Monday, February 18, 2008

أنا جاااااااااااااي ..فرافيروووووو

الواد وائل إبن طنط حشرية لما شاف الأملة اللي اختكوا بقت فيها و رايحة على دريم و راجعة من ال إيه آر تي و الناس كل شوية تشاور عليا في الشارع و تقول بنشبه عليها مش دي الي كانت إمبارح على مودرن سبورت و يجوا يسلموا عليا و يقولولي الله الله الله ..يا مساء الأنوار يا كابتن مدحت..(يظهر فيه شبه كبير و أنا مش واخدة بالي)


المهم يظهر الواد وائل الموضوع حز في نفسيته شوية و قال في عقله الباطن و عمقه اللاشعوري أنا لازم أضربلها كرسي في الكلوب.. قام هوووب واكل حتة من سلك الإنترنت و أنا سمعت كده و مادرتش بنفسي غير و انا باجري في الشوارع و أقول

واااااااااااااااااااااااااائيييييييييييييييييييييييييييييل


و من يوميها و احنارايحين جايين ع المستشفى

مش عشان خايفين على وائل ..إحنا عايزين السلك


المهم بعد عمليتين غسيل معدة على 3 -4 عمليات شفط (لطنط حشرية مش لوائل ..لو شفتوها دلوقتي مش هتعرفوها بقت قمر.. شبه فلافيو بالظبط)لكن في الآخر ربنا وفقنا و اتوصلنا للحلقة المفقودة في السلك (آه و فيه دكتور في الوراثة توصل للحلقة المفقودة في سلم تطور الإنسان حسب نظرية داروين بتطبيقها على طنط حشرية..بس ده مش موضوعنا دلوقت)..و بعد 4 أيام من إنقطاع النت أخير عدت إليكم بعد الفاصل و إذ أفاجأ بكل التعليقات دي و كل الناس اللي اتعرفت ع المدونة من العاشرة مساءا و شرفوني هنا لأول مرة


و ردا على كل تعليقات الزوار الدائمين (أهلي و عزوتي) و القراء الجدد (بكره هاروح السجل المدني و أضمكم للبطاقة) و كل الإيميلات اللي اتبعتت من ناس برضه لسه أول مرة يدخلوا المدونة و نسبة معقولة منهم بتقوللي في أول سطر أنا حسن من العراق بس على فكرة متجوز...أنا محمد من السعودية بس على فكرة متجوز..انا مصطفى من الكويت بس على فكرة متجوز...باقولهم أهلا بيكم و ماتخافوش قوي كده ..المدونة أمان و الدنيا لسه بخير


شكرا ليكم يا جماعة على التفاعل الجميل ده و إذا كان أي شئ بيحصل لأختكم خير فده بفضل الله اولا ثم تشجيعكم و دعواتكم


فيه بأه إتنين تلاتة بعتولي ع الإيميل و على الفيس بوك بيقولولي هابي فالانتين


يااادي النيلة


هو أنا مش قايلالكم شعوري ناحية البتاع ده السنة اللي فاتت؟


حد يحتفل بعيد ميلاد جلوس واحد على خازوق؟؟


و النعمة انتوا نفسكم حلوة


هو أنا صحيح نزلت إشتريت قلب و دبدوب و فيشة كهربا (هابقى أحكيلكم موضوع الفيشة ده بعدين) و مشيت في الشارع رافعة راسي قال يعني حد جايبهوملي


و صحيح إديت البت هند بنت أماني 3 جنيه و خليتها ترنلي من موبايل أمها على موبايلي كل 1/2 ساعة وانا في الشغل قال يعني حد بيعاكس


و صحيح وصيت عم محمد الأشكيف البواب بتاع المستشفى يسرقلي وردتين من جنينة المستشفى و يحطهم على مكتبي و معاهم ورقة مكتوب عليها عاشق ولهان


لكن ده مش معناه أبدا إني إديت الفلانتين أدنى إهتمام


عيب أنا واحدة ثابته على موقفي


بالنسبة للناس اللي عمالة تطلع إشاعات


فيه برنامج على إذاعة البرنامج العام من يومين كان عامل حلقة عن موضوع"كلنا ليلى" اللي كنت إشتركت فيه مع بقية المدونات و استشهدوا بموضوع"أنا مش صفر ع الشمال" و إذ أفاجأ-برضه- في آخر البرنامج بيقولولكم ده من مدونة عايزة أتجوز و صاحبة المدونة اتخطبت خلاص


فطبعا إنتوا هارشين..ماحصلش


فيه ناس بتقول دي خلاص بعد الكتاب هتقفل المدونة و ماعدتش هتكتب فيه


فطبعا انتوا فاقسين..لايمكن


فيه ناس بتقول دي خلاص بأه على قلبها أد كده و إغتنت و خدت في نفسها قلم


فطبعا انتوا فاهمين..أنا وش ذلك؟..و بعدين إغتنيت منين بس؟ مانتوا عارفين العلم لا يكيل بإيه



المهم على ما أرد أنا على تعليقاتكم على البوست اللي فات و اللي قبله..إتسلوا إنتوا في شوية الحاجات دي


خلاص بأه هنلم موضوع الكتاب ده و نرجع نكتب زي زمان إن شاء الله


أولا أستاذ أحمد بهجت في الأهرام شرفني بالكتاب عن الكتاب يومي السبت و الأحد بس للأسف مالحقتش أنزل اللينكات من صفحة الأهرام

بس اللي عنده الجرنال يراجعه و هيلاقي المقالات في عموده "صندوق الدنيا"




و آدي لينكات التوقيع في المعرض على يوتيوب












و آدي لينكات العاشرة مساءا برضه على يوتيوب


شكر عميق ل

foolab

اللي هو تقريبا محمد سمير عشان هو اللي رفع الحلقة على يوتيوب

و شكر تاني لوليد اللي جه هنا و سابلي اللينكات







و ده جروب للمدونة على الفيس بوك عمله محمد الشافعي أحد قراء المدونة الأعزاء و اللي باوجه له شكر كبير جدا جدا على الخطوة الجميلة دي.. إبقوا اشتركوا و قولوا رأيكم









يااااالا اتسلوا بأه لحد ماخلص رد ع التعليقات و لو فيه حاجة جدت هابقى أقولكم


و نبتدي بأه من البوست الجاي نحكي من أول و جديد


طب و هي الحكايات عمرها هتخلص؟؟؟


طبعا لأ

86 comments:

محمد فوزي said...

أنا مش مصدق إني أول واحد يعلق
ايه يا شيخه...ايه بأه يا شيخه؟
ربنا يباركلك ويبارك فيكي أنا قريت كل المدونه بتاعتك في يومين وكان أول مره أعرف عنك أي حاجه في برنامج العاشره مساءاً
عايز أعبرلك عن إعجابي بيكي بس خايف تفتكريني بعاكس ولا حاجه
شكراً على كل حاجه وشكراً بشكل شخصي لأنك شجعتيني أعمل مدونه يارب تنجح عشر نجاح مدونتك

مع خالص تحياتي

مها said...

Thank you so much for the links..
and Mabrouuuuuuuuuuk..
We will be waiting for your next books..best of luck to ALL


Maha
http://mashrabeya.blogspot.com/

بطوط حبوب said...

جديد جدااااا هنا
وعلى البلوج سبوت كله
وبحجز للمره الجايه

بطوط حبوب said...

جديد جدااااا هنا
وعلى البلوج سبوت كله
وبحجز للمره الجايه

Rivendell** said...

مبروووك انا كنت باحكي على بلوجك لاصحابي من غير البلوجرز ولما شافوكي على العاشرة كانوا اخر انشكاح
حدوتة جديدة بقى لو سمحتي مش عايزين نكسر الصالة
ههههههه

الطائر الحزين said...

مبروك

وربنا يبارك كمان وكمان

تحياتى

مدام كعبولة said...

بسم الله الرحمن الرحيم

بجد بجد ياغادة انتي تستاهلي كل خير

و انا و الله خليت جوزي قلب من تحليل قناة مودرن اثناء الاحتفال غصب عنه علشان اتفرج عليكي

الاول كان مش طايقني لكن لما سمع الحوار معاكي و حكيتله علي البلوج انبسط اوي اوي و كمان اخد مني عنوان البلوج علشان يشوفه

و حقيقي انتي متفريقيش كتييير عن الصورة اللي رسمتهالك في خيالي

بجد انتي طيبة اوي و تستاهلي كل خير

Anonymous said...

انتى بجد رائعة والمدونة بتاعتك تجنن
انتى تستهلى كل خير وربنا يوفقك
ويارب فى تقدم دئما وتفضلى تكتبى فى المدونة ومتغبيش عنها ابدا
ريم

موجة said...

صباح الخير يا غادة
بوست رائع .. كالعادة يعني

خالص تحياتي
احمد

بنوتة من وسط البلد said...

انا جاية اقولك الف مبرووووووووووووووووووك

فين الشكالييييته ؟؟
طب حتت جاتوه

طب ساندوشت بسطرمة

؟؟!!!

طب الف مليون مبروووك يا قمر

خمسة فضفضة said...

السلام عليكم ورحمة الله وبركاته

الف الف مبروك كنتوا زي القمر

من نجاح لنجاح ان شاء الله

Pink Unicorn said...

الف مبروك يا قمر
البرنامج كان ظريف جدا و كلكوا كنتوا هايلين ... والله حاجة تفرح
بالتوفيق دايما يارب
و ياللا ارجعى بقى احكيلنا على مغامراتك .. وحشتنى الحوادث بتاعتك يا بنتى .. بتطمنينى ان مش انا بس اللى بشوف عاهات
:-)
ياللا ربنا يكرم الجميع و يفرجها بقى
:-)

nigro said...

يااااااه انت وحشتينا قوي يا دودو
دا أنا خلاص كنت فقدت الأمل في إني أقرالك حاجة جديدة السنة دي
welcome back again , bride
بس إيه دا؟.. واضح انك لسه متمسكة بموقفك من الزلانطين داي
يا جاممممممممدة
ما تبقيش تغيبي بقى كتير كده مرة تانية
فيه ناس كتيييييييرة قوي بتحبك و عايزة تسمع أخبارك
العائلة البلوجرية من غيرك ناقصها كتيييييير قوي
و حشتينا قوي يا غادة

المستبــدة said...

أسلوبك جميل جدا
بسيط و مؤثر
انا بكتب على المنتديات من حوالي 4 سنين خواطر و لما اعتزلت المنتديات كتبت على سبيسات
و اشتركت على المدونة دي علشان اقولك الف الف مبروك
من بنت مصرية لبنت مصرية
ايوة كدة عمار يا بنات مصر
الف الف مبروك مرة تانية و عقبال الكتب الجاية

رفقة عمر said...

تعرفى ان اخويا لما شافك على دريم اول مرة يقتنع بفكرة النت والمدونات كان مضايق جدا انى بتعامل مع النت شايف ان كل النت سئ
بس اول ما شافكم على دريم انبسط جدا وحاس ان فيه ناس محترمه بتتعامل معاه وبدا بعد اخير مايزعلشى انى باتعامل مع النت
وبدا يناقشنى فى البلوج بتاعى
شكرا غادة انك نفعتينى بطريقه غير مباشره
وانا مبسوطه انك رجعتى للبلوج تانى
ربنا يباركلك اللهم امين

صاحب المضيفة said...

ربنا يسعدك كمان وكمان

وتزيد شهرتك كمان وكمان

ويرزقك بوليف حياتك يارب

بجد

كتاب رائع وجميل وعمل عندي علامة في حياتي


دمت بسعادة وهنا

مهندس مصري بيحب مصر said...

بقى بتقولي


هو أنا صحيح نزلت إشتريت قلب و دبدوب و فيشة كهربا (هابقى أحكيلكم موضوع الفيشة ده بعدين) و مشيت في الشارع رافعة راسي قال يعني حد جايبهوملي

و صحيح إديت البت هند بنت أماني 3 جنيه و خليتها ترنلي من موبايل أمها على موبايلي كل 1/2 ساعة وانا في الشغل قال يعني حد بيعاكس

و صحيح وصيت عم محمد الأشكيف البواب بتاع المستشفى يسرقلي وردتين من جنينة المستشفى و يحطهم على مكتبي و معاهم ورقة مكتوب عليها عاشق ولهان

لكن ده مش معناه أبدا إني إديت الفلانتين أدنى إهتمام

أمال الإهتمام يبقى ايه يا دكتورة
هههههههههههههههههههههه

عيني عليا طول النهار وسط الرمل و الزلط و الأسمنت و العمال بتزعق حواليا و لا فارقة معايا فلانتين من زلانطين
المهم ان المنشأ ما يتأخرش عن الجدول الزمني المطلوب

المهم ردي على الإيميل اللي بعته ليكي لو سمحتي لأن أجوبته تهمني جداً
:)

M.Sameer said...

هو بعينه بوشه بخلقته بشكله
;-)

طب ماتكلميلي طنط حشريه تشوغلي عروسه تتجوزني ؟ :)

masrry metgharb said...

عزيزتى برايد

اولا ما شاء الله عليكى منورة التليفزيونات العربية كلها زى ما كنتى منورة فى الشبكة العنكبوتية

وبما انك جيبتى سيرة ابو الانوار فاسمحيلى اقولك

الله الله الله الله عليكى ياحبيبة والديكى

الله عليكى - بس مش تسلم رجليكى - يسلم عقلك وثقافتك واسلوبك و.....

وربنا يوفقك ويشيل الغمامة الى على عيون العرسان الى قريبين منك

روحى يابنتى ربنا يرزقك بعريس على اد نيتك ويكون بجد يستاهلك ويقدر قيمة الهدية الى ربنا بعتها له

Anonymous said...

انا بصراحة مش عارف اقول لك غير مبروك....احمم قصدى الف مليون مبروك انا مش عارف كلامك ده عمل فيه ايه لانى بصراحة كده محستش بنفسى وانا قاعد اقرأ فى البلوج ده تلات ساعات ورا بعض من بعد الفجر و بالعافية نزلت روحت الكلية و ما روحتش الا وانا فى ايدى الكتاب و الاكتر من كده انى اعدت خمس ساعات متواصلة اقرا فى الكتاب لحد مخلصته وانا فى منتهى الانبهار يادوبك كنت باقف شوية عشان اخد نفسى من نوبات الضحك الهسترية اللى كانت بتجيلى..... اعذرينى ان كنت بقول كده لكن بصراحة فى بعض اللحظات كان بيتهيقلى انك بتفكرى تخلصى من حد عن طريق الضحك...على العموم انا بعتقد ان تأثير كلامك مقتصرش على الضحك و بس انا تقريبا غيرت حاجات كتيرة فى تفكيرى عاما عن الجنس اللطيف بالذات وانا لسه فى السن ده، ده كمان بفكر اعمل بلوج...بأى حال شكرا وألف مبروك مرة تانية

dr.gesho said...

فعلا المفروض تخليها عايزه اتجوز صح
انا شوفت المدونه من حوالى شهر
العنوان ادانى احساس انك شبه اسماعيل يس و الفرق الوحيد ان اسماعيل يس من غير شنب
بس لما شوفت العاشره مساء عرفت انك انتى اللى بتتامرى
انتى حظك وحش انى اصغر منك و انى خلاص هاخطب قريب لولا كده كنت عطفت عليكى و خطبتك :)
انا عارف انك عايزه واحد يحفى وراكى و يحسسك انك الاميره المتوجه عندوا
بس ماتتامريش كتير لان عمر ماحد هيلاقى كل المواصفات اللى هوا عاوزه فى شخص واحد لازم يتنازل شويه
بس بجد المدونه رائعه و الحديث جامد
استمرى

Anonymous said...

SemSem

نفسي فى مره اصتاد التعليق واكون اول واحد يعلق بس معلش انا هلبدلك فى الدره قصدي على المدونه علشان امون اول من يعلق
على العموم الف الف الف مبروك كنتى منوره العاشرة مساء والى مزيد من النجاح بس يارب متنسينا متابع قديم جدا

ياسمين حميد said...

ألف ألف مبروك
تفرجت على العاشرة مساءً (مع أنني لا أملك تلفازاً... نزّلتها من النت)، وكنتن رائعات
لكن لدي إحساس أن المقابلة كانت قصيرة جداً
على العموم، وجدت النسخة المحفوظة في جوجل من صندوق الدنيا ليوم السبت:ه
http://209.85.135.104/search?q=cache:X55F41KOD2kJ:www.ahram.org.eg/Index.asp%3FCurFN%3Damod5.htm%26DID%3D9494+%D8%A7%D9%84%D8%A3%D9%87%D8%B1%D8%A7%D9%85+%D8%B9%D8%A7%D9%8A%D8%B2%D8%A9+%D8%A7%D8%AA%D8%AC%D9%88%D8%B2&hl=en&ct=clnk&cd=2&gl=de&client=opera

للأسف يوم الأحد غير موجود

dramaqueen said...

هااااااااااااااااااااااااااااااااى برايد
ازيك يا قمر
انا شفتك فى العاشرة مساءا وكنتى بجد من غير مجاملة زى القمر
المدونة هايلة جدا و اسلوبك زى العسل
وانتى كلك على بعضك حلوة وزى القمر

Anonymous said...

الوووووووووووووووو
مساءك انوار يا عروسة
ايه دا على كده ان شاء الله حنبقى عرايس قبل الخمسين وطبعا نحنا بمعيتك انا زهقت بقا من لقب انس (دي مفرد اوانس )الي بتتقال على الناس الي زي حلاتنا بس ولا يهمك حطلع عين امه على التاخير ... لان التاخير محسوب تحياتي لجمال اسلوبك وخفة دمه

Anonymous said...

يللا بقي احنا مستنين البوست الجاي ان شاء الله يبقي بوست جامد ويكسر الدنيا متتاخريش علينا مبروووووك كبيرة قوي.نورا

سعيد شحاتة said...

والله رفعتوا راسنا على العاشرة مساءا
دا ايه الجمال دة
الف مبرووووووووووووووك

قلب بلا حب said...

7amdela 3al salama
bgad bgad anty 7kaya .. ana kont lesa awel mara ashof el blog bta3k el asbo3 elly fat w 2retha kolaha .. w konty el sabab any el 7kaya dy t3gbny w 3amalt blog lya
http://www.mo7amedthelover.blogspot.com/
rabna y7myky :) w isA el tase3 7ykon hwa el brimo w nsma3 akhbar 7lwa .. w yaret mtt27'ary 3alena

Unknown said...

هههههههههه
يعنى بعد كل ده يا دودي ومفيش عريس
اكيد عميوا
او بطلوا فرجه على ا لتليفزيون
يابنتى احسنلك اعملى كليب وريحي روحك
جميله اللينكات ياقمر
وعقبال فيديو الفرح

banota said...

انتى بجد زى القمر ودمك زى العسل ومحترمه جدا ومثقفه بس واضح انه شبابنا مبقتش تعجبه الحاجات دى

la3lahakhier said...

الحقيقة يابرايد انا ماشفتش البرنامج ولاكنت اعرف حاجة عن الموضوع ده .انا مخاصمة النت من سنين من ايام الاى سى كيو فاكراه؟؟؟ لكن لو تصدقينى انى حسيت بسعادة كبيرة جدا واتعديت من فرحتكم .. فعلا اتمنى لك كل سعادة ويتحقق كل مابتحلمى بيه يا رب
ياريت تبقى تقوليلى رأيك فى مدونتى .. ولا الاضواء حتشغلك؟

سيكو said...

الف الف مبروك

وجون وجون وجووووووووووووووووووون
با مدحت

قصدى يا برايد

بجد الف مبروك

Anonymous said...

بسم الله
أاااااه انا منهم ، ايوه منهم ، هما شكلهم هيزوروكي كتيييييييييييييير ، يا ستي بتوع العاشرة مساء ، كنتي جميلة والبنوته بتاعت الأرز ال بقه ب تلانه جنيه وربع عندنا برضو كانت منوره ، وال كانت ساحبه النور غادة صاحبتكم ،
انا مدون والحمد لله مدونتي زوارها مش كتير زيك عارفه ليه ؟
اصلها مسؤوليه كبيرة ، وكمان في حالة مدونتي تبقى فضيحة لاني بافضفض فيها بجد وبصدق ، ربنا ما يعرفكم طريقها ابدا ،
بس انا بجد رافع الشعار بتاعك بقالي ثلاث سنوات بس مشكلتي مش اني مش لاقي بالعكس مشكلتي اني مش قادر ، مش هطول امثر من كده بس بجد سعيد بمدونتك واسمحيلي احطها من المفضلات عندي ،
الى لقاء ان شاء الله .

rahaf said...

مبروك يا قمرانا كنت اول مره اسمع عن المدونه في العاشره مساءاواعجبت بيكم جدا وسهرت يوميها طول الليل اقرا مدونتك بجد دمك زي العسل وانتي اموره جداواناكل يوم بدخل عالمدونه اشوف الجديد فيها ربنا يوفقك

Anonymous said...

الكاتبه العزيزه صاحبة المدونه ارجوا أن تقبلى تهنئتى لك على صدور أول طبعه من الكتاب الذى يحوى مضمون مدونتك الشيق ، وبهذه المناسبه ترغب المجله التى أعمل لديها فى اجراء حوار صحفى حول هذا الانجاز ،على أمل أن تشرفينا بتعاونك معنا

للتواصل معنا بهذا الصدد يمكنك مراسلتى على البريد الالكترونى التالى:
Sh_press2007@yahoo.com

الرجاء التفضل بالرد ولك جزيل الشكر

شيماء مهدى

غني يابهيه said...

تانى مره اكتبلك
ومبروك تانى ومستنى انك تزورينى بصراحه لأن اكيد بهيه فرحانه بيكى

Ahmed Al-Sabbagh said...

بجد يا غادة الكتاب فظيع

وانتى تستاهلى كل خير

وربنا يوفقك كمان وكمان

بجد الكتاب ده فظيع بجد

بس شوفى بقى

احنا لازم نشوفك

احنا بنعمل اجتماع مدونين كل اسبوع فى البورصة فى وسط البلد

قريب اوى من مكتبة الشروق فرع طلعت حرب اكيد تعرفيها

او لو تحبى نخلي اللقاء فى الحديقة الدولية فى مدينة نصر

او كافتيريا دار الاوبرا

زى ما تحبى

مستنى ردك

وياريت على الايميل
ahmed000eg@hotmail.com

ahmed4u21@yahoo.com

احمد

Anonymous said...

واول الكلام سلام

مش عارف اقولك ايه غير الله الله الله الله عليكى الله
انا زى كتير من الناس ما كنتش اعرفك ولا اعرف البلوج بتاعك ولا يعنى ايه بلوج اصلا لح ما شوفتك فى العاشرة مساءا ولقيت الكتاب اسمه عايزة اتجوز قولت لازم اشوفه وقريت المدونة كولها وما اقولكيش كانت سعادتى قد يهبالبلوج ده عشان
1- موت على نفسى من الضحك
2- انتى بتناقشى فعلا مسالة فى عصب المجتمع وبآراء شبابية وعصرية
3- ان كتيييييير من الناس زى قروا الكتاب لما شافوكى على البرامج

ويارب تستمرى فى الكتابة والنجاح كمان وكمان

بس فى رجاء / ياريت تبقى تحطى حلول للمشكلة (فرضيا)لانك فعلا بتمثلى فئة كبيرة من بنات مصر

واخيرا (الكلام مش عاوز يخلص والله) ياااااااااااااارب يرزقك بابن الحلال

واختم الكلام بالسلام

"النجم القادم" said...

السلام عليكم
اول زيارة
بجد مدونة ومُدونة جميلة
ربنا يوفقك ياااااااارب
بجد اعجبت بكتاباتك المتميزه هذه ربنا يوفقك ياااااااااااااارب

فاتيما said...

برايد
ست البنات يا غادة
كنتى ست كل البنات و انتى منورة الشاشة ...مستنيين حكاياتك عن اللقاء دا .. منى الشاذلى كانت فرحانة بيكو .. نقلتولها عدوى المرح و اللطافة ...
زى لماضة الطعامة ما بتقول
هاقولك زيها
عقبال لينك الفرح بتاعك ...
قبلاتى وحبى
و ايه يا ختشى الرجالة دول ..
جرالك ايه يا مصر ؟؟!

خايف من الحقيقة said...

1-لولا اني متجوز وبحب مراتي جدا كنت ................. ياله حظك وحش بس ابني والله زي القمر ينفع لاحظي ان ابوه في الخليج وراجل مهم والله في مصر وكمان بره مصر وبفضلك رجع يكتب بعد 15 سنة توقف عموما بجد مبروك وان فرحان مش عشانك بس لا عشان الامل اللي اتزرع في الناس بسبك ........ بس مردتيش ابعتلك ابني امته؟؟؟؟

Anonymous said...

ربنا يحميكى من عيون الناس يابنتى

المـــفـــــــقــــــــوعـــــة مــرارتـهــا said...

ربنا يسعدك يابرايد ذي مابتفرحينا وتضحكينا بجد وحشتينا اوي النت من غيرك ضلمة
انا كل يوم كنت ياشقر عليكي في المدونة

جهاد خالد said...

طبعا بما واحدة مش من هنا خاااااالص ومنعزلة عن العالم وخصوصا التليفيزيون بقالي فترة
فانا مشفتش الحلقة
بس الكتاب هقراه قريبا

مش مهم ده كله

المهم
اني جاية اقولك من كل قلبي
شكرررررررررررررا

وربنا يزيدك اخلاص ونجاح يااااارب

Anonymous said...

السلام عليكمورحمة الله وبركاته

الحقيقه انا تابعت مدونتك من قبل الكتاب والتلفزيون واى حاجه وعجبتنى جدا ...بس طبعا لما عرفت ان الكتاب نزل اشتريته ودفعت ال15 جنيه (مش كانوا يرخصوه شويه )...عموما ميغلاش عليكى زى ما بتقولى العلم لا يقدر بمحشى البتنجان
بجد ربنا يباركلك يارب ...ويرزقك ويرزقنا معاكى اكتبى على طول ...واوعى اوعى اوعى الاضواء والشهره تخطفك او تغرك لانك بجد مكسب لينا وخساره ان اى حاجه تضيعه حتابعك على طول على واتمنى انك تقبلينى صديقه بجد ...وبجد بجد حبيييييييييييتك اوى ربنا يوفقك يارب والى الامام دائما

رؤى الخاطر.....

أميرة محمد محمد محمد said...

ربنا يكرمك ياغاده
ناوه اكتب موضوع عليكي لو اتنشر هقولك وتقريه
مبروووووووووووووووووووووووووووووووك

DR/adham serage said...

السلام عليكم يا برايد يابنتى
اخبارك ايه وحشتينا جدا جدا
عموما لكى على حق النصيحه:-
اولا:-قبل العمل فى كتابة السيناريو والذى منه احسبى أولا هل هو نافع للأمه ويذكرها بالله ويدلها على طريق الهدايه ام هو مجرد لهو للامه. لتعرفى ان كان ذلك سيكون فى موازين حسناتك ام سيكون مع من لهى بسببه فى موازين سيئاتك(عافاك الله )
ثانيا:-ان تكونى بدون زواج افضل مليون مرة من مطلقه لكن انصحك ان يكون اختيارك على اساس( من ترضون دينه) ولن تندمى ابدا خصوصا لو صليت صلاة الاستخارة وساعتها ربنا هيوفقك لأفضل شخص ممكن يسعدك ان شاء الله.
ثالثا:-لو بعد الشهرة والفلوس دى كلها مجاش عريس صح الصح يبقى تفكرى بقه فى العمليه باسرع مايمكن ولا تترددى لأن مفيش حاجه تتعمل فى الدنيا اكتر من كده وهتبقى راجل زى العسل والبنات تتهبل عليكى وتنقى بقه براحتك وفكى عقدك الكبيرة بعقد صغيرة.
وكفايه هزار عشان الهزار فى الضحك بيقلب بتهريج.
تحياتى وفقك الله الى كل مايحب ويرضى

Unknown said...

طبعا يابنتى انتى بتتكلمى فى ايه

ولا فارقة معانا الزلانطايم ده خاااااالص .. نهاااااائى .. ولا مضايقين ولا فى حاجة خنقانا ولا شايلين هم بتاتاااااا


قال زلانطايم قال

:D


على فكرة الحلقة كانت تحفة بجد .. واللى سعدنى اكتر من الحلقة انى كلمتك بشكل شخصى وباركتلك بنفسىىىىىى

هييييييييييييييييه

ربنا يكرم هشام بقا ويخليه لمصر ... كل سنة وانتى طيبة ياقمر .. وكاميكاز بيقولك عاوز الجاتو والحاجة الساقعة .. حاولت اقنع فيه ان ده مجرد كتاب مش كتب كتاب .. العبيط مش راضى يفهم .. معلش مخه على قده بقا

:D

ٍسلاااااام

أنسانة-شوية وشوية said...

الف الف مبروك يا غادة
بصراحة انا كنت طايرة بيكوا انتو الثلاثة والقاعدة معاكوا نسيتى حالتى النفسية السيئة في اليوم ده

رضوى said...

نورت الشاشة يا غادة و الله
بس ايه الرزانة دى كلها؟ و لا الواحد كان يتوقع ان الانسانة الرزينة دى يطلع منها كل ده.
طبعا مدونتك متابعاها من زمان و كمان اشتريت الكتاب من معرض الكتاب و قريته كله.
أنا بقول انتى تكملى البلوج علشان يبقى زى الكتاب و بعدين تبتدى فى الحاجات الجديدة و ده علشان يبقى البلوج كامل متكامل مدعم بالحديد و فيتامين ب12 (مين اللى بيتكلم ده؟)

Anonymous said...

علي العموم مش كل البنات تنفع للجواز بصراحة البنات دلوقتي حاجة تقرف ... ربنا يستر و ما يفضحوناش عن قريب و بردو كل بنت لازم تعرف ان الحياة مش سهلة عشان تتامر و تتمنظر و علي راي المثل خطبوها اتعززت .... و سابوها عملت بلوج عايزة اتجوز ( ممكن دا مطلع اغنية عايزة اتجوز ميكانيكي؟؟))

samourai 4 ever said...

ياااااااااااااااااااااه يا شيخه
ايه الغيبه دى كلها
و احشتينا موووووووووووووووووووووووووووووووووووووووووووووووووووت
و مشتاقه اوى اوى للبوستات الجديدة اللى مستنياها بفارغ الصبر
و مش حقولك هابى فلانتاين
مالناش فيه اختى ولا ايه
و دمتــــــــــــــــــــــــــــــم

Anonymous said...

السلام عليكم ورحمه الله وبركاته
بجد ألف ألف مبروووووووووووووك يا غاده
واكيد لانك انتي طيبه وربنا راي عنك عشان كده ربنا اداكي من وسع
وان شاء الله كمان
يرزقك بابن الحلال اللي يريح بالك
يارب
وانا كمان يلا فوق البيعه
انا كنت بتابع مدونتك من وقت صغير قبل موضوع الكتاب ده
بس يادوب قبلها باسبوع
وفعلا عجبتني اوي اوي اوي
وحتي ندهت علي ماما عشان تقراها وكان رايها من رأيي هي كمان وعجبتها اوي
وشفناكي في التليفزيون انا وهي وبجد كانت بتدعيلك بالعريس يلا يا بختك

ربنا يوفقك يا غاده يارب
ويحققلك كل اللي بتتمنيه عن قريب ان شاء الله

Anonymous said...

انا فعلا بهنيكى على جرأتك فى انك اتكلمتى عن حاجات فى كتير مننا اتعرضولها بس بيخافوا يتكلموا احسن حد يشمت فيهم
المهم انا مش هطول عليكى بس هحكيلك حكاية العريس الثالت اللى اتقدم لاختى واللى اتعجبت ازاى والدى مرمهوش من الشباك............. عريس الغفله حاول يكلم اختى وطبعا هى رفضت من باب الادب اللى مبقاش مطلوب دلوقتى المهم العريس بعت لها واحده الشغل وقعدت توصف لها على المزايا اللى فيه وعلى الشقه والشهادات اللى حاصل عليهاوالوظيفه ده غير انه بيشتغل باليل علشان يتجوز بسرعه والحاجات اللى ممكن يقدمها بسر هى توافق انه يقابلها اختى طبعا جت وحكتلى وانا من خبتى قولتلها طيب يا بنتى خليه يجى يقابل ابوكى واهو نتعرف عليه ونشوفه والعريس مكدبش خبر وجه فى الميعاد لوحده وجايب معاه طبق حلويات من ابو جنيه7 وكانت المفاجاه بعد ما استقبلناه احسن استقبال ما هو ضيف ولازم ياخذ واجبه وابتدى الكلام المهم اول حاجه والدى سأله عليها انت يا ابنى متخرج منين وطبعا الاجابه كانت عبقريه ..........انا يا عمى مكملتش بس الشهادات مش مهمه والدى:طيب يعنى وصلت لحد فين العريس: انا ساقط دبلوم طبعا دى شهاده جديده محدش سمع عنها وعدينا السؤال ده وقلنا ميجراش حاجه والسؤال االثانى انت بتشتغل ايه وطبعا الاجابه تعتبر منطقيه بالنسبه للشهاده موظف امن طيب بتاخد كام 135 طيب عندك شقه لا ما انا و العروسة هنتصرف طبعا انا قلت ان والدى اكيد هيقوم يضربه بحاجه بس العجيب ان والدى عرف الحاجه اللى ماختش بالى منها وعلشان يتأكد سأله انت يا ابنى امك عارفه انك جى تخطب ايوه وسبتك تيجى لوحدك ايوه اسلها قالتلى اجى اتكلم معاك الاول طبعا انا كنت خلاص عاوزه اقوم افتح دماغه لان اختى قلبت معاها بغم ودخلت الاوده الثانيه وقعدت تعيط المهم والدى كلمه بمنتهى الهدوء وقاله هرد عليك بعدين بس والدى اصر انه يديله طبق الحلويات والغريبه ان العريس برده مش فاهم وعمال يلح على والدى انه ميتأخرش عليه فى الرد المهم لما سألت والدى عن سبب هدوئه قالى يابنتى الضرب فى الميت حرام ده واحد عقله على كده ................. الغريبه فعلا ان بعد فتره اتاكدنا فعلا ان العريس متأخر عقليا وبيعانى من بعض الاضطرابات النفسيه بس طبعا الموضوع ده فضل سر محدش يعرفه غيرنا

safa7_karmooz said...

برااايد

احمد بهجت اللى بيكتب فى تانى صفحة فى الاهرام

بقاله 4 ايام بيكتب عنك وعن كتابك

مجرد إنسان said...

صباح الخير يا غادة
أى كلام مديح يتقاللك يبقى مكرر
و انتى تستاهليه فعلا
لكن أنا عاجبنى جدا روحك و خفة دمك
و انتى بجد مثل يشرف كل بنت مصرية وكل راجل طبعا
http://grean-heart.blogspot.com/2008/02/blog-post.html
ده عنوان مدونتى و أكون سعيد لو زرتينى و قلتيلى رأيك
مالك الحزين

Desert cat said...

الف مبروك يا غادة
وعقبال لما نشوف السيناريو كدا ويكسر الدنيا
مبروك يا جميل

raspoutine said...

شفت الحلقة بتاعت دريم انا وناس كتير
الف مبروك

اجار الدين كشمش said...

الله يهني الفرااافيرووووووووو


الكويت

Unknown said...

3ash meen shafk ya sety
ana brdon olt elset a3'tanit b2a we msh htktb 3alblog 3ashan nesthry elktab
ya sety mfesh mane3 nedfa3 el2rshen el7weshnahm fe ktab 7dretk, bas ana oltilk iny msafra, we oltilk edny ns5a we ha7sbk lmma agy, wenty m3brteneesh, fakrny hakol tmno 3aliky - hal ana wesh zalik ;)-
yalla ya sety mestnyeen kol mahowa jadeed wa 7asry 3al BLOG :)

بحبك يامصر said...

الف مبروك على النجاح الهايل ده
وانتى كده عرفتينا نقطة ضعفك وهى كلمة(حضرتك)انتى لجد بتتسطلى لما حد يقولك حضرتك؟
طيب حضرتك حضرتك حضرتك ولا ترامادول ولا الترادول ولا يحزنون
ههههههههههه
الف مبروك

$$Dado$$ said...

السلام عليكو يا دودي
انا كتبتلك كتير و مدونتك هي المفضلة عندي.
انا فرحانه ليكي زي الناس كلها
و اتمنى انك تكوني كاتبة كبيره , مش كتب و مدونه و بس لأ و سينما و تليفزيون
و ترحمينا من هوجة كتاب الافلام الكوميديه الهابطة اللي لا ليها لا كطعم و لا لون ولا ريحة
بصراحة انا نفسي ارجع اضحك من قلبي تاني زي ما ضحكت كده لما قرأت كتابك. دي عليى فكرة امنية كل المصريين.

Anonymous said...

مهندس معماري اسكندراني
ازيك يا غادة عامله ايه , انا اول مرة اقرالك الاسبوع اللي فات واللي كان السبب في كده هو طبعا العاشرة مساء , بس انا كنت عايز اقولك حاجة مهمة جدا مش شايفة ان كل البنات اللي بيروح الخطاب يخطبوهم وميحصلش نصيب يطلعوا القطط الفاطسة والاخطاء كلها على العريس المتقدم
حتى لو كان العريس ده مفهوش اي غلط ويكون هوه اللي رفض الخطوبة لما شاف العروسة مثلا ومعجبتهوش ليه نطلعه بقى غلط ومتخلف عقليا وبخيل وامه هي اللي ممشياه واحيانا يكون اهطل وكل العبر ,
هل ديه حجة البنت لما العريس يرفض الارتباط بيها وديه حاجة مشروعة واحد رايح يتقدم لعروسة عن طريق جواز الصالونات ومكنش شافها قبل كده طبيعي ممكن تعجبه فيكمل وممكن برده متعجبهوش فيتوقف في حالة انه توقف يبقى العريس ده من وجهة نظر العروسة متخلف وبخيل و و و و و الى اخره وتطلع كل العيوب والعبر فيه وانها يا حرام مظلومة ومحدش قادر يقدر الجمال بتاعهال لافتان ده وان نصيبها وحظها وحش ان كل اللي بيجولها متخلفين وبيهم العبر ,
وبصراحة انا بدأت احس بده في بعض كتاباتك عن العرايس اللي بيجولك يا ريت توضحي لو انا كنت مخطئ
ويا ريت ما تزعليش من كلامي ده وتعتبريني صديق
وعلى فكرة انا بعتلك على الياهو مسنجر يا ريت تقبلي الدعوة
ويا ريت ما تبطليش كتابة وبرده ما تتأخريشفي الكتابة

عروسة ننوسة said...

مبروك مبروك مبروك

(احمد سكر ) said...

ماشاء الله الله اكبر

ربنا يحفظك

بجد دمك زى العسل
اممممممم انا عارف شباب منطقتكم كلهم لابسين نضارت ولا ايه

هههههههه
عجبنى جدا ردك على ايملات (بس خلى بالك انا متجوز )
ههههههه
زى العسل
اممممممممممم
بس خلى بالك انا متجوز
هههههههههه

تقبلى تحيتى
احمد

semsema said...

انا بجد عاوزة اقول لك مبرووووووووك
على فكرة انت اول واحدة تعمل انجاز بجد ربنا عوض تعبك فى المدونة وخلى دار الشروق تحس بالجهد اللى انت بتعمليه وديه بدايه مبشرة ان الشباب لسه فى حد بيشجعهم وبيحس بيهم
ويارب دايما للاحسن

Ophelia - cfd said...

ممممممم

أنا كنت قاعده فى أوضتى بس سامعه البرنامج

بس بصراحه كسلت أقوم اتفرج يا ريتنى كنت قمت :D كان زمانى شفتك

بس أسلوبك حلو اوى جديد كده

وعامة ألف مبروووووووووك ليكى

مشمش said...

كلمة عايزة اتجوز ممكن تدي انطباع وحش بس لما شوفتك في العاشرة مساءا لقيتك بجد زي القمر وطيبة جدا وبنت حلال ربنا يكرمك يارب ويرزقك الزوج االصالح

لحظه من فضلك said...

ارجو الاهتمام بذلك الموضوع الموجود بالمدونه وارجو التضامن معى وشكرا

Unknown said...

مبرووووووووووك علي النجاح الفظيع
ويارب دايما
رحت سئلت علي الكتاب
افتكرتك وانت بتقولي واحد كان مسكوف يقول اسم الكتاب
ههههههههههه
اصلي انا كمان كنت مكسوفة اقول للراجل عايزة اتجوز وبعدين قولت وفيها اية هو انا اللي عايزة اتجوز دة اسم الكتاب
هههههههههههههه
نفسي اجيبة انا من اسكندرية متعرفيش اجيبة منين
سلام

Anonymous said...

السلام عليكم ورحمه الله وبركاته
ما شاء الله عليكي كنتي زي القمر يا غاده
ربنا يكرمك ويفرحك
انتي عارفه اتبسطت منك قوي لما قولتي انك بداتي تدرسي سيناريو
ديه الترجمه اللي بجد ل
انا مش صفر علي الشمال

مصطفى كامل (مصرررررى قووووى) said...

انا عندى اقتراح كويس للانتقام من الواد وائل احنا ممكن ندبر له مكيده ونزنقة فى اى حتة بعيدة ونقعدة على خزوق كبير والسنة الجاية فى نفس الميعاد نحتفل بعيد ميلاد خازوق وائل بدل من المهبب الفلانتين ده
ودا علشان حرمنا من طلتك الكام يوم دول

Lets.Live said...

ههههههههههههه

حلوة أوووي الموكنة اللي جيت فيها ديه

فلانتين مين وبتاع مين

أنا قبلها استاذ فلانتين ده بيوم ونازلة الجامعة ورايحة محاضراتي

كان في بنت جمبي في الميكروباص وشايلة بوكيه ورد

وأنا بحب الورد جدا جدا جدا جدا . . كنت عايزة اخطفه واجري

والاقي واد ماشي في الشارع وماسك وردة حمرا

أنا عمالة أقول البلد سابت الكورة وبقت تتكلم ورد وألا ايه

بس علشان عندي فضول قولت للبنت أول ما نزلنا ممكن اشوف البوكيه

وعايزاني امسكه بقي

شوفته وكده وقولتلها وجهة نظري العميقة فيه . . عالمة ورد وحس فني بقي

اتاريها جايباه لواحدة صاحبتها علشان مش لاقية محل ورد وصاحبتها هتديها لعمو صاحبها

وانا هموت من الضحك

البنت قالتلي ممكن امشي معاكم ومشينا بقي

وكل الجامعة باصة ع البنت

وانا جوايا هيموت من الضحك

عايزة اسيب البت واجري

ده شكلها مشبوه ولا ايه

وفي الاخر الاقيها بتسلم ع واحد

انا فكيت انا والبت اللي معايا بقي

قال فلانتين قال

والسنة اللي فاتت البت صاحبتي بعتتلي رسالة ع الموبايل ومعرفش ايه عيد الحب هنيتك

أنا رديت برسالة

(( عيد حب مين يا هابلة . . بحبك يا بت من غير نيلة ))

أصله عم فلانتين حكايته حكاية وع موقع طريق الاسلام والخطب اللي حاطينها ياما

ياريت نعيد وجهة النظر

أما بقي عن الواد وائل ابن طنط حشرية

فكك منه

ده أمه شكلها هتهريكي

يعني حماة متعفرتة . . رتبيله مكيدة

بجد أسعدني كلامك

أختك في الله : جنة Beautiful Soul

حمامة said...

ههههههههههه
يخرب عقلك بجد سكرررررر
حلوة شبه بينك وبين مدحت شلبى دى
دمك خفيف جداً ومنتظرين بقى عودتك بعد الأنجاز الجميل :)

مبروك تانى

wanna b a bride said...

محمد فوزي

جائزة الفجلة الذهبية لأول تعليق من نصيب محمد فوزي

هييييييييييييييييييييييييييه

شكرا للعاشرة مساء اللي أضافت قراء محترمين للمدونة
و البلوجر كله نور يا فندم
---------------------------
مها

الله يبارك فيكي و يا رب تكون اللينكات عجبتك

دانا مسلكاهم بالعافية من بين سنان الواد وائل

عشان تعرفوا بابذل مجهود أد إيه

شد و جذب و 21 حقنة و هيصه

--------------------------
بطوط حبوب

الواقع الإفتراضي كله منور يا فندم

إحنا عندنا أعز من بطوط؟
-------------------------
rivendell**

اللهم زيد إنشكاحكم كمان و كمان
ياااااارب

كسري براحتك ولا يهمك

الصالة بتاعة الخواجة بلوجر مش تبعي
--------------------------
الطائر الحزين

الله يبارك فيك

أدام الله الود
--------------------------
حياتي قنبلة ذرية

يا رب بس ماتكونش دعوات الأستاذ جوزك انصبت على نفوخي

لحسن أنا نفوخي وارم من يوميها

ربنا يخليكي يا رب
انتي الي شكلك طيبة

و مفهومة الطيبون للطيبات
---------------------------
ريم

إيه الذوق ده؟

ذوق ذوق ذوق الصراحة

ميرسي يا قمر ع الكلام الجميل

ايوة كده احنا بنانيت زي بعضشينا ولازم نشجع بعض
---------------------------
موجة

صباح النور

ربنا ما يقطعلنا عادة
:)

تحياتي
---------------------------
بنوتة من وسط البلد

فيه جاتوة و بسلة في البوفيت

مدي إيدك ماتنكسفيش
--------------------------
خمسة فضفضة

ربنا يخليكي
ده بس من ذوقك

---------------------------
pink unicorn

الله يبارك فيكي

العاهات جاية في الطريق

مانا اصلي متعهدة العاهات في المنطقة العربية
------------------------
nigro

يا سيدي ماتشوفش وحش

مش غيبة ولا حاجة..مش تعمد يعني

هي بتيجي كده

عموما جاية في السكة ماتقلقوش
------------------------
mustabedah

عجبني إسمك جدا

أنا قلتها في الكتاب

بس انا قلت انا مفترية

و فخورة بذلك

الله يبارك فيكي
أيوة كده البنانيت الحلوين لازم يقفوا جنب بعضشيهم
مابالك بأه إذا كانت واحدة مستبدة و التانية مفترية؟؟
:)
--------------------------
رفقة عمر

وليه يا أخو رفقة عمر

هو النت عيب والا كان عيب؟

هو يمكن كان يقصد الشات

أنا كمان بصراحة ماباستظرفوش

بس سعيدة اننا قدرنا نغير جزء من وجهة النظر و نفك شوية من الحصار المعنوي المفروض عليكي

تحياتي
--------------------------
صاحب المضيفة

ربنا يخليك يا رب

إيه الكلام الجميل ده

و بالنسبة لكل الدعوات دي

آاااااااااااامين

wanna b a bride said...

مهندس مصري

مش أنا باقولك شكلك أمن دولة

البلوج التاني سرررر حربي

مش لازم أي حد يعرفه

ده قرار نهائي بدون الإستعانة برأي الجمهور
:))
تحياتي
------------------------
m.sameer

شاكرين مهللين

طنط حشرية مابتحبش تخدم غيري أنا

أكلملك ام محروس؟؟
--------------------------
masrry metgharb

آااه..ضروري موضوع على أد نيتك ده؟

لا لا بس انا نيتي صافية

لأ مش هخاف
:)
تحياتي
--------------------------
mohamed_salah


quote

"انا بعتقد ان تأثير كلامك مقتصرش على الضحك و بس انا تقريبا غيرت حاجات كتيرة فى تفكيرى عاما عن
"الجنس اللطيف بالذات وانا لسه فى السن ده


هو ده..الله ينور عليك

كده الكتاب بصحيح نجح

سعيدة جدا ان الكتاب عجبك

مش هاوصيك ع الدعاية
:))

العفو ..ده واجب..و الله يبارك فيك
---------------------------
dr.gesho

ده كده يبقى ربنا سترها معايا
إنك صغير و انك هتخطب

ربنا بس يكون في عونها
:)
قال إسماعيل ياسين قال

ماااااشي
-------------------------
semsem

ماتقلقش انا عاينالك فجلة ذهبية على جنب عشان تكون من نصيبك المرة الجاية

الله يبارك فيك

ده نورك
--------------------------
ياسمين حميد

شكرا ليكي على لينك صندوق الدنيا

هو انا لسه مش عارفة أفتحة

بس هاتصرف

شكرا لإهتمامك
:)
----------------------------
dramaqueen

وشي إحمر
و بصيت في الأرض

ربنا يكرمك عل الكلام الجميل
--------------------------
آنسة فرفوشة

ألوووووووو

لا ده التأخير ده له حسابه

هو حر كل تأخيرة مش فيها خيرة دي فيها عقاب مالوش أول من ىخر

خليه يتأخر براحته بأه
و هنشوف
-------------------------
نور

الله يبارك فيكي
أكبر حاجة
:)
تحياتي
------------------------
سعيد حامد شحاتة

الله يخليك
ده بس من ذوقك

الله يبارك فيييييييييييييييك
--------------------------
قلب بلا حب

البلوجر كله نور يا فندم
بس أسمك بيوجع قوي

التاسع و العاشر في الكتاب
هنا هنبتدي من الحادي عشر
--------------------------
لماضة

العرسان كتيييييييييييييير

بس فين النفس
:)
تحياتي
--------------------------
banota

نقول إيه؟

دنيا
---------------------------
لعلها خير

طب الحمدلله اننا صلحنا العلاقات بينك و بين الإنترنت

آي سي كيو إيه؟

يا بلوجر يا إما بلا

انتظري مني زيارة قريبة ان شاء الله

wanna b a bride said...

سيكو

يا مساء الأنوار يا سيكو

الله يبارك فيكي يا قمر
------------------------
متمو

منورين
دول بتوع العاشرة مساء دول فوق راسي

ياسلام

يا سيدي فضفض فضفض ولا يهمك

خليك على المبدا و خليك رافع الشعار
3-6-9
انشالله حتى 13

خليك على المبدأ و ربنا هيكرم إن شاء الله
-----------------------
rahaf

دي المدونة نورت حضرتك

أمال؟

بس كل يوم تدوري ع الجديد؟

ده شرف أتمنى ان أكون أستحقه
--------------------------
شيماء مهدي

شكرا ليكي

ان شاء الله
--------------------------
جمهورية مصر العربية

شكرا ليك و لخالتي بهية

و يا رب دايما تعليقاتك منورة هنا
-------------------------
ahmed al-sabbagh

شكرا ليك يا أحمد


سعيدة جدا ان الكتاب عجبك

موضوع اللقاء ده عايز تظبيط مواعيد

ان شاء الله هاظبط ظروفي و ابعتلك ميل

و شكرا على الدعوة الجميلة
--------------------------
zatamonka

سلام مربع كمان
يا سلام

و الله العاشرة مساء ده شكله هيبقى علامة
فيه مرحلة قبلها و مرحلة بعدها

خلت ناس كتير قمر يشرفوني

شكرا ليكي ع الكلام الجميل

و بالنسبة للحلول

الفرج من عند الله

انا بادور على حد محترم

ربنا يبعت
-------------------------
النجم القادم

أهلا بيك
و يارب ماتكونش آخر زيارة
-------------------------
fatima

آه و الله هي منى الشاذلي كانت لطيفة معانا قوي

و القاعدة كلها كانت زي العسل

وي مانكون قاعدين في كافتريا و بنرغي مع بعض

الرجالة؟

باينهم راحوا في 67

مش كلهم..عشان ماحدش يزعل
;)
------------------------
خايف من الحقيقة

quote
"وان فرحان مش عشانك بس لا عشان الامل اللي اتزرع في الناس بسبك ."

كبيرة قوي الجملة دي

يا رب أكون قدها

طب يا أونكل ابنك ده كام سنة

عشان نبقى على بياض
------------------------
anonymous

آه و الله محتاجة الدعوة دي قوي
-----------------------
أنا و هي

ربنا يخليكي يا رب

و انتوا كمان بتوحشوني و ربنا العالم

------------------------
النجمة الصاعدة

طب مستنية رأيك بعد قراية الكتاب

إوعي تتأخري
------------------------
رؤى الخاطر

أشكرك جدا على الكلام الجميل
و احييكي جدا على شراء الكتاب

علش ال 15 جنيه دول اعتبري انك جبتيلي بيهم 3/4 دستة جاتوة

خليكي متابعة
و ان شاء الله الجديد في الطريق
------------------------
أميرة محمد محمد محمد

شكرا ليكي يا أميرة

و الله يبارك فيكي

يمامة شاردة said...

متابعاكي في صمت بقالي أكتر من سنة .. حتى من قبل ما أعمل بلوج

إنسانة جميلة بجد

ربنا يكرمك يا غودة .. تستاهلي كل خير

.. تحياتي لاحترامك

:)

wanna b a bride said...

dr/afham serage

و عليكم السلام

أشكرك على النصيحة الأولى و التانية

التالتة بأه
ههههههههههههه
إعفيني
:))
----------------------------
إنسانة

أنا اللي كنت سعيدة فعلا بمكالمتك يا قمر

فعلا ربنا يخللي هشام لمصر كلها
--------------------------
إنسانة شوية و شوية

الله يبارك فيكي

الحمدلله إننا كنا السبب في ده
--------------------------
radwa

ما هو ده يا بنتي الوش التاني

انتي ماعرفتيش اني طلعت بوشين
:)

--------------------------
samourai

على رأيك ..بلا فلانتاين بلا بتاع

إحنا بتوع الكلام ده؟؟
--------------------------
مدونة المكتبيين بالمنوفية

إسم مدونتك بجد يخض

و كمان المنوفية
يانهار أبيض


ميرسي جدا على الدعاية

و يارب دعوات مامتك يكون فيه الشفا
:)))
تحياتي
-------------------------
anonymous

لا حول ولا قوة إلا بالله

معلش أصل النوعية دي بقت كتير في البلد

عشان بس الكل يعرف إنها حاااااالة عاااامة

و اننا في الهوا سوا

جمعااااااء

:))

تحياتي
غادة
---------------------------
safa7_jarmooz

يومين ليا و الباقي لغادة و رحاب

موضوع أسعدني جدا

الحمدلله

و شكرا لتنبيهك

أنا ساعات كتير ماباعرفش الحاجات دي غير بعد ماتعدي

مانت عارفني

خيخة و آخر من تعلم

شكرا ليك
--------------------------
مالك الحزين

ربنا يخليك

يارب أكون أستاهل الكلام الجميل ده

و انتظر مني زيارة قريبة إن شاء الله

ده شئ يشرفني
------------------------
desert cat

الله يبارك فيكي

دعواتك
-------------------------
raspoutine

الله يبارك فيك

ده بس بتشجيعكم
--------------------------
إجار الدين كشمش

الله يهنيك

أحسن ناس
--------------------------
z_diva

ياسسسلام

دا أنا أجيلك بنفسي و أجيب النسخة على حسابي

يااااااااالله

إن شالله ما حد حوش

أنا عندي أعز منك؟
--------------------------
بحبك يا مصر

طب ينفع الكلام ده

كل شوية يغمن عليا و مش عرفت أكتبلك غير بعد مافوقوني بالنشادر

:)
تحياتي

لحضرتك
---------------------------
dado

إن شاء الله

بس انتوا ادعولي
و كل حاجة هتبقى ألسطة إن شاء الله
:))

تحياتي

wanna b a bride said...

مهندس معماري اسكندراني

دي وجهة نظرنا

طبعا وجهة نظركم تحترم

لكن احنا مانقدرش نتكلم بلسانكم

يا ريت تعمل بلوج و تقول وجهة نظرك فيه

هيكون اكيد جميل قوي

أو ابعتلي قصصك ع الميل و أنا انقي منها اللي ينفع يتنشر في بيت العرايس و العرسان

إيه رأيك؟
---------------------------
gannah

ميرسي ميرسي ميرسي
---------------------------
سكر

أمااااااان يا باشا

و الله امااااااااان

شكرا ليك

و تحياتي للمدام
:)
--------------------------
semsema

طب و الله يا سمسمة تعبانة فيها فعلا

شكرا إنك ملاحظة ده

ياااارب كل واحد يلاقي نتيجة لمجهوده ياااارب
---------------------------
amal

طب ليه كده

طب شوفي اللينكات بأه

و عامة

الله يبارك فيكي
-------------------------
مشمش

الله يخليك

ميرسي جدا

بس لو تعمقتي في قراية المدونة أكيد هتفهمي إسمها صح

تحياتي
---------------------------
لحظة من فضلك

حاضر

إن شاء الله
--------------------------
my hopes

و لاتتكسفي ولا حاجة

قوليله عايزة الكتاب الأخضر بتاع غادة عبد العال

لو ضغت عليكي قوي بأه ابقي قوليه

هتعملي إيه يعني؟
:)

الكتاب في مكتبة دار الشروق اللي في سان ستيفانو مول

و بيقولوا فيه معرض دلوقتي في اسكندرية و الكتاب موجود فيه
--------------------------
رضوى عمرو خالد

شكرا ليكي يا قمر

انتي اللي قمر

إدعيلي
---------------------------
مصطفى كامل

تصدق فكرة
--------------------------
lets.live

يا عيني يعني اتشبهتي ع الفاضي

:))

ياللا ماهي شبهة حلوة بضه

تحياتي
--------------------------
حمامة

و هو مدحت شلبي وحش

ده قممممر

أنا جاية إن شاء الله
-------------------------
يمامة شاردة

دعونا لا نعمل في صمت

:)

تحياتي لكلامك الرقيق

Anonymous said...

The link of Al Ahram (Sandook l Donya) Ahmed Bahgat

http://216.109.125.130/search/cache?ei=UTF-8&p=%D8%BA%D8%A7%D8%AF%D8%A9+%D8%B9%D8%A8%D8%AF%D8%A7%D9%84%D8%B9%D8%A7%D9%84+%D8%B9%D8%A7%D9%8A%D8%B2%D8%A9+%D8%A3%D8%AA%D8%AC%D9%88%D8%B2&fr=yfp-t-501&u=www.ahram.org.eg/Index.asp%3FCurFN%3DAMOD5.HTM%26DID%3D9301&w=%D8%BA%D8%A7%D8%AF%D9%87+%D8%B9%D8%A8%D8%AF%D8%A7%D9%84%D8%B9%D8%A7%D9%84+%D8%B9%D8%A7%D9%8A%D8%B2%D9%87+%D8%A7%D8%AA%D8%AC%D9%88%D8%B2&d=fjhqhHDuQUOM&icp=1&.intl=us

Regards
Anas El Attar

Anonymous said...

ايه الحلاوة دى
الصديقة العزيزة برايد سابقا غادة حاليا

انا اول مرة اسمع عن المدونة بتاعتك لما شفتك من يومين على القناة الاولى
بصراحة عجبنى اسلوبك فى الكلام
بجد رررررررهيبة
صممت لازم اعمل سيرش وادور على البلوج بتاعك
واتفاجأت لما لاقيت انى اخر واحد دخل المدونة بتاعتك
معلش اعذرينى اصلى عايش بره مصر
المهم مش عايز اطول عليكى انا من الصبح ماسك الارشيف وهات ياضحك

بجد اسلوبك فى منتهى الروعة والخفة
وكتاباتك تنبئ عن مولد اديبة ساخرة على اعلى مستوى
ربنا معاكى

شريف

Anonymous said...

و الله جبارة

Anonymous said...

والله انتى زى السكر وده على سبيل الدعابة لتقولى مامتك نحلة ولا حاجة كلامك حلو وجذاب ورب الكعبة لو مش خطبت كنت جيت خطبتك كملى المسيرة وربنا يرزقك بابن الحلال صباحو فل وياسمين على عيونك يا دكتورة ...ارجو زيارة مدونتى هى سياسة بس يالله اتشرف انك تبصى عليها http://alazizay.maktoobblog.com/

finereem said...

انتى يا بنتى امورة و رقيقة و عسل جدا و لما شوفتك على الفيديو فى يوتيوب ماصدقثش نفسى انتى اخرك 22 سنة والله مش باين عليكى

noha haggag said...

ربنا يحفظك يا غادة... و يحميكى
حبيبت اسلوبك جدا فى الكتابة
ماتحرميناش من كتاباتك... حتى بعد ماتتجوزى ان شاء الله
و خصوصا ان الحواديت بعد الجواز بتبقى مادة اكثر تشويقا للكتابة
ههههههههههههههههههه
او انا بعتقد كده لانى زيك لسه انسة ... بس هم اللى قالولى... و محدش يسألنى هم مين ;))))))