Tuesday, June 24, 2008

الحاسة الثامنة

جاري البحث عن طنط حشرية في جميع أرجاء المحروسة ..طنط حشرية آه لكن زوزن لأ لأ لأ..قال عايزة تتخطب قبلي قال .طب أهي جت على دماغها و دماغ أمها...بس أمها ..إهئ إهئ..طنط حشرية قطعت بيا قوي ..ماكنتش أعرف إنها هتسيب الفراغ ده في حياتي ..خلاص إتعودت عليها و على عرسانها ..صحيح هم كلهم إكسبايرد و لو أي حد من وزارة التموين أفشهم عندنا هيعملنا محضر زي بتاع الفسيخ الفاسد في شم النسيم لكن يعني.. العرسان كانوا داخلين طالعين رايحين جايين عاملين لنا حس و مخليين كل بنات الحي يهروا و ينكتوا في نفسيتهم ما هم بيبقوا منظر برضه و اللي مايعرفش يقول رز (ماعادش ينفع العدس بأه بعشرة جنيه).....الست دي أنا شكلي كده كنت ظالماها كانت بتعمل عشاني كل اللي في وسعها ..مش ذنبها بأه إن وسعها ده كان ضيق حبتين أهي كانت بتحاول...ماما كمان حست بالفراغ اللي سابته طنط حشرية في حياتنا فقررنا إحنا الإتنين ننزل ندور على طيف طنط حشرية في شوارع البلد و كل أما يتهيألي إني شفتها أشاور عليها و انا باصرخ في ماما بفرح


أهي يا ماما

لا يا حبيبتي دي بيضا



طب دي يا ماما؟

لا يا روحي دي طويلة



طب دي ...هي دي

لا دي مناخيرها بفتحتين مش شكل طنط حشرية خالص




و نرجع نجر أذيال الخيبة و عنينا مرغرغة بالدموع ..آاااه يا طنط حشرية ياللي اتبهدلت بعدك بهدلة الحضري في ماتشات المنتخب



و بعد كل مشاوير البحث و كل البوسترات اللي لزقناهم على الحيطان و العواميد و شبابيك التكاتك ..لم يستدل عليها في أي مكان. نفسي إتسدت عن كل حاجة لا عدت باكل و لا بانام ولا باخرج ولا حتى باروح الشغل.. شفتوا طنط حشرية مهمة أد إيه؟ أهي اتسببت في إني ما أرحش شغلي و ده أكيد أثر على عجلة الإنتاج و و ده اللي خلاني
أشكك في وجود أصابع أجنبية ملحوسة بآثار المؤامرة و تمويل خارجي مشموم من على بعد هدفه الأساسي هو التأثير على نفساويتنا عشان تتوقف عجلة الإنتاج ..و انتوا عارفين عجلة الإنتاج دي إحنا مأجرنها من عند واحد عجلاتي خلقه ضيق و بيشرب هيليوم 24 ساعة في اليوم و لو رجعناله العجلة و هي متوقفة ممكن يجري ورانا بخرطوم الهيليوم و يلسوعنا و انتوا عارفين إن إحنا شعب مش ناقص لسوعة..تفتكروا تكون إسرائيل هي اللي خطفت طنط حشرية ؟..و يكون العريس الأخير ده من بتوع (خالتي بتسلم عليك و بتقولك لو انت راجل مخابرات بحق و حقيق تجيبلنا 10 أرغفة من الفرن اللي جنبنا)؟..برضه مش بعيد



المهم إني من يوم إختفاء طنط حشرية فقدت حاجات كتير جدا..زي ماتكون نفسي اتسدت او جاتلي قفلة في النفسية من الموضوع كله..حتى مهاراتي البناتية اللي أنا مولودة بيها حاسة إنها بدأت تضمحل ..كله ممكن يتعوض و ييجي شوية تمرين لكن الطامة الكبرى ( من يوم الكتاب ماطلع ساعات ألاقي نفسي باقول كلام كبير مش عارفة جايباه منين) إني فقدت الحاسة الثامنة..و دي الحاسة اللي البنت بتعرف عن طريقها الراجل عايز يسمع منها إيه بالظبط..حاجة كده مالناش دخل فيها و بتيجي لا إراديا في حالات معروفة و محدده



بنلاحظها قوي إحنا البنات و احنا ماشيين بنتكلم مع بعض في الشارع مثلا..فور أول ظهور لأي فرد من الجنس الخشن في محيط 3 ميل مننا ..فجأة تلاقي نبرات الصوت إتغيرت و الأسلوب نعم و حتى الحركة بأة ليها قوانين تانية خالص غير بتاعة أخوكوا نيوتن ربنا يجازيه (على اللي عمله في الأجيال المتعاقبة



قبل الخطوبة تلاقي البنت من دول فجأة تلتفت لزميلها في الشغل



الله إيه الكرافتة الجميلة دي؟..دي شكلها شيك عليك خالص

إيه ده حقيقي بجد؟..ده كل الناس بتقولي عليها فلاحي و لونها وحش..أنا الوحيد اللي معجب بيها

عشان بس تعرف إن مافيش حد فاهمك قدي



طبعا الكرافتة أساسا أخضر في برتقاني و شكلها بيجيبلها اشمئناط و غممان نفس ..لكن الحاسة الثامنة بتأكد لها إنها مادام معفنة كده و هو مصمم يلبسها يبقى أكيد ليها معزة خاصة في قلبه و تبقى سكة مفتوحة تدخله منها



بعد الخطوبة و هي جنبه في العربية و هو بيغني بصوته الأجش المبحوح أكنه "على الشريف" الله يرحمه بيغني وردي وردي وردي في عيد الطفولة تلاقيها مغمضة عينيها و هيمانة



الله يا روحي..صوتك حنين قوي

بجد؟..مع إن ماما كل يوم تيجي تهبد عليا و انا باغني في الحمام و تقوللي الجيران بيشتكوا

عشان مامتك بتسمعك بودانها..لكن أنا باسمعك بقلبي



طبعا هي من جوه بتقول "جاك وجع في قلبك" بس أنا ألبس الدبلة في الشمال و أمسك القسيمة في إيدي و إبقى قابلني لو فتحت بقك أساسا والا قلت كلمتين على بعض



أنا بقه لقيت نفسي مخالفة كل التقاليد و شكلي كده قربت أنسى استخدام الحاسة الثامنة دي للأبد..الأسبوع اللي فات واحد صاحب بابا كان في زيارة عندنا و رغم كل الإستحياطات اللي أنا واخداها مش عارفة عرف منين موضوع الكتاب و الراجل بيسألني بإبتسامة أبوية كده توحي بإنه شكله بيدور لإبنه على عروسة



إيه ده؟..بجد ..إنتي كتبتي كتاب يا حلوة

بغلاسة

أيوة

إسمه إيه؟

طبعا في الأوقات اللي الحاسة الثامنة شغالة عندي فيها طبيعي بارد و أقول

"كيف تطيعين زوجك"..أو "ألف أكله و أكله" ..أو حتى " كيف تحصل على سيخ حديد عز..بس في إيدك مش في صرصور ودنك "

و ساعتها بابقى عروسة لقطة

لكن بغبائي أرد

عايزة اتجوز

و طبعا دي كانت آخر اونكل ده يحط رجله فيها في بيتنا




مرة تانية كنت في جلسة إنترفيو مع العريس اللي اتقدملي بعد نشر الكتاب

(آه هو واحد بس)

و أبص ألاقيه بيقوللي

ياللا بأة

نعم؟

ياللا

ياللا إزاي يعني؟

إعملي بأة الشويتين بتوع الكتاب

شويتين إيه حضرتك؟

هزري كده و نكتي و اتريقي على خلق الله



مش آخد بالي أنا بأة و أسمعه اللي عايز يسمعه و أقوم ببطولة إستعباط كوميدي كبير يضرب الإستعباطات بتاعة نادية الجندي اللي كانت بتعملها زمان في تل أبيب

أو حتى ألبس الباروكة أم صلعة بتاعت "حمادة سلطان" و أضرب بنطلون أبيض و زاكتة حمرا و أصدح و أقول

"النكتة الجاية دي..جديدة"

"مرة واحد بيقول لمراته تصدقي جارنا بيقول إنه خان مراته مع كل ستات العمارة ماعدا واحدة بس..قالتله دي لازم الولية الرخمة اللي في الدور الرابع"

تنتارارارام رام رام



لأ..ساعتها أدور ع الحاسة الثامنة ..مش لاقياها..أدعبس جامد..راحت خلاص

أبصله بغباء كده و أقوله..

باقوللك إيه يا أخ ..أهه ده اللي موجود..مش عاجبك شوف المحل اللي جنبنا



شايفين المصيبة اللي أنا فيها..جالكوا كلامي إن المصاب عظيم و الخطب جلل

طنط حشرية و الحاسة الثامنة في وقت واحد



طب أتجوز إزاي أنا دلوقتي بأه؟



يا جماعة ..و العشرة و العيش و الملح..طب بلاش موضوع العيش ده عشان بأة صعب دلوقتي

و البتي فور و الملح حد يقوللي أرجع تاني إزاي الحاسة الثامنة..أو على الأقل يساعدني في البحث عن طنط حشرشر حبيبتشي




لحسن شكلها كده هترسى إني هافضل محطوطة في الفاترينة هنا لأبد الآبدين



106 comments:

Anonymous said...

ازيك يا بربر ؟؟
ظلمتك يا حبيبتشى و افتكرتك تقلاتة ... ما هو اللى مايعرفش يقول فولز
اتاريكي يا حراام مكتشئبة عشان طنط حشرية مختفية .. ماتزعليش نفسك خاااالص بوكرة ترجع بالسلامة..
و اخيرا وحشتيييييييييييييييييناااااااااا يا بربر .. و مستنيين الجديد .. إلا ايه اخبار اونكل ديسكو ؟

Qabbani said...

:)

sweet as usual :)

have a nice day :)

Anonymous said...

جميل جدا بجد يا برايد
انا تقريبا بدخل كل يوم البلوج
اشوف اية الجديد
بجد هايلة
وياريت متتأخريش تانى علينا فى الكتابة
لان كتابتك بيكون فيها معانى كتير بين السطور رائعة
دا غير اسلوبك الرائع

مريم

zahra said...

معلش يا حبيبتى
بكرة طنط حشريه ترجعلك و تنورلك كل حواسك
ربنا يرجعها بالسلامه

Anonymous said...

إيه ده؟
أفهم من كده إن خطيبتي مش بتحب القميص الفوشيا بتاعي و بتستخدم الحاسة الثامنة دي معايا والا إيه؟

Anonymous said...

بالله عليكم حد يقوله يبطل يلبس القميص الفوشيا ده
أعصابي ماباقتش مستحملة


"خطيبة الأخ اللي فوق"

Anonymous said...

أيوة كده

إكشفيلنا كل الحواس اللي احنا مانعرفهاش دي

يا ترى الحاسة التاسعة تطلع إيه؟

إيثار said...

وحشتيني جدا يا بربر
و انا شفت كتابك و انا من اشد المعجبين بيه
ربنا يطمنك على طنط مستخبية
و يرجعلك الحاسة التامنة
سلميلي على فوفو و لولو
و قولي لزوزن ما تقلقش على طنط محشية

تحياتي

hussein said...

بجد بوست جامد جدا
وياريت كل البنات تفقد الحاسة الثامنة قبا الجواز وتكتسبها بس بعد الجواز
مع جوزها بس مش حد تانى

R-H-S said...

يااااااااه انتي فين دا كله
احنا افتكرنا خلاص الشهره بعدتك عننا وبطلتي تدوين
بس عودا حميدا يا دكتور

هقولك علي حاجه ترجعي بيها الحاسه الثامنه دي انك تجيبي حبايه كيتوفان علي نوفالجين اكيد انتي فاهمه انا بقول ايه واي حاجه اخرها ايين واطربيهم كلهم في كوبايه واحده هتلاقيها رجعت
وبالشفا ان شاء الله

موجة said...

ازيك يا غادة
♥ ♥ ♥ ♥ ♥ ♥ ♥
ايه اخبارك
على فكرة انا كنت في كلية فنون جميلة عند ناص صحابي و لقيتهم شغالين في مشاريع التخرج و اتعرفت على واحدة باسيالها مشروع تخرجك في الرسم طبعا عن ايه
لقيتها بتوريني رسمة رائعة غاية في الروعة و بتقولي انها غلاف لكتاب عايزة اتجوز لغادة عبد العال
وطالبة مني اني اقولك لانها لما تخلصه حتكون حابة توريهولك

خالص تحياتي
مجرد موجة
أحمــــــد

وصدقيني لو ليت طنط حشرية حأقولها انك عايزاها هههههههههه لا وممكن تلاقيني جايبها في ايدي و جاي هههههههه

Anonymous said...

ازيك يابربر لكي وحشه
النت لسه ملقتيش طنط حشرشر
اخر مشاهده لها كانت في وسط البلد
ورافعه رايه بيضه وبتقول
انا حشرشر اللي غلبت برايد
انا حشرشر بطله كتاب عاوزه اتجوز
عاوزها ولا ايه
فكري كده وانا اكتفها واجيبهالك
سلام يابربر

Anonymous said...

a7'eran ktabty 7aga ya Bride??
Really, I missed ur posts moooooooooot

Pink Unicorn said...

اولا حمدلله على السلامة يا غادة
وحشتينا بجد

وثانياً قلبى عندك
علشان اختفاء طنط حشرية العزيزة اللذيذة
واللى ترتب عليه اختفاء الحاسة الثامنة
:))
ربنا يرجعهم الاتنين بالسلامة

اللذيذ فى الموضوع بقى
انى اكتشفت من كلامك انى الظاهر كده مولودة من غير الحاسة الثامنة دى
اللى بتتكلمى على انها ال
Default
بتاع البنات

عمرى ما عرفت اعمل الحركات دى
بس شفتها كتير
بصى انا حاحاول اتعلم
و اعمل حاسة ثامنة مصطنعة
وانتى اعملى زيى برضه
لغاية ما طنط حشرية ترجع

وربنا يبعت يا قمر
:))

متتأخريش علينا كده تانى

مـحـمـد مـفـيـد said...

متقلقيش يا غاده
ساعات الحواس كده بتركن بس شويه وهتشتغل
:)

Anonymous said...

السلام عليكم ورحمه الله وبركاته
حمد الله علي السلامه يا غاده
اخيرااااااااااااااا بوست جديد
بس بجد تحححححححححححححححححفه

مصــــري said...

زيارتي الأولي
ودي مصيبة لإن مين اللي مايعرفش مدونة "عايزة اتجوز".

طبعاً بوست رائع في مدونة رائعة جداااا

واسمحي لي تجولت في المدونة.
وعرفت ليه طنط حشرية وحشاكي
لا تخافي هترجع يعني هترجع.
هي وراها شغلانة غيرك.

أما بالنسبة للحاسة الثامنة.
بصفتي رجل ممكن سؤال.
هو انتوا عندكوا كام حاسة بالظبط؟
أنا فاكر الاعلان لما الست تقول "ودي الحاسة السادسة اللي عمركوا يارجالة ما هتعرفوها"

ولا نظيف غلا الحواس كمان

تحياتي
أسامة

صاحب المضيفة said...

ما هو انتي رديتي عليه بشكل الكلام المكتوب في الكتبا والمدونة


ربنا يسعد أيامك بطنط حشرية وبعرسي لقطة كده ينور لك حياتك يارب


تحياتي

Lobna Ahmed Nour said...

ياه زعلتيني على طونط حشرية

انا عندي فكرة هايلة

انتي ترسميلي رسم مبسط لطنط حشرية

وانا انزل ادورلك عليها

مين عارف يمكن هي اللي معاها الحاسة

الثامنة اللي ضاعت منك

Anonymous said...

يالهوي ياغادة كل ده و لسه ماتجوزتيش؟
انا قلت مالهاش حس عشان اتخطبت ولا اتجوزت
انتى اكيد معمولك عمل يابنتي

مصرى وافتخر said...

كالعادة وربنا ما يقطعها عادة كلام زى العسل وكله لسوعه فى رجال مصر
بس ياترى الحاسة التاسعة هتنزل امتى
لان دلوقتى قوانين الحواس اتغيرت ....

الطائر الحزين said...

عارفة ليه
علشان سبتى حاستين فى النص لسه مكملوش السادسة والسابعة

تقومى شاطحة على طول على الثامنة

ربنا يعترك فيها هى وطنط حشرية يا قادر يا كريم

بطوط حبوب said...

بكل الحب والحنان
نتنمنى من الله ان يعيد عليكى طنط حشريه ابلخير واليمن والبركات
ههههههههههههههههههه

Anonymous said...

اممممم ما هو صعب يا بنتي ختى لو اتخطبتي و في كلامك حكيتي له عالبلوج صعب تلاقي واحد يتفاهم معاكي و يوافقك ده اذا ما كانش ده سبب في فسخ خطوبتك لا قدر الله

بقولك ايه ما تشوفي موضوع الخطبة ده يمكن يكون لك نصيب فيه

ان شالله لو خاطبة من عالنت...جربي مش هتخسري حاجة

Oss said...

برايد
إزيك
طولتى فى الغيبه
المهم سيبك من الحاسه التامنه والتاسعه والعشرتاشر
الواحد بطبيعته بيبقى احلى
والكرافته الأخضر فى برتقانى ممكن تلزق فى صاحبتك بعد الجواز
وممكن بعد كده تقلب بمشاكل لأنه عايز يلبس الأخضر فى برتقانى وهى خدعته
وى دودودودو
و وش كتييييييييييير

سيبك من ده كله
ماتطوليش علينا
تحياتى

دكتور بهــدوء said...

وجووون وجوووون وجوووووووون
بوست جديد بس بجد ف الجون
*****************************
يالهوي ع الكلام المكلكع
حسسني فعلا بالتكتلات السياسيه والحراك السياسي
والخطب جلل
ايه داااااه
بس تحفه
ألم تعلن أي جهه مسئوليتها عن اختفاء طنطك حشريه
وطلبت فديه
وياتري لو طلبت هتدفعواااا
؟؟؟؟

دكتور بهــدوء said...

ايه ده الموديريشن اتشال
انتي قتلتيه
قري واعترفي الانكار مش هيفيدك
وديتيه فيييين الاخ اياااه

mohammed alsha3r said...

عودا حميدا ياغاده

Amr said...

ممكن تبعتي لفقرة التنويه عن المفقودين اللي بتيجي علي القناه التالته, وهتلاقي ولاد الحلال اللي يساعدوكي انك تلاقيها :D

FrUiTa said...

ازيك غاده؟ جميل أوي بوست الحاسه الثامنه
من كلامك حسيت ان الحاسه السادسه عندك عالي أوي، لأن هي اللي أكدتلك الحاسه الثامنه في الوقت اللي انتي ماكنتيش حابه انك تعرفيها أصلا.
أصل في ناس ما ينفعش معاهم غير الحاسه الثامنه دي

تحياتي ليكي

ظل الشمس said...

يااااااااه يا برايد دا انا قلت البت اتخطبت سكيتى ومقالتش لحد لما غبتى كدا
خصوصا بقى وانك طالعة فى التليفزيون كل شوية وهاتك يا ندوات ومؤتمرات وتوقيعات وكتاب رايح وكتاب راجع
ما شاء الله الله اكبر يعنى انا مش باقر ولا حاجة انا بس باقولك شغلى الحادثة الثامنة والتاسعة عايزين نفرح بيكى بقى
فيها ايه لو كنتى قلتى للرجل الكتاب بتاعى اسمه صيد الفضائل فى تعليق النجف والمعالق

جبهة التهييس الشعبية said...

اوختشي
انا اصلي مولودة من غير الحاسة الثامنة دي
الست اب بتاعي مش نازل فيه البورنامج ده

مش عارفة بقى ترجعيها ازاي

بس طنط حشرية لازم ترجع
الحشرية لازم ترجع
الحشرية لازم ترجع

ahmed_k said...

حمدالله علي السلامه يا غاده طولتي الغيبه انا أفتكرت انك اعتزلتي التدوين ومش حنقرالك مواضيع تاني بس الحمد لله اعتقاداتي كلها طلعت اوت يا غاده مشكلتك بسيطه طنط حشريه انا عارف مكانها بس هي موصياني مقولش لحد علشان في موضوع مهم خاااااالص بتعمله اللي هو ........... ايه ده انا كنت حكشف السر !!! الحمد لله لحقت نفسي ,,متغبيش عننا تاني يا غاده وكنت حقولك تنوريني في مدونتي بس لو زرتي كل مدونات المعلقين عندك حتفضلي اليوم كلله امام الكمبيوتر , عموما تقبلي تحياتي ودمتي بخير

samourai 4 ever said...

ايه الغيبه الطويله دى كلها
فينك يا بنتى
على فكرة هما كتير اوى
مش تامنه بس
و لازم ترجعى تقرى قصص رومانس تانى
تشحنى عوطفك يعنى
و سيبك من طنط حشريه
مش حتنفعك

و دمتـــــــــــــــــــــــــم

قلم حالم said...

تمتلكي أسلوبا ساحرا .. لا أمتلك صبرا عادة حتى أكمل تدوينة طويلة لآخرها
ولا كن لا أدري لماذا أكملت تدوينتك الى النهاية بمتعة لا أدري سببها
في شوق لأن أقرأ كتابك
أسعدك الله وأسعد أيامك
ودمت مبدعة

aboooood said...

كلامك حلو طول عمرة بس واضح زعلك على الكتابة فعلا ناقصة شوية نكت من زمايلك في الشغل و أخبار العرسان مش لازم عندك عند الجيران والأصدقاء .
هاهاهاها
بجد ربنا يسعدك دائما بس حرام التأخير
سلااااااااااااااااااام

Mafrousa said...

هههههههههههه
هيه غالباًً طنتك حشرية طفشت
و الاكيد ان الحاسة التامنه
ضاعت فى زحمه الامضاءات بتاعة الكتاب

mahberry said...

غادة... بجد مدونتك اكتر من رائعة ,كل بوست أحلى من التانى, اسلوبك تحفة و دمك زى العسل , أنا يوم ما عرفت مدونتك شدتنى لدرجة انى سهرت للصبح لحد ما قريت كل البوستات اللى عليها , i really wish u every success and happiness

son's egypt said...

السلام عليكم
كان الله في العون
الحاسة وطنط حشرية
انتي ممكن تعملي حاجة تاروحي لشيخ يفتح ليكي المندل بس خدي معاكي حاجة من ريحة طنط حشرية علشان يشتغل صح
وربنا يعترك فيه هي والحاسة اللي ضاعت منك

Anonymous said...

ولا يهمك أنا هبعتلك طنط (------) اللي بتجيب عرسان لبنتي بقلها 15 سنه ولسه عندها أمل

أم هادي

Anonymous said...

ولا يهمك أنا هبعتلك طنط (------) اللي بتجيب عرسان لبنتي بقلها 15 سنه ولسه عندها أمل

أم هادي

Anonymous said...

سخيف جدا الاخ اللى جاي يقول سمعينا حاجة من بتوعك ......... هو جاي يتجوز الكوميديانة العبقرية مش جاي يتجوز غادة ........ كويس أوى الرد بتاعك ....... ده الشىء الوحيد اللى ممكن يتقال على كلمة زي كلمته دي

ساعات الشهرة بتكون سخيفة

اكتبي لنا بأة حاجة عن الشهرة بس بأسلوب من بتوعك
:)

لا لا ....... أنا بغلس بس ...... بعمل زي العريس ده ...... لكن انتي اكتبي اللى تحبيه وقت ما تحبي

تحية تقدير واحترام

Rannon said...

يا حبيبتشي يابرايد
كله غلا الحاسة التامنة
طنط حشرية ومقدور عليها تتعوض في زيها كتير ..أما الحاسة التامنة صعب قوي
حاولي ترجعيها..اقولك شوفي كبسولات ولا أي حاجة تعوض:))

تحياتي

Anonymous said...

.
FREE Kareem! God Bless you Kareem, you are a hero for freedom. Millions of people are with you in spirit.
You are not alone. Many people are working to get you out. You will get out. Someday there will be a movie about your story. Please stay safe. We love you!
.
absurd thought -
God of the Universe says
apologize to evil

religion is not at fault
all prophets' words are good

.
absurd thought -
God of the Universe says
surrender to jihad

sell out your great grandchildren
so theirs live Taliban life

.
absurd thought -
God of the Universe says
don't tell the truth

evil men will jail you
kill you to protect their lies

.
absurd thought -
God of the Universe says
don't destroy the new Nazis

exterminate their death cult
expose sick evil prophets

.
Campaign To FREE Kareem!
.
Mubarak Fears Islamist Nazis in Arabic
.
Hard To Swallow Blog in Arabic
.
Philosophy of Liberty Cartoon
.
Help Halt Terrorism Today!
.
USpace

:)
.

ميرا ( وومن ) said...

برايد
بجد بجد بجد وحشتيني وحشتيني وحشتني
اية ده هو انا من أول خمسين تعليق
لازم الحاجة دعيتلي انهاردة الصبح
وحياة طنط حشرية يا برايد متبقيش تغيبي علينا كدة تاني
ربنا يردهالك سالمة غانمة وفي ايدها عريسين تلاتة
قولي انشاء الله
تقبلي مودتي وخالص تحياتي

Anonymous said...

misssssssssseddddddddd you bgd so much
bgd elpost to7faaaaaa.. msh tet2a5ry tany:(:(
w rabena yerg3lek el7assa eltamna w tant 7eshrya w nazely leha e3lan f elwaseet w ma3ah mokf2a:D

LoYaL HeArT said...

دائما اتابع مدونتك الرائعة وجميل تلك الحروف التي تصوغينها ،،


بوركت اختي ،،،


واصل يعلى هذا المنوال ،،،




واتمنى تزوريني على هذا الرابط ،،،

http://loyal-heart.blogspot.com/2008/06/66.html

mora_227 said...

عودا حميدا
هل هلالك شهر مبارك علينا و على كل المدونين
انا بيتهيأ لى يا بربره يا اختشى ان غياب الحاسة الثامنة بسبب غياب حبيبتنا كلنا طونط حشرية ادام الاتنين اختفوا فى نفس التوقيت
بس حنلاقيها فين و ندور عليها فين (عكس بيضا و عكس طويلة و مناخيرها من غير اخرام او بخرم واحد و احتمال ضعيف بتلاتة و كله خلقة ربنا ) بس كمان حشرية ؟؟!!
انا معاكى ان لا اونكل ديسكو و لا حتى اونكل عشرة بلدى يسدوا مكانها .
ان شاء الله دائما متألقة

NilE_QueeN said...

نصيحه مني
استغني عن الحاسه الثامنه
الطبيعي احلى طلعى اللى ف قلبك ما كلوا محصل بعضه

وربنا يرجع طنط حشريه

سارة said...

متزعليش اوي كده انا هدورلك على طنط

قلب بلا حب said...

haaaaaaaaaaaaaaaay

كنتى فييين .. والله وحشتينا
متتاخريش علينا تانى

وانشاء الله طنط حشريه ترجعلنا بالسلامه..
شوفتى بقي قيمتها .. :)

و بالنسبه للحسه الثامنه .. انصحك تدوري علي اعفن نادي علي وجه الارض و يبقي فيه شباب كده من اللي بيلبس بيجامه و شبشب و هو رايح الناتتتى
واديها حاسه ثامنه زي مانتى عايزه ..

قولي لده ايه الحلاوه دي
وللتانى تقوليلوه الله علي شبشبك .. مفيش منه حاريمي ..

اكيد ده حيرجعلك الحاسه التامنه :))

Anonymous said...

أنا كمان نفسى أتجوز, معانا يااااااااااااااااا رب

Anonymous said...

ايه الحلاوة دي يا بنتى
دا انتى بأه كدة واخدانا على دوكة وتطيري العريس من ايدك
ما تفتحي مخك يا بنتى
اعملي اعلان في التلفزيون تدوري على طنط حشرية
وانا اساعدك فيه
يااااااااااااااااه دنيا
والا اقولك اعملي لها هنا في المدونة والمدونات الاخرى حملة البحث عن طمط حشرية
واللي يلاقيها ليه عروس ببلاش

nody said...

برايد
ماتقلقيش
الحاسه الثامنه دى مستحيل بنت تفقدها دى حاجه داخل الجينات
بس هو ممكن تكون اخدت فتره راحه ماهى الى شافته معاكى مش شويه
ماتغبيش تانى ياقمر

Anonymous said...

بجد و الله يا غادة انتى هايلة ربنا يحميكى يارب و يوفقك ان شاء الله و الى تقدم مستمر و ماتاخديش فبالك من اللى بينتقضوكى دول اعداء النجاح يا بنتى و ربنا يوفقك يا برايد :)

Anonymous said...

وحشتينا يا بربر والله

ما تتأخرش علينا كده تاني

Anonymous said...

إيه ده؟

إنتي رجعتي الموديريشان؟

كده أحسن

للأسف فيه ناس مابتقدرش يعني إيه حرية و بيستخدموها غلط

قلة تربيتهم بتضر ناس تانيين

معلش ولا يهمك

Anonymous said...

عثل يا غادة
عثل كالعادة
:))

تحياتي

Anonymous said...

ghaaaaaaaaadaaa

a5eran?!!! ana kol yom bafta7 3ala your blog to see a new post..

enty 6awelty el 3éba awiiii

sweet as usual,rabena ywaf2ak ya rab yerzo2na w eyaaaky b el 3arees el sale7 :D

rania

Anonymous said...

و الله يا بنتي انا لو اعرف وصفة لرجوع الحاسة الثامنة دي ماكنتش إتأخرت

بس انا كمان إنقرضت عندي من زمان
أصلي بطلت أتعب نفسي و ادور عليها من يوم ماخلفت

خلاص بأة الواحدة ماعادش فيها مرارة

Anonymous said...

ما قولنا نخللي بالنا من طنط حشرية
في الاخر مش هاينفعنا غيرها

قولتوا اطلعوا م البلد

رجعي العلاقات بأة مع اماني او أونكل ديسكو هنعمل إيه؟

الدفاع said...

انا مش فاهم بصراحه تاعبه نفسك ليه وعماله تدورى على طنطك حشريه وحاستك التامنه قال يعنى كانوا حققوا الهدف منهم؟!!!!!!!!ماهو لو كان فيهم خير كانوا زمانهم اصطادوا اى حد ،،،،،، نصيحتى ليكى جربى طعم تانى يمكن تغمز
وربنا يوفقك

Misrdream said...

حمد الله على السلامه
يارب بقي تتجوزي علشان انفرح فيكي
وانتى متجوزه قصدي نفرحلك
تحياتي

Ahmed Al-Sabbagh said...

رااائع

بوست جامد جدا

god-of-luck said...

اكبر مشكلة ان تمتلك تلك الحاسة الثامنة

Anonymous said...

hi barbar.miss u sooo.i am the pharmacist who attended your seminar in ElDewan library.don't know if u will remember me.wish u all the best and keep writing regardless EL7ASSADEEN.Good luck

wanna b a bride said...

semsema

شفتي بأه الظلم وحش

من غير طنط حشرية الدنيا مالهاش طعم و لا لون
أنكل ديسكو
صحيح؟..هي نمرته كام؟
------------------------------
qabbani

thank u very much
:))
-------------------------------
مريم

ربنا يديم الود يا مريم

إدعيلي بس ألاقي طنط حشرشر لحسن غيبتها مأثرةعلى نفساويتي خالص
-------------------------------
زهرة الياسمين

ياااااااااارب
------------------------------
anonymous

لأ إزاي

أكيد بتحبه طبعا
ماتقلقش غنت من الموضوع ده خالص
------------------------------
anonymous

إفتكري الجمايل دي
------------------------------
أيمن

الحاسة التاسعة في الفرن

لكن قوللي إيه أخبار ليبيا؟

-----------------------------
عاشقة الحب

لولو و فوفو بيردوا السلام

زوزن ربنا يـ...رجعها بالسلامة هي و مامتها

ياللا خللي نيتنا صافية ..يمكن
-----------------------------
hussein

طب ما تبقى قبل و بعد

إنتوا الكسبانين في الحالتين
-----------------------------
gehad

آه..ليه الظنون الوحشة دي؟

غن بعد الظن إثم

لو على النوفالجين و اكيتوفان ماكانش حد غلب
غالبا الموضوع هيحتاج حاجة من الجدول

جدول الضرب إنت إفتكرت إيه؟

wanna b a bride said...

موجة

أكيد نفسي أشوفه

دي حاجة جميلة قوي
إنت عارف انا شكل الغلاف بتاعي ماكانش عاجبني في الأول خالص خصوصا اللون
يا ريت يطلع الغلاف الإفتراضي ده احلى

أول ما تخلصوا خلليها تبعتهولي
بلييييييييييز

تحياتي
:))
-------------------------------
mayada

إديني العنوان بالتفصيل و هاروح أجيبها أنا ..بلاش إنتي ..لحسن توقعك في عريسين وانتوا جايين في السكة
-------------------------------
anonymous

زورونا
تجدوا ما يشركم
:))
------------------------------
pink unicorn

وحشتيني يا قمر و الله

بصي هي شكلها هترسى على حزب جديد للبحث عن الحاسة الثامنة

لتعيسات الحظ اللي اتولدوا من غيرها
و الأتعس اللي فقدوها

طنط حشرية بأه كفاية عليها جروب على الفيس بوك
--------------------------------
محمد مفيد

بجد؟

يعني لسه فيه أمل؟
-----------------------------
رضوى عمرو خالد

وحشتينا ووحشتني الشلة كلها

سلامي و تحياتي و قبلاتي
-----------------------------
مصري

أهلا بيك أول مرة و إن شاء الله مش الأخيرة

الحواس كل يوم في العالي

و خصوصا مع ال30% العلاوة
دي لوحدها نزل معاها 6 حواس
------------------------------
صاحب المضيفة

إيه الدعاوى الحلوة دي

بقالي كتير ماحدش دعالي هنا

ربنا يكرمك ياااارب
-------------------------
unique

ما هو موضوع رسم طنط حشرية ده صعب حبتين

عشان هي لازم تترسم رسم خماسي الأبعاد
ماينفعش معاها الرسم العادي ده
مش هيبين مواطن الجمال و التميز اللي فيها

تفتكر لطشت الحاسة الثامنة و هربت بيها
مؤااااااااامرةةةةةة
-------------------------------
bastawisi

ماتفكرنيش لو سمحت
عشان هي قربت تقفل بالضبة و المفتاح

:(
ربنا يستر

wanna b a bride said...

واحدة بواحدة

الحاسة التاسعة
في الطريق إليك

كله موجود..بس مش هاقدر أفشي أسرار أكتر من كده
جمعية المرأة المتوحشة بعتتلي إنذار
-----------------------------
الطائر الحزين

ما نا قلت نعمل
upgrade
على طول بأه..مافيش وقت للسادسة و السابعة

و بعدين السادسة بتاعة بروس ويليز
السابعة بتاعو أحمد الفيشاوي

الثامنة دي تبعي أنا بأه
---------------------------------
بطوط الحبوب

مع دار الإفتاء المصرية
و الحزب الوطني
:)
---------------------------------
anonymous

و قبل المدونة يعني كان بيجرى إيه؟

ما هيا هياها

والا قصدك أقفل المدونة و بعدها هيجيلي عريس

تفتكري؟
-------------------------------
oss

بص هي لو جت على الأخضر في البرطقاني

ما فيهاش مشكلة

أهي الواحدة ماتبقاش تمشي جنبه في الشارع و خلاص

خليه في البيت

هيخرج يعمل إيه يعني؟..خليه قاعد بالعيال
----------------------------
دكتور بهدوء

إيه ده ؟..إنت عرفت؟
داحنا كنا نخبيين

3 فصائل منوفية أعلنت مسئوليتها عن الحادث

بنحاول لم الفدية اليومين دول ..الموضوع صعب عشان هما طالبينها كلها من فئة العشرة صاغ الورق

مغلبانة دنيا و آخرة طنط حشرشر دي

أدينا رجعنا الموديريشان تاني
أصل صاحبك بيجي ع السيرة
-------------------------------
mohamed al sha3r

الله يسلمك

مش بيقولوا كده بضه و الا إيه؟
-----------------------------
amr

المششكلة إن نشر صورتها ممكن يكون خطر على صحة المواطنين

ينفع في ننشرها في نجوم إف إم؟
------------------------------
fruita

الحقيقة إن الحاسة السادسة هي اللي اكدتلي وجود الحاسة الثامنة
خصوصا بعد الحاسة السابعة ما بقت شغالة الطاق طاقين بغض النظر عن إن الحاسة الخامسة و الحاسة الرابعة الإتنين كانوا بيعملوا مارشيدير لورا في حين إن الحاسة الثالثة كانت عاملة قفلة في الكونتاكت
-------------------------------
ظل الشمس

اهوالكلام الكتير اللي بيتنطور ده هو اللي بيوقف السوق

الحفلات و الإنترفيوهات مابتنفعش لما بتبقى بتتكلم عن كتب

لو كنت عملت كليب كان الموضوع هيختلف

wanna b a bride said...

جبهة التهييس الشعبية

بس على فكرة لما تتولدي من غيرها أحسن ماتفقديها على كبر

الواحدة خلاص بتعتمد عليها إعتمادا تاما مع كل اللي حواليها

كل اللي حواليا بيلبسوا أخضر في برطقاني ..أعمل إيه؟..أخسرهم كلهم يعني؟

بس طنط حشرشر

مأثرة فيا قوي المضروبة

عموما البحث جاري..لو تعرفي حد في وزارة الداخلية .أو مصلحة الضرايب أو مباحث التموين

إيدي على كتفك
-----------------------------------
ahmed_k

إيه ده؟

إنت تعرف مكان طنط حشرشر ؟
لأ ..إنت بتضحك عليا..لأ..أكيد بتضحك عليا

طب إديني أمارة

صابع رجلها الصغير والا حاجة

عشان بس أصدقك
--------------------------------
samourai 4 ever



يعني إيه رومانسية

---------------------------------
يسرا

ربنا يخليكي يا رب

إيه الكلام الجميل ده؟
اتمنى فقط أن أكون أستحقه

زورونا دائما تجدوا ما يسركم
--------------------------------
aboooooooood

حاضر يا فندم
علم و ينفذ
----------------------------
واحدة مفروسة

و هتطفش من إيه؟

حد عمل داسلها على طرف

ده اللي يرميها بالماية أرميه بالبيبس
-------------------------------
mahberry

اهلا بيكي

و انا باقول المدونة منورة كده ليه؟
و بالمناسبة دي

هتشيلي نص فاتورة الكهربا
ماشي؟
:)
------------------------------
son's egypt

شيخ و مندل؟
إنت فهمت غلط

طنط حشرشر أهم من كده بكتيير

انا بافكر أروح ل محمد البرادعي
أو محمد أبو تريكة
أي حد فيهم
------------------------------
أم هادي

طب إبعتيها لما نشوف

أهي طنط جت..طنط راحت
الله عليه العوض
--------------------------------
أحمد هندي

شفت يا احمد؟

آدي أخرة الشهرة و البتنجان

الكل قعد ينق و يقول هيجيلك عرسان

و آاادي اللي جرا

Anonymous said...

ربنا يارب يرجع طنط حشريه بالسلامه
بربر عايزه اقولك على حاجه انا كمان الحاسه الثامنه عندى بعافيه من كام شهر مش عارفه واللهى ايه ده تفتكرى فى فيروس فى الجو ولا ايه يا دكتوره

الصعيدى said...

مشاء الله

الى الامام

TIMMY !! said...

يعني ....

دي أول مرة أزور المدونة اللي بيقولوا عليها دي :)

كل ده علشان الجواز ؟؟

دي العملية في الآخر ... بطيخة !!!

يا حمرا .. يا قرعة !!

تحيتي

nor said...

بجد بجد تحفه
يا بنتي كانك بتكتبي اللي جوايا
حقيقي كل ما تنشيري جزء جديد الاقيكي بتحكي انا
مش ممكن
كملي يمكن الكلام يريح شويه ههههههههههه

وضحى البوسعيدي said...

المشكلة اني مااذكر منو اللي سل وبأي موضوع كان

اذكر مرة لقيت احد سائل وين ممكن يلقى الكتاب
المهم لـ سكان سلطنة عمان والمقيمين فيها
الكتاب تلقونه بمكتبة سيتي سنتر - مسقط

وضحى البوسعيدي said...

المشكلة اني مااذكر منو اللي سل وبأي موضوع كان

اذكر مرة لقيت احد سائل وين ممكن يلقى الكتاب
المهم لـ سكان سلطنة عمان والمقيمين فيها
الكتاب تلقونه بمكتبة سيتي سنتر - مسقط

Hamed Soliman said...

ازيك يا غادة

بوست جميل ... انا متابع جيد للمدونة

وبعتبرها من افضل عشر مدونات بحبها وبتابعها باستمرار ..

وبسألك يا ترى ايه افضل عشر مدونات بالنسبة لكى ؟؟؟

ارجوكى تردى عليا فى البلوج ده

http://top--ten.blogspot.com/

و اتمنى لكى مزيد من النجاح

ست البيت said...

لا مفر من القول ... تعلن ست البيت مسئوليتها الكاملة عن خطف طنط حشرية
وتطالب بفدية 2 رغيف بلدي وكيلو سكر و2بوتلز زيت كريستال الواحدة 5كيلو وباكيت برسيل كالر ...إهيئ أحسن شاحح عندنا ...
على ان يرسلوا على عنوان المدونة
وحذاري _حلوة حذاري دي؟_ من إبلاغ البوليس ...أبوس ايديك ماتبلغيش البوليس ...وضيفوا على الفدية طابور ولا الطابور الخامس عرسان لبرايد
وإلا سأرسل لكم طنط حشرية فيليه
أما الحاسة الثامنة متحزيش في نفسوياتك يا برايد يا خشتي الدنيا مش مستهاله
واللي عاجبه الكحل يتحكل يا إما يتفضل يحط آيشادو
تحياتي وعود احمد...
ست البيت

شريف القاضى said...

بجد موضوع هايل جدا وفكرنى بايام ما قريت الكتاب نفس الاسلوب الساخر المجارى للاحداث وعجبتنى اوى (كيف تحصل على سيخ حديد عز)

Amr Ahmed said...

عسل كالعادة

بوست جميل يا بربر

:)

Amr Ahmed said...

عسل كالعادة

بوست جميل يا بربر

:)

Anonymous said...

حمد لله ع السلامة يا دكتور
ربنا يسعد أيامك ويجمعك باللى يستاهلك
الحاسة التامنة دى هتحتاجيها بعد الجواز ومش هتلاقيها هاهاها
وبعدين فداكى ألف طنط حشرية هو احنا عندنا كام برايد يعنى

Anonymous said...

معلهش
انا شوي بعرف اقراي بين السطور انا شايف مش زعلانه علي طنط حشريه ولا الحاسة الثامنه لكن زعلانه عشان الناس بتفهمك غلط وده اللي مدايقك ربنا يعينك وحشتيني جدا ومتتاخريش علينا يا برايد
عصام

Nermien Hani said...

سكررررررررررررررررررررررر بجد زي العسل دمك خفيف مووووووووووووت

انا سمعت عن الكتاب ده قبل كده بس للأسف مجبتوش

Unknown said...

طيب..
توكلنا على الله
وحشتينا جدا يا برايد ..:)
و ربنا معاكي

Anonymous said...

انا قرأيت اكتابك أمس بس من فتحته ما سبتوش الا لما خلصت عليه.. عاوزه أسألك حاجه يا برايد يا ختشى.. الا حضرتك لسه مالقتيش كتاب : كيف تصطادين عريسأً؟ مش ممكن نطلبوه من أمازون و لا حاجه؟باينه كتاب مهم و يمكن يساهم فى حل العقدأووووى ..

اربعين سنة ستيوتند said...

انتي انسانة جميلة حقيق
بتفكريني بيا
:)

snohe said...

ههههههههههه
والله العريس ده اهبل



تحياتى

Anonymous said...

بالراحة شوية يا برايد على نفسك المسألة مش مستاهله منك كل ده، انا ماكنتش عاوزة اقوللك، و احرقلك المفاجأه، بس قلقك الزيادة على طنط حشرية هو اللي خللاني اتكلم .
بصراحة انا كنت امبارح عند طنط نحمدو بنت خالة طنطك حشرية، و الست لما عرفتها ان فيه جماعة عزاز عليا (طبعا ما جبتش سيرتك )، الست بحبحتلي بإن طنط حشرية كانت في سفارة دولة "بادنجو" اول امبارح، بتستلم من هناك فيزا، قال ايه هتروح هناك تجيبلنا عرسان من هناك، سمار ايه رجاله يتخاف منهم صحيح ، ياللا بأه ظقطتي و افرحي، بس ماتجيبيش سيرة لحد ، حبايبك بس ، بدل مانقوم بين يوم وليلة نلاقي اسعار عرسان بادنجو غليت هي كمان

Anonymous said...

السلام عليكم يا غادة
انا معجبه بيكى جدا و شوفتك فى التليفزيون امبارح و طبعا كنتى زى القمر كالعادة و ماشاء الله على لابقتك و لسانك اللى بينقط عسل
ربنا يكرمك يارب و يحققلك كل اللى بتتمنيه

عاشقة الحواديت said...

بسم الله الرحمن الرحيم

مدونة رائعة جداااا

وفقك الله اختي الكريمة غادة

Anonymous said...

هاي غادة انا مش عارفة اقولك ايه غير ان كتابك غيرلي مودي 180 درجة وخلاني اضحك من قلبي وانسي حزن كبير كان جوايا ميرسي يا قمر

saadny_architect said...

للمرة الأولى التى أدخل بها لهذه المدونة ...رغم شهرتها التى لا تحتاج إلى إعلان ...شغلتنى القضية أكثر من الموضوع ...أعنى قضية المدونة وإنتباهها الواعى لقضية على درجة عالية من الأهمية ...إذ أن تجاهلها يعنى إنهيار مجتمعى شامل ...فالزواج سنة الله فى الأرض لعمارتها ...وتيسير الزواج أمر واجب لصلاح الأمة ...ومع تغيرات العصر وإختفاء آليات التوافق أولا والتى كان يعبر عنها فى كل وقت وفى كل مجتمع بطريقة مختلفة ...ففى القرن الماضى حتى منتصفه تقريبا كانت الخاطبة تمثل جزءا من الموروث الثقافى المجتمعى والمتفق عليه لدى الكثير من العائلات المحترمة ....هذه الخاطبة المفقودة من مجتمعنا المعاصر أنتى أيضا تفتقدينها وتحزنين لفراقها رغم عدم قناعتك بها وتعبرين عنها بشكل رمزى فى شخصية (طنط حشرية )وهى إن لم تكن الخاطبة بمفهومها القديم إلا أنها ترمز لهذه الآلية من التواصل والتوفيق المحترم والذى يقبله المجتمع حتى ولو إختلفنا معه............ربما تعمقت أكثر من اللازم وحولت الموضوع من شكل الفانتازيا الساخرة التى تتمتع بها مدونتك وتصبغ عليها صبغة من خفة الدم المصرية المعهودة ..إلى شكل جاد لا يقلل إطلاقا من كفاءة إسلوبك الساخر فى طرح القضية ولكن ربما يتضامن معه بإسلوب مختلف (ربما ما إعتدت عليه وربما لعدم إمتلاكى للموهبة التى تتمتعين بها فى الكتابة الساخرة )...ولكن على أى حال الأفكار التى تطرحيها فى مدونتك تثير الإنتباه نحو عمق القضية وأهمية تناولها وهذا ما جعل لها كل هذا الصدى من الإنتشار
----------
ما أردت أن أركز عليه قضية التوافق بين الطرفين مع غياب الخاطبة وإختفاء أيضا (طنط حشرية )....ومحاولة التفكير فى طرق معاصرة لحدوث هذا التوافق يرتضيها المجتمع ....والقضية الثانية ضرورة تيسير الزواج من الطرفين شكلا وموضوعا بعيدا عن المغالاة ليس ماديا فحسب بل فى المواصفات المطلوبة من الطرفين فى ظل تعليم عالى للمرأة والرجل بشكل مكثف لم يعتاد عليه مجتمعنا قديما الأمر الذى أدى إلى مزيد من التطلعات لدى الطرفين
ربما تكون تطلعات مشروعة أحيانا أو أحيانا أخرى يكون بها الكثير من المغالاة -------
هنا وبشكل لايميل إلى تنميق الكلمات من الضرورى أن نضع إعتبارات لها طابع التقديم والتمييز فى الأولويات للدين فى الإختيار ..ولن أستطرد فى هذه النقطة لأن مقصدها واضح
--------
وأخيرا ..فربما لم أقرأ كتابك الأكثر شهرة فى أوساط المدونين وحتى العامة ...ولكن قراءتى لبعض ما نشرتى بالمدونة قد نمى لدى الكثير من الأفكار ..وخصوصا هذا الشكل المميز للمدونة الذى يميل للكوميديا الساخرة التى لها هدف عميق وإن بدت بسيطة ...هذه البساطة التى يفهمها ويعشقها الشعب المصرى ...
وهنا أطرح عليكى فكرة ربما تلقى بعض إهتمامك ...فى إستثمار هذه الشهرة للمدونة والكتاب فى تكوين جمعية يكون هدفها تيسير الزواج ومحاولة إيجاد حلول واقعية لحل هذه المشكلة التى أصبحت من وجهة نظرى تنم عن أزمة حقيقية على المستوى العام
--------
الفكرة مطروحة للنقاش فى حال موافقتك على المبدأ
-------
وتمنياتى بالمزيد من التألق ومواصلة الرسالة

Matra7na said...

Hii everyone, this is Farah a student doing research about blogging and is amazed by the work of BRIDE, Would you please all help me and fill out this survey for my research? i would be more than thankful

http://FreeOnlineSurveys.com/rendersurvey.asp?sid=3my3gf38kl7dwn4514955

Thank you very much

حبيبه said...

السلام عليكم يا برايز
حبيت اقول لك ان شهرتك اصبحت عالميه
يا ستي انا اشاسا زيك محلويه بس يا ستي سبتها وهجيت لبلدي التانيه اصلي نص نص ...جت صورتك ومقاله عنك وعن الكتاب بتاعك في جريده سويسريه بالالماني ...فحبت اعرفك واهنيك بنجاحك يا جميل

Unknown said...

ايه الجنان ده

Anonymous said...

أولاً : انك ما تتجوزيش أحسن ما تتجوزي وتاخدي مقلب جامد ف شريك الحياة .. للأسف الجواز طلع عملية مش سهلة

ثانياً : انتي خفة دمك تؤهلك للجواز بسهولة ، ماتجوزتيش ليه بقى ؟؟ هاه ؟

ثالثاً : مبروك الكتاب .. وانا كنت متابع المدونة ف أولها فترة كدة وتاهت مني .. بس ممكن تقولي ، عـدنا

رابعاً : انتي من المحلة صحيح ؟؟ والله كويس

Anonymous said...

والله أعتقد الزواج لا يكن أن يصلح إلا بالتباع طريق الهدى أما اللف والدوران غالبا لا تنتهي العلاقة الناتجة عنه إلا بالخسران
www.manarway.com/vb

Anonymous said...

انا اول مره ادخل المدونه دى ومبسوطه جدا بيكم وياريت اكون صديقتكم
هبه

Unknown said...

انا لسه جديده معاكوا فى المدونه واول مره اشترك فى مدونات بس انا معنديش حكايات لانى لسه صغيره

Anonymous said...

:D:D enty sokkar ya benty always well done ;) I luv ur way bgd

مجنون وبس said...

الحقيقة هي أول أبواب الخيال.حيث المتاهة العقلية.والتداعي الفكري.وحتي تعجز الكلمات عن الوصف.والعيون عن البصر والقلوب عن الدق. فذاك أرقي أنواع الخيال.أن تصل الي ما لا يستطع الأخرون الوصول اليه حتي جوارحك.ولكشتك. وتلكشاتك. ولا اقولك سيبك انتي حمدالله عالسلامة وعلي رأي المفتش كرومبوا. اجري يا احمد أدم جري الوحوش يا تلحق قطر الجواز يا متلحقهوش.

Anonymous said...

هذه اول مرة أتعرف بها على هذه المدونة، بعد أن تم استضافة صاحبة المدونة في برنامج تسعون دقيقة
لا شك بأن موضوع الزواج في مجتمعاتنا العربية موضوع يستحق أن يُكتب من أجله ليس كتابا واحدا فقط بل الآلاف وربما أكثر .
لم اتصفح بعد جميع صفحات المدونة ، وأرجو أن تحتوي على كل ما هو قيم ومفيد من أجل بناء مجتمع يواكب الحضارة ويسير على خطى التقدم.
أرجو أن يتم قبولي كصديقة لهذه المدونة
نانا

Anonymous said...

ازيك يا برايد؟وحشتيني مع انك كنتي عندنا قريب.علي فكرة انا مش قادرة اعلق علي حاجه معينه لأني بعد اضحك وكل كلامك بيعجبني واللي عاجبني ان افكارك ما بتخلصش......خسارتك في العرسان....فيفي

مجنون وبس said...

عزيزتي برايد...أتمني لكي التوفيق فيما تكتبيي...ولكن ربما يأتي العريس بما لا تشتهي الصحف....جواز مع سبق الأرسال والتصفح..(فهماني طبعا)...وعلي فكرة بنصحك بعد ما هاه يعني؟ان شاء الله ...تنزلي مدونة بعنوان...وجدت بعلي

realmony said...

انا برسل اعجابى واحترامى لصاحبه المدونه ولكنى احب ان اضع مدونتى البسيطه حتى ينتفع بها الناس لان لااحد يعرف مدونتى اتمنى ان احد يزور هذه المدونات وينتفع بها www.umoneymakers.blogspot.com
realmony.blogspot.com
محمد من مصر