Tuesday, August 07, 2007

بنت التلاتين

في تدوينة سابقة وصل لي تعليق من واحد "كالعادة" شايف ان البنات هي السبب في اللي حاصلها و ان أي بنت لو كانت من الأول رضيت بقاليلها ماكانش ده بأه وضع البنات في مصر..ورغم ان في كل قصصي و مغامراتي الصالونية تلاحظوا اني مستبعدة العامل الإقتصادي لأن المشكلة بالنسبة لي ماكانتش أبدا الفلوس..اللي بيتقدملي بيبقى عارف هو بيتقدم لمين و عارف مستوانا ايه-مش مستوى مادي عالي قوي ولا حاجة- لكن ماحصلش ان حد اتقدم ايد ورا و ايد قدام ولا حصل اننا رفضنا حد عشان ضعف امكانياته المادية..بالعكس والدي من النوع المتفاهم ...الأزمة بالنسبة لي مش أزمة فلوس أد ماهي أزمة شخصية و أخلاق و تربية و انسان أقدر أعتمد عليه وقت الحاجة...لكن مازال فيه ناس كتيره بتصر الحاحا على ان البنت هي و أهلها هما السبب في كل المشاكل بالمغالاه في الطلبات و تعجيز العريس و القضاء على طموحه و حلمه بالإرتباط و لازم نجمع كل البنات و اهليهم و نعدمهم ضربا بالقباقيب لأنهم السبب في احباط الشباب و افساد مستقبلهم...أنا مابانفيش طبعا ان فيه فئة بتغالي و بتطلب طلبات غير معقولة..في بيت العرايس و العرسان ممكن تلاقوا قصة عن الموضوع ده بعنوان "فرصة نضيفة" ..لكن دلوقتي فيه اتجاه متصاعد بالرضا بأي منظر عشان نلم الليلة و نخلص من الأتب اللي طالعلنا في ضهرنا اللي اسمه البنت



طب نسيبنا من المرحلة دي....ندخل على المرحلة اللي بعدها...الثلاثين و ما ادراك ما الثلاثين..النظرية بتقول...لمي التعابين بأه و خلصينا..أهو راجل و السلام ..تخلفيلك عيلين تربيهم و تذاكريلهم و هو هيقضي حياته على القهوة أو الكوفي شوب أو على النت و خلاص و توتة توتة و يا دار مادخلك شر


ترد النظرية المقابلة...يعني أصوم أصوم و أفطر على فتحي؟...طب مانا كان قدامي اللي احسن منه و قلت لأوانتوا كنتوا موافقينني..طب مانا كده هاعيش بقية حياتي تعيسة ..يبقى أعيش تعيسة براحتي أتفرج على مسلسل القناة الأولى بدل ماتش الزمالك و ماحدش يسرق مني الغطا وانا نايمة بالليل ولا ياكل الفرخة كلها و يسيبلي الجناحات..والا أروح أقبل واحد يعمل فيا كل الحاجات دي لمجرد اني أشيل التهمة عن نفسي و لا انال الللقب الموعود؟


..


و يبتدي الصراع ..طب أستنى و ربنا هيكرمني في الآخر..والا هو نصيبي كده و نلم الليلة باه و خلاص؟



و اللي فاكر ان بنات التلاتين دلوقتي زي بنات زمان ..لقية..يبقى غلطان..في نفس التدوينة السابقة جالي رد على التعليق الرجالي بتعليق بناتي ذو وجهة نظر معاصرة..جديدة ..و جريئة


و الرد كان بيقول


كلمني بقى عن بنات التلاتين.. اللي منهم كتير اشتغلوا واستقلوا وربنا قدرهم يوفر لأنفسهم مستوى معين من الحياة... تقدر تقولي إزاي دول مطلوب منهم يستحملوا صعوبات البداية.. البداية اللي بنات التلاتين خاضوها لوحدهم... ومطلوب يستحملوها مع واحد سنه يتراوح من التلاتين إلى الأربعين.. ما هي بنت التلاتين ما تتأمرش على السن... هي طايلة..
بصراحة... مش معقول يعني بعد ما الواحدة تقضي أحلى سنين العمر لوحدها بتحلم.. تصحى متأخر قوي على حقيقة مطلوب منها تستحمل فيها صعوبات البداية لحد ما تبقى أربعين وللا خمسة وأربعين سنة!!!
صعوبات البداية اللي من ضمن طرق التغلب عليها تأجيل الإنجاب لحد ما نستقر شوية ونخلص من أقساط الشقة والعفش والأجهزة.. تأجيل الإنجاب لحد امتى لواحدة فوق التلاتين؟ لحد سن اليأس مثلاً؟
صعوبات البداية اللي بنتغلب عليها بتأجيل الفسح والمصايف والخروجات من أجل التوفير... لحد أمتى بردوا؟ لحد ما نبقى محتاجين نوفر الفلوس دي عشان فلوس دكتور الروماتيزم ونقاطع خروجات العشا بره عشان الكوليسترول والنقرس وارتفاع ضغط الدم؟؟


يتهيألي كده وضحت إنها هتبقى بداية ونهاية


بصراحة... أنا مقتنعة تمامًا إن اللي كنت هاقبل بيه وأنا طايرة من الفرح وأنا عندي 20 سنة... لا يمكن أستحمله دلوقتي... مش كِبر ولا حاجة... بس اللي تاكله على الفطار ما يشبعكش على الغدا
بنت التلاتين طبعًا لسة نفسها تتجوز... بس مش عشان ضل راجل ولا ضل حيطة... لأنها خلاص اتعودت على الشمس وجلدها نشف واسود وماعدتش الشمس تخوفها ولا محتاجة ضل حيطة تحوشها عنها... أو لأنها خلاص عملت لنفسها الحيطة اللي متحاجاها واتعودت عليها... بنت التلاتين محتاجة جواز من غير صعوبات البداية المادية... كفاية قوي قوي صعوبات التكيف مع الآخر... لأنه مهما كان الحب والتفاهم، اكتشاف الآخر بين جدران البيت الواحد بيكون مختلف تمامًا عن اكتشاف في صالون بيتنا أو بيتهم وفي النوادي والكافيهات والشغل... وما تنسوش إن بنت التلاتين دماغها استوت قوي ونشفت عن بنات العشرين!
بنت التلاتين مش ناقصها صعوبات البداية لأن الوحدة اللي عاشت فيها العشر سنين اللي فاتوا كفاية عليها... واللي استحملت عشر سنين لوحدها تستحمل غيرهم لوحدها بردوا وإلا هتبقى بتغير نوع مشاكلها والسلام.
أنا مش باقول مطلوب فيلا وعربية ولا شقة خمسة غرف وثلاثة رسبشن مكيفة... بس حاجة موازية للي أهلها معيشنها فيه... ما قلنا مش بعد عشر سنين حلم وأمل تنزل على جدور رقبتها عشان تبدأ من الصفر.


ربنا يصلح حال المجتمع والناس كلها ويحسن ختامنا جميعًا إن شاء الله.
عارفة إن نكدت عليكم... بس معلش... ما خلاص.. الشمس ما عادتش بتلسع لأننا اتعودنا عليها!



وجهة نظر باعرضها لأني أعجبت بجرأة صاحبتها- التي لم تصل الى حد كتابة اسمها على التعليق-لكن اللي فاكر ان كل بنات التلاتين مش طايلين و هيرضوا بأي حاجة يقرا التعليق تاني و يفكر



ناس كتير هتقول ..طب مانتوا كده مش ناويين تتجوزوا خالص..أقولهم مش دي وجهة النظر الغالبة..لكن موجودة و بقوة...لذلك وجب التنويه


...

115 comments:

Anonymous said...

انا مش عارفه انتى عامله مشكله كبيره جدا من مشكله صغيره انا راى ان كل شئ قسمه و نصيب ده كله رزق فيه ناس تتجوز اصغر ناس تتجوز اكبر يعنى مفيش قاعده لكن مش معنى كده ان العروسه ترضى باى حد يجيلها اهو راجل و خلاص البوست هايل فكره جديده و حلوه ربنا يوفقك انا لو كان ليه اخ واللهى كنت قلتله عليكى يمكن ترضى بييه يكون منحظه بالتوفيق ان شاء الله

Anonymous said...

مرحبا
تعرفي انا عمري 26 سنه بس انا سعوديه الجنسيه تعرفي انا بقى بسمع كلمه عانس دي من امتى من عمري 19 سنه اعتقد لما تعرفي كده راح تحسي بمقدار لهفتي الى الهروب من مراره اللقب ده حتى لو بانصاف الرجال و انت طبعا ما تعرفي الاعداد الرهيبه لهذه العينه من الرجال الدنيا وحشه قوي و الوحده اصعب و شوقي الى الامومه اصعب و أمر و رغبتي في الحصول على الاستقرار النفسي يااااااااااااااه انت مش راضيه انا بقى راضيه لان انا عندي ايمان باني ممكن اغير الراجل اللي مش عاجبني الى واحد عاجبني

Anonymous said...

و الله أنا رأيي الشخصي إنها تقعد ما تتجوزش أحسن من إنها تتجوز واحد مش عاجبها يا هيتخانقوا طول ما هما عايشين مع بعض يا هتتطلق
و بكدا نبقى عقدنا المشكلة و بدل عانس تبقى مطلقة

لأ ، من غير offence يعني تكون عانس أحسن

ع الأقل محدش هيعايرها بإنتها متطلقة و انتي عارفة عندنا ف مصر بيبصوا للمطلقة ازاي

بس أنا عندي حاجة محشورة ف زوري بس عايز أقولها

لما صالات الأفراح ف مصر محجوزة كلها لشهر حداشر اللي جاي لدرجة إن بنت ناس أصحابنا مش لاقيين قاعة لأنهم ما حجزوش من بدري

أمال فين الشباب اللي مش لاقي يتجوز؟

محمود على said...


انا مش عارف اقول ايه
الله يخرب بيت التقاليد الغبيه
والمجتمع المتخلفه
والشباب الضعيف
والبنات الهبله
والحكومه الفاسده
ربنا يكرمك بيوم
اسعد من كل ايام حياتك

mary victor said...

الأخت الأنونيمس اللى من السعودية و بتقول إنها ممكن تغير واحد لغاية ما يعجبها، يعنى إنتى هتيجى تعملى اللى أهله و صحابه ماعرفوش يعملوه فى 30 سنة؟ كل خبراء العلاقات و الجواز بيقولوا ماحدش يتجوز حد على أساس إنه هيغيره بعد الجواز لأن ماحدش بيتغير و بالعكس بأة لو إنتى حاسة ان 20% من صفاته وحش النسبة بترتفع بعد الجواز عشان كل المستخبى بيبان.

و بعدين لما أتجوز عشان كلام الناس و أهيه جوازة و خلاص، هيعملوا لى ايه الناس فى باقى عمرى؟ هييجوا يحلوا لى مشاكلى؟ و على رأيك يا برايد تعاسة قدام مسلسل القناة الأولى أحسن من تعاسة قدام ماتش الأهلى.
و بعدين يا الواحد أو الواحدة يتجوز حد عاجبه فعلا و يكون مبسوط حقيقى إنه هيربط حياته بالشخص دة يا بلاها جواز أصلا.

Anonymous said...

Dear sister
life is too short to spend on sad time, enjoy life. Stop worrying, as you see time flies fast so please don't waste on sadness. Go to movie, change your interests, find new hubbies or concentrate in your career or environment and helping the less fortune-less. Think about girls in Somalia or Sudan and how they are dieing for hungry, and pray a lot.

Samir Saad said...

انا مبسوط أوي بوجهة النظر الجديدة دي. بصراحة حاجة في منتهى القوة. انا بافرح في كل يوم احس فيه ان البنت مش محتاجة للراجل علشان تعيش، علشان حد يكمل معاها المشوار بعد ابوها. انا مبسوط بعرض وجهة النظر دي.

شكرا للجريئة صاحبة وجهة النظر، وشكرا ليكي يا برايد

Pink Unicorn said...

هاى برايد ....
انا اكتشفت البلوج بتاعك قريب لكن قريت كل كلمة اتكتبت فيه و حقيقى انا معجبة بيكى جدا.
البوست المرة دى هزنى لدرجة انى كان لازم اقول حاجة.
انا عندى 28 سنة و قربت على 29 و برضه مش مرتبطة و اللى حواليا انقسموا لحزبين ناس شايفين انى متطلبة اكتر من اللازم و ناس مش على نفس درجة القرب فاكرين انى اصلا مش عايزة اتجوز . و الحزبين غلط. اكيد عايزة احب واتجوز و ابنى بيتى و يكون عندى اولاد و حد باستريح معاه يقاسمنى بقية حياتى ..
بس اتجوز مين ؟ هى دى المشكلة !
برضه بالنسبة لى المشكلة عمرها ما كانت ماديات .. كان دايما ان اللى بيتقدملى شخصيته مش مناسبة
اكتر مرتين الموضوع كان على وشك انه يتم ، كان ماعندهمش شخصية اصلا .. كل واحد فيهم ماشى ورا دماغ ماما ولاغى دماغه و تفكيره تماااااااااااماً ...
وبعدها اكتشفت ان الحكاية دى اصبحت مشكلة قومية ، مش مشكلتى انا لوحدى
سمعت و شفت بنات كتير كل واحدة منهم فكت خطوبتها او حتى اتطلقت لأن حماتها بتتدخل فى ادق تفاصيل حياتها و الأستاذ بشكل أتوماتيكى بياخد صف والدته ويتبنى رأيها لأنها بتقنعه انه لو ساب " الهانم " يكون لها رأى فى حياتهم المشتركة و قالت اى كلمة غير " نعم " و " حاضر " تبقى دى أول خطوة فى أنها تتحكم فيه و تلغى وجوده و.... " يا عينى على الرجالة !!! "
النقاش بالنسبة لهم حرام شرعاً و جملة من نوع : " بس انا رأيى ان ...... " دى بداية خناقة محترمة.
و بغباء فظيع متصور أن العيب كل العيب انه يسمح لمراته بالتفكير والنقاش و استخدام المخ اللى ربنا خلقه فى دماغها لكن مش عيب ابداً انه يسمح لوالدته أنها ترسم له حياته بتفاصيلها.
و بينسوا بأصرار ان الرسول كان بيستشير زوجاته و يتناقش معاهم ، وأن مش عيب ابدا ان اتنين مفروض انهم ناضجين وبيفهموا يتناقشوا و كل واحد يحترم رأى التانى حتى لو مش متفق معاه و يأما واحد منا – أياً كان – يقدر يقنع التانى او نحاول نوصل لحل وسط يرضى الطرفين. من غير ما يكون فيه واحد بيفرض أراءه على طول الخط والتانى بيتنازل على طول الخط.
يا جماعة مشكلة البنت بداية من سن 27 انها فعلا – خصوصاً لو كانت بتشتغل – بتكون لها شخصية وكيان لازم اللى حيرتبط بيها يحترمه. وأنا شايفة ان زوجة عاقلة يقدر يثق فى قراراتها و تصرفاتها فى غيابه مفروض تكون أفضل بالنسبة له من واحده لازم يحركها فى كل خطوة بالريموت كنترول.
احسن تعليق سمعته على الموضوع ده كان من زميل صريح شوية ، قاللى " فعلاً الراجل بيعجب بالبنت المثقفة اللى ليها تفكيرها و شخصيتها المستقلة بس بعد الجواز لازم يبتدى يلغى الشخصية دى علشان يعيش مستريح ماهو مش معقول بقى نفضل نتناقش فى كل حاجة ... !! "
أنا عارفة انى رغيت كتير اوى بس اللى عايزة اقوله ان مش حقيقى يا جماعة ان البنت اللى قربت من / او عدت التلاتين بتوافق على أى حاجة و أهو عريس و السلام .... لأ الموضوع مش كده.
الموضوع انها بالفعل بتبقى استنت كتير و مفروض ان ارتباطها بعد الأنتظار يوفر لها اللى كانت بتحلم بيه قبله ..... واللى كانت بتحلم بيه ده مش فيلا و عربية أخر موديل ، لأ مجرد الحياة العادية المعقولة بس مع انسان تلاقى معاه المودة و الرحمة اللى ربنا وصف بيهم الجواز. لو ده مش موجود يبقى الهدف من الجواز نفسه مش موجود و يبقى قلته أحسن و يكون حملها للقب اياه مش اختيارى ده فرضه عليها المجتمع و الظروف.

حـــــدوتـــــة said...

ليه يا برايد النكد اللى انتى عملتيهولنا ده , مش كفايا الحر اللى الواحد فيه و الجو الزبالة ده ؟ بس عارفة انا بجد عمرى ما فكرت فى وجهة النظر دى , انا كنت فاكر ان البنات من سن 25 اى عريس حييجى موافقين عليه , الظاهر ان انا كنت غلطان

Anonymous said...

و لهذا أيتها البنات العزيزات نفضل نحن الرجال البنات الصغيرات مع احترامي ليس لأن الجمال يقل أو شيء تافه من هذا القبيل و لكن بكل صراحة خوفا من الدماغ التي نشفت كما قالت الأخت في البلوج.

Anonymous said...

المحترمة برايد /
أنتي عسل عسل عسل.
مشاكل الجواز زي القفة - ولا مؤاخذة - يشيلها الولد والبنت وأهليهما والمجتمع والدولة وبنسب مختلفة وتختلف باختلاف الجوازة.
الولد مشاكله تنحصر في المادةأولا - حيث لا توجد الا بعد سنوات طويلة من الكفاح , وحتى لو أهله ساعدوه يظل الخلل لديه أنه لا يعرف قيمة الحاجة اللي جاية له بالسهل - و ثانيا بعض الشباب بيبقى عايز يجرب وليست لديه الجدية.
البنت التعليم خرب مخها والشغل والإستقلالية المادية خربتها أكثر والتلفزيون والميديا خربتها أكتر وأكتر.
ولو البنت أهلها مبسوطين شوية ومتعلمة وحلوة شوية لو جالها حتى توم كروز حتقول عليه خيخة.
الأهل مشكلتهم قصور النظر والمادية في بعض الأحيان وكمان الأم مش عايزة تجوز إبنها والأم التانية عندها بنتها دي روحها فيقعدوا هما الاتنين أحلى سنين عمرهم بدون زواج كمان الأهل في كثير من الأحيان إذا تزوج الولد أو البنت راح الدعم بتاعم من راتب وهدايا ومودة (هذا ظنهم) فيقفون حجر عثرة في طريق الزواج - مثل حالة محسوبكم - أمي ماكانتش عايزاني أتجوز إلا لما أرد إلى أرزل العمر ... الله يهديهم.
أما المجتمع فمشكلته المظاهر الكدابة - هذا المجتمع العفن - الذي يمكن أن يضطر العريس ليقترض عشان يعمل الفرح في دار الدفاع الجوي. المجتمع الذي تحكمه الطبقيه الزائفة والكذب والنفاق والغدر والأوراق المختلطة والمعاني المطاطة ...
أما الدولة فهي المسئولة - من وراء الستار عن كل ما أسلفت:
فالولد عندما يتخرج لا تهتم الدولة برعايته وتوظيفه واقراضه بفوائد حسنة كما يحدث في أوروبا وأمريكا وبعض البلدان العربية. والدولة لا تهتم بتعميق مفهوم الأسرة والإستقرار والقدوة الحسنة لدى الشباب بل العكس تظهر القدوة في روبي وهيفاء وفيفي ودينا وسعد وشعبان وبدلا من إظهار العفاف والإستقامة وتيسير الطريق لها يكون للأسف طريق الحلال مفروش بالأشواك وطريق الفجر والفسوق سهل وميسر ,
الدولة مسئولة عن تأخير سن الزواج والبنت لا تجد من يوجهها ويرشدها حيث غلبت الأنانية حتى الأهل وتلوثت ثقافة المجتمع لدرجة عدم معرفة الصح من الغلط وقصور شديد في النظرة.
أستحلفك بالله إيه اللي يخللي البنت في أوج نشاطها وعاطفتها في سن العشرين مثلا ترفض العرسان ؟
ما تقوليليش ان كلهم سكة
ما تقوليليش لما اكمل تعليمي - طب ما تكملي !!!
ما تقوليليش ان العرسان شحاتين ..
كل ده هجص - ولا مؤاخذة - والحقيقة أرجوكي إرجعي للتحليل اللي أنا كاتبه كل فيما يخصه.
تعرفي انا مهندس من عيلة فقيرة - جدا - قعدت أربع سنين في السعودية عشان أجيب الشقة وأتجوز وخدي بالك أول ما اتجوزت كنت تقريبا على البلاطة ما تفتكريش اني جبت قصر ...
تعرفي انا عندي أصدقاء - والله مهندسين - حتى الآن متجوز ومخلف وشغال برة مصر والله بقاله أكتر من عشر سنين وشقته إيجار..
أقولك إيه واعيدلك ايه القلب مليان والله يا برايد.
آخر حاجة أقولهالك ان الجواز يبدأ بحاجات مادية ما فيش شك لابد من وجود حد أدني نبني عليه عشان ما يتعبوش بعد الجواز وأهم حاجة كضمان لنجاح الجواز - والضامن رب العالمين طبعا - هو التكافؤ التكافؤ التكافؤ.
ومعذرة على الإطالة.
أسلوبك حلو ودمت بكل خير
إيهاب
مصري أصلي - صعيدي تجميع القاهرة

Anonymous said...

هاي يا برايد
انا سمعت عن مدونتك من كام يوم في التليفزيون بس عجبتني جدا لدرجة اني قريت كل كلمة فيها و نفسي اتعرف عليكي و بحييكي و بحيي اهلك لان واضح انهم متفهمين الوضع
انا عندي كلام كتير جدا بس مش عارفة ابدا منين
هبدا من التعليق على البوست الجميل ده وقبل ما اعلق انا ماشية في 29 بخطى حثيثة
الناس فاكرة انه طالما البنت عدت 25 يبقى لازم تقبل اي واحد و السلام و الرجالة بيستغلوا الموضوع ده على فكرة
و تلاقي الواحد اللي رايح يخطب واحدة عندها 27 و لا 28 كانه رايح يعمل فيها معروف و تلاقي الناس حواليها كلهم بلا استثناء شايفينه احسن واحد في الدنيا حتى لو كان فيه العبر
و اللي يضايق بقى ان اول الناس دول بيبقوا اهل البنت اللي هما اصلا كونوا معاها شخصيتها اللي وصلتها تفكر بشكل معين في شريك حياتها و بعد كده يستغربوا من تفكيرها
انا حاسة اني طولت بس عايزة اقولك حاجة اخيرة كل ما بتقدمي كل ما دمك بيخف زيي انا و صاحباتي اللي عندهم نفس الموضوع بالظبط
سلام و الى لقاء

Anonymous said...

السلام عليكم
إيه ده؟ أنتِ عملتي الكومنت بتاعي بلوج لوحده... ميرسي ليكي والله.
بصراحة أنا جاية أرد على كومنت تاني بردو
Samir
إيه اللي مفرحك قوي "ان البنت مش محتاجة للراجل علشان تعيش"؟ هو طبعًا حاجة البنت للرجل ليست للحياة، ولكن عندما يصبح التخلي وعدم الاحتياج هو الوضع الطبيعي والشعور العام، فإن ذلك يعني حياد جديد عن الفطرة وخطوة واسعة في الطريق إلى هلاك البشرية....
ربنا سبحانه وتعالى لم يخلقنا من ذكر وأنثى ليتخلى الذكر عن الأنثى وتتخلى الأنثى عن الذكر...
لم يكن تعليقي يشير إلى التخلي... وإنما يشير إلى حاجة واضحة ومحددة المعالم... كالفرق بين جائع يأكل أوراق الشجر بديدانها وطينها وجائع ينتظر حتى يأتيه الطعام.... أما الجائع الذي لن يأكل أبدًا، فيستطيع العلم أن يقدر كم بقي لجسده على قيد الحياة.

Babyblue said...

ur post was really "food for thought" ... bas gably ekte2ab :/
I commented on it here: "http://anythingblue.blogspot.com/2007/08/blog-post_07.html"

حبة حاجات (ايمان) said...

بصى بقى يا برايد انا راىى ان فعلا الست ممكن تعيش من غير راجل صحيح هتبقى فى حاجه نقصها بس عادى ممكن تتكيف على دا
لكن بقى مش ممــــــــــــــــكن ابدا الراجل يعرف يعيش من غير الست ودى قاعده منتهيه
لذلك المفروض ان اى راجل يبوس اديه وش وضهر ان فى واحده وافقت عليه
يمكن يكون كلامى دا تحيز بس دا اقل حاجه ممكن الواحد يقلها خصوصا فى الظروف المقندله اللى احنا فيها وكمان ظروف انقراض الرجال وخصوصا فى العقد الاخير يمكن فى ذكور كتير لكن انا قصدى رجــــــــــــــــــال


واتمنى منكم سعة الصدر

Desert cat said...

على فكرة مش المجتعم بس اللى بيجبرك تهربى من اللقب
كان عندنا واحدة صحبتنا وكانت حتموت وتتجوز
ونفسها اى حد يتقدم لها
وربنا حقق لها حلمها واتخطبت
دلوقتى كل لما تتعرف حد تقوله علينا احنا صحباتها القدام يعنى بنحقد عليها وبنغير منها
اصلها مخطوبة واحنا عوانس
الجهل استفحل فى الشعب

washwasha said...

من فترة غير بعيدة كان لما بيتقدملي حد
اول حاجة بقولهاله - انا مش عايزة اشتغل بعد الجواز -
وكنت فاكرة ان ده شيء يبسط الراجل
وكان الرد حتزهقي اصل انا في الشغل طوال النهار .....
وكنت بأصر اني مش حزهق انا حرة والزهق ده مشكلتي
انا لحد دلوقتي طموحة جدا و بدرس و بشتغل
يعني مش مخي فاضي ولا عندي استعداد انه يبقى فاضي حتى لو قعدت في البيت

بس انا نفسي لما اتجوز اتفرغ واستريح واحس ان انا مسئولة من حد يصرف عليا و اعتمد عليه و اريح عيالي واعرف اربيهم وادلعهم

و محسش اني في ساقية

بس للاسف محدش عايز يشيل مسئولية بيت لوحده

لحد كدة وكنت بحس اني لما حتجوز حيبقى فيه فرق في حياتي

بس لما اقنعوني ان الست لازم اليومين دول تشارك جوزها في كل حاجة حسيت ان المسئولية حتزيد عليا

يعني فوق الشغل حيبقى رعاية اسرة وعيال
من ساعتها وانا مبقتش تفرق معايا

حتى مش حاسة ان التلاتين دلوقتي زي زمان

انا اصعر واحدة في المكتب واديني داخلة عا25

عادي يعني

كان زمان مبهتمش اني اشتغل عشان الشغل كنت بشتغل بمزاج وبراحتي

بس اقتنعت دلوقتي ان الواحدة لازم تثبت نفسها وتشوف مستقبلها
واتغيرت نظرتي تماما

محدش دلوقتي بيقعد في البيت ويستنى العريس

نانو said...

برايد انا بعتلك من ساعتين تعليق بس مظهرش معرفش ليه عموما انا هكتبلك تانى بصى بقى يا ستى لو هنتكلم عن سن الثلاثين واللى بيحصل فيه يبقى انا اكتر واحدة ممكن اتكلم فى الموضوع ده بما انى عندى 36 سنة ولسه متجوزتش - عارفة طبعا تلاقيكوا دلوقتى بتشهقوا وتقولوا يا خرابى - بس ولا يهمكوا انا فعلا وانا فى السن ده لا يمكن اتنازل نهائى فى موضوع الجواز واقول يلا اقبل اى واحد وخلاص واهو اسمه ابقى اتجوزت لا لا لا مش ممكن يعنى بعد كل صبرى ده وبعد كل العرسان العاهات والندامة والصدامة اللى اتقدمولى اوافق علشان مبقاش عانس طب لأ بقى انا افضل عانس طول عمرى ولا أنى اتجوز جوازة تعبانة وندامة وخلاص افضل الباقى من عمرى اندم عليها والاقى راجل مقرف يزهقنى بقية حياتى طيب وعليا من ده كله بأيه ماأنا عايشة واكلة شاربة شغالة كويس وليا مركز فى شغلى وحياتى هادية يعنى على رأى المثل مش هصوم اصوم وافطر على بصلة وياريتها تبقى بصلة طازة إلا تلاقيها معفنة وبايتة وطالع ريحتها بس الواحدة لو لاقت راجل مناسب مظنش ان فيه واحدة مش عايزة يكون لها بيت وولاد وحياة مستقرة بس بالأصول مش اخد اللى واقع من قعر القفة علشان كبرت فى السن عموما انا مبسوطة جدا من رأى صاحبة المقالة الجريئة بوصفك لها وعلى فكرة يا برايد انا بقرألك من فترة كبيرة بس كنت برد بأسم تانى علشان مكنتش لسه ليا اكونت ويا حبيبتى انا لو حكيتلك على العاهات اللى بيتقدمولى مش هتصدقى اللى بيحصل ولا قلة أدب الستات اللى بشوفهم ويفضلوا يمصمصوا شفايفهم ويدعولى بالجواز وهما فى نيتهم بيقولوا دى طالعة فيها على ايه متتنيل بقى وتتجوز اى راجل واهو ضل راجل ولا ضل حيطة أقولك ايه ولا ايه بس برضه انا مش ضد الجواز ولا بدعو لتصعيب الجواز ولا حاجة بس نفسى ان الناس تسيب كل واحدة فى حالها واكيد لما هى هتشوف الأنسان المناسب ليها هتوافق على طول ده نصيب ومكتوب
معلش يا برايد طولت عليكى بس أعذرينى من اللى بشوفه واللى بسمعه
سلام يا برايد

Anonymous said...

احب اضيف شئ واحد على التعليق انه الوعي بيزيد مع العمر وبالتالي الطلبات بيزيد من ناحية شخصية الطرف التاني
نصيحة من واحدة في التلاتين للولاد والبنات اتجوزو بسرعة في بدايات العشرينات والا عمركم محتلاقو اللي انتو عايزينه لما توصلو لتلاتين تكونو اتكيفتم على حياة العنوسة وبتطلعو القطط الفطسانة من الطرف التاني عشان ترفوضه بمبرر وهي في الاصل خوف من الارطيباط

كرانيش said...

اول مره اشوفك يا برايد بتتكلمى بطريقه جاده كده من غير هزار

مش هلومك على ده
ولا هلومك على وجهه نظرك ابدا
بس
صدقينى الحياه كويسه طالما ربنا راضيهالنا كده
الحمد لله رب العالمين
بس عاوزه احكيلك موقف مضايقنى شويه
انا عندى جارتنا ست ثئيله شويه
اتجوزت بعد ما خدتت الدبلوم واصلا معرفتش تاخده
شدينا مع بعض الكلام جاب بعضه فاستفزتنا ماما قالتلها انتى ساقطه دبلوم فردت قالت
انا لقيت راجل يلمنى انما بنتك عانس
عارفه انا عندى كام سنه يا برايد 20وماشيه فى الواحد وعشرين ولسه مخلصتش جامعه
زعلت قوى
بس مش عشان هى قالت كده
لا
عشان لسه فى ناس على وجه الكره الارضيه بيتكلم كده

Anonymous said...

والله يا برايد ما عارفةأبدأ كلامي منين
لما قريت البوست بتاعك عجبني جدا جدا وقريت فيه وجهة نظري وكنت لسة برتب أفكار في دماغي للموضوع ده من قصص واقعية بتحصل قدامي ومش عاجباني عشان كدة بقلك استني رد مني في موضوع على مدونتي
عايزة أقول ان بجد بجد أنا بفرح قوي لما بشوف بنات بتفكر بالشكل ده _خصوصا وهي في ال30_لأني بفكر كدة بس حواليا بلاقي ناس بتستعبطني وتقولي بطلي هبل يعني هما اللي قاعدين عملوا ايه؟هو في أحسن من أن البنت تتجوز بدري وتخلف؟ ده معناه ان البنات اللي بتفكر صح هي اللي لسة لحد دلوقت ما إتجوزتش...يعني نشتري نفسنا بأفكارنا ومبادئنا ولا نشتري جوازة فاشلة مليانة مشاكل وبلاوي؟ماما محسساني اني هم على قلبها عايزة تجوزني وخلاص؟!! أنا أمنية حياتي إني أعيش صح أتجوز صح وأمشي حياتي صح ...أنا يمكن لسة في أول العشرين بس حاسة اني بفكر زيكم ورغم إني لسة في ال20 بس بفكر كويس(وهو ايه جايبنا ورا غير التفكير) يعني مستحيل هقبل بأي حد والسلام لازم يكون شخصية ويكون راجل يفهم ويقدر ويحترم البني آدمة اللي هيرتبط بيها يمكن دلوقت بقول عايزاه يكون بيحبني قوي وعارفة اني مش هلاقي اللي أنا عايزاه وقدام هتنازل عن الحب لأنه مش موجود أو نادر
بس ده مش معناه اني عايزة حد محصلش أنا مستعدة أكمل طريقي مع حد لسة بيبتدي حياته من الصفر طالما أنا واثقة منه وفيه كل اللي أنا عايزاه من رجولة وطموح وثقة بالنفس حد أضمن انه هيقدر لي أني بدأت معاه... أنا بقول كدة بثقة لأني ضامنة إني مش هلاقي اللي في دماغي عشان صعب في الزمن اللي إحنا فيه..أنا بشوف بعيني حاجات بتصدم وانا بسمعها وبجد من قلبي بقول إني أحسن أفضل من غير جواز لحد ما أحصل على اللقب الخالد أرحم كتير من إني أتجوز وخلاص وعلى فكرة لو لقيت الشخصية اللي في دماغي برضو مش هكتفي بأني أدرسها كويس عشان برضو من اللي بشوفه وبسمعه ىإتعقدت وحسيت ان نادر قوي لما تلاقي راجل بجد بتصرفاته وشخصيته في الزمن ده...وبيتهيألي مش عيب إني أختار صح وأختار براحتي طالما دي حياتي وعمري الجاي ما أنا مش هقضيه مع أي حد والسلام واهو ضل راجل ولا ضل حيطة؟!!
خلاصة كلامي ان بنت العشرين برضو بتفكر زي بنت ال30 بس يمكن عندها فرصة تحلم عن بنت ال30 عشان كدة هي بترفض كتير دلوقت لأن الكتير دول ملقيتش فيهم اللي هيبني معاها حياة ناجحة
سلامي ليكي وبجد بجد بدعيلك من قلبي ربنا يرزقك بالزوج الصالح

Anonymous said...

كلام منظقي, بس اسمحيلي أسأل, ليه احنا دايما رابطين الاستقرار و السعادة في الجواز بالمطالب المادية!!
مين برده هيضمن ان الشخص اللي جاي و هيحققلك كل المطالب المادية دي هيقدر يسعدك علي المستوي الانساني؟؟؟
ماحدش يضمن, صح؟
وإذا كان الموضوع اساسا مش مضمون ليه رتبتي الاولويات في الاختيار و حطيطي المستوي المادي فوق كل شي, ماهي دي برده نظرة مش واقعية بصراحة لأن بنت التلاتين نفسها لو لقيت شخص يقدر يفهما و يحسسها بيه كراجل بس مش قد كده في المستوي المادي هتبتدي تتلخبط و تفكر أه ولا لأ, وغالبا مع كونه شخص مميز هيبقي أه انشاء الله.

برده من بقول الدنيا مخلصش فيها الرجالة ولاد البلد المتعلمين واللي يقدرو يصونو البنت و يحفظولها حقها في الغلط قبل الصح, وبرده احب افكركم ان احنا الشباب برده عندنا نفس المشكله اغلب البنات اللي بنشوفهم أقصي تفكير ممكن يوصلولو هو هتروح سينما حفلة كام ولاحول ولاقوة إلا بالله.

وبعدين بصراحة مش فاهم ايه العلاقة مابين ان كل مالبنت اتعلمت و اشتغلت تبتدي مسألة الجواز والارتباط تاخد مرتبة اقل بعد الشغل أو تاخد شكل بعيد تماما عن الشروط اللي وضعها النبي صل الله عليه وسلم للزواج, انا بشوف كده و بستغرب والله العظيم بأي منطق مجرد انها تتصور ان الشغل أو النجاح "المادي" في الحياة ممكن يعوضها عن زوج يفهمها و يقدرها. ويحبها
وتبتدي مسألة ضل حيطة تتلاشي و تحل محلها ضل برج القاهرة, يعني واحد متريش من الاخر!!
انا مش ضد الشغل, بالعكس والله بس بستغرب من البنات اللي بتفكر كده

مش مشكلتنا اننا مش لاقين بنات يقدرو يتعاملو معانا بنضج و "شئ" من الثقافة زي ماهي مش مشكلتكم انكم تلاقو "راجل", المشكل علي رأي برايز في فيلم ثقافي موجوده في النظام.
اللعنة علي هذا ال(لا نظام)

قبل ان انسي, قرأت بضع كلمات جميلة تتحدث بواقعية عن هذا الموضوع, أقرأيها هنا إن شئتي:
http://z3tr.loaloaa.com/showthread.php?p=319661

Ahmed said...

انا شايف انك منفعلة زيادة عن اللزوم
خللي اقولك محدش يقدر يغصبك على حاجة انتي مش عايزاها
لكن زي ما بيقولوا الزن على الودان امر من السحر
سيبك منهم وخلليكي مستنية نصيبك
انا عندي ٣٧ سنة متجوز من سنتين يعني ٣٥ سنة
اختي متجوزة بعد ما عدت الثلاثين واختي التانية لسه مستنية
وكمان عدت الثلاثين وحصل معاها زيك ويمكن اكتر
لكن في الاخر انا تدخلت وقلت لهم محدش لوه دعوه بيها
لما نصيبها يجيلها هتتجوز
وبس خلصت الحكاية من يومها
محدش قال اننا كنا مغالين في الطلبات ولا حاجة
المسألة إتفاق ووالدي ديماً كان بيقول
خليهم يبدأوا بأي حاجة وبعدين يكملوا مع بعض الناقص
اي كلام غير كده في الزمن ده يبقى مناقض للواقع المر
حاولي تعملي كده وتلاقي حد يقف جانبك يفهمهم
وكل مشاكلك هتخلص
تحياتي

Islamist Bloke said...

أحلى كلمة عجبتني فى الحوار ده كله


اللي تاكله على الفطار ما يشبعكش على الغدا

مشكلة

100 100


ربنا يرزقنا ويرزقكم

والسلام

mraghy said...

حقيقي وجهة نظر قويه و تستحق الوقوف امامها شويه

مين قال ان البنت لازم تقبل اي حد لمجرد انها وصلت التلاتين

احنا هنا مش بنتكلم علي بلوزه و الا تيشرت اهو ياخد وقته و يروح

احنا بنتكلم علي جواز - عشرة عمر - شخص هانقضي معاه بقية الايام اللي مكتوبلنا نعيشها

طبعا انا معارض جدا فكرة ان البنت تقبل اي حد لمجرد انها وصلت للتلاتين و خايفه من اللقب اللي يعتبر عار في مجتمعنا

لكن و من وجهة نظري البسيطه انا شايف انه مافيش مانع ان الواحده تتنازل قليلاً ( و باكرر قليلاً ) عن مواصفات فتى الاحلام بعد ما توصل للسن ده
طبعا مش تقبل اي واحد و خلاص
لا
هي بس تتخلى عن بعض مطالبها

و الا ايه راي حضرتك ؟؟؟

Anonymous said...

البوست و اللى علقوا على البوست فى الاغلب يعنى جابولى ضغط...قوليلى ليه؟
التعليقات الاول...بتروج لمبدأ غريب جدا و هو ان الست ممكن تعيش من غير الراجل؟؟؟ده ازاى يعنى انشاءالله..أنا شخصيا مؤمنه تماما ان الست أو الراجل الوحيد دى خطوه أكيده للمرض النفسى العضال و الجنان...بمنتهى البساطه حتى لو كنا بنستمتع بالوحده فبالتأكيد مش للأبد
البوست نفسه ..فكرته أنا متفقه معاها بنت التلاتين مش زى الاول دى حقيقه..بس مش متفقه مع التفاصيل الهدف من الجواز مش ابدا الفسح اللى مش هينفع تتاجل عشان الروماتيزم ولا حتى الانجاب اللى لازم نلحقه لحسن مفيش وقت...يا جماعه بجد الحياه المشتركه دى هدف فى حد ذاته ..و الصعوبات اللى هى بتقول عليها أو أى أنواع صعوبات تانيه أنا مش شايفه أنها لو تواجدت مع الشخص المناسب يبقى المفروض نقف أدامها..
أنا عندى تلاتين سنه و فعلا مش هوافق على أى حد ميكونش راجل فعلا لكن قضية انه لازم بقى يكون تخطى صعوبات البدايه و مش عارف ايه مش متفقه معاه ولا لما كان عندى 23 سنه ولا دلوقتى و انا عندى 30 سنه
و أخيرا تمنياتى أن البوست الجاى يكون مشرق يبعث على التفاؤل...مين عارف بقى!

Rushdy Kamel said...

فيه فرق بين انك تلاقي زوج مناسب
وبين انك تلاقي زوج مناسب ليكي انتي

الحكاية مش اي واحد ابن حلال واخلاقة كويسة
لأ
فوق ده كله لازم يكون بينكم مشاعر وراحة نفسية
مينفعش تفكري بعقلك بس هي مش شوية صفات بتدوري عليها واول ماهتلاقيها في واحد هاتقبليه

تحياتي

Anonymous said...

Big Code

قال المختصر المفيد

نورا said...

والله انا مش عارفة اقولكم بجد ايه الموضوع مهم والتعليقات اهموالكلام اللي في التعليقات يبين ان البنت مش بس كل تفكيرها خروجات وسنيما لا ولكن في نسبة كبيرة غير كدة وبجد كلامك في التعليقات خلاني اقول ان فعلا اللي بيفكر كدة مش لازم يرضي باي حاجة والسلام

emos said...

howa zay malbanat fehom en ahlohom 3ayzeen bentohom te3eesh fe mostawa 7elw
el regala bardo fehom moshkelet enohom mesh 3ayzeen yetwaro nafsohom
kol wa7ed 3ayez yaddo yegeeb sha22a w mesh mohem ye3eesh ezay ba3d keda
dah kaman fe mesh 3ayez yegeeb el sha22a aslan w yetgawez fe 2egar gedid w ye2ool eh el moshkela ya3ny law bet7ebeny hatesta7melny

howa aslan maye2balhash 3ala 2o7'to zorrof el 7ayah ba2et menayela w law 7asal enno 7asalo mashakel fe sho3'lo walla 7aga w sab el sho3'l hayedfa3 2egar el sha22a deh meneen
yetremp howa w merato w 3eyalo fel share3 3ashan 7'ater ahl el 3qarosa kano tayebeen w motafahmeenw redyo ye3ayesho bentohom fe sh22a 2egar gedid

el regala fehom 3eyoob zay el banat
kol wa7ed yesala7 nafso ba2a

Anonymous said...

بصى عنيك ماتجوزتى ولا حتى حد عبريك ماهى اصلها الى بتفكر بطريقتيك دية بتحط اعذار مش علشان متتجوز و بس لا دى كمان علشان متشلش مسئولية .. مسئولية اية و شمس اية الى بتتكلمى عليها الى انتى فيها دلوقتى مسئولية بيت كامل اكبر من الهبل الى انتى شايفة انيك بكدة عظميك نشف و بقيتى واحدة حتة كدة تقدرى تعملى الى ميقدرش علية حد واصل الحياة مش كلها رغد الى زيك يا ماما بيفكر في شكل احمد عز وغنى احمد مندور بس اقوليك خليكى في تفكيريك لغاية ماتفوقى و ساعتها هترجعى هنا و تقولى غير الكلام دة و تبقى عبرة لمن يعتبر بس علله محدش يشوف كلاميك و يصدق الافكار دية في الاخر اقوليك الى يشيل قربة مخرومة بتخر على دماغة خليكي عانس

Anonymous said...

الأخ الأنونيموس قليل الذوق

و النبي لما هو انت طايح كده في الناس و ماشاء الله مش مخلي في نفسك حاجة يبقى تقول اسمك ايه

و ماتبقاش مستخبي في الضلمة ورا كلمة أنونيموس دي

ياساتر..دا الحديث بيقول
فليقل خيرا أو ليصمت

حسبي الله و نعم الوكيل في أمثالك يا أخي

shahy said...

والله يابرايد انا قريت التعليق دة عندك قبل كدة وزعلت واتنكدت على الاخر
واديني قريتة تاني
ولعلمك الشباب كمان عندهم مشكلة تأخر سن الزواج بس طبعا بالنسبة للبنات بتكون المشكلة اكبر علشان نظرة المجتمع المتخلفة للبنت اللي بتتأخر في الزواج

اللهم ارزق بنات المسلمين بالازواج الصالحين يارب

تحياتي

shahy said...

سوري اني قولت بنات المسلمين بس

يارب ارزق البنات كلها بالازواج الصالحين

Eric Matt said...


عارفة يا برايد

انا مش قادر اعلق على البوست غير بكلمة واحدة

ربنا يرزق كل انسان بالخير ويعجل له به ويرضيه بيه أينما كان

تحياتي لك من ماناساس البلد ولا تنسيني من صالح الدعاء

Anonymous said...

أنا كمان قريت التعليق ده عندك قبل كده... ورغم إنه اللي باين فيه إن صاحبته بتعتبر المادة أكبر مشكلة لا يمكن التضحية بيها، إلا إني مش شايفة كده... ماهي أكيد اللي قعدت لحد التلاتين في بيت أبوها مش هتخرج منه غير لو اقتنعت ببيت غيره... ويتهيقلي من ضمن النضج إن الإنسان يعرف هو ممكن يستحمل إيه ومايستحملش إيه. ماينفعش أبقى عارف مثلاً إني عندي مشكلة فظيعة مع الأرقام وأروح أقدم في وظيفة محاسب!
ماينفعش بردو أبقى عارفة إنه الخبز قبل الحب أحيانًا وأروح آخد واحد أبهدله معايا لأني كنت فاكرة إن الحب هيخلي كل حاجة في حياتنا بمبا مسخسخ... وفي الآخر أقلب حياته كحلي عشان ماعرفش يجيب الخبز... والحب أكلناه كله وصلاحيته انتهت.
وعلى فكرة، أوعوا تكونوا فاكرين إن الواحدة هتمحو اللقب لمّا ترضى بأي واحد مادام وصلت للتلاتين... اللقب هيفضل موجود... إنها متجوزتش غير لمّا بارت... وهيفضل فرق السن بينها وبين عيالها يقول للدنيا كلها دي اتجوزت امتى وخلفت امتى...
يعني من الآخر، حتى إن الواحدة ترضى بأي حد، ده مش هيمحو عنها "العار" الاجتماعي... فيا ريت ندور على مصلحتنا وبلاش نفكر المجتمع هيقول علينا إيه....
المجتمع اللي معرفش يوفرلنا أبسط الحقوق مش من حقه يطالبنا ولا يحاسبنا....
بابا كان من كام يوم بيقولي "إزاي عايزة تقعدي برة البيت طول النهار؟ الناس تقول إيه؟"... فوجئت بنفسي باقوله بحرقة "الناس مالهاش عندنا أي حاجة".. فعلاً... واللي شايفة فيكو إن الناس ليها عندها حاجة، يا ريت تدفع اللي عليها عشان تريح دماغها...
وعلى فكرة... من الظلم للرجل إننا نقول إن المشكلة عند البنت أكبر... الولد عليه ضغوط كتير قوي... أنا شخصيًا كل ما افتكر باحمد ربنا جدًا إني بنت....
ربنا ينجينا جميعًا من الدنيا على خير.

dr_mero said...

مدونتك فكرتها دمها خفيف جدا وواقعية ف نفس الوقت!!!!!!!!! انت صيدلانية صح؟؟ يعنى مقدرة معانات اخواتك اللى ف طب واللى كرسوا حياتهم للعلم .. قصدى دفنوها...هاهاهاهاها

Anonymous said...

عيبك انك ذكية و واعية .... و الحاجات دي في الزمن دا ....عيب مش ميزة .... لأنها بتتعب اوي صاحبها قبل اي حد....بجد يا بختواااااااااا الي هتكوني م نصيبوا

Hany Rizk said...

المسألة فى الاول والاخر مسالة نصيب يا اخت برايد ايه المشكلة يعنى ان بنت تفضل لحد سن التلاتين من غير اى ارتباط من اى نوع عادى يعنى ايه المشكلة .... المشكلة يا برايد فى نظرة الناس اللى حوالينا لينا ولوضعنا ... يعنى انا راجل بس للاسف باسمع كلام زى الرصاص من رجالة وستات ومن اصحابي وقرايبي ومن الناس اللى ساكنين معانا فى العمارة والناس اللى معايا فى الشغل كل واحد يطلع بكلمة ايه يا عم انت مش ناوى تتجوز ...؟؟ هوة انت لسة ماتجوزتش ...؟؟ لحد بصراحة ما زهقت ... اى نعم انا لغاية وقت قريب كنت بادور على عروسة تكملنى واكملها ونكون لبعضينا زى القلب المقسوم اتنين اللى بيتباع عند بتاع الفضيات دة ... بس بعد كدة سلمت امرى لله وفوضته اليه ونفضت للحوار واى حد بقى يكلمنى على موضوع الجواز اقوله يا عم كبر هو اللى اتجوز عمل ايه بالجواز يعنى ... بس من جوايا بابقى حاموت على الجواز طبعا ... انتى عارفة طبعا شرقية الرجل اللى بتخليه عاوز يتجوز علشان يجيب عيل يحمل اسمه ... بس انا بقى عاوز اتجوز غيران من اصحابي ومن اختى الصغيرة ... المسالة مش مسالة ان مفيش فلوس المسالة ان مفيش نفس ... وعلى الرغم من ان كتير من البنات ليهم طلبات مغالى فيها زى ما بتقولى الا ان برضه فيه بنات كويسين وعاوزين يتستروا مع واحد ابن حلال وانا بالنسبة لى اهم حاجة ان البنت يكون عندها مخ تقدر تفكر بيه وذكية ومثقفة انا مش متجوز سورى يعنى خدامة تغسل وتطبخ وتكوى وتخلف وارميها عند امها بلا وجع دماغ .... لا طبعا انا عاوز واحدة تفهمنى من غير ما اتكلم وافهمها من غير ما تتكلم اغرق فى عينيها وتغرق معايا ... تعيش معايا اللحظة بحلوها ومرها ابقى حنين عليها وهية كمان من الاخر نبقى اتنين مكملين لبعض زى ما الكتاب ما بيقول .... انما فين بقى نلاقى الكلام دة ... انا عن نفسي ما زلت ابحث وابحث وابحث وربنا يسهل واوصل لاخر البحث اما انى الاقى الانسانة اللى انا باحلم بيها ... اما ان الانسانة نفسها تيجي تقولى انا معجبة بيك وعاوزة اتجوزك ((انا مش معترض يعنى)) بس دة طبعا فى الحلم .... اما ان ربنا يكرمنى واموت واخلص من الحوار دة ..... اما انى ازهق وابطل بحث لانى بصراحة قربت اتخنق............... بالمناسبة البلوجاية بتاعتك دى جامدة جدا على الاقل بتعرفنى وجهة نظر كتير من البنات اللى سنهم عدى 27 سنة ...... ممممممممم ...... بس كدة ... معلش طولت عليكي بس الموضوع الواحد ما بيصدق يتكلم فيه ... وسلام

hana said...

المشكلة مش بس فى توافر المادة اللى هتحلى البنت مرتاحة فى جوازها
لازم كمان يكون فى توافر الاحترام والحب او حتى مشاعر القبول اصل من غير الاحساس المتواصل بالحب
الحياة هتبقى مش حياة هتبقى وظايف كل واحد بيعمل وظيفته وبس
انا افضل عدم الجواز بلا جواز بلا وجع دماغ
يا حياة كلها حب وفيها بدايه نوعا ما حلوة
لاما بلاش جواز 30 بقى 40 مش مهم
المهم الواحد يعيش مرتااح
لكن ليه نتجوز حد مش بنحبه لتوافر المادة وبس ويموت احساسنا بالحياة ويعقدنا الواحد يقعد فى بيته احسن يتفرج على فيلم عربى
وياكل بسبوسة

Anonymous said...

بصى المشكلة وبمنتهى الصراحة ان طبعا اغلب قصص الحب مش بيتكتبلها النجاح بسبب ظروف كتير يعنى ولد بيبقى عارف من الاول ا اهلة مش هيساعدوة يرتبط بواحدة مستريحة ماديا طب ماهم مش هايفقو بيك ولو الاتفاق فى الاول كان موجود هاتلاقى الدنيا مشيت

اما جواز الصالونات فهوقوللك المشكلة فى اية ان الشباب دلوقتى يقولو اية هى البنات لاقي جواز لما يبقى سن البنت 27 او 28 دة سن التنازل ويبقى جاى العريس على اساس كدة لابسة روح النابلسى
مع انة مش لقطة اساسا
بس فالبنت بترفض طبعا من الاسلوب من انة مش لقطة وبيتعامل على انة لقطة
البنات مش السبب الدماغ التعبانة السبب
وشكرا
موندة

NilE_QueeN said...

برايد انتى مش المفروض تسمحي لحد يضغط عليكي بأي شكل والواضح انك بتقاومي اشكال الضغط دي
والست لما بتاخد قرار الاجواز بتاخده عشان هبقي فى راجل ف حياتها يكفى كل احتياجاتها
واه مفيش واحده هتلاقى عريس تفصيل لكل انسان عيوبه
وانتى جالك عرسان كتير واللى انا شوفته ف كلامك انسانه زيك مش المفروض ترتبط بأي عريس من اللى عدوا عليكي
واحده تبقي عانس لما يبقي مفيش راجل بصلها او متنفعش للجواز لاى سبب
بس انت لسا ربنا مجمعكيش على الانسان اللى كاتبهولك
وربنا يقدملك اللى فيه خير ليكي ف دينيتك ودينك
وانتى صبرتى سنين طويله من غير جواز يبقي مش هتيجي بعد الصبر دا كله وتدبسي نفسك مع كيس جوافه عشان مكتوب ف شهادة ميلاده انه دكر

Anonymous said...

يا رب ربنا يرزقك باللي يستاهلك يا برايد و ما ترتبطيش في الآخر بواحد تندمي انك اتجوزتيه اصلا

Anonymous said...

(لقد ارتأيت ان الانسان ان عرف ان خالقه هو مالكه و مدبر امره قد اراح خاطره و ان تيقن بانه له محب فقد وفق لصواب

fanty said...

ما شاء الله، الموضوع ده فيه مجال إن الواحد يؤعد يرغي كتير، أستاذه برايد أول مره أكون مهتم بكلامك زياده عن اللزوم لأني دايما كنت بلوم علي الطريقه الهزليه اللي زايده عن حدها في المدونة بتاعتك لكن المره دي جد الي جانب ان الموضوع اللي انتي أضفتيه عندك من مدونة تانيه أنا برضه قريته قبل كده و اسمحولي بقي أكتب شوية و أعيش، قبل ما نقول اني متحيز للرجالة أحب أعلق علي الأخت اللي بتقول ان الرجالة ميعرفوش يعيشوا من غير ستات بس الستات تعرف تعيش من غير رجالة، أول حاجة لو انتي فاهمه فعلا الواقع المرير بين الرجل و المرأة كنت عرفتي إن الراجل دايما بيتجوز لمبدأ الجواز مش أكتر من كده و سهل عليه جدا انه يئقلم نفسه مع واحده بنت حلال، أما الست دايما بتتجوز من أجل الزوج بسبب شعورها الدائم مهما عليت و وصلت انها محتاجه راجل جمبها، انت متعرفيش ان الراجل حنان والدته يغنيه عن أحسن زوجه، و متعرفيش ان ممكن يكون عنده أخت طيبه و حنينه و تاخد بالها منه، و ممكن يقضي حياته بجميع اللأشكال والطرق و ينزل و يطلع و يسهر و يخرج و يعمل اللي نفسه فيه و يوم لما يحب يريح اللي حواليه حيجبلوا بنت تنضفلوا بيته بتلاتين ولا اربعين جنيه و شكرا علي كده؟؟؟ أنت بقي الحنان و الأحساس بالأمان ده حتجبيه من أخوكي اللي هو راجل و سارح طول النهار بره و مش فاضيلك ولا من باباكي اللي أكيد مهما قربتي منه مش حينفع تحكيله كل حاجه و لا حتشتيري أمان و استقرار من سوبر ماركت مترو؟؟ أنا حقول كلام يمكن قلته قبل كده كذا مره بس أنا مستعجب من البنات اللي يقولوا الرجالة ماشيه ورا امهاتهم؟؟ يعني هو مين اساسا اللي ربي الراجل اللي واقف قدامك ده، مين اللي عمل منه راجل و تعب فيه و حق علي الراجل انه دايما يكسب رضاها و دعاها، و مش الأم دي برضه اللي سيدنا النبي وصي عليها، و أكيد في نفس الوقت أنا ربنا عطاني مخ افكر بيه، يعني لو أمي قالت كلمه مش صح يبقي مش لازم أمشي وراها، لكن بالأدب و بالذوق أقنع أمي ان ممكن يكون خانها التقدير في الحاجه دي و أحاول أقنعها، و بعدين أشمعني الرجالة عيب تسمع كلام أهلها أو امهاتهم و مش عيب علي البنات ان كل واحدة فيهم تمشي ورا كلام أمها و صاحبتها من أول كلمة أمها بتاعت الشبكة لازم تكون بكذا عشان احنا أقل بنت عندنا في العيلة جالها شبكة بكذا و لازم تكون من عند الصايغ الفلاني عشان طول عمرنا بنتعامل معاه، طب و دي هدية مين أساسا يا تعبانه في دماغك و مين اللي حيدفع حقها عشان تشطرتي انها تتجاب من عند فلان، و ليه مش عيب ان البنات تؤعد تقول انا جارتي جابت كذا من المكان الفلاني و أنا عاوزه أجيب زيه، و ليه مش عيب لما الراجل يكون عاوز حاجه و يلاقي الهانم تقوله لا ده انا صحبتي معرفش مين جابته من الحته الفلانيه و أنا عاوزه زيه، وليه لما الراجل بيكون عاوز يشتري حاجه بينزل يجيبها في خمش دقايق مع العلم انه لو نزل مع مراته حيلاقي نفسه عمال يلف يلف و الهانم راجعه شايله خمسين حاجه و يا ريت كمان اللي كانت عايزاه في الاساس منهم (صحيح العقل زينه والله) يا جماعه لو فضلنا نتكلم عن عيوب الست و الراجل مش حنخلص، بس اللي مش لطيف خالص ان البنات تدعي انهم ملايكه و المشكلة في الرجاله، أصل لو كل واحده فضلت تطلع عيوب في الراجل يبقي مش حنخلص لأن الكمال لله وحده، و بعدين علي ايه بس الكلام الكتير و علي رأي المثل لا تعايرني و لا أعايرك، ما تبصي علي وشك في المرايه و انتي صاحيه من النوم الصبح من غير ماكياج، ما تسألي نفسك بتعرفي تطبخي لقمه حلوه تتاكل ولا حنقديها بيتزا هت، ما تسألي نفسك عندك استعداد تستحملي جوزك و هو راجع من الشغل ولا كعادة أغلب الستات ما تصدقي انك تقفشي الراجل و هات يا اكلان دماغ في مواضيع كتير ملهاش أي اهميه الا بالنسبة ليها كأنثي و الراجل دماغه اكبر من التفاهات دي كلها، يا تري لو اتزنق ماديا في مره حتستحمليه و تقولي لما بيكون معاه مش بيقصر ولا حتشغلي الاسطوانه المشروخة بتاعة ما انا كنت قاعده في بيت أبويا مستريحه مع العلم ان بنسبة تسعين في المية أبوكي نفسه سمع من أمك نفس البؤين دول من 25 سنه (والله يالسخرية القدر)، كل مافي الموضوع ان الدنيا اكبر من أي اتنين و المشاكل و البلد المهببه دي سبب رئيسي في تعاستها بس الناس تحاول تبذل أقصي جهدها، يعني الراجل يحاول يكون هادي شوية مع مراته و يحاول يريحها، و الست لازم تعرف ان الراجل ملول بطبعه و لو فضلتي تكبريلوا من المواضيع و تقعدي تلكي كتير يبقي في الغالب حيقرفك زي ما انت مصدعاله راسه، بالتالي لازم كل واحد يعرف ازاي يريح التاني و الحل الوحيد ان كل واحد يمشي علي الدين و لو كل واحد راعي ربنا في التاني المشاكل ساعتها مش حتنتهي لكن حتقل كتير جدا، و أهم حاجه بلاش النعرة الكدابه بتاعة البنات عشان حتقوليلي أنا عايزه شبكه بكذا و مهر كذا و شقه بكذا عشان حرد عليكي بكل بساطه و أقولك أكيد لازم الراجل يوفر حاجه معقوله و كويسه لكن الشروط الواضحه و الصريحه دي انتي حتقدميلي ايه قدامها و ايه اللي عندك و مش عند غيرك يخليكي تتكلمي بالفرعنه دي، و لو مكنش عندك رد مقنع بأيه حتقدميه ليا مقابل كل التناكه دي يبقي أنا يؤسفني أقولك يبقي أنا كده بشتريكي بفلوسي

الملاح التائه said...

تقبلى خالص احترامي وتقديري لشخصك ولهذا الفكر الناضج والعقل المستنير
تحياتى

Anonymous said...

قال رسول الله صلى الله عليه و سلم فيما معناه
اذا اتاكم من ترضون خلقه و دينه فزوجوه
صدق رسول الله
يعني غير كده يبقى بلاش احسن علشان الاساس من الاول لازم يبقى سليم هو احنا نتجوز اي واحد و خلاص ونتبهدل بقية حياتنا

فطومه ويوكو said...

مع أطيب تمنياتي لك ولكل الفتيات في العالم العربي بالتوفيق
د.مراد آغا
حزب السلام اسبانيا
partidodelapaz@hotmail.com

Bride Zone said...

مرحبا برايد..
من فترة كنت طرحت بوست فيه فكرة مشابهة.. بس يمكن صاحبتنا قالت الفكرة بتفصيل اكثر..

http://bride-zone.blogspot.com/2007/07/blog-post.html
أتمنى تشوفيه
ربنا يفرج همومنا ويرزقنا من حيث لا نحتسب

Doba said...

نبأ هام لكل الأعزاء تتفضل الأستاذة المبجلة الصغنونة من غير فذلكة وينكى هانم بتقديم مسرحيتها الجميلة بساقية عبد المنعم الصاوى وذلك يوم الخميس المقبل الساعة السابعة مساءً بقاعة الحكمة وعلى الحاضر أن يعلم الغايب لمساندة أختنا العزيزة وينكى الغالية

http://pinsywinsy.blogspot.com/

تحياتى وأمنياتى بالتوفيق للجميع
هبة

أسوور said...

انا كنت من بنات الثلاثين دول
اشتغلت من وانا عندى 20 سنة وجبت عربية واهلى ناس مبسوطين جدا وعندى كل المميزات
جميلة ومثقفةومتعلمة تعليم عالى ومن عيلة لا غبار عليها
وحبيت واتجوزت واطلقت وحبيت واتجوزت تانى وخلفت

كل دة بعد الثلاثين من العمر
وكانوا يا بنتى بيتخانقوا علية والله عشان يتجوزونى

ولا همنى واخترت واحد واتجوزته بعد قصة حب وكانت امكانياته المادية ضعيفة واهلى قبلوه على مضض
واستمرت الخطبة لسنوات واتجوزنا واطلقت بعد شهور

التكافؤ مهم جدا

واتجوزت تانى بعد سنة واحد تانى برضه عن حب وكان من عيلة وميسور الحال وبيصلى وبيصوم وكل الصفات الحلوة بشهادة كل الناس

لكن جوة البيت بتعرفى خبايا النفوس

والله يا بنتى كله محصل بعضه فى الآخر

كل الرجال متشابهين
كلهم مزعجين وبيعاملوا الست مهما كانت على انها جارية وغبية ومابتفهمش وتعامل معاملة الحمار

صدقينى
حتى فى أقصى حالات الحب
والتكافؤ

بيتحججوا بالماديات ولو فرشتيلهم الأرض ورد ويقولوا اصلنا ما فيش زينا ولازم البنت تعمل كدة عشان نتجوزها

تحبى زى ما تحبيش
تضحى زى ما تضحيش
تسعديه زى ما تنكدى عليه

كله محصل بعضه
تحياتى لمدونتك المتميزة

wanna b a bride said...

anonymous

أنا مش عاملةمشكلة ولا حاجة
ربنا يرزقنا جميعا و تحياتي ليكي
لو بس كان ليكي أخ؟
------------------------
anonymous

أهلا بيكي يا اختي و بكل اهل السعودية

هنا برضه فيه ناس بتحمل اللقب من بعد ال18 في بعض المجتمعات

تحياتي لرضاكي و صبرك
لكن احذري لاأظن أن تغيير الرجل مهمة سهلة كما تتخيلين
----------------------
محمد فوزي آل ربيع

و مين قال إن عدد صالات الأفراح متناسب مع عدد البنات
حتى لو محجوزة طول السنة

البنات اكتر

تحياتي
----------------------
محمود علي

الله يخرب بيت كل اللي انت قلت عليهم

و يكرمنا جميعا بهذا اليوم الذي يسعدنا
-------------------
blanila

صحيح تغيير الزوج بعد الجواز ليس بالمهمة السهلة

بس برضه مش عايزين نقاطع
جايز يا بنتي
ان كيدهن عظيم
--------------------
lara

يا لارا انا حياتي مش فاضية و مش مضياعاها ف الحزن

باشتغل و باتعلم و عندي هوايات و عندي أصحاب و باصلي و ادعي ليا و لكل البنات
خصوصا اللي في السودان و الصومال
-------------------------
samir

سعيدة اننا قدمنالك وجهة نظر جديدة

لكن مش معنى كده ان البنت مش محتاجه الراجل في حاجة

ممكن يكون معناه..ان اعتمادها الوحيد مش عليه و تقدر في وقت الحاجة تقف على رجليها

تحياتي

wanna b a bride said...

pinc unicorn

أهلا بيكي دايما و سعيدة ان المدونة عجبتك

كلامك في معظمه بيعبر عن اللي بيجرالي
أكنك بتتكلمي عني بالظبط
--------------------
اسكندرانية

مافيش نكد ولا حاجة
هو انا لما ابقى متنكده شوية مش تيجوا تهونوا عليا و تفرفشوني
والا هو العكس بس؟؟

سعيدة جدا انك اكتشفت في الكلام وجهة نظر جديدة
هو ده الهدف
----------------------
anonymous

و لهذا أيها العزيز نرفض أمثالك من الرجال الذين يخافون دماغ المرأة

فمن يملك الشخصية القوية
لا يخاف ذوات الدماغ
----------------------
إيهاب

شكرا على الكلام الجميل

كلامك واضح و صريح
و مش هناقشك كتير لأن واضح ان
أولا انت مبقوق قوي

ثانيا انك صعيدي

انت لخصت كل اللي الأسباب
لدرجة ان تعليقك برضه ينفع بوست بحاله

ربنا يرزق الجميع
-------------------
shafshooq

أنا مدونتي اتقال عنها في التلفزيون

لو قصدك قناة دبي و برنامج نشوة..سمعت الموضوع ده

لو قصدك حاجة تانية...بلغيني لو سمحت

فعلا العريس اللي رايح يعمل معروف في العروسة دي حاجة منتشرة

و الناس اللي مربيينا و بيقلبوا علينا برضه حاجة للأسف منتشرة

بس برضه حاشا و كلا

الدماغ دماغ
والرزق على الله
-------------------
anonymous who wrote the quote

أهلا أهلا بالناس الجريئة
طب قوليلنا أول حرف من إسمك طيب

متهيألي سمير يقصد بالخصوص الموضوع المادي
يعني مش مضطرين نتجوز عشان نعرف نعيش (ماديا)لكن إحتياج الرجل و المرأة لبعضهم فطرة الله التي خلقنا عليها

تحياتي
-----------------
babyblue

سعيدة ان البوست عجبك
و آسفة انه على حد تعبيرك كأبك

بس الحقايق دايما بتوجع

تحياتي

wanna b a bride said...

إيمان

سعة الصدر موجودة لكن لا اظن أن رأيك ده هيعجب ناس كتير

موضوع يبوس ايديه وش و ضهر ده
يجيب رد فعل على طول
ما البنات زي الهم على القلب و الكلام البايت ده

ربنا يرزقنا جميعا بالرجال .الرجال حقا
-------------------------
desert cat

صحبك الندل ارميه ورا ضهرك ولا تبصيله

فيه بنات كتير بتقلب معاهم بكده

ربنا يبعدنا عن الغرور و النفسنة

و بعدين صاحبتك دي مش عارفة انها لازم تلايمها عشان ربنا يكرمها
لأن لا الخطوبة ولا الجواز دلوقتي مرحلة منتهية

كله فيه كلام
اللهم احفظنا
-------------------
bestic

يوووه يابنتي ده دلوقتي أول حاجة بيسألوا عليها الشغل
عشان ايد علىايد تساعد

و الرجل العظيم وراه امرأه عظيمة بتديله مرتبها أول كل شهر

و الراجل مش بس بكلمته الراجل بتأشيطه لبيته و أسرته

و عجبي
----------------------
نانو

معلش البوسطجي بتاعنا بيضيع التعليقات

انتي يا جميبلة احسن مثال للي قلته في البوست

و ليه اجيب لنفسي هم و احطه على كتافي عشان أرضي الناس

و انتي اكيد و ناس كتير جالهو عرسان زي الهم على القلب

و لو المسألة جوازة و خلاص ماكانش حد غلب

ربنا يرزقنا جميعا بالخير

تحياتي
----------------
جنان

يعني نتجوز بسرعة قبل مايبقى عندنا طلبات في الشخصية؟

يعني نغمض عينينا و نقفل مناخيرنا و نشرب و خلاص؟؟؟

نجرب
--------------------
كرانيش

وليه تفكري تلوميني اني باتكلم بجد؟

ليه يا جماعة هو انا قسم تهريج بس؟

لأ ده انا تهريج و تنكيد
فول اوبشن

جارتك ديماتتناقشيش معاها أصلا

العقلية مختلفة
--------------------
بنت في العشرين بتفكر زي اللي في 30

بصي بما إنك لسه صغنتوته و دماغك لسه مانشفتش قوي زينا

لو تقدر تبيعي دماغك

بيع يا لطفي

و خلصي و فرحي العيلة

ساعات ربك بيسترها

اما لو كانت دماغك خلاص و صلت مرحلة التحجير بتاعنا

فكان الله في عونك و عوننا

wanna b a bride said...

jet

أنا ماربطتيش السعادة بالإستقرار المادي

و صاحبة التعليق بتتكلم بصراحة عن كلام ناس كتير بتقوله

بس لجوه
من غير شعارات و عش العصفورة يقضينا و لقمة صغيورة تشبعنا

لكن التوافق الإنساني هو أول المطالب

والا لكان قضي الأمر من زمن بعيد

ولاد البلد المتعلمين بيدوروا على بنات البلد المتعلمين

لكن للأسف

مش لاقيين بعض

عندك حل؟


شغل البنات مش بخلي الجواز ياخد مرتبه أقل لكن بيقوي البنت على انها ترفض الغير مناسب ليها


و قلتها كلمة حكمة

اللعنة على هذا اللا نظام
--------------------
ahmed al-hussany

انت رجل و الرجال قليل

موقفك مع اختك مش كتير بيعملوه
وزي ماقلت الزن على الودان امر من السحر

و ربنا يستر
-------------------
islamist bloke

هههههههههههههه
فعلا كلمة حكمة صحيح
------------------
maghy

و الله بنتنازل و بنتنازل

و في الآخر الناس بيقولوا بتتنازل؟؟؟

يبقى أكيد فيها عيب

مش عارفة نعمل ايه الصراحة

------------------
placebo

سلامة ضغطك يا جميل

موضوع تخطي صعوبات البداية و الصبر على هذه الصعوبات

مسألة تختلف من شخص لآخر

و صوابعك مش زي بعضيها

تحياتي ليكي يا رفيقة الكفاح

مش صيدلانية زميلة برضه؟؟؟

الإشراق جاي طالما في العمر بقية ان شاء الله
----------------
big code

راحة نفسية و مشاعر على الأقل قبول

و يف الآخر و حياتك بتقف على التلاجة و مفتاح الأنبوبة

آاااه ...ماتفكرنيش
------------------
rana

منورة

mannoora said...

يعني هو بصراحه شو احسن، انك تكوني بتشتغلي و معتمده على نفسك؟ او تتجوزي واحد و تعيشي معه تعيسه؟ هيدي انا ، صار عمري 31 سنه و لسه ما تجوزتش. و عايشه انا و امي و شغلي،يمكن صح اني بقول ساعات اهو كل صحباتي اتجوزوا و انا اللي لسه قاعده زي الهبله،بس ليه اقبل بشيء انا مش راضيه عنه؟مش احسن لي اني انا اكون متحمله مسؤولية نفسي على ان يجي واحد يأمر و ينهي و هو مش مالي عيني اصلا.لا طبعا كلا و الف كلا.يعني عشان ما ابقى بدون جواز اقبل بابو رجل مسلوخه و الا بابو عين و نص؟هي الحياة ماشيه ماشيه ، لو اتجوزنا او ما اتجوزناش.بس اقولك على حاجه، هم اول 80 سنه اصعب شي و بعدين بتهون.

Anonymous said...

مش بترضى باي حاجه لانها شافت الاحسن
فمن حقها مترضاش بالاقل
لانها تستحق الاحسن
دى بنت ال30 وانا بصراحه معاها كليا
لان دماغها بقيت اكبر من بنت ال20 وتستاهل تتجوز واحد على نفس مستواها على الاقل الفكرى
اما المادى فانا مش مع صاحبه الراي فيها اوى

عمر عاشق القرآن said...

بعد ال30
بيحصل 3 حاجات .. فيه بنات بتفكر بواقعية اكتر .. وفيه بنات سقف التنازلات يزيد شوية ... وفيه بنات أهو راجل والسلام

لكن نصيحتى "فكرى بواقعية وعملية وفى نفس الوقت أفتكرى ان أعيش لوحدى أحسن ما أعيش بقية عمرى بتخانق مع راجل مش متفاهم ولا ميعرفش ربنا ولا .. - وأحسن برضه من انى اتجوز سنتين وأطلق وعلى كتفى عيل "

اتمنى لكى ولل 15 مليون التوفيق قريبا

Ma 3lina said...

يسلم ايدك يا حنفى

الحوار اللى حاصل ده على اعلى مستوى


احييكى عليه يا دكترة

Anonymous said...

عارفة يابرايد كل ما العمر بيجري بيزيد الطلبات مش المادية وبس لاء والاخلاقية والدينية والشخصية المتكاملة كمان وده كله مش موجود في سن 20 لان ساعتها شخصيتنا احنا كمان مش مكتمل الملامح عشان كده ممكن ساعتها القبول بشخصية غير مكتملة لان الحال من بعضه وبيتشكله مع بعض
بس بعد 30 ميكونش نفس المرونة فاضلة والتطبع بطباع الغير بيكون صعب عشان كده بندور على الرجل الكامل ومعدش لينا صبر على طباع ليس على هوانا

Noony said...

الكلام دة كله مضبوط وأنا متفقة مع صاحبة الرأي الجريء دة 100%...وعلى فكرة كمان..دة مش تفكير البنات بس..دة بيبقى تفكير أهاليهم كمان
يعني بنت التلاتين مش هتقبل بأي حد والسلام وأهلها مش هيقبلوا يجوزوها أي حد والسلام برضه
الأهالي برضه نظرتهم اختلفت..وبقوا يفكروا إن ايه يعني لو بنتنا اتأخرت في الجواز شوية لغاية لما ربنا يكرمها باللي يستحقها بدل ما تتجوز أي واحد والسلام عشان الجواز وخلاص ومش يصونها ويبهدلها؟ خليها في بيتنا معززة مكرمة ولما يجيلها نصيبها ربنا ييسر الحال

المشكلة إن أغلب الشباب فاكرين العكس...مع لو أخت واحد منهم في الوضع دة هم أول ناس هيفكروا تفكير بيت البيت أولى بيها لغاية لما يجي الراجل المناسب اللي يصونها

سبحان الله
ربنا يرزقنا جميعاً بالأزواج الصالحين

:)
نوني

Anonymous said...

Why does the question "Did you marry?" hurt when it comes from an old school mate you haven't met since years?

Anonymous said...

Ana nos7á menek ya bride f kol 7aga, bas seny as3ár shwaya. Moshkelty en msh mn elno3 eli sahl wa7ed ye7ebaha...all my colleagues consider me to be a good sister and trust my opinions, but too strong-willed to fall in love with.
Elmoshkela eny ba7es en eli beyetgawez salonat da 3áleban mala2ash wa7da te7ebo cuz he has a major problem with his personality, wa 2ela leh matgawezsh wa7da ye3raf sha7'seyetha, msh wa7da beye3rafha fe kam 2a3da??? We law kol elregala elkwayeseen beyetgawezo wa7da 3arfenha, from work or otherwise, then how am I going to get married??
Pessimistic I know, but I completely agree with your post. Since we can take care of ourselves, why limit ourselves with someone we can't love?
Ya3ni asoom asoom waftar 3la basala?

Anonymous said...

in reply to the one said that is why man go to younger women not older el "dema3' ely neshfet!"..i think u mean el dema3' ely nadaget!and can be an equivalent partner and not a follower... which is something that most oriental men can't handle... well at the end i think it's the men lost not the women:) GREAT piece BTW and totally agree with the lady that sent it:)

احساس لسه حى said...

عزيزتى
تفتكرى دى مشكله النساء فقط صدقينى مشكله الرجاله كمان
ويمكن صعبه اوى على الرجل انه يتجوز واحد اعلى منه فى المستوى
من غير حب
مش عارف البنت لما تكبر شويه تقبل اى عريس ولا تصبر انا راى تصبر لازم اقل شئ تكون قبلاه شكليا واخلاقيا
مش جوازه وخلاص وبعدها وجع والم
ولازم برضوا البنت تشوف ايه فيها ممكن بيبعد عنها العرسان اكيد فيه سبب
تحسن من اسلوبها وطريقتها ودمغها شوية
هى ازمة وكان ربنا رءوف بينا لما حلل للرجل اكثر من امراه
وحلل للمراه تتجوز راجل متجوز
يمكن انسان متجوز احسن من الف راجل عازب يتقدملك
سلام

Anonymous said...

أنا قريت كل اللى فى المدونة بتاعتك، مع إنى متجوز من سبع سنين يعنى الموضوع ميخصنيش . بس أنا كنت أحب أقول حاجه أظن كلنا بدأ يدركها. إن الشباب اليومين دول (الذكور يعنى) بقوا يخافوا من الزواج ، وده من الأسباب القوية لإحجامهم عن الزواج وبالتالى زيادة ظاهرة العنوسة. الزواج بقى مرتبط فى أذهان كتير مننا بالمشاكل والمسؤولية والخناقات الزوجية.
وأنا أحب أشير لنقطة هنا مهمه أوى، إن ثقافة البنت المصرية اتغيرت كتير، بمعنى إنها بقت أسوأ لا هى فضلت الست المطيعة اللى جوزها يشيلها من على الأرض ويحطها ف عينه ولا هى البنت المجتهده المثقفة العاملة اللى جوزها يعتمد عليها وتقدر تشيل معاه المسؤولية بدل ما تكون عبء عليه. من الآخر عايزة تجمع بين الثقافة الشرقية والغربية فى نفس الوقت بس أكيد تاخد الحلو من كل ثقافة.
يعنى لو بتتكلم فى المسؤليات والأعمال الشاقة يقى الراجل هو سي السيد وعيب مراته المصونة تتعب ،أمال راجل إزاى؟!.
ولو بنتكلم عن القرارات الزوجية يبقى الدول المتقدمة فيها حرية للمرأه والست مش خدامة ولازم يكون ليها قرارها.
اللى بيتفرج مننا على الحضارة الغربية يعرف كويس أوى إن الست هناك بتتطلع روحها علشان تعيش وفاهمه اللى ليها واللى عليها كويس أوى.
من الآخر البنت المصرية بقت مسخ ، الشاب بقى بيزهد فيه.
أنا عن نفسى طلقت زوجتى من حوالى تلات سنين بس لإن فى أطفال بيننا اضطريت أردها، وربنا يعلم إن عمرى ما ضربتها ولا شتمتها،بس عيشتها كانت كلها طلبات مش بتخلص وف نفس الوقت سخط دائم ونكد مستمر من غير أسباب وعدم رضا عن أى شئ.
البنت المصرية بتتحرك دايما بنظرية المؤامرة ومتحفزة جدا لأى تصرف تفهم منه إنه بيمس كرامتها، فهى مستعده تهد المعبد على اللى فيه.
أنا مش بقول إن الست تبقى خدامه ولا جارية عند زوجها ، بس بتنقط أوى لما البنت تتكلم من وجهتين نظر حسب الموقف والحاجه، مرة تستخدم الدين والأحاديث والآيات والثقافة الشرقية لما تحب تطلع منهم بمصلحة ، ومرة تتكلم عن حرية المرأه ونهاية عصر الاستبداد وإن طاعة الزوجة لزوجها اللى قال عنها الدين(نفس الدين اللى كان فله وكانت بتستشهد بيه) ده كان زمان واستحالة تبقة مطبقة دلوقت فى ظل العولمة والكلام الكبير اللى بنعيشه.
يعنى من الآخر الشاب مفروض يختار نموذج من الاتنين، يا إما واحده فلبينية تقوله تحت أمرك يا سيدى يا إما واحده أوروبيه تشيل معاه مسؤولية الحياة بحلوها ومرها.
إنما الشخصية المصرية بتاعة النهارده للأسف (معظمها ومقدرش أقول كلها) مبقاش يصلح للمؤسسة الزوجية.

أحب أقول حاجه أخيرة، إن فى رجالة برضه خسارة فيها اللقمة، بس دول متكلمناش عنهم لإن الكلام مش عليهم دلوقت.

Ahmed El Araby said...

التعليق اللى فات جامد جدا و أنا معاه 1000% بصراحه شبعنا من نغمات الحريه والديموقراطيه والعداله الإجتماعيه والبنت متخلفه فكريا يعنى كل اللى تعرفه من التقدم انهم بيلبسو ازاى وبأو بياكلو ازاى يعنى مظاهر فارغه. طبعا ده مش الكل. بس معظم اللى حوالينا كده.

وبرده فى ذكور ما يستحقوش لقب راجل دى خالص.

بس البنت لازم تحدد هدفها فى دماغها. يعنى ناشفه وخلاص ولا إقناع ولا غتاته ولا عقل سليم فى الجسم السليم وابقى ادى ضهرك للترعه.

Anonymous said...

انا اول مره ادخل هنا مدونه جميله وافكار زى الفل انا بدور على عروسه لو حد يعرف يدلنى على بينت الحلال ياريت اصلى رجلى حفيت من كتر مراسيلى ومشاويرى
وشكلى مش هاتجوز وانا خلاص تعودت على حالتى كده وحده وعذاب ودمار
لو عايزين التفاصيل راسلونى على الاميل
omar_sangar_art@yahoo.com

Unknown said...

مع احترامى لوجهة النظر دى .. بس تعرفى انى اعرف بنات ابتدوا فى التلاتين .. وجابوا اطفال .. ولسة بيكونوا نفسهم ومش عارفين يبتدوا لحد دلوقتى

ربنا ييسرلهم الحال ويكملوا

ويرزق كل بنت كبيرة او صغيرة بالزوج الصالح والإستقرار والأمان وراحة البال

يارب آمين

fanty said...

أنونيميس والله انت كفيت و وفيت يا ريس، المشكلة بجد ان الرجاله دلوقتي زي ما هم متغيروش، يا إما تلاقي الراجل راجل بصورته الطبيعية اللي دايما نعرفها عنه يا إما مش حيكون أصلا يستاهل كلمة راجل، و بالتالي اللي ينفع ينطبق عليهم كلمة راجل لسه زي ما هم، المشكلة فعلا ان البنت دلوقتي عاوزة تجمع بين الاتنين و في الغالب مش بتظبط معاها، أنا عن نفسي مش ضد ان البنت تشتغل، فعلا مش عدل انها بعد ما يطلع عينها في التعليم تقعد في البيت، لازم تشتغل بغض النظر جوزها محتاج مساعدتها ولا لا، بس أنا شايف ان لو الراجل مش محتاج مساعدتها يبقي كفايه عليها عشر سنين شغل بعد الجواز، اللي هو السن اللي ولادها يكونوا كبروا و ابتدوا يدخلوا المرحلة الاعدادية لأن من هنا بيبدا سن الخطر علي الاولاد و بيكون لازمهم رعايه اكتر من أي وقت و محدش يقدر ينكر ان الشغل كله قرف و بالتالي الست اللي يكون جوزها ربنا مقدره انه يفتح بيت بدون مساعدتها و برضه تفضل تشتغل و تحط نفسها ف القرف يبقي ست ما بتفهمش لأن ايه اللي يجبرك علي القرف و انت عندك زوج ناجح ربنا مقدره ان يخليكي قاعده في البيت معززه مكرمه و يقدر يلبيلك كل احتياجاتك، و مش صح لو فضلت تقول كياني و شخصيتي و بطيخي لأن انتي عندك أولاد و محتاجينيك أكتر من أي شىء تاني و بالتالي لو انتي شايفه ان كيانك الوظيفي اكبر من كيانك كأم يبقي انت متستهليش تكوني أم اساسا، تفتكري يا حواء تحبي تكوني مديرة بس علاقتك بأولادك مش تمام لأنك دايما ما كانش عاندك الوقت الكافي ليهم و لا تحبي تاخدي بالك منهم و تهبي نفسك ليهم عشان بعد سنين طويلة تلاقي قدامك رجالة و عرايس واقفين بيقولوا كل خطوة نجاح وصلنلها كانت بسببك انتي يا أمي؟؟؟؟ أنا عن نفسي مقدرش أقول غير ربنا يخليكي ليا يا أمي و يخلي كل أم زيك إذا كنت أنا و غيري بقينا رجالة تملا العين فهذا ليس الا فضل من الله ف البداية و تعب و سهر منك علينا و ربنا دايما يديها و يدي كل أم الصحة و العافية و طول العمر

Anonymous said...

First of all I really like your way in writing, it reflect how you think directly without any additions or stalling.

Your whole bloge idea is good and I like to think that you are not sharing your thoughts as much as it is the place of steaming for you " letting out what annoying you", most of the psychotherapist do this as a therapy.

Moving to the point I want to bring to your attention that most of the girls are not up to the commitment and sharing life, which have the 2 parts up and falls.

The one who said that the girl after 28 is not ready to endure the suffering of starting a good life really annoyed me for good reasons.
1. If she from the start not welling to share life with its sweetness and bitterness will never be able to share at any point she only wants luxury of life not the person who offers it.
2. As one of the men over 28 building my self cause I have no person to support me only depending on Allah and my hard work, why should I share what I worked hard to build to someone will not share me my downfalls cause every one have downfalls.
3. What she is going to offer to me cause adjusting with me is something me too have to do, I have to adjust with her also, so where is the advantage of marring a girl who sees in living with me a big favor I have to cope with.
4. I say if am going to marry some girl that am not the best she can get but I will try my best to make her life as good as it can be, what does she sees in her self better than me to say am not going to share the hard times in life instead of saying what I just said.

Back to yourself I really admire you and the way you think, it is really a shame that no one suitable for you get near enough to see that.

You bring to me hope that there is light in the end of the tunnel, that there are still girls have a mind and use it to think and compare and analyze life around her, and yet see that life is good and bad and we have to live the 2 parts and endure our partners during the rough times.

Thanks.
Eng. Nour

B.S.
I apologize for writing in English but the keyboard have no Arabic letters at work and sure am not using Arabic that much to memorize letters places, and sorry for the language mistakes " my English is not that good :$ "

بنت القمر said...

برايد
المختصر المفيد
الجواز عرض وطلب زى السوق وبنت التلاتين مش ها تاخد ابن تلاتين لو جاهز لانه ها يفضل بنت عشرين طب تاخد مين تاخد ابن اربعين وجاهز بس غالبا عنده انه يا مطلق بنوعيه اولاد وبدون او ارمل او تعيشى مع امه الست الكبيرة التى لايمكن ان يتركها وحيده
امازوجه تانيه والعياذ بالله
اخناري محدش مرتاح
لنتى هاتكون كفتك متساويه مع واحده اجوزت عشرينات وطلعت عينها لما الاحوال اتظبطت
انتى ها تخديه جاهز بس وراة حبه صداع يا اما تبيعي القضيه وتقعدي
الاختيار بتاعك

littel angel (2alb el 2ased) said...

برغم ان أى حاجة بتكتبيها حلوة الا ان البوست ده فعلا احلى بوست قراته و حسات ان الناس البتقرألك محتاجة تقراه كمان سواء كانوا ولاد و لا بنات ....تحياتى فأنت تربى جيل...

FOrty said...

بصراحه يا جماعه الموضوع مشترك و المسؤل عن تأخر سن الزواج الرجل و البنت مسؤليه مشتركه البنت اصبحت بتشتغل و لها دخل يمكن احسن من الرجل فى بعض الاحيان و معندهاش وقت فراغ و الايام بتجرى بيها و تفاجأ بانها ثلاثينيه و تبدأ تفكر فى الاولاد و مشاعر الامومه و الاستقرار بعد ما حققت نفسها فى مجال العمل و بقى عندها كرير زى ما بيقولوا و ده كله مش وحش و لا انا ضده على العكس استقلال البنت المادى و الشغل بيديها ثقه فى نفسها بس المهم الثقه متتحولش الى شىء اخر و على راى المثل ما يزيد عن حده ينقلب الى ضده

و فى الجانب الاخر الرجل يأما بيكون نفسه و عمال يحوش و طالع عينه شغل صبح و بعد الظهر او سافر الى بلد عربى وشرب المر علشان يحوش قرشين يجى بقى يدور على عروسه يفكر فى نانسى عجرم ان مكانتش هيفاء وهبى نفسه بقى فى المكافأه بعد ما طلع عينه فى الشغل و التحويش و لو كان ميسور الحال يبقى مقضيها مارينا و شرم و الحياه حلوه و برضه لما حيعوز يتجوز البحث عن نانسى حيكون الهدف و بصراحه الفضائيات رفعت مستوى الجمال قوى وارجو ان البنات ميزعلوش من الصراحه ماهو اللى عمل كده برضه بنات منكم انما ايه موز موز موز على رأى عمرو أديب

طبعا ماسبق لا ينطبق على الكل سواء الرجاله او البنات لكنه نسبه كبيره و بالتالى ارتفع سن الجواز يعنى يجى الجواز بقى لما الرجل يبدأ يزهق و اغلب اصحابه يتجوزه ويبدا يحس انه كمان لازم يتجوز بقى او بعد ما يقضيها شغل و تحويش قد عشر خمستشر سنه كده كذلك البنت اخر ما تطهق بتقبل باللى قدمها و خلاص علشان محدش ضامن بكره حيجى حد تانى

عموما ان مش ضد اى من الطرفين لكن دى طبيعة العصر و اخيرا اكيد الجواز ده نصيب زى الرزق كده مكتوب و لما حيجى وقته مفيش منه مهرب و ربنا يوفق الجميع الى زوجات صالحات و ازواج طيبين

He and She said...

TETGAWEZEENI ??

malish_da3wa said...

يا بناااااااات
الجواز نظام اجتماعي فاشل
مع تحيات
مجوزه جديد

wanna b a bride said...

نونا

سعيدة ان الموضوع عجبك
و التعليقات أوقات كتيرة بتبقى في أهمية البوست و احيانا اهم
تحياتي
--------------------------
emos

مش عارفة ليه انتي غاوية موضوع الفرانكو اراب ده يا إيموس؟؟؟

موضوع الإيجار الجديد ده شغال و فاتح بيوت كتير
انتي كده عايزة كل عريس يجيب شقة تمليك؟

دعيني أعترض
----------------------
anonymous

لا تعليق
--------------------
رؤى

لافض فوك يا بنتي
--------------------
shahy

من غير تنكيد ولا حاجة

دي بس وجهة نظر ولابد تحترم حتى لو فيه ناس رفضتها

تحياتي
-----------------
the groom

ياااااااااارب

ربنا يرزقنا جميعا
-----------------
sa7bet nouny

فعلا الناس اللي بتعترف بصراحة
ان لقمة صغيورة مش هتشبعها
و عش العصفورة مش هيقضيها
ليه بنتهمهم بالمادية؟..معه ان دول ناس واقعيين و بيفكروا بعقلهم مش بعواطفهم

كل واحد عارف هو يستحمل ايه و مايستحملش ايه الا الحالمين اللي بعد كده بيفوقوا من احلامهم على صخور الواقع

الشباب برضه من الناحية المادية معذور

معاكي في ده و مش معترضة عليه

ربنا يرزق الجميع

He and She said...

7A OLHA TANI
TETGAWIZINI? WALLA ARGA3 FE KALAMI?

Anonymous said...

وتاني باعلق على رد على نفس البلوج.
السيد الفاضل overforty،

"تفاجأ بانها ثلاثينيه و تبدأ تفكر فى الاولاد و مشاعر الامومه"...

اسمحلي أفاجأك أنا بإن مش كل البنات بتفاجأ إنها تلاتينية فتتذكر مشاعر الأمومة... البنت بتراقب نفسها تتحول إلى ثلاثينية سنة ورا سنة
وأنا أعرف ناس اللي حصل معاهم العكس. ناس طول عمرها عايشة على فكرة أن البنت مصيرها الزواج والبيت والأولاد حتى أنها كانت تقف في مطبخ بيت أبوها وتحلم باليوم الذي تقف في مطبخ بيت زوجها...
"يا سلام... شغل إيه وجري في الشوارع من صبح ربنا وبهدلة في مواصلات من أجل تحقيق ذات إيه... الواحدة أحسن حاجة تحقق ذاتها بكارمتها واحترامها في صينية البطاطس!"

وتحتضن أطفال العائلة وتنتظر أن تحمل أطفالها... ثم؟؟!!!!
ثم طال الانتظار...

مابدهاش بقى...
فلنرفع شعار "إلى العمل لحد بس ما ربنا يفرجها من عنده"...

والله الشغل ما طلعش وحش قوي....
ولسة ممكن أقف في مطبخ ماما في الويك إند....
فلنرفع شعار "إلى العمل لحد ماربنا يفرجها، ويمكن بعد كده حتى نكمل عمل شوية"

ويك إند إيه اللي هاقضيه في المطبخ؟ أنا تعبانة طول الأسبوع في الشغل عشان أقضي الويك إند شغل في البيت؟ وللا هو أنا كنت "أرملة وتعول" لا قدر الله...

والله الشغل طلع ظريف وصاحب العمل والمدير وزملائي مبسوطين من شغلي....
سبحان الله، الواحد طلع فيه حاجات بيعرف يعملها ويستمتع بيها رغم إنه كان فاكر عمره ما هيحبها....
مايتهيأليش إنه القعاد في البيت طول اليوم هيبقى سهل بعد كده...
وهو أصلاً فين البيت ده اللي هأقعد فيه؟ بيت بابا الحمد لله مش محتاجني طول اليوم...
لمّا يبقى ييجي البيت يحلها ربنا...
الأطفال؟ آه ظراف... بس لمّا ييجي وقتهم...
والله أعلم لمّا ييجي وقت البيت والأطفال هنعمل إيه!!!

فلنرفع شعار "إلى العمل لأنه أصبح كل حياتي" واللي شايف غير كده يا ريت يوضحلي!!!

أنا عارفة ومتأكده إن دي مش أحسن حاجة في الدنيا، بس مايتهيقليش إن المطلوب من البنت تشتغل عشان تشغل نهارها وتقضي ليلها تغسل مخدتها بدموعها من كتر التفكير في البيت اللي ماجاش والأطفال اللي قربت توصل لسن اليأس قبل ما تجيبهم؟

بصراحة، ربنا يكون في عون الشباب والبنات على حد سواء.

FOrty said...

تعليقا على تعليق الاخت
The Anonymous who wrote the quote in the blog
على فكره انا مش مختلف معاكى انتى وصلتى الى نفس النتيجه سواء عمر البنت اتسرق منها برضاها او وهى بتنتظر ابن الحلال فالنتيجه واحده ان البنت بتنغمس فى العمل و بترفع شعار الى العمل لانه اصبح كل حياتى واكيدانتى معى اننا منقدرش نعمم على كل البنات مش كلهم بيجروا ورا الشغل و عاوزين يبقوا كريرومن و لا كلهم فى المطبخ بيعملوا بطاطس و اكيد فى منهم بيجمعوا بين الاتنين و زى الفل بس المهم نسبه اى قسم اكبر من العدد الكلى و اخيرا اتمنى للجميع التوفيق بس امانه اللى تتخطب او تتجوز تعزمنا على صنيه بطاطس

Anonymous said...

مدونتك جت على الجرح....انا بنت عندى 19 سنه..اتخطبت..او اتقلبت فى شهر تقريبا...مامته شافتنى فى عيادة اسنان...لزقت فيا..اكمنى قمر ماش شا الله عليا...وخدت النمره...معرفش اديتهلهاازاى...المهم خدت نمرتنا...الموقف اصابتى بصدمه..وانا هاتجوز كده...وخدت الموضوع بهزار؟؟؟وقررت ان لا...مش هاتجوز كده..محكتش ماما غ ير بعديها بيومين...على سبيل الهزار..والتريقه...دخلت انام..اتصلو..جاين بكره....ايييييييييييه...انا مش قولت لا...لا انا مفهمتش كده....طيب يا ماما هاشوفه...وقلت هاشرحه بكره...وهاطلعهلهم شارون..والواد جه....زى الفل...واقنع كل اللى حواليه بيه....وبعد كده تواالت الاحداث لحد ما انا دلوقتى متسلسله...مخطوبه....بقالى شهر..مش حاسه بيه....عايشه فى صرعات مع نفسى...طب هو كويس ماله...طب انا مش عايزه احبه عشان هو مجرد خطيبى...طب وماله...بس انا كان نفسى اللى نقى واختار ..عشان مندمش...مش عايزه احس انى اتظلمت والجو ده...وحياتى هتبقى روتينيه..وهابقى انا المداام...اه بيعزنى عشان مرااته وام العياال..لكن فين انا بكل مشاعرى وافكااارى ..واحلامى..كان نفسى اتكعبل فيه...الاقيه ويلاقينى عشانى...عشانى ...عشان دماغى..عشان هو انا اللى شافنى فى وسط 500 حد..عشان هو ده اللى نفسى اتكلم معاه لصبح واحكى..ودى مش عادتى.....لكن اتجوز واحد لمجرد انى اتعودت عليه فى حياتى.....وصراع انه بنى ادم كويس ويم ما تحبى هاتحبى احسن من ده فى ايه...طب لحد امتى هاتدورى....وصراع انى لسه معرفتش انا عايزه ايه..عايزاه طويل ولا قصير .. حمش ولا بارد ملوش تجارب ولا صايع...مش عارفه...وعدم معرفتى فى حد زاتها صراع...لانى مضايه انى مش عارفه وحاسه انى لازم اكون عارفه يا أما لا.....حاشاه اننى عايزه وقت...حاسه انى عايزه اجرى رجرى...اصبروو عليا شويه....عايزه اقووول اصبروو عليا شويه لسه ما استوتش ومخى ما احمرش.......عايزه اسمع رائيك...خصوصا انا بيرن عليا الساعه 6 ونص الصبح...وانا بكتبلك..هل ده ليه دلاله معينه.....ردى عليا...

أمين المكتبة said...

قسمة ونصيب .. الكلمه دي باحس انهم بيبرروا بيها مشكلة فساد البلد اللي من أهم نتائجها العنوسة ..


بالمناسبة
استمتعت جدا بتدوينك

بالمناسبة برضو ليكي تاج عندي ابقى خديه

Anonymous said...

الحقيني انا خلاااااااص عنست
اختي اللي اصغر مني ب7 سنيين انخطبت و انا لسه في البيت بلييز عزيني في نفسي

wanna b a bride said...

mero_wild_cat

المعاناة واحدة

و قلبي معاكوا
-------------------
anonymous

يا سلام عليك انت اللي فاهمني و الله

ربنا يستر أنا عارفة اني كلي عيوب من دي

ربنا يرزقني باللي يستحملني
------------------
brokenheart

نبتدي من الآخر

كويس جدا ان البلوج بيعرفك على أفكار بنات ال27 فيما فوق و فيما تحت برضه
و زي مانتا شايف البنات اللي ليهم مخ و اللي بيفكروا و اللي انت بتدور عليهم

موجودين بس لازم تتعب شوية عشان تعرف اللي جواهم

مافيش حاجة تستحق في حياتنا بتيجي من غير تعب
ربنا يوفقك في بحثك و تلاقي بنت الحلال
----------------------------
hana

الفيلم العربي و البسبوسة

احلى ميت مرة
-----------------------
موندة

و الدماغ التعبانة كتيييييييير جدا

كنت لسه باتناقش مع حد قريب و قاللي ايه مواصفات عريسك

قلتله انه يكون بيفهم
قاللي و دي صعبة قوي

قلتله فووووووق ماتتصور
--------------------
nile queen

فعلا التدبيس في كيس الجوافة دي هي اللي خايفة منه

بس انا بقاوم

و هافضل اقاوم لغاية آخر نفس

ربنا يستر
-----------------------
anonymous

يااااااااااااااااااااااارب
----------------------
anonymous

و نعم الكلام

wanna b a bride said...

akram

شوف أنا بس يهمني انك تقول كل اللي في نفسك

انا عارفة انك نفسك في الموضوع ده من زمان

و بغض النظر عن البنات اللي فاكرين نفسهم ملايكة و مابيعرفوش يطبخوا و اللي بتقول انهم لو صحيوا الصب مش هيعرفوا يبصوا في المراية

برررررضه يا أستاذ أكرم كل واحد شايف نفسه أحسن الناس

و كل واحده من حقها تنقى اللي ينفعها زي مانت و أصدقاءك من حقهم ينقوا اللي يرتاحولها

الموضوع مش سلق بيض و لا لازم البنت تبوس ايديها وش و ضهر لأن حد اتكرم و اتقدملها

تحياتي
---------------------------
الملاح التائه

شكرا ليك على الكلام الجميل و رفع المعنويات

تحياتي
----------------------
ميمي

جبتي المفيد

--------------------
partido de la paz

شكرا ليك

تحياتي لكل العرب في اسبانيا
------------------
bride zone

رفيقة الكفاح

العقول و الأفكار تتقارب خاصة في الظروف المتشابهه
----------------------
doba

مبروك
--------------------
ياسمين

في الول قلت الحمدلله بارقة امل

حب و زواج بعد التلاتين

لكن بعد كده قلبت بغم

موضوع كله زي بعضة و اللي تعرفيه زي الي ماتعرفوش

حاجة تخوف

ربنا يستر

wanna b a bride said...

mannoora

أحلى حاجة موضوع"شو" دي ..بتعجبني قوي

فعلا هو اول 80 سنة هم أصعب حاجة

ربنا يعديهم على خير
-----------------------
myself

المستوى الفكري لازم يكون متقارب طبعا

الا ان الرجالة بتفضل البنت تكون متخلفة عقليا

بيتهيألهم كده أريحلهم
مع ان الست غالبا بتتعب أكتر لو مخها صغير

لكن تقولي لمين
--------------------
مشروع بطل

ال 15 مليون بيشكروك على هذا الدعم المعنوي

تحياتي
--------------------
ma-3alina

منورة يا زمل
تعالي على طول

و في البلوج ده ..مش هتقدري تغمضي عينيكي
----------------
جنان

و ده شئ خطير
ساات بيتهيألي ان تشغيل المخ الكير بيبوظ حاجات كتيرة في حياتنا

بس ده عيب مش قادرة أتخلص منه
للأسف
-------------------
noony

تفكير الراجل في اخته غير تفكيره في البنت اللي بيتقدملها نهائيا

يعني لو اخته مطرحها و اتقدملها واحد و عاملها المعاملة بتاعته ممكن قوي يبطحه و يروحه غرقان في دمه

لكن اللي بيتقدملها دي..تاخد على دماغها ولا تفتح بقها

هي يعني كانت لاقيه؟؟؟
--------------------
whoever

الصراحة بيوجع

خصوصا لما يتبعه رد فعل متمثل في اتساع العيون و الشهقة المستفزة بعد سماع الجواب بالنفي

wanna b a bride said...

anonymous

تعبير راااااائع التعبير بتاعك لما قلتي

انا مش من النوع اللي "سهل" الواحد يحبها

بنات كتير من النوع ده..واها حاجات كتييير جميلة...لكن مين اللي يدور و يفهم..التعاملات السطحية في الشغل أو جواز الصالونات لا يمكن يكشف الروح و المشاعر اللي جوا أي بنت الا لو حد قرر انه يحاول بجد

لكن مين يدور؟؟

فعلا الشخصية مش ممكن تبان من قاعدة او اتنين في الصالون و التقييم السطحي من ناحية الراجل او الست هو اللي بيخللي ناس كتير كويسة مش شايفين بعض


ان شاء الله الصيام مش هيخلص و نفطر على بصلة

قولي يارب
------------------------
anonymous

المشكلة ان البنت سواء دماغها ناشفة او غيره

غالبا لما بتبقى زوجة و ام بتتغير و كده كده بشكل او بآخر بتبقى قوة مؤثرة في البيت

الفرق بس ان لو الراجل خد واحدة مخها ترللي عشان يتحكم فيها المخ الصغير ده بيكون سبب غم و نكد و يمكن ترسى غلى طلاق

الدماغ الناشفة او الناضجة على رأيك...بتبقى منطقية أكتر و بيتضح انها أسهل في التعامل

بس مين يفهم؟؟
-----------------------
احساس لسه حي

النتيجةالنهائية

ان ماحدش يرضخ لضغوط المجتمع و ياخد حد هو مش مقتنع بيه

بس هل المجتمع هيرحمنا؟؟ و يصبر علينا لما نلاقي اللي احنا عايزينه

ولو ماصبرش هل احنا هنستحمل الضغط ده؟؟
---------------------------
anonymous

انا مش هاقول ان التجربة اللي انت مريت بيها مأثرة على حكمك على البنات

لني ماعرفش الظروف كانت ايه بالظبط

يعني هل اتجوزت مراتك عن حبو كنت فاكرها حاجة و طلعت حاجة تانية والا اتجوزتها بمنطق أهي زوجة و السلام

يمكن كان الإختيار خاطئ و يمكن هي ضغوط الحياة و يمكن مجرد نصيب

لكن الأكيد ان الكلام اللي انت بتقول عليه ماينفعش يعمم

الزوجة المطيعة بتاعة زمان ممكن جدا تتوجد دلوقتي لو لقت راجل تحس معاه بالأمان و ماتبقاش محتاجة تناقشه لأنها واثقة ان قراراته صح و انه حاطتها من أولوياته و مش مجرد كرسي في البيت

و الست اللي بتقف في وش جوزها و تقولله المساواة و حقي و حقك...لو لقت شخص يحتويها هتحط لسانها حوه بقها و مش هتقوله تلت التلاته كام

أكيد في نسبة غاوية نكد للنكد...و هنا بيجي دور الإختيار الصحيح اللي احنا بنتكلم عليه

ربنا يوفقك و يهدي النفوس

تحياتي
-------------------
mouslim combatant

انظر الرد السابق

و كلنا هندي ضهرنا للترعة ان شاء الله
------------------
عمر

منور المدونة
المدونة ماليانة بنات زي الفل

بس مين يلاقي

ربنا يوفقك
------------------
إنسانة

ربنا يوفق الكل

كل بطلة و ليها قصتها و مافيش حد حياته زي حد

ربنا ييسر للجميع

wanna b a bride said...

akram

أختلف معاك جدا في نقطة الشغل دي

مين قال ان الست بتشتغل بس غشان مرتبها و الا عشان جوزها مش قادر يصرف عليها؟

ليه دايما بتنسوا ان البنت دي عندها مخ و في شغلها ممكن تفيد ..
اللي بتختار تقعد في البيت تربي الولاد براحتها

لكن ماتصادرش على حق واحدة عنجها طموح تعمل لنفسها كارير و تفيد بيها الناس طالما مش مأثرة في حق بيتها و اولادها

المصريات رضوا من زمان بتحمل عبء الدورين الأمومة و العمل

ماتقوليش و العيال اللي بيبوظوا و الإنحراف و مش عارفة ايه...نص اللي انت بتقول عليهم دول بيبقوا من بيوت فيها امهات ربات بيوت ...و نص حالات الطلاق بيبقى بسبب الست اللي قاعدة في البيت فاضية تنكد على جوزها

النسبة هي هياها...الشغل مالوش علاقة...المشكلة في البني آدمين
--------------------------
الباشمهندس نور


سعيدة ان البلوج عجبك

هو فعلا اولا و آحرا وسيلة للفضفضة و اخراج مافي اللاوعي

شكرا ليك على كلامك الجميل بخصوص شخصي المتواضع
و اهلا بيك دايما في البلوج

عربي ..انجليزي...ولا يهمك البلوج فول أوبشانز

بالنسبة لصاحبة التعليق انا متهيألي هي تقصد اكتر توقع الناس للتنازلات المفروض ان البنت اللي عدت التلاتين تقبلها

و ان اللي بيجي يتقدملها كأنه عامل فيها معروف

كلامها عن العامل المادي يزعل ناس كتير لكن هي صريحة مع نفسها و مابتوهمش نفسها ولا الإنسان اللي يتقدملها انها هترضى بحاجة و بعد كده الحال يتقلب

حقك طبعا تعترض على المنطق و البنات اللي بيستحملوا ع الحلوة و المرة و الله موجودين

الست اللي بتقف جنب جوزها في بداية حياته و تستحمله في محنه و بتشيل معاه الصعب...لسه مانقرضتش ولا حاجة

بس الموضوع محتاج ررؤية و اختيار صحيح لشريكة الحياة

تحياتي
-------------------------
بنت القمر

ده ايه الإختصار المفيد ده

بجد جبتي من الآخر

بس و الله فيه بنات في التلاتين بيتجوزوا جوازات بيحلموا بيها بنات العشرين

و لحد دلوقتي شخصيا ماقبلتش واحدة في التلاتين قبلت بواحد متجوز او عنده عيال

في الأربعين جايز

او يمكن انا مش باشوف ناس كتير؟؟؟؟
جايز
----------------------
little angel

سعيدة ان البوست عجبك

بس موضوع بتربي جيل ده خضني شوية
:))
تحياتي
----------------------
overforty

رأي يستحق الإحترام

تحياتي
--------------------
he&she

اتقدم
----------------------
malish da3wa

الله يطمنك

wanna b a bride said...

the anonymous who wrote the quote

&

overforty

حوار راقي

استمتعت بيه

و صينية البطاطس عندي ان شاء الله
----------------------------
nour

من جهه لما تلاقي حد محترمحاولي تعرفيه اكتر و تقربي من فكره و شخصيته

لما تفهميها احتمال كبير تحبيه
خصوصا انه حائز على اعجاب الجميع وواضح انه شخصية محترمة...و مش لازم نجري ورا وهم اننا لازم نعيش قصة حب قبل الخطوبة..لن الموضوع ده مش متوفر للجميع

من جهة تانية مش معنى ان الواحد عريس مناسب يبقى مناسب ليا انا بالذات

المسألة مسألة قبول

ممكن مليون واحد يكونوا بيحبوا الكباب...لكن انا ماباحبوش

مش تنشيف مخ ولا تكبر ولا عناد

انا ذوقي كده..ماليش نفس له

و القبول ده شئ مالناش يد فيه ده من عند ربنا

ادي لنفسك فرصة و اتنين و تلاتة و عشرة عشان تعرفيه و تقربي منه

غير كده...يبقى احنا لسه على البر و دلوقتي احسن من قدام

ربنا يوفقك

تحياتي
------------------------
أخ جامعة

شكرا ليك

المدونة نورت
------------------------
anonymous

الكلمة دي بتنرفزني
و مش لازم مهما بلغ بيكي اليأس تستخدميها حتى لوصف نفسك

و مين عارف الخير فين؟؟
فيه مليون حاجة ممكن تحصل للواحدة أسوأ من إنها تتأخر في الجواز

فكري كده و هتلاقي انك أحسن من ناس كتير

عارفة موضوع الأخوات و القرايب ده بيوجع

لكن كل واحدة رزقها مكتوب

و كل شئ بامر الله

fanty said...

معلش يا برايد أنا عارف إنها مدونتك و لكي كل الإحترام فيها بس أنا في كام جملة كدة خبطوا علي راسي قبل ما يدخلوا و معرفتش أفتحلهم بصراحة!!!

و زي مانتا شايف البنات اللي ليهم مخ و اللي بيفكروا و اللي انت بتدور عليهم
موجودين بس لازم تتعب شوية عشان تعرف اللي جواهم
مافيش حاجة تستحق في حياتنا بتيجي من غير تعب!!! إيه بقي الهرتلة اللي إنتي بتقوليها دي، أنا دايما أقول الناس بتتجوز عشان تسعد بعض مش عشان تتعس بعض، هو في حد مفهمك إنك داخله إمتحان ولا يمكن حد ضاحك عليكي و مفهمك إن الولاد معقدين و بيقعدوا زي البنات قدام المراية طب يا تري بيحبني طب يا تري حيمسك إيدي طب يا تري حيشيلني في ليلة الدخلة و الكلام الأهبل ده، طب يا تري مش حيتغير و بما إن انتي نفسك كأنثي مش معروف انتي نفسك عاوزة ايه يبقي أنا من أساسه اتعب راسي ليه أصلا في فهمك و دي حاجه ولا حتقدم و لا حتأخر لاني لو أتفقت معاكي حترجعي تغيري رأيك لأن ده في دمكم.... نروح لكارثه تانيه، كنت لسه باتناقش مع حد قريب و قاللي ايه مواصفات عريسك، قلتله انه يكون بيفهم، قاللي و دي صعبة قوي،
قلتله فووووووق ماتتصور، حسستيني أنكم انتوا اللي اتشغلتوا علي أبحاث أحمد زويل و هو اللي طلع أخد الجائزة مكانكم، طب ده إحنا بقي نلحق نروح نتعلم و نتثقف عشان لو الحريم عملوا اضراب عن العمل مش حنقدر نمشي ولا خطوة من غيرهم، نروح لمصيبه تانيه، برررررضه يا أستاذ أكرم كل واحد شايف نفسه أحسن الناس،
الموضوع مش سلق بيض و لا لازم البنت تبوس ايديها وش و ضهر لأن حد اتكرم و اتقدملها، شوفي يا برايد أكيد ناس كتير شايفه نفسها كويسه بغض النظر هم صح ولا لأ بس الكلام ده ممكن تقوليه في المدرسه أو الشغل لكن في موضوع الجواز ده أنا مش موافقك، طب إديني أماره كده علي أنك أحسن واحدة؟؟؟ و بالنسبه لموضوع تبوس إيدها وش و ظهر، ما حدش أكيد عاوز كده بس زي ما قلتلك إديني أماره و مش بقولك روحي اتجوزي أي واحد بس لو فضلتي مستنيه اللي يكون تحفه من حيث أفكاره و نفس دماغك بالظبط والتفاهم و الكلام ده يبقي لازم تحضري نفسك لمشوار إنتظار طويل و للأسف برضه مش حتظبط معاكي لأن بعد كده طريقه تفكيرك حتتغير، صحيح متعرفيش والنبي البنات عاوزين إيه أصلا عشان بس نسيت و بليز بلاش تقولي أنا عندي أقعد كده ولا إني أتجوز واحد معرفش ماله عشان فعلا لو الموضوع مش فارق معاكي يبقي إقفلي البلوج بتاعك أحسن ما دام إنتي قوية قوي كده و يا ريت تمشي علي مبدا الشكوي لغير الله مذله، ويا ريت متقوليش أنا بس بشارك الناس ارائي، طب نشوف قصه تانيه، المستوى الفكري لازم يكون متقارب طبعا،
الا ان الرجالة بتفضل البنت تكون متخلفة عقليا، بيتهيألهم كده أريحلهم، مع ان الست غالبا بتتعب أكتر لو مخها صغير، لكن تقولي لمين، مش عاوز بصراحة أقف عند التعليق ده كتير بس مش حقول أكثر من الحديث الشريف يقول (ما فلح قوم ولوا أمرهم لامرأه)، تفتكري الحديث ده يعبر عن مخ و تفكير عاملين إزاي ، كارثه تانيه معانا و هي و انتي بتقولي ل الاخت جنان ساعات بيتهيألي ان تشغيل المخ الكير بيبوظ حاجات كتيرة و ده شئ خطير في حياتنا بس ده عيب مش قادرة أتخلص منه للأسف، بس صراحة يا برايد أثبتي قمة التوافق في ردودك،،،، إيه رأيك في شوية توافق كمان؟؟؟ قلتي المشكلة ان البنت سواء دماغها ناشفة او غيره
غالبا لما بتبقى زوجة و ام بتتغير و كده كده بشكل او بآخر بتبقى قوة مؤثرة في البيت، الفرق بس ان لو الراجل خد واحدة مخها ترللي عشان يتحكم فيها المخ الصغير ده بيكون سبب غم و نكد و يمكن ترسى غلى طلاق، الدماغ الناشفة او الناضجة على رأيك...بتبقى منطقية أكتر و بيتضح انها أسهل في التعامل بس مين يفهم؟؟
الزوجة المطيعة بتاعة زمان ممكن جدا تتوجد دلوقتي لو لقت راجل تحس معاه بالأمان و ماتبقاش محتاجة تناقشه لأنها واثقة ان قراراته صح و انه حاطتها من أولوياته و مش مجرد كرسي في البيت و الست اللي بتقف في وش جوزها و تقولله المساواة و حقي و حقك...لو لقت شخص يحتويها هتحط لسانها حوه بقها و مش هتقوله تلت التلاته كام أكيد في نسبة غاوية نكد للنكد...و هنا بيجي دور الإختيار الصحيح اللي احنا بنتكلم عليه، و ردي علي اللي انتي قولتيه ده إنه كلام فاضي عشان قال الرسول إني رأيت الجنه وتناولت عنقودا و لو أصبته لأكلتم منه ما بقيت الدنيا، ورأيت النار فلم أري منظرا كاليوم قط أفظع، ورأيت أكثر أهلها النساء، قالوا بم يا رسول الله؟ قال يكفرن بالعشير و يكفرن بلاحسان ، و لو أحسنت إلي إحداهن الدهر كله ثم رأت منك شيئا قالت ما رأيت خيرا قط

أكرم أختلف معاك جدا في نقطة الشغل دي مين قال ان الست بتشتغل بس غشان مرتبها و الا عشان جوزها مش قادر يصرف عليها؟ ليه دايما بتنسوا ان البنت دي عندها مخ و في شغلها ممكن تفيد، اللي بتختار تقعد في البيت تربي الولاد براحتها لكن ماتصادرش على حق واحدة عندها طموح تعمل لنفسها كارير و تفيد بيها الناس طالما مش مأثرة في حق بيتها و اولادها، المصريات رضوا من زمان بتحمل عبء الدورين الأمومة و العمل ماتقوليش و العيال اللي بيبوظوا و الإنحراف و مش عارفة ايه...نص اللي انت بتقول عليهم دول بيبقوا من بيوت فيها امهات ربات بيوت ...و نص حالات الطلاق بيبقى بسبب الست اللي قاعدة في البيت فاضية تنكد على جوزها، ما دام انتي بتقولي إنها مش بتشتغل عشان الفلوس يعني جوزها مكفي و موفي‘ يعني من حقه يرجع يلاقي لقمه حلوه سخنه ياكلها مش أكله معموله من قبلها بيوم بالليل عشان الهانم بترجع من الشغل الساعه اربعه و مش عندها وقت تطبخ، و من حقه يلاقي غرفته نضيفه مش متبهدله عشان الهانم يا دوب لحقت فطرت العيال و جريت علي الشغل و يا رب يلاقي هدومه مترتبه و ميكونش الرد هو أنا لحقت أعمل حاجه ما أنت شايفني من ساعت ما رجعت متنيله مع العيال و المذاكره و تئميع البايمه و يا ريت الساعه حداشر باليل مسمعش كلمة مش قادره والله يا محسن و هلكانه خليها يوم الخميس، لا فعلا خالص إنها بتقوم بكل واجبتها و بتعرف تجمع بين الشغل و البيت و واجبتها كزوجة اللي ربنا وصي عليها مش إحنا اللي اخترعناها من نفسنا، و أخيرا يا برايد شكرا علي سعة صدرك و أكيد الاختلاف في وجهات النظر لا يفسد للود قضيه

Anonymous said...

hi medosa , momken tekalmeny 3alashan 3ayzik fe mawdow3 mohem , 0124393811
eng.Mohamed hesham

Shimaa Gamal said...

أنا كان ليا تعليق صغير على الفرق بين جواز بنت الثلاثين و بنت العشرين .
مش بس بنت الثلاثين صعب عليها تقبل أنصاف الحلول و صعوبات البداية المادية اللى هى مرت بيها لوحدها قبل كده ، الأصعب إنها تقتنع بفكرة مشاركة الحياة اللى هى بنتها لوحدها مع شخص تانى .
الجواز قرار سهل بالنسبة لبنت العشرين اللى شايفة إن الراجل فارس بيشلها على حصان أبيض ، اللى بتحلم بفستان الفرح و فاكرة نفسها هاتكون أميرة . سهل بنت العشرين تقبل حاجات كثير . لكن بنت الثلاثين اللى فهمت الدنيا و عرفت إن مافيش نهايات سعيدة زى الأفلام و اللى فاهمة إن الدنيا يوم كده و يوم كده أكيد مش هاتقبل بأى حد لمجرد خطر الحصول على لقب عانس . لأنها جربت اللقب و لقيت إن الشتيمة مابتلزقش .

Anonymous said...

السلام عليكم
اولا كل حاجة نصيب ولكن فعلا اذا وصل سن البنت الي الثلاثين من يتقدم لها هيكون بين الثلاثين والاربعين علي الاقل ود في احسن الظروف ولكن اتفق يجب عدم الموافقة علي اي شخص وخلاص يجب ان يكون هناك توافق بين المستوي المادي يعني ممكن ان يكون اقل شويا مش مشكلة ولكن ميكنش فية توافق خالص الحياة لن تستمر في هذا الزمن
وتحياتي لكي
وهذا رابط لمدونتي
http://almasry1wk.maktoobblog.com

Anonymous said...

اشطاط عليكي يبقي بقي مافيش زعل لما الراجل ينفض لبنت التلاتين ويشوف واحدة لسة صغيرة حاجة بتاعة 21ولا 22سنة ولا حتي 18 اهي هتكون لسة بخيرها ماشفتش غيره ولسة فيها النضرة والدلع وفرحة ولهفة البنت علي عريسها
انا هكلمك من وجهة نظر ذكورية خالصة الراجل دايما يميل للبنت الصغيرة لأنها ممكن ترضي بالقليل وتفرح قوي وتطير من الفرحة كمان لما يديها الكتير اللي ممكن بنت التلاتين ماترضاش بيه او تعتبره صغير
كمان الراجل بيفضل الصغيرة لأنها مش بعد 10 سنين هيبقي عندها 42ولا 43سنة وتفضل تشكي من تعب في كل اجزاء جسدها ويبقي هو حاسس انه لسة في عزو وهي علشان تعبانة ومش قادرة تجاريه في النشاط والحيوية والرغبة تفضل تقطم فيه وتحاول تقلل منه وعلي رأي عمر طاهر في كتابه ( شكلها باظت) الست في الأربعين زي الشيشة ماتقمش معاك غير بعد تالت حجر
كمان الراجل بيفضل الست الصغيرة علشان لما يكبر يلاقي جنبه حاجة كويسة يقدر يبص عليها وتكون يعني لسة فيها الرمق
علي فكرة انا عندي 26سنة ولسة عازب بس ان شاء الله لما هتجوز الفرق بيني وبين عروستي مش هيكون اقل من 7أو 8 لما اخدها عيلة لسة بضفاير عندها 18 سنة وتكبر معايا احسن من لما تكون كبيرة وناضجة والكلام دة وتفضل تخنق فيا وتفضل تقولي ليه ومش ليه
وسلام بقي

Anonymous said...

الف مبروك المدونة والكتاب ودائما فى توفيق

محمد النجار said...

عايزه تتجوزى ليه؟

Anonymous said...

الموضوع دة شائك جدا جدا للاسف هيا النظرة كدة لاي واحدة وصلت لسن الثلاثين او كسرتهم ولسة مرتبطتش خصوصا لو مش ناقصها حاجة معينة بل المشكلة انها عندهاامتيازات اكثر من اللازم لا اقصد طبعا الامور المادية فقط لكن امتيازات شخصية واجتماعية وعلميةوما الى ذلك بالطريقة اللي تخلي ان عدد الرجالة المناسبين ينحسر جدا ويبقى اشبة بدرب من دروب المستحيل ولو ان مفيش حاجة بعيدة على ربنا طبعا :)))
المهم بتلاقي الناس بقى منفسمين الى عدة طوائف طائفة بتنادي بتقديم تنازلات وان نحمد ربنا على كدة ونشتري راجل نشتري راجل دي دلوقتي بقى معانها ان احنا نتبناه اه والله بجد يعني ابويا كدة بعمل حسابة على انه خلف ولدين بدل ما هو خلف ولد واحد المشكلة ان المأسوف عليه غالبا بيكون خسارة فيه ان تدفع علية مليم احمر واحد طائفة تانية بتنادي بإن احنا بتبطر وبنضيع فرص فظيعة عشان مثلا اتقدم عريس بيشتغل في السلك الديبولماسي صحيح لكن عنده عداوة مع الميه بيستحمى بس في المواسم والاعياد الرسمية وطول ماهوا قاعد يهرش في جتته ولما العروسة تقول انه مش نظيف يقوم الواسطة طبعا لانه هوا اللي جايبه يقول انا قلتله فعلا كدة وهوا قال انه مكنش فاضي الاسبوع او ال10 ايام اللي فاتو اللي جالنا فيهم اربع مرات وريحته الله عليها انه يستحمى عشان عندة شغل كثير طبعا بطر ازاي ارفض عريس لقطة زي كدة كل ما واحدة تعرف تقول وايه يعني مبيستحماش مفيش مشكلة لدرجة انه ابويا بدأ وفتها يتبني وجهة النظر دي واقترح اني اوافق واول ما يجي الراجل البيت بعد الجواز طبعا اروح واخداة من ايدة وادخلة بستحمى طيب انا راضية ذمتكم دة كلام هوا عشان حضرته هيبقى سفير في يوم من الايام انا افضل اشم الريحة المعطنه دي طول عمري
فيه كمان فرقة بتقول اني مش عاوزة اتجوز عشان منشغلة بالدراسة مع ان لا تعارض بين الدراسة والجواز ما الناس بتتجوز وبتشتغل وبتذاكر ايه المشكلة
بس هوا انا لازم يعني اتجوز اي حد معدي في الشارع طبعا مينفعش والمثل بيقول وانا شخصيا مقتنعة بيه جدا قعدة الخزانه ولا جوازة الندامة
المهم بقى من كام يوم كدة امي كانت في زيارة عند واحدة مسحبوبة من لسانها وياسلام لما تعرف لحد علة يا داهية دوقي قالت لها ايه وطبعا دي مش اول مرة ترمي طوبه زي دي لكن المرة دي القذف كان نووي قالت لامي طبعا بعد ما قعدت تدعي لي 10 ساعات بالجواز طريقة الدعاء اللي بتوصلك انك تقول اللي قدامك ارجوك ارحمني متدعليش انت بتعايرني مش بتدعيلي بعد ما خلصت الوصلة او امي قطعت عليها الوصلة بأنها قالت لها ادعيلها تخلص دراستها راحت قايلالها لا ليه بس متخافيش بكرة تتجوز واحد ان شاء الله يكون فاته القطر زيها عادي خالص بمنتهى البساطة طيب بذمتكم دة كلام يتقال
حصل بعد الموضوع دة بكام يوم ان واحد صاحب اخويا الصغنن اصغر مني بحوالي 3 سنين سنا ولسة بيقول يا هادي وانا بالفعل بعاملة كأخ اصغر وبعاملة من موقع الاخت الكبري انه حب يتقدملي او حب يحبني فانسحبت بصنعة لطافة من الموضوع بدون اصابات لكن انسحبت من لساني وحكيت لامي لقيتها بتقولي وهيا مش مقتنعة وانا عارفة انها مش مفتنعة طيب وايه المشكلة ياماما مينفعش انا مش محتاجة اقولها انه مينفعش لانها عارفة لكن طبعا تحت تأثير الكلام السم اللي سمعته عاوزة تنجز طبعا وده حقها انا عارفة نفسها تفرح ببنتها وتثبت للناس طبعا انها مش هتتجوز واحد فايته القطر انما واحد لسة
للاسف اغلب بمجتمعنا بيفكر كدة وبيبص انه لازم يدام كسرت ال 30 اني ارضي بأي واحد معدي من تحت الشباك واحمد ربنا وابوس ايدي وش وظهر كمان
لكن المشكلة ان اللي بيحصل العكس مع تقدم السن وخصوصا لو فيه شغل ودراسة واهتمامات ونجاجات بيكون صعب قوي قوي تقديم تنازلات بالشكل دة لمجرد اني اخد اللفب وابقى مدام حتى لو هتطلق بعد كدة بس الاحسن اني اكون اكتسبت هذة الخبرة لان في نظر الكثير لقب مطلقة احسن من لقب عانس

تحياتي

Anonymous said...

على فكرة الكومينت اللي فات بتاعي انا
http://mohandesmakhnoo2.blogspot.com/


ده اللينك بتاع المدونة بتاعتي بس لسة فاضية انظف من الصيني قبل وبعد غسييلة

Anonymous said...

عزيزتي برايد
انا عرفت البلوج بتاعك عن طريق الصدفة من برنامج العاشرة مساءا لاني من هواة هذا البرنامج وممن ينطزره يوميا صحيح لم اكمل هذه الحلقة لاني كنت لسه جاي من السفر ومجهد وعاوز استريح لكن عرفت البلوج ودخلت علية تاني يوم مع العلم اني لست من هواة النت والشات والكلام ده لاني بصراحة يقبلني كثير من العقول التافهة والفارغة كتير اوي وازعل على الشباب وعقلهم الفاضي مع العلم اني لما كنت في سن هذة الشباب كنت غير كده نهائيا انا ياعزيزتي صيدلي برضه بس تخرجت من القرن الماضي يعني قبل الألفية التانية ولكني كنت من هواة القراءة وبغزارة المهم ياعزيزتي مش عاوز اطول عليك انا ياما كنت اكتب اشعار وزجل وكنت اكتب كثير من الخواطر في اوراقي الخاصة ولكني لم احتفظ بها لنفسي ولكني عرفت في يوم من الأيام ان ابن اختي وجدها ويقرأها باستمرار وبيقولي ياخالو انا باستفيد منها كتير اوي مش عاوز اطول عليكي انا دخلت البلوج بتاعك وعجبني جدا بصراحة لعدة اسباب اولا بساطته في الكلام وطريقه عرض الأحداث المذكورة بالتفصيل مع شيء من خفة الدم ربنا يوفقك ان شاء الله وهذه الجدية في البلوج جعلت حتى من الرسائل المرسلة تأخذ نفس طابع الجدية في الرأي أو عرض المشكلة الخاصة بالمرسل
بالنسبة للأخت البنك يونيمون للأسف ياأختي ان كثيرا من الشباب لا يزال يعيش في جعبت سي السيد وهو اصلا ماشي معلق سلسلة في صدرة وحاطط على شعرة جل من ابو تلاتة تعريفة مع العلم ياأختي ان كلنا كشباب تربينا تربية الأفلام المصرية القديمة بتاعت بين القصرين وقصر الشوق الزمن اللي انتهى من قديم الأزل فلا هذا الزوج موجود ولا هذه الزوجة موجودة الأن ولا حتى جيلنا شافها فى بيته
كان لي زميل عزيز كان مضرب على الزواج وكل ما امه تشوف له عروسه تقول لها انها طيبه وبنت ناس وبتسمع الكلام وحتعيش تحت طوعك وحطي تحت كلمه تحت طوعك دي ميت خط وكان يرد عليها يا أمي انا مش عاوز واحدة تعيش تحت طوعي انا عايز واحدة تخرج منه وتخرجني معاها انا عاوز واحدة بتعرف كمبيوتر وطبعا لان امه كانت غير متعلمة تقول يابني احنا ممكن نشترط على اهلها ان الكومبيتر ده يكون على
العروسة بس تعالى اخطب وريحني ربنا ان شاء الله يرزقك بواحد يكون ابن حلال

Anonymous said...

بصراحة فى واحد دلوقتى اكيد والدته بتدعيله الشخص ده اللى انشاء الله هيكون من نصيبك يا برايد

على فكرة لقب عانس دلوقتى بقى بيتقال على اللى عدت ال 35 يعنى اترفع شوية

محبوبه said...

السلام عليكم ورحمة الله وبركاته
على فكرة يابرايد أنا ما كنتش عارفة حاجة عن المدونات بس لما شوفتك فى دريم 2 فى العاشرة مساءاً عجبيتنى فكرة البلوج وحبيت اجربها وجربتها ومن هنا هتبدأ يوميات محبوبة

Eng.Ahmed Adel said...

انا مش داخل غير عشان اهنيكي بكتابك الجديد الجديد اللي اول مالقيته في سيتي ستارز منور في دار الشروق دخلت جيبته علي طول...
بهنيكي علي اسلوبك.. بهنيكي علي صراحتك.. بهنيكي علي صبرك...
واخيرا ببشرك انك باذن الله قريب ان شاء الله ربنا يقسم لك النصيب في الوقت المحدد ليكي لا اكتر ولا اقل....
وعلي فكرة انا كمان فكرت كتير وانا واقف قدام الكتاب في سيتي ستارز عمال افكر اجيبه ولا لا عشان قعدت فكرت في الناس واللي هاتقوله الناس والقصة دي... لكن في الاخر خدت القرار الصح وجيبت الكتاب وفرحان اني جبته وفرحان بقصة نجاحك ادبيا التي اتمني ان تستمر ....!

Anonymous said...

بصراحة دى اول مرة اتعرف على المدونة دى وشدنى ليها الاسم كنت عايزة اشوف هم اللى نفسهم يتجوزوا زيى قد ايه على فكرة الموضوع مبقاش بالنسبة لى احلام وردية واسرة سعيدة والكلام الحلو ده الموضوع بالنسبة لى بقى حالة احراج شديد جدا باقصى درجات الشدة بقيت باكره كسوفى لما حد يعرف انى 32 سنة ولسة انسة مع انى جامعية ومش وحشة قوع يعنى وباشتغل واتخطبت 3مرات لكن مفيش نصيب 0 معلش قلبت بغم انا اسفة لكن حاعمل ايه بقى انتوا اللى قلبتوا علينا المواجع

ا لـمـــتـــمـــر د said...

كل اللى عاوز اقولو
ان كل الكلام اللى كتبتيه
مهم جدا
واستفدت كتير
وابتسمت كتير من اسلوبك

http://360.yahoo.com/profile-Wdphau85er8_.sM3NpAJvYR9

Omda said...

انا عملت مدونة مخصوص علشانك وسميته عمدة البلد ممكن تقولى رائيك فيها _Omda

Anonymous said...

m_على فكرة انتى دمك زى الشربات

Anonymous said...

عندما ترفق البنت عدد من المتقدمين لسوء حالتهمالاجتماعيه ثم لا يتقدم احد بعد ذلك بتحس ان العمر بيجري خصوصا ان زميلتها في مثل سنها اتجوزافتدخل في حاله من العزله و الاكتئاب
تلك حاله نعيشها الان

ابوضيف said...

ggggggggggggggggggg

DR/adham serage said...

عزيزتى برايد
السلام عليكم ورحمة الله وبركاته
أنا عندى ليكى حل عبقرى عمره ما خطر على بالك ويحل مشكلتك تماما وفى خلال أيام ويخليكى انت تجلسى وتحطى ص ب 45 بتاعك فى وش وفى قفا الجميع وتملى شروطك كمان عارفه ايه؟ مش الحلقه الجايه لا تحت

الجرااااااااااحه وتحولى هتبقى راجل ميه ميه ولا الحوجه للجمعيه لا معدشى فيا لا فراخ ولا حتى بيض

lonly said...

انتى بنوته زى العسل ربنا يحميكى

مصطفى كامل (مصرررررى قووووى) said...

الف مبروووك على التوقيع ولو انها متاخره حبتين ونفسنا نقول مبروك على العريس ولو انها مش امله قوى عملية الجواز دى
مصطفى كامل

Anonymous said...

ان راي لو احنا اتعملنا مع الجواز علي انه وسيله تجمع بين اتنين مش حقول لازم تكون بينهم قصه حب فظيعه بس علي الاقل حاسين انهم بيكملوا بعض وممكن يكون ليهم مستقبل كويس مع بعض مش مجرد غايه الواحد عايز يوصلها وخلاص بغض النظر اذا كانت الجوازه ده حضيفله شي في حياته او حتاخد منه راحه البال كلمه اخيره اوعوا تتعاملوا مع الجواز بالطريقه ده عشلن ما تندموش بس بعد فوات الاوان وقد اعزر من انزر

Amr said...

لا حول ولاقوة إلا بالله, ما هذا الذي أقرأ!!!

وماهذه النظرة المختلة المنتشرة بين الفتيات عن الزواج وأنتظاره!!!
والله لا أجد خيرا مما قاله الدكتور أحمد عبدالله حفظه الله عن هذا الامر, أنصح الجميع بقراءته

http://www.maganin.com/queries/queriesview.asp?key=4804

وهذا بعض مما قاله:
--------------
ا زالت الفتاة عندنا تعتقد أن الزواج هو الانتقال إلى مملكة هي فيها الملكة المتوجة، وأن الزواج هو الأمان وهو الاستقرار والإشباع الجسدي والروحي، وأن الزواج هو زوج يدللها، ويحملها ويحمل عنها، ولا يخنق تحركاتها، وهي ما زالت تنتظر الوسيم المؤمن الكريم ابن الأصول الذي يعرف قيمتها ويحفظها ويرعها فيكون لها بالنهار حارسا، وخادما يدبر شئونها، وبالليل سميرا ومؤنسا، ولا تفكير ولا تكوين لديها حول ما ستقدمه هي في مقابل هذا، وأحيانا تعتقد أن مجرد حفاظها على بكارتها يعدل هذا كله، ويستحق مقابله خدمة الحارس، ورعاية المسئول، وتوفير الأمن والحماية والرعاية والنفقة والعلاج مما لا تقدمه أية دولة غنية، ولا أي نظام إنساني، أو حتى خرافي أسطوري!!!

وكل فتاة ترى نفسها جديرة بهذا، وليس أقل، جديرة برجل لا تشاركها فيه أخرى، فليس في العبد شركاء، وإلا تشاكسوا!!! وهي تريده كل الوقت حاليا، وكل العمر، أي إلى الأبد!!

ومجتمعاتنا البلهاء ـإلا ما رحم ربي ـ تجلس متحسرة لأن الملايين يتأخر زواجهم وزاوجهن، والطلاق صار مثل إشعال سيجارة أو إطفائها!! والجميع يعيد إنتاج تلك التطلعات الساذجة!! والجميع حزين ينعي الحظ العاثر، ويرجو الأقدار الرحيمة أن تتدخل، ثم لما تتأخر يسخط ويتبرم ويدخل في خناقة معلنة أو مكتومة مع الرب جل وعلا لأنه لم يكن به رحيما!!

وكل هذا باطل من أساسه، بل ليس له أساس، وبالأحذية ينبغي أن يداس!! ولكن من يجرؤ على المساس بصنم؟!
هذه التطلعات الوهمية من كل جنس تجاه الآخر باطلة، والاحتجاج بالقدر على بؤس أوضاعنا الاجتماعية باطل لأن هذه الأوضاع من صنعنا نحن حكومات ومجتمعات وأفرادا، ويمكننا تغييرها طبعا، شريطة أن نكف عن لوم القدر الذي ترتكب باسمه الجرائم، ونترك الكوارث تقضي علينا!!

Anonymous said...

الحقيقة دى اول مرة اطلع على المنتدى ده
انا شابة جاوزت العشرين بثلاث كنت متخيلة ان حياتى ومصيرى هيقف من غير راجل يعنى بمعنى اصح كنت بكره اروح أى مناسبة عشان نفس السؤال الرخم " لسه مفيش حاجة ، ربنا يعدل لك يا بنتى
واتخطبت واتحققت امنيتى بعد كده اكتشفت ان كل ده كان وهم اتفرض عليه حاجات كتيييييييير مكنتش أصلا فى بالى اتحرمت من كل تقريبا بحب اعملها كله تحت مسمى واحد فقط انا مقبلش خطيبتى تعمل كده مبقاش فى خروج وهوه اصلا مش فاضى لى لما كل شوية بسأل نفسى هما الناس وانا كنا مستعجلين على ايه ولا هما مكبوتين وكانوا شايفنى سعيدة فقالوا يحبطونى ويخلونى زيهم وادوق المر عشان ميبقاش فى اى حد احسن من التانى
وبسسسسسسسسسسسس "

بكنك لدولتشي said...

وانا بقطرا كاد الدمع
يستل منا امام تلك الكلمات العظيمه
فكم فخورين بك

بكنك لدولتشي
http://hawaa.alnaddy.com/article/26268