Monday, October 06, 2008

البت نهى إتجوزت ..بس مش بالساهل يعني


كل سنة و انتوا طيبن بمناسبة رمضان و عيد الفطر السعيد و أكيد طبعا ما كانش ينفع نحكي و ننم في أي مناسبة دينية ..لكن لأن الموضوع زي ما انتوا عارفين أساسا وطني فماكانش فيه أنسب من النهاردة عشان نكمل الحكايةوقفنا عند إيه؟..آه كنا وقفنا في دايرة حوالين البنت السهنة التي لا تتمتع بأية روح وطنية و عايزة تبوظ مخطط التنمية بتاع البلد و رفعنا إيدينا و حلفنا القسم

أحلف بسماها و بترابها..لهشلفط وش اللي خطبها
..

لكن لأ..و هو ذنبه إيه؟..هي السبب ..شيرشيه لا فام ..إسألوني أنا..أيوه أيوه و كمان خلتني أرطن بالفرنساوي عشان
كده لازم أتصرف بسرعة أنا بقيت باقول كلام غريب و بتصرف تصرفات أغرب ..و لازم أنهي الموضوع ده يا إما مش هلاقي نفسي


فلاش باك بقه سريع كده..ليلة الفرح البني ده و أنا راجعه من الشغل فضلت أفكر و قلت لنفسي يا بنت يا برايد يا وطنية يا قمر إنتي ..البلد محتاجة كوادر و الحزب (حزب كتع الإشتراكي الوحدوي طبعا) محتاج دماء جديدة و انتي مش هتعملي زي الناس الغير متفتحين و ماتعمليش حساب للمستقبل و تربي صف تاني قادر على تحمل المسئولية لوجدت في الأمور أمور..لكن ألاقيه فين الصف التاني ده؟..أجيبه منين الجيل الجديد؟ ..فجأة قبل ما أوصل باب شقتنا لقتني باطير في الهوا و أضرب شقلباظ ماحصلش قبل ما أستقر على الأرض في وضع زرع بصل الشهير..بابص حواليا لقيت الأرض مليانة بلي و في لحظة ظهر قدامي الوش البريء ذو الإبتسامة الشيطانية ..هند بنت أماني..أييييوان هي دي..البت شخصية كده و مركز و بأه ليها شنة و رنة في المنطقة ..عاملة تنظيم عصابي مكون من كل عيال الحي و طوول النهار و الليل مقالب في الناس..بس البت عليها عقل إيه ..في الشدة شديد و في الأذية مؤذي..وجدتها..هي دي يا برايد ..خير خلف لخير سلف..أخدت البت من إيديها ..طبعا بعد ركبتين في قصبة رجلي و فاصل من الخربشة العض و رستها ع المطلوب بعد ما لهفت 15 جنيه عشان تشتري بيهم مصاصتين(عيال غلابة و الله عايشين في الغلا ده إزاي) و يوم الفرح إستأذنت أماني اللي كانت هتزغرط و قعدت تحلف عليا آخد جوزها بالمرة و يحلوا عن سماها الإتنين ..لكن أقنعتها بالعافية إني آخد البنت لوحدها و أبأه آخد الأستاذ فوفو أفسحه في فرصة تانية إن شاء الله


عودة ليوم الفرح الكحلي ده..وقفنا إحنا جيل الرواد حوالين العروسة و ماعداناش طبعا إننا نلف لفتين كده و ناخد كام منظر قدام الكاميرا ..لعل و عسى..و إدينا للبنت نظرتين سيبوا ركبها و سيبنا المرحلة الأولى و جبهة القتال لجيل الغد..البت هند بقه تعجبكم قوي ..في ثواني كانت متعرفة على كل العيال اللي في الفرح و ضمتهم لصفوف المقاومة و راحت مرتبة قواتها و الكل أخد مكانه في قاعة الفرح و نص ساعة و كانت مدية إشارة الهجوم


رنا الطفلة البريئة صاحبت الملامح التي تدل على إن أمها بتدربها لتكون أول سفاحة على مستوى الجمهورية و القارة الإفريقية و يمكن بعدها تحترف, تمركزت جنب العروسة و العريس وأول ما بدأوا يشربوا الشربات افتكرت إنها ماسلمتش على العريس (ذوق و الله) ماتعرفش إزاي بقه كوباية الشربات بتاعة العريس فجأة إستقرت في حجر العروسة و الفستان الأبيض بقه أبيض في فوشيا (على فكرة بقه أحلى بكتير.. كنت تحسه فاضي كده و مش مدندش كما ينبغي ..إيه مدندش دي؟..ما علينا) الفرح كله سكت و بص للبنية على أساس إنها هترقع بالصوت بأه و تقول له إنت مابتشفش و يقوم هو رازعها يمين طلاب مكن و نخلص من الليلة السودا دي و الراجل أبوصوت وحش بتاع الدي جي اللي صدعنا ده..الخطة كانت على وشك النجاح و البت لسه هتصرخ و احنا استعدينا نزغرط لكن لقيتها بصتلنا كده بطرف عينها و شكلها فقست الموضوع ..البت السهنة سهمت شوية و قامت راسمة إبتسامة واسعة


فداك يا حبيبي


نعم؟..فداك ..و يا حبيبي؟.هو ده كل اللي قدرتي عليه؟..فين "ما تفتح يا أعمى؟"..فين "إنت انتصيت في نواضرك؟"..فين " إنت عارف الفستان ده بكام ..ده تمنه يشتري أهلك كلهم"..إييييه..عليه العوض في المرأة المصرية و قاموسها اللغوي الفخيم
ما علينا ..أنا لسه مافقدتش الأمل في زهورالمستنقع..قصدي المستقبل


مروان طفل وديع فيه تاتش من كمال الشاذلي و هو صغير..لئيم كده و سهن و بنضاره (ده مروان طبعا) تمركز (برضه) جنب ترابيزة التورتة و بمنتهى البراءة اللي في الدنيا مد إيده على مفرش الترابيزة عشان كان عايز يلمع بيه إزاز النضارة (يمشي بيها مغشلقة يعني؟) مد إيده و في سره حلف القسم و هوب كانت نهى واخدة التورتة ال5 أدوار في حضنها و مستقرة على الأرض في وضع الكاتب المصري الفرعوني القديم ..الحممممد لله أكيد دلوقتي ترجع لعقلها و تعرف إن الجوازة دي نحس و تنفد بروحها و الا عريسها يشوف منظرها كده يعرف إنها شرارة و كل مناسبة ليها حادثة و على نهاية أول سنة جواز هتكون اتشوهت و يبقى مصيرها تطلع في إعلانات ميلودي" أول إنجليش أول ذا تايم"..و يقوم حادفها اليمين و ربنا يستر و ماتوطيش و ييجي في حد تاني و نخلص بقه من الليلية الزرقا دي و البوفيه اللي جايبينه تبرع من بنك الطعام فرع الصومال ده ..لكن البنت الصفرا دي أبد..اتاخدت كده شويه و بعدين بصتلنا و فجأة اتفتحت في الضحك و قعدت تاخد حتت من التورتة من على الفستان و تأكل المأسوف على شبابه في بقه


آااه ما بدهاش ..احنا كده لازم نعمل معاها الكبيرة بأه ..إديت الإشارة لفريق الرواد عشان ينتشروا و إضطريت آسفة إني أدي الضوء الأحمر لهند عشان تبقه ضربة مزدوجة مالهاش رجعة..البت هند إتلفتت حواليها و مدت إيديها على شمعة محطوطة جنب الكوشة و نزلت (بمنتهى حسن النية) تدور على قرش وقع منها في وسط الزحمة (مش باقولكم جيل غلبان) ..القرش كان وقع فين بأااه؟..إسم الله عليكم..تحت جيبونة نهى ..نزلت البنت الرقيقة دي و أنا متابعاها و قلبي واقف في وسط زوري من القلق عليها لحسن حد ياخد باله منها و بعدين يمكن ياخد منها القرش..قربت البنت م الفستان بالشمعة..قربت قوي و لسه هتنطلق أول شرارة و تمسك في الجيبونة ..بارفع عيني لقيت نهى أخدت بالها و سحبت الفستان بسرعة و بصتلي بصة ..عمري ما هنساها..فزع على استغراب على جملة بتطوف جوه عينيها الإتنين بتقول (كده يا برايد؟) و راحت زي ما تكون خارت قواها (أيوه هما بيقولوها كده) و قعدت في ركن القاعة البعيد و هي عمالة تتلفت حواليها و كأنها بتقول "كلكوا عليا والا إيه؟"..صعبت عليا المضروبة..رحت قعدت جنبها ع الأرض ..رفعت عينيها و بصتلي و فجأة حطت راسها على كتفي و إنفتحت في العياط ..بابص بعيني في أنحاء ساحة المعركة لقيت العريس بيرقص هو و أصحابه و هو ده كل اللي همه ..أمه و أمها بيلفوا بالشبكة يفرسوا في المعازيم و هو ده كل اللي يهمهم ..المعزيم واقفين يلغوا في البوفيه و ده كل اللي هاممهم ..حسيت إن البت دي غلبانة و ماحدش حاسس بيها غيري..تحركت بعضا من المشاعر الإنسانية اللي كنت مخبياها تحت سجادة البطين الأيمن آخر مرة و أنا بانضفه فأطلقتلها العنان ..و في لحظة عدم صدق مع النفس رفعت إيدي إشارة بانتهاء العمليات العسكرية و إيقاف الجزء التاني حرب الإستنزاف ..


سماح سحبت فلوسها من إيد الكهربائي اللي كانت اتفقت معاه يعملها ماس كهربائي محندق كده و يولعلها في المجلس..قصدي القاعة..رحاب سابت ودن أم العريس بعد ما كانت عمالة تحكيلها حكايات عن البنت ما اعرفش هي إيه (ربنا يستر على ولايانا) ..و نيفين صرفت نظر عن كعبلة العريس عشان يقع في اتجاه منى و هي مستعداله بسكينة التورتة..جم البنات و هم مستغربين و اتلمينا كلنا حوالين البت اللي شغالة شحتفة و نهنهة
خلاص ..قومي إخفي و اتجوزي بدل ما أرجع في كلامي
البنت ماصدقت و قامت جري و كملت الفرح ..بعريسها بفستانها بتورتتها بشرباتها ..إيييه..أهو الواحد يعمل الخير و يرميه ع الأرض..معلش بأه يا مصر..كان بودي أخدم و الله لكن أعمل إيه في قلبي الرهيف ؟البنات ماكانوش مقتنعين باللي أنا عملته و كان لسه باين على وشوشهم أمارات الإمتعاض
كده؟..و احنا اللي فاكرينك قوية؟
جبتي الضعف ده منين؟

ده كان خلاص هايلبس في سكينة التورتة
معلش بأه يا جماعة..البت غلبانة و منكسرة و صعبت عليا ..و بعدين أكيد هتقدر إن رقبتها كانت في إيدينا و سيبناها بمزاجنا..دلوقتي تشوفوا
عدت الليلة الرصاصي و جت آخر لحظة في الفرح ..لحظة البوكية ..مسكت البوكية و إدتنا ضهرها ..شوية و لفت و بصتلي عشان تحدد موقعي بالظبط و غمزتلي..يا سلااام..أنا قلت كده برضه..هو ده الإمتنان ..هو ده العرفان بالجميل ..يا فرحة مصر بيكي يا نهى ..وقفنا كلنا صف واحد و كل واحدة مستعدة تلقف البوكيه ..لكن أنا الوحيدة اللي كنت عارفة إنها هترميهولي و هوب في لحظة راحت لفة ناحيتي و بعزم ما فيها و طااااخ..بالبوكية في وشي و أخدت بعضها و طلعت جري على بره..ما دريتش بنفسي غير و هما بيعملولي كمادات على عينيا و بيحاولوا يشوفوا صرفة في الفتحة التالتة اللي ظهرت في مناخيري


هاااه؟..مش دي اللي كنتي بتدافعي عنها ؟


مش كان زماننا ولعنالها في الفرح؟


معلش معلش..مش ليها بيت و فيه أشياء قابلة للإشتعال؟..مش ليها ستاير و كنب..مش ليها جوز دلوقتي؟..بت يا هند ..خدي معاكي سكينة التورتة..بكره هنحتاجلها ..و برضه مش عشاني...كله عشان مصر

100 comments:

Anonymous said...

اكيد ناس كتير هتعلقلك عليها
بس بجد بسم الله ماشاء الله عليكى
بجد جباره

احنا عملنا اللى علينا والباقى على ربنا
المره اللى جايه اندهوا لرافت الهجان
دى مينفعش معاها غير كدا

وكله علشان مصر ام الدنيا

دعاء صلاح

Snakodus said...

أول واحد قبل الزحمة على طابور العيش

جبهة التهييس الشعبية said...

ههههههههههههههههههه

الا ايه اخبار زوزن؟ اوعي تكون اتجوزت هي كمان

جبهة التهييس الشعبية said...

باقول لك صحيح
ما تبقيش تغيبي
بتوحشيني

Anonymous said...

ممتاز أختي الحبيبة , أول مرة أشارك و صارلي زمن ما زرت المدونة و فرحت و انا برجع و بلاقي انو صار نشر لكتاب و ماشاء الله هذا التطور كلوا
بتمنالك كل التوفيق و انتي ما شاء الله حبوبة اوي يا ريت نشوفك عروسة بأقرب وقت
بدنا الكتاب بالمغرب أكيد رح يحقق مبيعات خيالية ههه لأنوا نفس المشاكل بالظبط بيعاني منها شبابنا
ناطرة ردك
أختك من المغرب

مهندس مصري said...

مش عارف اقول ايه غير
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

مهندس مصري said...

و متختفيش كتير كده
ما كانتش عشرة بلوجر
اللي تنسيها كده بالساهل
و لا المدونة بقت هامشية في حياتك و لا ايه ؟

يــوم جــديد said...

يا نهار أبيض
ولا كان باين عليكي حاجة يا برايد
جبتي الشر دا كله منين
قصدي الطيبة دي كلها
انتي هتسكتي للبت نهى دي ولاايه ؟؟؟
مش كفاية ما يصعبش عليكي سهن يا أمي اسأليني أنا
آدي نتيجة طيبتك
ألف سلامة على فتحات مناخيرك
وحشتيني أوي

mostafa rayan said...

غادة يا عزيزتي واضح من البوست مدى حبك للغالية مصر
- طبعا بضم صوتي للجماهير وبطالب بعدم تطويل الغيبة دي

ojg said...

هو قلبك الحونين ده يا برايد اللي موديكي في داهيه
يا بنتي كده مش هينفع

عجبتني فكرة ادخال الدم الجديد

هو ده الصح

جيل المستقبل

هو الأمل

:))

حاتم عرفه said...

ههههههه

الافترا وحش..

ربنا يقوي جبهتكم وجمعيتكم
وينصركم على من يعاديكم

تحياتي

Anonymous said...

كل سنة و أنت طيبة , و يا ريت ما تتأخريش تانى كتير كده لأنك فعلااااااا فعلااااااااا بتوحشينا مووووووت .
زيزى

Queen Diamond said...

ايه المعركه الحربيه دي....

هو ده حدث بالفعل ولاخيال؟؟

Randa El- Adawi said...

يا جمال الوان الليلة دى
بنى وكحلى ورصاصى
وفستان ابيض فى فوشيا
وسامحتوها
وجالكوا قلب
وعادى خالص
وكله علشان حبيبتنا

ذاكرت النص اهو اى سؤال
هاهاها
---
بس فعلا انا مع القول الشهير ان العروسة اكتر حد مظلوم فى الفرح
مش كفاية الفستان اللى شيلاه دا
ودرجة حرارتها
وكمان خلتينى اتخيلها
نفرتيتى بتتشمس
مع التورتة
بجد غلبانة غلبانة

وتستحق اغنية الارض لو عطشانة فى اخر الفرح

رضوى عمرو خالد said...

ههههههههههههههههههههه
بجد البوست تحفه يا غاده
ربنا يسعدك يا رب

Dalia w Ahmed said...

جميل أوي ودمك خفيف أوي وعليك مصطلحات تحفة :)
كله كوم وخارت قواها دي كوم تاني :)

REESH said...

جبيلها ببش وحقنة شرجيه ارحميهم يمكن يجيبواعيال تجنديهم او تخليهاتقطع الخلف ياريت تزريني
fromme-tou.blogspot.com زروني كل سنة مرة

ايمان اسامه محمد عواد said...

و حشتينا يا غاده
بس خلى بالك حايجيلك يوم قريب ما دام انت اللى تلقفت البوكيه
حتى لو كنتى لقفتيه بمناخيرك
بس ساعتها حاتكونى مضبطه و عارفه تحتاطى لنفسك ازاى من عصبة الامم دى هاهاها

انسانةعادية فى عالم مش عادى said...

الف حمدالله على السلامة
كل سنة وانتى طيبة
من اول رمضان وانا مستنية باقى البوست تسلم ايديكى
متغبيش كتير علينا

Anonymous said...

هههههههههههههههههههههه
دي حرب فعلا

احييكي يا برايد
اروع حرب في فرح شفتها قبل كده


تامر محمد

Amr said...

كنت متخيل انها تعمل فيكم مقلب وتحطلكم صوارخ ولا بمب في البوكيه, بس طلعت طيبة :D

صدى الصمت said...

كنت مـختفية بقالك فترة بس لما كتبتى نزلتى بتقلك كالعادة
الحقيقة بوست رائع ولذيذ جداً

nasimlibya said...

أحلف بسماها و بترابها..لهشلفط وش اللي خطبها
****************************************
حلوة حلوة هههه موت من الضحك شن هالحزب يابنتي باب العضوية مفتوح ولا مسكر ردي عليا ع خاطر نفكر نشترك مدام مخشيتش القفص لسه !!!

Anonymous said...

انت بحق انسانه جميله ورائعه انا للأسف ولسوء حظى مكنتش اتابع مدونك مع انى شاركت فى بحث عن المدونات المصريه لكن انا كدا ديما بتفوتنى الحاجات الحلوه لكن انا عرفتك من خلال لقائك فى برنامج اتكلم كنتى بجد ممتازه بس لو تكرمتى تردى على وتقولى لى اسم مدونة اللى كان مستضيفينه مع حضرتك فى برنامج اتكلم لأنى نفسى اشوف مودنة لأنه موده من مودى وممكن بعد اذنك تقبلينى صديق لمدونتك الرائع اسمى مؤقتا سيكو سيكو

dramaqueen said...

مش ممكن يا غادة تجننى
مبطلتش ضحك
تسلم ايدك وعقلك

Eman said...

هههههههههههههههههههههههههههههههههه
عسسسسسسسسسل ، اسلوبك يهلك من الضحك بجد
بس البت نهي طلعت سهنة نزلت الدمعتين علشان تستعطفك وتخرجي حبة الانسانية اللي كنتي شيلاهم لوقت عوزة

وراحت حدفاكي يا بريد بالبوكيه في عينك

و سبتيها تمشي بسلام

لا ، ما ينفعش ، انا عايزة أعرف هتخدي بطارك ازاي :)

دعاء said...

دي ولا حرب أكتوبر

بس أنا صعبت عليا البنت في النهاية رغم كل شيء

ثم أنك اخدتي البوكيه في الاخر حتى لو في عينك بقى أو مناخريك خلي ظنك حسن وقولي ان جه منها غلط وكان قصدها تديهولك في أيدكي

بجد أسلوبك تحفة يا غادة

ده أول تعليق ليا هنا بس متابعة من فترة المدونة وبعديه برضة قريت الكتاب

ومتغبيش كتير كده

3omda said...

و الله عليكى حركات يا برايد بس الغلبان اللى بيتجوز ده ذنبه ايه
ولا عشان ما اتجوز واحده من شلة معاليكى القومية

ربنا على البطالة و قطاع الطرق و خاطفين العرسان

على فكره هم دلوقتى بقوا بيحبسوا اى واحد على وش جواز بسبب المدونه دى و ربنا يستر و ميطبوش عليا

حاجه اخيرة بس هو سؤال يعنى

تتجوزينى؟!!!
:D

EMI said...

هاهاهاهاهاااااااااااا
يجنن البوست ده يا برايد
انا حضرت فرح شبه الفرح اللى انت كنت حتدمريه ده . و بجد بسال نفسى دلوقت هو اللى كان بيحصل ده كان قضاء و قدر ولا بفعل فاعل؟؟؟
اصلا لما جم الجرسونات يوزعوا الشربات على المعازيم واحد من الجرسونات دلق الصنيه اللى كان شايلها على الارض فى الحته اللى المفروض حيرقص فيها العريس و العروسه و بعدين جم ناس من الفندق و حاولوا ينضفوا الارض لكن الارض خلاص كانت لزقت و لما ابتدى العريس و العروسه يرقصوا اتزحلقوا فورا على الارض هما و المعازيم فى شكل شقلبازات متتاليه و الفستان الابيض بقى خليط من البنى و الاحمر و الاسود و حاولوا ينضفوا الارض تانى لكن الناس اللى كانت بتنضف كانوا بيتزحلقوا هما كمان.و العروسه اتبهدات و شعرها فك و عرق و كتكت كده و كانت عامله زى ما تكون كانت فى سباق فى الماراثون

صاحب المضيفة said...

كل ده يا برايد

ومال لما تتجوزي هايعملوا فيكي ايه

الجيل الجديد والصف التاني هايعمل البدع

خلي بالك من كده كويس


:)


تحياتي

موناليزا said...

تصرف جامد والله من العروسة ده اقل واجب بعد كل اللى حصل فى الفرح
الا لو كنتى مكانها وصحباتك عملوا معاكى كده كنتى هتعملى ايه؟؟؟

أُكتب بالرصاص said...

يا غادة قلبك الطيب دا هو اللي هيجيبك ورا يا بنتي

انا لم اتعاطف مع نهى بطاطا
قصدي بتاتا

وكنت اتمنى انك تفنذي المخطط للأخر
علشان ننقذ العريس

واهو ناخد فيه ثواب ،
اليست نفسا ؟ رهو روح برضه

وخسارة فيه الجواز وعذابه

صندوق الاسرار said...

مش ممكن يا برايد انا كنت حاسة انتى حسستينى انى بتفرج على ملحمة شعبيه
لا والا القسم
احلف بسماها وبترابها لهشلفط وش اللى خطبها
انتى جبتيها ازاى دى
بجد البوست دة جامد موووووووووووووووووووووووووووووووووت
:)))))))))))))))))))

بس بجد عندك خيال علمى واسع D:

صندوق الاسرار said...

اه صحيح انا كمان بضم صوتى لصوت اخوانى واخواتى فى التدوين بانك متتاخريش علينا تانى ابدااااااااااااا

والا هنشتكيكى فى محكمة المدونين الدوليه بالتقصير فى حق قرائك واهمالهم وهنطالبك بالنفقة
ههههههههههههههههههههههههههههه

سوالف said...

انتي عسسسسسسسسسسسسسسسسسسسسسسسسل

مصري جدا said...

انتي جبااااااااااااااااااااااااااااارة

ياسر said...

يا مفترية

هيقعدلك يوم فرحك و ربنا يستر عليك

عقبال ما نفرح بيكى يا غاده

Anonymous said...

فينك يا بربر ايه الغيبة دى كلها وحشتينى جدا

كل سنة وانتى طيبة
وصدقينى والله الجواز مايستاهلش وجع القلب ده كله وبكرة تجربى وتعرفى ان
شاء الله

وفى النهاية بهدى لك وللبت نهى اغنية ماتحسبوش يا بنات ان الجواز راحة

سلام يا عسل
عروسة جديدة

tamer.sala7 said...

علي فكرة انتي تقريبا كدة اخدتي فرقة تدريب في المخابرات او الموساد

بس خلي بالك في ناس بتقول
اللي عليي عليي يا باشا

هو البلوج مش بيوحشك ولا ايه ؟؟
حرام عليكي بلاش تطولي كدة
علشان الناس الوحشة اللي بتحقد دي متستغلش الظروف

aboooood said...

إنت متوقعة إنها هتفتحلك في الصباحية هية عملتها وهربت خلاااااااااص هاهاهاها.
أنسى موضوع الستاير والكنب والسكينة....

شفقة هانم واحسان بك said...

انتى هايلة يا برايد بجد اسلوبك ممتاز وممتع وفيه خفة ظل فظيعة
شفقة

الجواز و سنينه said...

و الله يا بنتى مش عايزه اقولك يابخت اللى هايتجوزك
كيد مش هايبطل ضحك
تسلم اديكى
و ابقى قوليله ان فيه ناس بتقوله ربنا يسهلك يا عم

Anonymous said...

i don't know what to say except that u r sooooooooo talented and very funny

وومن said...

برايد

الفرح دة مسخرة بجد وواضح ان كتع ليها مستقبل ان شاء الله

عملتيلي ايه في طلب الإلتحاق صحيح انا مستعدة اجند صف تاني وتالت

والمخالفات عليا

بجد هايلة ودمك زي العسل ومتتاخريش علينا بتوحشينا

Anollipian said...

انا سمعت كتير عن البلوج بتاعك و دورت عليه بس ملاقيتوش
و سبحان الله لقيته انهارده بالصدفة
بس بجد طريقتك تحفة
:D
ماشاءالله ..ربنا يكرمك :)

Asmaa Sinai said...

إزيك يا غادة
كل سنة وانتي طيبة الأول
بس ايه الحنية اللي عندك دي ، انا لو مكانك مكنتش اعدلها اليوم ده خالص
لازم تقوي قلبك اكتر من كده
ههههه
يلا مستنين كتاباتك الجديدة

Anonymous said...

bgad ana mayta mn el d7k dlw2ty eh el ebda3 daaa , w a7la 7aga fel lyla deh kolaha boquet el ward ya salam 3rft ta5od btarha sa7e7 :D .

w bardo 3o2balek ya bride lel marra el milion b3d el dishelion :D

menoshet

shimaa said...

غاده ربنا يزرقك بالخير واحنا معاكي البلوج بتاعك جميل وانتي بجد شجعتني اني اكمل اني اتكلم عن الي حاسه بيه لاني كنت بكتب من زمان احساسيي ومشاعري بس كنت بمسحها

sara said...

جامده آآآآآآآآآآآخر حاجه،عندك اكسبرشنز مميزه ، وافكار سودا هههههههههههههه مستحيل حد غيرك يتخيلها ، واخده السبق فيها زي البوفيه اللي من بنك الطعام فرع الصومال،وزي فتحه ثالثه لمناخيرك وأكتر حاجه ديما بتضحكني المأسوف على شبابه

ام فريده said...

ممتاز يا غاده وربنا معاكى ويوفقك فى المواقف الوطنيه دى

monn's light said...

بد يا غادة ربنا يبارك فيكي ايه كل الانتماء داه
بجد البلوج داه توحفة و طريقتك تجنن

Anonymous said...

بسم الله مشاء الله جواز ايه يابنتى الى بتدورى عليه ده انتى عندك شباب مصر كلهم اهم محاسيبك هههههههههههه ونبى ورده وسطهم سلام كبير اوى للرجاله وسلملى

اهالينا زهقوا يربونا said...

سلااااااامات يابرايد
من يومك دمك شربات
أحنا مشتاجييين جوى لطلتك البهية

Anonymous said...

كان نفسى اكون معاكى فى المهمة الوطنية دى .. صحيح كله يهون عشان مصر .. وبجد مينفعش تغيبى عننا كده .. بتوحشينا بجد .. وتحيا مصر

§a§a said...

مدونه جميله جدا مشاء الله

اول زيارة للمدونه

تحياتى

Dr. Kafy said...

قلبك أبيض

Anonymous said...

لو هتعملي كدة في كل عروسة يبقي هتقعديهم جنبنا هومين مستغني عن عمرة ياشيخة ربنا مايحكمك علي ولااية

Soka2979 said...

تصدقي اني هادي الكتاب بتاعك لمماما تقراه علشان تعرف ان مش لوحدي في الموضوع ده و ان فيه اخوة في الكفاح ده
المهم ميرسي جدا على الكتاب و شعاري شخصيا في الجواز هو الوحدة خير من جليس السؤ

واحده من أصحاب القمر said...

تحياتي يا بنوته مش بس للفكره ولا تغطيه العامه للحاله لكن للصراحه والتواضع والشجاعه ياريت كل البنات
تقدر تتكلم زيك او علي الاقل تقرالك كلمه فخوره بيك مش هاتعبر عن مشاعري ناحيتك كل التحيه والموده وبالتوفيق يارب وتبقي اشهر واهم من اوبرا وينفري

الف تحيه

أميره جمال

ليل said...

عايزة طموحك يبقى أوسع وأكبر يا برايد ، واسعي وكلنا وراك ومش علشان مصر وبس وعلشان الدول المجاورة كمان اللي منهم انا واحدة مفروسة وكمان بالقوي زيك وأكتر ، يلا اهو كله بثوابه
جزاك الله كل خير

واحدة عايزة " تتعزز "

Anonymous said...

السلام عليكم و رحمة الله و بركاته
انا عارفه ان التعليق لازم يروح للدكتوره العسوله غاده وبما انى لا اعرف ايميلك الشخصى فقررت ابعث لك رساله بهذه الطريقه اولا ياست برايد انت دمك عسل و سكر و شربات و والله لما بقرأ البوست بتاعك بضحك لوحدى و عندى اقتراح ارجو ان يلاقى منك القبول و هو رغم نبرة المرح الا انه لابد ان نعترف ان الزواج اصبح ازمه بجد و انك رغم انك تبدين انك بتهزرى طول الوقت الا ان الموضوع يؤلمك بالداخل فانا كنت احكى لاصدقائى عن العرسان الذين يأتون الى و نضحك من قلبنا الا اننى فى الواقع و فى غمرة الاحداث باكون بجد مش طايقه نفسى و على هذا لابد من محاولة ايجاد حلول للمشكله فلماذا لا تطرحين الامر للمناقشه بشكل جدى و اعلمى ان الافكار الجديده هى الكنوز المنسيه و انتى ماشاء الله مدونتك عليها اقبال كبير فلماذا لا نفتح المجال لكل من عنده فكره مميزه و كل بنت نجحت فى ان تتزوج من تتمنى تقل لنا ماذا فعلت ؟ يعنى ياستى من باب الاخذ بالاسباب و انا سأكون اول المشاركين و اخبرك بسر رائع و هو الدعاء وقت السحر ليس اى دعاء بل دعاء من القى متاعه على باب الله و لن يرحل ابدا دعاء توسل وذل و انكسار الى اكرم ملك ملك الملوك اجود من سؤل و اوسع من اعطى دعاء بعد كل صلاه و فى كل سجده و ادعيه بكل المواصفات التى تتمنيها فاذا سألت عظيما فاسأل عظيم و ثقى تماما بالاجابه و لا تملى الدعاء ابدا ربنا يكرمنا جميعا بما يقر اعييننا و اسفه للاطاله

Rannon said...

كدة البت تضحك عليكي وتتمسكن لحد ما تتمكن وكمان تخبطك

انا هستنى انتقامك بفارغ الصبر :D

top3885 said...

ههههههههههههههه

رضوى عمرو خالد said...

ازيك يا غاده عامله ايه يارب تكوني بخير
سمعت انك جايه المنصوره قريب لو جايه ياريت تقوليلنا

ساسو said...

ازيك يا برايد ... انا بجد معجبة بك جدا جدا جدااااااااااا و الله ... اسلوبك يجنن ودمك عسل و سكر و كل الحاجات الحلوة اللى فى الدنيا ,مش عارفة بتربطى كل الافكار و القفشات دى مع بعضها ازاى ؟ لسة حالا مخلصة قراءة كتابك الرائع بكل معانى الكلمة والذى اهدته لى قريبة لى وهى تقول :هتلاقى كل اللى بيحصلنا فيه . (معزرة يا برايد لم اقدم لك نفسى فانا وقريبتى زملاء كفاح لك فى هذا المجتمع الواعى !!!)المهم الكتاب تحفة واسلوبك تحفتين وانت احلى برايد فى الدنيا , بس يا اختى الرجالة مابقاش عندهم وعى مش مهم هم الخسرانين يا ريتنى كنت راجل كنت اتجوزتك فورا و ماكنش بقى عندى انا وانت مشكلة . عموما يا اختى يا برايد انا شايفة عرض زواج لك فى احدى الرسائل الله يسهلك يا عم و اوعدك انى مش هعمل فى فرحك زى ماعملتى انت فى فرح نهى ..ولن اعتبر زواجك اهانة شخصية فى حقى...والله ,,معجبة بك جدا و اول ما قرات فى اخر كتابك ان لك مدونة على النت جريت بسرعة فتحته وكتبت رسالتى هذه رغم ان الوقت متاخر جدا ..بصراحة ماصدقت اوصلك على فكرة ماما قرات الكتاب كله فى قاعدة واحدة ومعجبة جدا بك وبخفة دمك واسلوبك , سيرى على بركة الله ونحن اخواتك فى ال..... (طبعا انت فاهمة كل حاجة !) ورائك دائما ,برايد هو انا ممكن ادخل معك فى مجموعة البنات القمرات اللىاسمهم الكتع ممكن ؟؟ وده طبعا من اجل مصر ..يا ريت يا برايد ياختى تقبلينى معكم وشكرا

ساسو said...

ازيك يا برايد ... انا بجد معجبة بك جدا جدا جدااااااااااا و الله ... اسلوبك يجنن ودمك عسل و سكر و كل الحاجات الحلوة اللى فى الدنيا ,مش عارفة بتربطى كل الافكار و القفشات دى مع بعضها ازاى ؟ لسة حالا مخلصة قراءة كتابك الرائع بكل معانى الكلمة والذى اهدته لى قريبة لى وهى تقول :هتلاقى كل اللى بيحصلنا فيه . (معزرة يا برايد لم اقدم لك نفسى فانا وقريبتى زملاء كفاح لك فى هذا المجتمع الواعى !!!)المهم الكتاب تحفة واسلوبك تحفتين وانت احلى برايد فى الدنيا , بس يا اختى الرجالة مابقاش عندهم وعى مش مهم هم الخسرانين يا ريتنى كنت راجل كنت اتجوزتك فورا و ماكنش بقى عندى انا وانت مشكلة . عموما يا اختى يا برايد انا شايفة عرض زواج لك فى احدى الرسائل الله يسهلك يا عم و اوعدك انى مش هعمل فى فرحك زى ماعملتى انت فى فرح نهى ..ولن اعتبر زواجك اهانة شخصية فى حقى...والله ,,معجبة بك جدا و اول ما قرات فى اخر كتابك ان لك مدونة على النت جريت بسرعة فتحته وكتبت رسالتى هذه رغم ان الوقت متاخر جدا ..بصراحة ماصدقت اوصلك على فكرة ماما قرات الكتاب كله فى قاعدة واحدة ومعجبة جدا بك وبخفة دمك واسلوبك , سيرى على بركة الله ونحن اخواتك فى ال..... (طبعا انت فاهمة كل حاجة !) ورائك دائما ,برايد هو انا ممكن ادخل معك فى مجموعة البنات القمرات اللىاسمهم الكتع ممكن ؟؟ وده طبعا من اجل مصر ..يا ريت يا برايد ياختى تقبلينى معكم وشكرا

*,*AMY LEE*.* said...

رائعه ياغاده

$$Dado$$ said...

هههههههههههههههههه

حروف (دلو مرة ثانية وجرح ثاني سابقا) said...

هههههههههههههه حلو اوي اسلوبك اكتر من رائع واظاهر من كلام التعليقات انك غايبة عن المدونة

Anonymous said...

بجد رهيبة
الله عليكى

هوبليس.. said...

بجد كنت عاوز ابعتلك من فتره ... دمك خفيف جدا .. وجريئه جدا ...مش اى كتب
عن ده
واسلوبك حلو ..تالت احسن مدونه بعد بهيه وحواديت
بالتوفيق

زورونى http://hakeem2sbarta.blogspot.com/

صمت المشاعر said...

ههههههههههههههههه

ياخبر كاتمه دا كله في قلبك

ربنا يستر علي مصر

اللواء القليط said...

مروان طفل وديع فيه تاتش من كمال الشاذلي و هو صغير..لئيم كده و سهن و بنضاره (ده مروان طبعا) تمركز (برضه) جنب ترابيزة التورتة و بمنتهى البراءة اللي في الدنيا مد إيده على مفرش الترابيزة عشان كان عايز يلمع بيه إزاز النضارة (يمشي بيها مغشلقة يعني؟) مد إيده و في سره حلف القسم

على فكرة انا عجبنى مدونتك كتير
بس فيه شيء انا جدي كمال الشاذلى
واتمنى ان ترجعى عن هذة الصفات لان عيب اوى تغلطي في واحد قد جدك وانا متأكد انك لاتعرفي عنه جيدا غير الاشاعات وكلام الحاقدين عليه
واخيرا شكرا للبهجه التى ترسمينها فى القلوب

Meta said...

على فكرة البوست ده فظيييييييييييع

دمك خفيف جدا والبوست يجنن

كان ممكن اترفد بسبب الضحك اللى ضحكته فى الشغل

فرصة سعيدة

فضفضة said...

ازيك يا برايد بسم الله ماشاء الله عليكى تحفة بجد تعرفى انتى السبب اللى خليتينى انشئ مدونتى ومنتظرين جديدك دائما

girls said...

دمك عسسسسسسل

whiteblack.gray said...

ما شاء الله لا قوة الا بالله عليكي
بس بجد حملتي اللواء باسم كل المعذبين
علي فكرة المدونة دي سبب كبير في ازالة هموم ورسم بهجة وفرحة في الوشوش
اسأل الله لكي ان يريح قلبك ابد الدهر
وانك تلاقي بجد حد كويس يقدرك ويحس بيكي وتبقي تكتبي لنا برضه بس المرة دي عن مناورات المتزوجين وقفشات المتزوجات
هههههههههههههههههه وسلام يا قمر

arabianstar said...

انا اول مرة ادخل البلوج بتاعتك اكتر من رائعة انا دخلتها بعد ماقريت الكتاب عشان كده دخلت المدونة لقيتها تحفة وانا كنت متوقعة ده بعد اللى قريته فى الكتاب تحفة رائع بجددمك خفيف مووووووووووووووووووووووووووووووووت ربنا يوفقك والمسلسل يبقى على مستوى الكتاب ان شاء الله

اميرة said...

اييييييييه بقى يا بربر فينك بقالك كتير اوى وانتى غايبة عننا ومحدش عارف عنك حاجة انتى متعودة تتغيبى كده دايما ولا ايه معلش اعذرينى لان لسة جديدة فى المدونة هنا
عموما ياريت ترجعلنا بسرعة وتحكيلنا وتطمنينا عليكى يارب
وحشتينا اوى
واحب اهنيكى بالاصالة عن نفسى وعن كل جيل التسعينات اننا معجبين بشخصيتك اوى
وبندعيلك ان ربنا ييسرلكا لخير حيث كان ثم يراضيكى به
بس يلا ارجعلنا بسرعه بقى

Anonymous said...

اذيك يا برايد يا حبيبتشى انابحب البلوج بتاعك دا موووووووت كنتى فين بس من زماااااااان لقد كنا مقهورون فى الارض ولا حد معبرنا وانتى جيتى تنقذينا وتفضفضى نيابه عنا اهئ اهئ اهئ الى الامام يا حبيبتشى دايما وربنا يسعدك ويهنيكى يااااااااااارب مع واحد ميكونش قرا البلوج دا خالص احسن اللى كتبتيه عليهم بط بط هيطلع عليكى كتاكيت كتاكيت زى اللى ام ايمان جارتكم بتبيعها بالظبط وهتقعدى تغنى اغنيه الست شاديه والله يا زمن لا بايدينا زرعنا الشوك ولا روينا يا زمنننن .........بصى بقا يا جميل بما انك بنوته كده عسل ودمك سكروشربات فانا ليا عندك عتوبه صغنتوته كده انتى ازاى يا برايد تمثلى البنات من سن 25 بس؟ طيب انا عندى 22 ومع ذلك حاسه بالقهر لأنى جالى (اكتئاب نفسى تفاعلى متكرر) من حوار العرسان ده اصلهم اكوام اكوام اكوام على رأى عمنا محمد صبحى بس لسه محصلش اللى اسمه ايه ده النصيب ......يا ريت يا برايد تتمى جميلك وتزحزحى السن شويه عشان انضم معاكو للقايمه اااااااااااه حلوه كلمه (القايمه)دى بشره خير ياااااااااااا رب بقا نكتبها كلنا قريب وسمعنى سلام متزوقينى يا ماما اوام يا ماما دا عفيفى هياخدنى بالبيجامه يا ماما واذا كان عاجبه بقا ......اقعدو بالعافيه وربنا يوفق الجميع للى فيه الخير . (نونى

Anonymous said...

dr ghada i confess the moment i hold ur book , i couldn't but finish it in one sat , though i'm still a student a med student indeeeeeed ( yeb3d el shar 3an ai ma7'loo2) but i adored ur style, even adored u in person ............u are just talented and let me tell u one thing
females ....can reproduce alone by cloning and in lower species as u know by parthenocarpy ............so let males proud of them self hhhhhhh no offence wlahi
BUT BLESSED U ARE FOR THE LAUGHS U GAVE US , AND U''L BE FAMOUS SOON AND WHO'S THAT LUCKY GROOM WHO'D GET A TALENTED PERSON AS U.......
URS
MARIE

Anonymous said...

dr ghada i confess the moment i hold ur book , i couldn't but finish it in one sat , though i'm still a student a med student indeeeeeed ( yeb3d el shar 3an ai ma7'loo2) but i adored ur style, even adored u in person ............u are just talented and let me tell u one thing
females ....can reproduce alone by cloning and in lower species as u know by parthenocarpy ............so let males proud of them self hhhhhhh no offence wlahi
BUT BLESSED U ARE FOR THE LAUGHS U GAVE US , AND U''L BE FAMOUS SOON AND WHO'S THAT LUCKY GROOM WHO'D GET A TALENTED PERSON AS U.......
URS
MARIE

Anonymous said...

انتي جميله يا غاده .. ربنا يكرمك حبيبتي ويسعدك في حياتك.... دمك زي العسل

medoooooooooooo said...

و الله بجد المدونة دي جامدة اوي اوي
و انا قريت كتاب حضرتك ( اي خدمة حضرتك عشان انا عارف تأثيرها عليكي ) و ان شاء الله كل البنات تتجوز و الولاد
بس الأزمة عند الولاد على فكرة بردوا
اصلهم مش لاقيين بردوا

medoooooooooooo said...

كل سنةو انتوا طيبين يا جماعة

هيثم said...

رائعة واجمل شئ فى لغتك البساطة استاذة غادة ....ولكن ارجو من سيادتكم مساعدة ..انا حديث فى عالم التدوين واريد يد العون كيف انشر مدونتى وكيف يعرفها الاخرون وكيف اجعلها متاحة للتسجيل فيها اوماشابه ..اعلم ان ذلك كثير ولكن عندى عشم ..وارجو ان تشرفينى فى مدونتى ....شارع الملك

Anonymous said...

خدها لكشة كده على بعضها و اتكل على الله
ونعم بالله =)

أحلف بسماها و بترابها..لهشلفط وش اللي خطبها

تعليق بسيط أختي
لا يجوز الحلف بغير الله سبحانه

وفقت وبوركت في مسيرك

ahmed saad said...

بعد مطالعتى للمدونة احب ان اكون اول المهنئين بجواز نهى واول المعزين فى نفس الوقت لكن احب اقولك انى هاعمل مدونة عايز اتجوز 2 اية رايك

sewar said...

بجد يا غاده انتي زي العسل وانا بتابع المدونه من اول متفتحت بس دي اول مره اسيبلك فيها كومنت والمسلسل تحفه بجد وانتي زي القمر وزي العسل كمان وكل سنه وانتي طيبه يابرايد اختك من اللي بيمثلوا الفئه بين 18 ل35 واللي برضه الناس مزهقه ال خلفوني علشان متجوزتش هههههههههههه اختك في النضال سوار القاهره بين قوسين 27 سنه

Anonymous said...

ايه يا قمر الغيبه الطويله دى انتى عاوزه تعرفى غلاوتك وللا ايه ..وحشتينا طبعا ووحشنا كلامك وعاوزين جديد بقا كل سنه وانتى طيبه وربنا يعود عليكى الايام بخير والمسلسل ما شاء الله تحفه جدا ودمه عسل زييك بالظبط وهند دمها خفيف انا متابعه المسلسل بس انا عاوزه اعرف انتى كتبتى السيناريو ده لوحدك فعلا وللا حد ساعدك فيه لأنه بجد مكتوب باحتراف قوى ..ربنا يوفقك وللامام دايما يا رب (نونى)

Anonymous said...

بس انا عايزة اسالك يا غادة
انتى اتجوزتى بعد كل دة ولا لسة علشان اطمن على نفسى بردة
اصل انا بشوف الافلام دى بردة هههههههه
لدرجة انى رفعت شعار men suck

BERRY said...

هلا غاده

انا معجبه بيكى بس مانى مصريه اشتريت كتابك انا واختى وزوجى من سنه وانهرنا من الضحك لاننا جلسنا فتره فمصر وعارفين المصطلحات كلها وقولنا البنت دى تحفهو فعلا كتابك فوق الممتاز وعمرنا ماشفنا زيه

بس حابه اسألك تزوجتى او لسه عشان عندى عريس مصرى يارب يكون من نصيبك ومن عيله جدا جدا محترمه وميسور جدا وهو مايعرف شى عنك ولكن امه
تدورله على عروسه وكنت اضحك معها وقولتلها طيب مش برايد اولى قالت دى زمانها اتجوزت وبعدين هتعرفنا منين يعنى (=

وانا مش شاطره فى النت ومن الصبح ادور مكان اكتبلك فيه رساله توصلك وان شالله دى توصل
واتمنالك الف خير ومبارك عليك الشهر

وسامحينى على الدخله دى (=

BERRY said...

السلام عليكم غاده

انا مبسوطه كثيرانى قدرت ارسلك

انتى كاتبه ممتازه وقدرتى توصلى

مشكلتك ومشكله بنات كثير بطريقه تحفه وعلى فكره بابا بيحبك جدا جدا وهو رجل كبير ومايتابع شى الا مسلسلك

تستاهلين كل خير وانا سيفت الصفحه دى ودايما بحاول ادخلك منها

موفقه ان شالله (=

عايز أساعد مصر said...

الصراحة انتي فنانة!!!المسلسل جامد أوي و نادر لما يكون فيه بنت بخفة الدم ديه!!ما شاء الله عليكي و ربنا ينجحك أكتر و أكتر ان شاء الله!!

بعد اذنك بقا حبا استغلال أصل أنا عامل مدونة و فيها و الله كلام مفيد عن عروض الشركات بتاعت المحمول و اسمحيلي أحط الرابط هنا
http://egymobilepromos.blogspot.com/

شكرا جزيلا

Anonymous said...

انا بجد مش مصدقة انتي بجد حقيقية ولا خيال بجد روعة انا بنوتة عندي 18 سنة وبموت فيكي يا قمر يارب تلاقي الي بتدوري علية والاقي انا كمان

Anonymous said...

السلام عليكم و رحمة الله
انا ثريا من البحرين حاصله على بكلريوس في الصيدله من الاردن يعني زملاء وحبيت اهنيكي على الكتاب الروعه و المسلسل الاكثر منرائع بصراحه و انا بقراء الكتاب و بشوف المسلسل مع العلم انه المسلسل الوحيد الي بتابعه بحس بانك بتتكلمي عني . سبحان الله همه كده بنات الصيدله في كل بقاع الارض صُفر و غلاويين و مشعارفه كده مش مريحين.انا عايزه اشكرك انك جسدتي معاناتي و معانات الكثيرات وجعلتي من قصتي شيء يبعث الفرح في قلوب الاخرين و الامل الى قلبي
شكرا على هذه المتعه التي اهديتنا اياهه

tema toota said...

مااااااشاء الله
الا الواحد لو حب يقابلك ولا يشوووفك يعمل ايه بقى؟؟؟؟؟

مسلمه بفضل الله said...

انا اتفرجت يا غاده على مسلسلك ونفسي اعرف انتى اتخطبتى فعلا ولا لا وانا بدعيلك ربنا يرزقك الزوج الصالح وانا وبنات المسلمين

ice queen said...

انا منى بجد مدونه روعه و ندمانه اني معرفتهاش الا دلوقتي نفسي اقرى المدونه من البدايه
و المسلسل روعه و اهنيك على حسك الرائع في الكتابه
و عوزين نعرف اخر اخبارك اتجوزتي و لا لا و يارب يسعدك و يحققك مرادك و تتجوزي الراجل الي نفسك فيه

Anonymous said...

هههههههههههههههههههههههه