Friday, December 22, 2006

اللي يشوف بلاوي غيره

ازيكوا يا جماعة .. و الله وحشتوني بجد
ايه اللي أخرني
اتنين زمايلي في الشغل عملوا معايا موقف زبالة
و المشكلة هما اتنين اخوات ..بعنب واضح ان كله من التربية
بس عموما ..مالوش لازمة النم عليهم
كل اللي عايزاه منكم..ان انتوا يوم الوقفة و انتوا صايمين و لو بدأتوا صيام من دلوقت
امانة عليكوا أمانة عليكوا لو كنتوا يوم دخلتوا هنا و ضحكتوا و نسيتوا همكوا شوية
فبليز بليز بحق أي ضحكة أو ابتسامة من دول
يوم ماتصوموا ادعوا و قولوا ..حسبي الله و نعم الوكيل ..اللهم عليك ب إيمان و أختها سالي
آه و لو أنا غالية عندكوا ..يا ريت تفتكروني بدعوة حلوة عشان أتجوز و ربنا يدخل الفرحة في قلبي مرة من نفسي

هذا كان استهلال واجب و مقدمة لابد منها

آه بالمناسبة مش أنا اتنشرت في الأهرام
آه اتنشرت مش اتنشرلي
الأستاذ سيد على عمل عمود صغنطوط كده عن المدونة بتاعتي في الصفحة بتاعة يوم جديد اللي بتبقى موجوده يوم السبت
هو صحيح الأستاذة الصحفية اللي كتبت العمود فضحتني قدام أبويا و أحرجتني نفسيا و دمرتني معنويا لما قالت عليا اني واحده عانس و فاتني قطر الجواز
بس برضه الأهرام يا جماعة بتكتب عن مدونتي ..شرف كبير ليا

و بعدين انتوا عارفين ان لسه قدامي بتاع 3-4 سنين على ماخد لقب عانس عن جدارة و استحقاق
ده غير ان قطر الجواز ده لسه عمال يرمي عليا حاجات كل يوم و انتوا شاهدين ..اشي مشبك و اشي لجنة السياسات و حاجات حلوة خالص

ياللا افرحوا ..اختكوا اتشهرت و لو انها اتهزأت ضمنيا ..لكن يعني ..ياما دقت ع الراس طبول
شكرا جدا للأستاذ سيد على..و لو اني كنت أتمنى انه يدلني على حد ينشر اللي انا باكتبه ده في أي حتة
اقولكوا أنا اللي هانشر
أصل الغسالة خلصت آخر لفة و ماما بتنده عليا و لو ماقمتش دلوقت هتدعي عيا
و بصراحة ..المشرحة مش ناقصة قتلة

-----------------------

أنا نشرت و جيت يا جماعة يعني من دلوقتي اللي يكلمني يقوللي يا حضرة الناشرة المحترمة

أقولكوا ايه بأه..الإيميل بتاعي الي ع اليمين ..أيوة اللي فوق الساعة ده جالي منه أصحاب كتير
و عرسان برضه ..بس للأسف كله برضه على فشوش
كل واحد او واحده بيحكيلي حكايته و بيحلفني مانشرهاش
و لأن بالذات حكايات البنات كلنت بتسعدني - مش بفرح فيهم و الله- بس من باب اللي يشوف بلاوي غيره تهون عليه بلوته
هو صحيح فيه حكايات تغيظ شوية زي مثلا واحده حاسة انها عانس و هي عندها 19 سنة
لكن أنا باعذر و الله لأن كل مجتمع مختلف عن التاني و الضغط اللي بيحطه المجتمع على البنت بيخليها تبتدي تحس انها عانس في مجتمعات معينة من اول سن 14 سنة
و قصص حب عن طريق النت ..و عرسان عايزة يتولع فيها
و أحدث موديلات طنط حشرية بس تقفيل صيني..و غيرها و غيرها من الحكايات
قوم ايه بأه ..أنا فكرت
ايه يعني ؟..و انا مش شاطرة الا في الفضفضة و فضيحة العرسان عبر الشبكة العنكبوتية؟ لأ بافكر برضه
قولت ايه ..ماتيجي يا بت يا برايد تعملي بلوج حلو كده يجمع كل الحكايات المأساوية و الكوميدية بتاع البنات الغلابة دول..عشان اللي عنده ظروف زيهم يضحك معاهم ..أو عليهم ..هو وضميره بأه
فعملت بلوج و بلطه سيراميك أبيض مزرق كده و زي ماكانت طموحاتي طول عمري ..طلعت بكورنيش سقف و رحت نازلة بالستاير
البلوج اسمه ايه ؟؟
بيت العرايس
حلو مش كده

بما إن البلوج بتاعي اللي انتوا فيه دلوقتي ده ..بلوج غير ديمقراطي
أنا قلت أجرب اختراع الديمقراطية اللي بيقولوا عليه ده مرة كده يمكن يعجبني و أبعت أجيبه مع واحده حبيبة كده على الله ماتتقفش بيه في المطار
فهاخد رأيكوا في بعض النقط

أول نقطة
يا إما يبقى بيت العرايس بس مخصوص للعرايس يا أما نقلبه عرايس و عرسان

النقطة التانية
نخليه كوميدي بس و الا ننكد عليكوا و على نفسنا

النقطة التالتة
كل واحد يكتب بأسلوبه و الا تبعتولي المواضيع احط عليها شوية حبشتكنات من عندي؟

بس يا جماعة آدي نقط الإستفتاء اللي انا عايزة أعرف فيه رأيكوا

بس عشان نبقى واضحين مع بعض
مافيش اشراف قضائي و لا حبر احمر و لا صناديق إزاز

لأن اللي بيته من إزاز اييييه؟أيوة شاطرين ..اللي بيته من إزاز مايغيرش هدومه في الصالة
صح كده

أهم شرط بأه في الموضوع ده
اللي هيشترك في البلوج و هانشرله حكايته

اولا يبعتهالي على الميل
ثانيا يقوللي الإسم اللي عايزني أنشرله بيه
يعني ممكن يبقى ص .ن.ج
أو الحائرة من دكرنس أو أي حاجه
ثالثا و هو أهم شرط من شروطي
اللي يبعت حكاية و بعدها بيومين يتجوز يلم نفسه و مايقوليش لحسن و ديني لابهدله

خلينا حلوين كده مع بعض و بلاش نجيب لبعض احباطات في النفسية على أساس العاطفة

تمام

مستنيه رأيكوا
و فرز الأصوات مستمر الى ماشاء الله

81 comments:

Anonymous said...

هههههههه
ربنا يسعدك و يكون فى عون جوزك اللى هايهلك من الضحك
رأيى خليه للعرايس و العرسان و قسميه قسمين واحد نكد وواحد كوميدى وطبعا لازم الحبشتكنات بتاعتك "حلوه حبشتكنات دى كتبتيها أزاى"

Anonymous said...

فكرة رائعة وتدل على ايمان عميق بالديموقراطية
وطبعا للعرسان والعرايس
والاهرام ليها الشرف انها تكتب عن مدونتك مش العكس
bhadidi

Anonymous said...

ياريت يبقى بيت العرايس للعرايس و العرسان وياريت ننكد على نفسنا وكل واحد يكتب بأسلوبه

Anonymous said...

ههههههههههههه.

يخرب عقلك يا بت يا برايد

انت فييييين محدش سامعلك حس من بدري

عالعموم مبروك عالمدونة الجديدة ولا نخليها ...المشروع الجديد
ربنا يوفقك ويتمملك على خير يا رب ويجعل قدمنا قدم السعد عليها يا رب....
سلام

Anonymous said...

انا اسفة نسيت......يا حضرة الناشرة الكبيرة والمشهورة....

مين قدك يا عروسة...ادينا كبرنا وبقينا مهمين اهوووو...مبرووووووووك...ودي زغروتة مني


لللللللللللللللللللوووووووووووووووووووووللللللللوووووووووو

Anonymous said...

ازيك يابرايد ياختى عامله ايه انا واحدة جديدة لانج فى المدونات وكلامك شجعنى انى اعمل مدونه وانشاء الله هابعتلك ماساتى مع العرسان على ايميلك

Anonymous said...

الف مليون مبروك يا برايد

يا تري الموقغ ده لفضفة البنات بس ؟ ولا الشباب كمان ممكن تحكي ع حسرتها
انا هارد ع استفاءك حالا لكنحبيت اكون اول واحد يعلق عندك عشان ربنا يفتح عليك
وعشان تعرفي انا مدونتك اول مدونة بفتحها والله لما اقعد ع النت
وانها هي اللي بتعون عليا ليالي الغربة واللي عملتو نسرين بيا

Anonymous said...

الهزيزة برايد

بالنسية للاستفتاء
1- طبعا عرايس وعرسان فمش معقولة نعرف حكاينك وحكايات البنات عن لجنة السياسيات والجلاش والراجل ابو رجل مسلوخة ومتغرفوش حكايتنا مع نسرين واعضاء جمعية كونداليس رايس وام الغولة والنداهة وكل الحكايات اللي هي السبب ف كل مشكلانا من اول خروج ادم م الجنة الي خروج شحاتة ابو كف من الفورمة ف ماتش الزمالك ف القيلم الشهير

2- ثانيا طبعا نمشي ع خطك ونخليها كوميدي - احنا مش التيلفزيون المصري هنا عشان نقلبها دراما ودموع واهات لان طبعا كل واحد عايز يعيش ف دور الشهبد- لكن طبعا الاستثناء الوحيد هيكون ليا انا لما احكي حكايتي مع نسرين

3- انا شايف اللي يقولك اكتبيها باسلوبك عادي اوكي بس اللي وائق ان اسلوبه حلو يكتبها هو

وربنا يوافقك والله لولا اني عايش ف السعودية والسعودية دولة متاخرة جدا ف النت كنت فتخت بلوج عايز اتجوز
لكن البركة فيك بقي يا برايد ولولا شفتي واحدة من اللي هيحكوا ماساتهم اتظلمت اوي وعايزة تعوضيها نحن ف الخدمة طبعا خنسيها تجربتها اللي فاتت ع شرط اللي بكون حبييها الاول اسمه حسام فقد عرفت حوالي 415469 بنت وكل ما اسالها السؤال اللي نفسي بنت تجاول عليه بلا : وهو انتي حبيتي حد قبل كده
يطلع لي سي حسام مش عارف من فين ؟؟
طيب
وكل سنة وانتي طيبة بمناسبة عيد الاضحي لعاده الله عليك وعلي قراء بلوجك وع الامة الاسلامية بالخير واليمن والبركات
وادعي لي اعرف احج السنة ديه عشان انا مش معي تصريح

وكل سنة وانتي طيبة يا نسرين

hebaz said...

مبروك يا برايد على الشهرة بس برضة أنا عايزة أعرف هما عرفوا أسمك منين؟
بصى: فكرة حلوة البلوج الجديد مبروك
رأىى تخلية عرايس و عرسان علشان الديموقراطية تعم :)
و خليها كوميدى مفيش داعى للمأسى و فيلم الرثاء للنفس
بس أنا رأيى تخلى كل واحد يكتب بأسلوبة لو حلو
تحياتى
و كل سنة و أنتى طيبة و يارب السنة الى جاية زى دلوئتى تكونى فى بيت العدل هىهى ولاهى من قلبى :) و كل ألى متجوزش يتجوز أن شاء الله
تحياتى

Anonymous said...

أولا مبروك يا عروستنا على اعتراف الجريدة الحكومية الرسمية بيكي كزعيمة للعوانس في المدونات ههههههههههههه

لا بجد مبـــــــــــــرووووك

وياريت تحطي صورة سكان او لينك تورينا المقالة اللي اتكتبت دي

بصراحه انا حاموت واقراها

ويالله يا عم انت بقيتي من الناس الواصلة في البلد وبيتكتب عنها في الأهرام أهه ولا اشهر كاتب مصري

زيك زي العقاد ومحفوظ

بس برضة ماعرفناش انتي لية زعلانة من الاتنين زمايلك دول واية الموقف الزبالة اللي عملوة مع عروستنا الجميلة

انا توقعت انك حاتحكي الموقف في البوست وتضحكينا عليهم او عليكي وعاللي عملوة

تحياتي

Anonymous said...

حبيبتى برايد............

بصى خليه عرايس وعرسان كمان يمكن لما نشوف المآسى بتاعتهم نحس اننا مش لوحدنا فى الغلب ده

وبلاش نكد مش ناقصه الحكايه خالص

واكتبيها برضه باسلوبك

حلو كده ادى ردى على الاستفتاء ومستنيين بقى

Anonymous said...

مش ممكن يا برايد
مدونتك مكسرة الدنيا
كل ما اطلع وادخل القي ناس جديدة معلقة واللف اقل من ساعتين كان عدد التغليقات 4 وبعدين بقي 12 اللهم لا حسد
شوفت كلام الاهرام بيعمل شغل ازاي
وعقبال ما تطلعي ف السي ان ان زي شعبان عبدالرحيم
وتبقي مشهورة جدا زي هبه جمعة
وربنا ع زمايلك المفتريين
واعملي زي زينب ف مسلسل ولاد الشوراع واتحسبنني عليهم وانا هادعي عليهم ف عرفات مباشر وانشاء الله الشركة بتاغتكم ف الجرد كلها هتختفي من اثر دعواتي بس يارب تغيبي انتي ف البوم ده
واكتبي يا شيخة بسرعة فكي كربتنا كلنا يعني
ربنا يحنن قلبك عليا يا نسرين

Anonymous said...

ازيك يابرايد
مبروك ياستى على المدونة الجديدة وعلى مقالة الاهرام بس ماتبقيش تغيبى علينا كدة اما المدونة الجديدة خليها عرسان وعرايس (يمكن تبقى خاطبة وتوفقى راسين فى الحلال ) افرزى العرسان الى كويس فيهم قوليلة على عنوانك وقوليلة ان دى واحدة صاحبتك بس بنت اية ادب واخلاق وجمال وكدة يعنى
اما العرسان الوقيع ابعتيهم لبنت طنط حشرية
اما الكتابة خلى كل واحد برغبتة وابقى انتى علقى على كل حكاية بشوية حبشتكانات كم بتوعك
اما اهم حاجة اوعى تعمليها نكد احنا مش ناقصين اما الى عايزين نكد اتفضلو عيشو فى مصر هاتلاقو نكد يكفيكم مليون سنة لقدام اتفقنا يابرايد كوميدى يارب تتجوزى الواد كريم
فية تعليق لى فى البوست الى فات عايز تعليقك علية
وانا باضم صوتى للحصان عايزين لنك لمقال الاهرام وعايزين نعرف زمايلك دول عملم اية علشان نتأكد قبل ما ندعى عليهم

Anonymous said...

بالنسبه للدعاء على أيمان وسالى مفينفعش ندعى بظهر الغيب على حد ، بس هدعيلك ربنا ينصرك ان كان الحق معك وبالجواز كمان ولو انه مش الجنه اللى انت منتظرها

والف مبروك الشهره ، والفكره الجديدة

Anonymous said...

كويس إني لحقت أقرأ البوست الجميل ده .. أصلي مسافر بكرة الحج .. طبعا أنا يسعدني إني أدعيلك .. لكن أدعي على التانيين دول .. لأ

كفاية أوي إنك تحتسبي .. ربنا الأعدل على الإطلاق

وبالنسبة للإستفتاء فبصي بقى

1- العرسان برضه ليهم حكايات زي كده كتيييير .. ياما فيه بنات بيطلعوا برضه زي عرسانك ال .. الحلوين دول

2- كلنا عندنا نكد طبيعي يكفي ويفيض للتصدير .. لازم يكون البلوج كوميدي طبعا

3- بما إني من مشجعين إسلوبك الكوميدي والنادي الأهلي .. أفضل إنك تعدلي علي المقالات لإضفاء كوميديا زيادة .. بشرط إنك تعرضيها تاني على المؤلف أو المؤلفة علشان تتأكدي إنك ما غيرتيش المعنى اللي كانوا يقصدوه

وشكرا على حكمة اليوم بتاعة البيت الإزاز .. أشوفكوا على خير إن شاء الله وكل سنة وإنتوا كلكوا .. طيبين و متجوزييييين

ROMANTIC ROSE said...

انا عايزة استحلفك بالله ما تدعيش علي حد .. لسبب .. ربنا شاهد و مطلع و عالم بالظالم و المظلوم و ده كفاية .. و حسبي الله و نعم الوكيل كفاية .. ربنا يكفيكي شر دعوة المظلوم ..

حلوة فكرة البلوج دي .. هقولك رأيي ف نقاط الاستفتاء:

اول حاجه .. البلوج من الافضل انه ما يكونش كوميدي بس .. الافضل انه يكون درامي .. "فضفضه و تنفيث" و خلاص .. شوية ضحك و شوية نكد .. ده رأيي

تاني حاجه .. اقترح انه يبقي عرايس و عرسان .. بلاش نخنق نفسنا و نتحبس لوحدنا و احنا طول الوقت بنات و ولاد مع بعض ف كل مكان .. يبقي علي النت هنقفل علي نفسنا .. طيب ليه ؟

تالت حاجه .. أفضل ان كل واحد/واحدة هيبعتولك قصصهم الدرامية تنشريها زي ما هي .. يعني ده هيدينا ابعاد عن شخصية الراوي .. زي ما "حبشتكاناتك" عططنا فكرة عن شخصيتك العسولة يا عسولة ..

بس يا اختي .. دمتي زخرا للوطن .. :)

Anonymous said...

mabrook el nahsr bgd u deserve it

waiting 4 the new blog

we isa 7ad3ilak :)

Anonymous said...

ههههههههههههههههههههه
بجد انتي زي العسسسل ..مش ممكن بجد
المهم بالمناسبه انا اختي هتم ال19 ومفكره نفسها عانس
وانا شاخصيا علشان محرجش نفسي مش عايزة أتجوز :ي
يعني كل واحد يلحق نفسه كدا ال يعني متبطره على النعمه المهم كنت هقول ايه .. أه
عارفه بقى ايه اللي يفرسك بجد ويخليكي هتطقي من جنابك
ان ناس استغفر الله اللهم لا اعتراض يعني انتي تكوني احلى منهم وشخصية عنهم وهما بيكوانوا شخصية زباله زباله يعني ويجيلك منهم تليقون جالي عاريس وعيزاكي تتعرفي عليه :ي
ساعتها انا زغرت يعني من الفرحة اللي كانت مش سيعاني ..
بس اقولك على حاجه
مامي بتقول لي النصيب بيجيلك لو كنتي فين وبتقعد بقى تحكي لي حكايات كتير عن الموضوع دا
يللا ع الله نصبر وننول

Nouran said...

والنبي سؤال كده ع الماشي انت عيد ميلادك عدى وانا مكتبتوش ف النشرة ولا بلاش فضايح وهو عدى ومكتبوش ف النشرة فهمتي اللي عايزة اقولوه ولا لا؟؟
انا راي حطي حبشتكنات حلوة لازم علشان الطبخة تتطلع حلوة :)

Anonymous said...

يا ريت تخليها لللمشاكل بجد يعنى انتى بتكتبى هنا بإسلوب كميدى وبجد المدونه رائعه فيبقى التانيه تستقبل المشاركات العاديه ومايمنعش شوية كوميديا لو طلبت

Anonymous said...

ههههههههههههههههه.....البلوج بتاعك تحفه جدا...عايز ااقولك انك اتشهرتى عالايميلات والمنتديات المصرية الجامعية وغير الجامعية .....

طب البلوج التانية مقتصرة عالناس بتوع زمان...اصلى واحد بلعب فى اوائل العشرينات لسه....بس بقيت مستبيعها...ومش ناوى على جواز اصلا

وعلى فكرة ماتزعليش من لقب الاهرام...افتخرى ....محدش بيطلع فى الاهرام كل يوم...هههههههه

اللنك بتاع اخر موضوع منزلاه بتاع الفلووس ...

http://shamsawy.net/ib/index.php?showtopic=1124299512&st=0

Anonymous said...

Again, thanks for sharing your stories, you know, when you get married, you will have even more stories, as for the q's 1. both,2.black comedy, 3.each can write their own stories, but, omit the low level scenarios.
Gem , NZ

Anonymous said...

التعليقات عنك يا برايد في المنتدي اللي سمحتيلة ينشر قصتك "العريس الحرامي اللي سرق فلوسك" تعليقات سخيفة و جارحه ليكي جدا وبصراحه اتحرق دمي لما شفت اتعليقات دي

صحيح من خرج من دارة اتقل مقدارة

وأدي بعض التعليقات:

يا لهوي العنوسه وصلت للحد ده

آدي آخره الاحلام الفاضيه الواهيه اللي مش مبنيه علي اساس سليم

وصلتني في ايميل يا ريس فقلت نعمل بيها وموضوع

قصه روعه بجد يا دكتور والله انا لو
حصلي كده كنت مت من القهر

المفروض متردش من الاول بكل حزم حتى لو كان ادامها سوبر مان

هو عايز يخطبها او يعرف اذا كانت مرتبطه ولا لا يبقى على البيت عدل مفيش كلام معاها هيه الي غلطانه بس الموقف يضحك اوي

البنت ساذجه اوى ولا عنست اوى
بجد بجد صعبانة عليا قوي

Anonymous said...

اعملي اللي انتي عايزاه ..
بس اوعي تبطلي تكتبي
يا بنتي انتي بتاخدي ثواب من غير ما تاخدي بالك ,, من كتر الابتسامات اللي بتدخليها على قلوب الناس

انا بدخل عندك وافضل اضحك لما قلبي يوجعني
لدرجة اني مرة انا واحد اصدقائي قعدنا نقرا البوست على التليفون .. :)
يا ستي ربنا يوفقك ويكرمك على قد ما بتسعدينا كده دايما

وياستي ربنا يرزقك بعريس يقدر الروح الحلوة دي
كل سنة وانتي طيبة

Anonymous said...

سيري علي بركة الله
نورماندي

Anonymous said...

طيب ليه الالش بس
تنشري تبقي ناشرة
انت اتعديتي من عرسانك
لو عاوزة تتجوزي منجي بطلي الالش ده لانه مابيحبش البنات اللي بتالش
وعلي فكرة منجي معاه بطاقة

Anonymous said...

ما شاء الله عليكي يا برايد
ربنا يرزقك ويرزق بنات المسلمين أجمعين بالزوج الصالح
امين
وبالنسبة للبلوج الجديد ياريت يكون مشترك ولاد وبنات وكمان لازم يكون كوميديا طبعا واللى عايز نكد ده نعمله بلوج جديد للنكد والرومانسية وبعدين ما عندهم المنتديات مالية النت هى ناقصة نكد هنا كمان؟
اما الاسلوب اينعم انا بحب اسلوبك جدا لكن برضة التنوع مطلوب وبعدين انتى كدة كدة مشرفة علي الكلام يعني لما هتحسي ان فيه غلطة معينة هتشيليها وتعملى اديتنج برضة للكلام يعني ترفعى الفاعل وتنصبى المفعول وتجرى المجرور وهكذا لكن مش ضرورى تعملى اعادة صياغة من أول وجديد (معلش اصلى مترجم بأة) وعموما ربنا يوفقك ويبارك فيكي ويزيدك ويعطيكي كل ما تتمني ويوفقك لصالح العمل ويهدينا واياكي
سلام يا برايد

Anonymous said...

على فكرة يا برايد موضوع تأخر الزواج منتشر فى الدول العربية برده .
إقرى الخبر ده:

http://www.almesryoon.com/ShowDetails.asp?NewID=28450&Page=13
تواصل ارتفاع نسبة العزوبة للإناث في تونس

تونس ـ قنا : بتاريخ 26 - 12 - 2006

كشفت دراسة ميدانية عن ان نسبة العزوبة بالنسبة للاناث فى تونس ارتفعت بنسب متفاوتة حسب الشريحة العمرية خلال الفترة ما بين عامى 2001 و 2006 0 واوضحت الدراسة التى اعدها الديوان التونسى للاسرة والعمران البشرى ان نسبة العزوبة للشريحة العمرية ما بين 20 و 24 عاما ارتفعت من 3ر85 بالمائة فى عام 2001 الى 4ر88 بالمائة وللشريحة العمرية ما بين 25 و 29 عاما من 9ر53 بالمائة الى 65 بالمائة0
وفيما ارتفعت هذه النسبة من 7ر98 بالمائة الى 2ر99 بالمائة بالنسبة للشريحة العمرية ما بين 15 و 19 عاما ارتفعت هذه النسبة بالنسبة للشريحة العمرية ما بين 30 و 34 عاما من
7ر17 بالمائة الى 5ر37 بالمائة وبالنسبة للشريحة العمرية ما بين بين 35 و 39 عاما من
8ر14 0بلمائة الى 20 بالمائة0 وارجعت الدراسة اسباب العزوبة وتاخر الزواج بين الشباب اساسا الى ارتفاع الكلفة والبحث عن فرصة عمل ثم الرغبة فى مواصلة الدراسة وصعوبة
الحصول الى السكن

أحمــــــــدبــــــــــلال said...

و الله أنتى المفروض كنتى تكونى قصة من قصص مسلسل حارة العوانس
أما بالنسبة لبيت العرايس
أول نقطة
يبقى عرايس و عرسان
ثانى نقطة
كل واحد او واحدة يكتبوا بطريقتهم الخاصة يعنى كوميدى نكد اللى يريحوا بس لازم يتقبل التعليقات اللى جياله مهما كانت ساخرة أو جادة زيادة عن اللازم
النقطة الثالثة
القصص اللى تكون كويسة سيبيها زى ما هى و اللى حاسة أن طريقة ألقائها مملة أو غير مثيرة للقارئ عدلى فيها



مع تحياتى للحائرة من دكرنس
ماهى فى دكرنس لازم تبقى حائرة


و كشفت راسى و أتجهت و دعيتلك على البت أيمان و أختها سالى

Anonymous said...

انا كتبت عنك في جريدة وشوشة.
بصراحة مدونتك تحفة
ابقي شوفي الموضوع وقوليلي رأيك

Anonymous said...

مبروك البلوج الجديد
و خدى بالك احترسى من دور الخاطبة و للا اقولك طباخ السم بيدوقه على بركة الله


بالنسبة لاجابات الاسئله

فاعتقد خللى الموضوع بنات وولاد علشان نعرف انهم كمان مطحونين طلبات من اهالى مفترية و يصعبوا علينا بدل ما بنشتم و بس طول النهار

:)

تانى سؤال
خليه نكد و فرايحى و كترى المشكل بقى

ثالث حاجة

اعتقد نزلي المواضيع باسلوب كاتبها لان خلاصة احساسه هتبقى فيه


النتيجة هتظهر امتى يا ميس ؟
و نظام الكنترول ايه ان شاء الله

Anonymous said...

صحيح مبروك ع التسييح اللى فى الاهرام
هركز معاكى بقى و اضحك من تانى

و سيبك من كلام الناس ده حقد
انتى زى الفل اهو
اه سلميلى على ايمان و سالى و حضن كبير بقى

:)

Anonymous said...

هههههههههه

يابنتي انتي جامدة جدا
سقفة ليكي
وبعدين مش لازم يوم الوقفه من دلوقتي "حسبي الله ونعم الوكيل فيكي يا إيمان وأختها سالي " وكمان يارب تتجوزي عريس عايز يتجوز وتعملو جمعية اللي عايزين يتجوزوا
وايه يعني الاهرام سيحتلك شوية دا شرف ليها يابنتي وعقبال لما نشوف اسمك في المانشت العريض لصفحة المتزوجون.
وبعدين لما يبقي البيت للعرايس بس امال العرسان يروحوا فين نقعد في بيوتنا بقي اه لأ لازم يكون للعرايس وللعرسان ومش عايزين نكد وحياة ابوكي هيا مش ناقصة وإبقي حبشتكي العيال قصدي الكلام بمزاجك كدة علي رواقة مش عايزيين حاجة تفقع الدم .
و حسبي الله ونعم الوكيل فيكي يا إيمان وأخوها سالي

Anonymous said...

مبروك البلوج الجديد

1- عرايس وعرسان
2-نكت ونكد
3-كل واحد يبعتلك وتنزليه زي ما هو

ده رايي...مبروك تاني
منورانا كده دائما

Anonymous said...

bossy ba2a ya setty ana 3andy 19 sana wmesh ha2ollek 3ala zroofy 3ashan dammek mayet7ere2sh we7na 3ayzenek... bas ana 3ayza a2ollek 7aga enty bnyadma bent 7alaal whaygelek wa7ed gamed isa, la2 w2eeh hat7ebeeh mn awel nazra.. bas sho3'l gawazat elsalonat elmodhab dah haygeblek elkafya wehay5aleky tekbary 30 sana.... wbsara7a enty testahly wa7ed bey7ebbek mesh wa7ed awel marra yshofek wento bte2ro elfat7a...... eldoddd hanem

Anonymous said...

بداية .. اتضامن مع برايد باني اقول حسبنا الله و نعم الوكيل فيكي يا ايمان انتي و اختك ..
ثانيا بقا انتم قاعدين من غير جواز ليه يعني .. العيب مش في البلد المعيوبة اصلا من غير حاجة العيب في تفكير الاهالي دلوقتي " الرسول عليه الصلاة و السلام قال فيما معناه انه ان حضر لك عريس لبنتك ترضى بدينه و خلقه فلا ترفضه و الا شاع الفساد في المجتمع . لكن كل اب اه يتمنى لبنته حياه كويسة لكن باللي يقدر عليه الشاب و بما ان الشباب حالتهم متنيلة في اغلبهم فا مش هاتلاقي اب يوافق بيهم فا بالتالي اصبح الشباب عارفين القضية من اولها و انهم هايترفضوا فا بيجيبوها من قصيرها و مايتقدموش و يضيع فرصة على بنت تانية كانت هاترضى بيه و بظروفه زي ما هي ..
عدلوا افكار الاهل عن مواصفات العرسان و هي هاتتعدل..
انا لما باشوف اب ولا ام بيطلب مطالب غير طبيعية من عسران بنته كنت بتمني ان بنته تعنس علشان يفهم شوية .. لكن لقيت انه حرام و مفيش بايدي غير اني اقول ربنا يهدي الجميع

Anonymous said...

كل سنة وانت طيبة يا عروستنا :)

reham said...

هى عموما 2007 شكلهاداخلة جامدة شويةبس المهم انك يا برايد تلبسى بقى الطرحة فيها و نكسر و راكى قلة

Anonymous said...

هاى برايد
انا لسه اول مرة ادخل على البلوج بتاعك النهاردة جميييييييييييييييل جدا وان شاء الله هكون من المتابعين ويمكن ابعتلك حكايتى كمان
خلى بيت العرايس للعرايس والعرسان والحلو والصعب علشان نتعلم ونصبر لما نشوف بلاوى غيرنا تحياتى
نانا

Anonymous said...

عندما وقع تحت يدي هذا البلوج لم أتركه الا بعد أن قرأته كله رغم أني قد اختلف معك في الرأي وقد لا أصدق بعض الأحداث التي ذكرتيها (مثل أنك كعبلت العريس ليتدحرج على السلم.. ) ولكني لا أنكر أني قد استمتعت بالحكايات خفيفة الدم
وبالنسبة للفكرة المطروحة هذا رأيي
1- لا يتوافق ان يكون البلوج الجديد ديمقراطي ثم تحرمي فئة معينة ( التي هي الشباب) من الاشتراك هذا ليس عدلا
2- أرجو الاقتصار على الفرفشة بلاش النكد الا اذا كان النكد من نوع "شر البلية ما يضحك "
3- من الديمقراطية ايضا نشر الرسائل بدون حبشتكانات الا اذا طلب صاحبها ذلك ، أو نشرها بحبشتكانات الا اذا طلب صاحبها عكس ذلك
وأرجوا أن تقبليني صديقا للبرنامج

Anonymous said...

السلام عليكم،
يقول القرآن: (إدعوهم لأبائهم هو اقسط عند الله فإن لم تعلموا ابائهم فاخوانكم في الدين و مواليكم)
اليس اهم هدف من اعتبار الزنا من كبائر الذنوب هو منع ابن الزنا من الزواج بأخته دون أن يدري فكيف يستقيم ذلك مع الفتوى بعدم ثبوت النسب بالحمض النووي إذا كان الطلب من الأب؟ و مالذي يضمن عدم حدوث ذلك الزواج مثلاً؟
و ما معنى (ادعوهم لأبائهم؟) و معنى (فإن لم تعلموا ابائهم؟) الم يحدث في هذا العصر ان وجدت وسيلة علمية قاطعة تدل على النسب؟
و كيف يتم تقديم حق الستر للزوجة على حفظ النسب و منع زواج المحارم و منع الظلم في المواريث و منع ظلم الأب من خداعه في اعز ما لديه و جعله ينفق من مشاعره و صحته و ماله على ولد ليس له؟ في قصة حديث (الولد للفراش) كان الوالد يعلم بزنا زوجته و لكنه مع ذلك كان يريد نسب الولد له و لم يكن يوجد تحليل حمض نووي فلذلك ربما كان هذا الحكم لمنع اي احد من الادعاء على طفل بأنه غير شرعى لكي يحرمه من الميراث مثلاً.
أليس جعل اختبار الحمض النووي بصورة الية مع كل ولادة رادع لمنع ولادة اولاد غير شرعيين في زواج صحيح؟ وماذا يحدث في المستقبل عندما يتم تعميم اختبار الحمض النووي على كافة المواطنين لأسباب أمنية؟ او يكون الجهاز موجود بالمنزل يمكن لأي أحد عمل التحليل بمفرده؟وماذا يفعل الأب الذي يتم ضبط زوجته في قضية دعارة او تقول له زوجته علي سبيل الإغاظة ان اولاده ليسوا بأولاده؟ كيف يتأكد؟ و لماذا لا نفصل بين اثبات النسب و اتهام الأم بالزنا (فربما يكون نتيجة لحادث اغتصاب)؟

Anonymous said...

المساواة للرجال للتغلب على العنوسة
يحب التحذيرمن تطبيق القانون الجديد للعنف الأسري لأننا اصبحنا في زمن كثر فيه القضايا الكيدية التي ترفعها الزوجات (القرآن وثق اول قضية تلفيق نسوي و اتظلم فيها سيدنا يوسف) و اطالب بتسهيل إجرءات الطلاق بالنسبة للرجل لأن المشكلة الأساسية التي نكابر في مواجهتها هي نشوز المرأة و تجرأها على الرجل بأبشع الألفاظ امام أولاده بل والمبادرة بمد يدها عليه فماذا يفعل هذا الرجل؟ كما ان الإعلام و المسلسلات اصبحت تأتي بمشاهد إهانة الزوجة لزوجها بصفة متكررة. إذا اردنا تقليد الغرب سنتهي بنا الحال إلى نفس النتائج ، إضراب عن الزواج حتى وصلت نسبته إلى 4 بالألف و وأولاد ذكور يرتدون الأقراط نتيجة لنزع الرجولة منهم نتيجة ما يرونه من إذلال للأب و الرجولة بصفة عامة. اصبح الشباب في مصر يتحدثون عن خوفهم من الحبس لإتهامهم كيدياً بتبديد العفش أو عنف أسري أو لعجزهم من دفع نفقة ظالمة ويؤمنون أن الجواز اصبح قلة قيمة و بهدلة للرجل

Anonymous said...

أتذكر و أنا أشاهد القانون الحالي للأحوال الشخصية القانون القديم الظالم للعلاقة بين المالك و المستأجر حينما تركت المستأجر يستهبل على المالك و يستولى على شقته بحجة أن المستأجر ضعيف و يستحق الحماية متناسين أن القرآن الكريم انتصر لصاحب ال99 من الغنم و اعتبر ان صاحب الغنم الواحدة هو الظالم لأنه كان بيستهبل على مالك ال99 من الغنم فالله عز وجل هو العادل.
ساعتها الحكومة قالت للمالك ماتخافش فالمستأجرون ناس كويسين و مش حيستولوا على شققكم و حيسيبوها من نفسهم بعد كام سنة. ماذا حدث بعد ذلك؟ ببساطة لم يوجد مالك واحد يؤجر شقته فانهار القانون تلقائياً.
اعتقد ان هذا ما يحدث القانون الحالي للأحوال الشخصية، فسيضرب الشباب عن الزواج و ستزداد العنوسة حتى تضطر الدولة لتعود إلى صوابها و تلغي هذا القانون.
فمن هو المجنون الذي مستعد للإستعباد من قبل زوجته و اهل زوجته؟ من هو المجنون الذي يصدق الحكومة أن المرأة كائن عاقل لا تنتابه حالات غضب مفاجئة قد تدمر هذا البيت و تحرم الأب من اولاده مدى الحياة (بعد ان مدوا مدة الحضانة). الله عز وجل جعل العصمة بيد الزوج لعلمه بطبيعة المرأة الإنفعالية، فهل نصدقهم ام نصدق الله
الإحصائيات تقول ان المرأة هي المجرم الأول على الأرض و الضحية هي اولادها، و الجريمة هي الإجهاض. ولا أحد يحاسب المرأة على تلك الجريمة لأننا فى زمن اصبح اشباه الرجال يخشون غضب المرأة.
حتى في صعيد مصر تربي المرآة أولادها الذكور لكي يتم توريطهم في عمليات قتل تنتهي بقتلهم هم شخصياً بإسم الثأر بتحريض منها و لا ينتبه الرجال في الصعيد إلى هذه المؤامرة النسائية.
90% من الأطفال المرافقين للنساء الشحاذات هم من الأطفال المخطوفين لكي يتم استغلالهم في عمليات الشحاذة و ولا أحد يعاقبهن أو يعدمهن فالكل يخاف من المرأة هنا. مع إن لو طبقنا اختبار الحمض النووي لقبضنا عليهن جميعاً وارجعنا الأولاد إلى اهلهم الحقيقيين.
المرأة التي يتم تقويتها تتمرد و تسب زوجها وأمام اولاده و قد تخونه إذا فقدت احترامها له و يأتي بعض الشيوخ بمنع الأب من اختبار الحمض النووي على اولاده للتأكد من نسب اولاده مع ان القرآن قال (إدعوهم لأبائهم هو اقسط عند الله فإن لم تعلموا ابائهم فاخوانكم في الدين و مواليكم)
، و نحن الآن نعلم باستخدام الحمض النووي، ثم لاماذا لا نفصل بين احتبار النسب و اتهام الأم بالزنا؟ الكل يخاف من المرأة المهم ستر الأم حتى لو اختلطت الأنساب و تزوج ابن الزنا من اخته مش مهم، و مش مهم المواريث و طبعاً مش مهم الأب، أي منطق هذا ؟
مين المجنون الذي يغامر بشراء شقة ب 200 الف او يزيد لكي يتم الاستيلاء عليها بمجرد ان تنجب الزوجة طفلاً؟ و في اي شرع ان الزوج يسجن إذا كان معسراً و بأي حق يتم المبالغة في النفقة ؟ ما هذا العبث؟
إن المرأة الآن حافظة ماالذي تفعله: 1- تزوجيه 2- انجبي طفلاً 3- افصليه عن اهله تماماً 4- قرقشيه براحتك.
اتوقع ات تبلغ العنوسة المعدلات الموجودة في الغرب و سترون المهازل في هذا المجتمع إذا لم يتم ايقاف هذا العبث.

Anonymous said...

إلى المعلق المجهول اللي كاتب فوق عن قانون الاحوال الشخصية

أولا أحييك على مقالتك الرائعة وعلى فصاحتك وبعد نظرك

كلامك سليم مائة بالمائة

وانا أحد هؤلاء الذين فقدوا كل شيء بسبب هذا القانون المجحف

فالمرِأة بعد إنجابها يتعالى صوتها و تزداد احتجاجاتها بلا اسباب وتعلن التمرد والعصيان على زوجها الذي لا يكون أمامة الا طريقان اما يذعن ويخنع لها وينضم لطابور طويل من اشباة الرجال او ان يرفض الإذعان وتكون هي الحرب إذاً
وتنتهي غالبا بالطلاق و حصول الزوجه عالشقة التي تكبد الزوج سنوات من العمل لإدخار ثمنها وتوفير متطلبات الحياة بها
وكذلك تحصل على نفقات متعددة بأسماء مختلفة من متعه ومؤخر وخلافة ثم نفقة شهرية تقطم وسط الزوج السابق وايضا انتشر هذة الايام وضع شرط زيادة سنوية من 10 ال 20 بالمائة سنوياً

ويجد الزوج نفسة في الشارع فإما يعود للإقامة مع أهلة او يستأجر شقة ويكتفي فيها بأقل القليل ممن يلزم حياتة اليومية
ويعيش كمن يحيا في سجن
يفتقد ابناؤة و يفتقد الحياة الزوجية السعيدة و يلعن الزمن واليوم الذي تزوج فية و يلعن قوانين هذا الزمن الاغبر و يتمرد على المجتمع

على فكرة هذة ليست قصتي وحدي
بل وقصة صديقي عمري المقربين باختلاف ان احدهم مازال في مرحلة المحاضر الكيدية والمحاكم والقضايا

هذة ياسادة ليست قصة فرد
با قصة مجتمع بأسرة

Anonymous said...

إيه يا بنتي اتاخرتي علينا ليه
وحشتينا موت
كل سنة وانتي طيبة يا جميل

Anonymous said...

أنا عايز أقول ان المناخ العام في مصر هو مناخ فيه احتقار و تربص بلرجولة و مش عارف في مصلحة مين ده، ده اكيد في مصلحة اسرائيل يعني لو حصلت حرب تاني بيننا و بين اسرائيل مش الرجالة اللي المفروض يدافعوا عن مصر و الا ساعتها بتوع تمكين المرأة هم اللي حيتصجوا للأعداء بعد ما يكونوا دمروا الرجولة في مصر؟ حتى الأمريكان اتبهدلوا بسبب الحركات النسوية وشوف الصين عاملة فيهم ايه و شوف اشباه الرجال عندهم اللي بقوا في كل حتة و الله حل مشاكل العالم ده كله ان صوت المرأة الانتخابي يبقى نصف صوت الرجل عملاً بمبدأ ان شهادتها نصف شهادة الرجل و ده اللي حيوقف الحركة الصهيونية اللي بتخاف من الرجالة الحقيقيين عند حدها

wanna b a bride said...

السلام على من اتبع الهدى

و النبي انتوا أصلا تلات ترباعكم أي كلام
(انت زعلت ليه يا أخي ما جايز انت من الربع الباقي)..بقى انا أعملكم بلوج بحاله
و اتخلى عن منهجي الديكتاتوري
و آخد رأيكم في كل قشاية هتتحط فيه
و عرايس و عرسان
و نكد على تنكيت
و حبشتكنات و من غير حبشتكنات
و باللبن و سادة

و في الآخر أقعد أستنى
.
.
أستنى
.
.
أستنى
.
.
و في الآخر ماحدش بيبعت حكايات تتنشر؟

ايه يعني أأجره ايجار جديد و أخلص منه

كلكم خلاص يعني أحمد و منى و كله اتجوز أو خطب من غير مشاكل؟

ده حتى أحمد و منى تاهوا من بعض يجي عشرين سنة قبل مايلاقوا بعض تاني

هو صحيح لوكان احمد جايب خط سحري من أبو 12 جنية لنفسه وواحد تاني سوبر دردشة لمنى كانت اتحلت المشكلة

بس برضه يا جماعة

أكيد حد فيكم فيه شوية دراما كده في حياته

الحكايات يا جماعة

الحكاياااااااااات

الحاج صاحب البلوجر مديلي البلوج الجديد ده رهن و قالي يا إما تمليه قبل شهر فقراير مايخلص يا إما هرميلك عفشك في الشارع


و انتوا مايرضيكوش اترمى في الشارعفي البرد ده؟

ياللا يا جماعة ماتتكسفوش ..فضفضوا فضفضوا وانا خلاص هخليه عرايس و عرسان

عشان البهوات اللي بيقولوا انهم مظلومين دول يحكولنا مظلومين ازاي

(زعلت ليه تاني؟..هو مافيش بهوات غيرك يعني ما الناس كتير) يالا يا شباب و يا بنات

عمروا بيت العرايس و العرسان

FATMA said...

انا شوفت بوست بتاعك منشور في الدستور عشان كده جيت اشوفك صعبت علي أوي لما الراجل بتاع الميكروباص ده عمل كده بس تصدقي حركة جامدة النصابين دول بيجيبو الافكار دي من اين

Anonymous said...

مبروك يا برايد المقال فى الدستور :)
ولا أقول مبروك يا غادة لأ و أسمك الثنائى كمان :)
يلا عقبال ما أباركلك على العريس و كدة كمان هوة حيعرف يوصلك أسرع ان شاء الله :)

Anonymous said...

مبروك يا برايد على المدونه الجميله ام دم خفيف دى

بصراحه انتى بقيت اشهر ممن النسر فى الاوراق الحكوميه خصوصا بعد ما اتكتب عنك فى الاهرام

وياسلام عليك وانتى منورة جريده الدستور -اللى منها انا عرفت مدونتك اصلى مقاطعه الجاريد الرسميه

بصى يا ستى انا عايزه احكى لى حكايتى مع العريس الاخير لكن حاسه ان الدنيا هتقلب عندك بغم

لكن كل اللى اقدر اقوله لكى انه خد الشر وراح وانا مش آسفه عليه لانه ما يستاهلنيش لان اللى يتخلى عنك فى وقت المحنه ميتبكيش عليه وبعدين بعد تفكير عميق انا قاعده فى بيت ابويا مش فى الشارع لحد ما يجى العريس المناسب على حمارته البيضا العارجه ويخطفنى

سلامى مع احترامى

Anonymous said...

دول معندهمش نظر
انا العريس المنتظر
$:

Anonymous said...

بت يا برايد نازل الدستور بتاع الاسبوع ده الحلقه التانيه بتاع العريس اللى فى الميكروباص بس باسم واحدة بعتاهلهم على الايميل
ده انتى و للا ملطوش ؟

Anonymous said...

مبروك يا برايد على نشر البوست بتاعك فى الدستور والله انتى تستحقى اكتر من كده بس يا رب يكون منشور باسمك مش مسروق منك
بس على فكرة البوست تم اختصاره بشكل قلل كتير من خفة دمه ياريت لو كان اتنشر زى ماهو فى البلوج
على العموم الف مبروك والى الامام

Anonymous said...

هههههههههههههههههههههههههههههههههههههههههههههههههههههههههههه


بصي....مش عارفة اصلها ح تبقى فضايح اييييييييييه

وربنا حليم ستار مش عارفة يعني كويس يعني لما واحدة تكتب عن واحد وتفضح امه وتخلي الاربعة منه بتلاتة مليم؟


وللا واحد يشرح واحدة وتبقى فضيحتها بجلاجل وبدل ما تتجوز تقف تحت العمود وتقول تسمح تولع لي؟

عموما على خيرة الله انت برضه "عاقلة" و"كاملة" ومش ح تشردي لحد متهيالي


حائرة س. ع.؟ ممكن برضه

ليه لا حتى عشان ما تبقاش فضيحة

بس بقى افرضي واحد نزل على المدونة بتاعتك: يا نفيسة يا كرع أنا لسة باحبك وما نسيتش الليالي اللي كانت بينا وابننا اللي ودتيه الملجأ عشان تتجوزي البقف اللي انت على ذمته اللي اسمه مرسي الشبكشي الإمضاء فتوح حبيبك القديم...يبقى ايه الحل بقى ساعتها؟


هههههههههههههههههههههههههههههههههههههههههههههههههههه


والله العظيم انت مسخرة

ههههههههههههههههههههههههههههههههههههههههههههههههههههههههههههههههههههههههههههههههههه

عموما انت معاكي حق في ان اللي يشوف بلاوي غيره تهون عليه بلوته

يعني انا مثلا اتجوزت مرة بس كانت ايه تحلف بيها بنات مصر كلهم

وكل واحدة ما اتجوزتش بتسمع مني بتبوس ايدها وش وضهر على النعمة اللي هي فيها

وكل واحدة عايزة تتطلق من جوزها وتسمع مني ترجع تبوس رجلين جوزها

وبعدين مين الصحفية الوقيع دي اللي قالت عليكي عانس وانت عندك 28 سنة؟ دي ما بتفهمش في حاجة

عموما ان شاء الله تتجوزي واحد راجل

اذا لقتيه بقى

مع الاعتذار للاخوة اللي ممكن يزعلوا

Anonymous said...

بجد بجد عسل و طريقتك جميلة قوى ربنا يوفقك ز يوقف القطر قدام بيتكو قصدى قطر الجواز طبعا يمكن ده اول مرة اعلق فيها و تشوفى تعليقاتى و بس ا ن شاء الله هنبقى صحاب و كمان دى اول مرة ادخل علم المدونات عايزك تقوليلى ايه رأك فيها
http://neokhaled.blogspot.com

Anonymous said...

http://www.ikhwanonline.com/Article.asp?ID=25522&SectionID=0

ده تحقيق عن المدونات كتبت فيه عنك

على فكرة كنت حابه اخد رأيك فيه بس ما عرفتش اوصلك وقت اما عملته
ارجو ان يعجبك
ويسعدني ان نظل على تواصل
سالي مشالي

Anonymous said...

عايزة اتجوز هانم اول مرة أدخل مدونتك بعد ما وجدت ليها عرض علي موقع اخوان أون لاين , فقررت أدخل اتعرف علي المدونةوصاحبتها , بصراحة مكنتش متخيل اني الاقي مدونة جيدة بالشكل ده وبتعرض حاجة مهمة زي دي
وحضطر ادخل مدونتك تاني بس مرة انا اكونفاضي شويه واعمل شويه تحاليل
....صحفية مش حاجة تانية ليها ولبعض مدونات زميلاتك
وهي فرصة ليكي من ضمن الشهرة بعد الاهرام واخوان أون لاين ان نعرض قضيتك علي الملاء الالكتروني بشكل واسع
وده لينك الموضوع علي اخوان أون لاين لو مشفتهوش قبل كده ارسلته لي محررة الموضوع عبر البريد الالكتروني
http://www.ikhwanonline.com/Article.asp?ID=25522&SectionID=0

Anonymous said...

استدراك ارجو ان اتواصل معك عن تقرير سأهده عن مدونات البنات
أن ترسلي لي وسيلة للتواصل الموضوع أعده لموقع اخوان ويب بالانجليزية ولموقع الجزيرةتوك بالعربية
abdoumonem@gmail.com

Hend Sallam said...

really nice blog..........go on!!

Anonymous said...

برايد انتى فين
وحشتينا يابنتى
فين تعليقاتك وفين بوستاتك
اوعى يكون مافيش عرسان هما الرجاله فى مصر نظرها ضعف ولا ايه

مستنيين الجديد
بسرررررررررررررررررررررررعة

tamer afify said...

حلو جدا الموضوع ده وفكرة هايلة
ويكون شامل للعرسان والعرايس

وبما انك هتبقي رئيس التحرير
شوفيلي أي شغلانة معاكي

CHICO said...

انا عاوز عروسة

Anonymous said...

وبعد ما تتجوزي حتعملي مدونة "عايزة أرتاااااااااااااااااح"

أختك العانس 20 سنة
lol

Anonymous said...

اشطاط يا برايد
بصي انا رأي انه يبقي للطرفين الرجال والنساء
وكمان نكتبه بأسلوب كوميدي
حتي ولو القصة مأساوية نشترط علي صاحبها انه يكتبها بلغة ساخرة ضاحكة لأنها مش ناقصة هم يعني
وطبعا كل واحد يكتب القصة بأسلوبه لأنها طبعا قصته وهو اولي بيها وبعدين احنا هنا مش مجلة وانتي رئيسة التحرير وهتشيلي دة وتحطي دة
مادام اخترتي خيار الديمقراطية يبقي مشيها ديمقراطية علي طول
بس بقي الشيء المؤسف اني مش هقدر اشارك معاكوا في الحوار دة لأني رغم اني عمرى26 سنة وشاب وسيم وزي القمر
_ مش جخ والله _ لكن ماعشتش قصة حب قبل كدة علشان اقدر احكيهالكوا اما بقي ليه فمش عارف ليه
بس مايمنعش اني اشارك معاكوا بالراي وكدة ويلا سلام

Anonymous said...

انا انت مش تتجوزى علشان تكتبى على طووووووووول ممكن؟

Anonymous said...

يا ريت يا برايد تردى عليا انا علشان انا عايز اااااخد رأيك اوك؟

Anonymous said...

على كلامك اللى يشوف بلاوى غغيره بلوته تهون عليه باااااااااااااااااااااااااااااااااااااااااااااااااااااااى يا برايد

Anonymous said...

اختي الغالية شكرا على مدونتك الجميلة انا شفتك وانتي في برنامج العاشرة مساء بجد بجد ونعم الاحترام والادب وانا من اشد المعجبين بالاستاذة مني الشاذلي وربنا يوفقك ديما انا عندي مدونة بسيطة ممكن تساعدك في كتاباتك واشكرك

http://hsharqawi.jeeran.com/

إبراهيم الشرقاوي

Anonymous said...

بجد معجبة بيكى اوى ونفسى احقق حلمى زيك انا بحب الكتابة موت يارب الاقى طريقى

Anonymous said...

dcdcd

Anonymous said...

العزيزة برايد

بجد ماشاء الله عليكي

دمك بجد خفيف جدا

ومبروك النشر يا ناشرة

أنا عرفت مدونتك عن طريق صديق ليا

تحياتي ليكِ

جومانا حمدي

Anonymous said...

انا امير
و معجبة جدا بفكرة ان الواحد ممكن يحول تجربتة الشخصية الى ملحمة من الكتابة البسيطة و فيها ممكن الانسان يلاقى شركاء لة فىالمحنة رغم انة بيكون حاسس ان مافيش حد غيرة بيمر بالمصيبة دة غيرة لوحدة

Anonymous said...

انتى عاوزة اية هااااااااا

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

همسات الشرق said...

ازيكم انا حبيت اكون معاكم رغم انى مش عانس ومش فاتنى قطر الجواز واتجوزت من 3 شهور بس اهو هامن عليكى يا برايد واشارك معاكى
على فكرة باهرج معاكى انا بحبك اوى يا غادة وانتى فعلا عاجبانى اوى