Monday, January 19, 2009

المجلس القومي للرجل

يا أخي البنات مقصفوين الرقبة دول خلاص إستقووا و افتروا

إفتروا إيه ..قول توحشوا ..البنت من دول بقى يندب في عينها رصاصة

رايحة الشغل ..جاية من النادي ..رايحة الدرس ..راجعة من السينما

لا بقوا يتثبتوا ولا يتظبطوا و كله كوم و اللي حبست الواد اللي كان بيعاكسها دي كوم ..فين بنات زمان ..ولا واحدة كانت بتفتح بقها

و كل يوم مؤتمر ..جمعية

لأ و مجلس قومي للمرأة كمان

طب و إحنا مالناش مجلس ليه؟

آه صحيح ليه؟


و قد كان ..قررنا نحن الإخوة الرجال المقهورون إننا صحيح رجالة ..بس من زمان ماوقفناش وقفة رجالة ..ضد سيطرة المرأة على كل مجريات الحياة..ضد زحف جحافل النساء و شراذم الفتيات على كل المهن و المواقع ..ضد مشيهم في الشارع ..ضد ركوبهم الميكروباصات ..ضد إعتراضهم لما حد يمد إيده كده والا كده ..ملعونييييين في كللللللل كتاااااااااب ..ما هم اللي بيجيبوه لنفسهم ..اللي ماشية لوحدها ..عشان نفسها تتعاكس..و اللي ماشية مع أبوها والا أخوها و إيش عرف الناس مين ده إن شاء الله ..و اللي راكبه عربية لوحدها ..مش عارفه إن الموضوع ده بيثير الغرائز و اللي راكبه مع واحد جنبها ..مش عارفة إن شرف البنت زي سلك الفرامل ؟..اللي لابسه قصير ..أستغفر الله العظيم ..و اللي لابسه طويل ..إلهي تولعوا بجاز ..ما احنا بنفضل نفكر يا ترى اللبس الطويل ده مخبيه تحته إيه؟ ..اللي خارجة في العيد الصغير دون أي إعتبار لإن الناس لسه خارجة من صيام ..و اللي خارجة في العيد الكبير و الناس نفسها مفتوحة ع اللحمة ..و كله كوم و اللي خارجة في عيد العمال دي كوم .. ما احنا معذورين لما نظن فيها الظنون لأن كل الناس عارفة إن عيد العمال ده هو عيد "المكن" ..ولا سابوا شغلانة إلا و اشتغلوها ..ولا سابوا دراسة إلا ودرسوها ....خايليننا في الرايحة و الجاية ..ماتكنوا في حتة و تريحونا بقى ..و تقعدوا في بيوتكم و تسيبونا ناكل عيش

و لهذا قررنا نحن (مجموعة من الصحفيين و أساتذة الجامعة و المهتمين بشئون
المجتمع و حقوق الإنسان) إننا نقوم بإنشاء مجلس قومي للرجل ..أسوة بالمجلس القومي للمرأة و مافيش حد أحسن من حد..أما عن مبادئنا فهي كما يلي


المبدأ الأول : إذا رأيت فتاة أو سيدة تتعرض لموقف سيئ في الشارع لا أساعدها..


ده على أساس إن الرجالة مقطعين بعضيهم مساعدات و الحكومة نزلتها على بطايق التموين عشان كل راجل مايستعبطش و يساعد ست واحدة و بس


..
المبدأ الثاني: مقاطعة جميع المحلات والشركات التي تمتلكها أو تعمل بها فتيات أو سيدات..

قشطة جدا .. ..كده هتقضوا حياتكم فول و كشري و عصير قصب ....بدل المقهورون في الأرض,,هتبقوا المنتفخون في الأرض.. صحة و عافية إن شاء الله
.


.المبدأ الثالث: مقاطعة المنتجات التي تظهر في الإعلانات التلفزيونية التي تقوم بها فتيات أو سيدات..
طب دي بأه جايبة من أول السمنة و الشاي لغاية إعلانات "خللي السلاح صاحي" الشهيرة ..الإعلانات الوحيدة اللي مافيهاش ستات هي إعلانات مصلحة الضرائب.. خللي الضرايب بأه تنفعكم بدل السمنة و الشاي و....أي حاجة تانية يعني


المبدأ الرابع: إذا كنت صاحب شركة أو محل أمتنع عن تعيين الفتيات والسيدات وإذا كان لدي موظفات أقوم بفصلهن من العمل
طب إعملها كده ..أبو وردة هيسمعوه و هو بيعمل زووووو فوق نافوخك من آخر حارة في الصين


المبدأ الخامس: إذا كنت سائق تاكسي أو ميكروباص فلا أقوم بتوصيل النساء
عادي..هنقضيها تكاتك ..و يا توك توك الغرام يا ..مقرب البعيد


المبدأ السادس: المطالبة بالمساواة بين الذكور والإناث في تأدية الخدمة العسكرية
و الله ماعندنا مانع ..سلمونا انتوا بس الجيش ده 3 شهور و اتفرجوا عليه بعدها ..جمعيات و أجازات و أذونات رضاعة ..احنا ما نتأخرش أبدا عن خدمة الوطن


و تتوالى المباديء حتى المبدأ الرابع عشر : الإمتناع عن الزواج من أي فتاة حاصلة على أكثر من الإعدادية أو مؤهل متوسط على الأكثر..
دي شكلها تنفيضة قديمة من الفيونكة أيام الجامعة يا برنس ..


و إذا كنت أعرف شخص متزوج من مصرية أقاطعة لأن الذي يقبل الزواج من مصرية في ظل القوانين المعمول بها ليس رجلا..
هيييه ..مسكوا في بعض..مسكوا في بعض


أما أكثر مباديء الجمعية أهمية على الإطلاق هو المبدأ التاسع عشر و الأخير: إذا دخلت مصر حربا لا أدافع عنها..
ده علشان مصر مؤنث مثلا والا إيه؟


العضوية مقتوحة لكل المقهورين من كافة الأعمار و الخلفيات ..
و لا عزاء للسيدات
.
يا وكستك يا برايد إنتي و اللي زيك ..هم دول اللي فاضلين بعد اللي راحوا في الحرب و غرقوا في العبارة و اللي حاجزين في حادثة القطر اللي جاية؟..عليه العوض و منه العوض
لنا الله يا بنات
.
.
------------------------------------------------------------------------------------------

أخبار معرض الكتاب


1- يوم الخميس 22 يناير الساعة 12 في المقهى الثقافي بمعرض الكتاب ..ندوة فظيييييعة ..شنيييييييييعة ..باينة من إسمها " أدب المدونات صرخات شباب أم أدب كيلينيكس" أختكوا مدعوة تتكلم فيها و حاسة إنها هتنضرب...اللي يقدر ييجي يحوش ما يتأخرش و اللي يعرف أي صعايدة بالشوم ..يجيبهم و ييجي ..و ربنا مايرميكم في ضيقة


2- حفل توقيع مدونات الشروق في جناح الشروق في المعرض يوم السبت 24 الساعة 5 ..اللي معاه الكتاب و عايز توقيع ..و اللي لسه ما اشتراهوش..و اللي خمس فيه السنة اللي فاتت و ضميره بيوجعه ..يتفضل ..و اللي انكسر يتصلح ..خليك من المحظوظين اللي هيشتروا الطبعةالخامسة ..خمسة ..واخد بالك؟ ..الطبعة الخامسة ..الساعة خمسة
و كل سنة و انتوا طيبين


93 comments:

dramaqueen said...

مش معقول لحقت اول رد

هاقرا وارد تانى

إيناس حليم said...

ههههههههههههههه
بجد انت فظيعة اصلا انا بموت فيك من غير ما اعرفك ، و كتابك ده بيطلعني من اي حالة اكتئاب :))
بجد كأني بتفرج على مسلسل كوميدي
اما بالنسبة للمجلس القومي للرجل يمكن يكونو مش محتاجينه دلوقتي بس أكيد هيحتاجووه قريب
ههههههههههههههههههههه
ربنا يوفقك يا رب و من نجاح لنجاح

Anonymous said...

هيه انا اول كومنت
بس ولا يهمك يا برايد ال منظمه لحقوق الرجل ال
وبعدين يا بنتي اصلا معدشي فيه رجاله دلوقتي الراجل من دول عايز العروسه ال عندها شقه وعربيه وفلوس تصرف بيها عليه وعلي العيال ال هتجبهوم منه علي اساس المساواه
مساواه ايه بس انتو شكلو فهمين الموضوع غلط ولا احنا ال فهمينه غلط ميضورش برضو بس المهم لو مصر دخلت حرب مين هيدافع عنها
شكلها إحنا وكل البنات ال زيينا
ماهي دي اخرتها بس احنا هنكون جيش جامد جدا لانينا هنكون مستبيعين وبيعين القضيه ال احنا اصلا مش فهمين فيها حاجه
وشكرا لحسن الاستماع

عاشقه وغلبانه said...

عيني علي رجالتك يامصر....

بقوا بيطلبوا المساواه

بكره يطلعلهم قاسم امين يطالب انهم يتجوزوا ويقعدوا في البيوت

رئـــــيسـة حزب الأحلام said...

ربنا يستر فعلا على بنات مصر يابرايد
احنا فعلا نطاب باستيراد رجالة من برة احسن
يلا بقى حسن الختام

Dr.Dina.Nafe3 said...

3ala fekra enty bgad gamda gedan w fa5r l el syadla (ana f 3 saydala
3ala fekra) :) ana bsara7a lessa moktashefa el modawana enhrda 3an taree2 el facebook w walahy nzelt ma5soos ageeb el ketab .. ana
ba7ayeeki 3ala esloobek fel ketaba begad 7elw awy w momte3 gedan ..Rbena ywafa2ek w ykatar mn amsalek (aader ya kareem)
kanat ma3ki:
Dina Nafe3
3 saydala G.U.C... ay 5adamat :D
SALAM
(ya rab t2ry el comment)

ستيتة said...

فله ياروحي
والنبي عاوزين الخلفية الأجتماعية لشلة الموكوسين دول
مؤكد نصهم مخلوع ياولدي مخلوع والنص التاني أبو ورده شغال معاه الله ينور
تصدقي صعبو علي بس الشهادة لله نسوان هذه البلد صعبانين على اكتر اصلهم ملحقوش زمن الرجال يادوب شافوا زمن انصاف الرجال .. وعجبي

Mohamed Kamal Hassan said...

أخوكى مش مقهور ولا حاجه
بس عايز يبقى احد مؤسسى المجلس بتاع الرجالة ده
ثم ده ميمنعش إنى أباركلك على الطبعه الخامسه
خصوصا وانى هشوفك الخميس
هههههههه
مكنتش اعرف انك بتخافى م الحسد للدرجه دى
(:
صباح الفل

ميرا ( وومن ) said...

هيه هيه هيه هيه هيه هيه انا جيت بدري ولحقت اول 50 تعليق يارب يبقي بصحيح

انتي فينك من زمان طب تصدقي يا شيخة انتي شيلتي الإكتئاب اللي كان عندي

وأيه حكاية المجلس القومي للرجل دة والمبادئ دي نظامها ايه ؟

وقال لو مصر دخلت حرب مش هايدافع عنها قال طيب لما هما مش رجالة بيتلزقوا في الرجالة لييييييييييييييييية ؟؟؟؟

وعجبي

Anonymous said...

بصراحه انا متغاظ من البنات لكن هنعمل ايه ما باليد حيله وعجبى وعلى فكره انتى ضحكتى علينا بالبوست دا مش موجوده فيه كتير ومش محسوب منتظرين الجديد ماشى ولا مش ماشى
شحات على الابواب

mora_227 said...

ههههههههههههههه
بصراحة المرة دى تحفة اكتر من كل التحف اللى فاتت
و الله انا رايى انهم ماكانوش محتاجين المجلس ده لان بعض قراراته بتطبق طبيعى
فكرتينى بمرة تعرضت فيها لمعاكسة كانت تقيلة شوية المهم انا اتلبخت و مسكته من هدومه و ان واحد من السادة الرجال المحترمين يتحرك ابدا يا اختشى !!!!
عرفت بعد كده ان الطبع المصرى اتغير ما علينا واحد محترم او مش محترم قام فرد ريشه و قالى كان مفروض تضربيه باللى فى رجلك كان حابك عليا اقوله و الله لو خلعت اللى فى رجلى محدش عارف انا حضرب مين فيكم
و بعد كده الواحدة بقت تعمل احتياطها و تاخد اللى متوفر قدامها و هى نازلة من البيت مطواه قرن غزال ، كتر ، او اضعف الايمان لو كلهم مشغولين سكينة المطبخ
و لا عزاء فى الرجال
بصراحة اللى منهم كده يبقوا مع السلامة و وراهم ستين الف حزمة .....
ملحوظة : اكيد المعرض حيعدى و هو ماشى على رجليه على اسكندرية تعالى و فريق الحماية موجود لا تخافى شوية روسيات من بنات اسكندرية عجب ، بالاضافة لللاسلحة السابق ذكرها اعلاه

Anonymous said...

I read it and brought my sister and read it to her again and we both cracked up laughing :D :D :D I really cannot believe your sense of humor :D mashallah 3aleiky :)

بنوتة said...

ههههههههههههههههههههههههه
دمك خفيف جدا أحييكى على أسلوبك الحلو أوى

Ahmed-Rahal said...

السلام عليكم

بغض النظر إني بعلّق كل 9 سنين على المدونات اللي بتابعها , و إني طبعا عندي كتابك و قريت المدونة كلها مرتين تقريبا , بس الموضوع ده فيه حاجة لازم تخليني اعلّق

الموقع بتاع الكيان المدعو " المجلس القومي للرجل " ... مع احترامي العنيف للفكرة المبجلة بتاعتهم , و انا مشهور باحترامي للآراء المعارضة , لا يمكن أن يكون وراءه إنسان عاقل ... لأ بجد لا يمكن

ده قرايته لوحدها مضحكة بطريقة مبالغ فيها .. ده بيقول لك : "عدم إنتخاب أي مرشح أو مرشحة يدعمون ما يسمى بحقوق المرأة في أي إنتخابات" .... ههههه .. ده على أساس إن في انتخاب أصلا .. و القرار الخطير بقى : إذا كنت متزوج بالفعل من مصرية ولم أنجب منها بعد أطلقها فوراً

مش عارف ليه افتكرت مشهد في فيلم.. مسجون بقضية مخدرات كان بيهتف : فليسقط الاستقلال .. فليسقط الاستقلال , عشان يفتكروه مسجون سياسي و يطلع في هوجة الافراج عن المعتقلين

ملحوظة رفيعة : نغمة "الرجالة ماتوا في الحرب" دائما ما تذكرني بنغمة " بلد بايظة" و سيمفونية "مابقاش في ضمير" و كل الكلام اللطيف ده .. ياللا نقول إيه بقى ..
هو التحيز للمدوِنات ( بكسر الواو ) هو اللي جابنا ورا ..لازم نرفع قضية على بلوجر

و معلش عشان طولت , و عشان العامية كمان

مهندس مصري بيحب مصر said...

تصدقي بالله الموقع بتاع المجلس القومي للرجل ده مسخرة فعلاً
يخرب بيت الهبل يا شيخة

مش ناقصة غير دول كمان

يمكن يكون فيه إعتراضات على المنادين بحقوق مزعومة للمراة تخالف شرع الله
لكن برضه فيه إعتراض على خنق المراة و كبتها بما يناقض شرع الله برضه

لكن لو اتبعنا الشريعة حنستريح و نريح

لكن يا اما نتطرف في حرية المراة او نتطرف في كبتها و نقضها

هو ده الهبل الأصلي

فاتيما said...

غدغود
إنتى بتجيبى الحاجات دى منين ؟؟!!
أنا دمى إتحرق بصراحة
إيه كم الحقد و العقد دى كلها ؟؟
و كله كوووووووووووم
و حكاية ميدفعوش عن مصر دى
كوم لوحده
ليه بقى إن شاء الله ؟؟!!
و النبى مش مكسوفين من روحهم ؟
أهو عينة الناس دى بتخلينى احييكى على تغيير عنوان المدونة
(مؤقتا بس مش علطول.. ولاد الحلال كتير برضو )
بس بصراحة قصاد الذكور
اللى دماغهم حادفة لورا دول
الأفضل تكون الواحدة
مش عاوزة تتجوز بالمرة
هحاول آجى يوم الندوة إن شاء الله لو قدرت و تبقى فرصة أشوفك
و أسلم عليكى يا ست البنات
بس فى كل الاحوال إحنا وراك يا جميل و عارفين إنك قدها و قدود
و هتفحميهم
سلام بقى

Anonymous said...

كان فيه جملة عظيمة لواحد صاحبي بيقولها لي لما ارميله لينك من اللينكات دي "شكرا على الهم، والغم والكرب العظيم..!!"
بجد والنبي ايه اللي انا قريته ده..؟؟
إيه الهــــبــــــل اللي انا قريته ده..؟
احنا داخلين على أنهي حفرة وللا نفق وللا بلا ازرق وللا حادثة القطر اللي قلتي عليها..!!
وكالعادة كالعادة كالعادة.. بيتكلم باسم الدين...!!!
بالمناسبة انتي دخلتي اللينكات الفرعية وللا اكتفيتي بصدمة الصفحة الأولى..؟

MaNoOoSh said...

بصراحة كدة أنا عاجزة عن التعليق ومش جاى فى دماغى غير جملة من مسرحية العيال كبرت بقولها لماما دايما لما احس ان اخويا "سامحينى يا ماما" قليل الرباية
جملة يا زين ما خلفتى يا زينب
واحب اوجه نفس الجملة للسيدات الفاضلات والدات أصحاب الموقع الخطتشييييير دة.

Che said...

برضه كرجاله ( مع انى لسه مش مقهور بس هاتقهر قريب ) ارجع و اقول اننا مالناش غير بعض
و بالنسبه لنقطه الجيش عندى جندى صاحبى نفسه انهم يلغوا جيش الرجاله من اساسه عشان نلحق نكون نفسنا و نعيش شويه

Love-Guru said...

أحب اضيف مبدأ مهم لمبادئ الجمعية

" علي كل الرجالة الامتناع عن شراء اي كتاب تكون مؤلفته أمرأة مثل كتاب (عايزة أتزوج) لمؤلفته المدعوة برايد المفترية علي الرجالة و بدلا من انفاق الفلوس في شراء مثل هذه الكتب يستطيع الرجالة الحصول علي نسخة مجانية من موقع
4shared.com "

Anonymous said...

lazeeeeeeeeeeeeeeeeeeeez

Anonymous said...

السلام عليكم
اولا احب اهنيكي جدا على اسلوبك الرائع ومدونتك اللي ملهاش حل دي
ثانيا انا متابعة مدونتك من زمان جدا وبقراها اول باول مع اني اول مرة اكتبلك تعليق
ثالثا انا كمان شهرين هكمل 27 سنة بس اخدت لقب العنوسة من بدري من قبل ما اكمل الثلاثين لاني من بلد ارياف وانتي عارفة عواجيز الارياف بقى
يعني بنت خالي اصغر مني 9 سنين ومعاها عيل يعني بيعتبروني عانس من الدرجة الاولى
بس ده مش لسمح الله علشان انا وحشة انا الحمدلله زي القمر بس الناس واخدين عني فكرة اني مغرورة ده ليه لاني بكره الرجالة جدا
علشان مستبدين وقهرين الست وكل واحد فيهم عاملي سي السيد ومكدبش عليكي اولهم ابويا
علشان كدة بقول للكا مش عايزة اتجووووووووووووووووووووووز
انا اسفة طولت عليكي
واتمنالك يارب دايما التوفيق والنجاح ومبروك على الطبعة الخامسة ويارب دايما من نجاح لنجاح ونقهر الرجالة كمان وكمان
تحياتي

mostafa rayan said...

ليه الناس مصرة انها تخلهيا معركة بين الراجل والست
احنا بنكمل بعض مش بنحارب ولا ضد بعض
الكلام اللي اتقال في السايت وفي بعض التلعيقات عندك كلام غريب قوي
يعني ايه هتفحميهم هو احنا بنحارب
يابرايد الرجالة ماماتوش في الحرب
في رجالة كتير كويسين قوي وزي الفل
والنماذج اللي بنشوفها على النت مش دي اللي في الواقع
ياما ستات كتير زي الفل ورجالة زي الفل
الناس لازم تكمل بعض مش تحارب
ارجو انك تتقبلي رأيي ولك كل التحية والتقدير والود

Mony said...

ههههههههههههههههههههههههههههههههههههههههههههههههههههههههههههههههههههه

تصدقي

انا افتكرت موضوع المجلس القومي للرجل ده اشتغالة من اشتغالاتك

بس طلع حقيقة


سبحان الله

ادي اخر الرجالة

Anonymous said...

لا حول ولا قوة الا بالله يا خسارة الرجالة على رأيك يا برايد لنا الله يا بنات :D

Maha said...

مثال واضح وجميل ولطيف للتخلف و التراجع الحضاري و الرجعية و التحجر العقلي
وبيقولوا بعدين هما ليه محلك سر لاء ويا ريت كمان محلك سر
ده احنا بنرجع لورا كمان
بوست جميل جدا كالعادة مع اني مصدومة ثرتي عليه فين الاختراع ده!

شيماء سعد said...

لا بجد دى ناس مع نفسها على الاخر
انا دخلت الصفحة بتاعتهم بجد حسيت ان اللى كاتب ده كلة مريض نفسى
المشكلة انة كمان بيستشهد بحاجات دينية ما لهاش علاقة بالفكرة المتخلفة اللى هو بيقول عليها
المفروض يغيروا الاسم من المجلس القومى المصرى للرجل
للمجلس القومى المصرى لمحاربة مصر
الغريب بجد انة محمل النساء كل المشاكل المجتمعية
بس هم نسوا يحطوا بند
اذا كان ليك ام او اخت عايشة أوئدهم ولو خلفت بنت ياتموتها يتخليها علشان تعذبها وتنتقم منها
ربنا يشفى ويهدى
بجد ردودك على كلامهم زى السكر يابريد ما شاء الله عليكى
ربنا يعزك

mona said...

صدقت يا برايد

ونسيت أهم مبادئهم

المرأة فتنة ولذلك يجب مكافحتها

وهناك جمعية خفية هي جمعية مكافحة المرأة

Anonymous said...

ياة انتى لسة هنا يا برايد
انا قلت انك نسيتى المدونةواللى فيها

$$Dado$$ said...

و الله العظيم انا مش مصدقققققققققققققققققققققه
هم يضحك !!!!!و هم يبكي!!!!!
مش عارفه اضحك على سطحية موضوع المجلس و أراءة وسزاجته
و لا ابكي على الاخلاق اللي اختفت
طب مش هاقول نساء المسلمين هاقول امك اختك بنتك حصلها حاجة و حد بهدلها كده انت هاتقف مع مييييين ؟؟؟؟؟؟؟؟؟
طب اعمل حاجة تؤجر عليها يوم القيامة و تكون في ميزان حسناتك احسن متتحاسب على الكلام الفاضى و الهرتله اللي مكتوبه دى
و الله انا دايما باحترم الرأى الاخرو محبش اسفه من رأى حد بس بأمانة ده كتييييييييييييييييير
الكوميديا بقى انه مش خايف من مامتنا كلنا ماما سوزى اللى رافعه راسنا في السما هههههههههههههه

$$Dado$$ said...

اما انت بقى يا غودي فنفسي اشوفك وحشتيني موووووووووت ربنا يسهل و اقدر اشوفك في المعرض وأأجز من الشغل

Ahmed Al-Sabbagh said...

عسل عسل عسل

Anonymous said...

أهلا برايد، كيف حالك..أنا أتابع مدونتك دائماً..و هذه أول مرة أكتب هنا..و لقد أرسلت لك رسالة بها بعض التعليقات على إيميلك..
كلامك جميل جداً يا برايد...
"يا أخي البنات مقصفوين الرقبة دول خلاص إستقووا و افتروا
إفتروا إيه ..قول توحشوا .."

حقاً يا برايد، أكثر بنات اليوم يستهترن بشدة و يلبسن أضيق اللبس و يطوفن في السوق والمستشفى ..
و لا يخجلن !! و لا يستحيين من خلع حجابهن بل يخلعنه في زفافهن أمام أفواج من المعزومين....بالله
ماذا استفدن!!

"و ضد ركوبهم الميكروباصات ..ضد إعتراضهم لما حد يمد إيده كده والا كده ..ملعونييييين في كللللللل كتاااااااااب ..ما هم اللي
بيجيبوه لنفسهم"

حقاً يا برايد، عندما تتنازل الفتاة عن حقوقها التي أعطاها لها الإسلام،لا يوفيها المجتمع الإحترام الذي تستحقه..
و لذلك نجد المرأة التي تحترم نفسها و تحتشم ،و المرأة المنقبة خاصة، تحصل على المقاعد في الأتوبيس ..و يقدمها الناس في الصف!!
"..ما احنا بنفضل نفكر يا ترى اللبس الطويل ده مخبيه تحته إيه؟"
إن الكثير من الشباب المتسكع..و خاصة المنافقين و أعداء الحجاب يغتاظون من ...المحجبات و ذلك لأن الحجاب الشرعي يحرم الشاب من إحدى ملذاته..
كما أن الحجاب يصرف الرجال عن نظرتهم للمرأة نظرة شهوانية ، فيجعلهم ينظرون لها لا على أنها قطعة لحم يحملقون فيها و إنما على أنها أولا و أخيراً
إنسان..
"المبدأ الأول : إذا رأيت فتاة أو سيدة تتعرض لموقف سيئ في الشارع لا أساعدها.."
حقاً..هذا هو ما يحدث في مجتمعنا..و في بلاد آجرى مثل السعودية.. عندما تتعرض أي امرأة لأي مكروه،يسرع الجميع لمساعدتها..بل عندما تقبض الشرطة على فتاة في الشارع..يسرع الجميع للإمساك بالشرطة للتأكد من إنصافها!!
"و تتوالى المباديء حتى المبدأ الرابع عشر : الإمتناع عن الزواج من أي فتاة حاصلة على أكثر من الإعدادية أو مؤهل متوسط على الأكثر.."
الكثير من الشباب يطبقون هذا المبدأ..و الكثير من الشباب أيضاً يغير من زوجته بسبب أن مستواها التعليمي أعلى من مستواه !!
شكراً يا برايد..منتظرة ردك

Unknown said...

انا المهندس ياسر

اعلن لكل الناس اننى بريئا من هؤلاء القوم براءة الذئب من دم ابن يعقوب
و اننى ضد هذا البله بل واعتبره ضد
الفطرة التى فطر الله الناس عليها و كذا ضد قوانين المرجلة و ان من ينضم لمثل هذه الترهات قد خسر نفسه و كفى

s.m said...

انامع المناشدة دى طبعا ومؤيد مجلس القومى للرجال وخصوصا القرارت اللى وخدها وانصاف رجل ولاماتوا فى الحرب ولا القطر ولاالعبارة كله موت اهون من الموت بى ابو وردة نحنوا سيد قرارة نشجب ونعترض ههههههههههههههههههه
وياله خالوه حرب وطبعا النيجة معروفة مسبقاء البقاء لل ........ بوست حلو ولو حقيقى هتبقة كارثة بجد بيدعم للسالبيات اللى حنا بنعانى منها وانعدام النخوة ربنا يستر وتكون اشاعة من اشاعاتك

فاتيما said...

معلش يا غادة
بعد إذنك يعنى
الأخ الفاضل

mostafa rayan
===============
علق على جملة فى تعليقى
و هيا كلمة
هتفحميهم
و هوه متضايق و متصور إنى بشحنك
و إنى مع رفع درجة حرارة الصراع لأوجه بين الرجالة و الستات
و دى مش حقيقة
يا أستاذ مصطفى
أنا بقول لغادة تفحم الناس اللى ناوية تحضر الندوة
و تسن السكاكين
خصوصا إن موضوع الندوة باين من عنوانه
و شكله هيكون فيه كلام كبير
و بناء عليه
و بما إن كلام المدونات
مش غالبيته كلينكس
و بصفتى مدونة متعصبة لهذا العالم
و شايفة إيجابيته اعظم بكتير من سلبياته
فبقول لغادة تشد حيلها
و لا يهمها من أى حد
غلوطتش أنا يا أستاذ مصطفى عشان بشجع البونية ؟؟!!
أنا مقلتش حاجة على العلاقة بين الراجل و الست
لأن كل حالة فردية
و ملهاش حكم مطلق
و متنكرش إن زى ما فيه ستات عديمة المسئولية
فيه كمان رجالة بالرقم القومى بس
و شهادة التجنيد
طب دا حتى البهوات بتوع المجلس الموكوس دا
مش عاوزين حتى يخشوا الجيش يا شيخ
الملخص يعنى
و عشان موجعش دماغك
كلمة تفحميهم تنسحب على الندوة
مش على الرجالة
و حقك علينا يا سيدى عشان الأسلوب مكنش لطيف
و لو إننا مغلطناش يعنى
بس خلاص كدا
سلام

سبمبوت said...

الله يوفقكم انتي ورحاب . أما من الكويت فما اقدر احظر المعرض لكن قلبي حيكون معاكم.

كتبت عن مدوناتكم وكتبكم في مدونتي .. زوريني

سبمبوت من الكويت

Anonymous said...

اول شي ماعلق على الموضوع
قبل اقولك لاتتاخرين علينا ؟؟
بجد انزعج وافقدك كثير
اما المجالس القوميه للرجال اتوقع راح تصير في الفترات القادمه
بس انتي بليز لاتدخلين وتكتبين شروطهاااا
ممكن تطلع شروطهم ارحم :)

Anonymous said...

تابع تعليقي السابق...
يا برايد...عندما قرأت الكلام الذي قلتيه على لسان الرجال..وجدت أنه
به بعض الأحقية لهم و أنه أرحم بكثير من الإقتراحات التي قالوها و التي لا يحق أن تحترم...
المبدأ الثاني: مقاطعة جميع المحلات والشركات التي تمتلكها أو تعمل بها فتيات أو سيدات..
قشطة جدا .. ..كده هتقضوا حياتكم فول و كشري و عصير قصب ....بدل المقهورون في الأرض,,هتبقوا المنتفخون في الأرض.. صحة و عافية إن شاء الله.
"صحيح يا برايد....هذا يعني أنهم سيقاطعوا المستشفيات...أي أنهم لن يأكلوا الطعام و لن يتعرضوا لجو البيئة ليضمنوا الوقاية من الأمراض !!!.و لن يأخذوا أي تطعيمات حتى لا يروا الممرضة!!!
و هذا أفضل للجميع ...حتى ترتاح المستشفى من الزحام الشديد...هاها..

للهروب من تعسف وظلم قوانين الأحوال الشخصية للرجل في مصر أمتنع عن الزواج بمصرية وأتزوج من فتاة من أي دولة أخرى من خلال الإنترنت
"هاهاها و هل يحسب هؤلاء أن زواج النت ينجح!! هاها...فليذهبوا ليطلبوا يد الخليجيات..حتى يذوقوا المرارة ..و ليطالبوا بتحليل كافة تحاليل الدم..و ليدفعو المهر الذي يبلغ من 20إلى100ألف ريال..فليسددوا الأقساط!!"

المبدأ الخامس: إذا كنت سائق تاكسي أو ميكروباص فلا أقوم بتوصيل النساء عادي..هنقضيها تكاتك ..
" صحيح يا برايد..فلأفضل للمرأة أن تمشي على قدميها..و لا تركب هذه الميكروباصات المتهالكة المزدحمة بالناس و التي لا توجد بها ذرة أكسجين!!! هاها....
أذكر أني قرأت في خبر نقلته وكالة رويتز.. أن شركات قطارات طوكيو باليابان أطلقت حملة لحماية النساء من الرجال الذين يتعمدون مضايقتهن بطرق مخلة أثناء التنقل ، وتضمنت الحملة إجراءات عملية تمثلت في تخصيص عدد من العربات للنساء فقط ! مما أدى إلى إثارة غضب بعض الرجال على اعتبار أن ذلك تميزاً ضدهم ..!


المبدأ السادس: المطالبة بالمساواة بين الذكور والإناث في تأدية الخدمة العسكرية و الله ماعندنا مانع ..سلمونا انتوا بس الجيش ده 3 شهور و اتفرجوا عليه بعدها ..جمعيات و أجازات و أذونات رضاعة ..احنا ما نتأخرش أبدا عن خدمة الوطن...
" صحيح يا برايد....إنهم يريدون أن يلقوا بكل مسؤلياتهم على المرأة ...و لم يكفيهم جهاد المرأة في بيتها و عملها من أجل زوجها و أولادها...و يبدو أن نساء العصر أجدر من الرجال بالقيام بهذه الخدمة!! هاهاها...ألم تسمعوا عن الكونتيسة الألمانية التي عزمت أن تقوم برحلة على صهوة جواد أبيض من دبي إلى برلين في عشرة أشهر!! (علماً بأن هذه المسافة = حوالي عشرة آلاف كيلومتر ) و الخبر على هذا الموقع:
www.f4arb.net/vb/archive/index.php
/f-56-p-9.html - 24k
ألم تقرئوا عن بطلة قربلاء ( السيدة عائشة(رضي الله عنها))...كيف أنها ركبت الجمل على رأس الجموع المعارضة الثائرة ، و كانت القائدة العليا للجيش: تصدر الأوامر ، و تعين الامراء ، و توجه الرسل بكتبها ذات اليمين و ذات اليسار...(من كتاب سيدات بيت النبوة للدكتورة عائشة عبد الرحمن (بنت الشاطئ)).... و لكن بالطبع هذا لا يعني أن نجند النساء.... أذكر أن رجال العراق قاموا بإكبار بعض نسائهم على القيام بعمليات تفجير إنتحارية!!! و بالفعل قام بعض النساء بحمل القنبلة و قفزن بها من فوق السطوح العالية...و لا حول و لا قوة إلا بالله...

أما أكثر مباديء الجمعية أهمية على الإطلاق هو المبدأ التاسع عشر و الأخير: إذا دخلت مصر حربا لا أدافع عنها..ده علشان مصر مؤنث مثلا والا إيه؟
" صحيح يا برايد، هل يعقل أن يقول هذا القول رجل مؤمن؟!...يبدو أنهم يريدون أن يتركوا الأطفال و النساء يقتلون كما تقتل أطفال و نساء غزة...و يبدو أنهم يريدون أن يتخذوها حجة لكي يتخلفوا عن الجهاد في سبيل الله....و لو خضعت المحكمة لهم و أعطتهم ما يريدون لما دافعوا عن الوطن...

يبدو أن الفتنة الطائفية بين الرجال و النساء إشتدت على ذروتها...
رغم عدم وجود أي وقت لذلك…حيث أن إسرائيل تنافسنا و قد دخلت غزة و يمكنها أن تدخل عندنا (والعوذ بالله) في أي وقت…فكان الأجدر بالجميع أن يتحد من أجل إصلاح الأمة التي أوشكت على الهلاك…قبل أن يحل غضب الله علينا فتأتينا الحرب التي تقضي على الأخضر و اليابس …الله يرحم و يستر.
شكراً يا برايد و منتظرة ردك...

Shimaa Esmail said...

الأستاذ الجميلة/ غادة عبد العال
صاحبة مدونة / كنت ...عايزة اتجوز
" تحية طيبة" وبعد..
اعتذر عن الخروج من موضوع التدوينة، لكنني أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية.
أرجو الاهتمام والرد سريعا بالإيجاب أو السلب.
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

Anonymous said...

حمد الله على السلامه عشان وحشتينا
وبعدين الرجاله اللي زي دول عايزين نسحب مهم اللقب ده يظهر كده ان الرجاله خلصت في الحرب وعشان كده بيطالبو ان الستات هي اللي تحارب

انسانةعادية فى عالم مش عادى said...

هههههههه ليهم حق طبعا الستات بقوا مفتريين اوى مش تنكرى ده
عودة حميدة للتدوين ويارب نشوفك دايما كده منورة المدونة

أنا - الريس said...

بالصلاة علي النبي .. الرجال لسه فيهم الخير .. هم والنسا .. وأنا بعترض وبستنكر وبشجب .. الجميعة الخيرية دي .. لأن دول مش .... وكل واحد ودماغة بقي .. ومشكورة .. علي فكرة الأمن في المعرض أكثر من الرز في الحلة .. واقروا جرنان المصري للتأكيد بين كل رجل أمن ورجل أمن رجل أمن ثالث .. ربنا يوفقك يا برايد ويرزقك بابن الحلال اللي يوفقك ويهنيكي .. ويسعدك مشكورة

ابن سينا said...

فعلا فكرة جميلة

حروف said...

مممممممممم
فينك من زمان
بوست رائع كلعادة

ReEm said...

اذا الكلام ده بجد

هيبقى مجلس فاشل جدا

كل مرة ينفخو صدرهمويفتكرو انهم قادرين يمشو حياتهم من غيرنا

بس هيهات ما يقدروش

aboooood said...

هاهاها بس أقولك حاجة إنت جالك قلق من أول إتحاد رجالي مع إختلافي معهم في بعض المبادئ هاهاهاهاهاه
معلش متخافيش كدة كدة خربااااااانة.

محمد عتلم said...

الله الله الله الله ... احنا فينا من كده؟

Anonymous said...

خخخخخخخخخخخخخخخ
ههههههههههههههههههههه
هههههههاااااااهاي
هما الرجالة جاتهم "لوثة" في دماغهم ولا ايه
عاملين مجلس قومي
تلاقي الواحد فيهم يحط القرار ويخرج يعمل عكسه
هما اصلا بيتنفسوا ستات عشان كده اتخنقوا

كيكى عوووووو said...

شوفتك فى ردك الجامد على استاذ ونبى ما فاكرة اسمة
ال ادب الكلينكس ال
مبروك ياقمر
اقصد 555 مبروك
عوووووووووووووووووووووووو

samourai 4 ever said...

على كدة كل اللى تلاقى راجل بيشاور عقله
متستنهوش لما يشاور
تضربه على دماغه بشومه
و تاخده على المأزون عدل
و لما يصحى و يفاجأ بانه فقد اعز ما يملك
ألا و هى حريته
يبقى الوقت فات على الرجوع


العصمه فى ايديها يا حدق

و دمتـــــــــــــــــــــــم

۩۝۩ Dr. Flavio ۩۝۩ said...

هو مفيش حد عاجبه حاله

الست واخده وضعها وبتقول مجتمع ذكوري
والرجل بيقول مجتمع أنثوي

واضح ان محدش راضي عن حاله

المهم .. لسه واخد بالي حالا انك من المحله مع اني دخلت مدونتك قبل كده كتير ... يا مراحب ببنت بلدي

إن شاء الله هزور جناح الشروق أكيد لكن على اول فبراير كده ياريت تكوني هناك عشان اوقع الكتاب

SaSo said...

والطبعه الخامسه هتطلع بنفس الاسم ولا "كنت...عايزه اتجوز" هيه كمان
استهدى بالله كده يابرايد,وبعدين ايه كنت دى؟كنت عايزه اتجوز ودلوقتى عايزه ايه انشالله؟
ده حتى ياشيخه بس اسم شهره ولزوم اكل العيش
وربنا يكتبلك اللى فيه الخير يارب

utopia said...

أية الجمال ده هي دي بجد الموهبة الحقيقة مش دايما الواحد بيحب يقرا للناس الشباب بس بجد خلتيني أغير رأيي

Candy said...

LOL,
mashallah,egyptian people are always funny ^^
i do have ur book,i'll start reading it now,
:P
don't stop blogging,lovein ur [psts thought :P

Anonymous said...

الإبداع الحقيقي حري ٌبالتعبير عن ذاته ، والفكر الإنساني لم يخلق ليختنق في ظلام الصدور، والمبدع الحقيقي يمتلك دوماً الحق المطلق في أن تجد أعماله طريقها للنور باعتبارها خلاصة تجربة إنسانية كاملة تستحق النشر .
من هذا المنطلق تعمل دار رواية للنشر الإلكتروني على إفراد مساحة كاملة للنشر لكافة مبدعي الشبكة العنكبوتية بإعتبارها الخطوة الأولي نحو النشر الورقي، وفي سبيل الحلم في أن يصل إنتاجك للجميع تتعهد الدار خدمة النشر الإلكتروني على موقعنا أولاً بصورة تليق بالأعمال مع توفير الدعاية اللازمة والمناسبة له على الشبكة على كافة المستويات ثم تقديم ما يصلح منها لدور النشر المختلفة شرط أن يكون حجم هذه الأعمال صالحاً للنشر الورقي .
بدايتنا هي الحلم المشترك ودافعنا للاستمرار هو الأعمال المميزة من أجل أن نحقق معاً توازناً للنشر الإلكتروني والورقي ... الجديد عندنا هو اختيار أفضل عمل سنوي يصل إلينا كل عام من خلال لجنة تنعقد لذلك وتعتمد في اختيارها في الأساس على استقراء القبول الذي لاقاه العمل المختار لنشره بصفة سنوية في معرض الكتاب مع التزام الدار بتكليف نشره وعمل الدعاية اللازمة له كاملة و بصورة مرضية لصاحبه .
يبقى أن ننوه أننا لن نخضع لشروط النشر المعتاد وتعسف دور النشر التقليدية و يكفي فقط أن يمثل عملك تياراً أدبياً ناضجاً سواء أكان العمل في صورة رواية أو ديوان شعر أو مجموعة قصصية .


موقعنا ( http://rewaya.tk )


إيميلاتنا
rewaya12@hotmail.com
rewaya12@yahoo.com

Anonymous said...

انا كنت فكرة الاول ان الموضوع اشتغالة لكن شكله بجد لكن الاشخاص دول لا يستحقو لقب رجاله واي بنت فينا ب 100 واحد منهم وان كانوا مش عايزين يدافعوا عن البلد احنا ندافع عنها لاخر نفس ولا الحوجه ليهم بس ياريت يبقوا يشيلو صورة علم مصر-بكسر الميم- وحديث الرسول اللي في البدايه لان كل كلامهم -وماينفعش طبعا نقول مبادئهم لان الهبل ده ما يتقلش عليه مبدا- مخالف للشرع و سنة الرسول الكريم وده واضح فكل البنود بتاعتهم و بنقولهم ياريت يبقوا يقراوا اكثر للاحاديث لانهم واضح ما يعرفوش غير الحديث الشريف اللي كاتبينه في الاول
رضوى عبد اللطيف

H.F said...

هههههههههه
انا كنت حاسة انى هقرا من ضمن الاقتراحات والشروط ان الحمل والولادة حق مكفول لكل مواطن ومن حق اى راجل ياخد اجازة وضع او ساعة رضاعة زيه زى زميلته فالعمل
:):)
ولا حكاية لو متجوز واحدة اطلقها
ده اكبر دليل ان اللى كتب الكلام ده طفل معقد
الشباب ما بيصدقو ربنا يكرمهم ببنت الحلال ويتجوزو ويكملو نص دينهم ويبدأو أسرة جديدة
دول جايين يقولو انك عشان تبقى راجل تطلق مراتك لمجرد انها ست مصرية
ويرجعو يقولو منظمة حقوق المرأة لازم نقاضيها ونتهمها بالعنصرية

سلمولى على سن المراهقة وتداخل الافكار
:):):):)

koketa said...

عمار يا مصر على رأيك يا برايد يا وكستنا كلنا

Anonymous said...

ههههههههه

كلام ف قمة السذاجة والعبط والله

ربنا يشفيكى من هبل وعقدك النفسية

قومى صلى لك ركعتيين احسن

شوفى بتخدى كان سيئة بمقالاتك دى

بمجرد تقولى الرجالة كذا اعلمى انك غلطى ف كل واحد واضربى سيئة لكل واحد

ابشرى بالسيئات (:
ولو مش مصدقة رجعى دينك وانتى تعرفى

ولما تقولى لنا الله اعرفى الاول ربنا بيقول اية

كريم زياد said...

مرحبا
يشرفني ويسعدني أن أقدم طلبي الحصول على العضوية في المجلس الموقر... وتقبلوا فائق احترامي وتقديري

عزيزتي شكرا على الموضوع الطريف ده ...ده انت دمك عسل زي الشربات...صحيح ...هو الشربات ده عبارة عن عصير ايه ...؟ معلش أصل احنا في المغرب معندناش شربات هيهيهيه

تحياتني

البت المشمشية حلوة بس شقية said...

ههههههههههههههههههه
ان اكيدهن عظيم
مدونتك جميلة اوى يا غدغودة انا متباعكى من زمان من قبل ماابقى مدونة

ٌرحيـــــــــــــــــــــــل said...

عجبتني قصة الانضمام للجيش والجمعيات وأذون الرضاعة

والله العظيم انتي عسل!

علي جاد said...

سلام
عندى احساس 80% انك ما هاتفضيش تقرأى تعليقى ..بس هاكتبه واقولك ياااالهوى ..ايه ده خمس طبعات مرةواحدة ياخرابى ياخراشى ..ايه الحلاوة دى ..دا ما حصلتشى مع كبار الكتاب المعروفين..إيه ياعم الحلاوة دية الرحمة، حتى الكتابة.. داانتو ما خلتوش
على فكرة أنا بحسدك ويارب يحوأ فيكى
وفى الآخر تقولى انك ماتجوزتيش
طيب يا ستى أنا مستعد أجوزك واقعد فى البيت أطبخ وأغسل وأعمل الللى ايه رأيك .. فكرى فرصة ..وأهو يبقى اتلم المتعوس على ناجحة الرجى

alaa said...

كلام كبير ..كلام جريء
وفى الآخر نرجع للعبارة الشهيرة "هى وهو "

اكيد فى حكمة من خلقنا ذكر وانثى
او ممكن نقول هو وهى
والواقع بيقول ان المرأة واخده حقها كويس
ولو فى حق بتسأل عنه فهى السبب فى
ضياعه

وفى الآخر احب اقول انى وانا باكتب
اكتشفت انى كتبت ذكر الاول وبعدها هو برده الاول
مش عارف ليه؟

تحياتى لك ,,,

Unknown said...

اولآ انا من موقعي هذا بأطالب بكتاب جديد مش معقوله كده المفروض كل معرض بكتاب جديد ليكي يا غاده

انا هاجيب الرجاله من ع القهوه و اجي الندوه بس انتي شاوري يضربوا في مين ولا اجيب امن مركزي و انتي عارفه نسبة ذكائهم عالي ممكن يضربونا احنا

mohamed ibrahim said...

لولاش اني عارف انها فشرة و لا يمكن راجل يقولها بلسانه
مش عارف كنت عملت ايه
بس جو التدوينة فكاهي موووووت
متشكرين جدا علي التدوينة

تحياتي
محمد

علي جاد said...

.. سلام
طبعا الكلام معاكى مش أى كلام
بس بصراحة أنا مفروس منك فرسة
إيه اللى انت عاملاه ده .. دا أنا من يوم ما شفت مدونتك وأنا بفكر أروح بيتنا .. الطبعة الخامسة مرة واحدة ..
الخااااامسة !! يا لهوى .. ياخرابى يا خراشى ياميت ندامة علينا
أقولك على حسنة تُخُشى بيها الجنة حَدِفْ "اجوزينى" والله هاتكسبى ثواب كبير .. بصى أنا واد لهلوبة باغسل وأمسح واكنس واعرف كمان أربى العيال والطير .. طيب بس انت شاورى كدا ولو حتى بالماوس هاتلاقينى كييب وورد بين ايديكى
ايه العبط ده .. الله يسامحك خليتينى أهرتل ..
لأ مش يسامحك .. هه أحسن
...سلاااااااام

Heba Sayed said...

مدونة جميلة اوى

ههههههههههههههههه

بس الكلام فظيييع

مشكور

Unknown said...

الله عليكى يا غاده
انا مبسوطه جدا وانا بقرالك
ومتابعاكى بقالى فتره بتاعت 5 شهور من بعيد لبعيد
ولما بقرا كلامك بحس بأزمة صدريه من كتر الضجك لأن نفسى بيتقطع
نياهاهاهاهاهاا
انا بشكرك عالبوست ده
جميل وروعه كالمعتاد
بس انا عايزه اقولهم حاجه بصوت عالى
( جتكم البلااااااااااا بليتوااا البلد ) آل رجاله آل
يايايايا .. سوفاج
وحلو قوى موضوع المساعده بتاع الرجاله ده يا بنتى الى كتب البند بتاع المساعده ده تلاقيه مطلعش من البيت من ايام 73 هههههههههه
ايام ما كان فى رجاله
لكن لو نزل الشارع هيعرف ان كلنا زى بعض
يعنى منا وعلينا
واحتمال نكون احنا الى بنساعدهم

مشكورة

Anonymous said...

المبدأ 21 من ميثاق شرف مجلس البهوات ينص على:

"تجميد أرصدة كل نسوان وبنانيت الأرض، وكمان غلق منابع مدوناتهم اللذيذة دي، وإنشاء مجلس الهوانم الي هما آعدين في البيوت مريحينة

Anonymous said...

بالراحة علينا يا غادة
واحدة واحدة من مشاريعك

Abdelrahman Ellithy said...

ههههههه
ليه غيرتي رايك فالجواز

hasona said...

السلام عليكم
انها الحرب بمعناها وبغير معناها
ايه اللي بيحصل ده
،،رأيك اننا نلم البنات كلهم ونضعهم في جيش واحد نحارب بيها الاعداء، ونكون ضربنا عصفورين ،3 ،4 بجيش واحد
،،،
وبكده تبدأ البنات في بناء جمعيات نساء ضد الانقراض
،،،
احنا الرجالة اللي دلعناكوا أكثر من اللازم باين ولا ايه

ايه اللي ناقص تاني بعد ما الرجالة بيعملوا جمعيات لحقوق الرجل وأخري للمناداه بالمساواه بين الست والراجل
والمجلس القومي للرجل،،فاضل ايه تاني

والرجالة كل واحد ماشي يكلم نفسه

أيام وهتعدي
وربنا يعديها علي خير
ويجعله عامر

تحياتي

M A K I said...

الله عليكى يا برايد
أنا بحب كتاباتك جدا جدا جدا
و لسه مخلصة كتابك كله امببببارح
بجد انتى أسلوبك روعه

Wild at Heart said...

يا نهار أسود ده طلع بجد، والله كنت فاكراكي بتبالغي عشان الموضوع يبقى كوميدي :s
عندي حق أنحاز للبنات أنا دلوقتي ولا لأ
لك البنات يااا مصر

Anonymous said...

بجد بجد انتى اكترمن رائعة
انتى جامدة
انتى تهبلى
انتى بجد
سكرررررررررررررررررررررر
ودمك خفيف جدا
ع فكرة اانا جبت كتابك وبجد خلصت نصة فى ساعة
دمك شربات وربنا يكرمك يا برايد ويكرمنى من بعدك
ولو لقيتى طنط حشرية ياريت تقوليلى اهوة تشوفلى حد انا كمان.ههههههههه
عموما انا اباركلكع الطابعة الخامسة لكتابك وبجد ربنا يحرسك ريكرمك
يا قمر انتاااا
:)

Anonymous said...

مبدع ولله

Anonymous said...

lazeeeeeeeeeeeeeeeeeeeez

هديـــل الـروح said...

السلام عليكم ورحمه الله وبركاته

ازيك يا برايد عامله ايه
ملحقتش أقرأ الوقتى لأنى مستعجله وبعتذرلك على عدم المتابعه من فتره
بس المهم انتى تكونى بخير

بسمـــة مســـــلّم said...

السلام عليكم دى اول زيارة ليا لمدونتك بس عجبتنى موووووووووووت ايوة كده فوقيهم اصلهم ناموا هههههه بجد اسلوبك جميل وجذاب تسلم كل اقلامك اكيد منتظرة تعليقك على مدونتى والدعوة عامة سلااااااااااامى

د. ياسر عمر عبد الفتاح said...

والله عالم دمها خفيف

KEBLAWYAT said...

هو على فكرة فعلا الست بقى محدش يعرف يكلمها ف البلد دى

Anonymous said...

ba7ayeeki 3ala esloobek fel ketaba begad 7elw awy

Anonymous said...

الموضوع محتاج وقت وتركيز للرد...لكن في عجالة اكيد مش دي اراء كل الرجال...وما تنسوش ان الرجاة دول ابائكم واخوانكم...واكيد حاسين اد اية الاب بيدوق المر علشان خاطر اولادة ويوصل الليل بالنهار علشان يوفر لاولادة بنين وبنات حياة كريمة
وكمان فية شباب حاسس بالمسئولية تجاة اخوتة البنات وبيخاف عليها لانها جزء منة وعرضها وشرفها بيمسوة بالدرجة الاولي...بخلاف ان فية امهات او زوجات لا يقدرن المسئولية بأي شكل من الاشكال والحمدللة انهم اقلية

في النهاية هيا مش حرب ولو دققنا هانلاقي ان الاسلام كرم المرأة وحفظلها كرامتها
ولو خروج المرأة للعمل ممكن يعرضها للاهانة فالبيت اكرم إلا لو كان للضرورة احكام وما اكثر الضرورات في وقتنا الحالي
ولو كانت ذات طموح خاصة لو علمي فهذا من حقها بلا شك الا لو تعارض مع حيائها وانوثتها وكرامتها
وفي النهاية فالمراءة بقدر رقتها وطبيعتها فهي ايضا ذكية وعقلية إقتصادية جبارة وكل واحد فينا يلاحظ امة وكيف تدير شئون اسرتها بإقتدار سواء كانت عاملة او ربة منزل

وللحديث بقية علشان الحق اجري علي اكل عيشي...وتحياتي لكم جميعا

*الخاتــــIraqi Ladyـــووون* said...

ههههههههههه أول مرة أحس الرجالة مساكين

تسلمين يا برايد

Anonymous said...

انا مستغرب بس
ان مافيش غير النوعية دي هي اللي بتتشاف
و بيتم عمل تعميم خاطيء على الكل بالنوعية دي

بالمناسبة
بعض, من الكلام اللي قالوه صح مش غلط

AyA said...

دول بجد مجموعة.... كل الاوصاف السلبية اللي في القاموس تنطبق عليهم, لا وكله كوم والتحشيشات الطبية والمغالطات الدينية الرهيبة اللي في الموقع كوم تاني!!! بجد مش عارفة اللي كاتب الكلام دهبيهرج ولا بيتكلم بجد؟

AyA said...

أنا بعتلهم اقتراح جديد للإجراءات بتاعتهم....

ان تقتل نفسك فتيتم بناتك وترمل زوجتك نكاية فيهم او تثكل امك ان لم تكن متزوج انتقاما منها

Anonymous said...

السلام عليكم
انا عاجبانى فكره ان البنات يروحوا الجيش مش هم بيطلبوا المساواة

Anonymous said...

احنا نجمع كل حريم مصر ونحرقهم فى فرن كبييييير لانهم سبب وكست العالم
يروحوا يشوفوا ستتات الدول اللى برا
امريكا ولا انجلترا ولا فرنسا
ياربــــــى هو فى كدا ولا اجمل ولا احسن ولا الطف ولا كل حاجة فى الدنيا
هيو دا الجنس التانى
قرف

Bridal Shower Poems said...

This posting is beautiful and also interesting. Thanks for sharing, I like it. Bridal Shower Clipart

Anonymous said...

ما شاء الله عليك ..
كتاباتك ابداع في ابداع ...

لا تحرمينا من الدرر دي ^_^