Sunday, August 17, 2008

حيوا أم الفصاد






و لا كنت اتخيل أبدا أول مابدأت البلوج ده ..إن الموضوع هيتنطور بالطريقة دي..أولا فكرة إني اكتب في حاجة واحدة


سنتين ..ثانيا الزوار اللي الحمدلله بيزيدوا مابينقصوش..و قبل كل ده الكتاب و اللي جرى مع الكتاب و بسببه

سنتين إستثنائيتين بكل المقاييس

حاجة كده زي زلزال جه قلب حياتي رأسا على عقب ..من بنت قاعدة في حالها متحصنة خلف شاشة الكومبيوتر و حاطة بينها و بين الناس سدود و متاريس ..لواحدة بيتضرب بيها المثل في الجرأة(لغاية دلوقتي مش فاهمة ليه) و الشجاعة (أموت و اعرف مين اللي زقني) و الصراحة (مع إني و انا صغيرة كنت باحب الكذب بالظبط زي مرتضى منصور ما بيحب الخناقات)

و أصبح ناس كتير جدا بيبصولي على إني باتكلم بلسانهم ..مش بس في مصر ..لأ كمان في الهند و باكستان و بانجلاديش

و النعمة ماباهزر لسه الأسبوع ده ال بي بي سي عملت موضوع على موقعها لينكه أهه

http://news.bbc.co.uk/2/hi/middle_east/7554892.stm

و بعدها سيل من الرسايل من ال3 دول دول بالإضافة ل 2-3 هنود عايشين في أمريكا بيقولولي نفس الموضوع عندنا و إنتي بتتكلمي بلساننا (إستنوني في فيلمي القادم مع أميتاب)


البنت المقهورة المظلومة اللي عايشة في شرنقة لوحدها بقت كل يومين في محاطة و كل 3 ايام في حوار و مع كل الشهرة بيجي القلق و الخوف و ألف حساب لكل كلمة بتتكتب و سؤال بيدور في الدماغ كل يوم عن المستقبل ..يا ترى ده الطريق ..والا مجرد شمعة و هتهب عليها شوية هوا و تنطفي؟
لكن دايما تشجيعكوا هو الفيصل و الدافع للأمام
تشجيعكوا ليا كان وهمي و غير طبيعي ..الناس اللي بتقرا أول بأول و مع ذلك إشتروا الكتاب و بيعملوله دعايا في كل مكان..و الناس اللي اشترت الكتاب و بعدين دوروا ع البلوج و على حساب الفيس بوك عشان يبعتوا يقولوا قد إيه هما مبسوطين

و الناس اللي بتحضر حفلات التوقيع و المناقشات
(خصوصا اللي كانوا جايين يتفرجوا و يقولوا ما هي حلوة اهه امال إيه؟
:))

أشكركم و اعترف بالجميل ..كل حد كتبلي كلمة قبل نشر الكتاب فهو شريك ليا في النجاح ..كل حد كتبلي كلمة بسبب الكتاب ..فهو شريكي في الكتاب الجاي (نجح بقه والا لأ ..كله على وشكوا ماليش دعوة )
الناس اللي بتبعت ميلات تشجع و تناقش و تنقد و المشاركين و المشاركات في بيت العرايس و العرسان

كل الناس المحترمين اللي عرفتهم عن طريق المدونة..الناس اللي قابلتهم شخصيا و الناس اللي لسه نفسي أقابلهم بجد
54
موضوع



4813
تعليق



263000
زائر


و مئات الإيميلات



تفتكروا هيمر عيد تالت على المدونة ؟

أدينا مع بعض..و بكرة نشوف

مع إنه كله من عمرنا و الواحد بيكبر مع الأيام ..و ده طبعا مش كويس مانتوا عارفين ..لكن دايما بجد بجد يشرفني إني أكبر و انا وسطكوا و انتوا حواليا

ياللا ..أنفخوا البلالين


--------------------------------------------------------------------
شكرا لأول اتنين إفتكروا عيد ميلاد المدونة -
محمد كمال حسن
و
ساعد نسرين الأيمن

------------------------------------------------------------------
بمناسبة العيد الثاني للمدونة و صدور الطبعة الثالثة للكتاب ..إتفق جروب "محبي مدونة عايزة اتجوز" على مقابلة يوم الجمعة 22 الساعة 3 في حديقة الأزهر للإحتفال بهذه المناسبة الوطنية الجليلة و بناءا عليه إعتبار اليوم إجازة رسمية لجميع المصالح الحكومية
اللي فاضي يجي يحتفل معانا

بس النظام إنجليزي عشان نبقه واضحين

كل سنة و انتوا طيبين

72 comments:

Rannon said...

هيييييييييييه انا او واحدة تعلق وتقول هابي بيرث داي للبلوج:))

زي ما احنا شركاء ليكي يا غادة انت كمان فرحتينا كتير وضحكتينا كتير وبكتينا وأسعدتينا واتكلمتي عننا
انا من اللي حبوا المدونة اللي وقعت في طريقهم بالصدفة وحبيت الكتاب وعملتله دعاية(عايزة عمولة) مش عشان هو كتاب غادة لكن عشان الكتاب على قد ما بيضحكنا على قد ما بيوعينا وبيفتح عينينا على حاجات كتير
بجد بحييك عالكتاب وعالمدونة وان شاء نباركلك بنجاح الكتاب التاني والتالت
ونحتفل معاك ومع أولادك بالسنة الخمسين للبلوج

كل سنة وانت طيبة والبلوج دايما مليان ناس بتحبه وبتحبك

تحياتي :)

Moustafa` said...

مبروك علينا وكل سنه وانتي طيبه

عدى النهار said...

مبروك :) كنت قرأت الموضوع على بي بي سي من يومين وفرحت لك حقيقي
ربنا يوفقك

Unknown said...

كل سنه وانتي طيبه ومدونتك طيبه يا غدغود
وفي انتظار الكتاب التاني ان شاء الله
ودايما يارب من نجاح لنجاح
حاسه بفرحتك يا جميله
نفسي اجي احضر معاكي اليوم ده بس للاسف النطبشيات وما ادراكي
كل سنه وانتي طيبه يا ست البنات

A long distance said...

كل سنه وانتي طيبه
ويارب كده دايما في تالق مستمر
ونسمع عنك دايما اخبار حلوه
mrgkiller2020

Mahmoud البطراوى said...

عقبال مليووووووووون سنه بس تبقى المدونه خلاص اتجوزت
:D
ربنا يسعدك يااااااارب

فاتيما said...

كل سشنة و المدونة بخير
و صاحبتها بألف خير
و زى ما بيقول بطوط حبوب العزيز
تكون أنا إتجوزت
على وزن أنا إتجلبت
و مش هتفرق كتير قوى يعنى فى المعنى
كل سنة و إنتى من نجاح لنجاح يا ست البنات
تحياتى الخالصة ليكى يا حبيبتى

Qabbani said...

سبحان الله :)

الي تقريبا سنة و 8 اشهر متابعة مدونتك :)

كيف بتتغير الأمور :)
تحياتي لك

واذا زرت مصر مع المدام منشوفك :)

فتافيت سكر said...

الف مبروووووووك
وكل سنة وانتي طيبة يابرايد ودايما كده يارب ناجحة

انا قريت الكتاب وحبيته جدااااااا وضحكني جدا من قبل ما اعرف البلوج حتى

اتمنالك كل الخير والسعادة

yasmeen

Rasha Elkheshin said...

كل سنه و انتي طيبه و مدونتك دايما مشوقه و عقبال السنه اللي جايه و عقبال الكتاب الجديد ان شاء الله اللي مستنياه من ساعة ما الكتاب انا عايزه اتجوز اطبع

ربنا يكرمك و يوفقك دايما
عجبني اقتراح خلاص اتجوزت حايبقي جامد و حتلاقي مواقف كتير في الجواز تبكي و تضحك في نفس الوقت و دا مجرد اقتراح

شكرا علي وقتك

Pink Unicorn said...

كل سنة وانتى طيبة يا قمر
و كل سنة و المدونة بخير و على رأس قائمة اشهر المدونات و أجملها

ويارب السنة الجاية و احنا بنحتفل بالعيد الثالث نحتفل بالكتاب الثانى و الثالث والرابع

ربنا يوفقك دايما
ومن نجاح لنجاح بإذن الله

انسانةعادية فى عالم مش عادى said...

ربنا يسعدك يارب فعلا اجمي مدونة شفتها بحب جدا اجى كل يوم اقرا المواضيع فيها واعيد وزيد فى قريتها انتى فعلا بتتكلمى بلسان ناااااااااااااس كتييييييييييير اوى ان شاء الله السنة الجاية تكونى فى بيت العريس وان شاء الله المدونة تستمر طول السنين الجاية

maiosha said...

كل سنة وانت طيبة يا برايد وعقبال مليوووووووووووون سنة

وإن شاء الله هنحتفل مع بعض برضة بعيد ميلاد المدونة التالت والرابع والخامس والعاشر كمان

يالا حالا بالا بالا هنى ابو الفصاد .. واك واك

Anonymous said...

بجد ياغاده كل اللي قولتيه ان نجاحك ده
احنا بجد فرحنا بيه كانه نجاحنا احنا
وياااااااااااارب ياغاده من نجاح لنجاح دايما نشوفك وربنا يسعدك وتفضلي تمتعينا بكتاباتك دايما
كل سنه وانتي والمدونه دايما طيبين

فلفساتي said...

مبروك وعقبال العيد ال20
انا علي فكرة بحب مدونتك جدا و بتمنالك النجاح كمان و كمان

زبادي said...

happy birthday :)
عقبال ميت سنه من التميز
أنا حبيت مدونتك جدا و نفسي أشتري الكتاب بس مش موجود برة مصر .. امتى تحطوه على إي باي ؟
:)))))

قلب بلا حب said...

كل سنه و البلوج طيب :)
وعقبال 1000000000 سنه :)
يل ريت يكون لشباب اسكندريه جانب من الاحتفال بالعيد الوطنى ده
يا ريت يا غاده تيجيلنا اسكندريه و اوعدك ان النظام مش حيبقي انجليزي
حنتكفل باللي تطلبيه .. علي قد منستحمل :D
اوكى .. و متغيبيش عالينا بمواضيعك

Anonymous said...

كل سنة وانت متألقة في عالم التدوين بتوفيق إن شاء الله

موناليزا said...

كل سنة وانتى طيبة

Anonymous said...

مبروووووووك وكل سنة وانتي طيبة يا برايد
ودايما في نجاح وتألق
يارب

aboooood said...

في الأول أقولك كل سنة وإنت طيبة وعقبال عيد الميلاد اللي بعدة واللي بعدة وبعدة......
وأنا هكون أول الموجدين في الحديقة دة مكان بحبة أوي ونفسي أشوفك جدا ..
ومشتاق لكتبك اللي جاية
ومين عارف ممكن تنافسي (يوسف معاطي) وتكتبي ل(أحمد حلمي).....
ياأجمل عروسة في 2009 إنشاء الله ..
قولي إنشـــــــــــاء اللـــــــه

صاحب المضيفة said...

جميل نظرتك المستقبلية دي وانك تعرفي هدفك وطريقك بكرة شكله ايه ؟؟


بجد


انا متفق معاكي في كلام كتير قولتيه وربنا يسعدك يارب ويكتب لك الخير حيثما كنتي ويرضيكي بيه ويصرف عنك السوء بما شاء


تحياتي ودعواتي

Anonymous said...

من بوسطن - امريكا اصدق التهاني بعيد ميلاد المدونة و ان شاء الله السنة القادمة تحتفلي بالعيد الثالث للمدونة و انت مدام غادة
انا اتعرفت علي المدونة من فترة قصيرة و لكني اصبحت مداوم علي قراءتها من شدة اعجابي بها

Anonymous said...

يا بنت الناس انتي مش ناوية تتجوزي بقي ولا ايه، صيدلانية مغمورة في المحلة و مش ماشي حالك، عملتي كتاب أخضر زي بتاع القذافي في ليبيا و اشتهرتي و برضه حالك مش ماشي؟؟؟؟؟ تفتكري العيب في مين يا ست الدكتورة!!!! أنا كنت ماشي في كارفور أبو ظبي و شفت الكتاب بتاعك، كان في منه يجي 10 نسخ ولا حاجه و كان اول مره اشوفه علي الطبيعة، فتحته عشان أشوف اللي فيه زي هرتلة المدونة ولا لا و بنظرة سريعة لمدة ثواني عرفت انها نفس الهرتلة، واحد صاحبي أردني كان معايا و سألني ليش هالكتاب بالذات مسكتة؟؟ قلتله لا دي قصة طويلة و متشغلش بالك انا بس حبيت اتأكد من حاجة و سبت الكتاب و مشيت، علي فكرة يا دكتورة أنا مرة واحد صاحبي قالي كلمة حكمة، قالي البنات الكويسة مبتقعدش، و طبعا أنا هنا مش قصدي حاجة لا سمح الله، بس كان قصدوا البنات اللي من ابو آخر في كل حاجة، و علي فكرة انا و هو دفعة ثانوي من زمان، و احنا الاتنين عندنا 28 سنة، و احنا الاتنين خاطبين بنتين من نفس العمر 20 سنه، و البنتين احنا كنا أول اتنين عرسان نتقدملهم، ماهو انتي عارفة ان المرأة تنكح لأربع و أكيد عارفاهم، علي ما أعتقد ان أم الفصاد لازم تلين دماغها شوية عشان حتي لو السبعين مليون عريس اللي اتقدمولها قبل كده وحشين ف ام الفصاد برضة مش سيدة نساء الارض، حسيتي ان باعت الرسالة أضايقك؟؟؟ بالعكس بحاول أفوئك، مش حتقتنعي بكلامي، ما انا عارف ما هو انتي لو بتقتنعي بكلام الناس كان زمانك بقيتي أحسن من كده، حتقولي طب بتدخل ليه عندي، والله هي كل شهر أو اتنين مره عشان أدخل و أتأكد ان مفيش جديد و دايما كان عندي حق لما قلت ان بتهرتلي علي الناس، و آخر حاجة عاوز أقولهالك في عيد ميلاد مدونتك الثانية، كل اللي بيهللولك و يهيصولك و يصقفولك دول و رافعين معنوياتك في السماء، المتجوزين منهم بيناموا في حضن بعض و انتي بتنامي في حضن مخدتك، المخطوبين منهم بيناموا علي مكالمة تليفون آخر الليل و انت بتنامي علي صوت راسك اللي بتزن من التفكير، و المتصاحبين منهم اديهم بيتسلوا و بكرة يكبروا و انتي بالنسبه ليهم مش حتكوني اكتر من زكريات زمن جميل، فوئييييييييييي عشان الناس دي مش حتنفعك، و علي فكرة انا عارف طبعا ان الرسالة دي مش حتتنشر، ما هو انا اساسا مش عاوزها تتنشر، انت المعنية مش قرائك

محمد عبد الغفار said...

ربنا ييدى الصحه وطولة العمر وراحه البال

wanna b a bride said...

التعليق اللي فات مثال جيد جدا

لناس يمكن ربنا كرمها بأنها تلاقي نصها التاني و من منطلق ده فرصة إنهم يجرحوا في ناس تانيين لمجرد إن ربنا لسه ما أرادش إنهم يلاقوه

منطق إن أي واحدة لسه ما اتجوزتش يبقى فيها "عيب" و أي واحد برده..ما الكلام للطرفين


يا سيد يا محترم

إنت عارف بالكلمتين اللي انت كتبتهم دول أذيت كام واحدة و كام واحد في كام حتة في العالم؟

عارف لمحت بإيه و ده عقابه عند ربنا قد إيه؟

عارف إن انا عارفاك و عارفة إنت مين بالظبط و قبل كده قلتلك مافيش داعي تيجي المدونة دي تاني عشان أسلوب السم في العسل بتاعك ده غير مرحب بيه هنا


بتنصحني؟

شكرا يا فندم على النصيحة بس لما النصيحة تيجي من حد قلبه صافي و أسلوبه محترم يبقى أهلا بيها


لكن لما تيجي من حد قلبه ...و مابيتقيش ربنا في الكلام اللي بيخرج من لسانه

يبقى شكرا

خليهالك

و شكرا على تهنئة عيد الميلاد

Mafrousa said...

كل سنة و مدونتك طيبه و بخير
ياتري سننت و لا لسه؟؟؟
طلعلها سنان؟؟؟؟
و بتأكليها سريلاك؟؟؟
هههههههههههههه
كل سنة و انتي طيبه و عقبال السنة التالته و الرابعه....لغاية لما تخلص جامعه و تجوزيها و تشوفي عيالها
ههههههههههههههههههه
اما بالنسبة لحديقة الازهر؟؟؟؟!!!!!
ممممممممم
نظام انجليزي....مش بحبه انا بحب اتعزم
يعنى نظام ابو بلاش
ههههههههههههههههه
رمضان كريم

Rannon said...

ردا على التعليق المجهول الاسم

اسمحيلي يا غادة ارد عليه بكلمتين واقفين في زوري

مين اللي قالك ان البنات الكويسة مبتقعدش؟؟ بالعكس بقى أكتر نسبة بنات بتقعد هي الكويسة وده مش بس كلام..ده عن واقع احنا البنات عارفينه كويس قوي..لأن البنات بتفهم البنات اللي زيها..ومفيش واحدة كويسة بتزعل للي مش كويسة لما تتجوز بالعكس بتقول ربنا هداها..وعارف ليه الكويسة مبتقعدش؟؟عشان الكويسة مبتعرفش تلف وتدور بس عشان توقع عريس..لأنها بتبقى عارفة انها تستاهل الاحسن دايما ومستنياه بطريقة صح ومش مهينة لا لكرامتها ولا لسمعتها..مش عايزة تتجوز لمجرد انها عايزة تتجوز فتقوم تجري ورا أي حد..لكن عايزة تبني حياة صح مع انسان يحبها وتحبه ويحترمها وتحترمه ويبقوا متفاهمين...يعني مش عايزة تخلص و تقول أهو ضل حيطة..
انا طبعاً مش بعمم..
ويمكن انا مش كبيرة قوي..بس من اللي بيحصل حواليا وبشوفه..ولما ألاقي ان محترمين كتير كبروا ولسة نصيبهم ماجاش ولسة زي ما هم ميأسوش من احترامهم لنفسهم وللناس ومبيجروش ورا اي فرصة لمجرد انهم يخلعوا من اللقب الخالد..وبنات تانية ربنا يحمينا وما نبقاش زيهم..كان فيهم وفيهم..بس بيعرفوا ازاي يكدبوا ويألفوا ويمثلوا ويترسموا عشان بس يتجوزواومش مهم مين المهم انهم اسمهم اتجوزوا..لما بشوف ده وده بقول انا عندي أفضل ثابتة على قراري باني يا إما آخد اللي يستاهلني وأستاهله حتى لو صبرت كتير ولا اني اتجوز لمجرد اني خايفة من كلام الناس..وعلى فكرة مفيش بنت مبيجيلهاش عرسان بطريقة او التانية.زبس في واحدة بتوافق على أي حد وفي واحدة بتشغل مخها ومع الاسف الرجالة مش بتحب الست اللي بتشغل مخها..واحنا بقى مستنيين اللي بيحبوا اللي بتشغل مخها وبيحترموها حتى لو اتأخرنا على ما نلاقيهم..مش هتفرق آخد أي حد زي ما ماخدش حد...

وعلى فكرة انا مرة واحد قالي..اللي زي غادة دي نحترمها آه ونعجب بيها وبدماغها آه ونقف جنبها آه ونشجعها آه لكن صعب نفكر نتجوزها ولما قلتله ليه..قالي عشان دي بنت دماغ..ودماغها كبيرة..الواحد يخاف يقرب منها..لأن الراجل الشرقي بطبيعته بيحب الست تكون تابع ليه واغبي وأضعف منه مهما اعترف بذكاءها..وطبعا اللي يفكر كدة..يبقى تفكيره يخليه لنفسه طالما هيجيبنا لورا
وزي ما قلت ىخد أي حد زي ما ماخدش حد..وان شاء الله ربنا هيكرمنا في الآخر ..

معلش يا غادة طولت وخرجت عن الموضوع بس أهم كلمتين محشورين في زوري..لأن في ناس كتير مش فاهمة ولا حاسة باللي بيحصل حواليها بس عايزة تتكلم وخلاص

احنا معاك يابنتي وانا من الناس اللي بتحترمك وبتحترم دماغك جدا جدا ويارب يارب تقابلي الشخص اللي يستاهلك وتستاهليه..
ويارب يهديك ويهدينا لطريق الخير

تحياتي

Anonymous said...

بجد بهنيكى وكل سنه وانتى طيبة يا احلى برايد ف الدنيا وعقبال كل سنه وانتى منورة بكتاباتك وباحساسك باللى حواليكى ...........أما بالنسبة للناس اللى مش بيفهموا فانا معاكى ان الاحسن انهم ما يشرفوناش تانى لأن نجاحك باين لاى حد وعلى فكرة الناس لما بتقول على حاجه حلوة عمرها ما بتجامل حد ولو كان حد عايز يجاملك كان هيبقوا واحد اتنين عشرة بس مش العدد الهايل ده ربنا يوفقك ويديم عليكى النجاح .....ده انتى كفاية انك من المحلة بلديات جوزى يعنى كنت فاكرة انهم اجدع رجاله طلع بياتهم كمان اجدع بنوتات ف الدنيا
إلى الأمام يا دودو وكل سنه وانتى طيبه
دينا

أكون أو لا أكون said...
This comment has been removed by the author.
Anonymous said...

السلام عليكم ورحمه الله وبركاته
ردا عليAnonymous Anonymous said.
عاوزه اقولك ان ياما فيه بنات زي الفل بيتاخروا في الجواز وبنات زي ال........
وبيتجوزوا بدري ديه مش قاعده
وتاخير الجواز ده مجرد ابتلاء من عند ربنا زي اي ابتلاء
وهو نوع من انواع ضيق الرزق
زي قله الفلوس مثلا هل معنها ان الفقير ده واحد مش كويس علشان ربنا منع منه حاجه
بالعكس اذا احب الله عبدا ابتلاه
بجد ربنا يهديك

blue-wave said...

كل سنه وانتى طيبه
فعلا مدونه هايله
وتستاهل تماما دا واكتر منه كمان
انا زعلان انى مكنتش متابعها من زمان
بس تتعوض ان شاء الله
تقبلى تحياتى

عمو عزت من روما said...

صباح الخير يادكتورة كدةبداية غلط ماينفعش عملتى موقف مش ظريف بينى وبين مراتى والقطة.احكيلك وحكمى رجعت البيت بعد الشغل يوم ما قرئتلك لاول مرة باركت لك على جواز الكتكوتة نهى ولما دخلت البيت لقيت مراتى والقطة مساء الخير .مساء الخير ياحبيى عاملة اية كويسة الحمد للة وانت الحمد للة تمام ..... مالك......مفيش بس قوللى مالك.....مفيش وبعد شوية جاتنى رغبة فى الكلام قلت لها انتى فاكرة الثلاث بنات وفكرتها بيكو انتى وغادة ورحاب فى العاشرة مساء ؟؟؟اة اة فاكراهم قلت لها تصدقى ان البنات دى عاوزة تكمل المشوار ردت قالت جميل جدا قلت لها ازاااااااااى لية يعنى .وهنا يادكتورة القطة عملت حركة خبيثة قامت من على الكرسى بتاعى اللى كلة وسع وبراح وراحت اتحشرت فى الكرسى بتاع مراتى.وبينى وبينك يادكتورة عمو جسمة اقل من هرقل بشوية يعنى كرسى الصالون يبقى فاضى شوية لكن الجانب الاخر مالية الكرسى اوى وزادت بالقطة الملعونة ولكن رغم عدم تكافؤ الشكل العام قاومت لاكمل المعركة قلت لها شوفى القطة بنت الكلب سابت الوسع وراحت تتحشر فين ضحكت مراتى وقالت اول حاجة القطة تولد من قط مش كلب قلت لا لا دى مداعبة عندنا فى مصر بنقولها للقطط والزوجات مداعبة يعنى ضحكت بسخرية كدة وقالت لى القطة قامت علشان مش عاجبها الكلام وهنا ثارت ثورتى وفكرت اقتلهم هم الاثنين

Anonymous said...

كل سته وانت طيبه ياست البنات
بسم الله ماشاء عليكي
الله اكبر
رقيتك واسترقيتك
من ععين طنط حشريه
من عين سوسن
من عين اونكل ديسكوا
ومن عين كل اللي شافك
ومقلش انك بنت احسن من سبعميت مليون
غير معروف غير محترمين ورخمينه ودمهم يلطش ومبيحسوش ومعندهمش زوق
الله اكبر عليكي ويبعد عنك الحاقدين الرخمين
يااااااااااااااست البنات
ان البنات بقت جدعه وتفكيره ناضج وناصحه
زيك ياست البنات

ماء تشرين said...

العزيزه برايد انا كنت من الزوار الصامتين لمدونتك وقبل الكتاب ماينزل شوفتها عند الفراشه الصغيره وعجبتنى اوى المشكله بقه والخلتنى اكتب الكومنت ده انو بجد افتقدنا موضيعك افتقدنا خفت دمك في سردك لاحداث البتحصل وكأنها بتحصل معانا بجد وحشتينا ويارب يعدى مليون سنه على البلوج يارب وانت معانا وتكتبي يارب قصة زواجك قريبا وتقلبي من مشاكل قبل الزواج لمشاكل بعد الزواج انا بهزر طبعا يارب متشوفش حاجه وحشه ابدا

Unknown said...

أتابعك يا غادة منذ فترة طويلة جدا .. قبل أن يصدر كتابك ( اللي ما شاء الله واكل الجو كله ، وكل ما أروح في حتة ألاقيه قدامى :))
لم آتى هنا وأتحدث معكِ لأننى أحب المتابعة من بعيد . لكن مع هذا الحدث الفريد ، لا بد أن نقول : كل سنة وانتى طيبة يا غادة ، ومدونتك طيبة ، و عقبال السنة الجاية كده لما نبارك لك ع المدونة وانتى في بيت العدل قادر يا كريم :))
خالص تحياتى وحبي يا غادة
وإلى النجاح دومًا .
كل سنة وانتى طيبة



مصطفي يحيي

Ruwida Ashour said...

HAPPY BLOG DAY...REALLY I CAME BACK 4M EGYPT I WISH I WAS THER S OI CAN MEEET U

راندا رأفت said...

كل سنة وانت والبلوج الرائع طيبين

وان شاء الله في سنة ثالثة ورابعة ومية

أحمد (زوج مخنوق ). said...

كل سنة و بلوجك طيب يا غادة
أول مرة أعلق عندك رغم أني متابع قديم جدا للمدونة
و عدضو مشارك كتير في الجروب على الفيس بوك
بس باحس ان تعليقي مش هيقدم و لا يأخر
بس النهاردة علقت لسببين
هما الصراحة تلاتة :)
اولا عيد ميلاد سعيد للبلوج و من نجاح لنجاح ان شاء الله
ثانيا الأخ اللي فاكر نفسه علشان خطب فهو ملك الدنيا بحذافيرها
مش عارف الخير في أنه يتجوز و لا الخير في أنه يفضل عازب
و مش عارف طبعا ان ممكن يكون هو ده الخير ليكوا انكم لسه ما اتوفقتوش في زوج مناسب
صدقيني وضعك من غير جواز قدام المجتمع اللظيظ بتاعنا ده
أفضل مليون مرة من وضعك كمطلقة
ده فضلا عن التعب النفسي و البدني و الاجتماعي اللى بتشوفه المطلقات في مجتمعنا
فوق انت يا ابني و ما لكش دعوة برزق حد
ثالث سبب اني علقت عندك اني عملت مدونة
تحياتي ليكي

Rehab Mostafa said...

كل سنه والمدونه وصاحبتها طيبه وبخير
متابعاكي من 14-أغسطس السنه اللي فاتت وقريت كل مواضيعك:)
ربنا يزيد ويبارك من الزوار والمواضيع والانتشار والحاجات الحلوه دي :)
ربنا يكرمك يارب

صدى الصمت - عاشقة الورد - said...

ألف مبروك وعقبال 100000 سنة للمدونة الجميلة وصاحبة المدونة الرقيقة ودائماً فى تقدم بإذن الله

Lady E said...

كل سنة وانتي طيبة وبخير يا أحلى برايد
ربنا يسعدك ويقدرلك الخير

Sourah said...

كل سنة و انت طيبة يا برايد، و كل سنة و المدونة منورة بيكي, وانشاء الله يعدي عليها سنين كتير و انت متألقة دايما..
اسعدتينا فعلا بكلامك و كتابك و عرفت فعلا بأسلوبك الساخر الرائع انك تاخدي مكان بجانب الكتاب الكبار، ربنا يوفقك دايما في مشوارك و من، و من نجاح لاخر بإذن الله ..

الطائر الحزين said...

كل عام انت بخير

Anonymous said...

happy birthday ya a7la bride fee 3alam el blogs w el tadweeen :D ,isa isa el next birthday leke w lel blog ykooon m3ake ur husband by7tfl beeh m3ake w by3ml comments m3ana kaman ;) ,
bas tell me bsara7a ya bride hwa ente mesh b2ete tktbee fel blog 3shan bt3mlee ktab gdeed w 3wza el nas elle mshta2eeen y2rolek yshtrooh wala eh el 7kma mn enek mesh bttbee zay el awel w kaman el ksa bta3et s7btek elle etgwzet lesa till now mnshrtyhash ??? !!!


anyway , 7ata law bt7weshy el posts lel ktab el gdeed :d i waite enne ashtreeh 3la a7r mn el gamr cause i enjou reading ur posts ;) mante 3arfa kolna 3awzeen ntgawez ;):D

love u ya bride w congratulations 3la el bbc article and el birthday

Sara (menoshet)

funckydoctor said...

هههه
كل سنة والبلوج بخير وعقبال تعتمية سنة
كان نفيى أحضر بس مدفون فى الإمنحانات دعواتك

Mohamed Kamal Hassan said...

كل سنة ومدونتك من نجاح إلى نجاح أهم وأكبر
تعرفى يا غاده
لما بفكر بجد بلاقى انك مش بس لسان البنات
لا انتى لسان كتير م الشباب
(هتكلم عنى بس أحسن حد يزعل) لكن أكيد الواحد بيحتاج طرف تانى معاه ولما بتحسسينى ان فى أزمة فى العرسان فده معناه إن فى أزمة عندنا كشباب ولازم نفكر وده اللى محدش بيطرحه


مدونتك حلوه فعلا
ودى مش مجامله

عايزك بس تسامحينى لأنى ممكن أجيب هدية
وممكن مجيبش

بس أكيد أكيد هاجى وأنا فرحان إن شاء الله ويارب ده يكون ساعتها كفايه

ولا انتى ماديه
((:

ربنا يوفقك يا غاده

ظل الشمس said...

دايما باجى اهرج
بس المرة دى بجد عايزة اقولك انك بسمة فى زمن ندرت فيه البسمة
كل سنة وانتى طيبة ^_^

Alashik said...

لا تقلقي
ما عدت في شوق إلى أن نلتقي
مات الهوى
في زحمة الزمن البعيد الضيق
ما عدت ذلك الموهوم في بحر الجوى
ما عاد جمرك محرقي
عودي إلى صفحاتي الأولى
وفي أعماقها طوفي
و فيها دققي
سترينني شمس تذوب تلهفا
و تسيل دمعا من عيون المشرق
لا تقلقي
مهما تباعدت المسافة بيننا
و تمزق القلب الشقي صبابة
لا لن أقول ترفقي
لا تقلقي

ionised said...

مبروك و عقبال (عايز أطفش )لجوز الهناوالف مبروك أسأل هل ممكن لأي شخص أن يأتي هذا الإحتفال وسؤال عالماشي لو أنا جاي ألبس ايه:)؟
mabrook

عاشقة الحواديت said...

بسم الله الرحمن الرحيم

سنه وانتي طيبه ومدونتك طيبه يا ست البنات واحلى اسم في الوجود

وفي انتظار الكتاب التاني ان شاء الله
ودايما يارب من نجاح لنجاح

بس يا ريت اقدر على الحصول على الكتاب لانى متشوقة جداااااااااااا لقراءه

بس للاسف كل مره القى طبعته نفذت

قررت أكون عانس said...

مبرووك عليكى ومزيد من النجاح ان شاء الله

شكرا لزيارتك مدونتنا و التعليق و ارجو قراءة ردى

سلااام

Sourah said...

عزيزتي برايد معلش نفسي ارد على رسالة الاخ المجهول اللي بعت مشاركته بتاريخ 18 /8 لانني بصراحة مفروسة منه .
يا اخي العزيز اولا الموضوع في الاول و الاخر قسمة و نصيب ، انت ربنا قدرلك نصيبك و لاقيت بنت الحلال اللي كنت بتتمناها ، و على فكرة انا مش قصدي ابدا أقلل من شأنها ربنا يسعدك معاها، بس كلنا فينا عيوب، و اكيد بمرور الوقت وياها هتشوف سلبيات مش هتعجبك، بس مش معنى انك الوقتي في مرحلة الخطوبة ، و شايف الدنيا بمبي بمبي ، يبقى تجرح الناس ، خللي بالك ان لامك ده ممكن يكون موجه لاختك او حد قريب مكنك ، وزي ما قولت قبل كده دي مسألة قسمة و نصيب .
و في اعتقادي ان الزوج او الزوجة عموما بكل خصالهم عاملين زي "الباكيج " backage شروة يعني..
فالواحد يوايمها يعني عشان الموضوع مش هزار ، ده جواز يعني بيت و عيلة ، عشان كده الواحدة مننا بتفكر كتير عشان دي حياة مش لعب ..
عموما بتمنى لكل واحده ان ربنا يرزقها بالزوج الصالح اللي يتقى الله فيها و يعاملها بما يرضي الله.
و بتمنى منك لطيف الكلام و خاصة لما تعوز تنصح حد ..


شكرا يا برايد لاتاحتي الفرصة للرض على اخينا ..

*الخاتــــIraqi Ladyـــووون* said...

عيد ميلاد سعيد للمدونة يا برايد، و إلى الأمام و لمزيد من الإبداعات..
و يا رب يا رب ترزقي بعريس أنا نفسي مش حا حلم بيه هههههههههههههه

تقبلي تحياتي يا حبيبتي

TIMMY !! said...

يا بختك يا ستي ...

حد طايل كل الزوار دول ..

انا مش بقر و لا حاجة .. أن بحسد بس :)

و عقبال 100 سنة .. مع العريس إن شاء الله :)

Ahmed Al-Sabbagh said...

غادة

والله كنت ناوى ارد على الاخ المستخبى

بس بلحظة تفكير

اكتشفت انه احقر واتفة واقذر من انه يتناقش

وانا زعلان منك انك حتى عبرتية ورديتى عليه

فرحان ان خاطب وهو وصاحبة

وجاى يقول البنات الحلوة ما بتتقعدش

بجد فى خلق لسه كدة لغاية دلوقت

استغفر الله العظيم

مش بعترض والله على خلقة ربنا وله فى ذلك حكم

يمكن لما بنشوف الناس دى بنحس اد ايه بنعمة ربنا علينا انه وهبنا العقل والحكمة والتمييز

وانه سلب ناس تانية كل الحاجات دى

فاللهم لك الحمد والشكر يا رب

على التمييز والاحساس

-----------------

غادة

كل سنة وانتى طيبة وانتى احسن كاتبة شابة فى مصر

ومدونتك اجمد مدونة فى مصر

تحياتى وتقديرى واعزازى

أحمد الصباغ

Ahmed Al-Sabbagh said...

لو سمحتى يا غادة

امسحى تعليق الشخص العبيط ده

سورى يعنى

Anonymous said...

السلام عليكم برايد
ازيك عاملة اية
انتى متعرفنيش اعرفك الاول بنفسى
انا اسمى مروة 23سنة بعمل ماستر فى كليتى
انا اول مرة سمعت عن مدونتك كانت فى برنامج الصفحة الاولى فى التى فى
دورت على المدونة من باب حب الاستطلاع
بس بجد من غير اة مجاملة
انا عمرى مقريت فى مدونة زى السكر وعسل كدا زى دى
عجبتنى جدا جدا
رغم الكوميديا اللى فيها واسلوب كتابتك العبقرى
الا انها بتادى رسالة وبتقول حاجة جيل بحالة مش كان قادر يقولها او خايف او مكسوف يقولها
انا عايزة اتجوز
بجد مجهود رائع
ومدونة مذهلة واكتر من رائعة
اتمنى لك التوفيق يابرايد ودايما فى نجاح يارب
وhappy birthday للمدونة

Resala said...

السلام عليكم
بجد بجد اسلوبك تحفه جدا
واتمنى يكون لينا شغل مع بعض
انا عامل مدونه جديده
فيها كتاباتى الخاصه
كلها كوميدى
شوفيها كده ومستنى مشاركتك
http://3eeshayamak.blogspot.com/
وكل سنه وانتى طيبه

Anonymous said...

الى الأخ المجهول , بالرغم من إن نيتك وحشة وواضح العدوانية فى كلامك اللى يبدو فى ظاهره عام و لكن يحمل بشكل واضح نية الإساءة لبرايد و خلينا جد و نقول غادة , عاوزة أقولك إنك حقيقى ساذج و مكشوف ! تقدر تقول ايه سبب إهتمامك الواضح بغادة و كل ما يخصها إلى هذا الحد و بعدين بتوجه لها نصيحة ؟ طب لما أنت شايف إنها كيت و كيت طب و أنت مالك أصلا بيها عشان تنصحها , أكيد أنت واحد من اللى طردتهم من حياتها لأنهم عاديين و هى مميزة و شخصيتها متعددة الجوانب و مش أى حد يتناسب معاها و عشان كد أنت هتطق و تموت , و بعدين ممكن تكون أول واحد تخطب البت اللى معاك بس مش أول واحد كانت ماشية معاه ها ها ها هااااااى فا متفرحش أوى كدة لأنك مش عارف أى حاجة فى أى حاجة .
و سورى يا برايد انى نسيت أقولك هاى بس كان لازم أرد على البنى آدم ده الأول و كان نفسى أحضر إجتماعكم فى الأزهر بسى دخلت متأخر فعرفت بعدها , ع العموم الجيات أكتر من الرايحات يا جميل .
زيزى

Anonymous said...

عاوزة أقول للبنى ادم الغريب اللى باعت ينصحك و بيتكلم على اللى نايمين فى حضن بعض و اللى بيتسلوا , الجواز يا ابنى مش نهاية المطاف لا بالنسبة للراجل ولا بالنسبة للست , و بعدين فين ايمانك باللة و القدر ؟ ما ياما ناس بتتجوز و شريك العمر يموت و يكنملوا المشوار و تربية العيال لوحدهم , و فى ناس بتكتشف بعد الجواز إنها فى قمة التعاسة لانها مع شخص مش مناسب أو مش فاهم الطرف الخر كويس و دى بتبقى ازمة كبيرة و خصوصا لما يكون الواحد حساس و مرهف أو يمتلك جانب ابداعى أو أدبى أو ظروف عمله مختلفة زى العلماء و حتى أحمد زويل أتجوز مرتين و الكثير من المفكرين و الأدباء حينما لا يجدو الشخص المناسب بيقرروا الحياة فى هدوء بمفردهم على حياة الصخب مع حد غلط , حتى الناس العادية دلوقتى اديك شايف اللى يكتشف ان مراته بتبص لغيرة و اللى تكتشق ان جوزها زهق منها بعد ست شهور فانت ليه فاكر ان كونك خاطب دة انجاز ؟ و ليه متخيل أنك وصلت لأخر الطريق انت يا ابنى لسة فى البداية و غير كدة يا ما ناس ربنا بيقرر يبتليها بذرية مريضة , فانصحك قبل ما تخوض فى امور أكبر منك و تنصب من نفسك حكم عشان تقول ان البنات اللى بتقعد من غير جواز لحد الثلاثين و ما فوق دول مش مضبوطين فاتق الله و أعلم الحياه أعمق من أن تؤخذ كذلك و من ادراك ان اللة لن يكتب عليك ان تعيش تعيسا وحيدا فى اخر أيامك و أن الخطيبة ستصبح زوجة أو أنها ستدوم أو أن الله لن يبتليك فى أطفالك أن قدر لك بهم ؟ ثم أنك تقول أن خطيبتك فى العشرين و كأن من فى العشرين أفضل من من فى الثلاثين أو الأربعين , فاسمح لى أن أقول لك أنك واهم و رجعى فهناك من يترك زوجته الصغيرة ليتزوج بمن تكبرة , وهناك نساء تبدو شكلا أصغر من سنها بكثير و عموما المرأة من الممكن أن تنجب بدون مشاكل حتى فى اواخر الثلاثينيات و قد رأيت بنفسى صديقة مشهورة تزوجت وهى فى نهاية الثلاثينيات من مخرج مشهور و قد رزقا طفلا بصحة جيدة و الأثنان يتزوجان الزواج الأول , و فى العام الماضى حضرت فى شهر سبتمبر فرح صديقة فى الخامسة و الثلاثين و زوجها أكبر منها بعام و تلك ايضا أول زواج للطرفان و هما فى قمة السعادة و صديقتى تلك تبدو اصغر من سنها و جميلة و بالتالى فليس هناك قاعدة , و على الحانب الأخر اعرف فتيات تزوجن بمجرد التخرج و تطلقن بعدها ببضعة اعوام لعدم التوافق مع ان الطرفان على خلق و دين , و انا اكملت فى بداية العام التاسعة و العشرين و لم اتزوج بعد و لكنى لا اشعر بالحزن و لا الوحدة كما تتخيل فان كان على التسلية كما تقول فالحمد للة لا يوجد اسهل منها و خاصة انى جميلة و مميزة و لكن الانسان يتقى اللة , اما على الارتباط فيجب ان تصدق غادة فهناك فعلا من يتقدمون و لكن لا يوجد توافق و على فكرة اخر واحد اتقدملى من شهرين كان اصغر منى باربع سنين و فى وظيفة مرموقة و كان هيموت علية بس الجواز فى رأى مش ود و بس لكن تعايش و مشاركة فى الطموح و بالتالى فان ماكانش اللى هيشاركنى هيمشى فى نفس طريقى أو هيعطلنى فانا مش هوافق , و لان الأنسان ده كان اصغر و ساكن فى مكان بعيد عنى فانا اللى رفضت , و الحمد لله انا سعيدة فى قراراتى لأنها مبنية على العقل و المنطق و ماببصش ورايا ابدا علشان كدة مبندمش و مؤمنه بان ما اصابك ما كان ليخطأك و ده قدر و الأنسان المؤمن يقنع بما أرادة الله و ديما عنده أمل فى بكرة, الو بصيت هتلاقى أن سن الجواز اترفع لما بعد الثلاثين و الاصغر من كدة بيفكروا كويس و خصوصا الطموحات , ع العموم و فى الأخر اقولك صيح بتقول ان عندك ثمانية و عشرين سنة بس حقيقى واضح ان تفكيرك انت و اللى تعرفهم لسة متبلورشى ( مش عارفة هتفهمها دى ولا اعقدتك فى الخليخ تخنت مخك ؟ )علشان كدة يريت تقرأ أكتر و تشوف أكتر يمكن ربنا يهديك و تشوف الصورة بشكل أوسع و أعمق من كده .

Randa El-Adawy said...

اعترض بالضمة
معلش بقى يا غادة انا مبكتبش علشان الكتاب ولا قبل الكتاب

انا بكتب علشان جردل الماية اللى بنا انا نسيت ابعتهولك صحيح
قريب ان شاءلله

وكل عام وانتى بخير
والبلوج بخير والناس بخير

امل الاسلام said...

هابى بيرث داى كل سنه وانتم بالف صحه وسلامه مع انها جت متاخر بس خيرها فى غيرها ان شاء الله
وسلامى للجميع

الحكمة ضالة المؤمن said...

كل عام وانتي بخير
لقاء البي بي سي اكثر من رائع
الله يوفقك
و تستاهلين كل الخير
وفرحان لك وبك
بالتوفيق
واعذرونا على التاخير
و مثلكم
يعذر

Anonymous said...

كل سنة و انتى طيبة
بس انتى فعلا مدونتك زى العسل و تستحق تبقى بالجمال ده كله

عارفة أنا قبل ما أعمل بلوج خالص كنت بقرالك و ده كان أيام الثانوية و كانت هى اللى بتفرفشنى و لما عرفت أنك حتططلعى مع منى الشاذلى كنسلت جدول المذاكرة اللى عندى عشان أتفرج عليكى بمزاج و كنتى زى العسل زى مدونتك بالظبط و إن شاء الله نحتفل معاكى بمرور 50 على إنشاءها

Anonymous said...

الاستاذة غادة، بعد انقطاع لمدة شهر و نص كنت نسيت فيهم اساسا اني كنت باعتلك، دخلت اشوف الناس كاتبة ايه و لقيت ان في تعليق ليا كنت ناسيه اساسا و لقيت ان في ناس كتير قامت بالواجب و ردت ردود كتير، انا هنا مش برد علي الناس اللي لسه مطلعتش من البيضه و مش عارفه اي حاجه في الدنياو ردت عليا، ولا حتي عشان الناس اللي كانت ردودها عقلانية لأني عارف و فاهم اللي قالوه كويس جدا، حتي الانسان الوحيد اللي تتطاول عليا بالشتيمة رسمي، احمد باشا الصباغ اللي حاطط في المدونة بتاعته صورة تحت الشجرة يا وهيبه، ده برضه مش حرد عليه و لا حتكلم عن نفسي و اشرح للناس انا مين ولا فكري اتكون كده ازاي، انا باعت عشان أقولك اني في الاول و الاخر مسلم، و عارف ان الجواز قسمه و نصيب، و كلامي ليكي اللي كنت معترف انه تقيل مكنش استهزاء بعدم جوازك لا سمح الله عشان انا عارف ان كما تدين تدان، لكن تعليقاتي كانت ناشفه لأني بطبعي انسان صريح زيادة عن اللزوم، و زي ما قلتلك مكنش استهزاء بعدم ارتباطك علي قد ما هو رد علي الاستاذة غادة اللي مبهدلة الرجالة في مدونتها و مطلعاهم كلهم خرفان و للاسف مش لاقية راجل يملي عينها، و عشان الي حدا ما اكون وصلتلك الموضوع صح يبقي خلينا نقول اني واحد من الناس مكنش عاجبني تخبيطك في الرجالة زي بالظبط كده ما في ستات كتير مش بتحب انيس منصور لتهكمه الدائم علي النساء، و علي أي حال اتمني التوفيق للجميع

thesadbird said...

السلام عليكم

انا مشترك جديد بالنسبة للمدونة بصراحة انا لسع سامع عن مدونتك قريب من صديق ليا وما تقوليش ازاى اعتبرينى فى غيبوبة وحنفع بصراحة انا صديقى اشترالى الكتاب بتاعك وادهونى هدية ححكى سبب السبب فى التعليق القادم ليا بس انا شايفكم بتحتفلوا بمرور سنتين على المدونة فمش مناسب غير ان نقول كل سنة وانتى طيبة وبأمانة مدونتك جميلةوشيقة جدا لدرجة انى قريت المدونة كلها فى يوم مقدرتش اقسمها اجزاء بس ده ما يمنعشى ان ليا نقد حبعتهولك من بكرة ان شاء الله وححكيلك تجربة او وجهة نظر الاخرى زى ما انتى بصيتى للعرسان من النص الفاضى فى الكوباية اسمحى لواحد ليه تجربة مختلفة طبعا تجربتى انى عاوز اتجوز وبدور على عروسة باسلوب جواز الصالونات اللى طبعا الظروف اضطرتنى ليه وطبعا اسلوبى مش حيبقى لذيذ زى اسلوبك بس على الاقل ححاول اكون مركز فى نقاطى يا ريت تبعتيلى اللينك بتاعكم على الفيس بوك

(green eyes) said...

انا فرحانه اوي اني عرفت المدونة بتاعتك
انا لسه شايفالك حوار على التليفزيون وعجبتيني موووووووووت

اتمنى انك تشرفيني المدونة وتقوليلي رايك فيها ايه

تقبلي مروري

mhmdaljamal said...

كلامك والله عسل بس اتاكد اول انو جد

Unknown said...

جزاكم الله خيرا ع المدونة ...

من غير عنوان said...

هاي يا يا شباب بجد بجد البلوج ده ملوش حل وهوه الي شجعني اني اعمل البلوج الخاص بتاعي وياريت تبقوا تدخلوه وتقولوا اراءكم

w.k said...

كالعادة رائعة في كل طروحاتك
اتمنى ان تعطيني رايك بصراحة في مدونتي وتفيديني بخبرتك المميزة
موقع المدونة
http://walidkhalil2010.wordpress.com/

مع التحية