Saturday, December 02, 2006

الرابــــــــــــــع

أولا أسألكم سؤال...بقيت رخمة أنا و اسئلتي كتير أنا عارفة
سؤالي هو....انتوا بتعملوا فيا كده ليه؟
هتبقوا انتوا و الزمن؟
انا قلت أعمل بلوج و ألاقي ناس تفهمني و تصبرني
يقوم كل شوية حد يطلع يقوللي يا رب ماتتجوزي عشان تفضلي تكتبي..يا رب تفضلي كده على طول عشان نفضل نقرالك

لييييه يا جمااااعه كده؟
ليه عايزين توقفوا حالي..هو جوازي يدايقكوا في ايه؟
اكونش خديجة و مش عايزينها تتجوز جيمي؟

غريبة والله؟

ياللا معلش..يمكن دعوات الناس اللي بتقول يا رب تتجوزي تعادل دعوت اللي بيقولوا يا رب ماتتجوزيش
و حمض+قلوي=ماء+ملح
و ملحه في عين اللي مايصلي ع النبي
....
سؤال كمان بأه...آخر سؤال و حياتكم

افتحوا ورقة الأسئلة و امسكوا الأقلام
اذكر خمس أوجه للتشابه بين طنط شكرية و تنظيم القاعدة

ايه؟
غلب حماركم

أقولكم اللي قدرت اتوصلله من اوجه التشابه دي

أولا:الإتنين سواء اختلفنا معاهم أو اتفقنا(ممكن على فكرة تتفق مع القاعدة بس طنط حشرية مستحيل)أيا كان..الإتنين نتيجة أفعالهم انفجارات و دمار و غالبا بيبقى فيه طرطشة دم كمان

ثانيا:الإتنين ممكن يغطسولهم شهر..اتنين..تلاتة و يمكن سنة و بعدين يطلعولك بقنبلة أكبر من اللي قبلها

ثالثا : انهم الإتنين ساعات يبقى التفسير الوحيد ليهم هو نظرية المؤامرة
القاعدة ساعات يتهيألنا انها من صنع امريكا..و طنط حشرية ساعات يتهيألي انها بتعمل اللي بتعمله ده عشان يمكن زمان كان عينيها من بابا و دلوقتي فرصة تنتقم منه و ترفعله الضغط

رابعا و خامسا : فكروا فيها انتوا بأه انا بصراحة مافيياش مخ
..........

انا بأه كنت قاعده كده فوق المقطم و قدامي كريم متشحتف و عينيه حمره زي الطماطماية من كتر الدموع

أرجوكي يا برايد لازم نتجوز انا مش هاقدر اعيش من غيرك
مش عارفة أقولك ايه يا كريم الموضوع خلاص خرج من ايدي
طب انا مش فاهم ليه باباكي كارهني؟
اعمل ايه بس يا كريم ..حاولت و الله حاولت كتير و مافيش فايده
طب بس خليني أقعد معاه و انا اكيد هاقنعه
تقنعه ازاي بس يا كريم انت عارف بابا ماعندوش تفاهم
طب يعني انا ذنبي ايه انه شافني و انا باحضن منة و هي لابسه القميص الأحمر؟
هو بابا بس اللي شافك دي مصر كلها شافتك
طب أعمل ايه بس؟
هو فيه حل واحد
ايه هو؟
.
.
.
ماتجيبهاش معاك في الفيلم الجاي

فجأه المقطم كله بيتهز ..برايد..يا برايد
أيوة يا كريم أنا معاك اهه
كريم مين ؟..الله يقطع كريم عبد العزيز اللي هيجننك ده
الله ..مين اللي بيهز الجبل؟
جبل ايه يا هانم..قومي انا مامتك ..قومي يا بنت تعالي شوفي طنط حشـ..كرية..جايه عايزاكي في موضوع
قمت بتأثير الصدمة من النوم
بأه يا ربي أجي من المقطم و أسيب كريم عشان طنط حشرية دي؟
بس يا بت بلاش قلة أدب ..قومي البسي يالا و طشي وشك بشوية ماية و تعالي قابليها
يا فتاح يا عليم يا رزاق يا كريم
.......

ازيك يا طنننط
أهلا يا أمورتي..من غير كلام كتير يا برايد..جايبالك حتة عريس
عارفة عارفة ..راجل و رأيه من دماغه و أبوه تكاثر ذاتيا و جابه لوحده
هههههههه..ينيلك يا برايد ..يا بنتي الكلام ده مافيهوش هزار..دا عريس قمممر مافيش في جماله اتنين
بقولك يا طنط انا مابحبش الحلوين دول من يوم الراجل بتاع لجنة السياسات
هشششششش..الله يفضحك..لجنة سياسات ايه يا حبيبتي انت لسه ماصحيتيش والا ايه؟
(دي ماما و هي بتجز على سنانها)
أ..أ..اآآه ..آآه.معلش لسه مافقتش قوي يعني..قوليلي بأه يا طنط عنده كام سنة العريس ده
32
كويس و عايش فين?
في دبي يا حبيبتشي بلد الشوبنج ههه
و هيعيش فين
هناك برده
مااشي و بيشتغل ايه باه؟
هو يا حبيبتي كان معيد في تربية رياضية و من كتر عبقريته طلبوه يدرس في هندسة

نعممممممممممم
ازاي يعني؟
ماما ..هو انا نمت أد ايه؟
هي الدنيا بتتغير كده في ساعة زمن ؟
يا حبيبتي أنا بقولك الكلام اللي قالهولي..انتوا باه لما تقعدوا مع بعض ابقي اسأليه و استفهمي منه عن اللي انتي عايزاةهما هييجوا بكرة الساعة سابعة..هو و أمه..و الله أنا حاسه بتفاؤل المرة دي يا برايد يابنتي
انتي عارفة انا بحبك زي بنتي سوسن بالظبط

الا يا طنط صحيح هو حضرتك ليه مش بتودي العرسان اللي بتجيبيهوملي دول لسوسن بنتك؟

أ..أأ...هاه..أشوفك بكرة الساعة سابعة بأه يا برايد..استنيني

مش بقولكم نظرية المؤامرة شكلها شغالة

و مشت طنط حشرية و انا بغني و ماما بترد عليا

حاسس بمصيبة جايالي
يا لطيف يا لطيف

هذا كان موجزا لأهم الأنباء و التفاصيل في النشرة القادمة

ماتزعلوش قوي كده...مش هتأخر و الله

63 comments:

Anonymous said...

ازيك برايد
اهربى,انفدى بجلدك اوعى
بلاش بتاع دبى ده ,ولو مصرة تتجوزيه انصحك خليه يعمل تحاليل قبل الزواج الاول,طبعا انتى فاهمة ليه
وبالنسبة لطنط حشرية فيه مبيد حشرى كويس قوى نزل السوق

Anonymous said...

مالهم بقى بتوع دبى مانا عايش فى دبى وزى الفل اهو
عموما ابعتى لى اسمة ورقم تليفونة ومقاس الشوز بتاعة وانا واعملك تحريات جامدة قوى عنه ولا السى أى اية
بس بجد يا بختك وسعدك وهناك وتبقى الحاجة داعيالك من قلبها لو جيتى وعشتى فى دبى .... تحضر رقى ادب سلوكيات واهم حاجة حرية (طبعا الحاجات دى بتفكرك بمصر صح )المهم ماطولش عليكى ...... قولى طول يالله مش مشكله
زى ماقولتلك عمدة دبى حبيبى ويتمنى لى اى خدمة
اما بخصوص الواد كريم على فكرة منة معاة فى الفيلم الجديد واسمة محطة مصر (انا بس بهدى النفوس) وبعدين فية اية كريم علشان تحبوة كدة دة حتى واد مقرف كدة هو صحيح وسيم وجان وعريض المنكبين بس البنات بتوع مصر دول هبل دايما يغشهم الشكل الخارجى يابنتى دورى على المضمون اى الجوهر يعنى وبعدين هل انتى عندك استعداد تدخلى منافسة مع منة شلبى اهى هى دى البنات ولا بلاش (بس بردة ماتعجبنيش لان مش كريم بس الى حضنها دى مصر كلها )
يارب تتجوزى ياستى وتكتبى بوستات عن مشاكل الزواج ( اى خدمة علشان المرة الى فاتت زعلتى علشان قولت مش عايزك تتجوزى علشان تفضلى تكتبى ) مستنى البوست الجاى بتاع العريس

Ahmed Salem said...

مش عارف يا برايد
الموضوع فييييه "ان" كبيرة

بس اساسي لازم تفصصيه اسئلة و تمحصيييه

و بجد لو طلع المرة دي عريس بومبة زي اللي فاتو

يبقى معليش فعلا طنطك حشرية تعملي عليها اكس و تقفلي عليها و على عرسنها و تخليهم ل"سوسن"

و طبعا انا و غيري مستنين لقاء الجبابرة

Anonymous said...

حتى لو ربنا وفق وإتجوزتي .. إوعي تبطلي كتابة في نفس الموضوع حتى لو من خيالك .. أعرف ناس كتير كل يوم يخشوا عالبلوج ده وبيزعلوا إن ما فيش جديد .. رغم إن الجديد ده بيكون بمبة بالنسبة ليكي

ROMANTIC ROSE said...

استني استني .. هي سوسن بنت طنط حشرية "انذر برايد" و امها مش بتوديلها العرسان اللي بتجيبهوملك ؟؟

لآلآلآلآلآلآلآلآلآلا اسمحيلي كده نظرية المؤامرة علي أوجها و ف قمتها .. ربنا يستر

طمنينا بسرعه :)

islamz said...

يا بنتى ايه الغيبه الطويلة دى .. دا انا مليت الشات بوكس رسايل وجوابات ..بس يلا اللى فات مات والجايات اكتر من الرايحات.. والتعلب فات فات وفى ديله تسع لفات .. هههههههه
متخديش فى بالك من اللى اتقال ده .. ده مجرد زوبعة فى فنجان .. اوعى تتاخرى علينا تانى ماسي .. والمرة دى لو اتاخرتى تانى .. هدعى عليكى بعدم الجواز ويتقفل عليكى قطر الجواز بالترباس .. لا تطولى على ولا حتى عباس .. الله يسهلوا يا عم مع عريس دبى ... ربنا يكرمك ويوفقك ... متتأخريش بقي .. وابقي زورينى

والسلامز ختاااامز ...

:]

M.Sameer said...

That's my first time to comment here although I follow your writings>

اسمحيلى: ما ينفعش بتاع دبى: هاتعرفيه امتى اذا كان نازل اجازه و راجع تانى ؟

شهر او 2 مش كفايه فى رايى

و بعدين بلا دبى بلا ارف. "انا مابحبش الخليج عموما" و ده مش قصر ذيل يعلم ربنا.

ختاما ربنا يوفقك و يكتبلك اللى فيه الخير.

PS. هى طنط شكريه ماعندهاش عروسه ليا ؟ "انا مش باهزر"
:-)

Anonymous said...

نتى بتهرجى صح ؟
يعنى حضرتك دلوقتى ربنا عالم انا ماكنتش مستنية نتيجة الثانوية العامة بنفس اللهفة دى و لا نتيجة التخرج حتى


يارب يا اختى يوفقك للخير
الخير و بس


و على فكرة مالكيش حق تسيبى كريم بعد ما فرقع منه و جه يقابلك كده تنيمى السوق و تخسرى الزبون يا شابة

ليا عندك كام سؤال كده الصراحة واقفين فى زورى جامد
و انا ماتعودتش اسيب حاجة فى زورى


زمن الاجابة 13 دقيقة
عللى الاجابة اللى تكتبيها

1

الست شكرية الخاطبة دى ما تجوزش بنتها ليه الأول ده سؤال بيطرح نفسه
الاختيارات

نظرية المؤامرة
كيفها كده
بنتها جربت نقاوة امها قبل كده و داقت نفس الكأس فقالت بوريه منها
بنتهامرتشبطتشة


2

عاوزة تتجوزى ليه أصلا ؟

الاختيارات
عادتشى
سنة الحياة
علشان تبقى أم
علشان الاستقرار
متعرفيش الاجابة
لا شئ مما سبق

انتى مؤمنة بالجواز عن طريق الصالونات ؟

الاختيارات

ايوه طبعا
اهو واحد جاى م الباب
احنا مش بتوع لف و دوران
عادى
لا شئ مما سبق
كل ما سبق

4

هل لو العريس ده طلع بمبة مش هتقابلى عرسان من طرف طنطك شكوكو تانى ؟

الاختيارات

اه طبعا
لا عادى
مش عارفة

5

تصوراتك ايه عن حياتك بعد الجواز ؟
اكتب فيما لا يقل عن 5 سطور

يللا اى خدمه الامتحان عندك وقتك تفكرى فيه
بعد ما تنفضوا الشقة و السجاجيد و الستاير و كورس النضافة

وربنا يوفقك يا بنتى
و يجعل حياتك كلها الساعه 7
يامسهل بقى
تحبى كلنا نوحدلك الدعاء الساعة 7
شوفى انا هبقى فى محاضرة عن اليوجا بس ممكن اعمل reminder
و اقرالك الفاتحة فى سرى و ادعيلك
زى ما تحبى يعنى


صحيح هو كان فى كام حد انور انتقم منه فى الفيلم علشان نعرف بنعد صح و للا لا

Anonymous said...

اه صحيح و النبى يا اختى ركزى فى موضوع تربية رياصية و هندسة ده احسن شكله ناس بتعيش

Anonymous said...

ولكم باك يا عروستنا الحلوة وحشتينا وطال غيابك لية يا قاسي... لا بلاش قاسي دي لاحسن تزعلي نشطبها من المضبطة ونستبدلها ب ياطري او يا حلو او يا قمر

بلغي اني باعاكسك بقى او باتحرش بيكي هههه

اولا: انا زعلان منك لية بقى ايوة اقولك لية علشان انا باقرا مدونتك كلها و قضيت عليها وقت كتير واول مرة اكتب كومنت مارديتيش عليا فية يمكن علشان انا كتبتة في موضوع قديم.... مش عارف بس عالعموم هوة في موضوع العريس الي نصب عليكي في ال220 جنية

ثانيا: يابنتي اهمدي بقى وفكري صح وعلى راي اختنا اللي بتحط امتحان اسئلة انا حاحط نقط:

أ- يابنتي ماحدش يتجوز جوازة صالونات ف القرن ال 21 ولا حتى ال20

ب- يا بنتي الجواز دة مش جزمة حتشتريها ولو ماعجبتكيش تغيرها ولما تزهقي منها ترميها الجواز ارتباط ابدي و عمر حاتعيشووة سوا تفاهم وحب انشاء الله يعني لازم تبقوا متفاهمين وبينكم محبة وارتباط وتفاااااااهم عميق علشان تستحملوا تشوفوا خلقة بعض كل يوم الصبح بقيت حياتكم طباعكم واحدة تحبوا نفس الاشياء وتكرههوا نفسها علشان ماتتخانقوش نشوف الفيلم الاجنبي عال ام بي سي 2 وللا الفيلم العربي على روتانا وعلشان تاكلوا نفس الاصناف مش لا يا ستي انا مش باحب الكوسة اللي انتي بتموتي فيها وكل يوم كوسة كوسة وينزل ياكل في مطعم برة وهنا مكمن الخطر

(اعرف واحد حصل لة كدة واتجوز بنت بتشتغل في المطعم اللي بيروحه لما اكل مراتة مابيكنوش على مزاجة)

ج- طنط حش...كرية بتاعتك دي اكيد بتجيب لبنتها العرسان الكويسة وتبعتلك المضروبين

ماهو لو كان فية خير ما كان رماة الطير

د - بلاها بتاع دبي لكذا سبب مش بس موضوع التحاليل بتاع اخيا اللي بيقول وهوة فعلا كلامة صح جدا
البنات الصينيات بقوا غزو في دبي وسعرهم واللة ارخص من تلاتة ايس كريم اتنين بولة في اي مول هناك وضربوا اسواق بنات تركيا وروسيا مش بالسعر بس لا يابنتي دة بالجودة كمان سبحان اللة حتى الصينيات بتوع دبي غير الصينيات بتوع مصر اللي بيفوتوا عالشقق يقولوا تشتري مفرش ماما تشتري مفرش بابا
الصينيات اللي في دبي مزز بصحيح يا بنتي رشاقة وشعر اصفر و بياض وحلاوة ولا مضيفات الطيران اليابانيات بجد ومن حيث الرشاقة والمرونة هن يمتازون بها جدا لدرجه اني دايما اقول عليهم بورتابل يعني ممكن تطبقها وتشيلها في شنطتك وتاخدها معاك اي مكان هههههههه

يابنتي انا سافرت ولفيت كتير وكافيش احلى من بلدك بس اقولك بصراحة وبجد لو عاوزة تسافري بلد تاني خديها على ضمانتي وروحي الجزائر ولما تسأليني لية ابقى احكيلك الحكاية الجزائر في لقاء اخر

المهم ابعدي عن سفر الخليج والسعودية واي بلد عربي من اللي فية جلاليب وغطرة ودشاشة علشان دي عالم واطية وبيتأمروا علينا مش عارف على اية مع انهم عالم جاهلة ومعفنة من الاساس
وعقبال يارب مايبقى عندهم مياة وصرف في بيوتهم زينا بس فالحين يتأمروا ويتفشخروا ويصرفوا الفلوس عالصياعه والعربيات والاكل والسفر وهما حتى ماعندهمش صرف صحي و صرف البيت بيصرف في ترانش ورا البيت يععععععععع

ال ويقولك في دبي رقي وتحضر وادب سلوكيات اة صح مانقدرش ننكر بس البتاع الشيخ بتاعهم دة قلب لهم البلد ماخور علشان يخليها تجذب السياحه والامراء العرب ماهيه اصلا لا جو ولا مناظر ولا نيلة حتة بلد حر ورطوبة طول السنة تعرقي وتقعدي في التكييف و بخلاف الشوبنج والمولات البلد صحراء ولا فيها مكان للفسحه ولا نيلة غير بس تتمشي مي شوارعها زي شارع رقة و تقعدي على اي كافية من اللي فية و ربنا يكفينا شر المومسات اللي ملوها

على فكرة انا باشتغل في شركة هناك في دبي بس انا مش باروح هناك غير قليل دا ومقيم في مصر معظم الوقت بس مسافر يوم الأحد الجاي لمدة 5 ايام اجيبلك اية معايا وانا جاي
ممكن عريس هندي او باكستاني هما كتير في دبي قوي ورخاص وبيعيشوا كويس ههههههههههه

هـ- بالنسبة لموضوع كريم ومنة شنبي قصدي شلبي بصي يا ستي بقى رأيي وانا مسئول عن اللي حاقولة منة شنبي دي دكر وشكلها لا يمت للانوثة بتلاتة تعريفة
والله ماباهرج تلاتة بالله العظيم دي شبة واحد صاحبي واسمة عبد الله مش باهزر
انا مش عارف طالعين بيها السماء لية بنت زيزي مصطفى دي رخرى اللي داخلة السيما وراثة
انا افهم لما نقول بنت حلوة نقول منى ذكي ولا حتى هند صبري وياسلام لو على الله يمسيها بالخير المعتزلة جيهان نصر كانت رائدة في الجمال الرباني المصري انما سنة شنبي دي مش عارف هما مش يبطلوا يرموا زبالة من فوق لية
ال ةوالتاني يقولك انتي حاتدخلي مع منة شلبي في منافسة وادي البنات وللا بلاش...........لا يا عم بلاش احسن ال مناقسة ال دي البت رضا بتاعه الجرجير ولا البت انشراح اللي بتجيلنا تنضعف دي تضرب "شنة ملبي" دي على عينها بالشبشب

و- اخينا دة والله بيقول حكم طيب مااعمل زية والنبي يا برايد ماتخللي طنطك حشكرية دي تشوفلي عروسة انا كمان ههههههههه لا اقولك ماتجوزيني انتي وعوضك على الله بقى وخللي زيتنا في دقيقنا
فكري في الموضوع ومستني ردك وماتطنشيش بقى يا خطيبة المستفبل هههه
؛)

Anonymous said...

بجد أنا فرحان أوى انك رجعت تكمليلنا السلسلة الذهبية دي ... و ياريت فعلا ما تتأخريش

على فكرة أجمد حكاية فيهم كانت نمرة 2

Anonymous said...

fi 7ad yb2a damo 3asal kida w 3ando moshkila fil gawaz !!!!!!!

ام العيال said...

يا بنتي ده شكله مقلب
من بتوع طبيب خريج هندسه بيدافع عن الناس في المحاكم
ما تطوليش علينا
نراكي في الجزء التاني من سلسه
تنط حشريه و عرسان برايد

Anonymous said...

كعادتك يا عروسة موتيني من الضحك و انا بقرالك الللي انت كتباه
و بجد لازم تشوفيلك حل في طنط بتاعة دي
و العرير الجاي ده اتقصي على موضوع تربية رياضية و منه عدل على هندسة
اتاكدي الاول هندسة ايه؟
لحسن تكون هندسة كوالين اعمر
فرع السنبلاوين
ربنا يوفقك في بحثك و احب اسمع ان فرحك الخميس اللي بعد بعد اللي جاي
و حصوة في عين اللي يشوفك و لا يصليش عالنبي

سلامي

Anonymous said...

ماعلش ياعروسة بس لازم ارد على الكابتن قلب حزين انت يا عمنا فى كل مكان فى العالم النهاردة فية رذيلة ومفاسد وغيرها زى الامارات وزى جميع بلدان العالم والى مايعرفش ينزل المولات فى مصر ويشوف الى بيحصل فيها ولا شارع جامعة الدول العربية ولا المقطم ولا غيرة
هنا بقى فى الامارات يعنى زيها زى باقى دول العالم يعنى فيها المواخر زى مانت قولت وفيها المساجد والدعاه الرائعين ويكفى مثلا ان اقولك ان رمضان الى قبل الى فات كان عندنا السديس فى دبى ورمضان دة كان عندنا لمدة 10 ايام الشيخ محمد حسان والمفتى والدكتور عمر عبد الكافى المقيم فى دبى يعنى ياباشا الطريقين موجودين وانت امشى فى الى يريحك وكل واحد وغقليتة وعقيدتة وتربيتة
اما فرقها بقى عن مصر حاجات بسيطة ممكن ماتحسش بيها زى النظام والنظافة والموساواة والاحترام والتحضر والرقى و...
اما عن اماكن الفسحة فأى شاطىءعام فى الامارات انظف من اى شاطىء خمس نجوم فى مصر اضافة الى الحدائق الرائعة والنوادى والصحراء فى رحلات السفارى والمناطق الجبلية وغيرها
ياجدعان كفاية الاحترام بلد فاتحة لنا دراعها وبنتعامل فيها زينا زى المواطنين نفس القانون نفس العقوبات ونفس المزايا .
احكيلكم على موقف الشركة بتاعتى لها شراكة مع شركة نرويجيه وكان مهندس من هناك نازل مصر يشرف على موقع عمل ولانة بيعشق قيادة السيارة بنفسة استأجر سيارة ومشى بيها وبعد 200 لقى اشارة حمرا .. وقف الراجل زى ماهو متعود لكن لقى السواقين حوالية بياحركو وماحدش واقف ومش بس كدة دة فية ناس شتمتة لأنة وقف وعطل الطريق الراجل ياعينى لف وسلم السيارة ودخل الفندق واتصل وبلغنا ابعتولى سيارة بسواق حالا ولما رجع دبى قعد يحكيلى وانا مش عارف اقوله اية
ماعلش ياعروسة طولت بس مش عايزك تاخدى فكرة وحشة عن الراجل لمجرد انة عايش فى دبى
وقولتلك ابعتى بياناتة وانا اعرفلك من اى طريق بيمشى هو طريق اليمين ولا طريق الصين

Anonymous said...

يا رب تتجوزي يا ستي متزعليش
بس على شرط تفضلي تكتبي كتاباتك اللي زي العسل دي

Anonymous said...

يا صباح الانوار على الناس الاحرار...ازيك يا بت يا برايدي .....والله كنت حسة مدام مردتيش على تعلقتنا امبارح اني في حاجة جامدة كدة جاية في السكة..والحمد لله وصلت بس ايييييييييه حاجة جامدة جدا......هو حنا مينفعشي نقرة حاجة من مواضيعك من غير منفطس مالضحك طابعا .....بس حكايت طنط فشاكات دي ولا كشاكات ...معرفش بقه...وعريسي الغفلة دا.....حاجة كدة ....مية مية....والزاهر بقة مدام
فيها من تربي رياضية لهندسة مرة واحدة كدة يبقى متتخضيش لو لقتيه بيتاجر في المخضرات يعني ولاعندو ميول للطب.....يا بنت سيبك انت من العريس الي مش باينلو راسو من رجلو دا....هو العريس دا يعني مدام لقطة والكلام دا كانت طنطتك حشكرات دي سبتهولك كدة وبنتها موجودة....لا يا بنت دا لعب كبييييييير اووي ولزملوووو لعب اكبر منو....يا ست الناس دي بتبقة فيها ان كبيرة وعوزين يلزقوهم لاي حد وخلاص....متجوزو لبنتها وتخلصنا....المهم ربنا يرزق بالناس الطيبة ويكون عريس يستاهل الحلاوة دي كلها بجد مش اي واحد وخلاص.....يا بنت اصبري وربنا مع الصابرين وحيبعتلك عريس احسن منو بمليون مرة ومن لا طنط فشاكات ولا دياولو......والله احنا كلنا في البيت بندعيلك علشان انت بجد بنت جميلة روحا وفكرا ودا المهم ودمك عسل وشربات ودا الاهم...ربنا يجوزط جوازة م الي هية علشان متقليش مش عاوزينك تجوزي اه وتكتبلنا كدة عنو باحساااااااااااس جامد وحب كدة يا قمر انت يا جميل...

Anonymous said...

بجد انتي مشكلة ودمك خفيف وكمان متزعليش نفسك ان شاء الله تتجوزي قريب كمان .

Anonymous said...

walahy kolna bend3eilak en ynfek na7sek asdy rabna yrzo2ek be ebn el 7alal isa

7elwa nazriat tant 7eshria di :)

tarbia riadia we handsa ? homa fat7o kesm gedid esmo handsa riadia wala ih

plz mat3'besh 3anena nd write the rest of the stroy

Utopian said...

ya rab tetgawezi ya bride ya rab :)....bass es2ali 3aleih kwayis allah yekremek.

waiting for the news. hope to be the fourth and the last......and to start a new series of posts (AM:After marriage)

Anonymous said...

فعلا مدونة ملهاش حل
اسلوبك جميل وموضوع المدونة جميل وان شاء الله اتابعك فى كل البوستس بتاعتك

Anonymous said...

يا برايد انا عندى عريسين ( عدد 2 جروم Groom )

و هم أولادى .. بس احنا عايشين فى برة مصر .. و تحديدا فى كندا .. هااااااا قلتى ايه ؟ و حخلصك من طنطك حشرية الى الأبد

حماكى بكندا

Anonymous said...

لا يا برايد، مالكيش حق ، يعنى ما شاء الله العرسان جايين من البلوج من كندا ودبى ومن كل مكان، يا بنتى فرصة أعملى فلترينج وإختارى ونصيحتى إنك تجمعي كل اللى عايزين يتجوزوا واللى عايزات يتجوزوا فى مكان عام عشان نفك الأزمة اللى فى البلد
اللى موافق يرفع الماوس
:)
وتحياتشى

Anonymous said...

يا بنتى قومى كملى نوم بلا جواز بلا روشة بس على فكرة انا حاسة ان حاجة حلوة جاية ان شاء الله بس انتى اقرى سورة الفتح و استغفرى ربنا كتير و اطلبى منه هو بس مش من اى انسان عشان من يتوكل على الله فهو حسبه و ربنا يكرمك و على فكرة اللى بيدور على حاجة بيلاقيها و ربنا عنده تباديل و توافيق كتيرة اوى بس اهم حاجة الصبر و ربنا يسمعنا عنك كل خير يا جميل

smraa alnil said...

معيد في تربية رياضية
يبقي زمل
طب يا بنتي اصلك مش تعرفي ان كل بتوع تربية رياضية عباقرة من يومهم
هههههههههههههه
يلا ما علينا مش هعلق كتير عشان اعرف اعلق علي الليلة الكبيرة
بس يعني تربية رياضية وبيشتغل في الهندسة
منهم لله العمداء
اصل انا ليا تجربة زي الزفت مع العميدة بتاعتي
خلتني ادرس حاجة مش بفهمها اصلا
بس يلا ما علينا

admelmasry said...
This comment has been removed by a blog administrator.
admelmasry said...

معلشي ع الكومنت اللي اتحذف دا .. دا كان عن طريق الخطاء


انا كنت عايز اقولك .. اني بادعيلك يا بنتي كل يوم من قلبي .. انك تتجوزي

بس ععارف ومتاكد انك اكيد بعد كدا .. هتكتبي بوست عن يوميات واحدة متزوجة

وتتحفينا بقي بكلام اجمد من ده


انا مستني اعرف ايه اخبار الرابع

Anonymous said...

يا بت يا موكوسة انت فيييييين الله ينيلك.....هي اخبار الرابع ايه...هو في اييييييه متردي يا بت....عوزين اخبار ....دا السكوووووت علامة الرضا يا ناس.....دا اكيد المرة دي هي لي تسرقت مش محفضتها.....يالا بينا ننزل الشارع ندور...يا ولاد الحلال....حد فيكم شاف بنت كدة مش زي كل البنات....حلوة كدة ومسمسمة ....لبسة.....اه بالحق انا نسيت ..هي كانت لبسة ايه...لما نزلت مالبيت اخر مرة...المهم هي بت عسل وخلاص...مش طوييييلة اوي...ومش قصيرررة اوي.......مش بيضة اوييي...ومش سوووووودة اوي......مش كلبووووزة اوي....ومش رفيعة اوي......عرفتوها ....يا براااااايييييدي انت فيييين

Anonymous said...

يا لهوي يا ناس ......ليكووووووون الرابع دا من اصحاب تنظيم القاعدة الي بنسمع عنو انو.... فطزكستان.....مش هي اسمها كدة بردو.....وكان جاي ياخدها فمهمة كدة ولا حاجة....من عارف....هما العرسان الي قبلي كدة ..مش كان كل واحد فيهم بسم الله مشاء الله قنبلة موقوتة.....طب ميمكن الرابع دا قنبلة من نوع ...هيروششششمة ولا حاجة ...دا البت يا عيني مش بيلها اتر من ساعتها.....وانا قلبي خلاص بقالو حتة كدة وينط مني...يا براااايدي....لو في اي عملية انتحارية ولا حاجة قولينا واحنا نساعد بعض...هما مش بيقولو برضو الناس لباعتييها....

Anonymous said...

ربنا يصلح الحال

ونسمع سمع خير ان شاء الله

أنا حاسس أن فيه فرح جاى ..





رغاريددددددددددددد

Anonymous said...

والله انا حاسس انك اتخطبتى وعلشان كدة مش بتردى علينا ماشى الله يسهلك بس مش هاتعزمينا على الشبكة ولا اية
اوعى تكونى ناوية تعمليها على الضيق يعنى زجاجة حاجة ساقعة وسندوتش بسطرمة وخلاص
لو سمحت انا باشرب بيبسى دايت علشان تبقى عاملة حسابك من دلوقتى

Utopian said...

ah el tabfeed dah!!!
di shklaha zabatet 7'alas :)

Anonymous said...

يا صباحي العسل بالقشطة عليكم....اااه فتتني ازاي دي....انشاء الله خير طبعا...يا بنت الايييه ...غطستي وسيبانا كدة عقل يودي وعقلي يجيب والواحد عقلو في الحالات دي بيروح للنحية السيئة دايما....المهم ربنا يجعلو خير ونسمع كدة حاجة حلوة ....عاوزين نفرح بيييييييييييكي بقة ..يالا ربنا يكون الرابع دا تابع(ليكي طبعا)..ربنا يفرح قلبك باللي فيه الخير...الزغرووووطة واقفة فزورنا عاوزين نطلعها برة ...يالا يا بت يا براااااااااااايد....سمعينا سلام عسل زيك كدة...احنا قعدين على نار

Anonymous said...

شكلها اتجوزت و فى شهر العسل دلوقتى و احنا و لا على بالها

هو من اولها بتبيعنا كده
من لقى أحبابه نسى أصحابه و للا ايه

ده احنا اللى باقيينلك يا امى

Anonymous said...

على رايك يا بت يا حرة دي بينلها في العسل واحنا يا عيني قعدين ننقي بصل اهو....محدش حاسس بينا خالص...بس معلش لينا ربنا يا براااااااااااااااااايد

wanna b a bride said...

ازيكوا يا جماعتنا

و النبي يا جماعة ماتجوزت لسه و لا حاجة

و بعدين لو حصل ....دانا أفضح الدنيا و أعمل بلوج مخصوص فيه كلمة واحده بس

باركووووووووولي

بس و النبي ولا ليكوا عليا حلفان لسه ماحصلش

انا بس باخد نفسي من اللي جرا و هاجي أحكيهولكوا

كمان النت ملخبط عندي اليومين دول حبة

أصل السايبر بتاع وائل ابن طنط شكرية
ههههههههههههههههه

جايالكوا ..انتوا اللي بايقينلي ..بلا جواز بلا بتاع

هو انا ليا غيركم؟

Anonymous said...

شفتووو.....مش انا لسة قايلالكم مايمكن العريس دا من نوووووع قنبلة هيروشيما.....اهو... من طريقة كلامها باين ان في قصة كبييييرة...يعني في حاجة انفجرت....دي برايد يا ناس ولا واحدة تشبها...دي لي كانت فلقانا عوزة تجوز....في الطالعة وفي النازلة....بتقولكم بلا جواز بلا بتاااااااااااااع....انتو فهميين حاجة...اصلي انا الصراحة لس مخضوضة من الكلمة دي......يا لهوي يا ولاد لا تكون البت دي مش برايد الي نعرف...ليكون الرابع دا اعاد تصميمها.......مهو مهندس بقة..بصو انا مبقاش فية عقل يا ريت تفكرو فيها انتو وتقولولي رايكو ايه غي لي حنا سمعناه دا...

Anonymous said...

elly ieshof balawy elnas tehon 3aleh balweto
http://elmahzoz.blogspot.com/

Anonymous said...

كمان الواد وائل ابن طنط شكرية منضم للتنظيم
يعنى مش بس شكرية و بنتها لا و ابنها كمان

يا داهية دقى

ربنا يستر
بس شكل الموضوع شبك


مستنيين يا ستى تسحبى نفسك و تيجى
انا مع سندريللا ان الموضوع فيه ان

انتى تقولى بلاجواز بلا بتاع

بس مادام قالت كده يبقى هتتجوز
و خايفة حد يحسدها بقى

اتطمنى اللى هنا و عايزين يتجوزوا هياخدوا منك ايميل طنط شوكة دى

بس تعالى احكى يااختى
ارغى كلا اذان صاغية

عقبال ما نجيب اللب و السودانى تكونى جهزتى القاعدة

Anonymous said...

يا ناس الموضوع دا م الاول ميطمنش......العريس من تربية رياضية لهندسة.....واخدين بالكو...وطنط حشرات دي هي وبنتها وابنها كماااان....يعني العيلة متجمع تجمع قومي....البت برايد..بتطل تكتب كلمة وتغطس تاني....البت لي كانت مطيرة النوم من عينة وعملنا قلق عوزة تتجوز ..ومستعدة تدفع نص عمرها وتلبس فستان الفرح ...بتقووووول بلا جواز بلا بتااااااااع...ياعني يا خواناااااا دي حاجة طبيعية ولاااااااااا...اكييييييييييييييد فيها ان.. ومش اي ان ...يا لهوي يا خرابي ...انا الفار ابتدى ينط فنفوخي

wanna b a bride said...

دكتور أحمد سمير

خلاص يا دكتور ماعدش عندي رفاهية اكانية الهروب

لازم أقعد و أستنى اللي هيقع فوق نفوخي

يطلع خير بأه ..يطلع شر

كله هيبان في التحاليل
------------------
مصري مغترب

حضرتك برضه تربية رياضية و هندسة؟

والا معهد بريد و طب

اصل انتوا يا بتوع دبي دايما مختلفين

مميزين كده دايما

اييييييييه

بأه كريم جايب البت البيئة دي معاه في الفيلم
و ديني لانا مطينة عيشته بس اما اشوفه
------------------
تجربتي

لقاء الجبابرة

جاي في الطريق
-----------------
يا مراكبي

شد القلوع ..مافيش رجوع يا مواكبي

الجديد جاي

انا جديدي دايما بمب و صواريخ

حاجة تفرح الناس ...أمااال

-----------------
romantic rose

زوزن؟

هو فيه زي زوزن بنت طنط شكرية؟

العيلة كلها يا بنتي هاربانة من جوانتانامو
-----------------
islamz

بص يا عم

انا خلاص اعتبرت نفسي مأجرالك الشات بوكس ايجار جديد

خد راحتك بس هاطلعك كمان 3 سنين
------------------
mohammed sameer

عايز عروسة من عند طنط شكرية؟

خد زوزن

و النبي يا شيخ ماهي راجعه
----------------

أنا حرة

بسم الله الرحمن الرحيم

الإجابة
أ
د
ب
ب
فكيها براحتك..أما السؤال الأخير ده مش فارق معايا بصراحة ..المهم انننا أتكن في بيت و أجيبلي عيلين أقعد أربيهم

حد بعد ما يتجوز بيعمل حاجة غير كده؟

p.s
اليوجا دي اخت النوجا؟...هو انا جعت و الا ايه

اما أروح أعمللي سندوتش

أنور ده ..روحي روحي روحي..بس الصراحة مش فاكرة
و بعدين اعتبريني باكمل مسيرته ..لو هو قابل أربعه ...أنا بأه 50
-----------------
sad heart

بلاش الكلام الحلو ده لحسن باتكسف

جواز الصالونات بأه الأمل الوحيد عشان مابقاش فيه فرصة حد يشوف حد بره

يعني أنا كل اللي معايا في شغلي بنات و مش مشتركة في نادي و كده أعمل ايه

و بعدين صين ايه يا عم ..داحنا الأصلي و الباقي مضروب

ماعادش الا الصفر المعصعصين كمان

هناك فرق على الأقل التكت بتاعنا بيقول صنع في مصر

بالنسبة للخطوبة ...قوي قوي ..أنا حاليا أرحب بأي عريس

على شرط مايكونش من طرف طنط شكرية
-----------------
galamwa2alam

مش هتأخر انشاء الله

wanna b a bride said...

mitar2a3

أنا عارفة؟
-----------------
أم العيال

الجزء التاني جهز

داحتى البرومو على روتانا من امبارح
------------------
حفصوتشا أم مصطفى

فرحي الخميس اللي بعد بعد بعد بعد بعد بعد بعد الجاي

مش مهم بعد كام خميس المهم ان الخميس ده ييجي
------------------

مصري مغترب

ماشي يا باشمهندس

بس ماتزقش

هابعتلك البيانات و انت توديها القسم
-----------------
bosbos

هو ده العشم برضه يا بسبس

احنا البنانيت لازم نقف جنب بعضشينا
-------------
السندرلا الحائرة

هي الإن ..إن بصحيح

هقولك يا أوختشي و هتعذريني

كلكوا في البيت بتدعولي

ربنا يكرمكم يا رب و ينولكوا اللي فبالكم ولا يرميكومش في ضيقة

ايه ده؟
أنا قلبت على تسول قوي

ربنا يخليكوا ليا يا رب
-----------------
vero

ياااااااااااااااااااااااااااااااااااااااااارب

--------------

ma-3alina

تربية رياضية
قسم فن و لعب و هندسة
فرع الزمالك
------------------
utopian

موضوع بوستات بعد الجواز دي

مستبعده حاليا

ربنا يكرم

حاسب دماغك يا عم
-----------------
anonymous-1

المدونة هتنور
--------------

anonymous-2(حمايا)

ابعت ابعت على طول يا أونكل

الميل ع الصفحة الرئيسية فوق الساعة

مستناا العرسان يا عمو

ماتتأخرش

Anonymous said...

قوليلى عندك كام سنة
ومواصفاتك
ومواصفات عريسك ايه؟
يمكن اعمل مدونة اسمها عاوز اتجوز
ونتجوز فى مدونة اى مأذون قريب
D:

makhlouf said...

فكرة البلوج جميله
وكتابتك حلوة

برافو

Anonymous said...

برودتي (دي دلع برايد)
انا حاطير من الفرح انك موافقة عالخطوبة
انا بالنسبة لوموضووع للصناعه المحلية دة فانا مش باشجع الصناعه المحلية الا لما تكون عالمواصفات اللي ارجو طبعا انك تكوني مطابقة لمواصفات الجودة الاوروبية والامريكية CE & FCC واللي هيه:

مممممممم

طولك من 155 الي 163 وماتقوليش اشمعنى 163 اهوة كدة وخلاص

وزن العروسة شاملا الملابس والجزمة و الاكسسوارات لا يتعدي ال 63 كيلو وماتقوليش اشمعنى تاني

من حيث اللون فهوة ابيض فضي لامع ناصع يميل للبياض و يكون براقا وشايني يعني (ماهواش اصفر ولا اخضر ولا شعر ازرق ولا حاجة)

العيون مش مهم - حيث ان كل بنات البلد لابسة لنسز يعني ممكن نقول رمادي على ازرق بس المهم انك من غير النضارة نظرك مايكونش 6/6 يعني يفضل شيش بيش او شيش ياك

طبعا دة لحكمة انك ماتشوفيش حاجة لما تقلعي التضارة وللا اللنسز وبكدة اقدر اسحبك وتكوني معتمدة عليا اعتماد كلي اني اسحبك ونمشي نحسس ونعتذر سوا هههههه

ان تكون العروسة خالية من العيوب يعني ماتكونش حوله ولا رجليها الاتنين شمال
ممكن عرجة او عمشة مش مشكلة كبيرة يعني
ولايجوز ارتداء رموش صناعية ولا ضوافر ولا باروكة ولا اي حاجة تانية صناعية اثناء الانترفيو

هذا من حيث المواصفات الجسمية
اما من حيث المواصفات العقلية

تكون العروسة تحمل مؤهل عالي يعني ممكن كدة تشبلون تشجارة وللا صنايع مش مشكلة

ان تكون ملمة باللغه الانجليزية الماما تاما يعني تعرف تكتب اية بي سي دي ولغاية الأف كفاية
مانا عاوز عروسة تشرفني ولما تسافر معايا برة تعرف تتعامل مع الناس وبالذات في الفصال مع بياعين السوق

وطبعا يفضل الالمام بلغة اجنبية تانية ويفضا خريجي الجامعه الامريكية اللي هيه في ميدان التحرير دي
او يكون معاها ام بي اية او اية بي سي او اي اف جي والافضلية للي عندها خبرة 13 سنة ونص وخمستاشر يوم في اعمال السكرتارية والترجمة و الحسابات و اي حاجة تانية

الايكون سبق لها الحب ولا الخطوبة ولا مشيت مع حد ولا ليها اي علاقات سابقة
يعني بت كدة خام داية من ورا الداموسة لزم

ان تكون الهانم رومانسية رومانتيكية رقيقة المشاعر مرهفة الحس السينمائي وبتعيط كدة لما تشوف افلام عاطفية او دراما
بس مش افلام البورنو التي يحظر عليها بموجب عقد الزواج مشاهدتها الا في وجود الطرف التاني اللي (هوة برضة المحروس العريس)

ممم تاسعا وهوة المهم ان تكون بتشتغل و محوشة قرشين تتجهز بيهم وتشارك في مصاريف الجواز والفرح (مش الدنيا مشاركة برضة) و ان تكون قاهرة او سكندرية ولا عزاء للقرويات بتوع الارياف

ان تكون بنت ناس كويسين يعني معاهم فلوس ويكونوا طيبين لدرجه العبط يعني ماما وبابا بتوعها مش بيعترضوا على اي حاجة العريس (اللي هوة المحروس أنا) ولا ليهم اي طلبات من حيث مهر وشبكة و مؤخر واي حاجة يجود بيها المحروس لعريس تبقى فله

ومش مهم شغلانة عمي حمايا العريس موظف ولا تاجر حر ولا حتى تاجر مخدرات المهم انة يكون مستعد لأعالة بنتة وجوزها (اللي هوة برضة المحروس انا)
لما يترفد ولا يفلس ولا يتزنق في قرشين

الا يكون في عائلتهاالكريمة اللي هما اخواتها اي متهمين في قضايا جنايات او من سبق عليهم احكام جنائية مش مشكلة لو عليهم جنح بسيطة يعني ضرب افضى الي موت او نصب او نشل
معلش ماحنا برضة عائلة كبيرة ولازم نناسب ناس اشراف ومأصلين

شوفي بقى انتى مواصفاتك تنطبق (وخلي بالك من تنطبق دي) على اية في الكلام دة وابقى ردي عليا

على فكرة انا ضيفتك في الياهو بتاعي عالماسنجر علشان ممكن نبقى نشيت مع عروستنا الحلوة ونتعرف عليها وعلى افكارها البناءة قبل الخطوبة يعني لو كان فية نصيب

بالمناسبة صحيح بخصوص موضوع الصناعه المحلية و "صنع في مصر" دة العروسة مطالبة انها تقدم مايفيد انها صناعه مصرية 100% و من مكونات محلية وذلك من خلال تقديم شهادة المنشأ و فاتورة الجمارك ويكون مدفوع عليها 10% ضريبة مبيعات (سددت بمعرفة أبوها اللي هوة حمايا يعني)
ومايكونش عليها اعادة تصدير ولا واخدة ريجيكتد في الواردات علشان يعني لو حبينا نشحنها في كونتينر على المنطقة الحرة في جبل على اللي هوة في اخر طريق الشيخ زايد دة

** والنبي يا جماعه لو البنت مش مطابقة للمواصفات دي وانتو طبعا ادرى بيها علشان انتم عارفينها عالبلوج من زمان يعني ابقوا افتنوا عليها لو فشرت ولا زودتها شوية يعني

ولو فية اي بنت من قارئات المدونة شايفة في نفسها المواصفات القياسية المطلوبة ياريت تتقدم بالسي في بتاعها في موعد اقصاة 21 مارس سنة 2012 قبل الساعه ستة اللا خمس بالفاكس او البريد الالكتروني وممكن تاخدوهم من برودتي حياتي (ودة تاني يبقى دلع برايد العروسة اسمالله عليها وعلى مقامكم)مقابل الرسوم اللي هيه حاتطالبكم بيها ( ودي طبعا بالنص يابرودة هاااه)

وبرضة اي شاب كدة لة اخت عانس ولا متطلقة او مترملة ممكن يتبع نفس الاجراءات وذلك فقط في حالة مطابقتها للمواصفات المذكورة اعلاة

Anonymous said...

صحيح يا برودة بالنسبة للشرط بتاعك ان العريس مايكونش جاي عن طريق طنط حشكرية

فا الحمد لله انا مستوفي الشرط دهون (دة) يعني

ومتهيالي انك مالكيش شروط تانية نبقى نتكل على الله بقى ونحدد ميعاد نقابل الباشا الوالد علشان نطلب رجلك

ولا يحق عليكي الرجوع على العريس (اللي هوة برضة المحروس أنا) لو ثبت فيما بعد اني كنت اعرف طنط حشكرية او بنتها المحروسة زوزن او كنت ماشي معاها ولا اتقدمت ليها من قبل

3rby said...

انتي بتحلمي باين عليكي وبتصحي تعيشي علينا
علي فكرة لو الكلام ده حقيقي عايز اقولك ان جواز الخطبة ده مابيدومش
وبعدين انا ماشوفتش وشك في اي مدونة غير ساعة لما فتحتي مدونتك
والله انا زعلان منك جدا

Anonymous said...

حمــاكى بكنـدا

أيوه يا بنتى حبعت ان شاء الله .. بس انا عندى طلب الأول .. أنا عايز اتطمن على ابنى اللى حيكون من حظة و نصيبة انك توافقى عليه و تختارية .. بصراحة انا عايز الواد يتجوز و يعيش سعيد .. و انا مش متطمن لموضوع مشاركتك فى موضوع "كلنا ليلى" .. انا مش عايز انغص على الباشمهندس عيشته .. فأنا عايز اتأكد من تمام تبرئك من حركة "كلنا ليلى" و أن تشجبى الحركة بالكلية .. و نظام "كلنا ليلى و كلكم أدم" ده ما يعجبنيش .. احنا مش فى حرب يعنى ..

هاااااااااا قلتى ايه يا برايد ابنى ؟

التوقيع

حمــاكى بكنـدا

Anonymous said...

انتي فين يا برايد؟؟؟؟
بقى لنا زمان مستنيين اخبارك
عايزين نعرف جرى ايه مع العريس الرابع
ربنا يسعدك يا اختي

tota said...

برايد
واضح ان بنت طنط حشرية عندها هى كمان طنط حشرية بتاعتها اللى متبنياها
اصل برده طنط حشرية ما ينفعش تقول للناس عن بنتها برده يعنى مش لطيفة فأكيد فى حد قايم بالواجب معاها وكله سلف ودين

ثانيا العريس تربية رياضية وبيدّرس فى هندسة منطقى جدا مش كله فى رياضة اى ان كان بقى حساب ولا تمارين

هانت هنغرف التفاصيل منك بعد الموجز

تحياتى

Anonymous said...

اناياستى بكالريوس تجارة وباشتغل محاسب (غريبة دى صح ) بس كان نفسى من زمان ادخل كلية الزراعة وافتح صيدلية وابقى مهندس اد الدنيا

soosa el-mafroosa said...
This comment has been removed by a blog administrator.
wanna b a bride said...

anony

هننق بأه والا اييييه؟
-----------------
nirfana

التفاصيل جاية ماتقلقيش
----------------
anonymous

ميرسي ع الكلام الحلو و النصايح الأحلى

و احنا لينا مين غير ربنا نتوكل عليه

ادعيلي
---------------

smraa alnil

طبعا طبعا ..كل بتوع تربية رياضية عباقرة

لكن ده باه

هابقى أحكيلك في البوست الجاي
-------------

آدم المصري

ربنا يخليك يا رب
هو ده عشمي فيك برضه يا آدم
-----------------
السندرلا الحائرة

ما نا قلت
دانا لو اتجوزت مش هاغطس كده
دانا هافضح الدنيا
شكرا على نشرة عيل تايه دي

دانتي كأنك شايفاني بالظبط
--------------

رجل من غمار الموالي

من بقك لباب السما
--------------
مصري مغترب و السندرلا و يوتوبيان و انا حرة

و كل الناس اللي شكوا فيا

اخص عليكوا انتوا تعرفوا عني كده؟

هو انا م النوع اللي يتجوز بسهولة كده

خلي فيه شوية ثقة متبادلة
-------------
السندرلا الحائرة

ماتخديش في بالك حالة اكتئاب ع الماشي

بس مين ده؟...برضه عايزة أتجوز
---------------

أنا حرة

وائل دهحكايته حكاية
هابقى أحكيهالك بعدين

---------------
epitaph

الرابع جاي جاي
هيروح فين يعني

يارب يا ابي يا اااااااااارب
-------------------------
shabfa2re

لأ و صورتك تشجع قوي الصراحة
-----------------
makhlouf

شكرا

منورنا
-----------
sad heart

كلام جميل كلام معقول ماقدرش أقول حاجة عنه

المخابرة مع عم برعي البقال
-------------

3rby

حماتي؟

و النبي و حشتني يا أخي و وحشتني طولة لسانك

هو انت يا بني ربنا مايكرمكش و تقوللي بقين حلوين أبدا؟
---------------

حمايا في كندا

و النبي يا أونكل دول كانوا شوية بنات غلابة بيشكوا همهم للناس

بس عايزني أبيعهم؟

اديني فرصة أفكر

انا أصلي مش قليلة الأصل
----------------
فلة

انا هنا هنا يا بنت الحلال
--------------
tota

زوزن..هو فيه زي زوزن

دا هي دي انتقام السماء من طنط شكرية

----------------

مصري مغترب

طب ربنا يوفقك في كلية الحقوق
-------------

Anonymous said...

يا بنوتة دى صورة خودعة
مش عاوز احط صورتى الحقيقية
عشان دوشة المعجبات
$:

Anonymous said...

معلش انا ما قدرتش امسك نفسى حسيت انى عايز ارجع من الكلام اللى مكتوب فى البلوج ده صحيح ان ما فيش حد اتقدملك معقول بس ده مش معناه انك تستحقى بنى ادم محترم وكون انك بتحاولى تترسمى على العريس انك محترمة و مؤدبة دي بداية النفاق و فعلا الواحد منا م بقاش ب يثق فى اى بنت دلوقتى لانكم تعديتم كل الحدود من الهبل والسذاجة فى الحكم على الناس وكون انكم مش لاقيين فا ده احس حل . انا باتمنى من كل قلبى ان كل بنت بتفكر بسذاجة زيك انها ما تتجوزش لأنها ما تسحقش

Anonymous said...

هون على نفسك يا اخى الموضوع هزار

Anonymous said...

برايد الجميلة

ممكن نمرة تليفون عم برعي البقال لتحديد موعد

تحياتي

Anonymous said...

hi brayd 3la fkra enty damk zy 2l3asal w 7aboba gdn w enshalah rbna yrzo2k blzog 2lsa7

Anonymous said...

بجد انتي حتة سكرة مش ممكن أسلوبك أكثر من رائع بس انا حاسه ان الحكايات دي بالذات حكاية طنط حشرية مش عارفه ليه انها مجرد نكته ليس أقل أو أكثر عموما اتمنالك كل خير ويارب تلاقي العريس المناسب بس بعد ما تتجوزي غيري اسم البلوج لأسم ياريتني ما اتجوزت

قلب أبيــض said...

السلام عليكم
أولا انا أسف انى هخرج عن الموضوع لان
ووأحب أدعوك الى ان تنضم معنا الى رابطة عملناها للعزاب
أنا عارف ان الوقت مش مناسب
والرابطة دى عملنا لها مدونة تسمى
( عاوز اتجوز )
ونأمل ان تشارك معنا بمواضيعك
وحاول مشكورا ان تنشرها بين اصدقاءك والفكرة هتعجبك ان شاء الله
وجزاكم الله خيرا

amoodi said...
This comment has been removed by the author.
elzain said...

ادري متأخرة واااايد.. بس توني اقرا الكلام..برايد قصصك تجنن و الدليل اني قاعده اقرا الاشياء القديمه للحين..بس عندي تعليق على

Sad Heart said:

المهم ابعدي عن سفر الخليج والسعودية واي بلد عربي من اللي فية جلاليب وغطرة ودشاشة علشان دي عالم واطية وبيتأمروا علينا مش عارف على اية مع انهم عالم جاهلة ومعفنة من الاساس
وعقبال يارب مايبقى عندهم مياة وصرف في بيوتهم زينا بس فالحين يتأمروا ويتفشخروا ويصرفوا الفلوس عالصياعه والعربيات والاكل والسفر وهما حتى ماعندهمش صرف صحي و صرف البيت بيصرف في ترانش ورا البيت يععععععععع


so Elzain says: اللي مايطول العنب..حامض عنه يقول.

ماقدر اقول اكثر من هالكلمه..و بلاش بأه الكلام اللي ملوش داعي ده.

Anonymous said...

مصرى فى السعودية
ازيك يا برايد انا مبسوط من فكرة المدونة بتاعتك لكن مش متابع اوى عشان ظروف شغلى.لكن انتى ادتينى فكرة مدونة عملتها اتمنى تزوريها وتكتبى تعليقك عليها ونكون اصحاب انتى صاحبة الفضل فى فكرة مدونتى.الرابط اهو
http://7ikayaty.blogspot.com