Saturday, March 22, 2008

الحادي عشر

بس يا جماعة..داخلة أنا بأه الشقة و ألاقيلكم منظر يقطع القلب ..ماما محاصرة بين طنط حشرية و زوزن و عينيها زايغة و نفسها مقطوع ..وطنط حشرية بتبصلي و وشها مشرق كده و متفاءله..الست دي احنا مش لسه مدألجنها و قاطعين معاها العلاقات و ساحبين السفير من كام أسبوع..ده حتى شعبولا لسه عامل عن الموقف التاريخي ده أغنية بتتذاع في قناة مولتي كل نص ساعة..إيه مافيش عندها من الاحمر ده خالص؟..شيء غريب و الله..بس مش ده اللي استغربتله اللي استغربته بجد هي البت زوزن..البت قاعدة و حاطة رجل على رجل و على وشها ابتسامة و في عينيها فرحة ماطمنتلهاش..الفرحة اللي في العيون دي بتجيبلي حساسية..فرحانين على إيه دول؟..فيه إيه اللي يفرح يعني..إلا إذا..إلا إذا..و كانت الكلمات القاسية و ضربة القدر العنيفة فوق أم رأسي ..و أم رأس أمي كمان..


مش تيجي يا برايد تباركي لسوسن..سوسن خلاص هتتخطب


تاراتا تارارا..تاراتا تارارااااا...
أتاري ماما قاعدة زي أم هنادي اللي خدها الوبا يا خال


و دي كانت أول مرة أعرف معنى كلمة رقبتها بقت أد السمسمة..ماما يا عيني رقبتها إختفت ..دماغها كأنها متركبة قلاووظ بين كتافها على طول و دقنها قربت تلتحم بقفصها الصدري خلاص..و عشان تقدروا وقع الصدمة على ماما لازم تعرفوا حالتها النفسية في الكام شهر اللي فاتوا..الست خلاص بقت على شعرة و ماشية تكلم نفسها في البيت.. و بتستشير أي حد في المشكلة العويصة دي..اللي بقت أصعب من مشكلة طوابير العيش ..أي حد أو أي حاجة

مرة لقيتها فاتحة التلاجة وبتتكلم مع علبة اللبن
يعني لو جه عريس دلوقت نقبله و خلاص و الا نستنى حد كويس..طب لو استنينى نستنى أد إيه؟


شوية و ألاقيها فاتحة فرن البوتاجاز
يعني رأيك كده؟...نستنى؟..و الله إنت نصايحك كلها محروقة و رأيك ناقص سوى


بس اللي قلقني فعلا يوم ماقالتلي هننفض السجادة و بعد ماشلتها على قلبي و طلعتها فوق السطوح ونزلت أشوف إتأخرت ليه و لقيتها ماسكة المنفضة و نازلة هبد في البلاط
طب ماقلتش كده من زمان لييييه..كنا خلصنا من بدري


و ده كله نتيجة منطقية و حتمية و طبيعية لحملات الضغط النفسي و المعنوي اللي بتمارس علينا أنا و هي و احنا طالعين سلالم العمارة اللي بقت مناطق حظر تجول و بقينا بنعدي فيها على طراطيف صوابعنا ولا اجدع راقصات في بالية بحيرة البرلس الشهير


خلاص الناس أكلت وشنا و داخلين على قفانا ..كل يومين عريس يتدألج على السلم و الأخ تويتي ده اللي وقف و فضحنا في وسط السلم (أنظر العريس التاسع في الكتاب اللي لسه ماشتريتهوش لحد دلوقتي يا بيه)..حتى التعاطف اللي كنت باحسه منهم زمان ذهب أدراج الرياح (عادي بتحصل)..ماهو لما كل واحد من جيرانك ال13 يجيبلك عريس و ترفضيه بيتحول السلم كله لحقل ألغام .وواحدة واحدة اتحولت "لسه؟" اللي كانوا بيقولوهالي من كلمة لسه..لكلمة ..لس..لكلمة ..إلللللل..اللي هو حرف اللام مع إخراج اللسان بأطوال تتراوح بين 5 سنتي و نص متر و كل واحد حسب مقدار خنقته و طول لسانة


حتى اللي لسه بيمثل انه متعاطف لازم يختم الحديث بجملة من الفن الشعبي غالبا بتخلينا عايزين نولع في روحنا
هو انتي يا حبيبتي خلاص..ماعادش بيجيلك عرسان؟
لأ يا طنط بيجوا بس معظمهم مش كويسين
آااه..ماهي اللي ما تعرفش ترقص ..تقول الأرض عوجة



انتي يا حبيبتي خلاص؟
خلاص إيه تاني يا طنط؟
خلاص بقوا العرسان يرفضوكي والا لسه بترفضي؟
لأ يا طنط من ده على ده ..بارفض و اترفض يعني عادي
آااه..ما اللى يعمل نفسه رده تنكشه الفراخ



حتى آخر مرة و أنا رايحة الشغل و واحدة فيهم كانت مشغولة و بتدي الزبالة ل "هيثم"الزبال بتاع المنطقة ..لقيتها بتمصمص شفايفها و هي بتقول
ربنا يعدل المعووج
قام هيثم و إيمانا منه بضرورة تكاتف قوى الشعب العاملة و بالأصالة عن نفسه و بالنيابة عن فئة الزبالين المتعلمين قرر إنه يشارك في الحملة الوطنية لتعريف برايد بمقامها و راح قايل
بكرة اللي فى الحلة تطلعه المغرفة

(إيه العمارة البيئة اللي انا عايشة فيها دي؟)


بس أنا مازعلتش من "هيثم" عشان عارفة انه مجروح من ساعة ما رفضته لما اتقدملي بعد ماشاف فيلم "إنتبهوا أيها السادة مصر ترجع إلى الخلف" و افتكر نفسه محمود يس و افتكرني ناهد شريف (فيه الخير برضه بس ربنا يستر و مايتفرجش قريب على الرصاصة لا تزال في جيبي و يفتكرني محيي إسماعيل)..و أنا رغم إعجابي بشياكته (بييجي ياخد الزبالة و هو لابس فيرساتشي و عامل شعرة سابايكي و دايما إيده في جيبه) و رغم إن الواد كسيب (عنده عربية بيئة مصرية
اللي هي
B.M
(بس موديل قديم


لكن عرق الليبرالية و البروليتارية اللي جوايا اتخانق مع عرق البرجوازية و السفسطائية و الإمبريالية الحرة المتشددة و في الآخر اضطريت آسفة إني أرفضه (إفتحوا أي قاموس و ترجموا إنتم ..مش فاضية أشرحلكم)..فالواد إتقهر و حز في نفسيته..عشان كده كل اما ييجي ياخد الزبالة من عندنا و كنت أعدي قدام الباب كان بيبصلي و بياخد نفس عميق و يصرخ بأعلى صوته


زباااااااااالاااااااااااااه


أنا طبعا ماكنتش باخدها على نفسي خااالص مانتوا عارفين قلبي طيب أد إيه و قعدت أدعيله أدعيله لغاية ربنا مارزقه بخطيبته الباشمهندسة نيرمين
نرجع بأة من ذكريات معركة السلم مارس 2008 لطنط حشرية و زوزن
..حصلت؟...حصلت؟...حتى زوزن؟..يعني الأول نهى ..و دلوقتي زوزن؟...رجلي مابقتش شايلاني و اترميت على أول كرسي لقيته و ماما إنطلقت ناحيتي من آخر الصالة و هي بتطوح..ميت مرة أقولها بلاش تشرب حاجة أصفره..بس بتموت في الحلبة أعملها إيه؟
حطت إيديها على كتفي و راسها على راسي و اتفتحنا في العياط


عاااااااااااااااازوزن يا ماما؟..زوزن؟
عارفة يا حبيبتي ..عارفة
دي شكلها..دي طولها...دي عرضها..دي ..دي..دي بنت طنط حشرية..هو فيه حد يتجوز بنت طنط حشرية؟
يبقى عبيط و مابيفهمش..و ده بأه مانزعلش عليه



طنط حشرية قال إيه جت تحضنا هي كمان..الست دي بقت ولا جمهور الزمالك مابتتأثرش بأي صدمات
شوفتي يا زوزن شوفتي مش قلتلك هيفرحولك ..شوفي دموع الفرح

شوفت يا ماما شوفت..عرفتي بأه يا برايد إن كل شيء نصيب ..مع إني ماكنتش ناوية أتجوز دلوقتي خااالص..بس ..تخيلي ان العريس ده كان مصمم ..مصمم يتجوز دكتورة و تكون فوق ال25..لكن إيه ماما قدرت تقنعه و الحمدلله قرينا الفاتحة إمبارح



سيبيني سيبيني
و احاول أفلفص عشان أبطحها و ماما ماسكة فيا و طنط حشرية عاملالي لمس أكتاف في الحيطة ..لغاية أخيرا ما تحررت من قبضتهم
لأ بأه هو انا خيخة والا إيه
بس يا بنتي بلاش فضايح
فضايح إيه يا ماما الناس دول لازم..لازم
ماقلتكيش إحنا جايين ليه يا بربر..ده أخوه بيدور على عروسة
لازم يتغدوا معانا النهاردة ..امال إيه..يا للا يا ماما قومي اسلقي دكر البط اللي جوه هي طنط حشرية دي شوية والا زوزن بتيجي عندنا كل يوم؟ ياللا يا ماما إعمليلك همه أمال
لأ و شوفي النصيب يا برايد..هنبقى سلايف
يادي النيلة..كمان هابقى أنا و زوزن سلايف؟ طب و حياة عقل ماما اللي قرب يفوت ليكون ليكي نصيب من قبضة سلايف النينجا..يا دي الهم ..ياللا أديني هاسد مناخيري و اغمض عينيا و ابلعه و خلاص..على الأقل إتقاءا لشماتة هيثم فيا
ماما يا عيني فاقت من الإغماءة اللي كانت فيها
يعني يا حشرية يعني..هو كويس؟

كويس؟..ده طول و عرض و مافيهوش غلطة ده حتى فيه شبه من توفيق جوزي الله يرحمه..و النبي لو كان صغير شوية كنت إتجوزته أنا
الله يرحمك يا أونكل توفيق..و الله كنت راجل..فديت الجيل بتاعك كله ..الجنة و نعيمها يا اونكل و الله

بصي ياحبيبتي هما كانوا عايزين يشوفوكي في البيت هنا بس أنا قلتلهم نتقابل بره
إيه رأييييك؟



أجيبها يمين أجيبها شمال..مش لاقية سبب للي طنط حشرية هي و زوزن بيعملوه
طب لو هو زي اللي قبله يبقى هتجوز زوزن أخوه ليه؟
طب لو هو كويس..يبقى تجيبهولي ليه؟
تفتكروا ظلمتها..تفتكروا الست بتحاول و انا اللي بافتري عليها؟؟


تفتكروا؟



بكره نشوف

------------------------------------------------------------------------
شكر من الأعماق ل "محمدعودة" اللي تكرم و عمل للمدونة صفحة على ويكيبيديا ..


وأكررشكري..يا حالوللي و بقينا على ويكيبيديا كمان


:))

136 comments:

Anonymous said...

يا حالوللي يا حالوللي أول تعليق

:))

مبروك ع الويكيبيديا

بس زبااااااااالااااااااة

و ماتزعليش

دانتي قلبك أبيض قوي

:))

ماتغيبيش تاني

بتوحشينا

Anonymous said...

إوعي يا برايد

تبقي سلفة زوزن؟

يعني طنط حشرية تبقى في مقام حماتك

إنتي ناقصة يا بنتي؟
قبضة سلايف النينجا ماتقدرش عليهم الإتنين مع بعض

ماتعرضيش نفسك للتهلكة

إحنا عاوزينك

Anonymous said...

مامتك صعبت عليا أوي يا برايد

فكرتني بمامتي

بس ماما دلوقتي بتكلم الغسيل فوق السطوح
و بتضربني أنا بالمنفضة
:(
قوليلي هو هيثم لسه خاطب الباشمهندسة نيرمين والا خلع

أصل ماما طول عمرها نفسها تجوزني لواحد عنده عربية بيئة مصرية

بس تكون حمرا

:))

Anonymous said...

طب

إلللللللللل

لأ
بهزر
:P
حمد الله ع السلامة

بطوط حبوب said...

انا متابع المدونه من زمااااااااااان بس بقول هروح فين وسط التعليقات مش هبان هبقرا وبمشى بس فرصه المره دى انى فى الاول عشان اقولك انتى فوق الروعه وانا عايز اقول كده من زمان بس مش لاقى مكان

Lobna Ahmed Nour said...

والله يا برايد طالما الحكاية فيها طنط حشرية وبنتها اللطيفة زوزن






اهربيييييي احسن

والا اقولك .. خليكي معاهم لحد ما نعرف اللي وراهم

Anonymous said...

ربنا يجعلها اخر الأحزان ... يوه قصدى أول الأفراح
مبروك مقدما

Anonymous said...

مبروك على الويكيبيديا يا برايد ولا و وصلت للعالمية و الله شكلك بتصعبى الموضوع أكتر على نفسك عامة ربنا معاكى و معانا جميعا
أما بالنسبة لزوزن و طنت حشرية فلنترك الأيام ترينا ما الغرض الذى فى نفس يعقوب

Anonymous said...

ههههههههههههههههههه
طب وحياة احمد منصور عسسسسسسل
مبررررررررووووووك الوكيبيديا يا باشا
بس مش هتنازل عن
حلقتك علي الجزيرة
في بلا حدود

aya said...

هههههههههههههههههههه
يالا يا غادة بقى شدى حيلك
ويعنى
مالها زوزن
ان شاء الله تطلع كويسة

كملى بليييييييييييز عايزين نعرف الباقى
هههههههههههههههههههههه

ربنا يسعدك يا غادة ويديكى

$$Dado$$ said...

قبضة سلايف النينجا )
دى احلى حاجة في الموضوع ياريت يبقى عنوان البوست اللي جاي بتاع الضحية رقم11
طب انا متاكده اني طنط حشرية بتحب برايد بس و للاسف..... مش عارفه تعبر عن حبها ده ازاى
بس اعتقد لو النينجا دخلو في الموضوع ممكن طنط حشرية و زوزن و العريس يطيروااااا من بلكونة برايد

سلام يا دودي

Anonymous said...

Salam bride!i hope you're in the best of health and iman! congradulations for wikipédia! i'm really happy for you..you really deserve all the best!
chomicha, morocco

samourai 4 ever said...

لا بلاش السلايف اللى يبقوا يعرفوا بعض دول
و اوعى الحقى البطه على النار
اوعى تتحرق
و منصحش بالمقابله بره بصراحه
و متغبيش علينا يا غادة تانى
و دمتــــــــــــــــــــم

Anonymous said...

السلام عليكم و رحمة الله و بركاته
ازيك يا برايد و حشتينا وواحشتنا حكاويكى بجد انت بتهونى كتير ع الواحد من الضغط النفسى اللى كل الشعب المصرى بيسببو لينا ... بجد انا كل اما اكون مضايقه ادخل و اقرا شويه فى البلوج بتاعك بحس براحه .. ربنا ينولك كل اللى فى بالك .. ولو فعلا العريس كويس خلاص اتكلى على الله بقه مافيهاش حاجه و ابقى و لعى فى طنط حشريه و زوزن بعد الجواز على طول ... خدى بالك من نفسك .. اختك هبه من اسكندريه

صاحب المضيفة said...

وكمان طنط حشرية


يارب تسترها علي برايد يارب ومش يكون مقلب تاني


في انتظار نتيجة الماتش ده



دمت بسعادة

Asmaa mahaba said...

تستحقيها برايد
دمك يا الشربات والله يا بنتى الرجاله اتعمشوا او انطرشوا او بقوا زى جمهور الزمالك وطنط حشريه
بس حلوه الحلبه بتطلع فى النافوخ اما كان جايلى حته عريس النهارده واقولهم كبيير حرام فرق 15 سنه ...يقولولى البنات لاقيه بس على مين ولا طلعت سلمت وعملت نفسى ميته اقصد نايمه انا من مرشحى العنوسه اذا لم يتوفر الكويس
والفرصه المناسبه
وعلى راى المثل خللى العسل فى قناطيره لحد ما تجيله تساعيره
دا ماما كانت بتقوله ديما دلوقت غيرته بقى ضل راجل ولا ضل حيطه
تحياتى ليكى سومه_87

حاسوباتيه said...

ههههههههههههه زوزن وماله معلش استحمليها يمكن يطلع كويس ماحدش عارف

ٍSOU said...

يارب يا برايد يطلع احسن من اللى فاتوا و الاقيكى مغيرة عنوان المدونة و مخلياه قال عايزة اتجوز قال :)))

مدام كعبولة said...

شوفي يا برايد من خبرتي البسيطة جدا جدا في الحياة و من قرأتي لكل البوستات اللي فاتت فمن رأيي متبصيش عليها خالص هي شكلها بتحمل لك في طيتها مصيبة جديدة

او متعربيش خليكي ورا الكداب لحد باب الدار مش يمكن تأتي الرياح بما لا تشتهي سفنها هي و يطلع راجل كويس يمكن

بس الله يكرمك متتأخريش علينا في الاخبااااااااااااااااار

صبرني يارب said...

بصي يا برايد هو بجد بيبقي في ناس بتتوافر عندهم النيه الصالحه يعنى بس هما بيترجموا دايما غلط الاوضاع
وبيفكروا ويحكموا بشخصهم وفكرهم ومش بيقدروا التفضيلات الشخصيه والراي الاخر

دول الى هما الشعب المصري كله عادي يعنى

وبعدين يا برايد ماله هيثم حاجه غريبه اوي كان ماله ايه البتر ده عيب عيب ده راجل مركز يعنى

يلا ما تعمليش كده تاني بقى لما يجيلك حد فى مركزه

Anonymous said...

السلام عليكم

شو يا انسة غادة...وين التاسع و العاشر؟؟؟

اخر واحد كتبت عنه كان التامن..تقومي تنطي للحادي عشر ليش؟؟؟

كنت فاكرة انه غلط بالعد..بس بعدين قلت انه اكيد العرق الليبرالي البرجوازي البروليتاري الامبريالي العالمي بينقح عليك..عشان تجبري الناس يشتروا الكتاب..بس الغلابة اللي زينا ما يقدروش يشتروه..نظرا للظروف الجيوسياسية المحلية و الاقليمية و الدولية و القرشية المحيطة بنا.

و بالتالي ارجو من سيادتك ان تنظري الينا بعين العطف و الرافة و الشفقة .و تعيدي النظر بامر ادراج قصة التاسع و العاشر..ماشي؟؟

و دمت

EMI said...

هاى برايد
رايى ان العريس ده حيطلع زى اللى قبله .بس معلش قابليه عشان نقرا لك بوست جديد :-)

ولد مصري said...

أنا جاي أهدي النفوس
معلش يمكن رأيي مايعجبكيش أو يكون غريب حبتين بس أنا شايف أنك ترحمي نيينة الحاجة وترحمي نفسك وترحمينا معاكي وتوافقي على العريس ده وخدي الموضوع على أنه بر والدين ماهو كمان ماينفعش إن تيزا تدخل في مرحلة الكلام مع أبواب التلاجات والأفران والمنافض وبعدين معلش دلوقتي السويت في مستشفى أبو العزايم بقى يكلف الشئ الفلاني ده لو لقيتي حجز كمان.
إسمعي الكلام وبلاش لماضة إكسبي ثواب وإعملي خير في دنيتك وأهي حسنة قليلة تمنع عرسان كتيرة!!

نجوى سعيد said...

دائمة الابداع يا برايد

سعيدة بيكي جدا و في انتظار اخبار العرييييييييييييس

جبهة التهييس الشعبية said...

هههههههههههههههههههه
اولا وحشتيني
ما تبقيش تغيبي كده كتير
ثانيا مبروك على الويكيبيديا

ثالثا
كده يا بربر ترفضي الزبال ابو جيل في شعره اللي مبلط في الديسكو؟
وعامل ظابايكي كمان؟
اخص عليكي كسرتي قلب الولد

رابعا
انا ح اموت وانا مستنية بوست العريس
اوعي تغيبي

Anonymous said...

حلو البوست الجديد يا غاده

ومبرووووووووووووووووك علي الويكيبيديا

محمد عبد الغفار said...

عود احمد ، وويكيبيديا نورت

وصاحب المبادرة مجمد عوده انسان محترم

أطباء said...

بعد إذنك يادكتورة ياريت تعرف الناس بينا حتى نستطيع توحيد الأطباء جميعا
وشكرا

دعوة عامة

أطباء بلاحقوق تدعوكم لحضور مؤتمر القاهرة في نقابة الصحفيين الدور الرابع والذي يناقش مشاكل حركات المطالبة بزيادة الأجور
مواعيد ندوة أطباء بلاحقوق هي :
1- يوم الجمعة بالتعاون مع حركة تضامن من الساعة 6 مساء إلى الساعة 7 والنصف .
2- يوم السبت بالتعاون مع جمعية الحق في الصحة من الساعة 3 والنصف إلى الساعة 5 والنصف .

نرجو الحضور والمشاركة

وشكرا ..................

محمد فوزي said...

حمد الله ع السلامه يا برايد وحشتنا حكاياتك انا بعد اذنك عملت لسته عندي بالمدونات المفضله وهما لحد دلوأت اثنين انتي واحده منهم
اصل الواحد بيشوف في بعض المدونات بلاوي انما في مدونتك الحياه فعلا حلوه يعني الافضل من الكتابه الحاله اللي بتخلقها كتاباتك ده حتى الردود عندك كمان حلوه و عجبني اوي تعليق فلسطينيه
الى الامام دائما

Unknown said...

الله يكون ف عونك يا برايد

هاي اخرتها الباشا هيثم ؟؟

يالله بعين الله شو بدنا نعمل ؟

ع فكره أنا متابعتك من زمان و حتى شفت لقائك عالعاشره مساء

صراحه روعه و دمك جد خفيف

الله يفتح نصيبك يا رب و يسير لك ابن الحلال

والله حاسه معاكي جدا لني عم بعيش نفس المعاناه و عديت السن القانوني

ال 25 يعني مش اكتر

Z_Diva said...

aaah 5yana, tase3 we 3ashr 7asryan felktab :'(
msh oltilk inny 5areg elblad, tb eb3tihmly 3almail we sad2iny wa3d el7orra dain we kda y3ny, awl magy agaza ashtry ktbk, walhy hsjtreh ya abla :'(
ama b2a le a5o mrat ibn 5alt tnt zawzaw de, aked tab3an da a5oh elm5tal 3klyan, we 3yzen ygwezoh we y5lso mno, we fela5er y2tlik walla elserial killers bto3 blad elfringa, 5aly tntk 7shrya tnf3k b2a :P

Anonymous said...

يابرايد يعني انا بقي مزعلش علي الواد ابو دبلون اللي اتقدملي ده
والله من يومها وانا حاسه ان عندي صداع وعندي احساس اني قلب القفص
ربنا يعينك يابرايد
بجد الحلقه تحفه ولازم لازم
ترجعي بسرعه عشان مستنين البوسط الجديد
وملكيش بركه الا زوزن
ومبروك علي الوكبيديا ربنا يسهاه ياعم دخلتي التاريخ من اوسع صفحاته ههههههههه
لابقر ولا بحسد بنق بس
بجد انتي جميله قوي وتستهلي كل خير متتاخريش علينا

rona said...

صح بدام الحكايه فيها يبقى بكمله العرسان بقى

Anonymous said...

hi bride
how r you, i wish tht u r good ,
i liked u , u r really good
good luck to u darling
inshaalah u will be the most beautiful briiide in the world inshaalah
Good luck to you


Morocco

احمد أبو العلا said...

اشكرك يابرايد على رأيك فى مدونتى
الحقيقة انا متعاطف معاكى ومش عارف اعمل ايه .... بصى عليكى وعلى المجتمع الدولى هو اللى هيجيبلك حقك بس باقترح عليكى -لزوم الاعلام والبرستيش الدولى- على غرار اطباء بلا حدود واطباء بلا حقوق اعملى انتى كمان اطباء بلا حظوظ وماتدخليش البت زوزن ... يمكن ربنا يفكها قادر ياكريم

مهندس مصري بيحب مصر said...

ربنا يستر

حنان شلبي said...

مرحبا انا اول مرة ادخل مدونتك وبالصدفة بس ضحكت من قلبي
ههههههههههههههههه ولسة بضحك والله وااااااااو انتي وين عايشة يابنتي وكيف لهلأ ما ولعتي بالعمارة والي فيها
ولا شكلك بخيلة ومستخسرة فيهمن حبة كاز يعيني

بس سدقيني لو ولعتي فيهم رح تعملي حتة دين ثواب
ههههههههههههههههههههههههههه

وتحياتي الك
حنان شلبي

Anonymous said...

wallahy ya bride , mateftekreesh enny lama tetgawezy en sha2 allah elkalam dah 7abatal.... homma elnas kolohom keda...

3andek masalan ana metgaweza we 3andy bent..... leel we nehar 7amaty tezen 3alaya we 3ala goozy.... meratak 7amel?? la2... meratak 7amel ...la2... meratak 7amel... la2.... elakh elakh.... mabtehmadsh!!! la heya wla ekhwato wala araybo, wala araybee, wala elgeeran... te2ooleesh fakreena gozeen 2araneb mestaneyena newled mara kol esboo3een... begad ba2et 7aga tedaye2...

mafeesh mokalme teliphone gheer we asma3 ezay bentak?? elhamdulilah... yekoon radaha enshalla yarab tekhaweeha.... ya rab walad... lazem walad, we homa elbanat deeh khelfa??

wala fee 3eed el2om... kalemtaha sba7 elkheer ya tant, kol sana wenty tayeba... radaha kan, wenty tayeba ya 7abebty, howa enty 7amel?? 2oltelha ;a2 ;eeh?? 2aletly , howa ebny mesh 3amel elly 3aleeh walla ehh?? la2 keda mayemfa3sh... 3awzeen 3eed el2om elgay yekoon 3andek walad!!!


ya3nee zay manty shaifa, elnas kolaha keda, maye3gebhash el3agab, wala elseyam fi ragab!!!


fa bas ba2olek, tawely balek, elghatata dee tab3 fi elnas kolaha.... wekol wa7da beyla2olha 7aga ye2refooha beeha... fa seebek men elkalam elly la yewady wala yegeeb... lama taetgawezy enshaallah, lazem yekoon 3an eqtena3, we reda, we tekoony sa3eeda belly 2albek ekhtaro, wa ella 7atefdaly tool 3omrek tendeby el yoom elly shoftee feeh... fa kamely zay manty, naseebek 7ayeegy fi ma3ado, we rabena ensha allah 7awafa2ek!!!

ta7eaty leeky we lelmodawena elgameela beta3tek... begad enty kateba mawhooba :)

Anonymous said...

انا اول مرة اقراء مدونتك
وبجد اسلوبك رائع
وانتى بنت دمك زى العسل

انا مش عارف انتى هتردى عليا ولا لا

بس بجد انا اول مرة اقراء مدونه فى حياتى

وحبيت اقلك راى


وبجد انا نفسى اكتبلك كلام اكتر عشان فى حاجات كتير نفسى اقلهالك

يمكن تكون خيرا كتير

عبد من عباد الله said...

( عباس فوق العادة )

في حملة الإبادة
(عباس) كان كتلة من قوة الإرادة:
هدّ الخصوم بيته
واغتصبوا زوجته
وأعدموا أولاده.
لم يكسروا عناده.
قال لهم:
لي زوجة ثانية ولاّدة!

Anonymous said...

بجد انتي تجنني و دمك شربات مووووووووووووت و الله انا حبيتك اوي
نفسي تستمري و تمتعينا بكتاباتك
و ربنا انشاء الله يرزقك بابن الحلا الليى يستاهلك بجد :)
باموووت فيكي

اختك سارة

Anonymous said...

واللهى يا برايد طنط حشريه دى ست جدعه وزوزن دى بنت حلال مصفى
اتكلى على الله يا بنتى وشوفيه مالها سلايف النينجا بس هو حد طايل يبقى هو وزوزن العسل دى سلايف
والنبى يا برايد ابقى ابعتيلى موبايل طنط حشريه انا محتجاله اوى اصل انا كمان امى بتكلم الحلل فى المطبخ

بحبك يامصر said...

برايد ياقمر
والله انتى موهوبه ايه الجمال ده؟
عجبنى اوى تشبيه طنط حشريه وبنتها سوسن بجمهور الزمالك مش بيأثر فيهم الصدمات
وكمان سلايف النينجا
انتى جميله اوى يا بريد
كملى مستنين الباقى

موناليزا said...

ولا تحطى فى نفسيتك ولا تقهرى روحك وفى الاول والاخر ده نصيب ونصيبك هيجيلك هيجيلك هيروح فين يعنى

نورس said...

اه شفتك على الويكيبيديا
الف مليون مبروك وعودة جميلة كما العادة... يارب قبل العشرين نشوفك في بيت العدل بس عشان خاطر الحبايب لو حصل صوري الفرح ونزليه على اليوتيوب عشان الي بره مصر وعشان الزحمة كمان ... ودايما يارب فوق
نورس

ROMANTIC ROSE said...

ثواني كده .. الجملة دي "كويس؟..ده طول و عرض و مافيهوش غلطة ده حتى فيه شبه من توفيق جوزي الله يرحمه..و النبي لو كان صغير شوية كنت إتجوزته أنا" معناها ايه ؟؟ شبه توفيق جوزها ماشي .. لكن لو كان صغير شوية كانت اتجوزته معناها انه اكبر من حشرية بكتير ؟؟ حشرية اللي هي ام زوزن اللي هي من دورك يا برايد تقريبا ؟؟

لو ملاحظتي دقيقة يبقي كده "يا حلو بانت لبتك اول ما دابت قشرتك"!!!

Heba said...

بقى الزبال أخد باشمهندسة برده, أنا كدة حأزعل قوى يا برايد

رنا يسامحك

Anonymous said...

مبروك عالكتاب ( ولو متأخرة حبتين)

ممكن تزوري مدونتي؟ عشان موضوعي الأخير له علاقة باللي اتكلمنا فيه عالإيميل.

محمد said...

ونعمه الفرح
www.worldgames1.com

Anonymous said...

ايوة كدا يا برايد
بلاش الغيبة الطويلة دى
وبعدين اوعى تاخدى خطوة تندمى عليها
يعنى بعد التعب ده كله
وكمان تبقى سلفة زوزن
وطبعا هتروحيلها زيارات وتجيليك زيارات
وطنط حشرية تيجى كتير
وانتى المتضررة فى النهاية
حذار حذار حذار

نانا said...

مساء الورد

انا لسة مشتركة جديدة في عالم التدوين هنا وعجبتني مدونتك اوي يابرايد وتابعت حلقة العاشرة مساء..

لما دخلت المدونة دي لقيتها واقعية جدا وبتمس شريحة كبيرة جدا من البنات من بعد ما يتخرجوا من الجامعة ويواجهوا الواقع ويتصدموا بيه


وربنا يرزقك باللي يستاهلك


تحياتي

نهى

Mafrousa said...

برايد .. والله فطستينى من الضحك... اسلوبك يجنن.....و بعدين يا حبيبتى اتقلى و ماتشوفيش العريس دلوقتى.. ده انتى بقيتى مشهوره.. هوه انتى بقيتى شويه....ده كل اللى سابوكى .. حيضربو نفسهم بالشبشب .ههههههههه
و الله ربنا يوفقك .....

Mafrousa said...

ملحق
برايد ... لحظت انك لم تردى على اصحابك.... اوعى الشهرة تنسيكى اصحابك.....اوعى يابرايد

اهو ده عيبه said...

يعنى هى بعد ما نقت الحليوة اللى عايز دكتورة جايه تقولك على اخوه

الخوف لا يطلع فرز تانى منه

كان ماله هيثم ، وبعدين بلاش موضوع زوزن ده
ده حتى المثل بيقول( مركب الضراير سارت ومركب السلايف غارت)

Unknown said...

يخرب عقلك انتى طلعتى محلاوية

دة انا هادور عليكى فى شوارع المحلة

حتة حتة

احلى مسا يا اجدع محلاوية فى بر التدوين كلة

Anonymous said...

ما تخلصي بقى يابنت الحلال .. وهيثم في الأيد ولا عشرة على الشجرة .. وضل هيثم ولا ضل حيطة .. بس أنا مش مصدق إن زبال اسمه هيثم .. مش معقول .. ممكن يكون سفروت .. فرج .. حمؤة .. ويكون كارت الفرح
غادة & حمؤة
مش كده ولا أيه
مستني الزيارة
said57.blogspot.com
سلام

أحمـــــد علـــــــى said...

مبرووووووووووووك ... باقى عريسين اتنين بس وتدخلى نادى ال13 ومايجلكيش عرسان بعدها
لا يا بت بهزر معاكى.. انت صح لو اللى بتقوليه حقيقى ومش منفسنة وبتطلعى عقدك على الناس وتطلعى فيهم القطط الفاطسة.. إنما بجد حقك تختارى وتتشرطى .. المرأة الذكية والمثقفة واللدمها خفيف قربت تنطع للعنقاء والغول والخل الوفى .. ( م بلمح إنهم بيكونوا شبه العنقاء أو الغول ... استغفر الله) وبعدين تاخدى واحد غتيت يقرفك فى عيشتك وانت تكتبى حاجات تقرفنا فى عيشتنا احنا كمان؟ أو واحد سطحى يحرمنا منك أساسا... اكتبى ياختى ولا يهمك ... جواز ايه؟؟
اقرى ادراجى الأخير ... ليه علاقة بمدونتك ولو عجبك ممكن تنشريه فى مدونة بيت العرايس والعرسان
آه كنت هنسى ... عايز أشترى الكتاب... بس نسخة موقعة .. سيبيها فى دار الشروق وهابقى اسيبلك 5 جنيه زيادة تمن التوقيع:)

mostafa rayan said...

عوداحمد ياست برايد
انا من ساعة ماقريت وانا مشقادر امسك نفسي من الضحك علي العموم مايجراش حاجةبلاش نسبق الأحداث شوفي الزبون وعايني البضاعة وبعدين قرري بس حلوة الأمثال التحفة دي

إبـراهيم ... said...

أدعوكم، وتدعوكم ورقة وقلم .... إلى الاحتفالية المقامة بمناسبة فوز بوكر العربية ببهاء طـاهر ، وذلك يوم الثلاثاء القادم .... الأول من إبريل ... في نقابة الصحفيين الدور الرابع ... السادســـة مساءً

.

. والدعوة عــــااااامــــــة ....طبعًا

فراشة said...

صباح الخير

هههههههههه بجد ضحكتينى من قلبي يا برايد على الصبح بجد كنت محتاجه شوية الضحك دول

بس بجد يابرايد كده قطعتى قلبي كده تسيبى هيثم هوه هيثم ده يتساب ؟؟؟؟؟؟؟؟؟؟؟؟
حيرتينا معاكى بقي لا احمد عز عاجبك ولا هيثم طيب نجيبلك مين بقي
لا بقي انتى مش مقدره النعمة ولا ايه
الواد كسيب واكيد العربيه البيئة بتاعته هتنفعك بدل الشعبطه في الاتوبيسات
فكرى تانى يا بنت الناس واذا كان على المهندسة نيرمين سيبي الحكاية دى عليه ....هطفشهالك

صاحبة مدونة يوميات موظفة استقبال
تعالوا زوروناااااااااا

فراشة said...

اه برايد فكرتينى لو عاوزة اي تجديد على شكل المدونة احنا في الخدمة

هظبطك ...... بس قوليلي الاول هتدفعى كام ههههههههههه

ملحوظة :
انا لاحظت كده ان فيه ولاد كتير عاوزة تثبتك على البلوج خدي بالك يا قمر

نجوى سعيد said...

الله عليكي يا غادة امتعتينا و اسعدتينا ربنا ميحرمنا منك ولا من الفاكهة اللي بتنزل من قلمك

رئـــــيسـة حزب الأحلام said...

الحشريين دول فى كل حتة

رئـــــيسـة حزب الأحلام said...

الحشريين دول فى كل حتة

wanna b a bride said...

رؤى

حرام عليكي ده هيثم

يعني أكيد مايقصدش
--------------------
خالد

تفتكر؟

يعني قبضة سلايف النينجا ماتقدرش؟

ولا حتى لو استدعيت دوناتيللو؟
-------------------
anonymous

نيرمين هافرقعهالك لو ليكي شوق في العربية الحمرا

بس

أهم حاجة

إزي المنفضة؟
-------------------
بطوط الحبوب

مدونة اختك برايد مفتوحالك على طول

لو ماشالتكش الكومنتس يشيلك الشات بوكس

شكرا ليك
ده بس من ذوقك
-------------------
unique

مانا باقول كده برضه
مش يمكن؟
------------------
abdo farag

شكر الله سعيك..قصدي الله يبارك فيك
------------------
dr.sora

من غير ما اصعب ..هي لوحدها

والا بلاش..اللهم لا إعتراض
--------------------
الصمت الحزين

بلا حدود مرة واحدة

لأ مش للدرجة دي

انا و احمد منصور مع بعض
كتشييير كتشيير
------------------
aya

باشد في حيلي لما خلاص هينقطع

و الباقي جاي

هيروح فين يعني؟؟
------------------
dado

ينفع إسم فيلم مش كده؟

بس جديد موضوع البلكونة ده

فعلا أسهل بكتير من السلم

حل جذري

wanna b a bride said...

anonymous

thank you chomicha for your kind words

و الله يبارك فيكي
-----------------
samourai 4 ever

يووه فكرتيني بالبطة

شكرا دي كانت هتتحرق

------------------
هبه

أدينا هنشوف كويس والا إيه

بعدها مش هتبى ولعة ده هيبقى مولوتوف
-------------------
صاحب المضيفة

ده ماتش ماتش

من بتوع المصارعة الي بيبقوا جوه القفص دول

ربنا يستر
-------------------
somaa

الحلبة دي مية مية

بس إنتي جربيها بتعمل أحلى دماغ

حلو موضوع العسل ده..الصراحة جديد

تحياتي لماما
-------------------
حاسوباتيه

تفتكري؟

نجرب
-------------------
sou

دان هاقفلها خالص

و هافتح واحدة جديدة لانج
-------------------
حياتي قنبلة ذرية

خلييينا ورا الكداب

ورانا حاجة؟؟
--------------------
صبرني يا رب

تفتكري هيثم كان لقطة
طب ما الموضوع ماخرجش من إيدينا

نفرقع نيرمين؟؟
والا بلاش

الطيب أحسن
--------------------
فلسطينية

ما فيش حد نازل مصر يجيب الكتاب؟

طب لو مافيش إبعتيلي ميل و أنا أبعتلك التاسع و العاشر

عندي أغلى منك يعني؟

سلام يا قمر

wanna b a bride said...

emi

كده؟

يعني أنا أشرب مقلب جديد عشان خاطر إنتوا تقروا؟

عموما فداكوا
--------------------
walad_masry

يعني أوافق غميضي كده؟

هي إستراتيجية برضه

بس نينتك هتستريح كده يعني لما أجيلها متطلقة بعد يومين؟

تفتكر؟
---------------------
نجوى سعيد

ده بس من ذوقك

أنا الأسعد

و أنا كمان في الإنتظار
---------------------
جبهة التهييس الشعبية

أولا إنتي كمان
ثانيا الله يبارك فيكي

ثالثا ماتفكرنيش

و النعمة باحس بالذنب كل أما أشوفه

بس أكيد الباشمهندسة نيرمين هتداوى كل الجراح

العريس اكيد جاي

هيروح فين

ده قدر و مكتوب

تحياتي
-------------------
رضوى عمرو خالد

شكرا يا قمر

و الله يبارك فيكي
-------------------
محمد عبد الغفار

ده أكيد نورك

و باضم صوتي لصوتك

فعلا إنسان محترم
-------------------
أطباء

إنتوا بتعملوا مظاهرات لوحدكم و مابتاخدوناش معاكم
:(
بس عموما أهلا بيك
--------------------
محمد فوزي

شفت لستة المدونات

و أتشرف إني أكون فيها و كمان عنوانها شيء فعلا يشرف

شكرا ليك على ذوقك

تحياتي
--------------------
مياسي

لا بس أنا ماقبلتش

مش درجة هيثم
هو ساعات بارجع أفكر

لكن لأ برضه أنا على موقفي

تحياتي لرفيقة الكفاح
:)
--------------------
z_diva

خلاص من غير زعل

إبعتيلي ميل بس و أنا أكمللك السلسلة

ماباقدرش على زعلكم
قلبي ضعيف أعمل إيه؟

wanna b a bride said...

mady

لا لا ده أبو دبلون ده أقيم

ولا يهمك لا صداع و لا غيره

إحنا يا بنتي بقينا تيفال مافيش حاجة بتلزق خلاص

إجمدي

و على فكرة

إدراج الويكيبيديا كان يوم خميس
:)
تحياتي
--------------------
rona

صحيح أنا مش فاهمة قوي

لكن أكيد عندك حق
---------------------
anonymous

morocco

تعليقين من المغرب على بوست واحد

هي دي الوحدةالعربية بجد
:)

متجمعين في الخير إن شاء الله

شكرا على الكلام الجميل و الدعاوي الحلوة

تحياتي
-------------------
أحمد أبو العلا

أصل أنا باقدر قوي موضوعالخطوط ده

أطباء بلاحظوظ؟؟

فكرة برضه
--------------------
مهندس مصري

ياااااااااا رب
-------------------
حنان شلبي

رب صدفة خير من ألف معاد

معذورة مانتي ماتعرفيش الجاز في مصر بأه بكام

عندكيش شوية سلف؟

:)
تحياتي
--------------------
anonymous

بصي حماتك دي تعمليلها بلوج و يمكن ربنا يهديها

زي ما ربنا هدى طنط حشرية دي

هي ماتهدتش قوي ..بس برضه في تقدم

الناس عاملين زي الحكاية بتاع جحا و إبنه و الحمار ..فاكراها

بس هنعمل إيه ..إحنا عايشين وسطيهم و مانقدرش نعتزلهم


ربنا يصبرهم
--------------------
anonymous

شكرا ليك أو ليكي مش عارفة

و يا رب دايما تنوري المدونة

و الميل في الصفحة الولى ممكن تتواصلي معايا عن طريقه


تحياتي
--------------------
عبد من عباد الله

جميل
-------------------
سارة

شكرا ليكي يا قمر

ده بس من ذوقك

و مستمرة حتى يأذن الله

Anonymous said...

موضوع في موقع العربية عن المدونات المنشورة في الكتب

نفذت جميع نسخ الطبعة الأولى..
تحول 3 مدونات نسائية إلكترونية إلى كتب تثير جدلا في مصر

http://www.alarabiya.net/articles/2008/03/27/47516.html

و أطرف تعليق :

- أنا عايزة أتطلق
قبطية مصرية البابا مش ماوفق على تطليقها|28/03/2008 م، 09:41 مساءً (جرينتش)
هذه...قصتى أنا : عيشة سودة لشخصين

بلوجاتي said...

عفوا اللينك

www.alarabiya.net/articles/2008/03/27/47516.html

كلاكيت تانى وتانى said...

جميل قوى البوست المرة دى يابرايد وجامد جدااااااا ويارب تفضلى بنقس الحماسة والروح الجميلة دى فالكتابة
تحياتى

غني يابهيه said...

نصيحتى ليكى تبعدى عن الزن والحشريه

Egyptian Geologist said...

السلام عليكم و رحمة الله و بركاتهأولا اود ان اهنيكي علي البلوج العظيم ده رغم انه متأخر
بس غصب عني لاني يادوب لسه عارف عنه من يومين و لسه صاحي عشان اخلص البلوج قراية
و اتمني اكون صديق ليكي في البلوج ده
و انك تسعدينا كمان و كمان
سلاااااااااااااااااااااااااااااااام

كلبوزة لكن سمباتيك said...

انا متهيألي كل قرائك بيدعوا انك عمرك ما تتجوزي علشان نفضل نستمتع بكتاباتك اللذيذة دي


تحياتي

Anonymous said...

اولا اعرفك بنفسى انا مى عزت صاحبة مدونة فتاة المطر وكمان انا طالبة فى بكالوريس اعلام القاهرة وبحضر لمشروع تخرجى عن مجلة علمية تكنولوجية وبعمل موضوع عن المدونات وطبعا مش هلاقى احسن واجمل من مدونتك عشان اتكلم عنها ياريت تكلمينى عن مدونتك ومن اين جاءت فكرتك وكيف تطورت لكى تبح احدى الكتب الصادرة عن دار الشروق ارجو الرد عليا وارجو ايضا ارسال صرة لكى لو امكن لتصاحب الموضوع وايميلى lialyelsahar@yahoo.com او يمكن ترك الاجابة على مدونتى fatatelmatar.blogspot.comوشكرا والتمنيات بالتوفيق وفى انتظار الجزء الثانى من الكتاب

تــــايه ومش تـــايه said...

اولا مبروك على صفحة الويكبيدا .
وربنا ما يحرمك من طنط حشريه علشان هيا شكلها فى الاخر هتجوزك لاى عريس بالاكراه

ايام العمر said...

اسلوب جميل


بس كان لازم تحشرى جمهور نادى الزمالك كدة معاكى

هو هتبقى انتى والزمن ولا اية

ايمان اسامه محمد عواد said...

تجنن استمرى
و لو ان الجواز مش حلو اوى يعنى زى مانتو فاهمين
لكن اهوه لقب بنحب ناخده و خلاص
و انا عارفه لو ماكنتش اتجوزت برضه ما كنتش حاسمع كلام حد و حاصر اجرب بنفسى
نعمل ايه هوه ده طبع الانسان

yasmeen yousif said...

بجد بجد انت عسولة خالص , ده اولا , ثانيا بقى اوعى تستبعدى انك تبقى سلفة زوزن ", مين عارف ده نصيب ومش بعيد ده يكون نصيبك , انتى بس قبل ما تقابلية صلى استخارة وبعديها ان شاء الله كاه حيبقى تمام وابقى طمنينا عليكى وربنا يرزقك ويرزقنا بالزوج الصالح ان شاء الله

yasmeen yousif said...

اولا انت عسولة جدا , ثانيا ما تسبتعديش انك تكونى سلفة زوزن لان ده نصيب ومين عارف فينا نصيبه فين , اهم حاجه انك تصلى استخارة , وان شاء الله اللى فيه الخير يأدمه ربنا , وابقى طمنينا عليكى وربنا يرزقك ويرزقنا بالزوج الصالح .

om yassein said...

أذيك يا برايد عاملة أيه أنا أول مرة بكتبلك عشان أقولك شوفي العريس اللي جيبهولك طنطك حشرية يمكن ربنا يوفق وبعدنل محدش خسران حاجة أه يبقى أسمك مبتقفليش الباب زي ما بيقولوا و يمكن لعل الحداية بتحدف كتاكيت و سلمي على زوزن

Anonymous said...

كل ما تتأخري علينا بفتكر ان الموضوع تم
ربنا يستر ويقدم اللي فيه الخير

Anonymous said...

واصلي كتابة في الموضوع و اوعي توقفي الا إذا حسيتي أنه خلاص ماعندكيسش كلام
الموضوع ممتع جدا و اسلوبه لذيذ جدا و حصل و بيحصل كل يوم و اكتر من كدة

و مبروك علي الكتاب و زوريني في مدوناتي
د عائدة

Zika said...

فعلا تحفه
لكن لا مؤاخذه الكتاب ده الاقيه في مكاتب فين
متقوليليش دار الشروق . انا قصدي يعني اجيبه من مكتبة ايه تحديدا . او فين مكاتب دار الشروق دي ؟

hanan khorshid said...

الكتاب فين يا برايد
و اوعى توقفى كتابة عن الموضوع عشان جامد جادا
على فكرة انا العمارة عندى كلها خلاص خلصت برضه بس فاضل واحدة فى تالتة اعدادى
سؤال سخيف يا برايد
هى زوزن عندها كام سنة ؟؟؟؟؟

مروة الزارع said...

جميلة بجدددددددد

أسامه يوسف said...

أنا أول مره أوصل هنا
لأ علشان مابقاش كداب دى التانيه
بس دى الأولى فى حط الكومنت
الأولى كانت بعد لقاء العاشره بعد منتصف الليل

بجد بجد البلوج تحفه وجميله قوى
أنا هامسكها دلوقتى من أولها لآخرها
ولو سقط فى امتحان آخر السنه يبقى بسببك
أصل انا اعداديه
شهاده يا ناس

يل سلام علشان الحق اقرا اى حاجه

Anonymous said...

لاااااااااااااازم
لااااااااااااااااااااازم
لاااااااااااااااااااااااااازم
تستغلي الفرصة دي وتقولي لناس كتيرة عن حكاية اضراب 6 أبريل
بجدددددددد
دي حاجة مهمة لينا كلنا
والكل لازم يساهم
ناس كتيرة مش عارفة عنه حاجة

Anonymous said...

نورتي الويكبديا

مبروك

هبههههووب said...

اسلوبك حلو اوى يا قمرة
ومدونتك جميله
ربنا يكتب لك الخير حيث كان ويسعد ايامك قادر يا كريم
إذا اردت شيئا بقوة فأطلق سراحه فإن عاد اليك فهو ملك لك الى الابد
وإن لم يعد فإنه لم يكن لك من البدايه
عارفه يا اختى
انا كمان موضوع الجواز دا مشوع حياتى الاول واى حاجه تبقى بعدة ف الترتيب سواء شغلى او اى شىء اخر
الا انى مقتنعه ان الى يجرى ورا اى حاجه بتجرى منه
ولما يجرى منها هى الى بتجرى وراة
انا عاجبنى اسلوبك جدا ف الكلام
وربنا يقدر لك كل خير

Anonymous said...

شكرا يا برايد على أهتمامك بمقالة ويكيبيديا

وهذا أقل شئ يمكن أن أقدمه لمدونتك الرائعة

Unknown said...

بصى يا ستى
مش هكدب عليكى انا عرفتك من العاشرة مساء واعجبت جدا بيكى وبفكرك وبجراتك كمان
عشان انا بعانى من حتة الجراة دى زيك والحاجة اللى بتشفعلى انى ببقى بتكلم بجراة جامدة ووشى جايب الوان فبيعتبروا ان فيا خجل
المهم من كتر ما شجعتينى وعجبنى كلامك ومدونتك اناعلى فكرة قريتها كلها انا عملتلى بلوج عشان اعبر عن نفسى
عشان لسه بدرس مششش فاضياله قوى بس بجد انتى قدوة ويارب نخرج م اللى احنا فيه ده لانى اتخنقت انا لسه ما كملتش عشرين وبتتوجهلى اسئلة فى الموضوع ده توجع واعتبر عانس فى نظر ناس كتييييييييرة منهم ناس قريبة اوى ليا
ربنا يعينك

GO ON AND ON AND ON

Anonymous said...

مبروووك يا بربر على كل حفلات التوقيع دى .... موش ناوية يكون فى حاجة فى اسكندرية؟؟؟؟؟؟؟ اوعدك اجى اشوفك و اشترى الكتاب. صدقينى كنت عاوزة اشترى الكتاب من زماااان بس انا ماروحتش معرض الكتاب و معرفش اجيبه منين و انا فى اسكندرية... هانستناكى .. انا محوشة تمن الكتاب

wanna b a bride said...

basma

طب و ليه أبعتلك نمرة طنط حشرية؟

إكتبيلي عنوانك و انا أبعتهالك كلها
-------------------
بحبك يا مصر

ربنا يخليك

ده بس من ذوقك
------------------
minaliza

و لاباحط في نفسيتي

بس الناس هما اللي بيقهروني

و بس يجي بس ..و أنا أطلعهم على جتته إن شاء الله
------------------
نورس

صور الفرح إيه؟

دا أنا هاعمله في ميدان التحرير و هاعزم كل مصر
ده هيبقى جاي بعد كفاح و نضال
------------------
romantic rose

يا شيخة لأ لأ ماتقوليش

دي طنط حشرية و بتهزر يعني مافيهاش حاجة
------------------
heba

طب أنا أعمل إيه

ده ذوق الباشمهندسة نيرمين و أنا أعمل إيه

و بعدين دانا كنت على وشك إني أقبله
الواد لقطة برضه
-------------------
bunaz

جهد مشكور جدا

خيركم من تعلم العلم و علمه

شكرا ليك على إفادتنا بهذا الكتاب الجميل

و شكرا أكبر لدعوتك الكريمة لي لكي أقرأه
-------------------
إسلام المصري

أنا أتأنى إذا أنا موجود

ده شعاري في الحياة

ربنا يستر و مايودنيش في داهية
-------------------
نانا
أهلا بيكي في عالم التدوين

المدونة نورت
و شكرا على الكلام الجميل

wanna b a bride said...

واحدة مفروسة

هما مين دول اللي سابوني

كلهم إتدألجوا من ع السلم

إنتي نسيتي والا إيه؟؟
------------------
أهو ده عيبه

يعني بلاش زوزن و أوافق هلى هيثم؟؟

نظرية برضه
------------------
واحد مش فاهم حاجة

أهلا بأبناء المحلة الشرفاء
:)
مابامشيش في شوارع على فكرة
دور عليا في الميكروباصات
:))
-------------------
saidaziz

إنتوا هتبتدوا تخلوني اندم إني سيبت هيثم

و الله فعلا كان فرصة..ده كفاية العربية بس
إحنا عمارة متطورة و مابنختارش زباليننا غير بعد إنترفيو و كشف هيئة
و يا هيثم يا تامر يا بلاش
------------------
أحمد علي

مش كده و النبي؟

بلا جواز بلا بتاع
خلينا قاعدين كلنا مع بعض كده
هي قاعدة الحظ دي تتعوض؟
------------------
mostafarayan

على رأيك

و بكره على وشك يا بان يا نداغ اللبان
:)
-------------------
إبراهيم معايا

شكرا على الدعوة الجميلة
-------------------
فراشة

و بعدين بأااااه
هتخلوني أغير رأيي و أحط الباشمهندسة نيرمين في دماغي

تفتكري هيثم بجد فرصة
بجد يا أوختشي؟
هه؟

و يمن ده اللي يثبتني

لأ دانا جدعة قوي و اعجبك
------------------
نجوى سعيد

ربنا يخليكي على الكلام الجميل ده

بس موضوع الفاكهة ده جديد قوي
:)
تحياتي
-------------------
رئيسة حزب الأحلام

و خصوصا طنط شكرية
رئيسة حزب الحشريين
:)

wanna b a bride said...

حد فاهم الستات؟

مقالة كحلي

بس عموما شكرا ليك و للي علقوا و دافعوا

تحياتي
:)
-------------------
بلوجاتي

شكرا مرة تانية
-------------------
كلاكيت تاين و تاني
ياااااااااااااارب
:)
-------------------
غنى يا بهيه

بس مهما بعدت عن الزن

بيجي ورايا
و كنك حشرية مهما دألجتها ضد الكسر
نصيبي
-------------------
egyptian geologist

أكيد بقيت صديق للبلوج

و أهلا بيك في كل الأوقات
-------------------
sampateek

يبقى هو ده السبب بأه

مع إننا أصحاب

يبقى الموضوع زي الدبة اللي قتلت صاحبها بأه
-------------------
مي عزت

معلش يا مي إنشغلت و ماقدرتش أرد على تعليقك

ممكن تبعتيلي أسئلتك على الميل و انا إن شاء الله هارد عليها
-------------------
تايه و مش تايه

الله يبارك فيك

ماهي تقريبا شكلها هترسى على كده
--------------------
أيام العمر

معلش ..بكره تروق و تحلى

ماتزعلةش كل واحد بياخد وقته
:)
-------------------
إيمان أسامه محمد عواد

هي تجربةو لازم نمر بيها
هنعمل إيه؟

ربنا يسترها معانا بس

wanna b a bride said...

yasmeen yousif

ربنا يخليكي يا سمسم
حاااضر..هاقابله و نشوف
يمكن تمشي المرة دي
----------------
om yasein

حاضر يا أم ياسين
يمكن ربنا يوفق و تمشي و أبقى أم محمد والا حتى ام عتريس
----------------
anonymous

الموضوع محتاج تمهل

و لازم نتقل ع الرز لحد مايستوي
والا إيه؟
----------------
aydy

مستمرين إلى أن يشاء الله يا دكتورة

بس إنتي ماكتبتيش إسم مدونتك عشان أزورها
-----------------
zika

مكتبات دار الشروق
في ميدان طلعت حرب-التحرير
سيتي ستارز مول
فيرست مول-الجيزة
الكوربة مصر الجديدة

و موجود في مكتبة ديوان الزمالك
و ديوان مصر الجديدة

و في الكتب خان بالمعادي

و شفته كمان في فرشات الجرايد اللي قدام كنتاكي التحرير
--------------------
hanan

بالنسبة للسؤال الأول

أنظر التعليق السابق

ربنا يصبرك على عمارتكم
عندنا كمان نفس النظام

زوزن إتولدت بعدي بحبة كده

مش عايزة أقول قد إيه
بلاش إحراج
------------------
مروة الزارع

شكررررررررا
------------------
أسامه يوسف

لأ ..إلا الإعدادية

دي منعطف تاريخي مهم في حياة كل أفراد المجتمع العاقل و الواعي

يا راجل بلا مذاكرة بلا بتاع

إقرا إقرا و لا يهمك
:)
تمنياتي بالنجاح و التفوق
-------------------
barb michelen

ok....thnx
-------------------
anonymous

طب مانت قلت كل حاجة أهه
:)
-------------------
عبد الرحمن فارس

ده نورك

الله يبارك فيك

wanna b a bride said...
This comment has been removed by the author.
wanna b a bride said...

هبههههوب

ميرسي ليكي يا عسل

يعني تفتكري أجري منه؟

دي أول مرة حد ينصحني بكده

طب نجرب

ماهو الوقت متسع جدا جدا للتجربة
-----------------
محمد عودة

أكيد أنا اللي أشكرك

كلك ذوق و الله
و زي ماتعليق هنا قال
أكيد إنت حد محترم

شكرا مرة تانية
------------------
rodi

سعيدة بمعرفتك
و سعيدة إني أكون السبب في دخول عالم التدوين

و التعبير عن النفس يسهل الكثير من المواقف الصعبة في حياتنا

بس أكيد مش المفروض إنك تبتدي تقلقي و انتي ماكملتيش عشرين

لسه بدري يا قمر
-----------------
semsema

شوفي يا ستي

هو موجود في مكتبة دار الشروق اللي في سان ستيفانو مول

و احنا بنحاول مع دار الشروق يعملولنا توقيع هناك

بس هما مشفقين علينا من السفر و البهدلة

بس أوعدك هنحاول إن شاء الله

Z_Diva said...

we b3deeeeeeeeeeeeeeeeeeeen

e7na msh nbhna 3la mowdo3 elzwa3'an elkteer da

tb kmly elkessa we ro7y etsh3'ly shwaya, msh tsebena kda mesh 3rfen a5o goz zawzaw tle3 eah egzagly ??!!

yalla ya bnty e7na wrana masha3'l

belnsba lel e-mail sa2b3thoulk wnshkor lkm t3atfkm ma3 ele5wa el3rb walmohajereen :D

أُكتب بالرصاص said...

برايد
اسكتي يا اختي
مش امبارح وانا باتجول في كارفور ابو ظبي
إذ فجئتنا الاقي كتابك وكتاب رحاب منورين الرف
قلت مابدهاش يا واد
لازم تحصل على نسخة للذكرى

رحت بعيد عنك دافع العشرين درهم
درهم ينطح درهم
(ماليش دعوة انا عايز الحصان بتاعي)

واصبح عندي نسخة بس ناقصها التوقيغ
فا ياريت توقعي لي وتبعتهالي
وياريت كمان التوقيع يكون على شيك بعشرين درهم

بس تعرفي ..القراءة في الكتاب احلى كتير ولها طعم مختلف
طبعا مش دافع فيها عشرين درهم
:)

وكمان زوجتي بدات تقرأ فيه ،
وبدات تكون نظرة عن المرأة المصرية ،
ومتهيألي كتابك وما حوى ، سينتشر في المغرب

ام يحيي said...

لا لا يا برايد استني بلاش زوزن
اصبري بس كام سنة علي ما يحيي يكبر وهجوزهولك علي طول
هو هيلاقي زيك فين ؟
انتي بس الحقي جهزي الشقة وانا هخليه يتجدعن ويكبر بسرعة

ام يحيي said...

علي فكرة ابني واد حليوة ومقطقط واحلي من بتوع لجنة السياسات بمراحل
وف رابعة ابتدائي كمان
يعني مش اي اي ولا زي زي

LOST said...

ازيك غاده

اول تعليق اكتبهولك كان في عرايس وعرسان على بمنتهى اللطفغ

ياريت تقرأيه وشكرا

كلمات الصمت said...

مبرووووووووووووووووك على الوكيبيديا
وانت بتوصفى مامتك فكرتينى بماما هههههههههههههههه ربنا يفرح قلب مامتى ومامتك

Anonymous said...

انا رأيي ان احد تأخر حالات الزواج مش بسبب الظروف الاقتصادية للولد بس ى..لا اعتقد ان العاتق الاكبر بيقع على اهل البنت من غير زعل..لان اهل البنت للاسف مش مراعيين للحالة الاقتصادية اللي الشباب بيمر بيها
بجد لازم االهل يراعو الحته دي .. و في نفس الوقت البنت متبسش للماديات اوي لو هيه عاوزة فعلا انسان بيتقي الله فيها و يراعيها ايه لزمته العطله؟؟ ايه لزمته كل ده؟؟ عشان كده بصراحة انا بحترم جدا الاجانب لانهم شعب مبيبصس عالماديات اوي لما اتنين يحبوا بعض اهم حاجه عندهم الانسان اللي قدامهم ..انا مبقولشي طبعا البنت تتنازل لا طبعا انا قصدي تيسر والخصوص الاهل....

Mohamed Anwar said...

كلامك من القلب علشان كده جميل
وتفصيلك للأحداث رائع لدرجه ان ساعات بحس اني شايف اللي انتي بتوصفيه قدامي

وزي ماقولت لرحاب بقولك المحافظة علي النجاح اصعب
ربنا يوفقك وتمتعينا اكتر

مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
شخابيط said...

طيب كلام جميل قوي بس مش خايفه لحسن اي عريس يتقدملك ويعرف انك تكتبي عن خطابك بطريقه ساخره يخاف احسن توصيفيه بطريقتك الدقيقه مع مراعاة كافة التفاصيل صغيرها وكبيرها انه يخاف انه يتقدملك صدقيني انا بحط نفسي مكان الشاب اللي عايز يتقدملك وبخاف احسن اتعرض لقلمك انت بارعة بجد في السخريه براعة تخوف اي حد من انه يقترب حتي منك سامحيني ارجوك ويارب ما تزعلي مني انا عارف قد ايه انت انسانه حساسه

مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
Anonymous said...

gohead bride.ويارب نشوفك برايدبجد قريب انشاالله