Tuesday, May 15, 2007

السابع

أسوأ جزء من أجزاء يومي..لأ ..من أسوأ الأجزاء-لأن المنافسة مشتعلة و مش قادرة احدد أي جزء أسوأ من التاني- المهم و بفارق ضئيل يتصدر القائمة ...رحلتي من باب الشقة الى بوابة العمارة .و بالعكس
لأني في الرحلة اليومية دي غالبا بقابل كل فرد من أفراد جيراني الأعزاء
الجيران عموما ممكن يشكلوا جزء كبير من حياتك و ممكن يكونوا مالهمش أي أهمية



أنا بأه جيراني من النوع ..العشري..الحنين..المهتم..المواسي..باختصار يعني..ناس لا تطاق
..


بيحبوا يعرفوا و يتدخلوا في كل تفاصيل حياتي و بيحققولي توازن كبير في حياتي اليومية-ايه ده مين اللي فتح التلفيزيون؟-لأن مافيش انسان طبيعي بيعيش حياته في حالة مستمرة من التفاؤل و السرور-ايه؟..أيوة أنا متفاءلة ..فيه حاجة؟- لازم يبقى فيه جزء كده نكد مطعم بحرق الدم و لازم يبقى فيه نص كباية فاضي يوازن نص الكباية المليان و الا الكباية ممكن تتدلق عليك وتغرقك و الناس تفتكرك عملت...والا بلاش..نرجع لموضوعنا



الرحلة اللي ممكن تستغرق دقيقة واحدة من باب الشقة للسلم ممكن تمتد كل يوم لحد ربع ساعة كاملة..و تمر الدقايق ببطء و أحس ان فيه حاجة تقيلة كابسة على مراوحي و مش قادرة أتنفس زي ماكون باتفرج على معتز الدمرداش والا تامر أمين...الستات يوقفوني و يفضلوا يبوسوا فيا و يمصمصوا شفايفهم


ربنا يعدلهالك يا حبيبتشي
معلش مابيقعدش غير بنات الناس
هو انتي لسه
لسه برضه
مافيش أخبار؟
لسه؟
لسه؟



طبعا مفهوم ان أكتر 3 حروف باكرههم في اللغة العربية- اللي مش فاكرة فيها كام حرف- هما اللام و السين و الهاء


الرجالة بأه بيصمموا يوقفوني و يدععععوا ..و انا أأمن...و يدعععععوا..و انا أأمن



يارب يرزقك بالزوج الصالح
آآآآآآمييييين
يارب يفرح أهلك بيكي
آآآآآآآآميييييييييين
يارب تلاقيلنا للواد علبتين لبن من المدعم
منننننيييييين؟؟



أسوأ أيام حياتي بأه هو يوم مابقابل أماني..فاكرينها؟..أفكركوا..أماني اللي هي أصغر مني ب 3سنين و اللي تبقى أم هند اللي عندها 6 سنيت..أيوة أيوة ..اتجوزت و هي عندها 19 سنة..و انا كنت عمالة أضضضضحك عليها و أقول عبيطة دي والا ايه؟..تفهم ايه دي في جواز والا مسؤولية في السن ده و الا حتى تعرف تختار ازاي...و مرت الأيام و ثبتت الحكمة اللي بتقول..لولاك يا لساني مانسكيت يا قفايا..مش انا اللي باقول ..دي طنط مامة أماني كانت بتقوله مرة وانا نازلة من ع السلم ..بتتشفى فيا عشان قلت لأ على أخو جوز أماني و بعبعت كده يعني بكلمتين مالهومش لازمة عن الإختيار الصحيح و السن المناسب و الكلام الفارغ ده..و دارت الأيام و الشهور و السنين و ثبت بالدليل القاطع ان كلامي يصنف تحت فئة الخيال العلمي و أماني أهيه عندها هند و في بطنها مؤمن متوقع وصوله بين أي لحظة و التانية


و عشان الأمور تبقى واضحة أكتر لازم تفهموا ان اماني و جوزها الأستاذ فوفو"تقريبا اسمه عبد الفتاح" يعتبروا فولة و انقسمت نصين و لو معيار التوافق من 1 لـ10 دول ياخدوا 12و نص..مشكلة حياتهم بس هي الخناقة على المصروف ..مصروف البيت. مصروف مدرسة البنت. مصروف الماكياج-مصروف لماكياجه و مصروف لماكياجها-بالنسبة لشخصياتهم فهي واضحة جدا..هيا عاملة زي الربع جنيه المخروم بتلمع لكن فاضية من جوة..و هو عامل زي العشرة صاغ الورق..,موجود آه بس زي قلته و ماحادش بيديله أي أهميه


يوميها لسه بانزل على طراطيف صوابعي عشان ماحدش يحس بيا و هوووب ..اتفتح باب شقتهم و عقلي قاللي يا بتت اركبي الدرابزين و اعملي "سكي" لغاية البوابة..بس ..لأ..لأ..لأ..أنا دكتورة محترمة و لو حد شافني أعمل ايه ان شاء الله..المهم حصل اللي كنت خايفة منه و لقيت أماني جره في ايدها هند و قدامها بطنها فيها مؤمن واضح انه نايم جوه باطنها على ضهرة و حاطت رجل على رجل لأن بطنها كانت واخده شكل شبه المنحرف


امشي يا بنت بأه جننتيني..هلاقيها منك والا من اخوكي..الله برايد ازيك يا حبيبتي
أهلا يا أماني عاملة ايه
البنت مجنناني و الواد محجر و مش راضي ينزل..على سيرة التحجير..مافيش عندك أخبار جديدة؟
بلعت الإهانة بمزاجي..ماعنديش وقت أخش في حوارات
ربنا يسهل يا أماني..عن إذنك
استني بس..ماهو لو ماكنتيش نشفتي راسك و كنت وافقتي على أخو فوفو..مش كان زمانك زيي كده دلوقت
نصيب يا اماني بأه ..هنعمل ايه؟
على رأيك خيرها في غيرها فوفو لسه مكلمني على واحد انما ايه..زي مانتي عايزاه بالظبط
ماظنش
يا بنتي بس خليكي متفاءلة..ده ايه أخلاق و دين و مابيفوتش فرض..هو فوفو ماكانش موافق في الأول عشان موضوع زمان..بس أنا ضغطت عليه
بصيت لمنظرها
..ضغطتي عليه؟ و لسه عايش
ههههههه..يوه يا برايد دمك خفيف يا مضروبة..ايه رأيك الخميس كويس ؟..كويس أنا هاجيبه هو و العيلة ..و انتي ابقي البسي حاجة حلوة كده و بلاش مكياج..أنا قلت لك ده متدين
ياريت برضه لو انتي و الأستاذ فوفو جايين انتوا الإتنين كمان تخللوا بالكوا من موضوع الماكياج ده
هه؟..ماشي ماشي..بس باقوك ايه ماشي أمورك بأي يا حبيبتي مش عايزين حد يشمت فيكي أكتر من كده
أكتر من ايه؟
ماتشغليش بالك..ههههه..الناس مابترحامش
على سيرة الناس اللي مابترحمش ..ازي مامتك؟
هه؟..حلوة حلوة..بتسلم عليكي
الله بيسلمها و يديها على أد نيتها
ان شاء الله..وربنا يقدملك الخير يا حبيبتي..باقوللك ايه شيليلي بأه البنت لحد البوابة
آآآه..هانبتدي حاجة قصاد حاجة
حاضضضضر..يا أماني..و ماتنسيش تبقي تسلميلي ع الأستاذ فوفو..و تقولي لأخوة ياريت مايبقاش لسه زعلان
لولو؟..ده لولو ده عسل و قلبه أبيييض مابيشلش جوه قلبه خالص
ده انتي لو كنت اتجوزتيه كان زمانك عايشة في سعادة مابعدها سعادة
و هو صحيح عمل ايه في قضية الشيكات بتاعته؟
خير ان شاء الله
و محضر السكر؟
ربنا يسهل
وقضية التحرش؟
ربنا يزيح عنه
وقضية الخلع اللي مراته رافعاها
ربنا ينصره ..بس باقوللك ايه ماهو ممكن برضه لو خلعته يبقى فيه نصيب و ربنا بأه يبقى قاسمكم لبعض
تفتكري؟
آه و الله ممكن.و ليه لأ


سؤال وجيه فعلا



عموما من خبرتي الحياتية الطويلة ماحكمش على العريس من خلال الواسطة ..مانا طول عمري بيجيلي عرسان عاهات عن طريق ناس زي الفل..طنط حشرية و أونكل ديسكو و غيرهم
ما تقاطعيش يا بت يا برايد..مش هتخسري حاجة...
.....
..




يمكن

90 comments:

BaTresYa said...

ربنا يا حببتي يرزق بحد كويس يستاهل صبركـ كل السنين دي ..ومش تطولي علينا الغيبه بتوحشينا والله ..مستنين التكمله يا قمر

emos said...

rabena ma3aky ya rab
ana kont fakraky bethazary bs shoft b 3eny ma7adesh 2ally ya7'ty

isa 7'eeeeeeeeeeeeeeeer

Anonymous said...

انا لسه ما قيتش الموضوع بس عايز ارد بسرعه

ما شاء الله سوقك ماشي والعرسان بيترموا تحت رجليكي
او في مخيلتك

Anonymous said...

ربنا يسهل يا برايد......ربنا يسهل

هادعي لك وربنا يعلم....بس المهم انتى كمان مشى الحياة لو كان كويس ومقبول ويارب ميطلعش عاهة هو كمان

تحياتي

Anonymous said...

برايد انا عندي فكرة

فكرة جت لى فى ساعة غباء كدة بس اعتقد حلوة وتنفعنا كلنا

فاكرة فيلم ثقافى

لما الدكتورة نشوى مصطفى مسكت شلة الشباب اللى بيتفرجوا على ثقافى وقعدت تصوت وبعدين جت لها هستيريا ومسكت الدكتور وقالت له تعالى نخرج فى الشارع كلنا سوا ونصرخ بأعلى صوتنا ونقول عايزين نتجوز

اللقطة دي فى الفيلم كانت دعوة لكل الشباب اللى متجوزش لغاية النهاردة ...انه يخرج فى مظاهرات مليونية ويصرخ ويقول عايز اتجوز

انا مش بهزر والله -هو يمكن اكون لسعت قبل دخول الامتحانات- بس هى فكرة تستحق التفكير

ولو اننا نجتمع فى مكان زي التحرير ونمسك يفط كبيرة ونقول احنا شباب عايزين نتجوز

اية المشكلة

ولو حتى نخصص يوم للاخوة ويوم للاخوات

فكرى ونعتبرها مبادرة نعلنها من مدونتك

ويمكن....يمكن

وربنا يبعد عننا التحجير يا ست البنات

والسلام

ROMANTIC ROSE said...

فيه فرق كبير بين الامل و السراب .. يعني "لولو" اسم الله عليه .. عنده قضية شيكات و سكر "تموين" غالبا "يعني يا قهوجي يا حلواني يا الي بيوزع سكر التموين" و قضية تحرش و مراته طلبت الطلاق ما رضيش و معاشرها بالقوة فأضطرت ترفع قضية خلع كمان ..بصراحة فعلا لو كنتي اتجوزتيه كان زمانك اخر انتكة و البلوج ده مزااااااااااررررررررر سياحي .. و اللي ما يشتري يتفرج .. و تقولك لو الخُلع حصل يمكن يحصل نصيب .. بالزمة دي هيجي من طرفها ايه مراة فوفو دي ؟؟

يا برايد يا حبيبتي .. انا و الله بضحك كتير علي بوستاتك بس كمان دمي بيتحرق و بتعصب جدااااااا مرات من المواقف اللي بتحصل معاكي .. مش عارفه بجد ايه اللي بيحصلك ده .. عزائي الوحيد اني بقول اكيد تفاصيل كتيرة بتقوليها بتبقي "ملح و فلفل" علشان البوست يبقي حرش .. و الا و الله كان زمان ضغطك وصل 190/110 زي ما بيوصل عندي ساعات .. و ابقي طمنينا .. سبحانه ربك خلاف الظنون !!!

Anonymous said...

انتو بس لو تسيبو ربنا ف حاله يمكن يحصل خير

اللي بيدعيلك , واللي عايزه تدعيلك , والأهل بيدعوا والجيران بيدعوا

حرام عليكو , سيبوه في حاله

بعدين أنا أموت واعرف عايزة تتنيلي وتتجوزي ليه

عايزه تبقي زي منال ولا مش عارف اسمها إيه؟

يابت روحي عيشي حياتك

ده انتي مالكيش غير حياة واحدة

انتي حرة بنفسك وانشالله عمره ماجه سي السيد بتاعك

عايزه حميميه؟
موجود

عايزه أولاد؟
ابقي اتبني

عايزه استقلاليه؟
انتي اللي رابطه نفسك

انتي دكتورة صيدليانيه وأي بلد غير عربي يحطّوكي على دماغهم

سيبي البلد الفقر دي وروحي شوفي حالك

وما تبصيش وراكي

هاتقولي بابا وماما واخواتي وطنطاتي ؟

يبقى زنبك على جنبك

وتبقي تستاهلي فوفو وميمي وحوحو

وبطن منفوخه وبلاوي مصروف وحاجات قرف

انا قلت اللي عندي والباقي عليكي

Reemo said...

الحمدلله ربنا رحمنى من موضوع الجيران ده كل واحد فى حاله

محدش له دعوه بحد

ربنا يكون فى عونك يا برايد

انا عارفه اسلوب الكلام الغبى ده

من نظام ربنا يسهلك ويصلح حالك

حاجه تخنق فعلا

بس ولا تعلمى ما جايز العريس ده يكون كويس

شوفيه وبعدين احكمى

تحياتى

Anonymous said...

السلام عليكم
الله يكون بعونك يادكتوره برايدي
حقيقي مآسي وصراعات نفسيه
عاهات وبلاوي بتتحدّف عليكي من جبهتين
الجبهه الأولى جيرانك وعرسانك
والجبهه التانيه بعض العاهات اللي بتكتب رأيها السفيه جدا بهذه المدوّنه الجميله والرائعه مع تعمدهم الإساءة إلى الدين والإستهتار بما يمكن أن تقدم لنا هذه الحياه
أتمنى أن تبقي على ما أنتي عليه الآن إلى أن يأتي النصيب في القريب العاجل
كما أنتي مناضله وعفيفه وإنشاءالله ربّنا حيرزق الجميع كل على حسب نيته
من يعلم ؟ قد يكون عريس لقطه
متمنيّا لك الخير والسعاده
تقبلي تحياتي
من الكويت
وليد
على فكره أول مره أبدي رأيي على النت
فأرجو المعذره على أي خلل في الأسلوب

Eric Matt said...


هاهاهاها

لسه

ل

س

ه

حنستنا؟

:P

الله يكرمك يا برايد انا بدعي بجد و حجري أهو بدل ماتقولي عليا زيهم وحعطلك عن الطريق بين مكانك ورجل الكنبة

يا ساتر يا رب

تحياتي لك من ماناساس البلد

:))
:))

Unknown said...

ربنا يستر وميطلعش عاهة من عاهات فوفو مرة تانية
ولو اني من جوايا يعني متزعليش
مش عاوزاكي تبعدي عننا
انتي طبعا لو اتجوزتي اكيد مش هيكون في تامن ولا تاسع ولا عاشر ولا اي حاجه
وهتعمليلنا بلوج جديد اسمه يوميات زوجة
وهترشحي نائبة مكانك ف البلوج دا
ويبقى البلوج دا خلافة بالتوارث
ربنا يكتب لك اللي فيه الخير وييسر لك الزوج الصالح
مش عارفه ليه حاسة ان ربنا هيكرمك اوي يا برايد
يمكن عشان بحبك وبتمنالك الخير بجد
ربنا يوفقك يا حببتي

بس خلاص

Amr Ahmed said...

في انتظار الباقي

وربنا يوفقك

Van Gogh said...

لو كان فيه خير
ما كان رماه الطير

وربنا يستر


:)


تحياتى

سجدة said...

إن شاء الله المرة دى كويس بإذن الله ربنا يكرمك يا برايد يا رب
وفعلا عندك حق على الناس اللى كل شوية تسأل وتقول كلام غريب هو لسه هو مفيش حاجة فى السكة
المواصلات متعطلة يا ناس
انزلوا الشارع وشوفوا المواصلات عاملة ازاى
هيجى فى السكة ازاى يعنى

Ehab said...

انتي فكرتيني بأختي الكبيره نفس خفة الدم والإنتقاد لكل البلاوي اليوميه اللي بتعدي على كل بنت الجيران شايفين انها اتاخرت في الجواز من تلقيح لمصمصة شفايف لمحاولات مساعده غبيه انتي فطستيني من الضحك مع انك بتحكي حاجات توجع ومش عارفين نحلها
انا ابويا اصدر فرمان اني مقدرش حتى اتقدم للبنت اللي انا اخترتها لحد اختي الكبيره ما تتجوز امال يعني بنته لسه ماتجوزتش والبنت اللي انا قول عليها تتجوز بسرعه كده محدش احسن من حد المشكله ان ده احرج اختي جدا وزعلها لأنه بيقولها انتي واقفه في وش اخوكي وانا مش عارف اخفف عنها ازاي مش عايز افكرها بالكلام السخيف ده وفي نفس الوقت عايز اهون عليها تقدري تقوليلي احلها ازاي دي
وختاما لك الف سلام
ومحبه واشواق وخضار
سلاااااااااااااااااااااااااااااام

Unknown said...

انتى صح
سيبك من الناس
و ربنا يكرم الجميع
معلش طولت : )

barbie girl said...

مبروك مقدما يا برايد

صوت فيروز said...

مش هقول غير اللهم اعف المسلمين و المسلمات
و صبرنا يا رب علي مفرمة المجتمع لاننا تعبنا

اللهم صلي علي محمد

Desert cat said...

اهوه النهارده الخميس يا برايد
وربنا يعدلها لك يا حبيبشتى
عايزين نفرح فيكى بقا
يوووه يقطعك يا لسانى
عايزين نفرح بيكى يا حبيبتشى
ربنا يعدلها لك

Doba said...

ااااااااااااااه من معاميقى والله
الله يكون فى عونك من كل الستات الحشورات دول كلهم

ولو طلع عاهة من العاهات يمكن يبقى عندك الفرصة المناسبة اللى تسكيهم بيها بقى

ولا صحيح دول العاهات عندهم بيبقى قلبهم ابيض وعندهم محاضر سكر وخلع وحركات

ربنا يستر.....حقيقى قلبى معاكى...ممكن لو عاوزة ابعتلك اى شومة وتطيحى فيهم كلهم وخاصة فوفو اللى قلبه قلب خساية

تحياتى وسلامى......دوبا

انتظار مؤقت said...

الله يضحكك بجد انا اول ما قريت لولاك يا لساني ما اتسكيت يا قفايا و انا وقعت من الضحك طب تخيلي بقه ان ده ممكن يكون طبيعي مع البنت انا الناس تستعجل جوازها و كده لكن لو تعرفي الي بيحصلي تستغربي اكتر ..اول مره ازورك تعالي ردي الزياره

washwasha said...

مش عارفة ليه متفاءلة جدا
شكل البوست الي جاي روش قوي
محدش بيتجوز غير مراته و منين ما ربنا يسهلهالك و تلاقي نصك التاني مصمصة الشفايف و كلام الجيران و غير الجيران البايخ حيتنسي
المهم نختار صح لان ده حد حيقعد في ارابيزنا العمر كله وبعدين انا مقتنعة انه جاي جاي ومتأكدة اني كدة براحتي اكتر يعني مفيش تحكمات فارغة و الواحد الى حد ما متحكم في ظروفه و حياته بس هية سنة الحياةو شر لابد منه ربنا يوفقك و تلاقي نصك التاني

Shower-Mirror said...

انتى يابنتى بتطلعلك البلاوى دى منين

البوست ده شوهك انتى شخصيا خالص

كده انا اتأكدت بالدليل القاطع انك وحشه و كبيره و القطر لف و رجع و برده فاتك ....


ههههههه

ماهو اصل اكتر نشاط بيحصل فى مصر هو الجواز ,,, انتى بقى ايه حكايتك منحسه معاكى ليه


اعترفى يابربر و قولى ايه هو السبب الحقيقى

Esmeralda said...

اللى يجي منه احسن منه

المهم الدعاء مش مهم الجيران

Anonymous said...

hi Bride,
i wanna say many things,
actualy this is not a comment on the post, but on the comments and the global idea,
about who say that el 2atr fatek w bla bla bla, i just wanna ask "2atr eih en sha'allah ?"
why we usualy think about marriage as the most important event of our life that HAVE to be done before the age of 25,or any other age, and when a girl is 25 and not yet engaged, then "mosiba soda",
the question is, did u met your perfect guy, if the answer is no, then how do you had to be married now?
the problem is that we "benesta3gel el 2omour".
everyone maktoublo his soulmate, so law kan maktoublek te2ablih in 2 years from now, you 'll spend all this time just warrying about it, w kol el nass el hobl haytanohom ye2ouloulek "lessa ?"
i know MANY girls, that was married at age of 30 and over, just bcoz they didn't meet any one that could understand them before that, and all of them are happy now,
so i'm sure it's not the problem of time or age, it's a problem of how do you think and take the decision of accepting or rejecting 3ariss.
i know that eli 2ido f el maya mosh zay eli 2ido f el nar,
but i realy hope that when i bcome older i still think like that,
of course it's the biggest dream of every girl to get engaged and married, and i know that, being polite in this country means that u musn't have any boyfriend(bel ma3na el mo7taram lel kelma even)
so, i gess all we have to do, is to have faith that god kateblena the best, and to live our life normaly, enjoying every moment in our life, and to broading our socity,
and always have selfconfidence(i'm sure u r the best in that ya Bride), and at the end always SMILE to this life.
Notei'm not someone 100% motafa2el,or someone that have no problem in this life, (el 3aks tamaman), i'm just trying to think in a positive way, so that i can change many thing in my life.
Wish you, and all of your blog visitors, BEST of luck.

Ma 3lina said...

waiting for the 7th :)) we rabna ystor

Masria said...

انا بس حبيت اقولك إن البوست بتاعك لذيذ جدا,يفطس من الضحك :)

Anonymous said...

هاى يا برايد
بجد موضوع الجواز والنصيب بقا مشكلة كبيرة فعلا ........
واكيد البوستات كلها حقيقة حتى لو مكنتش حصلت ليكى انتى فعلا بس اكيد حصلت لبنات تانية

وطبعا كلنا بندعيلك وتيجى البوست الجاى تعزمينا على فرحك
بس عاوز اقولك على حاجه .....
ان يمكن من كتر التفكير فى الموضوع ده
وكتر ان المجتمع بتاعنا وتفكير الناس كلها بيتجه للموضوع ده
وان ازاى البنت لسه متجوزتش وهى فى السن ده
طبعا مع اختلاف حد السن ده من مجتمع لمجتمع زى ما قولتى (( المجتمع الريفى -- او حتى مجتمع المدن ))

طبعا مستنينا بوستاتك اللى زى العسل دى يا عسل وربنا يوفقك

reri said...

ربنا يسهلها
ويطلع غير اللي قبله يا برايد
أما عن كلام الناس البايخ فربنا يخلصنا من كل الحشريين المتطفلين الرخمين أمثال أماني ومامتها وغيرهم

سلامااااااااااااااااات

reham said...

مش حقول غير كلمة واحدة : خللى بالك من جيرانك
تحياتى اليكى يا صاحبة احلى مدونة فى البلوج رينج كله

Dibo said...

Dear Bride
I hope you the best of everything not just an excellent soul mate.
And I want to thank "some one" who wrote his comment on this post in English (on 17/5) for his nice words and his proper balanced opinion.

Aardvark EF-111B said...

لو سمحت حاولي تخلقي لنفسك حياه خاصه, بلاش حفر خنادق حول موضوع واحد, حتى لو كل إللي حواليكي بيزنو

إفصلي شويه

rody said...

كل الى اقدر اقوله ربنا معاكى و معايا انا ان شتء الله هبدأ رحلتى مع جوازات الصالونات من الجمعة الى جاية.....على فكرة دى اول مرة هحاول اعمل ذيك و افترض انه حد كويس و ينفع...ادعيلى

Anonymous said...

ادعيلها وهي هاتدعيلك

وانتو الاتنين هاتدعوا لبعض

وانا هادعيلك وادعيلها

وهم هايدعولك ويدعولها

وأكيد هو هايستجيب دعانا

مليار ونص بيدعو كل يوم

وهو قاعد بيستجيب لكله

ماسابش حد مااستجابلوش

تمرض ؟ تدعيه

عايز تنجح ؟ تدعيه

عايز تتجوز ؟ تدعيه

عايز قرشين ؟ تدعيه

عايز مليون؟ تدعيه

عايز تنتصر في الحرب؟ تدعيه

عايز اسرائيل تزول عن الوجود ؟

ادعيه

عايزغير المسلمين يموتوا كلهم ؟ ادعيه

سيبكو من العلم والعمل والقرف

خلونا كده نرفع ايدينا كلنا كده

زي ما قالولنا

ونفضل ندعي . ليل نهار

ونهار وليل

هوه هايستجيب

بس صبركو شوية

spoony said...

انا مش فاهم اني تاعبة نفسك ليه كل دا علشان عريس يييييا انتي جيتي في جمل منا موجود اهوه وجاهز من الستينات بس مش لاقي عروسه عليها الطلا عموما لو ضربك السلك والعمليه اتقحرت اكتر من كده انا في الخدمة ومتقلقيش مش هعملك رنة موبايل لما النسيم هنخليها العنب ولو قلقانة من موضوع من هيغسل المواعين متقلقيش انا هلتزم بالشربات ( عفانة بقي ) وكل واحد حر اما بالنسبة لمصاريف المعيشه انسي .. انا مش لاقي اكل وبجيب كل مستحضرات البترول وفي مشكله انا اصغر منك بكتير بس متقلقيش عموما ربنا يرزقك بابن الحلال .. بس اصل المشكله ان الشباب كله عايز يتجوز بس منين .. شوفي واحد كويس ويكون متدين وشوفي طريقه خليه يتجوزك بيها بجد وصدقيني الشباب الكويس كتير بس الامكانيات مش مساعده وبجد انا واحد من الناس بقول وانا هخنق نفسي ليه منا عايش اهوه واخر حلاوه ومن الشغل للتمرين ومن التمرين للشغل ةالحياه ماشية .. ومعيش نفسي حلو يبقي ليه اروح لواحد اقله جوزني بنتك ينطنط عليا .. مش كفايه خنقة الشغل .. ولو عايزه تلحقي نفسي ادعي ربنا وهوه هيسهلها وبلاش نظبط الواد العريس وعلي قد امكانياته وعديها بقي ....
ملحوظه لو عجبتك رنه العنب ابقي تعاليلي المدونه بتاعتي مع اني من زمان مكتبتش
www.toto3alakaboto.blogspot.com

Bride Zone said...

انا برضه ابتديت اكتب عن العاهات اللي تقدموا لي..
ربنا يصلح الحال يارب..


يمكن يكون ابن حلال؟
لو فيه الخير ربنا يوفق..

Anonymous said...

على فكرة اغلس حاجة البشر اللى مالههش لزمة اللى بتقعد ترغى فى اللى مالهش فية
انا هافكر جدية ابعتللك قصص العهات اللى بتجيلى والناس نوعية امانى
شكرا
موندة

Anonymous said...

ولا يهمك يا برايد كلنا زيك والله بس الشيئ المستفز فعلا هو كلام الناس دول يعنى فيها ايه لو يسيبوا كل واحد فى حاله مكنش هيبقى فيه مشكلة خالص سواء أتجوزنا أو متجوزناش خلاص اللى بيزود الطين بله كلامهم الوحش ويتصعبوا قوى ويفضلوا يحسروناعلى حالنا لأ وايه تسمعى من اى واحدة متجوزة منهم الكام كلمة دول ( معلش يا حبيبتى ده نصيب وبعدين والنبى انتى كده أحسن يعنى اللى أتجوزوا خدوا ايه ما انا طالع عينى من الراجل والعيال ده يا بختك فاضية ده انا والنبى بحسدك على الأمله اللى انتى فيها فاضية ومفيش وراكى حاجة ) كل يوم بسمع الكلمتين دول من أى جارة يعنى من النهاية احنا فى الهوا سوا

Unknown said...

حبيبتى برايد وحشتينى ووحشتنى موضوعاتك معلشى اتاخرت عليكى كنت بمتحن فعلا الناس متسيبشى حد فى حالة قبل متتجوزى يبصولك وهما زعالانين ويسالو وهو لسة مفيش نصيب ولما تتجوزى يسالو هتحملى امتى ولما تخلفى يسالوكى مش هتاخوية يعنى مش هيبطلوا اسئلة

Anonymous said...

Kol ali a3rafw an mish haigi 3aris kwis ela lama rabina yrid ,wi rait matid3afish wi tikhtari ai 7ad wi al salam

meroooo said...

حاسه او شوفتك في الحكايه او اللي حصلك ده
حاسه انك من كتر السخريه اللي جواكي من ناحيه الموقف اللي بتحصلك
بقيتي مش قادره حتي تتريقي اكتر من كده علي اللي بيحصل
بس صدقيني لو جالك رجاله الدنيا اللي ربنا قسمهولك هتشوفيه
مش عاوزه اقول كلام اوسي بيه او الكلام ده بس انا من اللي قريته بقيت عارفكي نوعا ما
شيلي قلبك واحسايسك ومشاعرك من تفكير في اي شخص وفكري بعقلك يمكن تكسبي زي اماني او زي ماناس كتيره معتقده ان الحياه راجل وعيال وخنائق علي مصروف وبس
ربنا معاكي ومعايا

Rosa said...

ربنا يستر يا برايد
اما نشوف ست اماني ام هند ومؤمن ومرات فوفو الي بيحط مكياج مجايبها ايه
اتحفينا يا برايد يالسابـــــــــــع
بس خير خير
بيقولا السابع في المنام نصره كبيره
:D
تحياتي يا جميل
سلام :)

Doba said...

عندى بوست جديد يهمنى جدا ردكم عليه
هتنورونى طبعا

متنشوس ....عاوزة حقيقى رأيكم وبصراحة

سلامى.........هبة

عشقك ندي said...

والنبي ومن نببي النبي الموضوع -اللي هو الجواز فاشل فاشل فاشل- وابن ناس وحشين اللي يقولك غير كده
بلاش عمر حد عمل حاجة حلوة وقاللك عليها طبعا لا بيكتم
انما علشان اللي متجوزين زييي متغاظين ومنفسنين عايزين كله يلبس في الحيطة زيهم
نداءمن حكمدارية العاصمة الي البنت اللي عايزة تتجوز القاطنة في كل ربوع مصر لا تتزوجي العريس الذي ارسلته بنت اخت خالتك
الجواز فيه سم قاتل

TAFATEFO said...

أنا بستمتع جدا جدا بكل كتاباتك في البلوج الأكثر من رائع ده .. وبتابعه أول بألو لكن بصراحه انتي محيراني جدا جدا

أنا مش فاهم هو بجد ناس كده بتيجي تتقدم من غير ماتشوفيهم قبل كده ولا تعرفيهم

حضرتك صيدلانيه ومن كلامك يتضح انك ذات عقليه متقتحه وبيتهيألي ان من الصعب جدا ان يكون هي دي وسيلة زواج حضرتك

يعني معقول انتي مثلا مرتبطتيش عاطفيا قبل كده .. مش مرتبطه عاطفيا دلوقتي !!! حاجات غريبه وتساؤلات كتير

يا ريت يا ريت نعرف عن حياتك أكتر وايه السبب في الوضع الغير مفهوم ده

TAFATEFO said...

وصحيح يا برايد

أنا مش فاهم جواز الصالونات ده بيحصل ازاي ؟؟؟ يعني ازاي مثلا اللي جاي يتقدم مش بيبقى عارف عنك أي حاجه (شخصيتك يعني) ولا حتى يبقى عارف انك مرتبطه عاطفيا ولا مش مرتبطه .. أو ...........

بضي باختصار يا ريت تفهميني أكتر عن طبيعة جواز الصالونات

3aziz 3eni said...

لا اعتقد يا برايد
باين عليه اسامة بن لادن
او حد من اخواته المجاهدين

ربنا معاك

Unknown said...

حبيبتى برايد
انا بعتلك تاج مع تحياتى

KOKKO said...

انا اول مره اكتبلك هنا
بجد البلوج بتاعك هايل
بالنسبه لامانى متركزيش معاها
وشوفى العريس
ربنا يسهلها المره دي
معاك دعوات كتير قوى
يس تبقى تعزمينا على الفرح ان شاء الله

Noony said...

إن شاء الله خير
مش مشكلة بقى انه من طرف ام هند أو جوز هند
بس يا رب يطلع انب حلال ويستحقك يا رب

ربنا يرزقك جميع البنات بالأزواج الصالحين

واللي عايز يتكلم يتكلم...هو الكلام بفلوس!؟
سيبك منهم..ناس فاضية

:)
ربنا يسعدك يا رب
نوني

ftataljanna said...

بصي يا برايد

انا بس عايزة اقول لك حاجة خبر حلو لما سمعته كنت مبسوطه اوى

يقال ان الفتاة المسلمة لما بتموت من غير زواج بيكون لها اجر الشهيد وتوج يوم القيامة لمن تحب

يعنى ماحدش خسران حاجة

اتجوزتى وان شاء الله قريب اديكى هاتعيشي واما لو خلافه لاى حد تانى
فلها اجر الشهادة

وماحدش بياخد اكتر من نصيبه

واما جيرانك دول فسيبك منهم ربنا يهديهم واديكي بتاخدى حسنات على قفاهم

Anonymous said...

انتى شكلك كدا لو موأخذة عايزة راجل أو عريس بس مكسوفة صح فبلاش طريقة الترهيب و الترغيب ديه لو عايزة عريس انا عندى واحد ينفعك تمام بس هاتى السى فى بتاعتك و صورة شخصية حديثة واعرضها عليه و بعد كدا اعرضك عليه

Anonymous said...

كان فيه حد قبلي سألك عايزة تتنيلي وتتجوزي ليه

عنده/ عندها حق

بصي حواليكي, أيه نسبة المتجوزين السعداء مقارنة بالتعساء؟

معظم اللي بينصحوكي في البلوج ده
بيقولولك ربنا ومش ربنا
وآخرهم اللي مسمية نفسها فتاة الجنة
بتستعبطك وهتعملك شهيدة وهتاخدي حسنات وكلام فارغ مالوش لازمة

الجواز بالنسبة للناس دول من ربنا
وكمان الطلاق , وكل حاجة هوّه اللي هايقررها لينا. يعني نقعد مانفكرش ولا نشتغل وهو هايعمل لنا كل حاجة

"ربنا يرزقك بابن الحلال", طب والناس اللي اترزقوا بابناء الحرام , كان مين اللي رزقهم ؟

الحرامية والنصابين اللي عندهم الملايين كان هوه برضه اللي رزقهم؟

طبعا انتي أكيد محجبة.
" أظفر بذات الدين"
أمّال مالهم التلاتين مليون محجبة مش لاقيين عرسان؟
مش يمكن من البلاوي المستخبية تحت الحجاب من روائح منفرة وما شابه؟

Anonymous said...

ربنا يوفقك يابرايد ومستنية بشوق البوست الجديد متتاخريش علينا ياجميل

تحياتي

wanna b a bride said...

batresya

شكرا ليكي يا جميل

و ربنا يسهل
----------------
emos

كلنا في البهدلة سواء

كلنا في خندق احد

انتي من الأحرار يا إيموس
-----------------
مجهول

من ناحية العرسان بيترموا

فهما بيترموا

بس من ع السلم
-----------------
islamist bloke

ربنا يسهل يا رب

و تبقى بركة دعاك

بالنسبة للمظاهرة دي

هي ممكن يجي فيها شباب كتير

بس في الغالب في يوم البنات هابقى لوحدي

ماحادش هييجي الا انا

لسه بدري على ما نقدر نقولها بصراحة
المجتمع مايسمحش
------------------
romantic rose

لأ هي مش قضية تموين

ده محضر سكر
بضم السين و تسكين الكاف

شوفتي الحلاوة
لولو بأه

عموما بالنسبة للي بيحصللي
فده قضاء الله ولا راد لقضاؤه
و المؤمن دايما مصاب

اللهم لا إعتراض
--------------------
مجهول

لا تعليق

wanna b a bride said...

reemoo

طب ممكن تشوفيلي شقة جنبكوا؟

ربنا ينفخ في صورة العريس

و نخلص منهم خالص

---------------
وليد من الكويت

شكرا لمواساتك

و الله كل شوية أحاول أقفل التعليقات المجهوله عشان البني آمين الغراب اللي بيكتبوا و يجروا دول

بس بارجع و افتحها عشان فيه ناس كتير محترمة زيك

ربنا يصبرنا ع الجيران و العرسان و التعليقات

شكرا
-----------------
the groom


آه اشمعنى أنا لوحدي اللي لسه

انتوا كمان لازم يبقى ليكوا نصيب من التلات حروف الذهبية دي

تحياتي لماناساس البلد
----------------
little

ياااااااارب

عموما لو حصل ماتقلقوش ممكن أدورلكوا في صندوق ذكرياتي

و اطلع لكم بلاوي

هو انا اللي جالي شوية؟
تحياتي
------------------
amr ahmed

ياااااااارب
---------------
van gogh

ده ايه التفاؤل ده؟
:)
---------------
سجدة

مش عارفة الناس دي

ما بتشوفش الإشارات عاملة ازاي

ده الواحد بينزل يروح الشغل يوصل بعد 7 سنين

مابالك العرسان بأه

wanna b a bride said...

الشنكوتي الكبير

تحياتي لأختك رفيقة الكفاح

و مش عارفة بصراحة انصحك لأني في نفس الموقف
أخويا كل أصحابه بأه معاهم عيال دلوقت

و هو صابر بالعافية

و انا باعمل نفسي مش واخده بالي

أعمل ايه يعني

ده أصغر مني بسنتين ..عايز يتجوز قبلي

طب دانا كنت

كنت

و لاحاجة هاعمل ايه يعني هاتقهر شوية و بعدين هاجي أكتب بوست

و بعدين خلاص

----------------------
esmeralda

و ليه التطويل ده؟

خدتي نص الصفحة
:)

تحياتي
-------------------
barbie girl

من بقك لباب السما
-----------------
صوت فيروز

مفرمة المجتمع

تعبير جميل

ربنا يصبرنا أجمعين
----------------
desert cat

افرحي فيا
افرحي بيا

بس المهم يبقى فيه فرحة و خلاص
---------------
doba

هو لو طلع عاهة

لو طلع ملا

مافيش فايده كده كده
مش هيبطلوا

بالنسب للشوم ماتقلقيش

جيب السبع ما يخلاش

عش اتحاد الشعب العامل

wanna b a bride said...

انتظار مؤقت

و انا في انتظار مؤت لمعرفة
ايه اللي بيحص معايا
----------------
bestic

من ناحية البوست الروش

ربنا يستر
ماهي الروشنة أنواع

بالنسبة للإختيار الصح
هو انا مقعدني الا اني بأتوخى الذر في اموضوع ده
-----------------
shower mirror

ليه ليه؟
ايه اللي شوهني في البوست ده

و بعدين فين الدليل على اني وحشة زي مابتقول؟

نبهني ربنا يخليك

و بعدين مين قال أكتر نشاط بيحصل في مصر الجواز

انت مابتقراش تعليقات البنانيت القمامير اللي بيجوا هنا

والا ماقريتش اللي بيجرا في بيت العرايس و العرسان؟
--------------------
esmeralda

ما هو انا ماشيه بالمثل ده
و ده اللي بيخلليني أشوف كل واحد
يمكن
-------------------
someone

شكرا ليك\ليكي

جدا جدا جدا

الكلام المكتوب ده يعمل بوست لوحده

و جهة نظر جميله جدا و كلام عاقل و مخ مظبوط جدا

احنا اللي عاملين كده في نفسنا نحدد معاد نهائي للجواز و لازم ينتهي موضوع الجواز ده قبله

حتى لو مالقيناش حد نرتاحله و يرتاحلنا

أهي جوازه و السلام زي مابيقولوا

و النتيجة مجرد اتنين غرباء عايشين مع بعض و بيربوا عيال

او ينفصلوا و يقولوا اللي جرالنا ده ليه

تحيات
-----------------------
ma-3alina

ربنا يستر
يااارب
-------------------
masria

شكرا على ذوقك يا جميل
------------------
tito

قولهم بليز

ماحادش مصدقني و كل الناس بتقولي بتألفي

و ان شاء الله لو حصل هاعمل بوست واحد مكون من كلمة واحدة بس

اتجوزززززززززززززززززززززززززززززززت

تحياتي
---------------------
reri

يا رب يسهلها للجميع

ربنا يهدي كل البايخين يااارب
--------------------
reham

تحياتي

يا رافعة معنوياتي

أخجلتم تواضعنا

سكينة said...

مش عارفة ليه البوست فكرني بالمثل
" يغور السعد من وش القرد"
تحياتي لك على التفاؤل اللذيذ وعلى رأيك يوضع سره في أضعف خلقه
على العموم الموسم الصيفي بدأ والمغتربين هيهلوا كله عايز يحجز قبل ما يسافر
:)

wanna b a bride said...

dibo

أشكرك على تمنياتك الرقيقة

و أضم صوتي لصوتك و أشكر مرة تانية
some one
---------------
aardvark ef-111b

لو سمحت ماتيهيألكش خالص اني حصرت نفسي في موضوع الجواز فقط

المدونة دي ليها نظام معين

لكن مش ضروري ده يكون بيعبر عن كل جوانب حياتي

ده مجرد جزء..قمة جبل الجليد

و مش محتاجة أفصل

شكرا
-----------------
rody

ربنا يوفقك

بس على فكرة فيه ناس كتير بتلفق معاهم من اول مرة

تفاءلي خير
--------------------
مجهول

لا تعليق
--------------------
spoony

لو ضربك السلك والعمليه اتقحرت اكتر من كده
مش لاقي اكل وبجيب كل مستحضرات البترول
شوفي واحد كويس ويكون متدين وشوفي طريقه خليه يتجوزك بيها

ايه الدرر اللي انت كاتبها دي ما شاء الله

بس عموما شكرا ع النصايح

هحاول بكل ما في وسعي أجربهم
---------------------
bride zone

تحياتي
يا رفيقة الكفاح

wanna b a bride said...

مونده

مستني القصص يا جميل

-------------------
naglaa

كلنا في الهم سواء

ربنا يهدي الناس
و يهدينا بعد ماربنا يسهل و نتجوز مانعملش كده في التانيين
--------------------
أيوية

ربنا يوفقك في امتحاناتك

ركزي فيهم قوي

و الناس هيفضلوا كده على طول للأسف

ربنا يسهل و يكتمهم خالص
ان شاء الله
-------------------
spyfun

أنا بحاول أقاوم موضوع الضعف ده

و المقاومة بتعذبني أكتر و أكتر

بس أكيد الإستسلام هيعذبني أكتر
-------------------
meroooo

للأسف أنا بافكر بعقلي أكتر من اللازم

مابافاكرش بمشاعري خالص خالص

و يمكن ده عيب كبير

تحياتي
-------------------
rosa

و النبي ياختي أنا كمان بتفائل برقم 7 ده قوي

تفتكري؟

و الله يا أختشي يبقالك الحلاوة

wanna b a bride said...

doba

عينينا ليكي

هاجيب نهى و اماني و اجيلك على طول
-------------------
عشقك ندى

الجواز فيه سم قاتل

بس الوحدة فيها سم أخطر
------------------
musatafa

ماهو صيدلانية ده عيب
لأن الكارير كله بنات في بنات

ذات عقليه متفتحة دي عيب تاني
ماحادش عايز واحدة بتفهم كل الناس عايزة واحدة تبص في الأرض بتتكعبل في ضلها و يسحبها وراه بحبل

و مش عارفة من حسن الحظ والا من سوءه اني مالقيتش حد يستحق اني أشعر من ناحيته بأي عاطفة

و لأني من البيت للشغل و من الشغل للبيت

فما فيش منفذ لموضوع الجواز إلا الصالونات

و بختك يا بو بخيت
--------------------
sokomonoce

تفتكر أسامه يقطع المسافة دي كلها عشاني؟
طب ماتبقاش تيجي ناحية بيتنا الأسبوع الجاي
يمكن حاجة تفرقع فيك والا حاجة
------------------
أيوية
ربنا يسهل
و شكرا ليكي
-----------------
kokko

و الله و الله لو حصل لأعزمكوا كلكوا

بس انتوا تيجوا
-

wanna b a bride said...

noony

ماهو انا اخدت قرار اني أشوف كل الناس

انشالله حتى ابن البواب

هاشوفه برضه

مش هاخس حاجة
دمي و ضغطي و اعصابي
بس

تحياتي
-----------------
ftataljanna

هو طبعا خبر جميل

بس أنا برضه أتمنى ربنا يرزقني في الدنيا و الآخرة

لن إحساس الوحدة

شئ قاتل
-------------------
محمود

و الله أنا مانا عارفة بتضيعوا وقتكم ووقتي ليه

بجد لو عندكوا حاجة مهمة تعملوها ياريت ماتضيعوش وقتكوا الثمين هنا


-----------------
مجهول

نفس التعليق اللي فات

-----------------
أيامنا الحلوة

شكرا ليكي

و حاضر بمجرد ماهييجوا و اشوف التفاصيل هاقول على طول

TAFATEFO said...

" ماهو صيدلانية ده عيب ...
لأن الكارير كله بنات في بنات

ذات عقليه متفتحة دي عيب تاني ...
ماحادش عايز واحدة بتفهم كل الناس عايزة واحدة تبص في الأرض بتتكعبل في ضلها و يسحبها وراه بحبل

و لأني من البيت للشغل و من الشغل للبيت"

!?!?!? الصيادله دول (وبتوع السوبر ماركت) أكتر ناس في الدنيا بيقابلوا ناس وليهم direct contact مع ناس في الحياه اليوميه .. عيب بقى ازاي الله أعلم

؟!؟!؟! محدش عايز واحده بتفهم دي هي الجديده .. لأن أكيد اللي هيتقدم لصيدلانية أو اللي يعرف صيدلانية يبقى متأكد انها بتفهم .. كفايه انها عدت من الفارما والثيوتيكال .. ودي لوحدها شهاده بالفهم :):):) .. ثانيا كلية الصيدله في مصر بيقولوا عليها من كليات القمه .. يعني هتبقى واحده دخلت صيدله واتخرجت .. ومبتفهمش؟؟!! فهميهالي دي أكرمك الباري

من البيت للشغل ومن الشغل للبيت دي بقى اللي مشكله وغلط كبير جدا .. بس حلها بسيط .. والحل ده مش علشان خاطر الجواز ولا حاجه .. لا ده علشان انتي محتاجه ده والناس في بلدك ومجتمعك محتاجه ده أكتر منك وممن هم مثلك

حضرتك في بوست قلتي انك روحتي النادي .. يبقى تروحي النادي .. تشمي هوا .. تمارسي نشاطات .. وتكوني علاقات صدافه كتير
الجمعيات الأهليه وجمعيات المجحتمع المدني.. محتاجه لمجهود الشباب .. وخاصة من وسط المثقفين .. وأعتقد ان بلدنا في أمس الحاجه لدورنا كشباب .. وخاصة الشبابا اللي على قدر عالي من التعليم زي حضرتك
ناهيك طبعا عن النشاطات الخيرية .. كدور الأيتام ودور المسنين والجمعيات الخيريه كرساله وغيرها وغيرها
وأخير وليس آخرا .. ملايين الأماكن اللي في بلدنا ومنعرفش عنها حاجه ومزورناهاش ولا فكرنا نزورها .. مثلا الآثار الإسلاميه والعدد في الليمون.

الموضوع يا برايد مش البحث عن عريس .. الموضوع كيف تعيش حياه تسعد بها وتساعد بها غيرك

حاجه كمان وآسف للاطاله .. تفتكري لما يتقدملك عريس وتعرفيه من جلستين تلاته وخلفيه تاريخيه عن حياته .. ده شئ كافي علشان تعرفيه ؟؟ يا برايد جواز الصالونات ده كارثه لأنه قد ينتهي بعقده للبنت حتى لو محصلش جواز .. يا ترى لو اتقدم واحد ظروفه كويسه ومن بره حلو كده وبيلمع .. وانتي وافقتي على الخطوبه وهوب في الخطويه لقيتيه شخص مش ولا بد .. مش ده احتمال قائم ؟؟!! أنا أعتقد انك ساعتها ( مش لازم انتي يعني أنا أقصد اللي عندهم ظروف مشابهه) ممكن جدا يتعقدوا من الموضوع كله.

نصيحه من واحد معترف انه لسه عيل عنده 23 سنه .. عيشي حياتك دي قبل ما تفكري في حياه جديده .. واختاري شريك حياتك .. مش بس توافقي عليه

Unknown said...

" ماهو صيدلانية ده عيب ...
لأن الكارير كله بنات في بنات

ذات عقليه متفتحة دي عيب تاني ...
ماحادش عايز واحدة بتفهم كل الناس عايزة واحدة تبص في الأرض بتتكعبل في ضلها و يسحبها وراه بحبل

و لأني من البيت للشغل و من الشغل للبيت"

!?!?!? الصيادله دول (وبتوع السوبر ماركت) أكتر ناس في الدنيا بيقابلوا ناس وليهم direct contact مع ناس في الحياه اليوميه .. عيب بقى ازاي الله أعلم

؟!؟!؟! محدش عايز واحده بتفهم دي هي الجديده .. لأن أكيد اللي هيتقدم لصيدلانية أو اللي يعرف صيدلانية يبقى متأكد انها بتفهم .. كفايه انها عدت من الفارما والثيوتيكال .. ودي لوحدها شهاده بالفهم :):):) .. ثانيا كلية الصيدله في مصر بيقولوا عليها من كليات القمه .. يعني هتبقى واحده دخلت صيدله واتخرجت .. ومبتفهمش؟؟!! فهميهالي دي أكرمك الباري

من البيت للشغل ومن الشغل للبيت دي بقى اللي مشكله وغلط كبير جدا .. بس حلها بسيط .. والحل ده مش علشان خاطر الجواز ولا حاجه .. لا ده علشان انتي محتاجه ده والناس في بلدك ومجتمعك محتاجه ده أكتر منك وممن هم مثلك

حضرتك في بوست قلتي انك روحتي النادي .. يبقى تروحي النادي .. تشمي هوا .. تمارسي نشاطات .. وتكوني علاقات صدافه كتير
الجمعيات الأهليه وجمعيات المجحتمع المدني.. محتاجه لمجهود الشباب .. وخاصة من وسط المثقفين .. وأعتقد ان بلدنا في أمس الحاجه لدورنا كشباب .. وخاصة الشبابا اللي على قدر عالي من التعليم زي حضرتك
ناهيك طبعا عن النشاطات الخيرية .. كدور الأيتام ودور المسنين والجمعيات الخيريه كرساله وغيرها وغيرها
وأخير وليس آخرا .. ملايين الأماكن اللي في بلدنا ومنعرفش عنها حاجه ومزورناهاش ولا فكرنا نزورها .. مثلا الآثار الإسلاميه والعدد في الليمون.

الموضوع يا برايد مش البحث عن عريس .. الموضوع كيف تعيش حياه تسعد بها وتساعد بها غيرك

حاجه كمان وآسف للاطاله .. تفتكري لما يتقدملك عريس وتعرفيه من جلستين تلاته وخلفيه تاريخيه عن حياته .. ده شئ كافي علشان تعرفيه ؟؟ يا برايد جواز الصالونات ده كارثه لأنه قد ينتهي بعقده للبنت حتى لو محصلش جواز .. يا ترى لو اتقدم واحد ظروفه كويسه ومن بره حلو كده وبيلمع .. وانتي وافقتي على الخطوبه وهوب في الخطويه لقيتيه شخص مش ولا بد .. مش ده احتمال قائم ؟؟!! أنا أعتقد انك ساعتها ( مش لازم انتي يعني أنا أقصد اللي عندهم ظروف مشابهه) ممكن جدا يتعقدوا من الموضوع كله.

نصيحه من واحد معترف انه لسه عيل عنده 23 سنه .. عيشي حياتك دي قبل ما تفكري في حياه جديده .. واختاري شريك حياتك .. مش بس توافقي عليه

dr-killer said...

معلش انا عارف اني متطفل
parasite
الي تحبي تعتبريه عني اعتبريه
بس الكلام الي بيتكتب هنا ده بجد
ايه ده الموضوع غريب
مش بس كدة لا و كمان الردود عددها مهول
وانتي بتردي على الكل
والله عفارم عليكي على راي ستي

Fantasia said...

Why do you wanna get married? You have your job and a great personality. You have a sense of humour that will never let you down. You can go on with your life without needing a man to show his interest in you. What if he never shows up? It's not the end of the world.
Girls like you should not waste their time looking for a suitor. You can succeed on your own and what people say is according to how much you allow them to say. You can be a model for other single girls. Just discard the idea and concentrate on your advancement in life. You can soon be in a position which 1000 men envy you for.

Anonymous said...

هاى برايد,ازيك قلبى معاكى والله فى العاهات اللى بتشوفيهم دول,بس مش عاوزاكى تزعلى لان دى بقت ظاهرة كل البنات اللى اعرفهم تقريبا و على اختلاف مستواهم الاجتماعى بيعانو من نفس الحكاية دى ,و الكلمة اللى بسمعها من كل الامهات اللى عندهم اولاد : هما البنات لاقيين عشان يتشرطو يقولو آه و لا و المهم ان ابنها يكون اقل من العادى فى كل حاجة من ناحية التعليم و الشكل و الوضع الاجتماعى والناحية المادية و كل شيئ و الاغرب بقى موقف نفس الست الوالدةو اللى ممكن يكون عندها بنت بس طبعا اللى نرضاه لبنات الناس ما نرضهاهوش لبنتنا, اقولك ايه الله يلعن ابو الفقر و البطالة اللى عملت كده فى بنات الناس و صحيح كلمة سيدنا على( لو كان الفقر رجلا لقتلته) اختكم نونا

Ali Mahdi said...

دا مش بحث عن عريس يا برايد
دا الموضوع على كده مشكلة عويصة
طاب تعملى اية فى العروسة والعريس اللى لقو بعض بس للاسف هو فى مصر وهى فى اخر الدنيا ومش عارفين يتقابلو

والله الدنيا مش مريحة حد خالص

ربنا يقربلك البعيد ويبعتلك ابن الحلال اللى يسعدك
وانا كمان يقربلى حبيبتى ويجمعنى بيها فى الخير دايما يا رب

Unknown said...

والله يا برايد يا أختي الموضوع محير وغلس
وتقريبا ممكن اقول اني حاسس ب احساسك
الوحدة مش سهلة والنفس تشتاق لمن يؤنسها

بس زي مابعض التعليقات قالت: انت بتشتغلي شغلانة حلوة ومتعلمة ودمك خفيف وكله ف اوانه حلو
واتمنى ليكي ماتتمنيه لنفسك
تحياتي

نفسنا said...

تم أفتتاح العدد الأول من مجلة نفسنا
نتمنى منكم زيارتنا

Wild at Heart said...

الست اللى بتيجى تنفض الشقة كل أسبوعين كل ما تشوف وشى تقوللى (عليا أنا و أخواتى) : ربنا يعدلهالكوا لحد ما فى مرة قلت لها: احنا كويسين الحمد لله :)
مش عارفة هما شايفين حالنا مايل وللا بنمشى بضهرنا عشان يقولوا لنا كده!!!
ماتغيبيش علينا يا برايد

Anonymous said...

وانتي مؤمنة كده قوي ماشاء الله
لو جالك عريس فيه كل المواصفات اللي انتي عايزاها, لكن عنده تلاته قبلك وانتي هاتبقي الرابعة

تقبلي؟

بيتنا القديم said...

"ما تقاطعيش يا بت يا برايد..مش

هتخسري حاجة"

كده فل

تحياتي

ويجعلو عاااااااامر

خيرالدين said...

فيه واحد بيفكر ينافسك ويكتب عن العرائس اللى اتقدم لهم واترفض
الناس بقت بتحسدك على الشهره يا برايد

Shreif fahmy said...

http://sfahmy78.blogspot.com/2007_04_01_archive.html
منتظر تعليقك

nehad said...

و لايهمك يا برايد
علقه تفوت ولا حد يموووووووووت
عاتى يا اختشى من دى كتير
ربنا معاكى ويكرمك

Unknown said...

يووووووووووووووووووه على مصمصة الشفايف والمواساة وتلاقيح الكلااااااااااام

ده لو احنا - بنات مصر - اجتمعنا كلنا وكتبنا اللى بنشوفه من الهبل ده نعمل مجمع مكتباااااات مش مكتبة واحدة

لا وأغرب تعليقات جالى لحد دلوقتى

جارتى اللى اصغر منى بسنة بعد حفلة خطوبتها اللى معزمتنيش عليها ولا عبرتنى - المفترض اننا كنا صحاب يعنى .. خدى بالك اوى من كنا- طلعت تزورنى على غير العادة وقبل ما تمشى وقفت على الباب تقولى:

ماتزعليش يابنتى - وانا مكنتش زعلانة ولا حاجة على فكرة - هيجيلك فى الاخر ماتخافيش - مين ده؟؟!!! - هما بس بيتأخروا شوية وهيجوا - هما مين دووووووووووووووول؟؟؟؟؟؟؟؟

وطنط بقا ماما جارتى اللى قالتلى البوقين دول شافتنى راجعة من الكلية وتقريبا حست انى متشيكة ولا حاجة .. فانشكحت كدة وبعد السلامات:

ايه الشياكة دى كلها يابنتى .. اكيد ماما عايزة تجوزكككككك

:(

هنقول ايه بس يا برايد

حسبى الله ونعم الوكيل

shermen said...

حاسه بيكي والله يا حبيبتي
كلنا برايد
وبيحصل لنا نفس المشاكل
وبنشوف نفس ردود الأفعال
لنا الله

wanna b a bride said...

tafatefo

سوري في السؤال

هو إسمك ده معناه ايه؟

اولا ربط الصيادلة بالسوبر ماركت شئ مش هايعجب صيادلة كتير

ثانيا ..آه طبعا فيه ناس كتير في صيدلة مابيفهموش و دخلوا الكلية بالصم فقط و بيخرجوا منها ببركة دعا الوالدين
و الذكاء العلمي مش شرط يكون مرتبط بالذكاء الإجتماعي

--------------------------------
mustafa

بسم الله الرحمن الرحيم
ده مجرد نقل للتعليق

والا دي حالة فصام؟

بالنسبة لجواز الصالونات ..هو ناجح مع ناس كتير
انا بس اللي معصلج معايا شوية
-----------------------------
dr-killer

أهلا بيك في أي وقت

الكلام اللي هنا كتير منه حقيقي

عدد التعليقات الكبير..ربنا مايجع لنا جار وله عينين:))

و شكرا يافندم ع التشجيع
--------------------------
fantasia

أنا عايزة اتجوز لأنه على الأقل هي دي الطريقة الوحيدة اللي ممكن أجيب بيها أولاد

و كمان مش عايزة أوصل لسن وأحس فيه بالوحدة واني مش جنبي حد

لكن لو لا قدر الله ماحصلش..الدنيا مش هتقف

انا عندي شغلي و حياتي و مش هاحصر نفسي في مورنر و أفضل أعيط على شئ مش من نصيبي

تحياتي
-------------------------
noona

رفقاء الكفاح في كل مكان و من كل سن و مستوى
لنا اله
------------------------
ahmed moghazy

ربنا يقرب البعيد
--------------------
obad

الحمدلله انك حاسس باحساسي و احساس ناس كتير

تحياتي
----------------------
نفسنا

ألف مبروك

wanna b a bride said...

wild at heart

معلش معلش

صبر جميل و الله المستعان
-----------------------
anonymous

مش فاهمه تقصد ايه؟

بس مش من حق أي حد يقرر مين مؤمن و مين لأ
---------------------
سمسم

ماقاطعتش والله

ربنا يستر ع الجميع
-----------------------
e7na

فين ده؟

وريهولي لحسن يطلع حد من المجموعة بتاعتي
-------------------
shreif fahmy

مدونة جميلة و أسلوب أكتر من رائع
تحياتي و يالتوفيق
------------------
nehad

أنا اتهريت علق
اللهم لا راد لقضائك
-------------------
إنسانة

ألا صحيح موضوع مصمصة الشفايف ده متهيألي انه اختراع مصري بحت

مايتهيأليش أي شعب تاني يعرف يعملها

موضوع ارتباط اللبس الجيدي بالبحث عن عريسده ماشي كتير اليومين دول

ماهم لو بيجوا بالبس الجديد

ماكانش حد غلب
------------------
shermen

كلنا في الهم سواء

تحياتي

TAFATEFO said...

tafatefo هو mustafa, mustafa هو tafatefo

مش فصام ولا حاجه، بس حصل خطأ بسيط

أما معنى tafatefo فدي حاجه لو عرفتوها تبقوا عمد (على رأي حسن حسني)

بالنسبه للصيادله والسوبر ماركت أنا مش بربط والله أنا بقول بس انكوا بتقابلوا ناس كتير جدا، وفعلا عندك حق ان الذكاء الاجتماعي (وحتى التوفيق مش بس الذكاء) غير مرتبط بالذكاء الفكري

بالنسبه لجواز الصالونات أكيد منه كتير جدا جدا كويس وأكيد أبهاتنا وأمهاتنا معظمهم اتجوز بالطريقه دي

على العموم بالتوفيق ان شاء الله ونتمنالك السعاده .. وشكلك طالما لغاية دلوقتي معلقتيش على زيارة الخميس يبقى في ;)

بالتوفيق ان شاء الله

Anonymous said...

أمرك غريب

ايه اللي مش فاهماه بسؤالي؟

تقبلي تكوني الزوجة الرابعة؟

يا آه يا لأ

Anonymous said...

يا قرّاء برايد المحترمين

أنا بأه العريس اللي بتحكيلكم عنه هنا

كنت سألتها في البوست اللي فات إذا ماكانش عندها مانع تتجوز واحد متجوز غيرها اتنين ولا تلاتة. برايد ما ردتش علي , يعني سكتت , وانا فهمت إن السكوت علامة الرضا فتقدمت لها.

طبعا هي بالغت في الوصف , وعملتني من غير راس. بس انا , والعياذ بالله من كلمة أنا , طيب وحنون وباعرف ازاي أسعدها قوي قوي.
هاستتها. وهتبقى المفضلة عندي.

كل يوم أنا وهي بعد ما نرجع من الشغل , ناكل الكباب اللي هاجيبهولها
وبعدين نقعد نقرأ قرءان . شوية كدة ونخش على كتب سيرة المصطفى ( صلعم )
وقبل ماننام نقرا لنا كم فصل من البخاري . سعادة مافيش زيها.
بعد أسبوع من كتب الكتاب هاخدها عمرة لبيت الله وقبل ما نرجع هانزور المدينة وقبر الرسول .

أول ما نرجع مصر هانروح سيدنا الحسين والسيدة زينب وناكل فطاير من عند فطاطري الحسين.
بعد كده نرجع البيت ونتفرج على قناة الأيمان ونقعد نتفرج على العلماء والفقهاء والدعاة والشيوخ لحد ما ننكشح. بعدين أنا وهي نصلي ونقرا قرآن وندعي لأحبابنا كلهم يبقوا زينا

يعني حياة كده مافيش بعدها حياة.

آه, وهنحضر دروس دينية عند الشيخ متولي والشيخ جمعة والشيخ النقراشي والشيخ حماد , دول شيوخ انما أيه , حاجة ماحصلتش , ومالهمش حل.

بعدين بأه أنا وهي قبل ماننام نقعد ننشد أناشيد دينية.

أما حكاية شغلها فدي طبعا ضد مبادئي وهانصحها تبطل شغل , ولو اني تظاهرت بأني موافق تستمر في عملها لأنه عمل إنساني . إنساني إيه ياشيخة؟

تقعد تتكلم مع الرجالة اللي عايز فياجرا واللي عايز عازل مطاطي وحاجات كده , وتجيلي آخر النهار نقر قرآن؟ أعوز بالله.

Anonymous said...

يابت يابرايد انتى زى العسل
بس اللى مجننى ان الناس مش فاهمة الموضوع
برايد مش عايزه عريس ياناس
برايد بتفضفض وبتقول اللىفى قلبها من خلال موضوع الجواز لكن البت دى مخها كبير قوى يعنى الجواز فرشة لموضوع اهم واكبر هم حرية التعبير

اسلوبك زى السكر وربنا حط فى لسانك عسل وشوية شقاوة ربنا يديمهم عليكى وتفضلى العمر كله بنفس الشقاوة والحيوية والحرية والاستقلال

انا عجوز عمرى 62 سنه لكن كلامك ورانى نوعية الشباب اللى بيعمل سهتان وهو فاهم كل حاجة بس بيمشى حاله كلنا عملنا كده يابرايد مش عيب
انا مش بتاع مدونات انا راجل عندى شوية كتب بحبها قوى وباحاول ان الكل يستفيد منها واعتقد ان دا حق مشروع انا اسمى galalgalal@yahoo.com
يمكن تحبى تقرى كتب م اللى بنزلها ح تنبيسطى قوى

وح اتابعك بس علشان احس بالسعادة مع قلمك الشقى العفريت
وروحك الوثابة

يللا طيرى

محمد جلال

momken said...

فلت من ايدك العريس ده مش يمكن ده الى يسعدك
مستنى البوست الى جاى ضرورى

Human Wolf said...

طيب وليه يا بنتى تعذبى نفسك وتاخدى طريق السلالمم المليان بالافاعى سليطه اللسان ماتغيرى الطريق انتى استنضفيلك من اى محل خردوات سبت من اللى بيتربط بحبل ده بس يكون هاند ميد على ابوه يعنى ويكون فاملى سايز وادخلى فيه ومن البلكونه اى حد ينزلك بس خدى بالك بلاش حد ينزلك يكون فى بينك وبينه خلافات انتى عارف ممكن يعمل فيها انه بيتاوب وقال ايه بيحط ايد على بقه وايده التانيه على ضهره واه وبتاع ويسيب الحبل وانتى جوه السبت وصباحه بيع هاتى حد ينزلك تكونى واثقه فيه بدل وجع الدماغ وتسمعيلك كام كلمه من الست السوسه دى انا لو منك الصراحه وقالتلى كده كنت برجلى كده فى الخباثه وشنكلتلها بنتها هند كحرتها على السلالمم .

Anonymous said...

يخربيتك دا انتي طلعتي بت نكتة مكتش اعرف ان مدونات البنات حلوة كدة مع خالص تحياتي

محمد محمود عبد الغني (MORONAJU) said...

الف مبروك ويارب دايما في نجاح وتفوق وده إهداء خاص مني http://moronaju01.blogspot.com/

آيه said...

ربنا ييسر لك ويرزقك يااختى انتى وكل اللي زيك وانا معاهم ونبي يارب
هو الموضوع بجد قسمه ونصيب وسبحان حاجات تتعقد سنين وحاجات تتم في ساعتين الصبر بقي وربنا يرؤف بحالنا اللي بستغربله كل الشباب اللي مترمى في الشوارع ده ومش مرتبطين بيعملوا ايه ف الدنيا ياسبحان الله؟