Monday, July 23, 2007

من هنا و هناك...من دلوقتي و زمان

السلام عليكم...اشكر جدا يا جماعة كل الناس اللي بيسألوا عليا لما باغيب ..و يقعدوا يقولوا ..انتي اتجوزتي يا برايد؟..ألف مبروك..مش هتعزمينا..أحب أشكرهم جدا لتفاؤلهم المتواصل و أعتب عليهم لأنهم كل ده و لسه مافهموش سيكولوجية برايد-حلوة سيكولوجية دي أكني مثقفة و بتاع-انتوا يا جماعة مش عارفين اني فضاحية حبتين و لو حصل و اتخطبت و لبست دبلة في ايدي اليمين او الشمال أو حتى خلخال نحاس في رجلي هاعمل مدونة مخصوصة و اسيبلكم لينكها و أكتب فيها كلمة واحدة



اتخطاااااااااااااااااااااااااااااااااااااااااااااااااااااااااااااااااابت



لكن للاسف لسه ماحصلش...المدة اللي فاتت دي كانت عندي حالة اكتئاب على خفيف..عادي يعني كنت نايمة مرة باليل صحيت الساعة 3 الفجر و قعدت أبص للسقف و إكتشفت في اللحظة دي ان بأه عندي 28 سنة و 7 شهور..يعني كسرت ال28 و دخلت بخطى ثابتة و إصرار لا يتزعزع على سنتي ال29..حد هيقوللي و انتي اول مرة تاخدي بالك..أقولكم آه و الله...ساعات الدنيا بتلهي و الواحدة مابتركزش..و فجأة تخبطك الحقيقة على دماغك...شوية

panic attack.


على حبة ضربات قلب سريعة و ضيق تنفس..ورسم قلب و حبايتين اندرال 40 مل


و اهي عدت والسلام..عادي بتحصل معايا مرة كل 6 شهور أو حاجة زي كده..يتهيألكم بأه اني باهرج على طول وضربه الدنيا بالكوتشي..لكن على مين الميكروباص الداير لابد من خبطه..والا كان الحجر الداير باين..المهم يعني فيه حاجة بتدور و لازم تتخبط


في عز إكتئابي وقعت في إيدي أجندة كنت باكتب فيها زمان أيام الكلية..و زمان دي طبعا ما خففتش حالة الإكتئاب لأنها فكرتني اني متخرجة من الكلية بقالي 7 سنين و دخلت الكلية أساسا من 12 سنة يعني أياميها كانت روبي عندها 11 سنة و نانسي 12


و أليسا 45..ياااه ده عمر...ماعلينا ..قعدت أقلب في الأجنده..كان فيها جزء يوميات ..حاجات عبيطة كده من عينة..النهاردة و انا باولع الشعلة في معمل الكيميا حرقت طرف الطرحة بتاعت علا ..كويس انها ماخدتش بالها الا و احنا في الميكروباص و كويس كمان ان الراجل اللي كان قاعد وراها كان مولع سيجارة و لبست فيه...أحسن.اهو خد جزاؤه عشان يحرم يدخن تاني


صفحة تانية..النهاردة وانا في معمل السموم و باحقن الفار بمحلول يا إما ماء و ملح يا إما سيانايد..الإبرة دخلت في بطن الفار و طلعت من ضهرة و دخلت في صباعي..يا ترى إيه أعراض تسمم السيانايد؟...ربنا يستر


يعني ..كانت معظم الصفحات عن حوادث لطيفة زي دي..في جزء تاني من الأجندة كانت الأوتوجرافات..للذكرى الهباب و أيام العذاب..تذكريني إذا لاح لكي نسياني ..عمر اللي فات ماهيرجع تاني..و الكلام الفارغ اللي مالوش معنى ده



في الجزء التالت بأه كانت القصايد...آه أصلي أنا كنت شاعرة زمان..يعني مش شاعرة قوي..بس لو كنت قابلت شعبان عبد الرحيم أياميها كنا هنعمل شغل زي الفل


الأول كانت مرحلة الفصحى و كانت اولى قصائدي قصيدة"قطرات المطر تتساقط" و دي كتبتها في لجنة الكيمياء العضوية بعد الخيمة اللي بنمتحن فيها ماتقطعت و المطر غرقلي الورقة و بهدلت الدنيا لغاية ماجابولي ورقة تانية و بدل ما أعمل فيها زي ماعملت في أول ورقة و أسيبها فاضية كتبت فيها القصيدة العصماء دي و شيلت عضوية أياميها عن جدارة و استحقاق..بس واضح ان القصيدة عجبت الدكتور شمس..لأنه إداني ض بس...بدل ال ض.ج


و اشتهرت في دفعتي لدرجة كبيرة جدا..و من كتر قصايدي الناحجة و المشهورة و اللي ادتني اسم ووزن وسط زمايلي في الدفعة ..مرة واحدة صاحبتي طلبت اني أكتبلها قصيدة تديها لواحد تاني من زمايلنا..تقريبا كده كانوا عايشين قصة حب و اتفركشت..و انتوا عارفينني أحب قوي أخدم في الحالات اللي زي دي


البنت كانت في سكشني و كان اسمها غادة البنت دي كان بيجري وراها كتير لحد ماكبلنت مع الولد ده..شوية كده و بيبو فرقع جيجي و اداها وش خشب ماحصلش..البنت جات لي منهارة و طلبت مني أكتبلها قصيدة تعرفه مقامه و تفكره هي مين..فانفعلت قوي قوي و ادتلها قصيدة باعتبرها جوهرة العقد في تاريخي الشعري كله


ألا تعرفني حقا..........إنني أنا المدعوة غادة


ذات النصائح..........و المواعظ و الإفادة


.لكل من هجره حبيبه.....لكل من جرح فؤاده


لكل من أراد يبكي...و أراد أن يشربها سادة


بعد حديثي اليه يضحك...يخرج يشربها زيادة


و مع ذلك لم اعي شيئا...لم اجني أي إستفادة


فوقعت في شباكك صيدا....كالبلطية أو البياضة


و جعلتي في الليل أبكي...أغرق بدموعي الوسادة


فكان حبك مثل جون...أخرجه الحارس في الإعادة


لكني اليوم استعدت نفسي...فاعلم وافهم يا حمادة


لن يكون قلبي يوما...تحت قدميك سجادة



برايد---1998



يا سلااااااام ..ايه الحلاوة دي..إزاي واحدة موهوبة في الشعر زيي كده تخلت عن موهبتها بالسهولة دي...المهم غادة صاحبتي ادت القصيدة دي للولد من هنا...حول صيدلة بني سويف تاني يوم..صحيح هي كانت فضتله عجل عربيته 3-4 مرات و جرحتهالوا مرتين تلاته و كانت تديله 420 ميسد في اليوم لحد الواد ماطفش لكن لازم برضه القصيدة أثرت ماهو كلام زي الرصاص



القصيدة التانية بأه دي كانت في مرحلة العامية..و الله انقلبت على ضهري من كتر الضحك...يخرب عقلك يا برايد اكن الموضوع كان في دماغك من أياميها..و قلبك كان حاسس بكل اللي هيجرالك..كأني لابسه نضارة معظمة و بابص بيها على المستقبل


اتفرجوا اتفرجوا كنت كاتبه ايه؟



أنا مش عايزاه فارس أبيض ...يركبلي حصان والا حمار


أنا مش عايزة حلاوة هيثم ..ولا عضلات عبد الجبار


ولا عايزاه حالم ورومانسي و يحبني ليل ويا نهار


أنا عايزاه متربي وواعي...يقدر يشاركني الأفكار


***


شوفتوش حاتم.....جالي بهانم...طلعت مامته جايه معاه


يوم ماخرجنا...طنطنا فتنه...ماسكه في ايده و موش سايباه


جابلي هدية قلت الله...قال ذوق ماما حماها الله


قلت لا يمكن تاني أستحمل ..و طلعت أجري بالمشوار


أنا عايزاه مترستأ واعي يقدر يشاركني الأفكار


***


شفت أسامه..قلت يا ماما ..بأه معقول كل دي عضلات


كات خروجتنا..لازم تخلص..بالشلاليت ويا روسيات


قلت له لأه ..ده ليلة الدخلة..لازم في الكراكون هنبات


قلت لا يمكن تاني أستحمل..ده مش راجل ده جرار


أنا عايزاه متربي وواعي يقدر يشاركني الأفكار


***


أم جه أمجد..قلت أتأكد..قبل ما أغرق في التيار


قاللي يا عمري..طريقي و قدري..و قعد ينظم لي في أشعار


قلت و ماله..ده يحسسني...اني أميرة ليل و نهار


بس زهقت..افلام وأغاني..و كلام فاضي مالوش أسعار


قلت لا يمكن تاني أستحمل..انا كده حاسة اننا بانهار


أنا عايزاه مترستأ واعي يقدر يشاركني الأفكار



برايد-1999



---------------------------------------------------------------


p.s


i wanna thank ms.alison dunham for accepting my apology for using a copyrighted photo from her site http://advicesisters.net as my profile pic..& i wanna repeat that i didn’t know it was illegal to do it..& i assure her that i didn’t mean any harm

101 comments:

Anonymous said...

انا سعيده انى اول واحده اعلق مع انك فعلا عندك حق يا برايد وقلبتى علينا المواجع احنا فعلا عمالين جرى ونلهث ومش حاسين بالوقت خالص وحاسين ان مش حنلحق فى الوقت الضيق دا اننا نعمل اللى عايزينه وفجأه بنصحى نلاقى العمر جرى بينا واحنا مش حاسين ونسأل روحنا ممكن ييجى اليوم اللى نبطل فى اللهاث اللى احنا فيه ونهدا ونستمتع بجمال الدنيا ونتأمل فيه من غير ما نفكر فى همومنا ومشاكلنا 000 اممكن

Michel Hanna said...

يخرب عقلك يا برايد
تخيلي موضوع السقف ده بيتكرر معايا كثير قوي اليومين دول؟
الظاهر اني مش لوحدي اللي السقف بيفكره بالمشكلة دي؟
بس إيه العلاقة القوية بين مشكلة الجواز والسقف؟

ftataljanna said...

سبحان الله

ايه ده يا بنتى

يعني حتى مش تكتبى انا خايفه اتاخر فى الجواز او مايجيليش عرسان لا كتبتى اللى بيحصل لك فعلا انه هايجيلك عرسان مش مناسبين
سبحان الله


برايد
صدقيني كل حاجة وليها ميعاد
مفيش حاجة بتيجي قبل ميعادها

اصبرى على ما ربنا يبعتلك الاستاذ مجهول اللى يملى عليكي الدنيا هنا ان شاء الله

ما تفقديش الامل عادى يعني انا اعرف ناس متجوزين وهما فى سنك واعرف ناس اكبر منك وما اتجوزوش عادى يعني اللى بقى الطبيعي ان البنات يتاخروا شوية على ما يتجوزوا

بس كنت عايزة اقول لك حاجة يا برايد حاولى تقربى من ربنا

Anonymous said...

قربى من ربنا and pray alot
good luck

دنـيـا محيراني(ايناس لطفي said...

انا قعده اضحك مش قادره امسك نفسي معلش يا بينتي فرجه قريب جدا جدا

mary victor said...

آه يا أوختشى جيتى على السقف، سورى الجرح..
ضحكتينى ضحك رهيب و على فكرة الصورة الأولانية كانت أحلى بكتير و معبرة، سيبك من الولية دى لا تعتذرى لها و لا بتاع، صورة السايت بتاعها وحشة أصلا اساسا يعنى.

Qabbani said...

تحياتي

الله يجبر بخطرك يا برايد و يبعتلك ابن الحلال يلي يقدر يشاركك الأفكار

اول تعليق لي عندك :)

و فعلا الله يرحم ايام الدارسة

Anonymous said...

لا!
لالالا!
لالالالالالا!
إليسا 57 سنة؟!
بيجاااااد؟!
لا!
والله؟!
*******%$#%$#%^&*&)^
هه..

الحاجة التانية، القصيدة بتاعت غادة وحمادة اسمها واسطة العقد مش جوهرة العقد لذا لزم التنويه :P

لا بس إشطة..بجد موهبة عالية :D

BaTresYa said...

هههههههههههههههههه عسل بجد والله القصايد دمها خفيف وزي العسل...بصي الواحده تقعد من غير جواز احسن ما تتجوز واحد مش يستاهلها ويعذب فيها وتنتهي بالطلاق...وإنتي عارفه عندنا لقب عانس أحسن من لقب مطلقه...تيب استني احكيلك على حاجه...واحده قريبتي كانت رافضه الجواز..وكانت عايشه حياه الفري...خروج وسفر وشغل...وبدأ تقل العرسان لحد ما انقطعوا...سافرة إيطاليا تشتغل هناكـ ...وقابلت واحد اسكتلندي وحبته...واتجوزته وهي عندها 31 سنه
وأسلم علشانها...يعني النصيب لما بيتأخر ...بيجي يعوض عن التاخير...تفائلي خير :)

friend said...

ازيك يابرايد
انتي طلعتي شاعره ملكيش حل يابنتي وساكته علي نفسك ليه كده بس حرام تدفني الموهبه بتاعتك تحت التراب
وتقعدي تغني ظلموه

بقولك حقيقي الصوره بتاعت العروسه اللي بتشد شعرها احلي بكتير من العروسه بتااعت البروفيل
تحياتي

شقاوة شعب said...

تعرفى يا برايد انا كمان بيجينى الاكتئاب ده كتير قبل عيد ميلادى
اصلى كان نفسى قوى اقف عند 19
بس ربنا ماارادش
يالا الحمد لله

بس ايه الاشعار الحلوة دى
وخاصة اللى بالعامية
بيتهيألى كنتى هتعملى دويتو مع شعبولة يجنن

فى القلب said...

يعنى يابنتى أيه 29ولاحتى 30 ما فيه بنات كتير أكتر من الهم على القلب أتجوزت
وأطلقت ومعاه عيال فى الضياع طبعا أنتى جدعه أنك رفضتى ناسى هما دلوقتى بيطلقو ستات وفأت بيهم هروبا من كلام الناس
برايد
الناس كده كده مبترحمش
أنتى دلوقتى أحسن من ملايين كتير
ده كفايه السخريه و خفه الدم
دى لوحدها نعمه كبيره

بنت القمر said...

على فكرة موضوع السقف دا ممكن يجي لك وانتى متجوزه برضه وتقولى انا عمرى بيتسرق منى الساعه ما بتوقفش بعد الجواز..صدقينى عن تجربه كل مرحله ولها جمالها

NilE_QueeN said...

مدام مش لاقيه نصيبك ف الجواز دورى عليه ف التأليف

بس قوليلي ياختشي
هو انتى ف خلال فترة دراستك خرمتى كام فار؟؟

Layla said...

دة انت شاعرة جامدة جدا

اقولك...اكتبي قصيدة من قصائدك العصماء دول لاي راجل واكيد حيطب على طول

Anonymous said...

ا انت على كدة يا برايد دمك خفيف من زمان..قصايدك دمها خفيف وانت عسولة مووت
عايزة أقلك ما تزعليش يا برايد ان الوقت بيعدي ولسة ما لاقيتيش الانسان المناسب لأن ده أكيد أفضل من انك تدخلي تجربة فاشلة وتعيشي حياة مش حاباها
انا اعرف بنات مكملتش 20 واتجوزت وخلفت بس مع الاسف كارهين حياتهم وكتير نصحوني ما استعجلش اللي ايده في المية مش زي اللي ايده في النار وإسالي مجرب بدل ما تجربي وتندمي ..كل واحد وله نصيب مكتوبله مستعجاليش ومتندميش بكرة ييجي الشخص المناسب اللي تقضي معاه حياة جميلة
وربنا يوفقك ويوفقنا
متتأخريش علينا يا قمر

حـــــدوتـــــة said...

اول حاجة حمد الله ع السلامة وحشتينا اوى و يا ريت كمان ست شهور ماتجيش حالة الاكتئاب تانى عشان ماتغيبيش عليثنا , على فكرة انتى موهوبة بجد فى الشعر و لو عندك كلمات تنفع اغانى يا ريت تبعتيهالى انا ملحن من اسكندرية , مستنى ردك

Anonymous said...

طيب انا ممكن أخلصك من المشكله دى و اتجوزك

بس ممكن صوره الأول ؟؟

:)

Anonymous said...

يا حبيبتشي يا بنتشي ,تعرفي يا لذيذة أنا على طول باقرا كلامك بس النهاردة قررت أكتبلك عشان مسيتي مشاعري بالذات في الشعر وقررت أبعتلك أشعاري تباعا .
لأن دي نقطة مشتركة بيننا خصوصا لو شعبولا غنى أشعارنا هي هي هي.
ودي حاجة عالماشي كدة

أحبك تبقى هادي
وطبعك موش عنيف
تتعشى بالليل زبادي
والصبح بيضة ورغيف
..............
أحبك تبقى رايق
ونومك موش خفيف
تصحى الصبح فايق
وتبتدي التنضيف
............
وصباح الفل يا برايد
مارجريتا

الباحث عن الحقيقة said...

احيانا يا برايد احس ان انتى مش عايزه تتجوزى

وقاعده تعدى فى ايام عمرك زى عداد الكهرباء

واضح انك خايفة تتجوزى احسن تفقدى هواياتك وتسليتك الوحيده
وهى انك تتريقى على حالك ووضعك وتقعدى تحسبى ايامك اللى مرت

انا شايفه مدونة واحده عايزه تتجوز

تمتلك مواهب كتيره وجميله ..انما واضح انها بتهدريها من اجل شئ هو اصلا قسمة ونصيب

سيبيها على ربنا

بلاش تشغلى دماغك اوى كده احسن يجرى لعقلك حاجه

حاولى تحفظى قرآن ..تقرى فى كتب السنة ..تقرأى عن الصحابيات
اشغلى وقتك بالخير ومساعدة الناس

بدل ما تقومى الساعه 3 الفجر تبصى فى السقف

قومى بصى فى السما

ربنا بينزل فى ثلث الليل الاخير

قومى اتوضى وصلى احسنلك

بكره العمر يجرى وتلاقى نفسك قدام ربنا

ابقى قولى انا عملت مدونة اسمها عايزه اتجوز

محمود على said...

الله عليكي

Anonymous said...

سققف يراقبنا كما نراقبه
اجندة من ايام الجامعة
ابيات شعر خالدةوحب يخرجه الحارس ف الاعادة
كيف لم تحصلين ع جائزة وزوج يا برايد؟
او لماذا؟
يمكن عشان طلباتك صعبة ؟
حد يفكر في واحد يشاركه الافكار انتي فاكرة نفسك ف المعمل ولو عايزة تتجوز واحد من لجنة السياسيات بتاعة فكر جديد ؟
فكري ف واحد يشاركك في دفع الفواتير& وتحضير السفرة مش يشارك التفكير هو في حد بيفكر دوقتي اساسا؟
بس بين وبينك شعرك اثر فيا وفاكرني بالذي ماضي حيث الفت في مطلع شبابي وتاثرابتحية كاريوكا قصيدة مطلعها
هشك هشك هشك هشك
وانا مش ممكن ابد اغشك
وعندما وجدت صدا من الطرف الاخر اللي هي نسرين طبعا مانتي عارفها الفت قصيدة
استك استك استك استك
واللي بحبه قلبه بلاستك

اما البيت بتاع حبك مثل جون اخرجه الحارس ف الاعادة فقد اعجبني جدا ولولم تقولي انه من تاليفك لظننت انه من تاليف امير الشعراء محمد شوقي بتاع الاهلي
وربنا يرزقنا ويزقك بانصاصنا التانية

خيرالدين said...

يعنى انتظارنا طلع بفايده كبيره

واكتشفنا موهبه جديده

emos said...

begad el she3r gamed moooooooooooooooooooot

mateb3ately wa7ed men dool l 2ahl 7'ateby el sabek keda nedala3hom beh shewaya:)

begad talama 3andek el mawheba sally wa2tek w 2ektebeklna tany la7san tedee3 w ndawar 3aleha mesh keafay el 3ersan day3een handaya3 el she3r kaman

Noony said...

يا سيدي يا مترستأ وواعي انت
اية الجمال دة كله

تسلم إيديك
بس القصيدة العامية معبرة أوي وتمشي معانا كلنا

دة انتي طلعتي كارثة بجد
:)
نوني

Abeer said...

ههههههههههه

والله تحفة بجد الاشعار ديه
ولا سيد حجاب في زمانه
وعجبني الموقف بتاع علا اوي
دا احنا بنعمل اكتر من كدا

ربنا يرحمك من بصة السقف يا بنتي

Anonymous said...

برايد حبيبتي حاسة بالاميك واحساس الوحدة والخوف من المستقبل لما يجي للانسان مرة واحدة
حاولي ياقمر تبدلي فكرة الجواز بفكرة تانية

ياريت يابرايد لو تبدلي الصورة وتخليها عروسة محجبة:))

سكينة said...

الحزن يبدأ كبيرا ثم يصغر ولكن اليأس يبدا صغيرا ثم يكبر
فهل أنت حزينة أم يائسة
؟؟؟
عدم الجواز على فكرة فيه منافع كثيرة مشكلته بس أنه مخالف للتوقعات ومحتاج رواد يا رب ما تكوني منهم
بلاش من حكاية حساب الأيام والشهور تاثيرها وحش فعلا وغالبا العدادات صيني ومضروبة كمان
:)
ستبقين سعيدة بإذن الله مهما كان حالك

Anonymous said...

أزيك يا برايد
هههههه تحفه يا برايد مواهب فظيعه ما تسكتيش على نفسك والله يا زمن لا بأيدينا زرعنا الشوك ولا روينا بجد بجد الكلام ماشى مع بعضه وبعدين انتى مكشوف عنك الحجاب بركاتك .. بس معرفش ليه أنا دايما مقتنعه أن ربنا بيشيل دايما الخير والأحسن لكل واحد أن شاء الله اكيد ربنا هيرزقك باللى يقدرك ومش مجرد جوزاه والسلام زى ما ناس كتير بتعمل
بوست جميل تحياتى
نرمبن

мσнη∂ιš said...

ايه ده يا شيخة، يا رب تديها على فد نيتها

شمعة أمـــــل said...

انتى زى العسل يا برايد ويارب اشوفك عروسه فى الكوشه وجمبك عريس فلقه قمر وربنا يسعدك ان شاء الله

Anonymous said...

مش انا قلت لك الصورة اللي فى الاول احسن واحلى

ياريت ترجعيها يا برايد
دي كانت احى بكتير


بحبك مووووووووت كتير بحبك
الله يكرمك بعريس احسن منو ما في
ويوعد الجميع بالخير يا حق

تحياتي الك

Anonymous said...

بحبك اوىىىىىىىىىىى يا برايد


انا بالرغم نمه عمري 21 سنة بس برضه كتير بتفاجأ انو السنين بتجري

الله يوفقك حبيبني


بكرة الله يعطيكي كل اللي فيه الخير
الله كريم وانتي بتستاهلي كل خير


رانيا

Anonymous said...

الا قوليلي يا برايد هي عرفت انو حطى الصورة بتاعتها مننين

ازاى عرفت الموقع بتاعك؟



حبي لك

توتة

Shower-Mirror said...

ازيك يابربر

سيبك انتى ....... احلى حاجه الاعتزار اللى فى الاخر ده !!! المحترم محترم برضه

تحياتى


طبعا وقت سعادتك لا يسمح بزيارة مدونات الناس البيئه اللى زى حالاتى .... براحتك عالاخر

Ihab said...

المحترمة / برايد
أول حاجة قرأتها لك البوست السابق "كيف تصطاد عريس " ولقيته هايف كدة ومش عارف بصراحة حسيت إنه لاذع وماقدرتش أبلعه مع إنه والله مش وحش بس أنا يمكن كنت مش في الفورمة.
البوست ده جذبني أكتر - يمكن يكون أقل جودة من سابقه بس دا اللي حصل.
فكرتيني بأيام الكلية وموضوع الطرحة اللي وقع عليها مادة كيميائية حصل معايا ولكن مع تفاصيل درامية شوية إن أنا كنت في معمل الكيميا في هندسة عين شمس - إعدادي طبعا - وكان حمص كبريتيك مركز ووقع عل جيبة واحدة زميلتي ولكن الحمد لله هيا كانت مدياني ضهرها فعملت بقعة وبعد شوية لاحظت إن الجيبة إتخرمت - كانت البقعة تحت الركبة والحمد لله - والأهم إنها لم تلاحظ ففضلت أنا في أمان ولم أجرؤ علي التحدث معها حاكم محسوبك كان - ولا يزال - قفل بعيد عنك. ومابعرفش أتعامل مع البنات إلا كما أعامل الأولاد تماما يعني راجل لراجل. حتى لما إتجوزت فضلت حمار - عفوا قصدي غشيم وكمان وش كسوف. والحمد لله على كدة. أما فيما يتعلق بسنك فهو معقول وفيه بنات كتير من نفس الشريحة . بس معلش عندي سؤال ولو بايخ: هل إنت إتقدم لكي عرسان قبل كدة ورفضتيهم أو زحلقتيهم؟
--
نفسي كمان تتكلمي في موضوعات غير الجواز
مثل العولمة والعراق وإيران والنظام السياسي في مصر والفقر والغنى في مصر.
ولك التحية والتقدير
إيهاب

Ihab said...

انا رجعت وقرأت الشعر بصراحة حلو بس هايف.
برايد أنا خايف أقوللك إنك ثروة قومية لتتغري في نفسك بس واضح التمرس من أسلوبك ويا ليتك تنوعين كما سبق وقلت لك. مع أرق تحياتي. إيهاب

سكوت هنصوت said...

برايد
عذرا للمقاطعة
نحتاج الى رأيك ودعمك في حملة القضاء على المخدرات انتظرك هناك
www.tw3ya.blogspot.com

Rushdy Kamel said...

على فكرة دي اول مرة ادخل هنا
بس عاجبني جدا البوست ده
وكوميدي جدا
انا ضحكت كتير
والقصيدة التانية عاجباني جدا
انا ممكن اكون فئة جديدة خالص
مفكر ورومانسي ومش بتاع ماما ولا حاجة بس معهوش فلوس ... ينفع ؟؟؟

تحياتي ليكي

shirry said...

يخرب عقلك دي قصايد دي
وساكتة علي نفسك ازاي يابرايد انتي لازم تعملي ديوان شعري يعني هما اللي عاملين دواوين دول احسن منك في ايه؟
علي الاقل شعرك كله واضح وصريح وماشي مع بعضه
بس عسل يغرب عقلك

انا مستنية قصايد تانية

صاحب البوابــة said...

ارجو ان تنضمى الينا في حملة ( افضحوا تجار الكيف )

التفاصيل في مدونتي

سأنتظرك

Anonymous said...

بجد يا برايد كل مرة أقرا بوست جديد ليكى بكون محتار أضحك من اسلوبك الرائع فى الكتابة ومواقفك
ولا أزعل على الحال اللى معظم البنات والولاد فيه
ربنا يوفقك

Mohamed Kamal Hassan said...

بجد مش عارف أقولك قد إيه مبسوط من مدونتك اللى عرفتها بالصدفة
بقالى 3 ساعات تقريبًا بقرا فيها لغاية ما خلصتها
أنا زعلان إنى معرفتش المدونة بتاعتك من زمان
الحقيقة متعة كبيرة
واستفادة أكبر
حسيت بكلام كتير كتبتيه
وبكلام كتير ماتكتبش
شكرًا

Anonymous said...

hi there
first of all : i don believe in love, sex , mariage , attraction .... etc
but ur writings made me laugh like crazy .. so i just had to tell ya .. : thaNKIES :]
hey , visit my WLS .. click my name .. okie ?

Anonymous said...

والله يا برايد انتى عسل من العيار التقيل
ربنا يكرمك يا رب وافرح بيكى يا رب

الكلام نوعان :كلام فارغ وكلام مليان كلام فارغ said...

ايه يا بت يا برايد الشاعريه اللى انتى فيها دي
بجد والله انتى خساره في اى راجل والله
ادب خفه دم شاعريه كمان
سيبتى ايه للبنات التانيه يا جميل
تحياتى

Anonymous said...

هو على ايامكم كان فيه موبايلات عشان صاحبتك تدي مسدات لزميلكم اللى قلبها؟

سؤال غلس....عارف


صباحو ابيض

والسلام

wanna b a bride said...

dado

الجري ساعات بيهون المشاكل

يعني حاجة تشغلك عن مشاكلك و تخليكي ماتفكريش فيها على طول

لحد لابنا مايفرجها

المهم ان الجري ماينسكيش نفسك و العنر يسرقك
------------------------
ميشيل حنا

السقف حضرتك بيمثل المكنون المعنوي للحيز الداخلي الفارغ داخل كل شخص سوي يبحث عن ذاته المفقودة

أظن كده وضحت
----------------------------
ftataljanna

شفتي

عندي بعد نظر فظيع أنا

كان قلبي حاسس باين

ربنا يستر على اللي جاي

من غير توصية طبعا كلنا بنحاول نقرب من ربنا

يارب يتقبل منا جميعا الأعمال الصالحة
-----------------------
lara

شكرا على النصيحة و الأمنيات
-----------------------
دنيا محيراني

إضحكي اضحكي
ماحدش واخد منها حاجة
------------------------
blanila

السقف ده فردمهم جدا في حياة كل بنت

الصةرو الأولانية أحسن آه
بس ياختي مش عايزة مشاكل

الست الأمريكانية دي أصل لسانها طويل حبتين
-------------------------
maqabbani

ان شاء الله مايكونش آخر تعليق

و اديكوا بتشاركوني الأفكار

على ما اسمه ايه ده يجي
--------------------------

wanna b a bride said...

إرحم دماغك


واللههي كانت اسمها واسطة العقد؟

و الله كويس انك فكرتني
أنا فاكرة اني اخدت حاجة زي دي في تالتة إعدادي

و تالتة إعدادي دي كانت من زماااااان

إليسا بأه

بلاش نتكلم عن الست و هي مش موجودة
ربنا يسهل للجميع
-----------------------------
batresya

الحمدلله أعطتيني بعض الأمل

يعني لو مالقيناش في رجالة مصر
مازال هناك امل في أبناء سكتلندا المغتربين في إيطاليا

و اهو ينوبنا ثواب دخولهم إلى الإسلام
---------------------------
جزر

و الله المواهب عندي كتير

بس مين يقدر

سبع صنايع زي مابيقولوا

انتوا على فكرة هتخلوا عقلي يوزني و أرجع الصورة تاني

بس حد فيكم يعرف محامي؟
---------------------------
شقاوة شعب

الإكتئاب ده صديقي من زمان

و تحسي كده اننا اخدنا على بعض

و متهيألي هي دي الحالة مع بنات كتير

فين طريق شعبولا

لو حد يعرفه يقوللي عليه

دانا عندي ليه شغل ماحصلش
----------------------------
في القلب

الحمدلله على نعمة السخرية
لو الواحد ماقدرش يسخر من نفسه في بعض الأوقات

كان طق من جنابه

بالنسبة للإختيار بين القعدة الى مالا نهاية و الطلاق

مش عارفة الغجابة ايه؟

ممكن أستعين بصديق؟
--------------------------
بنت القمر

كل مرحلة و ليها جمالها و حلاوتها

المرحلة دي حلوة قوي بس انا نفسي ماعت

نفسي في حتة جبنة
أو زلعة مش
---------------------------
nile queen

أدينا بندور

في أي مجال

يمكن ربنا قاسملنا الخير بعيد عن الجواز

ربنا يسهل

الفيران اللي اتخرمت كتير

بس هما اللي كانوا يستاهلوا
ماكانوش بيثبتوا و هما بياخدوا الحقنة

ياللا

أذكروا محاسن موتاكم

wanna b a bride said...

marvel

مش كده و النبي

بس هو فين العريس اللي بيفهم في الشعر؟
-------------------
rana

أنا شخصيا من زمان
و شكرا ليكي على الكلام الحلو

و انا لو عايزة اتجوز و خلاص على يدك طنط حشرية كانت نفسها تخدم بعنيها

لكن انتظار الشخص المناسب هو اللي معطلني

تحياتي ليكي يا قمر
----------------------
اسكندرانية

انت كده هتخليني أشحن بطاريات الشعر تاني

و ابتدي أكتب من جديد

يمكن يبقالنا نصيب في الشغل مع بعض
-------------------
anonymous

طب و صورتك انت فين؟
------------------
مارجريتا

ايه ده

داحنا طلعنا زملاء في مدرسة شعرية واحدة
و الله مستوى الشعر باينه هينتعش في البلد

تحياتي
-------------------
الباحث عن الحقيقة

بكره العمر يجرى وتلاقى نفسك قدام ربنا

ابقى قولى انا عملت مدونة اسمها عايزه اتجوز



بكره انت تبقى قدام ربنا

و يقوللك اتهمت واحدة انها مابتعملش حاجة لربنا في حياتها

ابقه قول لربنا..أصلي عارف كل حاجة في الدنيا عن كل الناس و مكلف اني احكم عليهم


ربنا يسامحك

----------------------------
محمود على

الله يخليك

wanna b a bride said...

ساعد نسرين الأيمن

انت ماتعرفش البيت بتاع الجون ده تعبني أد ايه

ده لوحده أنا باعتبره مدرسة شعرية و رياضية جديدة في نفس الوقت

و مافيش حد يقدره غير الناس الشاعرية الرياضية اللي زيك

قصائدك واضح انها ذات حس مرهف..و طبيعة رومانسية جارفة

ادتني أمل في رومانسية شباب مصر

كلامك القديم لسه قائم؟
عليك و على الميل
-----------------------
e7na

وما خفي كان اعظم

و اللي يعيش ياما يشوف

و الله المواهب كتيره

بس اللي يقدر
:)
--------------------
emos

بلاش أهل خطيبك السابق

اوعدك اكتبلك حاجة لأهل خطيبك الجاي

يارب مايبقاش فيه مشاكل

بس الأمر برضه مايسلمش

احاول أدور جوايا على الموهبهالشعرية اللي ضاعت مني بسبب السنين و العاهات

تحياتي
-------------------
noony

من بعض ماعندكم يا جميل

القصيدة العامية دي كل اما حد يقراها يحس انها بتتكلم عنه

انا هسميها
شعار الجيل
--------------------
abeer

سعيدة جدا ان الأشعار عجبتك

خلاصة تجربتي من قبل ماتبدأ

علا..ربنا يستر و ماتكونش بتقرا دلوقتي و تعرف ان انا اللي حرقتلها الطرحة

السقف ده مطير النوم من عيني

ماينفعش يعملوا أوض من غير سقف؟
------------------------
جنان

بحاول اهه أشغل نفسي بحاجات كتير
لحد ماربنا يهديه و يجي

لو عندك صورة حلوة لعروسة محجبة ابعتيلي و انا احاول اغيرها
-------------------
سكينة

لسه لم اصل لمرحلة اليأس بعد
فأنا لا أقنط ابدا من رحمة الله
شكرا ليكي

الباحث عن الحقيقة said...

مش اتهام يا برايد

انا بس كنت عايز ألفت نظرك للاهتمام بموضوعات تانية

عايزين نشوف الجوانب التانية غير واحده كل همها تدور على عريس

وباقى كلامى كان نصيحة

انما مين اللى قال ان فيه بنت بتسمع نصيحة او تقبل نقد

كل نقد بتفتكره اتهام

انتى حره

بصى فى السقف براحتك

اقعدى كده منتظره فارس الاحلام قال يعنى انتى الاميره

برضه ده مش حكم ولا اتهام

فيه ايه يا برايد

احنا هنقضيها كده ولا ايه

اعملى مدونات تانية اتكلمى عن الناس واحساسك بيهم

الناس التعبانه والشقيانه

ربنا مديكى موهبه فى الكتابه

استخدميها بشكل افضل

لان كلنا محاسبين

يلا ..كلامنا بيزعل ..علشان علشان بندبدب فى الكلام على حسب قول البعض انما عذرنا اننا بنتكلم بنية صافيه اصلا انما اللى يفهم ..بنى آدم او بنى آدمه فى زمن اعتاد النفاق؟!!!!!!!!!!


ييييييييييه

سامحينى

شكل وجودى هنا كان غلط من البداية

اعتذر

وانسحب

Anonymous said...

الباحث عن الحقيقة


كل واحد يعمل مدونة على كيفو.... يعني الواحد ما عندوش المقدرة انو يلم بجوانب الحياة كلها

بعدين ده جانب صغير من حياة برايد وبتتكلم عنه ...يعني مش معنى الكلام ده انو حياة برايد فاضية وما فيش وراها الا الجواز


زي مثلا الشاب السعودي اللي كان عامل مدونة اسمها رحلة البحث عنها...كان فى المدونة دي عامل خطة للبحث عن فتاة احلامه...مش معنى الكلام ده انو سايب شغله وقاعد يدور وبس او انو حياتو شخصية ....هو بس عايز يكتب وبس

ريـــانه said...

ههههههههههههههههههههههههه

القصايد تضحك بس جميلة بجد

المدونة كلها جميلة وفكرتها حلوه

ربنا يرزقك الزوج الصالح

Samir Saad said...

انت تجنني بجد. ايه الشعر الجميل ده؟ قصدي القصيدة التانية طبعا. الاولى متهيألى خلت الواد يحس ان صاحبتك عبيطة

برايد انت من نعم ربنا على البشر. بجد حر مصر يهون علشان خفة دمك.
انت اللي يعرفك يدمنك

Anonymous said...

http://www.tesettur.info/balagelinlik/bala-gelinlik11.JPG

http://www.tesettur.info/balagelinlik/bala-gelinlik3.JPG

http://www.tesettur.info/balagelinlik/bala-gelinlik9.JPG

ودي شوية صور ان شاء الله يعجبوكي

سلام

الطائر الحزين said...

السلام عليكم
المشكلة ليست فى الزواج المشكلة فى من هو الزوج
يعنى لو لقيتى الزوج المناسب ممكن يكون هو بيدور على الزوجة المناسبة

تحياتى

Dental said...

موضوعك جميل و مؤثر

الموضوع الوحيد الي قرأته من ساعتين و انا اتصفح المدونات

زوي مدونتي
http://dental-q8.blogspot.com

ROMANTIC ROSE said...

دلوقتي بس انا فهمت مشكلتك .. انتي يا بيضه بتدوري علي شئ خرافي .. عايزه عريس راسي و مترستأ و كمان يشاركك الافكار .. لا حول ولا قوة الا بالله .. يا بنتي عيشي عيشة اخواتك و اصحابك من جنس البنات .. انتي هتتشرطي ؟؟

انتي عارفه ايه العامل المشترك بين السوبر مان و الصعيدي الذكي ؟؟ ان الاتنين قصة خرافية .. اللي طلع النكتة دي نسي يضيف ع السوبر مان و الصعيدي الذكي الراجل اللي يشارك ف الافكار .. احنا يا حبيبتي سلو بلدنا راجل يفرض افكاره و بس .. لكن يشارك دي مش موجودة .. ماشي ؟

اذا كان عاجبك الوضع علي هذا الاساس كان بها .. لو مكنش عاجبك يبقي كولون من مني روح لحاله .. ماشي ؟

ملحوظة .. مع الاعتذار للصعايدة لانهم اجدع ناس :)

Anonymous said...

برايد اسمحي لي ان ارد ع الباحث ع الحقيقة عشان كلامه ضايقني جدا ومش قادر اخد عليه اوكسجين

الباحث عن الحقيقة
كلامك المني جدا لانه وبصراحة كلام سخيف جدا جدا
انت عايز برايد تمشي ع مزاجك ؟؟
بتفهمها تقول ايه لربنا لما تقابله؟ ؟
شوف اولا العلاقة بين العبد وربه علاقة شخصية جدا مش ينفع حد يتدخل فيها ابدا
عايز تنصحها ؟ باسم الدين مثلا ابعت ليها ايميل لان النصحية ع رؤؤس الاشهاد فضحية
عايزة حد يتكلم ف القضايا والمشاكل والوطن والبتجان الاسود
ما تتكلم انت
ليه عايزها تمشي ع مزاجك
احنا كلنا اللي بنجي لهنا بمزاجنا عشانها
عشان عايزنها كده وهي مش طالبة منا غير كده شوف وائل عباس عامل ايه ف مدونته
صعبان عليك مواهبتها ميصعبيش عليك غالي ابقي بس انت استغل مواهبتك كويس عايز تنسحب ومتيجش هنا تاني ؟
انت الخسران والله وبراحتك بس فكر هتلاقي كلامك هو اللي جارح انا مش بحب حد عادي يقسم درجات الناس عند ربنا عشان مفيش حد دوقتي شغال مع سيدنا جبريل
وبعد والله برايد بكتابتها ديه ادخلت السرور ع ناس كتيرة وفرجت كربات ناس كتير وانا اقسم بالله واحد منهم
فيجي ان تقدرها اعمال اكتر من كده وربنا يسامحنا ويسامح برايد ويسامحك

Eric Matt said...


ااااااه انت تقريبا جالك الهامي اللي الهم كاتب القصيدة بتاعت بحبك يا حمار

عموما

الله يصلح الحال يا رب

ويرزقك من وسع ونفرح فيكي قورايب جدا

:))

تحياتي لك من ماناساس البلد

CHICO said...

تهنيتى على المدونه الذيذه دى.. واسمح لى بان اكون من زورها الدائمين.. وان يبقى الحب بيننا

دلال said...

يا عمري الكآبه ما تييك أبدا وتعيشي أيامك سعيدة ومستانسة،، أعذريني دي أول مشاركة ليه عندك بس من جد حبيتك من قلبي أحسك قريبة ع القلب..
القصيدة ال بافصحى حاجة عجيبة مرة شكرا كتير لأنك شاركتينا بيها. كمان أحييك على الدفتر بتاع الكلية دة من أروع الأشياء اللي بفتقدها وأتمنى لو سويت مثلها..

سبتك بعافية :)

Anonymous said...

على فكرة انا اول مرة ادخل الموقع بتاعك واول مرة اعلق بس بصراحة انتى لذيذة احساسك اللى انتى حاسه بيه كتير بنات عايشه نفس احساسك ده بس انا متاكده من حاجه ان كل شى بيجي في الميعاد اللى ربنا محدده لينا اللي شايفه ان ده انسب وقت ليكي وعلى فكرة محدش بياخد كل حاجه واكىد ربنا هيكرمك بزوج يقدرك على فكره انا لسه صغىره بس مش قوى هما 19 سنه بس وربنا يوفقك

Anonymous said...

dear bride,
as lways you are funny, and you really are dealing with a very serious issue for millions of people in the best way one can.

i was dissapointed by (albaheth 3an alhakika) remarks..
ithink ya "bahith" that there are enough people writting about politics and religion nearly 79.999.999.00 and we need different outlet so please leave bride alone...

i salute you bride for the excellent work and you should publish more of your poetry.

Anonymous said...

انتى مش ممكن قاعد اضحك مش قادر

Doba said...

عندى تاج تعالو جاوبو عليه - يلا بسرعة قبل مأى حد يسبقكم

مستنياكم
هبة

momken said...

يعنى بتكتبى شعر....مع شديد الاحترام للشعراء دى كامن طايشه طيش شباب ياباشا متخدش عليه دى كانت لسه بنت خماشر تباشر سنه
الله يخليك يا استاذ نزار قبانى سمحها

ماشى يابرايد بتكتبى شعر بس كده انتى بتصعبى ماموريتى ياريتك كنتى بترقصى كان زمانا خرجين نزغرت من بيتك على بتاع الدهب الى عالى الناصيه
الواد وديع الصايغ الشهير بوديع الحرامى

هههههههههههههه
تحياتى

soosa el-mafroosa said...
This comment has been removed by the author.
soosa el-mafroosa said...
This comment has been removed by the author.
wanna b a bride said...

nermeen

ماتخافيش يا نيرمين انا مش هاسكت على نفسي

مانتي شايفه اهه هو انا فادرة امسك لساني و اسكت
رغي رغي رغي

اما نشزف اخرتها معايا

ربنا يرزق الجميع بالخير ان شاء الله
-------------------

ssi lmohandis

يااااااااارب

----------------
شمعة امل

ربنا يخليكي يا شمعة

ربنا يسمع منك

---------------
anonymous

حاااضر

معلش يا جماعة كان ضروري التفاوض مع الأمريكان
وانتوا عارفينهم مملين و يومهم بسنة

الحب متبادل اكيد يا جميل

------------------
رانيا

و انا كمان بحبك أويييييييييييييي يا رانيا

ربنا يخليكي على الكلام الحلو

ربنا يوفق الجميع للخير ان شاء الله
------------------
توتة

انا عارفة يا توتة

المريكان دول عليهم حركات

قال ايه الصوة في جوجل و هي متابعه كام واحد بيدخل الموقع

الست فاكراني باكسب من وراه فلوس باين والا ايه؟

------------------
shower-mirror

يا مرحبا بالناس اللي بتغيب

الإعتذار واجب و الا انت عارف...القنابل الذكية عدل

انا باجي المدونة على طول طبعا

كده تظن كده باختك الصغيرة برضه؟

wanna b a bride said...

ihab

اشكر ليك حضورك

و على فكرة كل اللي باكتبه غالبا زي ده

يعني اذا كنت شايف انه هايف و ليس له اي هدف

يؤسفني اني ضيعت وقت حضرتك

و مش عارفة منين كتابات هايفة و منين ثروة قومية

الا اذا كان المقصود تريقة

!!!!!!!!!!!!!

شكرا ليك على كل حال
----------------------
sokoothansawat


شكرا على الدعوة

و تسعدني المشاركة
------------------
big code

اهلا بيك

و ان شاء الله ماتبقاش آخر مرة

و ماتقلقش في كتير معاك في الفئة دي
واخويا اولهم

يعني مش فئة جديدة ولا حاجة
------------------
shirry

اييييه؟ماها القصايد؟

أنا طبعا هاعمل ديوان شعري مشترك انا و اسلام خليل اللي بيكتب لشعبولا
عشان احنا تقريبا في مستوى شعري واحد
------------------
صاحب البوابة

شئ يشرفني

وانت عارفني
انا لو اعرف اقول على طول
-----------------
محمود

نضحك..طبعا نضحك يالا نضحك

على رأي الأغنية بتاعت محمود يس

------------------
mohamed kamal hassan

شكرا ليك على احساسك الجميل

و سعيدة اكتر ان ك حسيت الكلام اللي ماتكتبش

اهلا بيك دايما

wanna b a bride said...

the lotus flower

سعيدة ان المدونة عجباكي

ليكي عندي زيارة قريبة ان شاء الله

--------------------------
myself

الله يخليكي
و يكرمني
عشان خاطرك بس
--------------------
الكلام نوعان

سيبت للبنات التانية

العرساااااان

يارب يكرم الجميع
----------------------
ahmad hendy

بسم الله الرحمن الرحيم
الإجابة

دخلت أجهزة المحمول كلية الصيدلة في العام 1998
ووقت ذهاب الطلبة و الطالبات و عددهم 200 الى رحلة القصر و أسوان
كان يوجد معهم 6 موبايلات منهم موبايل الطالب حمادة و موبايل الطالبة غادة

و السلام عليكم ورحمة الله و بركاته
------------------------
الباحث عن الحقيقة

حصل خير
و عموما كل واحد حر في راية
شكرا على كل حال
----------------------
anonymous

لافض فوك
----------------------
ريانة

سعيدة انها عجبتك

يااااااارب

تحياتي

يا مسافر وحدك said...

لحد ما كبلنت مع الولد ده
هههههههههه..انتى بتجيبى الالفاظ دى منين هى الصيدلة بتاعتك فى الكبلنه
عقبالنا يا رب لما نتكبلن احنا كمان
ههههههههههههه
واخيرا احب اسمع احلى سلام :الطشت قلى الطشت قلى

wanna b a bride said...

samir

أمال لو كنت كتبتلكم بأه قطرات المطر تتساقط

هي دي اللي ابداع بجد

أكيد الدكتور شمس لسه محتفظ بيها

شكرا على الكلام الحلو

تحياتي
--------------------
جنان

شكرا ليكي يا جنان

-------------------
الطائر الحزين

لو لقيت الزوج المناسب هيكون بيدور على الزوجة المناسبة

اللي هي انا

----------------------
dental

شكرا ليك
سعيدة انه عجبك

ليك عندي زيارة قريبة
ان شاء الله
-------------------
romantic rose

و الله يا روز يا حبيبتي

انا مش قصدي انه يشاركني الأفكار بدل مايفرضها عليا

انا قصدي انه يكون بيفكر أصلا
مش سايب حمل التفكير عليا و خلاص

بس ده برضه بعد الغول و العنقاء و الخل الوفي

رابع المستحيلات
-----------------------
ساعد نسرين الأيمن

ايه ده

مستشار بجد و الله

هو ده العشم برضه

انا كده اطمنت على مستقبل قضية الطلاق المستقبلية


لأ بجد
شكرا ليك
أيوة كده الواحد يحس ان له عيلة تقف جنبه في المدونة
------------------------
the groom

بغض النظر عن كل حاجة

انا عجباني
"قورايب"
دي جددددداااا

:))
تحياتي

wanna b a bride said...

ابقى الحب

شكرا ليك

و اهلا بيك على طول
-------------------
دلال

يا أهلا باهل السلطنة

سعيدة جداجدا بزيارتك

و سعيدة اكتر ان المدونة عجبتك

تحياتي
لكل اهل السلطنة
------------------
jasy-1988

ربنا يكرمك ان شاء الله

و حقيقي على رأيك

كل شئ بمعاد

تحياتي
---------------
dc

شكرا ليك على دعمك
ايوة كده الواحد بقاله عزوة
حتى لو في دي سي

و سعيدة ان التدوينة عجبتك
هحاول أدعبس على شوية شعر من بتوع زمان

او ارجع اشحن البطاريات
و اكتب تاني
------------------
doba

ان شاء الله

و لو اني ماليش في موضوع التيجان دي

------------------
momken

و الله صحيح؟

فعلا الرقص بيجيب نتيجة أحسن من الشعر

طب مش كان حد يقوللي

ياللا بأه مش مهم

أهم حاجة انصحوا الجيل الجاي عشان مايغلطش غلطتي

Fatema said...

انا كنت بسمع عن مدونتك كتير يا برايد بس الصراحة اول مرة اخش
انا شايفة ان السبب اللي بيخلي مشكلة لعنوسة تتفاقم عند البنات هيا نظرة المجتمع
لانو بيبقى بيبصلها انو اكيد البنت دي مش حلوة او فيها حاجة بتبعد عنها العرسان على الرغم انو ممكن تكون الحقيقة انها بنت قمة في الاخلاق وكويسة جدا لكن اللي بيتقدمولها مش مناسبين
لو المجتمع اتخلى عن نظرته دي هتكون مشكلة العنوسة اقل وطأة والبنت هتقدر تتأقلم مع الواقع وتعيش حياتها وتستغل فرصة انها فري ومش عندها مسؤليات كتير
حاجة كمان ليه احنا بنبص لكل حاجة في الحياة على انه قسمة ونصيب ونيجي عند الجواز ونظرتنا تتغير
بس بجد انتي بتعبري عن بنات كتير اوي وكمان شاعرة جامدة

حبة حاجات (ايمان) said...

لااااااااا الــــــــــــــــــف سلامه عليكى يا برايد من الاكتئاب
انا بس نفسى محدش يعتل هم السن ولا العمر
احنا البشر لينا مقاييس ومعايير انا مش فاهمه مين اللى حطها
الغريبه انها بدات او فعلا مشيت خلاص فى عروقنا وبقى فعلا فى عاداتنا وافكارنا
الدور والباقى علينا بقى اننا نحاول نعالج الفيروس دا
وهو فيروس الخوف من العنوسه

Ihab said...

برايد ..
أرجوكي تسامحيني فأنا لا أقصد الإهانة مطلقا وأنا والله أحترم جميع الناس .
بس معلش على الكلام اللي زي الدبش حاكم أنا أصلي صعيدي - بعيد عنك - والأصل غلاب.
أنا إتعودت أقول رأيي بشفافية وموضوعية. أنا أقصد هايف بالنسبة للمشاكل الموجودة على الساحة الآن. لكن دا ما يمنعش انك عندك قدرة إحترافية على إدارة وإخراج الموضوع. مرة تانية أرجوكي ما تزعليس مني .
ولك التحية
إيهاب

Yasmine Adel Fouad said...

يخرب بيت عقلك
:)

بس حلوة اوى مذكراتك فى المعمل
انا الحمد لله كنت حنينة ع الفيران و الضفاديع
دول عشرة عمر برضه

بس انتى طلعتى بتشرى موهبة
ليكى وحشة و الله

زى الهوا said...

دمك سكررررررررر و بلوجك حلوووووو مووووووووووووووووووووووووت , شوفيلك حل بقىىىىىىىىىىى

Anonymous said...

الاخت الفاضلة
طبعا انت ممكن تزعلى من كلمة الاخت كنت تتمنى كلمة ثانية بس حظك انا متجوز وعندى عيال
المهم
مدونة جميلة وموضوعات شيقة سررت بزيارتها واتمنى دوام التواصل
كل الشكر لك

عمر عاشق القرآن said...

انا مش عارف واحدة دمها زى العسل كده متجوزش لحد دلوقتى ازاى

طبعا مش محتاج أقولك قد ايه شعرك جميل بس فكرتينى بالذى مضى .. اصلى برضه كنت بكتب شعر زمان وبعدين جمعته كله وولعت فيه حرصا على البشرية من اشعارى

يلا متيأسيش
ودمتم بطاعة الله

wanna b a bride said...

شيكا بيكا

الكبلنه دي نظام معمول بيه في كل كليات الصيدلة

انت بس اللي ماتعرفش
-----------------------------
fatema

أهلا بيكي يا فاطمة
ان شاء الله تيجي على طول

صحيح هي دي نظرة المجتمع

و المشكلة نغيرها ازاي

تحياتي
-----------------
إيمان

الفيروس منتشر

و هياخد سنين و سنين عشان يتعالج

ده اذا اتعالج أصلا
------------------
ihab

حصل خير

سلامي لكل الإخوة الصعايدة

احسن ناس
----------------
أنا حرة

ربنا يكتر من أمثالك
من أجل خاطر الفيران و الضفادع

حلوة بتشري دي
:))
تحياتي
------------------
زي الهوا

طب و أشوف الحل ده فيييييييييييييييييين

أهلا بيكي على طول
:)
------------------
حسن توفيق

و مين تكره تبقى أخت لناس محترمين؟؟

اهلا بيك على طول
-------------------
مشروع بطل

أنا عارفة

الناس نظرها بأه ضعيف

سعيدة اننا طلعنا زملاء في الشعر

لا يأس مع الحياة و لا حياة مع اليأس

تحياتي

eman said...

اتذكر انى جت لى حالة لما دخلت الثلاثين .. وكأنى اخلص جزء من حياتي ...

بعدين .. جت ال 31 .. وال 32 .. وانا حاليا داخلة على ال 33 .. وعادى .. هى بس السنوات ام الأصفار اللى تمخول الواحد شوية !
الباقى يصير مجرد عدد


من فترة .. لقيت رسالة كنت كاتبتها لصديقة لى ولم ابعثها .. .. وكنت اقول لها بأنى قلقلة لأنى وصت ال 25 ولم اتزوج بعد !!! واله ضحكت على نفسى .. وقلت .. طيب ولو عرفتى يوميها انك وصلتى ال 33 وما تزوجتى بعد ! راح تقولى ايه !
..............

من فترة كتبت موضوع فى مدونتي .. عن خكاية تأخر الزواج .. بس ما كان من النوع الساخر .. لأ كان من النوع اللى يكون طالع من القلب ..

ومحيته ! عشانى ما كنت اريد أحد يدخل ويقول لى (الله يعطيكى) او (النصيب جاي) او اى من نوعية الردود الكثيرة التى ارى بعضها هنا


انا لا اعتقد انك تكتبين عشان اللى يقرأ يقولك استنى نصيبك جاى .. او الله يرزقك .. او .. او ..

انما وكما هو مكتوب فى تعريف مدونتك (انا امثل 15 مليون بنت)
.......
شفت ان واحد من الردود يطلب ان تكتبي عن السياسة !

ليش يعني ... هى الناس ناقصة سياسة ولا اقتصاد !

مدونتك من اجمل ما يكون كما هى .. خليها كده ! مختلفة عن كل ما هو موجود

تحياتى

Anonymous said...

من قلبى ... ربنا يوفقك ويسعدك

The Vanity Blog by Ayat Seif Elnasr said...

bride elsh3r elly bl 3amy gamed awiiiiiiiiiiiiiiiiiiiiiiiiiiiiii bgad 3agbny gedan lol ya3ny t7seeh spontaneius awi from heart to heart keda asl ana fal7a w tl3alek,yala rbna m3aky

بنت الاسلام said...

مش ممكن
انتي موهبتك الشعرية جميلة جداا
ان شاء الله
تلاقي الانسان الي يقدرك ويفهمك
انتي مش لازم تكوني لاي حد
لازم فعلا
تكوني لانسان
يقدر يشاركك الافكار

Anonymous said...

ايه يا اخواننا انتواهنود؟ اسف اصدي انتوا مصريين ؟ مش شايفين ان البنت غاده كانت بتدي للواد حماده 420 ميسد في اليوم من 10 سنين ولا 12 سنه هوا كان ساعتها في موبايل اصلا ؟ ويا تري ايه نوع العده بتاعه حماده بوليفونيك ولا ميموري كارد ؟ وبدال ما الواد يحول لجامعه تانيه مكانس ممكن يعني يخلي التليفون سايلنت ولا فيبريشن ؟ وربنا يجعله عامر

mohamed said...

إزيك يا برايد عامله ايه
عجبتني حكاياتك وشعرك الهزلي ولو انه له معاني مؤلمة
أنا مش هضحك عليكي يا برايد لأني كتير زيك .. مع انى شاب لكن فاقد الأمل بالإرتباط اساسا لأن الجيل اللى انا منه تقريبا كله جيل متخلف ساذج
بس هقولك
ماتسافري يا غادة
حاولي تسافري لأن بعقليتك وثقافتك دي كان لازم تعرفي ان مالكيش عيش هنا من زمان
حاولي تسافري بره يا غادة
فيه برة بني آدمين لما بيحبوا بيحبوا بجد
ويقدروا يشاركوكي أفكارك ..
تحياتي لقلبك الطيب

محمد إسماعيل سلامه

toty_toty said...

ياسلاااااااااااااااااااااااااااااام
معاكى حق يابنتى
واهو زمن بيدور علينا

Lobna Ahmed Nour said...

مدونة رائعة لاتمل .. احييكي

Anonymous said...

هههههههههههههههههههههههههههههههههه

والله انتي تحفة
تحفة
تحفة
تحفة
تحفة
ههههههههههههههههههههههههههههههههههه
حاجة عسل ما شاء الله مدية الدنيا صرمة ,بس قولي لي


إنتي إزاي إتسممتي بسيانيد و لسة عايشة :P


ماتبطليش كتابة و إسمحي لي أضيفك في قايمة أصدقاء مدونتي :)

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان