Friday, May 04, 2007

عن الرقة و الأنوثة


فاكرين فيلم غصن الزيتون؟ بتاع أحمد مظهر و سعاد حسني...لا طبعا مش الناصر
صلاح الدين هو ده كان فيه سعاد حسني؟

في الفيلم ده كان أحمد مظهر المدرس بتاع سعاد حسني و حبها و اتجوزها بس كان شاكك ان فيه علاقة بينها و بين عمر الحريري اللي كان مدرس في نفس المدرسة..طب ايه علاقة ده بأي حاجة يعني؟؟؟..هقولكم اصبروا بس

في مشهد من الفيلم ده كان عمر الحريري داخل قهوة فيها شوية مدرسين زمايله قاموا
قالوله ايه الكولونيا الجميلة اللي انت حاطتها دي إسمها إيه
قالهم أنوثة...و بغض النظر عن الإسم السخيف..لأ..السخيف جدا لكولونيا أو بارفان رجالي..فدي كانت المرة الأولى في حياتي اللي أسمع فيها الكلمة دي

أنوثة

و فضلت الكلمة دي متعلقة في ذهني بشكل عمر الحريري لمدة طويلة لحد لما كبرت شوية و لقيت الناس بيستخدموها لوصف ناس تانيين مع الأخ عمر الحريري..هند رستم.مارلين مونرو . ليلى علوي و غيرهم و بدات أدور حواليا في
المحيط بتاعي على حد يتوصف بالكلمة دي..بصراحة مالقيتش



فين يا جماعة الأنوثة اللي بيقولوا عليها دي..مامتي طول النهار في المطبخ ..طنط سهير جارتنا طول النهار و الليل بتغسل و تنشر الغسيل و الغسيل ينقط ع البلكونة بتاعت طنط أمال..فطنط أمال بتتخانق مع طنط سهير عشان الغسيل اللي بينقط و بتتخانق مع ابنها عشان بيلعب في الشارع و سايب واجب الحساب



طب سيبكوا من الجيل ده ..خش ع اللي بعده منال بنت خالتي اللي أكبر مني بخمس أو ست سنين ربنا كرمها من 4سنين و دخلت دنيا ..طيب يا منال انتي طول عمرك حلوة كده و دلوعة ورينا الأنوثة بعد الجواز..بعد الجواز بكام شهر هوب دخلنا ع الحمل كعبرت و بقللت من كل اتجاه ..ما علينا بكره تولد و تفوق..و اذ بمنال اللي كنا بنضرب بيها المثل في الرقة و الروقان بقت شبه الستات اللي بيطلعوا في إعلانات السمنة و مساحيق الغسيل تصحى طول الليل عشان الواد بيعيط و طول النهار عشان أبو الواد عايز ياكل و يشرب و مرتبها اللي كان ضايع كله ع البارفانات و المكياج بقة بيروح في ثلاث إتجاهات..بامبرز ثم بامبرز ثم بامبرز..و طبعا نتيجة الصحيان لمدة 24 ساعة في اليوم واضحة جلية على ملامح وشها و راسها يادوب تلمس أي حيطة في أي مكان و نسمع شخيرها من الفضاء الخارجي


طب سيبنا من المفهوم ده ..خللينا في مفهوم تاني برضه غريب عن المرأة المصرية و
هو مفهوم الرقة



البنت الرقيقة اللي تكلمها تبص في الأرض و تحس ان الهوا ممكن يجرحها و اللي تبقى حاسس انها بسكوتة ممكن لومشت شوية على رجليها تتكسر نصين..يخطبها واحد من دول و يفضل كل اما يروح في حته يقول عليها شعر..نسمة..ريشة.صوتها زقزقة عصافير و كل اما تسمع غنوة حلوة تفكره بيها ..و يعملها رنة ع الموبايل

لما النسيم بيعدي بين شعرك حبيبتي باسمعه ..بيقول أهات
و عطورك الهادية اللي دايبه فيكي كل ماتلمسك بتقول أهات




يعزمها عالغدا ماتاكلش غير سلطة ..يجيبلها هدية غالية تزعل منه و تقوله انت ليه مكلف نفسك..و هكذا تستمر الحياة كحلم جميل يصحى منه إمتى؟

بعد الجواز ب 4 أسابيع أو اسبوع ..حسب حظه و نصيبه و تبدأ المطالب و يبدأ التغيير..و فجأه يلاقي الحالة اتقلبت 180 درجة




لأن واحدة بالمواصفات دي تبقى لازم كانت عايشة في فقاعة بعيد عن كل الناس.. عمرها ما ركبت مواصلات ..عمرها ما اتعاكست و اضطرت ترد على واحد قليل الأدب و توقفه عند حده..عمرها ماتعكاملت مع حد في شغلها ..عمرها ما اضطرت تاخد موقف و تتخانق علشان تاخد حقها أو توقف ظلم وقع عليها..عمرها مانزلت السوق تشترى الخضار و اكيد عمرها ماطبخته فأكيد بعد الجواز لو بدأت تعمل الحاجات دي كلها ..لا يمكن تفضل نفس البنت الرقيقة
البسكوتة اللي بتنجرح من الهوا..و الا مش هتقدر تعيش



طبعا الحالة بتزيد اكترو أكتر مع وجود الأولاد و اللي غالبا عبء تربيتهم بالكامل بيبقى على كتافها هي و بس ..فيا إما تبقى شخصية قوية و تخوف العيال وأبوهم ..يا إما العيال هتبوظ و تفسد و ساعتها كل الناس هيلوموها هي و بس



فيا عزيزي الزوج..ماتزعلش لو عروستك اتقلبت لشخص تاني بعد الجواز ..مافيش
قدامها غير كده..ما هو انت لو بذلت شوية مجهود و ساعدتها يبقى عندها شوية وقت
تفوق لنفسها



و يا عزيزي العريس دور ع التربية و الأخلاق و التدين أولا ماتركزش بس على الرقة
و الأنوثة ..لأن الأيام بتغير هذه الحالات الطارئة



و اللي محتاج أنوثة تدوم معه مدى الحياة...يسأل على إزازة كولونيا من بتوع عمر الحريري



..بس حتى دي ..مافتكرش لسه بينتجوها

95 comments:

Anonymous said...

شوفي يا برايد الكلام وقف في زوري من كتر اعجابي بيكي بس انتي كل كلامك انهاردة صح جدا جدا وربنا يهدي الشباب ويوسع رزقهم

Anonymous said...

على فكرة انا متجوزة من عشر سنين والحمد للة مابقتش زي بنت خالتك وعندي ثلاث اطفال وعندي كمان 32 سنة والكسوف والرقة اللي بتقولي عليهم ممكن يفضلو بعد الجواز بسنة بس بعد كدة بيطيرو مع العشرة ولازم يبقى في شوية بجاحة والا يضيع حقك وسط مطالب زوجك واولادك اللي مابتخلصش ........ مع تحياتي وحبي الشديد ليكي

Anonymous said...

في برفان تاني كان منتشر اوي ف الستينات والسبعينات اسمه سكاندل وديه كلمة معناها بالعربي فضيحة يعني اسم البرفان فضيحة عشان يعني رائحة بتظهر بسرعة وسط ناس كتيرة
متهاليهي البنت الرقيقة الجميلة لازم تكون زي البرفان ده لازم تبان من وسط الناس ومش ذنب الشباب انه بيدورا ع واحدة تكون جميلة وحلوة ورقيقة ومتقوليش لي يشوف التدين عشان الصدمة ف الحلاوة والرقة ممكن تتعوض لكن الصدمة ف التدين بتكون مصيبة وانا مثلا كانت خاطب واحدة المفروض انها متدينة ومش كده وبس وحافظة القران كمان ومش كده وبس وكمان بتحفظ للبنات وف الاخر نصبت عليا ف الشبكة و15000 ريال يبقي التدين نفعني ف ايه ؟
اهم حاجة التوافق والاخلاق بيني وبينها اما اللي بينها وبين ربنا محدش يعرفه ابدا وايام الرسول كان ف منافقين محدش يعرفهم
يبقي الحكم بالتدين يجي ازاي
عزيزي العريس فكر ف الحلاوة والرقة متعسمعيش كلام برايد عشان الحاجات التانية اللي بنقول عليها ف علم الحساب غير معدودة يعني لاتقيم بمقاييسنا الارضية

Esmeralda said...

زمان كان للظروف الماديه السهله كل واحده عندها شغاله بطبعا الى حد ما كانت الستات مهتمين بنفسهم و لا فيه شغل و لا بهدله و حتى لو الواحد تخنت شويه فده كان بيبسط الراجل بمعنى ان حاجه تملى العين و على اعتبار الرفيعه المسلوعه بنى ادمه معلوله يلزم لها علاج

بالاضافه لده ان مكانش فيه قنوات فضائيه لا فيه هيفا و لا ايليصا
دلوقت الرجاله ملووحين من اللى بيشوفوه و الستات مش ملاحقه شغل و لا بيت و لا عيال و لا راجل ولا متطلبات اجتماعيه امه و امى و هلما جره

و طبعا مفيش تقدير او مشاركه

ربنا يكفينا شر البلاوى

oceaneyes said...

عندك حق والله يا برايد ...

كل كلمة قلتيها النهاردة صح 100 100

بس الغلط هنا مش بيقع على البنت انها تتغير وتتحول لحاجة تانية خالص بعد الجواز ...

وعموما ربنا يهدى الحال ويارب ما نبقاش زى منال بنت خالتك ...

:D:D:D

hamsa said...

جميلة مدونتك يا برايد
أول مرة أزورها
بوست جميل
.....
بصي يا قمر النوثه ممكن برضه تعيش وتدوم والجمال ممكن يفضل في تألق طول ما فيه حب
حب البنت مننا لزوجها وحبيبها
بيخليها تفضل دايما توريله كل شئ يسره ويسعده
جمالها ورقتها وانوثتها
ومافيش تناقض بين الأخلاق والجمال
وبرضه مافيش توافق بين القبح والأخلاق الحميده
ومافيش سبب يخلى اى أنثي تتخلي عن أهم حاجه فى كيانها (أنوثتها ) حتى لو كانوا ولادها وبيتها
الأنثي هي الأنثي
تحياتي لأجمل برايد

الدرويش المرووش said...

يا برايد هانم
حضرتك يتتكلمى فى الجون
أحب بس أقول إنه مش قاعده
فيه ستات أواريب و بيعرفوا يظبطوا المسائل

كمان الرجاله لازم تقدر الوقت و المجهود اللى كل زوجه بتقدمه من ننى عينها و حر أعصابها و حشاشى قلبها
أكيد بعد كل ده مش هاتبقى نانسى عكرت
لكن بتفضل ليها جمالها برضه

الخاجه الأهم
إن أنوثة و قسمة و باقى السلسله بتاعة الشبراويشى
ذهبت مع الريح

Eric Matt said...


ايوة كده يا جميل اصحا و بان عليك الأمان

صحيح "فاظفر بذات الدين تربت يداك" كلام زي الفل

وكمان العروسة تدور على صاحب الدين

تحياتي لك من ماناساس البلد وربنا يرزقك من وسع وفي القريب العاجل يا رب

:))

Noony said...

أيوة كدة قوليلهم

هوة دة الكلام
أكتر الأزواج بيعانوا من تغيير الزوجة بعد الزواج وخلاص من غير ما يراعوا أو حتى يكتشفوا سر التغيير دة

تسلم ايديك يا سكرة

نوني

Dibo said...

باسم الله ماشاء الله
نطقت فأحسنت
كل كلامك صحيح
بس أنا كنت عاوز أضيف نقطقة صغيرة
الرقة والأنوثة الحفاظ عليهم محتاج شوية روقان ووقت
يعنى ماتكونش مشغولة فى شغلها ثم بيتها ثم عيالها و.......... و ......... و
وهو كمان مايكونش بيطلع من شغله علشان يريح ساعة و ينزل شغلانة تانية
الروقان ييجى لما ضغوط الحياة تقل (زى حالنا فى مصر الضغوط علينا بتقل يوم عن يوم كده)ء
و الوقت يمكن يتوفر لو فيه روقان

Anonymous said...

ينصر دينك يا عروسة أنت جبتي التايهة و كما قال سيدنا محمد علية الصلاة و السلام فاظفر بذات الدين تربت يداك .
معلهش يا عريس مش قصدي أقلدك بس أنا شفت تعليقك بعد ماحطيت تعليقي.

Anonymous said...

جامد جدا البوست ده يا برايد

فعلا اهم حاجة الدين والتربية والاخلاق

موضوع الانوثة والرقة والنسمة والبسكوتة والبنت اللى تكلمها تحط وشها فى الارض ولو لمست ايدها تلاقيها اتكهربت ووشها يحمر اوى اوى وبتمنع الابتسامة عن نفسها بصعوبة كدة.....النوع ده موجود بالفعل....بس فى بنات 1 و 2 ثانوى اللى لسة ما صاحبوش.....اما بعد كدة....صعب تلاقيه....ولو لقيته .....مش هينفع للجواز


طيب لو انا عايز اتجوز واحدة تكون رقيقة جدا وأنثى وكدة وفى نفس الوقت تتحمل مسئوليات
اعمل اية؟

تعرفى يا برايد؟


انا عارف الطريق

حد تانى هنا يعرف؟

Anonymous said...

انوثة انا قربت انسى الكلام دى يعنى ايه من كتر الشغل والنزول كل يوم بحافظ على اى شوية علشان لما اتجوز بس بتلاقى نفسك غصب عنك مضطرة تتنزلى عنها فى ظل الحاجات الفظيعة اللى الواحد بيشوفها كل يوم
الحمد لله

Shower-Mirror said...

كلامك تمام فعلا ...

بس دى مشكله ...مش حاجه سهله لأن هو ده اول اسباب فتور العلاقه الزوجيه ...او الخيانه او تعدد الزوجات فى بعض المجتمعات ..

و لكن هى مش قاعده عامه ... فى ستات فاهمه الموضوع ده كويس و بتعرف ازاى تفضل فى عين جوزها انثى زى ما هى .


المشكله بقى فى النوعيه اللى غالبه من الستات و بالذات اللى بتشتغل ... اللى بتكون فى البيت مثال للبهدله و الدهوله و الصوت العالى و ..و حاجه تسد النفس

لكن تشوفيها الصبح و هى رايحه الشغل ..اخر دلع و شياكه و ماكياج ايه و بارفان ايه و محزق و ملزق ... ده غير الرقه و الصوت الحنين اللى بيظهروا فجأه ...

دول بصراحه انا مش عارف اقول عليهم ايه ...لأن اللفظ اللى يمشى معاهم ماينفعش اقوله هنا ...

و للأسف النوع ده كتير قوى ... قوى


تحياتى ...

و بعدين ايه حكاية البوستات الهادفه معاكى

هههههههه

انا ابتديت اقلق ... :)

صاحب البوابــة said...

احببت فقط ان اسلم عندما مررت على مدونتك الجميلة

تحياتي لكِ اختاة

emos said...

بصى يا برايد الكلام اللى انتى بتقولى عليه دة مش صحيح 100% هو موجود بس مش بالاسلوب ده

انا بشتغل مدرسة
و بشوف جميع انواع الامهات اللى فى الدنيا

عندنا واحده ولية امر

عندها اتنين توأم و بعدها ب سنة خلفت واحد كمان
و الثلاثة مجانيييييييييين مفيش شقاوة اكتر من كدة

انا قلت بقى تلافى الست دى هيبقى شعرها منكوش و لو جت لابسه هدوم اصلا يبقى كتر الف خيرها

لقيت واحدة ست فى منتهى الرقة اللى فى الدنيا

و لابسة شيك موووووووووت
و كل مرة تيجى تاخدهم تيجى بطقم شكل

و امورة و بسكوتة و كل حاجة

و فى من النوعية دى كتيير اوى

يا رب اطلع من النوعية دى يا رب
طب اتجوز الاول و بعديين نشوف هطلع من اى نوعية

عقبال لمل نشوفك عروسة يا برايد يختى

Just a Reader said...

عندك حق طبعا دلوقتي مفيش رقه زي زمان علشان متغيرات المجتمع اللي احنا عايشيين فيه خلتنا نعتمد على نفسنا في حاجات كتير ونتعامل مع كل نوعيات البشر سواء جوه الشغل أو براه وده فرض علينا نوع من تحمل المسئوليه بس لن يصل أبدا إلى حد نسيان الرقه وإن كان ده الظاهر لإن دي فطرة الله التي خلقنا عليها. وأحب أضيف بس إن الدين أصلا بيدعونا للحفاظ على ا لرقه( طبعا جوه البيت فقط لإن الرقه مع غير المحارم متنفعش) ..الدين هو اللي علمنا قواعد التعامل مع الأزواج اللي المفروض إنها تكون كلها رقه وأدب وأخلاق.
بجد لو طبقنا الدين صح جوه وبره البيت هتبقى حياتنا هايله.
ربنا يرزق الجميع بالأزواج الصالحين إن شاء الله.

سكينة said...

منال بعد شوية هتفوق متقليقيش عليها تحمل المسئولية عايز وقت
الأنوثة جزء أساسي
ممكن يختفي شوية لكن مصيره يقب على الوش ثاني

Unknown said...

الرقة والانوثة مكن ترجع بس لما الولاد تكبر في السن والست اصلا ربة منزل، او لما المراة العاملةاللي ترجع بيتها الساعة ستة ولا سبعة تلاقي خادمة مقيمة قامت بكل الواجبات المنزلية ساعتها بس تفضى الام بعدها لمذاكرة الاولاد والعناية بنفسها بعد كدة واعرف صديقة موظفة تعطي المفتاح لمامتها عشان تيجي مع خادمة الام الكبيرة لتنظيف البيت وطبخ الطعام لعدة ايام لابنتها وزوجها وابنهم! يعني الرقة ممكن بس لازم في تضحيات من احد الاطراف واذا اردت ان تطاع فأمر بالمستطاع!

الملاح التائه said...

هاي برايد
ازيك يا جميل؟
الأنوثه
غصن الزيتون
سعاد حسني
آه هي دي التجسيد الحقيقي للأنوثه سعاد حسني يا سيدي إذا ذكرت الأنوثه ذكرت سعاد حسني
غصن الزيتون كانت من أجمل الروايات اللى قريتها بس مع الأسف نهايتها كانت كئيبه وماتت عطيات
ذات الأنوثه
ياترى الأنوثه دي نعمه ولا نقمة وعلى مين الراجل ولا الست؟
الله جعل المرأة جميله
والشيطان جعلها مثيرة
وجعلنا مغفليييييين
تحياتشي

Anonymous said...

بصى يا برايد
الرقة والانوثة لحد نا البنت تتجوز وخلاص
ما هى لازم برضه تفضل محافظة ولو على جزء من رقيتها وانوثتها قبل الزواج
الا حيتفاجئ انه بدل ما يكون اتجوز البنى ادمة اللى راضع رقاق بالانسة حنفى ووقتها حيكون الطلاق الحل السلمى
اللهم احفظنا

أبو أمك said...

مالاقيش عندكوا إزازة أنوثة دايت ؟

Van Gogh said...

اخو واحد صاحبى اتجوز انجليزية...بعد اول اسبوع من الجواز..كان كل البيت اتغير..الدخل هوه هوه..نفس العفش اللى كان عايش بيه العريس واخوه..بس سبحان الله..فى اسبوع واحد..تخشى الشقة متعرفيهاش
بتشتغل برده...ودلوقتى عندها طفلين...ومهتمة بجوزها فوق ما تتخيلى
كانت زى القمر...ولسه زى القمر
المشكلة عندنا احنا...الدين صفة اساسية محدش يختلف عليها وتيجى نمرة واحد فى مواصفات شريكة العمر
بس الباقى مهم..واهم مما تتخيلى
لكن فن الحياة الزوجية..اللى موجود بره..لازم نبتيدى نتعلمه
نتعلم منهم فن الحياة..اللى هما نمرة واحد فيه..جنب ديننا وإلتزامنا
اكيد هنكون احسن

Anonymous said...

انا اسف انى اختلف معاكى يا برايد.... انا متجوز واحدة ماشاء الله عليها. راجل فى شغلها و مبيهمهاش حد و تقول للغوله عنيكى حمرا.. و انثىىىىىىىىى من هنا لبكرة الصبح.. لما بتتعامل معايا.. وخلفت ابن جميل و لسه ما شاء الله عليها.
ملحوظة: انا مش بطل من ابطال روايات نبيل فاروق.

Anonymous said...

مشكله اختفاء الانوثه
هيا عمل المرأه
الست اللي بتزل الشارع وتتعامل مع سواقين المكيروباصات والموظفين والمواطنين
وبتتعامل مع المدير اللي بيزعقلها
وزمايلها اللي بيضربوا فيها زنب
لازم طبعا تفقد انوثتها وتتحول الى وحش كاسر علشان تقدر تعيش في هذا الجو
............
الحل طبعا في طاعه الله سبحانه وتعالى
وقرار المرأه في بيتها
معززه مكرمه
تتفرغ نهارا لاعمال منزلها
وليلا لانوثتها

Anonymous said...

الحقيقة مش عارف .. لما انتم شايفين ان الرجالة هم اس البلاوى فى الدنيا كلها .. بتتجوزوهم ليه ؟؟ حقيقى مسكين قوى الراجل اللى يقع فى واحدة ممن تعودن على اعتبار الرجل هو المسئول ضمنيا و مسبقا و افتراضيا و بدون دليل على كل شيئ سيئ فى الكون

و اذا كان الرجل هو المسئول عن اختفاء الإنوثة و الرقة .. فأين دور النساء هنا ؟ أم تراهم كائنات بلا عقل أو ارادة ؟

عجبى

freeSoul said...

ياعنى مفيش أمل !!! ؟؟؟

هتجوز واحد صاحبى فى الاّخر؟؟

أصل البنت من غير اللى انت بتقولى عليه تبقى واحد صاحبى بس أمور شويه!!!!

Unknown said...

يامصيبتىىىىىىى

ايييه اللى بتقولييييه ده؟؟؟؟؟؟؟؟؟

قال انوثة قال

عيب يابنتى إحنا صعايدة

ههههههههههههههههههههه

t3ban said...

خدها زي أمك و اختك ان زادلك شيء من بختك
!!!!بس الكارثة لو قل

Anonymous said...

hi bride
ur blog is hylarious
n for ur information
this cologne {aonosa } still exist
i ve a lot in my pharmacy
i hope u ve a groom soon

Anonymous said...

?الإسلام هو الحل مش كده

طب يعني الإسلام هايحل ليكي يابرايد, ويا قرّاءبرايد, كل مشاكلكم

: المشاكل التالية

توفير زوجة/زوج محب وخلوق

الإحتفاظ بالرّقة والأنوثة

إيجاد سكن كبير ومريح ووظيفة كويسه

الإحتفاظ بالوزن وعدم السمنه

توفير مربية لتساعد الزوجة

توفير طبّاخه وغسّالة

توفير مصاريف الأطفال إلى أن يتخرجوا

توفير تأمين صحي للعيله كلها

توفير مصاريف السفر والترفيه

توفير عربية لكل من الزوج والزوجة


لذلك,وكما نصحتنا العزيزة برايد,
لا سبيل سوى دولة الخلافة الإسلامية اللي هاتوفر لنا كل ماجاء أعلاه

بالروح بالدم( مهم قوي الدم ) نفديك يا إسلام

صوت فيروز said...

سبحان الله
للاخ و لا الاخت adamneve
احب اقولك ان لا برايد و لا حد قال اننا نرجع للخلافه الاسلاميه
و ده تحميل الكلام فوق معناه

اما للاسئله دي ففي الاسلام الجواب و الحل فعلا
توفير زوجة/زوج محب وخلوق؟
فظفر بذات الدين تربت يداك
و من ترضون دينه و خلقه فزوجوه

لإحتفاظ بالرّقة والأنوثة؟
واقصد في مشيك و اغضض من صوتك ان انكر الاصوات لصوت الحمير
و اكيد ده للراجل و الست و اللي عايز يبقي محترم
اهيه اول اصول البروتكولموجوده في الاسلام و عندك سورة لقمان كامله فيها كل الاداب العامه

نكمل
إيجاد سكن كبير ومريح ووظيفة كويسه؟
لو مشينا علي الاسلام و ما فيش محسوبيات و لا سرقه هتلاقي البيت الكبير و الوظيفه الكويسه

لإحتفاظ بالوزن وعدم السمنه؟
علي ما اعتقد ان في الاسلام ركن مهم جدا اسمه الصيام بس الصيام مش بتاع اليومين دول
الصيام اللي علي حق
شهر كامل تريح فيه معدتك و تخس زي ما انت عايز
ربنا اداك شهر كامل في حياتك تعدل فيها نفسك و لو مش عايز تبقي انت طفس و عينك فارغه

توفير طبّاخه وغسّالة؟
من مميزات الاسلام و تعاونوا علي البر و التقوي
و لو كانت كل و احده تقدر تبر اختها حتي مش حد غريب في انها تساعده في البيت فايه المانع
لو الاسرة كلها بتتعاون هيشيل كتير عن الست , لو الراجل بيعاون الست ده كله هيسهل كتير
يعني كله تحت عنوان كبير اسمه التعاون

توفير مصاريف الأطفال إلى أن يتخرجوا؟
و من كان رزقه علي الله فلا يحزن
علي ما اظن انت نفسك مش عارف هتعيش بكره و لا لأ و ده اسمه قلت ايمان
لو كنت بتحسب للولاد لبعد التخرج
و لو انت مسرف و الاسلام نهانا عن الاسراف تبقي دي مشكلتك


توفير تأمين صحي للعيله كلها؟
برده ركن كبييييييير عندنا اسمه الزكاة و التكافل الاجتماعي اللي تقريبا نسناه

في ايه و احده لو دورت علي تفسرها هتلاقي كل الاجوبه بتاعتك
في سورة الاحزاب
قال الله تعالي
ان المسلمين و المسلمات و المؤمنين و المؤمنات و القانتين و القانتات و الصادقين و الصادقات و الصابرين و الصابرات و الخاشعين و الخاشعات و المتصدقين و المتصدقات و الصائمين و الصائمات و الحافظين فروجهم و الحافظات و الذاكرين الله كتيرا و الذاكرات اعد الله لهم مغفرة و اجرا عظيما
صدق الله العظيم

علي ما اعتقد انه تلخيص كافي للاخلاق كلها و اكيد كل خصله من دول لها اثر جيد في حيتنا

اما عن البنات اللي مش لاقيين حل في انهم يطلعوا بره البيت و يحافظوا علي نفسهم
(فلا تخضعن بالقول فيطمع الذي في قلبه مرض و قلن قولا معروفا)
يعني ما منعناش من القول
جعل القول مشروط بس
يعني سمح للستات انها تكلم الرجالة
بقول معروف يعني مش منكر

و اللي عنده حاجه يرد عليا
اللهم صلي علي محمد

حصان بري said...

علشان تعذرونا بس لما نقول البلد ماعادش فيها بنات

كلامك صح جدا يا برايد
وينطبق علينا احنا كمان
يعني بعد الجواز احنا نفسنا مابنهتمش باللي اتجوزناها
وبتنتهي الهدايا والعزومات اللي بتقولي عليها
ممكن تقولي دوامه الحياه
ممكن الملل بيغزو الحب
ممكن الاطفال بيشغلونا
بس الاكيد ان فيه ناس اعرفهم متجوزين من 20 سنه ولسه زي مايكونوا مخطوبين
هي شخصيات عموما
مدونه لذيذه يا برايد

خيرالدين said...

التغيير بيجى من الزوج والزوجه يعنى مسئوليه مشتركه هى بتنسى البرفانات والمكياج وهو بيتحول لكائن موظف بكرش وبينسوا المظاهر والجواهر كمان والله...مش جواهر اللى بتغنى

3ashe2elro7 said...

اغرب حاجه انى كنت بسمع لما النسيم فعلا و انا بقرأ البوست ده .. غريبه
اولا :تنكح المرأه لاربع :
حسبها ونسبها وجمالها و مالها
فاظفر بذات الدين تربت يداك
اللى موجود دلوقتى أنوثه مصطنعه ورقه مزيفه
اللى عايز يتجوز علشان يعمل اسره اكيد مش هيخلى الحاجات دى اول حاجه بيدور عليها والا ناوى يغير من بعد اول سنه قبل ما الضمان ينتهى

meroooo said...

برايد الحكايه مش فينا احنا
بس في الراجله هما عاوزينا ديما زي ماشوفنا اول مره بس انا عن نفسي في ارتباطي كنت ديما علي حقيقتي لما يتطلب الموضوع مني الزعيف قدامه كنت بزعق لما كنت بضايق واشخط وانتر كنت بعمله لماتطلع عصبتي اللي هيا طبع فيا كانت بتطلع كده هومش هيتصدم فيا ولا انا هتصدم في انسان سطحي بيبص لمظهر مش اكتر
هتعقدي علي الموضوع ده قد ايه كده علشان الواحد يدخل علي الجديد بتوحشينا

Anonymous said...

بعد الإذن من برايد

صوت فيروز

مرة تقولي " محدش قال نرجع للخلافة"

بعدها بشوية " فعلا الإسلام هو الحل"

الكلام لغاية هنا متناقض حضرتك

وبعدين " لو مشينا عالإسلام الصحيح.."

يعني إحنا مسلمين ولا لأ

وبما إن كل الأجوبة في القرآن

حالنا بالويل كده ليه

ROMANTIC ROSE said...

يا بنتي انا رأيي فيكي و الله من زمان انك بنت من الاخر و بتفهمي جدا .. اصبتي كبد الحقيقة بكل دقة .. بس فيه نص تاني للحقيقه دي .. ان الراجل يا حلاوته يا جماله قبل الجواز بيجيب ورد و هدايا و يركب حبيبته "خطيبته" تاكسيات ف مشاويرهم و هاين عليه لو بكت يبوس رجليها و ما يشوفش دموعها الؤلؤية الجميله بتجري علي خدودها الحرير و لو جرحت صباعها و هي بتعمل السلطه يدعي علي السلطه و الخضار و الارض الزراعية كمان .. تعالي بقي لبعد الجواز .. هي بتتغير و هو بيتحول .. الورد يجيب بيه كباب يمري عليه و علي العيال افيد "علي غرار فيلم أحلي الأوقات" .. و شعره اللي كان مسبسب و يجنن بيتنحل يا ضنايا و يصلع و جسمه الرياضي بيتكور و يتكعبل بقدرة قادر و يربي كرش "العز" التريد مارك بتاع المتجوزين .. و يا عيني علي الغلبانه لو نطقت بس و قالت الله يرحم .. يا داهية دقي .. هيطلع فيها القطط الفطسة و يعايرها باللي ربنا "يهديهم" نانسي و هيفا و اليسا و اخواتهن .. و لو اندبحت حتي و هي بتطبخله المشمر و المحمر .. ولا يهتز و لسان حاله يقول "هنضحي بيكي بس كرشي يعيش" .. و لو البيبي عيط بليل .. يصحي يجعر .. و انا راجل شقيان و حرام عليكي و الست الغلبانه يكون مصيرها هي و ابنها بره اوضة النوم علشان الغضنفر ينام .. و هكذا ..

خلاصة الكلام .. مش الانوثة بس اللي بتتبخر .. الجنتله و الاحتواء الرجولي كمان بيذهب ادراج الرياح .. و كل شئ راح و انقضي ..

بس عاوزه اقولك حاجه .. اينعم انا لسه مجربتش قوي .. بس متأكدة من حاجة .. الرقة و لو أطلال منها بتظهر ف اوقات معينه و حنية الراجل و رقته و احتوائة برضة بيطلعوا ف اوقات معينه .. و شطارتهم بقي بتتجلي ف انتزاع الاوقات دي من براثن روتينية الحياة ..

و بعدين يا بنتي علي رأي الحكمة اللي انا دايما بقولها .. اهو كاس و داير .. حلو شربناه .. مر شربناه .. و عجبي ..

:)

بعيدا said...

Keda ya bride you tricked me, ana ba7sebek hatetkalemi 3ala 7aga tania khales fel felm w howa el taree2a elli a7mad mazhar 3amel beeha merato ba3d el gawaz welli kan beygebli el na2ta ma3 eni ba7eb el felm. El mohem ya setty...I think en banat keteera fi masr faqadet onosetha men abl el gawaz 7ata... besabab taqleedhom el a3ma lel gharb....lama banzel masr batkhad besara7a men el taree2a elli betetkalem beeha el banat....taree2a keda mestargela w ghaleeza....mesh 3arfa leh ba2o keda....w ya khabar...kolo kom w lama yeego yefaslo fel se3r...taree2a khaleya men el 7aya2 besara7a w mokhalfa le tabee3et el bent enaha tetsaraf w tetkalem bel shakl dah.....rabena yehdeena gamee3an...

Anonymous said...

بعد اذنك يا برايد
الله عليكي ياromantic roseبتتكلمي صح
اية دة يابنتي انتي عايشه معانا والا ايه؟

Anonymous said...

msh 3rfa lih bd2t a7s enk 7d bi3ml b7s wbt3mli 3lina b7s midani wkda hahaha:) ana msh 3rfa ya gma3a lih el donia soda kda f3niko y3ni el r2a di mtloba wminf3sh el ast3'na2 3nha mhma kant 2sot el zrof wkol dh l2n di ftra asln rbna 5l2na 3liha a7na el bnat 7wa et5l2t mn dl3 adam wsmha 7wa y3ni a7twa2 wasl el gwaz el skina wel moda wel r7ma bs el rgl howa eli bi2dr izhr 2nost el st bklma r2i2a i2olha wi2dr brdo i2lbha el shoish 3tiaaa

wanna b a bride said...

shahy

شكرا ليكي و ربنا يهدي الجميع

اتفضلي بأه كباية ماية عقبال مانشرب شرباتي

ربنا يخليلك الأولاد ..و ابوهم
-------------------
ساعد نسرين الأيمن


ألف حمدالله ع السلامه انت كنت مسافر و الا نسرين لسه شاغلاك

ماشي ماشي بتحرض الناس مايسمعوش كلامي

بس برضه كله في الآخر نصيب..و ذات الدين هي اللي وصانا بيها الرسول..و الرك ع العريس هو اللي يقدر يفهم أخلاق العروسة و يشوفها من المنافقين والا لأ
-------------------------

esmeralda

اكتر حاجة فقعاني موضوع كل بيت فيه شغالة بتاع زمان ده

كانت أي واحدة تنزل البلد و تجيبلها بنت حلوة كده بتاع 7-8 سنين تشيلها البيت و اللي فيه
-----------------------

oceaneyes

ربنا مايوعد حد بشكل منال أبدا

ربنا يسترها معانا جميعا
------------------------
hamsa

اهلا بيكي

بس مش بمزاج البنت غالبا انها تتخلى عن انوثتها..حد يلاقي دلع و روقان و مايتدلعش
------------------------
الدرويش المرووش

و جون وجون وجون

هو صحيح الدكتور الشبراويشي ده راح فين؟
------------------------
the groom

من بقك لباب السما

أيوة كده دعواتك من ماناساس دي حاسة كده انها هتجيب نتيجة
-------------------------
noony

أيوة هاقوللهم اما

هو انا بخاف
------------------------
dibo

الله يخليك يا فندم
ده بس من ذوقك

أين هو الروقان
دلوني عليه
----------------------
iron cobra

ينصر دينك يا أستاذ
خليييييييييييييييفه

wanna b a bride said...

islamist bloke

فين الطريق

فيييين؟

الخريطة لو سمحت
-------------------
نونا

ما هو انا قصدي أفكر الناس بالموضوع ده

قبل ماينقرض
-----------------
shower mirror

لا و فيه سبب تاني

الست اللي أصلا مش طايقة جوزها و مش محترماه و كل اللي بينها و بينه

شركة تجمع مرتبين يربوا بيهم عيال صغيرين

و الستات اللي متجوزين رجالة منفضينلهم هم و العيال فالست تبقى مضطرة تبقى هي الراجل و الست في نفس الوقت

ما تقلقش عليا

هو انا يعني مانفعش في الجد؟
-------------------
صاحب البوابة

تحياتي لك يا اخي

----------------
emos

انتي بتشتغلي في مدرسة ايه بالظبط؟

اكتبي العنوان عشان الناس اللي بتدور ع الرقة و الأنوثة يجوا المنطقة عندكوا

عندنا الصراحة

مافيش
----------------------
just reader

رنبا يرزق الجميع بالأزواج الصالحين

الرقة و الإحترام المتبادل هو الأساس في أي علاقة

لكن مين يقدر يصمد في وجه الضغوط اليومية

هي دي المشكلة
---------------------
سكينة

ادعي لمنال

لحسن سدت نفسي من ناحية الجواز

باهزر باهزر
----------------
rania

حلو مشروع الأم و خادمتها ده

أهو كده ممكن
-----------------
الملاح التائه

أهي نهاية عطيات في غصن الزيتون وشك زوجها فيها في كل لحظة بسبب انوثتها الطاغية زي مابيقولوا

يبينلك ان مافيش حد مرتاح

لا انوثة مريحه الناس ولا انوثة فري
------------------
nana0

لازم تحاول تحافظ عليهم

و انا اعرف ناس كتير بتحاول

بس للأسف مابتنجحش

لن الظروف أقوى منهم

Islamist Bloke said...

الى صوت فيروز

ربنا يحميكي ويحرسك يا بنتي....مفيش كلام ابلغ من كدة

وربنا يهدينا اجمعين

اللهم امين

wanna b a bride said...

أبو امك

أدورلك
----------------
van gogh

طب ممكن تشوفلنا بعثة نتعلم الحاجات دي لو سمحت؟
----------------
مجهول

ربنا يخليهالك

بس ماتبقاش تقول كده قدام حد لحسن تتحسد

-------------
ونا-بي-أ-جروووووووم

برضه فيه ستات كتير نفسها ماتشتغلش

لكن ظروف المجتمع مش سامحالهم

زي ما قلت قبلكده

ساعات مرتبها بيكون النواية اللي تسند الزير
---------------
مجهول

مش عارفة و الله انت فهمت اللي انت بتقوله ده من كلامي ازاي

الأول اقرا بتمعن

و بعدين علق
-------------
freesoul

هي دي الحقيقة المرة

بي اطمن الإعتراف بالمشكلة

هو أول خطوات العلاج
--------------
إنسانة

قوليلهم و النبي

العيال خلاص عينيهم فتحت
-------------
t3ban

مش هيقل ان شاء الله

أهم حاجة انك تبقى قنوع كده

و ربنا هيكرمك ان شاء الله
-------------
مجهول

يا للهول

أنوثة لسه موجودة

يبقى لسه فيه أمل
--------------
admneve

عروستي

التعليق ده ع البوست بتاعي انا؟

hoda omran said...

ايه الدم السكر ده
دمك سكر عثل خفيف خفيف اوى
......................
عندك حق احنا كمجتمع مظاهر وبس
بنبص على المظاهر اللى عارفين كويس انها مش بتدوم وبننسى الحاجات اللى المفروض ندور عليها وفى الاخر بيبصوا برة
لو واحدة اتعاملت على طبيعتها تبقة مسترجلة ورخمة وتنحة
يييييييي
هتكلم من هنا لبكرة
تحياتى

BaTresYa said...

كنت قريت قبل كده موضوع عنوانه " كن رجلاً لأصبح أنثى " ناو الواحدة علشان تاخد حقها لازم تبقى راجل ولازم تطلع الراجل جواها في الوقت الصح والانثى اللي جواها في الوقت الصح يعني بدل ما تبقى بوشين مع اصحابها ...تبقى بوشين مع مجتمعها افيد لها ودمتم

Anonymous said...

استعنا على الشقاء بالله

صوت فيروز:
الميل للتبسيط المخل من أسوأ ما يمكن أن يحدث لمجتمع ما وهو للأسف الحدث الأهم في أنظمتنا الفكرية حاليا على ما يبدو

أمر بهذه المدونة خفيفة الدم لأضحك وأفرج عن نفسي بخفة دم صاحبتها، وأسوأ ما يمكن أن يعكر ذلك هو مرور أحدهم ليحاول أن يمنطق أمرا بإلباس الأمور قسرا ما لا يلائمها قياسا بينما القعدة قعدة حظ ما تتعوضش

مرورا بسيطا على منطقك:
1-الإحتفاظ بالرّقة والأنوثة؟
واقصد في مشيك و اغضض من صوتك ... إلى آخر الجملة"

لا أظن عزيزي أو عزيزتي إن الحديث - الذي لا أعرف مدى حجيته - قُصِدَت به النساء وحدهن وعلى نفس النسق سورة لقمان، وبالتالي ففرضيتك تفترض احتفاظ الرجال أيضا بالرقة والأنوثة وهو ما لا مانع لدي منه لإنه لا يوجد شيء محدد اسمه الأنوثة، كلها صفات اجتماعية تتغير حسب مزاج المجتمع. إنما لا أظن الرقة والأنوثة التي تقصدها كاتبة التدوينة أو المعلقين هي المشي الهويني والكلام بصوت واطي ... إلباس الأمور ثوب لا يلائمها قياسا

2- "لإحتفاظ بالوزن وعدم السمنه؟
علي ما اعتقد ان في الاسلام ركن مهم جدا ... إلى آخر الجملة"

من الوجهة الدينية اعتبار الصيام "دايت" هو أمر مخزي
أما من الوجهة العلمية فالحفاظ على الوزن لا يتم أبدا بصيام شهر، على العكس: التجويع من أسباب السمنة، والناس عادة تخرج من رمضان زائدة الوزن ليس فقط بسبب السكريات وتنوع الطعام، إنما بسبب النهم الطبيعي الذي يحدث بعد الصيام - والذي يدخل الجسم فيما يسمي "نظام المجاعة" مشجعا الجسم على تخزين أكثر وحرق أقل للدهون، واحساس أشد بالجوع - كلام معروف، ليس فيه من جديد

3- "توفير تأمين صحي للعيله كلها؟
برده ركن كبييييييير عندنا اسمه الزكاة و التكافل الاجتماعي اللي تقريبا نسناه"
من أكثر النقاط التي أدهشتني أن تسوقيها بهذه البساطة. فبحسبة بسيطة:
يقع نصف الشعب المصري تحت خط الفقر، أي: لايمكن بأي حال أن يدور الحول على ما قيمته 5 جرام من الذهب في البيت ناهيك عن مروره على 85 جرام. استقطع أيضا الأسرة المتوسطة التي لا تملك من حطام الدنيا إلا شقتها وسيارتها ولا زكاة عليهما وطبعا لن يدور حولها - عامها يعني - على 85 جرام من الذهب

فطبقا لفرضيتك: يمكن لأقل من 30% من الشعب أن يوفر العلاج لأكثر من 70% من الشعب بإخراج نصف في المائة من ما يدور الحول عليه من ادخار، مع الأخذ في الاعتبار إن الزكاة ستجب على ما يبقى لدى العائلة بينما سيحتاج للعلاج الأفراد كلهم.

احسبها اقتصاديا مع نفسك في البيت تطلع كام
دي باينة إنها واسعة قوي ومش محتاجة توضيح؟ مش كدة؟

4- "إيجاد سكن كبير ومريح ووظيفة كويسه... إلى آخر الجملة"

لماذا لا تقدم مثلا لمجتمع ماشي على الإسلام وصل لهذه النتيجة؟ السعودية؟ أفغانستان أيام الطالبان؟ باكستان؟ الدولة الإسلامية في أي عصر من عصورها؟ الرسول مثلا كان عايش في بيت ضيق ومتعب. على ابن أبي طالب كان ينام على فراش من الجريد. الدولة الإسلامية في عهد عمر؟ علي؟ عثمان؟ الأمين؟ المأمون؟ الوليد؟ الرشيد؟ صلاح الدين الأيوبي؟ شجرة الدر؟ الملك فاروق؟ عايزة مثل واحد لمجتمع وصل لهذا الرفاه الاقتصادي إسلامي كان أو غيره

5-"توفير مصاريف الأطفال إلى أن يتخرجوا؟
و من كان رزقه علي... إلى آخر الجملة.

ويا ترى الأولاد المرميين في الشارع بلا عمل ولا تعليم، وأولئك المرميين في المستشفيات بلا علاج... رزقهم على مين؟ مين قال إن المسلم مش بيعاني الفقر؟
محدش بيموت من الجوع؟ بغض النظر عن خطأ المثل ده، فإل بنتكلم عنه مش الجوع: إنما التعليم، العلاج، المسكن الجيد والملبس الجيد

6- "توفير الزوج أو الزوجة الصالحة ... إلى آخر الجملة"

السؤال مش "مين الزوجة الصالحة"، السؤال "أجيبها منين؟". يعني مثلا برايد على ما يبدو من ذوات الدين، يا ترى مش لاقية عريس ليه؟ اشرحي لنا: كيف يمكن للإسلام بشكل عملي أن يوفر لبرايد عريسا محبا وخلوقا؟ أقول بشكل عملي وليس بشعارات، وعليه تنحل مشكلة هذه المدونة كلها

ساعة الحظ ما تتعوضش، لا تفسدوها بمحاولة تحليل الأمور بما لا تقدرون عليه من الأدوات

تاء

rona said...

كلامك صح بس لو الوحده بتحب زوجها جدا اكيد تتمنى انها تفضل احلى ست فى نظره

koko said...

صدقينى فيه ناس عملت كدة
لكن للاسف النتيجة بتكون نفسها
مش كل البنات بتكون فعلا انسانة رقيقة احيانا بتكون تمثيلية مكررة وفى الاخر مطب جامد يكسر الاكسات والمقصات وكل حاجة وكمان الرجالة مش كلهم بيبقوا مخلصين وكويسين وبيحبوا زوجاتهم

لكن فيه فعلا رجالة بتساعد وستات عمرها ما تشبع
وفيه ستات لو قادوا صوبعهم شمع الرجالة بيكونوا اسخم من سى السيد

لكن ممكن جدا كل الستات والبنات تبقى فى منتهى الرقة والجمال وكل حاجة حلوة ....لو هن عايزين وكمان تعيش العريس فى سعادة ما حلمش بيها ويبقى هو فى الحالة دى عمرة ما هيبص برة ولا هيبقى غير مبالى او مهتم وعمرة ما يسبها تعمل كل حاجة لوحدها لانها ببساطة ربطاه جنبها فى البيت بانوثتها ورقتها وجمالها حتى لو مخلفة دستة عيال

الست لو عايزة تسعد نفسها ممكن ولو عايزة تنكد على المنطقة كلها مش العمارة او الشارع برضة ممكن

المفتاح معاكن انتن يا برايد

الربان said...

تحياتي

في رأيي ان التفاهم بين الزوجين يحل مشاكل كثيرة... يعني العناية المشتركة للاب و الام لاولادهم ممكن يعطي الام فرصة انها تستريح و تاخذ بالها علي نفسها.

أيضا عايز اقول ان تنظيم وقت الزوجه مهم جدا...و لازم يكون لها وقت مخصص لها هي.

و أضيف ان الاصل ان يكون الرجل او تكون المرأة مهتمه بنفسها لنفسها يعني حتي تكون هي راضية عن نفسها و تزداد ثقتها في نفسها.... و ليس انها تتجمل لتتزوج... او هو يتجمل و يتعطر ليتزوج و بعد الزواج أنسي يا عمر...

تحياتي

Anonymous said...

كلامك بصراحه واقع عيشينوا وبس في نقتطين واقفين في زوري الاوله ان دلوقتي البنت قبل الجواز بتكون بداري الفضايح اللي بتبان بعد مابتضمن انها خلاص اتجوزت ,يعني في الاساس دلوقتي ولا في رقه ولا كلام من دا كله تمثيلقبل الجواز وعايزين تتاكدوا نرفز بنت عندها 20 سنه وقولها انتي شكلك ماله ملخبط كده هتلاقي بلاوي سودا ضربت في وشك.
النقطه التانيه بقه ماهي البنت بتتحول صح لكن بردوا الرجل مش بيبقه زي ماهو ربنا يزيدوا الكرش يطلع والهم يترسم علي ملامحه دا غير عوامل التعريه في الاخر بيتفاهموا مع بعض واللي مضرر من الموضوع دا الشباب الصاعد اللي بيشوف مستقبله فيهم

سجدة said...

أنوثة يااااااااا هو الإحساس دا فين يا أختى

Anonymous said...

مجهول 3:18

خليها على الله

ربك يفرجها

قل لن يصيبنا إلا ما كتب الله لنا

الصبر مفتاح الفرج

مد لحافك على قد رجليك

قسمة ربنا

ربنا عاوز كده

لا يؤمن أحدكم حتى أكون أحب إليه من أمه وأبيه وصاحبته وأخيه وبناته وبنيه

ليه؟ هوه الحب بالعافيه

reham said...

sweetie , we all have left our oestrogen at the college door the moment we entered med/pharmacy school

Anonymous said...

برايد انا مكنتش مسافر لاني اصلا بره مصر-غالبا ف السعودية - بس انا زعلت منك عشان كاميرا جيرل ديه غلطت فيا وانتي مش خدت لي حقي لكن كالعادة هاسامح كل الناس
موضوع ان الدين مهم جدا في اختيار شريكة الحياة والرك ع العريس هو اللي يشوفها من المنافقين اما لا
مش متخيل العريس يقعد مع المرشحة للزواجة ويقعدها ع جهاز كشف النفاق يعني
اكيد محدش فينا معه كشف من سيدنا جبريل باسماء المتدنينواللي موش
ومش عارف ليه حرام علينا نقول علي فلان انه من اهل الجنة او النار حتي عندما نتكلم ع احد نظنه ملتزما لا بد ان نقول نظنه كذلك ولكننا لا نزكي علي الله احد
في غانية من بني اسرائيل دخلت الجنة لانها سقيت كلب واول ما تسعر بيهم النار يوم القيامة شهيد وقاري للقران ولكنهم كان غير مخلصين لله
فكرتي المبنية علي تجربة انه من سؤء الادب ان يتدخل العبد فيما بين العبد وبين الله ويقسم الناس الي متدينن وغير متدنين
اهم حاجة الاخلاق الشخصية انا اريد الارتباط بواحدة لا تخونني او تخدعني حتي لو كانت برزايلية
اما دينها فليحاسبها عليها الله
ارجو الا يفهم كلامي علي اننا ضد الدين والله ابدا والحمد لله لقد حجيت 6 مرات لكن انا ضد اننا نظن نفسنا انصاف الهة ونحكم ع دين الاخرين بالسالب او الايجاب
اذن لا تحكم بالدين فلسنا في محاكم التفتيش ههنا حتي نفتش ف الضمائر
ايه الحاجة المضمونة اللي ممكن تلعب عليها الجمال والرقة والانوثة كما تراها في باميلا جونسون ونانسي عجرم ونسرين

Anonymous said...

كلامك صح جدا يابرايد

Anonymous said...

ليكي حق يابرايد بس يا اختي مش مركزين هما اليومين دول الا على الكلام ده بس ومنها لله هيفاء ونانسي

Anonymous said...

ساعد نسرين الأيمن
كلامك صح لولا حكاية الغانية اللي حضرتك بتحكيلنا حكايتها ودخولها الجنة
حضرتك كنت شفتها هناك مثلا؟
القصد ان الدين حاجة بين الإنسان وبين ربه. وحكاية الغانية في السياق ده تثبت صحة الفكرة دي
الدين المعاملة. أعرف ناس أفاضل توفاهم الله وهم لم يركعوا فرضا واحدا في حياتهم, لكنهم ساعدوا المحتاجين وبروا والديهم, ليس من أجل أن تكتب الأعمال دي في ميزان حسناتهم ويزيدوا رصيدهم وإنما من طيب معدنهم وإنسانيتهم التي تفجرت أعمالا صالحة دون التفكير بالحور العين والولدان المخلدون
فهل ستكوى جباههم وتحترق جلودهم ثم تبدل بجلود أخرى ليذوقوا العذاب؟ بينما المنافقين الذين يتسترون برداء الدين يسرحون ويمرحون في أنهار الخمر والعسل؟
آسف للدخول في موضوع الدين , لكن مسألة : اظفر بذات الدين دي, مش
قادرة أهضمها
هوه أربع أخماس العالم , الغير مسلمين , مافيهمش حد صالح أبدا؟

Mohamed Hesham Safa said...

الحب والتفاهم دايما بيخلقو جو من "الروقان" اللي بتقولي عليه .. يعني لو الواحدة بتحب جوزها هتبقى دايما مهتمة انها تظهر بأحسن مظهر قدامه "انما لو متجوزة تقضية واجب اي حد والسلام عشان اجيب دستة عيال مش هتبقى فارقة مش كفاية انها اتجوزته أساسا" عشان كده الجواز لازم يبقى عن حب ... أحب بقى أقول ل"رومانتك روز" ان كلامها في الجون وصح الصح ... الانوثة بتختفي لأن الاحتواء الرجولي و"الجنتلة" بيقلو خالص ان ماكانوش بيختفوا ...
وربنا يهدي الجميع ... ويوفق الكل ان شاء الله

كراكيب عادل said...

تعالي شوفي الصورة دي وخديلك جرعة تفاؤل

اة عندي في البوج او بوست في وشك هتلاقي صورة ركزي شوية يمكن تفسر حجات كتير من اسئلتك

بس هي ملهاش علاقة بالانوثة

ليها علاقة بحجات تاني مهمة الامل

اما عن انك خليتي كل الستات خلاص بقوا رجالة دي حكاية تاني

فية رقة يا برايد بس بعد منتصف الليل دول بيضحكوا عليكي متصدقيش

:)

Amira said...

ههههههههه
بامبرز ثم بامبرز ثم بامبرز

هههههههههههه

الرقه و الانوثه لازم يفضلوا من طباع الست مهما حصل
مع احترامي الشخصي لرأيك
بس الست المصريه هي اللي داخله الحياه بصدرها زي ما بيقولوا

لو هي ماجبتش خضار حيجيب هو عشان ياكل
لو هي مجبتش البامبرز حيجيب هو

ساعات بحس ان فيه رجاله اتعودوا على شقا ستاتهم
لو الست رفضت تشقى
حيشقى هو
دي نظريه اكيده

انا اعرف ستات ناعمه زي الغريبه بعد الخلفه و الجواز

عارفه ليه؟
علشان كل حاجه تقول لك " معرفش" مبتعرفش تعمل اي حاجه فبالتالي هو اللي بيعمل غصب عنه

shabfa2re said...

يمكن عشان الرقة والانوثة احياناً بتكون البنت مزوداها اوى
وترفيع صوت بقى وحركات

Anonymous said...

قد كده مالكوش فى الدعاء ولا الصلاة ؟
للدرجة اللى تخليكى يا برايد تشيلى دعاء صلاة الحاجة من غير ولا اعتزار او حتى كلمة شكر ولا حتى انك تقولى ليه شلتى الدعاء ؟!!!!!عموما انا كنت بحاول اخدم بس الواضح اننا بقينا نفهم الدين غلط
سلام عليكم ومش داخل المدونة دى تانى
بس برضه ربنا يرزقك الزوج الصالح
سلام عليكم

صوت فيروز said...

to admnave
للرد علي حضرتك انا كلامي بعيد كل البعد عن التناقد لان حضرتك في الاصل خالط ما بين الخلافه الاسلاميه و معني نظام دوله, و ايمانا نحن بالاسلام
يعني علي ما اعتقد حضرتك لو غيرنا كلمة رئيس جمهوريه بكلمه الخلافه
اكيد مش ده اللي هيخلي برايد تتجوز
لكن ايمانا و اخلاقنا هو اللي هيصلح مجتمعنا بتطبيق هذا الناموس الرباني و الذي تميز بذكره لمكارم الاخلاق و الاداب العامه

يعني برده انا شايفه ان الاسلام فيه الحل و مش ذنبنا ان في ناس نسيته
مثال: قانون المرور موجود لكننا بنكسر الاشارة برده

اما الرد علي اننا مسلمين و لا لأ فمن فضلك اتكلم عن نفسك في ده و هسيبك ترد عليه بنفسك لان دي علاقه ما بين كل واحد و ربه
لكن انا لما اتكلمت, انا اتكلمن عن الاسلام كاقعده فيها الحل لينا
سواء مشيت عليها او لا دي حاجه ترجع لك

و بالمثل لكلمه (بما ان كل الاجوبه في القران حلنا بالويل ليه) فده لانك تركته


اما عن الاخ مجهول
انا عايزه الناس و انت تشهد علي نفسك و انت بتقول استعنت علي الشقاء بالله ,ده و انت بترد عليا في موضوع عادي؟؟؟

يعني لما انا قلت اننا نستعين علي الشقاء بالله في موضوع حيوي زي ده علي ما اعتقد اني بكده ما غلطش !
و اللي خلاني ارد عليه هو سخريته في كلمة(بالروح بالدم( مهم قوي الدم ) نفديك يا إسلام)
و اللي تعمدت اني ما اذكرهاش في كتابتي للرد لاني فضلت اني اقنعه بدل ما اهجمه و ارد علي النقط اللي كاتبها لان الكلمه اللي قاله مالهاش اي داعي

و علي ما اعتقد ان الاسلام مش مستني دمه يفتدي بيه

اما بالنسبه لحضرتك و اللي عايزه افهمه هو -هل اعتراضك عليا لقلة حجتي, ولا لاني شايفه ان فعلا الاسلام هو الحل يعني انت اصلا بتناهض المبدأ؟؟؟؟

اما بالنسبه لاننا عكرنا صفو حضرتك لانك جي تمهيص في المدونه و تكركر فانا عن نفسي اسفه
اما بالنسبه لوضع حضرتك للمدونه تحت اطار التفريج عنالنفس بس ,فده ترد عليه برايد

و عن النقط اللي حضرتك انتقضتني فيها فانا عندي رد كافي و وافي للرد عليك, بس انت قول لي و انا ارد عليك بس في ساحه تانيه غير هنا

اما بالنسبه لسخريتك من الحديث(لا يؤمن أحدكم حتى أكون أحب إليه من أمه وأبيه وصاحبته وأخيه وبناته وبنيه

ليه؟ هوه الحب بالعافيه

محدش طلب منك تحبه و وجود او ذكر الحديث ده مش في موضعه اصلا
واضح انك بتناقض نفسك
كذلك احنا مش مسئولين عن قلة ايمانك بقسمة ربنا

اللهم صلي علي محمد

صوت فيروز said...

اما انت يا برايد يا اختشي
فقد اصبتي كبد الحقيقه
انتي يا بت انتي عكروته فعلا
قولي كمان و متحرمناش
و انتي عارفه اني اكتر واحد عانيت من موضوع الانوثه ده
و اقري البوست بتاعي فيه و احد كانت مشكلته برده الانوثه

ربنا يزودنا من تاء التانيث و نون النسوه
سلام يا قمر

اللهم صلي علي محمد

Anonymous said...

يعني يا ست برايد مافيش حل وسط
يا ابيض يا اسود
ياما في ستات قدروا يمسكوا العصاية من النص بس دا مابيجيش الا بدعم ازواجهم وتشجيعهم ليهم
لو تفتكري كريمة مختار ف العيال كبرت لما ابنها قالها انت اعظم أم بس دا مش كفاية لان ابوه بدا يبصبص علىواحدة تانية وانت طبعا عارفة ان ل الرجالة عيون تندب فيهم رصاصة ولا اييه؟
الحل زي ما
شاهي قالت
تمنياتي للجميع بالسعادة

wanna b a bride said...

صوت فيروز

رغم ان انا ماقلتش حاجة من دي زي مابتقولي

بس تعليق جميل

ووجهة نظر تحترم
-------------------
حصان بري

الإعتراف بالحق فضيلة

عاجباني قوي الحيادية اللي الكل بيكتب بيها التعليقلت

صح زي ما الست بتتبهدل الراجل كمان بيتبهدل

و يظهر الكرش و بدل أي كلمتين حلوين يقوم ياكل سندوتش محشي أفيدله
-----------------
e7na

كلام ميه ميه
و تمام و على ماية بيضا
-------------
3ashe2elro7

الناس العظماء دايما أفكارهم بتتوافق

أحب أطمنك ان الضمان ساعات بينتهى بعد أول أسبوع
-------------
meroooo

من حسن حظك ان الإنسان اللي ارتبطي بيه ماكانش سطحي

بس للأسف الغالبية بتدور على السطح و بس
و لو الحقيقة ظهرت في خناقة والا حاجة

يبقى انا شايف اننا مختلفين و مش ممكن هنكمل مع بعض
لكن اللي بيستمر حتى مع ظهور العيوب اللي في الطرف التاني قليل قوي
-----------------
admneve

اذنك معاك

ولو اني مش فاهمه حاجة برضه
---------------
romantic rose

واضح ان انتي كمان بنت بتفهمي جدا وواخدة الحياة بواقعية و بساطة في نفس الوقت و ده أسلوب احترمه جدا

بالنسبة للجنتله فدي في أوقات كتير حتى قبل الجوزاز بتكون خرجت و لم تعد

و بعد الجواز قلة الجنتلة بتنضرب في عشرة

و في الاخر كل واحد بيقول لنفسه

اشرب..لاااازم تشرب
------------------
بعيدا

البنات في مصر فقدوا جزء كبير من أنوثتهم أي نعم..بس ظروف الحياة بتتسبب كتير في الموضوع ده

يعني الخروج و التعامل مع البياعين و الناس و ظروف الحياة اللي بتخللي كل واحد روحه في مناخيره و قلة الضمير اللي بتخللي في أوقات كتيره الواحدة لو ماتخانقتش و فاصلت و علت صوتها مش هتاخد حقها

ما هو يا اما نبقى كلنا رجالة يا غما ننكن في بيوتنا و نبطل نشوف الشارع..و متهيألي التانية دي صعبة قوي
-------------------
مجهول

الراجل له تأثير على الست و ممكن يظهر انوثتها

بس ده في حالة اذا كان لسه عندها أنوثه و ماتعرضتش لمواقف كتير خلتها تحط انوثتها على جنب

سندباد said...

مساء الخير
دي اول زيارة للاسف لاني كان لازم ادخل مدونتك من زمان عجبني اوي الحالة اللي في المدونة احييكي عليها بس معلش ممكن اختلف معاكي والاختلاف لا يفسد بين المدونيين قضية وهي قضية التعبير بكل صراحة وانا هاتكلم بكل صراحة اه كلنا بنتغير بعد الجواز كلنا بنتغير لما بنطلع من بيتنا بنروح المدرسة من ابتدائي لاعدادي لثانوي لجامعة كل يوم في تغيير وكل مرحلة ليها تغيير بس في حاجات مش ممكن تتغير ممكن تستخبي او ندفنها جوانا لحد ما نلاقي حد يطلعها يعني الزوجة اللي طول النهار شغل وعيال وطبيخ وغسيل ممكن تبقي في منتهي الرومانسية لو قدر جوزها يفهمها ويحس بيها والعكس الراجل اللي طول النهار شغل علشان لقمة العيش ودايما مكشر وقلقان ممكن مراته تخليه في قمة السعادة اللي قصدته اننا ممكن مع بعض لو بنحب بعض اوي وبنخاف علي بعض جدا تبقي الزوجة في قمة الانوثة والراجل في قمة الرجولة معلش انا طولت اسف
تحياتي

السندريللا السعيدة said...

ايه الجدية دي كلها يا بت يا برايد

والله كلامك صح جدا ..وفعلا كتير قوي دلوقتي مبقوش يبصو غير عالشكل والجمال الخارجي والانوثة المتصنعة بس...مبقاش همهم الاصل والشخصية وجوهر الانسان....

سواء رجالة او ستات او مهما كانو...وهو دا الي بيخلي حالات كتير تفشل عشان مفيش توازن في الاختيار ....

المهم بحييك على البوست

الكلام نوعان :كلام فارغ وكلام مليان كلام فارغ said...

انوثه ايه اللى بتتكلمى عنها
ايه الكلمه دي...الكلمه دي انقرضت من زماااااااااااااااااان
صلي على النبي لما تلاقي البنت دلوقتى واقفه مع ولد وتقوله خليك في كوزك لما نعوزك وخليك في جحرك لما نروح لك
تبقى فين الانوثه
ولا لما تضربه بالشلاليت في الجامعه وتقعد على الرصيف معاه
تبقى فين الرقه
والنبي لما تقابلي الانوثه صدفه طبعا ابقى سلميلى عليها

Anonymous said...

أنا شكلي ماليش في الموضوع أساسا و مش عارف بأعلق ليه؟


بس أنا عايز أدي هدية لمستمعين و مستمعات إذاعة بلوجك

دا بقف مين؟

و الرابط أهه

http://boswtol.com/tafaneen/media/131/bakaf.wma

Reemo said...

الرقه مش معناها عدم تحمل السمؤليه ومفش اختلاط والكلام ده خالص
الرقه رقه الروح
بتبان فى الاختيارات والازواق والكلام
انا بشوف بنات كتير بتعاملو فى حياتهم عادى وبينزلو وبيشترو وبيكلمو الناس
ومع ذلك فيهم رقه مش طبيعيه بجد
بس اكيد مش معنى كده ان الراجل يبقى عايز الرقه وخلاص
مفيش احسن من التوازن
اننا نمسك العصايه من النص
يعنى الراجل يدور على المتدينه الكويسه والرقيقه بس فى نفس الوقت ناضحه وتقدر تتحمل المسؤوليه
أما بقى البنات اللى بتمثل الرقه لغايه ما توقع العريس فدول حدث ولا حرج مفيش اكتر منهم فى حياتنا
باختصار الانوثه فى رأيى ان البنت تتعامل كبنت بكل ما تحمله الكلمه من معنى وتبعد عن تقاليع البنات وحريه المرأه والكلام الفارغ ده
الست هى الست ولو فهمت كده هتبقى فى قمه انوثتها حتى فى اسوأ حالتها
تحياتى

Anonymous said...

اية اخبارك يابرايد؟
انا عاوزة اعرف انتي بتروحي فين؟ وبتتأخري علينا اوي كدة لية؟
وكمان عاوزة اطمن عليكي وعلى صحتك
والسلام عليكم

تائهة فى أرض الأحلام said...

والله يابرايد كلامك فيه كتير صح
بس أنا بشوف ستات بجد بجد أنا بحس انى راجل جنبهم
بس دولا بيكون ليهم مواصفات خاصة فى اللى هايتجوزوه
يعنى أنا ليا جارتنا عندها خمسين سنة لغاية دلوقتى قمر ورقيقة بشكل بس مش بتدخل المطبخ لان الطباخة بتجيلها مرتين فى الأسبوع تقطع لها الخضار وتنضفه وهى يدوبك تحطه على النار
والشغالة بتروح تنظف لها البيت مرتين فى الأسبوع
ولما ياكلوا كل واحد فى العائلة يقوم يشيل طبقه ويغسله حتى جوزها
وكل ده ومش بتشتغل
فيدوبك تنزل النادى الصبح بعربييتها ومن ساعة ما واحد قالها ( يابنت الجموسة ) آسفة فى اللفظ قعدت 3 شهور مش بتسوق لانها زعلانة ان الناس أخلاقهم بقت وحشة

MiraMar said...

وجون وجون وجوووووووووووووووووون
اهو كده
عود أحمد يا بنتي
بصي بأه
كل بنت جواها أرق أنثى في الدنيا
بس الرقه والأنوثه زي أي حاجه في الدنيا بتتعرض للضغط العصبي وعوامل التعريه وتقلبات الجو وخصوصا الحر
بس أسهل الطرق أنك تقتل الأنوثه جوه بنت أنك تهمل الأنوثه جواها وتتجاهل وجودها مش بالضروره القاتل يكون راجل من اياهم اللي عايش من منطلق وأد البنات مش بيقتلها بجد يعني بس على الأقل بيتجاهل وجودها ويقلل من اهميه المشاعر ويعامل البنت كأنها كم مهمل
الراجل ده من يكون أب أو أخ أو خطيب
أو زوج
يخلي البنت تموت في كل يوم بتصحى تلاقي نفسها عايشه الكابوس انهالسه أنثى
وساعات بيطور الموضوع وتتمنى انها تكون ولد وتعترض على حكم ربنا
ممكن اوي البنت بذات نفسها هيه اللي
تقتل الأنثى جواها
بكيفها أوقات وغصب عنها أوقات أكتر
شغلها ولادها حماتها:)جوزها
بس في الاخر
الانوثه هي فطره وحلم وأمنيه وعيشه واللي عايشنها وتصبحي على خير

a3trafat lylyah said...

هو فيه ستات فى مصر عندها انوثة أصلا
هههههههههههههههههههههه
تحياتى لك
المنقذ

صاحب البوابــة said...

اين جديدك ؟؟؟

تحياتي ؟؟؟

بياترتس said...

الله عليكى
رغم ان الموضوع اتقدم كتير
لكن استخدامك لعطر الانوثه كان استخدام صح وضاف جديد
جميله

Anonymous said...
This comment has been removed by a blog administrator.
Anonymous said...
This comment has been removed by a blog administrator.
MaMaDo said...

بوست جميل جدا من نوع المضحكات المبكيات بس علي فكرة الرجالة كمان-وانا منهم- بيطلبو من الست حاجات غير اللي هي بتعرضها. زي مثلا لما الراجل يطلب من مراته انها تقعد في البيت , في حين انها تفضل الشغل عن القعدة.
المهم بوست جميل و ميه ميه

wanna b a bride said...

همسات

الله يكرمك و يخليكي

احنا شعب يبحث عن المناظر..مع ان منظرنا عموما كشعب

مش ولا بد
--------------------
batresya

بس انت مش معايا ان ساعات اليوم كله بيستدعي انها تطلع الراجل اللي جواها

هي دي المشكلة
---------------------
مجهول

سعيدة ان المدونة بترسم ابتسامة على وجهك

و شكرا علىالإطراء

ده اللي يخصني في التعليق بتاعك

و بقية التعليق محتاج رد من صوت فيروز

تحياتي
------------------
rona

ده ..لو

----------------
koko

المفتاح معانا و معاكم

الست لو تلاقي الحنية و التفاهم

هتخرج كل الأنوثةالي عندها

بس بصراحة في أحيان كتير..المود مابيسمحش بأي أحاسيس
--------------
الربان

تمام

اولا يبقى فيه النفس و النية عن طريق الحب و المودة

و بعدين يبقى فيه التعاون اللي يوجد الوقت لراحة البال و الإهتمام بالنفس
-----------------
spyfun

مش عارفه ليه كل ولد أو بنت بيبصوا لأهاليهم و يقولوا احنا لا يمممممممكن نبقى كده

و بعدين يكرروا نفس الأخطاء

هو بيبقى الأب اللي بيشخط و ينطر و لا يمكن يساعد في حاجة عشان التاج اللي فوق راسه مايقعش

و هيا بتتحمل مسؤولية البيت و الأولاد كاملة و مابتفكرش تطلب مساعدته على اعتبار ان الدنيا كده و الرجالة مالهومش في الحاجات دي

و مستنيين الحياة تتغير...طب ازاي؟

wanna b a bride said...

سجدة

ما احنا أهه بندور عليه
-------------------
مجهول

شكرا على تشكيلة الدعوات
--------------------
reham

جبتي الفايدة..و الله باقول كده منزمان
-------------------
ساعد نسرين الأيمن

عموما اهلا بيك تاني في المدونة

و لو اني متأكدة ان المدونة ماهانتش عليك طول المدة دي و كنت بتطل عليها كل شوية

أنا ماباحبش أتدخل في خناقات و الله

و بعدين كل واحد جدير يدافع عن نفسه

انا مش بس في المدونة حتى في الحياة ماباعرفش للأسف أتدخل في خناقات
---------------------
أيامنا الحلوة

شكررررا
-----------------
قلوب حائرة

منهم لله من هنا لبعد بكره

قووا علينا الجيل كله
-----------------
mohamed hesham

صح جدا

و لأن معظم جوازات دلوقت تقضية واجب

يبقى منين الروقان يجي؟
------------------
كراكيب عادل

جيت و شفت

انت بتجيب التفاؤل ده منين

احجزلي شوية لو سمحت

فيه و الله ؟...بعد منتصف الليل

ماعنديش فكرة الصراحة ..بنام بدري
-------------------
farida

نظرية ماباعرفش دي نفسي أتعلمها

بس مش عارف

برضة موضوع الشقا ده زي مابتقولي بأه مزاج عند ستات مصر

خلاص يعني لازم تبقى 7 رجالة في بعض و ماحادش يساعدنا

جتنا نيلة احنا اللي بنجيبوا لنفسنا
------------------
shabfa2re

ماهو ده اللي بيوقع العريس يا عم على جدور رقبته

و يفتكر ان الموضوع كده على طول

بس على ميييين

wanna b a bride said...

مجهول

أنا مش فاهمة انت بتقول ايه؟

دعاء ايه الي شلته

و مين اللي يديك الحق تقول مين اللي له في الصلاة و مين اللي مالوش

استغفر ربنا و اتعلم تتكلم ازاي قبل ما تتكلم بإسم الدين

و المدونة عموما مش هتنقص كتير
و عموما برضه

شكرا

wanna b a bride said...

obad

فيه طبعا فيه

بس لازم الرجل و الست يتعاونوا مع بعض

و للأسف ده قليل
-----------------
sendbad

أهلا بيك دائما وعلى طول

زي ماقلت

لو بنحب بعض و نخاف على بعض و نساعد بعض


لو
-----------------
السنديللا السعيدة

شوية هزار و شوية جد

هناخد السنة كلها ضحك والا ايه؟

كلامك تمام
-----------------
الكلام نوعان

عليه الصلاة و السلام

اهم البنات اللي بتقولي عليهم دول أكبر مثال و هما بيجيبوا من الآخر عشان عارفين ان مافيش مستقبل معاهم

لكن العريس المنتظر هتلاقيهم أرق من أرق واحدة

هابقى أسلملك عليها ان شاء الله
بس ربنا يعترني فيها بس
--------------------
محمد فوزي آل ربيع

مالاكش في الموضوع

أممممممم..غريبة دي

بس عموما شكرا ع الهدية
-------------------
reeemo

كلام جميل كلام معقول

ما اقدرش أقول حاجة عنه

wanna b a bride said...

shahy

و الله يا بنتي الدنيا تلاهي

و انا باجري في 3-4 اتجاهات في نفس الوقت

ده غير ساعات حالات الإكتئاب العابرة اللي تخللي الواحد نفسه تتسد عن كل حاجة

بسجاية جاية ماتقلقيش
--------------------
mai

هي جارتك دي بصراحة اللي ليها الحق

لو كل واحدة يبقى فيه حد يساعدها كده

كان زمان المصريات راسهم براس هيفا و نانسي

بس فيييين
------------------
miramar

كلامك جميل و عجبتني النقطة بتاع الرجالة اللي بيخللوا الأنثي تكره انها أنثى و تتمنى لو كانت راجل و تريح دماغها

فاتتني النقطة دي

شكرا ليكي
---------------------
a3trafat lylyah

ساعات
:))
---------------
صاحب البوابة

جاي في السكة
-------------
بياتريس

شكرا ليكي يا عسل

يا رافعة معنوياتي
-------------
mamado

و الله ساعات حتى القاعدة في البيت بتدخل في دوامة الأكل و العيال فقط..زي ماحد من المعلقين ضرب مثال بمسرحية العيال كبرت

ربنا يوفقك ان شاء الله

تحياتي

Ehab said...

يا ستي انتي بتحسبي ان انتو بس اللي بتتغيروا احنا عارفين كده كويس لأن احنا كمان ماشاء الله بنتدهول بصره رائعه بعد الجواز
يعني انا دايما كل ما حد اعرفه يبقى هايتجوز اقوله انه يعمل حسابه عشان الكرش لما يظهر يبقى ما يتخضش ده طبيعي وطبعا غير حاجات كتير منا مثلا الإهتمام بالشعر يقل تدريجيا وده مفهوم لأنه اصلا بيبتدي يقع لوحده المهم اما معاكي ان الأخلاق والدين قبلها والصل مهمين جدا لكن احنا بقينا بنقيس بمعايير مختلفه يعني واحد شايف ان انا مثلا محترم لكن واحد تاني شايفني صايع ومنحرف وعديم التربيه برده انا ممكن اشوف بنت لابسه بنطلون منيل محذق اقوم افترض على طول انها راجعه من الكبارييه وواحد تاني يقولك ان اللبس حريه شخصيه يعني الإختيار ده على حسب الشخص اللي بيختار مفيش معيار عام للإختيار
وختاما لك الف سلام
ومحبه واشواق خضار
سلاااااااااااااااااااااااااااااام

Ehab said...

على فكره انا حبيبت قلبي هاتفضل طول عمرها دلوعه في عيني ولذيذه
ربنا يخليهالي
غ
سلاااااااااااااااااااااااااااااااام

Anonymous said...

أم أحمد
========
الاغنية بتاعة محمد منير دي كانت بتاعتنا انا وجوزي لما كان خطيبي طبعاً
وبصراحة كانك بتوصفي حالي لما كنت بسكوتة ودلوقت بقيت بطوطة

Human Wolf said...

مهو للاسف ده امر واقع ومصير محتوم لازم الكل يمر بيه هى الواحده منكم اول ما ضمنت ان الضحيه وقع فى شراكها واتخدر وخلاص لحظات ويبقى ملكها بتظهر وتكشر عن انيابها وتبان على حقيقتها وتبدا بقى تتحول لمصاصه دماء وتمص فيه وتاخد من صحته ومن جيبه ومن اعصابه والجوز يا عينى يبقى عامل ذى السجاره الملفوفه من الشقى والغلب وهى عماله تتخن وتتبرشم يعنى تاخد شكل البرشامه وصحتها اخر فل وعشره راحه بال بقى حاطه ايدها فى المايه البارده وخلاص بقى مش ساله فى حاجه مهو الضحيه وقع على جذور رقبته ومش هيعرف يفرفص منها والفرفصه فى لغه الازواج يعنى الزوح يصبح بلا حول ولا قوه وملهوش سكه غير سكته بيته يا تقطيع القلب وربنا بيصعبوا عليه الناس المتجوزين طيب والله لسه واحد صاحبى قافل معايا التليفون من شويه بيكلمنى لقيت صوته متغير حزين شويه بقوله مالك يا مان فى ايه صوتك مش طبيعى هو اساسا فى مرحله الجواز وكده فبيجهز الشقه والعفش والحوارات المستنفذه للصحه الجسديه والماديه المهم قالى الفلوس يا مان كل ما اسد خانه يتفتحلى باب ويطلعلى منه مصاريف مكنتش عامل حسابها ده كان شويه وهيعط اخدت انا السماعه بتاعه التليفون وقعدت اطبطب عليها واقوله اهدى يا مان مش كده وهو يقولى مش قادر انا عاوز ارجع فى كلامى وانا اقوله يا مان خلاص ترجع ايه هى بنات الناس لعبه المهم مطولتش معاه فى المكالمه علشان خفت احسن يكون عاوز فلوس قومت قفلت معاه بدرى بدرى ايه هو علشان صاحبى يستكردنى ولا ايه ابوها نداله انا ناقص المهم موضوع الرقه والانوثه بيصبح فانتزى بعد الجواز خيال علمى يعنى استحاله تبقى حاجه موجوده فى ارض الواقع والبسكوته اللى كان الواحد وهو ماشى معاها عمال يزق فى الناس يمين وشمال علشان محدش يخبط فيها وتحصلها حاجه دلوقت هى اللى ماشيه تزق فى الناس وتضرب فى ده وتخبط فى ده صباح الافترى يعنى وتلاقها اتجبست واتحنطت ولا تقرب الى البسكوت ولا كحك العيد حاجه خالص وتقول يا سبحان الله هى دى اللى كانت قبل الجواز وتقعد تعيط وتقول انا ماليش دعوه انا عاوز الموزه اللى حبتها فى الاول دى اتغيرت هو مفيش غيره الواد حموءه الميكانيكى غيرها وانا نايم علشان كان عاوز يجوزنى اخته وانا مرضتش اصله فرق كبير بين الواحده قبل الجواز والواحده بعد الجواز قبل الجواز تحس انها سمباتيك قوى ودلوعه كده وتتاكل اكل بعد الجواز ده انها كانت محرومه مش بتاكل والاكل اتحط قدامها وبصت لاقته على غلفه ومقدرتش تحوش نفسها ضربت الشورت والفانله مهى ناصحه مش عاوزه توسخ هدومها علشان متتعبش وتغسلهم وتروح ضاربه واحد دايف مع واحد باكورد فى نفس ذات الوقت فى صنيه المحشى وادينى يا ريس احلى اصوات بقلله والاكل نازل على المعده يطفى نارها يا ساتر يا رب لا جواز ايه وبتاع ايه

don don said...

السلام عليكم ورحمة الله وبركاتة

مدونة رااااااااائعة يا برايد

بجد روعة والبوست يجنن

فعلا والله يا براد كانى بتكلم

عارفة انا خايفة اوى خايفة ارتبط وخايفة من كل دة

لاءن زى ما بتقولى هانتحول انا حاسة انى اكي هاتحول يعنى هاتحول
يعنى ماهو عل رأيك انا لما اشيل المسؤلية دى اكيد مش هاكون رقيقة

تعالى انتى شوفى بنت خالتى امبارح كانت بتتكلم مع الواد اللى بتحبة فى التليفون قبلها كانت بتضربنا وبتتكلم بصوتها العادى

ساعة ما جالها التليفون رقة الدنيا والاخرة نزلت عليها بقت فعلا بكسووووووتة


شوفيها لما بتشوفة يا سلام على الجمال اعتد انة بعد كدة بالتاكيد بترجع تانى يعنى حتى البنات الرقيقة دى يا اما بيدعوا الرقة

ي اما هيحتاجوا يكونوا فى الفقاعة على طول

ربنا يهدينا يارب

ويرحمنا


تحياتى ليكى يا قمر

سلااااااام

Anonymous said...

كلام جامد جدا شكرا ليكي ولنصايحك

ربنا يوفقك

Anonymous said...

بصي يابرايد
انا معاكي في اللي انتي بتقوليه دة بس الراجل بردة محتاج لشوية رقو وشوية انوثة من مراته ماهو يعني يبقي ايه الفرق بين برة البيت وبراه ولما الراجل مايلاقيش راحته جو بيته هيلاقيها فين
ولما الحكاية تبقي كدة يبقي الستات مايزعلوش لما الراجل يقعد اكببر وقتع برة البيت اولما يقضي اليوم كله معىاصحابه علي القهوةو او اي مكان
او لما يعط برة ويبص لغير مراته
الراجل يابرايد ويا اي ست تانية مش بيبص لواحدة تانية غير ماراته إلا لما مابيلاقيش راحته مع مراته فبيدور علي الشيء اللي مفتقده برة
وطبعااي راجل وفي اي سن محتاج للدلع والأنوثة والرقة والحنان وكل الحاجات دي

Anonymous said...

خلاصه الحكايه وما فيها بش بالرقه والجمال تحافظ اي واحده علي حب جوزها ايوه هم مطلوبين بس مش كل حاجه والسؤال هنا ازاي نحقق المعادله الصعبه ان الواحده تفضل رقيقه وجميله وفي نفس الوقت تبقي ست بيت شاطره وام ممتازه ويا جماعه من فضلكم بلاش تدخلوا الدين في مناقشات ملهاش لازمه مش احنا الي حنخضع الدين لمقايسنا العقليه المحدوده والي كل من بيقول انا مش مقتنع بالكلام ده وعامل فيها العارف بامور الدين والدنيا حاول تخلق بعوضه اواقترح نطام يحل كل مشاكلنا واحنا يا سيدي معاك بس مقاوحه بالكدب يبقي عيب ده دين مش موديل مش عجبك وعايز تغيره