Thursday, March 15, 2007

السادس

وحشوكوا عرساني؟؟..ماتشوفوش وحش..أنا شخصيا ماوحشونيش خاالص..أنا جاتلي منهم حالة اكتئاب كل أما أنام أحلم بكوابيس مالهاش أول من آخر..مرة أحلم بأيمن ماسك صابعين جلاش..مرة أحلم ببتاع لجنة السياسات معدي بالمكروباص على الرياض و مرة أحلم بالأخ اللي شبه عمرو موسى ده و أنا واقفة و ماسكاله الطفاية..مرتين تلاته كمان حلمت بكريم عبد العزيز بس ده مش موضوعنا دلوقتي خااااااااالص



و برضه من آثار الإكتئاب اللي بيحصل للوحدة بعد كمية محترمة من التجارب المحترمة زي اللي انا مريت بيها دي..بعدها مابتبقاش الواحدة عايزة تسمع كلمة عريس أو تشم حتى ريحته..طبعا أصلا لو له ريحة يبقى ماينفعش..يضرب جرس الباب أقوم أستخبى ورا ماما ..يرن التليفون أقوم أجري و أمسك في ايد بابا قبل مايرفع السماعة و الذعر في عينيا
لا يابابا بلاش..بلاش يا بابا..حرام عليك ..
ايه يابنتي في ايه ..جرالك ايه
لحسن تطلع طنط حشرية يا بابا و جايبالي عريس أرجوك يا حاج..بلاش ترد ع التليفون..اعتبرني زي بنتك
زي بنتي ..الحقي ياأم برايد البت اتهطلت
ماما تيجي و تسلك ايد بابا من ايدي اللي قافشه عليها زي الكابوريا
معلش يا حبيبتي معلش و الله نصيبك هيبقى زي الفل..اهدي يا حبيبتي كده و صلي ع النبي
عاااااااااااااااااا..آه يا ماما آه..مش عايزة طنط حشرية دي تاني
خلاص يا بنتي خلاص ..يا رب يبعدها عن سكتك


و الحمد لله أبواب السما يوميها كانت مفتوحة و مش ماما تنقي دعوة حلوة كده زيي يا رب تتجوزي بكرة الصبح؟..لأ تيجي في حظ طنط حشرية بس كويس برضه أهو قضى أخف من قضى



قوم ايه ..ربنا رحمني من طنط حشرية و عوضني عنها بأونكل ديسكو..أونكل ديسكو ده -و اسمه الأصلي دسوقي- صاحب بابا من زمان بس راجل شيك كده و أمور و روش و يبان عليه العز...نعم؟..أتجوزه؟؟..أتجوزه ده ايه؟..بقولكم صاحب بابا..خلاص يعني مافيش تمييز
المهم أونكل ديسكو ده كان دايما يجي عندنا و يقعد يلعب هو وبابا..طاولة؟؟..مين جاب سيرة طاولة؟..قمار؟؟..إمشي ..قمار في عينك انت و هو..بيقعدوا يلعبوا بلاي ستيشان..أمال ماهو أونكل ديسكو مش أي كلام

يقعد يغلب في بابا يغلب في بابا لحد ماتقوم خناقة و بابا يرزع الجهاز في الأرض و يبقى صوتهم مسمع آخر واحد في عنبر الغيبوبة بتاع القصر العيني
انت راجل مالاكش فيها
انت اللي مابتفهمش
يا عم روح انت صحيح بتفهم في البلاي ستيشان بس زي ماشعبان عبد الرحيم بيقهم في الطاقة الذرية

..و نخش نسلك أنا و ماما تنوبني زغدة في جنبي أو بونية في عيني و بعدين يخلص الموقف و أونكل ديسكو متشعلق في بابا بيبوس راسه و
بابا يقوله الشيطان شاطر يا حاج ديسكو
و هو يقوله حقك عليا يا بو برايد
و تتكرر الحكاية كل خميس زي الساعة لدرجة ان الواد برررق ابن الجيران اللي قصادنا بيجيب العيال صحابه كل خميس يتفرجوا ع الخناقة ..فرقعة و مطاردات في البلاكونة و بونيات و شقلبظات ..أحسن من ميت فيلم للسقا ده اللي بيقولوا عليه



الخميس اللي فات بأه بابا مجهز البلاي ستيشان و الكراسي في البلاكونة ..و انا انتهيت من تمارين الضغط و الحديد استعدادا لدوري في التسليك و ضرب جرس الباب رحت افتح لقيت أونكل ديسكو مدخل وشه من فتحة الباب و بيقوللي بلهجة كده ماعجبتنيش ..إزيك يا برااااااااايد..أخبارك ايييييييه
عارفينها الطريقة دي ..اللي الناس بيمطوا بيها الحروف قبل مايقولولكوا انهم جايبنلكوا باكو شيكولاته و بعد ماتحلموا بالكادبوري ..تطلع كورونا لبني من أم ربع جنيه
آآآآآآآآه ..عرفت ان الموضوع فيه إنه
بابا فيييييييييييين
مش هنا يا أونكل..سافر العراق ..جاتله إعارة سلام
و لسه هاقفل الباب الراجل الأروب حط رجله في فتحة الباب و زقه لما فعصني في الحيطة و دخل
هههههههه إعارة ايه يا بنت يا عكروتة إنتي؟..و الله دمك زي العسل يا برايد من ساعة ماكنتي قد كده لغاية لما بقيتي عروسة زي القمر



آآآآآآه ..وضحت الرؤية مادام قاللي انتي عروسة ..مش بس كده ..ده من خلال خبرتي الحياتية الطويلة ..أي موضوع تجتمع فيها كلمة عروسة مع كلمة عكروتة يبقى أكيد لا يبشر بأي خير

اتجه للبلكونة اللي عارف طريقها كويس و انا من الصدمة قعدت على أول كرسي قابلني في الصالة انتظارا لوقع القضا المستعجل فوق نافوخي
شوية كده و سمعت ضحك و هقهقة و بابا بينادي ماما ماما طلعت م المطبخ اللي مقضية فيه نص حياتها و متجهه ناحية البلكونة
و انا شفتها من هنا و رحت مرمية على رجلها
بلاش يا ماما ربنا يخليكي
فيه ايه يا بنتي ايه اللي حصل
ماتدخليش يا ماما قلبي مش مطمن حاسة انه كمين
كمين ازاي يعني؟
حاسة ان أونكل ديسكو جايبلي عريس
طب يا بنتي ربنا يبعت..انتي مش كنتي هيتقلعلك عين و تتجوزي
لا يا ماما..خلاص انا عرفت حظي و نصيبي ..أنا مابيتقدمليش غير العاهات ..أنا خلاص ياماما هاقعد جنبك و هاسمع الكلام و هاغسل المواعين
ايه ده ..هتغسلي المواعين بجد
لألألأ..بلاش استغلال الظروف ده
..بس و النبي يا ماما و النبي ماتدخلي
ماتقلقيش يا برايد ..انت عارفة ان اونكل ديسكو بيفهم و راجل محترم و معارفه كلهم ناس محترمين و لو جايبلك عريس أكيد هيقى محترم


بصتلها و الدموع في عينيا ..ذكية ماما دي ..عكروتة بتعمل معايا زي ماكانت بتقوللي زمان ..روحي المدرسة و انا أجيبلك صباع روج.....ايه دانا كنت في تالتة إبتدائي يعني عروسة قد الدنيا
يووووه ..برضه عكروتة و عروسة في جملة واحدة بس على رأي ماما أونكل ديسكو راجل محترم و غير طنط حشرية
خالص و لو جابلي عريس هيبقى راجل محترم
مش انتوا رأيكوا كده برضه
أما أخش أتصنت عليهم و أحكيلكوا المرة الجاية
ادعولي

86 comments:

Blank-Socrate said...

خير انشاء الله و بعدين انا مستبشر خير بالراجل الشنتل دا ...

Dibo said...

I can't wait to hear the story of your 6th "moseeba"
Don't be late pleeeeeeezzzzzzzz

shermen said...

يارب يطلع كويس يابرايد وتتجوزي بقى ياستار عليكي عاوزين نفرحي فيكي قصدي بيكي ونقول لولولولولولولي
وادعيلي انا كمان عشان حكاياتي شبه حكاياتك السوق كله ضارب ماتقلقيش ياماما مفيش غير العاهات اللي بيتقدموا الرجاله ماتوا ف الحرب خلاص بالذات أكتوبر

Shower-Mirror said...

ربنا يستر يابرايد ... انا قلقان من الراجل صاحب ابوكى ده اللى اسمه ديسكو و بيلعب بى اس .. :) .. اوعى يا بت يجيبلك عريس من بتوع ( انا اسمى مدحت و انت اسمك ايه ) :) و تبقى سنتك طين و تقولى ياريتنى كنت فضلت عند امى اغسل الحيطان كمان مش المواعين بس ...:)

تحياتى ليكى ياسكر و لو انى بدأت اشك انك كاتب ساخر كبير قوى و متنكر ...!!!

اقلع الباروكه يا يوسف يا معاطى خلاص اتكشفت هههههههههههههههههههه

و لا رديتى عليا فى الكومنت اللى فات ولا جيتى زورتينى و انا ولا هاعبرك بعريس من اصحابى البهوات ...

فلة said...

ههههههههههه
دمك عسل يا برايد
مش كنتي تفضلي راضية بطنط حشرية احسن لك

في انتظار السادس

سمسم said...

--=={{ الشاعر }}==--
السلام عليكم ورحمة الله وبركاتة
اولا : احب اقول لك ان الرجالة ممتوش ولا حاجة بس الحقيقة انهم عقلوا شوية على الاقل فى موضوع الجواز وبطلوا يدورا على عرايس اصل الواحد طلعان عين امة سورى يعنى ويدوبك المرتب بيكفية لغايه 5 منة الشهر يعنى وبعد كدة يدور على ابوه وأمة يستلف منهم على امل انه هيرجع الفلوس لما يقبض الشهر التانى وطبعا لما ييجى الشهر بيصدرلهم العبيطة بيكبر دماغة للمبيفهمش يعنى من الاخر اللى بيدور على عروسة يأما مجنون يأما مجنون
ده اولا ثانيا بقا:
انا بحييكى على المدونة الاكثرمن رائعة بجد هيله جدا على الاقل الواحد بيلاقى فيها حاجة تخليه يبتسم مش يدحك وبعيد عن الهم والقرف اللى الواحد شيفه فى المدونات التانية بس دة الواقع المصرى أما موضوع العريس اللى جى فى السكة مش هتخسرى حاجة لو جربتى يعنى فى كل تجربة استفادة وديكى بتتعرفى على دماغ الاخوة دول ويارب يكون من نصيبك ولو اننا ممكن لو ده حصل هنخسر مدونة اسمها عوزة اتجوز ونصيحة لو ربنا سهل بعد شهر ولا اكتر بالكتير غيرى اسم المدونة بـعوزة اطلق
انا بهزر بجد يا بختة اللى هتكونى من نصيبة هيتجوز مدونة بس اشرطى عليه انك لازم متبطليش تدوين مش عوزين المرءة المصرية ينقصوا وحدة
سلامى لمصر ولأهل مصر
أخوكى الشاعر بالغربة

كراكيب عادل said...

انا نزلت جري علشان احط التعليق الاول


اقف في الطابور


وبعدين اقرا

Ahmad El-Saeed said...

يــــــــــا رب يا برايد ربنا يقدملك اللى فيه الخيييــــــر

أنا مش فاهم هيا الرجالة إتعمت و لا إيه ؟؟!؟ - يا بنتى إنتى ثروة

على فكرة بالمناسبة انا أخويا و أختى وقعوا على مدونتك بالصدفة و قالولى البنت دى دمها شربات ... و قالولى أحييكى بالنيابة عنهم

يا رب يا برايد نسمع عنك أخبار حلوة قريب

أحمد السعيد

Noony said...

السلام عليكم ورحمة الله وبركاته

إن شاء الله يكون مناسب وأحسن من اللي قبله..ادينا شوية أمل إن في ناس كويسة في الدنيا مش كلهم كدة وكلاهم البارومة...الحياة لسة حلوة ولونها بمبي بورد أحمر
:)
في انتظار بقية التفاصيل السعيدة بإذن الله

سلام
نووني

Unknown said...

عايزين نفرح

يارب تتجوزى وساعتها تتكتبى يوميات مخطوبة
http://elsawaf00.maktoobblog.com/?all=1

emos said...

مبروك يا برايد لولولولوللللللللللللى ان شاء الله خير ربنا يوفقك يا رب انا كنت هقول لك تقرى القصة بتاعتى عشان كتبتهالك بالعربى بس بلاش دلوقتى لحسن تتعقدى

Eric Matt said...


ربنا يتمم على خير يا برايد

انا عندي فكرة خبيثة كده بتقول انك لو بطلتي شوية الاسلوب المستفز ده هاهاهاها لا والله دمك زي العسل يعني لو خفيتي بس شوية على العرسان يمكن يتعدلو صحيح منهم عاهات كتير بس ربنا يستر

ربنا يرزقك و يرزقني يا رب

سلاااااااام

الكلام نوعان :كلام فارغ وكلام مليان كلام فارغ said...

يااااااارب يطلع عريس حلو روش طحن زي عمو ديسكو ده
ياااااااارب يطلع جنتل ومايطلعش عينك
عايزين نجوزك ونخلص

الكلام نوعان :كلام فارغ وكلام مليان كلام فارغ said...

اه صحيح نسيت لافرحه نسيتنى
مدونتك اكتر من رائعه ولو حصل نصيب ابقى شوفيلي عريس معاكي

زحل الفلكي said...

يابنتي تلقيهم بيندهولها علشان فيه لعبة بلاي ستيشن جديده اهو يركبوا دراع ثالث وتلعب معاهم واللا حاجه

عريس ايه وبتاع ايه

واللا ممكن يكونوا جابوا اسطوانه عرسان يفرجوها عليهم

ممكن برضه

washwasha said...

ربنا يتمم بخير
انا في مرحلة الانتظار دي بقعد ارسم في نظري شكله وملامحه و طبيعة شخصيته على حسب ما بسمع ظروفه قبل ما اشوفه و بعدين لما بأقابله بخلي اخويا الصغير يصوره من بعيد لاني طبعا مش حتأمله و هو قاعد عشان بعد ما يمشي اختبر قوتي على التخمين او تقدري تقولي كدة بدل الملل و الاكتئاب بقلب الموضوع للعبة ظريفة زي لعبة عروستي كدةاصلي كنت بحب اتفرج على ماما سامية زمان
ايه رايك في الفكرة دي
البوست الجاي عايزين صورة :-)
washwasha@google.com

نوري said...

حراااااام عليكي ياشيخه
انا خلاص كنت استعديت
اني اعرف مواصفاته
وبعدين يابنتي عمو دسكو الابيض
ينفع في اليوم الاسود
يعني ياما خدتي منه بكسات ولكمات
بس هيبقي سبب سعدك انشاء الله
مستنيه البوست الجاي ع احر
من الفرخه المشويه الي قاعده
تحت الشمس الحاميه

Anonymous said...

اهدوا يا جماعة شوية

انتوا مش ملاحظين إنها القصة اللي بتحكيها برايد بصيغة الماضي؟

معناها إنها اتفركشت

و بعدين أنا مكنتش مستريح لعمنا ديسكو ده من الأول
أصل الشخصية لما بتدخل في قصة معروف مسبقا نهايتها بتبقى أكيد هتساهم في تعزيز فكرة فشل الجوازة

اعذروني يا جماعة أصل النهاردة لسه واخدين حصة نقد أدبي

و بقولك مسبقا يا برايد إنشالله يجيلك الأحسن منه يا رب

هههههههههههه

و الشربات و كوفرتينا على حسابي
بس همتك معانا شوية

تحياتي

Unknown said...

انت قلتي بنفسك انه راجل محترم, وبيلعب بلاي ستيشان كمان , يبقي ان شاء الله المره دي خير, وتغيري اسم البلوج ويبقي اتجوزت خلاص ((:

سكينة said...

عيب يا برايد أما تتصنتي!!ثم متسعجلة على إيه مصيرك تعرفي المتسخبي انا لو منك أشغل شوية أغاني من اللي القديمة واسرح بخيالي عشان تكوني مستعدة نفسيا على الأقل لما يأتي به عم ديسكو
بقى انت متخيلة ديسكو اللي شوية يتخانق وينهي الحكاية بالبوس هيجيب حاجة عدلة؟ أستبعد غالبا هيكون حاجة كده مش ثابته زي الديسكو ومع ذلك اسمعي الأغنيتين وعيشي لحظتين حلويين أصل ساعة الحظ ما تتعوضش
:)

تخاريف خاصه! said...

ماشاء الله...
عجبانى اوى طريقتك ف العرض..........
وربنا يقدملك الخير يا برايد...ونبقى كلنا براايدز...
:)

الأرمـوطــي said...

دمك خفيف قوى وطريقتك جميلة فى الكتابة من زمان مستمتعتش كدة بحاجة قراتها

hebaz said...

الى تخافى منة ميجيش أحسن منه
خير إن شاء الله يا برايد

Anima said...

يا خررررررررررراشي ( هما مش بيقولوا كده عندكم في مصر؟) برايد حاتتجوز و حاتسيبني

يا رب يكون عريس كويس علشان أنا كما أحوال العرسان اللي بيتقدموا لي تكون كويسة

ما تتأخريش مستنياكي و لو إتأخرت أكثر من يومين حاحذفك بالشبشب

M0naliza said...

والله عندم حق يا برايد لازم يجيلك اكتئاب من سيره العرسان
لكن استحملى ان شاء الله المره دى تكون مختلفه
ان شاء الله اونكل ديسكو يكون وشه حلو

عبدالله said...

وكالعاده بوست شقي خالص كله كلمات سريعه و شقيه و كلها عكرته
:)

في انتظار السادس

تحياتي

kaed said...

ربنل يوفقك يا برايد و تتنيلى قصدى تتجوزى
المهم يا ترى بعد ما يحصل المراد وتخشى بيت العدل هتكليمى برضة عن الجواز و سيرتة

Motazaweg said...


هممممم..
(لصوت ده معناه إنى لبست النضارة الكعب كوباية وعملت فيها المحلل النفسى.. بابقى وحش قوى لما أعمل كدا لعلمك)


فيه تطور حصل في أسلوب كتابتك فى البوست ده يا برايد..
ابتديتي تركزي أكتر على توضيح إنفعالاتك الشخصية أو إحساساتك داخل الموقف نفسة..

ده وإن كان نمو وزيادة في المستوى بمثابة التطور الطبيعي للحاجة الساقعة عن بوستك الأول.. إلا إنه مؤشر خطير على تزايد شعورك بالوحدة والإغتراب.. فابتديتي تركزي أكتر على تفريغ اللى جواكي.. وده ظهر على كتاباتك في زيادة المساحة اللى بتشرح إحساسك داخل الموقف


ده طبعاً التحليل الخنفشاري لعظمة معالينا المتواضع واللى هوه كفيل بإنه يسقط فرويد ذات نفسه.. فمتاخديش على كلامى قوى

المهم اللى عايز أقولهولك في بداية الألفية التالتة.. أوعى تفتكري إن الشعور بالإغتراب هاينتهي بالجواز.. أو إنك بعدها هاتحسي إنك مش وحيدة.. ده خطأ شائع
دا العملية يا بنت الناس هاتزيد.. والجنان واللسعان هايكتر.. والهطل هايتساقط بغزارة

فاعقلى يا برايد وبلاش تهور وإقدام على أكبر خطوة هاتندمى عليها فى حياتك وتبقى زيك زى غيرك.. وإلا وقتها هاتعملى بلوج اسمه عايزه إتطلق.. صدقينى أنا عامل عليكي ومش عايزك تغلطى غلطتي وغلطة كل متزوج


باسجل متابعة بشغف للعريس السادس وإنتظار لبقية البوست.. حكم أنا حشرى قوى والتصنت ده باعشقه عشق الجعان للكباب

fanty said...

شفتي يا رانيا، أهو متزوج طلع رأيو من رأيي وانا مطلعتش غلطان لما قلتلك ان الجواز ده مشروع فاشل جدا... يبقي لازم تسمعي الكلام و تعيشي أول تلات تشهر زي ما قولتلك عشان موضوع كام عيل تربيهم او يربوكي مش جايب همو و صدق اللي قال ان الجواز دة عامل لامؤاخذه زي برميل الخرة اللي علي وشة عسل، وانتي و حظك حتفتحي البرميل من انهي ناحية، يا اما تفتحي البرميل من ناحية العسل اللي هما اول كام شهر فالجواز و بعد ما العسل اللي عالوش يخلص حتخوشي في مرحلة الخرة يا أما لو فتحتي من الناحية التانية حتبقي بعونك يا رب مخرية من الاول للآخر ولا عزاء ساعتها لطالبات الزواج

ROMANTIC ROSE said...

يا مسهل الحال يا رب .. مستنيه الاخبار علي ناااااااااااااار !!!

بيييييكو said...

بقوليك ايه يا برايد
سبيكي من طانط حشريه وعمك ديسكو ده
انا بقي جايبلك عريسان ايه ... لقطه
ميه ميه يعني
بس انتي نقي

انتي بس اول ما ابوكي يدحرج العريس الاخير ده من علي السلم
هو وديسكو العجيب

هاتيهم و تعالي مستشفي ..... ......


الدكاتره الصغيرين هناك ايه
بيدوروا علي عرايس
دمهم خفيف زيك

بس قولي انك برايد هتلاقي الدنيا اتقلبت و شرحوا بعض عشانك

دانتي يا بنتي كلهم هايتجننوا عليكي

وابقي اعزميني علي الفرح

شيماء الجيزى said...

والله يا برايد يارب يكون فيه الخير
ويعجبك يارب وعمو ديسكو ده يكون راجل امور كده وحلو

وهيكون عريس كويس بإذن الله
وابقى احكى بقى
ومتقطعيش الجوابات فى المدونه ها

Nouran said...

يعني هو الموضوع لسه قائم ولا فركش
ف الحالتين ربنا يوفقك يا برايد ونفرحلك ع خير بس ف الفرح اعزمينا كلنا ماشي :)

Anonymous said...

:D:D:D:D...begad ya bride mwade3ek 3latol amela we esobk 7elw awyyyyyyyyyyyy :D....ana mabttltsh de7k....m3lesh ana mtb3ek men zman bs makntsh ba3t bs now ana mdwen zameel ya3nii :D...w ya rb t2blony m3akooo

الكلام نوعان :كلام فارغ وكلام مليان كلام فارغ said...

عايزه اقولك انى من كتر ماحبيت خفه دمك واسلوبك اللى زي العسل ده في البوست الجديد خليتيني اقرا كل البوستات من اول شهر اغسطس لحد اخر بوسن وضحكت كتيييييير
على فكره ماعندهاش حق طنط حشريه انها تبليكي بكل اللى بليتك بيهم
ده ياريتنى ولحد كنت خطبتك على طوووووووووووول
يلا بقى قوليلنا ايه اللى حصل مع عمو ديسكو وبابا عشان عايزين نفرح بيكييييييييي

wanna b a bride said...

blank-socrate

يسمع من بقك ربنا

-----------------------
dibo

حااااااااااااااضر

هاجيب المصيبة و جاية في السكة على طول
----------------------
shermen

بذمتك بتعرفي تزغرطي

تصدقي أنا حالفة ماتجوز لغاية دلوقت عشان مافيش ولا واحدة من ولا واحدة من صاحباتي بتعرف تزغرط

انقذتيني
------------------------
shower-mirror

أنا برضه وش يوسف معاطي

الله يسامحك

ادعيلي كده ربنا يكرمني
و مدحت؟؟؟

هي وصلت للدرجة دي

لا متهيألي لسه فيه شوية رجالة في البلد

والا كلهم راحوا دبي؟؟؟
---------------------
فلة

طنط حشرية .منها لله
جابتلي عقدة م الصنف كله

--------------------
سمسم

ي سيدي ربنا يرزقنا بواحد من المجانين اللي بتقول عليهم دول

بالنسبة للتدوين

لا يا بابا لاااااا

كله الا ده

ده شرطي الأول انت ماتعرفنيش

انت ماشفتنيش يوم ماكنت بافرفر و اطلع في الروح كان قلبي ع المدونة إزاي

-----------------------
كراكيب

مالحقتش أول الطابور

المرة الجاية هاحجزلك

--------------------
ahmed el-saeed

سلامي الحار لأخوك و أختك
و معلش أنا لغيت تعليقات الأنونيموس عشان فيه ناس كانت بتقل ذوقها
فعلى الأقل أعرف مين اللي بيتكلم عشان أعرف أرد عليه

الرجالة عميوا آآآه

انشاء الله ربنا ينفخ في صورتهم و يفتحوا
------------------------
noony

الحياة لونها بمبي؟؟؟

أشك ..بس مش عايزة أقدم الشر

ربنا يسهلنا جميعا

---------------------
loose in love

يااااااااااااااااااااااااااارب
---------------------
emos

قصتك يا إيموس قريتها

ربنا معاكي يا بنتي
فعلا حاجة تعقد

بس اطمني الخير جاي انشاء الله

wanna b a bride said...

the groom

طب بذمتك في كل قصصي أنا قلت لحد أي حاجة

ده كل ده و لسه حتى ماكلمتهمش

حرام عليك و الله انت ظالمني

ربنا يرزقنا جميعا يا سيدي

------------------------
الكلام نوعان

آه و الله أنا كمان عايزة أخلص

و عينيا ليكي انضمي الى القائمة البريدية لعرسان برايد

اول ماتجوز كلكوا هتكروا ورايا انشاء الله
-----------------------
زحل الفلكي

تفتكر؟؟
بس انا عارفة كل اسطوانات البلاي ستيشان و عارفة ان ماما مالهاش فيها

طب أروح أشوف و ارجع أقولك
--------------------
bestic

و الله انتي روحك حلوة و مخك كمان

و بتخلي اخوكي يصورة من غير ماياخد باله

اخوكي ده شغال في المخابرات و الا حاجة

انا خلاص بطلت أتوقع أي حاجة عشان النتيجة دايما بتبقى
هباب
--------------------
نوري و نوري للكل

المواصفات جاية

مستعجلين على إيه

هي الفراخ المشوية دلوقتي بتاخد حمامات شمس؟؟
صحيح يت ولاد الدنيا بتتقدم
---------------------
محمد فوزي آل ربيع

ايه ده ايه ده؟

انت هتبوظ الساسبينس بتاعي والا ايه؟

بلاش تذاكر نقد من ده كتير

الشرباتو الكوفرتينا

يا رااجل

يعني يوم ياتبعتلي من دبي تبعتلي كوفرتينا؟؟؟؟؟

طب خليها جلاكسي والا كادبوري

انت من دمياط والا حاجة؟
----------------------
esraa

يا رب

ادعيلي بس كده يا اسراء

و انا اعملكوا 5 بلوجات مع بعض
أنا يعني ورايا حاجة
--------------------
سكينة

و الله انا برضه نفسي أشغل أغاني و أسرح

بس شريط شفيقة ضاع مني و مش لاقيه نسخ في السوق

لو تعرفي حد في بلاد بره يبعتهولي يبقالك الحلاوة

----------------------
تخاريف

أخجلتم تواضعنا

يا رب الكل يبقوا برايدز انشاء الله
--------------------
الأرموطي

الله يخليك يا فندم

ابقى تعالى على طول
و سلامي الخاص لمرعي بتاع الكليمة

khaled said...


ايه ده هى تنت حشرية لسة عايشة؟
مبروك اونكل ديسكو راجل تيب
ربنا يطمم بخيييييييييييير
:)

Esmeralda said...

ربنا يهدى كده و ميكونش جاى علشان موضوع تانى, و النبى بلاش التشاؤم بتاعك ده المواضيع مش ناقصة, عايزة اقولك على حاجة مش وقتها خالص بس حاقولها , ايام الكليه كان ليا صاحبتين قريبين منى اوى , الاتنين قالوا اقتراح, وقتها شفتوه اهبل,وقتها طبعا و اتريقت عليهم ويا ريتنى يااختى كنت تبت فيه, المهم قالوا اللى تتجوز الاول تحاول تشوف عرسان لصحباتها من صحاب جوزها, اظاهر اجوازهم مالهومش صحاب

Esmeralda said...

ربنا يهدى كده و ميكونش جاى علشان موضوع تانى, و النبى بلاش التشاؤم بتاعك ده المواضيع مش ناقصة, عايزة اقولك على حاجة مش وقتها خالص بس حاقولها , ايام الكليه كان ليا صاحبتين قريبين منى اوى , الاتنين قالوا اقتراح, وقتها شفتوه اهبل,وقتها طبعا و اتريقت عليهم ويا ريتنى يااختى كنت تبت فيه, المهم قالوا اللى تتجوز الاول تحاول تشوف عرسان لصحباتها من صحاب جوزها, اظاهر اجوازهم مالهومش صحاب

Unknown said...

انا ممكن اسمح لنفسي واتجوزك

Eric Matt said...



أنا أظلمك؟ أنا معرفشي أظلم غير نفسي دانا غلباااااااااااااااان

امين يا رب

Motazaweg said...


ايه اللى بيحصل ده؟
ايه اللى أنا شايفة ده؟
أكرم رأيه من رأيي؟
إيه البواخة دي؟
..إذن
لف وارجع تاني
لف وارجع تاني

__________
* منقول (بتصرف) عن علاء وليّ الدين في فيلم الناظر *

بيييييكو said...

برايد قبل ماتكملي القصه

يا ريت تقوليلنا

ايه مواصفات فارس البلوج اللي هاييجي
ان شاء الله قريب

و ياخدك علي حصانه الابيض لحد البلوج السعيد

و تيجي طنط حشريه و عم ديسكوا يزروكوا هناك

و يروح الفارس الابيض مديهم بالجزمه و يدحرجهم من علي الزلم

بس يا ريت ما تكون مواصفات مش مستحيلات

بس خلاص

fanty said...

ايه يا عم متزوج، متخودش الموضوع علي شرفك اوي كدة

reham said...

يا رب يا موجود تجعله اخر العنقود

Esmeralda said...

انا عندى سؤال مش عرفة لو حد ساله قبل كده و لا لأ, انت ان شاء الله كده
يعنى باذن الله بدون مقاطعة لما تتجوزى ( بلاش تتخطبى مفيش داعى للتاخير )
حاتقولى لجوزك على البلوج داه؟
و لو الاجابة اه حيشوف البلاوى الزرقا ديه !!!

yousef said...

ربنا يستر يا برايد لحسن يطلع اونكل ديسكو هو اللى عايز يتقدملك

a3trafat lylyah said...

تعرفى يابرايد

الحقيقة والواقع مؤلم وانا بجد متعاطفة معاكى جدا لانى فى نفس حالتك تقريبا بس انا لغاية دلوقتى صابرة ورافضة الصالونات بسببك وبسبب حكاويكى عنه
وعلى فكرة انا جربت جواز الصالونات حوالى 10 مرات بس كنت العريس ماكنتش العروسة وده كمان عمل لى عقدة
انا مش عارفة ليه الرجالة مابقتش تحب زى الاول
تحسى انهم عايزين البنات هما الى يجروا وراهم

fanty said...

أحب أضيف تعليق للأخت بتاعت اعترافات ليله ولا مش عارف أيه، و ايه المشكلة لما البنات هي اللي تجري ورا الولاد عشان الجواز، ما هو الولد ده حيدفع دم قلبه عشان خاطر سيادتك و في الآخر مش حينوبه غير العكننه، ده غير فلانه صحبتي جابت صالون جديد في بيتها و أنا عاوزة أجيب زيه، بنت عمتي عملت حفلة عيد ميلاد بنتها و أنا برضه عاوزه اعمل عيد ميلاد بنتي في نفس المكان، جارتي اللي متربية معايا جوزها جاب شاليه مش عارف فين و احنا كمان عاوزين نجيب في نفس المكان عشان البت دي طول عمرها حسه انها احسن مني و لازم نسبتلها هي و جوزها ان احنا مش أقل منهم، الغريب ان اغلب البنات بيقولوا ان البنت زي الولد و لازم يكون عندها نفس الحقوق و مفيش تفرقة، بس ساعت الخروجات بيعرفوا ان في فرق و ان الراجل لازم هو اللي يدفع و ساعت الشوبنج برضه انت الراجل و عيب لازم تشيل الحاجة ولا انت عاوزني انا اللي اشيل انشاء الله، وبعدين زي ما المثل بيقول عشان خاطرالورد ينسقي العوليء و مدام زي ما برايد بتقول ان العرسان الكويسين بقم قلة قليلة يبقي انا شايف ان البنت تستاهل انها تجري وراه لأن كمان مش طبيعي ان الولد الكويس الجاهز يبقي عارف ان في أزمة جواز و شايف الستات عماله تعرض في بناتها عليه و بعد كده يرجع يجري ورا واحدة فيهم و أخيرا أحب أقول ان العبارة الشهيرة بتقول كييف الخ.ة يشتريلوا معلقة، انتوا مش عاوزين تتجوزا، شيلوا بقي، حتقولوا اني متحامل علي البنات؟؟ حئول اه و اكيد كمان، أصل ربنا خلق حواء من آدم مش العكس و الجزء عمره ما كان اشمل و أحسن من الكل....

بيتنا القديم said...

عريس يا بوي

طوخو بس متجتلوش

ربنا يهديك يابرايد

إتجوزيه وهنجبلك كونتر روج

shabfa2re said...

رحتى فيييييييين كل ده؟

wael elgazawey said...

يا برايد انتى مبتحكيش غير عن تجاربك مع العرسان.. لانك عايزة تتجوزي ربنا يكرمك عن قريب بعريس يجمع كل مقومات الشجاعة والنبل والدين والاخلاق ووسامة عمرو موسى مع عمر الشريف مع اخلاق الصحابة رضى الله عنهم
لكن انك تحصري حياتك بالشكل دة في موضوع واحد لا يجوز.. فيجب أن لا تبحثي عن الحب.. لانه مثل المرض يأتي كالمرض فجأة دون سابق معرفة أو انذار

RealMan said...

مممممممم
ماذا يقال بعد كل ماقيل في هذا المقال الجميل.
بالنسبه لموضوع طنط حشريه واونكل ديسكو ليهم عندي حل بسيط لكي يكفوا ايديهم عن خلق الله . اطلعي انتي انصح منهم هما الاتنين وعرفيهم علي بعض وانتي عارفه الباقي بقي والطيور علي اشكالها تقع وبكده يبقي اخدتي بحقك كله

الملاح التائه said...

ربنا ينولك مرادك
ويجعل قدم أونكل ديسكو عليكي
زي قدم أبو تريكه على الأهلي
وعلى فكره
رقم سته ده رقم حظ كبير
وان شاء الله هايبقى حظك عنب
تحياتشي

Shower-Mirror said...

هو العريس لسه ما خرجش من الجمرك و الا ايه ؟؟؟؟

قلب أبيــض said...

انا مكنتش مصدق لما كنت ببحث على الجوجل ولقيت ان اسم مدونتك (عاوزة اتجوز ) وانا عامل مدونة جديدة عنوانها ( عاوز اتجوز ) ربنا معانا ويسترها معانا

كلبوزة لكن سمباتيك said...

حلو قوي الساسبنس ده
دسوقي بقى ديسكو
انت عكروتة صحيح
الاخ مراية مطلع عليكي اوشاعا انك راجل و لابس بروكة و احنا علشان نكبسة حنقلعك البروكة و نثبتله انت ست قلتي اية؟

emos said...

اية يا برايد فى اية كل دة بتتصنتى هو الراجل هيبات عندوكو ولا اية؟
اوعى تكونى نمتى و انت بتتصنتى ولا حاجة مش هنعرف حاجة كدة
خدى عم ديسكو على جنب و هو خارج و اديلو نص جنية و هو هيقر و يعترف بكل حاجة

كراكيب عادل said...

فينك هو العريس حصلة اية

تعالي اتفرجي علي صور ولوحات لغاية اما يجي بئي

مسرح الغلابا said...

مسرح الغلابا كله بيسلم عليكي و بنقولك ... عاوزين نتجوزززززز


درويش


مفيش

KitTyy said...

غالباً كدا والله اعلم برايد انتحرت لأسباب غير معروفة لينا..
ماهو مش معقول بقالك 10 ايام بتتصنتى على القعدة يعنى ؟ أكيد ياحرام قفشوكى على الباب وجوزوكى الراجل اللى جايبهولك عمك ديسكو وانتى مغمضة العين مسدودة الأنف والأذن والحنجرة..
ياحبيبتى يااوختشى . ماكانش يومك واللهى ..
مش كنتى عاوزة تتجوزى ياختى.. اشربى بقى .. ههههههههه

3aziz 3eni said...

انت متاكدة من حاج ديسكو ده؟
انا اعتقد ان الموضوع مش مريح...لكن خلينا ورا الكداب وربنا يفكها

بس انا خايف لا يطلع طمعان فيك لنفسه

تصدقى هتبقى مسخرة
هههههههههههههههااااهههاااههههههههههههههاهههههههيهيهيههيهيهيهيههيهيهييييييي

Anonymous said...

ازيك يا برايد
أولاً تحياتي و سلاماتي ليكي و لكل الموجودين ....و
ثانياً : أنا عمال اقرا التعليقات الظريفة اللي بتتكتب هنا و ساكت، لكن خلاص بقة طفح الكيل و غرق الشوارع كلها.
يعني إنت نازلة تريقة عالرجالة و قلنا زي بعضه أدينا بنضحك و بننبسط
لكن كل واحدة تكتب تعليق هتستلمنا كمان .. لا بقه .. بصراحة أنا فيه كلمتين محشورين في زوري و طلبت معايا إني أقولهم
البنات اللي بيقولوا إن سوق الرجالة بقه تعبان و عامل زي سوق الخردة أحب أقولهم إن الحال من بعضه و إن سوق الحريم بقه معظمه يا إما بضاعة مضروبة أو مستعمله و إن بنات كتير جداً مخهم فاضي و مش حمل مسئولية الجواز.
معلش يا جماعة عالكلام البايخ ده بس اللي شايف غير كده يقول
ملحوظة: تستثنى برايد من هذه القاعدة (ياريت كل البنات زيك يا برايد)
و شكراً

Anonymous said...

انا بجد معجب بطريقتك وبصراحه دمك زي العسل
بس انا عايز اقولك اللي بتقابليهم دول مش ينفعوا يكونوا عرسان دول اصلا ماينفعش نقعد جنبهم في المواصلات
يمكن يكون حظك سيء او ممكن تكوني وحشه علشان كده مش بيجيلك غير تحف
بس من الاخر زي مانتي بتشوفي تحف اهو تحفه لنفسه لكن احنا كاولاد بنشوف بلااااااااااااااووووووويييييي فهماني طبعا

Tamer Nabil Moussa said...

بوست رائع

بس ياترى اية سر ان كل عريس يجى الاول تخافى منة قبل ما تشوفية

وبعدها يطلع عاهة
دة من رايك انتى


فى مثل بيقول على قد .... مد رجليك

يعنى مش معقول كل العرسان اللى بتيجى العيب فيهم وانتى ملاك

اكيد فيكى حاجة غلط او عندك عقدة من الموضوع دة

لان اسم المدونة عايزة اتجوز وانتى بتعرضى ليما وكان الرجالة كلها تعبانة وعاهة وانت اللى ست البنات وقاعدة على العرش وبتختارى على راحتك

قبل البحث عن عيوب العريس عدلى عيوبك انتى اولاا

دة راى من غير زعل

تحياتى

LAMIA MAHMOUD said...

لالا .. خير باذن الله ما تقلقيش

vision said...

ربنا يجعل فى وشو الأوبوووووو القبووووول يعنى

الأباصيرى said...

تسمعى نصيحتى


أول لما يتقدملك العريس دة
أسألية عن أحدث أنواع البلاستييشن والفيديو جيم
لو عرف يجاوب يبقى عندة معلومات ثقافية عالية واتكلى على الله وربنا يوفقكم
:)

مستى أعرف الأخبار الجديدة
متنسيش تقوليلة يجيب الأسطوانات بتاعتة معاة

meroooo said...

انا كمان زيك يابرايد
جايلي عريس يوم التلات الجاي وخلاص كرهت نفسي من الوضوع ده
مع اني عندي 21 سنه بس
بس امي وابويهمحسسني اني عديت وبقيت عانس ومش عارفه اعمل ايه وربنا يستر وانا هبقي اقولك حصلي ايه برضه

elkamhawi said...

هة

reri said...

ههههههههههه...طريقتك في السرد جامده موووووووووووووت...ربنا يوفقك وتلاقي العريس اللي ما يكونش عاههه...أنا والله بعاني من العاهات زيك بالظبط...ربنا يرزقني معاكي

سلاااااااااااام

Anonymous said...

ها يا عكروتة؟
إيه اللي حصل؟ :)

wanna b a bride said...

hebaz

خير خير صحييييييييييييح
---------------------

anima

أيييييييييييييييي
كده؟؟
أهو الشبشب جه في عيني
--------------------
واحدة عادية

استحملنا كتير

مش آن الأوان تتفك بأه؟؟

كله على الله
------------------
عبدالله

عكرته عكرته..بس نعيش

------------------
kaed

أتنيل أتنيل

حد لاقي نيلة دلوقت
------------------
motazaweg

شكرا يا باشا ع التحليل النفسي

اللي هيخليني أشرب سم فران و أولع في نفسي و أرمي نفسي من الدور الإتنين و العشرين

مش هاتجوز حاضر

خليني كده قاعدة على قلبكم
--------------------
akram

إذا كان ولابد تندهني باسم

قوللي يا غادة

إسمي ..هاستعر منه يعني؟

شكرا على النصايح الغالية

و التعابير العاطفية

و الأسلوب الرومانسي

ربنا يخليكوا ليا و تضلموها في وشي كمان و كمان
-------------
romantic rose

دعواتك معانا
--------------
بييكو

الدكاترة الصغيرين دول ماعادوش ينفعوا خلاص

اديني في التلاتينات

لو لسه فيه
---------------
شيماء الجيزي

ياااااااااااااااااااااارب
---------------
nouran

كله هيبان

ماتستعجليش

و انتي أول واحدة معزومة في الفرح

ماتخافيش
-----------------
erte3ashat

يا أهلا بيك في مجتمع المدونين

إنت من الأحرار يا علي
----------------
الكلام نوعان

إبقي تعالي على طول و إضحكي

ماهو هم يبكي و هم يضحك

مستنياكي

wanna b a bride said...

khaled

ربنا يديها الصحة و تولة العمر

إّذا كانت مش نافعة معايا
بقية بنات البلد عايزينها
----------------------
azmiralda

بصي يا بنتي خديها مني كلمة

كل البنات بعد الجواز عايشين بمبدأ

عيش ندل تموت مستور

فكبري دماغك عليهم و خليكي مع الله
-------------------------
hany

دا إيه الكرم ده؟
------------------------
the groom

شكلك غلبان فعلا

إمسحها فيا المرة دي
------------------------
بيييكو

و الله أنا زمان كان ليا مواصفات كتير

شكل و منظر و عيلة و حاجات من دي

دلوقتي أنا بس عايزة حد يتقى الله

بس خلاص
--------------------------
reham

آآآآآآآآآآآآآآميييييييييييين
-------------------
azmiralda

يتهيألي واضح من البلوج ده أهم صفة من صفاتي

و هي إني فضحية مووووووووووت

و مابيتبلش في بقي فولة
:)))
--------------------------
yousef

تفتكرررر؟

طب و طنط علوية يعمل فيها إييييييييه؟
--------------------------
a3terafat lylyah


وعلى فكرة انا جربت جواز الصالونات حوالى 10 مرات بس كنت العريس ماكنتش العروسة"

عروستي؟؟؟؟؟؟؟؟؟؟
---------------------------
سمسم

هاتجوزه حاضر..و تجيبلي إيه؟

و الله تجيب اللي تجيبه ..كلك ذوق برضه

---------------------------
shabfa2re

كان عندي ظرف طارئ..سوري
--------------------------
wael elgazawey

أنا حياتي مش منحصرة في الجانب ده

البلوج هو اللي منحصر
--------------------------
realman

آآآآآآآآآآآآآآه

طب و طنط علوية مرات عمو ديسكو

و عمو شرقاوي جوز طنط شكرية

نوديهم فييييييييين؟؟
------------------------
الملاح التائه

الله يخليك يا ذوق

و النعمة بقين حلوين قوي

-----------------------
shower-mirror

في التشحيم

-------------------
كاستر

ربنا يسترها مع الجميع

بس جوجل ده ابن حلال و الله

شوف بيجمع الناس إزاي؟
------------------
sampateek

مين الأخ مراية ده

قوليلي يروحوله منين

ثواني بس أروح ألبس البروكة و احصلك ع التاكس
-------------------
emos

معلش أصل صوتهم واطي قوي
-------------------
كراكيب عادل

فنان و الله فنان
-------------------
مسرح الغلابة

مفيش

فعلا مفيش


----------------
sosa

حاضر

انشاء الله
----------------
kittyy

يا جماعة دخلت في غيبوبة بسيطة كده

و بعدين فقدت الذاكرة
و بعدين خبطت في عمود
ففقت و رجعت أهه
-------------------

wanna b a bride said...

sokomonoce

لا لا لا من فضلك

إلا عمو ديسكو

دا راجل محترم و حريف بلاي ستيشان

مش أي كلام يعني
---------------------------
sameh

دفاعا عن كل بنات جيلي

أقولك

كلامك ميه ميه

إعمل بأه بلوج و طلع كل اللي في قلبك

إحنا في بلد ديمقراطي

والا إيييييييييييه؟
---------------------------
spyfun

او ممكن تكوني وحشه علشان كده مش بيجيلك غير تحف "

الله يكرمك يا عم الحاج

هما دول الكلمتين اللي قدرك عليهم ربنا؟؟؟

تشكر

------------------------
tamer

اكيد فيكى حاجة غلط او عندك عقدة من الموضوع دة

كبااااااااااتن

هو كله ضرب ضرب

ماشي يا عمنا

تشكر إنت كمان
--------------------------
lamia mahmoud

الله يطشمنك يا أوختشي

------------------------
camera girl

ميرسي يا قما

يا قمر يعني
-----------------------
الأباصيري

طب الأول إديني إنت كورس في البلاي ستيشان ده

انا ما اعرفش ألعب

أعرف أسلك بس
-----------------------
meroooo

21

يااااااااااااااااااه

لسه بدررررررررري

لسه قدامك كام سنة

ماتقلقيش

ربنا يستر إنشاء الله
------------------------
أحمدسعيد

بالتوفيق إنشاء الله

----------------------
elkamhawi

طيب
----------------------
reri

ربنا معاكي و كعايا

و مع كل الولايا إنشاء الله
----------------------
إرحم دماغك

هاقول يا أبيه

و الله هاقول

البوست الجاي
--------------------

History Of Me!!! said...

بصراحة كنت منكد وزهقان وعندي مشكلة
بس بعد ما قراة الزوج السادس ضحكت كتير
بدي اسمع باقي القصة
في الانتظار
واقبلي بي زائر دائم باذن الله
سلام

Anonymous said...
This comment has been removed by a blog administrator.
انا اللى بالامر المحال اغتوى said...

hi bride
de awl mara ashof ur blog
bs bgad lazez moot
w isa uncle disko yegy b 3ares tamam

Unknown said...

يمكن يا برايد ربنا يحل ضيقتك ونحصلك بدعيلك والله يارب يارب يارب ارزقها واحنا معها بقى

Anonymous said...

دا ينطبق عليه المثل: خدى بتاع فول نابت ولا تاخديش ظابط

Ahmed taher said...

عزيزتي برايد .. الزواج ليس غاية مالم يكن دستورا سماويا و رباط مقدس
فلا تخافي فالطيبون للطيبات..
تعجبني موهبتك النقدية وان كنت لا اعرف ان كانت شخصية صريحة مثلا يمكن ان يتزوجها رجل مصري ام لا .. ارجو ان تفهميني لا اقصد الاساءة

ولاكن قد يعجبنا انسان في عملة وقد يكون عملة سبب فشله انسانيا

دعائي لك بصلاح الحال اينما كان ...

ta5areef said...

ايه يا برايد
انتى مسحتى التعليق بتاعى ولا ايه
هه؟؟

Anonymous said...

انتى رغاية قوى على فكرة وعايز عريس
دا انتى عايز اتوبيس
هههههههههههههههه
دا امة دعية علية

على شان انتى لوك لوك

ههههههههههه
يالة باى
والله يسهلك ياخالة

Anonymous said...

السلام عليكم :
اولا اسلوبك فى الكتابه ممتع جدا وان كان بالعاميه . بتفكرينى بنفسى لما كنت فى الكليه انا كمان وكنت بحب واحده وكنت بقعد اكتبلها شعر واخدت الاول على الجامعه فى الغزل وبعدين سيبت الغزل بما حمل .
انا كاخ ليكى من غير ما اعرفك انا خايف عليكى من التشجيع اللى انتى شايفاه فى الكتابه يكون اتكونت عندك قناعه ان انتى اساسا مبقتييش عايزه تتجوزى وانك دايما هتخترعى عيوب فى اى واحد يتقدملك على ترفضيه وتعيشى نفس حالة السعاده اللى انتى عايشاها من غير راجل قصدى زوج . عموما ربنا يكرمك ان شاء ءالله بابن الحلال.

نغم said...

ايه الجمال دة كل

انا كنت خير يعنى بدور على اغنيه كريم ابو زيد الجديدة " انا عايز اتجوز " اقوم الاقى البلوج الذيذ دة
برايد يا بنتى لازم اعترفلك واقولك ان الراجله نصهم مات فى حرب 67 والباقى فى 73 يعنى احنا فى الضياع

لا ويعقدونا ويجبولنا مسلسلات زى باب الحاره ولا الراجاله اللى فيها تحسى ان هو اسد وملو هدومه

المهم ربنا يرزقك يا برايد يا بنت حوا وادم بعريس يكون مرجلش وعلى مزاجك
وانا كماااااااااااااااااااااااااااان بقه

شكرا ليكى برايد على البلوج