Tuesday, August 22, 2006

ياللا نبتدي

سموا كده و خليكوا معايا واحدة واحدة...خلينا نتفق الأول ان موضوع الجواز و العرسان و تأخر الجواز ده موضوع حساس جدا..وصعب جدا انكوا تلاقوا حد بيتكلم فيه بصراحة..خصوصا بالنسبة للبنات....لأن اللي بتتكلم فيه بصراحة يا إما بيتبصلها على إنها قليلة الأدب و ماتربتش ..يا إما على انها مسروعة ع الجواز ..يا إما على انها بارت و مش لاقيه حد يتجوزها..عشان كده تلاقوا بنات كتير بتقول ..جواز ايه بلا نيلة ..يعني هم اللي اتجوزوا كانوا خدوا ايه...انا قاعده في بيت أبويا معززة مكرمة ,ايه اللي يخليني أروح أتبهدل مع حد ماعرفوش..أنا ما بافكرش في الجواز دلوقتي لما أبني مستقبلي ..و الجملة المستهلكة في كل الأفلام العربية .."لما أحقق ذاتي ""...مش عارفه ايه ذاتها دي و تحققها ازاي يعني


يمكن فيه بنات كتير ليهم طموح في دراستهم و في شغلهم ..لكن أتحدي ان أي واحدة فيهم مايكونش طموحها الأول انها تبقى زوجه ..على الأقل لأن دي الطريقة الوحيده اللي تخليها تبقى أم


نتفق بقه على أسس تانية مهمة ....عدد البنات في مصر أكبر من عدد الرجاله
دي نقطة أساسية مش عايزة أي حد يناقشني فيها ( البلوج ده مش ديمقراطي على فكرة) ..و سيبوكوا بقه من إحصائيات الحكومة اللي بتقولك عدد الإتنين زي بعض ..لأن دي إحصائيات عاملة بالظبط زي درجات الحرارة اللي بيعلنوها في النشرة ..يعني الناس بتحلف بالطلاق ان الحرارة أكيد فوق ال 45 ..و هما لا يمكن يزودوها عن 38..أنا ليا واحد صاحب بابا قاللي ممنوع يزيعوا ان الحرارة فوق ال42
عشان السياحة ماتنضربش و السياح مايهربوش


موضوع نسبة الإناث للذكور برده فيها لعب بالطريقة دي..ليه بقه النسبة أكبر؟ أقولكم


موضوع الستات اللي بيقعدوا يخلفوا عشان يجيبوا الولد..يعني فيه عائلات كتيرة تلاقيها كده..4 بنات وولد..5بنات وولد..6 بنات وولد ..و هكذا...و تفضل الست تخلف تخلف عشان البأف جوزها يجيله الواد..يجيبوا يعمل بيه ايه؟ ماتعرفش ..و بيجي في الآخر خايب و نايب و يقعدوا يدلعوا فيه لما يطلع فسدان و يضيعهلم اللي وراهم و اللي قدامهم و اللي جنبهم كمان...ما علينا ده موضوع تاني..بس أي حد بيدرس أو درس في أي كلية في جامعات مصر هيلاحظ ان عدد البنات في أي كلية أكبر من عدد الولاد ..في كليتي مثلا كانوا تلتين العدد بنات و التلت ولاد ..يعني الضعف


نقطة تانية ..الرجالة بقوا حاسين بنفسهم و بيتكبروا على خلق الله من البنات ( يقعدلهم في عينهم و عافيتهم يا رب ) و تلقي الراجل قاعد هو و أمه يتشرطوا ...لازم تبقى بيضا و شعرها بني و عينيها عسلي و شبه نيللي كريم ..الله يخرب بيوتكم طب بص لنفسك يا خويا في المرايه الأول ..طب بلاش بيقولوا الراجل مايعيبوش الا جيبه ..طب شبرقنا كده و ادخل في ايدك انشالله علبة ملبس ..ألا لأ البعيد هو و امه يروحوا يشوفوا العروسة الغلبانه اللي أهلها صارفين عليها الشئ الفلاني و مكلفين قعدة التعارف دي شئ و شويات ..رايحين إيد ورا و إيد قدام ..و البت مافيهاش أي عيب و يقولولكم ..لأ أصلها مش شبه نيللي كريم قوي ..دي قالبه شوية على نجلاء فتحي و انا مابحبش النوع ده ..تقولش حسين فهمي رايح يتقدم للبت


لأ و الأفراح ..نككككتة..زمان كنتوا تشوفوا في الأفلام العربي أي بنت تدخل فرح و هي لابسه شيك كده شوية ..يتلموا عليها الشبان و يبقوا عايزين ياكلوها .. و ما تخرجش م الفرح إلا بعريس..دلوقتي نفس التجمعات بس بالعكس ...تلاقي كل أم قاعده هي و بناتها مراقبين الشباب و ياويله اللي يعدي جنبهم...طارق ..إزيك يا ولد ..مش تيجي تسلم على بنات خالتك شوف بقوا حلوين إزاي؟...أنا مش طارق يا طنط و أنا متهيألي كده حضرتك مش خالتي ...صحيح؟ معلش يا حبيبي العتب ع النظر طب ما تعرفنا على نفسك كده ..يمكن ربنا يحبك و يبقالك نصيب معانا


طبعا الواد يا إما بيطلع يجري ..يا إما حد من صحابه بياخد باله م الكمين اللي وقع فيه ويجي ينقذه على أساس في حد عايزة و كده

طبعا ده غير اللف اللي بيقعدوا البنات يلفوه حوالين العروسة عشان يبقوا واضحين لكل اللي في القاعة من كل الجهات ..و لما بيقف اللف تلاقيهم يزقوا في بعض أو يعملوا انهم بيعدلوا للعروسة فستانها أو طرحتها عشان يطلعوا في الفيديو..و يحاولوا يطلعوا في أكبر عدد ممكن من الصور ..يمكن يعجبوا حد و يتكل على الله و ينتشلهم من عالم الآنسات



الكلام ده كله على فكرة مش المفروض تضحكوا عليه..و الله البنات دول غلابة ..زمان ما كانش مطلوب من أي بنت غير انها تحترم نفسها و تقعد في بيت أبوها و تستنا العدل اللي بيكون في الغالب من إختيار أهلها
دلوقتي الكورة بقت في ملعب البنات ..يعني لازم تخرج و تشتغل و تروح أفراح و تزور أصحابها لأن مسؤلية إحضار عريس بقت ملقاه على عاتقها بالكامل ..أنا أعرف حالات كتيرة أهل البنات بيتخانقوا معاهم خناقات لرب السما عشان يخرجوا و يشتغلوا يا إما عمرهم ما هيتجوزوا .. و م الجهة التانية المجتمع في حالات كتير و خصوصا خارج القاهرة و الأسكندرية مابيرحمش أي بنت تخرج مع راجل عشان تتعرف عليه و يمكن يبقى فيه نصيب ..ده غير ان الراجل نفسه في الغالب ما بيرضاش بيها و يقولك عايز واحدة خام لا خرجت و لا اتكلمت مع حد غيري


طب بذمتكوا البنات يعملوا ايه...ده غير العداد اللي بيعد من أول ماتتخرج من الجامعه ...يعني البنت تعتبر بدأت تعنس من أول ما يعدي عليها سنتين أو تلاتة متخرجه و لسه ماتخطبتش
أنا شخصيا بدأت أحس اني هاعنس من أول ما كملت 23 سنة..طب نعمل ايه


بصراحة المجتمع المنيل اللي احنا عايشين فيه و اللي بيقيمالبنت بجوازتها واللي تتجوز بسرعة تبقة شاطرة واللي تتأخر يبقى فيها عيب ..و ع الجهة التانية الراجل من حقه ينقي و يتشرط و يبقى مقطع السمكة و ديلها و يتقال عليه مفتح و مدقدق..و يبقى معدي الأربعين و من حقه يتجوز في أي وقت انشالله واحده عندها 18 سنة


المجتمع ده ظااالم و مفتري ..و البنات غلابه و الضغط عليهم بيزيد كل يوم والناس بتحاكمهم على حاجه مالهمش يد فيها


خليكوا معايا بقه ..م المرة الجايه كل بوست هاحكيلكم على بلوة م البلاوي اللي اتقدمولي ..عشان تعرفوا احنا بنستحمل أد إيه


سلام

60 comments:

Gid-Do - جدو said...

عروسة
احد اسباب المشكلك هى الامهات وبختصار شديد لما الام تروح تخطب لابنها بتكون راحة وهمها اتمام صفقة يطلع منها ابنها هو الكسبان ونفس الام لما يجى حد يخطب بنتها برضة همها صفقة تطلع منها بنتها كسبانة هذة الاذواجية فى المعاملة متوارثة من اجيال سابقة ومازالت تمارس نقطة تانية الاصرار على حفلات فى اماكن معينة وشبكة برقم معين وعفش بعدد محدد من الاوض نفس النظام الموروث وسيطرة الام وسيطرة الاب بدون تفكير عملى الناس مش عاوزة تغير فى عادات ملهاش مكان واعتبار الجواز صفقة تجارية مش مستقبل اسرة كفاية كدة وغيرى يغطى اجزاء اخرى من المشكلة

أم أحمد said...

انا عاجبني الموضوع جداً لانه بجد مشكلة كبيرة وياريت تكمليه بس تعرفي ان الرجالة اليومين دول قليلين فعلاًواللي موجودين اللي منهم مضرب ماعرفش ليه واللي مش لاقي واللي فقير ونفسه عزيزة وبيرفض ان البنت تساعده

lastknight said...

عروسه
لم أعلق على أول موضوع لك باعتباره فضفضه شخصيه .. لكن الحقيقه وصفك الدقيق و العميق للمشاعر الأجتماعيه نبهنى لمشكله فعلا خطيره بتتعرض لها البلد كلها مش البنات بس .. فعلا كلامك مهم .. و جميل .. و مؤلم ..
أعتقد الحاله الأقتصاديه سبب أساسى فى أضراب الشياي عن الزواج .. أيضا مناخ التشاؤم العام .. المستثبل أصبح غامض لكل المصريين .. و ده بيستدعى التردد فى كل قرار مستقبلى ..
عموما واضح أنك ذكيه و دمك شربات .. و بأمر الله ألف مين يتمناكى .. بس ماتنسيش تعزمينا لما ربنا يفرجها

أم أحمد said...

يابنتي الجواز مش كله حلو اوي كده يعني يارب تتجوزي وهاتبقي برضه عاوزة حد تفضفضي معاه انا اعرف واحدة عندها 31 سنة ولسة ماتجوزتش وكل ماقولها انا مش لاقية حد اكلمه تقوللي مش كفايه عليكي جوزك يارب تتجوز هي واللي زيها ويوروني وبكرة نقعد علي الحيط ونسمع الزيطة

الأميره أوسه said...

عزيزتى حواااااء
أى مشكله وليها حل
وأنا موجوده لخدمة الشعب بتاعى
و أنا هاكتب فى مشكلة الأنسه ن ن ح
وأحاول أشوف أبعاد المسأله
وبلاش قلق وتسرع
أنا عمرى متخليت عن شعبى
أدونى فرصه أفكر وأرجع بالحل
التوقيع طبيبك الخاص

Nouran said...

اولا مبروك ع البلوج الجديد هيا جاية متاخرة بس مش مشكلة
تعرفي انا كنت بحسبك صاحبة اوسا لما قريت اللي انت كاتباه اسلوبك حلو زيها بالظبط بس مش بالظبط اوي :)
اما بالنسبة للموضوع اللي انت كاتباه فانا بحس ان اهل العروسة ممكن يعقدوها شوية ومع برده ان مبقاش فيه شغل للناس الكتير اللي متخرجة فمعظم الناس بيفضلوا مقضينها صحوبية لحد ما يكونوا نفسهم وغالبا اليوميمن دول ع راي الهيرر بتاع الالماني ان العنوسة ف مصر بتبدأ من سن 34 معرفش لشمعنى بس بجد بقت مشكلة صعبة جدا يعني الواحد بيفرح جدا لما يلاقي فرح حتى لو مش حد يعرفوه بحس ان ف حد بيتجوز
تعرفي اانا بقول لماما ادعي من دلوقتي علشان عقبال ما اكبر يكون ربنا سهلهالي

Gid-Do - جدو said...

عروسة

توجهى فورا ال مدونة

باب مردود

خدى معاكى كام زغروطة

HANY said...

فكرة جيدة وصريحة واتمنى لكى التوفيق فى ما تتمنيه
وعلى فكرة موضوع الجواز مش مشكلة عند البنات بس والرجلة كمان عندهم نفس المشكلة وهى الطبيعة الغيورة للشرقيين وكلما قرأ او سمع احد الرجال ان فلانه بتعمل كذا او عرف بطريق اليقين ان فلانه محجبة او منتقبة وبتعمل كذا بيبقى هيتجنن ويقول يا رب طيب اعمل ايه والخوف يسيطر عليه ويخاف يتقدم لواحده لتطلع من اياهم

وبيبقى فى حيره نفسه يتقدم على الطرية القديمة يدخل البيت من بابه يعنى بس يقول لو دخلت مش طالع غير بيها يبقى افكر الاول كويس وتستمر عملية التفكير هذه حتى الثلاثين وهكذا
ان موضوع الجواز اصبح بالفعل مشكلة كبيرة ولابد من الحل
وعلى فكرة انتى دمك خفيف خصوصا "" يقعدلهم فى عينهم وعفيتهم يا رب ""
ولكى تحياتى اختى الكريمة

littilemo said...

والنبى انت جدعه ودمك خفيف

كلبوزة لكن سمباتيك said...

ههههههههههههه
الحمد لله اني اتجوزت من زماااان و موصلتش للافراح اللي بتحكي عنها
بس بجد بقي كلام من مجربة
انتي كده فلة
اوعي توكسي نفسك بنفسك
قال جواز قال
لا يا بنتي اشتري دماغك ما فيش احلي من العنوسة
ابقي تعالي

KazaBaza said...

بصراحه مش أي بنت تقدر تتكلم في الموضوع ده تحياتي علي شجاعتك

بس فعلا المشكله مش عند البنات بس عندنا كمان
و انا عن نفسي بدور عليها من 3 سنين و لسه مقبلتهاش و ولا عندي طلبات خاصه و لا طلبات جزره

بس المشكله فعلا في الاسره الي تسيب البنت و تحملها مسئولية توقيع عريس

بصي انا عندي لكي شوية اقتراحات مش عارف عدت عليكي ولا لا
سجلي في خدمة شريك الحياه علي اسلام اون لين
http://www.islamonline.net/Matrimonial/Arabic/Browse1.asp

الموقع محترم و بيراجع الرسايل قبل ما يبعتها
خدي بئي الحته دي سجلي كل شهر مره او كل شهرين ببروفيل جديد يعني علشان البحث بتاعهم بايظ بيطلع بيانات قديمه لكن بالطريقه دي هتفضلي علي طول في الاعضاء الجداد
و يا بخت من و فق راسين في الحلال
روحي يا شيخه ألهي تتجوزي بكره

soosa el-mafroosa said...
This comment has been removed by a blog administrator.
أُكتب بالرصاص said...

الاحصائيات سليمة ،
وفي 9 مليون ...بدون زواج في مصر

موضوع شائك ،

انا نفسي اتشوكت

بس لازم نطرح الحلول ،
لعل وعشم نجد اذان صاغية ، والمشاريع الكبيرة بتبدي بفكرة

أطرحوا

Anonymous said...

موضوع جامد بس فى الاخر مفيش حد بيتجوز غصب عنه.
جميل انك بتعرضى الحاجات القديمه دى

كلبوزة لكن سمباتيك said...

انا عندي فكرة كويسة
تعالوا شوفوها

Adel said...

عروستي وننوستي بالراحة على نفسك هاتتجوزي وروحي عند كلابيظو وانت ترتاحي بس هاتي ودنك بيني وبينك ومن غير ما نشرد لبعض احنا ما نعرفش بعض انا وانت ؟؟؟؟ وبامانة ربنا انا حاسس من اسلوبك ان انت واحدة من القريبيين جدا لقلبي هاه لقلبي ولو اكتشفت ان انت انت وما فلتيليش هافضح الدنيا وانت فاهم يا سوسو اخوك مش عبيط واحنا دافنينوا سوا وافتكر سيدك ابو حمار ..... مساء الفل شكل المزاج النهارده عاااااااااااااالي قوي اشطة

أحمــــــــدبــــــــــلال said...

أحدث خبر سمعته فى التليفيزيون
أن الحكومة قررت رفع سن الزواج من 16سنة الى 18سنة
المفروض أن ده معناه أن الشباب عندنا كلهم مابيصدقوا يوصلوا سن ال16سنة علشان يتجوزوا

ده الشاب من دول يوصل للأربعين و ده لو اعتبرناه لسه شاب و يكون بيفكر هايتجوز و لا يفقد الأمل أحسن

أحمــــــــدبــــــــــلال said...

تشرفت بمعرفة حالمة أخرى فى دنيا الاحلام

wanna b a bride said...

gid-do-جدو

فعلا الموضوع كله صفقة و مش بس صفقة دي صفقة خسرانه و كل واحد عايز يخرج منها بأقل الخساير

sahar

هاكمل انشاء الله ..بس يا رب يفرجها قبل ماتجن

lastknight

شكرا ع المتابعه .. ولو حصل اطمن انا هافضح الدنيا و اعزم مصر كلها

sahar

لا يا ستي حلو وحش ماليش دعوة ..أنا عايزة أتجوز

wanna b a bride said...

epitaph

المواضيع جاية في الطريق .. و المجتمع هو اللي عمل كده في الرجاله و مرعهم علينا...منهم لله

aoossa

مين طبيبك الخاص ده ؟؟..بس أي حد يحل المشكلة ينور و النعمة

nouran

أوسة زي العسل بس أنا أول مرة أتعرف عليها هنا في البلوج

إلحقي كسفي الدعاء و أول واحد يدق على بابك اتجوزيه ..مافيش وقت و لا فرص

hany

أختلف معاك ع الأقل الراجل من حقه ينقي و يتشرط لكن البنت بتقعد مستنيا اللي هايطب على دماغها و مالهاش خيار كبير ..يعني لازم تتجوز حد من اللي هيتقدم لها حتي لو مش عاجبنها كلهم

أنا كويسه و الله و اخلاقي حلوة ..ماتشوفلي حد من صحابك

سوسة المفروسة

الله يخليكي بس العسل ده كان عملنا ايه يعني..يا رب افرجها من عندك

wanna b a bride said...

littilemo

و النبي انت عسل..بس ايه الفكرة في الصورة دي يعني؟

كلبوزة لكن سمباتيك

يعني لازم تغيظيني ..اللي أعطاكي يعطينا

kazabaza

ربنا يخليك يا رب طب أنا هاعمل اللي انت قلت عليه ..و مش لازم بكره انشالله الشهر الجاي

أكتب بالرصاص

معلش مش قصدي أشوكك بس أهه يمكن تحسوا بينا

wa3d el3yoon

مش فاهمه قديمه إزاي ..يا بني ده واقع و انا عايشاه

المزاجانجي

عروستي؟؟

أحمد بلال

الشرف لينا..قال صحيح يعني سن العنوسة كمان هيترفع والا الجواز بس؟

hebaz said...

و ما أكثر البلاوى فى زماننا ده
أصلا أنا مرة فكرت أدون البلاوى و الحكايات العجيبة ألى بسمعها أو حتى بتحصل معايا أو مع صحباتى البنات
حكايات عجيبة و على رأيك الزمن حالة أتقلب بأت البنات هيا ألى بتجرى ورا الولاد و الولاد بتعزز و تتشرط
عارفة بجد أنا سعيدة أوى بالمدونة بتاعتك أنتى قلتى و عبرتى عن كل الى جوايه بصراحة و دى حاجة أنا أحترمها فيكى أنك مخفتيش و ٌلتى لأ عيب مينفعش أتناقش فى موضوع الزواج و تعلنى أنك بجد عايزة تتجوزى بأة ولاهى أنتى جدعة و برفعلك القبعة لأن البنت من حقها تتكلم و تعبر عن كل الى جواها !
و أخيرا الهم أرزق البنات و الشباب بالأزواج و الزوجات الصالحين

Anonymous said...

هم يضحك و هم يبكي

بس انت ضحكتينا على هم كل البنات دلوقتي
بجد دمك خفيف قوي
هتابعك

Ayyam said...

عروسه
والله كلامك معقول. بس المشكله مش فى نسبه السيدات الى الرجال. المشكله ازاى يبقى فيه وسط أجتماعى يتم فيه التعارف بدون النيه المسبقه فى الزواج. فيه أماكن ممكن تخلقى فيها فرص للتعارف غير حضور الأفراح مثلاً زى المكتبات أو الرحلات مع زملاء العمل, أو أى طريقه أجتماعيه مسموح بها من قبل الأهل ومجتمع الكلاكيع. وياستى الرجاله والله مخلوقات سهله وضعيفه جداً أمام سحر النساء وأنت لك ذكاءك. أنا شايف انك حقيقى عسل بكلامك وروحك المرحه ده كده 80 فى المائه من الجمال. المهم أنتى متسكتيش وتحاولى دايما لغايه متلاقى الشخص اللى تحبيه أويرتاح له قلبك
مع أطيب أمنتاتى بأنك تلاقى حبيب العمر وتعيشى فى أطيب حال أنتى و كل البنات العسل اللى زيك

مفلس افندى الرايق said...

c.v
الاسم عربى منه فيه
السن ضاع منى ومش لافيه
المهنه طبيب قلوب وقلبى محتاج حد يسكن فيه

الصحبفه الجنائيه\ 70 جنايه بتهمة خطف القلوب مع ان قلبى ضايع منى وبدور عليه

اتقدم بهذا السى فى وفى انتظار تحديد موعد للانترفيوا

حد معاه ربع جنيه سلف
اجيب بيه عقل تانى
بدل عقلى اللى من الركنه تلـف

BaTresYa said...

اقوللكـ على حاجه والله الجواز مش كل شئ واحنا البنات اللي لازم نقول للمجتمع دا كدا صدقيني الرجاله مش كلهم حلوين او كلهم وحشين بس بجد لو كل واحده عايزة تتجوز علشان مش تعنس هتلاقي نسبة الطلاق اكتر من نسبة العنوسة وأنا مش ناوية اتجوز على فكرهـ :-)

She said...

والله انتي عسل انا احب البنات اللي عارفين هدفهم ايه في الحياه

wanna b a bride said...

hebazzz

وليه ماسكة نفسك و مابتكتبيش عن البلاوي دي كلها ..اكتبي اكتبي و الله مافي أحلى م الفضفضة

bosbos

تعالي على طول إضحكي معايا مش عليا و انا مستنياكي

ayyam

عندك حق ..بس للأسف أنا في مجتمع مافيهوش حته حد يشوف حد فيها و جواز الصالونات هو الطاغي ...ربنا يستر

wanna b a bride said...

مفلس أفندي الرايق

و الله فعلا رايق ..ضحكتني

بحب مصر

مبروك .زهاروح أشوفها

batresya

طب و النبي مادام مش ناوية اللي يجيلك ابعتيه على هنا

shaimaa

و الله هو هدفي من زمان ..إدعيلي يتحقق

Adel said...

عروستي العزيزة انا شاكك فيك انك واحدة صديقة عزيزة تعملي بمجال الادوية ودي اول امارة وكمان حبة حبة هاقول انت مين ابقى قولي لي فالتليفون يا سو سو انت عارفاني مجانينو وياياااااااااااارب تتجوزي واخلص منك ولو انت مش انت برضه يارب تتجوزي

Polka Dotted said...

bala waksa
rabena yostor 3alina ya o7'tchee..
el manazer eli benshofha fazi3a...

Mai Kamel said...

اسلوبك مسخرة.. بجد فظيع

SOLITUDE® said...

ازيك يا عروسة
كلامك جميل وطريقتك لذيذة

بما انك مانعة التعليق إلا لأصحاب المدونات...ففي صديقة شافت الموضوع وكان نفسها تكتب تعليق بس معرفتش فقالت لي ينوبك ثواب ادخل اكتبه بدالي هههههههه

وادي تعليقها

"على فكرة انتي عسولة اوي و كلامك صح مية المية
فعلا الرجالة انطسوا في نظرهم و المشكلة ان كل واحد يقول انا لايمكن اااااااابدا اني اتجوز واحده صاحبتها قبل ما نتجوز او عرفت واحد قبلي
طب ما هو لو كل واحد قال كده مفيش حد هيتجوز لان بالبديهة كده لما كل واحد هيقول مش هتحوز واحده عرفت حد قبلي و هو مصاحب عد شعر راسه يبقى ايه ؟ و دي تيجي برضه يا راجل ؟؟؟
الله يرحمك يا هاني يا سلامة لما قلتها حكمة في فيلم ويجا"

wanna b a bride said...

المزاجانجي

و النبي و حيات غلاوتك عندي ...مش أنا
---------
batabeet

يا رب يا أوختشي يا رب
---------
mai

الله يكرمك ..أخجلتم تواضعنا (هي مسخرة دي شتيمة؟)
----------
مداح القمر

لااااا أنا كده اطمنت ع الرساله بتاعتك خااالص
-----------
محمد محرز

طب ما قلتليش اسمها ..و الله انا ماعرف اني قافله الأنونيموس ..عشان خاطرك بس هافتحه ..أهلا بيكي يا حبيبتي ..ربنا يستر على ولايانا

Anonymous said...

بصي بقى, انا ماكرهش فحياتي اد جواز الصالونات, مع انو بينفع كتيير و مع ان البنت ممكن تكون مضطره, بس انا مقبلش ابدا ييجي واحد هو و امه يتفرجوا عليا و يعجب يا معجبش, ماهم بسالامتهم مش بينأوا عربيه, و بعدين اللي ييجي يتأدم لازم يبقى عارق اللي هيتأدملها كويس لان طبعا كلنا عارفين التمثيل اللي بيحصل ففترة الخطوبه. عموما الجواز ده عامل زي البطيخة متعرفش اذا كانت حلوه و للا قرعة غير لما تفتحها................
داليا

wanna b a bride said...

داليا

واضح انك لسه صغنتوتة يا قمر..لما تكبري شوية هتعرفي ان المضطر يركب الصعب

Anonymous said...

الموضوع فعلا مهم و حساس جدا.
بس لازم نحسب و نفكر و نشوف السبب ورا كده.
في اللأول الثقافة. بقى بذمتك إنت أو أي واحدة ترضى بسهولة تتجوز أي عيل (و أنا بقول عيل) من بتوع اليومين دول ولا واحد من بعتوا تعليقاتهم و يستهزئوا من المشكلة إللي ممكن أي واحدة من قرايب سعاده تواجهها. بس على العموم واضح إنهم مابقاش عندهم دم أو نخوة أو هدف أو إهتمام حتى بحرمتهم. يللا أهو بردا يستاهلوا إللي بيحصل لإخواتهم لما يتعاكسوا في الشارع أو ينحرفوا. أيوة ينحرفوا, هو البنات ماعندهمش شهوة و إحساس بردو؟ لإن المسألة مش تربية و بس, لكن طبيعة ربنا خلقها فينا يوم ما خلقنا, عاوزين دليل؟ ليه ربنا في سورة النور قال "الزانية و الزاني...." و مبدأش ب"الزاني" قبل الزانية؟ لكن في الكلام عن السرقة قال "السارق و السارقة..." كلامي وضح شوية؟ مش باتهم البنات بالإنحراف, لكن.... بردو عندهم شهوة قوية.....
والراجل إللي بقى بيختار ده بردو, فين الدين إللي بيدور عليه؟ و هو طبعا متدين بس بردو السمكة لازم تتقطع هي و ديلها......
و طبعا البنات بقى أنيل و أدل, تحب دايما واحد مجرب
(أي عدى بتجارب كتيرة) مش جربان مع إن الإتنين مابقوش يفرقوا الأيام ديه.... ولا دين ولا أي حاجة... والدين بقى إللي بيطلع في الصيف بس, أي "دين برشومي أو شوكي" (التعليق ده مقتبس من الشيخ وجدي غنيم)....
و البنات بقوا بيتفننوا في إنهم يظهرا الدين بردو و البذات في مارينا في الصيف... مش بنقول الدين بيطلع في الصيف بس؟
و الجميلات, إللي فاكرين إنهم هيتجوزا سيد سيدهم, ماهو خلاص لو الموضوع بقى جمال و بس, ففي جميلات في شرم الشيخ, إستيراد و إستعمال الخارج, لكن ماهو كله بدون أخلاق و عقل حيبقى مستعمل, و (second hand, third hand, .... tenth hand) واهو ربنا يديهم على أد نيتهم, بس بردو إستعمال الخارج ما زال أرخص و أذل مصاعب (يعني من تذليل المصاعب) لكن مع العربية أغلى و أذل سبيلا و اهو أحسن من إذلال النفس..... مش كده؟
وبقى البنات عاوزين اللي يقدرهم.... بالمال طبعا.. وهو مال أهله؟ أيوا... أو يمكن أبوه قدرها , كانو داخلين فيها شركة, واحد بالفلوس, و التاني بالمجهود..... ,أما بنعمت رببك فحدث... و طبعا الواد كده بقى لازم يبقى رياضي و على قد المجهود... بس تيجي تشوفه تلاقى إيده من العطلة أنعم من إيد اللي حيتجوزها....

سلام دلوقتي, و أنا مستني التهزيئ و التعليقات......

Anonymous said...

انا موش عارف اقولك ايه غير انك فنانه بجد بجد فنانه وانا اعجبت بيكى جدا جدا جدا جدا وباتابعك وهاتابعك واما نشوف اخرتها فى البلد دى هاتودينا لحد فين وعموما انا هادورلك على عريس وربنا يكرمك كده بعريس .

Jasmine said...

I am so impressed !! I suffer every single second, every single day because of the Marriage problem. As if it's a sharr labodd menno..!

Anonymous said...

بعد السلام .... والله انت دمك شربات وانا مش حلاقي احلى ولا اجمل من كدة عرووووس .... ألا بصحيح انت بتشبهي الصورة اللي جنب اسمك ... عن جد والله انا زي ما بيقولووو عريس قطة .. اسف قصدي لقطة وجاهز من مجاميعه .. الشغل والشقة والعربية كمان .. فإذا لسه عاوزة تتجوزي ابعثيلي عنوانكم وانا اجيكم من بكرة .. وده اخر كلام

Anonymous said...

العنوسه موجوده فى كل الدول العربية والخليجية تحديدا تعانى منها والحل يكمن فى الحث والتشجيع من الدوله وتوعية الناس بانه لاحل الا بتعدد الزواج وهناك اكثر من فتوى لرجال دين ومشايخ بأن الزواج من العانسات زكاة وصدقة واجر وثواب بس وين الرجال المتزوجون لكى يتزوجوا الثانية والثالثة والرابعة للقضاء على مشكلة العنوسة ،، الظاهر انهم خوافون من حريمهم نسوانهم وكل واحد يكتفى بوحده المفترض الزوج

الاولى تشجع زوجها للارتباط بثانية

وثالثة ورابعة حلا ,,, واجرا

zawaj2@yahoo.com

Anonymous said...

باحييك يا bride ..جدو أنا معاك في كل كلمة قلتها ..ومؤمنة بكلام أنيس منصور ان المرأة في الأول لا تطلب الا رجل وبعد أن يأتي الرجل تطلب كل شئ ..وكمان بانصح كل بنت ما تعرضش نفسها أبدا لتجربة الصالونات ولو كانت ملكة جمال الكون ..هي تجربة سخيفة ولا أرى مررا للزواج الا الوقوع في الحب heba

Anonymous said...

osloobik zareef giddan w dammik khafeef giddan giddan.. isma7ili ahanniki 3ala il blog dah

Anonymous said...

لله علييييييييك ياعروسة
تصدقى انك عسل وجريئة
انا سودانى مقيم فى الكويت ومستعد اعرسك شرط تشبهي نيللى كريم واوعك تقولى انى اسمر ولا اسود حتى الراجل مايعيبهوش غير جيبه وانا جيبى ملاااااااان
بجد الله يخليك انت تصنعى الابتسامة والله
اتمنى لك التوفيق
وعريس يشبه توفيق الدقن
الله يرحمه حي او ميت ههههههههههههههههههههه

Anonymous said...

سلام عليكم
ممممممممم مش عارف اقول ايه كالعاده
بصو يا جماعه, انا تنيلت خطبت مرتين
ضيعت سنه و نص من عمر في خطوبتين و بعدين فجأه لقيت نفسي عند نفس النقطه اللي كنت عندها قبل السنه و نص دول.
الاولانيه :
جميله . متعلمه
بس المشكله ابوها كيس جوافه و امها راجل بس لابس طرحه, كانت امها مصممه ان بنتها تبقى زيها و انها تخليني زي ابوها.
( شهور بتنيل احاول اصلح لغايت ماجاتلي البواسير و في الاخر سبتها و انا تعبان.
التانيه :
قلت اصلح اغلاط الاولانيه
مش جميله { فرضت انها مش مغروره و اهلها مش واخدين في بنتهم مقلب }
امها الله يرحمها
ابوها دكتور جامعه و حافظ القرآن كله
انا كنت عايزها علشان عرفت ان ابوها حافظ القرآن, قلت هوا في كام واحد حافظ القرآن دلوقتي.
المهم خطوبه و فتره كويسه مش بطاله مشاكل كتير كنت بشوفها مع الاولانيه معدتش بشوفهاز
بعدين بدأت الامور تبان
مظهريين جدا
لازم شقه كبيره مع العلم ان عندي شقه ملك و في حدايق الهرم
و عفش ببتاع متين الف عفريت على اللي جابوهم
و حاجات من كدا
سبتهم لما بدأت احس ان البنت بدأت تتنطط و حاسه انها اكبر مني
مع العلم, اهلي معاهم فلوس اد اهلها عشر مرات.
بس انا اللي رافض المبدأ ده

الخلاصه :
ممكن الام تكون السبب
ممكن الاب
ممكن البنت
ممكن الولد
ممكن عم عبد تلحلاق
كله جايز
ده قسمه و نصيب

ملاحظه : في واحده عايزه تتجوز في شقه سبعين متر في حدايق الهرم ؟

man_in_paradise@hotmail.com

Eric Matt said...


يللا يا بنات في واحد عنده شقة 70 متر في حدايق الهرم؟

يللا يا برايد عريس لقطة أهو

وفي طبعا ما شاء الله بنات زي القمر أهوم و لا العريس بتاع الكويت ما شاء الله يا سيدي

يا برايد مالكيش حق تسيبي العملية ببلاش كده خدي من كل واحد فيهم نص دولار أمريكي أخضر عشان العملة الصعبة دلوقتي زي الدهب

يمكن ربنا يكرمك بغلة تمام

شوفيلي عروسة في البرتيتة دي يا برايد

سلاااااام

Anonymous said...

المجتمع بتاعنا رقص علي السلم ولا متفتح زي اوروبا ولا متدين يعني مجتمع ساذج والله
انا روحت مره اتقدم لبنت مقبولة الشكل وذات دين و محترمه و بنت ناس كويسين
اخد امي و خالي و خالتي وروحنا ومش عايز اقولك اللي حصل
ايه دا دي شكله مش حلوه ومش بتعرف تلبس وبيتهم مش نطيف ومش عارف ايه راح فين
وحاولت اقنع لكن امي تعبت وحصل مشاكل فصرفت نظر وانا تعبان بس امي مالهاش غيري
ماما زي اغلبيه الامهات في مصر ودي المشكله بيبصوا للظاهر لكن كاكلام تسمعي احلي كلام
انا كان نفسي اكتب القصه في البلوج بتاعي بس مش ينفع علشان البنت
احنا بجد لازم نتعلم الدين الاول علشان ينصلح حالنا
الدين من صلي و صوم بس

Shreif fahmy said...

http://sfahmy78.blogspot.com/2007/04/9.html
منتظر تعقيبك على البوست ده ومين عارف ممكن يعجبك وتشوفيه مناسب للنشر في مدونتك

anyone said...

دم حضرتك زي العسل ما شاء الله .....بجد مش بقدر امسك نفسي من الضحك طول ما انا بقرأ....ازاي حضرتك قدرة تتكلمي عن الموضوع الهم ده ....بكل خفة الدم دي ...انا كنت فكرة ان الموضوع ده مرتبط بالحزن والدموع بس.....فعلا وضع مؤلم ومحزن .....ربنا يرحمنا بجد ربنا يرحمنا ......شككككككككرا اوي ليكي

CHICO said...

ماعندكيش عروسة طيب ليا؟

RED_HEART said...

كلام فارغ طيب ازاى البنات عاوزه تتجوز و عاوزين طلبات كبيره يكون الشاب لسه متخرج يا حراااااام و اهلها عاوزين منه شقه و متجهزه و مرتبه يكون كبير مش اى مرتب الله يرحم دخله ابوها و امها و الحسيره اللى لسه موجوده تشهد هليهم لحد النهارده يابنتى تصعييب الزواج هووا اللى عمل كده فى البنات و يعنى الشباب مش مميزين اوى عنكوا الاف الشباب مش لاقين جواز والبنات قماره عالفاضى تقولش البنت واخدها استنفع منها هاتبيضلى كل يوم بيضه ذهب و انزل ابيعها ولا بتعرفوا تعملوا حاجه لاطبيخ ولا تربيه ولا حاجه مش انتى انتى طيبه سلام

Anonymous said...

مش لاقي كلام أقوله غير بجد
روووووووووعة
لو كل بنات صيدلة بالعقلية دي وخفة الدم دي بجد يبقى أنا نفسي أناسب من صيدلة
لا بجد أسلوب جميل ومبرووووووك على الكتاب والبلوج الرائعة دي

Stella De Mare said...

انا عندى رأى تانى انا شايفة ان المشكلة مشكلة ثقة لا الرجالة بتثق فى البنات ولا العكس يعنى ليه اسلان الواحده تستنى جواز الصالونات ماهى ممكن تعرف حد فى النور على الاقل تحس بالثقة اللى عمرها ما بتيجى من زيارة عريس و مامتة و عمتة و الولد كمان يعنى ايه يلف و يصاحب 100 واحده و يجى يتجوز عروسة ماما تنقيها و هى ماما دى يعنى عارفة الغيب ضامنة يعنى ان البنت مش وحشة و بعدين الرجالة بتمثل لان الكويسة بتبان و الوحشه بتبان هو الموضوع ناقصه حبة ثقة و حبة تقل من البنات و اهاليهم

Anonymous said...

انا بقي نفسي اعمل مدونه اسمها انا راجل متجوز عشان البنات تعرف بيعملوا ايه في الرجاله بعد الجواز يا أخي البنت من دول تبقي حتموت علي الراجل و تتجوزه و تو ما اتجوزته و اسم الله علي مقامك حملت و خلفت انسي ابقي قابلني في البطيخ

ابن مأذون said...

اولا بحيكى على ان فى بنت تقدر تتكلم بصراحة وتناقش موضوع مهم زى كدة بس خلينا نتفق على شى مهم فى الاول
اننا نكون عندنا صراحة وصدق
وعلشان نكون صرحا لازم نواجة نفسنا واهل البنت والولد بالمشاكل ال بتخلى موضوع الجواز يكون صعب جدا
انا هوريكى صورة بسيطة من مواقف الجواز وفشلها بصورة حقيقية وانتى تحكمى على الموضوع يوميات ابن ماذون
مع خالص شكرى
ابن ماذون

Anonymous said...

يا جماعة ارحمونا احنا الشباب المصريين

بدول الخليج

والله بنتعاير لما حد منهم يقرا لوحدة زي ديه

انا باشييد واوجه كلامي ده للمصريين الرجالة في مصر

تبرعوا لكرامة المصريين بالخارج

حد يتبرع ويتجوزها ويخلصنا يا جماعة الخير

ارجوكم

واحنا ممكن كمان نجمع من بعض ونجيب لكم الشقة والعفش وكل حاجة كمان

بس خلصونا وحد يلمها ويتجوزها

شوفي انا عارف انك بتحذفي راي ده

بس ميهمنيش انك مبتحبيش النقد

او الراي الاخر ومش بتحترمي ان حد يقول رايه فيكي

زي ما انت بتقولي على الرجالة اللي بيتقدمولك عاهات

ده انت واللي زيك اللي عاهات لينا

وهو ايه اللي جاب مصر ورى غير المراة وحقوق المراة

دلوقت كمان المراة بتطالب انها تتجوز وتطلب ايد الرجالة كمان

مصري بالغربة said...

انا احب ارد على اللي ردت عليا وبتقول مفيش داعي لتكرار

تعليقي

عاوز ارد عليها بان الاخت غادة صاحبة المدونة المحترمة

للاسف بتحذف جميع الردود اللي بتجلها وبيكون فيها نقد ليها حتى لو الاسلوب محترم

مش عايزة اي نقد

وانا براي ان ده غلط انها تحذف تعليق لاي شخص وده من احترام الشخص لنفسه اولا

ثانيا : ليه متقبلش النقد هي يعني مش زينا بشر ولا هي ملاك

ولما ارسلت لها للاسف حذفت تعليقي نهائيا وبدون اي كلمة عذر حتى

وعشان كده كررت كل تعليق لي

عشان حتى لما تحذفه تحس بالتعب شوية وتقدر ان اللي كتب الكلام ده

بني ادم زيها وله راي

يا ريت بس تفهم هي وغيرها الكلام ده

بدل ما بيعملوا كده حتى بالجروب اللي على الفاس بوك

اي راي معارض يتم وقف عضويته مباشرة
وانا متأكد هي عرفت دلوقت انا ابقى مين بالظبط
وبامثل مين من شباب مصر العاملين بدول الخليج

وبارسل دعوة لشباب مصر تبرع ولو بجوازة
حد يتجوزها ويخلصنا منها واحنا متبرعيين بجميع تكاليف الجواز يا جماعة

بس يا رب محدش يطلع لنا تاني في المقدر

Anonymous said...

زى العسل على فكره كملى بقى

7oby said...

ازيكم يا شباب
كان نفسى افضفض من زمااااااااااااااااان

Anonymous said...

توني مكتشفة هالبلوج.... روعو وواقعي جدا ً