Saturday, January 26, 2008

إبني










يا سلااااام و الله مافيش زي قلب الأم

الكتاب مسكته في إيدي و ماتتخيلوش شعوري كان إيه...مش عارفة أعيط والا أضحك والا أسجد على الأرض وألا أقوم أقلع الجزمة و أنطقها زي محمد زيدان


المهم آدي الكتاب بيقولوا هينزل في المعرض بكرة الأحد الموافق 27/1

الناس اللي بيقولوا احنا من محافظات تانية و مش هانقدر نيجي المعرض..أقولهم إن انا كمان من محافظات تانية و باجي المعرض كل سنة
أركب القطر و انزل في رمسيس و اعدي الميدان و اركب المكروباصات من جنب الجامع اللي بتقول "المعرض ..المعرض..المعراااااااض"..تقوم توصلني للمعرض أقعد ألف أف جوه المعرض و اشتري كتب و أحطها في الباك باج لما يطلعلي أتب و ارجع أطلع بره المعرض ألاقي مكروباصات بتقول "رمسيس ..رمسيس..رمسييييييس" ..أركبها و أشد الرحال على رمسيس و منها على بيتنا عدل


دي وصفة سهلة..دي وصفة هايلة
مش كده؟؟


الناس التانيين المقيمين خارج حدود القطر المصري ..عادي يا جماعة انتوا توصوا بس أي حد يشتريلكم الكتاب و يبعتهولكم مع البط و المحشي و السمنة البلدي اللي بتتبعت مع أي حد نازل على هناك

وانتوا عارفين طبعا إن العلم لا يكيل بمحشي البتنجان


نيجي بأه لميعاد التوقيع
(لا ياجماعة مش التوقيع بين نهى و خطيبها ..انا مش فاضيالهم دلوقت ..لما أفضالها بس شوية)


التوقيع يا جماعة بتاع الكتاب إن شاء الله و بإذن الله

يوم الجمعة الموافق 1/2 ..أي الأول من فبراير 2008 ..في مقر دار الشروق في المعرض الساعة 3 العصر


مالكوش حجة بأه ..يوم جمعة أهه و بعد الصلاة و كله تمام التمام

هتيجوا يعني هتيجوا..كل واحد من دلوقتي يجهز نفسه و يحوش تمن الكتاب و يجي عشان أمضيله عليه (يا فرحتك ببنتك يا أم برايد)..خلاص..هاستناكم

إوعوا تتأخروا

Tuesday, January 08, 2008

أخباااااااار حلوة بنااااار الفرن

بررررضه مش اللي في دماغكم..لسه يا جماعة ..لسسسسه




بصوا بس




عدوا معايا كده على إيديكم...واحد..إتنين..تلاتة ..أربعة لحاااااد 15 ..مش هتكفي إيديكم ..عدوا على رجليكم اعملكم إيه يعني؟؟؟
المهم من هنا لغاية يوم 23 ..15 يوم ..يعني أسبوعين ..يعني نص شهر..يعني 1/24 سنة..عايزاكوا تستعدوا ..نفسيا و معنويا و أكييييد ماديا لمعرض الكتاب عشان هيبقى فيه أخبار حلوة




لأ مش هاتجوز رئيس معرض الكتاب ولا حاجة (قولولي صحيح هو متجوز؟) ماعلينا المهم هيحدث في معرض الكتاب حدث لم يحدث من قبل




أختكم الصغيرة ..طب بلاش ماتزعلوش ..الكبيرة ..اللي هيا حضرتي و لأول مرة في تاريخ الأدب المصري و العربي و الشمال أفريقي هينزل إسمها على كتاب




آه و الله ...عايزة أتجوز اللي انتوا بتقروها دلوقتي دي نازلة في كتاب عن طريق دار الشروق و إسم أختكوا هيبقى منور على الغلاف




حلم كنت باحلم بيه من مدة ...بسبب تعليقاتكم المشجعة ليا و أذكر منها تعليق للأسف مش فاكرة إسم صاحبته كانت بتقوللي فيه
get published .get published.get published




وأنا الصراحة كان نفسي في يوم من الأيام أشوف كتاب عليه إسمي عند عم صبحي بتاع الجرايد (يمكن الراجل يرجع يحترمني بعد مانزلت في نظره يوم ما كنت باسأله على كتاب كيف تصطادين عريسا)




لكن ولا كنت أعرف أروح لمين و لا أنشر إزاي في أي حتة غير بلكونتنا




و جاء الفرج عن طريق لبنى اللي كلمتني عشان بتعمل بحث عن المدونات و اللي وصلتني لرحاب بسام صاحبة بلوج حدوتة و اللي كان ليها دور في وصول نمرتي للأستاذ سيف سلماوي مدير النشر بدار الشروق و اللي أنبأني بالخبر السعيد الي هو رغبة دار الشروق في نشر المدونة في كتاب




لفة طويلة بس ربكوا بيسهلها مع الغلابة اللي زيي عشان أتعامل مع دار نشر بحجم و قيمة دار الشروق و كل الناس المحترمين اللي هناك




نيجي بأه للمفيد....الدعاااااية يا جماعة...يعني مش عايزين حركات من بتاعة ماهي المدونة على النت و ببلاش إيه اللي يخلينا نقول للناس يشتروا الكتاب و نوفرلهم عشان البنزين غلي و الحركات دي
الكتاب فيه كل مواضيع المدونة + مواضيع جديدة لم تنشر من قبل و من ضمنها العريس التاسع و العاشر و بعدين إنتوا عارفين إن الكتاب و اللي فيه هيفيد ناس كتير و هيكون كتاب لا يمكن الإستغناء عنه في أي بيت بعد كتاب" أبلة نظيرة" و كتاب" أهداف الحزب الوطني ..فكر جديد طحن" طبعا




لكن بجد بجد بعيدا عن الهزار ..أنا مش قادرة أوصفلكم سعادتي أد إيه بالخطوة دي ..اللي حاسة إنها هتكون خطوة مؤثرة في حياتي و أكيد هتغير حاجات كتير




و كان لازم أقولكم و تشاركوني سعادتي ..إنتوا كان ليكوا دور كبير بتفاعلكم و تشجيعكم في وصول المدونة للدرجة دي من الشعبية-اللهم أدمها نعمة و إحفظها من الزوال- و بجد باحس بكل واحد وواحدة منكم صديق و صديقة ليا و أتمنى أكون كده كمان بالنسبة لكم




بالمناسبة فيه إحتمال يكون فيه توقيع للكتاب في المعرض..يعني أختكم تقعد كده و تمضي لكل واحد على نسخته زي الكتاب الكبار ..إبقوا تعالوا إتفرجوا..قصدي سلموا عليا..هي صحيح هيبقى فيها تاتش فضيحة كده ..بس ولا يهمكم كلوا فداكم...عندي أغلى منكم أنا يعني؟؟؟..اللي ياخد القطر و اللي يخطفله توك توك و اللي يركب الناقة و يشرخ ..ماليش دعوة..لاااازم كلكوا تيجوا ..و على كل مواطن تدبير و سيلة إنتقاله بنفسه




مش هاوصيكم على الدعاية..و آاااادي غلاف الكتاب عشان ماتتوهووش










نزل شربات يا عم مرسي ..بس كل واحد ياخد كوباية واحدة وبس..و سمعونا زغروتة حلوة ..من نفسي ..ماليش نفس أسمع زغاريط يعني؟

Friday, December 21, 2007

سعيكم مشكور

17_birthday_girl

النهاردة يا جماعة ..يوم تاريخي..يوم لن يتكرر مثله أبببدا في تاريخ البشرية..يوم مهم و فاصل و يعتبر من العلامات البارزة في تاريخ عالم التدوين بل العالم أجمع ..باختصار و من غير رغي كتير النهاردة -للأسف- عيد ميلادي

الكام؟؟؟؟

و ليه الأسئلة البايخة دي بأااااه؟

عموما انتوا مش غربا و اي حد لئيم شوية هيرجع يبص ع البروفايل و هيعرف ..ده غير اللي متابعين أصلا و حافظين

النهاردة و مع الأسف و الألم و الـ,,, مش عارفة ايه كمان

عيد ميلادي ال 29

ياااااااااااااه ..بأه عندك 29 سنة؟؟

مش قلنا بلاش التعليقات البايخة دي؟

زي النهاردة من 29 سنة الست الوالدة قررت ان هو ده الوقت المناسب لتترك بصمتها على وجه الخليقة و تضيف للدنيا إضافة عظيمة و مهمة ..اللي هي طبعا حضرتي

و لأن ال29 رقم مميز جدددددا في حياة أي بنت مصرية..فهو رقم له دلالاته و من اهمها ان خلاص العداد قرب يشطب و احنا بنلعب في الوقت بدل الضايع

و خلاص يا برايد بكره اللي يسوى و اللي مايسواش يديكي اللقب المعروف و اللي بقالك 3-4 سنين بتجاهدي و تكافحي عشان تلغيه من القواميس بدون فائدة ترجى

لكن ليها حل

..البروفايل من بكره هغيره..و هاشيل السنة

و كل البوستات اللي فيها سيرة لموضوع السن هتتظبط

و كل التعليقات هيتعملها مونتاج قبل ماتتعرض

أو على الأقل زي كل الستات على مستوى العالم -جمعاااء- هيفضل عندي 28 سنة لمدة 5-6 سنين جايين (طيبه أنا قوي..ماقلتش 24 والا 25 ولا حاجة)..لكن

لكن مش عارفة ليه ..مش فارقة معايا قوي؟؟؟

مش حاسة ان ال29 دول فارقين عن ال 25 قوي يعني

يمكن هاحس كمان شوية؟؟

يمكن جتتي نحست و أخدت على كده؟؟

يمكن عشان حواليا بنات كتير زيي و كلهم زي الفل؟؟

يمكن عشان لسه بيجيلي عرسان و لسه بارفض اللي مش مناسب و مش حاسة لغاية دلوقتي اني المفروض ألم التعابين بأة و أقبل أي حد؟؟

يمكن عشان فيه نسبة كبيرة من اللي بيزنوا على وداني بطلوا - عن يأس أو إستسلام- انهم يزنوا عليا أقبل أي منظر و خلاص؟

يمكن عشان شاغلة وقتي و مش حاسة قوي بالفراغ؟

يمكن عشان اهلي واقفين ورايا في كل القرارات؟

يمكن لسبب او اتنين ..و يمكن لكل الأسباب دي

بس برضه ..صعب ان حد يقوللي كل سنة و انتي طيبة السنة دي و أقوله و انت طيب

غالبا بارد و أقول

سعيكم مشكور

:-D

Friday, November 30, 2007

البت نهى اتخطبت....عااااااااااااااااا

لقد...نزل...علينا...الخبر....كالصااااااااااااعقة


البت السهنة ..ولا تقول و لاحسينا بيها..و لاسمعنالها لا حس و لاخبر..قال ايه نسيبها يوم نيجي التاني نلاقيها دخلالنا و واقفة في وسط الصيدلية و هووب رفعتلنا ايديها اليمين و الدبلة بتلمع فيها


مش تباركولي يا جماعة انا اتخطبت


الصيدلية اللي كانت في حالة حركة فجأة كل حاجة فيها وقفت في مكانها زي ماتكون بتتفرج على شريط فيديو و هنج فجاة عشان الهيد عايز يتمسح..كل حاجة وقفت حتى المرضى على الشباك وقفوا و بحلقوا و هما مش فاهمين" كأنهم بيقولوا"الجماعة دول ممكن حد فيهم يتخطب بجد"؟؟؟" شوية و الكل لفلها ببطء و عينيهم مبرقة و البت رجعت خطوتين لورا استعدادا للجري ..و فجأة انطلقت زغروتة مدوية كان مصدرها -طبعا- مدام سندس..ماهي مش خسرانة حاجة... و بعد ماانطلقت مدام سندس و خدت البت بالحضن و احنا بصينا لبعض على أساسا ان منظرنا هيبقى مش لطشيف لو مارحناش و هنيناها دلوقت..راحت كل واحدة فينا مطلعة من شنطتها الإبتسامة اللي شايلاها للمناسبات اللي زي دي-حلوة الحتة دي مش دي الإستعارة المكنية بتاعت النحو زمان؟-و الكل راح و هو عاصر على نفسه 12 كيلو لمون عشان نهني و نبارك بالمناسبة السعيدة..قال سعيدة قال


و البت عماله كل شوية ترفعلنا ايديها في وشنا كأنها نفسها تحط صابعها في عيننا..خلاص خلاص شفنا يا امي خلاص ..مش كده يعني مانتيش اول واحدة تتخطبي


طبعا بعد موجة التهاني اللي جاية من..القلب طبعا..عدى اليوم و كأننا في فيلم من أفلام الزميل الراحل شارلي شابلين..فيلم صاااامت مافيش غير نهى عماله توشوش مدام سندس و يضحكوا و يرجعوا يتوشوشوا و يضحكوا..آه ماهم خلاص هما الإتنين مرتبطشين زي بعض و كل واحدة ليها راجل


..بقية الصيدلية بأه..أجاركم الله..البت سماح كل شوية تقوم تقف في الشباك نقولها مالك ترد علينا
مخنوقة ..مخنوقة مش عارفة آخد نفسي

البت نيفين -ولأول مرة في تاريخ وزارة الصحة-تتعاطف مع المرضى و تكلهم بالراحة..تقريبا قالت يمكن دعاوي المرضى اللي بيدعوها عليها لما بترمي العلاج في وشهم تكون هي السبب في وقف حالها فقالت تغير الخطة و تخليها 4-2-4 يمكن ربنا يفك النحس

البت سمر بأه هي اللي قلقتنا قوي كل شوية تروح ناحية علبة سم الفران اللي في المخزن و تبصلها بصات غريبة كده و ده اللي خلانا طول اليوم مراقبينها و عمالين نبعدها عن أي كوباية شاي بتاعتها أو بتاعة نهى و ما ارتحناش غير لما بعدت عن السم و راحت تلعب بالمقص..المقص سهل ..هتعور حاجة هنقدر نلمها ..لكن سم الفران ده نعمل فيه ايه؟



أنا عن نفسي كنت فرحانة...آه فرحانة فيه حاجة؟؟...البت صحيح سهنة و غلاوية و سماوية و خبيثة ..بس زميلة كفاح يعني.
.و صحيح انا بقيت باعتبر أي حالة خطوبة او جواز على سطح كوكب الأرض إهانة شخصية في حقي..بس خلاص بأه يمكن تكون اول الطابور و الكل يكر وراها.
.وصحيح احنا قلنا كده لما مدام سندس اتجوزت من 4 سنين..لكن يمكن كل 4 سنين واحدة..بالمعدل ده هنحتاااااج
"4*13"
يعني.... 52 سنة على مانخلص لستة البنات اللي في الصيدلية ..لكن برضه أهو يبقى فيه أمل


عدى اليوم اللي كان اطول يوم في تاريخ البشرية و كل شوية ترميلنا فيه معلومة.
.أصل حسام..ده يبقى اسم المأسوف على شبابه
أصل في المستشفى بتاعته..يعني دكتور
أصل مامته الله يرحمها..و كمان مالكيش حماة ..يابنت المحظوظة



و فجاة في آخر اليوم تلتفتلنا بكل بجاحة قال و تقولنا


عن إذنكوا بأه يا جماعة أصل حسام هيجي يوصلني بالعربية بتاعته


...كام نظرة من تحت لتحت على 3-4 أصوات لمصمصة شفايف انطلقت من انحاء الصيدلية و راحت مكملة الجملة


ماتيجي يا مدام سندس نوصلك في سكتنا


طبعا ماهي دي المضمونة بقيتنا خطر على المحروس...الصراحة عندها حق أنا لو كنت أخدت خبر بالموضوع كنت بعته
بني غازي يروح يتجوز اخت مرات أيمن..الله يمسيك بالخير يا أيمن ويرجعك لأهلك بالسلامه


نزلت الهانم جري واحنا وراها بنتدألج ع لسلم و بنوقع كل حاجة في طريقنا المرضى و الموظفين حتى الشجر البلاستيك اللي قدام أوضة المدير ..عشان نلحق نتفرج ع المحروس و على عربيته


الواد مش وحش ..شغال يعني..هو صحيح رفع القلم الرصاص و كل شوية يلحق البنطلون قبل مايقع منه و ودانة واضح انهم واخدين موقف شخصي من بعض أو محترمين دماغه جدا لدرجة انهم واقفين الوقفة السودة دي..لكن خلقت ربنا يعني
صحيح لابس نضارة كعب شفشق مش كعب كوباية و كبيرة لدرجة انها مش بس بتعالج نظرة دي أكيد كمان بتعالج حواجبة و خدوده
لكن راجل ..هو حد لاقي رجالة محترمة اليومين دول


العربية صحيح مش عربية 16-اللي هي 4*4 بس انا باحب أختصر-لكن عربية فخمة برضه 128 حمرا موديل 79..و البنت قعدت جنبه في العربية ولا كإنها قاعدة جنب ابن رئيس مراجيح مولد النبي و بصتلنا بصه كلها غل و تشفي و مدام سندس ركبت وراها..الهي يشوفك الباشمهندس الشافعي و يطين عيشتك يا رب



أما روحت البيت و حكيت لماما بصت للتليفون و هي بتفكر و مدت إيديها و بدأت تطلب في رقم أنا حافظاه كويس قوي..رقم طنط حشرية


مديت ايدي و وقفتها قبل ماتكمل و بصينا في عينين بعض و انا باقولها بعمق و تأثر


لا يا ماما...لأ.. لسه ماوصلتش للدرجة دي


و بعدين مديت إيدي على نوتة التليفونات


هو.. أونكل ديسكو نمرته كام؟؟


______________________________________________________________

ملاحيظ ع الماشي


جبت جريدة الدستور الإسبوع اللي فات و ابتديت أقرا في صفحة المدونات.. ألاقيلكم خبر منشور عن فوز مدونة "الجزيرة توك" بجايزة البوبز لأفضل مدونة عربية في المسابقة السنوية اللي بتقيمها إذاعة "دويتش فيله" الألمانية..عادي يعني مافيهاش حاجة..بقية الخبر بأه بيقول و قد فازت المدونة دي بأكبر عدد من الأصوات من بين المدونات العشرة التي وصلت للمرحلة النهائية و هي كذا و كذا و كذا و عايزة اتجوز ..
وانا ولا اعرف أي حاجة عن الموضوع ده..دخلت على موقع المسابقة و لقيت فعلا المدونة من ضمن العشرة في المرحلة النهائية..طب حد يقوللي..يعبرني... ألم العيلة و نروح نصوتلنا صوتين في الموقع كده.مش عشاني..عشان مصر..ماعلينا خيرها في غيرها يمكن السنة الجاية حد يعبرني و يقوللي و مافضلش كده على طول..خيخة و آخر من تعلم



شكر خاص للزميلة شيماء الجيزي اللي كانت السبب الرئيسي في استضافتي في حلقة "صوت مدون" على إذاعة إسلام أون لاين" و شكر تاني للأستاذ باسل و الأستاذ أحمد..الحلقة هناك على الموقع للي عايز يسمعها.....اللي في الحلقة دي "غادة" مش برايد..حتى هتلاقوها عاقلة و هادية كده و خنيقة حبتين..اللي مالوش مزاج يسمع غادة و تبوظله صورة برايد اللي في خياله مايروحش...أنا قلت اهه و حذرت و قد أعذر من بنجر



باعتذر عن التاخير في الرد على تعليقات التدوينة الأخيرة و نشر التدوينة الجديدة..أنا أصلي مشغولة دلوقتي في كورس كده يمكن في يوم أبقى أحكيلكم عليه....باشغل وقتي حبه...فاضية بأه أعمل ايه؟

Saturday, November 03, 2007

زغروتة حلوة رنت في بيتنا

يوووه..مش بيتنا احنا ..ماتقاطعوش...دي رنت في بيت العرايس و العرسان...اللي هو طبعا بيتنا...
رغم اني لسه مصدومة من خبر جواز أحمد عز الدخيلة من غير ماحد يقوللي انه بيدور على عروسة ..طيب مش كان حد قاللي دانا كنت نغنغتكوا و اديت لكل واحد منكم 10 -15 ربع جنيه مخروم تتشبرقوا بيهم ..ياللا مالكوش في الطيب نصيب... لكني هاقولكم اخبار حلوة قوي عن أحد أهم أعمدة بيت العرايس و العرسان..طبعا عرفتوه..الأستاذ حمادة..و رغم اني كنت حالفة ان لو حد بعت قاللي اتخطبت والا خطبت والا اتجوزت هابهدله..لكن الا الأستاذ حماده ..ده معزة خاصة و رفيق كفاح..خصوصا و اني انا شخصيا و بصفتي مؤسسة بيت العرايس و العرسان.. كنت أحد أسباب هذا الخبر السعيد.. ألف مبروك يا أستاذ حمادة..من قلبي و الله ..
و عقبااااااااااااااااااااالي

ياللا إجروا بسرعة على بيت العرايس و العرسان و اقروا

Tuesday, October 16, 2007

تابع التامن

كنا وصلنا لحد فييين؟..آه
ماما جابتلي الطقم الجديد و الشنطة و الشوز وروحنا على البيت
بعد مارجعنا البيت بساعتين رن الجرس و كانت أم محروس بترقص من الفرح و بتتنطط زي الضفدعة اللي محطوطة في طاسة على النار-و الله الست دي بترقص كويس..فيها شبه من نادية الجندي في فيلم ..اضرب و اجري في تل أبيب -
كانت جاية تبلغ ماما بالأخبار الحلوةالعريس بيستأذن يجي يوم التلات الجاي يعني كمان أسبوع و بيقول انه جاهز لكل الطلبات و اننا عيله محترمة و عمره ماهيلاقي زينا

ابتدت ماما تمسك التليفون و تقوم بمهمتها المقدسة كأم العروسة المقبلة ..وتغيظ في كل ستات العيلة الكريمة اللي ماعرفوش حاجة عن الموضوع

ان شاء الله بكره تسمعوا أخبار كويسة...هنشوفكوا قريب ان شاء الله ..خير خير كتير ان شاء الله...و الله شكلي هاحتاجك قريب معايا في ايه ..بكره تعرفي ..لا لا مش هاقولك خليها مفاجئه


طب و اشمعنى انا بأه أنا عايزة اغيظ قصدي أفضفض لحد أنا كمان
اتغدينا و دخلت أنام شوية ..بس مش قادرة باتقلب على جمر النار على رأي فايزة أحمد ...والا كانت أسمهان..أديني باتقلب و خلاص الله طب و ايه فايدة الخطوبة اذا كان الواحدة مش قادرة تغيظ ..قصدي تفضفض لحد عليها ...لا لا لا دي حاجة لا تطاق نفسي أطلع في البلكونةو أصرخ في اللي رايح و اللي جاي
هاتجااااااووواااااااااز
بس بس بلاش مقاطعه بأه
مانا لازم أقول لحد مش قادرة أمسك لساني..هموت طب أروح أقول لأماني؟...لا لا دي عينها وحشة و هتقعد تقوللي و ده يطلع ايه في لولو أخو فوفو وساعتها ممكن أتهور و أقولها رأيي بصراحة في جوزها و اخوه و عيلتهم كلها و يمكن مشاعرها تتعور والا حاجة طب أنزل أقول لعبد ربه البواب و أكبسه زي مابيكبسني بأخبار مراته الليدي سها في الرايحة و الجايه..لا لا أنا مش أد سها لتطلع تباركلي و تاكل دراعي والا حاجة ..مرة كانت فرحانة لما محمود سلوع جارنا خد الثانوية العامة و دخل كلية الطب و شكلها جاعت شوية لأن كان فيه شجرة جوافة بتنام تحتها قطتين مالقناش ليهم هما التلاتة أي أثر تاني يوم

طب أقول للعيال في المستشفى؟..لأ لأ لحسن يقعدوا يشمشموا و يطقسوا و يعرفوا مكان العيادة و يمكن يروحوا و يحاولوا يخطفوه لا لا لا لازم أبقى أنصح من كده..طب أقول لمين لمين؟

قمت جري و لبست هدومي و صممت اني لازم أنزل لنهى ...مش هاينفع أأجل الغيظ ..قصدي الفضفضة ليوم تاني مش هاقدر

وانا راكبة في التاكس قلت أما أجرب الكلمة في بقي..

بسرعة يا أسطى لو سمحت عشان خطيبي مستنيني

حاضر يا عروسة

يا سلاااام حلوة قوي الكلمة دي ..مع اني في أي ظروف تانية كنت شخطت فيها و قلت له دكتورة لو سمحت ...لكن دلوقتي اللقب ده أجمل لقب في الدنيا..فليسقط مكتب التنسيق

وصلت للصيدلية اللي بتشتغل فيها نهى بعد الضهر .أول ماشافتني اتبرجلت و وشها اصفر باضرب بعيني كده لقيت الصيدلية بتبرق و كل الإزاز ممسوح ببص على لبسها ..قلبي وقع في رجليا

ايه الطقم ده ..الطقم ده انتي مابتلبسيهوش الا اذا..الا اذا ...انتي جايلك عريس

لا مش مظبوط

لا انتي لايمكن تضحكي عليا انا عارفة الطقم ده كويس

الطقم.. الطقم..يوووه ..كنت عارفه انك هتعرفيه..أيوه جايلي عريس دلوقت

اوعي يكون دكتور و عنده عيادة..احنا مش هنكرر موضوع أيمن تاني

لا لا لا ..ده طيار..هاييجي يشوفني النهارده ..و بعدين ايه حكاية أيمن هو عمل ايه؟

أيمن ..أأأأ..لا ..الله يمسيه بالخير و يسعده هناك في بني غازي..المهم عشان الطيار ده كنت بتوزعيني

مش مسألة توزيع يا برايد ..بس يعني لو جه و شافك هنا...إفرضي يعني انتي عجبتيه أكتر و الا حاجة..تقطعي على أختك حبيبتك


آآآه ..فكرة كويسة و الله ..هو يجي هنا و فجأه أطلعله و يقع فيا و يسيب البنت نهى الخبيثة دي اللي كانت عايزة تقرطسني..و طبعا معروف ان مافيش أي وجه للمقارنة بيني و بينها..أيمن ؟...أيمن ده كان عنده حالة استجماتيزم متقدم و بعد نظر متأصل ..يا سلام بأه على فرحة ماما و انا راجعالها بعريس كمان...يا سلام يا بت يا برايد الفقي لما يسعد ..دكتور و طيار و أسبوع واحد ..يا فرحتك يا ماما

..البنت نهى شكلها فهمت اللي بيدور في دماغي
برايد ..انا صاحبتك و حبيبتك مش معقول تعملي فيا كده ..انتي عارفة انا حظي كان عامل ازاي

وانا يعني اللي حظي كان عدل قوي

معلش يا برايد ..عشان خاطري ..انا عارفة انك مش هيجيلك قلب و تعملي فيا كده ..و انا أوعدك اني أبقى اخليه يشوفلك حد من أصحابه


بعد ماكنت خلاص هاتعاطف معاها الجملة الأخيرة جننتني...هيا حصلت ..أنا اللي كنت هاقولك البقين دول بعد مافحمك بخبر عريسي..بس لأ برضه انا ماعملش كده في صاحبتي أبدا ..احاول أخطف عريسها ...لا لآ لآ...و بعدين آخر مرة أيمن كان هيجيله انهيار عصبي و انا كنت غالبا هادخل سجن القناطر في قضية ضرب أفضى طفاية السجاير على دماغه...قدر و لطف...بعد ماتحايلت نهى شوية عليا قررت اني أدخل المعمل و أستنى جوه ..ياللا بأه صحبتي و ماتهونش عليا و بعدين انا عندي عريسي و عيادته ..هو أنا يعني ناقصة عرسان

بعد ماكنت ناوية أصدمها صدمة عمرها بالخبار اللي عندي..بعد ما أمهدلها طبعا نهى دي حبيبتشي و لايمكن أصدمها من غير تمهيد..أهي دلوقتي هي اللي صدمتني و خلتني واقفة و حاسة باحساس العربة المفخخة نفسي أنفجر فيها و في الصيدلية و في العريس لو شفته..آه و على رأي المثل..على الباغي تدور الدوائر..منك له يا نهى و كمان خلتيني أتكلم بالنحوي

بعد شوية واحدة اقتحمت الصيدلية وشها هيشقق من كتر الفرح..و أول ماشافتني قطمت الضحكة..انا فهمت على طول انها الواسطة..أنا عارفاهم بيبتدوا كده و أخرهم مقلب حرامية و يتدألجوا ع السلم
ماشي ماشي..ماتقلبوش وشكوا أوي كده..انا ماشية

مشيت في الشارع و الصدمة بادية الأثر على وجهى الذي كان بشوشا-يووه نحوي تاني-..يعني كمان مش هاعرف أتأنتك على حد بالعريس يعني لو كبرت في دماغي و رحت قولت للعيال في المستشفى و نهى كمان قالتلهم كفة مين اللي تطب..الطيار طبعا..و احنا في شهر أكتوبر و ده موسم..أول طلعة جوية الساعة اتنين الضهر و الحركات دي..دي ايه الخطوبة اللي باينة من أولها دي..ايه فايدة الخطوبة لو مافضلوش الناس يحسدوا و يقروا ع الواحدة و يرتفع ضغطهم كل أما تجيب سيرة خطيبها قدامهم..يارب هو انا دايما فرحتي ناقصة كده؟؟

الإسبوع عدى عادي ..طول الوقت في الشغل انا و نهى بنبص لبعض من تحت لتحت..مافيش واحدة عايزة تقول جرى ايه في موضوعها و كل واحدة خايفة تسأل التانية ايه الأخبار؟..الموضوع دلوقتي بأه مسابقة و هانشوف مين فينا اللي هيسبق

عدى الأسبوع على خير و جه اليوم الموعود

دخل العريس صالوننا المتواضع اللي ماما جددت كل حاجة فيه تقريبا في الأسبوع ده ستاير جديدة و فازة جديدة و كاسات جديدة كله جديد في جديد..الواد الدكتور ده أول مادخل الصالون تحس اننا بقينا الضهر..ايه ده ..أحب أنا جدا الناس اللي بتبان كأنها لسه مستحمية من تلات دقايق دي..قاعدنا قاعدة طويلة و اتكلمنا و ضحكنا و العريس قالنا انه مستعجل جدا على الخطوبة و مافيش داعي للتأخير كل شئ جاهز..و لما ماما و بابا سألوه على عيلته اللي كان جاي من غيرهم..قالهم انهم في الإمارات و ان شاء الله هيبقوا يجوا على وقت الخطوبة و لو ماعرفوش ينزلوا عادي يعني مش لازم نأخر المراكب السايرة عشان حاجة بسيطة زي دي..لا طبعا و نتأخر ليه..ده كده ممكن البت الخبيثة اللي اسمها نهى دي تخطب قبلي و تاكل الجو

بعد القاعدة دي حسيت في عينين ماما انها مارتاحتش و عبثا -و اكرر- عبثا حاولت أقنعها تشيل الوساوس دي من دماغها لكن ماما من طول خبرتها معايا كان عندها احساس غير مبرر ان انا لازم يطلعلي في كل خرابه عفريت

و تااااني مسكت ماما التليفون و قررت القيام بجولة من المحادثات مش عشان تغيظ المرة دي ..لكن عشان توصل لمصدر الخبر و تسكت النحل اللي بيزن في دماغها من ناحية العريس اللميع

تاني يوم رحت الشغل ..لسه نهى ماقالتش حاجة خير ..ربنا يستر بس على موضوعي و ماما ماتبوظهوش..الأمهات دول..لو مالقيوش مشكلة يعملوها هما

روحت البيت و باضرب بعيني في الصالة لقيت ماما ماسكة سماعة اتليفون زي ماسيبتها بالظبط من 14ساعة و نص بس فيه تعبير غريب كده باين على وشها

فيه ايه يا ماما خير؟

لا أبدا ..فيه حاجة كده طنط فتنة قالتلي عليهاوانا باغيظها..قصدي باكلمها على موضوع العريس ده

حاجة ايه يا ماما؟..انتي شاكلك كده اتعودتي على قعدتي جنبك و اللاوعي بتاعك عايز يبوظلي الموضوع و خلاص

انتي مش فاهمة ..طنط فتنة قالتلي انها عارفاه و انه متجوز و مخلف ... خشي البسي هنروحله العيادة

ايه؟..لا بأه حرام..هنعيد قصة عائلة الصندل البني تاني؟

عشان كده باقولك البسي بسرعة انا مش هاقدر استنى ثانية واحدة غير لما أتأكد

رجعنا تااااني للعيادة ..العربية اللانسر في مكانها..البواب نايم جنب الباب ..طلعنا العيادة..التمرجي..لا ده كان واحد تاني..عادي يعني دي كانت فترة مسائية و أكيد الطقم بيتغير..العيانين مارحبوش بينا زي المرة اللي فاتت..خلاص ضميري مش هيوجعني لما مادعيلهمش يخفوا..ازاي مايرحبوش بينا زي المرة اللي فاتت..قطعنا كشف و دخلنا للدكتور

وقعدنا نستناه..نستناه...نستناه..لحد ما الراجل الغريب اللي قاعد جوه أوضة الكشف شكله هو كمان زهق

هو مين فيكوا اللي مريضة

احنا مافيش حد منا مريض

أمال حضراتكم مشرفينا ليه

دي مسائل عائلية

ازاي يعني؟

حاجة بيننا و بين الدكتور

طب مانا الدكتور

ياسلام يا سلام ..سمعني بأه و اشجيني

لا حضرتك الدكتور(...) دي عيادته

مانا عارف ..ده أنا

إزاي ده الدكتور(..)صغير في السن و عينيه خضرا و عنده

غمازات..مش كده

أيوة مظبوط..ماتقوليش انه بيتدرب مع حضرتك و انه لسه تلميذ ولا انه

الراجل سابنا و خرج من الأوضة جري

ماما..فيه ايه هو هايجبلنا البوليس والا ايه

بوليس ايه؟..هو احنا سرقنا حاجة

رجع الراجل الكبارة و هو جارر في ايده الدكتور الصغنون من قفاه لابس تريننج سوت و شكله كده كان نايم

هو ده مش كده؟

أيوة ..أيوة هو ده الدكتور(..) انت خاطفه والا ايه؟

و فجأة الراجل الكبير نزل ضرب في الدكتور الصغنن

خاطفه دانا نفسي أحرقه..اقطعه..نفسي أرميه من فوق البرج و اخلص منه

واحنا من طيابة قلبنا و لأننا مش فاهمين قاعدنا نسلك ونصوت.نسلك و نصوت .وفي الآخر الدكتور الصغنن طلع يجري و الدكتور الكبير قعد قدامنا منهار...جبناله لمون و مشينا العيانين و روحنا التمرجي و قعد يشكيلنا همه

خدوا عندكوا..البيه أبو غمازات..ابنه...البيه ماجابش مجموع في الثانوية العامة خلاه يعيد برضه ماجابش دخله جامعة خاصة قعد فيها 6 سنين و ماعرفش يتخرج ..حول تجارة..و بقاله فيها 5 سنين ولسه في سنة تانية..و عشان هو ابن دكتور كبير و عشان حليوة و عنده فلوس ..خدها غية يتسلى بخلق الله..نفس المسلسل اللي عملوا علينا عملوا على كتير قبلنا ..دكاترة و صيادلة و أسنان..يدخل عليهم نفس الداخلة و العيادة اهه و العربية كمان و بابا و ماما في الإمارات بس هما مبسوطين قوي و آدي جواب منهم بيقولوا على بركة الله..و يخطب و يدخل و يخرج و يتفسح و يتعزم و بعدين ينكشف او يزهق و ياخدله علقة أو يجوا الناس يبهدلوا أبوه ..و يغطس شهرين و يعييد الكره

عشان كده الشهادات الكتير اللي كانت متعلقة اللي تاخد عشرين سنة على ماتتاخد...بتاعة باباه

عشان كده العيانين اللي عرفونا أول مادخلنا....كانوا صحابه

عشان كده لجأ لأم محروس..الكل كان عارف سمعته من قرايبة و معارفه و هي كانت لسه داخلة المنطقة جديد و مالحقتش تتعرف على كل مصايبه

عشان كده عنده علامه في قورته..حد متفاهم من اهل العرايس سابله تذكار يفكره ان بنات الناس مش بلاي ستيشان

هدينا الدكتور الكبير..عشرة برضه ولازم نقف جنبه..و نزلنا الشارع عادي..عاادي..باقولكم عااااادي..احنا اتعودنا على كده..ولا كنا ماسكين نفسنا من العياط ولا صعبت علينا نفسنا ولا كنا كارهين الدنيا ومافيها ولا انا كنت بافكر في نهى اللي زمانها دلوقتي بتلبس الدبل ولا حاجة...عااااادي

تاني يوم رحت الشغل و التعبير اياه مرسوم على وشي..تعبير واحدة واخدة مقلب سخن طالع من عينيها..على الأقل دلوقتي أقدر افضفض للبنات و واحدة تطبطب عليا و التانية تاخدني في حضنها و واحدة تدعي على اللي كان السبب و تقولي ضفرك برقبته و بكره يجيلك اللي يقدرك و يخلص و يشيل..أدخل الصيدلية ألاقي كل المشاهد اللي فاتت دي جاري تنفيذها على الهوا..و البطلة...نهى..الموضوع بتاعها طلع فشنك عشان العريس بتاعها اكتشف انها عندها 28 سنة و تلات أشهر و هو عايز واحدة عندها 28 سنة و شهرين..عنده حق..ايه 28 سنة وتلات أشهر دول..ده حتى سن مش عاطشفي خالص..الدم غلي في عروقي...لا بأه ..حتى في دي مش سايباني في حالي..حتى شوية الطبطبه واقفالي فيهم

مدام سندس واقفة جنبها و عماله تطبطب عليها

ولا تزعلي نفسك يا حبيبتشي بكره يجيلك اللي يعرف قيمتك

وطت صوتها شوية و هي مش عارفة اني واقفة وراها و سامعاها

أنا ماكنتش عايزة أقولك هنا قدام البنات ..بس انتي ليكي عندي عريس مايستاهلش غيرك

بجد يا مدام سندس

آه و الله أم هبه بتاعت الفراخ هي اللي قالتلي عليه..دكتور و عنده عيادة و عينه خضرا و بغمازات

و لأول مرة من ساعة ما موضوعي طلع فشينك رتسمت ابتسامة واسعة على وشي

طب أقولها بأه والا لأ؟..هاتقول كنت باتصنت..هاتقول أناغيرانه..هاتقول طول عمري حاطاها في دماغي و مش بعيد تقرر ام طارق بتاعة الكافتريا و تعرف حكاية أيمن

طب أسيبها ..لأ حرام..صاحبتشي برضه

لقيتها بتهمس لمدام سندس وانا لسه وراهم

طب اوعي تجيبي سيرة لبرايد.... لحسن عينها وحشة

كده ه ه ه ه ه ..طب إستلقي وعدك بأه

___________________________________________________

شكر خاص لأحمد خير الدين على حواره الصغير اللي في الوريد في مدونته ولاد النهارده...و شكر متأخر شوية...لأ هو كتير لشيماء الجيزي على حوارها الجميل في مدونتها صحفية مع إيقاف التنفيذ

ليس بيدي و لكنه بيد وائل


إلى الأعزاء والعزيزات




anonymous-lara-qabbani-pink unicorn-freesoul-anonymous2-akram-abeer-mishmishaya-bride zonemarvel-desrt cat-shafshooq-shaimaa-me2-mohsen abouzeid-ammouna-semsem-battabakr-meroorania-amr ahmed-yasmine-anonymous3-galileo-jasy_1988-nouran-masrry metgharab-angel heart-doba-ma_3alina-anonymous4-anonymous5-z_diva-cinderella-anonymous6-miro-anonymous7-gamecanvas-emos-nile_queen-sa7bet nouny-anonymous8-amr-mahmoud-batooot-anonymous9-shahy- the groom-rania-anonymous10-banota-nostalgia-anonymous11-doaa-sa7bet nouny-islamist bloke-he&she-yahia-anonymous12-misho-realman-bestic-esraa-semsem-mohamed kamal hassan-mazagangy-fnan fa2eer-someone-moony-osama-fatataljanna-barie2010-anonymous13-mesh2dra-lolo-moslim-tweety-epitaph-mohamed hesham-anonymous14-snow white-anonymous15-spyfun-echo of silence-anonymous16-koko-heba_sakr-ahmed-anonymous17-toblerone-still insane-darsh-a dreamer with feet on the floor-emoo_yh-3ala asm masr-muslim masry



حياة الأحلام-مروة-محمود علي-فوضى الحواس-الطائر الحزين-ساعد نسرين الأيمن-همسة قلم-نانو-لعب عيال-أمة الله-ارحم دماغك-دعاء-سجدة-الكلام نوعان-عصفور بلا أجنحة-تسنيم-أيام و بنعيشها-جميلة بو حريد-واحد مكسوف-رؤى-النورس-تخاريف دكتور-سحابة-شقاوة شعب-حابس نملة و بعذبها-زمردة-برعي الغلبان-حسن مشالي-غادة-امرأة تقول الذي لا يقال-كلاكيت تاني و تاني-أيامنا الحلوة-ديمو-حاول تفتكرني-ابن عمر-أنا مش بتفلسف على فكرة-أنسانة-آدم المصري-زوجة مفروسة-أشرف حمدي-المستقبل-يا مراكبي-إيمان-ساعد نسرين الأيمن و الأيسر



شكرا لتعليقكم على البوست اللي فات و آسفة لعدم الرد و التأخير...ليس بيدي و لكنه بيد وائل ابن طنط حشرية
صاحب السايبر




كل سنة وانتوا طيبين

Saturday, September 08, 2007

التامن

هييييييييييييه جالي عريس...غريبة؟...مش ان جالي عريس طبعا انتوا عارفين انهم إكوام إكوام عندي في الفسحة..الغريب اني فرحانة انه جالي عريس بعد ماكان هيجيلي صدمة وجدانية و انهيار نفساوي من آخر عريسين تلاتة أربعة...بس أعمل ايه يا جماعة..قلبي طيب و ماباشلش و ماما بالذات بتحاول تستغل موضوع قلبي الأبيض ده

و ايه يعني لما طنط حشرية يوم جابتلك عريس وحش ..جايز تنشن صح المرة اللي جاية

و جرى ايه لما أماني بدل ما تجيبلك عريس جابتلك عيلة متكاملة متحابة تخطبك..الله أعلم المرة اللي بعدها ممكن يحصل ايه؟

اعزمي طنط حشرية على الغدا..اخطفي رجلك و روحي زوري أماني..افتحي نور السلم لجوزها فوفو عشان بيخاف من الضلمة و ياريت تهشيله القطط اللي على السلم ..ساعدي أماني اللي كل يوم تنزل تاخده من قدام البوابة

وانا رغم قلبي الأبيض لكن دماغي ناشفة و كرامتي بتنقح عليا قوي و مش بالساهل أعزم طنط حشرية على الغدا الا اذا كنا طابخين يوميها رز بالخلطة مرشوش بالمكسرات و بودرة أبيدو بتاعة الصراصير
بس بقول حاضر..ان شاء الله..ربنا يسهل

اللي دايسين ي موضوع جواز الصالونات ده و عندهم خبرة يعرفوا ان العرسان بيجوا حسب الشرع "جماعة" في اسبوع واحد هوب هوب هوب 5 عرسان مرة واحدة ..و يجي واحد ورا التاني. فشنك..أونطة..ماتلاقيش..و ده من ايه..و دي حادثة و الا هو مخه كده طبيعي
و يخلص المولد على كده و بعدين يعدي كتيييييييييييييييييييييييييييير..مافيش حد يهوب ناحيتنا لدرجة ان بابا كل اسبوع يجيب كهربائي يتأكد ان جرس الشقة شغال..يمكن بييجوا و مابنسمعهمش...و في الفترة دي بتنشط الحواس التلاتة اللي بتستخدمهم أي بنت عشان تعرف جايلها عريس والا لأ

حاسة السمع..تطرطق ودانها لما يجي لأمها أي تليفونات خصوصا بعد جملة..الحمدلله هي كويسة..و بعد كلمة..لسه..و بعد الأكلاشيه المعتاد..بيجيلها كتير بس لسه النصيب ماجاش..لأن اللي بيفتح موضوع زي ده في التليفون فيه احتمال مش بطال انه يكون بيمهد لحاجة..الا ان في احتمال تاني انه يبقى نوع من التباتة و خلاص

حاسة النظر..تمسح بعينيها أي مكان موجوده فيه خصوصا مكان شغلها..اول ماتشوف واحدة ست و معاها واحد شكله ابنها بيزغرولها من بعيد..تقلب على القناة التانية و تحط فيشة الرقة و توطي مؤشر الصوت و تجبر عضلات الرقبة على وضع الرأس في زاوية 90 درجة مع بقية اجزاء الجسم دليلا على الأدب و التربية

حاسة الشم..برضه في مكان شغلها أو و هي داخله او خارجة من العمارة..حيث أن من المعتاد ان العرسان الراغبين في الزواج..لازم يستحموا بنص إزازة كولونيا أو أفترشيف و هما رايحين يشوفوا العروسة...و موضوع البارفان ده بيحل محل الجزمة اللي بتزيق بتاع زمان اللي كانت برضه بتنبه العروسة ان حد ماشي وراها و تخلي المسافة اللي بتقطعها كل يوم في 5 دقايق تقطعها يوميها في ساعة الا ربع

المهم بعد ماشحنت كل الحواس دي..مافيش..مافيش أي حاجة بتحصل..سلمت أمري لله ..مافيش في ايدي حاجة غير كده..و بدأت افكر جديا اني أعزم طنط حشرية على الغدا وإني أساعد أماني و فوفو في موضوع السلم و القطط..لكن ربنا يعتلي النجدة الإلاهية في صورة أم محروس

أم محروس دي تبقى المورد الرئيسي لللبن و القشطة في المنطقة بتاعتنا.....و الست تحس انها نزيهة كده رغم انها بعين واحدة و دايما بتلبس جلابية سودة و فيها تاتش كده من نجمة ابراهيم..لكنها دايما بتقول انها واخدة موضوع الللبن ده هواية عشان تضيع بيها وقت خصوصا بعد جوزها ماشترى 3 تكاتك شغالين ليل و نهار...(تكاتك اللي هي جمع توك توك على فكرة)..لكن أم محروس بتعتبر مهمتها الحقيقية في التقريب بين الناس..تعرف الشقة دي اخبار الشقة دي و العمارة دي فضايح العمارة دي..و من أول ما اتعرفت على ماما و ماما بتعتبرها أحسن اختراع عرفته البشرية بعد الإنترنت..و يمكن أحسن على الأقل الإنترنت مش هيساعدك تعمل رز بلبن

في يوم راجعة من شغلي شفت منظر أثر فيا جدا..ماما حاضنة أم محروس و الإتنين منخرطين في بكاء يقطع نياط القلوب-ايه نياط القلوب دي؟_ماما بتتشحتف على آخرها و ام محروس واضح انها ماسكة في ايديها كمية من الفلوس اللي ماما بتخبيها من بابا ورا عداد النور

فيه ايه يا ماما بتعيطي ليه

أصل..أأصل..أاااه

و شدتني ماما معاهم في جروب هج ولا بتاع الست الأروبة بتاعة برنامج أوبرا
جوه الشقة اتفتحت في ماما

أم محروس هي حصلت أم محروس

مالها أم محروس ..ماحنا جربنا الجيران و الصحاب مانفعوش..يمكن يوضع سره

آدي انتي قولتيها الناس المحترمة المثقفة كلهم طلعوا زي أعضاء مجلس الشعب في الأول وعود و في الآخر مصايب..يبقى أم محروس اللي هتجيب الفايدة ..يا ماما
و مشيت علشان أدخل أوضتي و في منتصف المسافة اتسمرت لما اتهيألي اني سمعت كلمة غريبة
ايه ..انا اتهيألي سمعتك بتقولي حاجة
و الله دلوقتي وقفتي..لما سمعتي انها جايبالك دكتور و عنده عيادة
مش النظرية يعني يا ماما المهم الشخص نفسه هو أنا كنت يعني هتجوز العيادة
و تتجوزي صالون حلاقة كمان..باقولك ايه أنا تعبت تعبت
خلاص خلاص ,,هاتجوز العيادة..قصدي هاشوف العريس..هوانا ورايا ايه يعني

أيوة كده اتعدلي

المهم بعد ما ماما قامت بجولة استخباراتية عشان تجمع أكبر قدر من المعلومات عن العريس قبل مايشرف صالوننا المحترم عشان مانفاجأش انه متجوز اتنين أو من الرياض أو بيقلد فنانين....جمعت ماما المعلومات اللي قدرت عليها لكن برضه ماقتنعتش ..و بعد الفضايح اللي حصلت في صالوننا قبل كده وخصوصا موضوع الزغاريط بتاع عائلة الصندل البني بتوع آخر مرة ..ماما طلعت بفكرة كيفتني قوي الصراحة..احنا اللي هنروح نشوف العريس
و يادوب ماما أخدت عنوان العيادة من ام محروس و تاني يوم ام محروس بلغتها انه مستنينا في العيادة

..ليه يا ستي تعملي كده؟؟
ماهو برضه عشان يستعد لمقابلتكم

يحيا العدل يحيا العدل
أخيرا هابقى على الشط التاني و هو اللي هيبقى مستنينا..يا سلام عليه بأه و هو قالب العيادة رأسا على عقب و مشمر البنطلون و نازل مسح هو و التمرجي و ينضف السجاد و ينفض الستاير و يقف محتار قدام الدولاب ألبس القميص ده بأه و الا ده طب أعمل شعري سابايكي والا أفرق على جنب؟ و يبعت يجيب ساقع و دستة جاتوة...يا سلااااام أخيرا هاكل جاتوه بابا مش غرمان فيه و بعدين يحسسني بالذنب انه جابه على مافيش

ياللا يا بربر..لازم تتقمصي الدور صح..لبست بدلة شيك كده و عليها حتة صندل بني(اشمعنى انا يعني) و ماما لبست طقم شيك و لبست كل الدهب اللي عندها اللي نعرف انه عندها و اللي مستخبي في الخزنة السرية تحت رف الهدوم بتاعها للطوارئ و لغرض في نفس يعقوب..و تقمصت الدور فعلا

لازم يبقى أبيض و عينيه صفرا و شعره أخضر و ملفوف كده وصوتي واطي و يقدس الحياة الزوجية و يشارك في الأثاث..و كامل من كله و حصوة في عين اللي مايصلي ع النبي..رحنا العمارة اللي فيها العيادة ..يافطة كبيييييرة و البواب اول ماشافنا قام اتنطر في سيمفونية احترام وصلت لحد باب العيادة ..ماما اللي كانت عاملة حسابها حتى لو العيادة بتنش و مابيدخلش للأخ المواطن العريس أكتر من 50 جنيه في الشهر ..برضه هتجوزهولي و تصرف علينا احنا الإتنين مادام ده هيشيل من على ضهرها الأتب الدائم المتمثل في حضرتي..شفتوا الأصل..ماما كانت مستعدة تضحي بالأم و الجنين عشان أنا و الدكتور نعيش

أول مادخلنا و قلنا اسمنا للتمرجي اتنطر نفس النطرة بتاعة البواب و دخل يدي للعريس خبر و العيانين- اللي كانوا ماليين العيادة- كلهم قعدوا يكلموا بعض و يهمسوا..هي دي هي دي...ايه يا جماعة الموضوع ده..انا لقطة آه..بس مش لدرجة دي
التمرجي دخلنا رغم ان ماما كانت مصرة نستنا لحد ما الكشوفات تخلص-واهو كله من تمن الشبكة-لكن الراجل أصر اننا ندخل الأول و ماحدش من العيانين اعترض...يا سلاااام ناس طيبين و الله..لو ماكنتوش انتوا اللي هتأكلونا كل شهر كنت قلت ربنا يديكوا الصحة

المهم دخلنا على المكتب...مكتب شيك و الجدران ماليانه بشهادات يتهيألي محتاجة 20 سنة عشان حد ياخدها كلها..انا صحيحي نسيت أسأل سنة أد ايه.هو اكيد اكبر بس مش عارفة بأد ايه؟..دخلن و انا مغمضة عين و مفتحة عين ..خايفة آخد صدمة تانية ...بس المره دي أنا مستعدة ..كنت عايزة اجيب شوية بندق على شوية لوز و أخليه يكسرهم عشان أتأكد من قوة أسنانه و بعدين افتكرت ان البندق و اللوز دول بيجيبوهم للبنات ...يعني حاجة حريمي قوي...و عشان كده جبتله معايا دوم...هو ده الإختبار الحقيقي لأسنان الرجالة ..ولو طلع زي اللي قبله هابطحة بيها في نفوخة و ماحدش يلومني ساعتها آه....أنا مش ملطشة بأه

ماما لقيتها وقفت ومدت إيديها و بتسلم و بتزغني عشان أسلم انا كمان..رفعت عيني و انا ببسمل..ألاقيلكم حتة عريس..كل المواصفات اللي أنا قايلاها من كام سطر دي ..عيون خضرا و شعر بني فاتح طول بعرض بارتفاع ابتسم كده ابتسامه بينتلوا غمازتين...إخيييييه...ايه ده؟...أنا هاتجوز واحد أحلى مني والا ايه..و أقعد كده في الكوشة الناس تقول اتجوزها على ايه...يوووه بأه..انتي لازم تتغاضي عن العيوب دي يا برايد..مش هنعاير الناس بشكلها كمان.مش ذنبه انه حلو و فاضله فولت و ينور على رأي اللمبي..خلاص خلاص..اتجوزه و أمري لله..و بعدين هو فيه عيب برضه..عنده علامة كده في قورته على شكل نجمة..شكلوا كان شقي و هو صغير..كويس يعني على الأقل مش خيخة

قعدنا و طلبلنا حاجة ساقعة ..ايه ده فين الجاتوة..هو مكتوب على اهل العروسة بس والا ايه. هتجوز ..أنا ماباحبش نظام التسبيل ده..أنا لازم أطلع الدوم..هو ده اللي هيحسم الموقف صحيح قعد هو و ماما يتكلموا و طول ما هو بيكلم ماما يبصلي و يركز قوي ..لدرجة ان حرارتي ارتفعت و أعصابي سابت و حرارةايدي اللي ماسكة كوباية الحاجة الساقعة مع التلج اللي جواها عملوا طبقة بخار أضفت على الجو تاتش رومانسي فظيعو رغم اني من الموديل الجديد النازل في السوق سنتر لوك و حزام أمان و ضد التسبيل لكن أعصابي ماقدرتش تستحمل ده كله بسسسسسسس..ستووووب..هو ده..خلاص..ده مافيهوش غلطه...صبرتي و نولتي يا بربر ...يا حلوللي ..ده العيال في الصيدلية هيموتوا..دكتور و عيادة و بغمازات يا سلام عليا وانا قاعده في الكوشة و كل صحابي هيطقوا من جنابهم
لا لا مابلاش الأفكار السودة دي ..خلي الشماتة و التشفي لواحدة تانية...لواحدة في ايديها الشمال دبلة دكتور..هيهيهيهي

خلصنا القاعدة اللي كانت مدتها ساعتين ماما اتقصت فيها على كل المعلومات المطلوبة و انا ماسمعتش ولا كلمة من الإتنين كنت كأني بأتفرج على فيلم صامت مبقلله عينيه و لاغيه بقيت الحواس ..و خرجنا من العيادة و احنا طايرين ..كنا طولنا قوي لدرجة ان العيادة كانت فاضية و احنا خارجين..ماما اتحرجت قوي و اعتذرلته بشده

يظهر اننا طولنا قوي و زهقنا العيانين

لا حضرتك ولا يهمك هييجوا تاني

ازاي؟

أصلهم مابيثقوش في حد غيري..هيروحوا فين هيلفوا يلفوا و يرجعولي..و حتى لو ماجوش مش مهم..المهم اني اتعرفت على حضرتك ده شئ أهم من ميت فيزيته و متين عيان

و انتوا عارفين تأثير موضوع حضرتك ده في عيلتنا..ماما مشيت و هي مش مصدقه..أنا كنت مسنداها لأنها كانت دايخة من كتر السعادة..أنا كمان ماكنتش مصدقه نفسي

واحنا نازلين شفنا عربيته تحت العمارة لانسر فضي شكلها جديدة لانج...يا سلام يا بابا مرتبك هيفضلك ..فلوسك حلال و الله

ماما في فورة سعادتها خدتني و خلصت كل فلوسها عليااشترينا طقم جديد و شوز و شنطة و كل اما ندخل محل من المحلات تقوله

عايزين أحسن حاجة أصلها هتتخطب قريب

ادينا أغلي حاجة حاجة تليق بواحدة خطوبتها قريب

ماما ماتقاطعيش

لا من غير مقاطعة ان شاء الله ان شاء الله

Tuesday, August 21, 2007

عقبالك يوم ميلادك





يا جماعة الأسبوع ده إكتشفت موضوع غريب جدا...ان الأسبوع ده عيد ميلاد برايد

يتهيألكم ان برايد دي أكيد بطلت تعمل أعياد ميلاد من زمان ..كبرت عليها خلاص..لكن ازاي تكبر و هي عمرها يادووووب سنة

من سنة في 14 أغسطس بالتحديد قعدت على الكومبيوتر و ابتديت اعمل بلوج أفضفض فيه عن اللي جوايا و كتبت فيه مبرراتي اللي كان اهمها اني مش لاقيه حد احكيله و بدأت أظبط نفسي باتكلم مع نفسي في المواصلات فقررت ببساطة اعمل البلوج ده بدل ما يشحنوني قريب على السرايا الصفرا

و في اليوم ده اتولدت برايد...بصراحتها و وضوحها و لسانها الطويل ...برايد مش غادة بالظبط ...و غادة مش برايد بالظبط...لكن برايد جوه غادة و بتطلع وقت اللزوم ..تقول و تعيد و تزيد على صفحات البلوج و بعدين تدخل جواها تاني تستخبى أو تختفي شوية ..بس ترجع تاني تقول و تعلي صوتها يمكن حد يسمع

لا يممممممممممممكن بأي حال من الأحوال كنت أتوقع اني أقدر أكتب في نفس الموضوع لمدة سنة...الموضوع حساس و مش سهل ان بنت تتكلم فيه خصوصا على النت.لكني كنت فعلا محتاجة حد يسمعني..و يالهول ما وجدت

لايمممممممممممممكن "كمان مرة عشان الحبايب" كنت أتخيل ان رد الفعل هيكون بالطريقة دي..كنت متوقعة ردود بايخة كتير من شباب بيستظرف و بنات بتعترض على كتابة و مناقشة موضوع خاص بالبنات بالشكل ده

كنت متوقعة اتهم بالبجاحة و العين القوية و حتى قلة الحياء و كانت كلمة
delete this blog
ماثلة امامي أول مابتديت اكتب في البلوج

لكن ردود الأفعال كانت حاجة تفوق التصور....الناس المحترمة اللي قابلتها هنا رجعتلي الثقة في الناس عموما و انا اللي كنت قربت أيأس من الجنس البشري كله

الشباب اللي احترموا المحتوى و بداوا يفهموا جوانب من شخصية البنت المصرية ماكانوش يعرفوا عنها حاجة...و البنات اللي حملوني مسؤلية -اتمنى اني كنت قدها- اني باتكلم بلسانهم و باقول اللي جواهم

المتزوجين من الرجال و النساء اللي دخلوا و شاركوا بأراءهم و خلاصة تجاربهم في الحياة الزوجية

الدعوات و النصايح و حتى الإختلاف في الرأي...كلها أشياء مش عارفة ازاي أعبرلكم عن قيمتها بالنسبة لي

المنتديات اللي نقلت و الجرايد اللي نشرت و الصحفيين اللي كتبوا في الجرايد و على النت و البرامج اللي اتكلمت عن البلوج في التلفزيون و الناس اللي كتبت في البلوجات و اسم البلوج في قوايم المفضلة عند ناس كتير أعرفهم و ماعرفهمش...بيت العرايس و العرسان و الناس اللس بعتت تجاربها الشخصية بحلوها و مرها و ائتمنتني على نشرها...المسينجر اللي اتملى بايميلات ناس كتير و اللي من قلة مابادخل عليه كان سؤال ناس كتير من اللي قبلت اضافتهم هو ...انتي مين و جبتي ايميلي منين؟

إيميلاتكوا و تعليقاتكوا اللي دايما بتسأل...حكاياتك دي حقيقية؟...والا تأليف؟...أصلها مش معقول حقيقية...والا هي حصلت بجد؟

الناس اللي اتشجعت و عملت بلوجات على نفس اللحن...عايز اتجوز..برايد زون..مش عايزة اتجوز...المتزوجون في الأرض...حارة العوانس...اعنس أحسن...و غيرها كتير

عداد الزوار اللي قرب على ال100000 و تشجيعكم ليا على الصراخ بصوت عالي ضد تقاليد بالية و كلام فات عليه الزمن

كلمة
هههههههههههههههههه

في أول تعليقات كتير على عرساني الأعزاء...بتفكرني باللي فات لكن كمان بتديني أمل في اللي جاي

يااااااااااااااااااااااه سنة عدت و انا باكتب و انا معاكوا و انتوا معايا...مانكرش اني كان نفسي في السنة دي أكون مع حد تاني و أقفل البلوج أو اغير اسمه و أعمله ...خلاص اتخطبت..او خلاص اتجوزت...او عايزة اتطلق..اي حاجة غير نظام يبقى الوضع على ماهو عليه ده

لكن رغم كل شئ...بسببكم و معاكم...دي كانت سنة من أسعد سنين حياتي

و عقبال 100 سنة

Tuesday, August 07, 2007

بنت التلاتين

في تدوينة سابقة وصل لي تعليق من واحد "كالعادة" شايف ان البنات هي السبب في اللي حاصلها و ان أي بنت لو كانت من الأول رضيت بقاليلها ماكانش ده بأه وضع البنات في مصر..ورغم ان في كل قصصي و مغامراتي الصالونية تلاحظوا اني مستبعدة العامل الإقتصادي لأن المشكلة بالنسبة لي ماكانتش أبدا الفلوس..اللي بيتقدملي بيبقى عارف هو بيتقدم لمين و عارف مستوانا ايه-مش مستوى مادي عالي قوي ولا حاجة- لكن ماحصلش ان حد اتقدم ايد ورا و ايد قدام ولا حصل اننا رفضنا حد عشان ضعف امكانياته المادية..بالعكس والدي من النوع المتفاهم ...الأزمة بالنسبة لي مش أزمة فلوس أد ماهي أزمة شخصية و أخلاق و تربية و انسان أقدر أعتمد عليه وقت الحاجة...لكن مازال فيه ناس كتيره بتصر الحاحا على ان البنت هي و أهلها هما السبب في كل المشاكل بالمغالاه في الطلبات و تعجيز العريس و القضاء على طموحه و حلمه بالإرتباط و لازم نجمع كل البنات و اهليهم و نعدمهم ضربا بالقباقيب لأنهم السبب في احباط الشباب و افساد مستقبلهم...أنا مابانفيش طبعا ان فيه فئة بتغالي و بتطلب طلبات غير معقولة..في بيت العرايس و العرسان ممكن تلاقوا قصة عن الموضوع ده بعنوان "فرصة نضيفة" ..لكن دلوقتي فيه اتجاه متصاعد بالرضا بأي منظر عشان نلم الليلة و نخلص من الأتب اللي طالعلنا في ضهرنا اللي اسمه البنت



طب نسيبنا من المرحلة دي....ندخل على المرحلة اللي بعدها...الثلاثين و ما ادراك ما الثلاثين..النظرية بتقول...لمي التعابين بأه و خلصينا..أهو راجل و السلام ..تخلفيلك عيلين تربيهم و تذاكريلهم و هو هيقضي حياته على القهوة أو الكوفي شوب أو على النت و خلاص و توتة توتة و يا دار مادخلك شر


ترد النظرية المقابلة...يعني أصوم أصوم و أفطر على فتحي؟...طب مانا كان قدامي اللي احسن منه و قلت لأوانتوا كنتوا موافقينني..طب مانا كده هاعيش بقية حياتي تعيسة ..يبقى أعيش تعيسة براحتي أتفرج على مسلسل القناة الأولى بدل ماتش الزمالك و ماحدش يسرق مني الغطا وانا نايمة بالليل ولا ياكل الفرخة كلها و يسيبلي الجناحات..والا أروح أقبل واحد يعمل فيا كل الحاجات دي لمجرد اني أشيل التهمة عن نفسي و لا انال الللقب الموعود؟


..


و يبتدي الصراع ..طب أستنى و ربنا هيكرمني في الآخر..والا هو نصيبي كده و نلم الليلة باه و خلاص؟



و اللي فاكر ان بنات التلاتين دلوقتي زي بنات زمان ..لقية..يبقى غلطان..في نفس التدوينة السابقة جالي رد على التعليق الرجالي بتعليق بناتي ذو وجهة نظر معاصرة..جديدة ..و جريئة


و الرد كان بيقول


كلمني بقى عن بنات التلاتين.. اللي منهم كتير اشتغلوا واستقلوا وربنا قدرهم يوفر لأنفسهم مستوى معين من الحياة... تقدر تقولي إزاي دول مطلوب منهم يستحملوا صعوبات البداية.. البداية اللي بنات التلاتين خاضوها لوحدهم... ومطلوب يستحملوها مع واحد سنه يتراوح من التلاتين إلى الأربعين.. ما هي بنت التلاتين ما تتأمرش على السن... هي طايلة..
بصراحة... مش معقول يعني بعد ما الواحدة تقضي أحلى سنين العمر لوحدها بتحلم.. تصحى متأخر قوي على حقيقة مطلوب منها تستحمل فيها صعوبات البداية لحد ما تبقى أربعين وللا خمسة وأربعين سنة!!!
صعوبات البداية اللي من ضمن طرق التغلب عليها تأجيل الإنجاب لحد ما نستقر شوية ونخلص من أقساط الشقة والعفش والأجهزة.. تأجيل الإنجاب لحد امتى لواحدة فوق التلاتين؟ لحد سن اليأس مثلاً؟
صعوبات البداية اللي بنتغلب عليها بتأجيل الفسح والمصايف والخروجات من أجل التوفير... لحد أمتى بردوا؟ لحد ما نبقى محتاجين نوفر الفلوس دي عشان فلوس دكتور الروماتيزم ونقاطع خروجات العشا بره عشان الكوليسترول والنقرس وارتفاع ضغط الدم؟؟


يتهيألي كده وضحت إنها هتبقى بداية ونهاية


بصراحة... أنا مقتنعة تمامًا إن اللي كنت هاقبل بيه وأنا طايرة من الفرح وأنا عندي 20 سنة... لا يمكن أستحمله دلوقتي... مش كِبر ولا حاجة... بس اللي تاكله على الفطار ما يشبعكش على الغدا
بنت التلاتين طبعًا لسة نفسها تتجوز... بس مش عشان ضل راجل ولا ضل حيطة... لأنها خلاص اتعودت على الشمس وجلدها نشف واسود وماعدتش الشمس تخوفها ولا محتاجة ضل حيطة تحوشها عنها... أو لأنها خلاص عملت لنفسها الحيطة اللي متحاجاها واتعودت عليها... بنت التلاتين محتاجة جواز من غير صعوبات البداية المادية... كفاية قوي قوي صعوبات التكيف مع الآخر... لأنه مهما كان الحب والتفاهم، اكتشاف الآخر بين جدران البيت الواحد بيكون مختلف تمامًا عن اكتشاف في صالون بيتنا أو بيتهم وفي النوادي والكافيهات والشغل... وما تنسوش إن بنت التلاتين دماغها استوت قوي ونشفت عن بنات العشرين!
بنت التلاتين مش ناقصها صعوبات البداية لأن الوحدة اللي عاشت فيها العشر سنين اللي فاتوا كفاية عليها... واللي استحملت عشر سنين لوحدها تستحمل غيرهم لوحدها بردوا وإلا هتبقى بتغير نوع مشاكلها والسلام.
أنا مش باقول مطلوب فيلا وعربية ولا شقة خمسة غرف وثلاثة رسبشن مكيفة... بس حاجة موازية للي أهلها معيشنها فيه... ما قلنا مش بعد عشر سنين حلم وأمل تنزل على جدور رقبتها عشان تبدأ من الصفر.


ربنا يصلح حال المجتمع والناس كلها ويحسن ختامنا جميعًا إن شاء الله.
عارفة إن نكدت عليكم... بس معلش... ما خلاص.. الشمس ما عادتش بتلسع لأننا اتعودنا عليها!



وجهة نظر باعرضها لأني أعجبت بجرأة صاحبتها- التي لم تصل الى حد كتابة اسمها على التعليق-لكن اللي فاكر ان كل بنات التلاتين مش طايلين و هيرضوا بأي حاجة يقرا التعليق تاني و يفكر



ناس كتير هتقول ..طب مانتوا كده مش ناويين تتجوزوا خالص..أقولهم مش دي وجهة النظر الغالبة..لكن موجودة و بقوة...لذلك وجب التنويه


...

Monday, July 23, 2007

من هنا و هناك...من دلوقتي و زمان

السلام عليكم...اشكر جدا يا جماعة كل الناس اللي بيسألوا عليا لما باغيب ..و يقعدوا يقولوا ..انتي اتجوزتي يا برايد؟..ألف مبروك..مش هتعزمينا..أحب أشكرهم جدا لتفاؤلهم المتواصل و أعتب عليهم لأنهم كل ده و لسه مافهموش سيكولوجية برايد-حلوة سيكولوجية دي أكني مثقفة و بتاع-انتوا يا جماعة مش عارفين اني فضاحية حبتين و لو حصل و اتخطبت و لبست دبلة في ايدي اليمين او الشمال أو حتى خلخال نحاس في رجلي هاعمل مدونة مخصوصة و اسيبلكم لينكها و أكتب فيها كلمة واحدة



اتخطاااااااااااااااااااااااااااااااااااااااااااااااااااااااااااااااااابت



لكن للاسف لسه ماحصلش...المدة اللي فاتت دي كانت عندي حالة اكتئاب على خفيف..عادي يعني كنت نايمة مرة باليل صحيت الساعة 3 الفجر و قعدت أبص للسقف و إكتشفت في اللحظة دي ان بأه عندي 28 سنة و 7 شهور..يعني كسرت ال28 و دخلت بخطى ثابتة و إصرار لا يتزعزع على سنتي ال29..حد هيقوللي و انتي اول مرة تاخدي بالك..أقولكم آه و الله...ساعات الدنيا بتلهي و الواحدة مابتركزش..و فجأة تخبطك الحقيقة على دماغك...شوية

panic attack.


على حبة ضربات قلب سريعة و ضيق تنفس..ورسم قلب و حبايتين اندرال 40 مل


و اهي عدت والسلام..عادي بتحصل معايا مرة كل 6 شهور أو حاجة زي كده..يتهيألكم بأه اني باهرج على طول وضربه الدنيا بالكوتشي..لكن على مين الميكروباص الداير لابد من خبطه..والا كان الحجر الداير باين..المهم يعني فيه حاجة بتدور و لازم تتخبط


في عز إكتئابي وقعت في إيدي أجندة كنت باكتب فيها زمان أيام الكلية..و زمان دي طبعا ما خففتش حالة الإكتئاب لأنها فكرتني اني متخرجة من الكلية بقالي 7 سنين و دخلت الكلية أساسا من 12 سنة يعني أياميها كانت روبي عندها 11 سنة و نانسي 12


و أليسا 45..ياااه ده عمر...ماعلينا ..قعدت أقلب في الأجنده..كان فيها جزء يوميات ..حاجات عبيطة كده من عينة..النهاردة و انا باولع الشعلة في معمل الكيميا حرقت طرف الطرحة بتاعت علا ..كويس انها ماخدتش بالها الا و احنا في الميكروباص و كويس كمان ان الراجل اللي كان قاعد وراها كان مولع سيجارة و لبست فيه...أحسن.اهو خد جزاؤه عشان يحرم يدخن تاني


صفحة تانية..النهاردة وانا في معمل السموم و باحقن الفار بمحلول يا إما ماء و ملح يا إما سيانايد..الإبرة دخلت في بطن الفار و طلعت من ضهرة و دخلت في صباعي..يا ترى إيه أعراض تسمم السيانايد؟...ربنا يستر


يعني ..كانت معظم الصفحات عن حوادث لطيفة زي دي..في جزء تاني من الأجندة كانت الأوتوجرافات..للذكرى الهباب و أيام العذاب..تذكريني إذا لاح لكي نسياني ..عمر اللي فات ماهيرجع تاني..و الكلام الفارغ اللي مالوش معنى ده



في الجزء التالت بأه كانت القصايد...آه أصلي أنا كنت شاعرة زمان..يعني مش شاعرة قوي..بس لو كنت قابلت شعبان عبد الرحيم أياميها كنا هنعمل شغل زي الفل


الأول كانت مرحلة الفصحى و كانت اولى قصائدي قصيدة"قطرات المطر تتساقط" و دي كتبتها في لجنة الكيمياء العضوية بعد الخيمة اللي بنمتحن فيها ماتقطعت و المطر غرقلي الورقة و بهدلت الدنيا لغاية ماجابولي ورقة تانية و بدل ما أعمل فيها زي ماعملت في أول ورقة و أسيبها فاضية كتبت فيها القصيدة العصماء دي و شيلت عضوية أياميها عن جدارة و استحقاق..بس واضح ان القصيدة عجبت الدكتور شمس..لأنه إداني ض بس...بدل ال ض.ج


و اشتهرت في دفعتي لدرجة كبيرة جدا..و من كتر قصايدي الناحجة و المشهورة و اللي ادتني اسم ووزن وسط زمايلي في الدفعة ..مرة واحدة صاحبتي طلبت اني أكتبلها قصيدة تديها لواحد تاني من زمايلنا..تقريبا كده كانوا عايشين قصة حب و اتفركشت..و انتوا عارفينني أحب قوي أخدم في الحالات اللي زي دي


البنت كانت في سكشني و كان اسمها غادة البنت دي كان بيجري وراها كتير لحد ماكبلنت مع الولد ده..شوية كده و بيبو فرقع جيجي و اداها وش خشب ماحصلش..البنت جات لي منهارة و طلبت مني أكتبلها قصيدة تعرفه مقامه و تفكره هي مين..فانفعلت قوي قوي و ادتلها قصيدة باعتبرها جوهرة العقد في تاريخي الشعري كله


ألا تعرفني حقا..........إنني أنا المدعوة غادة


ذات النصائح..........و المواعظ و الإفادة


.لكل من هجره حبيبه.....لكل من جرح فؤاده


لكل من أراد يبكي...و أراد أن يشربها سادة


بعد حديثي اليه يضحك...يخرج يشربها زيادة


و مع ذلك لم اعي شيئا...لم اجني أي إستفادة


فوقعت في شباكك صيدا....كالبلطية أو البياضة


و جعلتي في الليل أبكي...أغرق بدموعي الوسادة


فكان حبك مثل جون...أخرجه الحارس في الإعادة


لكني اليوم استعدت نفسي...فاعلم وافهم يا حمادة


لن يكون قلبي يوما...تحت قدميك سجادة



برايد---1998



يا سلااااااام ..ايه الحلاوة دي..إزاي واحدة موهوبة في الشعر زيي كده تخلت عن موهبتها بالسهولة دي...المهم غادة صاحبتي ادت القصيدة دي للولد من هنا...حول صيدلة بني سويف تاني يوم..صحيح هي كانت فضتله عجل عربيته 3-4 مرات و جرحتهالوا مرتين تلاته و كانت تديله 420 ميسد في اليوم لحد الواد ماطفش لكن لازم برضه القصيدة أثرت ماهو كلام زي الرصاص



القصيدة التانية بأه دي كانت في مرحلة العامية..و الله انقلبت على ضهري من كتر الضحك...يخرب عقلك يا برايد اكن الموضوع كان في دماغك من أياميها..و قلبك كان حاسس بكل اللي هيجرالك..كأني لابسه نضارة معظمة و بابص بيها على المستقبل


اتفرجوا اتفرجوا كنت كاتبه ايه؟



أنا مش عايزاه فارس أبيض ...يركبلي حصان والا حمار


أنا مش عايزة حلاوة هيثم ..ولا عضلات عبد الجبار


ولا عايزاه حالم ورومانسي و يحبني ليل ويا نهار


أنا عايزاه متربي وواعي...يقدر يشاركني الأفكار


***


شوفتوش حاتم.....جالي بهانم...طلعت مامته جايه معاه


يوم ماخرجنا...طنطنا فتنه...ماسكه في ايده و موش سايباه


جابلي هدية قلت الله...قال ذوق ماما حماها الله


قلت لا يمكن تاني أستحمل ..و طلعت أجري بالمشوار


أنا عايزاه مترستأ واعي يقدر يشاركني الأفكار


***


شفت أسامه..قلت يا ماما ..بأه معقول كل دي عضلات


كات خروجتنا..لازم تخلص..بالشلاليت ويا روسيات


قلت له لأه ..ده ليلة الدخلة..لازم في الكراكون هنبات


قلت لا يمكن تاني أستحمل..ده مش راجل ده جرار


أنا عايزاه متربي وواعي يقدر يشاركني الأفكار


***


أم جه أمجد..قلت أتأكد..قبل ما أغرق في التيار


قاللي يا عمري..طريقي و قدري..و قعد ينظم لي في أشعار


قلت و ماله..ده يحسسني...اني أميرة ليل و نهار


بس زهقت..افلام وأغاني..و كلام فاضي مالوش أسعار


قلت لا يمكن تاني أستحمل..انا كده حاسة اننا بانهار


أنا عايزاه مترستأ واعي يقدر يشاركني الأفكار



برايد-1999



---------------------------------------------------------------


p.s


i wanna thank ms.alison dunham for accepting my apology for using a copyrighted photo from her site http://advicesisters.net as my profile pic..& i wanna repeat that i didn’t know it was illegal to do it..& i assure her that i didn’t mean any harm

Sunday, July 08, 2007

هيا بنا نصطاد


هاي يا جماعة..ليكوا وحشة و الله...بأه انا بأه ايييه..بعد ماقلتلكم على موضوع الكتاب ده المرة اللي فاتت انهمرت الرسايل على الإيميل بتاعي كالسيل..اللي مش مصدق..و اللي فاكرني باهرج ..و اللي بيتريق...لكن دول مش موضوعنا ..موضوعنا بأه هي مجموعة "كتع" اللي اتكونت بسرعة شديدة بعد أيام من نشر البوست...كتع ده إختصار ل "كيف تصطادين عريسا"..ماتخلوش مخكوا يروح لبعيد


المهم قسمنا نفسنا مجموعات ..مجموعة تدور على الكتاب و مجموعة تستقي المعلومات من الستات اللي قصص جوازهم ناجحة و مجموعة تبلغ البوليس...يووه قصدي مجموعة تعمل حصر للمعلومات و تلخصها بطريقة مبسطة و بعد كده يمكن احنا بأه اللي ننزل كتاب


أنا عن نفسي كان شاغلني قوي الموضوع ده و كنت مستغرقة فيه بكل جوارحي ...اللي أعرفها و اللي ماعرفهاش و عملت جولة تانية للبحث عن الكتاب ..لكن بدون أدنى بارقة امل ..تقدروا تقولواكده اني رجعت بخفي حنين -الناس المثقفة اللي بتبقى مستعدة كل مرة أسأل سؤال غبي زي ده يبقوا برضه يقولولي ايه موضوعة الأخ حنين ده- وكنت خلاص على آخر شعرة قبل ما يجيلي حالة احباط مزمنة و اكتئاب موسمي حاد ..ماهو واضح جدا ان انا فاشلة في موضوع الجواز ده.لكن كمان أبأة فاشلة في البحث عن الكتاب اللي بيشرح طريقة الجواز..لأ ده كتير قوي...قلت أخلع نفسي من المجموعة الأولانية و أنضم للمجموعة التانية و يمكن الموضوع يجي بفايده

أنا كل اللي محتاجاه حد بس يقوللي يا جماعة ..إعملي يا برايد و انا هاعمل على طول..دانا حتى شاطرة و نبيهة و بافهمها و هي طايرة في كل حاجة..مخي بس اللي مصدي و مابيشتغلش في موضوع الجواز ده.محتاج بس شوية صنفرة .و كل شوية يقولولي شدي حيلك شدي حيلك..و انا مش عارفة أشده إزاي...طب بس قولولي و انا أشده على طول

أنا قلت خلاص مافيش غير اولوا الخبرة و الأقربون أولى بالمعروف ..خليني أبدأ بعيلتنا.. يمكن.


أتاريني كنت باقوم بالحوار ده كله بصوت عالي و قدام جدتي

يا دي النايبة ...انتي اتهبلتي يا بت يا برايد والا ايه؟

لا يا تيتة ماتهبلتش ولا حاجة

لأ قولي قولي ماتخافيش..ماهو أنا قلت من زمان من أول ابني ماحب يتجوز الست دي اللي هي أمك...قلتله دي شكلها ضاربة و هتجيبلك عيال كلهم مجانين

ماما مش مجنونة يا تيتة دي ست الكل..هو فيه زيها

أيوة أيوة يا ختى ..مين يشهد للعروسة

لا يا تيتة لا ..ماتقوليش الكلمة دي في وشي أنا خلاص اتعقدت منها

اتعقدتي...أنا قلت من زمان لإبني لما جه يتجوز الست دي اللي هي أمك قلتله دي مكلكعة و هتطلعلك عيال كلهم مكلكعين

أوووه يا تيتة ..قلت لك مامتي زي الفل و بعدين دي جدعة جدا على الأقل عرفت تطلعلها بعريس زي الفل زي بابا ...والا ايه

طبعا أبوكي ده زي الفل ده ابني انما أمك

هاااه

حلوة برضه حلوة ..أهي خلفتكوا و خلاص...لكن قوليلي انتي اتعقدتي خلاص...لأيه يا بنتي..ده النصيب بيجي في ثانيه

ما هو مش راضي يجي يا تيتة ..مش عارفة جاي ماشي من حلايب و الا ايه اللي معطله ...قوليلي يا تيتة انتي اتجوزتي ازاي..يعني كانت ليكي طريقة كده وقعتي بيها جدي والا ايه؟

بس يا بنت اختشي

لا و النبي يا تيتة اديني من خبرتك ..أصلي خايبة قوي في المواضيع دي

مع ان أمك بالذات استنصحت في الموضوع ده.نهايته.يا بنتي مافيش راجل بيتجوز كده بمزاجه لازم حد يزقه ..أمه بأه إخواته...و لو لا دول ولا دول يبقى العروسة نفسها

يا سلام ع الخبرة يا تيتة ..الدهن في العتاقي صحيح

أمال ايه..إسأليني أنا..دانا كنت زمان ايه..يا سلام ع الأيام..دانا كنت مبهدلة الدنيا

أيواااه مبهدلاها ازاي بأه اشرحيلي ربنا يخليكي

ببصي انا هاديكي خبرتي ..بس ده ايه يبقى بيني و بينك ماتحكيش لحد و تضيعي هيبتي قدام العيلة

(آه دا واضح ان الموضوع خطير ..اديني خبرتك يا تيتة( أنا شكلي هانصدم في العيلة دي

أنا كنت بأه حلوة أحلى بنت في المنطقة

مش باين يعني

ايه؟..بتقولي ايه علي صوتك

لا مافيش حاجة ..بقول ماهو واضح

آه كنت أطلع بس في المشربية أملى القله و اطول شوية يكون الشارع انقلب و ليلتها يكون عند أبويا 4 عرسان

بس كده تطلعي تدلعي و تملي القلل

و هي دي كانت شوية مانا كنت باطول شوية و أدلدل الضفاير اللي لون الدهب من الشباك و يهفهفوا مع كل هبة هوا و احنا الصراحة كان عندنا قلل كتير

طب و اللي ماعندوش قلل زي حالتنا يعمل ايه

يعمل ايه يعمل ايه؟..مش عارفة يا بنتي و الله صحيح مانتو جيل غلبان ماعندوش قلل



عمتي فادية و بسبب هوايتها المفضلة في تلميع الأكر سمعت الحوار

قلل ايه يا ماما اللي انتي بتعلميها للبنت؟..بصي يا برايد يا حبيبتشي أنا بأه كانت عندي طريقة ماتخرش الماية

خير

كان عندي حتة جيبة ميكرو كده حمرا و معاها بوت طويل و انتي عارفة الرجالة بأه و اللون الأحمر..أمشي بيها بس خطوتين في شارعنا بهدوء كده وواحدة واحدة أشتري حاجة من هنا ..حاجة من هنا ..أركب تاكس أنزل منه ..أتلحلح شوية يعني ...يكون باليل عند أبويا 5 عرسان

مرة واحدة

مرة واحدة...هو جاب جوز عمتك الا هيا

طب و يا طنط واللي مابيلبسش ميكرو جيب ولا حمرا ولا خضرا يعمل ايه

يعمل ايه يعمل ايه...و الله مانا عارفة...صحيح دانتوا جيل غلبان ماعندكوش ميني جيب

كويس جدا...ماطلعتش أنا منكم بحاجة مفيدة يعني أروح دلوقتي لهند بنت اماني يمكن أطلع منها بخطة تنفعني

اسمعي بس استني انتي رايحة فين ..مافيش غير عمتك راقية دي بالذات أكيد عندها والا مليون خطة انتي عارفة دي اتقدملها كام عريس

مش المهم الكوانتتي المهم الكواليتي و بعدين الأهم ان حاجة تتم

ماتقلقيش هيا دي اللي هتجيب المفيد


و طلبنا طنط راقية في التليفون ..اتأخرت شوية عشان ابنها كان بالع مسمار و جوزها كان متجبس بعد ما كسرتله ضلعين و هي بتهزر معاه بعد خناقة بسيطة كده بينهم و بنتها كانت واقفة على سور البلكونة و مصممة تنط زي ثبايدر مان..جوازة ناجحه جدا جوازة طنط راقية هي دي اللي هاتجيب النصايح التمام

و جت طنط راقية

بصي يا حبيبتي انا كان نفسي أقعد معاكي من زمان خدي مني بأه النصيحة التمام..الرجالة دول عاملين زي الطبلة فاضيين من جوه و لازم تسكيها عشان صوتها يطلع

يعني ايه؟

بصي انتي تعمل زي ماعملت مع عمك محسن..تنقي الراجل اللي يعجبك و تقومي ماشية وراه في الشارع

أعاكسه يعني

يا بنت انتي مخك فين لا تخليه هو يعاكسك

بالعافية يعني

يا دي الغباء ..لا يا ستي تطلعي قدامه و بعدين تلفي و طاخ

طاخ؟

تديله حتة قلم يخلي ودانه تصفر أسبوع

طب ماهو يمكن يردهولي ..أتهزق انا بأه و أنضرب في الشارع

لا يمكن..الراجل أول مايشوف كف ايد واحدة ست و هو نازل يطرقع على خده بتتغير حياته تمااااما

يا سلام

أمال ايه..العبط يقولولك الطريق لقلب الراجل معدته ..كلام فارغ الطريق لقلب الراجل بيبدأ بخطوة واحدة..كف ايدك و هو معلم على خده..أمال أنا عايشه أنا و جوز عمتك في سعادة بقالنا 9 سنين ازاي

و هو ازي دراعه هيفك الجبس إمتى

قريب ان شاء الله..انا عارفة ايه ده ؟...رجاله خرعه

طب و بعدين يا طنط يعني أطرقعله يخطبني

لا يا خايبة انتي بعد ماتطرقعيله تديري تنادي أمين الشرطة و تقوليله الراجل ده بيعاكسني جره ع القسم ..يقوم العريس يخاف و يفضل يتجوز بدل ما يتسجن

يعني أبتزة و أتجوزة بالإكراه

يوووه ..هتعمليلي فيها أم ضمير..هيا الرجالة مابينفعش معاها غير كده..اسألي مجرب

طب و يا طنط لوما فيش أمين؟..هو أصلا الأمين ده شكله ايه؟ أنا عمري ماشفت واحد طول حياتي

لو مافيش أمين ؟..لو مافيش أمين؟..أهي دي بأه ماعملتش حسابها زمان كان دايما بيبقى فيه أمين..ربنا معاكو دانتوا جيل غلبان ماعندكوش امين



حاولت قدر الإمكان أنفذ النصايح على أد ما قدرت


مالقيتش قلل ..بس لميت كل قصاري الزرع و قعدت أسقي فيها في البلكونة ماحصلش حاجة

ما قدرتش ألبس ميكرو بس جيبت بوت أحمر و قعدت اتمش في شارعنا من صباحية ربنا لآخر اليوم لغاية ما رجلي فقفقت و بررررضه ماحصلش حاجة

مشيت في الشارع و اتديرت عشان أضرب اللي ورايا بالقلم و قبل ما أرفع ايدي كان رافع عليا مطواه و سارق الموبايل..آآآآه لو كان بس فيه أمين شرطة..لكن نعمل ايه نصيبنا...جيل غلبان ماعندوش أمين


باختصار كل النصايح طلعت فاشوش ..أو يمكن انا اللي حظي فاشوش

ده مش يمكن ..ده أكيد

بعد الإجتماع الأول لجمعية"كتع" المصرية القومية الإشتراكية العظمى و بعد حصر كل النصايح اللي لموها العضوات من أهاليهم و زمايلهم و حتى بعض الإميلات و التعليقات على البوست اللي فات عندي هنا..و بعد تجربة بعض النصايح دي اللي معظمها أثبت فشلها الذريع ..و بعد الفشل في الحصول على نسخة واحدة من الكتاب الموعود...قررنا ان إجتماعنا الأول يبقى هو إجتماعنا الأخير...و على كل مواطن تدبير وسيلة جوازه بنفسه


مع مراعاة ان المنحوس منحوس...ولو شبكوه في الجواز بدبوس