Friday, September 01, 2006

الأول

حلو العنوان كده زي ماكان انور وجدي بيقول في "أمير الإنتقام" ..أصل الموضوع كله أصلا تحس انه فيلم عربي ..بس اول موضوع ده كان فيلم هندي و كوميدي كمان

واحدة صاحبتي كانت لسه متجوزة قريب و كنت لسه حاضرة فرحها من أسبوعين ..أتصلت بيا تطمن عليا يعني ..كنت لسه سامعه خبر ان واحده من أصحابنا جابت عريس لواحدة تانية صاحبتنا برضه ..و ده موضوع يضايق قوي على فكرة ..يعني تفضل الواحده تقول و اشمعنى يعني ماختارتنيش أنا و مش بعيد تقاطعها و ماتكلمهاش تاني أبدا

أنا بأه مسكت صاحبتي اللي كانت طالباني في التليفون و قعدت أرصلها ,,شايفة الصحبات ؟..ماطلعش منك انت حاجه زي كده ..أمال مجوزينك ليه؟ مش عشان تشوفيلنا في اصحاب جوزك والا قرايبه حد ينفع ..و كل شوية صاحبتي دي تحاول تقاطعني و تسدني و انا ابدا منطلقه زي الصاروخ ..لحد ماراحت موقفاني بصرخه ..يابت اسكتي بأه جوزي بيسمع م السماعه التانية و عايز يتأكد انك كويسة و رقيقة عشان جايبلك عريس

و في لحظه واحده انقلبت طريقة كلامي 180 درجه و بقيت أرق من أرق واحده تعرفوها ...انتي صدقتي دانا كنت بهزر معاكي..انتي عارفاني رقيقة طول عمري ..دانا أرق م البت اللي طالعه جديد دي اللي اسمها منى زكي ..و اسمع صوت جوزها يحاول يكتم ضحكة ع السماعة التانية و هي حساها بتجز على سنانها و هي بتقوللي عارفه عارفه هو انتي هتقوليلي

المهم اتفقنا على معاد..و لما اقول اتفقنا على معاد يمكن تعدي ع الرجاله سهلة كده يعني ديتها ايه؟ هيستحمى و هيخلي أمه تغسله القميص و البنطلون و أخته تكويهومله و يشغل كل اللي خلفوه عشان طلعة أهله البهية ..لكن في بيت العروسة اللي هيا المفروض انا ..هيييصة ..غسيل للحيطان ..مسح للأرضية..تنضيف للسجاجيد ..تسييق للسلم..تلميع للكاسات ..تنضيف للستاير و الشبابيك ..و بعد ده كله متوقع من العروسة بعد كل المجهود المقندل ده انها تتزوق و نخش عليهم حلوة و بتبرق ..مفهومه بتبرق دي .. عموما البنات هيفهموا لأنهم عارفين موضوع بتبرق دي بتاخد مجهود أد ايه ...

المهم جه المحروس هو و أهله ..هو دكتور على فكرة ..باضرب بطرف عيني كده لقيته لابس لبس ..يا سلاااام ..زي مايكون لم اللي ع الحبل كله و لبسه على بعضه ..و تقريبا كده ماعندهمش مرايا و شكل أمه و أخته عندهم عمى ألوان..البيه لابس قميص أصفر ..بنطلون أزرق ..بلوفر أخضر ..و فوق ده كله كرافته كده الصراحه مش عارفه أحدد بالظبط لونه إيه..لأ و استنوا ..جزمة بني لما اتجعص كده و حط رجل على رجل بصيت لقيت الشراب نبيتي ...آه و النعمة ..قلت في نفسي مش مشكله بيقولوا الراحل مايعيبوش الا جيبه ..و أهو يبقى عريس تكني كلر زي التلفيزيون الملون ..مشرق كده و مقبل على الحياة...هو صحيح ودانه مخاصمه راسه خالص و سنانه بيحبوا بعضهم جدا لدرجة انهم راكبين فوق بعضيهم ..بس خلقة ربنا يعني ..المهم العقل و الشخصية

أول ما بابا دخل راح واقف ..حلو مؤدب يعني و انطلقت امه تعرفه زي مانكون في برنامج..الدكتور سامي ..علاج طبيعي ..قام هو مكمل التقديم و قايل ...و بقلد فنانين....إيه الهبل ده بأااااه ..هو احنا عاملين برنامج مواهب و الا ده جاي يعمل انترفيو في كبارية..بابا برقله كده و قاله آه أهلا و سهلا اتفضلوا و بص لماما بصه معناها إيه اللي انتوا جايبينه ده؟

أنا قاعده و ماسكه نفسي م الضحك و ده منطلق بيتكلم على صولاته و جولاته في عالم التقليد و احنا قاعدين نبص لبعض و امه شكلها منشكح أوي من كلامه ..و فجأة بص في الساعة و بص لبابا ..بابا خاف ليطلبني دلوقت و هيبقى موقف محرج أول مرة يتعرضله..لكن ده قاله ..عمي ممكن أسألك حضرتك سؤال و تجاوبني بصراحة؟..بابا قاله بخوف كده خير يا بني؟..قاله هو التلفزيون ده شغال ؟..بابا فوجئ كده و قالله آه يابني شغال ..فجأه الحليوة ده راح قايم و فاتح التلفزيون و قعد يقلب في القنوات لحد ما جاب قناه كانت بتزيع ماتش للزمالك..و احنا قاعدين مذهولين و مش قادرين نعمل حاجه و امه قاعده منشكحه زي ما هيا..و هوب و صوته علي ..شوت يا عم ..أيوة كده ..يااااه ..الحكم ده حمار بن كلب ...واحنا قاعدين ..ماما حبت تحرجوا بالذوق كده و قالتله ..و الله يا دكتور انا مش عارفه انت ازاي بتابع الكورة دي اليومين دول ..ده حتى الزمالك بقاله مده مش كويس خالص

الواد فجأة سكت و لف كده لماما بالتصوير البطئ..و عينيه احمرت لدرجة ان ماما كشت في مكانها ..و ده راح رافع الجعورة ..لاااااا ..بقولك ايييييه ..إلا الزمااالك ..اتكلمي براحتك على أي حد ..على امي على أبويا عليا أنا شخصيا لكن الزمالك لألألأ ..فاهمه ..قومي يا ماما ..أنا لا يمكن أدخل بيت الزمالك بيتهان فيه

يابن 60 في 70..أكن احنا معديينلك البلاوي اللي انت لابسها و السخافات اللي عمال تقولها عشان تبقى أخرتها كده ؟....كلنا فضلنا متسمرين مكاننا بابا يبص لماما و مش قادرين حتى يقوموا من مكانهم وانا الأول اتحرق دمي و بعدين وقعت ع الأرض من كتر الضحك..هم يبكي و هم يضحك

الجميل بأه ان صاحبتي جايه تاني يوم تسألني على رأيي قولتلها لأ طبعا انتي بتستهبلي ..و حكيتلها ع اللي حصل..لقيتها بتقول طب و ايه يعني؟ عادي ماتبقيش بس تقوليله انك أهلاوية..و لما أصريت ع الرفض..صاحبتي دي قاطعتني و ما رفعتش عليا سماعة التليفون من يوميها ..إزاي يعني أرفض عريس لقطة زي ده؟

صحيح إزاي؟

84 comments:

Ayyam said...

لا دا حقيقى كان نكته وكمان قليل الأدب ومش جاد, هو واضح أنه واخد فى نفسه مقلب علشان البيه دكتور. طبعاً كويس أنك مرضتيش بالوضع ده, العمليه مش جواز وبس والتسرع ممكن يوقع فى مشاكل كبيره. بس ليه ملاحظات على كلامك : بالنسبه لموضوع اللبس, ممكن الواحد يبقى زوقه هباب ويمزج ألوان الطيف كلها بس برضه ممكن يكون أنسان محترم. خلى بالك النظره الاولى بتكون سطحيه وطبعاً ده مش كل حاجه زى ما أنت عارفه.

أحلى سلامات

lastknight said...

انتى أكيد بتهزرى .. مش ممكن يكون اللى بتقوليه حقيقى .. عموما قصه كوميديه جميله تنفع فيلم..

الأميره أوسه said...

هههههههههههههههههههه
هم دول الرجاله الملونين
لا والبعيد طلع زملكاوى
وجى يتفرج على الماتش وبالمره ياخد فكره عن العروسه
وبيقلد فنانين
مين ده يأ ختشى
يكونش الأستاذ شكوكو
أيوه شكوكو زملكاوى وسمعت أنه بيدور على عروسه
بس أنتى دمك عسل
رجاله معندهاش تذوق خالص
بصى أعملى زيى أى عريس جى بقابله فى مدخل العماره منعآ للأحراج
أو فى جونينة الحيوان جمب قفص النوسناس
قطيعه تقطع حنفى وسنينه
العواف
لو عدى من هنا عريس كروهات أبعتيللى
أأأأأموه

Captain L.J.Silver said...

be3`ad el nazr 3an enno shaklo...
we be3`ad el nazr 3an zoo2o fe el llebs...
we be3`ad el nazr 3an mawdoo3 el koora we el zamalek da ....
we be3`ad el nazr 3an 2ellet el zoo2 we keda....

fa howa sara7a 3arees maytsabsh !!!!

: ))))))))) post gamed !

hebaz said...

Heheh walahi da7aktini ya benti, bas begad law el mawkif dah 7asl fi film el nas mesh 7atsada2 khales , da daye3 , bas 3la el 3oumoum ana lazizt en keteer men el doctors wakhdeen fi nafsohom Box mesh 2alam!!!
we ba3deen bemonasbet el korra , fakartini be wa7da sa7biti khoutobitha kanet ayam the matches of kas el 3alam! so her finacee el beeh khatibha fi west we 3z el khoutouba ra7 2alaha khali balik, el fatra elli gaya mesh 7anshouf ba3d , 2alitloh leeh?
2alaha 3lashan ana mesh 7ab2a fadi, 2alitlo khier? 2alaha 3lashan 7ab2a 2atfarag 3la matchat kas el 3alam fa mesh 7ab2a fadilk
shofto el hanna elli heya kanet fiih?
rigalet akher zaman :S
يلا لينا ربنا بأه

مفلس افندى الرايق said...

اياكم والتسرع وماتعملوش زى اتسرعت وجيبت واحده كولا طلعت عرق سوس
هههههههههههههه

زيارتك لينا هتسر

وسيجارتك مش هتضر

واللينكه اهى عندكhttp://mfaysal.blogspot.com/

وياخويا انت حر

Adel said...

باللله عليكي ده عريس يترفض ولا يتساب يخرج انا لو منك كنت استغليته هو يعني غسيل الحيطان والنضافة اللي حلت على البيت ولا البريق اللي حل عليكي والنضافة حلوة برضة ما يستاهلوش انك تستغلوه لمده عشر دقايق ويقلد لكم الفنانين واهو تبقى طلعتي بحاجة وبعدين ده دكتور علاج طبيعي يعني لا هاتحسي بهشاشة عظام مبكرة ولا خشونة ركب ولا اي من امراض العصر اسمحي لي الفقري فقري اهو كان هايبقى مسلي احسن من التليفزيون انت اللي مالكيش في الطيب نصيب

BackBone said...

لاء بجد صحيح انت فعلاً بتهرجي انك سبتيه يضيع من ايديك من غير ما تخلصي حق تنضيف الحيطان و التلميع (إلا هوه ايه التلميع ده), طب دانا لو مكانك كنت مسكت الحله اللستنلس و طلعت زفيتوه علي السلم و هوه نازل

"خدوه سته رايح خدوه اربعه جي"

littilemo said...

هع هع

Nouran said...

ههههههههههههههههههههههه بجد فيه كده يا نهار ابيض اصل انا معرفش شكل العرسان عامل ايه
بعد كل اللي عامله ده ويطلع كمااان زملكاوي بلا نيلة حاجة تقرف وبكرة يجيلك سيد سيده ع راي سوسة :)
ربنا يكرمك ويفرح قلبك يا رب

3rby said...

انا مش فاهم انتوا ازاي سبتوه يقعد اصلا...كان المفروض تقولولوا ماعندناش زبالة يا زبالة...ده عبيط ده ولا ايه؟؟....ايه اللي لابس بلوفر في الحر ده......عموما انا ليكي عندي عريس لؤطه..........مونجي...بس هو كان مكسوف يقولك...حتي ادخلي البلوج واسأليه

بنت مصرية said...

والله انتى بنت زى العسل.. قولى يا اختى اللى فى قلبك.. احم ، اللى فى قلوبنا
هههههههههههه

صحيح انا حاسه بشىء من المبالغة فى الاحداث والوصف، او بمعنى تانى ثصعوبة ان العلل دى كلها تتجمع فى شخص واحد ومن اول قعدة ، انما بردو برافو عليكى


قوليلى يا برايد

انتى بلوجاوية قديمة ومعروفة وفتحتى البلوج ده بشخصية مبهبه عشان تتكلمى فى الموضوع ده بصراحة؟ وللا انتى وجه جديد فى عالم التدوين؟

أُكتب بالرصاص said...

طبعا مش ممكن نصدق الحكاية دي ، إلا إذا الراوية قالت كده ،
مصدقينك طبعا

بس ده ما ينفعمش يكون إلا جزء من سيناريو لبلال فضل ،


والا أقول ...!! بيني وبينك ومن غير ما حد يسمع

ما يمكن العريس أول ما دخل البيت أ, اول ما شاف العروسة ماعجبوش الحال ، فعمل فيها أهبل .!!!

مين عارف ؟

Gid-Do - جدو said...

عروسة
انا جيت اههه
انا حفترض ان القصة بالتفاصيل دية حصلت حقيقى وبعد حزف الكوميديا ـ اللى انت كنت رائعة فى تصويرهاـ حكتب ملاحظاتى
جوز صحبتك بيسمع على السماعة التانية الحوار بينك وبينها ومن غير ما صحبتك تعرفك ـ اذا دة بيحصل بجد تبقى كارثةـ واذا انتى بعد معرفتى استمرتى بس غيرتى الحديث الى العكس يبقوا كارثتين

وممكن تكون صحبتك وجوزها عملوا مقلب فيكى علشان يخلصوا منك والدليل على كدة انهم قطعوا الصلة بيكى بعدها

طبعا واضح المجهود اللى بيتعمل من البنت واهلها علشان يستقبلوا واحد جاى يتكلم على بنتهم وكمان المصاريف اللى ممكن ترهق ميزانية اى اسرة مصرية

واضح التعالى اللى بيعملوة العرسان وعدم الاكتراث لان البنات على قفا من يشيل

عروسة
سعدت بالحدوتة على انها كوميديا سوداء اما اذا كانت بجد فهذا شئ فظيع لايقبلة بشر ـ لك خالص تحياتى ومنتظر التانى على احر من الجمر وياخوفى يابدران

أم أحمد said...

قال رضينا بالهم والهم مارضيش بينا يابنتي ده لو كنتي اتجوزتيه كنتم هاتبقوا في استاد ربنا رحمك وعلي راي المثل قاعدة الخزانة ولا جوازة الندامة

3rby said...

ماردتيش يعني...ايه رايك في مونجيي؟شاب 16 سنة زي الفل...اسئليه في البوج عندنا وهاتلاقيه متجاوب بس ماتقوليلوش اني قلتلك علشان بيتكسف:=)

Anonymous said...

يا بنتي يا حبيبتي مهم اخترعو النوادي و الفنادق و الاماكن العامه عشان كده
عشان متطلعش روحنا في التنضيف و التلميع و ندفع دم قلوب اهالينا في حلو و حادق و يطلع العريس في الاخر قفص زي اللي جالك و يتحسب عليكي عريس

بعد كده تاخدي مامتك و باباكي لو حبيتي و تقابلي العريس و اهله في اي مكان عام مره و اتنين و عشره
و متدخليهمش من باب البيت الا على قراية الفاتحه يبقى ساعتها يستاهل المصاريف

Mo Eltaher said...

ايه دا؟؟؟ دا بجد
والله انا فاكرها افتكاسه
هههههههههههههههههههههه
ههههههههههههههههههههههههه
هههههههههههههههههههههههههه

She said...

كلامك جه علي الجرح يا اوختي والله

قولي قولي كل اللي عندك

Polka Dotted said...

LOL r u serious ?:D
this is my first time in this blog and i really really loved it... very nice blog
and a3adt ad7ak de7k 3ala el TV dah :D
ana law mennek kont lebestelo zai so3ad 7osny (dana 3amlah b edaia dool)..

admelmasry said...

ههههههههههه
بصراحه انا مقدرتش امسك نفسي م الضحك انتي عالية جدا

خصوصا الجزء بتاع الشقة ده لان انا اختي حصل معاها كده
هههههههه

لا وايه ده نجدنا الانتريه
هههههههههه

مش قادر امسك نفسي والله من كتر الضحك

اصل الخطوبة طلعت فشششنك
هههههههههههههه


بقولك ايه انا مش عارف اكتب اصلا
بصي انا بقي واد حليوة وابيضاني ومهندس مش دكتور
بس عامل دكتوراه

ياعني الاتنين
ايه رايك

انفع ؟





ادم المصري
اول دكتور احه

Anonymous said...

والله كنتي هاتموتيني من الضحك..

واللي يعيش ياما يشوف..أنا مستبعدش على فكرة الحكاية تكون حقيقية، ماحنا ياما شفنا كركترات، وهم يعني اللي بيقلدوا فنانين مش بيروحوا يتقدموا؟
هههههههههههههههههه

Anonymous said...

ايه يا سوسة يا مفروسة هنقلب ليه على بعض محنا كنا حلوين مالهم الزملكاوية بقى عاملين احسن شغل فى الجماعة البلوجرية ههههههه

وبعدين برده الانسة اللى جالها العريس شكله معجبتوش قالك اعمل عبيط واقلد ممثلين وكدا ههههههههه

لأ بس بجد انا لو مكانك كنت لما اقلك بقلد ممثلين قوليله قلدلى دور المشبوه بتاع عادل امام واطلبيله البوليس فى ساعتها واديك ضربتى عصفورين بحجر مشيتى من هنا وزدت السجون بواحد جديد

Anonymous said...

ههههههههههههههههههههههههههههههههههههههههههههههههههههههههههههههههههههههههههههه
انا مش قادر أصدق انا كنت فاكر انك فى الاخر حتقولى أنه بيشتغل فى برنامج الكاميرا الخفيه
والله ممكن تتجوزى بوحه حيبقى أحسن منه برده عايزه تتجوزى شعبان عبد الرحيم ليه؟؟؟؟؟؟؟؟؟؟؟؟؟؟؟؟؟
بس بجد أسلوبك رائع

Anonymous said...

ردا على كزانوفا أحزرك من انك تتجوزى حد بيشجع الزمالك عشان وعشان وعشان
بالمناسبه البقاء لله على موت محمد عبد الوهاب

ROMANTIC ROSE said...

أنا جيت هنا بعد توصيات .. و بجد البلوج زي العسل .. يا بنتي اقلبي اقلبي .. النصيب هيجيلك من حيث لا تحتسبي .. افتكر مره جالي عريس زي الطين و كان "راجل مُبالغ فيه" علي رأي بوحه .. قعدت و اتكلمت معاه و روحت .. كلمت صاحبتي و قلتلها انسي الفكره .. تاني يوم العريس بيسأل جوزها عن رأيي فجوزها قاله مفيش نصيب .. راح قايله احسن برضه انا كنت عايز اقول كده .. ايه رأيك ؟؟
ربنا يتوب علي كل البنات من البلاوي السوده اللي بتشوفها !!

تحياتي يا ست العرايس

Shower-Mirror said...

عايز اقولك انك دمك شربات ... انا بايظ من الضحك ..من ساعة ما قريت كلامك و بالذات الحته بتاعة تقليد الفنانين دى ... طبعا الموضوع خيالى شويه..بس يموت من الضحك .. انما لو كان حصل بجد هازعل منك جدا ..عشان كان لازم الموضوع ده يتصور فيديو !! و تعرضيه على الغلابه اللى عايزه تضحك ... المهم انتى سكر .. اكتبى كتير .. و لازم تيجى تزورينى يمكن اشوفلك عريس ... تشاو

3rby said...

ايه يا عم شاور ميرور؟هانقطع علي بعض ولا ايه...ده مونجيي زي اخوك برضه...ماتخليش البونية تتشتت

3rby said...

انتي مابترديش ليه...زعلتي ولا مكسوفة...؟عالعموم السكوت علامة الرضي..اما اروح بقه ابشر مونجي...شكله كده هايحصل حنفي قريب اوسا

3rby said...

شكلك كده اغمن عليكي مالفرخه...مبروك

KazaBaza said...

بصراحه اذا الكلام ده كله حقيقي يبقي
ربنا يعينك

بس هو عنده سببين ممكن يوصلوه للي هو فيه
الاول دراسه طب بتخلي الناس تلسع شويه
ثانيا و ده الاهم الزمالك و ما ادراكي ما معني ان يكون شخص زملكاوي اليومين دول

نصيحه نجدو انتريه احمر لزوم المواقف دي

أم أحمد said...

انا بعتلك التاج جاوبي عليه

أم أحمد said...

انا بعتلك التاج ياريت تجاوبي عليه

wanna b a bride said...

معلش يا جماعه اتأخرت شوية في الرد

أصل كان فيه موضوع كده و قلت ربنا هيسهلها و أقلب البلوج زغاريط بس النطع اللي كانوا جايبينهولي كان عنده 29 سنة و قال لا يممممكن يتجوز واحده عندها 27 ..و لازم مايتجوزش واحده تكون أكبر من 22 سنة ..مش عارفه ايه الفكرة يعني ..22 طلقة رصاص في نافوخه انشاء الله ..قولوا آمين


ayyam

مانا بلعت موضوع الهدوم في الأول بس الباقي بأه وقف في زوري
------------
سوسة المفروسة

سيد سيده ده اتأخر شوية ..يظهر جاي على رجله
----------

lastknight

و غلاوتك عندي حصل بجد
----------
aoossa

يعني أحجزلك الكاروهات يا أوختشي ..دانا كنت عامله حسابك في الجاكار ..ماشي هاغير الأوردر
---------
captin silver

بغض النظر عن كل حاجه ..تشكر يا كابتشن
--------
epitaph

آه و الله ..بالذمة مش مسلي
-------
hebazzz

هو ما كانش واخد قلم في نفسه ..هو تقريبا حد داس على دماغه و هو صغير
--------
مفلس أفندي الرايق

سلملي على طنط عرقسوس
---------

المزاجنجي

انت مالك متحمس له كده ليه ..شكلك كده كنت بتعمل لخطيبتك فقرة الساحر ..صح؟
---------
الغريب

داهو اللي شاكله كان جاي يكتشفني و نفتح سيرك شركة

----------

backbone

كابتشن ..كابتشن ..انت مالكش اخوات بنات ..ابقى اسألهم لحسن باتكسف

من ناحية الزفه هو الحقيقة ماداناش فرصة و بعدين خفنا لا تطلعلهم مواهب تانية و يلموا علينا الجيران

--------

إبراهيم

ربنا يكرمك يا رب ..يا رافع معنوياتي

--------

wanna b a bride said...

littlemo

ايه الواجهة دي ؟
---------

nouran

ربنا يخليكي يا شابة و يكرمك و ماتشوفيش بلاوي من دي..آمين

-------

3arby

أنا قولتلك هناك عايزة واحد أتجوزة .زيوم ما اتزنق في حد يلعب معايا بلاي ستيشن (تو) عشان ماتزعلش هابقى أقولك

---------

bent masrya

و النبي يا أوختي انتي منوراني ..ايه الخطوة العزيزة دي .. والله هو طلع كده و كان أول عريس في حياتي .. شوفي الصدمة العصبية اللي جاتلي بأه

سؤالك اعفيني أرد عليه ..انت قلبك بيقولك ايه؟

--------


أكتب بالرصاص

إيه ده بأاااه ..احنا هنعك
---------

gid-doجدو

و الله يا جدو هو ده اللي حصل ..فيه تفاصيل صغيرة زياده بس الأحداث هيا هيا...شوفت بأه احنا متبهدلين ازاي؟
----------

sahar

بس انا زهقت من قاعدة الحزانه دي ..ادعيلي ربنا يفكها

--------
bosbos

و النبي يا بسبس ياختي هما اللي طالعنلي في موضوع أنا مادخلش البيوت غير من أبوابها و الواحد مابيحبكهاش يمكن الموضوع يمشي

آه و النبي داحنا بقينا صرفين مصاريف كان زمان الواحده اتجوزت بيها و جابت عيال كمان
---------

محمد الطاهر

لا و الله بجد ..ما هو قليل البخت يلاقي العضم في الكرشة

------

shaimaa

هاقول طول مانتوا بتسمعوا بس لو عندكوا حاجه قولوا انتوا كمان نواسي بعض و البلوج بلوجكوا
---------

batabeet

و الله دانا كنت لابساله اللي ع الحبل ..بس لو كان جه مرة كمان كنت قدمتله سم فران

------

wanna b a bride said...

adamelmasry

مبروك عليكوا الأنتريه يا عم ..تجديد برضه

لو جاهز يا سلام هنلاقي حد أحسن منك يعني ..مهندس و عامل دكتوراه
----------

yahya_ayash

و الله فعلا حصل ..مش عارفه الناس مش مصدقاني ليه؟
---------

كازانوفا

ايه العك ده ..مين دي اللي ما عاجبتوش ..ماشي مانت زملكاوي و تلاقيك بتلبس شراب نبيتي انت كمان

بس لو جيبناله البوليس يمكن الظابط راخر كان طلع زملكاوي و تضامن معاه

-----------

wa3d el_ 3oyoon

حياتك الباقية..شوف انا عامله حسابي زملكاوية لأ..بوحة آه
-----------

romantic rose

والله زمان كنت رومانسية زيك بس عليه العوض بأه ..الراجل المبالغ فيه ده لو دورتي وراه كويس هتلاقيه بيقلد فنانين برضه

-----------
shower-mirror

إسمك مفتكس قوي ..ماكناش لسه جيبنا كاميرة فيديو و الا كنت صورتهولك

هاجي أشوف العريس ..اوعى تعلقني
----------

kazabaza

يعني بلاش بتوع الطب ..ليه دانا و الله بحبهم..طب الزمالكاوية ماشي ..غلابه برضه الله يكون في عونهم

---------

sahar


ميرسي يا حبيبتي ع التاج..انشاء الله هاعمله قريب أول ما اعصابي ترتاح

tota said...
This comment has been removed by a blog administrator.
tota said...

الجميلة

كدت اثبتى عدم خبرتك فى العرسان خالص وكسفتينا قدام الاجانب
اولا: فاتك انه يتعمله كشف هيئة بره قبل ما يجى البيت
ثانيا: فاتك انك تسيبيه يختار المكان علشان اختبارات الذوق الرفيع ومتابعة نظراته للحلوين فى المكان
ثالثا: فاتك تعرفى مدى كرمه يعنى فنجان شاى ونقلب ولا فى كازوزة فى القاعدة
لا تنسى النصائح السابقة ولا تتراجعى وتتأثرى بمدأ اصل لازم ندخل البيت من بابه وعليه لازم الزيارة المنزلية
لان هدف الزيارة المنزلية
اولا:تقييم الحالة الاجتماعية للعروسة ثانيا:توفير مصاريف العزومة بره
ثالثا :مشاهدة التلفزيون مع كوباية الشاى علشان فى كتير معندهمش
تليفزيون فى البيت

وتحياتى يا جميلة وصفك واقعى ورائع جدا

soosa el-mafroosa said...

ايه يا كازانوفا احنا هنسيح لبعض في بلوجات الناس

و بعدين على رأي عمرو أديب ..البهائي مابقاش يتكسف يقول انا بهائي و الزمالكاوي هو اللي بيتكسف

معلش يا سيدي ..ربنا يفك ضيقتكم

المواطن المصري العبيط said...

ظريفة موت القصة، وبصراحة المفروض يبقى ليكي حق تقولي دلوقتي مش عايزة أتجوز

:) تحياتي

admelmasry said...

لا انتي مسكتي في الكلمة ولا ايه انا لسه ادامي عشر سنين

عندك استعداد تستني ؟

Anonymous said...

هههههههههه وربنا يا بنتى كانك كنتى قاعدة معايا فى البيت فى نفس الموقف العبيط دة بكل حذافيره...بس البية بقا كان اهلاوى وماما زملكاوية..شبطوا الاتنين فى بعض...وبخلاف التكنيكلور بتاعك...كان لابس لى كدة اى كلام كانه جاى ومتعطف عليا يعنى ..وكمان ايييييييية؟ مش يلبس عشان خاطرى مثلا كدة شراب جديد؟؟..لالالالا...لبس لى شراب صوباعه الكبير باظظ منه..وان كان عاجبك...
عديت حكاية الشراب..ولهف تلات اطباق جاتوة مع انه مقروض زى البرص الصغنون النونو كدة..وادهم فين ؟ ماعرفش...وشوبين بيبسى..مش باعد علية ولا حاجة يا اختى لكن من الفرسة اللى حطت عليا منهم ومن امه.....ههههههههههه..كلنا فى الهوا سوا

Anonymous said...

اة نسيت اقولك
ان حكاية تقليد الفنانين دى انتى اللى اختصيتى بيها..محصلتش فى السيناريو بتاعى ....لسة انتى اللى محتكراها لدلوقتى

Doaa Samir said...

يا خراااااااااااابي
أنا هافطس على نفسي م الضحك

ايه ده يا بنتي؟
بس تصدقي لو حذفنا الهوامش والرتوش.. أصدق إن فيه ناس كده
!!
تعيشي وعمرك ما تاخدي غيرها أبداً
(((:

high_staff said...

يخرب عقلك انتى كنتى فين من زمان.سعيدة جدا انى عرفتك انتى عسل

BackBone said...

نصيحه من مواطن مصري مبتبهدل ذيك بالظبط

قديــــــــها

انحرااااااااااااااااااااااف


و ابقي ادعيلي

مستنين قصة البوب بتاع ياتجبولي 22 برباط يامش لاعب ده

wanna b a bride said...

tota

كان أول واحد و الله ماكنت أعرف ..و بعدين مش عايزين نوقف المراكب السايرة
---------
سوسة المفروسة

عادي البيت بيتكم سيحوا براحتكم
--------
المواطن المصري العبيط

لأ برضه عايزة أتجوز
--------
admelmasry

ربنا يستر و ماستناش غصب عني
---------
شهروزة

يا شيخة انت كمان ..حلوة موضوع الصباع دي ..طب قولي قولي و النبي نفسي حد يجي يشاركني و يكتب هو كمان ..ده البلوج بلوجكوا و الله

بس كويس انه طفش ..و ده كنتي هتكفيه أكل منين ده؟
--------
red ghost

بخ
-------
doaa samir

و الله حصل ..ادعيلي الجاي يبقى عدل انشاء الله
-------
high staff

انا هنا من قديم الأزل..و النبي انتي اللي سكر
--------
backbone

لو ليه في الإحتراف يا خويا ما كنتش جيت أصوتلكم عشان اتجوز

البيه أبو 22 رصاصة في دماغه ده لسه حكايته قدام شوية فيه كتيييير قبله

sara... said...

ياعينى يا اختشى ده كله حصل...
والله العظيم ليكى حق تتعبى نفسيا ...بس والله الراجل ده ممكن يكون ليه فوائد كتير....يسلى الاطفال لما تخلفو ان شاء الله بوصلات لاسماعيل يس واللمبى وشكوكو..وغيرهم من ممثلين الكوميديا..وكل يوم بعد العشا يبقي فيه فقره فكاهيه..لمحمد نجم او اسمه ايه ده اللى بيقول طلع بطنك برة دخل بطنك جوه ....يلا خد الشر وراح...

Jannah said...

البوست فظيع قرأته لماما و قالت لى ده ما يضجكش يا بت :@

وقعدت تدعيييلك يا رب ارزقها و ابعت لها اللى يستاهلها و فك عنها هى وانتى و كل البنات يا رب

خدتيلك كم دعوة جامدين ربنا يستجيب

فى حاجة انا مستغرباها جدا, ايه موضوع القطع بين الصحاب عشان ما جبتش عريس ده؟؟؟؟؟ ما ممكن صحابك كلهم يبعتو لك عرسان و ولا واحد فيهم ينفع, هم الصحاب اللى بيجوزوا ولا النصيب؟ ولا انتو اصلا مصاحبين بعض عشان المصلحة دى فلما ماتختاركيش تقاطعيها؟

Adel said...

عروستي الجميلة اعتقد ان انا علقت عندك كام تعليق مش مفهومين وكنت شاكك فيكي بصراحة انك واحدة صديقتنا وحبيبتنا اوي وعاملة لنفسك حركةتمويه كده لكن انا حلفتها على الختمة الشريفة ان انت واحدة غيرها وحلفت فانا من هنا ومن موقعي هدا ادعو الله لكي ولكل البنات اللي عاوزين يخوضوا تجربة الزواج ان ربنا يرزقكم بولاد الحلال قادر يا كريم وساعتها هاتقولوا كنت فين يا لألما قلت انا اه ...اه يا لييل اه يالييييل

admelmasry said...

هههههههه
لا وانا ما اردهاش









ربنا يوفقك وتستنيني

wanna b a bride said...

mizo

مااشي يا سيدي ..هم يبكي و هم يضحك
احنا يهمنا بس تبقوا مبسوطين
------
sara

تصدقي فاتني موضوع الفوايد دي؟

ياللا أهو راح هابقى آخد بالي في البلاوي اللي جايه
------
jannah

ربنا يخليكي انت و ماما ..رمضان جاي و النبي خليها تكثف الدعاء
------

المزاجانجي

و الله انت روشتني ..خلتني أشك في نفسي و اللي حواليا و أقعد أفكر يمكن أعرفك و جالي الزهايمر

ادعي كده من قلبك ..يا رب استجب
-------
مداح القمر

يا رافع معنوياتي
--------
admelmasry

ماااشي يا حليوة ..و ديني لو جيت تزحف مانا قابلاك

ماخدوش يا بابا..ماخدوش يا بابا

Anonymous said...

يعني علاج طبيعي وزملكاوي كمان
وبعدين ده مش دكتور ولا نيله والنقابة بتاعتنا ما بتعترفش بيهم وبتقول دول "سنيده" مش دكاتره
بس ايه ياعني اللبس (يعني أنا لو ماما مشافيتش أنا لابس ايه بلبس أعبط من كده عادي يعني)
سيبك انتي بلا جواز بلا نيله مش جايبة همها أصلا

3rby said...

والنبي انتي وشهروزة خايلكوا وااااسع...قال صباعه باظظ قال...هو كان جاي لابس شبشب ولا ايه؟

شيمـــــاء said...

انا لو منك وبأقدم جزمة عندنا فى البيت و على دماغه و دماغ امه

و بنفس الجزمة على دماغ صحبتك و جوزها

فكرتنينى باللى جالنا فى البيت من اسبوعين

رياض القصبجى ولابس طقم شعبولا يجنن
تيجى نبدل

كراكيب نـهـى مـحمود said...

هوه اتجوز ولا لسه
يعني لو لسه قولي لصاحبتك تبعتوا وانا ابعت لك الحلقه التانية من يوميات عريس لقطة
دمها خفيف جدا طريقتك في السرد انا مش عارفه ابطل ضحك لحد دلوقت
كراكيب كركوبة

wanna b a bride said...

خالد حسني

طب ابعت لي يا عم واحد من السنيده دول ..بس مايكنش بيقلد فنانين...قطيعه تقطع الجواز وسنينه
-----------
3rby

يابني دي موضه جديده ..بيقلعوا الجزمه عشان يبانوا نضاف يعني

أمل يعني يبوظوا السوجاده

هي السوجاده دي ببلاش يعني؟
----------
shaimaa

أنا موافقه على التبديل..ده شعبولا ده ..روحي روحي روحي
---------------
كراكيب

كان نفسي أبعتهولك ..بس ماشوفتوش من زمان..شكله كده انتحر م اللي بيحصل للزمالك

Dina El Hawary (dido's) said...

إيه المسخرة دي ... في كده بجد .. أنا كنت قاعدة بذاكر بليل و طبعاً البلوجنج يحلو ساعة المذاكرة ... و انهرت من الضحك لما قريت القصة دي و كنت كاتمة الضحك بالعافية لحسن حد يسمعني !! بجد حاجة تقرف ان تبقى هي دي المناظر اللي عايزة تتجوز .. الجيل القادم هيطلع مضروب قوي
لازم تكمليلنا السسلسلة كلها .. ان
منتظرة
إلا قليلي صحيح ؟؟ معملكوش فقرة تقليد فنانين و هو عندكم ؟؟
Keep the good work my dear bride :):) I fell in love with it !

Anonymous said...

انتي عارفه انا لو مكانك أضرب عن الجواز

ربنا يكون في عونك وعدى الازمه دي على خير

تسلمي

Anonymous said...

والله هتندمي مفيش احسن من دكتور علاج طبيعي وبعدين يا الي اسمك خالد حسني اننت متتكلمش ي في حاجه مش تعرفها ياحبيبي هم دكتر غصب عنك وبعدين انت ازهر اصلا مش معترفين بيكو ياشاطر يا عم روح اتنيل علي لاقل علاج طببعي معاهم فلوس وبيتجوز مش انت تلاقيك مش لاقي اصلا تاكل وهتشتغل اي حاجه

Anonymous said...

انا موش عارف اقول ايه بس انا اعرف واحد صاحبى كان رايح يتقدم لبنت زميلتنا وموش هاتصدقى لو قلتلك راحلهم بالبيجامه زى كأن بيتهم جمب السرير على طول وطبعا رجع بخفى حنين عموما ربنا يكرمك بواحد ابن بلد كده ويكون بيستحمى كل يوم وموش جعان زى بتوع اليومين دول واهم حاجه تكون ريحته حلوه اوكى ربنا يكرمك بس انت ادعى.

صوت فيروز said...

بريد متزعليش. بس بجد انا حاسه انك بتتكلمي عن حكايتي و بتتكلمي باسلوبي . بعد كل واحد ما يجي الاقي نفسي عماله اتريق -شر البليه-بس بحد حاسه انه هو نفس اللي جالي او بمعني اصح واحد من اللي جولي, نفس الطله و كمان يا بريد تحسي انه بالع عروسه او اتنين قبل ما يجي و كمان في كمام الجكته عيلين, الكارثه انهم حسين بنفسهم
يادي المصيبه يكونش هو و النبي يمكن يا بريد ربنا يعينك يا بنتي ويعنا

Anonymous said...

ههههههههههههههههههههههه
نياهاهاهاهاهاهاها
هوهوهوهوهوهوهوهوه
هىهىهىهىهىهىهىهىهى
خخخخخخخخخخخخخخخخخخخخخخ
مش قادره امسك نفسي من كتر الضحك
يالهوى يامه
ايه البلاوى دى؟ بتتحدف علينا منين

Anonymous said...

سلام أختي السكرة ...حكاية مضحكة جدا ولعلمك ان اللبس من دلائل الشخصية وبه تستطيعي تحديد ماهية الانسان وأسلوبه مع طريقة القائه هي ذاته وكما قال الحكماء الانسان مخبوء تحت لسانه ... فالنهاية ان ما تقدم لكي هو ابتلاء بالرجال علشان تعرفي ان كده احسن دماغك فايقه ولسانك بينقط سكر....
كان ممكن انك تلبسي له فانله حمراء وشورت أبيض وتجيبي كورة وتشوطيها في بطنه ... نعم لا يسلم الشرف الرفيع من الأذي حتي يراق علي جوانبه الدم كان معك /دكتور علاج طبيعي بجد ههههههههههههههههه
dr_amgad0059@yahoo.com

Anonymous said...

You are kidding me sa7?? Bigad 3amel kida !!! yanahar abyad!!

Rosa said...

طب هو بجد الي بتحكيه دا ؟؟ يعني بجد بجد ؟؟ طب قولي و النبي ان في حد بجد كدااااا
بس على فكرة انتي الخسرانه , خسرتي ال multy clour system da shofy hat3wdih tany ezai

teef.noor said...

السلام عليكم

انا اول مره ادخل هنا

بس الصراحه دمك شربات وذي العسل واسلوبك ممتاز وبسيط

وبجد مش عارفه لو جالى عريس ذي دا ممكن اطلعه من بتنا على العنايه المركزه ههههههههههههههههههههههه

ربنا يكرمك بالاحسن باذن الله

aboooood said...

أنا مبسوط منك أوي وأنا بقرالك كل يوم باليل علشان أنام مبسوط
و أنا لوعندي إمكانيات الزواج
لأتزوجتك لدم الخفيف حتى لوكنتي راجل
هههههههههههههههههه
وشكرا........

Sarah said...

la2 ezay trfodo...mlhash ha2...de sahbtha de wallahy btsthbel

Biotechnology @ Top said...

با بت انتى اتهبلتى ازاي ترفضي عريس لقطة زي دة
اانا لو كنت صاحبتك مش بس مكلمكيش دا انا اهبدك على دماغك
دا بالالوان يا بت ؟؟ هو حد لاقي عريس بالالوان كمان؟؟؟ ايه العبط اللي انتى فيه ؟؟
دة تكني كلور يعنى الحياة حاتبقى فل الفل واخر حلاوة
يا بت سيبك من العبط اهلاوي وزملكاوي طب دي الحياة الزوجية حلاوتها بالكورة ؟ انتى تشوتيه شويه وهو يشوتك شويه ههههههههههههههههههه
http://biotechnology-4u.blogspot.com/

Anonymous said...

اه يا برايد صحيح انت ازاي ترفضي عريس لقطة زى دة
مش كان زمانك دلوقتي عندك 3ولا 4 عيال صحيح مالكيش في الطيب
بس ولا يهمك الجايات احسن من الرايحات

Unknown said...

بجد انسان عديم الزوق حد يعل كدة ومع ناس اول مرة تعارف مابينهم .
احمدى ربنا والجايات اكتر ان شاء الله
بس اللى انا شايفه ان البنات مسروعة على الجواز وانها تلبس الفستان الابيض بس المشكلة انها مابتكونش عندها دراية بالموضوع كله او انها متجاهلاه انا بتكلم على المسؤولية انها تبقى مسؤلة عن بيت وزوج واولاد فلازم كل واحدة يكون الكلام دة حاضر فى دماغها لان الموضوع مش مجرد فستان وكوشة
وتمنياتى لكل واحدة انها توفق لشريك حياتها والسعادة الابدية

Stella De Mare said...

فكرتينى بعريس جالى كان عامل شوربة الخضار دى بردو اعد 4 ساعات يرغى لوحده عشان مفروض انه صحفى انا كنت اعده بتخيل انه هينط منة حشرات بس اهلى اعدين ساكتين محرجين منة و بس انا طلعت فيه بقى انفجرت فيه و فهمتة انه مفيش امل و جه قبل ما يمشى بيسأل اخويا هو المواصلات من عندكو هنا بكام انا اتصدمت من النتانة دى وحمدت ربنا ان اهلى مش بيضغطوا عليا

Anonymous said...

على الأقل بيتقدملك عرسان
أمال أنا أعمل ايه
ربنا يرزقنا جميعا

مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...

انا احب ارد على اللي ردت عليا وبتقول مفيش داعي لتكرار

تعليقي

عاوز ارد عليها بان الاخت غادة صاحبة المدونة المحترمة

للاسف بتحذف جميع الردود اللي بتجلها وبيكون فيها نقد ليها حتى لو الاسلوب محترم

مش عايزة اي نقد

وانا براي ان ده غلط انها تحذف تعليق لاي شخص وده من احترام الشخص لنفسه اولا

ثانيا : ليه متقبلش النقد هي يعني مش زينا بشر ولا هي ملاك

ولما ارسلت لها للاسف حذفت تعليقي نهائيا وبدون اي كلمة عذر حتى

وعشان كده كررت كل تعليق لي

عشان حتى لما تحذفه تحس بالتعب شوية وتقدر ان اللي كتب الكلام ده

بني ادم زيها وله راي

يا ريت بس تفهم هي وغيرها الكلام ده

بدل ما بيعملوا كده حتى بالجروب اللي على الفاس بوك

اي راي معارض يتم وقف عضويته مباشرة
وانا متأكد هي عرفت دلوقت انا ابقى مين بالظبط
وبامثل مين من شباب مصر العاملين بدول الخليج

وبارسل دعوة لشباب مصر تبرع ولو بجوازة
حد يتجوزها ويخلصنا منها واحنا متبرعيين بجميع تكاليف الجواز يا جماعة

بس يا رب محدش يطلع لنا تاني في المقدر

مصري بالغربة said...
This comment has been removed by a blog administrator.
Dr_MosTafa said...

بجد انتى اسلوبك تحفه يا دكتوره غاده
بجد انا بقيت مدمن البلوج ده

نورالقمر said...

قطيعه يااختشششي على الرجاله واللي يبحبوا الرجاله