Sunday, January 28, 2007

الخـــــــــــــامس

أيمن جه..أيمن جه

هي دي إشارة بدأ اليوم عندنا في مكتبنا..حاجة كده زي تحيا جمهورية مصر العربية اللي كنا بنبدأ بيها طابور الصباح زمان
بعد الكلمة دي ما بتتقال الصبح تحسوا ان عاصفة الصحراء ضربت مكتبنا
مرايات بتتفتح إقلام روج من كل لون و نوع بودرة كحل ..طرح بتتفك و تتربط تاني شعور بتتساوى و كل الإستعدادات الأنثوية اللي بتقوم بيها ست الحسن قبل ما تقابل الشاطر عبد الحميد كانت موجودة في اللحظة دي

كل ده عشان أيمن..أيمن مين ..أيمن ده الموظف الوحيد من جنس الرجال اللي موجود في مكتبنا ..تخيلوا كده 14 صيدلانية على وش جواز(و على وش جواز دي فيها قولان) و معاهم أيمن

لأ و مش أي أيمن ..ده أيمن عريض المنكبين قوي الجبهة طويل القامة واسع الإبتسامة عميق العينين حاد الأنف..باختصار كده كل الأوصاف اللي نبيل فاروق بقاله عشرين سنة مزهقنا في وصف أدهم صبري بيها..موجودة في أيمن ده و بالتالي فهو بصراحة يستحق كل الإستعدادات دي
أههههههه-دا أنا ....باتنهد-.المهم بعد عاصفة الصحراء دي دخل أيمن المكان..ماحدش قدر يبص بطريقة مباشرة لأن كل شئ فيه كان بيلمع.. الشعر .البسمة .الجاكت الجلد و. الشوز الملمع كان صعب تبصله مرة واحدة..مش هاتقدر تفتح عينيك(بالغيظة في هالة زرقان) و ريحة البارفان اللي هبت على المكان..خلت اتنين يفقوا النطق و تلاتة يفقدوا الوعي وواحدة كان عندها استعداد تفقد أكتر من كده لو كان حد اداها فرصة

صباح الخير يا جماعة
تمكتنلاربيةلالفف
دا إحنا بنرد بكلام غير مفهوم مع فاصل من الهقهقة اللي مالهاش لازمة

وقف أيمن يبص كده شوية في المكان و يلف بعنيه في المكتب و فجأه بصلي..و اتسعت ابتسامتة قوي و لمعت في الشمس لدرجة اني أصبت بعمى مؤقت و بعدين ..و بعدين .. يا دي النيلة دا جاي نحيتي..طب أروح فين و الا أعمل ايه؟
عملت نفسي مشغوله في الورق اللي قدامي بس على مين؟..برضه جاي ناجيتي و الكل بيبص و فجأه جسمي كله غرق في عرقه
كمية العرق اللي عرقتها ساعتها كان ممكن تحل مشكلة الجفاف في اثيوبيا
أما وشي بأه ماحكيلكوش ..وشي بأه أحمر لدرجة اني لو كتبت عليه 22 الناس هتفتكرني أبو تريكة
ميل و سند على مكتبي و قال بصوت واطي
صباح الخير
هه؟...ايه؟..آه آه..طيب
انا ممكن أتكلم معاكي شوية؟
معايا أنا..إحلف.أ..أ..أ..قصدي ليه خير في حاجة
لأ خير انشاء الله
قلت و انا بحاول أوقعه عشان يعترف..بخصوص ايه يعني
بخصوص حاجة كويسة انشاء الله ..حاجة ليها علاقة بالمستقبل
فستان أبيض و زغاريط دبلة و شبكة.. سعد الصغير بيغني و نوال بترقص ..كل ده مر في خيالي في اللحظة دي
نوال مين؟..نوال دي رقاصة مهمة جدا بس انتوا جهلة ماتعرفوهاش
طيب امتى
بعد الشغل انشاء الله ممكن
طبعا ممكن نتكلم بعد الشغل
دا أنا باعلي صوتي عشان أكيد العزال
بقيت اليوم بأه ..كان يوم تاريخي ..أكني عايشة في فيلم عربي بالظبط..أنا طول الوقت بابص في الأرض و كل البنات عاملين أحزاب و بيرموا عليا كلام
اتنين ع اليمين..هي فاكرة نفسها ايه يعني كل ده عشان عايز يكلمها و ايه يعني
اتنين ع الشمال بكرة تعملنا فيها نانسي عجرم و ماحدش يقدر يكلمها
اتنين تانيين بيصرفوا للمرضى هو لو يعرفها على حقيقتها ما يبصش في وشها ..اسأليني أنا..خد يا حاج لما تتعب ابقى نقط من دي في مناخيرك

و استمر اليوم على كده تلقيح كلام تلقيح كلام ..ده غير الزغر ..يعني لو النظرات بتعور كان زماني مرمية في مشرحة زينهم دلوقت الوحيدة اللي كانت واقفة جنبي في الموضوع ده نهى صاحبتي ..هي الوحيدة اللي كانت مقوياني و بتشد من أزري..على طول بتبتسم في وشي و تطبطب على دراعي..ربنا يكرمك يا نهى يا رب..هما دول الصحاب و الا بلاش وكل شوية أيمن يبص ناحيتي و يبتسم ابتسامة زي مايكون بيقوللي سيبك منهم و لا يهمك و كل اما عينه تيجي في عيني على طول أدير عيني في أي اتجاه.
.الله..باتكسف!!
و نهى كمان ماسابتهمش يستفردوا بيا ربنا يخليكي يا نهى يا رب

و جه ميعاد الإنصراف و لأول مرة في تاريخ وزارة الصحة منذ انشاءها ..الناس مش عايزة تروح
الساعة جت اتنين ..اتنين و عشرة اتنين و ربع و ماحدش عايز يتحتح من مكانه
نهى عايزة تنقذ الموقف
ايه يا جماعة انتم مش مروحين النهاردة و الا ايه
انا لسه قدامي شوية شغل
و انا احتمال بابا يعدي عليا
انا بأه ماليش مزاج أروح دلوقت اللي عايز يخفى يخفي....قصدي اللي عايز يمشي يمشي
أيمن يبصلي خلسة كده و باين عليه محرج قوي..و انا قاعدة هاموت ..يا ولاد ال.. هو خلاص يعني..مانتوا هتعرفوا هتعرفوا ..لازم تقفوا في زوري كده؟
فضلت مستنية لحد 2 و نص الا خمسة و برضه ماحدش عايز يتحتح..قلت مابدهاش باه

خدت شنطتي و قمت من مكاني و مش عارفة ايه الشجاعة اللي نزلت عليا بدون مناسبة دي رحت رايحة عند أيمن
دكتور أيمن
الواد اتفزع..أيوة
لوسمحت عايزاك
و رحت خارجة بره الأوضة بسرعة و هو ماصدق راح جاري ورايا
سامعة أنا بأه دربكة في الأوضة كل واحدة بتحاول تقوم من على كرسيها بسرعة و تخرج ورانا تتفرج و غالبا كلهم خبطوا في بعض او اتحشروا و هما خارجين من الباب خصوصا ان فيه كام واحدة منهم من الوزن التقيل
وصلت الكافيتريا بتاع المستشفى و بمنتهى الثقة رحت قاعدة على أول ترابيزة و انا مش مصدقة نفسي
يا حالولي يا حالولي هي دي الكافتريا بأه بتاع الرانديفوهات..يا سلام يا رب ..الحمد لله كل احلامي اتحققت ..أنا كده ممكن أموت و انا مستريحة
قعد أيمن قدامي و هو خجلان و باصص في الأرض
لا وحياتك مش وقت كسوف دلوقت زمان فيلق البنات كله جاي على هنا و لو جم قبل ماتتكلم هاقوم أدبح فيهم كلهم و أرمي نفسي م الشباك ولا مذبحة القلعة بتاع محمد على كلاي
أيوة يا دكتور أيمن..اتكلم اتكلم ..ماتتكسفش
الحقيقة هو الموضوع محرج شوية
ياسلام أيوة كده هينطق باموت انا في المواضيع المحرجة دي..خير انشاء الله
الحقيقة حضرتك عارفة ان انا بقالي 7 سنين متعين ده غير شغلي في الصيدلية بره و الحمدلله يعني احنا مستريحين ماديا
أيييييييوة ..هو ده اللي انا عايزة أسمعه من زمان..سيبك من بحبك و الا انا معجب..مادام قاللي انه مستريح ماديا يبقى فيه أمل الموضوع يتم
ربنا يزيدك يا دكتور بس انا ايه دخلي في الموضوع بالظبط
الحقيقة..أأ..أنا ..يعني..كنت بافكر في الإستقرار
هيييييييه...يحيا العدل ..يحيا العدل
هو حضرتك لسه ماستقرتش حقيقي..والا اعرف
لا الحقيقة لسه و من أول ما اشتغلت معاكوا في المكتب و انا الفكرة بدأت تلح على دماغي قوي
يا سلام يا سلام ..هو ده الكلام
طب وانا دخلي ايه في الموضوع ده
ازاي يعني ده حضرتك أهم شخص في الموضوع ده
الدنيا بتلف بيا يا جماعة حد يسندني لو سمحتوا
ازاي يعني
الحقيقة أنا كنت طمعان ان حضرتك
أيوة
يعني ان حضرتك
أييييوة
تكلميلي الآنسة نهى
نهى ؟..نهى مين
نهى اللي معانا في المكتب أنا لاحظت ان حضرتك أقرب واحدة ليها عشان كده فكرت إنك أنسب واحدة تكلميها في الموضوع ده
سواطير و ضرب رصاص..مشنقة زي بتاع عمكوا صدام متعلق فيه الزفت ده و جنبه البت التانية اللي اسمها نهى دي.و انا ماسكة العصاية و تك تتقطع رقبتهم هما الإتنين
نهى؟..انت جايبني هنا عشان تكلمني على نهى
الحقيقة مش انا اللي جايب حضرتك هنا ده حضرتك اللي جايباني
نعممممم
أيوة دانا حتى خايف ان الآنسة نهى تاخد على خاطرها وتزعل
انت
يا بني آدم انت مافيش عندك دم؟ والا مابتفهمش خالص ها؟
قمت ساعتها وقفت و عمال الكافتريا بيبصوا عليا كأنهم بيشوفوا مشهد من فيلم كينج كونج
خلاص البعيد غبي للدرجة دي تجيب واحدة هنا..
.حضرتك اللي جايباني.
.بس اسكت ..ماتتكلمش خالص.
.جايبني مرسال بينكم ليه ؟.
.مالاكش لسان تكلمها بيه
يا آنسة أنا كان قاصدي بس
قلت لك ماتتكلمش
في اللحظة دي خدت بالي اني واقفة و في ايدي طفاية السجاير اللي كانت على الترابيزة و الواد كاشش في مكانه و خايف مني و العمال بتوع الكافتريا رافعين سماعة التليفون و بيطلبوا الأمن يجوا يفضوا الخناقة أو جايز بيكلموا العمال بتوع المشرحة عشان يبقوا يجوا يشيلوا الميتين
لقيت شكلي مش ظريف قوي خصوصا ان المرضى بدأول يطلعوا من أوضهم عشان يتفرجوا
نزلت الطفاية من إيدي..عدلت هدومي و طرحتي ..رسمت على وشي ابتسامة كبيرة
عموما يادكتور انت ممكن تبقى تكلم الآنسة نهى وجها لوجه أحسن المواضيع دي مش عايزة واسطةعن إذنك
و لفيت و خرجت من الكافتريا و الواد لسه قاعد متسمر زي ماهو..افتكرت حاجة فرجعت تاني الواد شافني قام جري استخبى ورا أم طارق بتاعت الكافتريا
آه على فكرة لما تتجوزوا..ماتنسوش تعزموني ع الفرح ..أوكي ..باي بااااي

حصل ايه بعد كده ؟..مش عارفة بالظبط
أيمن..الله يمسيه بالخير بأه ..أيمن راح ليبيا ..و بيقولوا اتجوز من هناك
نهى..نهى دي صاحبتشي و حبيبتشي...أماااال..هي الصداقة دي بالساهل
طبعا لأ

118 comments:

Anonymous said...

ههههههههههههههههههه حموت من ضحك الصراحه والله موقف جامد مايتنسيش معلش بقا هارد لاك ومبروك مقدما لنهى وربنا يرزقك بالاحسن منه ميت مليون مره رجاله ياختى مابقاش عندهم نظر

Anonymous said...

عض قلبى ولا تعض عريسى
:)))
مسخرة

انت مبقتيش تدخلى على الياهو ليه علشان نتكلم
عسل والله

islamz said...

يخرب عقلك يا ربايد .. هتضربي الراجل بالطفاية .. والله بكرة ربنا يرزقك براجل عسل زيك كده ..

:]

Anonymous said...

هههههههههههههههههههههههههه
طفشتى العريس من نهى
ربنا يكرمك يارب يا نهى

بس ماقولتلناش نهى عرفت ولا ايه؟؟ وكان ايه رد فعلها؟؟مسكت طفاية الحريق؟؟؟

Anonymous said...

هاهاهاههاهه

روعه
جامده

كان قلبى حاسس ان النهايه مش سعيده خالص

كل واحده تخلبلها من اى واحد اسمه ايمن

بس منك لله - نهى تقول عليكى ايه

Anonymous said...

يخرب عقلك يا برايد

و بعدين يا بنتي انتي مش قلتي قبل كدة مبتحبيش الرجالة المرسومين دول

أمال قرفتينا بحب الراجل الرزين اللي ودانه طويلة زي حمدي قنديل و عنده لغد زي عمو موسى

إية يا برايد ما تكبري عقلك شوية

انتي داخلة في التلاتين يعني عيب الحركات دي قدام الناس

بعدين بصراحة الحق علية
ابن الهبلة عرف يكلمك و مش عارف يكلمها
طب دي تيجي ازاي و النبي فهميني

و أخيرا زوروني في بلوجي
كمون و زنجبيل
http://kammon-we-zangabeel.blogspot.com/index.html
هتنبسطوا

بيييس يا برايد يا أحلى عروسة

ROMANTIC ROSE said...

قلبي كان حاسس و الله .. انتي أصلك موعوده .. انا و الله بدعيلك ربنا يرزقك باللي تتمنيه .. و بعدين ده انتي الكسبانه انك ما اخدتيش ايمن ده .. ازاي يا اُخشي تاكلي لُقمة كل العيون مدبوبه فيها ؟ و ازاي تتجوزيه و تسيبيه يمشي لوحده كده و هو واد جامد و يلوح كده ؟؟

خليكي ف الرزين التقيل اللي شبه نبيل الحلفاوي و حمدي قنديل لان دولا ناس معينة اللي بتقدرهم و حتي لما بيحترموهم مفيش واحده بتبصلهم كرجاله يعني .. فاهماني ؟

علا من غزة said...



والله ما نا عارفة اقول ايه بس ,, انتي بتجيبي الكلام ده منين .؟ مش معقول خفة الدم والاسلوب عسل عسل عسل

باقولك ايه ,, هو بعد ما سي ايمن ده هاجر "او هج" جابوا مين بدالو ؟ :p

Anonymous said...

بيني وبينك وانا بقراها من الأول كان نفسي تبوظ عشان تكتبي تاني

Anonymous said...

اعذريني بس فعلا انتي بتنقلي واقع مجتمع
لازم تكملي مشوارك
(washwasha)comming soon

Anonymous said...

نرجو تشريفنا
www.blogs4arab.com

Anonymous said...

على فكرة أنا أيام التكليف بتاعى كنت أنا وواحد صاحبى بس العزاب و كان معانا يجى 15 صيدلانية وشوفى ياختى الفقر كلهم يتجوزو وإحنا اللى نفضل عزاب

Anonymous said...

ههههههههههههههههههه
نهى حبيبتشك؟
هههههههههههههههههههههه
نهى الز ههههههههههههههههههه
نهى الزف ههههههههههههههههههههههههه
حبل المش ههههههههههههههههههههه
نهى هههههههههههههههههههههه
حبل ههههههههههههههههههههههههههههه
صاحبتك و حبيب ههههههههههههههههههههه

عبدالله said...

هههههههههههههههه
مالكيش حل كالعاده يا برايد ايه الاسلوب المسخره ده معتقدش الواقع بالروعه اكيد كلماتك هيا الي بتغير الواقع وده درس لكل راجل لما تحب تكلم واحده كلمها مباشر احسن ما تضرب بطفايه علي راسك
:)
خصوصا لو كانت صيدلانيه
تاني درس للبنات عاوزين تتجوزا اطلعوا علي ليببا
:))))
شكرا ليكي برايد علي البوست الجميل و مستنين بقي بوست النهايه و خطوبتك علشان نفتح بوست يوميات مخطوبه
تحياتي
عبدالله
حيران سابقا

Anonymous said...

والله العظيم انت مالكيش حل
تاخدى الواد على الكافيتريا وتقعديه قدامك زى التلميذ الخايب الى مش عامل الواجب لما يقعد قدام المدرسه بتاعته ههههههههههههههههههههههههههههههه
ده انتى مسخرة وكمان تضيعى الجوازه على البت نهى لا بس فى دى عندك حق عض قلبى ولا تعض عريسى
بس ولا يهمك لو راح ايمن فكلنا جمال عبد الناصر قصدى ايمن
وربنا يرزق بأحسن منه
وشوفى بقى عذاب الضمير لما يجيلك عن طريق نهى
وبعدين انتم مقعدنكم سبع بنات مع البعض فى مكان واحد ده انتم كده تقطعو على بعض
وبعدين كنتى زقيتى نهى اهو كدة تبقو 6 وتبقى فرصتك فى الجواز 1/6 بدل ما هى دلوقتى 1/7 ولو جه مكان ايمن بنت تامنه يبقى فرصتك 1/8 وساعتها تروحى تعيطى عند رجلين طنط حشريه الى فى ناس مفتريين زقوها من على السلم وكسروهالها لحد ما تخف وتبدأ تدور لك تانى على عريس والمرو دى الى يجى تاخديه وتتكلى على الله وبعدين ابقى صلحى فيه الى انتى عايزاه بعد الجواز يعنى لو مكرمش اكويه لو طويل اتنيه لو مترب نفضيه
يعنى فصليه على طريقتك وخلاص
مش لازم تاخدى واحد جاهز

بس حتة نبيل فاروق دى ولا حتة الطفايه مسخرة
هههههههههههههههههههههههههههههههههه

Anonymous said...

التعليق الى فات ده بتاعى اوعو اى حد انونيومس تانى ياخده فاهمين

Anonymous said...

ههههههههه
مش عارفة اقول ايه
اضحك والا ابكي
اسلوبك حلو موت
بس انا شايفة ان نهى كانت بتوزع البنات عشان حاسة ان البتاع ده عايز يكلمك في موضوعها
طب كانت تقول
تلمح لك بكلمة
والا تاخد هي زمام المبادرة
على كل ربنا يوفقك ويرزقك بعريس احسن منو
وتكتبيلنا يوميات برايد عن حق وحقيق

Anonymous said...

ممتعه ، وطريقه سردك الجانبى للأنفعال و شرح ردود الأفعال رائع

عابها فقط انى اكتشفت ما سيحدث فى النهايه بدرى اوى

reham said...

خيرها فى غيرها

Anonymous said...

أيوة كدة :))
هو ده الكلام هههههههه
وشك احمر وتكتبي عليه هههههههههههههه
ولله عليكي أسلوب جامد فعلا، أستاذة ورئيسة قسم بجد :)

Anonymous said...

نداء الي ايمن ف لبييا : انت كنت اعمي يا بني حد يسيب القمر ويبص لنهي مالها عبير وسالي واختها وبقية ال14 صيدلانية ارجع مكان ف المكتب - اكيد المكتب ده لازم يكون عنوانه سري زي المخابرات العلمية كده عشان اكيد كل العيون عليها دوقتي- 14 صيدلانية حتة واحدة وكلهن ع وش جواز احمدك يا رب المهم ارجع يا ايمن شلينا طفايات السجاير من كل الكفتريات

نداء الي نهي : مش حرام عليك تعملي واقفة جنبها وانتي مظبطة مع الزبون من وراها اهي طفش لك العريس عشان تبقي صريحة ومتركبيش حد الحنطور بعد كده

نداء لل13 صيدلانية الباقيين : انا عايزكم كلكم ف موضوع بعد الشغل او قبله ممكن نتقابل في اي بوفيه مفهوش طفايات سجاير ولا طفايات حريق عشان انا عايزكم كلكم انتوا عارفين طبعا اني ف السعودية ومستريحين ماديا ماشاء الله وعايزكم ...... عايزكم تكلموا برايد اه اه اه اه لا المطاوي لا

نداء لنبيل فاروق : يعني انت كنت كل ده بتسرق ف اوصافه ايمن وتنسبها لادهم طيب هي برايد يعني هي مني ولا جيهان ولا سونيا لا طبعا هي اكيد مش مستر اكس

نداء الي مصري مغترب : مفيش اي وجه شبه بين ايمن وبين عبدالناصر فعبدالناصر عمره ما كان هيهرب ع لبيا
الله الوطن عروستي

Anonymous said...

يا برايد كنتي سيبي البت تتجوز..وهو حد يزيح
اتوقع عن قريب نهي تيجي تركن جمبنا وتعملها بلوج تشكى همها للدنيا
ربنا يسهل للجميع

Anonymous said...

ايه ده هما 14 ده انا كنت بحسب النسب على انهم 7 كده بعد ماطفشت عريس نهى بقت نسبتك 1/14 شوفتى الموضوع بقى صعب ازاى

عمنا ساعد نسرين الايمن
عبد الناصر لايمكن يهرب طبعا بس القفيه تحكم ياباشا
ياريت تبعتلى اميلك

Anonymous said...

ياخوفي يا بدران

كان قلبي مش مطمن من ناحيه ايمن ده و حاسس انه هيبقي مقلب كبير بس عادي و عسي ان تكرهوا شيئا و هو خيرا لكم
وبجد انا ضحكت من قلبي استمري في كتاباتك يا برايد

بس انا ليا عندك عتاب و اظنه و اجب انت ليه مش بتردي علي اي حد من اللي بيعلقوا علي البوستات بتاعتك
هل ده عدم اهتمام و لا مش في وقت !

وانا عملت مدونه و انت طبعا في اللينكان غناك ابقي شرفيني هناك الافتتاح هيكون في الساعات القليله القادمه ان شاء الله

اسامه ياسر

yasser_auf said...

لــيـبــيا اتجوز من ليبيا دول غفر و مايفنهم رجالة قصدي حريم
لية هي كانت طفاية و لا كان ساطور

عموما الفقري فقري و قليل البخت يطلعلة في الكرشة نهي

يعني رضيتي بالهم و الهم مرضاش بيكي معلش خيرها في الدكتور ال حيجي مكانة و ربنا يسهل كلهم 14 عقبة قصدي زميلة فاضلين و الدور يجي عليكي

تحياتشي

Anonymous said...

- بيقولوا ان ام طارق بتاعة الكفتربا- اللي استخبي وراها ايمن فازت بجائزة السعفة الذهبية من حبيب العادلي جيت كما فازت بجائزة مازنجر من زكريا عزمي عشان هي استطعت لوحدها حماية ايمن قبل هروبه ع ليبيا بعد ان حطم قلوب العذاري وعددهن 14 رغم ان وزارة الداخلية مقلوبة عشان تعرف هو ليه هرب ع ليبا مش انجلتر

كما سارت اشاعة اخري ان سفاح المعادي ده هو ايمن بعد ما رجع من ليبا وقرر ينتقم من اللي برايد عملته فيه بطفاية الحريق لكنه قرر ينتقم من كل البنات - الظاهر الطفاية كانت تقيلة ونسي شكل برايد وبيلطش ف اي بنت وخلاص وطبعا عشان بنت المعادي معندهمش واحدة زي ام طارق اللي بتدافع ع الضعفاء ومعتدمين بس ع الشرطة والمباحث المصرية بتاعة التنظيم السري للمجانين الدوليين طبعا دول عشان معتمدين ع كده وبس بيتشرحوا واحدة ولا واحدة
عشان كده نهيب من الانسة برايد الا تذهب الي المعادي مطلق ما دام السفاح ايمن حر طليقا عشان الامن مش هينفعك يا بنتي
واحنا كلنا مش عارفين نلقي لك عريس وانتي سليمة وزي القمر ووشك بيحمر زي فانلة ابو تريكة فاكيد اكيد مش هنعرف نلقي ليك حد لو بقي ف وشك خطان مشرط وبقيت عاملة زي فانلة حازم امام كده

مصري مغترب ايميلي - بس ياليت اوع تديه لاي بنت خاصة برايد مش عايز حد يرسم عليا ف غربتي بليز
nesreenmourad22@yahoo.com

شعاري الجديد : الله الوطن عروستي

Anonymous said...

ياه بقدر ما انت تناولتي الموضوع بسخرية تضحك الا اني حاسة قد اية ممكن يكون كسر الخاطر ده صعب قوي
اني اتامل خير في واحد و يخزلني ده بوجع قوي

ربنا يسعدك و بكرة تقولي كلبوزة قالت
حيجيلك سيد سيدو
:)

Anonymous said...

ده انا بس بيتا معصلج معايا

Anonymous said...

انا عملت مدونه يا برايد و افتتحتها ابقي شرفيني هناك و قولي لي ايه رايك في البوست و التصميم

www.dabbor.blogspot.com

اسامه ياسر
الدبور

Anonymous said...

هههههههههههههههههههههه
والله العظيمة انتي دمك اعسل من عسل النحل الجبلي الصافي

بجد انا مت على نفسي من الضحك
ايه الحلاوة دي

انتي تعرفي
نفسي ابعت البوست ده لايمن عشان يشوفو اكيد هينتحر بعد ما هيقراه

Anonymous said...

يا لهوى يا برايد أنتى قطعتى على نهى صحبتك حبيبتك! مكنش العشم بس برضة موقفك صعب معلش ربنا يرزقك بسي سيدة
أنا بصراحة حموت من الضحك يمكن دة أكثر بوست دمة خفيف لكن مفهوش تشويق زى الباقى
تحياتى
الله حى السادس جى

Anonymous said...

الديك زعق للفرخة.. اسقيني قالت كاك
عطشان تقو تشرب القلة علي الشباك

إحنا اتسوينا خلاص..والفرق بينا مفيش
ناقص تبيض ياديك علشان اعيش وياك

Anonymous said...

الديك زعق للفرخة.. اسقيني قالت كاك
عطشان تقوم تشرب القلة علي الشباك

إحنا اتسوينا خلاص..والفرق بينا مفيش
ناقص تبيض ياديك علشان اعيش وياك

Anonymous said...

برايد
منك لله كل ما اقول حلاص هتثبت المرة دى ابدا
يا بنتى مش كده حرام عليكى
يعنى بقيتى مبسوطة اهو لا انتى ولا نهى وخدته حفيدة معمر القذافى
عاجبك كده
مش كانت نهى اولى
معلش اهو لا انتى ولا هيه وربنا يخليكم لبعض

تحياتى

Anonymous said...

شوفتى بقى لما استخسرتى نهى فى ايمن اهو خدتة واحدة غريبة مش نهى كانت هيا الاولى

بقولك اية نهى عرفت الموضوع دة ولو عرفت كان اية شعورها

ولو ماقولتى ليها هزعل

ممكن بقى تكلمينى الانسة نهى بس من غير طفايات ولاحرقة دم ولازعل
معلشى احنا بنتكلم

تحياتى

أُكتب بالرصاص said...

هي العرسان طفشت من شوية!!!!

طفاية السجاير ؟
كنت ضربتيه بطفاية الحريق ...كان اوقع

السياغة رائعة، الكوميديا عالية
الحبكة فظيعة


برافو عليك

Anonymous said...

والله انتى عسل

Anonymous said...

تحفة يا برايد ربنا يرزقك الزوج الصالح يارب بس ليه تقطعى على نهى كده دانا ماشية فى جوازت لطوب الأرض ومش عارفة اتجوز انا معلش قدر الله وما شاء فعل
لعلمك بدعى ليك على طول وخصوصا وانا صائمة فى أوقات المغرب
ربنا يرزقنا ويرزقك الزوج الصالح يااااااااااااااارب

Anonymous said...

يمين بالله إنتي كارثه يخرب بيت عقلك
لا
لا
لا مش هاينفع كده أنا ا ا انا
اقولك ايه بس بجد انتى عسوله ولو شخصيتك لذيذه زى ماهو باين من كلامك يبقى اثبتى ان الرجاله فى مصر المحروسه جالهم عشى ليلي ونهاري كمان
طيب اقولك على حاجه
حاجه كده بس ما تقوليش لحد يعني
تعرفى
انا لو مكان اسمه ايه ده
هو اسمه ايه
ايمن مش كده
اه هو ايمن
لو انا مكانه
بصراحه
كنت طلبت منك تكلميلى الآنسه
نهى
هههههههههه
ربنا يعسلك كمان وكمان

Anonymous said...

مكنتش اتوقع ابدا ان في خفه دم للدرجه دي

Anonymous said...

آنستى العزيزة برايد
لو الزواج لن يجعلك تكتبين هذة الروائع ادعوا الله ان بجعلك دائما وابدا من عوانس مصر رغم اننى تركت لك عرض فى الماسج اللى على ايدك اليمين ...رجاله طماعة اوعى تزعلى يابرايد يارب تتجوزى بس بعد كدة حاتكتبى فى ايه فى الطلاق والعياذ بالله تحياتى لك وربنا يوفقك وياريت تييجى زورينا

Anonymous said...

وال ..ربنا يكرمك يا نهى يا رب... و..ربنا يكرمك يا نهى يا رب
راحت فين نهى
مش عارفة في ثانية بعتيها
ياسااااااااتر ايه الحقد ده ياربرايد
كل ده عشان استاذ ايمن
وراح فين بقه من ساعة ليبيا مات ولا ايه
بالطفاية يا برايد... طب بمنديل، هوشيه بقلم رصاص لكن بالطفاية
طبعا له حق ميرجعش هيرجع فين ده الحمد لله انه نفد بجلده
كل ده عشان ايمن امال لو كان تامر كنتي عملتي ايه؟؟؟!!!ا

Anonymous said...

مع الاعتذا ليكي يا برايد بس ده ميعتبرش عريس ايه بقى مش هينفع كده انت اللي بتحسبيه عريس والواد جايلك علشان حاجة تانية خاالص وانت يا عيني ههههههههه
يعني هو مجوزش نهى بس شكل نهى كده بقت ف سجلات مش سجلاتنا يعني :)
يا رب يا برايد يا بنت ام برايد يرزقك عريس وتتجوزي

Anonymous said...

:-) Ayman reminds me of myself before getting engaged (every girl is talking about me and everything)! :0) U should tell everyone now in the pharmacy that he proposed, but u didn't really loved him ;-).

Anonymous said...
This comment has been removed by a blog administrator.
Anonymous said...
This comment has been removed by a blog administrator.
Anonymous said...
This comment has been removed by a blog administrator.
Anonymous said...

يا نهار ازرق

صاحبتشي وحبيبتشي دي خلتني عهيوغمن عليا من الضحك


يا نهار فوشيا

Anonymous said...

طفاية السجاير يا ظااااالمة

Anonymous said...

Sob7an allah, law etalala3tom 3ala al ghayb lekhtartom al wake3.
estamte3ee ya bentyy estamte3ee dee a7la ayam wallahee,ma7adesh 3aref el kheer feen w rabena yeb3et ebn el 7alal ellee yestahel fe3lan el tad7eya b ra7et el bal.anyway sokaraya walahee w rabnea yekremna gamee3an.

Anonymous said...

جدععععععععععععععععععه جدا كويس انها جت على قد طفايه السجاير لو منك كانتهتبأه طفايه الحريق على رأى اكتب بالرصاص

انتى تحفه وبجد سكر مووووووووووت موت موت دخلت صدفه واحلى صدفه النهارده مشاء الله عليكى وربنايرزقك باللى يقدر ويسعدك يارب وقريب قريب قريب واكيد لو هو كويس هتفضلى تكتبى انشاء الله ولا ايه؟؟؟

Anonymous said...

الانسة اللي اسمها كامير جيرل
نود ان نلفت عناية سعادتكم اننا نحن ساعد نسرين الأيمن اول من ربط بين طفاية السجائر والحريق مش اضرب بالرصاص بتاعك ده -ماتبقوا تقروا كويس ال واسمك كاميرا ال اومال لو كان اسمك نظارة-- كما هو موضح ف التعليقات بذلك تكوني انتي بحسن نية او بسوءها قد تعديت ع حقوق الملكية الفكرية الخاصة بساعد نسرين الايمن
فتوقعي انتقام الساعد قريب لانه ممكن يسخطك ويخليك زي نهي مش بيعيشها عرسان ده لوكان طيب
وممكن يمكن فيك زي ما حصل ف طنطتك حشرية
ده لوكان شكلك وحش
وممكن يعمل فيك زي ما ايمن سفاح المعادي بيعمل في بنات المعادي
وده غالبا اللي هيحصل
وابقي خلي اضرب بالرصاص ده ينفعك ياقطةن

Anonymous said...

نياهاهاهاهاهاهاهاهاهاها..موقف جااااااااااااامد جامد جامد..بس هوا حفلة المكياج اللي قبل دخوله دي بجد ولا لزوم الدراما ..لأ لأ ملكيش حق طفاية سجاير مين كان المفروض تشيلي الكرسي أحسن ..ساعتها كان مكن ماتلقيهوش أصلا حيكون ساح في الكرسي بتاعه ..ربنا يرزقك ابن الحلال..وتكون السادسة تابتة ..
مع تحياتي ..
والسلام عليكم0

Anonymous said...

ههههههههههههههه
لأ مش ممكن, انت بجد مالكيش حل
بس مش عيب عليكي كده؟ تضيعيه من نهي صحبتك, هي دي الصداقه برضو, مش الصديق يتمني لصديقه كل خير, وانت وهي واحد يعني
بس هي بجد لما عرفت قالت ايه؟ (((((:

Anonymous said...
This comment has been removed by a blog administrator.
Anonymous said...
This comment has been removed by a blog administrator.
wanna b a bride said...

chico

مافيش مبروك لنهى و لا حاجة

أهي قاعدة جنبي أنا و التانيين

-----------------------

shaimaa

و نعم الكلام

معلش أصل الشات عموما حاجة تقيلة على قلبي

لو عايزة خليها إيميلات
----------------
islamz

واحد عسل اتجوز واحده عسل

خلفو عيل ملزق

-----------------

إنسانة

و الله أنا ماعرفش نهى عرفت و الا لأ

انا مالي ؟..ايه حشرني في المواضيع دي؟
--------------------

ياء

نهى دي حبيبتشي و صاحبتشي و مالناش غير بعض
-------------------

محمد فوزي آل ربيع

مافيش بنت ماتنجذبش لراجل رزين

و بعدين يا ريت شوية
sense
في الكلام..ايه داخلة في التلاتين دي؟

و الله زعلانة بجد

------------------

romantic rose

و الله عندك حق يا روز

فعلا..ربنا مايجعلنا جار و اه عينين..و دول 14 يعني 28 عين

-----------------

3ola

الله يخليكي يا قمر ..انتي اللي سكر

أيمن ؟..هو فيه حد يقدر يحل محله برضه

مكانة فاضي..دا حتى البنات عملوا له نصب تذكاري

--------------------

anonymous-1

ولا يهمك يا عم ..دا أنا أبوظهالك مخصوص..أنا عندي أعز منك

مستنية

-----------------
ww.blog4arab.com

حاضر

-------------------

kaed

و الله دانتوا يبقى وشكوا حلو

ماتيجوا تشتغلوا عندنا

-----------------

khaled

ربنا يسعدك كمان و كمان

ابقى تعالى
------------------

wanna b a bride said...

سلامو عليكم يا جماعة

اتفضلوا الشاي ع النار

بصوا بأه ..فيه حاجة كارثية حصلت لما البلوج ده اتحول بيتا

انا ماكنتش عايزة أصلا هما اللي أجبروني

فزي مانتوا شايفين 3/4 الأسامي بقت بقدرة قادر أنونيموس

مش عارفة هتفضل كده على طول و الا بس عشان أنا غيرت بعد الكومنتس دي ما إتحطت

المهم يعني كان فيه حد بيقول اني ماباردش على حد

بس انتوا عارفين اننا بارد على كل تعليق لأن كل تعليق يهمني جدا جدا لآخر الجدنات

و طبعا لأني دلوقتي مش عارفة مين كتب إيه بالظبط

و مش هينفع أرد بطريقة أنونيموس 13 و أنونيموس 22 مكرر

فبعتذر يا جماعة مرة تانية

soosa el-mafroosa said...

سكر يا برايد

و الله يا بنتي مش عارفة ..طب الرجالة انتصوا في نظرهم دي معروفة من زمان

لكن كمان انتصوا في نفسيتهم و مش حاسيين بالعسل ده

و الله يا بنتي مايستاهلوكي...إسأليني انا

معلش على فكرة لخبطة البيتا دي بتحصل مع كل اللي بيحولوا حتى إسألي كلبوزة

خست 4 كيلو عشان البيتا ده

و لا يهمك

Shiko said...

ههههههههههههه
يا خفة دمك يا بريد وروحك الرياضيه
يا ستى العريس يبقى فى بقك ويقسم لغيرك
وعلى اى حال اهو خد الشر وراح اكيد حد كان باصص لك فيه
ان شاء الله ربنا يرزقك ويرزقنى بابن الحلال بس ميكونش بيحب نهى

FemTo said...

هههههههههه
كله من النق ابقى بخرى المكتب

Anonymous said...

يا خبر ابيض على كمية الضحك اللى ضحكتها

وقال ايه الضحك هيغلى

بجد بجد بجد دمك خفيف اوى

بس اللى صعبان عليا فى الموضوع

نهى

تسلم ايدك يا عسل

vision said...

الأخ سااااااعد نسرين الأيمن

ولون مش ده المكان الى من حقى ارد
عليك فيه لأن ده بلوج ناس يعنى معرفش ايه ساعد ومش مساعد اسمك عجيب اصلاا بس ما علينا اولاا وااااضح جدا ان فى لخبطه فالكومنتسسس والأسامى داخله فى بعضها

ثانيه مسموش اضرب بالرصاص اسمو اكتب بالرصاص وخليه ينفعنى طبعا لأنو باااااشاااا وحاجه جامده جدا جدا جدا واكيد هينفعنى

مبلبسش نضاره ...ونبى شكللك لاازق وشك فالشاشه عالشان تقرء كلاامى لو كنت لااقياللك بلوج خاص كنت عرفت ارد عليك سلاام سفوووووووحتى

bnita said...

يا بنتي عايزة تتجوزي تعملي بيه ايه؟ و مين حيحكلي حكايات زي دي هههههههههههه
ربنا يرزقك بابن الحلال اللي يستاهلك

Anonymous said...

والله اسلوب السرد جميل و فعلا ضحكتيني بس نهى المسكينة ليه تعملي فيها كدة ؟؟؟؟؟؟؟

Anonymous said...

يا اختي وانا بقرى البروفيل بتاعك دلوقتي بشوف انو عندك 28 سنة ؟؟؟؟
وانتي ماشاءالله دكتورة صيدلة يبقى ايه العنوسة اللي انتي بتتكلمي عليها؟؟؟؟
على العموم ربنا يرزقك بابن الحلال اللي يسعدك

السندريللا السعيدة said...

يا ميت فل ومسى عالناس الكويسة

ازيك يا بت يا برايد
والله ليك واحشة بجد

لنت منورة البلوج بجد

يبنت انت ايه معجونة بمية ايه


انا من كتر الضحك قعدت ييجي نص ساعة كل ماجي اكتب حرف الضحك يوقفني

يخرب عقلك

هو ايمن دا لسة عايش وشغال كويس ولا المسكين من الخض الي عملتيلو مبقاش ينفع


يخوفي لا يكون الراجل جرالو حاجة ومش هيعرف يجيب عيال لما يتجوز

وتبقى مصيبة

بس الصراحة عريس ايه دا دا ولا يسوا نص تعريفة يا بنتي

في حد يجيب واسطة عشان يكلم واحدة في الجواز

وبتقولي راجل وكل البنات الي معاك في الشغل بيتدهولو لما يشفوه

جتهم البلاوي والله معندهم نظر خالص


متزوق من برة ويعلم الله من جوا

عالعموم سيبك انت وربنا يبعتلك سيد الرجالة الي يستاهل العسل دا بجد وحاجة مستورة كدة مش كل الناس بتبصلك فيها

دي هتوقف في زورك


ربنا يسعدك

ومنورانا دايما يا بت يا عسل انت

ody911 said...

هههههههههههههههه
أنا بجد زعلان وبضحك

متفهميش إزاى

إنتى بتقولى حجات تنفع افلام واللهى

يا ستى إن شاء الله هييجى

مش مهم بقة عريض المنكبين دى

بس أهوة جوز أحسن من جوز جزمة يعنى

ياله كلو بأمرة

وعادى بقة
أودى

جبهة التهييس الشعبية said...

هههههههههههههههههههههه

احمدي ربنا إنه ما طلعش زي العريس اللي جه لميمو

أصله كان كذا كذا في المنتزه

هههههههههههههه

بس هو جلياط فعلا

إيه الغباوة دي

نصيحة للأخوة الشباب

ما توسطش حد بينك وبين واحدة إنت معجب بيها

ثانيا: لو حبيت توسط

يبقى يا ريت تبقى أكبر منك بعشرين سنة

غير كده تبقى جلياط وقليل الذوق

وغبي كمان

heba said...

تصدقي أيمن ده طلع معندوش نظر ، حد يسيب القمر والعسل ويبص لحد تاني ، معلش يا برايد ملوش في الطيب نصيب ويارب يبعتلك ابن الحلال اللي يكرمك يا رب قولوا آآآآآآآآآآمين

Hany Barakat said...

:-) A daa! a el anonymous dool kolohom!! kol el nas fakadet el haweya keda!

Ana lw menek! 7'sosn b3d ma Ayman safer... kont arg3 el saydlya w raf3a rasy fooo2 foooo2 fooo2... w atklm keda bsot 3aly w el klam msh metwageh le7ad w 22ol... Msh momken mafesh bnt el nahrda t3rf tsht3'al fel balad de 3'er lamma tet3akes!! kol shwya ygely 3ares 3lshan nzelt el share3 bs!! Ana 3awza arakez fe sho3'ly ya gama3a msh keda!! :-) bs 7awly tbyny bardo en lw 7d 3ndo 3ares yegebo! :-) w en meen 3aref ymkn 7d y3'yar r2yek fel mawdo3 ;-)

:-) A non-related post comment: u r one of the fewest who makes me laught by writing. :-) Hope u r feeling happy always and ever.. :-) w rabena yrzo2ek be 3ares zy el amar ya rab ;-)... ella sa7e7 ttwk3y lw fe wa7ed kan 7atet 3eno 3leky wenty btdrby Ayman keda kan hayt2dem! Konty osbory ya... ella sa7e7 we7na lama negy nklmek n2lek ya a?

smraa alnil said...

ههههههههههههههههههه

بتحصل والله
تخيلي ان انا الي بادي دول مجوزة تلات اربع صحابي
وانا قاعدة جنب امي بقشر بطاطس
بس هي نهي ايه نظامها في الموضوع
وبعدين انتي مش عارفة ليه العرسان بتطفش منك يا برايد
اكيد شافوكي وانتي ماسكة الطفاية
يلا معلش بقي
ربنا ينولك عريس لقطة

مصر هى أمى said...

برايد
بعد اذنك قررت انا وشوية مدونيين تانيين اننا نقعد ندعى ان يتقدملك كل يوم عريس ويترفض علشان تفضلى تكتبى بوستتات جميلة اوى كدة ومعلش انتى لازم تضحى علشان الشعب يضحك على فكرة اخر بوست كتبته من كام يوم ( هل انا سعيد ) بوست نكد اه انسى
المهم الاختيار وقع عليا اكون اول واحد يتقدم استننونى يوم الجمعة الجاية ومتخافيش هجيب معايا حاجة حلوة يعنى علشان ميبقاش انتوا نفضتوا السجاجيد على الفاضى
بوستتاتك حلوة اوى

الأباصيرى said...

مش دى صحبتك اللى كانت واقفة جنبك من شوية

وللندالة أصول

بس هرجع وأقولك
فقرية فقرية فقرية فقرية ياولدى

ياشماتة عوانس المكتب فيكى

وبعدين أنتى فاكرة ايمن بعد الموقف دة ممكن يتجوز دة خلاص بقى مينفعش

ويجعلة عامر

مستنيين السادس

heba said...

طيب يا برايد لما نهى عرفت ان أيمن كان عايز يتقدملها هي وانك طفشتيه كده زعلت منك ولا ايه ؟

واحـــد مـــــن الـنـــاس said...

هحط التعليق تاني عشان انا ضمن المتحولون الى
annymouse

وعلى فكرة هوا عمل نفس الحركة فيا قبل كده
تعليقي
---------
هههههههههههههههههههههه
والله العظيمة انتي دمك اعسل من عسل النحل الجبلي الصافي

بجد انا مت على نفسي من الضحك
ايه الحلاوة دي

انتي تعرفي
نفسي ابعت البوست ده لايمن عشان يشوفو اكيد هينتحر بعد ما هيقراه

Unknown said...

أنا مررتلك تاج
ادخلي شوفيه وحليه (:

الحصان الأسود said...

يا غادة انا باقرأ مدونتك من زمان جدا ومن المتحمسين لها

و لكن الملحوظ انة لا يوجد اي جديد ولا تجديد من فترة

بل البوستات عبارة عن قصص مكررة

و الفترات بينها تباعدت

ننتظر البوست في لهفة اسابيع و نصدم عندما نجد ان البوست هو مجرد اعادة صياغه لقصة سابقة

جددي شوية يا غادة قبل الزباين ماتطفش

تحياتي

Anonymous said...

بأقولك إيه يا برايد .. عندي ليكي فكرة عبقرية >>>>> بما إنكم (بسم الله ماشاء الله) 14 بنت في مكان واحد( إيه الزحمة دي!!!!!) .. و بما إنكم بتشتغلوا في صيدلية مستشفي .. يعني أغلبية اللي بتشوفوهم ناس عيانة و صحتها في الباي باي .. و بما إن أيمن إتكل على الله و هج من البلد زي حالاتي ( بس أنا لسة ماحدش رفع طفاية عليا) ... إيه رأيك تنشري اسم المستشفى اللى إنتو شغالين فيها على البلوج .. و بكدة تضربي عصفورين بحجر واحد ( و يمكن كذا عصفور كمان) .. هتخفي من الحمولة لما الرجالة تهل على المكان ( و يمكن تضرب معاكي و إنتي اللي تخفي عنهم).. مع ملاحظة إن مافيش حد يعرفك بلإسم (هو بس ممكن تتعرفي من خفة دمك) .. و اهو تبقي عملتي خير يكفر عن ذنبك مع نها .. إيه رأيك

bluesky said...

برايد ....... انت بنوتة عسولة جدا جدا جدا
و بما اننا صيادلة زي بعض و القلوب عند بعضها .. اقولك ربنا معاكي و معانا جميعا في الحرب ضد كل الجنس الأيمني كلة...وبقي سلميلي على نهى.

3aziz 3eni said...

كان نفسى اقول مبروك

wanna b a bride said...

soosa

منوراني يا سوسة و الله

البيتا ده تحفة..ربنا يستر على بقية التعليقات
------------------------
shiko

هو فعلا واضح انه كان منظور
------------------------
femto

و حياتك عندي البخور من يوميها مابيتقطعش
-----------------------
seef el3ashk

الضحك هنا ببلاش و لايهمك

نهى بكرة ربنا يكرمها بسيد سيده..عموما ماكانش يستاهلها
------------------------
camera_girl

ساعد نسرين

استهدوا بالله يا جماعة..ده شيطان و دخل المدونة
----------------------
bnita

إنشاء الله لما ربنا يرزق مش هابطل أكتب..ده وعد
----------------------
ندى

نهى بكرة ربنا انشاء الله هيكرمها

هي طيبة و تستاهل

و بعدين أنا ماتكلمتش على العنوسة ولا حاجة..البنت من أول 13-14 سنة لما فوق دايما بتقول عايزة أتجوز

عادي يعني
----------------------
السندريللا السعيدة

ازيك يا سندريللا بقالك مدة مابتجيش
منورة و الله
أيمن؟؟

و الله أخبارة اتقطعت من مدة
يمكن طلع على إيطاليا هربان من العروسة

كل شئ جايز
----------------
ody911

ولا تزعل نفسك أبدا
إلا أنت يا أودي

دانتا غالي علينا و الله

كله بأمر الله

wanna b a bride said...

جبهة التهييس الشعبية

هو أنا حرق دمي و جنني إلا الغباوة دي؟
أصل انا كلمة في سرك ماقدرش أستحمل بني آدم غبي قدامي من غير ماهزقه
---------------
darbet shams

أنا عارفة...شكله كده كن أحول

آآآآميييييييييين
----------------
hany

أنا بأه طلعت جدعة قوي

قلت لهم كان عايز يستلف مني فلوس عشان ناوي يسافر ليبيا

شفت إزاي؟
و تقريبا كده هو ده اللي طلع الفكرة في دماغة
-------------------
smraa alnil

ربنا يجعلك من الساعيين في الخير..ماتيجي تشتغلي معانا

مين ده اللي يطفش مني يا حلامة

إنتي مش واخده بالك م العرسان اللي فاتوا والا ايه؟
-----------------------
مصر هي أمي

و نعم الأمهات
بس لو سمحت بلاش مشبك
لسه عندنا من ساعة الأخ بتاع الرياض
-----------------------
الأباصيري

أنا ندلة أنا؟

ربنا يسامحك

أنا فقرية أنا؟
الله يكرم أصلك

صحابي و حبايبي ..عوانس؟
ربنا يستر على ولاياك
--------------------
shams

و مين قال ان نهى عرفت

و بعدين يا جماعة هو انا كطفشته؟؟؟؟
دانا حتى قلتله ابقوا اعزموني ع الفرح

لا شتمت في نهى و لا قلت له عليها حاجة وحشة

أبقى غلطت في ايه بس؟
-------------------
واحد من الناس

ربنا يخليك يارب و تبعت كمان و كمان

أيمن هدورلك على إيميله لو ماكانش لسه هرب من العروسة على إيطاليا
---------------------
esraa

تشكري يا قمر
-------------------
الحصان الأسود

الزباين تطفش؟؟؟؟؟؟؟؟؟؟؟؟؟؟

ده على أساس إني فاتحة محل كشري؟

عموما يا عمنا اللي زعلان ياكل من المحل اللي جنبنا

أنا باكتب اللي يريحني في الوقت اللي يريحني
متهيألي هو ده الغرض الأساسي للمدونات

الحرية
--------------------
sameh

إسم المستشفى ..إسم المستشفى؟؟؟

طب أما أسأل بقية البنات

برضة لازم يبقى لهم رأي

بس يا خوفي كل اللي يجي يوسطني أخطبله

المرة الجاية مش هاقدر أمسك اعصابي..أنا بقولكم أهه
--------------------
bluesky

إلى الجهاااااااااااااااااااااااااد
جمعي انتي بس الطفايات اللي عندك و انا هاتصرف بشوية طقاطيق حدي او نحاس

و نشن الحرب
يوصل
-----------------
sokomonoce

و الله و أنا كمان

Anonymous said...

انت فظيعة انا نفسى اعلق الحاجات اللى انت كتباها فى الشغل عندى بجد انا بجبها لكل اصحابى علشان يقروها

مصطفى حسان said...

على فكره انا شمتان فيكي خالص
اه والله
قمة الشماته
ليه كده .. الراجل جاي وكل نيته خير
ولا قال اي حاجه
ذنبه ايه
يا عيني والله صعبان عليا

marwa said...

هو الخسران عشان عمره ما هيلاقي حد دمه خفيف كدة بجد دمك خفيف جدا

Anonymous said...

عزيزتي برايد......
لي تعليق بسيط بخصوص موضوع (( اسم المستشفى)) ... و هو إن نشرك لإسم المستشفى مش هيكون خدمة للبنات اللى معاكي .. بالعكس دي خدمة للشباب اللي عايز يرتبط ببنت كويسة و محترمة.. و لو افترضنا إنهم بيقعدوا معاكي الفترة الطويلة دي .. يبقى أكيد هيتعدوا من خفة دمك ....
ده لو خدوا بس نص خفة دمك يبقى كده تمام ( هو الشاب مننا هيعوز إيه أكتر من كده) .. و طبعاً لو خفة الدم كلها يبقى مفيش بعد كده.
و لي تعقيب بسيط على الانسات المحترمات اللي بيتحاملوا على شباب اليومين دول .. أحب أقولهم بصوا حواليكم كويس و هتعرفوا ليه الشباب مش عايز أو بالأصح مش عارف يتجوز ..
أمال هم بيهجوا من البلد و يسافروا يتمرمطوا في بلاد تانية ليه.
يعنى أنا مثلاً بأشتغل في دولة من دول الخليج 12 ساعة كل يوم (من غير أجازات).. يعني يدوبك أخلص الشغل و أروح اكل لقمة و أتفرج على التلفزيون شوية أو أخطف لي ساعة على النت .
و على رأي المثل .... اللي مايشوفش من الغربال يبقى إيه ..... مضبوط .. يبقى مغمض عينيه
(شوفتي أهو أنا بدأت أتعدي منك)
يعني على طريقة otv
o
الدايرة دي معناها إيه
.
.
.
.
.
دي الساقبة اللي أنا مربوط فيها
.....
بالراحة علينا شوية يا جماعة

Anonymous said...

بالمناسبة ... سمعتي اخر نكتة
.
.
مرة واحد لقى مصباح علاء الدين، فدعكه .. راح طالعله العفريت
العفريت : شبيك لبيك .. تطلب إيه
قال له : نفسي أتجوز برايد
العفريت : لا يا عم أحسن تبطل تكتب البلوج
;-)

أشرف حمدي said...

انتي بتتكلمي بجد ؟ يخرب عقلك
بصي بقى , انا انصحك تنزلي البلوج ده في كتاب .. صدقيني حيطرقع , وماتنسيش انا اللي حعملك الغلاف :)
اتشطري انتي بس وكمليهم دستة

أشرف حمدي said...

آه نسيت
أنا مررتلك تاج عندي في البلوج , ياريت تردي عليه بقى

azmeralda said...

كنت فاكرة روحك رياضية يا برايد بس سيبك عينة ايمن دي عندنا منها كتير والحالة بتوصل مع بعضهن لدرجة (جاللي كلام يدوخ يا بوي ...انا دايخة يا بواي) بس هارد لاك الجايات اكتر من الرياحات واللي جاب ايمن يجيب غيره ياختي ولا تزعلي نفسك ابدا

Anonymous said...

انا ايمن حد سأل عليا؟؟!!

مسرح الغلابا said...

تحية خاصة جدا من مسرح الغلابا الي الداكطور ايمن

تعيشيش و تاخدي غيرها

هيييييييع هيييييييييع هييييييييع

wanna b a bride said...

anonymous

علقي يا ستي ولا يهمك

إحنا يهمنا الخدمة العامة و الإتحاد النسائي
-------------------
darsh

طب و تشمت فيا أنا ليه؟

هو أنا كان حصل لي حاجة

انا زي مانا و انت بتتغير
-------------------
marwa

قوليله و النبي
-------------------
sameh

جاري اخد الإذن

و بعدين مين ده اللي متحامل على الشباب
ماحنا بنديكم الفرصة كاملة أهه
و بعدين بتسيبونا و بتروحوا ليبيا

يبقى مين الغلطان؟

النكتة
هههههههههههههههه
و الله حلوة
--------------------
أشرف حمدي

إيدي على كتفك

آه صحيح فين صور كتب الكتاب يا عم؟
أنا عايزة أتفرج

تاجك على عيني وراسي
هو ايه حكاية التاجات دي صحيح؟
------------------
azmeralda

طب يا جماعة مانا قلتله روح كلمها و أعزموني على الفرح

يبقى روحي رياضية أهه
-------------------
masra7 el 3'alaba

هابعتهاله ع الميل

تعيش

amr_mt said...

new media coverage:
http://www.almesryoon.com/ShowDetailsC.asp?NewID=30049&Page=13
http://www.almesryoon.com/ShowDetailsC.asp?NewID=30145&Page=13

Yasmine Adel Fouad said...

ههههههههههههههههه
هارد لك
بس مش كان ايمن راح لنهى بدل ماتاخده واحده غريبه برضه

و كنتى عملتى جميلة فى صاحبتك ذلتيها عليها العمر كله
:)

عموما يا برايد
خيرها فى غيرها
لسه عصابة على بابا و الاربعين حرامى ما كملتش
لسه احنا باقيلنا 35
يامين يعيش بقى

بس على فكرة الموضوع من اوله كده
من ساعة الكافيتريا و انا قلبى قالى الواد هيكلمها على واحده من المكتب


حلو ده الافلام ما طلعتش ضحك ع الدقون يا ولاد

و كمان طلعت صيدلانيه زميلة
يعنى تشرفنا


وحشتنى حكاياتك
و ربنا يوفقك يافندم

أشرف حمدي said...

الكتاب الكتاب الأسبوع الجاي :)
والفرح بعديها بأسبوع
طبعا لازم حعمل بوست كبييييير في المدونة فيه كل الصور

التاج هو عبارة عن سؤال بطرحه علي مدونتي مثلا عشان انتي تردي عليه في مدونتك وتبعيه لناس تاني ترد عليه

مطلوب منك في البوست القادم عند في مدونتك أن تخبرينا بخمس أشياء لا يعرفهم أحد عنك !
شفتي الفضايح ؟؟؟
أديها بقى

chaos said...

بجد بجد دمك خفيف مووووتو قدرتك علي الحكي تِثَبت أي حد لغاية الآخر
و لا يهمك الجايات اكتر من الرايحات بجد مش فايتك من الرجاله غير الهم و النكد

~ Bato0ot ~ said...

to7fa bgd ,, ana mooot mn el de7k w el wad ayman se3eb 3lya :D w noha de :D rabna m3aha :D

BinO said...

101 تعليق طبعاً أنا قرأت 5 و لا 6
بس كنت خلصت كل الضحك في لبوست فكنت مش عايز أقرأ أي حاجة
المشكلة أني عارف و فاهم و عشت كل الكلام اللي أنتي حكيتيه
يممكن التفاصيل مختلفة بس
رغم أن الموضوع كميدي جداً ألا أني كنت حاسس بكسرة قلب
علي كل الاخوات
اللي موضوع الجواز عامل معاهم كده
ربنا يزوجهم جميعاً
ويربطهم برجال
لا بوجوه جميلة
ربنا يكرمك
وأكيد حجيلك هنا تاني أن شاء الله

M0naliza said...

بجد يا برايد مش عارفه اقول ايه انا من كتر الضحك بكيت.اسلوبك لما البنات اللى زيك خفه دم وكل الصفات الحلوة لسه مش اتجوززا امال احنا نعمل ايه

Unknown said...

معلشى بقى يا برايد
تعيشى وتاخدى غيرها بس المرة الجاية انصحك بلاش الطفاية السكينة اسهل على طول
ربنا يوفقك

Van Gogh said...

احمد الله انى رفضت التكليف واشتغلت فى الدعاية لانى مقتنع ان اللى زى ايمن دوووول متخلفين عقلياً
ومش عارف اسجل اعجابى بأسلوبك ازاى...بس اكيد الناس دى كلها عبرت عن اللى مش هقدر اقوله
اخيراً....يا بخته اللى هيكون من نصيبك

Anonymous said...

السلام عليكم
بجد حقيقي اسلوبك رائع ، طبعا انا مش مصدق ان القصص دي حقيقية!!!

بعد اذنك ممكن اعرف عنوان مكتبكم ، بدل ما انا عمال متشحطط في الموصلات عمال الف الصيدليات بقالي خمس سنين!! الله يكرمك لحسن انا تعبت خلاص

رجاء خاص:
سرعه الرد

Anonymous said...

اسلوبك من اروع الاساليب اللي قريتها ولو مش كنتي صيدلانيه كنت قلتلك اكتبي قصص كوميدي
عايزه اسالك سؤال يابرايد اذا جالك واحد انتي عارفاه-وبتتمني انه يكون زوج المستقبل- يتقدملك ومكسوف انه يكلمك وجها لوجه وراح لنهي يطلب منها انها تكلمك بالنيابه عنه ونهي طفشتهولك واختفي كان هيبقي رد فعلك ايه؟؟ وكانت نهي هتفضل صاحبيتك وحبيبتك؟؟ ولو عايزه ترديلها اللي هي عملته فيكي هتعملي ايه؟؟
في حاجه غريبه في قصتك وهي ان ازاي نهي صحبتك وحبيبتك ومش وقفتي جنبها واتمنتيلها الخير زي مابيقولوا وساعدتي ان جوازتها تتم
انا معاكي انها صادمه من واحد جاي يتقدملك ويطلع مش ليكي لصاحبتك ولحظة غضبك والطفايه ده كله رد فعل تلقائي
هقولك جمله صغيره خليها دايما مصحباكي في حياتك
كما تدين تدان والحياة قصاص

Anonymous said...

بتقولي في قصتك مع أيمن

------------------------
عدلت هدومي و طرحتي
------------------------

يا خسارة

طلعتي محجبة

ربنا يهديكي من كذبة الشيطان إللي إسمها الحجاب .. الحجاب مش من الإسلام يا برايد

DailyTecVideo said...

بجد ضحكت من قلبي
عارفه ليه ؟
لأن الموقف بجد رهيب فوق ما أي حد يخيل
لأنه ببساطه شديده انتي عشتي في الموقف ده حالات كتير أوي تخيلتها وأنا بقرا التدوينه الجامده
بجد أداء أكثر من رائع ومتميز لدرجه مش قادر أتخيلها في بساطتها وشعبيتها في الكتابه

بجد بجد إبداع ما بعده إبداع في سرد الحكايه اللذيذه دي

ويا ستي قلبي معاكي وبدعيلك من قلبي إن ربنا يكرمك وتنولي كل اللي بتتمنيه وتقابلي إبن الحلال اللي يعرف يقدرك وتعيشي معاه أجمل أيام العمر

تقبلي خالص تحياتي

عريس جديد said...

هلا برايد
اسلوب سهل ممتنع
تمنياتي لك بعريس
تحياتي من الدوحة

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

منك لله فتحتي نفسي على الجواز تاني

hussam said...

انا اول مرة اشوف المدونة اسلوبك جميل جدا ...الى الامام