Sunday, July 08, 2007

هيا بنا نصطاد


هاي يا جماعة..ليكوا وحشة و الله...بأه انا بأه ايييه..بعد ماقلتلكم على موضوع الكتاب ده المرة اللي فاتت انهمرت الرسايل على الإيميل بتاعي كالسيل..اللي مش مصدق..و اللي فاكرني باهرج ..و اللي بيتريق...لكن دول مش موضوعنا ..موضوعنا بأه هي مجموعة "كتع" اللي اتكونت بسرعة شديدة بعد أيام من نشر البوست...كتع ده إختصار ل "كيف تصطادين عريسا"..ماتخلوش مخكوا يروح لبعيد


المهم قسمنا نفسنا مجموعات ..مجموعة تدور على الكتاب و مجموعة تستقي المعلومات من الستات اللي قصص جوازهم ناجحة و مجموعة تبلغ البوليس...يووه قصدي مجموعة تعمل حصر للمعلومات و تلخصها بطريقة مبسطة و بعد كده يمكن احنا بأه اللي ننزل كتاب


أنا عن نفسي كان شاغلني قوي الموضوع ده و كنت مستغرقة فيه بكل جوارحي ...اللي أعرفها و اللي ماعرفهاش و عملت جولة تانية للبحث عن الكتاب ..لكن بدون أدنى بارقة امل ..تقدروا تقولواكده اني رجعت بخفي حنين -الناس المثقفة اللي بتبقى مستعدة كل مرة أسأل سؤال غبي زي ده يبقوا برضه يقولولي ايه موضوعة الأخ حنين ده- وكنت خلاص على آخر شعرة قبل ما يجيلي حالة احباط مزمنة و اكتئاب موسمي حاد ..ماهو واضح جدا ان انا فاشلة في موضوع الجواز ده.لكن كمان أبأة فاشلة في البحث عن الكتاب اللي بيشرح طريقة الجواز..لأ ده كتير قوي...قلت أخلع نفسي من المجموعة الأولانية و أنضم للمجموعة التانية و يمكن الموضوع يجي بفايده

أنا كل اللي محتاجاه حد بس يقوللي يا جماعة ..إعملي يا برايد و انا هاعمل على طول..دانا حتى شاطرة و نبيهة و بافهمها و هي طايرة في كل حاجة..مخي بس اللي مصدي و مابيشتغلش في موضوع الجواز ده.محتاج بس شوية صنفرة .و كل شوية يقولولي شدي حيلك شدي حيلك..و انا مش عارفة أشده إزاي...طب بس قولولي و انا أشده على طول

أنا قلت خلاص مافيش غير اولوا الخبرة و الأقربون أولى بالمعروف ..خليني أبدأ بعيلتنا.. يمكن.


أتاريني كنت باقوم بالحوار ده كله بصوت عالي و قدام جدتي

يا دي النايبة ...انتي اتهبلتي يا بت يا برايد والا ايه؟

لا يا تيتة ماتهبلتش ولا حاجة

لأ قولي قولي ماتخافيش..ماهو أنا قلت من زمان من أول ابني ماحب يتجوز الست دي اللي هي أمك...قلتله دي شكلها ضاربة و هتجيبلك عيال كلهم مجانين

ماما مش مجنونة يا تيتة دي ست الكل..هو فيه زيها

أيوة أيوة يا ختى ..مين يشهد للعروسة

لا يا تيتة لا ..ماتقوليش الكلمة دي في وشي أنا خلاص اتعقدت منها

اتعقدتي...أنا قلت من زمان لإبني لما جه يتجوز الست دي اللي هي أمك قلتله دي مكلكعة و هتطلعلك عيال كلهم مكلكعين

أوووه يا تيتة ..قلت لك مامتي زي الفل و بعدين دي جدعة جدا على الأقل عرفت تطلعلها بعريس زي الفل زي بابا ...والا ايه

طبعا أبوكي ده زي الفل ده ابني انما أمك

هاااه

حلوة برضه حلوة ..أهي خلفتكوا و خلاص...لكن قوليلي انتي اتعقدتي خلاص...لأيه يا بنتي..ده النصيب بيجي في ثانيه

ما هو مش راضي يجي يا تيتة ..مش عارفة جاي ماشي من حلايب و الا ايه اللي معطله ...قوليلي يا تيتة انتي اتجوزتي ازاي..يعني كانت ليكي طريقة كده وقعتي بيها جدي والا ايه؟

بس يا بنت اختشي

لا و النبي يا تيتة اديني من خبرتك ..أصلي خايبة قوي في المواضيع دي

مع ان أمك بالذات استنصحت في الموضوع ده.نهايته.يا بنتي مافيش راجل بيتجوز كده بمزاجه لازم حد يزقه ..أمه بأه إخواته...و لو لا دول ولا دول يبقى العروسة نفسها

يا سلام ع الخبرة يا تيتة ..الدهن في العتاقي صحيح

أمال ايه..إسأليني أنا..دانا كنت زمان ايه..يا سلام ع الأيام..دانا كنت مبهدلة الدنيا

أيواااه مبهدلاها ازاي بأه اشرحيلي ربنا يخليكي

ببصي انا هاديكي خبرتي ..بس ده ايه يبقى بيني و بينك ماتحكيش لحد و تضيعي هيبتي قدام العيلة

(آه دا واضح ان الموضوع خطير ..اديني خبرتك يا تيتة( أنا شكلي هانصدم في العيلة دي

أنا كنت بأه حلوة أحلى بنت في المنطقة

مش باين يعني

ايه؟..بتقولي ايه علي صوتك

لا مافيش حاجة ..بقول ماهو واضح

آه كنت أطلع بس في المشربية أملى القله و اطول شوية يكون الشارع انقلب و ليلتها يكون عند أبويا 4 عرسان

بس كده تطلعي تدلعي و تملي القلل

و هي دي كانت شوية مانا كنت باطول شوية و أدلدل الضفاير اللي لون الدهب من الشباك و يهفهفوا مع كل هبة هوا و احنا الصراحة كان عندنا قلل كتير

طب و اللي ماعندوش قلل زي حالتنا يعمل ايه

يعمل ايه يعمل ايه؟..مش عارفة يا بنتي و الله صحيح مانتو جيل غلبان ماعندوش قلل



عمتي فادية و بسبب هوايتها المفضلة في تلميع الأكر سمعت الحوار

قلل ايه يا ماما اللي انتي بتعلميها للبنت؟..بصي يا برايد يا حبيبتشي أنا بأه كانت عندي طريقة ماتخرش الماية

خير

كان عندي حتة جيبة ميكرو كده حمرا و معاها بوت طويل و انتي عارفة الرجالة بأه و اللون الأحمر..أمشي بيها بس خطوتين في شارعنا بهدوء كده وواحدة واحدة أشتري حاجة من هنا ..حاجة من هنا ..أركب تاكس أنزل منه ..أتلحلح شوية يعني ...يكون باليل عند أبويا 5 عرسان

مرة واحدة

مرة واحدة...هو جاب جوز عمتك الا هيا

طب و يا طنط واللي مابيلبسش ميكرو جيب ولا حمرا ولا خضرا يعمل ايه

يعمل ايه يعمل ايه...و الله مانا عارفة...صحيح دانتوا جيل غلبان ماعندكوش ميني جيب

كويس جدا...ماطلعتش أنا منكم بحاجة مفيدة يعني أروح دلوقتي لهند بنت اماني يمكن أطلع منها بخطة تنفعني

اسمعي بس استني انتي رايحة فين ..مافيش غير عمتك راقية دي بالذات أكيد عندها والا مليون خطة انتي عارفة دي اتقدملها كام عريس

مش المهم الكوانتتي المهم الكواليتي و بعدين الأهم ان حاجة تتم

ماتقلقيش هيا دي اللي هتجيب المفيد


و طلبنا طنط راقية في التليفون ..اتأخرت شوية عشان ابنها كان بالع مسمار و جوزها كان متجبس بعد ما كسرتله ضلعين و هي بتهزر معاه بعد خناقة بسيطة كده بينهم و بنتها كانت واقفة على سور البلكونة و مصممة تنط زي ثبايدر مان..جوازة ناجحه جدا جوازة طنط راقية هي دي اللي هاتجيب النصايح التمام

و جت طنط راقية

بصي يا حبيبتي انا كان نفسي أقعد معاكي من زمان خدي مني بأه النصيحة التمام..الرجالة دول عاملين زي الطبلة فاضيين من جوه و لازم تسكيها عشان صوتها يطلع

يعني ايه؟

بصي انتي تعمل زي ماعملت مع عمك محسن..تنقي الراجل اللي يعجبك و تقومي ماشية وراه في الشارع

أعاكسه يعني

يا بنت انتي مخك فين لا تخليه هو يعاكسك

بالعافية يعني

يا دي الغباء ..لا يا ستي تطلعي قدامه و بعدين تلفي و طاخ

طاخ؟

تديله حتة قلم يخلي ودانه تصفر أسبوع

طب ماهو يمكن يردهولي ..أتهزق انا بأه و أنضرب في الشارع

لا يمكن..الراجل أول مايشوف كف ايد واحدة ست و هو نازل يطرقع على خده بتتغير حياته تمااااما

يا سلام

أمال ايه..العبط يقولولك الطريق لقلب الراجل معدته ..كلام فارغ الطريق لقلب الراجل بيبدأ بخطوة واحدة..كف ايدك و هو معلم على خده..أمال أنا عايشه أنا و جوز عمتك في سعادة بقالنا 9 سنين ازاي

و هو ازي دراعه هيفك الجبس إمتى

قريب ان شاء الله..انا عارفة ايه ده ؟...رجاله خرعه

طب و بعدين يا طنط يعني أطرقعله يخطبني

لا يا خايبة انتي بعد ماتطرقعيله تديري تنادي أمين الشرطة و تقوليله الراجل ده بيعاكسني جره ع القسم ..يقوم العريس يخاف و يفضل يتجوز بدل ما يتسجن

يعني أبتزة و أتجوزة بالإكراه

يوووه ..هتعمليلي فيها أم ضمير..هيا الرجالة مابينفعش معاها غير كده..اسألي مجرب

طب و يا طنط لوما فيش أمين؟..هو أصلا الأمين ده شكله ايه؟ أنا عمري ماشفت واحد طول حياتي

لو مافيش أمين ؟..لو مافيش أمين؟..أهي دي بأه ماعملتش حسابها زمان كان دايما بيبقى فيه أمين..ربنا معاكو دانتوا جيل غلبان ماعندكوش امين



حاولت قدر الإمكان أنفذ النصايح على أد ما قدرت


مالقيتش قلل ..بس لميت كل قصاري الزرع و قعدت أسقي فيها في البلكونة ماحصلش حاجة

ما قدرتش ألبس ميكرو بس جيبت بوت أحمر و قعدت اتمش في شارعنا من صباحية ربنا لآخر اليوم لغاية ما رجلي فقفقت و بررررضه ماحصلش حاجة

مشيت في الشارع و اتديرت عشان أضرب اللي ورايا بالقلم و قبل ما أرفع ايدي كان رافع عليا مطواه و سارق الموبايل..آآآآه لو كان بس فيه أمين شرطة..لكن نعمل ايه نصيبنا...جيل غلبان ماعندوش أمين


باختصار كل النصايح طلعت فاشوش ..أو يمكن انا اللي حظي فاشوش

ده مش يمكن ..ده أكيد

بعد الإجتماع الأول لجمعية"كتع" المصرية القومية الإشتراكية العظمى و بعد حصر كل النصايح اللي لموها العضوات من أهاليهم و زمايلهم و حتى بعض الإميلات و التعليقات على البوست اللي فات عندي هنا..و بعد تجربة بعض النصايح دي اللي معظمها أثبت فشلها الذريع ..و بعد الفشل في الحصول على نسخة واحدة من الكتاب الموعود...قررنا ان إجتماعنا الأول يبقى هو إجتماعنا الأخير...و على كل مواطن تدبير وسيلة جوازه بنفسه


مع مراعاة ان المنحوس منحوس...ولو شبكوه في الجواز بدبوس


97 comments:

خيرالدين said...

هييييييييييييييييييه
أول تعليق
أحجز وبعدين اقول رايى

Anonymous said...

dear bride
join a club, find a charity project all these places are full of guys and good luck

خيرالدين said...

بجد اسلوبك مش محتاج انى أقول انه متميز وطريقتك الساخره لها مذاق محبب لكل الناس
بالنسبه بقى للقلل فدى فعلا احد اسباب تأخر سن الزواج فى مصر
كمان دخول المياه للبيوت وعدم خروج البنات للغسيل فى مياه الترع خوفا من البلهارسيا اثر بشكل كبير
انما المينى جيب الحمرا مش لون خالص بصراحه الموضوع محير
انما الموبايل اللى اتسرق فاحنا هنشوف زملائنا اللى شرقوه ونعرفهم انك تبعنا

خيرالدين said...

ايه شرقوه دى
اقصد
شرقوه

Anonymous said...

ههههههههههههههههههههه
بجد يا برايد انتى تحفه..ولو ان ساعات المبالغه مبتبقاش مطلوبه..بس بجد اسلوبك جااامد
انا عارفه يا اختشى الرجاله تايهين عنك فين..ولا تكونى على الحقيقه ظااابط
بس متخافيش..انا قاعده معاكى..لايمكن اتحتح كده ولا كده..انتى بس ادينمي العنوان وانا اجى اونسك..ههههههههه
تحياتى

Anonymous said...

فين ايام القلل و الميكروجيب
وانا اقول ليه نسبة الجواز قلت فى البلد ليه
بصراحه اسلوبك مميز و جميل

Unknown said...

انتي تعملي انك مطنشه وثقيله على الرجاله وبعد كده هم يقولك اصل احنا يا صنف الدكر ما بنحبش إلا الحاجه الي مابنطولهاش

Anonymous said...

dear bride
i think it's time for u to go international send me your c.v. and i will do what i can.

ftataljanna said...

بجد موبايلك اتسرق يا خبر ابيض بجد ولا بتهزرى

والكلام ده حقيقي عماتك وخالاتك قالوا لك كده

بصي يا حبيبتى

انا بصراحه حاولت اكتب لك اى نصيحه ما عرفتش فقلت احكى لك حكاية حنين ولا يحكي الا انا

ده واحد عقله على اده كان معاه جمل محمل مشي وراه حرامى العبيط الحرامى رماله فردة جازمة خف يعنى كان اسمه كده فالراجل ضاف فردة جازمة فى الصحراء طنش ومشى وبعد مسافه كبيراااااااااااه اوى رما له الحرامى الفرده التانيه شافها راح واخدها وراكن الجمل عل تل صحراوى ومن غبائه ساب المفاتيح :D
فراح جاى الحرامى واخد الجمل بما حمل ومشي

ورجع اخونا فى الله
بخفى حنين
اصل كان اسمه والله اعلم حنين

وربنا يرزقك بابن الحلال يارب انتى وبنات المسلمين يا برايد يا بنت ام برايد

اللهم امين

قطر الندي said...

بصي يا برايد يا ختي ماتتعبيش نفسك و تدوري علي طريقه طنشي عريس ايه بس اللي بتدوري عليه دا يا بنتي الجواز دا مقلب و اذا ماكنتيش مصدقاني بصي كدا حواليكي هتلاقي نفسك بتقولي اللي خدته اللي اسمها ايه تاخده ام شعر و بعدين احنا لازم نكبر دماغنا علشان الرجاله ماتتغرش علينا اكتر من كدا موقفنا بقي وحش اوي

m.bazeed said...

اول مرة تكتب تعليق فى مدونه واحد ماتعرفوش بس معجب بكتاباته بيبقى حاجة كدة عاملة اكنك خبطت على جارك ودخلت عنده من غير اذن وقفلت الباب كمان وطلبت واحد شاى
ماعلينا
المهم كالعادة اسلوب جامد فحت يخليك مبسوط وانت بتقرا ولا اكنك دودة فى مقبرة جماعيه على راى عمنا احمد خالد توفيق ...وعلى العموم ياستى لو كل البنات الى لسه ماتجوزوش فى جمعيه كتع زيك كدة ان مستعد اتجوز اتناشر منهم لوينفع

سجدة said...

شوفى جدتك كانت تملى القلل بس يجليها 5 عرسان
انتى بقه خارجة داخلة طول اليوم
ولا اى حاجة
سبحان الله انا الصراحة فهمت من كلام جدتك قد ايه المرأة كانت عزيزة والرجلة تتمنى تشوف ضفرها دلوقتى ولا لينا لازمة

Islamist Bloke said...

لو القلل منفعتش هاتى زير
:p

لا بجد.......... الوضع فعلا اصبح سخيف........... وبيني وبينك اللى الواحد بيشوفه فى الفضائيات يخلى الواحد قلقان اوى اوى من اللى هتلبس ميكروجيب احمر......يعني اتجوز واخرج من البيت وانا مش مطمن؟

ربنا يرزقك يا برايد

Anonymous said...

الصديقه العزيزه برايد طبعا تعليقك حتي لو كان فكاهي فاكيد بيحمل معاني والام بتحس بيها جميع بنات مصر

بصي يا برايد انا شاب ولازم تعرفوا ان الشباب بيعانوا زيكم بالظبط ونفسنا نتجوز اكتر منكم لكن في مشكلتين برايد اولا هي المشكله الاقتصاديه المشكله مش مشكلة عدد او البنات اكتر من الولاد لا المشكله ان مفيش اي شاب جدع وعنده احساس بالمسئوليه وحب بنت فعلا هيقدر يتقدملها وهو عارف ان وضعه مينفعش اللي لسه متخرج وادامه جيش الشاب اللي في الكليه اللي عارف انه ميقدرش الشاب اللي لسه في بداية شغل يعني كل المراحل اللي بيمر بيها اي شاب بتخليه ياجل الارتباط خوفا علي كرامته انه يتهان لو اتقدم لبنت وهو مش جاهز
ثانيا يا برايد المشكله التانيه فيكم انتم انتم مش عايزين جواز بمعني شاب جدع يفهمكم تقفوا جبه وتسندوه في اول الطريق ولكن زي ما بيتقال احنا في عصر السرعه انتم عايزين شاب مسافر بره عنده شقه جاهز علي طول بالملخص نفسكم قصير كمان لاحظي ان معظم بنات جيلكم مبتعرفش تطبخ ولا تسلق بيضه حتي وده واصل لشباب كتير
كمان في مشكله خفيه ساعات انا بنزل الشارع واكون لابس شيك جدا لكن بيجيلي رهبه لما بمشي والاقي كل البنات وهم محجبات في اخر شياكه واحلي لبس فالبنت الممميزه اللي انتم بتكلموا عليها صعب اكتشافها او بمعني اخر انتم خليتم مناطق الجاذبيه في شيء واحد هو المظهر واجبرتم الشباب ان ينجذب للمنطق ده فقط لكن محاولتوش تظرهوا مناطق تانيه زي الثقافه العامه بنت راحه تشتري كتاب مش مجله بنت عندها موهبة رسم وعايزه ترسم وتروح لمعرض تشتري برواز وهكذا مش نمشي نروح نشتري لبس او نتمشي وخللاص اتمني تكوني نصايحي عجبتكم وريجتني وريحتكم

شيمـــــاء said...

بقى بذمتك مجالكيش عريس من المدونة دى بجد
يا ستى اقبلى و جربى بس من المدونة هتلاقى عرسان اكثر نظافة

Unknown said...

أنا قريت المدونة كلها تقريبا
عسل عسل عسل
ربنا يوفقك للخير

Iskanderani said...

يا بنتي انت والله خفيفة الدم أوي؛ أنا مُش مصدق إنك مش لاقية الطبلة اللي تُسك عليها علشان صوتها يطلع، انت اكيد بتهزري

تحيات إسكندراي في بلاد الله الواسعة

عمر عاشق القرآن said...

الله يرحمه مصطفى كامل قال "لا حياة مع الياس"
بس برضه الله يرحمه سعد زغلول قال "مفيش فايدة" !!!

طب ما تجربى انك تعملى اعلان فى الراديو على نجزم F M
او توزعى ورق على باب الجامع علشان يجيلك واحد ابن حلال بيصلى

فكرة جديدة ..صح؟

Abeer said...

فظيعة بجد بلوج تحفة
على فكرة الوقفة في الصيدلية بتجيب عرسان كتيييييير :)
بس يا خسارة
مبقاش في عيانين
جيل غلبان صحيح

washwasha said...

على كل مواطن تدبير وسيلة جوازه بنفسه

فعلا هو ده الحل الأمثل ولم يبق لي وسيلة سوى الدعاءبالستر و كثرة الاستغفار
اللهم اكفني بحلالك عن حرامك واغنني بفضلك عمن سواك

Anonymous said...

Reply to Anonymous
حضرتك بتتكلم عن أول الطريق والصبر والخريج الجديد اللي وراه جيش ولسة في بداية الشغل... كل الناس دي سنها مناسب للبنات من 20 إلى 24 سنة...
كلمني بقى عن بنات التلاتين.. اللي منهم كتير اشتغلوا واستقلوا وربنا قدرهم يوفر لأنفسهم مستوى معين من الحياة... تقدر تقولي إزاي دول مطلوب منهم يستحملوا صعوبات البداية.. البداية اللي بنات التلاتين خاضوها لوحدهم... ومطلوب يستحملوها مع واحد سنه يتراوح من التلاتين إلى الأربعين.. ما هي بنت التلاتين ما تتأمرش على السن... هي طايلة..
بصراحة... مش معقول يعني بعد ما الواحدة تقضي أحلى سنين العمر لوحدها بتحلم.. تصحى متأخر قوي على حقيقة مطلوب منها تستحمل فيها صعوبات البداية لحد ما تبقى أربعين وللا خمسة وأربعين سنة!!!
صعوبات البداية اللي من ضمن طرق التغلب عليها تأجيل الإنجاب لحد ما نستقر شوية ونخلص من أقساط الشقة والعفش والأجهزة.. تأجيل الإنجاب لحد امتى لواحدة فوق التلاتين؟ لحد سن اليأس مثلاً؟
صعوبات البداية اللي بنتغلب عليها بتأجيل الفسح والمصايف والخروجات من أجل التوفير... لحد أمتى بردوا؟ لحد ما نبقى محتاجين نوفر الفلوس دي عشان فلوس دكتور الروماتيزم ونقاطع خروجات العشا بره عشان الكوليسترول والنقرص وارتفاع ضغط الدم؟؟

يتهيقلي كده وضحت إنها هتبقى بداية ونهاية

بصراحة... أنا مقتنعة تمامًا إن اللي كنت هاقبل بيه وأنا طايرة من الفرح وأنا عندي 20 سنة... لا يمكن أستحمله دلوقتي... مش كِبر ولا حاجة... بس اللي تاكله على الفطار ما يشبعكش على الغدا
بنت التلاتين طبعًا لسة نفسها تتجوز... بس مش عشان ضل راجل ولا ضل حيطة... لأنها خلاص اتعودت على الشمس وجلدها نشف واسود وماعدتش الشمس تخوفها ولا محتاجة ضل حيطة تحوشها عنها... أو لأنها خلاص عملت لنفسها الحيطة اللي متحاجاها واتعودت عليها... بنت التلاتين محتاجة جواز من غير صعوبات البداية المادية... كفاية قوي قوي صعوبات التكيف مع الآخر... لأنه مهما كان الحب والتفاهم، اكتشاف الآخر بين جدران البيت الواحد بيكون مختلف تمامًا عن اكتشاف في صالون بيتنا أو بيتهم وفي النوادي والكافيهات والشغل... وما تنسوش إن بنت التلاتين دماغها استوت قوي ونشفت عن بنات العشرين!
بنت التلاتين مش ناقصها صعوبات البداية لأن الوحدة اللي عاشت فيها العشر سنين اللي فاتوا كفاية عليها... واللي استحملت عشر سنين لوحدها تستحمل غيرهم لوحدها بردوا وإلا هتبقى بتغير نوع مشاكلها والسلام.
أنا مش باقول مطلوب فيلا وعربية ولا شقة خمسة غرف وثلاثة رسبشن مكيفة... بس حاجة موازية للي أهلها معيشنها فيه... ما قلنا مش بعد عشر سنين حلم وأمل تنزل على جدور رقبتها عشان تبدأ من الصفر.

ربنا يصلح حال المجتمع والناس كلها ويحسن ختامنا جميعًا إن شاء الله.
عارفة إن نكدت عليكم... بس معلش... ما خلاص.. الشمس ما عادتش بتلسع لأننا اتعودنا عليها!

Ma 3lina said...

ايه يا برايد كنت فكراكى انصح من كده

نصايح ايه يا بنتى اللى تاخديها من جدتك و عماتك الزمن غير الزمن

احنا بقينا مختلفين عنهم و الرجالة غير الرجالة زمان

يالا مااا عليناا

بقولك ايه رجعولك الموبايل و لا لسه؟؟؟

emos said...

eh ya bride mesh tes2aleny
dana emos
medaweba wa7ed bs

kol ma fel amr ennek te7dary kol 7aga momken tet7eder
3aza ro7y
2 2e3mely habla w 7'oshy ma3 el regala
fara7 matsebeesh
seboo3
2ehgemy
kol el monasbat wel mogamalat elly fel donia ro7eha

mato3odesh fe betko
w kol monasba men dool tero7eha 2et3arafy 3ala 2ommet la elah ella allah mesh regala ya3ny
la2 kol el setat elly henak
belta2keed lehom 2e7'wat arayeb 2ay 7aga

w 2e7'rogy keteeeeeeeeeeeeeeeeer keteeeeeeeeeer

w isa ba3d kol dah mesh hatla2y 3'eer nasebek
7aga waga3 alb

rabena yerzo2ek w yerzo2ny
7asebya allah

Samir Saad said...

Hiiiiiiiii Bride,
على فكرة أنا عايز أقول لك حاجة. النهاردة وانا في الاتوبيس 825 كان في اعلان ملزوق على الشباك عن شركة اسمها التوفيق. دي يا ستي شركة لتوفيق العرايس على العرسان. وسايبيين أرقام تليفوناتهم لو تحبي تتصلي اهو أوفر من ثمن كتاب. واضح ان المشكلة زادت وبعد شوية راح يكون في مكاتب للتزويج. سماسرة يعني.

أول ما شفت الاعلان أفتكرتك. فلزق في دماغي الرقم التالي وهو احد أرقام شركة التوفيق

0108102221
سلام

Unknown said...

شوفى يا برايد يا بنتى
الحكاية زى ما قالت ستى
قسمة ونصيب
انا لما اتجوزت
كانت البنت قدام عيينى
وعمرى ما اتخيلت انها ليا
ودلوقتى بقول
مش عارف لو اتجوزت غيرها هيكون إيه مصيرى

الكلام نوعان :كلام فارغ وكلام مليان كلام فارغ said...

يابنتى احنا جيل غلبان اوى اوى
ايوه يعنى يعنى ابتداء من اول العرسان نفسهم
ممكن توقعي لك عريس ويطلع غلبان وتقعدى تندبي حظك بقيت عمرك
يابنتى نحن في زمن صعب

reri said...

متبعاكي من زمان
بس دي أول مره اعلق
أصل المره دي مختلفه
كنت عايزه أقولك إن النصايح مش بتنفع في المواضيع دي
كل حاله ولها ظروفها
وكل حله ولها غطاها
ولغاية ما نلاقي الغطا
أدينا بنسخر من الحاله الكرب اللي إحنا فيها
علي فكره أنا صيدلانيه زميلة كفاح يعني

إسلوبك كالعاده سكر
سلامااااااااااااااااات

reri said...

أنا ضفتك علي المسينجير
يا ريت تضيفيني
علشان بجد عايزه اتكلم معاكي

ROMANTIC ROSE said...

انتي جربتي حضور الأفراح ؟؟
جربتي دروس العلم ف المساجد ؟؟
جربتي تروحي للخياط/الخياطة ؟؟
جربتي تركبي الترام/الاتوبيس و تقومي و تقعدي راجل/ست كبير ف السن ؟؟

علي فكرة انا ما بهزرش .. 90% من معارفي و صحباتي بما فيهم أنا شخصيا اتجوزا كده .. هقولك ازاي ..

أنا اتعرفت علي جوزي ف فرح .. عجبته و اتكلمنا و طلبني ..

صاحبتي الأنتيم حماتها اتعرفت عليها و اعجبت بيها و زكيتها لابنها من درس العلم ..

و واحدة تانية جوزها لاحظ ترددها علي المسجد و حبها كده لله ف لله و لقيته ف خلقتها ف البيت بيخطبها بدون ما يكلمها كلمة واحده ..

و جدتي حماتها خطبتها لجدي من عند الخياطة .. شافتها و عجبتها و خطبتهاله ف فترة عمل تايير !!

أخت واحدة صاحبتي كانت قاعده ف الترام ف امان الله لقت الست اللي قاعده جمبها بتقولها انتي مخطوبه .. قالتلها لآ .. قالتلها ابني بيدور علي عروسة !!

و اخيرا واحده صاحبتي جدا كانت قاعده ف المكيف و طلعت ست كبيره ولا حد اتحرك يقعدها .. قامت قايمه البنية و مقعدة الست مكانها .. قام الواد اللي كان قاعد قصادها علي الصف التاني اعجب بأخلاقها و طلب يقابل باباها ف ساعتها ..

ايه رأيك بقي ؟؟ جربي يا بنتي مش هتخسري حاجة .. جربي ما تيأسيش !! ربنا معاكي :)

Bride Zone said...

باب النجار مخلع للاسف..
حتى لما يجون العرسان بيكونوا عاهات غير قابلة للتاهيل..!

أنا بديت ايأس من الموضوع ده خلاص.. تعبت وأنا استنى.. واللي بدوا يخطبوني اليومين دول واحد عنده 45 سنة.. واحد عاوز وحدة يقعدها في البيت.. واحد ما معوش حتى ثانوية عامة.. أنا مش عارفة الناس دي بتتلم علي ازاي..؟ أمال الرجالة القدعان بيروحوا فين؟

ساعات كنت بشك ان العيب فيني بس والله بنت زي الفل الحمدلله.. يبقى الخلل فين..؟ الحمدلله على كل حال..
ادينا عايشين بدون رجالة بلا هم بلا نكد..

Layla said...

ايه اليأس دة...لا لا لا يا برايد...انا ماكنتش فاكرك كدة خالص...لازم يكون عندك عزم وارادة اكتر من كدة

ايه يعني مشيتي يوم في الشارع لحد ما رجلك باظت...ايه يعني موبايلك اتسرق...كل دة مش مهم...المهم الهدف الاسمى اللي بتسعي وراه...العريييس

Anonymous said...

عايز ابدى اعجابى الكبير بكلامك يا برايد ربنا يوفقك فى كتابتك دى

خمسة فضفضة said...

السلام عليكم ورحمة الله وبركاته


ههههههههههههههههه

لا حول ولا قوة الا بالله

علي فكره زي ماقالت الزعيمه الوقفه في الصيدليه بتجيب عرسان انا عندي في الصيدليه 2 صيادله بنات كان كل شويه يجيهم بالاتنين والتلاته لحد ما قفلت الباب دا خالص وقلت للي بيتقدموا دي صيدليه مش محل خاطبه

واحده من الاتنين صيادله اتخطبت والتانيه لسه
يلا عقبال يا برايد


تحياتي

Anonymous said...

كتع
صيدلية جميلة خفيفة الظل زيك مش لاقي عريس
قلل غير موجودة
ميني جيب احمر وبوط
قلم وامين شرطة
يبقي انت صحيح في مصر

الاول انتي اكيد مش نفذتي نصايحي اللي كتبه ليك
ثانيا تصدقي فعلا ان موضوع دخول المياه البيوت اثر ع معدلات الجواز وخصوصا ان ملي المياه ديه الطريقة اللي بيتجوزا بيها البنات من ايام سيدنا موسي
يعني مشاريع البنية التحيتة بتاع حسني ديه هي اللي رجعتنا وراء
خصوصا انه حتي تصريف المياه بيجب عرسان واسالو ا لينا مراة مسعودي
يبقي عليك وع تدمير شبكات الصرف الصحي ف المنطقة وكل المناطق
وزعي منشوراتت قولي لك اللي بيقرا مدوناتك وهم كتير انا عارف انهم يحاولوا يفجروا مواسير المياه بنوعيها الصرف والتوصيل
ونرجع تاني لايام وانا نازلة ادلع املي القلل
بالمناسبة مفيش حد بارك لي ع الترقية اللي خده انا بقيت مستشار زي مكي وبسطويسي كده

S H A H said...

ولا رديتي عليا في البوست اللي فات و حلقتيلي

انتو العيلة عندكم كلهم فقريين كدة حتى تيتة

الطائر الحزين said...

السلام عليكم

جميل التدوين واسلوبة لا غبار علية

لا قلل قناوى ولا ميكرو جيب أحمراوى ولا قلم يرن ولا قلم رصاص

اقول لك نصيحة

ومن يتق الله يجعل له مخرجا ويرزقة من حيث لا يحتسب

افضل رزق هو زوجة صالحة

بارك الله فيك

Anonymous said...

ازيك يابرايد وحشتيني
انا هعلق المرة دي عالاسلوب بس
الاسلوب رائع كالعادة
واول مرة احس ان احنا جيل غلبان بجد
انا داخلة الحقيقة اعلق على التعليقين الي وجعوني اوي
من مجهول والرد على مجهول
بجد يا جماعه كلامكم واقعي جدا وحزين جدا
انا مش بنت تلاتين ولا حاجه
انا لسه بنت عشرين
بس لما كملت العشرين حسيت بخوف شديد مش عارفه ليه
طلباتي ف الجواز هيا الحب والامان
بس اهلي صدموني وقالوا الحب مش كل حاجه
وانا عارفه ان بعد الجواز هنوصل انا وجوزي لمرحلة التعود وعند المرحلة دي فعلا الحب مش هيبقى كل حاجه
بس انا شايفه انا متعة الحياة مش ف انك تلاقي كل حاجه
انك تلاقي كل حاجه وقت ما تحب وتجيلك ف اسرع وقت زي ما بتطلب وجبة سخنة يجيبهالك الديلفري كده دي اسمها رفاهية
والرفاهية مش متعه
لانك لا تعبت فيها ولا انجزت ولا تستاهل تكافيء نفسك ولو بالفرحه عليها

انا حبيت ومازلت بحب شخص ف العشرينات برضه
ورغم ان اهلي معارضين لانه مش جاهز الا اني شايفه ان مستقبله بإذن الله مشرق
ولو متعبتش ف البيت الي هبنيه يبقى سهل عليا اني اسيبه او حتى اهده
ياريت بجد الاهالي فهموا كده
ويفهموا انهم ساعات بحبهم وخوفهم علينا بيكبتونا
وبيخلونا مش م
تحملين للمسؤولية
ياريت يخلونا نبدأ بداية ما تختلفش خالص عن بدايتهم
ياريت يسيبونا احرار وبايدينا مصيرنا
ياريت ربنا يهديهم

شكرا برايد عالمساحه الي ادتهالي مدونتك للتعبير والفضفضة

Unknown said...

السلام عليكم
كالعاده أسعدني توقفي بمدونتك اللذيذه
ما شاء الله ربنا يوفقك وينجحك كمان وكمان
أقصد النجاح الساحق بالمدونه والنجاح الماحق بالزواج
ألاّ بجد هوّ ماحق يقرب لساحق ؟
ياريت تقومي بزيارة أشهر المواقع العالميه
http://www.aboutarek.com/
عقبالك يا برايد الشهره حلوه
حاولي تحطي إعلان عندهم
ممكن تساعد بحل مشكلتك
ههههههههههههههههههههه
ياريت تديني رأيك بمفهوم العالميه الجديد عند أبوطارق
تحياتي
وليد من الكويت

كراكيب عادل said...

برايد يا برايد

اغيب عن مدونتك اجي القاك بتعلمي البنات الاصتياد

واية اصتياد عريس

انا هقولك ان الكتب مش بتعلم في المواضيع دي بالذات

اسئليني انا علشان اتجوزت

بس بجد مدونتك وحشاني من زمان

طيب انتي ولا مرة تطلي علي الناس

هرجع اقرا تاني

:)

Anonymous said...

سلام،،،
عزيزتي احلى ما في البوست بتاعك انك بتعبري عما يدور في خاطري (على اساس انا عانس قديمه) كل هذه التساؤلات ناقشتها مع زميلاتي بس ما فيش فايدة.
احيي برايد التي تمثل اغلبية في زماننا

Unknown said...

يا برايد ياحبيبتي ان شاء الله نصيبك هيجيلك من غير مخططات ولا مؤامرات
باذن الله قريب هتكتبي بوست تقوليلنا فيه خبر حلو
:))

islam yusuf said...

يابوى
ايه الجشطه دى
حاجه فل

دى أول زيارة و أكيد مش هاتكون الأخيرة
أسلوبك جميل جدا
و الجميل أكتر انك بتحاولى تحلى مشاكل مش عايزه تتحل
و مين وفق راسين فى الحلال.....
ممكن أقترح اقتراح
كل واح أو واحده ليهم غرض للجواز
يتقابلو هنا على الصفحه بتاعتك
و أهو تاخدى ثواب

Unknown said...

برايد ياجميييييييييلة

جربى نصايح رومانتيك روز .. باين عليها بتجيب نتيجة واسأل مجرب عليها وعلى صحابها وكدة
وانا كمان اختى جوزها عرفها فى فرح
هييييييييييه

بس انا مبحبش الأفراح

وفى فرح اختى لزقولى عريس من خيالهم اصلا والواد غلبان ماتكلمش فى حاجة اساسا
ههههههههههههههههههه

لالا بجد جريبهم انا ححاول انا كمان وربنا يسهل يااااااارب

عايزة اقولك حاجة
ادعى كتير بالدعاء ده

اللهم يا جامع الناس ليوم لا ريب فيه إجمع بينى وبين الزوج الصالح

و

رب إنى لما أنزلت إلى من خير فقير

و

استغفرى ربنا كتييييييير

بجد انا اختى اتجوزت اكبر منك اساسا وكنت انا اللى بصبرها دايما ومش عايزاكى تيأسى ابدا بالله عليكى

خالتى حبيبتى قالت كلمة حكمة
كل بنت مسيرها حتمشى ويبقى ليها بيتها وجوزها

وانا شوفت بنات كتير جدا صبروا كتير اوى واكبر منك بكتيييييير
اخرهم واحدة قريبتنا وصلت ل 36 سنة وصابرة سبحان الله ربنا رزقها واحد كويس جداااااا وبميموت فيها ما شاء الله بعد ما الكل كان خلاص فقد الأمل وفرحها فى شهر 8 ان شاء الله

يارب يارب يارب البوست الجاى اسمع خبر حلو عنك اللهم امييييييييين

سلامى وحبى ليكى فى الله أويييييي
:)

Abo Amr said...

كالعادة
اسلوب محبب الى النفس
يشجع على القراءة الى اخر فتفوتة

انا مع لارا في كلامها
مجموعات الخير مليانة شباب زي الورد

Nouran said...

يا بنتي حرام عليك وجعتي قلبي
ايه القلل وميكروجيب والتالت تسرقي الموبيل ههههههه حاجة تضحك وحاجة تغلب
ربنا يرزقك يا برايد يا بنتي :)

شقاوة شعب said...

طب الميكرو مش هقدر البسه والقلم مش هقدر اضربه
لكن انا عندى قلة فى البيت فى البلكونة املنا دلوقتى كله فى الله ثم فى القلة
برايد بجد انا كل مابقرالك بتشائم
اتفاءلى شوية يا شيخة
ادينا اى بادرة امل

Anonymous said...

بجد مدونتك تحفة و لطيفة موووووت
انتي اسلوبك مميز وجميل ودمه خفيف وربنا يكرمك ويكرم البنات كلها

mary victor said...

هههههههه بتقتلينى إنتى يا برايد
بقولك، ما تنزلى إعلان فى الوسيط
ما تتأخريش علينا بأة، المعجبين مش بيقدروا يستنوا إرحمينا

wanna b a bride said...

e7na

منورين

بس حاجزين عادي والا نوم؟
-----------------
lara

مين قاللك اني ماعملتش كل ده

عموما كله على الله

تحياتي
----------------
e7na

فعلا القلل دي من المفاتيح الرئيسية للجواز في مصر

يا سلام على زمان اللي كانوا بيتزلوا يتدلعوا يملوا القلل هما دول اللي كانوا بيخلصوا قوام قوام

الموبايل اللي شرقوه ده لو حد يعرف طريقة يرجعه يا جدعان
مش هيبقى موت و خراب ديار
-------------------
myself

عاش تحالف قوى الشعب العازب

مكانك محفوظ جنبي
بس خليكي على العهد
-------------------
محمد

القلل و الميكروجيب..والأمين

إوعى تنسي الأمين
لولاه الموبايل ما كانش راح
-------------------
حمودي

منكم نستفيد

نجرررب

wanna b a bride said...

admirer from dc

فكرة برضه

بس بلاش بتوع دي سي دول

لو ينفع إل إيه...يكون أحسن
-------------------
ftataljanna

الموبايل ده ذنب وزارة الداخلية

ماهو لو بس كان فيه أمين

و جازاكي الله خيرا على موضوع حنين ده

تصدقي كنت هاموت و أعرفه
--------------------
قطر الندى

أولا الجواز مقلب صحيح

بس لااااازم نشربه

ثانيا و مين قالك ان احنا مش مصدرينلهم الوش الخشب...لا في الواقع انتي ماتعرفنيش ..بضهر ايدي على طول

بس هنا بافضفض بس ...بلاش أفضفض كمان؟

تحياتي
-----------------------
m.bazeed

يا سيدي بيتك و مطرحك..خبط و خش مافيش حد غريب

حلو موضوع دودة في مقبرة جماعية دي...شاعرية قوي بصراحة

موضوع اتناشر ده ممكن و الله ليه لأ ..احنا نقسمهم تلاتات تلاتات و كل مجموعة تاخد تلات أشهر

بس ماترجعش في كلامك وانا هابتدي آخد الطلبات من بكره...اللي عايز
-----------------------
سجدة

آه شوفتي بأه
منه لله قاسم أمين و توفيق الحكيم و زكي جمعة

بس مين زكي جمعة؟
----------------------
islamist bloke

نعمل ايه بأه اذا كان فيكوا ناس مابتجيش غير بالميكرو الأحمر؟

و بعدين ترجعوا تشكوا و تقولوا قلقانين؟

ناس غريبة والله

wanna b a bride said...

anonymous

فيه كلام كتير من اللي انت قلته مظبوط

لكن موضوع انك مش شايف واحدة مميزة والا بتفهم في حاجة غير اللبس و المظهر

فده مش ذنبنا

مش لازم اشيل يافطه و أكتب عليها اني باشتري كتب والا بارسم صور

و نظرة البنات السطحية للرجل على أساس انه لازم يبقى جاهز ماديا و خلاص..بتقابلها نظرة سطحية تانية من الرجاله اللي بيبصوا للبنت فقط من خلال المظهر

النظرتين لازم يتغيروا
-------------------
shimaa

تفتكري؟

على ضمانتك؟
-----------------
محمد ثروت الجابري

شكرا ليك

اخجلتم تواضعنا
------------------
iskanderani

شكرا ليك

و معلش

فيه ازمة في الطبل اليومين دول

تحياتي
----------------
مشروع بطل

هي حصلت ورق على باب جامع

شكررررا
-----------------
abeer

يا ما وقفنا في صيدليات و ياما جالنا عرسان

بس نفس العاهات اللي باحكيلكم عليها

ربنا يبعت

3abdo me7tas said...

هههههههههههههه
بجد مش عارف اقول غيه مع انى اول مرة ادخل هنا ولا تقريبا تانى مرة بس بصراحة البوست ده جامد جدا
بصى انا هقولك على احجة سيبك من النصايح بتاع الناس القديمة دلوقتى خلينا فى العصر الجديد اللى احنا فيه أكيد فيه طريقة جديده زى زمان لما كانت الطرق بتاعتهم جديده فلازم احنا كمان نلاقى طريقة
وبما انك بتدورى على كتاب كتع أى كمان بدور على نفس الكتاب بس كتع للمؤنث :) كيف تصطاد عروسة انتى عارفه انا قاعد فى البيت عاطل يعنى حاليا لغاية ما ربنا يفرجها ومصمم انى لازم اتجوز جوازة كده من على النت وسمعت ان فى كتاب كتع باب كامل عن انك تصطاد عروسة من على النت
بالتوفيق يا بنتى وربنا معاكى ومعانا
سلامووووز
;)

ftataljanna said...

تحت امرك يا حبيبتى

any time

بالله ما تغيبي كده بجد ببقى نفسي اعرف اخبارك اول باول فعلا

ابقى طمنينا عليكي

ادخل اكتبى كده

يا جماعه انا كويسه وبخير
والسلام ختام

اوك
ربنا يوفقك اللهم آمين

koukawy said...

ههههههههههههههههههههه
يا بنتي متفتكريش الجواز جميل اوي كده
بكره تتجوزي و تضربي نفسك بالصرم
ده قلته احسن ؛ متتعبيش نفسك علي كائن مايستهالش ؛ اقولك انزلي اي محل من اللي بيبيعوا حيوانات
و اشنريلك سبت عصافير اكسبلك
هههههههههههههه
بس موتيني من الضحك

wanna b a bride said...

bestic

آااااااااامين
-----------------
anonymous

وجهة نظر جديدة

و جريئة

مش نلس كتير هتفهمها

لكن جديرة بالإحترام

اسمحيلي اسلط عليها الضوء اكتر البوست الجاي

----------------
ma-3alina

منين النصاحة هاجيبها

غذا كان ده صنف النصايح اللي باخدها من العيلة

الموبايل
راح راح راح
خد قلبي وراح
---------------
emos

موضوع الحضور ده مفيد لكن تقل استفادته في وجود 30-40 بنت في كل مناسبة
بيطبقوا نفس النظام

على رأيك بلا وجع قلب
نصيبنا هنشوفه ..بس يا رب مايجيش قبل مانظرنا يروح

تحياتي
------------------
samir

شكرا على التنبيه

بس أنا مابقطنعش بالحاجات دي

إذا كان طنط حشرية بجلالة قدرها مش عارفه تجوزني

هيجوزني أونكل توفيق ده؟
------------------
أبو امل

ده إيه الرومانسية دي

بس مادام كانت قدام عينك وانت مش مهتم
إيه اللي خلاك اتقدمت

أكيد فيه طريقة

قلنا ينوبك ثواب يمكن حد يعرف يطبقها

momken said...

ههههههههههه
تيته مين وطانط مين وعمتك مين يا بنتى.....
هو انا روحت فين
انا بقى ممكن تعتبرينى جاسوس على العرسان وبما انى راجل زيهم مش هعملوا خوانه
والنصايح منى هتبقى فى الجون ليه بقى؟
اهل مكه ادرى بشعابها

اصلا اصلا انا اعتقد ان ايام جدتك ماكنش لسه اخترعوا جواز....وطانطك وعمتك رقيه اتجوزوا تخليص حق
صلى على النبى
انتى ياستى اول ما تشوف الماسوف على شبابه
تساليه تلت اسئله
البعيد نخطوب
لاء
البعيد متكلمين عليه
لاء
البعيد ماشى مع وحده
لاء
تقصد تقول محدش معبرك
ايون
تروحى مقدماله نفسك وتقولى
انا مبعوث العنايه الالهيه لتخليصك من المشاكل دى كلها ارضى بنصيبك ولا ناوى تكفر

البوست بتاعك كالعاده روعه
تحياتى

wanna b a bride said...

الكلام نوعان

صح و الغلبان ده ممكن حتى مايستحملش الواقعة
نعمل ايه نصيبنا كده

جيل غلبان صحيح
-----------------
reri

يا أهلا بزميلة الكفاح

ان شاء الله ماتبقاش آخر مرة تعلقي

النصايح بتختلف و كل حالة ليها ظروفها

لكن بنحاول نجمع اكبر قدر من النصايح يمكن وقت اللزوم واحدة فيهم تنفع
------------------
romantic rose

و الله يا روز يا اختي الحاجات دي كلها جربتها

لكن المنافسة شديدة

و البنات كتير

و ماعادوش حاجة نادرة زي زمان

الله يجازي اللي كان السبب
-------------------
bride zone

العاهات يمثلوا 80% من العرسان اللي بيتقدموا

نعمل ايه هما دول اللي عندهم إمكانات يتجوزوا

يا إما نستنى إلى ما شاء الله
يا إما نرضى بضل الحيطة و خلاص

-------------------
marvel

لا يأس مع الحياة

ولا حياة مع اليأس
------------------
كازانوفا

شكرا ليك يا كازانوفا

wanna b a bride said...

خمسة فضفضة

مبروك للزملا

و عقبالي
---------------
مستشار نسرين الأكبر

ألف ألف مبروك على الترقيه

فرحت لك و الله

دلوقتي تقدر تترافع عنا لو قفشونا بتهمة تفجير شبكة المياة و الصرف الصحي
------------------
shah

أنا حلقتلك؟

لا لا انا ماليش في الحلق

ساعات بيبقى ليا في التنفيض

بس لا و الله

أديني بارد اهه

بالناسبة تيته بتسلم عليك
------------------
الطائر الحزين

شكرا على النصايح و الدعاء

تحياتي
----------------
anonymous

أهلا بيكي في أي وقت

و ربنا يوفقك في قصتك

بموافقة الأهل طبعا

و طالما هتقفوا جنب بعض و شايفين المستقبل سوا

يبقى بالتوفيق ان شاء الله
-----------------
fine

أهلا بيك يا وليد

انا سعيدة جدا بالموقع اللي انت بعتهولي ده

تصدق ماكنتش اعرف ان احنا وصلنا للعالمية

بس جعت

ياللا عليك عزومة

wanna b a bride said...

كراكيب عادل

المثل بيكون بدل ماتديني سمكة

علمني اصطاد
وحشتنا و الله

ابقى تعال
------------------
tina

أهلا بيكي

ان شاء الله هتفرج

تحياتي
----------------
fanan fa2eer

يااااااااااااااااارب
-----------------
islam yousef

ده بس من ذوجك يا ولد العم

ان شاء الله ماتبقاش اول زيارة

ربنا يوفق الجميع

بس ماحدش دلوقتي عايز يتجوز بملء إرادته

فالفكرة مش هتنجح بالساهل

تحياتي
-----------------
إنسانة

هحاول اطبق النصايح
ولو ان المنافسة شديدة

و الكل بيفكر بنفس النظام

شكرا ليكي على الحكايات المشجعة

و الدعاء ..ان شاء الله هكثفه

ربنا يرزقنا جميعا بالخير
--------------------
abo amr

شكرا ليك على الكلامالمشجع

ربنا يروقنا بالخير عن قريب ان شاء الله

wanna b a bride said...

nouran

لسه بدري شوية على وجعالقلب

ربنا يستر على اللي جاي

ربنا يرزق الجميع
-----------------
شقاوة شعب

طب و ليه تتشائمي طالما عندك قلة

الدور و الباقي علينا

احنا ماعندناش قلل
----------------
بعض.مني

شكرا على الكلام الجميل

في انتظارك على طول
--------------
blanila

إسمك معبر جدا على فكرة

إعلانات الوسيط مايتهيأليش بتجيب نتيجة

ربنا يسهل و ماتاخرش

إدعيلي

wanna b a bride said...

3abdo me7tas

طب اشترك معانا في الجمعية

لتدوير على الكتاب

ممكن نعمل فرع ذكوري في الجمعية
و مين عارف مش يمكن مانحتاجش الكتاب ساعتها؟

تحياتي
-----------------
ftataljanna

يا جماعة انا كويسة و بخير
و السلام ختام

عشان خاطرك بس

ربنا يوفقنا جميعا ان شاء الله

تحياتي
----------------
koukawy

ايه ده ؟

هو لسه فيه صرم؟

ده احنا جيل غلبان صحيح

العصافير قكرة كويسة برضه
والا السمك احسن على الأقل مافيش صوصوة والا وجع دماغ

تصدقي أفيد؟

تحياتي
----------------
momken

يا سلاااااااااااااااااااااااااااااااااااام

اكن الموضوع سهل كده؟

طب خليني اسألك سؤال

ال...مخطوب؟

:))

momken said...

مخطوب ايه مافيش راجل محترم ...لما يتسال يجاوب باه حتى لو خاطب اربعه
ديما الاجابه لاء

متقلقيش جوزتك عندى بس انتى متتنعريش
يعنى قدمى شويه تنازلات
مش لازم يكون محترم
وليه يعنى يكون بيحترم المراءه
واشمعنى يعنى يكون بيقدس الحياه الزوجيه
وليه بالزات يكون بيقدر يتحمل المسئوليه

كلها دى حجات شكليه فين التنازلات فين
انتى سيبك من كل الشروط دى وانا اجبلم عريس انهارده العصر
تحياتى

Anonymous said...

شوفي يا ست الكل
انا هقلك علي حل جديد كيك
بصي
انتي اشتغلي وحاولي تعملي فلوس علي اد ماتقدري
ويا ريت توفرى منهم اووووووووي ومتصرفيش اطلاقا
ولما سنك يوصل 55سنه
ابدئي بقي دوري علي العريس
والله هتلاقي كتير
بس اهم حاجة ساعتها يبقي عندك شقه لوكس
وعربية فول اوبشن
وشاليه بالعجمي
وعلبه صيغة
وحساب بالبنك
ويفضل برضة انك تفتحي صيدليتك الخاصة
ساعتها بقي مقولقيش

Unknown said...

السلام عليكم يا برايد
أخبارك إيه
إن شاء الله تكوني دايما بخير وعافيه
العزومه ياست البنات مؤكده وبذمتي
دين برقبتي يا جوعانه
ههههههههههههههه
والله إنتي تستاهلي أرقى وأحلى مطعم بالعالم
ياسلام دا إنتي تؤمري
عقبال عزومتي ليكي بمناسبة زواجك
ربنا يوفقك ويرزقك ويرضى عليكي
تحياتي
وليد من الكويت

Anonymous said...

شوفي برايد انا كنت نصحت اننا نفجر شبكات الصرف اللي عملها - او قال انه عملها حسني
لكن دوقتي ابشرك الناس رجعت تخرج من بيوتها وفي ايديها براميل تملي المياه
والفرصة رجعت سانحة لابراز حماسة الشباب وجدعدنتهم وابرزا مفاتن الانوثة ونضارتها
وزي ما مينا وحد القطرين
انقطاع المياه هيوحد الجنسين وكلنا هنشيل برالميا مياه ع قلبنا
فانزلي بنفسك وشوفي اقوي واحد شيل براميل وامشي ادمهم ووقعي البراميل بتوعك وهو هيساعدك
وابقي اعزميني ف الفرح
بالمناسبة شكرا جزيلا ع الترقية وادعي ليا اني افضل ف منصبي وانا معك ف اي قضية بعد الطلاق وعد

حـــــدوتـــــة said...

مش ممكن واحدة تبقى دماغها زى دماغك و عاملة بلوج زى ده و مايجيلهاش ولا عريس بصراحة انا اول المعجبين , ربنا يوفقك و مستنيين البوست الجديد , و يجعله عامر

Anonymous said...

هل الرب الإله ذكر؟؟؟


هل قدم احدهم الاثبات على ذكورة الله


أم هو أسقاط السلطة الذكورية على مفردات الأسطورة

Anonymous said...

السلام عليكم
ازيك برايد

بحبك يا سكر

على فكرة صورة العروسة اللي قبل احلى بكتير ومعبرة اكتر من الصورة الجديدة

رانيا

wanna b a bride said...

momken

شوية تنازلات بسيطة و الله

مش كنت تقول من الأول

عشان خاطرك بس هتنازل عن كل اللي قلته

بس لو مافيش عريس بعد كده ..هاسيبك منك لجمعية "كتع" و على نفسها جنت براقش
--------------------
anonymous

ما هي دي الخطة البديلة

كل الخطوات معمول حسابها

ماتقلقش
-----------------
fine

كلك ذوق و الله

تحياتي إلى أهل الكويت جميعا
-----------------
مستشار نسرين الأكبر

أوعدك اول وحد أكلمه بعد الطلاق

بس الأول يبقى فيه زواج ان شاء الله
------------------
اسكندرانية

و مين قال مش جه والا عريس

انتي ماقريتيش السبعة اللي فاتوا

الرك على الكوانتتي مش الكواليتي
------------------
حنين

عروستي
----------------
رانيا

معلش يا رانيا الصورة القديمة طلعت بتاعة واحدة أريكانية و بعتت لي إيميل بهدلتني

و ادتني خيارين يا أشيلها يا أحط لينك لموقعها

و بما إني مش عارفة فيه ايه بالظبط

فقلت الأسلم أغير الصورة

لو عندك صورة تانية تكون برضه معبرة يا ريت تقوليلي عليها

شكرا

حصان بري said...

ههههههههههههه
لذيذه كالعاده يا برايد
واللهي بتصعبوا علينا
مانتوا لو توافقوا علي تعدد الزوجات كانت مشاكلكم اتحلت
والحكومه كمان توافق علي مضاعفه المرتبات 4 مرات مثلا علشان نصرف علي اربع اسر

كانت تبقي فل ومن غير كتع ولا يحزنون
بجد مدونه لذيذه ومسخره من الاخر

بنت القمر said...

يالهوى انا جيت متاخر اوى فمش هاطول الصبر والصلاة... وبعيد عن الهزاااار انا عن نفسى لاحظت حاجه مش عارفه تنطبق عليكى ولا لا؟؟ اصحابى اللى مرضيوش يتجوزوا اول ما تخرجنا من الكليه ما اتجوزوش لحد دلوقت عارفه ليه؟؟ لانهم كانوا عاوزين الكمال لكن بعد التلاتين لازم معدل طلباتك يقل وتكونى واقعيه اكتر وما تقوليش طب ما انا جالي زيه قبل كدا ورفضته لا لكل وقت ادان ولازم حبه تنازلات!!

Anonymous said...

ديه اول مره اقرا المدونه ديه وجامده مووت بصي هو اصلا الجواز ده مشروع فاشل انما ده نصيب وبعدين الجواز ده زي الموت مانتيش عارفه هاتموتي امتي وفين هو برضو كده مش عارفه هاتجوزي امتي ولا مين ولا فين واهو ادينا مستنين الجواز والموت وبجد دماغك خساره تتجوز عشان ممكن يحرمنا منك

Anonymous said...

والله مدونتك دي متعة وضحك وواقع مؤلم في نفس الوقت

NilE_QueeN said...

انا متبعاكى من فترة طويله يا برايد بس للاسف هاتفى الداخلى مقاليش الا قريب انى اعلق ف البلوج بتاعك
بس تصدقى من كتر ما حكاياتك غيريبه بيبقي صعب عليا اصدقها
ربنا يقدملك الخير وانا معزومه على الفرح
ان شاء الله

الباحث عن الحقيقة said...

بصراحه خايفين تتجوزى احسن نتحرم من موضوعات المدونة الجميله دى

شايفه الانانية هههههه

عموما انا عندى وسيله حلوه ..روحى معهد السلفيه فى القاهره وادرسى فيه

بنات كتير راحته علشان تتجوز


للاسف هبل الجواز بيخلى البنات احيانا ترخص نفسها ..وتستهر بدينها

مره تتحجب

مره تنتقب

مره تمشى بشعرها

وايييييييييه دنيا لمونه والناس مجنونه

Anonymous said...

صدقوني مفيش بنت بتاخد اكتر من نصيبها بس لو تصبروا دلوقتي البنات كلها مستعجلة وخايفة من القطر اللي هيفوت والواقع ان مفيش حاجة اسمها قطر والنصيب جي جي ولو بعد 40 سنة

عروس البحر said...

علي العموم ربنا يرزقك بابن الحلال و تحياتي علي الاسلوب الحلو و الاداء الجميل

Anonymous said...

سلام برايد

بخصوص حقوق الملكية للصورة بتاعة الست الامريكانية .. انتى ممكن تحطيها تانى لأنك بالفعل وضعنى اللينك بتاعها فى المدونة و ده يعتبر اعلان ليها ببلاش .. يعنى كل مره حد بيدخل على صفحتها من عندك هى بتكسب ترافيك .. او شيلى اللينك بتاعها لو مش هتستعملى الصورة.

على فكرة مدونتك جامدة و ليها بيج رانك عالى وممكن تكسبى منها فلوس لو حطيتى فيها اعلانات من google adsense.

الوحدة بتقتلنى said...

انا عارف انى متأخر فى تعليقاتى بصى بجد انتى عسل مووت فى طريقة كتابتك انا لسه فى اول حياتى المدونية بس عجبانى مدونتك موووت واتمنى طبعا لو لحقتى تقرى كل الكومنتات تبقى تعبرينى وتدخلى مدونتى المتواضعة والصغيرة وتسيبيلى كومنت صغير طبعا انا هكون فى قمة السعادة لما برايد تسيبلى تعليق

وربنا يوفقك

Anonymous said...

هههههههههههه
انا متابع جديد لتك المدونة الخاصة بكي
وممكن اقول حاجة
ان لا حياة مع اليئس ولا يئس مع الحياة
وباذن الله ياتي العدل في اقرب وقت
وتحياتي لكي

Anonymous said...

يا بنتي سيبك من اللي في دماغك ده.و روحي اشتغلي او اعملي حاجة مفيدة وربنا هيديكي علي قد اللي بتعمليه...شوفي ضيعتي اد ايه في الموضوع ده,ابدائي حياه جديدة وربنا هيرزقك ان شاء الله.

MerMaid said...

هههههههههههههههههههههههههههههه

و الله ضحكتيني و خرجتيني من حالة القرف اللي انا فيها

ياااااااااااااااااااارب ترزقنا كلنا بعريس حلو كدة اللي كلنا بنحلم بيه

Anonymous said...
This comment has been removed by a blog administrator.
Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

om ali said...

ردا علي anonymous مين قال ان الحب بيروح ويبقي التعود انا بقالي خمس سنين متجوزه وعندي طفلين واخدت جوزي عن حب والحمدلله كان مثال الطيبه والاحترام والتقوي انا حبي مقلش بعد الجواز لا ده الرباط المقدس زادنا حب وترابط اكتر واكتر .عموما يابرايدحقك انك تحلمي ببيت صغير وبراجل صالح يراعي الله فيكي وصدقيني خليكي بجانب الله وادعي كتير اكيد ربنا مش هيخذلك.وزي مقولتلك انا مش هبطل ادعيلك ف الروضه الشريفه ف الحرم لحد ميجيلك ابن الحلال .بحبك ف الله

smsma said...

خليفة برايد في الملاعب
نصيحه الي برايد والي كل قارئات هذه المدونه اوعواتعملوابنصايح رومانتيك روز لانها قديمه جدا وانا جربتها كلها اعمل ايه تاني بس ياختشي افراح وحضرت لقيت كل واحده معبطه في جوزها وقفشاه من رقبته لا يتشفط منها دروس دينيه ورحت اخدت كل مساجد المنطقه وغير المنطقه كعب داير لما رجليا باظت اتوبيسات وركبت لا سبت راجل ولا ست عجوزه الا وقمت عشان اقعدهم والرجاله قاعدين يتفرجوا عليا بمنتهي التناحه ضيفي علي كده كمان المعاهد الدينيه ودور حفظ القران تروحي تلاقي 30 40 بنت بيدوروا زي حالاتك وضيفي كمان المتنزهات والنوادي والحدائق العامه وضيفي عليهم المصايف في كل مره باخد البلاج كله مشي من اسكندريه لاسوان يجي 10 مرات لكن زي ماسعد قال مفيش فايده ومع اني كنت باعمل الحاجات دي كلها كنت مزوده عليهم شوية ادعيه من اللي هما رب لا تذرني فردا وانت خير الوارثين رب اني لما انزلت الي من خير فقير ربنا هب لنا من ازواجنا وذرياتنا قرة اعين وكمان ركعتين قضاء الحاجه ده حتي الشغل ماعتقتهوش اشتغلت كلللل حاجه وبرضه الدراسات العليا مانفدتش من تحت ايدي وحتي مكاتب الزواج رحتها والاعلانات عملتها وحياتك يا ختشي مفيش فايده لدرجة اني خرجت من من مرحلة الهواه ودخلت علي الاحتراف وبقيت مدربه كبيره بادرب البنات علي طرق تقفيش العرسان حاكم الرجاله دول انواع يعني واحد عشان يتقفش محتاج لمصيده وواحد تاني لازم يتضرب بالشبشب وواحد تنفع معاه القله بس مش علي طريقة جدتك خااالص دي قديمه موووت انتي تقفي في البلكونه وتعملي نفسك بتمليها واول ماتشوفي سعيد الحظ معدي من تحت البلكونه تحدفيها فوق دماغه ال يعني وقعت غصب عنك وبعدين تاخدي شنطة العده وتنزلي جري حتلاقي الشارع كله اتلم مش مهم تقولي وسعوا يا جماعه انا دكتوره ونسيب الباقي عليكي طبعا وانتي وحظك بقي يا يجيله ارتجاج في المخ يا تخلف عقلي يا حول مش مهم المهم انك تشنكليه وخلاص بس المهم تدعوا معايا يا بنات يا رب حنين يموت اصلي كل ما اخرج في رحلة بحث الاقيه في وشي يا رب يموت بقي قولوا امين