Sunday, December 21, 2008

حاجة غريبة




صحيت النهاردة الصبح من النوم على سلسلة من الحوادث الغريبة








أولا بابص لوشي في المراية مالقتش أثر لأي تجاعيد





فتشت في شعري كويس ..مافيش ولا شعرايا بيضا






سناني جامدة (ماشاء الله يعني) ال35 سنة كاملين مش ناقصين ولا واحدة (آه هم 35) و مايتهيأليش هحتاج أركب طقم النهاردة








إبتديت أستعد عشان أنزل الشغل ..و سبحان الله..لا جه في دماغي ألبس قميص كاروهات أحمر في أخضر تحت فستان موف في أصفر في زمردي له رفارف من ع الجنبين ..و لا جالي هاتف إني أفرق شعري من النص و لا هفة إني أنزل أشتري 6 كتاكيت من عند أم إيمان بتاعة الفراخ و أحطهم جوه برنيطة و أشيلهم فوق دماغي







نزلت الشارع و أنا متوجسة خيفة (معلش عندي دي المرة دي) ..كل أما يمر جنبي عيل صغير أتشنج و أستعد عشان أطلق ساقي للرياح (آخر مرة و الله)











الغريبة لا لقيت العيال بيحدفوني بالطوب و لا إتلموا حواليا و إستوحوا لحن من ألحان سلطان الطرب مصطفى كامل و ألفولي أغنية بتقول "الع...أهي أهي"






ركبت الميكروباص..ماحدش واخد باله





روحت الشغل ..برده ما فيش أي حد واخد باله من أي حاجة







لا زمايلي و لا العيانين ولا حتى المدير أصدر قرار بفصلي عشان ما أثرش على الصورة العامة للمستشفى



رجعت البيت و عكس كل توقعاتي ..ماحدش من الجيران رمى عليا جردل ماية مش نضيفة و لا لقيت أهلي محضرنلي شنطة هدومي و بيقولولي إحنا إستحملناكي كتير ..كفاية علينا كده بأه



تخيلوا..مافيش أي حاجة حصلت






ما فيش أي فرق بين النهاردة و إمبارح








أنا ما أتغيرتش و الناس كمان شايفاني ما أتغيرتش






لكن بكره والا بعده هيعرفوا و ساعتها هيعملوا إيه؟..مش عارفة ..بس أنا الأكيد أكيد ..مش هاعمل حاجة..عشان أنا لغاية دلوقتي مش حاسة إن حدث جلل حصل يعني ولا حاجة





باختصار




(بعد الرغي اللي فوق ده كله يعني)









أنا









النهاردة









بـــــــأه











عنــــــــدي







----30---







ســـــــــــــــنــــــة








أنعي إليكم بمزيج من الأسى و الحزن..عامي التاسع و العشرين اللي إنتهى إمبارح .. و نفتكره طبعا بكل خير..





(كان عزيز عليا قوي و الله..إهيء إهيء)








و أخطو اليوم أول خطواتي في عالم الثلاثينيات المرعب ..أو الممتع








(أنا و نصيبي بأه)







و لأن العام الفائت ..كان عمري 29 سنة و برضه ما سلمتش من اللقب اللي انتوا عارفينه على يد أغلبية الصحفيين و المعدين و مقدمين البرامج اللي عملوا مواضيع حوالين الكتاب







فأتوقع إن السنة الجاية هتكون سنة لطشيفة جدا جدا جدا











و لأن بلوغي سن التلاتين ده من أهم أحداث عام 2008 و قبل جواز نانسي عجرم و بعد جزمة بوش على طول





فعشان كده هتلاقوا صور التلاتين الكتيرة دي في البوست..إشمعنى يعني موبينيل دول حياللا كملوا 20 سنة؟






و أوعدكم إن اللي هيبعت 30 تعليق ..هافتحله تعليقين من غير موديريشان مجانا




يااااالا




و دلوقتي قبل ما أطفي الشمع و أفرقع البلالين







خلوني أقولكم أمنياتي للعام الجديد




1- يا رب تبعد عن طريقي كل الطنطات الحشريات اللي لما هيسألوني عن سني و أقولهم 30 أكيد هيضربوا أقفاصهم الصدرية بإيديهم و يشهقوا شهقة إستحضار جني الملوخية و هم بيقولولي ..يا لهوي..و لسه خالية لحد دلوقت على أساس إني كان المفروض أبقى دلوقتي زوجة إيجار جديد





2- يا رب تبعد عن طريقي كل البنات و الشباب اللي لما بيقابلوني في أي حتة يدققوا قوي في وشي و يقولولي غريبة ..و لا باين عليكي السن..على أساس إني لازم أبقى شبه صباح أو نادية الجندي أو فتحي سرورعشان يبقى عندي 30 سنة




3- يا رب تبعد عن طريقي أي صحفي أو معد أو مقدم برامج ما قراش ولا حرف من المدونة و لا الكتاب و نام و صحي و قالهم ماتجيبولنا البنت دي بتاعة "العنوسة"


(اللهم إكفني شر الإعلاميين ..أما أعدائي فأنا كفيل بهم)





4- يا رب تهدي كل صحباتي اللي طول النهار بيتكلموا عن عيالهم (و الإسهال و الإمساك و الترجيع) ..يا رب نفسي أفطر مرة بنفس من غير ما يقلبوا معدتي..ولا يعني لازم أستحمل عشان كل واحدة فيهم عندها 3 عيال و أنا الوحيدة اللي عندها 4 بلوجات و كتاب؟




5- يا رب مافيش أي تباع ميكروباص يقوللي يا مدام..يا رب مافيش أي تباع ميكروباص يقوللي يا مدام..يا رب مافيش أي تباع ميكروباص يقوللي يا مدام




6- يا رب ما أسمعش التعليق عن أي نجاح أو أي حاجة كويسة باعملها بالقول المأثور.." طب كويس إنك لاقية حاجة تشغلك"..يا رب اللي يقولهالي يقعد يتفرج ع البيت بيتك لمدة 6 ساعات و يكون يوميها "تامر أمين " هو اللي بيقدمه ..بس خلاص..ياللا بأه ..هم اللي جابوه لنفسهم



7- يا رب البيه اللي مغلبني ده و مش راضي ييجي و لا حتى يعرفني أول حرف في إسمه و لا حتى يطلعلي في الحلم زي حسين فهمي في خللي بالك من بوزو ..يا رب يكون متشحطط زي ما نا متشحططة و متغلب زي ما أنا متغلبة ....زهقني ..زهقني..إيه الملل و اللكاعة دي ..يا رب يتكعبل دلوقتي في حرف السجادة و يتخبط في سن الحيطة و ياخد غرزتين في دماغه عشان أعرف إني بادور على واحد كان بيتخانق مع ماكنة خياطة و ما يدخلش صالون بيتنا أي عريس ما يعديش إختبار الغرز..و أخلص بأه من موضوع الصالونات ده خالص



هه..هه..هه



معلش إنفعلت شوية




عموما كل سنة و أنا طيبة ..النهاردة بأه عندي 30 سنة ..و السنة الجاية إن شاء الله ..بافكر أرجع و أبقى 29
















247 comments:

«Oldest   ‹Older   201 – 247 of 247
بـِصَمتـِـ أميرة ــــى said...

كل سنة وانتى طيبة ياغدوووودويارب تحققى كل احلامك
اختك
ملكة بحجابى

المعتصم said...

ايه ياست الدكتورة
كل دى حفلة عيد ميلاد ؟
ولا انتى خلاص طناشك لينا بقى هواية عندك؟
ولا تكونى بتطنشينا دا كله عشان التعليقات تبقى كتيرة ؟
طب ايه رايك انتى اكتبى بوست كل اسبوع وانا هظبط مع حبايبنا قراء المدونه ان كل واحد يكتبلك تعليقين
اعتقد كده مالكيش حجه اهه
تعليقات بالعبيط
بجد مستنيين ابداعك الجديد بلهفه
تقبلى تحياتى

Joe said...

المهم كل سنة وانتي طيبة
وإن شاء الله السنة الجاية تبقي متجوزة الراجل أبو غرز إللي يستاهلك

بس ماتنسيش تخلعي 3 ضروس عشان يفضلوا 32 سنة في بقك بس زي بقية خلق الله

شوفي انتي بأة، القطن بتاعك مع الغرز بتاعته
عشان تعرفو إنكو بتكملوا بعض

Anonymous said...

كويس انك بتعاملى مع الموضوع بسخرية بس اكيد طبعا لسه عندك الرغبة فى الجواز و ده اهم حاجة فى الانسان المثابرة

و فعلا فى الاول و فى الاخر ده نصيب من عندنا ربنا و المولى عزل وجل هو الادرى بالاشياء المناسبة للانسان فتأكدى ان الله اختار لك الافضل

و ان شاء الله نحضر الفرح قريب جدا جدا جدا

مواطن مصري said...

كل سنة و انتي طيبةةةةةةةةةةةةةةةةةةةةةةةةةةةةةةةةة

Anonymous said...

kol sana wnty tyba ya pride we 3o2bal 10000 sana....why did you stop writting???why did your activity weaken??
i'm opening your blog everyday trying to find something new which will be wonderful...
i feel that you are depressed of something that get you away from having jokes and funny writtings...i dont know if my feelings are true or you are just busy to write...but plz be back with you funny perfect and unique spirit KHADA....

Anonymous said...

انا مشتاق للتدوينه الجديده امتى بءه اوف اوف انا منتظرها على احر من الجمر والله بجد مش بهزر فعلا انا منتظر تدوينتك الجديده شحات على الابواب

Anonymous said...

الإستاذة غادة
أو برايد
(حضرتك)
شخص مميز جدا يرغب الجميع في أن يعرفه أو أن يكون بجواره

المدونة رائعة جميلة معبرة مكتوبة بطريقة سلسلة تعبر عن مشاكل واقعية في شكل فكاهي وفي الحقيقة هي لا توصف إن أردنا تقييمها فقط يجب أن ننظر للمعجبين بها

وفقك الله
و رزقك بما يسعدك ويجعلك تقرين عينا في الدنيا والآخرة

Anonymous said...

http://www.youtube.com/watch?v=nKRFqao-e0k

كل سنة و انتي طيبة


gam3etna.net

Anonymous said...

يا غادة الانسان مش بالعمر لا والله بالنضج والكمال وانتى جميلة وناضجة ومش تنسى ان عمرنا بيتحسب بالحظات الجميلة بس اللى عشناها وحنعيشها مش بكترة السنيين وعلى فكرة عمر الثلاثين اجمل عمر للانوثة والدلع يا جميل\\بسمة مسلم شفتك فى الشرقيةhttp:\\hamssat.blogspot.com

Anonymous said...

awalan ....happy Bday walw enha late shwia...
sanyan....matez3alesh awy men 30 ana hkamel 33 after 2 months....we bardo ana doctor and sa7bet sha5-sya kawia..hehe
we mstanya el pasha lama yegy bas aslo gay rakeb gaml....we mesta7-lefalo lama yegy m5aleny astna kol da..!!!???
ye3ny fe elhawa sawa

Sumaya Rabie said...

يا ستي كل سنة وانتي مبدعة وكلامك بيمس الجلب
بس أكيد إحساس الـ 30 مختلف
كبرنا بقى وبقينا عاقلين خلاص
عقبال ألف سنة في تميز وروعة
وسيبك انتي
الشباب شباب القلب برده
:D

Anonymous said...

كل سنه وانتي طيبه ياقمر والسنه اللي جايه احلى من اللي راحت
وتحققي كل اللي نفسك فيه

Anonymous said...

مالها الثلاثين أنا بقالى خمس سنين عندى ثلاثين ومحصليش حاجه

أمير الثرى said...

من كام شهر كنت بقرا كتابك و كنت معجبة جدا بيه
انا اصلا كنت بدور علي اى حاجة تسلى وحدتى بالقراية و خصوصا في موضوع الع....بس خلاص انا ما بقتش بدور لانى و الحمد لله هربت من سجن الوحدة و دخلت سجن الارتباط.. اوففففففف مش مهم
المهم كل سنة و انتى طيبة و سورى انها متاخرة
علي فكرة كان نفسي كتير اعلق او اتكلم معاكى المهم اوصل لك اعجابي بيكى بس انا دايما بفضل اخد الجانيب اللى ف الضل و اعبر عن اعجابي من بعيد علشان اجنب المعجب بيه وجع الدماغ و كتر التعليقات
بس اصريت انهاردة اعلق و اقوللك كل سنة و انتى طيبة لسبب مهم جدا
انى اكتشف ان يوم ميلادك هو نفس يوم ميلادى .. و كل سنة و انتى طيبة

utopia said...

كل سنة و انتي طيبة و يكتبي اكتر و اكتر

Anonymous said...

يلا اضحك كركر ويلا عيش متقولش بقى عندى تمانيه ولا تلاتين
لما الصبح بيطلع محدش بيشوف الليل
ولما العيد بيجى بننسى اننا كنا صايمين
بكره الشمس هتنور ليلنا
والضحكه هتملى قلوبنا
والمتنيل هيجى بسرعه
يلاحقنا قبل الخمسيييييييييين
كل سنه وانتى طيبه ياقمر

zazooo said...

بصي يا غادة أنا عايزة أقوللك في واحدة صاحبتي دكتورة ومواليد 78 زي حالاتنا كانت بتقول ان دفعة 78 واخدة اعفا من الجواز في واحدة تانية قالتلي قبل التلاتين بتبقي قلقانة بعدها ولاااااااااااااااااا حاسة بحاجة

Anonymous said...

بجد فعلا انتي كتابتك وهمية .. و كل سنة وانتي طيب طبعا دي متأخرة بس لحد ما قريت البلوج بقي نعمل ايه
بس غريبة وشك مش باين عليه السن !!!!ههههههههههههههههههههه

Anonymous said...

Joyeux anniversaire la miss :)

J'ai adoré ton article. Bravo :)

ألـــــــوان الحيــــــــاة said...

كل سنه وانتى الى الله اقرب وعن معصيته ابعد وعلى طاعته ادوم ويارب تحققى كل ما تتمنين

تحياتى

Rannon said...

كل سنة وانت طيبة
كل سنة وانت شخصية جديرة بالاحترام:)ـ
موضوع تحفة وفكرة جميلة لموضوع عن عيد الميلاد

بس عندي سؤال بيخنقني
لو تامر أمين قرا البوست ده وجت الطوبة في المعطوبة وعمل معاك حوار عالهوا سالك فيه ليه دعيتي بالدعوة دي هتقوليله ايه :))وافتكري انك عالهوا :))

كل سنة وانت طيبة يا برايد :)

تحياتي

Anonymous said...

كل سنه وانتى طيبه يا قمر مع انها نتاخره شويه انا مبسوطه انى عرفت حد مولود 21-12 غيرى
انا مكنتش بدخل على المدونه الفتره الى فاتت لاسباب نتيه بحته فعايزه اسالك ايه موضوع (كنت) ده انتى خلاص بعتى القضيه ولا ايه

Anonymous said...

كل سنة وانتِ طيبة وربنا يرزقك بالزوج الصالح اللي يراعيكي ويتقي ربنا فيكي دمك خفيف جداااا ما شاء الله عليكي اول مرة اقرأ ليكي حاجة بس ان شاء الله مش هتبقي اخر مرة

Anonymous said...

السلام عليكم ورحمة الله وبركاتة
أولا انا اول مرة اعلق على الكدونة بتاعتك لكن اسلوبك جميل اوى ويشد و فعلا مضحك ... وربنا يستجيب دعائك و يرزقك ابن الحلال اللى تستاهلية ..
على فكرة انا متزوجة حديثا وانا هكمل 25 سنوة كمان كام يوم لكن مش عايزة اقولك الناس اللى انتى بتتكلمى عنهم زهقونى اد ايه ... يعنى انا ماكنتش بفكر فى الزواج لكن كل اللى حواليا اول ما يلاقونى متضايقة من غير ما يعرفوا السبب يفتكروا انة علشان انا ماتجوزتش وتبتدى جمل المواساة تظهر ولو حاولت اشرح ان مش ده السبب انشى ان حد يصدقك ... ده انتى بتحاولى تخبى .. والحمد لله الذى لم يطل انتظارى وادعوا الله الا يطيل انتظارك ويرحمك من كثرة الكلام اللى لا بيودى ولا يجيب .

صمت المشاعر said...

كل سنه وانتي طيبه وعقبال مية سنه

وتكوني اتجوزتي وبقي عندك 77 عيل

ســـارة said...

حقق الله أمنياتك الطيبات :D

وكل سنةوانتي طيبة يا برايد

good4u said...

موضوع جميل انا قريته من زمان وكان نفسي انقله منك بس انشغلت وبعدين المهم انا نقلته علي لسانك
ربنا معاكي هههههههه اقصد
عاوزين نسمع عنك سمع خير صحافه
تليفزيون
او حتي راديو
اكيد هتكون مشهورة في يوم من الايام
سلام

Unknown said...

الف مبروك عقبال الالف

Anonymous said...

ربنا يكرمك بابن الحلال اللى يعوضك عن اللى فات
ويزوج كل بنات المسلمين ويسترهم
انتى مثال للبنت الناجحة

Eman Rashad said...

انا اسمى ايمان .... بس مش بنت بياعة الفراخ طبعا ههههههههههه

المهم انا شايفه ان كلنا لها
20....25...30
ديه بأه الخطة الخمسية المتعارف عليها عندنا و ياا ريت الناس تسيب البنات فى حالها باه هو احنا طماطم و العرسان بينقوا و اللى متتبعش بتتعفص و تبوظ فى الاخر... ارحمونا بأه ده كله بأمر الله

همسة ايمان said...

موووووووووووش عارفة هاتشوفى التعليق دة ولا لا

بس نفسى اوى ااقوك كل سنة وانتى طيوووبة وكل عام وانتى الى الله اقرب وعلى طاعته ادوم وولاسلام والمسلمين زخرا

مدونتك رائعه ودمك شربااااااااااات

MariannE_N said...

عزيزتى برايد
أنا فعلا سعيده جدا بقرايه البلوج بتاعك
أنا سمعت عنك من واحدة صاحبتى أوى قرت الكتاب بتاعك بس أول ما قالتلى على اسمه جالى احساس بالرفض انى اقراه، ليه؟ لانه هايقلب عليا مواجع صعبة جدا
انا كمان اتمرمطت بجد اتمرمطت عاطفيا ونفسيا وعقليا من جواز الصالونات ده
بس بعد ماقريت البلوج بتاعك عرفت انك بتعبرى عن الواقع المرير جدا بأسلوب ساخر جدا
ممكن ابانلك طفله او غبية بس بجد اسمحيلى اقول لك انى حبيتك جدا كشخصيه واحترمت جدا عقليتك واستمتعت بأسلوبك البسيط الساخر اللى يفطس من الضحك وبيعبر عن ناس كتيييييييير اوى

فيه حاجة يابرايد خدت بالى منها ان حتى فى بلاد بره عندهم نفس المشكلة يعنى اه البنات ممكن تتعرف على شباب قبل الزواج بس بعد كده بيعانوا من عدم التزام الشباب وانهم مابيتجوزوش
الموضوع بس ظاهر فى مصر شوية لانهم بيركزوا على البنت
أنا بردو كاتبه حاجة عن جواز الصالونات فى البلوج بتاعى بعنوان "اللعنه" وهو مسلسل من 4 أجزاء بجد يشرفنى لو قريتيه
هو طبعا مايتقارنش باللى انت كاتباه بس محاوله منى انى اعبر عن اللى حصل لى

كل سنه وانتى طيبة يا برايد :-)

Anonymous said...

عيد ميلاد سعيد، عارفة إنها متأخرة فإنت الآن كملت 31،
عقبال مائة سنة.
لكن ليه ما تكتبيش حاجة في المدونة من شهور، اكتبيلنا على الأقل أخبارك إيه، أنا عارفة إنك بتضايقي لما يسألوك ليه ما بتكتبيش لكن قصدي بس أطمن على أخبارك.
إوعي تكوني اتجوزتي واحنا مش عارفين.
أنا عرفت في معرض الكتاب هنا في أبوظبي إنك وصلت الطبعة 24، ألف ألف مبروك وعقبال الطبعة 50
، لا، عقبال الكتاب الخمسين.
أنا اشتريت كتابك لما زرت مصر السنة الماضية واشتريت كمان كتابي غادة محمود ورحاب بسام،
حبيتهم قوي كلهم.
وقولي لي، هو صحيح في مسلسل بيتعمل ليكي.
يالله بقى قولي لنا االأخبار وأغلقي باب الإشاعات.
التوقيع، سناء قارئة مغربية متحمسة ليك لأن كل كلامك بيمس القلب من جوه

ملتقى يمانيون said...

الله يوفقك دنيا واخرة

احمد على المصرى said...

بجد دمك خفيف كنت اتمنا اتجوز واحدة زيك دة تبقى امى دعيالى او دية عليا

wyaah for internet service said...

عقبال 100 سنه



www.wyaah.com

Unknown said...

كل سنة وانتى طيبة
والسنة الجاية إن شاء الله هتكونى فى بيت العريس
أدعوكى أنتى والزملاء لزيارة مدونتى المتواضعة

www.atefelgohary.blogspot.com

ويشرفنى اشتراككم فيها

Unknown said...

كل سنة وانتى طيبة
والسنة الجاية تبقى فى بيت العريس ان شاء الله
ويسعدنى أ، تشرفرفونى وتزورو مدونتى المتواضعة
Atef.Elgohary.blogspot.com

dandouna.hisham said...

كل سنه وانتى طيبه
وان شاء الله السنه الجايه تكونى متجوزة متهنيه فى بيتك ياااااااااااااارب

حبات التوت said...

ياترى عريسك اللى لسة مانعروش بيعمل اية دلوقتى ياغادة
بتعمل اية ياخويا زمانة جى بس هة تاه فى السكة
انا بقول كدة لنفسى هيروح منى فين يعنى
او مزنوق فى الحمام او بيلعب بلاى ستيشن مع صحابة واتاخر
او راحت علية نومة


كل سنة وانتى طيبة يارب ان شاء الله ايامك كلها اللى جاية فرح وهنا يارب

رحمه خشبه said...

اسال الله العظيم ان يرزقك الزوج الصالح ويرزقني ويرزق كل بنات المسلمين

Monis said...

بصراحة ، وبدون مجاملة ، هقطع في فروتك بشويش :-) أنا بصراحة بحس نفسي من الاذواق صعب ارضاءها في الكتابة ،وبلاقي تفاهات كتيرة بتتكتب لا تحمل اي معنى ولا اي ايحاء حتى ،تشربي ست سبع ثمن عشرطعشر (20) كوباية شاي وقهوة وبردو متفهميش حاجة وانتي بتقرأيها ،بس بصراحة أكتر (مش هكذب زي ما قال تامر حسني ) البت اول ما تقلك بصراحة يبقى بتكذب :-) لالا مبكدبش ، كلامك حلو جدا ، واسلوبك الساخر ده رائع وتحسي كدة بمتعة وانتي بتقرأيه ، دحكت مرة واتنين وعشرطعشر بردو اها عشرطعشر ،بصي كان عندي فكرة فيلم كوميدي ساخر جديدة موت ، ممكن لو وصلتهالك تعرفي تصيغيها باسلوبك احسن من عشرطعشر :-) حد زيي :-)
تحياتي

Monis said...

بصراحة ، وبدون مجاملة ، هقطع في فروتك بشويش :-) أنا بصراحة بحس نفسي من الاذواق صعب ارضاءها في الكتابة ،وبلاقي تفاهات كتيرة بتتكتب لا تحمل اي معنى ولا اي ايحاء حتى ،تشربي ست سبع ثمن عشرطعشر (20) كوباية شاي وقهوة وبردو متفهميش حاجة وانتي بتقرأيها ،بس بصراحة أكتر (مش هكذب زي ما قال تامر حسني ) البت اول ما تقلك بصراحة يبقى بتكذب :-) لالا مبكدبش ، كلامك حلو جدا ، واسلوبك الساخر ده رائع وتحسي كدة بمتعة وانتي بتقرأيه ، دحكت مرة واتنين وعشرطعشر بردو اها عشرطعشر ،بصي كان عندي فكرة فيلم كوميدي ساخر جديدة موت ، ممكن لو وصلتهالك تعرفي تصيغيها باسلوبك احسن من عشرطعشر :-) حد زيي :-)
تحياتي

ساعد الاسماعيلي الايمن said...

كل سنة وانتي طيبة يا أنسة علا يوووووة قصدي ياأنسة غادة وعلي فكرة انا حاسس بيكي جدا وبالشعور ال جواكي بعد ما وصلتي للتلاتين لأن أن عمري هيكون واحد وثلاثين سنة بعد أقل من عشر أيام تقريبا مش عارف ليه ما بين ال29 وال30 مش سنة لاء تحسي أني في جاب كبير اوي بينهم ودة طبيعي لأن دةفرق بين عقدين بس عادي المهم الروح ال جواكي وأنا شايفك بسم الله ماشاء الله جواكي روح بحسدك عليها بجد ربنا ويحميكي ومن نجاح لنجاح بأذن الله وأبشرك أن سن ال 31 هوة سن الجواز دلوقتي ودة عن تجربة بس يتري لو أتجوزتي ايه هوة الاسم الجديد ال هتسميه للمدونة

kadham said...

حلوه الله يخليك

مناهج مصرية said...

السلام عليكم
كنت ابحث عن مدونتك منذ مدة طويلة ويسرنى دائما التواجد للقراءة والاستفادة والى الامام دائما ان شاء الله

«Oldest ‹Older   201 – 247 of 247   Newer› Newest»