Saturday, December 09, 2006

تابــــــــع الرابــــــــــع

و جاء اليوم الموعود...و دقت الساعة دقاتها المتأنية التي يختلف إيقاعها تمام الإختلاف عن إيقاع دقات قلبي المتسارعة
تن..تن..تن..تن..تن..تن..تن
دقات تهز وجداني و تزلزل كيان
يها قد أتى الميعاد..ميعادي مع السعادة
هذا الميعاد الذي أخره القدر كثيرا
لكني صبرت و صبرت
و هاقد أثمر صبري و انتظاري
و ها أنا أخطو أولى خطواتي الى مملكتي الجديدة التي لا مكان فيها للحزن و لا للبكاء
لقد ارتشفت من كأس التعاسة الكثير
و الآن لم يعد هناك الا كأس الهناء أرتوي منه الى آخر العمر
...ستووووووووووووووووووووووووووووووووووووووووووووووب
انتوا صدقتوا والا ايه؟

الساعة سابعة اليوم الموعود قعدنا نستنى بعد كورس تنضيق البيت اللي انتوا عارفينه
استنينى كتير؟الساعة جت سبعة ..و نص..تمانية..ونص..تسعة.. و تلت
بابا قاعد على آخره بيمارس هوايته المفضله في الجز على سنانه خصوصا لما يجيلي عريس من اياهم (و النبي صعبان عليا سنان الراجل ده ذنبها في رقبتي) المهم عمال يبصلي و ينفخ و انا قاعده في نص هدومي
ماما خدته و طلعوا بره الأوضة و سمعت فاصل من الزعيق بالوشوشة-قال يعني عشان مايجرحوش مشاعري- آه يا بن ستين في سبعين أنا تحطني في الموقف ده؟..طب و حياة سنان بابا لو كان ليك في الطيب نصيب لاطلعهم على جتتك و جتت اللي خلفوه ..قول انشالله

و أخيرا فيييين الساعة التاسعة و الدقيقة الرابعة و الأربعون ضرب الجرس
بابا حسيت انها هتكبر في دماغه و هيلطعهم ع الباب ..لطعه بلطعه بأه.. بس ماما بصتله و بصتلي و قلبت شفتها قدامه بصعبنه..فيظهر حركة جواة المشاعر الأبوية فحن..و اتنهد ..و قام فتح الباب
دخلو ورا بعض..طنط شكرية في فستان موديل عضة الكلب ووراها العريس عبارة عن 32 سنّة و طالعلهم بني آدم
سنة يعني تووث
آه و الله ..أعرض ابتسامة شوفتها في حياتي
عجبتني ابتسامتة جدا..بس طبعا فرست بابا قوي..جاي متأخر و كمان بيبتسم ..ال 1111 بتوع بابا بدأول يطلعوا بس ماما حطت ايدها اليمين فوق دراعه الشمال فاتنهد تاني و أذعن للامر الواقع
قعدنا كلنا في الصالون بنتكلم في أي حاجه ..أي حاجه و السلام بعيد عن الجواز ..أكنها قعدة تعارف يعني و خلاص
العريس الوسيم ..آه وسيم فعلا ..بيرد على كل الأسئلة بابتسامة واسعة أو ضحكة مجلجلة و من خلال بقه الفتوح على آخره تقدر تشوف بوضوح اللوز و البلعوم و لو دققت شوية يمكن توصل للأمعاء الغليظة ..بس بشوش كده يعني ووشه سمح...خير ..خلصت القاعده و ايه بأه ..ده كان اول عريس مايدخلش عليا ايد ورا و ايد قدام و ايد بابا على قفاه
كان جايب لفه صغيرة كده كان نفسي من اول القاعدة أعرف هي فيها ايه
هو مشي هو و طنط شكرية من هنا و انا و بابا و ماما اتلمينا ع اللفة من هنا ..عملين حواليها دايرة و مافيش حد عايز يمد ايده زي مانكون بتوع الإف بي آي و مشتبهين في شنطة واحد من تورا بورا
الفضول كان هيقتلني فمديت ايدي و فتحت اللفة الصغنتوتة دي ..لأجد فيها .....اييييييييه؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اصبروا اصبروا..هقولكوا في الاخر

بابا بصلي و قاللي :ايه ده؟
ماعرفش يا بابا زي مانت شايف
ماما قالتله ماحنا مانعرفش يا بو برايد العرسان بيجيبوا ايه في المناسبات دي..يمكن هي دي الموضة
بابا وقف يبصلنا شوية و يبص للفة و وبعدين تنهد باستسلام و هز كتفه ..يمكن....
تاني مرة بأه..هتقولولي ليه ماتكلمتوش في أول مرة و خلصتوا
يا جماعة ما هو مش معقول كل اما حد يجيلي يمشي من أول مرة..الناس بدأوا يتكلموا و يقولوا مادام بيمشوا من اول مرة يبقى برايد فيها عيب
قولنا بأه نقسم أي قاعده بعد كده على نصين ..كده ممكن يقتنعوا اننا ماتفقناش أو احنا اللي مشيناه و بابا دألجه ع السلم
غباء؟..هو غباء بس هنعمل ايه؟..فيه مثل بيقول ..لو نزلت بلد بيعبدوا فيها العجل ..حش و اديله..
مثل بيئة عارفه..طنط شكرية اللي قالتهولي
بس القاعده الأولى المرة دي المفروض انها مبشرة و باستثناء التأخير عدت من غير خسائر كبيرة

تاني معاد بقولكم ..احنا مانتظرناش الساعة سابعة زي المرة اللي فاتت لأننا أدركنا ان العريس باينه ماشي على توقيت دبي
فبدأنا نستنى ابتداءا من الساعة تسعة ناس مرنين أهه و مافيش بعد كده

ضرب الجرس و دخلوا الإتنين ورا بعض ..نفس المنظر بتاع المرة الأولانية باستثناء ان فستان طنط شكرية المرة دي كان موديل رفسة الحمار
قعدت ابص على ايده يمكن المرة دي جايب حاجة غير المرة اللي فاتت..بس نأبي طلع على شونة(ألا يعني ايه نأبي و يعني ايه شونة دي) ..ما علينا
قعد العريس أبو ابتسامة واسعة ده ..يا ختي أمور
بابا بيبتدي هو كمان بابتسامة ازيك يا ابني
ههههههه الله يسلمك يا عمي
و ازي الحاج و الحاجه
ههههههههههههه بخير و الحمد لله
ماما بابتسامه واسعة ماكانش له لزوم تتعب نفسك و تجيب معاك حاجة المرة اللي فاتت
ههههههههه دي حاجه بسيطة يا طنط ..حاجة من عندنا
من عندكو ..هي دبي فيها حاجات حلوة من دي
هههههههه دبي؟..دبي ايه يا طنط؟....قصدك الرياض
الرياض؟
لفينا كلنا بصينا لطنط شكرية اللي بانت محرجة كده شوية و بعدين ابتسمت ابتسامة عصبية كده
ماهو انا أصلي باين ودني مابقتش مظبوطة زي زمان ههههه السن بأه معلش
رجعنا بصيناله و هو قاعد مبتسم
بابا:يعني حضرتك في الرياض
هههه آه .عايش و باشتغل هناك
و عامل ايه هناك مبسوط
ههههه جدا جدا
بيقولوا أهل الرياض متشددين شوية
ههههههههه لا أبدا أبدا دول طيبين جددددا
و انت علاقتك كويسه مع السعوديين هناك
هههههه سعوديين سعوديين ايه يا عمي انا ماعرفش سعوديين
ازاي يعني عايش في السعودية و ماتعرفش أي سعوديين
هههههه سعودية؟ سعودية ايه يا عمي
طنط شكرية بأه في اللحظة دي بتشيل شنطتها و ماشية..أسيبكم انا بأه طالما خدتوا على بعض..ابقوا طمنوني بأه
المرة دي بأه ماما اللي وقفتلهااستني يا حشرية اقعدي رايحة فين؟
انا ؟انا حشرية؟..يعني الحق عليا؟
استني هنا اما نشوف الحكاية ايه؟ بتقوللي ايه بأه يا حبيبي؟..عايش في الرياض و ماتعرفش السعودية؟
ههههه أيوة يا طنط يعني هاعرفها منين؟
ازاي يا بني آدم ما الرياض في السعودية
هههههههههههههههههههههه..آآآآآه انتوا فاكرينني من الرياض اللي في السعودية
امال ايه؟
لا يا جماعة أنا من الريااااض..الرياض اللي في دمياط
الرياض اللي في دمياط؟ أنا مش فاهمة حاجة
...ههههــ
و ديني لو كملت الضحكة دي لاتكون آخر ضحكة في حياتك ..فهمني بتقول ايه
طيب طيب..مش هاضحك خلاص..يا طنط الرياض دي قرية في محافظة دمياط
نعممممممم..أمال ايه دبي و شوبنج و مش عارفة ايه
بابا اتدخل:طب معلش معلش ..فهمني باه بالمرة قبل ما أولع فيك و في البني آدمه اللي جايباك ..سيادتك بتشتغل ايه بالظبط؟ معيد في تربية رياضية و الا في هندسة
العريس اللي قام من مكانه و بقه رجل جوه الصالون و رجل براه و بابا ماسكه من دراعه و ماما ماسكه طنط حشرية من قفاها
الصراحة يا عمي الصراحة..أنا كنت في تربية رياضية الأول و بعدين بقيت معيد ...يعني قعدت أعيد أعيد لحد مارفدوني م الكلية و بعدين حولت كفاءة انتاجية
بابا و ماما ماسكين الإتنين و بيقربوا عليهم زي ما مصاصين الدماء بيقربوا على ضحاياهم و طالعين بيهم بره الباب و العريس هوو طنط حشرية مرسوم على وشهم أقسى أمارات الرعب
و قفنا كلنا ع السلم و هما الإتنين بيبصوا لماما و بابا برعب
و فجأه...مديت رجلي و اديتهم هما الإتنين مقلب حرامية و بصينا عليهم احنا التلاتة و هما بيتدحرجوا مع بعض في مزيج سيريالي بديع
نفضنا ايدينا و قفلنا الباب و طفينا النور
.
.
.
.
آه نسيت أقولكم اللفة اللي العريس كان جايبها معاه في أول مرة كان فيها ايه؟...
.
.
.
قرص مشبك و نص كيلو بسبوسة على هريسة............و 3 صوابع جلاش

89 comments:

Anonymous said...

كدة مقعدانا كل دة على نار
انا قلت اعلق الاول وبعدين اقرا البوست براحتى

مصرى متغرب said...

انا باكتب وانا ميت على نفسى من الضحك انتى بتتكلمى جد ولا بتهزرى وخلتينى صحيت عمدة دبى من النوم وقولتلة ماعلش البت برايد قاصدانى فى خدمة وهانبدأ نتحرى الموضوع وفجأة طلع السعودية ماكدبتش خبر اخدت اول سماعة تليفون وكلمت عمدة الرياض بس الى فى السعودية مش الى فى كفر ابو تشط وقالى انا تحت امرك انت وبرايد ومقعد الرجالة مستنيين يطلع الراجل من ههههههههههههههههههههههه
لا والله انا لو منك ماكنتش رميت طنط حشرية من على السلم انا كنت طلعت على السطح وقلبتهازرع بصل ( يعنى الراس تحت والرجلين فوق ) وعلى الاسفلت الى تحت بيتكم ولو انتم دور ارضى ممكن اطلع لها فيزة الامارات ودبى بالتحديد واخدة بالك دبى وارميها لك ياستى من فوق برج العرب واحنا تحت الطلب ونتمنى نخدم وبالذات فى طنط شكرية

مصرى متغرب said...

ممكن اللفة الى جايبها لو سمحت تبعتيها اصل احنا وحشتنا حلويات السيد البدوى مددددددددددددد ياسيددددددد
على فكرة هو كان جايب عينة تعملى عليها تحاليل ولو عجبتك تبقى تطلبى هههههههههههههههههههههههههه

عابر سبيل said...

انت شكلك واحدة متجوزة وبتسلي نفسك
بالحكايات دي

يللا الفراغ ممكن يعمل في الواحد اكتر من كده

Anonymous said...

I have an idea,

If it's that bad in Egypt and you liked the idea to go Dubai.
I'm an engineer and I work in Dubai in the biggest company in Dubai in a high posiotion.
I'm a very nice person and you won't regret it.
If you don't beleave me I can give you my wife's phone number and you ask her yourself.
Just make sure to call her in the morning while our older kids are at their schools so she can talk with you freely.
:)
Ok, waiting for you to reply.

Anonymous said...

كدة برضو يا بنت الايه تسبينا ملطوشين لحدي دلوقتي مستنيينك على نار..بس والله لو الموضوع ميستهلش لزعل منك...انا حقراه دلوقتي علشان قلت اسلم عليكي الاول وبعد كدة اقراه....يا الله بسم الله الرحمان الرحيم...خير الله هما اجعلو خيررررررررررر...نبتدي بقه...

Ahmed Shokeir said...

فيه في الوادي الجديد قرية والله إسمها قرية باريس إبقي خللّي بالك المرة الجاية يقولولك العريس من باريس

Anonymous said...

الله كدة حلوت اوييييييي...هو انا مش قيلالكم اني الحكاية مالاول فيها ملعوب كبير ...اهو المستور بان اهو....والله الولية الحشرية دي لزمها حرق بمية نار....دا عريس دا...امال قعدة تقلك بتحبك زي بنتها ومش عرفة ايه كمان..(حبها برص واتنين خرص)...دي ولية معندهاش دم ولا قلب ولا حتت ضمير من اصلو...
انت تحمدي ربنا طبعا يا برايد يا حبيبتي اني ربنا عدا الموضوع دا على خير وباقل خصارة ممكنة....ربنا يجيبلك الي فيه الخير ولي يسعدك ..يا رب....دنا لو مكانك والله لكنت اديتو بالشبشب ونزلتو السلالم بفضيحة وخليت الي ميشتري يتفرج عليه....ايه المصايب الي بتتحدف علينا دي....عل العموم يا برايد خلي لي حصل دا قدام عينك وبلاش طنط حشرات دي ولا اي طنط بدلها ...الموضوع ميسلمش برضو.....ربنا معاك ويقدملك الي فيه الخير ...يا عسل....والله الرجالة بضفرك يا جميل انت يا روش....

Anonymous said...

ماقلتلك سيبك منهم دة مافيش غيري

قيمة وسيمة ووظيفة مش ميري

ولو على دبي ياستي انا مسافر بكرة الصبح الساعه 9 دبي بس قوليلي انتي عاوزة اية من هناك وانا كمان حاجيبلك شوية صور اخدها بالكاميرا الديجيتال تشوفيها كأنك رحتي هناك بالظبط

فكري تاني يمكن المرة الجاية ماسافرش لوحدي


تتجــــــــــــوزيــــــــــني

Anonymous said...

أنا مش عارفة أعلق من كتر الضحك، بس كل اللي جه في دماغي، إنك لازم تعملي كتاب تجمعي فيه القصص ده. كلامك ما شاء الله مرتب وأفكارك منظمة، وعندي برده إحساس بنظرية المؤامرة، مش عارفة ليه، يعني مش مطمنة. يا إما إنت فعلاً كاتبة، يا إما إنت ولد مش بنت (مع إن ده فيه إطراء كبير للولاد)، يا إما متجوزة، يا إما أم كبيرة، يا إما بتعملي بحث، يا إما كل كلامك صح وأنا اللي سايكو والأفلام كلت مخي. ما علينا، مخسرناش حاجة، يا رب ربنا يوقفنا كلنا ويكتب لنا الخير سواء كان في الجواز أو عدمه :)

Anonymous said...

من غير زعل .. كويس إنه طلع بمبة علشان تكتبي لنا تاني .. ضحكتيني جامد وأنا كنت مكتئب .. بس إيه ده؟ إنتي بتجمعي العرسان دول إزاي؟ ده إنجاز والله يتحسب لك في موسوعة جينيس

mizo said...

heheheheheheheheeee, la2 mesh momken yeb2a koll da begad!!! da koll moseeba, 2asdi 3arees, men dol ygeeb el daght, rabbena ysabbarek, howa zay ma 2oltelek 2abl keda, te3meli el 7ekayat di mosalsal w teshtehry w bala gawaz bala 2araf:))))))))

hebaz said...

برايد! أنتى مؤلفة شاطرة أوى كدة ؟؟بجد أنا حموت من الضحك! و فعلا نظرية المؤامرة بتاعة طنط حشرية عملت عمايلها خصوصاأنك بتقولى أنها عندها بنت هيه كمان!!!
ما هو مش معقول الكم الغريب من العرسان المضحكين الى بيقعوا فى حظك دول !!!
على العموم ربنا يفك نحسك و عقدتك يابرايد يا أختتى!!
مستنية الخامس :)

Anonymous said...

يابنتى حرام عليكى اللى بتعمليه فى أبوكى ده .. و كان لازم من الأول تفهمى أن طنط زفتيه دى جايباهولك و ماودهوش لبنتها عشان العريس متنيل على عينه
يابنتى ادينى عنوان طنط نيله دى و انا ابعتلها عربية صعايده يكسروا عضمها عشان تبعد عنكم
و ربنا يفتحها عليكى من أى حته تانيه .. قبل أبوكى مايتفقع من عمايلكم

فلة said...

الله عليكي يا برايد
والله انا كنت مستنياه على نار
ربنا يفرحنا بعدلك يا حبيبتي
والله انتي تستاهلي كل خير

3rby said...

ههههههههههههههه
لووووووووووووووووووووووول
مشبك ايه ابن المهروشة ده
انتي كل عرسانك ألاشييين كده
معيد يعني بيعيد السنة
ده ايه الابداع ده
بس الحق عليكي
شوفي هاتفضلي طول عمرك نحس في العرسان
اصل منجي ده يا بنتي قدرك
مش هاتقدري تتجوزي غيره
فبدل ماتستني في عرسان الاشين كمان عشرين سنة اتجوزي منجي واخلصي


التوقيع
حماكي(وماتقولي حماتك)
سلام

خـــرابــيـــش said...

تصدقوا انتوا شوية شباب غباوة
مش شايفين المزمازيل الانسه المشيره العظيمه الكريمه ستنا السيده اوسه عامله ايه
يعنى تعمل ايه اكتر من كده تكتبهالكوا صريحه
تعمل اعلان فى التليفزيون
قالتها بالطريقه وعملت بلوج وقالتها بالفم المليان عايزة اتجوز عشان تفهموا
هتعمل ايه تانى
المزمزيل عايزه تتجوز
ايه مافيش نظر
مافيش زوق
مافيش فهم
مافيش انسانيه
معلشى يا ست أوسه ولا يهمك من الغجر دول
ال كل ماتعملى قصه ييجوا يلموا بعض ويقروا ويصقفوا ويضحكوا وبعدين يروحوا
حد فيهم كان عنده دم وطلب تليفون بيتكوا ولا معاد مع بابا
ماهو انتى كمان مزوداها يا أوسه
طريقة تشريحك للمشتبه فيهم كانت قاسيه اوى تخوف الشباب
يعنى لو واحد عنده حركه كده ولا لازمه كده هيترعب وهوه قاعد قدامك
انا لو منك اقفليها احسن
ولا خليها بفلوس يا اما كشف هيئه واللى يعجبك اتجوزيه غصب واكراه
وانا ممكن اتجوزك
يبقى عملت ثواب فى الدنيا وكمان رحمة ونور على ابويا

bosbos said...

والله انت سكر يا بنتي
ضحكتيني مووووووت

و دي كانت نهاية طنط حشريه
الي الجحيييييم يا حشريه

Nouran said...

ممكن اضحك
هههههههههههههههههههههههههههههههههه
كفاية كده لحسن تزعلي بس انت كل عرسانك كده
طب روحي يا برايد يا بنت ام برايد اللهي يرزقك بعريس ابن حلال ومش مشكلة تقفلي البلوج وافتح واحد تاني

Anonymous said...

انا اول مرة ادخل ع البلوج ده بس انت اسلوبك تحفة

Anonymous said...

يعنى يجيلك عريس دمياطى و ترفضيه و الله ماعندكيش حق . هوه فيه فى طعامه الشاب الدمياطى و لا اديه و لا و لا.........ده كله فوايد و الله ياله معلش خيرها فى غيرها بس لو جالك دمياطى تانى اتعلقى فيه بايدك و سنانك و لا اقولك سنان الوالد

Anonymous said...

ياستى انا دمياطى بس دى اول مرة اسمع عن قرية الرياض دى بيتهيالى دى تاليفة

Anonymous said...

ياستى انا دمياطى بس دى اول مرة اسمع عن قرية الرياض دى بيتهيالى دى تاليفة

Anonymous said...

والله والواحد مش عارف يضحك ولا يزعل
انا متألم جدا لحالك والله ..وفعلا ..اللى حاصلك ده ..مجننى ..الله يكون فى عونك وعون أسرتك
......
أنت أنسانة رائعة .بس نقول ايه
ربنا عاوز كده
...........
أعتقد من الأفضل أنك تقابللى العرسان دول خارج البيت
ده أسهل عليكى وعلى الأسرة ..
.................

Anonymous said...

هههههههههههه
أنا كنت تعبان بس فقت لما قريت البوست ده
ربنا بسعدك يا شيخه زى ما أسعدتينا بسخريتك اللاذعة

arabesque said...

بصي يا برايد يظهر طنط حشرية دي عاملالك عمل مستخبي في شقتكوا يابنتي روحي دوري عليه
أو حد عامل لسوسن عمل ومفهمها إنها مش هاتجوز إلا لو انتي اتشلتي من سكتها الأول..وبالتالي أمها بتوردلك أول بأول
أصل "نأبك على شونة" دي بقى هو "نقبك على شونة" يعني زمان الحرامية في القرى كانوا بيلفوا على البيوت وينقبوا/يعملوا حفرة في الحيط من ورا عشان يسرقوا البهايم
إنما أحيانا حظهم يطلع وحش ويطلع النقب على شونة يعني مكان تخزين قش أو ذرة وكده

Romantic Rose said...

برايد يا بنتي .. اعتقد انكم اتسرعتوا المرة دي .. الغلط علي طنطك حشرية و الراجل ملوش ذنب .. يعني هي اللي هبلت من الاول و قالت قاعد ف دبي لآ مش عارفة خريج تربية رياضيه قسم هندسة .. كنتوا ف الحالة دي زحلقتوها هي ودلقتوها ف السريع و بعدين اخدتوا الشاب علي رواقة .. يعني من دمياط مش وحش و الراجل قال الحق و ما عامش علي عوم حشرية هانم .. خريج كفاية انتاجية مش شرير برضه .. عارفه انك دكتوره ما شاء الله بس انتي بتقولي الراجل شكله حلو و وشه بشوش و سنه مناسب فكان ممكن يجي منه .. و بعدين قرص مشبك و نص كيلو هريسه مش بطال .. انا عارفه انها حاجه عره .. بس يا ستي اهو مش هيجي شايل و محمل من اولها و هو مش عارف الجو ايه .. يعني كنتي استنيتي عرفتي بيشتغل ايه .. شقته فين .. طبعه ايه .. يعني كنتي صبرتي شوية يا برايد يا بنتي ..

انتي كده خلتيني اتفق مع الأخ اللي قال انك بتشرحي العرسان و اللي عنده اي مشكله او عيب هيهرب و يخاف يقرب منك .. شوية صبر ..

و بعدين اعتقد ان باباكي و مامتك استووا و فعلا ممكن ما يستحملوش اقل مشكله ف اي عريس تاني لان بقي عندهم مخزون من البلاوي اكبر مما يحتمله اي انسان .. افضل انك تشوفي العريس بره الاول مع اختك الكبيره مثلا او خالتك او عمتك .. و لو عجبك الحال تبقي تجيبيه البيت .. علي الاقل بدال ما الجيران بيعدوا عليكي اللي بيجوا و يروحوا بدون ما ربنا يتمم بخير ..

علي كل حال جالك عريسين من التعليقات لحد دلوقتي .. انظري ف الامر و نحن ف الانتظار .. ربنا يعدلهالك يا حبيبتي :)

تجربتي said...

برايد ليه ما تحوليش تكتبي في السينما ؟؟؟

Anonymous said...

ياللهول
ياللمهزلة الجوازية


لا يابنتى مينفعش كده
اصله فعلا مينفعش
يعنى انتى كل عرسانك كده
طب ليه ؟
انتى لازم لما ربنا يفك نحسك و يدخل واحد محترم ابن ناس عاقل يعنى تدبسيه بقى فى باب الشقة و تعملى عليه شوربة


اولا
صعبانه عليا سنان باباكى جدا
وانه يتسنى عريس اتأخر كل الوقت ده مش سهل
اعرف واحده لما العريس اتأخر راح لقى باباها بالبيجاما
هههههههه

ثانيا
مامتك بقى اميرة جدا و جاية على نفسها و دراع باباكى الشمال
مع انها بتاكل فى مفسها اكيد م الغيظ بس بتهدى عمو
هاتيلها هدية و النبى

ثالثا

عجبنى اوى مقلب الحرامية اللى اديتيه للعريس و طنط
بس ده بجد
ده انتى قادرة
تفتكرى الولية شكرية دى ممكن تتجرا و تجيبلك عريس تانى

بس لو جابت ووافقتى تقابليه هطبق فى زمارة رقبتك يا بت

رابعا

هو انتى برايد انتى طنط اوسا ؟
اصل انا معرفش


خامسا

هدية العريس ابداع
و الله الراجل ده دماغ و رايق و نفسه حلوة اهو
انا المشبك وحشنى


ساسا

هارد لك يا بنتى
ده انتى ربنا رايدلك لسه تدوقى من كاس العزوبية
مالها الحرية يا اختشى
زى الفل و مالهم اهلم و الله ماهتلاقى ضفر ابوكى ده و لا سنان ابوكى المستحمله غلب عرسانك ده


سابعا و اخيرا

منتظرين الخامس
علشان الحسد انتى عارفة
هههههههههه

Aoossa said...

أنا جيت
سمعونى سلام العنب العنب
للفنان سعد الصغنن
مين ده اللى بيدعى أنى أنا وبرايد نفس الشخصيه
ده شرف كبير وعظيم أن تصفونى بالجميله برايد فاتنة المدونات وعروسة الأنترنت
=============================
برايد
طنط حشريه زعلانه وحاسة بغلطتها
وناويه تجيبلك عريس طول بعرض بأنتفاخ
وكسيب وعنده مصنع نسيج فى كفر الدوار
ومتعلم يا ماما
معاه دبلون صنايع قسم نسيج
و شهاده من شركة بيع المصنوعات
و عنده شقه مطرحين وأربعه عفشة ميه
عشان تاخدوا راحتكوا
و وسيم وماشاءلله سنانه كلها مسوسه
بس المره دى لازم تشوفيه خارج المنزل
يعنى فى أرض محايده
ممكن فى شارع لبنان بدولة تايوان
أى مكان قريب والسلام
بس تحكيللى بقا التفاصيل
بيضالك فى القفص يا برايد
مبروك مقدمآ
مبروك عليكى حنفى
أمووواه ليكى

Anonymous said...

لا اله الا الله
منجلكيش فى حاجه وحشه يابرايد والله
بس فعلا الموضوع كده وسع منك اوى ...مفيش عريس عليه القيمه لحد دلوقتى...هما الرجاله راحوا فى 67 فعلا زى ما بيقولوا ولا ايه
عموما ياريت تزورينى....شوفى تجربتى بعد اذنك طبعا

Anonymous said...

ربنا يرزقك
Don't warry
i love this blog very much..please don't stop writing after marriage

Anonymous said...

بصراحة انا اتصدمت لما قرات المرة ديه البلوج جايز ناس كتير مش هتوافق علي انا هقوله بس ده رايي . اولا ديه مش مشكلة الشخص اللي جاي يتقدملك انكم فهمتوا غلط حقيقته بسبب اللي جابه كان الاسئلة ديه المفروض تتساءل من اول مرة ومباشرة . واعتقد ان مفيش عنده نية للكدب بدليل كلامك انه قال حقيقته لما وجهتوا سؤال مباشر . ثانيا ايه مشكلة انه مبتسم وبيضحك فيها ايه ديه ديه طريقته واسلوبه في الحياة ومنحقه علينا اننا نحترم طريقته ولا نسخر منها بالشكل اللي انتي عملتيه ده .ثالثا ايه مشكلة واحد ساقط ولا ناجح ومعاه اكبر شهادة في الدنيا مش جايز يكون انسان طيب القلب رحيم ولكن حظه العاثر اوقعه في براثن الفشل انتي نفسك كان ممكن تتعرضي لكده وبالمناسبة الفشل جزء لا يتجزاء من حقيبة النجاح يجب عليك اخذهما معا . نقطة اخيرة زي ما انتي بتحكي كده بلسان طليق تخيلي معي لو كان ذلك الشخص يملك نفس فصاحتك في الكلام ويمتلك بلوج زي بتاعك تفتكري كان هيقول عليكي ايه ؟؟؟؟
فكري قبل ما تجرحي مشاعر الناس علشان الموضوع مش لعبة انا لو مكانه وبالصدفة قرات هذا الموضوع سادمر للابد . اخر حاجة انا معرفش الشخص ده ولا اي حاجة علشان محدش يفتكر اني بدافع عنه انا حبيت اقول رايي بكل صراحة
شكرا

Anonymous said...

أنتي ما بترديش ليه؟؟؟؟؟؟!!!؟؟؟؟

Anonymous said...

34t3t3t3t32r2r21e1

Anonymous said...

يا مصيبة انتى اسلوبك تحفة يجنن دايما بتبهرينى فى كل حاجة بتعمليها

Anonymous said...

يا مصيبة انتى اسلوبك تحفة يجنن دايما بتبهرينى فى كل حاجة بتعمليها

Epitaph said...

هههههههههههههههههه

نهاية غير متوقعة

مشبك؟؟ و جلاش و هريسة؟؟؟؟
ههههههههه


احمد يا رب

روحي يا شيخة
الهي تتجوزي

هههههههههه مشبك

Anonymous said...

مش عارف افرح اني من زوار هذه المدونة ولا ازعل عشان انا زائر جديد
بس لاشك انها من احلى واظرف واجرأ المدونات
الارقام هي الي بتقول كده
بالرغم من قلة الانتاج ال حد ما
الا ان اقل بوست عليه 34 كومنت
والزوار عددهم في اللمون
انا مش جي احسد

اما عن هذا البوست
فانا بالفعل احببت مرتين
واحدة تكبرني بثلاث وتجوزت من ثلاث سنين
و برده محرمتش وحبيت واحدة اصغر مني بسنة وبرضة اتجوزت قبل حتي انا ولا هي نخلص تعليم

اما الأن وانا احب ثالثة تصغرني باربع
فاقد الامل نهائي في الزواج منها
ولكني بعافر يمكن الحقها قبل ما تنخطف
مش عارف ليه رغم ان الكل مجمع على ان البنات كتير وكتير منهم بيتاخر جوازهم
الا اني حاسس ان كل لما احب واحدة
تصبح وبقدرة الله وكأنها البنت الوحيدة ع الارض والعرسان اية
مش اول وتاني ورابع
لا
عاشر وعشرين ويمكن ميه

انا قررت لو البنت دي اتجوزت
بعد كده مش ح افكر حتى ان اعجب بواحدة الا اذا كانت اصغر مني
يجي كده بعشر سنين ولا حاجة

Anonymous said...

حرااااااااااااام عليكيييييييييييييييييييي


انا صحيت الميتين من كتر الضحك


مسخرررررررررررررررة

مصرى متغرب said...

برايد ابسطى ياستى انا حكيت حكايتك لعمدة دبى واحنا قاعدين ساعة العصارى بنمص قصب ونشرب شاى فى حديقة الممزر قوم اية الراجل اتأثر جدا وقرر انة يساعدك لحد ماتلاقى العدل فقرر التنبية على اى مصرى نازل يتجوز اول ماينزل ينزل عليكى الاول وعلق اعلان على ابواب المساجد هنا للجنسيات الاخرى كمان بس كان عايز المواصفات للاعلان المهم قوم اية لما كان احنا ماعندناش المواصفات وضعنا بت مصرية جدعة فى سن مناسبة وعايزة تتجوز وهانحط الاميل ادريس بتاعك وهانفتح كول سنتر للرد على الاستفسارات
اطمنى شباب مصر فى دبى بيدعموك ودى دبى الى فى الامارات مش الى فى برج العرب

شهرزاد Shahrazad said...

Eh elna7s dah? ensy ba'a marriage khalas w rakezy fel writing. After kol el3ahat dol leeky nefs lesa?!

wanna b a bride said...

anonymous

براحتك يا عم ولا يهمك
--------------
مصري مغترب
بأه يا عم مصاحب عمدة دبي و عمدة الرياض بتاع السعودية
و مش عارف تبعت لأختك اللي هي أنا عريس من أي دولة عربية شقيقة

طنط حشرية هابعتهالك قريب

لو جت و جابت حاجة تانية هانزلهالك فيوق برج العرب بالباراشوت
و انت عليك الباقي بأه

آه و هابقى ابعتلك معاها حتة مشبك

سوري أصل احنا خلصنا الهريسة كلها

-----------------

عابر سبيل

الله يسامحك

يعني أنا كذابة

-----------------

anonymous-2

يا سلام ..كتر خيرك و الله

أقولك اعرض الموضوع الأول على المدام و بعدين ابقى اديلي عنوان المستشفى عشان أبقى أبعتلك ورد
----------------

السندريلا الحائرة

كويس جدا انك سميتي

بس يظهر دخلتي برجلك الشمال

-----------------

ahmed shokeir

باريس دي الطلعة الجاية انشاء الله

لو ليك قرايب هناك أمانة عليك تخليهم يستنوني

------------------

السندرلا الحائرة

و النبي يا سندرلا يا أوختشي لو عندك شوية ماية نار باقيين عندك تبعتيهوملي عشان أهديهم لطنط حشرية في عيد الأم

هتفتكرها برفان و يمكن تخللي البيت زوزن تحط منها و نخلص م الإتنين بضربة واحدة

-----------------

الحصان الأسود

يعني اتجوزك و أبقة مدام حصان

و الله فكرة .أنا مستعده و الله و هنروح دبي سوا و نسابق في السباق بتاع الشيخ مكتوم ده

و الله فكرة

بس تجيبلي حدوتين دهب و اسطبل 4 مطارح و بيطل على الخليج

------------------

anonymous-3

و الله يا بنتي أنا بنوتة و لسه مادخلتش دنيا و لا آخرة

موضوع الكتاب ده أنا ماعنديش فيه مانع بس أفضل أكتب كتابي انا الأول على صاحب النصيب

هو ده الكتاب اللي ع الأقل أعرف بيتكتب ازاي و يتنشر فين
----------------
يا مراكبي

يا عم ادعيلنا دعوتين حلوين لحسن ابواب السما تكون مفتوحة والا حاجة

احنا في الخدمة يا باشا ..أنا مستعده أتبهدل كل يوم عشان انتوا تنبسطوا و تضحكوا
-----------------

mizo

ده ضغط و سكر و كوليسترول كمان...يا حبيبي يا بابا

لو تعرف حد يا عم يساعدني أعمله مسلسل أنا منفتحة غلى كل الإقتراحات

بس قلبي مش مطاوعني أقول بلا جواز بلا قرف
----------------

hebaz

ربن يحظك يا شيخة و يضحكك كمان و كمان

طنط حشرية ..دانا لو أشوفها؟
حسيت ان مقلب الحرامية مش كفاية عليها

ربنا يرحمها و مايجيبهاش في سكتي
---------------
lastknight

و الله انت باين عليك حنين
دايما بابا بيصعب عليك

طب الصعايدة دول حضرتك ..فيه حد فيهم مش مرتشبط؟
-----------------
فلة

ربنا يخليكي يارب
أيوة كده ادعيلي
احنا بنات زي بعض و لازم نقف جنب بعضشينا
-----------------

3rby

أونكل عربي حماتي؟ ..يا سلااااام و الله باستنا تعليقاتك يا أونكل

زعلان اني باٌوقولك يا حماتي

طب مانت اللي مستقصدني

منجي ..حاااضر ..طب مش لما يطلع بطاقة الأول؟

------------------

wanna b a bride said...

خرابيش

ايه يا عم ؟ هي الخطوط دخلت في بعضيها عندك و الا ايه

أبلة أوسة حبيبة قلبي مش محتاجه تعمل بلوج و تقول عايزة أتجوز

انت مش يتشوف العرسان اللي بيحولها في بلوجها كل بوست والا ايه؟

-----------------

bosbos

و الله انتي اللي عسل

خدي بالك لحسن طنط حشؤية بتدور على واحده تعملها متعهد عرسان

هبقى أبعتلك مواصفاتها عشان تاخدي بالك منها
-------------
nouran

من بقك لباب السما
يا شمعة يا منورانا
-----------
anonymous-4

الله يخليك ده كله من ذوقك
-------------
anonymous-5

يا سلام هو فيه زي الدمايطة و جمالهم و كرمهم:)

طبعا اللي هيجيلي من دمياط بعد كده هامسك فيه بس يبأه 2 كيلو مشبك طيب مش قرص واحد
---------------
anonymous-6

انا مالي يا عم

دا هو اللي بيقول
--------------

رجل من غمار الموالي

اضحك اضحك ماحدش واخد منها حاجة

هحاول أعمل بالنصيحة

يمكن؟
-----------
مبرمج حر

احنا في الخدمة يا فندم

أصحصح التعبان و أضحك القرفان و أوشوش الودع
-------------
arabesque

يعني تفتكر أروح لاونكل الشيخ مخلوف و اخليه يدورلي ع النملة اللي العمل تحت رجليها الشمال؟
أجرب

و شكرا على تفسير نأبك و شونة دي

مجنناني من زمان نفسي أفهمها
-----------
romantic rose

شكرا ع الإقتراحات
هحاول أطبقها

وانا مش بشرحهم و الله

انا بادألجهم بس
-----------------

wanna b a bride said...

تجربتي

ايدي على كتفك
--------------
أنا حرة

أولا
ماتقلقيش هنركبله طقم سنان

ثانيا
عينيه انشاء الله هاجيبلها هدية في عيد الأم و بعد يومين هاخدها منها....كالعادة

ثالثا
أمال يا بنتي هو احنا بنات خرعة و الا ايه؟..لأ ددانا جامده جدا و أعجبك

رابعا
أنا مش اوسة والا حاجة..دا واحد عنده تهيؤات

خامسا
هابعت لك حتة ابعتيلي عنوانك

سادسا
ماليش دعوة عايزة اتجوز

سابعا
الخامس جاي في الطريق
--------------
aoossa

منوراني اي أبلة أوسة يا كايده العدا

حبفي...حبفي ده باين عليه حلو خالص يا أبلة

ألا قوليلي يا أبلة..مش اتجوزتيه انتي ليه؟

آآآآآه ..لازم بتحبيني و قولتي تطيبي خطري و تجوزيني الأول

مردوده لك يا أبلة انشاء الله

تحياتشي

أمممممواة

----------------
rony

هما فعلا تلات ترباعهم راحوا في 67 و الباقي راح في 73

و اللي فضل منهم راح الرياض....اللي في السعودية
-----------------
gamecanvas

مش هبطل بعد الجواز صدقوني

بس جوزوني
-------------
anonymous-7

وجهات نظر

و بعدين لو طان عايز يعمل بلوج ..قوي قوي..و فارس لفارس
و الميدان بره واسع
----------------

ahmed

يا عم الله يخليك

انت بأه البلوج بتاعك منرفزني جدا ..خصوصا عنوانه

جيت أسيبلك تعليق مارفتش..هي خطشيبتشك محرجة عليك تاخد تعليقات مني و الا ايه؟
-----------------

epitaph

آه و النعمة مشبك

انت عارفة او كان جاب شكلمة..كان الموضوع اختلف؟

بس هنعمل ايه؟
-------------

shadi

ربنا مايجعلنا جار و له عينين

و معلش معلش

التالتة تابتة انشاء الله
---------------
غواص بحر الأمل

شيلوا الميتين اللي تحت

منورة يا حبيبتي

شرفينا على طول
-------------
مصري مغترب

ربنا يخليك يا رب و مايرمكش في ضيقة و يوقف في سكتك ولاد الحلال

أيوة كده هي دي وقفة أبناؤنا في الخارج

بس بلاش موضوع الجنسيات التانية دي لو سمحت ..هو انا ناقصة العاهات اللي هنا لما هتجيبلي الجنسيات التانية كمان؟
---------------

شهرزاد

يا ستي هابقى أعصر على نفسي لمونة

ساعد نسرين الايمن said...

القلب اللي بيجرحرنا في حاجة اكيد جارحه
وجراحنا بتفكرني بالمشبك اللي اكلنا
يعني يا برايد تاكلي مشبك الرجل وهريسته وكمان ما يعجبيش
ايه هي من دمياط ما جمال م المنوفية وخديجة مقالتيش لا
وايه يعمي كفاءة انتاجية ماهي عزة بلبع بنت باشاواتجوزت احمد فؤاد نجم وهو صعلوك
وايه يعني ما يعرفش سعوديين هو لازم يكون فاتح مطعم ف لبنان يعني
انتي اتكبرتي وضيعتي الفرصة من ايدكي وكل الغتربين دول مش هينفعوكي لانهم بيزنوا اجازة كل سنتين ومتهالي انك مش عايزة تستني سنتين كمان
المهم العريس ديه لسه فاضي اوديها لكايدهم بنت انعام ولا لا
رجاء الرد بليز البنت يعني قاعدة جنب نوراة ع نار
ساعد نسرين الايمن
بالمناسبة ياليت تخلي صاحبتك اوسة ترجع تكلميني تاني عشان هي زعلتي مني عشان خالفت ميعاد وانا كنت عامل حادثة والله

Anonymous said...
This comment has been removed by a blog administrator.
hebaz said...

eih dah? how did al ahram know ur name ? did they contact u ? wala ma3a nafsohom keda?

wanna b a bride said...
This comment has been removed by a blog administrator.
Anonymous said...

إبسط يا عم، الخبر طلع فالأهرام
بكرة تلاقى شباب صر المحروسة بيتخانقوا عليكى.

بس سؤال هوه أنتى فعلا إسمك زى ما قالوا
طب وعرفو منين
عموما ماتنكريش، إحنا يعنى مش هانعرف أكتر من الحكومة
:D
تحياتشى

Anonymous said...

يابنتى احمدى ربك انه جالك عريس اصلا...
زكلى الشبك وصوابع الجلاش وانتى بتبوسى اديكى زش وضهر...

بصى تيجى نحط خيبتك على خيبتى ونعمل كوكتيل عوانس

دمك عسل
زى دمى برضو

حاجات ومحتاجات said...

ههههههههه والله دمك زي العسل
يا رب ربنا يرزقك بابن الحلال قريب ان شاء الله يا برايد يا اختشي
اقولك باءة يعني اية الواحد نقبة يطلع على شونة
باءة زمان يا ستي الحرامية لما يروحوا يسرقوا بهيمة من زريبة أعزك الله كانوا بينقبوا او يحفروا في سقف الزريبة اللي هي كانت قش تقريبا او حاجة زي كدة عشان يدخلوا الزريبة من سكات. ساعات باءة كانوا ينقبوا او يحفروا المكان الغلط فبدل ما يلاقوا بهايم حلوة تتسرق يلاقوا شونة اللي هي كانت تقريبا حاجة زي العلف كدة فيقولك دة نقبة وتعبة طلع على الشونة اللي ملهاش لازمة
بس وصارت مثلا :)

female egyptian doc said...

انتى مش ممكن و الله انا فطست من الضحك بجد انتى تحفة والله نفسى انك تتجوزى واحد يقدرك و يسعدك...اهم حاجه انه بان على حقيقته و انتى مش اول واحدة كدة انا برضه حصل فيه كدة عشان كدة جواز الصالونات فاشل عشان مفيش حد بيقول الحقيقة عن العريس اللى جاى و تكتشفى كل حاجة فى القعدة و تحسى انك اتلزقتى على قفاكى_اكسكيوز ماى فرينش_عشان كده باقول تانى :يا برايد خليها على الله و اقرى سورة الفتح و استغفرى الله كتير عشان هو شاهد و مطلع ..موضوع جوازك ده ساحب مننا كهربا كتير بس ان شاء الله كلنا نتجوز و نعرف نجيب بيبى ..و على العموم اللى متجوزتش فى الدنيا ربنا فى الجنة حيديها راجل كويس و من المؤمنين اللى متجوزوش يعنى مش حيكون لنا ضرة و الحمد لله ...يا رب تتجوزى و انا كمان و نلحق نجيب عتريس و بهانة ..قولوا امين

Anonymous said...

بجد انك بتبالغي جامد معقول 3 صوابع جلاش بس دا ايه القهره دي بس بجد انتو بتضربو العرسان اللي بيجولك اصلي رحت مرتين اخطب بالشكل دا - جواز صالونات يعني - اه هو ماحصلش نصيب بس مانضربتش والنبي قوليلي انتي ساكنه فين عشان لو جاتلي عروسه في المكان دا مارحش

smraa alnil said...

ال وانا اللي فرحت انه معيد في تربية رياضيه
الله يكسفه
بصي انا اصلا مش بحب الدمياطية ولا الحلاوة الدمياطي
ههههههههههههههههههه

فكرتيني بحالي
بس انا بقي مش عندي طنط حشرية
عندي طنط بوظان
قصدي دكتورة سوزان
اللي بتجيبلي عرسان عرة بعيد عنك
والنبي انا لو عملت مدونة زيك كدة بتكلم فيها علي عرساني مش هنخلص
بس خليني كاتمة في قلبي وساكتة

Anonymous said...

برايد

بعد الدخول على الخريطة الجغرافية ثبت ان الرياض فى كفر الشيخ مش فى دمياط
بس هو العريس وهو جايلك دخل على دمياط علشان يجيب المشبك من هناك ومن هنا نشأ سوء التفاهم

وبعدين اى حد يدخل عليكى بحاجة ملزقة كده متكمليش الموضوع من اصله علشان الجواب باين من عنوانه

ربنا يرحمك يا بنتى قولى امين

تحياتى

ساعد نسرين الايمن said...

ثلاث صوابع جلاش
ومرات لانهائية ادخل مدونتك لاقرا نفس المواضيع
لماذا لا نتزوج حين نريد هذا؟؟
ولماذا لا تكتبيني كل يوم؟؟؟
ولماذا يوجد امثال طنطاتك شكرية حشرية الغبية في كل مكان ؟؟
من يتحمل ثمن السنوات الضائعة ؟
والايام السودا التي يحييها الشباب بدون زواج ؟؟
لقد تزوج حتي ابن الشيطان ف سلسلة ملف المستقبل
فهل الله غاضب عليا الي هذا الحد يتزوج ابن الشيطان ونحن لا نستيطع زوجا
ف البداية ذهبت نسرين
ثم دعاء
ثم ذهبت نسرين
ثم رباب
ثم نسرين
ثم شيماء
ثم نسرين
ثم عزة
ثم نسرين
ثم فاطمة
ثم نسرين
ثم نسرين
لانني كنت ارجع لها دائما
ثم ذهبت اللي الابد
فعل ساجد من يتزوجني ؟؟
ام ان نسرين سوف تسخر مني الي الابد مع السيد س وكل السادة المحترمين الذين ساهموا بشكل او باخر ف تدميري حياتي
ابتداء من امين عام لجنة السيابات- التي سبت كل بنات مصر واعتبرتهم سبايا-
الي عمتي التي ضيعت 10 سنوات من حياتي بخطوبتي لفاطمة اللعينة
برايد هل عندما نتزواج - اقصد الشباب وليس انا وانت طبعا- هل سانسي هذه الايام السوداءة ام سنموت تحت عجلات
قطار الزمن دون ان نراي دنيا- لا اقصد دنيا الراقصة ولا سمير غانم-
من يدري؟؟؟؟؟؟؟؟؟
لعلنا ننسي
بالمناسبة: هل اعجبت يا نسرين ام انك الان مشغول مع علي ؟

Anonymous said...

برايدي يا حصانتي

سوري جيتي متأخرة انا سافرت ولسة راجع امبارح

بقالي شهر باقولك وانتي مطنشة وجاية توافقي بعد الفاس ما وقعت في الراس

وبعدين يا قلبي الاقامة دلوقتي مش سهل خالص والبت الهندية معاها اقامة وزي الفل وشغالة معايا في الشركة كمان غير انها راكنة على درهمين (قرشين) يعني

والبت من ساعه مارحت وفتحت معاها كلام وهيه مابتقولش غير كلمتين عربي

أيجيبشن حايبوسني......هيه ...... إجيبشن حاتبوسني .......هيه

يرضيكي اخلى بيها واسوأ سمعه مصر

ونعمل اية في كل الشباب المغترب اللي هناك...... يرفعوا راسهم ازاي وسط الخلق

يرضيكي بيوت ناس تتقفل ومستقبلهم يضيع

سوري يا حصانتي مش علشاني دة علشان مصر


وحلال الاسطبل بقى عالهندية و شوفيلك انتي بقى اي زريبة لوكال في مصر


بالمناسبة الشيخ مكتوم انكتم خالص يا حراااام ولغوا السباق بتاع البهايم

مصرى متغرب said...

اطمنى يابرايد المكتب الى مفتوح هنا شغال نار واحنا شكلنا لجنة تلقت طلبات المتقدمين وهذة اللجنة انبثقت عنها لجنة فرزت هذة الطلبات لاختيار المناسب منها كما انبثقت عن اللجنة الرئيسية لجنة اخرى لعمل مقابلات مع الطلبات التى رشحتها اللجنة التانية الى كانت انبثقت علشان ترشح الطلبات الكويسة المهم ان هذة اللجنة (وانا هنا باتكلم على اللجنة الى بتعمل المقابلات ) اختارت شوية شباب زى الورد كلهم موافقين على المبدأ واخذت قرارها ورفعتة للجنة الرئيسية الى شكلت لجنة اخرى للتفتيش على كل الللجان السابقة للتأكيد على انها جميعا ادت عملها على اكمل وجة كما انبثقت لجنة للتأكد من ان كل من تم استبعادة فعلا من قبل اللجنة الى كانت بتفرز الطلبات فعلا يستحق الاستبعاد وقد رفعت توصياتها بأن عدد قليل منهم يستحق فرصة تانية وبالفعل انبثقت لجنة مش عارف رقمها كام علشان انا مش بعد المهم اللجنة الجديدة درست طلبات هؤلاء الى يستحقو فرصة تانية وقررت انهم مايستحقوش فرصة تانية ولا حاجة وان اللجنة الى استبعدتهم كان عندها حق وقامت معركة بين اللجنتين مما لزم انبثاق لجنة عن اللجنة الرئيسية للتحكيم بين اللجنتين ولكنها رفعت توصية بأن الموضوع غير قابل للحل الودى وعلية تم رفع الموضوع للقضاء الاماراتى والى ان يبت فى الموضوع من قبل القضاء كل اللجان منعقدة وعلى اهبة الاستعداد
نسيت اقولك فى لجنة جديدة (ايوة تانى دة انا هاعقدك ) المهم اللجنة دى علشان تتابع القضية فى المحاكم وترفع تقريرها للجنة العليا
الخلاصة احنا مش هايهدا لنا بال غير لما نجوزك
بس فية شوية مصاريف صغيرة 39547.65(تسعة وثلاثون الف وخمسمائة سبعة واربعون درهما وخمسة وستون فلس ) قيمة انتقالات وايجار اماكن انعقاد اللجان السابق ذكرها ومصاريف القضية لحد دلوقتى فى القضاء الاماراتى عايزة الفاتورة نبعتها لبابا ولا انتى الى هاتدفعى ؟ ومش عايزك تقلقى خالص فى لجنة جديدة منعقدة علشان تراجع المصاريف دى تم صرفها فيما يستحق ام لا واى تبذير او اسراف سيحاسب المتسبب عنة بشدة بالغة بس يردة المبلغ لازم يندفع لانة اتصرف خلاص
انا مكافأت اعضاء اللجان دى بقى هانخدها بعد الجواز ان شاء الله احنا كل همنا ان احنا نجوزك طبعا

Anonymous said...

مصري مغترب

هيه لسة بتمطر في دبي وللا الامطار الغزيرة بتاعه الاسبوع اللي فات خلصت

نصيحة ماتبقاش تنزل بدماغك عريانة لحسن واضح ان تأثير المطر عليها كان ولامؤاخذة مش ولابد

مصرى متغرب said...

اية ياعم الحصان خليك انت والنبى فى الهندية بتاعتك ربنا يخليهالك وتخلفو احصنة صغيرة وعلى فكرة هى لسة بتمطر بس مش كتير

Anonymous said...

دا انتي والله مشكلة بس مشكلة دمها خفيف
ويارب تتجوزي :))

Anonymous said...

mabrouk a7'bark wasalet fel ahram ya gamila ma7desh hay3raf yekalimik


p.s homa werfo esmik meneen

lola

Anonymous said...

mabrouk a7'bark wasalet fel ahram ya gamila ma7desh hay3raf yekalimik


p.s homa werfo esmik meneen

lola

sabrina said...

3صوابع جلأش
مش معقول أكيد انتي بتجني علية
يعني ازاي اشتراهم
أكيد دة ثمن كيلو
يعني 4 صوابع مش ثلأثة و انت قولتي كدة علشان تشويه صورتة؟
معلش يا بنتي بلأوي

Anonymous said...

اهلييين يا برااايد
والله قلبي عليكي.. بس هالمره العتب على طنط حشريه.. وبرضوا اللي عملتوه فيها مش شويه.. اما من الرياض ..... هههههههههه

يا برايد اسلوبك تحفه وعاجبني مررره.. وانتي مش اقل من اللي بيألفوا كتب او قصص..
عموما..اسمحيلي يا قمر انا نسخت حكياتك مع عرسانك.. علشان ارجع اقراهم مره ثانيه...

الله يعطيك العافيه ويرزقك ابن الحلال اللي تستاهليه..

تحياتي : رنوود من السعوديه

يا مصر اكتب إليكي رسائلي said...

يسرني ان اتقدم بخالص التهاني وأطيب التمنيات بمناسبة حلول عيد الأضحى المبارك اعادة الله علينا وعليكم بالخير واليمن والبركات ، وكل عام وانتم والأسرة الكريمة بخير

Anonymous said...

عاوز/ة كل الناس تعرف مدونتك
اشترك في مشروع الغريب لارشيف المدونات
http://elgharep.blogspot.com/2006/12/blog-post_15.html
............
المدونات العربية
http://arabblogs.blogspot.com/
........
بدل لما تحط لستة طويلة باسماء المدونات
عندك في مدونتك
حط اسم مدونة واحدة تحتوي على اسماء كل المدونات
........
عاوز اسمك يضاف الى قائمة المدونات
ارسل لنا اسم مدونتك وعنوانها و اسمك
على
za_shady@yahoo.com
...........
لو عجبك المشروع أخبر به كل اصدقائك لكي ينجح


امضاء
أعضاء مشروع الغريب لارشيف المدونات

ساعد نسرين الايمن said...

واللع يا برايد انا كمان عايز اتجوز
بس واحد من قريباها مش موافق ع الجوازة ديه
ملحوظة
الواحد ده مش ابوها
ولا اخوها
ولا عمها
ولا خالها
ولا ابنها
ولا ابن عم جوز خالتها
ولا ابن اخت بنت عمتاها
تفتكري الحل اني اقتله

Anonymous said...

بجد انتى لذيذة قوى انا واحدة من 15 مليون اللى قلتى عنهم وانتى كانك بتتكلمنى عنى واللى زاد وغطى مواقع الزواج على النت رايت فيها عجب العجاب كلهم امراض نفسيه وعقد وكلاكيع لغايه ما ربولى الجنان اللى على اصله احكيلك ايه ولا ايه ممكن نكون اصحاب بجد

Anonymous said...

ما زلت أرفع القبعة لكي يا برايد و ربنا يسعد بابن الحلال زي ما بتسعدينا بحكاياتك الغريبة .... و ربنا يكفيكي شر طنطك حشرية ... روحي قلبي و ربى راضيين عليكي

ساعد نسرين الايمن said...

اين انت يا برايد ؟؟؟؟؟؟؟؟؟؟
كل يوم وكل ساعة افتح مدونتك يمكن يكون الخامس جاه
لكنه لا ياتي
لماذا لا تاتي ايها الخامس؟؟؟
لماذا تحرمها/ تحرمنا من متعة رفضك
اعرف انا الشرع قال اربع فقط
ولكن هل ترضي ايها الخامس ان نخرم من كتابات برايد كل هذا الوقت
عارفة ؟
انا فعلا فكرت اركب دقن
واروح لباباكي
عشان تكتبي من جديد
علما باني قد قمت والله ب8 زيارات للخطوبة وكنت دايما باجيب شيكولاتة من امريكان سويت وكل الزيارات ماجبتش نتيجة لكني احتسبت
وكمان والله لما كنت خاطب كنت كل مرة اروخ ازوعا اجيب لها هدية دهب والله العظيم بدون مبالغة وكله ما تمريش
يارب محاولات مصري مغترب والحصان الاسود تفلح انا من زمان نفسي اشوف مغامرة ليك مع غريس اجنبي/ خليجي/ منوفي
ويا رب الخامس يجي بسرعة
ويارب نسرين ترضي عني

Anonymous said...

انا تعبت من كتر الضحك بجد...دي من اخف البلوجات دما الي زرتها
ياريت تتوقعي اني البدلك هنا على طول
اما بخصوص اللفة بتاعة عمو العريس فا كويس انه طلع فيها حاجة مفيدة انا كنت فاكرة حاجة تانية مع اني مبحبش المشبك خالص

Sarah El Gazzar said...

الحقيقة انا عرفت البلوج من زميل..ودخلت عليها مرة قبل كدا ومصدقتش بصراحة الكلام ده ودي تاني مرة ادخل ..اسلوبك جميل جدا ومؤثر واحلى حاجة فيه وصف العرسان
على فكرة انا بكتب قصص زييك كدا بس باللغة العربية مش فضايح اوي كدا..انا كنت فاكرة انه البنات بتعاني من العنوسة ..اه..بس مش للدرجة دي..بصي يابنتي في ملة بتتباع مع الخشب في دمياط اخطفي رجلك على النجاريين هناك واحجزيلك ملتين واتجوزيهم بلا رجالة بلا وجع دماغ
على الاقل كل ما تزهقي منها تغيريها

Anonymous said...

mabrouk 3aleeky 3aressek el khefa

Anonymous said...

ساعد نسرين اليمين

يمكن السبب في بوظان رحلاتك التمانية الميمونة للبحث عن عروسة يكمن في شيكولاتة اميريكان سويت

انت شكلك من مندينة نصر انت كمان

وبتشتري من اميريكان سويت اللي في شارع الطيران

غير المرة الجاية واشتري من لابوار عباس العقاد او قويدر يمكن ربنا يفك نحسك ونفرح فيك

تحياتي يا أبو جارووووو

Anonymous said...

ايه دة عريس ملزق اوى

هههههههههههه

انا بحييكى على خفة دمك واسلوبك اللذيذ

ضحكتينى بجد

وحكاية الرياض دى كمان

ربنا يقويكى يابنتى ويوفقك

تحياتى

Anonymous said...

السلام عليكم انا اريد ان اعرف كيف اشترك في هذا الموقع يا ريت حد ينصحني ازاي عشان عندي قصص اريد نشرها بجد الجد وشكرا ام المروان

Dananeer said...

انتى مش معقوله بجد
و احلى حاجه عجبانى فيكى انك بتقدرى تطلعى من كل بضحكه
و تبسطى غيرك معاكى

Anonymous said...

ههههههههههههههههه
ايه يابنتى ده انتى مش معقولة
ربنا يحميكى

algafry said...

سعدت بوجودي بين كلماتك

algafry said...

سعدت بوجودي بين حروفك

BinO said...

أختي في الله
بالله عليكي
أمانة
أوعي تتجوزي في أخر الأمر حد من علي النت
التريند شكله ماشي في السكة دية و أنتي دماغك الواضح أنها دماغ موزونة
وربنا يهدينا أجمعين

ايوية said...

والله حظك كويس طيب اقولك انا مرة جالى عريس جايبلى معاة علبة شيكولاتة من مقلة الب الى فى اول شارعنا

Ahmed Moghazy said...

على فكرة يا برايد احنا عندنا فى كفر الشيخ مدينة صغيرة كدة اسمه بجد الرياض, مركز ومدينة الرياض
لو مصرة على الجواز ممكن تيجى تعيشى فيها واهى كلها رياض

the:SAESAR said...

العروسين والمعازيم

فرح شعبي لجمال باشا مبارك يا بلد

بيان رسمي من عليش أبو جالوص الغفير الخصوصي لفخامة آبا الحاج أبو جمال ومسئول التنظيم فى الفرح بتاع البيه الصغير، :

يا أهل العزبة بعد ما كنتم جرب والشق في رجل النفر منكم يساع كلبه والده، الحاج عطف واتكرم وخلاص هايدعيكم على فرح البيه جمال، ومع إن الفرح عائلى وانتم يعنى ماتستاجروش تمتو للحاج بصله، فاستحموا يابلد واجهزو، ونعرفكم أن فرح جمال بيه وارثكم - بعد عمر طويل لفخامة جلالة الحاج - على المصونة الجديدة خضرا بنت أبو حسين المسماه من النهاردة رودى بنوتة بابي هسين هيحضره ناس كبرات، ونضاف من العزب التانية ومن أهل المصونة الكبيرة الأكابر، و استحراصاً على صورة عزبتنا بين العزب الشرقية والكفور اللى ف الناحية ديه، قررت اللجنة السيادية الإعلالية العليا المتكلفة بإدارة الليلة الكبيرة رفع تقرير يحذر القوادة السياسية من بلاوي محتملة وفضايح متوقعة من أشكال زيكم وخصوصا لحظة تقديم الزفر للمعازيم ؛ وبناء عليه يا عزبة حدث من فترة يعنى وبناء على أنكم ما تفهموش فى التيكوتيك قرر فخامة الحاج نصب الفرح الحقانى فى ناحية برم الشيخ المجاورة للناحية الشرقية حدا دكانة حسين أبو سالم .

لكين الوضع اتغير وبقالكم دور وحضور يا عرر، والحكاية أصلها عشان يعنى يبقى فى معلومكم انتم وغيركم أن سيدة العزبة الأولى المصونة أم جمال الحنينة ريسة " قعدة للنسوان العمومية" وصاحبة مبادرة "العلام للناس كلاتها " التاريخية و"حركة أم جمال الدولية للنسوان بتوع السلام" التى تضم خيرة نسوة العزب الدولية، المهم المصونة مجالهاش قلب تحرم شعب العزبة من فرحتهم في ليلة مفترجه زى الليلة الكبيرة بتاع جمال بيه وطلبت من فخامة الحاج نصب فرح تاني شعبى لأهل العزبة اللي ما انعزموش في برم الشيخ، وقد رق قلب فخامته كعادته مع محدودى الدخل والمحتاجين ووافق على طلبها كما أصدر توجيهاته بتوزيع القرطاس الرسمي للعزبة على جميع الأهالي المشاركين في الفرح .

تيجو بقى متليفين كده ولابسين المزهزه والمكوى، من الساعة ستة قبل المغرب يوم الجمعة أربعة مايو وسط العزبة عند وسعاية طلعت أبو حرب قدام فرش الحاج مدبولي بتاع الجرايد وبكدة مالكوش حجة وحسك عينك إنت وهو تهوبوا ناحية فرح برم الشيخ أو الناحية الشرقية كلتها, حيث تتواجد قوات الغفر النظامية المدججة بالبنادق سعة عشر طلقات لتأمين الفرح والمعازيم الأكابر

ملحوظة ورجاء حار من الست رودى للنسوان اللى هايحضروا، بلاش الجاز واستخدموا شامبول وبلصن على شعوركم

نقي واحد من البانرات وحطه في مدونتك وربنا يتمم بخير :)

القعقاع said...

صباح الخير يا دودي ( دودي ده اسم الدلع بتاع غادة ) معلش مش عاوز اقولك يا برايد لاني بعز اسم غادة ده اوي ,, صدقيني مش قادر أوصفلك مدى سعادتي لما دخلت البلوج بتاعتك وقريت موضوعاتك ممكن ميكونش السبب نفس الاسباب اللي الاخوة قالوها زي إن اسلوبك في الكتابة جميل ومرح لكن ممكن يكون السبب إن اسلوبك فكرني باسلوب واحدة بحبها جدا ووحشاني جدا جدا ,, انا عرفت شخصيتك من غير ما أشوفك لان نفس الشخصية ونفس طريقة التفكير ونفس الاسلوب كانت عايشة معايا في بيتنا ومتربيين سوا وكمان نفس الاسم ( مش انتي غادة برضه )غادة دي بقى يا ستي نسخة طبق الاصل منك بالنسبة للاسلوب وخفة الدم .. ألف تحية ليكي فكرتيني بأجمل وأحن وأرق أخت اللي واحشاني مووت ( أم يوسف ) ... انما بالنسبة للعريس بتاع دمياط فالراجل ممنوش عيب يا دودي هو المشكلة في تانتك حشرية اتسرعت ومعرفتش تستفهم من الراجل كويس وبعدين ياستي مالهم الدمايطة ماهم حلوين اهم مش احنا اللي ناسبنا الحكومة وبقينا حبايب,, على فكرة انا دمياطي بس ساكن في جدة بتاعت دمياط :)
سلام يا قمر أتمنالك التوفيق مع عرسانك اللي مبيخلصوش دول :D

Anonymous said...

مالهم الدمايطة

؟

علي فكرة انا من دمياط

totalala1976 said...

انتى مصيبة من مصايب الزمن قريت عن مدونتك فى الدستور وقلت ام اشوف البت اللى عامليناها هيصة دى
لقيتك تستهلى مولد
وما تستعجليش على الجواز يا اما والنبى يا ختى ما خدنا حاجة منه غير لقب مطلقة بكل فخر
والله يباركلوا