التلاته، تتحطوا على الجرح يطيب.:)

M.Sameer said...

لا انا عايز نسخه ممضيه ماليش دعوه :)

و بعدين انا مش في الخليج انا في فنلندا و العياذ بالله.

hany mostafa said...


اولا:
احب احييك على فكرك الرائع واسلوبك المميز انا بصراحة مش بشعر بإى ملل من اسلوبك واعتقد انك هتكوى مشروع مؤلفة وكاتبة ناجحة اهم شىء ايمانك بنفسك وبحقك فى الحياة الكريمة
ثاينا مش لازم تظلمى الشباب لان صدقينى كتير منهم محترمين جدا بس للاسف الفرص صعبة جدا جدا فى البلد
انا بعت لك مقارنة بين مستوى الخليج مثلا والى بيتجوز هناك بيعملوا معاه ايه وانتى تحكمى برحكتك
هذه مقارنة للوضع المعيشي العام بين دول الخليج


تم احتساب التكاليف بالريال السعودي

الإمارات العربية المتحدة

الحد الأدنى للراتب الأساسي في القطاع العام و الخاص هو : 8500 ريال

راتب العاطل عن العمل : 3700 ريال

منحة لكل متزوج : 50.000 ريال

أرض مجانية فورية لكل متزوج وقرض سكني بلا فوائد وقدره مليون ريال ويستلمه خلال أسبوع من اعتماد عقد الزواج

راتب عن كل مولود : 300 ريال شهرياً وحتى يصل المولود لسن 18 عاماً

قيمة جواز السفر : 20 ريال

قيمة رخصة القيادة : 10 ريال

الكهرباء : 30 ريال شهرياً ثابتة

الماء : مجاناً

قيمة الإقامة للأجانب : 200 ريال كل 5 سنوات




سلطنة عمان


الحد الأدنى للراتب الأساسي في القطاع العام و الخاص هو : 7150 ريال

راتب العاطل عن العمل : 2000 ريال

منحة لكل متزوج : 40.000 ريال

أرض وقرض قدره نصف مليون ريال ويحصل عليه المتزوج خلال مدة أقصاها 6 أشهر من عقد الزواج

راتب عن كل مولود : لا يوجد

قيمة جواز السفر : مجاني

قيمة رخصة القيادة : مجانية

الكهرباء : 90 ريال ثابتة

الماء : مجاناً

قيمة الإقامة للأجانب : 100 ريال كل 3 سنوات




قطر

الحد الأدنى للراتب الأساسي في القطاع العام و الخاص هو : 9.000 ريال

راتب العاطل عن العمل : 5.000 ريال

منحة لكل متزوج : 100.000 ريال

أرض وقرض قدره مليون ونصف ويحصل عليه المتزوج خلال 48 ساعة من توقيع عقد الزواج.

راتب عن كل مولود : 500 ريال لأول 4 مواليد فقط، وحتى يصل المولود لسن 15 عاماً

قيمة جواز السفر : 30 ريال

قيمة رخصة القيادة : 20 ريال

الكهرباء : مجاناً

الماء : مجاناً

الهاتف الثابت للمكالمات الداخلية : مجاناً

هدية رمضان + عيد الفطر : 5000 ريال

هدية عيد الأضحى : 2500 ريال

قيمة الإقامة للأجانب : 40 ريال كل سنتين




الكويت

الحد الأدنى للراتب الأساسي في القطاع العام و الخاص هو : 8000 ريال

راتب العاطل عن العمل : 3.000 ريال

منحة لكل متزوج : 70.000 ريال

أرض وقرض قدره 700.000 ريال ويحصل عليه المتزوج خلال سنتين من توقيع عقد الزواج، والدولة تتكفل بدفع ايجار السكن خلال فترة انتظاره للأرض و القرض.

راتب عن كل مولود : 350 ريال لأول مولودين فقط، ولمدى الحياة

قيمة جواز السفر : 20 ريال

قيمة رخصة القيادة : 20 ريال

الكهرباء : 40 ريال ثابتة، قابلة للزيادة في فصل الصيف

الماء : مجاناً

هدية رمضان : 2000 ريال

هدية عيد الفطر : 2000 ريال

هدية عيد الأضحى : 2000 ريال

هدية اليوم الوطني : 2000 ريال

والهدايا الأربع تُعطى لجميع المواطنين دون استثناء لمن هم فوق سن الـ 21 سنة

قيمة الإقامة للأجانب : 250 ريال سنوياً





البحرين

الحد الأدنى للراتب الأساسي في القطاع العام : 1000 ريال

راتب العاطل عن العمل : لا يوجد

منحة لكل متزوج : لا يوجد

أرض وقرض قدره 150.000 ريال ويحصل عليه المتزوج خلال 5 سنوات من توقيع عقد الزواج، وفي حال انتهت الـ 5 سنوات ولم يحصل على الأرض و القرض تتكفل الدولة بدفع ايجار السكن.

راتب عن كل مولود : لا يوجد

قيمة جواز السفر : 100 ريال

قيمة رخصة القيادة : 30 ريال

قيمة الإقامة للأجانب : 100 ريال سنوياً




السعودية

الحد الأدنى للراتب الأساسي في القطاع العام و الخاص هو : لا يوجد حد أدنى معلن

راتب العاطل عن العمل : لا يوجد

مساعدة لكل متزوج : 30.000 ريال ويجب عليه تسديدها، ولا تُعطى إلا بكفيل

قرض سكني قدره 300.000 ريال ويحصل عليه المواطن في احسن الأحوال بعد 25 سنة من تقديم الطلب، والجدير بالذكر انه لا يحق له تقديم طلب القرض إلا بعد امتلاك الأرض.

راتب عن كل مولود : لا يوجد

قيمة جواز السفر : 300 ريال ، تم تخفيضه مؤخراً إلى 150 ريال

قيمة رخصة القيادة : 75 ريال

الكهرباء : الأعلى على مستوى العالم

الماء : الأعلى على مستوى العالم

قيمة الإقامة للأجانب : 1000 ريال ( ويعتبر اعلى ضريبة اقامة في العالم )





ضرائب انفرادية



السعودية تعتبر الدولة الخليجية الوحيدة التي تأخد ضرائب على الأمور التالية :



1- ضريبة على لوحة "الدكان" أو المحل التجاري.



2- ضريبة على إصدار وتجديد و الإشتراك بـ السجل التجاري.



3- ضريبة على مرور الشاحنات في الطرق السريعة (( ضريبة وزن الشاحنات )).



4- ضريبة 30 ريال شهرياً للهاتف سواءً استخدمته ام لم تستخدمه.

مصــــــــــــر المحروسة
ده نموذج واحد بس من ملايين الى تعبوا زيك وكافحوا عشان يحققوا حلمهم وحلم اهلهم
شاب مصرى بكالوريوس علوم
ماجستير فى الفيزياء النووية
دبلومة فى البرمجيات
الحالة مستنى الفرج
يااااااااااااااااااااااا فراااااااج

hany mostafa said...


اه نسيت اقول لك الف مبروك على كتابك
رغم انى ملحقتش نسخة ولا لحقت التوقيع
حاجة تكسف
وعقبال اما تنشرى سلسلة الاعمال الكاملة بكل اللغات وربنا ينولك الى
فى بالك
سبحانه يحى العظام وهى رميم

NoNa said...

الف مبروووووووووووك يا غاده

على الكتاب وربنا يسعدك ان شاء الله

وبعدين انتى فعلا طرحتى مشكله كل بنات بتعنى منها

بس انتى عملتى حاجة بنات كتيره معملتهاش انك اتكلمتى عن المشكله وعملتى كتاب وحققتى نجاح لو كنتى اجوزتى مكنتيش عملتى ههههههههه
شفتى بقى كل تأخيره وفيها خيره
انا عجبنى اوى بلوج بتاعتك ياريت تعتبرنى صديقة ليكى
انا نونا فى نفس سنك بردو
تبقى تزورى بلوج بتاعى لسه على قده

الف مبروووووووك على نجاج جميل بتاعك

شــــمـس الديـن said...

انا بجد رحانة لفرحتك

مش لاقية كلام اكتبة بس فعلا انت انسانة جميلة اوي اوي اوي :))

wanna b a bride said...

amr ezeldeen

فريدة

shaimaa

تايه و مش تايه

مهندس الرومانسية

atef el-bassiony

eman

الراقص مع الذئاب

حازم

saadebaid

shaimaa

f.osama

zico

blessful rain

romantic rose

anonymous 1

anonymous2

جومانا حمدي

عصفورة من الشرق

gamil

dr_medo

mesh2adra

omda

karma

m.sameer

hany mostafa

nona

شمس الدين




الله يبارك فيكم

و شكرا ليكم على التشجيع و الدعم

و ان شاء الله كل واحد بيحلم بحاجة يقدر يحققها

Anonymous said...

شوفي يا غادة
اللي يشوف بلوة غيره تهون عليه بلوته
أنا فيه واحد قعد يشوفني لمدة تسع سنين
شافني وان عندي 25 سنة في بدايةحياتي الوظيفية وراح ما جاش- اكتشف ان معندوش شقة! وبعدها بسنتين قال عاوز يشوفني تاني ليه ماهو شافني أولاني المهم حددنا موعد وشافني تاني وبعدين راح ماجاش ايه معندوش وظيفة وبعد3 سنين طلب يشوفني تالت ليه ياعمنا قال ايه جاب الشقة( كل مرة يكلمني في نفس الموضوعات السخيفة بتاعته)
اخر مرة جه بشوفني كان من 5 سنين قلت وديني لأبوظ له أعصابه قلت له اني موافقة عليه ومن ساعتها يا حضرات وهو مستني اخواته ياخدوا أجازة عشان ييجو مع بعض يطلبوا إيدي !!!

First said...

ميروك يا غادة الشهرة والانتشار السريع في جميع انحاء العالم على الكتاب الثاني وان شاء الله يكون فتح باب الرزق لجميع الاخوات في العالم.

التعليم الالكتروني said...

الف مبروك يا غادة الانتشار السريع والنجاح الكير انا شفتك من خلال قناة العربية وانتي بتجنني وعقيال ما يتجوزو كل البنات وانتي أولهم
تقبلي مروري

Anonymous said...

أنا بأه استهبلت لما جيت أسأل عن الكتاب وقلت فين كتاب أنا مش عايزه أتجوز

Anonymous said...

أنا بأه استهبلت لما جيت أسأل عن الكتاب وقلت فين كتاب أنا مش عايزه أتجوز

مصري مكبر دماغه said...

اولا السلام عليكم
ثانيا انا بحييكي يا غاده بجد انتي عسوله اوي وبتكتبي اللي بتحسيه بجد وسلامي لكل اعضاء البلوج
اخوكم عمرو المصري
وعايز تحيه كبيره اوي ورساله ترحيب جامده ده او بوست ليا في اي مدونه ويارب تستفادو من البوستس بتاعتي وجود لاك للجميع

مصري مكبر دماغه said...

انا نسيت اباركلك على الكتاب او بمعنى اصح الثلاث كتب انتي وغاده ورحاب ومزيد من التقدم والكتب من كل قلبي
ومزيد من المواضيع
اخوكي عمرو المصري(مصري مكبر دماغه)

Anonymous said...

بليييييييييييز عايزين حلقة البيوت اسرار على art
بليز بليز اي لنكات ليها, سواء فيديوهات او تحميل الحلقة كاملة

Anonymous said...

السلام عليكم ورحمه الله وبركاته
الحمد لله الذي لا اله الا الا هو الحي القيوم خلق منا ازواجا نسكن اليها وجعل بيننا مودة ورحمه والصلاة والسلام علي سيدنا محمد عبد الله ورسوله من قال زوجوهم ولو بخاتم من حديد اما بعد احيكم جميعم بتحيه الاسلام واود ان اعلق علي كل ما نحن فيه كشاب مصري مقيم بالخارج ويعلم الله ان كل ما نحن فيه ما هو الا نتيجه لبعدنا عن الدين وتخلفنا عن الشريعه التي اباحت لنا الزواج لعدم انتشار الزنا ولكن النفس اماره بالسوء تري هناك من يقول والله انا بنت خالت بنت عمت بنت عم قريبت فلانه جالها شبكه بعشرميت الف جنيه وشقه بتلريون الف وووووو وابو العربي المصري في صالون النساء وكأنه يتحول لسيده تقول وتقول وتغار منها الاخريات والاب الذي يتصور انه عندما يأتي شاب ليتزوج ابنته انه لم يكن شاب ويظن ان ابنته واسف في التعبير مجرد سلعه تباع وتشتري لمن يدفع اكثر في مزاد الدنيا وكل عائله تبحق عن عريس مرتاح او بمعني اصح ميسور الحال سؤال لكل اب وام لو اكتشف يوما انا ابنتك ولقد الله او ابنك قد تزوج عرفيا او ان ابنتك حامل ماذا ستفعل ستلعق الاقدام كي تستر الفضيحه فلما كل هذا العناء ولما نصل الي هذا الحد اقسم بالله اني عندما قرأت كتابك يا انسه غادة كاد الدمع ينزل من عيني ومن كثرت التعليقات التي قرأتها احسست اننا نعترض ونصرخ بداخلنا ولكن اظن اننا جميعا نقف في صحراء جرداء وكل ما يرد علينا هو صدي صوتنا المملئ بالشجن والحزن والحيره مما حولنا هل سأل اهلنا يوم او فكر يوم اننا قد مر علينا العمر الطبيعي للزواج في مثل سمعته زمان بيقول الاولاد الشيبه يتمي يعني اللي يتجوز كبير يموت وعياله تتيتم طيب مين يرضي يجيب طفل يعيشه يتيم انا مش يدنا ذكريا انا انسان طبيعي يا جماعه احنا في ازمه وبجد ملهاش لزمه تصدقوا بالله انا اهل خطيبتي بجد ناس محترمه جدا كل اللي طالبينه مني اني اقدر افتح البيت يعني اللي يقدرني عليه ربنا والله نفسي اجيب لها الدنيا كلها لاني بجد حسيت انهم شاريني مش شارين الدنيا وهي نفسها نتجوز وانزل مصر بس انا مش عايز انزل واحس اني قصرت معاها لانكم كلكم عارفين الحياة في مصر جميله جداااا جداا لدرجه الخنقه ورخيصه موووت والشغل فيها بصراحه كل يوم تلاقي مليون مجال عمل والله بقي لا في ضرايب ولا كلام من ده دا احنا في نعمه والله انا مش بنتقض البلد بالعكس ولا بنتقض الناس برده انا بس بقولهم ان امرتم بالمطاع فأمروا بالمستطاع يعني عايز بنتك ما تكلمش واحد من وراك في التليفون اخطبهاله ومش حالك وواحده واحده انت ساعد بنت واهله يسعدوه وربنا يكرمهم والحياه تمشي بدل ما تعمل عنتر وتشيل سيفك علي ابنك وتقول انت بتشرب دراجز ليه اسال نفسك وفرتله ايه وفرتله بيت وزوجه واسره وخليته يفكر مراته محتاجه ايه ابنه عايز ايه هيروح المدرسه امته الكلام ده انا بقوله وعارف ان كلكم عارفينه بس زي ما بنقول لا يغير الله قوم حتي يغيروا ما بأنفسهم واسف علي الاطاله اخوكم عمرو hello.messenger@yahoo.com
بتمني تلقي ردكم وتعليقاتكم والسلام عليكم ورحمه الله

Rehab said...

مبروك