Sunday, January 28, 2007

الخـــــــــــــامس

أيمن جه..أيمن جه

هي دي إشارة بدأ اليوم عندنا في مكتبنا..حاجة كده زي تحيا جمهورية مصر العربية اللي كنا بنبدأ بيها طابور الصباح زمان
بعد الكلمة دي ما بتتقال الصبح تحسوا ان عاصفة الصحراء ضربت مكتبنا
مرايات بتتفتح إقلام روج من كل لون و نوع بودرة كحل ..طرح بتتفك و تتربط تاني شعور بتتساوى و كل الإستعدادات الأنثوية اللي بتقوم بيها ست الحسن قبل ما تقابل الشاطر عبد الحميد كانت موجودة في اللحظة دي

كل ده عشان أيمن..أيمن مين ..أيمن ده الموظف الوحيد من جنس الرجال اللي موجود في مكتبنا ..تخيلوا كده 14 صيدلانية على وش جواز(و على وش جواز دي فيها قولان) و معاهم أيمن

لأ و مش أي أيمن ..ده أيمن عريض المنكبين قوي الجبهة طويل القامة واسع الإبتسامة عميق العينين حاد الأنف..باختصار كده كل الأوصاف اللي نبيل فاروق بقاله عشرين سنة مزهقنا في وصف أدهم صبري بيها..موجودة في أيمن ده و بالتالي فهو بصراحة يستحق كل الإستعدادات دي
أههههههه-دا أنا ....باتنهد-.المهم بعد عاصفة الصحراء دي دخل أيمن المكان..ماحدش قدر يبص بطريقة مباشرة لأن كل شئ فيه كان بيلمع.. الشعر .البسمة .الجاكت الجلد و. الشوز الملمع كان صعب تبصله مرة واحدة..مش هاتقدر تفتح عينيك(بالغيظة في هالة زرقان) و ريحة البارفان اللي هبت على المكان..خلت اتنين يفقوا النطق و تلاتة يفقدوا الوعي وواحدة كان عندها استعداد تفقد أكتر من كده لو كان حد اداها فرصة

صباح الخير يا جماعة
تمكتنلاربيةلالفف
دا إحنا بنرد بكلام غير مفهوم مع فاصل من الهقهقة اللي مالهاش لازمة

وقف أيمن يبص كده شوية في المكان و يلف بعنيه في المكتب و فجأه بصلي..و اتسعت ابتسامتة قوي و لمعت في الشمس لدرجة اني أصبت بعمى مؤقت و بعدين ..و بعدين .. يا دي النيلة دا جاي نحيتي..طب أروح فين و الا أعمل ايه؟
عملت نفسي مشغوله في الورق اللي قدامي بس على مين؟..برضه جاي ناجيتي و الكل بيبص و فجأه جسمي كله غرق في عرقه
كمية العرق اللي عرقتها ساعتها كان ممكن تحل مشكلة الجفاف في اثيوبيا
أما وشي بأه ماحكيلكوش ..وشي بأه أحمر لدرجة اني لو كتبت عليه 22 الناس هتفتكرني أبو تريكة
ميل و سند على مكتبي و قال بصوت واطي
صباح الخير
هه؟...ايه؟..آه آه..طيب
انا ممكن أتكلم معاكي شوية؟
معايا أنا..إحلف.أ..أ..أ..قصدي ليه خير في حاجة
لأ خير انشاء الله
قلت و انا بحاول أوقعه عشان يعترف..بخصوص ايه يعني
بخصوص حاجة كويسة انشاء الله ..حاجة ليها علاقة بالمستقبل
فستان أبيض و زغاريط دبلة و شبكة.. سعد الصغير بيغني و نوال بترقص ..كل ده مر في خيالي في اللحظة دي
نوال مين؟..نوال دي رقاصة مهمة جدا بس انتوا جهلة ماتعرفوهاش
طيب امتى
بعد الشغل انشاء الله ممكن
طبعا ممكن نتكلم بعد الشغل
دا أنا باعلي صوتي عشان أكيد العزال
بقيت اليوم بأه ..كان يوم تاريخي ..أكني عايشة في فيلم عربي بالظبط..أنا طول الوقت بابص في الأرض و كل البنات عاملين أحزاب و بيرموا عليا كلام
اتنين ع اليمين..هي فاكرة نفسها ايه يعني كل ده عشان عايز يكلمها و ايه يعني
اتنين ع الشمال بكرة تعملنا فيها نانسي عجرم و ماحدش يقدر يكلمها
اتنين تانيين بيصرفوا للمرضى هو لو يعرفها على حقيقتها ما يبصش في وشها ..اسأليني أنا..خد يا حاج لما تتعب ابقى نقط من دي في مناخيرك

و استمر اليوم على كده تلقيح كلام تلقيح كلام ..ده غير الزغر ..يعني لو النظرات بتعور كان زماني مرمية في مشرحة زينهم دلوقت الوحيدة اللي كانت واقفة جنبي في الموضوع ده نهى صاحبتي ..هي الوحيدة اللي كانت مقوياني و بتشد من أزري..على طول بتبتسم في وشي و تطبطب على دراعي..ربنا يكرمك يا نهى يا رب..هما دول الصحاب و الا بلاش وكل شوية أيمن يبص ناحيتي و يبتسم ابتسامة زي مايكون بيقوللي سيبك منهم و لا يهمك و كل اما عينه تيجي في عيني على طول أدير عيني في أي اتجاه.
.الله..باتكسف!!
و نهى كمان ماسابتهمش يستفردوا بيا ربنا يخليكي يا نهى يا رب

و جه ميعاد الإنصراف و لأول مرة في تاريخ وزارة الصحة منذ انشاءها ..الناس مش عايزة تروح
الساعة جت اتنين ..اتنين و عشرة اتنين و ربع و ماحدش عايز يتحتح من مكانه
نهى عايزة تنقذ الموقف
ايه يا جماعة انتم مش مروحين النهاردة و الا ايه
انا لسه قدامي شوية شغل
و انا احتمال بابا يعدي عليا
انا بأه ماليش مزاج أروح دلوقت اللي عايز يخفى يخفي....قصدي اللي عايز يمشي يمشي
أيمن يبصلي خلسة كده و باين عليه محرج قوي..و انا قاعدة هاموت ..يا ولاد ال.. هو خلاص يعني..مانتوا هتعرفوا هتعرفوا ..لازم تقفوا في زوري كده؟
فضلت مستنية لحد 2 و نص الا خمسة و برضه ماحدش عايز يتحتح..قلت مابدهاش باه

خدت شنطتي و قمت من مكاني و مش عارفة ايه الشجاعة اللي نزلت عليا بدون مناسبة دي رحت رايحة عند أيمن
دكتور أيمن
الواد اتفزع..أيوة
لوسمحت عايزاك
و رحت خارجة بره الأوضة بسرعة و هو ماصدق راح جاري ورايا
سامعة أنا بأه دربكة في الأوضة كل واحدة بتحاول تقوم من على كرسيها بسرعة و تخرج ورانا تتفرج و غالبا كلهم خبطوا في بعض او اتحشروا و هما خارجين من الباب خصوصا ان فيه كام واحدة منهم من الوزن التقيل
وصلت الكافيتريا بتاع المستشفى و بمنتهى الثقة رحت قاعدة على أول ترابيزة و انا مش مصدقة نفسي
يا حالولي يا حالولي هي دي الكافتريا بأه بتاع الرانديفوهات..يا سلام يا رب ..الحمد لله كل احلامي اتحققت ..أنا كده ممكن أموت و انا مستريحة
قعد أيمن قدامي و هو خجلان و باصص في الأرض
لا وحياتك مش وقت كسوف دلوقت زمان فيلق البنات كله جاي على هنا و لو جم قبل ماتتكلم هاقوم أدبح فيهم كلهم و أرمي نفسي م الشباك ولا مذبحة القلعة بتاع محمد على كلاي
أيوة يا دكتور أيمن..اتكلم اتكلم ..ماتتكسفش
الحقيقة هو الموضوع محرج شوية
ياسلام أيوة كده هينطق باموت انا في المواضيع المحرجة دي..خير انشاء الله
الحقيقة حضرتك عارفة ان انا بقالي 7 سنين متعين ده غير شغلي في الصيدلية بره و الحمدلله يعني احنا مستريحين ماديا
أيييييييوة ..هو ده اللي انا عايزة أسمعه من زمان..سيبك من بحبك و الا انا معجب..مادام قاللي انه مستريح ماديا يبقى فيه أمل الموضوع يتم
ربنا يزيدك يا دكتور بس انا ايه دخلي في الموضوع بالظبط
الحقيقة..أأ..أنا ..يعني..كنت بافكر في الإستقرار
هيييييييه...يحيا العدل ..يحيا العدل
هو حضرتك لسه ماستقرتش حقيقي..والا اعرف
لا الحقيقة لسه و من أول ما اشتغلت معاكوا في المكتب و انا الفكرة بدأت تلح على دماغي قوي
يا سلام يا سلام ..هو ده الكلام
طب وانا دخلي ايه في الموضوع ده
ازاي يعني ده حضرتك أهم شخص في الموضوع ده
الدنيا بتلف بيا يا جماعة حد يسندني لو سمحتوا
ازاي يعني
الحقيقة أنا كنت طمعان ان حضرتك
أيوة
يعني ان حضرتك
أييييوة
تكلميلي الآنسة نهى
نهى ؟..نهى مين
نهى اللي معانا في المكتب أنا لاحظت ان حضرتك أقرب واحدة ليها عشان كده فكرت إنك أنسب واحدة تكلميها في الموضوع ده
سواطير و ضرب رصاص..مشنقة زي بتاع عمكوا صدام متعلق فيه الزفت ده و جنبه البت التانية اللي اسمها نهى دي.و انا ماسكة العصاية و تك تتقطع رقبتهم هما الإتنين
نهى؟..انت جايبني هنا عشان تكلمني على نهى
الحقيقة مش انا اللي جايب حضرتك هنا ده حضرتك اللي جايباني
نعممممم
أيوة دانا حتى خايف ان الآنسة نهى تاخد على خاطرها وتزعل
انت
يا بني آدم انت مافيش عندك دم؟ والا مابتفهمش خالص ها؟
قمت ساعتها وقفت و عمال الكافتريا بيبصوا عليا كأنهم بيشوفوا مشهد من فيلم كينج كونج
خلاص البعيد غبي للدرجة دي تجيب واحدة هنا..
.حضرتك اللي جايباني.
.بس اسكت ..ماتتكلمش خالص.
.جايبني مرسال بينكم ليه ؟.
.مالاكش لسان تكلمها بيه
يا آنسة أنا كان قاصدي بس
قلت لك ماتتكلمش
في اللحظة دي خدت بالي اني واقفة و في ايدي طفاية السجاير اللي كانت على الترابيزة و الواد كاشش في مكانه و خايف مني و العمال بتوع الكافتريا رافعين سماعة التليفون و بيطلبوا الأمن يجوا يفضوا الخناقة أو جايز بيكلموا العمال بتوع المشرحة عشان يبقوا يجوا يشيلوا الميتين
لقيت شكلي مش ظريف قوي خصوصا ان المرضى بدأول يطلعوا من أوضهم عشان يتفرجوا
نزلت الطفاية من إيدي..عدلت هدومي و طرحتي ..رسمت على وشي ابتسامة كبيرة
عموما يادكتور انت ممكن تبقى تكلم الآنسة نهى وجها لوجه أحسن المواضيع دي مش عايزة واسطةعن إذنك
و لفيت و خرجت من الكافتريا و الواد لسه قاعد متسمر زي ماهو..افتكرت حاجة فرجعت تاني الواد شافني قام جري استخبى ورا أم طارق بتاعت الكافتريا
آه على فكرة لما تتجوزوا..ماتنسوش تعزموني ع الفرح ..أوكي ..باي بااااي

حصل ايه بعد كده ؟..مش عارفة بالظبط
أيمن..الله يمسيه بالخير بأه ..أيمن راح ليبيا ..و بيقولوا اتجوز من هناك
نهى..نهى دي صاحبتشي و حبيبتشي...أماااال..هي الصداقة دي بالساهل
طبعا لأ

Thursday, January 18, 2007

العين صابتني و رب العرش نجاني

كح كح كح كح كح كح كح كح كح كح كح كح

هذه كانت مقدمة واجبة و استهلال لابد منه
صحيح يا جماعة البني آدم ده لسان ..آه و النعمة

بعد النشر في الأهرام و من وراه الدستور و موضوع إخوان أون لاين و الشهرة اللي نزلت على أختكم من غير ميعاد ..مش الناس بأه تباركلي و تهنيني على الكلام ده؟
لأ ازاي؟

و مصداقا لقول الشاعر الجاهلي القديم

الكحكة في ايد اليتيم عجبة

النم و القر اشتغل ..و كانت النتيجة الحتمية هو رقودي في السرير خلال الإسبوعين اللي فاتوا بين الحيا و الموت
جسمي مولع من الحمى و امد ايدي و هيا بترتعش و أشاور ع الكمبيوتر
أوج..أوج..يعني البلوج
ماما تطبطب عليا و تقوللي ..سلامتك يا برايد ..بتخترف م الحمى يا عيني
ده الكومبيوتر يا حبيبتي مش الأورج..لا حول ولار قوة الا بالله

أمد ايدي و أشاور تاني
أنة..أنة...يعني المدونة
بابا يصرخ و هو ماسك دموعة بالعافية..يا جماعة شوفوا حل ..البنت هتضيع مننا

الواد محمود سلوع جارنا اللي في كلية الطب يعدل النضارة على أرنبة مناخيره زي اونكل فتحي سرور و يقول
أنا شاكك انها حالة انفلونزا طيور
البت هند اللي عندها 6 سنين بنت أماني جارتنا اللي هيا أصغر مني ب3 سنين ..تتنطط على السرير و تقول
هيييه هيييه طنط برايد هتبيييض

و انا أصرخ فيها
تي..ات..اسن..وم..سك..تي..مك
يعني اسكتي يا بت بدل ما أقوم أهرسك انتي و أمك

أماني تشد البنت من قدامي و تقول..جايز برضه يا عمو ..انتوا كلتوا فراخ قريب

يا بنتي من ساعة العيد و احنا بناكل في لحمة الخروف

الواد محمود سلوع يقرب من بابا و يحط ايده على كتفه
أنا عايزك تفكر كويس يا عمي قبل ماتجاوبني
الخروف اللي انتوا دبحتوه ده ..مش فاكر كده حضرتك اذا كان قبل ماتدبحوه...كان بيكاكي
بيكاكي؟...لا ..دانا كده اطمنت على مستقبل الطب في البلد..امشي ياله ..امشي روح العب بعيد ..امشي
الحق عليا يعني كنت عايز أوفرلكوا أجرة الدكتور
امشي يالة باقولك

المهم يا جماعة خلصت الموقعة دي على ان اختكوا-اللي هيا أنا - اتنقلت المستشفى
حصل ايه بعد كده باه مش فاكرة بالظبط
بس خير اللهم اجعله خير...يتهيألي كده ان طنط حشرية جت تزورني في المستشفى
او يمكن هي اللي كانت محجوزة في السرير اللي جنبي بعد مارجليها اتكسرت
بيقولوا فيه حد دألجها من ع السلم...ماتعرفوش مين
ياللا ..ولاد الحلال ماخلوش لولاد الحرام حاجة

انا برضه مش عايزة أظلم النشر في الهرام او في الدستور في اللي حصللي احتمال النشر في البلكونة هو السبب؟
جايز برضه

و ها أنا عدت اليكم ..سالمة غانمة و هنبتدي الشغل في البلوج الجديد
أه على فكرة
كل الكلام اللي انتوا قلتوهولي عشان أخللي البلوج عرايس و عرسان ..مالوش لازمة
كل الحكايات اللي جاتلي بناتي
يظهر الرجالة في البلد دي اتعودوا يسمعوا الستات و بس..و نسيوا ازاي يتكلموا
انتظروا قريبا جدا
حكايات البلوج الجديد

و انتظروا أيضا

الخــــــــــــــــــامس

Friday, December 22, 2006

اللي يشوف بلاوي غيره

ازيكوا يا جماعة .. و الله وحشتوني بجد
ايه اللي أخرني
اتنين زمايلي في الشغل عملوا معايا موقف زبالة
و المشكلة هما اتنين اخوات ..بعنب واضح ان كله من التربية
بس عموما ..مالوش لازمة النم عليهم
كل اللي عايزاه منكم..ان انتوا يوم الوقفة و انتوا صايمين و لو بدأتوا صيام من دلوقت
امانة عليكوا أمانة عليكوا لو كنتوا يوم دخلتوا هنا و ضحكتوا و نسيتوا همكوا شوية
فبليز بليز بحق أي ضحكة أو ابتسامة من دول
يوم ماتصوموا ادعوا و قولوا ..حسبي الله و نعم الوكيل ..اللهم عليك ب إيمان و أختها سالي
آه و لو أنا غالية عندكوا ..يا ريت تفتكروني بدعوة حلوة عشان أتجوز و ربنا يدخل الفرحة في قلبي مرة من نفسي

هذا كان استهلال واجب و مقدمة لابد منها

آه بالمناسبة مش أنا اتنشرت في الأهرام
آه اتنشرت مش اتنشرلي
الأستاذ سيد على عمل عمود صغنطوط كده عن المدونة بتاعتي في الصفحة بتاعة يوم جديد اللي بتبقى موجوده يوم السبت
هو صحيح الأستاذة الصحفية اللي كتبت العمود فضحتني قدام أبويا و أحرجتني نفسيا و دمرتني معنويا لما قالت عليا اني واحده عانس و فاتني قطر الجواز
بس برضه الأهرام يا جماعة بتكتب عن مدونتي ..شرف كبير ليا

و بعدين انتوا عارفين ان لسه قدامي بتاع 3-4 سنين على ماخد لقب عانس عن جدارة و استحقاق
ده غير ان قطر الجواز ده لسه عمال يرمي عليا حاجات كل يوم و انتوا شاهدين ..اشي مشبك و اشي لجنة السياسات و حاجات حلوة خالص

ياللا افرحوا ..اختكوا اتشهرت و لو انها اتهزأت ضمنيا ..لكن يعني ..ياما دقت ع الراس طبول
شكرا جدا للأستاذ سيد على..و لو اني كنت أتمنى انه يدلني على حد ينشر اللي انا باكتبه ده في أي حتة
اقولكوا أنا اللي هانشر
أصل الغسالة خلصت آخر لفة و ماما بتنده عليا و لو ماقمتش دلوقت هتدعي عيا
و بصراحة ..المشرحة مش ناقصة قتلة

-----------------------

أنا نشرت و جيت يا جماعة يعني من دلوقتي اللي يكلمني يقوللي يا حضرة الناشرة المحترمة

أقولكوا ايه بأه..الإيميل بتاعي الي ع اليمين ..أيوة اللي فوق الساعة ده جالي منه أصحاب كتير
و عرسان برضه ..بس للأسف كله برضه على فشوش
كل واحد او واحده بيحكيلي حكايته و بيحلفني مانشرهاش
و لأن بالذات حكايات البنات كلنت بتسعدني - مش بفرح فيهم و الله- بس من باب اللي يشوف بلاوي غيره تهون عليه بلوته
هو صحيح فيه حكايات تغيظ شوية زي مثلا واحده حاسة انها عانس و هي عندها 19 سنة
لكن أنا باعذر و الله لأن كل مجتمع مختلف عن التاني و الضغط اللي بيحطه المجتمع على البنت بيخليها تبتدي تحس انها عانس في مجتمعات معينة من اول سن 14 سنة
و قصص حب عن طريق النت ..و عرسان عايزة يتولع فيها
و أحدث موديلات طنط حشرية بس تقفيل صيني..و غيرها و غيرها من الحكايات
قوم ايه بأه ..أنا فكرت
ايه يعني ؟..و انا مش شاطرة الا في الفضفضة و فضيحة العرسان عبر الشبكة العنكبوتية؟ لأ بافكر برضه
قولت ايه ..ماتيجي يا بت يا برايد تعملي بلوج حلو كده يجمع كل الحكايات المأساوية و الكوميدية بتاع البنات الغلابة دول..عشان اللي عنده ظروف زيهم يضحك معاهم ..أو عليهم ..هو وضميره بأه
فعملت بلوج و بلطه سيراميك أبيض مزرق كده و زي ماكانت طموحاتي طول عمري ..طلعت بكورنيش سقف و رحت نازلة بالستاير
البلوج اسمه ايه ؟؟
بيت العرايس
حلو مش كده

بما إن البلوج بتاعي اللي انتوا فيه دلوقتي ده ..بلوج غير ديمقراطي
أنا قلت أجرب اختراع الديمقراطية اللي بيقولوا عليه ده مرة كده يمكن يعجبني و أبعت أجيبه مع واحده حبيبة كده على الله ماتتقفش بيه في المطار
فهاخد رأيكوا في بعض النقط

أول نقطة
يا إما يبقى بيت العرايس بس مخصوص للعرايس يا أما نقلبه عرايس و عرسان

النقطة التانية
نخليه كوميدي بس و الا ننكد عليكوا و على نفسنا

النقطة التالتة
كل واحد يكتب بأسلوبه و الا تبعتولي المواضيع احط عليها شوية حبشتكنات من عندي؟

بس يا جماعة آدي نقط الإستفتاء اللي انا عايزة أعرف فيه رأيكوا

بس عشان نبقى واضحين مع بعض
مافيش اشراف قضائي و لا حبر احمر و لا صناديق إزاز

لأن اللي بيته من إزاز اييييه؟أيوة شاطرين ..اللي بيته من إزاز مايغيرش هدومه في الصالة
صح كده

أهم شرط بأه في الموضوع ده
اللي هيشترك في البلوج و هانشرله حكايته

اولا يبعتهالي على الميل
ثانيا يقوللي الإسم اللي عايزني أنشرله بيه
يعني ممكن يبقى ص .ن.ج
أو الحائرة من دكرنس أو أي حاجه
ثالثا و هو أهم شرط من شروطي
اللي يبعت حكاية و بعدها بيومين يتجوز يلم نفسه و مايقوليش لحسن و ديني لابهدله

خلينا حلوين كده مع بعض و بلاش نجيب لبعض احباطات في النفسية على أساس العاطفة

تمام

مستنيه رأيكوا
و فرز الأصوات مستمر الى ماشاء الله

Saturday, December 09, 2006

تابــــــــع الرابــــــــــع

و جاء اليوم الموعود...و دقت الساعة دقاتها المتأنية التي يختلف إيقاعها تمام الإختلاف عن إيقاع دقات قلبي المتسارعة
تن..تن..تن..تن..تن..تن..تن
دقات تهز وجداني و تزلزل كيان
يها قد أتى الميعاد..ميعادي مع السعادة
هذا الميعاد الذي أخره القدر كثيرا
لكني صبرت و صبرت
و هاقد أثمر صبري و انتظاري
و ها أنا أخطو أولى خطواتي الى مملكتي الجديدة التي لا مكان فيها للحزن و لا للبكاء
لقد ارتشفت من كأس التعاسة الكثير
و الآن لم يعد هناك الا كأس الهناء أرتوي منه الى آخر العمر
...ستووووووووووووووووووووووووووووووووووووووووووووووب
انتوا صدقتوا والا ايه؟

الساعة سابعة اليوم الموعود قعدنا نستنى بعد كورس تنضيق البيت اللي انتوا عارفينه
استنينى كتير؟الساعة جت سبعة ..و نص..تمانية..ونص..تسعة.. و تلت
بابا قاعد على آخره بيمارس هوايته المفضله في الجز على سنانه خصوصا لما يجيلي عريس من اياهم (و النبي صعبان عليا سنان الراجل ده ذنبها في رقبتي) المهم عمال يبصلي و ينفخ و انا قاعده في نص هدومي
ماما خدته و طلعوا بره الأوضة و سمعت فاصل من الزعيق بالوشوشة-قال يعني عشان مايجرحوش مشاعري- آه يا بن ستين في سبعين أنا تحطني في الموقف ده؟..طب و حياة سنان بابا لو كان ليك في الطيب نصيب لاطلعهم على جتتك و جتت اللي خلفوه ..قول انشالله

و أخيرا فيييين الساعة التاسعة و الدقيقة الرابعة و الأربعون ضرب الجرس
بابا حسيت انها هتكبر في دماغه و هيلطعهم ع الباب ..لطعه بلطعه بأه.. بس ماما بصتله و بصتلي و قلبت شفتها قدامه بصعبنه..فيظهر حركة جواة المشاعر الأبوية فحن..و اتنهد ..و قام فتح الباب
دخلو ورا بعض..طنط شكرية في فستان موديل عضة الكلب ووراها العريس عبارة عن 32 سنّة و طالعلهم بني آدم
سنة يعني تووث
آه و الله ..أعرض ابتسامة شوفتها في حياتي
عجبتني ابتسامتة جدا..بس طبعا فرست بابا قوي..جاي متأخر و كمان بيبتسم ..ال 1111 بتوع بابا بدأول يطلعوا بس ماما حطت ايدها اليمين فوق دراعه الشمال فاتنهد تاني و أذعن للامر الواقع
قعدنا كلنا في الصالون بنتكلم في أي حاجه ..أي حاجه و السلام بعيد عن الجواز ..أكنها قعدة تعارف يعني و خلاص
العريس الوسيم ..آه وسيم فعلا ..بيرد على كل الأسئلة بابتسامة واسعة أو ضحكة مجلجلة و من خلال بقه الفتوح على آخره تقدر تشوف بوضوح اللوز و البلعوم و لو دققت شوية يمكن توصل للأمعاء الغليظة ..بس بشوش كده يعني ووشه سمح...خير ..خلصت القاعده و ايه بأه ..ده كان اول عريس مايدخلش عليا ايد ورا و ايد قدام و ايد بابا على قفاه
كان جايب لفه صغيرة كده كان نفسي من اول القاعدة أعرف هي فيها ايه
هو مشي هو و طنط شكرية من هنا و انا و بابا و ماما اتلمينا ع اللفة من هنا ..عملين حواليها دايرة و مافيش حد عايز يمد ايده زي مانكون بتوع الإف بي آي و مشتبهين في شنطة واحد من تورا بورا
الفضول كان هيقتلني فمديت ايدي و فتحت اللفة الصغنتوتة دي ..لأجد فيها .....اييييييييه؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اصبروا اصبروا..هقولكوا في الاخر

بابا بصلي و قاللي :ايه ده؟
ماعرفش يا بابا زي مانت شايف
ماما قالتله ماحنا مانعرفش يا بو برايد العرسان بيجيبوا ايه في المناسبات دي..يمكن هي دي الموضة
بابا وقف يبصلنا شوية و يبص للفة و وبعدين تنهد باستسلام و هز كتفه ..يمكن....
تاني مرة بأه..هتقولولي ليه ماتكلمتوش في أول مرة و خلصتوا
يا جماعة ما هو مش معقول كل اما حد يجيلي يمشي من أول مرة..الناس بدأوا يتكلموا و يقولوا مادام بيمشوا من اول مرة يبقى برايد فيها عيب
قولنا بأه نقسم أي قاعده بعد كده على نصين ..كده ممكن يقتنعوا اننا ماتفقناش أو احنا اللي مشيناه و بابا دألجه ع السلم
غباء؟..هو غباء بس هنعمل ايه؟..فيه مثل بيقول ..لو نزلت بلد بيعبدوا فيها العجل ..حش و اديله..
مثل بيئة عارفه..طنط شكرية اللي قالتهولي
بس القاعده الأولى المرة دي المفروض انها مبشرة و باستثناء التأخير عدت من غير خسائر كبيرة

تاني معاد بقولكم ..احنا مانتظرناش الساعة سابعة زي المرة اللي فاتت لأننا أدركنا ان العريس باينه ماشي على توقيت دبي
فبدأنا نستنى ابتداءا من الساعة تسعة ناس مرنين أهه و مافيش بعد كده

ضرب الجرس و دخلوا الإتنين ورا بعض ..نفس المنظر بتاع المرة الأولانية باستثناء ان فستان طنط شكرية المرة دي كان موديل رفسة الحمار
قعدت ابص على ايده يمكن المرة دي جايب حاجة غير المرة اللي فاتت..بس نأبي طلع على شونة(ألا يعني ايه نأبي و يعني ايه شونة دي) ..ما علينا
قعد العريس أبو ابتسامة واسعة ده ..يا ختي أمور
بابا بيبتدي هو كمان بابتسامة ازيك يا ابني
ههههههه الله يسلمك يا عمي
و ازي الحاج و الحاجه
ههههههههههههه بخير و الحمد لله
ماما بابتسامه واسعة ماكانش له لزوم تتعب نفسك و تجيب معاك حاجة المرة اللي فاتت
ههههههههه دي حاجه بسيطة يا طنط ..حاجة من عندنا
من عندكو ..هي دبي فيها حاجات حلوة من دي
هههههههه دبي؟..دبي ايه يا طنط؟....قصدك الرياض
الرياض؟
لفينا كلنا بصينا لطنط شكرية اللي بانت محرجة كده شوية و بعدين ابتسمت ابتسامة عصبية كده
ماهو انا أصلي باين ودني مابقتش مظبوطة زي زمان ههههه السن بأه معلش
رجعنا بصيناله و هو قاعد مبتسم
بابا:يعني حضرتك في الرياض
هههه آه .عايش و باشتغل هناك
و عامل ايه هناك مبسوط
ههههه جدا جدا
بيقولوا أهل الرياض متشددين شوية
ههههههههه لا أبدا أبدا دول طيبين جددددا
و انت علاقتك كويسه مع السعوديين هناك
هههههه سعوديين سعوديين ايه يا عمي انا ماعرفش سعوديين
ازاي يعني عايش في السعودية و ماتعرفش أي سعوديين
هههههه سعودية؟ سعودية ايه يا عمي
طنط شكرية بأه في اللحظة دي بتشيل شنطتها و ماشية..أسيبكم انا بأه طالما خدتوا على بعض..ابقوا طمنوني بأه
المرة دي بأه ماما اللي وقفتلهااستني يا حشرية اقعدي رايحة فين؟
انا ؟انا حشرية؟..يعني الحق عليا؟
استني هنا اما نشوف الحكاية ايه؟ بتقوللي ايه بأه يا حبيبي؟..عايش في الرياض و ماتعرفش السعودية؟
ههههه أيوة يا طنط يعني هاعرفها منين؟
ازاي يا بني آدم ما الرياض في السعودية
هههههههههههههههههههههه..آآآآآه انتوا فاكرينني من الرياض اللي في السعودية
امال ايه؟
لا يا جماعة أنا من الريااااض..الرياض اللي في دمياط
الرياض اللي في دمياط؟ أنا مش فاهمة حاجة
...ههههــ
و ديني لو كملت الضحكة دي لاتكون آخر ضحكة في حياتك ..فهمني بتقول ايه
طيب طيب..مش هاضحك خلاص..يا طنط الرياض دي قرية في محافظة دمياط
نعممممممم..أمال ايه دبي و شوبنج و مش عارفة ايه
بابا اتدخل:طب معلش معلش ..فهمني باه بالمرة قبل ما أولع فيك و في البني آدمه اللي جايباك ..سيادتك بتشتغل ايه بالظبط؟ معيد في تربية رياضية و الا في هندسة
العريس اللي قام من مكانه و بقه رجل جوه الصالون و رجل براه و بابا ماسكه من دراعه و ماما ماسكه طنط حشرية من قفاها
الصراحة يا عمي الصراحة..أنا كنت في تربية رياضية الأول و بعدين بقيت معيد ...يعني قعدت أعيد أعيد لحد مارفدوني م الكلية و بعدين حولت كفاءة انتاجية
بابا و ماما ماسكين الإتنين و بيقربوا عليهم زي ما مصاصين الدماء بيقربوا على ضحاياهم و طالعين بيهم بره الباب و العريس هوو طنط حشرية مرسوم على وشهم أقسى أمارات الرعب
و قفنا كلنا ع السلم و هما الإتنين بيبصوا لماما و بابا برعب
و فجأه...مديت رجلي و اديتهم هما الإتنين مقلب حرامية و بصينا عليهم احنا التلاتة و هما بيتدحرجوا مع بعض في مزيج سيريالي بديع
نفضنا ايدينا و قفلنا الباب و طفينا النور
.
.
.
.
آه نسيت أقولكم اللفة اللي العريس كان جايبها معاه في أول مرة كان فيها ايه؟...
.
.
.
قرص مشبك و نص كيلو بسبوسة على هريسة............و 3 صوابع جلاش

Saturday, December 02, 2006

الرابــــــــــــــع

أولا أسألكم سؤال...بقيت رخمة أنا و اسئلتي كتير أنا عارفة
سؤالي هو....انتوا بتعملوا فيا كده ليه؟
هتبقوا انتوا و الزمن؟
انا قلت أعمل بلوج و ألاقي ناس تفهمني و تصبرني
يقوم كل شوية حد يطلع يقوللي يا رب ماتتجوزي عشان تفضلي تكتبي..يا رب تفضلي كده على طول عشان نفضل نقرالك

لييييه يا جمااااعه كده؟
ليه عايزين توقفوا حالي..هو جوازي يدايقكوا في ايه؟
اكونش خديجة و مش عايزينها تتجوز جيمي؟

غريبة والله؟

ياللا معلش..يمكن دعوات الناس اللي بتقول يا رب تتجوزي تعادل دعوت اللي بيقولوا يا رب ماتتجوزيش
و حمض+قلوي=ماء+ملح
و ملحه في عين اللي مايصلي ع النبي
....
سؤال كمان بأه...آخر سؤال و حياتكم

افتحوا ورقة الأسئلة و امسكوا الأقلام
اذكر خمس أوجه للتشابه بين طنط شكرية و تنظيم القاعدة

ايه؟
غلب حماركم

أقولكم اللي قدرت اتوصلله من اوجه التشابه دي

أولا:الإتنين سواء اختلفنا معاهم أو اتفقنا(ممكن على فكرة تتفق مع القاعدة بس طنط حشرية مستحيل)أيا كان..الإتنين نتيجة أفعالهم انفجارات و دمار و غالبا بيبقى فيه طرطشة دم كمان

ثانيا:الإتنين ممكن يغطسولهم شهر..اتنين..تلاتة و يمكن سنة و بعدين يطلعولك بقنبلة أكبر من اللي قبلها

ثالثا : انهم الإتنين ساعات يبقى التفسير الوحيد ليهم هو نظرية المؤامرة
القاعدة ساعات يتهيألنا انها من صنع امريكا..و طنط حشرية ساعات يتهيألي انها بتعمل اللي بتعمله ده عشان يمكن زمان كان عينيها من بابا و دلوقتي فرصة تنتقم منه و ترفعله الضغط

رابعا و خامسا : فكروا فيها انتوا بأه انا بصراحة مافيياش مخ
..........

انا بأه كنت قاعده كده فوق المقطم و قدامي كريم متشحتف و عينيه حمره زي الطماطماية من كتر الدموع

أرجوكي يا برايد لازم نتجوز انا مش هاقدر اعيش من غيرك
مش عارفة أقولك ايه يا كريم الموضوع خلاص خرج من ايدي
طب انا مش فاهم ليه باباكي كارهني؟
اعمل ايه بس يا كريم ..حاولت و الله حاولت كتير و مافيش فايده
طب بس خليني أقعد معاه و انا اكيد هاقنعه
تقنعه ازاي بس يا كريم انت عارف بابا ماعندوش تفاهم
طب يعني انا ذنبي ايه انه شافني و انا باحضن منة و هي لابسه القميص الأحمر؟
هو بابا بس اللي شافك دي مصر كلها شافتك
طب أعمل ايه بس؟
هو فيه حل واحد
ايه هو؟
.
.
.
ماتجيبهاش معاك في الفيلم الجاي

فجأه المقطم كله بيتهز ..برايد..يا برايد
أيوة يا كريم أنا معاك اهه
كريم مين ؟..الله يقطع كريم عبد العزيز اللي هيجننك ده
الله ..مين اللي بيهز الجبل؟
جبل ايه يا هانم..قومي انا مامتك ..قومي يا بنت تعالي شوفي طنط حشـ..كرية..جايه عايزاكي في موضوع
قمت بتأثير الصدمة من النوم
بأه يا ربي أجي من المقطم و أسيب كريم عشان طنط حشرية دي؟
بس يا بت بلاش قلة أدب ..قومي البسي يالا و طشي وشك بشوية ماية و تعالي قابليها
يا فتاح يا عليم يا رزاق يا كريم
.......

ازيك يا طنننط
أهلا يا أمورتي..من غير كلام كتير يا برايد..جايبالك حتة عريس
عارفة عارفة ..راجل و رأيه من دماغه و أبوه تكاثر ذاتيا و جابه لوحده
هههههههه..ينيلك يا برايد ..يا بنتي الكلام ده مافيهوش هزار..دا عريس قمممر مافيش في جماله اتنين
بقولك يا طنط انا مابحبش الحلوين دول من يوم الراجل بتاع لجنة السياسات
هشششششش..الله يفضحك..لجنة سياسات ايه يا حبيبتي انت لسه ماصحيتيش والا ايه؟
(دي ماما و هي بتجز على سنانها)
أ..أ..اآآه ..آآه.معلش لسه مافقتش قوي يعني..قوليلي بأه يا طنط عنده كام سنة العريس ده
32
كويس و عايش فين?
في دبي يا حبيبتشي بلد الشوبنج ههه
و هيعيش فين
هناك برده
مااشي و بيشتغل ايه باه؟
هو يا حبيبتي كان معيد في تربية رياضية و من كتر عبقريته طلبوه يدرس في هندسة

نعممممممممممم
ازاي يعني؟
ماما ..هو انا نمت أد ايه؟
هي الدنيا بتتغير كده في ساعة زمن ؟
يا حبيبتي أنا بقولك الكلام اللي قالهولي..انتوا باه لما تقعدوا مع بعض ابقي اسأليه و استفهمي منه عن اللي انتي عايزاةهما هييجوا بكرة الساعة سابعة..هو و أمه..و الله أنا حاسه بتفاؤل المرة دي يا برايد يابنتي
انتي عارفة انا بحبك زي بنتي سوسن بالظبط

الا يا طنط صحيح هو حضرتك ليه مش بتودي العرسان اللي بتجيبيهوملي دول لسوسن بنتك؟

أ..أأ...هاه..أشوفك بكرة الساعة سابعة بأه يا برايد..استنيني

مش بقولكم نظرية المؤامرة شكلها شغالة

و مشت طنط حشرية و انا بغني و ماما بترد عليا

حاسس بمصيبة جايالي
يا لطيف يا لطيف

هذا كان موجزا لأهم الأنباء و التفاصيل في النشرة القادمة

ماتزعلوش قوي كده...مش هتأخر و الله

Saturday, November 18, 2006

أسئلة مجنناني

بصوا باه انتوا صحابي
عشرة يعني يجي 3-4 شهور كده
جاوبوني لو سمحتم على شوية أسئلة بتزن في دماغي زي الناموسة اللي دخلت دماغ قارون و قعدوا يضربوه بالجزم على نافوخه عشان يموتوها و في الآخر موتوه هو
مش عارفين موضوع الناموسة ده ..هابقى أحكيهولكم بعدين
المهم أفهم باه
هو ليــــــــه لازم يبقة فيه فرق كبير في السن بين الست و الراجل المتجوزين؟
ايه الفكرة يعني؟...الراجل يعني بيبقى متحكم في الست عشان أكبر منها؟
طب هو مين في مصر بيمشي كلمه على مراته؟
طب لو أكبر منه....مستحيل
طب لو قده بالظبط...مش ممكن
طب لو هو أكبر منها بشهر أو اتنين أو حتى أربعه...لا برضه ولو.. ده حتى سنة بحالها مش كفاية
طب ليه؟؟
مش ساعات كتير تشوف شباب صغير في السن و شخصيته أحسن بكتير و أقوى من واحد عدى الأربعين
و ساعات واحده 55أصغر منك بعشر سنين و تمشيك ع العجين ماتلخبطوش؟
يعني مش مسألة سن
يبقى ايه الفكرة المتأصلة ..المتمكنة ..المستقرة ..المستمرة في دماغنا كلنا في الموضوع ده

طب حاجة تانية

ايه بعبع التلاتين ده؟؟
ليه اللي عندها 30 سنة تبقى عنست و اللي عندها 29 يبقى لسه؟
اشمعنى يعني الراجل لحد الأربعين يبقى صغنتوت و قمر و حبوب
و البنت تبقى قرشانة و عانس و فاتها القطر؟؟
قطر يبقى يشيل اللي يقول كده انشاء الله
طب سؤاااال كماااان
تقلت عليكم ..معلش
ليه بأه كل واحد حتى لو عنده 38-40-45 سنة عايز يتجوز واحده عندها 22؟
مالها اللي عندها 25 و الا 26 و الا حتى 30 ...كخة؟
عايزها صغيرة ليه يعني ...تبقى روشة ..مش ضروري ممكن تبقى قفل
تبقى خام و معرفتش حد قبل كده...ماتلاقيش يا فندم مش مضمونة حتى لو عندها 14 سنة.. ممكن لأ ..بس برضه ممكن آه
هتخلفلك عيال كتير...مش ضروري برضه ...يا أخي ده كله بأمر الله
أمال ايه؟
ايه الفكرة في الكلام ده كله؟
انا مش بس باعترض ..فهموني يمكن أفهم معاكوا
كان ممكن أعملها تاج و أكتب 5 أسامي يعملوه بعدي و ناس يعملوه مجاملة عشان مايحرجونيش
و ناس تحلف ماهي عاملاه و تقول ..هي فاكرة نفسها ايه يعني تقولي أعمل التاج أقوم عمله على طول؟...هزلت

فمن غير تاج و ماتاجشي لو سمحتوا جاوبوني و فهموني أسباب الكلام ده ايه
و الا هيبقى مصيري زي مصير قارون أو شجرة الدر

الإعدام ضربا بالقباقيب
---------------------------------------------------------------
تصحيح

اللي اضرب بالجزم على نافوخه هو النمرود مش قارون..الشكر لمصعب الخير و أكتب بالرصاص على التنبيه

Wednesday, November 01, 2006

التــــــــــــالت

الله يرحمك يا أنور و الله ليك وحشة
المهم ..بتقولكوا ايه...هي مين؟..آه آه نسيت أقولكم ..صحبة ماما طنط "حشرية" ..(اسمها شكرية ..حشرية ده النيكنيم اللي صحابها الأنتيخ بينادوها بيه ) جابت لي عريس
عريس ايه يا برايد ...راااااجل
أيوة طبعا ماهو لازم يبقى راجل امال هتجوز ايه..موتوسيكل؟
لأ قصدي هيبة كده و مركز عاقل وراسي و بيفهم في كل حاجه
عريس و بيفهم ؟..أشك ..الصراحة لسه ماقابلتش النوعية دي قبل كده ..عموما جايز
ماشي يا طنط حشـ..قصدي شكرية شكرية ..و ده هييجي أمتى و مع ميين؟..هيجيب مامته معاه

مامته؟هي هي هي..يا حبيتشي بقولك راااجل
أيوة يعني أبوه تكاثر ذاتيا و جابه لوحده؟؟...ما هو لازم يبقى له ام
لا يا برايد لازم تفهمي ده "مستكل" جدا و رأيه من دماغه و مابيديش ودانه لحد و معتمد على نفسه اعتمادا تاما
الله.."مستكل" و رأيه من دماغه و مابيديش ودانه لحد ..انا باموت في النوع ده
أحمد عبد العزيز في المال و البنون ..شريف منير في ليالي الحلمية..محمد رياض في أي حاجه مثلها قبل مايتجوز(الوحش)

الصراحة جسمي قشعر ..باموووت في النوعية دي..يا سلام بأه لو سنانه مزاحمه بعضها زي نبيل الحلفاوي و الا ودانه واقفه زي حمدي قنديل و الا بلغد زي عمرو موسى
الرجالة اللي ليهم شخصية و هيبه لازم يبقى ليهم ديفوهات زي دي و هو ده اللي بيميزهم..و بعدين انا اتعقدت من الناس اللي شكلها حلو ..أنا عايزة واحد وحش مش عايزة بتوع لجنة السياسات خلاص


و جه اليوم الموعود..نضاااافنا الشقة و نفضنا السجاد و غسلنا الستاير اللي كانت لسه مغسوله من يومين و كويت الطقم و لبسته و حطيت مكياج نص نص ..مش في الكواليتي .لأ في الكوانتيتي ..لو طلع من اللي مابيحبوش الميكاب الكتير و قلب وشه و امتعض ..أخش أغسل وشي واطلعله زي ما ربنا خلقني(هو اللي جابه لنفسه) ..أما لو كان من اللي بيحبوا التكني كالر ..عندي صباع روج بطعم الفراولة هاخش أكله كله ..ما حدش يغلطني بأه ..عروسة فول أوبشن أهه
قاعدين مستنيين سمعنا صوت رجلين ع السلم وهوب رن الجرس رننننة رزييييينة قووووي..يا سلام الكبير كبير برضه

دخل م الباب ..يااااسلاااام حاجه كده بتاع مترين و نص طول بعرض و عارفين كل الديفوهات بتاع نبيل و حمدي و عمرو ...ياسلام زي ماتكون أبواب السما كانت مفتوحة ..سنان ايه وودان ايه و لغد عسسسل ماحصلش تحس انه شايل فيه الخزين
لابس بدلة مقلمة تقليمة خفيفة كده و كرافته شيك و نضارة طبية ..ايه ده وزير المواصلات يا خواتي

واحنا كلنا لسه واقفين ع الباب بنبص لبعض ..وانا فرحانه قوي .الراجل هيبه كده و يخض و يحسس الواحده انها جنبه ولا حاجه ..يمكن تلاقي بنات كتير تقوللك لازم احس بشخصيتي ..لكن خدوها مني حكمة ..كل اما تقلب البنت و تنفضلها كل اما تنفض جيوبك...لأ لأ مش دي الحكمة ..سوري ..قصدي كل اما تنفض للبنت كل اما تقع فيك اكتر..ايوة ايوة هي دي ..احنا لسه واقفين ع الباب و ده مد راسه من جوة وبصلنا ..اتفضلوا يا جماعه واقفين بره كده ليه..اتفضلوا

اتحركنا كاننا تحت التنويم المغناطيسي و بابا بيبصلي نظرة معناها..ايه اللي انتي جايباهولنا يتأنزح علينا ده ..وانا ابصله نظرة معناها ..بحبه يا بابا .عااااا
ا...

دخل و قعد و حط رجل على رجل و احنا واقفين
بصلنا و ابتسم ابتسامه انيقة و هزلنا راسه اقعدوا اقعدوا
قعدنا قداموا مبهورين بنبصلوا زي ما مرات عم محمد البواب بتبص لجوزين الغوايش بتوع مرات عم مصطفى المكوجي
قاعد هو ع اكرسي اللي في وش الكرسي اللي انا قاعده عليه..قعد يبصلي كده و يبص للفازة اللي ع الترابيزة اللي في وسط الصالون و فجأه بدون مقدمات راح قايم شايل الفازة بالورد اللي فيها و حاطتها ع البوفيه..وقاعد تاني
بابا بصله و ال1111 ظهرت على وشة واضحة جلية _ملحوظة بابا بيظهر على وشة 1111 مش 111 زي الناس العادية خصوصا لما بيبقى متغاظ-بص لبابا و ابتسم برضه الإبتسامه الأنيقة:أصلي مش عارف أشوفها كويس..


دي طبعا اللي تبقى أنا..ومش عايزة نباهة هو كان شايف وشي يبقى كان عايز يشوف....يا نهار اسود ...و واضح ان بابا كمان وصل للنقطة دي بتفكيرة لأن حواجبوا كانوا خلاص قربوا يندمجوا و يبقوا خط واحد طويل فوق مناخيره اللي احمرت و بقه اللي كان مكرمش لأنه واضح انه بيجز على سنانه
ماما مدت ايديها و طبطبت على ايده يعني استنى لما نشوف أخرتها ايه
بابا بصلها يعني ده واضح انه بجح و عينه يندب فيها رصاصة
رفعت حواجبها واتنهدت يعني الرجالة كلها بقت كده ..جيل الدش يا سيدي


كل ده و اختكوا قاعده غرقانة في عرقها و هو مركز قوي مش عارفه في ايه؟...ومش عايزة أعرف
وفجأة برضه و بدون مقدمات تاني اتفتح في الكلام ..
لو سمحتي ممكن أعلق على حاجه ..وبيشاور
بابا اتحرك بتحفز عشان يقوم بتصرف أبوي لطيف و ينط في كرشه و ماما شايفاها بدأت تطلع رجلها من الشوز تحسبا لإحتمال استخدامها كدعم معنوي بابا يحتاجه

تعلق على ايه
ضوافرك
هااه؟
ضوافرك
مالها
انتي ليه بتقصيها مدوره مش عارفه ان المربعه هي الموضه
هي الموضه في الدهب ايه دلوقتي الأصفر والا الأبيض؟
بس اللون الأبيض اللي انتوا داهنين بيه الأوضه ده هايل و اللون اللي انتوا داهنين بيه البيت كمان
هو البيت ده تمليك والا ايجار؟
ايجارات الشقق بقت غالية قوي على فكرة اليومين دول
اليومين دول ساقعه شوية باين الشتا داخل بدري السنة دي
انتوا عارفين ان السنة دي سنة خبيثة أصل انا مواليد تسعه و عشرين فبراير وباحتفل بعيد ميلادي كل أربع سنين مرةهاهاها
..مرة واحد جه يقعد على قهوة قعد على شاي هاهاهاها
الشاي بتاعي خفيف يا طنط على فكرة و بمعلقة سكر واحده

ماما بعد ماتاكدت انه أهبل صدرتله الوش الخشب..الشاي خلص من عندنا يا حبيبي

الشاي خلص ..طب خلاص نخليها قهوة
هي القهوة اللي تحت البيت دي مش عاملالكوا ازعاج
اصل ازعاج الناس ده اسوأ حاجه في الدنيا خصوصا الكلام الكتير
كتير قوي المكياج اللي انتي حطاه يا آنسة..
آنسه انتي برضه ماقولتليش اسمك ايه ..الإسم دايما مهم
القسم بقه اللي جنبكوا ده بيحميكوا كويس بيخوف الحرميه يجوا الناحية دي..أصل الناس خلاص هتاكل بعض
هو انتوا هتاكلوا ايه النهارده انا شامم ريحةملوخية بالأرانب
الأرانب بقت سهلة دلوقتي على فكرة الواحد يدخل بميت جنيه في البورصة يطلعلوا بأرنب.. مليون يعني
مليون مرة أقول لطنط شكرية عايز عروسة مش عارف اتأخرت ليه على ماجابتني هنا
بابا فرمله :

أنا عارف...بره


نعم يا عمي قصدك السفر بره لأ انا مش ناوي أصلي

بررره..أطلع بره ماعندناش بنات للجواز

هاهاها ..بتهزر يا عمي ..أمال دي ايه..يا جماعه حد
يقوللي اسمها ايه ..هاتجوز واحده ماعرفش اسمها

انا قلت بره ماعندناش بنات للجواز

مش فاهم حضرتك بتتكلم بجد.بتهزر أكيد مقلب..
آه شوفتوا برنامج مقلب دوت كوم


و هنا قرائي الأعزاء وصل ارتفاع الضغط ببابا حدا لم تشهده البلاد من قبل و قام و هو الذي يبلغ طوله 170 سنتي و عمره 62 سنة بحمل البيه العريس المترين و نص ده هيلا بيلا من الصالون لباب الشقة و زقله ع السلم و سمعناه
بيتدحررررج دحرررجه رزيييينة جددددا


و العاقبة عندكم في المسرات


تمت

Friday, October 27, 2006

كل سنة و انتوا طيبين



هيييييييه رمضان خلص ..ننم براحتنا بأه

مش انا جالي عريس قبل رمضان بيومين ...و برضه الموضوع طلع فشنك!!!مش عارفه يا جماعه انا اللي منحوسه و الا معموللي عمل و الا الرجاله اللي في السوق هيا اللي مضروبة

ايه.عايزين تعرفوا حكايته ..لسه باااااادري ..فيه قبليه مقالب كتير قوي شربتها و مصايب نزلت على دماغي لما دماغي قلقزت
بس على فكرة دماغي بقت حلوة ما عدتش مقلقزة و لا حاجه

-لحسن حد يبقى ناوي يتقدم ..مش عايزين تطفييش

المهم بالنسبة للعريس التالت -قصدي المصيبة التالته- جاي في السكة ماتقلقوش بس انا الأول لازم أشكر و اعتذر

أشكر الناس اللي عيدت عليا في البوست اللي فات و اللي لسه بتعلق ع البوست اللي قبله

و اعتذرلهم هما و الناس الحلوة اللي بتعلق في الشات بوكس اننا ماردتش عليهم على طول

سوري العريس اياه ده جابلي اكتئاب

بس خلاص هانرد باه و نحكي و ننم براحتنا ..صبركوا عليا

------------------------------------------
COMING SOON

التـــــــــــــــــــــــالت

Sunday, September 24, 2006

رمضان كرييييم

أجااااازة


مش ناقصين ذنوب بسبب النم في رمضان


والا ايه رأيكم؟؟؟؟؟؟؟؟




كل سنة و انتوا طيبين

Saturday, September 16, 2006

الثانـــــــــي

ما احنا قلنا هنمشيها زي أنور وجدي بأه خلاص


بصوا بأه ..أولا الحكاية دي برضه من فصيلة هم يبكي و هم يضحك ..بس الصراحه يعني الصراحه ..انتوا هتضحكوا عليا أنا..هتشوفوا ..بس بقولكوا ايه بما اني فتاه ركيكة ..قصدي رقيقة رقيقة..و مهيضة الجناح..ههه حلوة مهيضه دي..فبليز بليز ..بلاش تريقة


الحكاية دي مايعرفهاش أي حد غير انا و ماما ..ماحكيتهاش لأي حد من أصحابي ..يعني ابقوا اتفشخروا قدام كل أصحابكم بالأمتياز ده ...حصريا على بلوجر ..حكاية العريس التاني ل عايزة أتجوز ..إقرا الحادثة ..اقرا الحادثة



احمم..مقدمة...عارفين ايه احساس واحده و هي ماشية في الشارع و تحس ان حد معجب بيها..مش معاكسه يعني و كده ..لأ بيبقى فيه كده كيميا زي مابيقولوا الأجانب ..و على فكرة فيه جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة فين و يسأل عليها و يخطبها ..ابن عمي عمل كده و البت لسعته حتت قلم على وشة ..علم على صداغه 3 أيام ..قام هو اتكيف قوي و قال البت دي واضح انها مؤدبة و متربيةوراح خطبها ..آه و النعمة..هي صحيح بعد كده اتضح ان ايديها بتطول عليه في كل المواقف مش في الموقف ده بس ..بس و الله الراجل مبسوط و بيحلف باليوم اللي شافها فيه..و بيلعن أبو ...والا بلاش دي في مقام عمتي برضه


المهم أنا يوم نازله من البيت رايحه الشغل..حسيت بكيميا م اللي كنت بقولكم عليها دي ..حسيت ان فيه عين هتخرم قفايا ..اتديرت بسرعه كده في الخباثة لقيتلكم راجل انما ايه ..طول بعرض بارتفاع.ماسك ف ايده شنطة سودا و لابس بدله و كرافته و نضارة شمس....عامل كده زي العيال اللي كانوا بيطلعوا في إعلانات جمعية شباب المستقبل بتاع جمال مبارك "شباب الجيل ..قوام جينا ..هو ..هو" فاكرينهم ؟..المهم الواد كان حليوة و انا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب مكروباص ليه يعني..أكيد في الأمر إنا ..و جه كمان قعد جنبي ....يا حلولي يا حلولي..بس كنت خايفه ليعاكس و ساعتها أنا ماعرفش أبويا ..باللي ف رجلي و لايهمني لا شباب المستقبل و لا جمال مبارك ولا حاجه أبدا..بس لاقيته في نص المسافه كده ..بيميل عليا و بيقول باسلوب رزين كده ..لو سمحتي ممكن أسأل حضرتك على حاجه ..وانتوا ماتعرفونيش... باتسطل لما حد يقولي حضرتك ..بس برضه مش سهله يعني..صدرت الوش الخشب و قلتله ..خير بمناسبة ايه ؟...يعني كنت عايز أسأل بس ..هو حضرتك مرتبطه ..واضح انك مش مخطوبة ولا متجوزة مافيش دبل في ايديكي ..بس الإرتباط بأه لازم أتأكد منه من حضرتك ..(حضرتك تاني يا حلولي)..والله الكلام ده مايتقالش في مواصلات و بعدين انا ماعرفكش و مش متعوده أكلم حد ماعرفوش ..طب يعني أنا لو معجب بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس دي أول مرة أتشجع و أحاول أكلمك ..ياحلاوة ياحلاوة متابعني من زمان ..ده واقع بأه..بس برضه على مين ..لازم أثبت ..و الله لو حضرتك متابعني زي مابتقول تبقى عارف بيتي و عارف بابايا ..هو الوحيد اللي ينفع يتكلم في المواضيع دي ..لو سمحت ماتحرجنيش اكتر من كده ..جامده جامده يعني ...الحقيقة انت كده أثبتيلي اني أحسنت الإختيار....ياسلام ياسلام..الله الله ..هو ده الكلام ..لحد كده الأمور كلها صح و مية مية ..صديته آه بس كمان قلتله كلم بابا..سيبتله سكه مفتوحه يعني .


الواد بأه التباع راح شاخط فيا في اللحظه دي ..الأجرة يا أبله والا هتركبواببلاش...يابن اللذينا ..دانا عماله أترسم من ساعتها تبعتر كرامتي كده ؟...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ مايصحش ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود ...وجون وجون وجون ..هيتقدملي خلاص أيوة كده هو انا صحيح ماعرفش هو بيشتغل ايه و الا عايش فين والا بيقلد فنانين والا ايه نظامه بس الجواب بيبان من عنوانه.



أول ما المكروباص وقف لقيته نزل معايا في نفس المحطه و بصلي و قاللي ..أنا حبيت أنقذك يعني في المكروباص ..واضح قوي انك ماعاكيش فلوس...الدم ضرب في نافوخي..وله انت هتتمنظر عليا والا ايه ؟..واضح ان شنطتك فاضية آخر الشهر بأه يالا وفرتلك أجرة المكروباص تنفعك ..بصتله بذهول كده و قلت له ..مين اللي قالك الكلام الفارغ ده ..انا عمري مامشي بشنطتي فيها أقل من 300 جنيه..قالي باستهزاء كده ..لاااااماصدقش..الدم كان خلاص قرب يطلع من نافوخي زي النافورة..رحت مطلعه كل اللي في المحفظه مورياهولي ..أهه حتى شوف 50-100-200-220
لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه


و في لحظه راح مطبقهم و حاطتهم في جيبه ..و قاللي انا هاخليهم معايا بأه سوفينير لحد لما آجيلكم البيت ..ماستوعبتش و قبل ما آخد فرصة أقول كلمه واحده كان راكب ورا واحد على موتوسيكل شكله كده كان ماشي ورا المكروباص و هوا ..فص ملح و داب


أختكوا بأه واقفه في وسط الشارع هابلااااااااااه ..زي اللي اتدلق عليه جردل مايه مش نضيف..مش عارفه أصوت والا أطلع أجري وراه والا ألطم على وشي ...فضلت واقفه يجي خمس دقايق في الشارع مش عارفه اروح فين والعربيات تقعد تزمرلي و لما تلاقيني مسهمة تقريبا اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل ..و الناس تعدي تبصلي... و العيال الصغيرة يشدوا في هدوم أهاليهم ..بابا بابا هي الست دي عامله كده ليه؟


بعد شوية كده لفيت و دخلت المستشفى اللي باشتغل فيها ..و على وشي تعبير كده زي تعبير العمده الآلي بتاع زمان ..دخلت الصيدلية..قعدت ع المكتب ..و فجأه .....انفجرت في العياط ..و العيال زمايلي اتلموا حواليا..مالك ..فيه ايه؟...حد زعلك ..حد كلمك؟
من بين العياط و الشحتفه ما اقدرتش أقولهم غير كلمه واحده
.................................................
..................................
..................
اتسرقت
عااااااااااااااا

Friday, September 08, 2006

كلنا ليلي ......أنا مش صفر ع الشمال


مجتمعنا الحلو العسل ده بوشين ....قديمه يعني مش جديده..شفتوا أي تجمع عائلي موجود فيه ولد و بنت صغيرين؟؟ اول حاجه بيقولوها للولد ايه ..عايز تطلع ايه يا حبيبي لما تكبر..نص العيال المفترية بتقول ظابط و اللي عنده وعي شوية يمكن يقولك رئيس جمهورية ..جيل المستقبل بأه يا سيدي عنعمل ايه؟...كب و البنوته الصغيره بيقولولها ايه؟؟؟...نجوزك حماده يا سوسو لما تكبري ..والا تتجوزي ابيه خالد؟؟...تبص البت بغباء كده و تقولهم ..أناهاتجوز بابا ..و الكل يتفتح في الضحك و يخلص الموضوع على كده

و تطلع البت من صغرها يجيبولها عروسة ..تسرحها و تلبسها الفرحه و تزفها ...و اي بنت في اي مجتمع تلاقي اول لعبه نفسها تلعبها ...عروسة و عريس !!! بالمعنى الطفولي مش بتاع الجامعات الخاصة و الورق العرفي


و تمشي البنت في سلك التعليم و كل اما تنجح في مرحلة ما يقولولها ..مبروك عقبال مانشرب شرباتك...وعقبال عدلك يا حبيبتي ..و لما تيجي تستشير حد في الكليه اللي هتدخلها بيبقى الرد الموحد ...يا ستي ماتشغليش بالك ..هي البنت آخرتها ايه غير بيت جوزها


و تفضل البنت تتشحن تتشحن طول حياتها على ان الشئ الوحيد المتوقع منها في الحياة انها تتجوز و تجيب عيال.....طب و لو ماحصلش


شوفوا معايا التلت حوارات دي
م1:هو انت معاكي ايه دلوقت؟؟
م2: معايا جوزين غوايش و ماشاءالله
م1:لأ يعني معاكي عيال ايه
م2: ل انا لسه ماتجوزتش
م1: يا عييييييني
---------------
بيئة تانية و مستوى تاني
م1: وانت معاكي ايه دلوقتي
م2:معايا ماجستير و باحضر في الدكتوراه
م1:لأ قصدي معاكي عيال ايه؟
م2: لأ انا لسه ماتجوزتش
م1: يا عيييييييني
---------------
بيئة تالته و مستوى تالت
م1: وانت معاكي ايه دلوقت
م2: انا معايا شيروكي 4*4
م1: لأ قصدي معاكي تشيلدرين ايه؟
م2:نو ..أنا لسه ماتجوزتش
م3:أوه ماي جود ..هاااانييييي


هو هو الحوار في كل المستويات ..ولا يوجد اي نجاح في اي مجال يقدر يحل محل الزواج بالنسبة للبنت الشرقية...طب و اللي مش لاقيه و اللي فاتها القطر و اللي بارت على رأي الناس مابتقول ...يبقى مالهاش لازمة ..تروح تولع في نفسها يعني؟؟
هي غالبا ما بتبقاش مستعده لا نفسيا و لا علميا و لا اقتصاديا لللحظه دي ..كل الناس بيقولولها هتتجوزي يعني هتتجوزي ..و ساعة لما مايحصلش .مابتلاقيش حواليها غير نفسها و بس


بعد مالنسبة زادت و بقى عدد اللي لسه قاعدين بالملايين..لازم كل البنات يحبوا نفسهم و يدوروا ع النجاح في كل الأماكن و يعيشوا حياتهم على انها حياتهم مش على أساس انها تتر لمسلسل لسه مابتداش


ولازم المجتمع يبطل يحصر البنت في دور العروسة و بس ..لأنه وقت الجد مش هيقدر يعلها حاجه و هيبقى هو اللي جنا عليها لأنه فهمها ان ده الطريق الوحيد و مافيش غيره..و هتحس ساعتها ان مالهاش لازمه و انها صفر ع الشمال و هتيجي تعمل بلوج زيي كده و تقعد تشتكيلكم


وانا من هنا بقولها ..لو ماحصلش ..لو ماتجوزتش وما جبتش عيال و ماقدرتش اتبع خطة المجتمع ...أنا برضه ليه شخصيتي و حياتي و مش هابقى أبدا ......صفر ع الشمال



http://laila-eg.blogspot.com

Friday, September 01, 2006

الأول

حلو العنوان كده زي ماكان انور وجدي بيقول في "أمير الإنتقام" ..أصل الموضوع كله أصلا تحس انه فيلم عربي ..بس اول موضوع ده كان فيلم هندي و كوميدي كمان

واحدة صاحبتي كانت لسه متجوزة قريب و كنت لسه حاضرة فرحها من أسبوعين ..أتصلت بيا تطمن عليا يعني ..كنت لسه سامعه خبر ان واحده من أصحابنا جابت عريس لواحدة تانية صاحبتنا برضه ..و ده موضوع يضايق قوي على فكرة ..يعني تفضل الواحده تقول و اشمعنى يعني ماختارتنيش أنا و مش بعيد تقاطعها و ماتكلمهاش تاني أبدا

أنا بأه مسكت صاحبتي اللي كانت طالباني في التليفون و قعدت أرصلها ,,شايفة الصحبات ؟..ماطلعش منك انت حاجه زي كده ..أمال مجوزينك ليه؟ مش عشان تشوفيلنا في اصحاب جوزك والا قرايبه حد ينفع ..و كل شوية صاحبتي دي تحاول تقاطعني و تسدني و انا ابدا منطلقه زي الصاروخ ..لحد ماراحت موقفاني بصرخه ..يابت اسكتي بأه جوزي بيسمع م السماعه التانية و عايز يتأكد انك كويسة و رقيقة عشان جايبلك عريس

و في لحظه واحده انقلبت طريقة كلامي 180 درجه و بقيت أرق من أرق واحده تعرفوها ...انتي صدقتي دانا كنت بهزر معاكي..انتي عارفاني رقيقة طول عمري ..دانا أرق م البت اللي طالعه جديد دي اللي اسمها منى زكي ..و اسمع صوت جوزها يحاول يكتم ضحكة ع السماعة التانية و هي حساها بتجز على سنانها و هي بتقوللي عارفه عارفه هو انتي هتقوليلي

المهم اتفقنا على معاد..و لما اقول اتفقنا على معاد يمكن تعدي ع الرجاله سهلة كده يعني ديتها ايه؟ هيستحمى و هيخلي أمه تغسله القميص و البنطلون و أخته تكويهومله و يشغل كل اللي خلفوه عشان طلعة أهله البهية ..لكن في بيت العروسة اللي هيا المفروض انا ..هيييصة ..غسيل للحيطان ..مسح للأرضية..تنضيف للسجاجيد ..تسييق للسلم..تلميع للكاسات ..تنضيف للستاير و الشبابيك ..و بعد ده كله متوقع من العروسة بعد كل المجهود المقندل ده انها تتزوق و نخش عليهم حلوة و بتبرق ..مفهومه بتبرق دي .. عموما البنات هيفهموا لأنهم عارفين موضوع بتبرق دي بتاخد مجهود أد ايه ...

المهم جه المحروس هو و أهله ..هو دكتور على فكرة ..باضرب بطرف عيني كده لقيته لابس لبس ..يا سلاااام ..زي مايكون لم اللي ع الحبل كله و لبسه على بعضه ..و تقريبا كده ماعندهمش مرايا و شكل أمه و أخته عندهم عمى ألوان..البيه لابس قميص أصفر ..بنطلون أزرق ..بلوفر أخضر ..و فوق ده كله كرافته كده الصراحه مش عارفه أحدد بالظبط لونه إيه..لأ و استنوا ..جزمة بني لما اتجعص كده و حط رجل على رجل بصيت لقيت الشراب نبيتي ...آه و النعمة ..قلت في نفسي مش مشكله بيقولوا الراحل مايعيبوش الا جيبه ..و أهو يبقى عريس تكني كلر زي التلفيزيون الملون ..مشرق كده و مقبل على الحياة...هو صحيح ودانه مخاصمه راسه خالص و سنانه بيحبوا بعضهم جدا لدرجة انهم راكبين فوق بعضيهم ..بس خلقة ربنا يعني ..المهم العقل و الشخصية

أول ما بابا دخل راح واقف ..حلو مؤدب يعني و انطلقت امه تعرفه زي مانكون في برنامج..الدكتور سامي ..علاج طبيعي ..قام هو مكمل التقديم و قايل ...و بقلد فنانين....إيه الهبل ده بأااااه ..هو احنا عاملين برنامج مواهب و الا ده جاي يعمل انترفيو في كبارية..بابا برقله كده و قاله آه أهلا و سهلا اتفضلوا و بص لماما بصه معناها إيه اللي انتوا جايبينه ده؟

أنا قاعده و ماسكه نفسي م الضحك و ده منطلق بيتكلم على صولاته و جولاته في عالم التقليد و احنا قاعدين نبص لبعض و امه شكلها منشكح أوي من كلامه ..و فجأة بص في الساعة و بص لبابا ..بابا خاف ليطلبني دلوقت و هيبقى موقف محرج أول مرة يتعرضله..لكن ده قاله ..عمي ممكن أسألك حضرتك سؤال و تجاوبني بصراحة؟..بابا قاله بخوف كده خير يا بني؟..قاله هو التلفزيون ده شغال ؟..بابا فوجئ كده و قالله آه يابني شغال ..فجأه الحليوة ده راح قايم و فاتح التلفزيون و قعد يقلب في القنوات لحد ما جاب قناه كانت بتزيع ماتش للزمالك..و احنا قاعدين مذهولين و مش قادرين نعمل حاجه و امه قاعده منشكحه زي ما هيا..و هوب و صوته علي ..شوت يا عم ..أيوة كده ..يااااه ..الحكم ده حمار بن كلب ...واحنا قاعدين ..ماما حبت تحرجوا بالذوق كده و قالتله ..و الله يا دكتور انا مش عارفه انت ازاي بتابع الكورة دي اليومين دول ..ده حتى الزمالك بقاله مده مش كويس خالص

الواد فجأة سكت و لف كده لماما بالتصوير البطئ..و عينيه احمرت لدرجة ان ماما كشت في مكانها ..و ده راح رافع الجعورة ..لاااااا ..بقولك ايييييه ..إلا الزمااالك ..اتكلمي براحتك على أي حد ..على امي على أبويا عليا أنا شخصيا لكن الزمالك لألألأ ..فاهمه ..قومي يا ماما ..أنا لا يمكن أدخل بيت الزمالك بيتهان فيه

يابن 60 في 70..أكن احنا معديينلك البلاوي اللي انت لابسها و السخافات اللي عمال تقولها عشان تبقى أخرتها كده ؟....كلنا فضلنا متسمرين مكاننا بابا يبص لماما و مش قادرين حتى يقوموا من مكانهم وانا الأول اتحرق دمي و بعدين وقعت ع الأرض من كتر الضحك..هم يبكي و هم يضحك

الجميل بأه ان صاحبتي جايه تاني يوم تسألني على رأيي قولتلها لأ طبعا انتي بتستهبلي ..و حكيتلها ع اللي حصل..لقيتها بتقول طب و ايه يعني؟ عادي ماتبقيش بس تقوليله انك أهلاوية..و لما أصريت ع الرفض..صاحبتي دي قاطعتني و ما رفعتش عليا سماعة التليفون من يوميها ..إزاي يعني أرفض عريس لقطة زي ده؟

صحيح إزاي؟